འཁོར་ལོ་ལུས་ལ་འཆང་བའི་ཕན་ཡོན་དང་ལོ་རྒྱུས།
འཁོར་ལོ་ལུས་ལ་འཆང་བའི་ཕན་ཡོན་དང་ལོ་རྒྱུས་ཡོད། འགྲོ་ཕན་གྱི་ཆ་རྐྱེན་གྲོང་ཁྱེར་སྒྲོལ་བའི་འཁོར་ལོ་འདི། སྔོན་ཇོ་བོ་རྗེ་དཔལ་མར་མེ་མཛད་ཀྱིས་མདོ་ཕྱོགས་མན་ངག་ཐམས་ཅད་ཀྱི་སྙིང་ཁུ་ཙཀྲའི་ཚུལ་དུ་མཛད་ནས་
འབྲལ་མེད་སྐུར་བཅང་གནང་། ཕྱིས་སྐུ་གཤེགས་ཁར་འབྲོམ་རྒྱལ་བའི་འབྱུང་གནས་ལ་བསྩལ་ཏེ། །འདི་ལས་ཟབ་པའི་གདམས་ངག་བོད་དུ་མེད་པས་ཁྱོད་ཀྱིས་འགྲོ་དོན་གྱིས་ཤིག་གསུངས་པར་བརྟེན། དེ་ནས་རིམ་བཞིན་ད་ལྟའི་བར་བརྒྱུད་པ་མ་ཆད་ཅིང་། ཕྱག་བཞེས་ཀྱི་རྒྱུན་མ་ནོར་བ་དང་། དགོས་བྱའི་རྫས་ཚང་ལ་འཕགས་མཆོག་ཐུགས་རྗེ་ཆེན་པོའི་སྒོ་ནས་སྒྲུབ་པ་ཐེམས་ཤིང་། རབ་ཏུ་ུགནས་པ་ཁོ་བོས་བགྱིས་པ་ཡིན་པས་འདི་ཉིད་དར་ཚོན་གྱིས་བསྒྲིལ་ཏེ། མི་ཉམས་པའི་ཕྱིར་བུ་ཧར་གྱིས་གཡོགས། བུད་མེད་དང་མི་མང་ལག་བརྒྱུད་འཛེམ། ཞག་བདུན་ཤ་ཆང་སྤངས་ཞིང་། གཟའ་སྐར་འཕྲོད་སྦྱོར་དགེ་བར་རྡོ་རྗེ་རྣམ་འཇོམས་ཀྱི་ཁྲུས་ཞུ་ཞིང་། སེམས་ཅན་གྱི་སྲོག་བསླུ་ཚེ་ཐར་ངེས་ཤིག་བྱས་ཏེ་དགེ་པའི་འདུན་པ་བཟང་པོའི་མཚམས་སྦྱོར་དང་བཅས་རང་གཞན་གྱི་མགུལ་དུ་འཆང་ན། སྤྱིར་ཕན་ཡོན་དཔག་ཏུ་མེད་ཀྱང་། མདོར་བསྡུ་ན། གནས་སྐབས་སུ་ལོ་ཟླའི་སྐག་རིགས་ལས་གྲོལ་ཞིང་། མི་མཐུན་པའི་ཕྱོགས་ཀུན་ཐུབ་པ་དང་། མཐར་ཐུག་ངན་སོང་གསུམ་གྱི་སྐྱེ་སྒོ་ཆོད་ཅིང་། རིམ་པར་མངོན་མཐོ་དང་། ངེས་ལེགས་ཀྱི་སར་འཇོག་ཅིང་། འཆང་བ་པོ་དེ་མཐོང་བ་དང་། ཡོད་པའི་ཕྱོགས་ཀྱི་སེམས་ཅན་ཐམས་ཅད་ངན་འགྲོ་ལས་
སྒྲོལ་ནུས་པ་སྟོན་པ་སངས་རྒྱས་ཀྱི་བཀའ་དང་། དཔལ་ལྡན་ཨ་ཏི་ཤའི་ལུང་གིས་ནམ་ཡང་མི་བསླུ་བས་སོམ་ཉི་སྤངས་ཏེ་དད་པ་དང་མོས་གུས་ཀྱི་རྟེན་དུ་གཅེས་སྤྲས་སུ་འཛིན་འཚལ། ཞེས་སི་ཏུ་པས་ཆོས་སྦྱིན་དུ་སྤེལ་བ་དགེ། །