སྒྲུབ་ཆེན་གྲོལ་ཁར་དུས་འདས་འབྲེལ་ཐོགས་རྣམས་ཐུགས་སྒྲུབ་སྒོ་ནས་སྟབས་བདེའི་ཆེད་གནས་འདྲེན་ཞིག
སྒྲུབ་ཆེན་གྲོལ་ཁར་དུས་འདས་འབྲེལ་ཐོགས་རྣམས་ཐུགས་སྒྲུབ་སྒོ་ནས་སྟབས་བདེའི་ཆེད་གནས་འདྲེན་ཞིག་བྱེད་སྲོལ་ལ། དེའང་ལས་བྱང་གཞུང་བསྲང་ཚོགས་མང་དང་མཉམ་སྔོན་དུ་བཏོན་ཟིན་པར་བྱས་ལ། དཀྱིལ་འཁོར་གྱི་ལྷོའི་ཕྱོགས་སམ། ཡང་ན་གང་བདེར་རྡོར་རྒྱལ་ལམ་རྒྱལ་ཐེབས་ཞིག་གིས་གཙོས་བའི་བཞི་སྡེ་ཙམ་གྱིས་ཐོག་མར་སྟེགས་ཀྱི་དབུས། མཎྜལ་ཚོམ་བུ་འདབ་བརྒྱད་བཀོད་སྟེང་མཉྫིའི་ཁར། རྣམ་རྒྱལ་བུམ་པ་དུང་ཆོས་དང་གཟུངས་རྡོར་ལྡན་པ། གང་བདེར་ལས་བུམ། མཐར་ཉེར་སྤྱོད་མཆོད་པ་དང་སྔོན་གཉིས་ཀྱང་བཤམས། གཞན་ཡང་གནས་འདྲེན་འདོན་ཆ་ལ་གསལ་པའི་ཙཀླི་རྣམས་དང་གཏོར་མ་ལ་སོགས་དགོས་ཆས་རིགས་གང་ཡོད་ཆད་ལྷག་མེད་པར་འདུ་བྱས་ལ། སླད་ཀྱི་དུས་བྱང་ཕྱག་འཚལ་མཁན་ཞིག་ལའང་བརྡའ་བཏང་དགོས། དང་པོ་སྐྱབས་འགྲོ་སེམས་བསྐྱེད་བཏང་། མཚམས་གཅོད་སོགས་ལས་བྱང་ལྟར་ལ་རྔ་རོལ་ཡང་ཉིན་ལྟར་བཞིན་བྱ། རང་ཉིད་རྡོར་སེམས་བསྐྱེད་ལ། ལས་བུམ་སྔགས་ཨ་མྲྀ་ཏ་ཉེར་གཅིག །ན་མོ། དཀོན་མཆོག་སོགས་མཐར་ཞི་རོལ་བཅས་གཏོར་མ་ཕུལ། རྣམ་རྒྱལ་བུམ་པར་ལྷར་བསྐྱེད་ཀྱི་དམིགས་
པ་གཞུང་གསལ་བཞིན་རྩེ་གཅིག་པས། ཡིག་བརྒྱ་ཉེར་གཅིག་ཡང་སྙིང་བརྒྱ་བརྒྱད་བཟླའོ། །སློབ་དཔོན་མདུན་གནས་འདྲེན་ཆས་རྣམས་བཤམས་བཀོད་བྱས་ལ། བྱང་བུའང་བཞག །འགུགས་པའི་རྒྱས། ཧཱུྃ། དཀོན་མཆོག་མཐུ་སོགས་ནས། ཨ་ལ་ལ་བར་ལན་གསུམ་ཞི་ཁྲོའི་གཞུང་གདངས་རིང་ཐུང་གང་བདེས་འདིའི་རིགས་རྣམས་ལ་བཀབ་དགོས། མཚམས་སུ་དྲིལ་གསིལ་ཡང་གོང་འོག་ཀུན་ལ་འགྲེའོ། །ༀ་ཨཱཿཧཱུྃ་གིས་གླུད་གཏོར་བྱིན་བརླབས་ལ། རྔ་སུམ་བརྡུང་གིས། ཧཱུྃ། ང་ནི་དབང་ཆེན་སོགས། བཛྲ་ཀྲོ་དྷ་དང་། སུམྦྷ་ནི་གསུམ། རོལ་མོ་འབེབས་མཐར་བཞག །ཡུངས་ཀར་བྲབ། གུ་གུལ་བདུག །དེ་ནས་འདོན་བྱ་དང་། ལག་ལེན། དམིགས་པ་རྣམས་གཞུང་ཇི་ལྟ་བར་མ་འཁྲུལ་བར་ཕྱག་ལེན་ལྡན་པས། ཧཱུྃ་ང་ནི་བླ་མ་སོགས་ཀྱིས་གནས་ནས་དྲང་ཞིང་། ཚིག་སོ་སོ་དང་མཚུངས་པའི་བྱང་ཕྱག་ཀྱང་ཕུལ་བཅུག་པ་སོགས་རིགས་འགྲེ་ཞིང་། མཐར་བྱང་བུ་དབང་སྟེགས་ཁར་བཞག་ལ། དམིགས་པ་སྤྲོ་བསྡུ་དང་བཅས། ཡིག་བརྒྱ་ཉེར་གཅིག་དང་། ཡང་སྙིང་བརྒྱ་བརྒྱད། ཀྃ་ཀ་ནི་ཉེར་གཅིག་བཟླའོ། །འདོད་ཡོན་རྣམས་དང་། སྔར་ཉིན་ཚོགས་སྐལ་ཞིག་བཞག་དགོས་
པའང་འདིར་བཤམ། སྟབས་བདེའི་འགལ་མེད་ཙམ་དུ་ལས་སྔགས་ཀྱིས་བསང་། ཨ་ཀཱ་རོས་ལན་གསུམ་བྱིན་བརླབས་ལ། ཁ་དོག་མ་བཏོན་མཐར། འདོད་ཡོན་ནམ་མཁའ་དང་། ཁ་ཟས་བསྟབ་པ་སོགས་བརྗོད། ཧཱུྃ་བུམ་པ་བཟང་སོགས། རྣམ་རྒྱལ་བུམ་དབང་ཡང་བསྐུར། དེ་ནས་སྒྲུབ་ཁང་ལ་འགྲོ་ཞིང་། དཀྱིལ་འཁོར་གྱི་ལྷོ་སྒོའི་ཕྱོགས་ནས་བྱང་ཕྱག་གསུམ་འཚལ་བཅུག །འདི་སྐབས་ལས་བྱང་གི་སྒོ་དབྱེ་འདོན། དར་རམ་རས་དཀར་གྱི་ལམ་སྣེ་གཞི་སྟེང་བརྐྱང་བ་དེར་བྱང་བུ་བཞག །ཧཱུྃ། ཉོན་ཅིག་སོགས་ལམ་བསྟན་རྣམས་དང་། ཧོ། ལྷ་དང་བླ་མ་སོགས་བསྔོ་བ་དང་། ཧཱུྃ། དུག་གསུམ་རྣམ་དག་སོགས། རྡོར་རྒྱལ་ལམ་རྒྱལ་ཐེབས་ཀྱིས་མིང་བྱང་བསྲེག །ཉམས་ལེན་ལྟ་བའི་ངང་དུ་བཞག །མཐར། ཨེ་མ་ཧོཿ ངོ་མཚར་སངས་རྒྱས་སོགས་དང་། གཞན་ཡང་བསྔོ་སྨོན་གང་འོས་བྱ། བྱང་ཐལ་སཱཙྪ་གདབ་པར་བྱའོ། །དེ་ནས་ཚོགས་ཆེན་དང་སྐབས་བསྟུན་པའི། ཚོགས་དང་བཀའ་སྲུང་སོགས་ད་ནང་གི་འདོན་བྱའི་འཕྲོས་རྣམས་ལ་འཇུག་པར་བྱའོ། །འགལ་འཁྲུལ་མཆིས་ན་སྐུ་གསུམ་ཀློང་དུ་བཤགས། །དགེ་བས་འགྲོ་རྣམས་སངས་རྒྱས་སར་འགོད་ཤོག །ཤུ་བྷམ། །