བཅའ་ཐབས་དང་འདོན་འགྲིགས་ཀྱི་རིམ་པ་མཐོང་བས་དོན་རྟོགས་རབ་གསལ་ཕན་བདེའི་མེ་ལོང་།
ཡོངས་དགེ་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱི་ཟབ་གཏེར་ཁྲོ་རྒྱལ་རྡོ་རྗེ་གྲོ་ལོད་རྩལ་གྱི་དཀྱིལ་འཁོར་ཆེན་པོའི་ཞལ་ཕྱེའི་སྐབས་བཅའ་ཐབས་དང་འདོན་འགྲིགས་ཀྱི་རིམ་པ་མཐོང་བས་དོན་རྟོགས་རབ་གསལ་ཕན་བདེའི་མེ་ལོང་ཞེས་བྱ་བ་བཞུགས་སོ། །ན་མོ་གུ་རུ་ལོ་ཀ་རྟོ་ར་བཛྲ་ཡ། འདིར་རྩ་གསུམ་གྱི་བསྙེན་སྒྲུབ་མཐར་ཕྱིན་པའི་རྣལ་འབྱོར་པ་དམ་ཚིག་ལྡན་ཞིང་། བསྟན་པ་དང་བླ་མར་གུས་པ། སེམས་ཅན་ལ་བརྩེ་བ་དག་གིས་དྲག་པོའི་ལས་བརྩམ་པར་བྱ་སྟེ། དང་པོ། རྩ་གསུམ་ལྷ་ཚོགས་བྲིས་འབུར་གྱི་རྟེན་བཤམས་པའི་དྲུང་དུ། མཆོད་རྟེན་བང་རིམ་གསུམ་བྱས་ལ། གོང་མར་ཟ་འོག་གི་སྟན་ཁེབ་ཁར། དབུས་སུ་དར་དཀར་པོ་ཁ་གང་སྟེང་། བླ་མ་ཞི་བ་ལ། དབུས་དང་ཕྱོགས་མཚམས་བརྒྱད་ལ། འབྲུ་དཀར་དགུ་ཚོམ་བཀོད། གཡས་སུ་དར་དམར་ཁ་གང་སྟེང་། ཡི་དམ་དྲག་པོ་ལ། འབྲུ་དམར་པོའི་དགུ་ཚོམ་དང་། དེའི་གཡས་ངོས་སུ་ཛཾ་ལྷར། དར་སེར་ཁ་གང་སྟེང་། འབྲུ་སེར་པོའི་དགུ་ཚོམ་བཀོད། ཞི་བའི་གཡོན་དུ། ཆོས་སྐྱོང་ལ་དར་ནག་པོ་ཁ་གང་སྟེང་། འབྲུ་ནག་གི་ལྔ་ཚོམ་དང་། དེ་ཕྱིར་ཕྱོགས་མཚམས་ལ་ཚོམ་བུ་བརྒྱད་བཀོད།
དེ་རྣམས་སོ་སོའི་ཁར་མཉྫུ་ཡོད་ཀྱང་ལེགས། མེད་ཀྱང་རུང་ལ། དབུས་སུ་ཤེལ་ལམ་དངུལ་སྣོད་དུ་བླ་མའི་རྟེན་གཏོར་ཚེའི་བུམ་པ་ཁ་རྒྱན་ཤིང་ལོ་དང་རིན་པོ་ཆེའི་རྒྱན་དང་། ལྟོ་བ་པད་འདབ་བརྒྱད་ཁ་གྱེན་བསྟན་ཅན། གཤམ་དུ་ཚེ་རིལ་རིན་ཆེན་རྒྱན་ལྡན་སྤུངས། རྩེ་རྒྱན་ལ་ཤིང་ལོ་དང་། དབུས་སུ་མེ་ཏོག་དཀར་ལ་དམར་མདངས་ཅན་གྱི་ཟེའུ་འབྲུའི་སྟེང་། ཐོད་ཆབ། དེ་སྟེང་གསེར་གྱི་རྡོ་རྗེ་རྩེ་ལྔ། རྩེར་ཉི་ཟླ་ནོར་བུ་དང་། མཐའ་སྐོར་མདུན་དུ། ཕྱོགས་བཞིར་མཁའ་འགྲོ་སྡེ་ལྔའི་དཀར་བཤོས་ལྔ་ལ་དཀར། སྔོ། སེར། དམར། ལྗང་གི་རྒྱན་གཉིས་ཅན། ཕྱོགས་མདོག་བྱ། བར་མཚམས་སུ་ཚེ་རིལ་བྱུར་བུར་སྤུངས། མདུན་གཡས་གཡོན་ལ་ཐབས་ཤེས་རྫས། ཤ་དང་། ཆང་། ཚེ་རིལ། ཚེ་ཆང་། ཚེ་མདའ་རྒྱན་ལྡན་ཡང་གཟུག །ཞི་བའི་གཡས་ལ་ཟངས་སྣོད་དུ། ཡི་དམ་རྟེན་གཏོར་ཐོག་མདེལ་དབྱིབས་ཟུར་གསུམ་རྣོ་དབལ་ཅན་མེ་རིས་བརྒྱན་པ། རྩེ་རྒྱན་དང་ཕྲག་རྒྱན་ལ་མེ་རི་ཡེ་ཤེས་ལྔའི་མཚོན་བྱེད་ཅན་གྱི། དབུས་སུ་མེ་ཏོག་དམར་སྨུག་གི་ཟེའུ་འབྲུའི་སྟེང་། གནམ་ལྕགས་རྡོ་རྗེ་རྩེ་དགུ་དང་། ཕུར་པ། དེ་གཉིས་ཀྱི་སྟེང་བྱ་ཁྱུང་དང་། ལྕགས་སྡིག་གིས་
མཚན་པ། མཐའ་སྐོར་དུ་སྡེ་བརྒྱད་དམར་གཏོར་མེ་རི་ཅན་བརྒྱད། བར་མཚམས་སུ་ཟས་སྣ་བསྐང་བ་བཤམས། དེའི་གཡས་ངོས་དངུལ་སྣོད་དུ་ཛཾཾ་གཏོར་ཟན་འབྲུ་བཞིའི་སྟེང་ནོར་བུ་སུམ་བརྩེགས་མར་ཚོན་རྒྱན་དང་། རྩེ་རྒྱན་ཤིང་ལོ་དང་། དབུས་སུ་མེ་ཏོག་སེར་སྐྱའི་སྟེང་། ཤིང་ཏོག་དང་། ནེའུ་ལེ་ནོར་བུ་སྐྱུག་པ་བཅས། གཏོར་མའི་མཐའ་བསྐོར། ཞོ། འོ་མ། སྦྲང་། ཞག་དང་ཚིལ། རྐང་མར་དང་གཞན་ཡང་ཟས་སྣ་སྤུངས་པ་བཀོད། བླ་མའི་གཡོན་དུ། མཁའ་འགྲོའི་རྟེན་ཚེ་མདའ་ལ་དར་སྣ་ལྔ་བཏགས་པར་སོ་སོར་སིནྡྷུ་རའི་མཁའ་འགྲོའི་སྔགས་བྱང་བྲིས་པ་དང་། བྱ་རྒོད་ལྤགས་པ་དྲི་བཟང་བྱུགས་ནས་དྲིལ་བ་དང་། གཞན་ཡང་མེ་ལོང་། རིན་ཆེན་སྣ་ལྔ་སོགས་ཀྱང་བཏགས་ལ་བུམ་པའམ་སྣོད་འབྲུས་བཀང་བའི་ནང་འཛུག །དེའི་གཡོན་དུ། ལྕགས་སམ་ཟངས་སྣོད་དུ། འབྲུ་ནག་གི་ལས་མགོན་རྟེན་གཏོར་ཟུར་གསུམ་མེ་རི་ཅན། རྩེ་རྒྱན་ཡི་དམ་ལྟར་ལ། དབུས་སུ་པདྨ་སྔོ་ནག་གི་ལྟེ་བར། རུ་དར་དང་། ཞགས་པ། ལྕགས་ཀྱུ་དང་། དགྲ་སྙིང་བཅས་དང་། མཐའ་སྐོར་ཡུམ་བཞིར་ཟུར་གསུམ་བཞི། དེ་རྒྱབ་ཕྱོགས་དང་མཚམས་སུ་བདུད་མགོན་
དམར་གཏོར་བརྒྱད། དེ་རྣམས་མེ་རི་དང་། གཙོ་འཁོར་ཐམས་ཅད་ལ་ཤ་དར་བཙུག །བར་མཚམས་ཟས་སྣ་སྤུངས་པ་བཅས། ཕྱིའི་རྟེན་རྫས་དང་། ནང་གི་རྟེན་རྫས་བྱ་ནག་ཁྱི་ནག །ལུག་ནག་གི་ཙིཏྟའི་རྩ་སྦུབས་ནང་རྩ་སྔགས་དང་སྤྱི་དྲིལ་བྲིས་ལ། དར་དཀར་དམར་མཐིང་གསུམ་གྱིས་དྲིལ། མདུང་དར། ཞགས་པ། ལྕགས་ཀྱུ། དགྲ་སྙིང་སོགས་བྲིས་པའམ་དངོས་སུ་བཤམས། མེད་ཀྱང་རུང་བ་ལས་ཅི་བྱ། དེ་ལྟར་རྟེན་གཏོར་བཞི་ཀར་སྨུག་རྩི་བྱུག །སྟེགས་བར་མ་རྟེན་ཁེབ་ཁར། གཡས་སུ་བདུད་རྩི་དབུས་སུ་མཆོད་གཏོར་ཟུར་གསུམ་ཅན་ལ། མར་རྩི་དང་དཀར་ཐིག་མར་རྒྱན། རྩེར་ཉི་ཟླ་ནོར་བུ་བཅས། གཡོན་དུ་རཀྟ། དེ་རྣམས་ལ་རྩ་བརྒྱད་སྟོང་སྦྱར་ཆོས་སྨན་སེལ་མེད་བཏབ། སྒྲོན་ཐུར་གཉིས་སམ་གཅིག །མདུན་ངོས་གཡས་ནས་མཆོད་ཡོན་སོགས་ཉེར་སྤྱོད་རྣམས་གཙང་ཞིང་ཡིད་འོང་ཕྲེང་ཚར་བཤམས། སྟེགས་ཞབས་མར་སྟག་ལྤགས་སྟེང་། དབུས་སུ་ལྕགས་སྣོད་ཡངས་པའི་ནང་ས་ཡིས་ཞལ་བ་བྱས། ལྟེ་བར་ཧོམ་ཁུང་བྲིས་པའི་ནང་འཛུད་རྒྱུ་སོགས་ཤོག་ལིང་སྤར་མའམ་བྲིས་པ་བཞི་ལ། བསྟན་པའི་སྤྱི་དགྲའམ། དམིགས་བསལ་དགྲ་མིང་བྲིས་ལ། སྐབས་
འདིར་སློབ་དཔོན་གྱིས། ལིང་ཁྲུས་དང་། ལྕགས་ཁང་ནང་བཅུག །རང་མདུན་ཨེ་སོགས་དང་། འགུགས་གཞུག་གསུམ། ལྷ་དབྱེ་དང་། གུ་གུལ་བདུག་དགྲ་བོ་དངོས་སུ་བསམ་ལ། ཤོག་ལིང་གཅིག་གཏོར་མའི་འོག་ཏུ་མནན། དེ་སྟེང་ཡི་དམ་གཏོར་ཟློག་གནམ་ལྕགས་ཐོག་མདེལ་དབྱིབས་ཟུར་གསུམ་རྣོ་དབལ་ཅན། དུག་ཁྲག་བྱུག་པ། མེ་རིས་བརྒྱན། རྩེར་དབུ་རྩང་། སྐེད་པར་ཕྱག་རྩང་གཉིས། ཤ་དར་ལིང་གས་བརྒྱན། མཚེ་དང་ཡུངས་ཀར་ནག་བཙུག །རྒྱབ་ངོས་སུ་མེ་སྒྲོན་གཉིས་ཀྱང་བཙུགས། རྩེ་ཁྲ་མེ་རིས་ཕྲེང་སྐོར་ཅན་དང་། གྲོ་ལོད་ཙཀླིའི་སྟེང་དར་གདུགས་དམར་སྨུག །ཡུ་བས་དཀྱིལ་ལ་བཙུག་པ། རྡོ་རྗེ་ཕྱེད་པ་རྩེ་དགུའི་ཏོག་བྱ། མཐའ་སྐོར་ཕྱོགས་མཚམས་སྡེ་བརྒྱད་དམར་གཏོར་མེ་རི་ཅན་བརྒྱད་ལ་རྩང་ཐུར་གསུམ་རེ་དང་། ཤ་དར། ལིདྒ། མཚེ་དང་ཡུངས་ཀར་ནག་བཙུགས། མཐའ་བསྐོར་གྱི་མུ་ཁྱུད་ལ་ཕོ་ཉ་ལས་མཁན་གྱི་ཚུལ་དུ་རྩང་ཕུར་དམར་ནག་ལ་དུག་ཁྲག་གིས་སྦགས་པ་ཉེར་བརྒྱད་སྲིན་མོ་འགྲོས་སུ་བཙུག །དེ་མཐར་འོག་ནས་རིམ་བཞིན་བསྣོལ། སེར་དཀར། དམར་ནག །ལྗང་གི་འབྱུང་བ་གོ་ལྡོག་ལྟར་དཀྲི་བའམ། ཡང་ན་སྔོ་དམར་གྱི་སྐུད་པས་འཚུབས་མ་རིས་སུ་དཀྲི། རྩེར་ཤ་དར། ལིདྒ་ཁྲག་རྐང་གིས་བརྒྱན། ནང་སྐོར་རྣམས་སུ་མི་རོ་དང་། ལྷུ་
དུམ་སོགས་ཀྱང་བཀྲམ་ལ། དུར་ཁྲོད་ཀྱི་བཀོད་པ་ལ་བརྗིད་ལྡན་རྔམ་བརྗིད་ཅན་བྱ། དེའི་མཐའ་སྐོར་རམ། ཟུར་དུ་ཟངས་ལྕགས་ཀྱི་སྣོད་གཅིག་གམ་སོ་སོའི་ནང་དུ། གཏོར་ཟོར་ཐོག་མདེལ་དབྱིབས་ཅན་དབུ་ལ་རྩང་གསུམ་རེ་དང་། མཚེ་ཡུངས་བཙུགས་པ་བཤམས། གཡོན་དུ་ལྕགས་སྣོད་ཡངས་པའི་ནང་སའི་ཞལ་ལ་དང་། ཧོམ་ཁུང་བྲིས་པའི་ནང་ཤོག་ལིང་བཅུག་ལ། སྟེང་དུ་ཆོས་སྐྱོང་ཟློག་གཏོར་ཟུར་གསུམ་རྣོ་དབལ་ཅན། རྩེར་ཏྲཀྴད་ཙཀླི། དར་གདུགས་ནག་པོ་ཏོག་གོང་ལྟར། མཐའ་མར་ཡུམ་བཞིའི་དམར་གཏོར་མདུན་རྒྱབ་གཡས་གཡོན་བཀོད། དེའི་མཐར་ཕྱོགས་དང་མཚམས་སུ་བདུད་མགོན་བརྒྱད་ཀྱི་དམར་གཏོར་བཅས་ཐམས་ཅད་ལ་དུག་ཁྲག་བྱུག་ཅིང་མེ་རི་དང་། ལྕགས་རི་ལ་རྩང་ཕུར་བཙུག་པ་ལ་སོགས་གོང་བཞིན་ཡི་དམ་གྱི་རྒྱས་བཀབ་པའི་ཆད་ལྷག་མ་སོང་བར་ངེས་པར་བྱ། འདི་ལ་གཏོར་ཟོར་དགུ་པོ་དེ་མི་དགོས། ཡི་དམ་གྱི་གཡས་སུ། ཤིང་གི་ཁྲིའི་ཁར། སྐོང་གཏོར་གྱི་འོག་གཞི་ས་ལ་བྱས་པའི་འབྱུང་བཞི་བང་རིམ་བཞི་དང་ལྡན་པའི་སྟེང་དུ་རི་རབ། དེའི་ཕྱོགས་བཞིར། ཤར་གླིང་ཟླ་གམ། ལྷོ་གླིང་སོག་ཀ །ནུབ་གླིང་ཟླུམ་པོ།
བྱང་དུ་གྲུ་བཞི་གླིང་ཕྲན་བརྒྱད་བཅས་དང་། རི་རབ་སྟེང་དུ་ཏྲཀྴད་གཏོར་མ་ཟུར་གསུམ་ཆེ་བ་མེ་རི་ཅན། གླིང་བཞིའི་སྟེང་དུ་མ་གཤིན་དམར་གཏོར་བཞི། གླིང་ཕྲན་བརྒྱད་སྟེང་བདུད་མགོན་དམར་གཏོར་བརྒྱད། དེ་རྣམས་ལ་དུག་ཁྲག་བྱུག་ལ་མེ་རིས་བརྒྱན། བང་རིམ་དང་པོའི་མཐར། བཀྲ་ཤིས་རྟགས་བརྒྱད་དང་རྫས་བརྒྱད། རྒྱལ་སྲིད་སྣ་བདུན་གྱི་ཙཀླི་བཙུགས་ས་དང་ཟན་སྤར་རེ་ཡང་བཏབ། བྱང་ཤར་ཟླ་བ་དང་། ལྷོ་ནུབ་ཉི་མ། ཕྲེང་སྐོར་གྱི་མཆོད་རྫས་སོགས་དཀོར་ཆས་སྣ་ཚོགས་པའི་རིགས་རྣམས་དང་། དར་ཚོན་སྟག་གཟིག་རས་མོ་རྣམས་སྙུག་རྩེར་འཕྱར་བ་བཙུགས། བང་རིམ་གཉིས་པར་ཁྱུང་འབྲུག་སེང་སོགས་བྱ་རིགས་འདབ་ཆགས་རྣམས་དང་། བང་རིམ་གསུམ་པར་སྟག་གཟིག་དོམ་སོགས་གཅན་གཟན་རྣམས་དང་། བང་རིམ་བཞི་པར་གླང་ཆེན་བསེ་རུ། རྟ་མཆོག་སོགས་རི་དྭགས་དང་གཡུང་དྭགས་སོགས་ཐམས་ཅད་སྤར་དུ་བཏབ་ལ་སྒྲོས་ལྡན་བར་མཚམས་མེད་པར་བཀོད། ཕྱི་སྐོར་བའི་ལྕགས་རིའི་སྟེང་རྩང་ཕུར་དུག་ཁྲག་གིས་སྦགས་པ་ཉེར་བརྒྱད་སྲིན་མོ་འགྲོས་སུ་བཙུགས་པའི་རྩེར་ལིདྒ་ཤ་དང་། ཁྲག་ཀོང་དང་། མཚམས་བཞིར་མར་མེ་བཞི། སྤོས་ཐུར་བཞི་
བཅས་བཙུགས། བར་མཚམས་རྣམས་སུ་ཟས་སྣ་དང་། རིན་ཆེན་ཕྱེ་མ། དར་སྣ། སྨན་སྣ་སོགས་སྤུངས། སྟེང་དུ་དར་གདུགས་སྔོ་ནག །ཡུ་བ་རི་རབ་ལ་བཙུག་པ། དེ་སྟེང་བླ་མ་སྐུ་གསུམ་དང་མཁའ་འགྲོ་སྡེ་ལྔའི་ཙཀླི་སྟེང་དར་དམར་གདུགས། དེ་སྟེང་རིགས་ལྔ་དང་རིགས་གསུམ་མགོན་པོའི་ཙཀླིའི་སྟེང་དར་གདུགས་དཀར་པོ་རིན་པོ་ཆེའི་ཏོག་ཅན། དེ་རྣམས་ལྟ་ན་སྡུག་ཅིང་ཡིད་དུ་འོང་བར་བྱ། གཏོར་ཆེན་གསུམ་གྱི་མདུན། གཡས་ན་ཁྲག་གི་མཆོད་ཡོན། དབང་ལྔའི་མེ་ཏོག །གུ་གུལ་དང་ཚིལ་ཆེན་བདུག་སྤོས། མར་ནག་གི་སྣང་གསལ། ཁྲག་ཞག་གི་དྲི་ཆབ། ཤ་ཁྲག་གིས་སྦགས་པའི་བཤོས་བུ་ཟུར་གསུམ། ཐོད་རྔ་དང་། རྐང་གླིང་གི་རོལ་མོ་བཤམ། པད་སྣོད་ཡངས་པར་འབྲུ་བཅུད་སྦྱར་བའི་ཚོགས་བམ་གཟུགས་རྒྱན་ལྡན་ལ། སྟོབས་ལྡན་ཤ །མྱོས་བྱེད་ཆང་དང་། བཟའ་བཅའ་སྣ་ཚོགས་ཀྱིས་བསྐོར་བ་བཤམས། ཡི་དམ་གཏོར་འབུལ་དམར་གཏོར་གཉིས་དང་། གསེར་སྐྱེམས། ཡང་དམར་གཏོར་གཅིག་བཅས་དང་། ལས་མགོན་གཏོར་འབུལ་དམར་གཏོར་གཅིག །བསྐང་བ་དམར་གཏོར་དང་དཀར་གཏོར། ཛཾ་ལྷར་དཀར་
གཏོར། དེ་རྣམས་གཏོར་ཆེན་རྣམས་ཀྱི་ཐད་དུ་བཤམས། བཟློག་པའི་སྐབས་མངའ་གསོལ་གཏོར་ཆུང་བདུན། ཕྲིན་བཅོལ་གཏོར་ཆུང་བདུན་རྣམས་ལ་ཟངས་ལྕགས་སྣོད་བཅུ་བཞི་འཛོམས་ན་དང་། ཡང་ན་སྣོད་རེའི་ནང་གཏོར་མ་བདུན་རེ་བཤམས་པས་འཐུས། ཏྲཀྴད་གཏོར་འབུལ་ཡང་བཤམས། ལར་ཟློག་པའི་གྲངས་དང་བསྟུན་པའི་གཏོར་མ་བཤམས་ལུགས་གོང་ལྟར་བྱ་བ་སྨོས་མ་དགོས། ལས་ཕུར། གཡབ་དར། རྡོར་དྲིལ། གསེར་སྐྱེམས་བརྡར་རྒྱུ། གཏོར་གྲི། བསང་ཆུ་འཐོར་གཡབ་སོགས་ཀྱང་བཀོད། གཞི་མདུན་སྟེགས་ཀྱི་ཁར། སྔོན་འགྲོའི་དཀར་གཏོར་དང་གསེར་སྐྱེམས། གླུད་གཟུགས་གཡས་གཡོན་བཤོས་བུ། ཏིང་ལོ། རྒྱབ་ཏུ་ཆངས་བུ། ཤ་དུམ་འབྲུ་སྣ་བཏབ་པ་བཤམ། ལར་དཀར་གཏོར་ནང་འབྲུ་སྣ་དང་། དམར་གཏོར་ལ་ཤ་དུམ། ཕུད་སྐྱེམས་ལའང་འབྲུ་སྣ་བཏབ་པ་བཅས་ཀུན་ལ་དགོས། གཞི་དྲུང་གང་བདེར། རེ་ནག་གམ། རས་ནག་སྟེང་ཧོམ་ཁུང་ནང་། སླར་ཟོར་ལེན་བཞག་རྒྱུའི་ཤོག་ལིང་དང་། སྦྱིན་སྲེག་བླུག་ནའམ་གཏོར་རྒྱག་ཉིན་བསྒྲལ་ལས་སྐབས། ཞལ་བསྟབ་རྒྱུའི་ཤོག་ལིང་བཅས་འོག་ཏུ་བཅུག །དེ་སྟེང་
ཟན་ལིང་རེ། བཟློག་པ་ཚར་གྲངས་དང་བསྟུན་བསྒྲལ་ལས་རྒྱུར་རིམ་གྱིས་བཞག་དགོས། དབྱེ་རྫས་བྱ་རོག་སྒྲོ་དང་། འུག་སྒྲོ་བཀོད། ཡང་ཉེ་ལོག་གང་བདེར་ཉིན་བསྟར་གྱི་མཆོད་འབྲུ། ཆུ་གཙང་། བདུག་སྤོས་དང་། མར་མེ། ཞལ་ཟས། དྲག་བཤོས། མཐེབ་སྐྱུ། དམ་རྫས། བདུད་རྩི། ལིདྒ་ཟན་སྤར་ཅན་དུག་ཁྲག་གིས་བྱུག་པ། གལ་ཆེ་ན་དགྲ་མིང་བཅུག་པ་མང་པོ་དང་། དམར་གཏོར་ཆུང་ངུ་འགའ་ཞིག་དང་། བམ་ཚོགས། སྔོན་འགྲོ་དཀར་བགེགས། གཏོར་འབུལ་རྣམས་སོགས་ཞག་ཤས་ཀྱི་མཁོ་ཆས་ཀྱང་འདུ་བགྱིས་ལ། གཞན་ཡང་ཞི་བ་དང་དྲག་པོའི་སྤྱན་གཟིགས་དཀོར་ཆས་ཅི་འབྱོར་པས་མཛེས་ཤིང་རྔམ་པར་བརྒྱན། རྡོ་རྗེ་སློབ་དཔོན་མདུན། རྡོ་དྲིལ་ཐོད་ཌཱ། གཡབ་དར། ཡུངས་ཀར། ནས་བཟེད་བཀོད། ལས་ཀྱི་རྡོ་རྗེའི་མདུན་སྤོས་ཁང་དང་སྤོས་ཤིང་། གུ་གུལ་དཀར་ནག །ཏིང་བུ་དང་། ཆབ་བུམ། ཞལ་དཀྲིས་སོགས་བཤམས། རྔ་ཆེན། སིལ་སྦུབས། རྐང་གླིང་། དུང་དམར། རྒྱ་གླིང་། དུང་དཀར་སོགས་གང་འཛོམས་བྱ། དེ་ལྟར་གཙང་སྦྲ་དང་བཅས་བཤམས་ལེགས་པར་གྲུབ་ནས་སྤོས་དང་།
ཆབ་ཀྱིས་བསང་། ཕྱི་ནང་གི་འགྲུལ་བཅད། རྣལ་འབྱོར་པ་རྣམས་བདེ་བའི་སྟན་ལ་འགོད། ཉིན་དང་པོར་ཚིག་བདུན་གསོལ་འདེབས། བསམ་པ་ལྷུན་གྲུབ། བརྒྱུད་འདེབས། དཀར་བགེགས་ནས་རིམ་པ་ལྟར་བཏོན་ལ། མཆོད་རྫས་བྱིན་རླབས་སྔགས་མཐར་རོལ་མོ་མཚམས་རྒྱག་གིས། ཨ་ཨཱཿ ཡང་དག་དོན་སོགས་ནས་ཡེ་ཤེས་གསང་བ། ཤོག་ཕྲན། གྲོ་ལོད། མཁའ་འགྲོ། ཚོགས་ལས། ཏྲཀྴད་མཐར་སྐོང་བ་བཅས་དང་། ཛཾ་སེར། དེ་ནས་ཚེ་འགུགས་བཀྲ་ཤིས་བཅས་བརྗོད། རོལ་མོ་རྔ་ཚིག་གཤམ་གསལ་ལྟར་བྱ། མ་མགོན་རྒྱུན་གཏོར་སྐབས་དང་བསྟུན། དེ་ནས་ཉིན་བཞིན་འདོན་འགྲིགས་ལ། དང་པོ་ཚིག་བདུན་མ། བསམ་ལྷུན། བརྒྱུད་འདེབས་སྲིད་ཞི་མ་དང་། སྤྲོ་ན་ཡང་དག་རྫོགས་སངས་དང་། ལྕང་ལོ་ཅན་སོགས། དེ་ནས་སྔོན་གཏོར། ༀ་ཨཱཿཧཱུྃ། རིན་ཆེན་སྣོད་མཆོག་སོགས་ནས་བྱིན་རླབས་སྐབས་བྲན་རྒྱུ་འདི་ཕྱིན་ཐམས་ཅད་ལ་ངེས་དགོས། ཧཱུྃ་སྟེང་གི་ལྷ་དང་སོགས་ལ་ཤླཽ་ཀ་རེའི་མཚམས་དྲིལ་གསིལ། འདིའང་རིགས་འགྲེ་བྱེད། པཱུ་ཛ་ཁ་ཧི་ནས། དཀར་གཏོར་དང་།
སྐྱེམས་ཕུད་ཕུལ། སིལ་སྙན་ཞི་རོལ་སུམ་འཕར་མཐར་བཞག་ཌཱ་དྲིལ། །འདི་ནས་བཀྲ་ཤིས་ཡན་སུམ་འཕར་ཐམས་ཅད་ལ་རོལ་རྟགས་འདི་བཞིན་ནོ། །བགེགས་གཏོར་ཧཱུྃ་བྷྱོ། ང་ནི་པདྨ་བཛྲ་ནས། བྱིན་རླབས་དང་། ཐམས་ཅད་ཀྱི་འགུགས་པའི་རྒྱ་བྱེད་པ་འདིའང་རིགས་འགྲེ་དགོས། ན་མོ་དཀོན་མཆོག་གསུམ་སོགས། དྲིལ། སྔགས་བཅས་ལན་གསུམ། སམྦྷ་ར་གཡས་མཆོག་སྦྱིན། གཡོན་སེ་གོལ་བཅས་ལས་རྡོར་གྱིས་ཆུ་སྦྲེང་། བྷྱོ་བི་ཤྭ་ལ་ཐལ་མོ་ཁ་གྱེན་བསྟན། སྔགས་གཉིས་ཀར་གསུམ་རེ། ཧཱུྃ་ཉོན་ཅིག་སོགས། དྲིལ་གསིལ་དང་། ཏ་ཡ་ཕཊཿ ནས། སྦུབ་ཆོལ་འབེབས། བགེགས་གཏོར་ཕྱི་རོལ་དུ་ཕུལ། གུ་གུལ་བདུག དྲིལ་གསིལ་དང་ཡུངས་ཀར་གྱིས་བྲབ། གཡབ་དར་གཡུགས། ཕཊ་དྲག་པོ་བརྗོད་ལ་ཚེས་བཅུ་ུགསང་འདུས་དང་གྲོ་ལོད་གཞུང་གི་རོལ་ཆེན་ཉིན་བཞིན་རེས་མོས་ཀྱིས་མཐར་སུམ་བརྡུང་གིས། བགེགས་བསྐྲད། བཀའ་བརྒྱུད་བླ་མ་དང་མཚམས་གཅོད་རྣམ་རྟོག་གཉིས་འཛིན་སྐབས་གུ་གུལ་གནས་དང་ཡོ་བྱད་ལ་འཐུལ་ཞིང་། ཤཱིནྟཾ་ཀུ་རུ་ཨཱ་ནས། དྲིལ། རོལ་མོ་འབེབས་མཐར། ༡༢༣ ༣ ༡༢ ༣ སྲུང་འཁོར་རང་རིག་བླ་མ་སོགས། ཨ་ཨཱཿ ནས། རོལ་མོ་འབེབས་མཐར། ༡༢༣ ༣ ༡༢ ༣ ཐལ་སྦྱར། སྐྱབས་འགྲོ།
ཆོས་སྐུ་ལོངས་སྐུ་སོགས་ལན་གསུམ། སྐུ་གསུམ་བླ་མའི་སོགས། ཡན་ལག་བདུན་པའི་མཐར། རོལ་ཆེན་ཌཱ་དྲིལ་བཅས། བྱིན་འབེབས་སྤྱན་འདྲེན་རྣམས་ཀྱི་ཐོག་མཐའ་དགོས་པ་རིགས་འགྲེའོ། །མཐར་སུམ་བརྡུང་འཛག་ཆེ་རྡེག་བཅས། བྱིན་འབེབས། བཞི་དྲིལ། སྐྱེ་མེད་ཆོས་དབྱིངས་ནས། འཁོར་ལོས་སྒྱུར་བ་ལན་གསུམ་དང་། རྒྱལ་བ་རབ་འབྱམས་ནས། སིདྡྷི་ཛཿཧཱུྃ། ཌཱ་དྲིལ། རོལ་མོ་འབེབས་སུམ་བརྡུང་། དལ་རན་འདིར་བཤམས་མཆོད་རྫས་སོགས། སྔགས་ཀྱི་བྱིན་རླབས་རྣམས་ལན་གསུམ་རེ་མཆོད་རྫས་ཐམས་ཅད་ལ་སྨན་རཀ་འཐོར་མཐར། སིལ་སྙན་འབེབས་སུམ་བརྡུང་། ཕྱི་སྒྲུབ་ཀུན་བཟང་། ཧཱུྃ་འཁོར་འདས་ཡེ་སྟོང་སོགས་ནས། ལུས་ལྷ་རྩ་འཁོར་བསྐྱེད་པ་བཅས། དྲིལ། སྔགས་མཐར། ཌཱ་དྲིལ། སིལ་སྙན་འབེབས་སུམ་བརྡུང་། འཁོར་འདས་ཡེ་སྟོང་ཀློང་ཆེན་ནས། སྤྱན་འདྲེན་སྔགས་མཐར། ཌཱ་དྲིལ། སིལ་སྙན་འབེབས་མཐར། ༡ ༡༢༢༡༢ ༡༢༢ ༡༢ སྟོང་གསུམ་སྟོང་སོགས། བཞུགས་གསོལ། ཕྱག་འཚལ་མཆོད། བསྐང་། བཤགས་པ། མཚམས་རྒྱག །བསྟོད་པ། ཆོས་དབྱིངས་རྒྱལ་བ་ནས། སིལ་སྙན་འབེབས་བཞག་རོལ། བསྙེན་པ་དང་པོར། སྤྱན་འདྲེན་སྔགས། ༀ་ཨཱཿཧཱུྃ་བོ་དྷི་ཙིཏྟ་ནས། ཛཿཧཱུྃ་བྃ་ཧོཿཉེར་ལྔ་བར། རྒྱུན་
བསྙེན་གོང་ལྟར་གྱི་ཧཱུྃ་བྷྱོ་ཧཱུྃ་གི་བར་སུམ་བརྒྱ་བཟླ། དེ་ནས་རིགས་ལྔའི་བསྐྱེད་བཟླས་རྣམས་ལ་རྔ་མི་བསྐུལ། དེ་ནས་ནང་སྒྲུབ་ཡེ་ཤེས་གསང་བའི་གཞི་རྫོགས་རིམ་བསྒོམ་པ་ནི། སིལ་སྙན་སུམ་བརྡུང་། ཨ་ཨ་ཨཱཿ ཡང་དག་དོན་ནི་སོགས་དང་། ལམ་བསྐྱེད་རིམ་གསལ་བཏབ། ཧྲཱིཿ མཁའ་དབྱིངས་ཡེ་ཤེས་སོགས་ནས་སྤྱན་འདྲེན་དྲིལ། སྔགས་མཐར། ཌཱ་དྲིལ། སིལ་སྙན་འབེབས་ནས། འཛག་གཉིས་བདུན་བརྡུང་དལ་རན་བཅས། བཞི་དྲིལ། ཧཱུྃ་སྔོན་གྱི་བསྐལ་པ་སོགས་ལན་གསུམ། གནས་མཆོག་འདིར་ནས་སྔགས་མཐར། ཌཱ་དྲིལ། སིལ་སྙན་འབེབས་ཉིས་བརྡུང་གཉིས་འཕར་གོང་ལྟར། ཉི་ཟླ་པདྨ་འབར་སོགས་བཞུགས་གསོལ། ཕྱག་འཚལ། མཆོད་ཕྲེང་སྐོང་བཤགས་རྣམས་སོ་སོའི་དབྱངས་གདངས་དང་བསྟུན་པའི་རོལ་ཚིགས་སྐབས་ཐོབ་དང་། སྨན་རཀ་གཏོར་འབུལ་སོགས་སྐབས་སྦྲེང་ཚུལ། གཞན་ལའང་རིགས་འགྲེའོ། །བཤམས་པའི་མཐར། རིག་རྩལ་མྱུར་རྟོགས་ཤོག་ནས། འབེབས་བཞག་རོལ། ཚོགས་ཐེངས་བྱ། ཡར་འཚོགས། སིལ་སྙན་སུམ་བརྡུང་། ཆོས་དབྱིངས་སྐྱེ་མེད་སོགས་བསྟོད་པ་དང་། མཚམས་རྒྱག བླ་མ་རིག་འཛིན་ནས། ཆུ་བཞག་ལྟ་བུར་གྱུར་བར། སིལ་སྙན་འབེབས་བཞག་རོལ། རང་རིག་བླ་མ་སོགས་བསྙེན་དམིགས་དང་། བསྙེན་པ་དང་པོར།
ཐོད་ཕྲེང་རྩལ་ནས། ཧ་རི་ནི་ས་བཛྲ་ས་མ་ཡ་ཛཿཛཿ སྤྱན་འདྲེན་སྔགས། ༢༥ རྒྱུན་བསྙེན་ཐོད་ཕྲེང་རྩལ་༥༠ ནས། ཨཱ་ཡུ་སིདྡྷི་ཛཿབར་༣༠༠ བཟླ། དེ་ནས་ཤོག་ཕྲན་ཚེ་སྒྲུབ། ཤྲཱི་མ་ཧཱ་གུ་རུ་ནས། ཛབ་བསྙེན་སོ་སོར་༥༠ བཟླ། དེ་ནས་གསང་སྒྲུབ་གྲོ་ལོད། རོལ་མོ་ཉིས་བརྡུང་འཛག་མེད་ཀྱིས། གདོས་བཅས་ལུས་སྣང་སོགས་བསྐྱེད་རིམ་དང་། དྲག་རྩལ་འགྱིང་རྔམས་རྒྱ་སྟག་སྟེང༔ རིག་རྩལ་སོགས་གཏེར་གཞུང་རྡོ་རྗེའི་གསུང་དུ་ངེས་པའི་ཞལ་རྒྱུན་ལགས། སྤྱན་འདྲེན་སྔགས་མཐར། ཌཱ་དྲིལ། རོལ་མོ་འབེབས་ནས། བདུན་བརྡུང་གཉིས་མཐར་འཛག་མེད་ཀྱིས། དགོངས་སུ་གསོལ་དང་། སྔགས་མཐར། ཌཱ་དྲིལ། རོལ་མོ་འབེབས་ཉིས་བརྡུང་གོང་ལྟར། ཕྱག་འཚལ་གདན་འབུལ་མཆོད་སྐོང་བཤགས་པར། མཚམས་རྒྱག །དྲིལ། བསྟོད་པ་མཐར། སིལ་སྙན་འབེབས་བཞག་རོལ། བསྙེན་པ་དང་པོ། ༀ་ཨཱཿ ཧཱུྃ་ཤྲཱི་ཧེ་རུ་ཀ་སོགས་ནས། ས་པ་རི་ཝཱ་ར་ཅན་སྤྱན་འདྲེན་སྔགས། ༢༥ རྒྱུན་བསྙེན་ཨརྩིག་༣༠༠ བཟླ། མཐར་ཨརྩིག་ཤམ་བུར། སྡེ་བརྒྱད་ལས་བསྐུལ། ཨ་ཡ་མ་ནས། བྷྱོ་ཟློག་ཅིག་བར་བཟླའོ། །དེ་ནས་འབུལ་གཏོར་རྣམས་བྲན། རོལ་མོ་བཞི་བརྡུང་འཐེང་འགྲོས་གཉིས་ཀྱིས། བཞེངས་བསྐུལ་དགོངས་སུ་གསོལ་ནས། རྡུལ་དུ་རློག་ལ། མཚམས་རྒྱག །དམར་གཏོར་ཟློག་གཏོར་ནང་དུ་ཕུལ། རྡོ་རྗེ་དྲག་པོ་སོགས་ནས། བདུད་
རྩི་གསེར་སྐྱེམས་བཞེས་ནས། དམར་གཏོར་དང་། སྐྱེམས་ཕུད་དགྲ་ཕྱོགས་སུ་འཐོར། སྔགས་མཐར། རོལ་མོ་འབེབས་སུམ་བརྡུང་། ཁྲོ་རྒྱལ་འབར་བའི་བཟློག་པ་སོ་སོར། ཐལ་རྡེབ་དང་མཚམས་རྒྱག་རེ་བཅས་སྔགས་མཐར་དམར་གཏོར་གཅིག་ཟློག་གཏོར་ནང་དུ་ཕུལ། རོལ་མོ་འབེབས་བཞག་རོལ། ཚོགས་ཐེངས། ༈ ཡར་འཚོགས། མནྡྷ་ར་ཝ། སིལ་སྙན་སུམ་བརྡུང་འཛག་མེད་རིགས་འགྲེ་དགོས། རིག་རྩལ་མ་འགགས་སོགས། ལྷ་བསྐྱེད་ནས་སྤྱན་འདྲེན་དང་པོ། དྲིལ། སྔགས་མཐར། ཌཱ་དྲིལ། སིལ་སྙན་འབེབས་སུམ་བརྡུང་འཛག་མེད་ཀྱིས། རང་ཉིད་ཡེ་ཤེས་མཚོ་རྒྱལ་སོགས། སྤྱན་འདྲེན་གཉིས་པར་དྲིལ། སྔགས་མཐར། ཌཱ་དྲིལ་སིལ་སྙན་འབེབས་སུམ་བརྡུང་འཛག་མེད་ཀྱིས། ང་ནི་དཔལ་ཆེན་སོགས་སྤྱན་འདྲེན་གསུམ་པར་སྔགས་མཐར། ཌཱ་དྲིལ། སིལ་སྙན་འབེབས་ཉིས་བརྡུང་འཛག་མེད་གོང་ལྟར། རབ་འཇིགས་སོགས། གདན་འབུལ། ཕྱག་འཚལ། མཆོད་ཕྲེང་། སྐོང་ཟློག བཤགས་པར། མཚམས་རྒྱག །བསྟོད་པ་རྣམས་གདངས་དང་སྐབས་ཐོབ་རྔ་ཚིགས་བྱ། མཐར། སིལ་སྙན་འབེབས་ཀྱིས་བཞག །ཛབ་དམིགས་དང་བསྙེན་པ་༣༠༠ བཟླ། བསྡུ་རིམ་མཐར། ཚོགས་ཀྱི་ཡོ་བྱད་ལ་བསང་ཆུས་བྲན། རོལ་མོ་སུམ་བརྡུང་འཛག་ཆེ་བརྡེག་གིས། བཅོམ་ལྡན་ཀུན་བཟང་སོགས་དང་། བླ་མ་ཡི་དམ་ནས། ལས་རྡོར་གྱིས་རྡོར་དྲིལ། གཡབ་དར་
བཅས་འགུགས་པའི་རྒྱ། རིག་འཛིན་བདག་ལ་ནས་སྔགས་མཐར། རོལ་མོ་འབེབས་སུམ་བརྡུང་གིས། བཤུག་པ་བཅས་ལན་གསུམ། རྗེས་མར་བདུན་བརྡུང་འཐེང་པོ་ལན་གཉིས་བཅས། ང་ནི་སྣང་སྲིད། བསྒྲལ་ལས་སྐབས། གཡས་རྡོ་རྗེ། གཡོན་ལས་ཕུར་བཅས་མཚམས་སུ་བཀྲོལ། རྡོ་རྗེ་ཕུར་བུས་གདབ་པར་བྱ། ལྷུབས་གདངས་སྐབས་འདིར་ཚིག་རྔ་མཚམས་རྒྱག་བཅས། བམ་བསྒྲལ། ཀུན་བཟང་ཀློང་ལ་རོལ་མོ་ལྟོ་སྐོར་ཚེ། རྔ་ཐིང་བརྡུང་བྱས་མཐར་བདུན་བརྡུང་འཐེང་པོ་གཉིས་དང་། སྔགས་མཐར། རོལ་མོ་འབེབས་བདུན་བརྡུང་གཉིས་དང་འཛག་མེད་གཉིས་ཀྱིས། བཞི་དྲིལ། རྒྱལ་བ་རབ་འབྱམས་སོགས། ཞལ་བསྟབ་གདངས་ཀྱི་སྐབས་དགུ་བརྡུང་འཛག་ཆེ་བརྡེག་ཅན་ལན་གཉིས། རྒྱུན་པར་བདུན་བརྡུང་བྱ། ཚོགས་ཕུད་རིམ་པ་དྲུག་སྤྲོས་ལ་བཤམ། བདུད་རྩིས་བྲན་ལ། རིམ་པ་ལྟར། སྨན་གཏོར་ནང་ཕུལ། གཅིག་ལྷག་མའི་དུས་འབུལ་རྒྱུ་བཞག །མཐར་བྷྱོ་བྷྱོ་ཟློག་ཟློག་ནས། རོལ་མོ་འབེབས་ཀྱིས་བཞག །སློབ་དཔོན་འདུས་པ་བཅས་དཔའ་བོའི་དགའ་སྟོན་ཚོགས་ལ་རོལ། ཞབས་བརྟན་བཀྲ་ཤིས་བཅས་བཏོན། ལྷག་མ་བསྡུ་བའམ། ཧྱ་གྲྀ་བའི་དགོངས་པ་གོང་གི་གཙང་ལྷག་ཕུལ་བ་ལས་བཀའ་གཉན་ཕྱིར་མང་ལྷག་གང་
བྱུང་མི་རུང་གསུང་རྒྱུན་སྣང་། དེ་ནས། ཌཱ་དྲིལ། རོལ་མོ་ཆེམ་བརྡུང་འབེབས ། བཤུག་གླུ་བཅས། ཉིས་བརྡུང་འཛག་དང་། སུམ་བརྡུང་འཛག་མེད་སྤེལ་མས། བམ་སྒྲོལ་ལྷག་སྡུད་སོགས་སྔགས་མཐར། རོལ་མོ་འབེབས་ཀྱིས་བཞག །ལྷག་གཏོར་དཀྱིལ་འཁོར་འོག་ཏུ་བསགས་ལ། གཏོར་རྫོགས་ཉིན་ཕྱིར་གཙང་སར་འབུལ་དགོས། ཚོགས་ཐེངས། ༈ ཡར་འཚོགས། པདྨ་ཉི་ཟླའི་སོགས། གསང་བདག་བསྐྱེད་བཟླས་༢༥ དང་། ཡང་གསང་ཏྲཀྴད་མདུན་བསྐྱེད། ༀ་སྭ་བྷཱ་ཝ་སོགས། གསལ་གདབ་གཞུང་ལྟར་སྤྱན་འདྲེན་སྔགས་མཐར་གཡབ་དར་༣ གཡུགས། ཌཱ་དྲིལ། རོལ་མོ་འབེབས་ཉིས་བརྡུང་གིས། བཞེངས་ཤིག་བླ་མ་སོགས་དང་། བསྐུལ་ལོ་འབོད་དོ་གདངས་བྱེད་ན་དགུ་བརྡུང་འཛག་མེད་དང་། བདུད་དམག་ས་ཡའི་མཐར། མཚམས་རྒྱག །མ་མོ་ས་ཡ་ནས་བྲེལ་དུ་བཏང་། ཌཱ་དྲིལ། མཐར་དགུ་བརྡུང་འཛག་མེད་དང་རོལ་མོ་འབེབས་དང་ཉིས་བརྡུང་གིས ། ཆོས་སྐུ་ལོངས་སྐུ་སོགས་ཕྱག་འཚལ། བཞུགས་གསོལ་མཐར། མཚམས་རྒྱག །འདས་དང་མ་སོགས། དམ་བཞག་མཆོད་པ་བསྟོད་པའི་སྔགས་མཐར། རོལ་མོ་འབེབས་ཀྱིས་བཞག །བསྙེན་པ་དང་པོ། སྤྱན་འདྲེན་སྔགས། ༢༥ རྒྱུན་བསྙེན་རྩ་སྔགས་དང་། སྤྱི་དྲིལ་སྦྲེལ་མར་ ༣༠༠ བཟླ། དམ་བཞག་སྔགས་ལན་གསུམ་མཐར་གཏོར་མ་བྲན། རོལ་མོ་སུམ་བརྡུང་གིས། འཁོར་འདས་རང་
གྲོལ། སྔགས་མཐར། མཚམས་རྒྱག་བཅས། གཏོར་མ་ཟློག་གཏོར་ནང་ཕུལ། ཁྱོད་ལ་གཏོར་མ་འབུལ་སོགས་དང་། སྔགས་མཐར། རོལ་མོ་སུམ་བརྡུང་། སྐོང་གཏོར་བྲན། སྟོང་གསལ་མཁའ་དབྱིབས་སོགས་ནས། གཉེར་གཏད་དོ། །༥༨།༧ མཐར་དཀར་གཏོར་དང་། དམར་གཏོར་བསྐང་བར་ཕུལ། སིལ་སྙན་འབེབས་ཀྱིས་བཞག །ཏྲཀྴད་གསོལ་ཁ་གསུང་། དེ་ནས་ཛཾ་སེར། རང་ཉིད་སྐད་ཅིག་སོགས། བདག་མདུན་བསྐྱེད་མཐར། རིན་ཆེན་འབར་བའི་སོགས། བསྙེན་དམིགས་དང་། སྔགས་སུམ་སྦྲེལ་ལྟར་༡༠༠ བཟླ། གཏོར་མ་བྲན། སིལ་སྙན་སུམ་བརྡུང་། མཆོད་བསྟོད་མཐར། སིལ་སྙན་འབེབས་ཀྱིས་བཞག །དཀར་གཏོར་ཛཾ་གཏོར་དྲུང་དུ་ཕུལ། དེ་ནས་ཟངས་སྦུབས་མ། འབྱུང་བ་བཞི་ཡི་སོགས་སྒྲིག་འདོན་གྱིས། རིམ་གསལ་ལྟར་ཛབ་བསྙེན་རྣམས་སོ་སོར་༢༥ བཟླ། དྲག་དམིགས་སྐབས་ཡིག་འབྲུ་དགུ་པ་ཏྲཀྴད་རྩ་སྔགས་སོ། །དེ་ནས་ཚོགས་ཐེངས། ཡར་འཚོགས། ཡས་ཟོར་མདོས་ཆེན་གྱི་འདོན་འགྲིགས་གཤམ་གསལ་ལྟར་དང་། དེ་ནས་སྲིད་གསུམ་གཏིང་ཟློག་ལས་གཏོར་མ་ཆེ་བ་གཉིས་དང་། མངའ་གསོལ་དང་། ཕྲིན་བཅོལ་གཏོར་ཆུང་བཅས་བཅུ་བཞི་དང་། ལས་མགོན་གཏོར་འབུལ་སོགས་བྲན་ལ། དང་པོར་རྐང་གླིང་བཞི་འབུད་བཏང་ནས། རོལ་མོ་འབེབས་དང་སུམ་བརྡུང་གིས་རྐང་གླིང་བཏང་།
རང་མདུན་ཡྃ་ལས་སོགས་དྲག་པོའི་ལྷ་ཚོགས་མདུན་བསྐྱེད་མཐར། གསལ་བའི་སྣང་བར་གྱུར་ནས་མཚམས་རྒྱག་དང་། ཟླ་གམ་དམར་ནག་སོགས། བཞེངས་བསྐུལ་སྤྱན་འདྲེན་དྲིལ། སྔགས་མཐར། རོལ་མོ་འབེབས་དང་ཌཱ་དྲིལ། གསོལ་ལོ་མཆོད་དོ་ཞེས་པ་རྣམས་ལ་སྨན་རཀ་འཐོར་ཞིང་གཏོར་མ་ལྔ་ཡི་དམ་ཟློག་གཏོར་ནང་ཕུལ། བསྟན་སྲུང་རྒྱ་མཚོ་དང་། སྣང་སྲིད་ལྷ་འདྲེ་སོགས། གཏོར་མ་གཉིས་ལས་མགོན་ཟློག་གཏོར་ནང་ཕུལ། སློབ་དཔོན་མདུན་ལས་ཕུར་དང་། ལྕགས་ཁང་དུ་ལིདྒ། ལྷ་དབྱེའི་རྫས་བཅས་བཀོད་ལ། འགྲོ་དོན་ལྷུན་འགྲུབ་ཤོག་མཐར། རོལ་མོ་འབེབས་སུམ་བརྡུང་གིས། རང་མདུན་ཨེ་ལས་དང་། ན་མོ་དཀོན་མཆོག་གསུམ་དང་ཞེས་པར་འགུགས་པའི་རྒྱས། འགུགས་རོལ་འབེབས་། གཡབ་དར ། བཤུག་པ་བཅས་ལན་གསུམ་མཐར་སུམ་བརྡུང་གིས། རང་ཉིད་སྐད་ཅིག་གིས་རྫུས་སྐྱེས་སོགས། རྡོར་ཐལ་བར་ཕུར་བུ་འཛིན་ཕུར་བསྐྱེད་དང་། དྲིལ་སྔགས་མཐར། མཚམས་རྒྱག་བཅས། འོ་ལས་ངན་ཁྱོད་སོགས། བྱ་རོག་དང་འུག་པའི་སྒྲོས། ལྷ་དང་དབྱེ་མཐར། མཚམས་རྒྱག་དང་། འོ་དམ་ཉམས་རུ་ཏྲ་ལས་ངན་སོགས། ཕུར་པ་གདབ། ལིདྒ་བསྒྲལ། དུམ་བུར་གཏུབ། དྲིལ་སྔགས་མཐར། མཚམས་རྒྱག་བཅས། གནས་སྤར། འོ་ལས་ངན་སོགས། ཕཊ་ནས། མཚམས་རྒྱག །ལིང་
རོ་སྣོད་དུ་བཞག་ལ། སློབ་དཔོན་གྱིས་འཛིན་བཞིན། དམ་ཉམས་ལས་ངན་སོགས་ནས། ༀ་ཨཱཿཧཱུྃ་གིས་བྱིན་གྱིས་བརླབས་ཞེས་པར་བདུད་རྩི་བྲན་ལ། བཞི་དྲིལ། ཀུན་བཟང་རིགས་ལྔའི་སོགས་ནས་ཞལ་བསྟབ་སྔགས་མཐར། རོལ་མོ་འབེབས་སུམ་བརྡུང་ཚེ་ལས་རྡོར་གྱིས་ལིང་རོ་ཕྱེད་ཟློག་གཏོར་གཉིས་ནང་བཏབ། ཕྱེད་ཟློག་གཏོར་ཆུང་བ་དང་བདུན་ནང་བཏབ། སོ་སོར་བདུད་རྩི་བྲན། དྲག་བསྐུལ། ཆེ་བའི་ཆེ་མཆོག་མཐར། ས་མ་ཡ་ནས། མཚམས་རྒྱག་དང་། ཕྲིན་བཅོལ་ནི། དུས་གསུམ་རྒྱལ་བའི་དཀྱིལ་འཁོར་སོགས་རིམ་བཞིན། གཏོར་ཆུང་དྲུག་ཡི་དམ་ཟློག་གཏོར་ནང་དུ་ཕུལ། བཅོམ་ལྡན་ཀུན་བཟང་ཆེ་མཆོག་སྐབས་གཏོར་ཆུང་གཅིག་མགོན་པོའི་ཟློག་གཏོར་ནང་འབུལ། གོང་འོག་གདངས་ལ་རྔ་ཚིགས་སོ་སོར་བྱ་བ་ཀུན་ལ་འགྲེ། མཐར་རྦོད་གཏོང་ཟློག་པའི་ཕྲིན་ལས་མཛོད་ནས། རོལ་མོ་འབེབས་སུམ་བརྡུང་། ལས་མགོན་གཏོར་རྦད། མ་ཧཱ་ཀཱ་ལ་སོགས་ནས། རྦད་སྔགས་དོན་བཞི་མའི་མཐར། རོལ་མོ་འབེབས་བཞག །གཏོར་འབུལ་ཏྲཀྴད་ཟློག་གཏོར་ནང་ཕུལ། རིགས་ལྔའི་གཏོར་ཟློག་སྒྲིག་འདོན་གྱིས་སོ་སོར་ཐལ་རྡེབ་བཅས་གཏོར་ཟློག་ཚར་གསུམ། དེ་ནས་ཚོགས་ཐེངས ། ལར་ཟློག་པ་ཚར་གང་འགྲོ་ཚོགས་ཐེངས་གང་འགྲིགས་དང་། ཚར་གྲངས་
གསོག་སྐབས། རོལ་མོ་འབེབས་སུམ་བརྡུང་། རང་མདུན་ཡམ་ལས་སོགས་སྔར་ལྟར་རོལ་མོ་དང་། གཏོར་འབུལ་གོང་འོག་བསྒྲལ་ལས། གཏོར་རྦད། གཏོར་ཟློག་མཐར། རོལ་མོ་འབེབས་སུམ་བརྡུང་། ཟློག་པ་ཚར་གཉིས་ཀྱི་རྗེས་མའི་སྐབས་གཏོར་རྦད་མཐར། །འཛག་ཆེ་བ་གཅིག་སུམ་བརྡུང་འཛག་མེད་ཆེ་གཅིག །སུམ་བརྡུང་ཆུང་གཅིག །དེ་འདྲ་ལན་གཉིས་མཐར་འབེབས་ཀྱིས་བཞག། དེ་ནས་གཏོར་ཟློག་གྲུབ་ནས། ཚེ་སྒྲུབ་འཆི་མེད་བཙན་རྫོང་། ཧྲཱིཿ དཀོན་མཆོག་གསུམ་དང་སོགས། རྡོར་དྲིལ་འཛིན། མདའ་དར་གཡབ། ཚེ་ཛབ་གཉིས་སྦྲེལ་༡༠༠ བཟླ། ཐལ་མོ་སྦྱར་ལ། དྲིལ། དབྱངས་གསལ། རྟེན་སྙིང་། ཡིག་བརྒྱ་སྦྲེལ་མར་ལན་གསུམ་། ཧཱུྃ་ཡེ་ཤེས་ལྷ་ཚོགས་སྦྱན་འདྲེན་སོགས། འདིར་མཆོད་བསྟོད་བཤགས་པ་ཚང་ཞིང་། མཐར་ཌཱ་དྲིལ། ཞི་རོལ་སུམ་འཕར་མཐར་བཞག །ལུས་སྣང་ལྷ་སྐུ་སོགས་བསྡུ་རིམ་དང་ཟུང་འཇུག་གི་སྐུར་ལྡང་། དེ་ནས་ཀུན་བཟང་བཀྲ་ཤིས། ཧཱུྃ། ཆོས་དབྱིངས་སྐྱེ་མེད་སོགས་དྲིལ་གསིལ་དང་། མེ་ཏོག་འཐོར། མཐར། ཌཱ་དྲིལ། ཞི་རོལ་སུ་འཕར་མཐར་བཞག །རྒྱལ་བ་རབ་འབྱམས་དཀྱིལ་འཁོར་དུ། །ཚོགས་ཀྱི་སོགས་དང་། མཆོད་སྦྱིན་གནས་འདིར་སོགས། དཀོན་མཆོག་རིན་ཆེན་སོགས། སངས་རྒྱས་
སྐུ་གསུམ་སོགས་བརྗོད། ཚོགས་གྲོལ་ལོ། །ཡེ་ཤེས་མགོན་པོའི་རྒྱུན་གཏོར་བཏང་བ་སྐབས་བསྟུན་བྱའོ། །གཏོར་བསྔོ་བཏོན་ན་མཆོད་སྦྱིན་གནས་སོགས་མགོན་པོའི་མཐར་འདོན། ༈ གཏོར་རྒྱག་ཉིན་འདོན་འགྲིགས་ཉིན་ལྟར་ལ། བསྒྲལ་ལས་སྐབས་སྔོན་དུ་ཧོམ་ནང་ཡོད་རྒྱུའི་ཤོག་ལིང་གཅིག་དེ། ཟན་ལིང་དང་མཉམ་བསྒྲལ་གྱིས། ཤོག་རས་སྦྱིན་སྲེག་བླུགས་ན་ཞལ་བསྟབ་རྒྱུ་བཞག །དེ་མིན་ཟན་ལིང་དང་མཉམ་ཕུལ་དགོས། འདོན་པ་དལ་བྲེལ་དང་། ཚོགས་ཐེངས་སོགས་གང་བདེས། སྒྲ་གཅན་ཕྱོགས་ཐེབས་བསྟུན་པའམ། སཱ་དྷ་ཀ་འཛིན་རྟོག་མེད་པའི་གདེང་ཡོད་ན་ནམ་འགྲིགས་བྱ་བའི། ཟློག་པའི་མཐའི་ཕ་རོལ་རྦོད་གཏོང་བཟློག་པའི་ཕྲིན་ལས་མཛོད། མཐར། རོལ་མོ་འབེབས་ཀྱིས་བཞག །དེ་ལས་སྔ་བར་ཕྱི་རོལ་དུ་གོམ་པའམ་འདོམ་ཉེར་ལྔ་མཚམས་སྐྱེར་ཤིང་གི་མེ་ཐབ་ཟུར་གསུམ་བརྩིག་བཅུག་ལ། རྩེ་ཕྱོགས་གཙང་ལ་གཏད་པའམ། དགྲ་ཕྱོགས་སུ་གཏད། ཉེ་སྐོར་ཚེར་མ་ཅན་སོགས་ཤིང་སྐམ་མང་བ་བཅུག །སེར་སྦྲེངས་གཤར་ན་དེའི་ཆས་བསྒྲིག་པ་དང་། དར་ནག་འཕྱར། ཟོར་ཆས་རྣམས་གྲ་བསྒྲིག །ཧོམ་ཁུང་ནས་ཤོག་ལིང་
གཅིག་དེའང་བཏོན་ལ། གསལ་ཤིང་རྩེར་བསྐྱོན་ནས་བཞག །ཡང་ན་སྒྲུབ་ཁང་ནང་ནས་གཏོར་རྒྱག་བྱེད་ཚེ་གྲལ་མདོ་ལྟ་བུར། ཕྱར་ནག་བཏིང་། དེ་སྟེང་ས་དཀར་གྱི་གྲུ་གསུམ་ཉིས་རིམ་མེ་རིས་བསྐོར་བ་བྲིས་ལ་དེ་ནང་ཤོག་ལིང་བཞག་པས་འཐུས། དེ་ནས་སློབ་དཔོན་སྔགས་ཆས་རྡོར་དྲིལ་དང་འདུས་པ་རྣམས་ཞྭ་བཞེས་ལ་མཐོན་པོ་ཞིག་ནས། གསེར་སྐྱེམས་རིན་ཆེན་སྣོད་མཆོག་ལ་ཕྱོགས་གཙང་ངམ། དགྲ་ཕྱོགས་སུ་གདོང་བསྟན་ལ། ཚིག་དང་མཚུངས་པར་གསེར་སྐྱེམས་འཐོར་བ་དང་། འབེབས་གཉིས་ཀྱི་སྔོན་མར་གསེར་སྐྱེམས་འབུལ། རྗེས་མས་བླུགས། སྐབས་ཐོབ་བྱེད། དེས་དྲག་པོའི་མདོས་ཟོར་གྱིས་ལམ་ཕྱེ་བ་སྔོན་དུ་གྲུབ་ནས། ནང་དུ་འོང་། རོལ་མོ་འབེབས་སུམ་བརྡུང་། བསྐང་བའི་བཞེངས་བསྐུལ་ཐ་ཚིག །ཧཱུྃ། བསྐུལ་ལོ་ཐུགས་དམ་སོགས་ནས། གཏོར་གཡོག་པས་སྐོང་གཏོར་བཏེགས་ལ། ལས་རྡོར་གྱིས་མར་མེ་དང་སྤོས་རྣམས་སྦར། བདུད་རྩི་བྲན། ལས་བཞིའི་ཕྲིན་ལས་མྱུར་དུ་སྒྲུབས། །རོལ་མོ་སུམ་བརྡུང་དང་། འདི་ནས། ཙཀླི་དར་གདུགས་བཀྲ་ཤིས་རྫས་རྟགས། རྒྱལ་སྲིད་ཙཀླི་རྣམས་ལེན་ལ་གཞི་སྟེང་བཞག །ཧཱུྃ། སྟོང་གསུམ་འཇིག་རྟེན་སོགས་ནས། རྦད་སྔགས་
དོན་བཞི་དང་། དམ་བཞག་སྔགས་མཐར། རོལ་མོ་འབེབས་ཀྱིས་བཞག །དལ་རན་བཅས། སྐོང་གཏོར་མཐོ་སར་ཕྱོགས་གཙང་ངམ་དགྲ་ཕྱོགས་སུ་གཏོར་ཞལ་བསྟན་ལ་བཞག །འདི་སྐབས་ཟོར་ལས་ཀྱི་འདོན་ཆ་རྣམས་མ་འཁྲུལ་བར་བསལ། གཏོར་ཁྱེར་བ་རྣམས་ཀྱང་བསྒྲིག །འདུས་པ་རྣམས་ཞྭ་བཞེས། སེར་ཕྲེང་བྱས་ན་བཞེངས། དེ་མིན་མི་དགོས། རོལ་མོ་འབེབས་མཐར་དགུ་བརྡུང་འཛག་མེད་ཀྱིས། ཧཱུྃ་འབོད་དོ་བསྐུལ་ལོ་སོགས་ཞལ་ཆེམ་ལས་འགྱེད་མཐར། རོལ་མོ་འབེབས་སུམ་བརྡུང་། ཧཱུྃ་བསྐུལ་ལོ་རྦད་དོ་རབ་འབྱམས་སོགས་ནས་སློབ་དཔོན་གྱིས་ཆོས་སྐྱོང་དང་། ཡི་དམ་གཏོར་ཆེན་གཉིས་བཏེགས་ཙམ་བྱས། སེར་སྦྲེངས་སྐབས་གཏོར་གཡོག་པར་ཁུར་བཅུག །དེ་འཕྲལ་གཞི་སྟེང་དེར་དར་དཀར་པོའི་ཐོག་ཏུ་ཕྱེ་མར་བཀོད། གཏོར་གདན་སྟག་ལྤགས་དང་། གཞན་ཟོར་ཆས་རྣམས་ཀྱང་སོ་སོར་ཁུར་བཅུག །དྲག་པོའི་ཕྲིན་ལས་མཛོད་ནས། རོལ་མོ་འབེབས་བཞི་བརྡུང་ཁོ་ནར་བྱེད་ནས་སྔོན་དུ་དཀར་གཏོར་དང་གསེར་སྐྱེམས་ཆས་ཤོག་ལིང་དང་སྟག་ལྤགས། རྐང་གླིང་། དུང་དམར། གཏོར་ཟོར་དགུ་དང་མདའ་བཅས་ཕྱོགས་གཅིག་ཏུ་བཞག་པ་དང་། ཆོས་སྐྱོང་དང་། ཡི་དམ་གཏོར་ཆེན། དར་ནག་གཉིས་སམ་
གཅིག །སྤོས་འཛིན་པ་སློབ་དཔོན་གྱིས་རྡོར་དྲིལ་གཡབ་དར་བཅས། དྲག་སྔགས་རྣམས་བཟླ་བཞིན། རྔ་བ་ཁ་ཤས་དང་རོལ་མོ་པ། དེ་ནས་རྔ་པ་ཡོངས་རྫོགས་བྱོན། འབུལ་སར་སླེབས་ནས། གཏོར་མ་རྣམས་སྟག་ལྤགས་སྟེང་བཤམས། ཉེ་སྐོར་དུ་དར་ནག་འཕྱར། སློབ་དཔོན་དབུས་དང་། གཡས་གཡོན་སེར་ཕྲེང་པ་རྣམས་བཞེངས་ལ། ཤོག་ལིང་མེ་ཐབ་ནང་བཅུག །སེར་ཕྲེང་། རོལ་མོ་འབེབས་ཀྱིས་བཞག །དེ་ནས་ཤོག་ལིང་ཆུས་བྲན། ཐམས་ཅད་ཀྱིས་འགུགས་པའི་རྒྱས། འགུག་གཞུག་རྒྱས་པ་ཚར་གཅིག །ན་མོ་དཀོན་མཆོག་གསུམ་དང་ཡི་དམ་ཞི་ཁྲོའི་ལྷ་སོགས་ཚར་གཉིས། ལན་གསུམ་ཀར་འགུགས་སྔགས་དང་། བཤུག་པ་བཅས། རང་བཟོ་མངོན་སྤྱོད་ཀྱི། ཧོ། དགོངས་སུ་གསོལ་ལོ། །གསན་དུ་གསོལ་ལོ་སོགས་དང་། རོལ་མོ་འབེབས་གཉིས་ཀྱིས། ཀྱཻ་ཉོན་ཅིག་སྣང་སྲིད་སོགས་ནས་གལ་གོལ་བ་དྲི་བ་ཆེ འོ། མཐར། རོལ་མོ་འབེབས་གཉིས་བཅས་སྐྱེམས་མཆོད། དཀོན་མཆོག་ཀུན་འདུས་མཐར། རོལ་མོ་འབེབས་གཉིས་ཀྱིས་སྐྱེམས་དང་། དཀར་གཏོར་མཆོད། རོལ་མོ་འབེབས་ཀྱིས། སྤྲོ་ན་སློབ་དཔོན་ནམ་དབུ་མཛད་ཀྱིས་བཞེས་འབོད་བཏོན་ན་འདིར་བྱ། མཐར་རོལ་མོ་འབེབས་ཀྱིས་བཞག །དེ་ནས་རང་བཟོ་མངོན་སྤྱོད་ཟོར་ལས། ཧོ།
དགོངས་སུ་གསོལ་ལོ་སོགས་དང་། ཟངས་མདོག་དཔལ་གྱི་རི་བོ་ནས། རྩད་ནས་ཆོད་པར་ཤོག༔ མཐར་རོལ་མོ་འབེབས་ཆེམ་བརྡུང་གིས་བཞག་ལ། ཡང་ཕྲིན་ལས་མཛོད་ནས་རོལ་མོ་གོང་ལྟར། ཡང་རྡུལ་དུ་རློག་ནས། རོལ་མོ་འབེབས་ཀྱིས་བཞག །ཕཊཿ ཕཊཿ ཕཊཿ མཐར་འབེབས། ཡང་རྨང་ནས་མ་ལྡང་ཞིག་ལ། འབེབས། ཡང་སྐྱབས་གནས་ཧཱུྃ་ཧཱུྃ་ཧཱུྃ། འབེབས། ཐལ་བར་རློག་ལ། འབེབས། ཧོ། དགོངས་སུ་གསོལ་ལོ། །བདེན་དོན་གཉིས་སོགས་ནས། ཐལ་བར་རློག་ལ། འབེབས་སུམ་བརྡུང་། ཚིག་རྔ་མཚམས་རྒྱག་བཅས། རྡོ་རྗེ་གྲོ་ལོད་ལན་བཅུ་གསུམ། མཐར་ཆེམ་བརྡུང་གིས་བཞག །ཧོཿ དགོངས་སུ་གསོལ་ལོ༔ བདག་ཅག་སོགས་ནས། སངས་རྒྱས་ས་རུ་ཕྱིན་ན་དགའ་མོད། མཐར། འབེབས་ཆེམ་བརྡུང་བཅས་བཞག །དེ་ལྟར་གཏོར་ཟོར་དགུ་པོ་སོ་སོར་འཕེན། ང་བདག་ཡེ་ནས་སོགས་དང་། མདའ་ཟོར་ཡང་འཕེན། རོལ་མོ་འབེབས་ཆེམ་བརྡུང་མཐར་སུམ་བརྡུང་གིས། ཧཱུྃ་མ་ཧཱ་ཀཱ་ལ་མཐུ་བོ་སོགས་དང་། ཙཀླི་གཏོར་གདུགས་ལེན། མེ་སྒྲོན་སྦར། མེ་ཐབ་ཡང་སྦར་ལ། རྦད་སྔགས་དོན་བཞི་མའི་སྔགས་མཐར། རོལ་མོ་འབེབས་སུམ་བརྡུང་དལ་རན་གྱིས། ལས་མགོན་བཟློག་གཏོར་འཕང་མཐར་སུམ་བརྡུང་གིས། ཧཱུྃ་རྡོ་རྗེ་དྲེགས་འཇོམས་ལྷ་
ཚོགས་སོགས་ནས། དགྲ་ལ་མཱ་ར་ཡ་ཕཊ་ནས། རོལ་མོ་འབེབས་ཆེམ་བརྡུང་དང་སུམ་བརྡུང་གིས་ཁྲོ་རྒྱལ་འབར་བའི་ལྷ་ཚོགས་སོགས་ལན་གསུམ་འདོན་ཚེ། ཙཀླི་དར་གདུགས་ལེན། མེ་སྒྲོན་སྦར། སྔགས་རྣམས་མཐར། ཡི་དམ་ཟློག་གཏོར་མེ་ཐབ་ཏུ་ུའཕང་ནས། མཱ་ར་ཡའི་རོལ་ཆེན་ལྡིར། དར་ནག་ལན་དགུར་བརྡབ། རོལ་མོ་འབེབས་ཀྱིས་བཞག །ཡང་ནང་ནས་གཏོར་རྒྱབ་སྐབས། གཏོར་ཟོར་འཕང་པ་ཐམས་ཅད་རེ་ཕྱར་ནང་གཏོར་གཡོག་གཉིས་ཀྱིས་བཏེག །དེ་རྗེས་ལས་རྡོར་ཞྭ་བཅས་དྲིལ་བུ་གསིལ། གཡབ་དར་གཡབ། དྲག་སྔགས་རྣམས་འདོན་བཞིན། སྐབས་སུ་རྐང་གླིང་ཡང་འབུད་ནས། སྔར་བརྩེགས་པའི་མེ་ཧོམ་ནང་གཏོར་ཟོར་རྣམས་བསྲེག་ལ། དེ་ནས་རིགས་ལྔའི་གཏོར་ཟློག་སྒྲིག་འདོན་སོ་སོར་ཐལ་རྡེག་བཅས་དང་། སློབ་དཔོན་གྱིས་མཚམས་གཅོད་དང་སྲུང་འཁོར་བསྒོམ། ཐོ་བཙུགས་ཕྱི་ལམ་བཅད། སྒྲུབ་ཁང་སྒོ་དྲུང་དུ། གཏོར་གཞོང་སྦུབ་ལ་རྡོ་རྗེས་མནན། དཀོན་མཆོག་གསུམ་དང་ཡི་དམ་ལྷ་སོགས་ནས། གཏོར་གཞོང་རི་རབ་འབར་བའི་འོག་ཏུ་ཁུག །འགུག་རོལ་ཉིས་བརྡུང་། གཡབ་དྲིལ། དྲག་འབེབས། བཤུག་པ་བཅས་ལན་གསུམ་མཐར་སུམ་བརྡུང་
གིས། ཧཱུྃ་དངོས་སྣང་སེམས་སུ་སོགས། གཏོར་བྲོ་ཕྲེང་སྦྲེལ་ལུ་གུ་རྒྱུད་བཅས་མཐར། གཏོར་གཞོང་རྣམས་ཁ་གྱེན་པས་རྣལ་འབྱོར་པ་སོགས་ནས་ཀུ་རུ་ༀ། ནས་གཏོར། ནང་དུ་འོང་དཀྱིལ་འཁོར་ལ་ཁ་ཕྱོགས་པས་རྒྱལ་དབྱངས། ཧོ་དགོངས་སུ་གསོལ་ལན་གསུམ་དང་། སིལ་སྙན་འབེབས་སུམ་བརྡུང་གིས། སྣང་སྲིད་འཁོར་འདས་སོགས་ལན་གསུམ་དང་ཟླ་བ་ཡར་ཚེས་རོལ་མོ་ལྡིར། གྲལ་ལ་བཞུགས། ཕྱེ་མར་བཀྱེ་དྲངས། ཞབས་བརྟན་དང་བཀྲ་ཤིས་བརྗོད། སྦྱིན་སྲེག་བླུགས་ན་ལོངས་སྐབས་བྱུང་ཚེ་འདིར་བྱ། མཐར་ཚེ་འགུགས་དང་བཀྲ་ཤིས་སོགས་བྱའོ། །ཕྱི་ཉིན་དངོས་གྲུབ་ལེན་ཆོག་གམ། ཡང་ན་མེ་ཧཾ་བླུགས་ན་ཉིན་དང་པོའི་འདོན་འགྲིགས་ལྟར། ཡེ་གསང་། ཤོག་ཕྲན། ཡི་དམ། མཁའ་འགྲོ། ཚོགས་ལས། སྤྲོ་ན་ཚོགས་བརྒྱ་སྐབས། བཅོམ་ལྡན་ཀུན་བཟང་ནས། བྷྱོ་བྷྱོ་ཟློག་ཟློག་བར། ཚོགས་རེ་བཤམས་ལ། བསྒྲལ་བསྟབ་བཅས་གྲངས་འཛིན། ཕུད་སྨན་གཏོར་ནང་ཐམས་ཅད་ཕུལ་ནས། ལྷག་ཕུད་ཕྱོགས་གཅིག་བཞག །སླར་ལྷག་མའི་སྐབས་ཕྱི་རོལ་དུ་འབུལ། མགོན་པོ་སྐོང་བ་བཅས། གཏོར་འབུལ་ཡང་བྱ། ཛམ་སེར་མཐར། སྦྱིན་སྲེག་འདོན་འགྲིགས་
འོག་ཏུ་གསལ། སླར་ཚེ་འགུགས་དང་བཀྲ་ཤིས་བྱ། དངོས་གྲུབ་ལེན་པ་ནང་སྔ་བར། ཞི་དྲག མཁའ་འགྲོ། ཚོགས། ཆོས་སྐྱོང་། ཛམ་ལྷ་བཏོན། ཚེ་འགུགས་ཀྱི་བསྙེན་པའི་སྐབས། ཚེ་རིལ་ཚེ་ཆང་དྲངས། དྲིལ་བཅས། དབྱངས་གསལ་རྟེན་སྙིང་ཡིག་བརྒྱ་དང་། ཡེ་ཤེས་ལྷ་ཚོགས་མཐར། ཌཱ་དྲིལ། ཞི་རོལ་མཐར་སུམ་བརྡུང་བླངས་ནས། དབང་བཞི་པ་ལེན་པ། སྐྱ་རེངས་ཤར་དུས་སམ་ཉི་ཤར་དང་བསྟུན་ལ། ཡེ་ཤེས་གསང་བའི། ཧཱུྃ་བླ་མ་རིག་འཛིན་སོགས་ནས་སྔགས་དབང་སྐབས། ཞི་བའི་རྟེན་གཏོར་ཚེ་བུམ་སློབ་དཔོན་གྱི་གནས་བཞིར་བཞག་ལ། སྔར་ལྟར་གཏོར་མ་ཡར་བཞག །ཆུ་བཞག་ལྟ་བུར་གྱུར་ནས་རོལ་མོ་སུམ་འཕར་བཅས་བཞག །རྟེན་དང་གཏོར་མའི་སོགས་ཀྱིས་བསྡུ་རིམ་དང་། ཟུང་འཇུག་གི་སྐུར་ལྡང་། བཀྲ་ཤིས་བརྗོད་ཅིང་མེ་ཏོག་ཆར་བསྙིལ། ཌཱ་དྲིལ། ཞི་རོལ་སུམ་འཕར། དེ་ནས་སླར་ཡང་གཏང་རག་ཏུ་ལྷ་བསང་བཏང་བ་སོགས་བྱའོ། ༈ །དྲག་པོའི་མེ་ཧོམ་ལས་བཞིའི་སྦྱིན་སྲེག་གི་དུས་ནི་མར་ངོའི་བརྒྱད། བཅུ་བཞིའི་ཉིན་ཕྱེད་དམ། ནམ་གུང་ཡང་ན་གང་བདེར་བྱ་བའི། ཕུང་གསུམ་སས་བསྲེས། རྒྱར་མདའ་གང་། དཔངས་ཇི་བདེ་བྱས་ལ་དུག་ཁྲག་གིས་ཆག་ཆག་བཏབ་པའི་སྟེང་། མེ་ཐབ་གྲུ་གསུམ་
ནག་པོ་རྒྱར་སོར་མོ་ཉི་ཤུ་པ། ཁ་ཁྱེར་རིམ་གསུམ་རྣམས་ལ་རལ་གྲི་དང་གྲི་གུག་སྤེལ་མས་བསྐོར། ཕྱི་རོལ་མེ་རིའི་ཕྲེང་བ་དབུས་སུ་རྡོ་རྗེ་རྩེ་ལྔ་མཐིང་ནག །དེ་རྣམས་རྡུལ་ཚོན་ནམ། བྲི་བ་གང་བདེའི་ཐབས་ཀྱིས་མཆུ་ནང་སྐྱེར་པ་སོགས་དྲག་པོའི་ཡམ་ཤིང་དུག་ཁྲག་གིས་སྦགས་པ་ཟུར་གསུམ་པའི་མཚམས་པར་བརྩེགས་པའི་ནང་མེ་ཚང་དང་། ཤར་ལྷོར་མར་ནག་གི་ཏི་ལོ་བཞག །བུད་ཤིང་སྐྱེར་པ་དང་ཚེར་མ་ཅན་ཟུར་གསུམ་དུ་བཞག །སློབ་དཔོན་གཡས་ངོས་སུ་སྟེགས་ཀྱི་ཁར་རས་དམར་པོའི་སྟེང་། ཡི་དམ་དང་ཆོས་སྐྱོང་གི་མཆོད་པ་རིམ་པ་གཉིས་སུ་བཤམས་པའི་ཡི་དམ་ལ་གཡས་ནས་བརྩམས་པའི་ཁྲག་གི་མཆོད་ཡོན། དབང་ལྔའི་མེ་ཏོག གུ་གུལ་དང་ཚིལ་ཆེན་གྱི་བདུག་སྤོས། མར་ནག་གི་སྣང་གསལ། མཁྲིས་པའི་དྲི་ཆབ། ཤ་ཁྲག་གིས་སྦགས་པའི་དྲག་བཤོས་ཟུར་གསུམ། ཐོད་རྔ་རྐང་གླིང་གི་རོལ་མོ་སོགས་དང་། གཏོར་འབུལ་དམར་གཏོར་བཅུ་ཡང་བཤམས། ཆོས་སྐྱོང་ལའང་དེ་ལྟར་གྱིས་མཆོད་པ་དང་། གཏོར་འབུལ་བཅུ་སོགས་བཤམ། གཡོན་ངོས་སུ་སྟེགས་ཀྱི་ཁར་རས་ནག་པོའི་སྟེང་ཡི་དམ་དང་། ཆོས་སྐྱོང་གི་དབྱེ་རྫས་རྣམས་རིམ་པ་གཉིས་སུ་བཀོད་པའི་གཡོན་ནས་བརྩམ་ལྕགས་སྣོད་གྲུ་གསུམ་མམ།
ཟངས་ལྕགས་སྣོད་གང་རུང་ལ་ལིདྒར་སྤར་བཏབ་པར་དུག་ཁྲག་གིས་བྱུག་པ་བརྒྱ། གལ་ཆེ་ན་དགྲ་མིང་བཅུག །ཤ་དུམ་བརྒྱ། སྔར་གྱི་ཤོག་ལིང་རས་མོ་རྣམས་ཁྲག་དང་བསྲེས་ལ་ཐོད་པར་བླུག་པ་དང་། འབྲུ་སྣ། ལྕགས་ས མ་ཟངས་སམ་སྣོད་དུ་མར་ནག་ཚན་མོ་འདི་ཐབ་ཀྱི་ཉེ་སྐོར་དུ་བཞག་དགོས། དར་ཟབ་བརྒྱ། ཀ་པཱ་ལར་བདུད་རྩི་དང་། ཐོད་པ་རཀྟས་བཀང་པ། དམར་གཏོར་བརྒྱ། ཤ་ཁྲག་བསྲེས་པའི་བག་ཕྱེའི་རིལ་བུ་བརྒྱ་བཅས་བཀོད། ཆོས་སྐྱོང་ལའང་དེ་ལྟར་བཤམས་དགོས། སློབ་དཔོན་མདུན་རྡོའི་མེ་ཡོལ་ནང་ངོས་སྟེགས་ཀྱི་ཁར། རྡོར་དྲིལ། ཐོད་རྔ། གཡབ་དར། དགང་བླུགས་ཁ་སྦྱར། དཔལ་འབར། རླུང་གཡབ། བསང་ཆུ། འཐོར་གཡབ་བཤམས་བཀོད། སློབ་དཔོན་སྔགས་ཆས་རྫོགས་པར་རུས་རྒྱན་བཅས་སོ། །དར་སྔོན་སྟོད་གཡོགས། རཀྟ་དང་། ཐོད་ཕྲེང་གི་སེ་རལ་ཁར་བྱས། གདན་ནག་པོའམ། སྔོན་པོའི་སྟེང་དུ། རྐང་པས་རྐང་པ་མནན་པའམ། གཡས་སྐྱིལ་ཀྲུང་། རྐང་གཡོན་བ སླང་བའམ། པུས་མོ་གཉིས་ས་ལ་བཙུག་པ་གང་བདེས་ཁ་ལྷོར་བལྟས་ལ། སྔོན་དུ་ལས་བྱང་བསྐྱེད་བཟླས་ཟིན་བཞིན་འདི་ནས་མ་གྲོལ་བར་
ངག་བཅད་དང་། རྡོར་དྲིལ་ཏིང་ངེ་འཛིན་དང་མ་བྲལ་བར་བྱས་ལ། དང་པོ་ཤན་པའི་ཁྱིམ་གྱི་མེ་སྣོད་དུ་བླང་བར། དཔལ་འབར་སྤར། བསང་ཆུ་བྲན་ལ། ཐབ་ཀྱི་ཏིང་ལོ་སྤར་ནས། བུད་ཤིང་རྣམས་ཀྱང་སྦར། དྲག་པོའི་སྐབས་འདིར་ལག་གཡས་དགང་གཟར་དང་། གཡོན་བླུག་གཟར་གྱིས་མར་ཁུ་ལན་གསུམ་བླུགས་ལ། མེ་གསོས་རླུང་གཡབ་བརྡེབ། རོལ་མོ་འབེབས་སུམ་བརྡུང་། ཧཱུྃ་ཧཱུྃ་ཧཱུྃ་རང་རིག་རྡོ་རྗེ་གྲོ་ལོད་སོགས། བདག་མདུན་ལྷ་བསྐྱེད་ནས། བསྲེག་པར་གྱུར་ནས། ཌཱ་དྲིལ། རོལ་མོ་འབེབས་བདུན་བརྡུང་གཉིས་རྗེས་མར་འཛག་མེད་ཀྱིས། ཧོ་ཧོ་དགོངས་སུ་གསོལ་ལོ་སོགས་སྤྱན་འདྲེན་སྔགས་མཐར་མར་ཁུ་དགང་བླུགས་ཀྱིས་བདུན་བྱོན་སྐྱེམས་སུ་ཕུལ། ཌཱ་དྲིལ། འབེབས་ཉིས་བརྡུང་གིས། ཕྱག་འཚལ་གདན་འབུལ་མཆོད་སྐོང་བཤགས་པ་བསྟོད་པའི་མཐར། འབེབས་སུམ་བརྡུང་གིས། ཟློག་པའི་ནང་གི་ན་མོ་དཀོན་མཆོག་གསུམ་སོགས་འགུགས་གཞུག་ལན་དགུ། གཡབ་དྲིལ། འགུགས་རོལ་སུམ་བརྡུང་བཤུག་པ་བཅས། ཞལ་ཕྱེ། ཧཱུྃ་ཁྲོ་རྒྱལ་དྲེགས་འཇོམས་སོགས་ནས། ལྷུན་གྲུབ་ཤོག་བར། འབེབས་ཀྱིས་བཞག ༀ་ཨཱཿཧཱུྃ་ཤྲཱིཿཧེ་རུ་ཀ་སོགས་ནས། རུ་དྲའི་རུས་པ་སོགས། ལྷ་སྔགས་དང་། རྫས་སྔགས་སྦྲེལ་མ་བརྒྱ་རེས་དང་པོ་ལིདྒ་བརྒྱ་མཐེབ་སྲིན་གྱིས་ཕུལ། མཐར་དགང་གཟར་ཁར། དམར་གཏོར་བྲན། རོལ་མོ་སུམ་བརྡུང་གིས།
ཧོ། དགོངས་སུ་གསོལ་ལོ་སོགས་ཀྱི་སྔགས་མཐར། རོལ་མོ་འབེབས་སུམ་བརྡུང་། གཏོར་མ་དགང་གཟར་གྱིས་མེ་ཐབ་ནང་དུ་འབུལ་མཐར། ཁྲོ་རྒྱལ་འབར་བའི་སོགས་ཟློག་པ་སྔགས་མཐར་ཆེམ་བརྡུང་། རོལ་མོ་འབེབས་སུམ་བརྡུང་། སྔར་བཞིན་ཞལ་ཕྱེ་དང་། མམ་ས་མཐེབ་སྲིན་གྱིས་ཕུལ་བ་དང་། རཀྟ་བླུགས་གཟར་གྱིས། འབྲུ་སྣ་མཐེབ་སྲིན་གྱིས། ཞུན་མར་དགང་བླུགས་ཀྱིས། དར་ཟབ་མཐེབ་སྲིན་གྱིས་བདུད་རྩི་དང་། རཀྟ་གཉིས་དགང་བླུགས་ཀྱིས། གཏོར་མ་དང་། ཟས་སྣ་མཐེབ་སྲིན་གྱིས་དབུལ་བ་སྟེ། དེ་ལྟར་དགྱེས་རྫས་རེ་རེ་བཞིིན་བརྒྱ་རྩ་རེ། ལྷ་སྔགས་རྫས་སྔགས་སྦྲེལ་མ་མཐར་གཏོར་འབུལ་རེ་དང་ཟློག་པ་བཅས་སྔར་ལྟར་བྱའོ། །རྗེས་སུ་གཞུང་གསལ་ལྟར་མེ་ལྷ་གྲོ་ལོད་འཁོར་བཅས་སོགས་བསྡུ་རིམ་བྱ། དེ་ནས་གསང་བདག་བསྐྱེད་བཟླས། པདྨ་ཉི་མའི་སོགས་དང་། མར་ཁུ་དགང་བླུགས་གསུམ་གྱིས་མེ་གསོས་ཤིང་། བུད་ཤིང་བསྣན་ལ་སྦར། མདུན་བསྐྱེད་ལས་མགོན། ༀ་སྭ་བྷ་ཝ་སོགས་ནས་ལྷ་བསྐྱེད། སྤྱན་འདྲེན་སྔགས་མཐར་མར་ཁུ་དགང་བླུག་གིས་བདུན་བྱོན་སྐྱེམས་སུ་འབུལ། འབེབས་ཉིས་བརྡུང་། དཀྱུས་ལྟར་ལ། བསྟོད་པའི་མཐར། འབེབས་སུམ་བརྡུང་། ཧཱུྃ། དཔལ་མགོན་སྲོག་བདུད་སོགས་ཞལ་ཕྱེ་གོང་ལྟར་ལ་
རིགས་འགྲེའོ། །རྩ་སྔགས་དང་སྤྱི་དྲིལ་གཉིས་སྦྲེལ་གྱིས། དགྱེས་རྫས་བཅུ་སོ་སོར་བརྒྱ་རེའི་མཚམས་སུ་གཏོར་མ་རེ་བྲན། འཁོར་འདས་རང་གྲོལ། སྔགས་མཐར་དགང་གཟར་གྱིས་གཏོར་འབུལ་དང་། ཁྱོད་ལ་གཏོར་མ་འབུལ་བའི་སོགས་མཐར། རོལ་མོ་འབེབས་སུམ་བརྡུང་གིས། སྔར་བཞིན་དང་། ཁྲོ་རྒྱལ་འབར་ཟློག་བཅས་རྗེས་སུ་མེ་ལྷ་སྲོག་བདུད་འཁོར་བཅས། ཞེས་ཡི་དམ་ཁ་བསྒྱུར་གསུངས་ལྟར་གྱིས་བསྡུ་རིམ་བྱ། ལོང་ཡོད་ན་མེ་མི་བསྒུལ་བར་བཞག །དེ་མིན་དུག་ཁྲག་ཆུས་ཞི་བར་བྱས་ནས། རྡོ་རྗེ་བསྡུ་བའི་རྒྱས་བསྡུས་ལ་ཆུ་བོར་འདོར་ཞིང་ལས་ཀྱི་རྗེས་མི་མངོན་པར་བྱས་ལ། ལས་གཞུང་གི་ཚེ་འགུགས་དང་བཀྲ་ཤིས་ལ་འཇུག་པར་བྱའོ། །ཡས་ཟོར་བཅའ་བཤམས་གཏེར་གཞུང་གསལ་ལྟར་མ་འཁྲུལ་བར་ཞིབ་པར་བྱས་ལ། ལས་བྱང་འོག་ཞི་དྲག་གི་བཟླས་པ་རྣམས་ཀྱི་སྔགས་ཤམ་དུ། དགྲ་བགེགས་དམ་སྲི་མཱ་ར་ཡ་ཕཊཿ བྷྱོ་བཟློག །ཐལ་རྡེབ་བཅས་ཉེར་ལྔ་རེ་བཏོན་དགོས་ཤིང་། ཟངས་སྦུབ་མའི་མཐར་མདོས་བྱིན་རླབས། ༀ་ཧ་ཧོ་ཧྲཱིཿ སོགས་སྔགས་ཚན་གསུམ་སོ་སོར་ཉེར་ལྔ་རེ་དང་། མདོས་ཀྱི་དྲུང་དམར་གཏོར་བཅུ་གཉིས་ཀྱང་བཤམས། དེ་ནས་མདོས་བསྐྱེད་པ། སྭ་བྷཱ་ཝ་དང་། སྣང་སྲིད་འཁོར་བཅས་ཐམས་ཅད་སོགས་ནས། བ་ལིདྟ་ཨཱཿ ཧཱུྃ་བར། བདུག་སྤོས་བསྲེག །རུ་དར་འཕྱར་ཞིང་། འདི་སྐབས་རོལ་མོ་ཡང་བྲེལ་ཙམ་བྱ་ཞིང་། གཡབ་༣ ཌཱ་དྲིལ། རོལ་མོ་འབེབས་དགུ་བརྡུང་འཛག་
མེད་ཀྱིས་བཞེངས་ཤིག་མར། བསྐུལ་ལོ་རྦད་དོའི་གདངས་གིས་བཀབ། བཞེངས་ཤིག་སྲིད་གསུམ་ནས་ཐུང་དུ་བཏང་། ཉིན་གཞན་ལའང་རེས་མོས་ཀྱིས་སྤྱན་འདྲེན་གཉིས་རེར་བཀབ་པའི་བསྐུལ་མཚམས་བཅས་མཐར། རོལ་མོ་འབེབས་སུམ་བརྡུང་། ཧཱུྃ་རང་བྱུང་ཆོས་དབྱིངས་སོགས། བསྐང་མཆོད་སྐབས། ཆང་དང་། རཀྟ། དུག་ཁྲག་རྣམས་རིམ་པས་མཆོད་ཅིང་། མདོས་ལ་བདུད་རྩི་འཐོར་བ་སོགས་གཞུང་ལྟར་བྱ། འགྲེས་བྱང་གཉིས་བཅས་སོ་སོའི་སྔགས་མཐར། རོལ་མོ། མཚམས་རྒྱག་དང་། མཐར། འབེབས་སུམ་བརྡུང་གིས་ལེན། དེ་ནས་ལིདྒ། མཁར་ཐབ། ཤ་དུམ་འབྲུ་སྣ་བཅས་སོ་སོར་བརྒྱ་རྩ་རེ་དང་། ལིདྒ་ལྕགས་ཁང་མདོས་དྲུང་བཤམས་ལ་ཆུས་བྲན། རང་མདུན་ཨེ་སོགས་དང་། གཡབ་དར་བཅས། འགུགས་གཞུག་ཉེར་གཅིག །འགུགས་རོལ་བཤུག་པ་བཅས་ལན་རྗེས་མར་འབེབས་མཐར་བཞག །བླ་འགུགས་ཉེར་གཅིག་སྔགས་གསོག །རོལ་མོ་སུམ་བརྡུང་གིས། འོ་ལས་ངན་སོགས་ལྷ་དབྱེ་མཐར། འབེབས་སུམ་བརྡུང་། ཞལ་ཕྱེ། ཧཱུྃ། རྒྱལ་བ་རབ་འབྱམས་སོགས་ནས། བཞེས་སུ་གསོལ་བར། མཐར། འབེབས་བཞག་རོལ། མ་ཧཱ་ཀཱ་ལ་སོགས། རྦད་སྔགས་མཐར་ཁཱ་ཧི་བཏགས་པའི་ཞལ་བསྟབ་སྔགས་ཉེར་ལྔ་རེ་དང་། ལིདྒ་ཉེར་ལྔ་རེ་སྦྲགས་ནས་ལས་རྡོར་གྱིས་མདོས་ནང་འབུལ་མཐར། རོལ་མོ་སུམ་བརྡུང་། ཧཱུྃ་མ་ཧཱ་ཀཱ་ལ་མཐུ་བོ་ཆེ་སོགས་སྔགས་མཐར། དམར་
གཏོར་རེ་མདོས་ནང་ཕུལ། ཡང་འབེབས་སུམ་བརྡུང་། གོང་ལྟར་ཞལ་ཕྱེ་རེ་དང་། རྦད་སྔགས་དང་ཞལ་བསྟབ་སྔགས་ཚན་རྣམས་རིམ་པས་ཉེར་ལྔ་རེའི་མཐར། གཏོར་འབུལ་དང་བཅས་རིགས་འགྲེའི་བཞི་གསུམ་བཅུ་གཉིས་བཏོན་པས་ཁྱོན་ཞལ་བསྟབ་རྣམ་གསུམ་བརྒྱ་རྩ་རེ་གྲུབ་པར་བྱས་མཐར། འབེབས་སུམ་བརྡུང་། དེ་ནས་མདོས་ཟོར་ལ་གཞུང་ལྟར་མཆོད་རྫས་རྣམས་ཀྱིས་གསོ་ཞིང་བྲན་ལ། བྱིན་རླབས་གོང་ལྟར། ༀ་ཧ་ཧོ་ཧྲཱིཿསོགས་སྔགས་ཚན་གསུམ་ལན་གསུམ་རེ་དང་། འབེབས་སུམ་བརྡུང་། ཧཱུྃ་རྒྱལ་བ་རྒྱལ་བའི་འཁོར་ལོ་སོགས། འགྲེས་བྱང་བཅས། བར་མཚམས་རྣམས་ལ་རོལ་མོ། མཚམས་རྒྱག་རེ་དང་བཅས། སྒྲུབ་པར་མཛོད་ནས། འབེབས་སུམ་བརྡུང་། ༀ་མ་ཧཱ་ཀཱ་ལ་སོགས་སྤྱན་འདྲེན་སྔགས་གཡབ་དར་གཡབ། དྲིལ་བུ་གསིལ་ལ་ཁཱ་ཧི། སྦྱར་བ་བརྒྱ་རྩ། ཨ་ཡ་མ་ལ་ཁཱ་ཧི་སྦྱར་བ་བརྒྱ་རྩ། རྦད་སྔགས་དང་ཐལ་རྡེབ་བརྒྱ་རྩ། དམ་བཞག་སྔགས་བརྒྱ་རྩ་བཅས་བཏོན། དེ་ནས་སྲིད་གསུམ་གཏིང་ཟློག་སོགས་ཉིན་ལྟར་དང་། གཏོར་རྒྱག་ཉིན་ཁང་ཐོག་ནས་གསེར་སྐྱེམས་དང་། སྒྲུབ་ཁང་ནས་བསྐང་བ་ཕུལ་ཐོན་ནས། མདོས་ཀྱི་སྒོ་དབྱེ་སློབ་དཔོན་གྱིས་མདའ་དར་ཐོགས་ལ། འབེབས་སུམ་བརྡུང་། ཧཱུྃ་འཁོར་འདས་
རབ་འབྱམས་སོགས་བཏོན་ལ། འབེབས་བཞི་བརྡུང་། ཞལ་ཆེམས་ལས་འགྱེད། ཧཱུྃ་འབོད་དོ་བསྐུལ་ལོ་སོགས། འབེབས་སུམ་བརྡུང་། ཧཱུྃ་བསྐུལ་ལོ་འབོད་དོ་སོགས་གཞུང་ལྟར། སེར་སྦྲེངས་སྐབས་མདོས་ཆེན་གྱི་རྗེས་ཟློག་གཏོར་གཉིས་བཏེགས་དགོས། འབུལ་སར་སླེབས་ནས་འགུགས་གཞུག་གསུམ་དང་། གསེར་སྐྱེམས་མཆོད། སྤྲོ་ན་བཞེས་འབོད། དེ་ནས། འབེབས་སུམ་བརྡུང་། ཧཱུྃ་སྔོན་བྱུང་སྲིད་པའི་སོགས་ཟོར་རྣམས་རྦད་སྔགས་དང་བཅས་སོ་སོར་འཕང་ལ། འབེབས་སུམ་བརྡུང་གིས་ལེན། ཧཱུྃ་མ་ཧཱ་ཀཱ་ལ་མཐུ་བོ་ཆེའི་མཐར་རྦད་སྔགས་བཏོན་བཞིན་རོལ་མོ་འབེབས་ཆེན་བཅས་མདོས་ཆེན་དང་མགོན་པོའི་ཟློག་གཏོར་རྒྱབ ། དེ་ནས་རྡོ་རྗེ་དྲེགས་འཇོམས་སོགས་གོང་གསལ་ཟིན་བྲིས་ལྟར་བྱས་པས་ཁྱབ་པར་ཡོད། དེ་ལྟར་གསང་སྔགས་ཀྱི་ཟབ་ཆོས་འདི་ཉིད་བཀའ་གཉན་པ་བྱིན་ཆེ་བའི། དེ་ཡང་ཐོག་མར་དབང་དང་ལུང་གིས་རྒྱུད་སྨིན་ཅིང་གྲོལ་བར་བྱ་བ་དང་། དེ་ནས་བསྙེན་སྒྲུབ་མཐར་ཕྱིན་པའི་སྒོ་ནས་བསྟན་པ་དང་བསྟན་འཛིན་གྱི་དོན་དུ་བྱ་བ་ལས། གར་ཐོད་ཐོད་དུ་བོན་གྱེར་ལྟ་བུ་མི་རུང་ཞིང་། དེ་ཡང་རྣལ་འབྱོར་པ་བསྐྱེད་རྫོགས་ལྡན་པ་རབ། ཐ་ནའང་འདོན་པ་ལྷག་ཆད་མེད་པར་མི་ཚིག་གིས་བར་མ་ཆད་པ་ཙམ་དགོས་རྒྱུ་ལས། གང་བྱུང་བྱས་པས།
གཏེར་སྲུང་གི་བཀའ་ཆད་འཁུ་ལྡོག་འབྱུང་ངེས་པས་རང་བཟོས་མ་བསླད་པ་གལ་ཆེ་ཞིང་། གཏེར་ཆེན་ཉིད་ཀྱིས་ཆོས་བདག་སོ་སོར་ཟིན་བྲིས་མི་འདྲ་བར་གནང་བའི་མཐའ་གཅིག་ཏུ་མ་ངེས་ཀྱང་འདིར་ནི་བླ་མ་ཀུན་མཁྱེན་ལ་གནང་བའི་བཞེད་པ་ཇི་བཞིན། རྗེ་ཆོས་ཀྱི་འབྱུང་གནས་ཀྱི་ལུགས་སྲོལ་གཙོར་བཏོན་པའི་བཅའ་བཀོད་འདོན་བསྒྲིགས་བཅས་རིག་འཛིན་མི་འགྱུར་རྡོ་རྗེ་དང་རོལ་པའི་རྡོ་རྗེའི་གསུང་རྒྱུན་རྣམས་དང་ཡང་གོ་བསྟུན་ནས། སི་ཏུ་པདྨ་ཉིན་བྱེད་དབང་པོས་བལྟས་ཆོག་ཟིན་ཐོར་བཀོད་པ་དགེ་ལེགས་སུ་གྱུར་ཅིག། །།