ཀློང་གསལ་གཏེར་བྱོན་ཡེ་ཤེས་རབ་འབར་གྱི་བཅའ་ཐབས་འདོན་འགྲིགས་གསར་བཀོད་དོན་གསལ།
ཀློང་གསལ་གཏེར་བྱོན་ཡེ་ཤེས་རབ་འབར་གྱི་བཅའ་ཐབས་འདོན་འགྲིགས་གསར་བཀོད་དོན་གསལ་བཞུགས། །སྭ་སྟི། རྩ་གསུམ་བདག་ཉིད་པདྨ་དྲག་པོ་རྡོ་རྗེ་ཐོད་ཕྲེང་རྩལ་ལ་ཕྱག་འཚལ་ལོ། །བཀའི་གནང་བ་སྩལ་དུ་གསོལ། །འདི་ཉིད་བཅའ་ཐབས་འདོན་འགྲིགས་སྔར་གྱི་རྙིང་ལུགས་དང་། རྗེ་གོང་མའི་ཞལ་རྒྱུན་ལུགས་དང་། རིག་འཛིན་ཧྱ་གྲཱྀ་ཝས་བསྒྲལ་ལས་དང་། ཟོར་འཕེན་གསར་བཀོད་དེ་རྣམས་ཀུན་འདུས་ནོར་བུ་ལུགས་དབོན་སྤྲུལ་དེ་ཉིད་ཀྱི་བཞེད་སྲོལ་སོར་བཞག་ལ། གཏེར་ཆེན་མཆོག་ནས་ཆོས་བདག་ཨ་ལོ་ཀུན་མཁྱེན་ལ་གདམས་པའི་བསྐྱེད་རིམ་གྱི་ཟབ་གནད་གཙོར་བཏོན། ཨོ་རྒྱན་རྡོ་རྗེའི་གསུང་རྣམས་དཔང་དུ་བྱས་ནས་བཀོད་པ་ལ། དེའང་། ཐོག་མར་འདི་ཉིད་ཀྱི་བསྙེན་སྒྲུབ་སྔོན་དུ་ཐེམ་པའི་གང་ཟག་གིས། ཟླ་བ་གང་རུང་གི་དམར་ཕྱོགས་ཚེས་གཉིས་ལ་བརྩམས་ཏེ་དབེན་པའི་གནས་སུ་རྩ་གསུམ་གྱི་རྟེན་དང་། འདི་ཉིད་ཀྱི་སྐུ་བྲིས་འབུར་གང་འབྱོར་བཤམས་པའི་དྲུང་། སྟེགས་བང་རིམ་གསུམ་གྱི་དང་པོ་ལ། གཡས་ངོས་སུ་བླ་མ་ཡིིི་དམ་མཁའ་འགྲོ་ཆོས་སྐྱོང་གཏོར་མ་ལྔ་ཚོམ་མཐོང་བརྒྱུད་བཞིན་དང་། དབུས་སུ་དཀྱིལ་ཐང་ངམ། མཎྜལ་ཚོམ་བུ་ལྔའི་སྟེང་། མཉྫིའི་ཁར་ཆོས་འབྱུང་བསྣོལ་མའི་སྟེང་དུ་དཔལ་གཏོར་རྒྱན་ལྡན།
གཡོན་ངོས་སུ་བསྙེན་ཕུར་བྱིན་ཅན་དང་། ཚེ་རིལ། ཚེ་ཆང་། མདའ་དར་བཀོད། མདུན་ངོས་ཉེར་སྤྱོད་མཆོད་པ་ཆ་ཚང་བཤམས་པ་བརྗེ་མི་དགོས། དེ་འོག་གཡས་ནས་བརྩམ་སྔགས་སྲུང་མར་གཏོར་གདན་གྲུ་གསུམ་ལ་ཞིང་ལྤགས་སྟེང་། སྙིང་གཟུགས་ཅན་སྤྱི་འགྲོ། རྣམ་སྲས་གཏོར་གདན་ཟླུམ་པོ་ལ། མཁར་ཐབས་ཁ་བད་ཅན་སྟེང་དུ་ནོར་བུ་སུམ་ཚོམ་ཁར་ནོར་བུ་འབར་བ། མཐའ་འཁོར་གཏོར་འབྲང་རྒྱས་བརྒྱད་ཀྱིས་བསྐོར། བསྙེན་སྒྲུབ་ཟིན་ལ་གསལ་བའི། སྐོང་གཏོར་བང་རིམ་བཞིའི་སྟེང་། དཔལ་གཏོར་རྒྱན་ལྡན། བང་རིམ་རྣམས་སུ། ཉེར་སྤྱོད་དང་། འདོད་ཡོན་ལྔ། བཀྲ་ཤིས་རྫས་རྟགས། རྒྱལ་སྲིད། ཁྱུང་འབྲུག་སོགས་འཕུར་ལྡིང་གི་རིགས་དང་། སྟག་སེང་སོགས་གཅན་གཟན་རིགས། གླང་བསེ་རུ་སོགས་རི་དྭགས་གཡུང་དྭགས་རིགས་རྣམས་སྤར་བཏབ་པས་བསྐོར་ལ། དར་ཚོན་དང་། སྟག་གཟིག་རས་མོ། རིན་ཆེན་ཕྱེ་མ། སྨན་སྣ། སྤོས་སྣ། འབྲུ་སྣ། དམ་རྫས་སོགས་ཕྱུར་བུར་སྤུངས་ལ་བཀོད། ཁྱབ་འཇུག་དམར་གཏོར་གཡས་དཀྱུས་ལ། འཁོར་གཏོར་དེ་འདྲ་བརྒྱད་ཀྱིས་བསྐོར། དམ་ཅན་གཏོར་གདན་གྲུ་ུབཞིའི་ཁར། མཁར་ཐབས་བད་ཅན་སྟེང་། བཤོས་བུ་ཟུར་གསུམ།
འཁོར་གཏོར་དེ་འདྲ་བ་བཞི་བད་དང་མཉམ་པ། མདུན་དུ་ར་མགོ །གཡས་ལྕགས་ཏེལ། གཡོན་སྨན་ལེབ། འབྲང་རྒྱས། གསང་ཕྱི། ཏིང་ལོ་སོགས་ཀྱིས་བསྐོར། རྒྱལ་པོ་ལ་མཁར་ཐབས་བད་ཅན་སྟེང་། བཤོས་བུ་ཟུར་གསུམ་ལྔ་ཚོམ། དེ་རྣམས་ལ་སྨུག་རྩི་དང་དཀར་ཐིག་དམར་རྒྱན་གང་འོས་བྱ། མདུན་ངོས་སུ་ཆོས་སྨན་བཏབ་པའི་བདུད་རྩི་དང་། སྨན་གཏོར། རཀྟ་ཉེར་སྤྱོད་མཆོད་པ་རྣམས་ཕྲེང་ཚར་བཤམས། དེ་འོག་ཏུ་ལས་དཀྱིལ་ཞིང་ངམ་སྟག་ལྤགས་སྟེང་ལྕགས་སྣོད་དུ་སའི་ཞལ་བར་རོ་སོལ་བྱུག་ལ་འཁོར་ལོ་རྩིབས་བཅུ་བྲི། དབུས་དང་རྩིབས་བཅུའི་ལྟེ་བར་བྲུབ་ཁུང་རེ་བརྐོས་ལ། ལིང་ཁྲུས་སྔོན་དུ་ཟིན་པའི་ཤོག་ལིང་གསུམ་དགོས་པར་གཅིག་དབུས་ཀྱི་བྲུབ་ཁུང་དུ་གཏོར་ཆེན་ཞབས་སུ་བཅུག །གཉིས་ཟུར་དུ་ཧོམ་ཁུང་ནང་བཞག་ནས་སླར་བསྒྲལ་ལས་སྐབས་དམིགས་རྟེན་བྱེད། རྩིབས་བཅུ་ལ་ཟན་ལིང་རེ་བཅུག །དེ་སྟེང་དྲག་པོའི་གཏོར་ཆེན་ཟུར་གསུམ་བརྗིད་ལྡན། སྤྲོ་ན་གཏོར་ཞལ་རྔམས་པ་བྱ། རྩེ་མོར་བྱ་ཁྱུང་གི་གཟུགས་སམ་ཙཀླི་ལ་དར་དམར་གདུགས། རྩིབས་བཅུར་ཁྲོ་བཅུའི་དམར་གཏོར་རྣམས་གཙོ་བོའི་སུམ་ཆ་དང་མཉམ་པ་བར་མཚམས་རྣམས་སུ་ཁྲག་གི་ཀྱུ་གུ་ཁ་ཕྱིར་བསྟན་བཀོད།
གཙོ་གཏོར་ལ་དབུ་རྩང་གསུམ། གཡས་གཡོན་ལ་སྤྱན་རྩང་གསུམ་རེ་སྟེ་དྲུག །འཁོར་གཏོར་རྣམས་ལ་གསུམ་རེ། མཚེ་དང་ཡུངས་ཀར་ནག །ཟན་ལིང་རོ་ལྟེབས་དང་། ཤ་དང་། མེ་སྒྲོན་གཉིས་ཀྱང་གཏོར་ཆེན་རྒྱབ་ངོས་འཛུགས། མཐའ་མར་རྩང་ཕུར་དམར་ནག་དགུ་བཅུ་སྲིན་མོ་འགྲོས་སུ་བཙུགས། བ་སུ་ཏ་དང་སྔོ་དམར་སྐུད་པས་འཚུབས་མ་རིས་སུ་དཀྲིས། དེའི་གཡས་སུ་མེ་དབལ་ཟློག་གཏོར་ཟུར་གསུམ་ལ་གཙོ་གཏོར་ལས་དམའ་ཙམ། ལོགས་གསུམ་ལ་པྲ་མོ་ཧེ་གསུམ་གསུམ་ལ་དམར་གཏོར་དེ་ལས་ཆུང་ཙམ་གསུམ། གཡོན་ངོས་སུ་སྔགས་སྲུང་ཟློག་གཏོར་རྩ་གསུམ་པ། དེ་དཔལ་གཏོར་ལས་དམའ་ཙམ། དེ་མཐར་དབང་མོ་ཉེར་བརྒྱད་ལ་ཁྲག་ཀོང་ཉེར་བརྒྱད་ཀྱིས་བསྐོར། དེ་གཉིས་ལའང་རྩང་ཐུང་གསུམ་རེ། མཚེ་ཡུངས། ལིདྒ་ཉིས་བསྟབ། ཤ་དང་། མེ་སྒྲོན་རེ་འཛུགས། མཐའ་མར་རྩང་ཉེར་བརྒྱད་ཀྱིས་བསྐོར་ལ། སྔོ་དམར་སྐུད་དཀྲིས་བྱ། གཉིས་ཀར་གཏོར་གདུགས་དམར་སྨུག་རེ། ལས་དཀྱིལ་གྱི་ཉེ་ལོགས་གང་བདེར་ལྕགས་སམ་ཟངས་སྣོད་དུ། སའི་ཐུན་ཀོང་ཟུར་གསུམ་ལྔའི་ནང་རྩང་ཐུར་གསུམ་རེ་དང་། མདའ་གཞུ་མཚོན་ཙམ། རཀྟ། རྡོ། དམར་གཏོར། ཐོད་ཟོར་རྣམས་ཀྱིས་མཚན་པ་བཀོད། མདུན་
ངོས་སུ་ཁྲག་གི་མཆོད་ཡོན། དབང་པོའི་མེ་ཏོག །གུ་གུལ་སོགས་བདུག་སྤོས། ཚིལ་ཆེན་གྱི་མར་མེ། དུག་ཆུའི་དྲི་ཆབ། ཤ་ཆེན་གྱི་དྲག་བཤོས། ཐོད་རྔ་རྐང་གླིང་སོགས་ཅི་ལྟར་འོས་པ་བཤམས། ཉིན་བཞིན་གྱི་སྔོན་འགྲོ་དཀར་གཏོར་ལ་འབྲས་ཆན་དང་ཟན་རིལ་གྱིས་བསྐོར་བ། དམར་གཏོར། གླུད་གཟུགས་སྤྱི་འགྲོ། ཚོགས་ཀྱི་ཡོ་བྱད། ཞི་བཤོས་དང་། དྲག་བཤོས། བསྐུལ་ཆེན་སྐབས་འབུལ་རྒྱུའི་གནམ་ཕུད། སྨན་རཀ་གཏོར་གསུམ་སྣོད་གཅིག་ནང་བཞག་པ། དམོད་ཟློག་གི་དམར་གཏོར་དང་། ཟློག་པ་ཚར་གྲངས་ལྔའམ་གང་འདོན་ཀྱང་ཚར་རེར་གཏོར་ཆུང་བདུན་རེ་འབུལ་དགོས་པར་དེ་ལུགས་ཀྱི་འགའ་ཞིག་དང་། མེ་དབལ། ཁྱུང་། ཁྲོ་བཅུ། སྔགས་སྲུང་། དམ་ཅན། བསྐུལ་རྔ་ཡབ་མ་དང་། བཀའ་སྲུང་ལྔ། ཆད་ཐོ། བརྟན་མ་དེ་རྣམས་ལ་དམར་གཏོར་བཅུ་གསུམ་རྒྱན་རྩེ་འབུག་རེ། དྲག་པོའི་རིགས་ལ་ལྕགས་ཐེབ་གྲུ་གསུམ་འཛོམས་གལ་ཆེ། དམ་རྫས་དང་འབྲུ་སྣ་གང་འོས། འདོན་བྱ་དང་བསྟུན་པའི་གཏོར་མ་རྣམས་སྔོན་དུ་བཤམས་བཀོད་ཟིན་པར་བྱེད། ཧོམ་ཁུང་དུ་ཤོག་ལིང་གཉིས་ཡོད་རྒྱུའི་གཅིག་དེ་གྲོལ་ཉིན་ཞལ་བསྟབ་སྐབས་གཏུབ་ནས། ཟན་ལིང་དང་མཉམ་ཕུལ་དགོས། གཅིག་ཤོས་སླར་ཟོར་ལེན་བཞག་རྒྱུ་དང་། ཉིན་བཞིན་ཟན་ལིང་རེ་
དང་། སླར་མཁོ་ཁྱད་སྒོ་དབྱེ་དང་། ལམ་སེལ་ལ་དཀར་གཏོར་གཉིས་དང་། བསྐུལ་གྱི་དམར་གཏོར་བརྒྱད་རྣམས་ལ་རྩང་གསུམ་རེ་བཙུགས་པ་སྔ་རྗེས་གང་བདེར་བཅའ། ལས་འཕུར་དང་རྡོར་དྲིལ་གཡབ་དར། དབྱེ་རྫས། བྱ་རོག་དང་འུག་སྒྲོ། ཐུན་རྫས་མཚེ་དང་ཉུངས་ཀར་ནག །འབྲུ་སྣ། དམ་རྫས། ཆང་ཕུད། རཀྟ། སྤོས་ཕོར། ཆུ་གཙང་། ཆབ་བུམ་རྣམས་འདུ་བྱས་ལ། སྟེགས་གང་བདེར་ཟུར་དུ་མ་མགོན་དང་། ལྷ་སྨན་མའི་རྟེན་བཤམས་པའི་དྲུང་དུ། དེ་དག་གི་རྒྱུན་དང་རྟེན་གྱི་གཏོར་མ་གང་དགོས་མཐོང་བ་བརྒྱུད་བཞིན་ལེགས་པར་ཚར་དུ་དངར་བ་དང་། འབུལ་གཏོར་དེ་རིགས་རྣམས་ཀྱང་། དུས་གཅིག་བཅའ་བ་གང་བདེའི་ཚོགས་འདོན་མི་ཆག་པའི་ཁྱད་པར་དང་། རིམ་བཞིན་གཏོར་མ་རྣམས་བཟང་དུ་བཏང་དགོས་ཤིང་། སྣོད་སྟོང་པ་ཆེ་ཆུང་གང་ཡང་ཉེ་སྐོར་མི་བཞག་པ་གནད། སློབ་དཔོན་མདུན་ཌཱ་དྲིལ། འཐོར་ནས། ཉུངས་ཀར། གཞན་ཡང་རོལ་ཆས། རྔ་དུང་། རྐང་གླིང་སོགས་ཉེར་སྤྱད་མཐའ་དག་ཚང་བར་བྱས་ལ། མཆོད་རྫས་རྣམས་སྤོས་རུམ་དང་། ཆུ་གཙང་བྲན། ཉིན་དང་པོར། ཚིག་བདུན་མ་དང་། བསམ་པ་ལྷུན་གྲུབ། འོག་མིན་བདེ་ཆེན་སོགས་བརྒྱུད་
འདེབས། མདུན་གྱི་ནམ་མཁའ་ནས། སྐྱབས་འགྲོ་ཡེ་ཤེས་རྩེ་མོ་གསུམ། སེམས་བསྐྱེད་བདག་དང་མཐའ་ཡས་གསུམ། མ་གྱུར་འགྲོ་བ་དང་། ཤེས་རབ་དགྱེས་རོལ་ཚར་རེ་ནས། སར་དྲོངས་ཤོག༔ བར་དང་བསྐྱེད་རྫོགས་འབྲིང་པོའི་ཧཱུྃ་ཧཱུྃ་ཧཱུྃ༔ ང་ནི་ལས་ཀྱི་སོགས། དཔལ་དུ་ཤར་བར་དང་། ཕྱི་གཏོར་སྭ་བྷཱ་ནས། རིན་པོ་ཆེའི་སྣོད་སོགས། ལྷུན་གྲུབ་མཛོད༔ བར། གཏོར་མ་དཀར་དམར་གཉིས་དང་། གསེར་སྐྱེམས་ཕུལ། ཡེ་ཤེས་བླ་མེད་ནས། ཧཱུྃ༔ བར་དེའི་གླུད་གཏོར་བཏང་། བདག་ཉིད་ལས་ཀྱི་བགེགས་བསྐྲད་དང་། སྲུང་འཁོར་ནས་གཞུང་བཞིན། བྱིན་འབེབས་བསྡུས་པ་དེ་ཡིས་འཐུས། བྷནྡྷ་སྟོང་གསུམ་སོགས་བྱིན་རླབས་ནས། བཛྲ་ཙིཏྟ་ཧཱུྃ༔ བར། རྡོར་སེམས་དང་། ཁྲོ་བཅུ་བཞག །ཐུགས་ཀར་གཙུག་ཏོར་སོགས་ནས་ལྷ་བསྐྱེད། རྡོ་རྗེ་པད་ཉི་དང་། ཧཱུྃ་ཡིག་དམར་ནག་སྦྲེལ་འདོན་གྱིས། སྤྱན་འདྲེན་སོགས་སྔོན་བསྐལ་མ་དང་། བཞུགས་གསོལ། ཕྱི་ནང་གསང་མཆོད། བསྟོད་པ་ནས། དཀྱིལ་འཁོར་ལྷ་ལ་བཤགས་བར། ཛབ་བསྐུལ་ཚིག་བདུན་མ་དང་། ཞི་བསྙེན་ཤམ་ཅན་སྒྲིག་འདོན་གསུམ་དང་། ཞི་བསྙེན་བརྒྱ་བརྒྱད་སྣང་སྟོང་དབང་དྲག་སོགས། དྲག་བསྙེན་གོང་འོག་གཉིས་པ་ལྔ་ཙམ། ཡང་དྲག་
བསྙེན་བདུན། འཁོར་སྔགས་བདུན། ཁ་སྐོང་ཡིག་བརྒྱ་གསུམ་སོགས་དང་། ཛབ་བསྟོད། དེ་ནས་སྔགས་སྲུང་སོགས་བཀའ་སྲུང་ལྔ་ཡི་ལས་བྱང་བཏོན་ལ། སོ་སོའི་བསྐུལ་གྱི་འོག་བར་དང་། ཚོགས་རྡོ་རྗེ་ལྟ་བུའི་སོགས་ནས། དང་པོ་སྨན་གཏོར་དང་། བར་པ་བསྐང་གཏོར་ནང་འབུལ། སྐོང་བཤགས་དྲི་མེད་མཐའ་བྲལ་བཏང་། དེ་ནས་འབྱོར་ཚོགས་འདོད་ཡོན་སོགས་བཤགས་པ་ཡིག་བརྒྱ་བཅས། ཐ་མ་བསྒྲལ་མཆོད་སྐབས། ལས་རྡོར་གྱིས་གཡབ་དར། རྡོར་དྲིལ་བཅས། བདེན་སྟོབས་གསང་འདུས་ལེ་བརྒྱད་བཞིན་ཁ་བསྒྱུར་གྱིས་ཚར་གཅིག །ཞལ་བསྟབ་ཟློག་གཏོར་ཆེ་ཆུང་གསུམ་དང་། བཀའ་སྲུང་གཏོར་འབུལ་དྲུག་ནང་སོགས་ལ་ཕུལ། གཙང་ལྷག་ཞིག་ཀྱང་བཞག །ལས་རྡོར་གྱིས་རྡོ་རྗེ་སློབ་དཔོན་སོགས་དང་། འདུས་པ་རྣམས་ཀྱིས། གཟུང་འཛིན་བྲལ་བའི་སོགས་གྱེར། ཚོགས་ལ་རོལ། ཞབས་བརྟན་འདོན། མང་ལྷག་སྟེང་གཙང་ལྷག་བཀོད། སྨན་རག་གིས་བྲན། དང་པོ་ཕུད་སོགས་ཀྱིས་ལྷག་མ་བཏང་། ཟློག་བསྐུལ་རྔ་ཡབ་མ་དང་། སྔགས་སྲུང་སོགས་ཀྱི་བསྐུལ་རྣམས་བཏོན་ལ་སོ་སོར་གཏོར་འབུལ་དང་། ཆད་བརྟན་ནས་བཀྲ་ཤིས་སོགས་རྗེས་ཆོག་གཞུང་ལྟར་གྱིས་
འགྲུབ། དེ་ནས་མགོན་པོའི་རྒྱུན་གཏོར་མཚལ་མ་དང་། བཀྲ་ཤིས་ཚེ་རིང་མ་སྦྲགས་འདོན་སྔར་རྒྱུན་ཇི་ལྟར་བྱའོ། །ཉིན་བཞིན་འདོན་ལུགས་ནི། གོང་དུ་སྨོས་པ་རྣམས་གཞིར་བཞག་པའི། གཞུང་གི་བྱིན་འབེབས་བསྡུས་པ་དེ་རྒྱུན་པར་དང་། ཡུལ་གྱི་མིང་ནི་དང་། ཕྱི་ནང་གསང་བ་གཉིས་འདོན་རེས་སྨན་རཀ་གཏོར་གསུམ་བྱིན་རླབས་ནས་བཛྲ་ཙིཏྟ་ཧཱུྃཿབར། སྐབས་འདིར་སྔ་མའི་འདོན་ཟིན་རྣམས་སུ་མ་གསལ་ཡང་། འདོན་སྒོམ་ལ་དོན་དང་མཐུན་པའི་ཁྱད་པར། གཏེར་གཞུང་ཐེག་པའི་སྒོ་འབྱེད་ལས། འགྲོ་རྣམས་སྒྲོལ་ཕྱིར་སོགས་ནས། རང་ཉིད་རྒྱུའི་ཧེ་རུ་ཀ་བསྐྱེད་པའི་ཐུགས་ཀར་སྔགས་ཕྲེང་གསལ་གདབ་ལ། ཧེ་རུ་ཀའི་ཡིག་བརྒྱ་བདུན་བཟླ། རང་སྣང་རྡོ་རྗེ་སོགས་ནས། རང་ཉིད་ཧེ་རུ་ཀ་སོགས་ཀྱི་བླ་མའི་རྣལ་འབྱོར། གསོལ་འདེབས་དབང་བླང་མཐར། ཁྲོ་བཅུའི་སྲུང་ཟློག་ལས། བླ་མ་རྒྱུའི་ཧེ་རུ་ཀར་ཐིམ་སོགས་ནས། ༀ་གྷ་གྷ་སོགས་ནང་། ༀ་བཛྲ་མུད་ཀཱ་ར་སྦྲེལ་མ་ལན་གསུམ། ཧཱུྃ་མཛད་ཀྱི་ཐུགས་ཀར་སོགས་དང་ཧཱུྃ་བཅུ་བརྒྱ་བརྒྱད་བཟླ། ན་མཿས་མནྟ་བདུན་སོགས། ཁྲོ་བཅུ་རང་འདྲ་སོགས་ནས། སྟོང་པར་བསྒོམ་ལ། སླར་ཡང་ན་མ་ས་མནྟ་ལ། ༀ་ཧ་ར་ཧ་ར་བཏགས་པ་གསུམ། དེ་
ནས་ལས་གཞུང་གི། ཐུགས་ཀར་གཙུག་ཏོར་སོགས་ནས། ལྷ་བསྐྱེད། སྤྱན་འདྲེན། བཞུགས་གསོལ། མཆོད་བསྟོད་ནས། ལྷ་ལ་བཤགས༔ བར་དང་། གཞུང་ལས་བསྙེན་པའི་མན་ངག་ལ། ཞི་བར་བསྙེན། དྲག་པོར་སྒྲུབ། ལས་ལ་སྦྱར་ཅེས། དང་པོ་ནི། ཞི་བའི་ཛབ་བསྐུལ་སྔོན་བསྐལ་མ་ཚར་གཅིག །བཛྲ་གུ་རུ་ཤམ་ཅན་གསུམ། ཞི་བསྙེན་སུམ་བརྒྱ་བརྒྱད། གཉིས་པ་དྲག་པོའི་ཛབ་བསྐུལ་ཡེ་ཤེས་བཅུད་ཆེན་ལས། སྣང་སྟོང་དབང་དྲག་སོགས་ཨརྩིག་གོང་འོག་གཉིས་བརྒྱ་བརྒྱད་རེ་བཟླའོ། །དངོས་གྲུབ་བདེ་བ་ཆེའོ༔ གསུམ་པ་ལས་ལ་སྦྱར་བ། ཨརྩིག་ཉེར་གཅིག །གོ་ཆའི་ལྷ་ལྔའི་སྔགས། ཡ་མནྟ་ཀ་ཉེར་གཅིག་སོགས། ཡིག་བརྒྱ། ཨཱ་ལི་ཀཱ་ལི། ཡེ་དྷར་སྦྲེལ་མ་གསུམ་རེ། ཛབ་བསྟོད་ཡེ་ཤེས་ལྷ་ཚོགས་སོགས། དེ་ནས་གཏོར་བཟློག་གི་མདུན་བསྐྱེད་ལ་བསྐྱེད་རྫོགས་ཆུང་ངུའི། ཕྱི་ནང་སྣོད་བཅུད་སོགས་ནས། ལྷ་བསྐྱེད། སྤྱན་འདྲེན་མཆོད་བསྟོད་བར་དང་། ཛབ་བསྐུལ་རིགས་སྔགས་བཅུད་བསྡུས་ལས། རང་ཉིད་དྲག་པོར་གསལ་སོགས། ཨརྩིག་གོང་འོག་གཉིས་བརྒྱ་བརྒྱད་རེ། ཨརྩིག་ལ་མེ་དབལ་དང་། སྡེ་བརྒྱད་སྔགས་ཤམས་ཅན་ཉེར་གཅིག །
མངོན་དུ་གྱུར་པའོ༔ བར། ཁ་སྐོང་དང་ཛབ་བསྟོད་བྱ། སྔགས་སྲུང་། རྣམ་སྲས། ཁྱབ་འཇུག །དམ་ཅན། རྒྱལ་པོ་རྣམས་ཀྱི་ལས་བྱང་སོ་སོའི་བསྐུལ་པའི་འགོ་བར་བཏོན། དེ་ནས་བསྐྱེད་རྫོགས་འབྲིང་པོའི་ཚོགས། རྡོ་རྗེ་ལྟ་བུ་ནས་དང་པོ་སྨན་གཏོར་དང་། བར་པ་བསྐང་གཏོར་ལ་འབུལ། བསྐང་གཏོར་བྲན་ལ། བདེ་ཆེན་ཞིང་གི་སོགས་ཀྱི་བསྐང་བཤགས་བཏང་། མ་བསྐང་ཚན་གཉིས་འདོན་རེས་བྱ། འབྱོར་ཚོགས་འདོད་ཡོན་སོགས་ཀྱི་བཤགས་མཐར་ཡིག་བརྒྱ། ཐ་མ་བསྒྲལ་མཆོད་དང་། བདེན་སྟོབས་མཐོང་བརྒྱུད་བཞིན་གཅིག །བསྒྲལ་ཞིང་བསྟབ་པ་བཟློག་གཏོར་ཆེ་གསུམ་དང་། བཀའ་སྲུང་བསྐུལ་གཏོར་དྲུག་རྣམས་ལ་ཕུལ། གཙང་ལྷག་ཀྱང་སྤྲོས་ལ་བཞག །བསྟོད་ཆེན། ནུབ་ཕྱོགས་བདེ་ཆེན་སོགས་དང་། གནམ་ཕུད་བྲན་ལ། བསྐུལ་ཆེན་ནུབ་ཕྱོགས་དགོངས་ཤིག་བླ་མ་རིག་འཛིན་སོགས་བཏོན་མཐར་སྨན་རཀ་གཏོར་གསུམ་ནམ་མཁར་མཆོད། དེ་ནས་ལས་སྦྱོར་མཚོན་ཆའི་འཁོར་ལོའི་བསྒྲལ་ལས་ནུས་ལྡན་རྡོ་རྗེས་བསྒྲིགས་པའི། མཁྱེན་གསོལ་དྲག་པོ་ཡེ་ཤེས་རབ་འབར་སོགས་བཏོན་ལ། སློབ་དཔོན་མདུན་བསྒྲལ་ལས་ཀྱི་ཆས་རྣམས་བཀོད། ཨེ་མཎྜལ་ནས། ལིདྒ་ཁྲག་ཆང་གིས་བྲན་ལ། བདེན་
སྟོབས་མཐར་ཨརྩིག་དང་། དགྲ་བགེགས་ཨ་ཀཪྵ་ཡ་སོགས་འགུགས་གཞུག་ལན་གསུམ། ལྷ་དབྱེ། ཐུན་བྲབ། ཕུར་གདབ་ནས། ཞལ་བསྟབ་ཟློག་གཏོར་གཙོ་འཁོར་རྣམས་སུ་ཕུལ་ལ་ཁཱ་ཧི་བར། དེ་ནས་ལས་གཞུང་གི་དྲང་སྲོང་དམོད་ཟློག། བཅོམ་ལྡན་དཔལ་ཆེན་སོགས་ནས། འགལ་རྐྱེན་མཐའ་དག་བཟློག་བར། བར་མཚམས་གསུམ་པོར་དྲང་སྲོང་ལྷ་ཡི་སོགས་ཚིག་རྐང་བཅུ་ུགཅིག་དེ་སྦྱར་ཞིང་། ཨརྩིག་ཤམ་བུར་དྲག་པོ་ཁྲོས་པ་གསང་རྒྱུད་ལས་བྱུང་བའི་དྲང་སྲོང་དམོད་སྔགས་རེ་སྦྱར། མཐར་གཏོར་མ་ཟློག་གཏོར་ནང་ཕུལ། དེ་ནས་གཏོར་ཟློག་མཚོན་ཆའི་འཁོར་ལོའི། བཅོམ་ལྡན་དཔལ་ཆེན་སོགས་ཀྱི་བར་མཚམས་བདུན་སོ་སོར། ཨརྩིག་དང་སྔགས་ཐུན་བདུན་པ་ཞེས། ཏྲཀ་རཀྵ་སྔགས་ཚན་གསུམ་དང་། ཨ་རྩིག་ཤམ་བུར་དྲག་སྔགས་ཆེན་མོ་བདུད་པྲ་མརྟ་སོགས་དང་། རྒྱལ་འགོང་འདུལ་སྔགས་དང་། ཨ་རྩིག་ལ་བྱད་བཟློག་དྲང་སྲོང་དམོད་སྔགས་བཏགས་པ། ཡང་ཨ་རྩིག་ལ། ཡང་ཟློག་ཏྲིག་ཁྲོམ་སྦྱར་བ་དེ་རྣམས་ཐལ་རྡེ བ་དང་བཅས། ཟློག་པ་ཚར་ལྔའམ་གང་འོས་བཏོན་ལ། ཚར་རེར་གཏོར་ཆུང་བདུན་རེ་ཟློག་གཏོར་ནང་འབུལ། དེ་ནས་མེ་དབལ་གྱི་ཟློག་པའི་ཕྲིན་
ལས། གཞེངས་ཤིག་བཞེངས་ཤིག་སོགས། ཟློག་ཚན་ལྔ་ལ་དྲང་སྲོང་ལྷ་ཡི་དམོད་པ་སོགས་ཚིག་རྐང་བཅུ་བཞི་དེ་སྦྱར་ནས། ཨ་རྩིག་ལ་སྡེ་བརྒྱད་ལས་སྔགས་སྦྱར། མཐར་གཏོར་མ་མེ་དབལ་ཟློག་གཏོར་ནང་ཕུལ། ཁྱུང་ཟློག །ༀ་མ་ཧཱ་ཤུཎྱ་ཏ་སོགས་ནས། བཟློག་ཅིག་སྒྲོལ་བར་དང་། ཁྲོ་བཅུའི་ཟློག་པ། ཆེ་མཆོག་པདྨ་ནས། བྷྱོ་བཟློག་བར། འདི་སྔ་རྗེས་གཉིས་གཏོར་མ་ཟློག་གཏོར་ནང་ཕུལ། རལ་གཅིག་བཀའ་ཟློག །ཡེ་ཤེས་ཀུན་གྱི་ནས། ཕཊ་ཕཊཿབར། གཏོར་མ་སྔགས་སྲུང་ཟློག་གཏོར་ལ་ཕུལ། རྡོར་ལེགས་ཀྱི་ཟློག་པ། དབང་དྲག་པདྨའི་བཀའ་ནས། རྦད༔བར་གཏོར་མ་ཕྱི་རོལ་འབུལ། མི་ཁའི་ཟློག་པ། བདག་ཉིད་པདྨ་དྲག་པོ་ནས། སྔགས་དང་ཟློག་པ་ལན་གསུམ་མཐར། རིག་སྔགས་བདེན་པའི་དམོད་པ་ཡི་སོགས་ནས། རྒྱས་བར་མཛོད་བར་བརྗོད་ལ། ཆོས་བདག་ཀུན་མཁྱེན་གྱིས་མཛད་པའི་ཚོགས་ཞུ་ལན་གཉིས་དེ་བརྗོད་ལ་རོལ། ཞབས་བརྟན་དང་། ལྷག་མ་བསྡུ་བཀོད། སྨན་རཀ་བྲན་ལ། དང་པོ་ཕུད་ཀྱི་སོགས་ལྷག་གཏོར་བཏང་། བཤལ་ཆུ་བརྟན་མའི་གཏོར་མར་བླུག །ཟློག་བསྐུལ་རྔ་ཡབ་མ་དང་། སྔགས་སྲུང་མ་སོགས་ཀྱི་བསྐུལ་གཏོར་རྣམས་སོ་
སོར་ཕུལ། ཆད་ཐོ་དང་། བརྟན་མ་ཕུལ། གཏོར་བྲོའི་མཐར། གཏོར་གཞོང་རྣམས་ཁ་གྱེན་པས་སོགས་བརྗོད། མེ་ཏོག་འཐོར། ཚེ་འགུགས། རང་སྣང་ཤེས་རིག་སོགས་མདའ་དར་གཡབ། བཛྲ་གུ་རུ་ཚེ་ཤམ་ཅན་དང་། ཚེ་བྷྲཱུྃ་སོགས་སྒྲོལ་མ་ཉེར་གཅིག་བཟླའོ། །དངོས་གྲུབ་ལེན་པ། བཀྲ་ཤིས་དང་། བསྡུ་རིམ་མཐར། ལྷའི་སྐུར་ལྡང་ནས། བསྔོ་སྨོན་བྱ། པདྨ་དྲག་པོའི་དཀྱིལ་འཁོར་དུ། །ཚོགས་ཀྱི་འཁོར་ལོ་སོགས་བརྗོད། དེ་ནས་མ་མགོན་རྒྱུན་གཏོར་དང་། ལྷ་སྨན་ཚེ་རིང་མའི་གཏོར་ཆོག་སྒྲག་འདོན་རྣམས་སྔར་ལུགས་ཇི་བཞིན་པར་ཉམས་མེད་བྱའོ། །གཏོར་རྒྱག་སྐབས། ཟོར་ལས་མཚོན་ཆའི་འཁོར་ལོ་བཞིན་དགོས་རྒྱུར་ཀྱང་། ཧྱ་གྲྀ་ཝས་གསར་བསྒྲིགས་དེ་དབང་གི་རྡོ་རྗེ་ནས་གསུངས་པར་བཞེད་པས། གཏོར་རྒྱག་ཕྱོགས་ཐེབས་དང་ཆུ་ཚོད་བསྟུན་དགོས་བཞིན། ལས་གཞུང་ཉིན་ལྟར་ལ། ཟློག་པ་ཚར་གྲངས་སོགས་གང་འོས་ཀྱིས། ཚོགས་རོལ་དང་། ལྷག་མ་བཏང་བའི་རྗེས་སུ། ཁང་ཐོག་ནས། སྒོ་དབྱེའི་དཀར་གཏོར་དང་། གསེར་སྐྱེམས་ཀྱི་ཆས་ཐོག ས་ལ། ཨ་ཀཱ་རོ་གསུམ་གྱིས་བྱིན་བརླབས། བྷཱུྃ་ལས་རིན་ཆེན་བར་མཚམས་གསུམ་ལ་སྐྱེམས་དང་། མཐར་དཀར་
གཏོར་མཆོད། རྡུལ་དུ་རློགས་བར། ནང་དུ་འོང་ལ། སློབ་དཔོན་གྱིས་སྒོ་རྩང་བཞི་ལེན་ལ། གཏོར་ཆེན་གསུམ་ཁ་ཕྱིར་བསྟན་ལ་ཅུང་ཟད་དཔག །མེ་དབལ་ཟློག་པའི་མཐའི། ང་ནི་དབང་དྲག་བདྨའི་སོགས་ནས། བསྟན་དུ་གསོལ་བར། གསེར་སྐྱེམས་བཤམས་ལ། ཐ་ཚིག་བསྒྲ ག་པ། ཧྲཱིཿ བདག་ཉིད་གང་ཤར་རང་གྲོལ་སོགས་ནས། སྐྱེམས་ཕུད་འཛིན་བཞིན་མཐར་ལས་རྡོར་གྱིས་ནམ་མཁར་མཆོད། ཨ་མྲྀ་ཏ་ན་ར་ཀན༔ བར། དེ་ནས་ཚོགས་པ་རྣམས་བཞེངས། ལམ་སེལ་དཀར་གཏོར་བྲན། ༀ་དཾཥྚཏ་སོགས་ཀྱིས་བསང་། ཐོད་པའི་སྣོད་སོགས་ནས། ཤར་ལ་སོགས་པ་བཏོན་ནས་ཕུལ། དར་ནག་ཕྱར། སེར་སྦྲེངས་ཇི་བཞིན་ཆས་པའམ། སྒྲུབ་ཁང་ནས་གཏོར་མ་རྡེག་པ་ཅི་ལྟར་བྱས་ཀྱང་ཁོག་ཕྱོགས་མཚུངས་དགོས་པས། སྔ་ནས་ས་གཞིར་གྲུ་གསུམ་ཉིས་རིམ་མེ་རིས་བསྐོར་བའི་ལྟེ་བར་ནྲྀ་ཏྲི་བྲི། བུད་ཤིང་གྲུ་གསུམ་པ་བརྩིག་པའི་རྩེ་ཕྱོགས་གང་ཡིན་དེར་བསྟན་པ་སོགས་ཚག་བཀོད་གྲུབ་པར་བྱས་ལ། གཏོར་ཟོར་རྣམས་གཏེགས་ནས་བཤམས་ཟིན་པར། ཟོར་ལན་ཤོག་ལིང་ཡང་བཙུག །དང་པོ། གསེར་སྐྱེམས་ཐོགས་ལ། སྣང་ཞིང་སྲིད་པའི་ལྷ་སོགས། བར་
མཚམས་གསུམ་ལ་མཆོད། ན་མོཿ རྗེ་བཙུན་སོགས་འགུག་གཞུག་ལན་གསུམ། དེ་ནས་དམར་གཏོར་བརྒྱད་བྲན། ཟློག་བསྐུལ་རྔ་ཡབ་མ། བཀའ་སྲུང་གཞན་ལྔ་ཉིན་ལྟར་བཏོན་པ་གཏོར་མ་རྣམས་ཟོར་དུ་འཕེན། སྔོན་ཚེ་འདས་དུས་སོགས། ཆད་ཐོའི་གཏོར་མའང་བརྡེག །རབ་འཇིགས་རྔམ་པའི་སོགས་ནས་མདའ་གཞུ་སོགས་ཀྱི་ཟོར་ཚན་ལྔ་པོ་རིམ་བཞིན་རྡེག །སྔགས་སྲུང་མའི་བཀའ་ཟློག །ལས་ཀྱི་དབང་མོ་སོགས་ཀྱིས་མེ་སྒྲོན་སྦར་ལ། སྔགས་མཐར་གཏོར་ཟོར་བརྡེག །མེ་དབལ་གཏོར་མ་བཏེགས་ལ། རྔམ་བརྗིད་པདྨ་དྲག་པོ་སོགས་མེ་སྒྲོན་སྦར། མཐར་རྡུལ་དུ་རློགས༔ ནས་གཏོར་ཟོར་རྒྱབ། ལྷ་ཚོགས་རྣམས་ལ་དམོད་བཅོལ་ཆེད་དུ་སློབ་དཔོན་གྱིས་གསེར་སྐྱེམས་ཐོགས་ལ། བཞེས་འབོད། ཧོ་དགོངས་སུ་གསོལ་ལོ་སོགས་གཞུང་གི་བར་མཚམས་གསུམ་དེར་སྐྱེམས་མཆོད། ཐམས་ཅད་ཀྱིས་སྒྲིག་འདོན་དང་། མེ་སྒྲོན་གཉིས་སྦར། མཐར་ཨརྩིག་དང་། བདུད་པྲ་མརྟ་ནའི་སྔགས་རྣམས་བརྗོད་བཞིན་གཏོར་ཆེན་བརྡེག་ལ་མེ་ཧོམ་དུ་ཕུལ། རོལ་ཆེན་མཱ་ར་ཡ་དང་། གཡབ་དར་གཡབ། དར་ནག་བརྡེག །དེ་ནས་
སར་བཞུགས་ལ། ལོག་ཏྲིའི་སྔགས་ཉེར་གཅིག་དང་། ཏྲིག་ཁྲོམ་མ་ཉེར་གཅིག་མཐར། ན་མོཿ སངས་རྒྱས་ཀྱི་བདེན་པ་དང་སོགས་སྤྱི་འགྲོ་བཞིན་ཐལ་རྡེབ་དང་བཅས་ཚར་གསུམ་། རིག་སྔགས་བདེན་པའི་སོགས་ནས། རྒྱས་པར་མཛོད་བར་དང་། བཞེངས་ལ། བརྟན་མ་སྐྱོང་། གཏོར་གཞོང་རྣམས་བརྩེགས་མར་སྦུབ་ལ་ཉེ་ལོགས་སུ་དར་ནག་སྦྲེང་། སློབ་དཔོན་གྱི་རྡོ་རྗེས་མནན་ལ། ན་མོཿ རྗེ་བཙུན་སོགས་འགུགས་གཞུག་གོང་བཞིན་ལ། གཏོར་གཞོང་རི་རབ་འབར་པའི་འོག་ཏུ་སོགས་ཁ་བསྒྱུར་ནས། ཨ་ཨ་བར་ལན་གསུམ་བརྗོད། དེ་ནས་གཏོར་གཞོང་རི་རབ་འབར་བའི་སོགས་ཀྱི་མཐར། གཏོར་གཞོང་རྣམས་ཁ་གྱེན་པས་རྣལ་འབྱོར་པ་སོགས་བརྗོད། མེ་ཏོག་འཐོར། མཚམས་གཅོད། སྲུང་འཁོར་དང་། ཁྱུང་གི་དམིགས་པས་ཕྱི་ལམ་བཅད་ལ་ཡར་བྱོན། སྒྲུབ་ཁང་སྒོའམ། ནང་གང་བདེ་ནས་འདོན་ཟིན་སྔར་ལུགས་ཀྱི་རྒྱལ་དབྱངས། དགྲ་བགེགས་བདུད་བཞི་ཐུལ་སོགས་ཚར་གསུམ་གྱེར་ལ། དཀྱིལ་འཁོར་ལྷ་ལ་མེ་ཏོག་འཐོར། མཐར་ཞི་རོལ་ཟླ་བ་ཡར་ཚེས་བཀྲོལ། གྲལ་ལ་འཁོད་ནས། ཕྱེ་མར་དྲངས། ཞབས་བརྟན་དང་། ཤིས་བརྗོད། ཚེ་འགུགས་སོགས་བཏོན་ལ།
མགོན་ཚེ་གཉིས་བཅས་ཉིན་ལྟར་གྱིས་འགྲུབ་བོ། །སྐབས་འདིར་སྦྱིན་སྲེག་བྱ་ན། ཚེ་འགུགས་དང་རྗེས་ཆོག་གི་སྔོན་དུ་བྱ། ཕྱི་ཉིན་འདྲར་སྟབས་བདེ་ངེས་པས། ལས་བྱང་ཉིན་དང་པོ་བཞིན་བཏང་ནས། ཚོགས་ལས་ཞལ་བསྟབ་གྲུབ་ནས་ཚོགས་རོལ་དང་། ཞབས་བརྟན་བཏོན་མཚམས། གནས་དེའམ་གཞན་གང་བདེར་མཆོད་རྫས་བཤམས་བཀོད་སོགས་སྔ་ཚགས་ཟིན་པར་བྱས་ལ། དང་པོ། སྣ་སེལ་གསེར་སྐྱེམས་བདེ་བར་གཤེགས་སོ་ཞེས་པ་བཏང། ཞི་བའི་སྲེག་བླུགས་དངོས་གཞི་གཏེར་གཞུང་རྒྱལ་སྲས་ཀྱིས་བསྒྲིགས་པའི་གོ་གསལ་བར་ཞིབ་དཔྱད་གནང་འཐུས་མཐར་ཆགས་སུ་བཏོན་པའི་མཐར། ལས་གཞུང་གི་ཚོགས་ལྷག་དང་། བསྐུལ་རྣམས་སོགས་རྗེས་ཆོག་གཞུང་བཞིན་གྱིས་ཁྱབ། །ཡང་ཚེས་ཉེར་བདུན་དང་ཉེར་བརྒྱད་ལ་མ་མོའི་ཁྲག་མདོས་དང་། རྒྱལ་མདོས་དམིགས་བསལ་སྦྱར་དགོས་ཚེ། ལས་གཞུང་གི། དབྱངས་གདངས་སྐོར་འདོན་པ་ཟོར་ཡང་ཙམ་བྱས་ལ། ཚོགས་ལྷག་གི་རྗེས་ཐོག་དེར། གླུད་མདོས་ཡས་ལྟག་གི་རྫས་རྣམས་གཞུང་གསལ་གང་དགོས་སྔ་ནས་བསྒྲིགས་བཀོད་གྲུབ་པ་ཟིན་ནས། ཁྲག་མདོས་ལ། ན་མཿ ས་མནྟ་སོགས་ལན་གསུམ་
རེ་དང་། ན་མོ་སངས་རྒྱས་སོགས་ཚར་གྲངས་གང་འོས་བསགས་ལ། གླུད་རྫས་བྲན་ཅིང་། བསྔོ་བསྒྲངས་བྱས་ལ། མཐར་གསེར་སྐྱེམས་མཉམ་ཉིད་ཆོས་སྐུ་སོགས་ཀྱིས་མཆོད་ལ། སྔོན་གྱི་བསྐལ་པའི་སོགས་མཐར་མདོས་ཕྱོགས་གཙང་ལ་རིང་བར་རྫོངས། རོལ་ཆེན་དང་། མཚམས་གཅོད། སྲུང་འཁོར་བསྒོམ་ལ། དེ་ནས་ལས་བྱང་གི། བསྐུལ་བ་རྣམས་ཕྱིན་དཀྱུས་ལྟར་བཏོན། །རྒྱལ་མདོས་སྐབས་ཀྱང་འདི་མཚུངས་ཀྱི། ཆས་རྣམས་འཛོམས་པར་བྱས་ལ། ཉོན་ཅིག་ནམ་མཁའི་ལྷ་སོགས་ནས། སྤྱན་འདྲེན་མཐོ་ནམ་མཁའ་སོགས། ར་ཁྲི་ར་ཛ་ཛཿབར། རྒྱ་ཆིང་། ཀྱཻ། ལྷ་སྲིན་སོགས། ཚེ་བསྲིང་དུ་གསོལ་བར། དེ་ནས་རྒྱ་ཆིང་སྨྲ་ར་སོགས། དངོས་གཞིའི་གླུད་བསྔོ་ལེ་ཚན་རྣམས་རྫོགས་ནས། བསྲིང་དུ་གསོལ་བར། ན་མཿསརྦ། སོགས་གསུམ་རེ། ཉོན་ཅིག་ནས། ཧཱུྃ། བར་བྱང་གཅིག་དེ་ཚར་གྲངས་གསོག་མཐར་ཁྲག་མདོས་ཀྱི་གསེར་སྐྱེམས། མཉམ་ཉིད་ཆོས་སྐུའི་སོགས་བཏང་། རྒྱལ་མདོས་ཀྱི་ཉོན་ཅིག་སྣང་སྲིད་ལྷ་འདྲེ་སོགས་དང་། ད་ནི་མདོས་ཀྱི་ལམ་བསྟན་སོགས། མཐར་མདོས་ཕྱོགས་གཙང་ལ་རིང་བར་སྐྱེལ། རོལ་ཆེན་དང་། མཚམས་གཅོད། སྲུང་འཁོར། དེ་ནས་གོང་བཞིན་ལས་གཞུང་གི་བསྐུལ་རྣམས་བྱའོ། །
ཡང་ཚོགས་བརྒྱ་སྤྲོ་ན། ལས་བྱང་ཉིན་དང་པོ་སོར་བཞག་གི། ཚོགས་རྡོ་རྗེ་ལྟ་བུ་ནས། དང་པོ་མཆོད་པ། བར་པ་བསྐང་བཤགས། ཐ་མ་བསྒྲལ་བསྟབ་བཏོན་ལ། བདེན་སྟོབས་བསྡུ་ན་དཀོན་མཆོག་གསུམ་དང་ཡི་དམ་སོགས་ཤླཽ་ཀ་ཞེས་འཐུས་པར། གྲངས་འཛིན་ཅིང་མཐར་ཚོགས་རོལ་དང་། རྗེས་ཀྱི་བྱ་བ་སོགས་གཞུང་ལྟར་རོ། །དངོས་གྲུབ་ལེན་ཆོག །ནངས་སྔ་བར་འཚོགས་ལ་ལས་བྱང་བཏང་ནས་སྐྱ་རེངས་ཤར་བའམ། ཉི་ཤར་རྩེ་སྤྲད་ཀྱིས། ཚེ་བསྙེན་བརྒྱ་བརྒྱད་བཟླ་སྐབས། ཚེ་རྫས་དངོས་གྲུབ་ཏུ་རོལ། དབང་བླང་དངོས་ཀཱ་ཡ་སིདྡྷི་སོགས་ཚར་བདུན་རིང་། དཔལ་གཏོར་དང་། བསྙེན་ཕུར། སློབ་དཔོན་གྱི་གནས་གསུམ་དག་ལ་དབང་བླང་། དེ་ནས་བཀྲ་ཤིས་དང་། བསྔོ་སྨོན་རྗེས་བསྡུ་གྲུབ་ཐོག །ལྷ་བསང་གཏང་རག་གི་ཚུལ་དུ་བཏང་བར་བྱའོ། །ཅེས་བསྟན་པའི་སྤྱི་རི མ་དོན་ལ་སྨན་པའི་ཆེད་དུ་གཞུང་གི་དགོངས་པ་དང་བསྟུན་ནས། སི་ཏུ་པདྨའི་མིང་ཅན་གྱིས་གསལ་བར་བཀོད་པ་ནོངས་པ་བཟོད་ཅིང་། དགེ་བས་བསྟན་པ་རྒྱས་ཤིང་འགྲོ་ལ་དགེ་བའི་དཔལ་དུ་ཤོག །སརྦ་ཛ་ག་ཏམ། །
དེའང་འཕགས་མཆོག་ཕྱག་ན་པདྨོ་དང་རྣམ་དབྱེར་མེད་པའི་རྒྱལ་དབང་ཀརྨ་པ་རིམ་པར་བྱོན་པ་རྣམས། མཉམ་མེད་ཤཱཀྱའི་རྒྱལ་པོ་དང་། ཨོ་རྒྱན་རིན་པོ་ཆེས་བཀའ་གཏེར་དུ་མ་ནས་ཡང་ཡང་བསྔགས་བརྗོད་ལུང་གིས་བསྟན་པར་གསལ་ཞིང་། ཁྱད་པར་རྗེ་བདུན་པ་ཆོས་གྲགས་རྒྱ་མཚོ་ཉིད་བྲམ་ཟེ་པདྨ་དཀར་པོ་དང་ཐུགས་རྒྱུད་གཅིག་པར་གསུངས་པའི་མྱོང་གྲོལ་རིལ་ནག་གི་ཕབ་རྒྱུན་གཙོ་བོའང་དེ་ལྟའི་སྐྱེ་བདུན་དམ་རྫས་འདི་ཉིད་ལེན་ཅིང་། གཞན་ཡང་ཡེ་ཤེས་རང་སྣང་གི་ཅོད་པན་མཚོན་ཕྱིར་བརྡ་ཐབས་ཀྱི་ཞྭ་ནག་གསེར་མདངས་ཅན་མཇལ་བའི་ཕན་ཡོན་སོགས་ཀྱང་སངས་རྒྱས་རྣམས་ཀྱི་ཕྲིན་ལས་འདོད་དགུར་བསྒྱུར་བའི་ཐབས་ཚུལ་ཁོ་ན་སྟེ། །སྐྱེ་བདུན་རིལ་བུས་འདུལ་བའི་དུས་ཚོད་ནི་དེང་གི་སྐབས་ཉིད་དུ་ངེས་པ་སྟེ། དོན་ཏིག་འགྲོ་བ་ཀུན་གྲོལ་གྱི་རྒྱུད་ལས། སྙིགས་མའི་དུས་སུ་ཚེ་ཐུང་ནད་མང་ཞིང་། །ལོངས་སྤྱོད་དབུལ་ཕོངས་ཉོན་མོངས་རང་གར་སྤྱོད། །ཆོས་ལ་ཉན་བསམ་སྒོ་གསུམ་གུས་མཁན་མེད། །དེ་དུས་ཚེགས་ཆུང་དོན་ཆེའི་དམ་རྫས་འདི། །འགྲོ་དོན་ཕྱོགས་བཅུར་སྐྱོ་ངལ་མེད་པར་སྤེལ། །ཞེས་པ་ལ་སོགས་ཕན་ཡོན་བརྗོད་ལས་འདས་པ་མཆིས་སོ། །