མགོན་ཁང་ཆེན་མོའི་སྒྲུབ་པ་རྣམས་ཀྱི་འདོན་སྒྲིག་དང་བཅའ་ཡིག
མགོན་ཁང་ཆེན་མོའི་སྒྲུབ་པ་རྣམས་ཀྱི་འདོན་སྒྲིག་དང་བཅའ་ཡིག་ཡོད། ༀ་སྭསྟི་སིདྡྷཾ། སྣང་སྲིད་ཟིལ་གནོན་པདྨ་སཾ་བྷ་ཝ། །དབྱེར་མེད་གྲུབ་ཆེན་ཀརྨ་པཀྴི་དང་། །བསྟན་སྲུང་རྡོ་རྗེ་བེར་ཅན་ལྕམ་དྲལ་ལ། །གུས་པས་འདུད་དོ་བྱང་ཆུབ་བར་དུ་སྐྱོངས། །ཞེས་ཆེད་དུ་བརྗོད་ནས། མགོན་ཁང་ཆེན་མོ་བདུད་དཔུང་ཟིལ་ནོན་གྱི་སྒྲུབ་པའི་རྣལ་འབྱོར་པ་རྣམས་ཀྱི་ཞལ་འདོན་ལ། དང་པོ། ཐོ་རངས་ཀྱིི་ཐུན་ལ། ཚིག་བདུན་གསོལ་འདེབས་དང་། བརྒྱུད་འདེབས་བདེ་ཆེན་རྡོ་རྗེ། ཕག་མོའི་བདུད་རྩི་བྱིན་རླབས་དང་པོ་ཉིན་ལས་རྒྱུན་དུ་མི་དགོས། སྔོན་འགྲོ་བཏང་། སྲུང་འཁོར། སྐྱབས་སེམས། ཚོགས་ཞིང་སོགས། བདག་བསྐྱེད་བསྙེན་པ་དང་ཟུང་འཇུག་སྐུར་ལྡང་བཅས། ཕྱག་ཆེན་སྔོན་འགྲོའི་གོ་ཡང་དེས་ཆོད། དེ་ནས། ལེགས་ལྡན་སྲུང་འཁོར་བསྙེན་པ་རྣམས་དང་དགུག་གཞུག །ཞལ་བསྟབ་སྔགས་བསྙེན། བྱང་ཕྱོགས་དུར་ཁྲོད་དང་། ཡེ་ཤེས་དབྱིངས་མས་ཐུན་གཏོར་ཕྱིར་འབུལ། གར་ཟློག་དང་། ལོ་ཏྲིའི་ཐལ་རྡེབ་བྱས་ལ་ཐུན་གྲོལ། ཆབ་གཏོར་རྒྱས་པའི་ཚིག་དོན་འབྲིང་པོར་འདུས་པས་དེ་དང་དེའི་ཆ་ལག་བཏོན་པས་འཐུས། བསང་བཏང་ལ། འདོན་
ཆ་གསར་བཀོད་ནང་འགགས་འདུས་རྩིས་ཀྱིས་དེ་ཙམ་བྱ། སྔ་དྲོའི་ཐུན་ལ། མཚལ་མ་གཞུང་བཞིན། མཆོད་པ་བྱིན་རླབས། ཚོགས་དང་། གསང་སྔགས་ནང་གཏོར། ལྷ་ཆེན་དཔལ་བར་སྔགས་རིང་མཐར། རྡོ་རྗེ་འཆང་དངོས་མ་ཡབ་ཡུམ། བཅོ་ལྔ་ཉིན་རྣམ་སྲས་རྒྱས་པ། རྒྱུན་པར་རྣམ་སྲས་དང་སྔགས་བདག་གཏོར་འབུལ་བསྡུས་པ་རེ། དམ་ཅན་རྒྱས་པ། སྲིན་མགོན་བསྡུས་པ། ཞིང་སྐྱོང་རྒྱས་པ། མཁར་ནག་བསྡུས་པ། ཨ་ཕྱིའི་ལྷུབ་གསོལ་གཏོར་ཆོག་དང་། རྡོར་གདན་མ། བྲག་བཙན་བསྡུས་པ། ཐང་ལྷ་ཛཾ་གླིང་བྱང་ཕྱོགས་མ། མཁའ་འགྲོ་སྤྱི་གཏོར་དང་། གཞི་བདག་དཀར་གཏོར་བཏང་། བསྟོད་པ་གང་དྲིན་མ་སོགས་ནས། དམ་ཞིང་བསྟོད་པ་སོགས། བསྙེན་པ་བྱ། དགུག་གཞུག་༣དང་། རྟགས་བསྟོད་གཉིས་ཀྱིས་གཏོར་མ་ཡར་ཕུལ། ཐུན་གྲོལ། འདི་སྐབས་གཞན་གྱི་གསོལ་ཀ་དང་བསྐང་བ་འདོན་དགོས་ཡོད་ན་བཏོན། གུང་ཐུན་ལ། གསོལ་ཀ་རྒྱས་པ། ལྷ་མོ་དང་། དམ་ཞིང་གསོལ་ཀ །བསྐང་བ་རྒྱས་པ་དང་འབྲིང་པོ། བསྐང་ཐུན་ཚར་ལྔ། ལྷ་མོའི་བསྐང་བ་དང་། འཁྲུགས་བསྐང་། ཚེ་རིང་མའི་བསྐང་བ། བདག་སྒྲུབ་མ། སྔགས་རིང་གོང་འོག།
བསྙེན་པ་བཅས། དགུག་གཞུག །འདས་བྱོན་མ་ཡབ་ཡུམ་བསྐུལ་དང་གཏེར་སར་སོགས། གཏོར་མ་ཡར་འབུལ། ཐུན་གྲོལ། གཞན་གྱི་གསོལ་ཀ་སོགས་དམིགས་བསལ་དགོས་ན་བྱ། དགོང་ཐུན་ལ། མཚལ་མ་དང་། མཆོད་པ་བྱིན་རླབས་འདོན། ཚོགས་མི་དགོས། གསང་སྔགས་ནང་གཏོར། ལྷ་ཆེན་སྔགས་རིང་མཐར། ཕྱག་བཞི་ཡབ་ཡུམ་དང་། རྣམ་སྲས། སྔགས་བདག། དམ་ཅན། སྲིན་མགོན། ཞིང་སྐྱོང་། མཁར་ནག་བཅས་ཀྱི་སྔགས་བསྔོས་བྱ། ཀུན་ཏུ་བཟང་དང་། རྡོ་རྗེ་མི་འགྱུར། བྲག་བཙན་རྒྱས་པ། ཐང་ལྷ་དྲི་ཟའི་རྒྱལ་པོ། །མཁའ་འགྲོ་དང་། གཞི་བདག་གཏོར་མ་བཏང་། བསྟོད་པ་བྱ། དམ་ཞིང་མི་དགོས། གསོལ་ཀ་བྱིན་རླབས། བསྟན་སྲུང་མཐར་ཐུག །ལྷ་མོའི་གསོལ་ཀ །བསྐང་བ་བྱིན་རླབས་དང་བསྡུས་པ་ཚར་གཅིག །བསྙེན་པ་བྱ། དགུག་གཞུག༣།མ་དག་མ། གང་ཞིག་བླ་མ། ཕོ་བྲང་མཁའ་སྤྱོད། རཀྵ་ས། ཉི་མ་ནུབ་ཕྱོགས་མཐར་ཐུན་གཏོར་ཕྱིར་འབུལ། གར་ཟློག་དང་། སེང་གདོང་མ། ཏྲིག་ཁྲོཾ་མ་ཐལ་རྡེབ་བཅས། ཆོས་ཀྱི་དབྱིངས་མ་ཡབ་ཡུམ་དང་། ལྷག་མ་བཏང་། མཆོད་བསྟོད། བཤགས་པ། མ་མགོན་བཀྲ་ཤིས་
པའི་གཟུངས་༣ དང་། བར་ཆད་སེལ་གཟུངས། ༣ སྨོན་ལམ་བཀྲ་ཤིས་དང་བཅས་བྱའོ། །ཉེར་དགུའི་དུས་གཏོར་རྒྱས་པ་ལ་ཚོགས་ཆེན་སྲོལ་བཞིན་ཕྱོགས་མཚུངས་དགོས་པའི། ཐོར་ཐུན་སྐབས་ཉིན་ལྟར་དང་འདྲ་ཞིང་། སྔ་ཐུན་ལ་མངོན་རྟོགས་རྒྱས་པ་ནས་གཞུང་བཞིན་གྱི་འཁོར་ལྔ་རྣམས་དང་། མཁར་ནག །ཨ་ཕྱི་རྒྱས་པ་ནས་དཀྱུས་ལྟར་གཞི་བདག་དཀར་གཏོར་བཅས་དང་། བསྟོད་པ་རྣམས་ཡོངས་རྫོགས་དང་། བསྙེན་པ་བྱ། མཐར་འགུག་གཞུག་༣ དང་། མ་དག་མ། རྟགས་བསྟོད་གཉིས་བཏོན་ལ་ཐུན་གྲོལ། གུང་ཐུན་ལ་གསོལ་ཀ་རྣམས་དང་བསྐང་བ་རྒྱས་བསྡུས་བཅས་སྔར་བཞིན། བསྙེན་པ་དང་མཐར་འགུག་གཞུག ༣ །དེ་ནས་རྒྱ་མཚོ་གླིང་མ་སོགས་ལས་འགྲིགས་ཀྱི་དྲག་བསྐུལ་རྣམས་དང་། གསོན་ཅིག་མ་དང་། འདས་བྱོན་མ་ཡབ་ཡུམ་བསྐུལ་བྱས་ལ་ཐུན་གྲོལ། དགོང་ཐུན་ལ་མཚལ་མ་བསྡུས་པ་ཉིན་ལྟར་གྱི་བསྙེན་པ་དང་། མཐར་འགུག་གཞུག ༣ །གང་ཞིག་མ། ཕོ་བྲང་མཁའ་སྤྱོད། རཀྵ་ས་ཡབ་ཡུམ་བསྐུལ་དང་། ཉི་མ་ནུབ་ཕྱོགས་ཀྱི་ཛ་བརྡུང་སྐབས། ཐུན་གཏོར་སྔོན་འབུལ་རྣམས་ཕྱོགས་གཅིག་ཕྱིར་འབུལ་དགོས། གར་ཟློག་ལ་
སོགས་གཞུང་བཞིན། དངོས་གྲུབ་ལེན་ཆོག་དང་བཀྲ་ཤིས་བཅས། དེ་ནས། ཕག་མོའི་ཚོགས་བྱིན་རླབས་བཏོན་ལ་བླ་མ་ཡི་དམ་སྤྱན་འདྲེན་གཞུང་ལྟར་དང་། རིགས་ལྔ་མཁའ་འགྲོ་བསྡུ་ཚིག་བྱེད། དེ་ཕྱིན་དཀྱུས་ལྟར་ཚོགས་ཕུད་འབུལ། ཚོགས་རོལ་དང་ཞབས་བརྟན་འདོན། ལྷག་མ་དང་རྗེས་ཆོག་བཀྲ་ཤིས་སོགས་མཐའ་རྒྱས་བྱའོ། །གནམ་གང་ཉིན་རྒྱུན་གྱི་འདོན་འགྲིགས་ཇི་ལྟ་བ་དང་། ཚེས་གཅིག་ལྟ་བུར་སྒྲུབ་པ་རྣམས་བརྗེ་ལེན་སྐབས་སྔ་འཚོགས་བྱ་བའི་ཐུན་བཞི་ཀ་སྦྲེལ་ནས་འདོན་པའི་བདག་སྒྲུབ་མའི་མཐར་བསྙེན་པ་དང་། སྔགས་རིང་རྣམས་དང་། དགུག་གཞུག ༣ །མ་དག་མ། འདས་བྱོན་མ་ཡབ་ཡུམ། གང་ཞིག་བླ་མ་ཕྱི་ཉིན་ལྟར་དང་། དངོས་གྲུབ་ལེན་སྔགས་བརྒྱ་རྩ་བརྒྱད། བཀྲ་ཤིས་པའི་གཟུངས། བར་ཆད་སེལ་གཟུངས་རྣམས་ཉེར་གཅིག་རེ་བཟླ། སྨོན་ལམ་བཀྲ་ཤིས་ལྷ་བསང་དང་བཅས་འགྲུབ་པར་བྱས་ནས་སྐབས་འདིར་ལྷ་རྟེན་མཆོད་རྫས་སྤྱན་གཟིགས་ལ་སོགས་ཆོས་ཁྲིམས་པས་རྩིས་སྤྲད་ལེན་ཞིབ་ཆ་ཚད་ལྡན་དགོས་རྒྱུའི་མ་ཚང་བ་འཚབ་པ་སོགས་སྲོལ་གང་ཡོད་དང་། གསར་བཞུགས་རྣམས་ཀྱིས་དགོང་ཐུན་ནས་བཟུང་
མཚམས་བསྡམ་ཞིང་། ཆ་གསུམ་བཏང་ལ་ཐོ་བསླང་། བསམ་འགྲུབ་མ་འདོན། དེ་ནས། མཚལ་མ་བསྡུས་པ་ཉིན་བཞིན་དགོང་ཐུན་དང་ཕྱོགས་མཚུངས་ལ་ཁྱད་པར་བྲག་བཙན་བསྡུས་པ་དང་། གཞན་རྣམས་དཀྱུས་ལྟར། བསྙེན་པ་དང་། འགུག་གཞུག ༣ །མ་དག་མ། གང་ཞིག་མའི་མཐར་ཐུན་གཏོར་ཕྱིར་ཕུལ། དམ་ཞིང་བསྐུལ་པ་མི་འདོན། གར་ཟློག་ལ་སོགས་གཞུང་ལྟར་བྱ། ཕྱི་ཉིན་ཐོར་ཐུན་ལ། ཚིག་བདུན་མ་དང་། བརྒྱུད་འདེབས་ཕག་མོའི་བདུད་རྩི་བྱིན་རླབས་སོགས་གོང་གསལ་བཞིན་མཐར་ཆགས་སུ་བཏོན་པས་ཁྱབ་བོ། །ཐ་སྐར་ཅན་གྱི་དབང་ཕྱོགས་ལ་དགུ་ཆུང་གི་ཚུལ་དུ་བསྟན་པའི་སྤྱི་རིམ་གཏོར་ནག་པར་བུའི་ལས་སྦྱོར་བཅའ་སྒྲུབ་སྐོར་གྱི་ཕྱག་ལེན་སོགས། ༈ རྗེ་གོང་མའི་གསུང་རྒྱུན་ཟིན་ཐོ་ཅི་ལྟ་བ་དགོས་ཤིང་། རྒྱུན་གྱི་སྤྱོད་ལམ་མཚམས་དམ་པར་བཅད་ནས་མཚམས་གཡོག་མ་གཏོགས་གཞན་འགྲོ་སྡོད་མི་ཆོག །ལྷ་མཇལ་ཡོང་མཁན་དེ་མཚུངས་དགོངས་ཞུས་འདྲ་མ་གཏོགས་འོང་མི་ཆོག་པའི་བཀའ་རྒྱ་དམ་པར་ཡོད་ཅིང་། རྣམ་ཀུན་དམ་ཚིག་བརྟན་པོའི་ངང་ནས་དཔལ་ལྡན་བླ་མ་དང་ཡེ་ཤེས་མགོན་པོ་དབྱེར་མེད་པའི་ངེས་ཤེས་འདུན་པ་ལྡན་པས་བསྟན་པ་དང་སེམས་ཅན་
གྱི་དོན་ལ་དམིགས་པའི་བསྙེན་སྒྲུབ་ལས་གསུམ་སོགས་ལུས་དང་ངག་ཡིད་དགེ་ལ་བསྐུལ་བའི་སྒོ་ནས་བསྐྱེད་རྫོགས་ཀྱི་ཉམས་ལེན་གཙོར་བཏོན་པའི་ལྷ་བསྒོམ་སྔགས་བཟླས་གདོན་བྱའི་གོ་རིམ་རྣམས་དང་། ཌཱ་དྲིལ། རོལ་མོ་རྔ་ཚིག། རྐང་གླིང་བཏང་ལགས། གཏོར་མ་དང་མཆོད་པ་རྣམས་བཤམ་བཀོད་གསོ་བྲན་འབུལ་བ་ལ་སོགས་ཕྱག་ལེན་མཐོང་བ་བརྒྱུད་པའི་ཞལ་རྒྱུན་ཇི་བཞིན་ལྷག་ཆད་མེད་པ་ཞིག་གིས་རང་བཟོ་བྱུང་རྒྱལ་དུ་མ་སོང་བ་དང་། བག་མེད་ཀྱི་ཆང་རག་བཏུང་བ་སོགས་མདོར་ན་སྤྱོད་ལམ་རྩིང་ཧྲལ་དབང་གིས་གཉིད་དང་ལེ་ལོ་ལ་སོགས་ཉོན་མོངས་རགས་པ་རྣམས་སྤང་བ་གལ་ཆེ་ཞིང་། ཚུལ་དང་མི་ལྡན་པའི་ལོག་པར་ལྟ་བའི་གནས་སུ་འགྱུར་སྲིད་ན། ཡེ་ཤེས་པའི་ལྷ་ལ་འཛིན་རྟོག་མི་མངའ་ཡང་། ལས་དང་འཇིག་རྟེན་སྲུང་མ་རྣམས་ཀྱིས་ལེགས་ཉེས་སྟང་འཛིན་དམ་ཚིག་རྗེས་གཅོད་བཀའ་ཡི་ཆད་པ་འབེབས་ཤིང་། ལས་འབྲས་བླང་དོར་བསླུ་མེད་ཀྱིས་མནར་མེད་གནས་སུ་ལྟུང་བར་འགྱུར་བས་དེས་ན་བག་ཡོད་པའི་རྣལ་འབྱོར་ལ་བརྩོན་པར་བྱའོ། །སྔར་རྒྱུན་སྒྲུབ་པ་གསུམ་དང་། ཤིང་སྤྲེལ་ལོར་གསར་བཞག་གཅིག་གི་ཕོགས་ཆས་རྟེན་ས་ཞིང་དང་། ཁྱད་པར་མགོན་པོའི་བསྙེན་འཁོར་བཅས་གཟིམས་དཔོན་བདེར་གཤེགས་པས་ཇི་སྲིད་བརྟན་
པར་བཞག་པའི་དགེ་དེས་རྒྱལ་བསྟན་དར་ཞིང་བསྟན་འཛིན་མཆོག་རྣམས་ཞབས་པད་བརྟན་པ་དང་། དགེ་འདུན་གྱི་སྡེ་རྒྱས་ཞིང་ལྷག་པར་དེ་ཉིད་ས་དང་ལམ་གྱི་ཡེ་ཤེས་ཡོན་ཏན་མཐའ་དག་ཡོངས་སུ་རྫོགས་ནས་ཀུན་བཟང་འོད་མི་འགྱུར་དང་དབྱེར་མེད་མངོན་བྱང་ཆུབ་ཅིང་། མ་གྱུར་འགྲོ་རྣམས་རྫོགས་སངས་རྒྱས་ཀྱི་གོ་འཕང་ཐོབ་པའི་ཕྱིར་དུ་ཡོངས་སུ་བསྔོ་བས་དེ་བཞིན་དུ་འགྲུབ་པར་གྱུར་ཅིག །ཅེས་སི་ཏུ་པདྨ་ཉིན་བྱེད་དབང་པོས་ས་སྐྱོང་ཞེས་པ་ཤིང་བྱ་ཟླ་བ་གཅིག་པའི་ཚེས་བཅོ་ལྔ་ལ་བཀོད་པ་སརྦ་མངྒ་ལཾ། །