གྲོང་ཁྱེར་སྒྲོལ་འཁོར་ཆེན་མོའི་ཕན་ཡོན་ལོ་རྒྱུས།
གྲོང་ཁྱེར་སྒྲོལ་འཁོར་ཆེན་མོའི་ཕན་ཡོན་ལོ་རྒྱུས་ཡོད། འགྲོ་ཕན་གྱི་ཆ་རྐྱེན་གྲོང་ཁྱེར་སྒྲོལ་བའི་འཁོར་ལོ་འདི། སྔོན་ཇོ་བོ་རྗེ་དཔལ་མར་མེ་མཛད་ཀྱིས་མདོ་ཕྱོགས་མན་ངག་ཐམས་ཅད་ཀྱི་ཉིང་ཁུ་ཙཀྲའི་ཚུལ་དུ་མཛད་པ་སྐུར་བཅངས་འབྲལ་མེད་གནང་ནས། ཕྱིས་སྐུ་གཤེགས་ཁར་འབྲོམ་རྒྱལ་བའི་འབྱུང་གནས་ལ་བསྩལ་ཏེ། འདི་ལས་ཟབ་པའི་གདམས་ངག་བོད་ན་མེད་པས་ཁྱོད་ཀྱིས་འགྲོ་དོན་གྱིས་ཤིག་ཅེས་གསུངས་པར་བརྟེན། དེ་ནས་རིམ་པར་ད་ལྟའི་བར་བརྒྱུད་པ་མ་ཆད་ཅིང་། ཕྱག་བཞེས་ཀྱི་རྒྱུན་མ་ནོར་བ་དང་། དགོས་བྱའི་རྫས་ཚང་ལ། འཕགས་མཆོག་ཐུགས་རྗེ་ཆེན་པོའི་སྒོ་ནས་སྒྲུབ་པ་ཐེམས་ཤིང་། རབ་ཏུ་གནས་པ་ཁོ་བོས་བགྱིས་པ་ཡིན་པས། སྤྱིར་ཕན་ཡོན་དཔག་ཏུ་མེད་ཀྱང་། མདོར་བ སྡུ་ན། རྟེན་མཆོག་འདི་ཉིད་ཟངས་སམ། རིན་པོ་ཆེའི་གའུར་དར་ཚོན་གྱིས་བསྒྲིལ་ཏེ་བཅུག །ཆར་ཆུས་མི་གོས་པར་བྱས་ཏེ། བུད་མེད་དང་། མི་མང་ལག་བརྒྱུད་འཛེམ། གཟའ་སྐར་འཕྲོད་སྦྱོར་ལེགས་པར་བརྩི་བའི་ཡར་ཚེས་ལ་དགེ་སློང་སྡོམ་ལྡན་བཞི་སྡེས་ལྷ་བསང་བཏང་། རྡོ་རྗེ་རྣམ་འཇོམས་སྒོ་ནས་རི་ཁྲུས་དང་། ཁྱིམ་ཁྲུས་བྱ། བཀྲ་ཤིས་བརྩེགས་མདོ་བཀླག
སེམས་ཅན་སྲོག་བསླུ་ཚེ་ཐར་གང་མང་ཞིག་བྱས་ཏེ་ཁང་སྟེང་རྒྱལ་མཚན་གྱི་རྩེར་བཞུགས་སུ་གསོལ་ཏེ་རབ་གནས་དང་། བཀྲ་ཤིས་བརྗོད། སེམས་ཅན་ཐམས་ཅད་བདེ་སྐྱིད་འབྱུང་བའི་དོན་དུ་སྙིང་ཐག་པ་ནས་བསྔོ་བ་དང་། སྨོན་ལམ་བཟང་པོའི་མཚམས་སྦྱོར་བྱས་ན། ཡུལ་དེར་གནས་པའི་གཞི་བདག་རྣམས་ཀྱི་མཆོད་རྟེན་དུ་འགྱུར་བས། གནས་སྐབས་ལྷ་སྲུང་ངོ་སོ་མཐོ་ཞིང་དགྱེས་པ་བསྐངས་པས་ལོ་ལེགས་ཞིང་། ཆར་ཆུ་དུས་སུ་འབེབས། ནད་ཡམས་དང་དུས་འཁྲུགས་ཞི། ལོ་ཟླའི་སྐག་རིགས་ལས་གྲོལ་བ་དང་། མཐར་ཐུག་རྟེན་དེ་མཐོང་དང་རླུང་རྫིས་ཕོག་པའི་གཟུགས་ཅན་གཟུགས་མེད་སེམས་ཅན་ཐམས་ཅད་ངན་སོང་གསུམ་གྱི་སྡུག་བསྔལ་ལས་གྲོལ་ཏེ་མངོན་མཐོའི་ལམ་བཟང་རྙེད། རིམ་པར་ངེས་ལེགས་ཀྱི་གོ་འཕང་ལ་གཞོལ་ནུས་པ་སྟོན་པ་སངས་རྒྱས་ཀྱི་བཀའ་ཡིས་ནམ་ཡང་མི་བསླུ་བས་མོས་གུས་ཀྱི་རྟེན་དུ་གཅེས་སྤྲས་སུ་འཛིན་འཚལ། ཞེས་སི་ཏུ་པས་ཆོས་སྦྱིན་དུ་སྤེལ་བ་དགེ། །