ཀར་གླིང་ཞི་ཁྲོ་ཚོགས་སྐབས་ཌཱ་དྲིལ་ཟིན་ཐོ།
ཀར་གླིང་ཞི་ཁྲོ་ཚོགས་སྐབས་ཌཱ་དྲིལ་ཟིན་ཐོ་ལ། དང་པོ་དཀར་གཏོར་ལམ་ཤབྡ་ལ་ཌཱ་དྲིལ། ལྷ་ཀླུ་སོགས་ཚིག་བཞི་མཚམས་དྲིལ་གསིལ་དང་། མཐར་ཌཱ་དྲིལ་བྱ། འགུགས་པའི་རྒྱ་དང་བཅས། ཕྱོགས་བཞི་མཚམས་བརྒྱད་ནས་ཊཱ་ཀི་ཧཱུྃ་ཛ་དྲིལ་གསིལ། ཤབྡ་ཌཱ་དྲིལ། ཉོན་ཅིག་སོགས་བཞི་མཚམས་དྲིལ་གསིལ། མཐར་དྲིལ་གསིལ་རོལ་མོ་འབེབས་དང་བསྟུན་པར་བྱ། མཆོད་པ་བྱིན་རླབས་ཤབྡ་ལ་ཌཱ་དྲིལ། སྤྱན་འདྲེན་སྐབས་རོལ་ཆེན་རྔ་ཚིག་རྣམས་དང་བསྒྲིག་ནས་ཌཱ་དྲིལ་དེར་མཐུན་དགོས་པ་ཁྱད་པར་དང་། གཤེགས་སུ་གསོལ་གྱི་མཐར་ཡང་ཌཱ་དྲིལ། སྡེ་བདུན་ནང་ཁྲམ་ལྟར་བསྐྱེད་ལ་ཌཱ་དྲིལ། བཤགས་བའི་མཐར་ག་ན་ཙཀྲ་སོགས་ལ་ཌཱ་དྲིལ། ཚོགས་ཀྱི་འགུག་གཞུག་ལ་དྲིལ་གསིལ་དང་། ཆོས་སྐུ་ཞི་བ་དང་། བླ་མ་ཀུན་བཟང་སོགས་ཚིག་གསུམ་མཚམས་དྲིལ་གསིལ་དང་། རོལ་ཞབས་དྲིལ་གསིལ། ཞི་སྐོང་རྣམ་ཤེས་ཕུང་པོ་སོགས་ལེ་ཚན་རྣམས་ཀྱང་མཐར་ཌཱ་དྲིལ། དྲག་སྐོང་མཐར་མཆོད་རོལ་དང་བསྟུན་པའི་ཌཱ་དྲིལ། ཕུར་པ་གདེངས་མཐར་རོལ་མོ་འབེབས་བསྟུན་ཌཱ་དྲིལ་བྱ།
གནས་འདྲེན་སྐབས་འགུགས་པའི་རྒྱ་དང་བཅས། བདེན་སྟོབས་གསུམ་མཐར་དྲིལ་གསིལ། སངས་རྒྱས་མཐུ་སྟོབས་ནས་འགུགས་པའི་རྒྱ་བཅས་བཛྲ་ས་ཏྭ་སོགས་དྲིལ་གསིལ། གནས་སྤར་གྱི་དྲིལ་གསིལ། གཞན་དུ་དེངས་མཐར་དྲིལ་གསིལ། རང་ཉིད་ལྷ་ཡི་བཞི་མཚམས་དྲིལ་གསིལ་དང་མཐར་དྲིལ་གསིལ། ཁྲུས་དང་དུག་བཅོམ་བཞི་མཚམས་དྲིལ་གསིལ་དང་། སྔགས་རྣམས་ལའང་དྲིལ་གསིལ། བྱང་ཕྱག་སྐབས་ཀྱང་དྲིལ་གསིལ། གཏོར་མ་ཕྱིར་ཕུལ་སྐབས་དྲིལ་གསིལ། དུག་བཅོམ་ཁྲུས་དང་ས་བཅད་རྣམས་སོ་སོའི་སྔགས་ལ་དྲིལ་གསིལ། བུམ་དབང་སོགས་ལའང་མཚམས་སུ་དྲིལ་གསིལ། ཟས་བསྔོ་བའི་མཐའ་དྲིལ་གསིལ། གསུར་མཆོད་སྐབས་ཌཱ་དྲིལ། ཏིང་འཛིན་ཤུགས་དང་བྱང་བསྲེག་ལམ་སྟོན་སོགས་ལའང་ཚིག་བཞི་མཚམས་དྲིལ་གསིལ། ཕཊ་ནས་མཆོད་རོལ་ཌཱ་དྲིལ། ལྷག་མ་བར་མཚམས་འགུག་གཞུག་སྐབས་དྲིལ་གསིལ། བཀྲ་ཤིས་ཚིག་གཉིས་མཚམས་དྲིལ་གསིལ་དང་མཐར་ཌཱ་དྲིལ་བྱའོ། །དེ་ལྟར་ཕྱག་རྒྱུན་མཐོང་རྒྱུན་བཞིན་བཀོད་པ་སོར་གནས་པ་ཞིག་ལས་གང་མོས་བྱུང་རྒྱལ་གྱི་སྤྱོད་པ་མི་རིགས་པ་ངེས་པར་ཞུ། སརྦ་མདྒ་ལམ། །