པདྨ་བཛྲ་གྲུབ་ཐོབ་རྒྱ་མཚོའི་དཀྱིལ་འཁོར་བཤམས་བཀོད་འདོན་འགྲིགས་མ་ལི་ཀའི་ཕྲེང་བ།
པདྨ་བཛྲ་གྲུབ་ཐོབ་རྒྱ་མཚོའི་དཀྱིལ་འཁོར་བཤམས་བཀོད་འདོན་འགྲིགས་མ་ལི་ཀའི་ཕྲེང་བ་བཞུགས་སོ། །གུ་རུ་པདྨ་བཛྲ་ན་མོ། དང་པོས་གཞི་གཙང་མར་ལྡིང་ཁྲི་བང་རིམ་གསུམ་ཅན་བཀོད་ལ་གོང་མར་རས་བྲིས་བཀྲམ། དེ་སྟེང་མཉྫི་ལ་སུམ་བརྩེགས་འོག་མར་དཔལ་གཏོར་རྒྱན་ལྡན། བར་པར་བུམ་པ་རྫས་ལྡན་དང་དར་སྣ་ཚོགས་ཀྱི་མགུལ་ཆིངས་དུང་ཆོས་གཟུངས་རྡོར་བཞག་ཅན། སྟེང་མར་ཀ་པཱ་ལ་མཚན་ལྡན་རྫས་ཀྱིས་བཀང་བ་བཅས་དར་དམར་ཆོས་འབྱུང་ལྟེབ་ཀྱིས་བཀབ། དེ་སྟེང་རིམ་བཞིན་གསུང་དཀྱིལ། ཐིག་ལེའི་སྨིན་ཆེན། དཀྱིལ་འཁོར། ཕྱག་མཚན་དཀྱིལ་འཁོར་རྣམས་མ་རེག་ཙམ་གྱིས་ཙཀླི་སྐུ་ཡི་དཀྱིལ་འཁོར་གྱི་ནང་དུ་བཤམས། སྐུའི་དཀྱིལ་འཁོར་སྟེང་བླ་བྲེ་དང་། འཕན་སོགས་མཛེས་པ་བསྟར། གོང་སྨོས་དཔལ་གཏོར་གྱི་ཕྱོགས་བཞིར་ལས་བཞིའི་གཏོར་མ། མཚམས་བཞིར་ལྷ་བཤོས་བཞི་བཤམས། དེ་ཕྱིར་མཆོད་པ་སྐོར་བཤམས་གཡས་བསྐོར་བྱ། སྟེང་ཕྱོགས་གང་བདེར་མཚན་བརྒྱད་ཙཀླི་བཀོད། ལས་བུམ་ལ་མགུལ་ཆིངས་དཀར་པོ་
ཁ་རྒྱན་བཅས་གཡོན་ཕྱོགས་སྟེགས་དང་པོར་བཞག །སྤྲོ་ན་སྒབ་སྐོར་གྱིས་བཀླུབ། དེའི་ཕྱིར་སྟེགས་གཉིས་པར་མྱོས་བྱེད་ཀྱི་མཆོད་ཡོན། མེ་ཏོག །བདུག་སྤོས། སྟེགས་གསུམ་པར་རཀྟའི་དྲི་ཆབ། གཏོར་མ་ཟུར་གསུམ་རྒྱན་ལྡན། དར་ཟབ། ཚོགས་དང་། དམ་རྫས། མར་མེ་བཅས། ཕྱོགས་རེར་ཉེར་བདུན་རེ་བཀོད་པའི་བརྒྱ་རྩ་བརྒྱད་ཚང་བར་བཤམས། དེའི་སྟེང་འོག་གི་ཕྱི་ནང་གང་བརྒྱ་རྩའི་ནང་དུ་བཀའ་སྲུང་བདེར། ཤར་དུ་ཕྱག་བཞི་གཡས་ཟུར་པ། ལྷོར་ལེགས་ལྡན། ནུབ་རང་བྱུང་མ། བྱང་ཏྲཀྴད་གཏོར་མ་བཅས་གསུམ་མེ་རིས་བརྒྱན་པ་དང་ཤ་དར ། མདུན་དུ་ལྷ་བཙན་དཀར་བཤོས་པདྨས་མཚན་གཡོན་དུ་བཞག་པ་བཅས་ལ་སོ་སོའི་ཙཀླི་བཙུག་པ་དང་། དཀྱིལ་འཁོར་མདུན་ངོས་སྟེགས་བར་མར་གཡས་སྨན་མཆོད་ཡོན་སོགས་བརྒྱ་བརྒྱད་ནང་དུ་ཐོད། གཡོན་རཀྟའི་ཐོད་པ་དཀྱིལ་དུ་སྨན་གཏོར་རྒྱན་བཀྲ་བཅས་བཤམས། དེ་མཐར་སྤྱི་མཆོད་ཕྲེང་ཚར་དང་། སྒྲའི་བྱེ་བྲག་པི་ཝཾ། ཏིང་ཏིང་ཤག་སོགས་ཅི་འབྱོར་བཞག །མཐར་ཕྱོགས་བཞིར་མདའ་དར་ཕྱོགས་མདོག་གི་དར་བཏགས་པ་བཞི། མཚམས་བཞིར་རལ་གྲི་བཞི་བཅས་འཛུག །ཞིང་ངམ་སྟག་ལྤགས་སྟེང་
ཚོགས་དང་དམ་རྫས། བདུད་རྩི། གཞན་ཡང་ཟས་སྣ་དང་། བྱེ་མ་བྱང་བུ། ཐར་ལམ་དར་དཀར་ཁྲུས་དར། ཕུད་སྐྱོག །ཆབ་ཐུར། བཞག་ཡུལ་གང་བདེར་གནམ་ཕུད་མཆོད་རྒྱུའི་སྨན་རག་གཏོར་གསུམ། སྔོན་འགྲོ་གཏོར་མ་གསེར་སྐྱེམས་བགེགས་གཏོར་བཅས་བཤམས། བཀའ་སྲུང་གཏོར་འབུལ་དམར་གཏོར་ལྔ། དཀར་གཏོར་སྨན་ལེབ་བཅས་ཀྱང་བཤམས། གཞན་ཡང་བརྒྱ་རྩ་ཁ་གསོས་མཐེབ་ཀྱུ་སོགས་ཉེ་བར་མཁོ་བ་རྣམས་འདུ་བགྱིད་ལ། དང་པོ་རྣལ་འབྱོར་ཉམས་བདེ་བའི་སྟན་ལ་འཁོད་ནས། ཉིན་མཐར་ཆགས། ཚིག་བདུན་གསོལ་འདེབས། བསམ་པ་ལྷུན་གྲུབ་མ། པདྨ་བཛྲ་བརྒྱུད་འདེབས། དང་པོ་ཉིན་ཐོག་མར་སིལ་སྙན་འབེབས་དང་སུམ་བརྡུང་བླངས་ནས་དབྱངས་དང་བཅས་ཐིག་གདབ་བྱ། ཡང་རོལ་མོ་གོང་ལྟར་གྱིས་ས་འདུལ་ལེ་ཚན་ཅིག་བཏོན་མཐར་འབེབས་དང་རོལ་མོ་བཞག །བགེགས་གཏོར་བྱིན་རླབས་འབྲུ་གསུམ་ལན་གསུམ། ཉོན་ཅིག་སོགས། ཏ་ཡ་ཕཊ་ནས་གཏོར་མ་སྦྱོང་། སྦུབ་ཆོལ་རོལ་ཆེན་གང་རུང་གིས་འབེབས་མཐར་བཞག །ༀ་ཨཱཿཧཱུྃ་གནས་བདག་གཏོར་འབུལ་མཐར་ཞི་རོལ་འབེབས་དང་སུམ་བརྡུང་གིས་མཚམས་གཅོད་ལ་འཇུག །
གུ་གུལ་བདུག །མཐར་འབེབས་དང་སུམ་བརྡུང་གིས་སྐྱབས་འགྲོ་ལན་གསུམ་མཚམས་མཚམས་རྒྱག་ཅི་བདེའི་མཆོད་པ་བྱིན་རླབས་དང་པོ་ནང་མཆོད་བྲན། དེ་ནས་མཆོད་རྫས་ལ་བདུད་རྩི་བྲན་ལ་མཐར་རོལ་མོ་འབེབས་ཀྱིས་བཞག །རྡོར་སེམས་བཏོན། ཧེ་རུ་ཀའི་ཡིག་བརྒྱ་བཟླས། དཀྱིལ་འཁོར་ལ་བདུད་རྩི་འཐོར། མར་མེ་ཕལ་ཆེར་སྤར། མདའ་དར་གཡབ། རོལ་མོ་འབེབས་ཆེན་གྱིས་བྱིན་འབེབས་བཏོན། མཐར་འབེབས་ཀྱིས་བཞག །དེ་ནས་མི་རྟག་བསྒོམ་པ་དང་། དམ་བཅའ་བདག་བསྐྱེད་རྣམས་ལ་རྔ་མི་བསྐུལ་འདུར་གདངས་བྱ། རྩ་བསྙེན་༡༠༠༠ སྤྱི་དྲིལ་༡༠ བཅས་ཤུ་ནྱེ་ཏས་རས་བྲིས་ལ་བདུད་རྩི་འཐོར། རོལ་མོ་སུམ་བརྡུང་གིས་མདུན་བསྐྱེད་གཞལ་ཡས་ལྷ་བསྐྱེད་ཡོངས་རྫོགས་དང་སྤྱན་འདྲེན་ཚིག་ལྷུག་སྔགས་བཅས་མཐར་སུམ་བརྡུང་ནས་རོལ་ཆེན་འབེབས་དང་རྔ་ཚིག་དབྱངས་གདངས་གང་རུང་གིས་བསྐུལ། སྔོན་བསྐལ་མ་ལན་གསུམ། དམ་ཡེ་བསྲེ་མཚམས་དལ་རན་དང་སུམ་བརྡུང་ལྟ་བུས་གདན་འབུལ་བཤགས་པ། མཆོད་པའི་སྔགས་མཐར་མཆོད་རོལ་སུམ་འཕར་ཅན། སྨན་རག་གཏོར་གསུམ། གནམ་ཕུད་འབུལ་མཚམས་སོ་སོའི་གོང་འོག་གམ། ཡང་ན་གསུམ་ག་རྫོགས་
མཚམས་མཐར་འབེབས་དང་། སྐོང་བཤགས་མཐར་འབེབས། ཚོགས་ཐེངས་དང་པོ་བྱེད། ཡར་འཚོགས་སུམ་བརྡུང་གིས་བསྟོད་པ་འོད་གསལ་འཁོར་ཡུག་མཐར་འབེབས་ཀྱིས་བཞག་ལ། དང་པོ་འོག་གི་སྔགས་དམིགས། ཧཱུྃ་ཧྲཱིཿ རང་ཉིད་པདྨ་བཛྲ་ཡབ་ཡུམ་སོགས་ཀྱི་མཐར། རྩ་བསྙེན། ༡༠༠༠ སྤྱི་དྲིལ། ༡༠༨ སྔགས་བྱང་རྣམས་དང་བཅས་བཏོན། ཤུ་ནྱ་ཏ་ནས་བུམ་པར་བདུད་རྩི་བྲན། རོལ་མོ་སུམ་བརྡུང་གིས་བུམ་བསྐྱེད་རྡུལ་ཚོན་ཕྲིན་ལས་སོགས། ཛཿཧཱུྃ་བྃ་ཧོཿནས་སྤྱན་འདྲེན་སྐབས་འབེབས་ཆེན་དང་སུམ་བརྡུང་གིས། ཧེ་རུ་ཀ་དཔལ་སོགས་མཆོད་པ་རྣམས་སོ་སོར་བཏོན་ལ་སྐོང་བའི་སྔགས་མཐར་རོལ་མོ་འབེབས་མཚམས་རྒྱག་ཟེར་བ་དཔྱད་དང་བསྟོད་པ་ཡེ་ནས་ལྷུན་གྲུབ་སོགས་མཐར་འབེབས་ཀྱིས་བཞག །རང་ལུས་སྣང་སྲིད་སོགས། རྩ་བསྙེན། ༡༠༠༠ སྤྱི་དྲིལ། ༡༠༨ བཅས། ཤཱུ་ནྱ་ཏས་ཐོད་དཀྱིལ་ལ་བདུད་རྩི་འཐོར་ལ་རོལ་མོ་སུམ་བརྡུང་གིས་བདག་མདུན་སོགས་ཐོད་པ་ཐུགས་ཀྱི་དཀྱིལ་འཁོར་བསྐྱེད་ལ། དེ་མཐར་སྤྱན་འདྲེན་ལ་འབེབས་ཆེན་དང་སུམ་བརྡུང་གིས། འོག་མིན་ཆོས་དབྱིངས་སོགས། ཕྱག་མཆོད་རྣམས་རྫོགས་མཚམས་འབེབས་ཀྱིས་བཞག་
ལ། རྡུལ་ཚོན་བུམ་པ་ཐོད་པ་སོགས། སྤྱི་དྲིལ་སྔགས་༡༠༨ དང་། ཚོགས་ཐེངས་གཉིས་པ་གུང་གསེང་། ཡར་འཚོགས་ལ། ཤུ་ནྱེ་ཏ་སོགས། གསུང་དཀྱིལ་ལ་བདུད་རྩི་བྲན་ནས་སུམ་བརྡུང་གིས། བདག་མདུན་བུམ་དཀྱིལ་ཐོད་རྫས་སོགས་གསུང་གི་དཀྱིལ་འཁོར་ལེ་ཚན་དང་པོའི་མཐར་འབེབས་དང་སུམ་བརྡུང་གིས་གཞན་ལེ་ཚན་ཐམས་ཅད་རྫོགས་མཐར་རོལ་མོ་འབེབས་ཀྱིས་བཞག །གཞི་ལུས་དག་པ་སོགས། རྩ་བསྙེན། ༡༠༠༠ སྤྱི་དྲིལ། ༡༠༨ མར་མེ་སྦར། འདི་མན་རེ་ཞིག་རྔ་ལ་མི་ལྟོས། སིལ་སྙན་གྱིས་མཆོད་རོལ་སྐབས་སུ་བྱ། དེ་ནས་སྐུ་ཡི་དཀྱིལ་འཁོར་ༀ་ཤུ་ནྱེ་ཏ་སོགས། སྣང་སྲིད་འཁོར་འདས་སོགས། འདུར་གདངས་བྱ་བའི་རྔ་ལ་མི་ལྟོས། མཐར་མཆོད་རོལ་སུམ་འཕར་ཅན། ཐིག་ལེའི་དཀྱིལ་འཁོར། སྣང་སྲིད་རྡོ་རྗེ་སོགས་ནས་མཆོད་རོལ་སུམ་འཕར་ཅན། ཕྱག་མཚན་དཀྱིལ་འཁོར། ཡེ་ནས་རྣམ་དག་སོགས། མཐར་མཆོད་རོལ་སུམ་འཕར་ཅན་གྱི་མཐར། གཅིག་བརྡུང་། ཉིས་བརྡུང་། སུམ་བརྡུང་། བཞི་བརྡུང་སོ་སོར་འཛག་དང་བཅས་རིམ་བྲེལ་གྱིས་འབེབས་བཅས་མཐར་བཞག རྔ་ཚིག་འདི་གྲངས་ལྡོག་ནས་ལྡིར་བའང་སྣང་། ཐལ་མོ་སྦྱར་ནས་རིགས་ཀུན་
ཁྱབ་བདག་སོགས་འདུར་གདངས་བྱ་བཞིན་སྒྲ་མཆོད་སྐབས་མཆོད་རོལ་དང་འབུད་བརྡུང་བཀྲོལ་བ་གང་ཡོད་སྦིར་ནས་སུམ་བརྡུང་གིས་བླངས་ནས་མཐར། འདི་ཕྱིན་ཚིག་རྔ་དགོས། ཚོགས། མངོན་གྱུར་ཤོག་བར། ཞི་རོལ་སུམ་འཕར་གྱི་མཇུག་ཏུ་སུམ་བརྡུང་གིས་བླངས་ལ་སྐོང་བ་ཕྱི་སྣོད་འཇིག་རྟེན་སོགས། ལ་གནས་ཤོག་འབེབས་དང་སུམ་བརྡུང་། མཆོད་པ་བརྒྱ་རྩ་ལ་བདུད་རྩི་བྲན་ནས་འབེབས་དང་སུམ་བརྡུང་གིས། ཡེ་ནས་རྣམ་དག་སོགས་མཆོད་པ་རྣམས་རྫོགས་མཚམས་སྔགས་མཐར་མཚམས་རྒྱག་ཙམ་གྱིས་བཞག་ལ། ཐལ་མོ་སྦྱར་ནས། བཤགས་པ་ནི། ཧོཿ དུས་གསུམ་སངས་རྒྱས་སོགས་ལན་གསུམ། བདག་དང་མཐའ་ཡས་སོགས། དུས་གསུམ་སངས་རྒྱས་ཉན་རང་སོགས་ནས་དགོངས་སུ་གསོལ་གསུམ། བདེ་གཤེགས་ཁྲོ་རྒྱལ་སོགས། གྲངས་གསོག་ཚེ་འདི་མཐར་རོལ་མོ་འབེབས་དང་ཉིས་རྡུང་ནས་གོང་གི་ཡེ་ནས་རྣམ་དག་སོགས་ལ་འཇུག་པའི་བཤགས་པ་བཅས་གོང་དང་འདྲ་བའི་ཚར་བཞི་ཚར་མཚམས་འབེབས་མཐར་བཞག་ལ་ལན་རེ་བདེ་སྨོན་འོད་དཔག་མེད་སོགས་ཚོགས་ཐེངས་དང་པོ། ཡར་འཚོགས། ཡེ་ནས་རྣམ་དག་ནས་བཤགས་པ་སོགས་སྦྲེལ་མ་བཅས་སྔོན་མ་
ཇི་ལྟ་བཞིན་ཚར་བཅུ་ཚར་མཚམས་རྗེས་མར་ཧཱུྃ་ནས་འབེབས་མཐར་རྔ་བཞག །བཤགས་པ་སོགས་ཚན་གསུམ་རྔ་ལ་མི་བསྐུལ་བར་ཚར་མཚམས། ཚོགས་ཐེངས་གཉིས་པ་བྱ་ལ། ཡར་འཚོགས་གཏོར་འབུལ་རྣམས་བཤམས་ནས་བདུད་རྩི་བྲན་ལ། ༀ་ཨཱཿཧཱུྃ་བྷན་དྷ་མཚན་ལྡན་མཐར་བྱིན་རླབས་ལན་གསུམ་མཐར་སྦུབ་ཆོལ་གྱིས་སུམ་བརྡུང་འཛག་མེད་ཀྱིས། ཧཱུྃ་བྷྱོ། དག་པ་མཁའ་སྤྱོད་སོགས་སེང་གདོང་གཏོར་འབུལ་མཐར་རོལ་མོ་འབེབས་ཀྱིས་བཞག །བྷནྡྷ་ལྕང་ལོ་སོགས་ནས། བསིལ་བའི་ཚལ་ཞེས་སོགས་མཐར་འབེབས་ཀྱིས་བཞག །བྷནྡྷ་སྐྲ་འབྱར་སོགས། འོག་མིན་བྱང་ཕྱོགས་ནས་མཐར་འབེབས་ཀྱིས་བཞག འདི་ཀུན་ཚིག་རྔ་ལས་གདངས་མ་བྱས་ཚེ་འགོར་སུམ་བརྡུང་མི་དགོས། གོང་འོག་ཀུན་ལ་འགྲེ། དེ་ནས་གནམ་ལྕགས་འབར་བའི་གཏོར་གཞོང་ཞེས་ཚིག་བསྒྱུར་སོ་མཛད་སྲོལ་སྣང་། འདི་དབྱངས་བྱེད་ན་སུམ་བརྡུང་འཛག་བྲལ་དགོས། རི་རབ་བྱང་ཤར་སོགས་མཐར་འབེབས་དང་དགུ་བརྡུང་འཛག་མེད་ཀྱིས་དྲག་པོ་ཨེ་ཡི་སོགས་ནས་མཐར་འབེབས་དང་སུམ་བརྡུང་བཞི་བརྡུང་འཛག་མེད་འདྲ་གིས། ཡུལ་ནི་སྦས་ཡུལ་སོགས་མཐར་འབེབས་དང་སུམ་བརྡུང་འཛག་བཅས་དལ་རན་གྱིས་ཧཱུྃ་
ཧྲཱིཿ པདྨ་འདབ་སྟོང་སོགས། སྤྱན་འདྲེན་སྔགས་ཀྱི་མཚམས་སུམ་བརྡུང་གིས་མཚམས་རྒྱག་ཙམ་བྱེད་ནས། རིག་འཛིན་ཆེན་པོ་སོགས་ནས། ཚོགས་འབུལ་མཐར་འབེབས་ཀྱིས་བཞག ཧོ་དགོངས་སུ་གསོལ་ལོ། །ཕྱོགས་བཅུ་སོགས། ལན་གསུམ་སྒྲིག་འདོན་བྱ། ཚོགས་ལ་རོལ། བར་ཆད་ལམ་སེལ་དང་། ཞབས་བརྟན། ཡང་ན་སྨོན་ལམ་བཟང་སྤྱོད་དམ་སྨོན་ལམ་འདྲ་སྐབས་འབྲེལ་གང་ཡོད་བྱ། ཚོགས་ལྷག་བསྡུ། རོལ་མོ་དྲག་འབེབས་བཤུག་གླུ་དང་བཅས་ལྡིར་ནས་ཨ་ལས་ལྷག་མ་བཏོན་མཐར་རོལ་མོ་འབེབས་ཀྱིས་བཞག བཀྲ་ཤིས་ཧོ་དགོངས་སུ་གསོལ། སོགས་ཀྱི་མཐར་ཞི་རོལ་སུམ་འཕར་ཅན་དང་། རྒྱལ་བ་རབ་འབྱམས་སོགས་སྨོན་ལམ་དང་། རང་ལུགས་ཆོས་སྲུང་གཏོར་བསྔོས་བཅས་བཏོན་ནས་གྲོལ། གྲོལ་ཉིན་ལ་ལྷག་མ་ཚར་མཚམས་ཞི་རོལ་འབེབས་དང་མཐར་སུམ་བརྡུང་ནས་གྲོ་ལོད་ཡེ་གསང་བླ་མ་རིག་འཛིན་རྣམ་རྒྱལ་བུམ་པ་ཕུལ་ནས་བཞག་ལ་བུམ་ཆུ་བསྐྱེད་ལྷ་ཚོགས་སོགས་ནས་ལྟ་བུར་གྱུར་བར། མཐར་འབེབས་ཀྱིས་རོལ་མོ་བཞག །རྟེན་དང་གཏོར་མའི་ལྷ་ཚོགས་སོགས་ཀྱི་བསྡུ་རིམ་དང་། གོང་གསལ། དབང་རྫས་གཞན་ཕུལ་མི་དགོས། །བཀྲ་ཤིས་བཅས་མཐའ་
རྒྱས་བྱའོ། །ཡང་གནས་འདྲེན་སྐབས་ལས་བྱང་གཞུང་བསྲང་བ་གོང་ལྟར་གྱིས། ཚོགས་ཀྱི་སྨོན་ལམ་ཚར་གསུམ་དང་། དེ་ནས། འདིར་མཐུན་པའི་པདྨ་བཛྲ་གྱི་ཐུགས་རྗེ་བསྐུལ་བའི་གསོལ་འདེབས། ཆོས་དབྱིངས་རང་སོགས་མཚན་བརྒྱད་ཙཀླི་ལས་བུམ་བྱེ་མ་མདུན་དུ་བཞག །ཛཿཧཱུྃ་སོགས་ནས་འགུགས་པ་ལན་གསུམ། དེ་ནས་དཀྱུས་ལྟར་ལ། ཧཱུྃ་ང་ནི་པདྨ་སོགས་བགེགས་གཏོར་སྐབས་རོལ་མོ་འབེབས་དང་སུམ་བརྡུང་རྔ་ཚིག་དང་བཅས་མཐར་རོལ་མོ་འབེབས་ཀྱིས་བཞག །ཧཱུྃ་འདི་ནི་རྡོ་རྒྱལ་ཡབ་ཡུམ་ཕུལ་པདྨ་སོགས། དབང་ཁྲུས་རྣམས་བར་མཚམས་རྩ་སྔགས་སྤྱི་དྲིལ་བཏོན། གནས་སྤར་སོགས་རིམ་བཞིན། མཚན་བྱང་མཐར་ཞི་རོལ་རིང་ཙམ་གིས་དལ་ལ་བསྐོར་བ་གསུམ་མམ་ཕྱག་གསུམ་བྱས་ཏེ་དལ་གྱི་ལྷོ་སྒོར་བཞག །འདོད་ཡོན་བསྔོ། འདི་སྐབས་ཞི་རོལ་ཞིག་བྱེད། ལམ་བསྟན་བྱ། རྡོ་རྗེ་འཆང་ཞག་གྲངས་ཚེ་དང་རོ་གཅིག་གྱུར་དང་། ནུབ་ཐ་མར། རོ་མར་མེ་བསྟན་གཅིག་གྱུར་ནས། ཁྱོད་ཀྱི་མ་དག་སྡིག་སྒྲིབ་སོགས་སྦྲེལ་ནས། ཁྱབ་བརྡལ་ཤོག་བར། རྩ་སྔགས་ལན་གསུམ། པྲཱ་ཝ༴ ར་གསུམ། སྤྱི་དྲིལ་བཅས་ལན་གསུམ་གྱི་མཐར། མིང་བྱང་སྤར། དེ་ཚེ་ཞི་རོལ་སུམ་འཕར་ཅན་ལྡིར། གཞན་ཡང་ཞི་ཁྲོ། མི་
འཁྲུགས་ཀུན་རིག་བཅས་ཀྱི་རྩ་སྔགས། ཡིག་བརྒྱ་བཅས་བརྗོད། མཐར་ངོ་མཚར་སངས་རྒྱས་སོགས། དམིགས་ཡུལ་ངན་སོང་སོགས། འདི་ནི་ནུབ་ཀྱི་ཕྱོགས་རོལ་སོགས། པདྨ་འདམ་གྱིས་སོགས། མི་གཙང་ལུས་འདི༴ ཅི་ལྟར་སྔོན་སོགས་ནས། བཟང་སྤྱོད་སོགས་རྣམ་ལྔ་བཏོན་ལ་གཞན་ཡང་བསྔོ་བ་སྨོན་ལམ་ཇི་སྙེད་ཀྱི་དཔུང་བསྐུལ། ཚོགས་དྲངས། ཞབས་བརྟན་སོགས་སྐབས་དང་བསྟུན། ལྷག་མ་བསྡུ་སོགས་ནས། བཀྲ་ཤིས་བཅས་གོང་ལྟར་བྱའོ། །དམིགས་བསལ་སྙིང་ཐིག་དབང་མོ་ཆེའི་སྒོ་ནས་སློབ་མ་སྨིན་གྲོལ་ལམ་འཇུག་གི་སྐབས་ལས་གཞུང་ལྟར་གྱི་སྐོང་བཤགས་ཚར་མཚམས་རྡོ་རྗེ་རྒྱལ་པོས་ཏིང་ངེ་འཛིན་གྱི་དབང་ལེན་པ་ཡེ་གསང་ལྟར་བྱས་ནས། སློབ་མ་མདུན་དུ་འཁོད་ལ། སྔོན་འགྲོ་ཚན་གཉིས། སྲུང་འཁོར་དང་སྒོ་དབྱེ་སྐབས་ཕྱོགས་བཞིར་མདའ་དར་གཡབ། མནྜལ་དང་། སྤྲོ་ན་ལོ་རྒྱུས་འདོན། ཞུ་གནང་དང་སྐྱབས་འགྲོ་ཆ་ལག་གུར་དྲག་ནང་ལྟར། སེམས་བསྐྱེད་དང་བཅས། གོང་གི་རྡོར་སེམས་སྒོམ་རིམ་སློབ་མ་ལ་ཕོག་ལ། ཁྲུས་བྱ། དེ་ནས་དབང་གཞུང་གསལ་ལྟར་མདུན་བསྐྱེད་ཇི་བཞིན་སློབ་མ་ལྷར་
བསྐྱེད། སློབ་དཔོན་ཡང་ལྷའི་ང་རྒྱལ་ལྡན་བཞིན། ཡེ་ཤེས་སྤྱན་འདྲེན་དམ་དབྱེ་བསྲེ་བ་གྲུབ་མཚམས་དབང་རྫས་རྣམས་གཞུང་ལྟར་བཀྲ་ཤིས་དང་བཅས་བསྐུར། ཡང་དབང་གི་ཟབ་གནད་ཕྱེ་བ་ནི། རིག་པའི་འཕྲུལ་གྱིས་རྟོགས་དགོས་སོ། །ཆས་དབང་མངའ་གསོལ་སྐབས་གཞུང་ཚིག་ལྟར་རྔ་རོལ་དུང་ཀར་སོགས་སྦིར། ལར་ཡང་གནས་འདྲེན་དང་། དབང་ཆེན་འདི་སྐབས་འབྲེལ་ཆགས་པའི་དྲིལ་གསིལ་སྤྱན་འདྲེན་བྱིན་འབེབས་སོགས་ཀྱི་སྐབས་རོལ་ཆེན་དང་ཞི་རོལ་སོགས་སྐབས་ཐོབ་བསྟུན་ལ། དེ་ནས་འབུལ་གཏོར་བསྐུལ་རྣམས་ཀྱང་གཞུང་ཚིག་དང་མཐུན་པར་ཕུལ། རོལ་མོ་སོགས་ཀྱང་དཀྱུས་ལྟར་འགྲེའོ། །དེ་ནས་ཚོགས་རོལ། ལྷག་མ། དངོས་གྲུབ་དབང་བླངས་བཀྲ་ཤིས་སོགས་མཐའ་རྒྱས་བྱའོ། །སརྦ་མདྒ་ལམ། །