རབ་གནས་བཀྲ་ཤིས་ཆར་འབེབས་ཀྱི་འདོན་འགྲིགས་ངེས་གསལ་མེ་ལོང་།
རབ་གནས་བཀྲ་ཤིས་ཆར་འབེབས་ཀྱི་འདོན་འགྲིགས་ངེས་གསལ་མེ་ལོང་བཞུགས། ན་མོ་དྷརྨཱ་ཀཱ་ར་ཡ། འདིར་རབ་ཏུ་གནས་པ་བྱ་བའི་ཆོ་ག་ལས། རྟེན་གང་ཡིན་དེའི་མདུན་སློབ་དཔོན་ཞལ་ཕྱོགས་ལ་བཞུགས། སློབ་དཔོན་གྱི་གཡས་སུ་བདེ་མཆོག་གི་དཀྱིལ་འཁོར། དེ་དང་གང་བདེ་ཞིག་ཏུ་པདྨ་འདབ་བརྒྱད་ཀྱི་དབུས། རྣམ་རྒྱལ་བུམ་པ་ལྔ་ཕྲག་ལྔས་བཀང་
བ། བྱང་དུ་ལས་བུམ། ཤར་ནས་གཡས་སྐོར་དུ་ཕྱིན་དྲུག་གི་བུམ་པ། བྱང་དུ་དྲི་མ་ཁྲུས་བུམ་བཤམས། ཕྱིན་དྲུག་གི་བུམ་པར་འབྲུ་སྤོས་སྨན་རིན་པོ་ཆེ་སོགས་རིམ་བཞིན་བླུགས། རབ་གནས་ཡི་དམ་གང་འབྲེལ་གྱི་གཙོ་བོའི་སྐུ་མདོག་གི་དར་གྱིས་རྣམ་རྒྱལ་བུམ་པར་མགུལ་ཆིངས་དང་། ལས་བུམ་ཡང་གཞུང་ནས་ལས་ལྷ་གང་གསུངས་པ་དེའི་སྐུ་མདོག་གི་དར་གྱི་མགུལ་ཆིངས་བྱ། སྐབས་འདིར་བདེ་མཆོག་ལྟ་བུ་ལ་སྦྱར་ན། རྣམ་རྒྱལ་བུམ་པར་མགུལ་ཆིངས་སྔོ། ལས་བུམ་དམར། ཕྱིན་དྲུག་གི་བུམ་པར་མགུལ་ཆིངས། སྦྱིན་སེར། ཚུལ་དམར། བཟོད་ལྗང་། བརྩོན་དམར། བསམ་དཀར། ཤེས་རབ་སྔོ། དྲི་མ་སེར། མཆོད་པ་གཡོན་བསྐོར། བདེ་མཆོག་སྐབས། རྒྱས་པར་འབྱོར་ན་དཀྱིལ་འཁོར་ལ་མཆོད་པ་ཆ་དྲུག །བུམ་དཀྱིལ་ལ་མཆོད་པ་ཆ་གཅིག་གིས་བསྐོར། རྟེན་གྱི་དྲུང་དུ་མཆོད་པ་ཆ་གཅིག་ཕྲེང་ཚར། བདག་བསྐྱེད་མཆོད་པ་ཆ་གཅིག །ཕྱི་རོལ་མཆོད་པ་ཆ་གཅིག །གཡས་གཡོན་གང་བདེ་ཞིག་ཏུ་སྟེགས་ཀྱི་ཁར་མངའ་དབུལ་བའི་ཙཀླི་རྣམས་དང་རྫས་རྟགས་སོགས་རིམ་བཞིན་བཤམས། ཟངས་གཞོང་སོགས་ཀྱི་ནང་འབྲས་བཀྲུས་པ་གུར་གུམ་ཆུས་
བཙོས་པ་འབོ་གང་ཙམ། དུང་ཆོས་སུ་དྲི་བཟང་གི་ཆུ་བླུག་པ་དང་། ཡུངས་ཀར་ཕུལ་གང་དང་། གུ་གུལ་བཅས་བཤམས་ལ་ཞལ་འགྲིམས་རྒྱུ་དགོས་པ་དང་། ཙཱ་རུའི་བཟའ་བ། སྦྱོང་ཆས་འདག་ཆལ། ཁྲུས་ཆས། སྐུ་ཕྱི་གོས་ཟུང་རྣམས་བཤམས་ལ་དང་པོ། ཚིག་བདུན་སོགས་དང་། དེ་ནས། བདག་ཉིད་སོགས་ནས་བདག་བསྐྱེད་བཟླས་པ་ཐུན་བསྡུ་བཅས་སོང་རྗེས། དཔའ་གཅིག་རྣམ་པར་གྱུར། རྣམ་རྒྱལ། རྣམ་འཇོམས། མཆོད་དཔོན་པས་བུམ་པ་རྣམས་ལ་གུ་གུལ་བདུག །ཡུངས་ཀར་གྱིས་བྲབ། སུམ་བྷ་ནི་སོགས། ༀ་བཛྲ་ཤི་ཥ་རེ་སོགས། ལྷ་ཆུ་དལ་འགྲོ་སོགས་ༀ་ཏ་ཧེ་སོགས་དྲི་བཟང་གི་ཆུས་སུམ་གཉིས་བཀང་། ༀ་བཛྲ་ཨ་མྲྀ་སོགས། སྔགས་རེ་དང་ཆུ་ཐིགས་སྤྲད་ནས་ལན་བདུན་དུང་ཆོས་སུ་བླུགས་ལ་རྒྱལ་རྒྱམ་ལྟར་བཞག །རྣམ་རྒྱལ་བུམ་པའི་ཁ་རྒྱན་བ་ལུ་དང་ཤུག་པ་གཟུངས་ཐག་རྡོ་རྗེ་བཞག །གཞན་ཕྱིན་དྲུག་གི་བུམ་པ་རྣམས་ཀྱང་གོ་རིམ་མ་ནོར་བར་བཤམས། ལས་བུམ་ཀུ་ཤའི་ཁ་རྒྱན། ༀ་ཁནྜ་སོགས་བུམ་བསྐྱེད་བཟླས་པ་བཅས། བཟླས་པའི་སྐབས་སློབ་དཔོན་གྱིས་གཟུངས་ཐག་འཛིན་ལ་བཟླས་པ་བྱ། བཟླས་པ་ཚར་ནས་གཟུངས་ཐག་ལས་བུམ་སྟེང་དུ་སྤོས་ལ་ལས་བུམ་བཟླས་པ་བཅས་
ཚར་རྗེས་མཐར། ༀ་ཤྲཱི་རི་ཙཀྲ་སོགས། ལྷ་རྣམས་འདོད་ཆགས་ཆེན་པོ་ཞུ་བ་སོགས། དུང་ཆོས་ཆུ་རྣམ་རྒྱལ་བུམ་པར་བླུགས། པུཥྤེ་སོགས། ཇི་སྲིད་དཀྱིལ་འཁོར་སོགས་གཟུངས་ཐག་དྲི་མ་ཁྲུས་བུམ་གྱི་སྟེང་དུ་བཞག་ལ། ༀ་སརྦ་ཏ་ཐཱ་སོགས། དེ་ནས་གཟུངས་ཐག་བཟླས་པ་སོ་སོའི་སྐབས་རིམ་གྱིས་སྤོ། ཕྱིན་དྲུག་སྔགས་སོ་སོར་བདུན་ནམ་ཉེར་གཅིག་བཟླས། འབྲུ་རྣམས་རྟེན་འབྲེལ་སོགས། ན་མོ་བུདྷཱ༴ ཡེ་དྷརྨ༴ སྦྲེལ་ནས་བརྒྱ་རྩའམ་ཐ་ན་ཉེར་གཅིག་ལས་མི་ཉུང་བར་བཟླས། མཆོད་དཔོན་པས་ནས་འགྲིམ། ཐམས་ཅད་ཀྱིས་ལག་པ་གཉིས་ཀ་ཁ་སྦུབ་སྟེ་རེག །ༀ་ཨཱཿཧཱུྃ་ཉེར་གཅིག །མཆོད་དཔོན་པས་དུང་ཆུ་འགྲིམ། གཡོན་སྲིན་མཛུབ་ཀྱིས་རེག ཡུངས་ཀར་ཁྲོ་བོ་སོགས། ལས་བུམ་སྔགས་དང་། ཁནྜ་རོ་ཧི། སུམྦྷ་ནི་སྒྲོལ་མ་ཉེར་གཅིག་བཟླས། ཕུ་འགྲིམ། དེ་ནས་བདེ་མཆོག་གི་མདུན་བསྐྱེད་ཀྱི་རིམ་པ་བཏང་། བདག་འཇུག་བཅས། ཆོས་རྣམས་གཟུགས་བརྙན་སོགས། ཚར་གསུམ་རྗེས། གཟུགས་བརྙན་གསལ་ལ་རྟེན་རྣམས་ཞེས་ཚིག་ཁ་བསྒྱུར་ལ། མཆོད་དཔོན་པས་སློབ་དཔོན་མདུན་ནམ། རྟེན་གྱི་དྲུང་ལྕོག་རྡོག་གསུམ། མར་མེ། ཆངས་བུ་བཅས་གསུམ་བཤམས་ལ། སློབ་དཔོན་ནམ་ལས་རྡོར་གྱིས་ཡར་བཞེངས་ལ། ༀ་སརྦ་བིགྷྣན་སོགས། གཡས་གཡོན་གསུམ་རེ་བསྐོར། མཆོད་སྦྱིན་ཕྱག་རྒྱ་བྱ། སེ་
གོལ་བརྡབ། སྐུ་གསུང་ཐུགས་ཀྱི་རྟེན་འདི་ལ་སོགས་དེ་འདྲ་ཚར་གསུམ། ༀ་སརྦ་བིགྷྣན་སོགས་སྔ་མ་ལྟར་བསྐོར། སུམ་བྷ་ནི་སོགས། སྐུ་གསུང་ཐུགས་ཀྱི་སྤེལ་མ་ཚར་གསུམ། དེ་རྣམས་སྣོད་གཅིག་ཏུ་གསོག །སྦྱོང་བ་ཕྱིར་དོར། གནས་གཞན་དུ་འགྲོ་དགོས་ན་འདི་ནས་བཞེངས་ལ་འདོན། འགྲོ་མི་དགོས་ན་བཞུགས་ལ་འདོན། རང་གི་ཐུགས་ཀ་ནས་སོགས། ཡེ་ཤེས་བསྐལ་སོགས་གཞུང་བཞིན། གདོན་མི་ཟ་ནས་སྦུབ་ཆོལ་འབེབས་བྱ་ལ། གནས་གཞན་ལ་འགྲོ་ཞིང་རབ་གནས་བྱ་དགོས་ན་སེར་སྦྲེངས་བྱ་ཞིང་། སློབ་དཔོན་གྱིས་སུམྦྷ་ནི་བརྗོད་ཅིང་། ཡུངས་ཀར་གྱིས་བྲབ། གུ་གུལ་བདུག་གིན་བྱོན། །སླར་རང་གནས་སོན་ནས་གྲལ་དུ་འཁོད་ལ། སྲུང་འཁོར་ནི། སུམྦྷ་ནི་དང་ཡི་གེ་དེ་རྣམས་སོགས། ༀ་ཙཀྲ་པྲཱ་ཀ་ར་ཧཱུྃ་ཞེས་པའི་བར་སྦྱར་རོ། །དེ་ཚེ་ལས་རྡོར་གྱིས་ཚོགས་པའི་སྣ་རླུང་གཡས་ནས་སྦུད་པར་ཏིལ་འགྲིམ་ལ། མེ་ལོང་ཐོག་ཏུ་ཏིལ་གྱིས་སྡིག་པའི་གཟུགས་བྱས་ནས། གཡས་སུ་མེ། མདུན་དུ་ཏིལ། གཡོན་དུ་ཆུ་གཞག་ནས་སྙིང་གར་ཀཾ་ལས་སོགས་སྔགས་བཟླ་ཞིང་། མེ་ཆུའི་ནང་དོར། གཡས་སུ་ཡེ་ཤེས་མེར་བསྲེག་ཞེས་སོགས་ཕྱི་རོལ་དུ་དོར། དེ་ནས་ཁྲུས་བྱ་བ་ནི། སློབ་དཔོན་ནམ་ལས་རྡོར་གྱིས་ཕྱག་ལེན་བྱེད་ལ། སྟེགས་ཀྱི་ཁར་ཁྲུས་སྡེར་ཆེ་བ་གཅིག །ཁྲུས་ཆུ་དུར་བའི་སྤིར་སོགས་བཤམས། གོས་ཟུང་དང་མེ་ལོང་བཟུང་ནས། བཅོམ་
ལྡན་འདས་དེ་བཞིན་སོགས། རྣམ་རྒྱལ་བུམ་ཆུ་ནས་ཅུང་ཟད་འཐོར། ཁྲུས་ཀྱི་ཁང་པ་སོགས་ཀྱི་ཚེ་མེ་ལོང་ངོས་སུ་ཀུ་ཤས་གྲུ་བཞིར་བྲིས། སྟོང་གསུམ་ཀུན་སོགས་ནས་དུར་བའི་སྤིར་གྱིས་ཁྲུས་ཆབ་ནས་མེ་ལོང་ལ་བྱུགས། ༀ་སརྦ་ཏ་ཐཱ་སོགས། སྲན་དཀར་ཟན་གྱིས་དྲུད། འོག་མ་ཀུན་ལ་འགྲེ། ལས་བུམ་ཐོགས་ལ། བཅོམ་ལྡན་ཁནྜ་སོགས་ཀྱིས་བཀྲུ། རོལ་མོ་བྱེད། ཁྲུས་རས་ཐོགས་ལ། རྒྱལ་དང་རྒྱལ་བའི་སོགས། ༀ་ཧཱུྃ་ཏྲྃ་སོགས་དྲི་བཟང་གིས་བྲིས་ལ། མེ་ལོང་ངོས་ལ་ཁྲུས་རས་ཀྱིས་ཕྱི། དེ་ཁྲུས་ཚན་གཅིག །སྟོང་གསུམ་ཀུན་སོགས་ཁྲུས་ཆབ་སྔར་ལྟར་བྱུག །སྣུམ་ནག་བྱུག །སྲན་དཀར་གྱིས་དྲུད། དྲི་མ་ཁྲུས་བུམ་ཐོགས་ལ། ཇི་ལྟར་བལྟམས་སོགས། འདི་ནི་ཁྲུས་མཆོག །རྒྱལ་བའི་སྐུ་གསུང་ཐུགས་སོགས་བར་བར་དུ་བཀྲུས་ལ། རྒྱལ་དང་རྒྱལ་བའི་སོགས་གོང་ལྟར། ཁྲུས་ཚན་གཉིས་པ། སྟོང་གསུམ་ཀུན་སོགས། རི་བོ་ལྟར་ནི་སོགས། མཐར་སྔགས་དང་རོལ་མོ་བཅས་བཀྲུ། རྒྱལ་དང་རྒྱལ་བའི་སོགས་ཁྲུས་ཚན་གསུམ། སྟོང་གསུམ་ཀུན། ཕར་ཕྱིན་དྲུག་སོགས་བུམ་པ་སོ་སོར་ཐོགས་ལ། འདི་ནི་སྦྱིན་པའི་སོགས་བཀྲུ། ཆུ་བོ་དྲུག་གིས་སོགས་ལ་དྲི་མ་ཁྲུས་བུམ་གྱིས་བཀྲུ། རོལ་མོ་དང་། རྒྱལ་དང་སོགས་ཁྲུས་ཚན་བཞི་པ། སྟོང་གསུམ་ཀུན་སོགས་དྲི་མ་ཁྲུས་བུམ་ཐོགས་ལ། དེ་བཞིན་གཤེགས་རྣམས་སོགས། སྟོན་མཆོག་དམ་པ་སོགས། ཉིན་
མོར་བདེ་ལེགས་སོགས་སྔགས་བཅས་རོལ་མོ། རྒྱལ་དང་རྒྱལ་སོགས་ཁྲུས་ཚན་ལྔ་པ། ཁྲུས་ཀྱི་ཚེ་རོལ་མོ་འདི་ཡི་དམ་གང་ཡིན་གྱི་མཆོད་རྔ་ཡིན། སྲབ་འཇམ་ཡངས་པ། སྣ་ཚོགས་དབང་པོའི་སོགས་གོས་ཟུང་འབུལ། རྟེན་བསྐྱེད་ནི། རྟེན་རྣམས་ལ་ལས་བུམ་ཆུ་འཐོར་ནས། ༀ་ཁནྜ་སོགས་བསངས། སྭ་བྷཱ་ཝ་སོགས་སྦྱངས། སྟོང་པའི་ངང་ལས་ཨེ་ལས་སོགས་ནས་མཚན་པར་གྱུར་བར། དེ་ནས་ཐམས་ཅད་ཡར་བཞེངས་ལ། སྤོས་ཐུར་བཀྱེ། སྙིང་ཁར་ཉི་མ་སོགས། སྤྱན་དྲངས་བཞུགས་པར་གྱུར། མ་ལུས་སེམས་ཅན། ཇི་ལྟར་སངས་རྒྱས་སོགས། ས་མཿཡཿཛཿཧཱུྃཿབྃཿཧོཿ ལག་པ་བསྣོལ་ཞིང་སེ་གོལ་བརྡབ། རོལ་ཆེན། མཆོད་རོལ། སྤོས་ཐུར་བསྡུ། གྲལ་དུ་འཁོད་ནས། བཅོམ་ལྡན་འདིར་ནི་སོགས། ཤླཽ་ཀ་གཉིས། དེ་སྐབས་རྟེན་གྱི་དྲུང་དུ་མཆོད་པ་གསར་དུ་བཤམས། བསངས་སྦྱངས་ལ། སྟོང་པའི་ངང་ལས་སོགས་བྱིན་རླབས་གཞུང་བཞིན་མཆོག་གཙང་མ་སོགས། བཅོམ་ལྡན་དཔའ་བོ་སོགས་ཀྱིས་བསྟོད་ལ་དེ་ཚེ་མཆོད་དཔོན་གྱིས་མེ་ཏོག་བཀྱེ། ཐམས་ཅད་ཡར་བཞེངས་ལ་གཟན་ཟླུམ་ཁྱེར་བྱས་ལ་བཅོམ་ལྡན་འདས་དེ་བཞིན་གཤེགས་པ་སོགས། མཐར་རོལ་ཆེན་བཅས་མེ་ཏོག་འཐོར་ལ་ཚར་གསུམ་
འདོན། དེ་ཚེ་མེ་ལོང་ནང་དུ། རྟེན་ཐམས་ཅད་ཤར་བཅུག་པ་ལ། གྲལ་ལ་འཁོད་ནས་མེ་ལོང་དུང་ཆོས་ནང་གི་དྲི་བཟང་གི་ཆུ་སློབ་དཔོན་མདུན་དུ་ཁྱེར་ནས། རྡོ་རྗེས་དྲི་ཡི་ཐིག་ལེ་གསུམ་བྱ། རྟེན་རྣམས་སྤྱི་བོའི་སོགས་འདོན། དར་དམར་སེར་གྱིས་མེ་ལོང་བཀབ་ནས་བཞག །ༀ་བཛྲ་ཝསྟྲ་ཧཱུྃ། གྲུབ་ན་ཞི་བའི་སྦྱིན་སྲེག་བླུགས། དེ་ནས་ལག་མཆོད། ཚོགས་བྱིན་རླབས། ཚོགས་བཏང་། ཚོགས་ཕུད་འདས་གཏོར་དྲུང་དུ་ཕུལ་ནས་གཏོར་བསྔོས་ཕྱག་བཞི་པ་མཚལ་མ་བཀྲ་ཤིས་བཅས་ཚོགས་དྲངས། ལྷག་མ་བསྡུས་ནས་ལྷག་མ་བཏང་། རྗེས་ཆོག་མཆོད་པ་བྱིན་རླབས་མཆོད་བསྟོད། ཡིག་བརྒྱ། བཟོད་གསོལ་བཀྲ་ཤིས་བཅས་དཀྱུས་ལྟར་རོ། །སྒྲུབ་མཆོད་སྐབས་གྲོལ་ཉིན་བར་གཤེགས་བསྡུ་མི་ཉན། གྲོལ་ཉིན་རྡུལ་ཚོན་གྱི་ཡེ་ཤེས་པ་སྐུ་གསུང་ཐུགས་རྟེན་ལ་བསྟིམ། དམ་ཚིག་པ་རང་ལ་བསྡུ་བ་སོགས་དང་། ཕྱི་ནང་སྔ་བར་འཚོགས་ལ་བདེ་མཆོག་བདག་བསྐྱེད། བུམ་བསྐྱེད། འབྲུ་དྲི་ཡུངས་གསུམ་བྱིན་བརླབ་བྱ། མདུན་བསྐྱེད་ཕྱི་རོལ་པ། བདག་འཇུག་གི་སྐབས། གཟུགས་བརྙན་གསལ་བ་རྟེན་རྣམས་ནི་ཞེས་ཚིག་ཁ་བསྒྱུར་བ་ཚར་གསུམ། ཆོས་རྣམས་གཟུགས་བརྙན་བཅས་
ཚར་ནས་སྦྱང་བ། ཁྲུས། རྟེན་བསྐྱེད། ཕེཾ། སྙིང་གར་སོགས། མ་ལུས་སེམས་ཅན་སོགས། བཅོམ་ལྡན་འདི་ནི་མཆོད་པ་བྱིན་རླབས། མཆོག་གཙང་མ། རྐང་བརྒྱད་བསྟོད་པ་སྔར་བཞིན། སྙན་གསན་ཕབ་ལ། རྟེན་དགབ་པ་རྒྱས་བཏབ་པ་སོགས་དོར་ནས་རྐང་བརྒྱད་བསྟོད་པའི་ཚེ་ལས་རྡོར་གྱིས་སྤོས་དང་མེ་ཏོག་བཀྱེ། ཐམས་ཅད་ཡར་བཞེངས་ནས་གཟན་ཟླུམ་ཁྱེར་བྱས་ནས་ལག་ཏུ་མེ་ཏོག་བཅས་ཐལ་མོ་སྦྱར་ལ། འདི་ལྟར་བཅོམ་ལྡན་འདས་སོགས་ནས་གསོལ་བར་མེ་ཏོག་འཐོར་ཞིང་མཆོད་རོལ་བཅས་ཚར་གསུམ་མཐར། བྱོན་ནས་ཀྱང་། སོགས། གང་འདིར་སངས་རྒྱས་བཅོམ་ལྡན་སོགས། མཚམས་མཚམས་སུ་རོལ་མོ་དང་མེ་ཏོག་འཐོར། གྲལ་དུ་འཁོད་ནས། ༀ་ན་མོ་བྷ་ག་སོགས། ༀ་ཤྲི་བཛྲ་ཧེ་རུ་ཀ་སོགས་ནས། རཱུ་པི་ནི་ཡེའི་བར་བཟླས་པ་རྣམས་བཟླས། བཟླས་པའི་ཚེ་སེར་སྦྲེངས་ཀྱི་གྲབས་དང་། ངོ་མཚར་ཆེན་པོ་སོགས་འདོན། དེ་ཚེ་མེ་ཏོག་བཀྱེ། ངོ་མཚར་ཆེན་པོ་ཚར་ནས། ཐམས་ཅད་ཡར་བཞེངས་ནས་ཛཿཧཱུྃ་བྃ་ཧོཿ ཡེ་ཤེས་པ་དང་དམ་ཚིག་དབྱེར་མེད་གྱུར་སོགས་ནས་རྣམ་དག་གོ། །རོལ་མོ་འབེབས་གཅིག་བྱས་ནས་སླར་སུམ་བརྡུང་དལ་རན་གྱིས་སེར་ཕྲེང་གཤར། ན་མོ་བུདྡྷ་ཡ་
སོགས་བརྗོད་ཅིང་ཕྱག་ནས་གང་དགོས་སར་འཐོར། སྤོས་སྣ། སློབ་དཔོན། མེ་ཏོག་གི་སྣོད་བཅས་ཁྱེར། ཚུར་འཁོར་བ་དང་། ཐམས་ཅད་རང་མལ་ནས་བཞེངས་ལ། ཕུན་སུམ་ཚོགས་པ་སོགས། གཞན་ཡང་བཀྲ་ཤིས་གང་རིགས་བརྗོད། མེ་ཏོག་འཐོར་ལ། མཐར་ཕྱོགས་བཅུའི་རྒྱལ་བ་སོགས་གྲལ་དུ་འཁོད་ནས། ཁར་སང་གི་མེ་ལོང་དེ་སློབ་དཔོན་མདུན་དུ་བཞག་ནས། དབང་རྒྱས་པའམ། བསྡུ་ན། བཅོམ་ལྡན་ཡབ་ཀྱི་གོ་སོགས་བུམ་པའི་དབང་རྟེན་ལ་བསྐུར། རིན་ཆེན་འབྱུང་ལྡན་དབུ་རྒྱན་གྱུར་ཞེས་པའི་བར། རྟེན་གྱི་མེ་ལོང་དེ་ལ་དུང་ཆོས་ནང་གི་དྲི་བཟང་ཆུས་ཐིག་ལེ་བྱ་ཞིང་། ༀ་ཨཱཿཧཱུྃ། རྟེན་རྣམས་ཀྱི་སྤྱི་བོར་སོགས་འདོན། དེ་ནས་གསེར་གྱི་ཐུར་མས་སློབ་དཔོན་གྱིས་སྤྱན་དབྱེ་ཚུལ་བྱས་ལ། ཀུན་མཁྱེན་ཡེ་ཤེས་སྤྱན་ལྡན་སོགས་དང་། ཤེས་བྱ་ཐམས་ཅད་གཟིགས་པའི་སོགས། སྐུ་ཞབས་ནས་སྤྱན་དབྱེ། ཞལ་ཕྱེ་སོགས་འོག་ནས་འབྱུང་བ་རྣམས་འདིར་བྱས་ན་རུང་ཡང་། སྤྱན་དབྱེ་བྱས་པས་འཐུས་པ་ཡིན་གསུངས། སློབ་དཔོན་གྱིས་རྟེན་ལ་རྡོ་རྗེས་རེག་ཅིང་། ཕྱོགས་བཅུ་ན་བཞུགས་པའི་སོགས་ནས་གྱུར། ཞེས་པའི་བར་བརྗོད།
དེ་ནས་རྟེན་ཞལ་བསྒྱུར་ལ། མགོན་པོ་བསྐལ་པ་སོགས་དྲིལ་གསིལ་བཅས། བཅོམ་ལྡན་འཁོར་ལོ་སྡོམ་པའི་སོགས་བརྗོད། དེ་སྐབས་མཆོད་དཔོན་པས་རྟེན་གྱི་དྲུང་མཆོད་པ་ཆུ་བཞི་བཅས་ཆ་གཅིག་བཤམས། བསངས་སྦྱངས་བྱིན་རླབས་གཞུང་ལྟར་འཇིག་རྟེན་ཁམས་འདིར་སོགས། མཆོད་ཡོན། འཇིག་རྟེན་ཁམས་སོགས། ཞབས་བསིལ། ཨ་ཙ་མ་ནཾ། འཇིག་རྟེན། བསང་གཏོར། པྲོཀྵ་ན། འཇིག་རྟེན། ཞབས་བསིལ། པདྱཾ་སོགས་སྦྱར། དེ་འཕྲོས་གཞུང་ལྟར་མཐར་མཆོད་རོལ་བྱ། རྡོ་རྗེ་སེམས་དཔའ་བསྡུས་པ་ན་སོགས་གདངས་འཐེན། བདེ་བར་གཤེགས་པ་ཐམས་ཅད་སོགས། རིན་ཆེན་གདུགས་དང་སོགས། ཁ་དོག་མ། ཤབྡའི་བར་སྐབས་རྔ་རོལ་བཅས་ཀྱི་མཚམས་རྒྱག །དེ་ལས་གཞན་ཡང་སོགས་མཆོད་རོལ། སེམས་ཅན་རྣམས་ལ་བརྩེ་བ་སོགས། དྲིལ་གསིལ་དང་རོལ་མོ། དཀོན་མཆོག་རྗེས་དྲན་འདོན་ཞིང་། བསྟོད་པའི་དྲིལ་གསིལ་འགེབ་གདངས་དང་བཅས་པས། གང་གི་དྲིན་སོགས་རོལ་མོ། དེ་ནས་མངའ་དབུལ་བའི་ཙཀླི་རྣམས་སྣོད་ནང་དུ་ནས་བླུགས་པའི་ནང་དུ་བཞག་པ། མཆོད་དཔོན་པས་ལག་ཏུ་རང་རང་ཚིག་དོན་ལྟར་གྱི་མ་ནོར་བར་འཛིན་ལ་
རྟེན་གྱི་དྲུང་དུ་རིམ་བཞིན་དབུལ། མཎྜལ་བཟུང་ལ། ས་གཞི་སྤོས་ཆུ་སོགས། ཁྲུས་ཆལ་བཟུང་ལ་སྟོང་གསུམ་ཀུན་སོགས། ན་བཟའ་བཟུང་ལ་སྣ་ཚོགས་དབང་པོ་སོགས་དང་། དེ་ནས་ཀྱང་གོ་རིམ་བཞིན་ཙཀླི་མ་ནོར་བར། མི་དབང་རིན་ཆེན་སོགས། ཐེག་མཆོག་བླ་བྲེ་སོགས། ལྷ་མི་དབང་པོ་སོགས། གཟུགས་སྒྲ་དྲི་རོ་སོགས། ལྔ་ཕྲག་ལྔ། རྒྱལ་བ་མགོན་པོ་སོགས། རིན་ཆེན་དུ་མའི་སོགས་མཆོད་རོལ། དེ་ནས་མངའ་དབུལ་རྣམས་རིམ་བཞིན། ཉེ་རིང་མི་མངའ་སོགས་དང་། རོལ་མོ། འདི་ཕྱིན་ཀུན་ལ་མཚམས་སུ་རོལ་མོ་དགོས། རྒྱལ་བའི་དབུ་སྐྲ་སོགས། བདེ་གཤེགས་སྡུག་བསྔལ་སོགས། སྲོག་ཤིང་སོགས་ནས་གདན་གྱི་བར་མཆོད་རྟེན་གྱི་མངའ་དབུལ་ཕུལ། རིན་ཆེན་དུ་མ་སོགས་གླེགས་བམ་ནང་གླེགས་ཐག་བར་གྱི་མངའ་དབུལ་ཕུལ། རོལ་མོ། དེ་ནས་ལག་མཆོད་ཚོགས་བྱིན་རླབས། ཚོགས། དེ་ལྟར་འབད་བར་འདོན་ལ། དེ་ནས་འོ་ཐུག་སྒྲུབ་པ་ནི། སྦྱིན་སྲེག་ཐབ་ནང་དུ། ལྕགས་སྒྱེད་ཀྱི་སྟེང་རྫ་སོ་མ་དཀར་རྩི་བྱུགས་ལ་བཀྲ་ཤིས་རྟགས་བརྒྱད་བྲིས་པ་བཙུགས་ལ། ནང་དུ་འོ་མ། འབྲས་བླུག །ཀ་ར་དང་སྦྲང་བཏབ་ལ། དགེ་སློང་ཞིག་
གིས་ཞྭ་ཁྲ་ཆོས་གོས་གྱོན་ནས་བསྐོལ། སྦྱིན་སྲེག་ཚར་ནས་རྩ་རིའི་བཟའ་བ་ལ་སོགས་ཕུད་དང་། འོ་ཐུག་བྲན་ནས། ན་མཿསརྦ་སོགས། ཚར་གཅིག །ཞལ་ཟས་རོ་བརྒྱ་སོགས། ཞལ་ཟས་རྟེན་གྱི་དྲུང་དུ་ཕུལ། རོལ་མོ། དེ་ནས་འོ་ཐུག་དྲངས། དེ་ནས་རྟེན་ལ་གཟུངས་ཐག་བཏགས་ནས། ན་མ་བུདྡྷ་ཡཱ་སོགས། ཡེ་དྷརྨ་སོགས་ཉེར་གཅིག །སུ་པྲ་ཏིཥྛ་སོགས་ཉེར་གཅིག །ༀ་ཧཱུྃ་ཏྲཱྃ་སོགས་ཉེར་གཅིག་རེ་བཟླས། བཀྲ་ཤིས་ཁ་ཤས་བརྗོད། མེ་ཏོག་འཐོར། དེ་ནས་བདེ་མཆོག་གི་འདས་གཏོར། གཏོར་བསྔོས་འབུལ། ཕྱག་བཞི་པ་གཞུང་ལྟར་འདོན། མཚལ་མ་མངོན་རྟོགས་སྤྱན་འདྲེན་སོགས་བཀྲ་ཤིས་བར་དཀྱུས་ལྟར། དེ་ནས་ཚོགས་ལ་ལོངས་སྤྱོད། ལྷག་མ་རྗེས་ཆོག་བཀྲ་ཤིས་བཅས་རྣམས་ནུབ་སྔ་མ་བཞིན་བྱས་ལ། ཆོས་སྐྱོང་གི་རྟེན་གཏོར་དེ་སློབ་དཔོན་གྱི་དྲུང་དུ་བཏེགས་ལ། ཆོས་སྐྱོང་བའི་སོགས་བརྗོད་ནས་རོལ་ཆེན་བཅས་རྟེན་གྱི་དྲུང་དུ་མར་ཞལ་གྱུ། གྲོལ་ཉིན་མཚལ་མ་དང་བཀྲ་ཤིས་ཚར་ནས་ཆོས་སྐྱོང་བསྒོ་བ་སོགས་ནས་གཞུང་བཞིན་བྱ། དེ་སྐབས་རྟེན་གྱི་དྲུང་དུ་མཆོད་པ་གསར་བཤམས་མེ་ཏོག་དམ་པ་སོགས་ཤོ་ལོ་ཀ་གསུམ། རོལ་མོ་བྱ། ཡིག་བརྒྱ་ཚར་གསུམ། རྫོགས་སངས་རྒྱས་
དང་དེ་ཡི་སྲས་སོགས་ཚར་གསུམ། དེ་ནས་ཡོན་བདག་བོས་ལ། ཁྱོད་ཀྱིས་ང་ལ་གང་གསོལ་སོགས། རྡོ་རྗེ་ལག་ཏུ་གཏད། དེ་ནས་ཡོན་བདག་ཀུན་གྲལ་དུ་འཁོད་ནས། མེ་ལོང་ལས་རྡོར་གྱི་ལག་པ་དར་སོགས་རྟེན་ཁེབས་ཀྱི་དགབ་པས་འཛིན་ལ། དབུ་མཛད་པས་སྔོན་ཡང་དག་པར་སོགས་ནས་དཀྱུས་ལྟར་རོ། །མཚམས་སུ་རོལ་མོ། དང་པོ་རྫས་དེ་རྟེན་གྱི་དྲུང་དུ་འབུལ་ཚུལ། དེ་ནས་སློབ་དཔོན་གྱིས་རེག །དེ་ནས་ཡོན་བདག་གིས་རེག་ལ་སྦྱིན་བདག་གི་མདུན་སྟེགས་ཀྱི་ཁར་བཞག་པའམ། རྟེན་གྱི་དྲུང་གང་བདེར་བཞག་ནའང་ཆོག །ཀུན་ལ་འགྲེ། བཀྲ་ཤིས་གང་ཞིག །ལྷ་རྫས་ལས་བྱས་སོགས། དེ་རྣམས་ཐམས་ཅད་ལ་བར་བར་དུ་མཆོད་རོལ། དེ་ནས་ཚོགས་ལ་རོལ་ནས་བཀྲ་ཤིས་ནི། སྟོན་མཆོག་དམ་པ་དང་། དུས་གསུམ་སངས་རྒྱས་སོགས། བཀྲ་ཤིས་བཀའ་རྒྱ་མ་བརྗོད། བདེན་གྲུབ་མ་གྱེར། ལྷག་མ་བཏང་། རྗེས་ཆོག་བཀྲ་ཤིས་བཅས་གཞུང་ལྟར་བྱས་པས་འགྲུབ་པ་ཡིན། །བུམ་པའི་ནང་དུ་བླུག་རྒྱུ་དྲི་བཟང་གི་ཆུ། རིན་པོ་ཆེའི་སྣོད་ཀྱི་ནང་དུ། སུག་སྨེལ། ཤིང་ཚྭ། སྤང་སྤོས། བ་ལེ་ཀ །ཙན་དན་དཀར་དམར་རྣམས་ཐུམ་པོ་
བཅིངས། ཆུ་གཙང་ནི་བྲེ་ཕྱེད་བརྒྱད་བསྐོལ་བའི་གཞི་གསུམ་དུ་བསྡུས་པའི་ཆུ་ཡིན། དེ་ལྟར་མ་གྲུབ་ན་གུར་གུམ་སྦྱར། ཁྲུས་ཆལ་ནི། འོ་ཞོ་མར་སྦྲང་ཀ་ར་སྟེ་བདུད་རྩི་ལྔའོ། བ་དམར་ཟལ་གྱི་འོ་མ། ཞོ། མར། ལྕི་བ། གཅིན་ལྔ་ནི་བ་བྱུང་ལྔའོ། །དྲི་བཟང་ཀྱུ་རུ་རའི་ཕྱེ་མ་སོགས། དུར་ཝའི་སྤིར་ནི་དུར་བ་ཆུན་པོའོ། །ལར་རབ་གནས་གོང་བཤད་དེ་ཀ་ནི་ཉིན་གྲངས་སོགས་བྱ་བའི་འདོན་ལུགས་ལ། དེ་ལས་བསྡུས་པ་དངོས་སྟ་སྦྲེལ་མ་སོགས་ཉིན་གཅིག་གིས་ཚར་བ་བྱེད་ན། དང་པོ་ཡོ་བྱད་སོགས་བཤམས་པ་ནས་སྙན་གསན་དབབ་པ་ཡན་སྟ་གོན་སྐབས་ལྟར་དཀྱུས་བཞིན་བྱས་ལ། རྒྱས་གདབ་པ་དང་རྟེན་དགབ་པ་དོར་བས། དངོས་གཞི་དྲུག་གི་དང་པོ་ནས་བཟུང་འདི་ལྟར་སོགས་ནས། རྟེན་ཞལ་བསྒྱུར་བའི་ནང་གི། མཆོད་པ་ཤབྡའི་བར། དེ་ནས་ཇི་ལྟར་འཇམ་དབྱངས་ལ་སོགས་པས་མཆོད། བསྟོད་པ་ནི། དཀོན་མཆོག་སྤྱི་བསྟོད། སེམས་བརྩེ་མ་དང་དཀོན་མཆོག་རྗེས་དྲན་ཙམ་གྱི་རྗེས། ཆོ་གའི་གཞུང་གང་ཡིན་དེ་ཉིད་དང་དཀྱིལ་འཁོར་པ་ལ་སོགས་པའི་གཏོར་མ་སོ་སོའི་ཆོ་གས་འབུལ་ཞིང་། དེ་ནས་ཆོས་སྐྱོང་བགོ་བ་སོགས་རབ་གནས་དང་དཀྱིལ་
འཁོར་གྱི་རྗེས་ཆོག་རྣམས་གོང་བཤད་དང་འདྲ་བ་ཡིན། སྙན་གསན་དབབ་པའི་སྐབས་ནང་པར་ཞེས་པ་ལ་ད་ལྟ་ཞེས་འདོན་པ་བསྒྱུར། རབ་གནས་ཀྱི་ཆོ་གའི་འདོན་འགྲིགས་ཕྱག་ལེན་དང་བཅས་པ་འདི། རྗེ་ཉིད་ཀྱི་ཕྱག་ལེན་དང་ཞལ་ཁྲིད་ཇི་ལྟ་བ་བཞིན་བྲིས་པ་ཡིན། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །སརྦ་མངྒ་ལམ། །