འཕགས་ཆེན་ཕྱག་ན་པདྨོ་མཐོན་མཐིང་གི་ཅོད་པན་འཆང་བ་མཆོག་གི་ཆོས་ཀྱི་རྒྱལ་ཐབས་དམ་པར་དབང་བསྒྱུར་པ་ཏཱའི་སི་ཏུ་ཞེས་གྲགས་པའི་ཡི་གེ།
འཕགས་ཆེན་ཕྱག་ན་པདྨོ་མཐོན་མཐིང་གི་ཅོད་པན་འཆང་བ་མཆོག་གི་ཆོས་ཀྱི་རྒྱལ་ཐབས་དམ་པར་དབང་བསྒྱུར་པ་ཏཱའི་སི་ཏུ་ཞེས་གྲགས་པའི་ཡི་གེ། ཡངས་པའི་རྒྱལ་ཁམས་སྤྱི་དང་བྱེ་བྲག་ཤར་ཁ་རོང་ཆེན་བཅོ་བརྒྱད་ཀྱི་ནང་ཚན་ཝག་ཤུལ་ཁག་གསུམ་གྱི་ཆར་གཏོགས་པའི་བླ་མ་མི་དཔོན་སྡེ་རིས་བཅས་མཐའ་དག་ལ་ཟློ་བ། རྡོ་སྨད་རྟག་བརྟན་ཆོས་འཁོར་དགོན་ལ། སྐྱེ་དགུའི་སྐྱབས་སུ་ད་ལམ་བླ་མ་ཀརྨ་མགོན་པོ་ཚེ་དབང་ཞེས་པ་སྤངས་དང་རྟོགས་པའི་ཡོན་ཏན་གྱིས་མངོན་པར་མཛེས་པ་འདི་ཉིད་འགྲོ་བའི་དེད་དཔོན་དུ་བདེ་ལེགས་ཚིག་གི་མེ་ཏོག་བསྙིལ་བས། ༧ སངས་རྒྱས་བསྟན་པའི་ཕྲིན་ལས་ཀྱི་ཤིང་རྟའི་ཁ་ལོ་གྱེན་དུ་འདེགས་པ་པོར་མངའ་གསོལ་བ་ཡིན་པས། མཆོག་དམན་བར་མར་གྱུར་པའི་ཡིད་ཅན་དགེ་བའི་སེམས་ལྡན་རྣམས་ནས་བསྙེན་དང་བཀུར་སྟིའི་ཞིང་དམ་པར་དམིགས་པ་ཅི་ནས་འཚལ་ཞིང་། འདི་པས་ཀྱང་༧ཤཱཀྱའི་སྲས་ཀྱི་བརྟུལ་ཞུགས་ལ་གནས་པའི་རང་དོན་ཕར་ཕྱིན་དྲུག་གི་སྤྱོད་པ་ཕུན་སུམ་ཚོགས་པ་གཞར་ཡང་ལྷོད་བྲལ་གྱིས་སྐྱོང་བ་དང་། གཞན་དོན་རིས་སུ་མ་ཆད་པའི་སེམས་ཅན་རྣམས་ལ་རྟག་པར་བརྩེ་བའི་བྱམས་དང་སྙིང་རྗེ་ཕྱོགས་མེད་འབྱོང་བ་བཅས་མདོར་ན་སྐྱེས་བུ་དམ་པའི་རྣམ་ཐར་དག་གི་རྗེས་སུ་ཞུགས་ཤིང་རྗེས་སུ་སློབ་པའི་འདུན་པ་ཡང་དག་གཅེས་སྤྲས་གལ་ཆེ། དེ་ལྟའི་རང་གཞན་
དོན་གཉིས་གེགས་མེད་མཐའ་རུ་ཕྱིན་པར་དུས་གསུམ་གྱི་རྒྱལ་བ་རབ་འབྱམས་རྒྱ་མཚོའི་ཡེ་ཤེས་ཐུགས་རྗེ་ཆེན་པོས་ཉེ་བར་བསྐྱང་དུ་གསོལ། ཞེས་རབ་བྱུང་བཅུ་བཞི་པའི་ནང་ཚན་ཤིང་ཕོ་སྤྲེའུ་ལོའི་གྲོ་བཞིན་ཟླ་བའི་དཀར་ཕྱོགས་ཆ་གང་བའི་གྲལ་ཚེས་དགེ་བར་དཔལ་སྤུངས་ཐུབ་བསྟན་ཆོས་འཁོར་གླིང་གི་གཙུག་ལག་ནས་སྤེལ་བ་ཀ་ལེ་ཎ་བི་སྟཱ་ར་བྷ་ཝནྟུ་སརྦ་ཛ་ག་ཏཾ། །