སྐྱབས་མཆོག་རྒྱལ་དབང་རིན་པོ་ཆེའི་ཞབས་དྲུང་དུ་ཕུལ་བ།
བོད་དང་བོད་ཆེན་ལྗོངས་རྣམས་སུ། །བསྟན་དང་བསྟན་འཛིན་མཆོག་རྣམས་ལ། །བསྙེན་བཀུར་མཆོད་སྤྲིན་འབུལ་བའི་ཐོ། །པུཎྜ་རཱི་ཀའི་ཕྲེང་འདིར་གསལ། །
ཨངྒི་ར་ཞེས་ཆུ་སྤྲེལ་ལོར། །བོད་ཡུལ་དབུས་གྱི་རྒྱལ་རྣམས་ལ། །དངོས་འབུལ་ཐོ་ཡིག་ཚིགས་བཅད་ཕྲེང་། །བཀོད་རྣམས་འདི་ན་གསལ་བར་བྱ། །དེ་ཡང་དང་པོ་སྐྱབས་མཆོག་རྒྱལ་དབང་རིན་པོ་ཆེའི་ཞབས་དྲུང་དུ་ཕུལ་བ་ནི། ༀ་སྭ་སྟི་ཛ་ཡནྟུ། མཐའ་ཡས་སྲིད་པར་ཕྲིན་ལས་རྒྱ་མཚོ་ཡི། །ཐུགས་རྗེ་ཆེན་པོའི་རླབས་ཕྲེང་གཡོ་བ་ཅན། །མི་བཟད་སྙིང་རྗེའི་རྣམ་པར་འཕྲུལ་པ་ལས། །ཚར་དུ་དངར་བ་རིམ་བྱོན་མུ་ཏིག་ཕྲེང་། །མཆོག་གི་དཔལ་ལྡན་རྡོ་རྗེ་ཅན་དངོས་ཆེ། །དཀྱིལ་འཁོར་ཀུན་གྱི་ཁྱབ་བདག་འཁོར་ལོའི་མགོན། །གང་དེའི་ཞབས་པད་རྡོ་རྗེ་གཡུང་དྲུང་དང་། །སེང་གེས་བཏེགས་པའི་ཁྲི་འཕང་ལྷར་བཅས་པ། །ཆེ་དགུའི་གཙུག་གི་
ནོར་བུས་མངོན་བཏུད་པའི། །བསྔགས་འོས་ཕྱག་བྱར་གྱུར་པ་གང་དྲུང་དུ། །ཕུན་སུམ་ཚོགས་པའི་རབ་དགེའི་དུས་ཀྱི་ཆར། །གུས་པས་ཡིད་ཀྱི་དང་བ་བསྐྱེད་བཞིན་དུ། །ལུས་ཀྱི་གནས་ལྔ་ས་ལ་རེག་ནས་སུ། །ངག་གི་སྡེབ་ལེགས་ལྷ་ཡི་རོལ་མོ་བཀྲོལ། །ཀ་མ་ལ་ཡི་ཆར་ཆེན་ཕྱོགས་ཀུན་ཏུ། །འཐོར་བར་བྱས་ནས་མགོན་པོ་ཁྱོད་ཉིད་ཀྱི། །གསང་གསུམ་རྣམ་ཐར་རིག་པའི་ཨཱ་དཪྴ། །གསལ་བར་བཀོད་ནས་ཤིས་པའི་ཚིག་གི་ཕྲེང་། ཏམྦུ་ར་ཡི་རྒྱུད་ཀྱི་བསྟོད་པ་ནི། །དེང་ཡང་འབྱམས་ཀླས་བསྐལ་པའི་གོང་རོལ་ནས། །སྟོབས་བཅུ་མངའ་བ་རྣམས་ལས་ཆེས་ལྷག་པའི། །བདེ་བར་གཤེགས་པའི་བརྩེ་ཆེན་ཡེ་ཤེས་ངང་། །
མངོན་པར་བྱང་ཆུབ་ཉིད་ནའང་གཞན་སྣང་ངོར། །ཡལ་བར་འདོར་མེད་ཆོས་དབྱིངས་ཀློང་ཡངས་སུ། །བྱམས་པའི་ཤུགས་ཀྱིས་བསྐུལ་བའི་ཁྱུང་སྔོན་སྐྱེས། །ལེགས་བྱས་བྱེ་བའི་བསོད་ནམས་འོད་རིས་ཀྱིས། །དྲངས་ནས་ཤར་རིའི་རྩེ་ལས་ཉིན་མོར་བྱེད། །ཇི་བཞིན་རྫུ་འཕྲུལ་རྟ་བདུན་ཤིང་རྟ་ཡིས། །བཏེགས་ནས་ཛམ་གླིང་སྐྱེ་དགུའི་མཆོད་སྡོང་དུ། །གཟུགས་སྐུའི་དཀྱིལ་འཁོར་ཆ་རྫོགས་ལྷམ་མེ་བ། །ངེས་གསང་རིང་ལུགས་ཡོངས་རྫོགས་འཛིན་པའི་བདག །མ་འདྲིས་ཡིད་ཅན་གདུལ་བྱའི་སྐྱེད་མོས་ཚལ། །ཕན་བདེའི་འདབ་སྟོང་གྲོལ་བའི་གཉེན་གཅིག་པུ། །མ་སྨད་རྣམ་དཔྱོད་ཕྲིན་ལས་འཇུག་པ་གང་། །གཞན་དྲིང་མི་འཇོག་རྒྱལ་རྣམས་འགྲོ་ཕན་གྱི། །ཚུལ་ལ་བསྙེལ་བ་མེད་བཞིན་གང་འདིར་ཡང་། །རྡོ་རྗེའི་སྐུ་ནི་མཚན་དཔེའི་དཔལ་འབར་བ། །མཐོང་ཐོས་དྲན་ཙམ་བདེ་བ་ཆེ་ཐོབ་པ། །བླ་མེད་འཕགས་པའི་ཚོགས་ཀྱི་བྱིན་བསྡུས་ལས། །ལྷག་པའི་གཏེར་ཆེན་གང་ཁྱོད་ལས་གཞན་སུ། །རྡོ་རྗེའི་གསུང་ནི་ཡན་ལག་དྲུག་ཅུར་ལྡན། །འགགས་མེད་དབྱངས་ཀྱི་གྲག་སྟོང་སེང་གེའི་སྒྲ། །ལུང་དང་རིགས་པའི་ང་རོས་རྒོལ་ངན་རྣམས། །མཐར་བྱེད་ངག་གི་དབང་ཕྱུག་གང་ལས་ཅི། །རྡོ་རྗེའི་ཐུགས་ནི་མི་གཡོ་གསུམ་ལྡན་ངང་། །ཟབ་ཞི་སྤྲོས་བྲལ་ཏིང་འཛིན་ཕྲག་
བརྒྱ་ཡི། །ཡོན་ཏན་མ་འདྲེས་སོ་སོར་གསལ་སྟོན་པའི། །དུས་གསུམ་ཀུན་མཁྱེན་གཟིགས་པ་ཉིད་ལས་གང་། །དེ་ལྟའི་དཔག་པར་དཀའ་བའི་ཡ་མཚན་གྱིས། །ཕྱུར་བུར་གཏམས་པ་དགོས་འབྱུང་དབང་རྒྱལ་བཞིན། །ལྷ་དབང་རལ་པའི་ཟུར་ཕུད་རྩེ་མོས་མཆོད། །གསེར་མངལ་ཅན་དང་འཇིག་རྟེན་སྐྱོང་བ་ཡི། །གྲགས་ལྡན་ཆེན་པོར་གྱུར་པ་རྣམས་ཀྱིས་ཀྱང་། །ཁེངས་པ་བསྐྱུངས་ནས་མགོན་ཁྱོད་ཞབས་པདྨོ། །གེ་སར་རྒྱས་པའི་ངོགས་སུ་བསྙེན་བྱས་ནས། །དམ་པའི་བདུད་རྩིའི་ཞོ་ཤས་འཚོ་བཞིན་པར། །དཀར་པོའི་ཕྱོགས་ཀུན་རྒྱལ་བའི་བ་དན་བསྒྲེངས ། །དེ་མཐུའི་དཔལ་ལས་སྲིད་ཞིའི་དགེ་མཚན་ནི། །རྟག་པར་ནོངས་མེད་རྒྱལ་ཁམས་རྫོགས་ལྡན་དུས། །དང་པོར་སྤྱོད་པ་ཇི་ལྟའི་བསོད་ནམས་གང་། །མི་བཟད་གཏེར་ཆེན་བུམ་པ་བཟང་པོ་ལྟར། །འདི་ཀྭ་གང་གི་ཐུགས་རྗེའི་ཆ་ཤས་ཀྱི། །འཕྲུལ་ལས་གྲུབ་པ་དེ་ལས་གཞན་སུ་ཞིག །དེས་ན་འགྲོ་བའི་བླ་མ་ཁྱོད་ཁོ་ན། །བསེ་རུ་ལྟ་བུར་ངེས་པའི་གང་འདིར་ཡང་། །བདག་སོགས་ཚོགས་གཉིས་མ་ལུས་རྫོགས་སླད་དུ། །དད་གསུམ་བློ་ཡིས་གསོལ་གདབ་ལས་བྱུང་བའི། །མཐོང་དང་ཐོས་དང་དྲན་ཙམ་གྲོལ་བ་ཡི། །རྫུ་འཕྲུལ་བཀོད་པའི་རང་གཟུགས་ལས་གྲུབ་པའི། །རང་རྟགས་
མི་བསྐྱོད་རིགས་ཀྱི་ཅོད་པན་ཅན། །ལྟ་བས་མི་ངོམས་བྱིན་གཟི་རབ་འབར་བ། །ཐོད་དུ་བཅིངས་ནས་གདུལ་བྱ་སྐལ་ལྡན་རྣམས། །འབྲེལ་ཚད་ཡང་དག་ལམ་ལ་དཀྲི་བ་ཡི། །རིང་ནས་སྔོན་གོམས་ཐུགས་བསྐྱེད་དམ་བཅའི་ཁུར། །ཟབ་མོ་རྗེས་སུ་དགོངས་པའི་བྱང་ཆུབ་ཆེའི། །གོ་འཕང་བདེ་བླག་སྟོན་ཕྱིར་བདེན་པའི་ཚིག །རྡོ་རྗེའི་གསུང་གི་བརྗོད་དང་ལྷན་ཅིག་ངང་། །བྱམས་ཆེན་དབྱིངས་ནས་བརྩེ་བཞེས་སྲིད་པའི་འགྲོ། །ཡལ་བར་འདོར་མེད་འཁོར་བའི་ཆུ་བོ་ལས། །བརྒལ་དཀའི་ངན་སོང་དུཿཁས་གཙེས་པ་དག །གང་གི་ཐུགས་རྗེའི་གྲུ་གཟིངས་ལ་བརྟེན་ནས། །མྱང་འདས་ཐར་པའི་གྲོང་ཁྱེར་ཉམས་དགའ་བར། །འཇུག་པའི་ཕྲིན་ལས་ནམ་མཁའི་ཁམས་སུ་ཡང་། །ཤོང་བར་དཀའ་བའི་རང་བཞིན་ལས་འདས་ཀྱང་། །མོས་པའི་བློ་ཡིས་ཡར་གཞལ་མ་ཡིན་པར། །མངོན་སུམ་ཚད་མས་གྲུབ་འདི་ངོ་མཚར་ཕུལ། །བཀའ་དྲིན་འཁོར་མཐའ་བྲལ་བའི་ཚད་བཟུང་བ། །ཆུ་ལྷས་ལྕེ་བརྒྱ་བསྐྱོད་ཀྱང་བརྗོད་མི་ནུས། །དེས་ན་བདག་ལྟ་སོ་སྐྱེས་ལྟ་ཅི་སྨོས། །འོན་ཀྱང་ས་མུ་དྲ་ལས་ཉར་མ་ཙམ། །གུས་པས་ཀུ་ཤའི་རྩེ་མོས་འཐོར་བ་འདིའི། །ལེགས་བྱས་དགེ་མཚན་བསོད་ནམས་དཔལ་ཐོབ་སྙམ། །དེང་འདིར་རྒྱལ་བའི་ཞལ་ལྟ་ཆོས་མཉན་ཕྱིར། །
གཏང་རག་དངོས་པོའི་བདོག་པ་པད་སྣལ་ལྟར། །ཕྲ་ཡང་ལྷག་བསམ་དག་པས་ཀུན་བསླངས་ནས། །རྒྱ་མཚོའི་གོས་ཅན་དོག་པར་བྱེད་ནུས་པའི། །ཀུན་བཟང་མཆོད་པའི་སྤྲིན་དུ་དམིགས་པ་ཡིས། །རབ་འབྱམས་མཐའ་ཡས་ཞིང་རྣམས་མ་ལུས་པར། །མཎྜལ་གཅིག་ཏུ་བསྡུས་ནས་འབུལ་ལགས་ན། །བརྩེ་བས་དགོངས་ཏེ་དགྱེས་པར་བཞེས་སུ་གསོལ། །ཞེས་ཚིགས་སུ་བཅད་པའི་ཆེད་དུ་བརྗོད་པས་མདུན་བདར་བར་བྱས་ནས། དེ་ཡང་གནས་ཕུན་སུམ་ཚོགས་པ་འོག་མིན་དཔལ་གྱི་མཚུར་ཕུའི་གནྡྷོ་ལའི་གཞལ་མེད་ཁང་མ་བཞེངས་ལྷུན་གྱིས་གྲུབ་པ་ལྟ་བུ་འདིར། དུས་ཕུན་སུམ་ཚོགས་པ་རྟ་ལྡན་མ་ཉ་བའི་རྒྱལ་བ་ལྷ་ལས་བབས་པའི་དུས་ཆེན་དང་ཉེ་བར་ཨཽ་ཌི་ཡ་ནའི་ཨ་ཙཱཪྱའི་དུས་བཟང་པོར་དཀར་ཕྱོགས་ཀྱི་ཡར་ཚེས་བཅུ་ལ། སྟོན་པ་ཕུན་སུམ་ཚོགས་པ་གྲུ་འཛིན་བདག་པོའི་ཕྲེང་བ་རིམ་པར་བྱོན་པ་ལས་བཅུ་བཞི་པ། མཚན་བརྗོད་པར་དཀའ་བ་ཐེག་པ་མཆོག་གི་རྡོ་རྗེ་འཆང་ཆེན་པོ་འཚོ་ཞིང་གཞེས་པ་ལ། འཁོར་ཕུན་སུམ་ཚོགས་པ་ཚེ་རབས་ནས་རྗེས་སུ་འབྲེལ་བའི་སྔོན་སྨོན་ལས་འཕྲོ་དང་ལྡན་པའི་གནས་བརྟན་དགེ་འདུན་གྱི་ཚོགས་དང་མཆོག་དམན་བར་མའི་སྐྱེ་བོ་སྣ་ཚོགས་ཀྱི་དབུས་སུ། ཆོས་ཕུན་སུམ་ཚོགས་པ་མཐོང་བ་ཙམ་
གྱིས་གྲོལ་བར་འགྱུར་བའི་ཕྱག་རྒྱ་ཆེན་པོའི་གནས་ལུགས་རྗེན་པར་འཆར་ནུས་པའི་བྱིན་རླབས་ཀྱི་གཟི་འོད་དང་ལྡན་པ། མཐོན་མཐིང་གནམ་སྔོན་ཞུན་མའི་ངོས་ལ། རབ་གསལ་ཉིན་མོར་བྱེད་པའི་འོད་མདངས་ཀྱིས་བརྒྱན་པ་ལྟ་བུའི། དབུ་ཞྭ་རིན་པོ་ཆེ་དབུ་ལ་བཞེས་ནས་འབྲེལ་ཚད་ཡང་དག་པའི་ལམ་ལ་བཀོད་པར་མཛད་ནས། སེམས་ཅན་དབུགས་མ་དབྱུང་བ་རྣམས་དབུགས་འབྱིན་པ་དང་། མ་བརྒལ་བ་རྣམས་བརྒལ་བ་དང་། མ་གྲོལ་བ་རྣམས་གྲོལ་བའི་གོ་འཕང་ལ་འགོད་པའི་སྙིང་རྗེ་ཆེན་པོས་ཉེ་བར་ཁྱབ་པར་གནང་བའི་བཀའ་དྲིན་གཏང་རག་གི་ཡོན་དུ་དངོས་པོའི་ཡོ་བྱད་ཆུ་ཐིགས་ཙམ་སྟོབ་པའི་ཐོ་གསལ་དུ་བཀོད་པ་ལ། ཐོག་མར་བཀྲ་ཤིས་པའི་ལྷའི་རེག་བྱ་གངས་རིའི་མདངས་ཅན་སྲིད་ན་རིང་བ་ཕོན་ཚར་མ་ཉམས་པ། སྐུ་རྟེན་ཤཱཀྱའི་རྒྱལ་པོའི་གསེར་སྐུ། གསུང་རྟེན་ཚེ་མདོ། ཐུགས་རྟེན་བཀའ་གདམས་མཆོད་རྟེན། གདན་དཀར་རྡོ་རྗེའི་རེ་ཁཱ་བཀྲ་བ། རྡོར་དྲིལ། རྒྱ་སྦུབ་སྤུས་ལེགས། གོས་ཆེན་ཅོད་ལྡན་སྒྲིལ་ཁ། ཡང་གོས་ཆེན་སིའུ་སྦུ་ཅན་སྒྲིལ། ཞབས་ཆག་ཆ། ཚན་དང་པོར་ལྷ་རྫས། གོས་དམར་སྨུག་ཡུག་བཅས་དགུ་ཚན། ཚན་གཉིས་པར་ལྷ་རྫས། གོས་སེར་སྨུག་ཡུག་བཅས་དགུ་ཚན། ཚན་གསུམ་པར་ལྷ་རྫས། གོས་སྨྱུག་
ཁ་ཡུག་བཅས་དགུ་ཚན། ཚན་བཞི་པར་ལྷ་རྫས། གོས་སེར་ཡུག་བཅས་བདུན་ཚན། ཚན་ལྔ་པར་ལྷ་རྫས། གོས་སྔོན་ཡུག་བཅས་བདུན་ཚན། ཚན་དྲུག་པར་ལྷ་རྫས། འགའ་ཁྲ་ཡུག་བཅས་བདུན་ཚན། ཚན་བདུན་པ་ལྷ་རྫས། སྲང་ལེ་བཅས་ལྔ་ཚན། ཆིབས་བཀྲ་ཤིས་དུང་དར། ཡང་ཆིབས་སྔོ་སྐྱ། ཆིབས་ཧྲོལ་གཉིས། དཀྱུས་རྟ་བཅུ་གསུམ། དྲེའུ་གསུམ། མཛོ་བཅུ། ཁལ་བཅོ་ལྔ། ཇ་ཆུང་འཇུ་འཁོར་དྲུག་ཅུ། ཀོ་རྩེ་འཁོར་དྲུག་བཅོ་ལྔ། དངུལ་སྲང་བརྒྱ་དང་ལྔ་བཅུ། མཐའ་དཀར་ཀ་ཅི་ཡུག་བཅས་ཁྱོན་བརྒྱ་ཕྲག་གཉིས་དང་ཡོན་ཏན་ནོར་ལྷའི་གྲངས་ལྡན་བཅས་འབུལ་ལམ་ཞུ། སླར་ཡང་གསོལ་བ། གདོད་ནས་ལྷུན་གྲུབ་ཆོས་དབྱིངས་ཡེ་ཤེས་ལས། །ཡོངས་གྲུབ་བདེ་ཆེན་སྒྱུ་འཕྲུལ་རྡོ་རྗེའི་གར། །སྤྲུལ་པའི་རྣམ་རོལ་གཟུགས་ཀྱི་སྐུར་སྣང་བ། །ཞིང་འདིར་གདུལ་བྱའི་མགོན་དུ་བསྐལ་པའི་བར། །སྟེང་ཕྱོགས་ཡོན་ཏན་དཔག་མེད་མགོན་པོ་བཞིན། །མི་འགྱུར་རྡོ་རྗེ་ཆོས་བདུན་ངོ་བོ་རུ། །ནམ་མཁའ་ཇི་སྲིད་གནས་དང་དེ་སྲིད་ཀྱི། །བར་དུ་རྡོ་རྗེའི་ཁྲི་ལ་རྟག་བཞུགས་ནས། །སྨིན་གྲོལ་དམ་ཆོས་བདུད་རྩིའི་དགའ་སྟོན་གྱིས། །འགྲོ་མང་ཐེག་པ་མཆོག་ལ་བསྒྱུར་བ་ཡི། །ཕྲིན་
ལས་ཁྱབ་དང་རྟག་པའི་བདག་ཉིད་ཀྱིས། །སྲིད་ཞིའི་འཆིང་བ་ཀུན་ལས་བསྒྲལ་དུ་གསོལ། །བཀྲ་ཤིས་གང་ཞིག་ཚད་མེད་བྱམས་པའི་ཐུགས་རྗེའི་མཁའ་དབྱིངས་ལས། །ཡོངས་ཤར་རྒྱལ་བའི་དཀྱིལ་འཁོར་རྟ་བདུན་དབང་པོའི་འོད་སྟོང་ཅན། །ཕྲིན་ལས་རྣམ་བཞིའི་གཟི་འབར་རྒྱ་མཚོའི་གོས་ཅན་ཡོངས་ཁྱབ་པའི། །བཀྲ་ཤིས་དེས་ཀྱང་ངེས་གསང་རིང་ལུགས་པད་ཚལ་བཞད་གྱུར་ཅིག །བཀྲ་ཤིས་གང་ཞིག་འདུས་མ་བྱས་པའི་རང་གདངས་རྩལ་འཁྲུངས་པའི། །ཞི་དང་ཁྲོ་ཚོགས་དག་པ་རབ་འབྱམས་སྐུར་སྟོན་ལྷ་ཡི་ལྷ། །དངོས་གྲུབ་རྣམ་གཉིས་འདོད་འཇོ་ཀ་ན་ཀ་ཡི་རྩིབས་སྟོང་ལྡན། །བཀྲ་ཤིས་དེས་ཀྱང་གླིང་བཞིར་དབང་བསྒྱུར་སྐྱེ་དགུ་བདེ་གྱུར་ཅིག །བཀྲ་ཤིས་གང་ཞིག་ཞི་ལས་མ་གཡོས་མངོན་སྤྱོད་རོལ་པ་ཆེའི། །བདུད་དགྲ་མཐར་བྱེད་དཔའ་བོ་འཇིག་རྟེན་གསུམ་ལས་རྒྱལ་བ་པོ། །ཆོས་འཁོར་སྐྱོང་ལ་གཡེལ་བ་མེད་པའི་མཐུ་ལྡན་མེལ་ཚེ་ཅན། །བཀྲ་ཤིས་དེས་ཀྱང་ཕྱོགས་རྣམས་ཀུན་ལས་རྣམ་པར་རྒྱལ་གྱུར་ཅིག །ཛ་ཡ་ཛ་ཡ། སུ་ཛ་ཡ། སརྦ་མངྒ་ལམ། །