གུ་རུ་རིན་པོ་ཆེའི་གསོལ་འདེབས་ཚིག་བདུན་མར་གྲགས་པའི་ཟིན་ཐོ།
གུ་རུ་རིན་པོ་ཆེའི་གསོལ་འདེབས་ཚིག་བདུན་མར་གྲགས་པའི་ཟིན་ཐོ་ཉུང་ངུ་ལགས། རྒྱལ་ཀུན་ངོ་བོ་བླ་མ་མཆོག །པདྨ་འབྱུང་ལ་གུས་བཏུད་ནས། །གང་ལ་གསོལ་བ་འདེབས་པ་ཡི། །མན་ངག་རྣམ་པར་གསལ་བྱེད་བྲི། །དེ་ཡང་རང་ཡི་དམ་གང་རུང་དུ་གསལ་བའི་སྤྱི་བོར་རམ་སྙིང་གའི་དབུས་སུ། གུ་རུ་རིན་པོ་ཆེ་མཚོ་སྐྱེས་རྡོ་རྗེ་འཆང་དབང་ཡབ་ཡུམ་གསལ་བཏབ། དེ་ཉིད་རྩ་གསུམ་ཀུན་ཀྱི་བདག་ཉིད་དུ་ཤེས་པ་ལ། འཁོར་མཁའ་འགྲོ་སྡེ་ལྔའི་ཚོགས་ཀྱིས་བསྐོར་བ་འཇའ་འོད་འཁྱིལ་བའི་ཀློང་ན་བཞུགས་པར་བསམ་ལ་
གསོལ་བ་འདི་ལྟར་དུ་གདབ་སྟེ། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བ རླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་སྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཞེས་བརྗོད་ཅིང་དོན་ནི་གོ་བདེ་ལ་འདི་ནི་སྤྱིར་གཏེར་གཞུང་རྡོ་རྗེའི་ཚིག་དང་། བྱེ་བྲག །ཨོ་རྒྱན་ཡུལ་གྱི་ཞེས་པ་ནས། བྱིན་གྱིས་བ རླབ་ཕྱིར་གཤེགས་སུ་གསོལ་བར་རྡོ་རྗེ་ཕག་མོས་གསུངས་པར་གྲགས་པའི་ཚིག་བདུན་གསོལ་འདེབས་ཏེ་ཚིག་རྐང་བདུན་ཡོད་པས་དེ་ལྟར་གྲགས་ལ། དེ་ནས་གུ་རུའི་ཐུགས་སྲོག་སྙིང་པོ། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ ༀ་ཨཱཿཧཱུྃ་བཛྲ་གུ་རུ་པདྨ་ཐོད་འཕྲེང་རྩལ་བཛྲ་ས་མ་ཡ་ཛ་ཛཿ སརྦ་སིདྡྷི་ཕ་ལ་ཧཱུྃ་ཨཱཿ ཧྲཱིཿམ་ཧ་རི་ནི་སཿར་ཙ་ཧྲི་ཡཿཙིཏྟ་ཧྲིཾ་ཧྲིཾ་ཛཿཛཿ ཞེས་རྩ་སྔགས། བྱིན་འབེབས་སྔགས། མཁའ་འགྲོ་སྡེ་ལྔ་ཡབ་
ཡུམ་གྱི་སྔགས་དང་། གུ་རུ་མཁའ་འགྲོའི་ཚོགས་བཅས་ཀྱིས༔ བདག་ཅག་མོས་པའི་བུ་རྣམས་ལ༔ ལུས་ལ་སྐུ་ཡིས་བྱིན་གྱིས་རློབས༔ ངག་ལ་གསུང་གིས་བྱིན་གྱིས་རློབས༔ ཡིད་ལ་ཐུགས་ཀྱིས་བྱིན་གྱིས་རློབས༔ དབང་བཞི་བསྐུར་བར་བྱིན་གྱིས་རློབས༔ རྒྱུད་བཞི་དག་པར་བྱིན་གྱིས་རློབས༔ ལམ་བཞི་འབྱོངས་པར་བྱིན་གྱིས་རློབས༔ སྐུ་བཞི་ཐོབ་པར་བྱིན་གྱིས་རློབས༔ ཞེས་པ་རྣམས་ཀྱིས་རྩ་བའི་བླ་མ་གུ་རུ་ཡབ་ཡུམ་མཁའ་འགྲོའི་ཚོགས་ལ་གསོལ་བ་བཏབ་པས། གུ་རུའི་སྐུའི་སྨིན་མཚམས་ནས་འོད་ཟེར་དཀར་པོ་སྐར་མདའ་ཆད་པ་ལྟར་བྱུང་སྟེ་བདག་གི་སྨིན་མཚམས་སུ་ཐིམ། བུམ་དབང་ཐོབ་པར་བསམ། བླ་མའི་མགྲིན་པའི་གནས་ལས་འོད་ཟེར་དམར་པོ་མར་མེའི་རྩེ་མོ་ལྟར་རྒྱང་གིས་བྱོན་རང་གི་མགྲིན་པར་ཐིམ། གསང་དབང་ཐོབ་པར་བསམ། གུ་རུའི་ཐུགས་ལས་འོད་ཟེར་སྔོན་པོ་སྤོས་རེང་གི་དུད་པ་ལྟར་འཕྲོས་རང་གི་སྙིང་ཁར་ཐིམ། ཤེས་རབ་ཡེ་ཤེས་ཀྱི་དབང་ཐོབ་པར་བསམ། གུ་རུའི་གནས་ལྔ་ལས་འོད་ཟེར་འཇའ་ཚོན་སྣ་ལྔའི་རྣམ་པར་བྱོན་ཏེ་རང་གི་གནས་ལྔར་ཐིམ་པས། དབང་བཞི་པ་ཐོབ་པར་བསམ་པ་སྟེ། དབང་བཞི་སོགས་
ནི་བུམ་དབང་། གསང་དབང་། ཤེར་དབང་། ཚིག་དབང་སྟེ་དབང་བཞི་རྣམས་ཐོབ་པས་རིམ་བཞིན་གྱིས། རྒྱུད་བཞི། རྩ་དང་། རླུང་དང་། ཐིག་ལེ་དང་། བྱང་ཆུབ་སེམས་ཀྱི་རྒྱུད་དག་སྟེ། ལུས་རྩ་ཁམས་རྣམ་པར་དག་པ་ལྷར་སྦྱངས། ངག་རླུང་དབྱིངས་སུ་གྲོལ་བ་སྟེ་སྔགས་སུ་དག །ཀུན་རྫོབ་ཀྱི་ཐིག་ལེ་ཡེ་ཤེས་དྭངས་མའི་ཐིག་ལེར་དག །ཐ་མལ་གྱི་ཤེས་རྒྱུད་རང་བཞིན་ཀློང་ཡངས་སུ་གྲོལ་བ་བདེ་ཆེན་བྱང་ཆུབ་སེམས་སུ་དག་སྟེ། རིམ་པ་བཞིན་ལམ་བཞི་ཡང་འབྱོངས་ཏེ། བསྐྱེད་རིམ་གྱི་ལམ། རྫོགས་རིམ། ཕྱག་རྒྱའི་ལམ། རྫོགས་ཆེན་ལམ་སྟེ་བཞི། ཡང་ཚོགས་ལམ། སྦྱོར་ལམ། མཐོང་ལམ། སྒོམ་ལམ་བཞི་ཞེས་པས་ལམ་བཞི་ཡང་ཡོད་མོད་ཀྱི་འདི་རང་གི་སྐབས་དོན་ནི་གོང་དུ་སྨོས་པ་དེ་ཁ་སྟེ། རིག་འཛིན་ཆེན་པོ་ཚེ་དབང་ནོར་བུའི་གསུང་ལས་ཀྱང་། རྩ་རླུང་ཐིག་ལེ་བྱང་སེམས་རྒྱུད་སྨིན། བསྐྱེད་རྫོགས་ཕྱག་རྒྱ་རྫོགས་ཆེན་ལམ་འབྱོངས། ཞེས་གསུངས་པ་དང་མཐུན་པའི་ཕྱིར་རོ། །སྐུ་བཞི་ནི་སྤྱིར་གྲགས་ལྟར། ཆོས་ལོངས་སྤྲུལ་སྐུ་ངོ་བོ་ཉིད་སྐུའོ། །དེ་ལྟར་དབང་བཞི་ལེན་པའི་དམིགས་པ་དང་བསྟུན། ༀ་ཨཱཿཧཱུྃ་བཛྲ་གུ་རུ་པདྨ་དྷེ་ཝ་དྷཱ་ཀི་ནི་
ཀཱ་ཡ་ཨ་བྷི་ཥིཉྩ་ༀ༔ ཝཱཀྐ་ཨ་བྷི་ཥིཉྩ་ཨཱཿ ཙིཏྟ་ཨ་བྷི་ཥིཉྩ་ཧཱུྃ༔ སརྦ་ཨ་བྷི་ཥིཉྩ་ཧྲཱིཿ ཞེས་བརྗོད། ཏིང་ངེ་འཛིན་གྱི་དབང་བཞི་ཡང་ཡང་བླང་ཞིང་གསོལ་བ་གདབ། མཐར་གུ་རུ་རིན་པོ་ཆེ་མཁའ་འགྲོ་ཚོགས་བཅས་རང་ལ་ཐིམ་སྟེ་རྫོགས་པ་ཆེན་པོའི་ཀློང་དུ་མཉམ་པར་བཞག་གོ། །འདིར་སྨྲས་པ། རང་ཅག་བོད་ཡུལ་སྐྱེ་འགྲོ་རྣམས་ཀྱིས། །བླ་མའི་སྐལ་པ་པདྨ་འབྱུང་གནས། །བཀའ་དྲིན་མཉམ་མེད་གུ་རུ་རྗེ་དེ། །ཡིན་པར་ཤེས་ནས་གསོལ་བ་འདེབས་དགོས། །གྲྭ་པའི་གཟུགས་དང་སྒྲུབ་གཟུགས་བྱས་ནས། །ཆོས་ཀྱི་སྙིང་པོ་བླ་མ་མ་དྲན། །དམ་ཆོས་ཉམས་ལེན་རྒྱུད་ལ་མེད་པར་། །ཁ་བཤད་བྱེད་པ་བདག་འདྲའི་ཆོས་པ། །རི་ཀླུང་མེད་པར་ཁེངས་ཏེ་འདུག་གོ །རྩ་བའི་བླ་མ་གུ་རུ་རྗེ་དེ། །དྲན་པ་ཙམ་གྱིས་བྱིན་རླབས་ཆེ་བས། །གསོལ་འདེབས་བཛྲ་གུ་རུ་དྲོངས་ཤིག །ཨ་ཧོ་སངས་རྒྱས་པདྨ་འབྱུང་གནས། །ཨ་ཏི་ཀློང་ཡངས་ངང་དུ་བསྙེན་ན། །ཨ་དོན་ཆོས་སྐུའི་ངོ་བོ་པདྨས། །ཨེ་དབྱིངས་ཆེན་པོར་བསླུ་ུབ་མེད་གསུངས། །ཞེས་གུ་རུ་རིན་པོ་ཆེའི་གསོལ་འདེབས་བླ་མའི་རྣལ་འབྱོར་གྱི་ཟིན་བྲིས་ཉུང་དུ་ུའདིའང་། དབུ་མཛད་རྣམ་རྒྱལ་གྱི་འདོད་ངོར་རྡོ་རྗེའི་སྙིང་པོས་ཙཱ་རིའི་གནས་སུ་ཐུན་མཚམས་ཞིག་ཏུ་བྲིས་པ་དགེ། འདི་ཉིད་བཀའ་འབུམ་གྲས་སུ་འཇོག་མཛད་འདུག་ཅིང་ལུང་ཡང་བཞུགས་འདུག་པ་ལྟར་རོ །