བཏགས་གྲོལ་མཐོང་ཆོག་འཁོར་ལོའི་ལོ་རྒྱུས་ཕན་ཡོན།
བཏགས་གྲོལ་མཐོང་ཆོག་འཁོར་ལོའི་ལོ་རྒྱུས་ཕན་ཡོན་བཞུགས། སྤྲུལ་པའི་སྐུ་གང་ནས་ཐུགས་རེས་རྒྱུར། དེ་ཕྱོགས་ཡུལ་སྡེ་སྤྱི་ལ་ཐར་པའི་ལམ་བཟང་སྟོན་པའི་ཐབས་ཟབ་མོ་དམ་པ་རིགས་བརྒྱ་འདུས་པའི་བཏགས་གྲོལ་ཙཀྲ་འདི་ཉིད་ལ་དགོས་བྱའི་རྫས་ཚང་ཞིང་། མན་ངག་ཐམས་ཅད་གཞུང་མཐུན་དུ་བསྟར་བའི་སྒྲུབ་པ་རབ་གནས་སོགས་ཚད་ལྡན་གང་འབྲེལ་དོན་ལྡན་དུ་བགྱིས་ཡོད་པར། གྲོང་ཚན་མིག་མཐོང་རེར་ཆོས་མཐུན་
ཡ་རབས་ཀྱི་སྦྱིན་བདག་རེའི་ཁང་ཐོག་ཏུ་ཟངས་སམ་རྫའི་གའུར་བཅུག་ཏེ་ཆར་ཆུས་མི་གོས་པར་ལྷ་ཐོ་ལྟ་བུར་བཅོས་པའི་ནང་དུ་བཞུགས་སུ་གསོལ། བཞག་མཁན་ཀྱང་བླ་མ་སྤྲུལ་སྐུ་འམ། དགེ་སློང་སྡོམ་ལྡན་རེའི་ཕྱག་བསྟར་ལས་མི་མང་ལག་བརྒྱུད་མི་རུང་། ཟླ་བ་གང་རུང་གི་ཚེས་བརྒྱད་ལ་བསང་དང་། རི་ཁྱིམ་ལ་ཁྲུས། ཕྱོགས་དེར་འཁོད་པའི་སྐྱེ་བོ་རྣམས་ཀྱིས་དགེ་ཆོས་གང་ནུས་དང་། ལྷག་པར་སྲོག་བསླུ་གང་འགྲུབ་རེ་ཁས་ལེན་བྱེད་དགོས་པའི་དྲིལ་བསྒྲགས། ལས་འབྲས་ཀྱི་ཆོས་ཀྱང་སྟོན་ནས་དགེ་ལ་སྦྱོར་བ་སོགས་རྣམ་པར་དཀར་བའི་བསམ་སྦྱོར་དང་ལྡན་པའི་འཁོར་ལོ་བསྟན་པའི་རྒྱལ་མཚན་འདི་ཉིད་ཀྱི་ཕན་ཡོན་ཞིབ་རྒྱས་སྨོས་སུ་མི་ལངས་ཀྱང་། ཨོ་རྒྱན་སངས་རྒྱས་གཉིས་པས་བཏགས་གྲོལ་རྒྱུད་ཀྱི་ལས་མཐའ་ནས་འདི་ལྟར་གསུངས་ཏེ། གྲོང་ཁྱེར་གཅིག་ལ་འདི་ཡོད་ན༔ ༔གྲོང་ཁྱེར་ནང་གི་སེམས་ཅན་རྣམས༔ ༔གྲོལ་བ་ཐོབ་པར་ཐེ་ཚོམ་མེད༔༔ རྟེན་མཆོག་རླུང་ཕོག་དེས་གཞན་ཕོག༔ ༔སྡིག་སྒྲིབ་དག་ནས་གྲོལ་བར་འགྱུར༔ ཞེས་གསུངས་པའི་ལོ་རྒྱུས་དང་བ་འདྲེན་ཕྱིར་འཆད་ནས། སེམས་ཅན་ལ་སྨན་པའི་སེམས་བསྐྱེད་གོ་ཆ་གཡེལ་མེད་ཀྱི་འགན་བཞེས་སྨོན་བཟང་ཅི་ནས་འཚལ། དཔལ་སྤུངས་ཡང་དབེན་ནས་ཏཱའི་སི་ཏུས་སྤེལ། །