ཞབས་བརྟན་གྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཚེ་མཆོག་བདུད་རྩིའི་གཏེར་མཛོད།
ཞབས་བརྟན་གྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཚེ་མཆོག་བདུད་རྩིའི་གཏེར་མཛོད་ཅེས་བྱ་བ་བཞུགས།།
ༀ་སྭ སྟི། ཕྱོགས་བཅུའི་བདེར་གཤེགས་རྒྱལ་བ་རབ་འབྱམས་ཚོགས། །གཅིག་བསྡུས་གུ་རུ་པདྨ་ཐོད་ཕྲེང་རྩལ། །འཆི་མེད་ཚེ་དབང་ལྷག་པའི་ལྷ་རྣམས་ཀྱིས། །དེང་འདིར་མི་འགྱུར་ཚེ་ཡི་དངོས་གྲུབ་སྩོལ། །དཔ༵ལ་ལྡ༵ན་སྒྲུབ་བརྒྱུད་བསྟ༵ན་པ༵འི་རྒྱ་མཚོ་ཆེར། །ཉི༵ན་བྱེ༵ད་འཆི༵་མེ༵ད་ལམ་ལས་ཡོངས་ཤར་བ། །གྲུ༵བ་པ༵འི་ཁྱུ༵་མཆོ༵ག་འགྲོ་བའི་མུན་པ་སེལ། །ཕྲི༵ན་ལ༵ས་རྒྱ༵ས་པ༵འི་དཔལ་མངའ་ཞབས་བརྟན་གསོལ། །གང་གི་གཞན་ཕན་འོད་སྣང་རབ་ཏུ་གསལ། །སྡེ༵་བཞི་པདྨོའི་གེ་སར་རྣམ་པར་བཀྲ། །སྐལ་ལྡན་རྐང་དྲུག་ཐར་པའི་ལམ་སྟོན་མཆོག །བྱང་ཆུབ་སེམས་དཔའ་ཆེན་པོ་ཞབས་བརྟན་གསོལ། །དམ་པ་ཁྱོད་ཀྱི་ཐུགས་བསྐྱེད་ཀུན་དགའི་དཔལ། །དམ་ཆོས་
ཟབ་མོའི་བདུད་རྩིའི་ཀླུང་བཟང་པོས། །སྐྱེ་དགུའི་ཉོན་མོངས་ཚ་གདུང་འགོག་བྱེད་པ། །སྨྲ་བའི་དབང་ཕྱུག་བསྐལ་བརྒྱར་ཞབས་བརྟན་གསོལ། །མགོན་ཁྱོད་དོན་དམ་འཕོ་འགྱུར་བྲལ་མོད་ཀྱང་། །ཀུན་རྫོབ་གདུལ་བྱའི་སྣང་ངོར་ཞིང་འདི་རུ། །གསང་གསུམ་མི་ཤིགས་འགྱུར་མེད་རྡོ་རྗེའི་སྐུ། །བསྐལ་པ་རྒྱ་མཚོར་ཞབས་པད་བརྟན་གྱུར་ཅིག །ཅེས་འཇིག་རྟེན་གྱི་འདྲེན་པ་རྒྱལ་མཆོག་ཕྱག་ན་པད་དཀར་འཆང་བ་ཞབས་པད་བསྐལ་པ་དུ་མར་བརྟན་པའི་ཕྱིར། གང་གི་ཞབས་རྡུལ་སྐྱེ་བ་ཀུན་ཏུ་མི་འབྲལ་བར་གཅིག་ཏུ་སྨོན་པའི་ཡིད་ཅན་སི་ཏུ་པདྨ་ཉིན་བྱེད་དབང་པོས་ཆུ་གླང་ལོ་སྨིན་ཟླའི་ཡར་ཚེས་དགེ་བར་གྲུབ་པའི་གནས་ནས་ཕུལ་བ་དགེ་ལེགས་འཕེལ། །ༀ་སྭ་སྟི། དུས་གསུམ་
རྒྱལ་དང་རྒྱལ་སྲས་ཚོགས་རྣམས་ཀྱིས། །དེང་འདིར་བྱིན་རླབས་ཐུགས་རྗེའི་དངོས་གྲུབ་སྩོལ། །གདོད་ནས་ལྷུན་གྲུབ་བདེ་ཆེན་རྡོ་རྗེའི་སྐུ། །ཞིང་འདིའི་སྟོན་མཆོག་དམ་པར་བཞུགས་གསོལ་འདེབས། །རིམ་གསུམ་ཆོས་ཀྱི་འཁོར་ལོ་མཐའ་ཡས་པས། །འགྲོ་ཀུན་ལེགས་པའི་ལམ་མཆོག་སྟོན་མཛད་ཅིང་། །དཀྱིལ་འཁོར་རྒྱ་མཚོའི་དབང་ཕྱུག་འཁོར་ལོའི་མགོན། །དཔལ་ལྡན་བླ་མ་བསྐལ་བརྒྱར་ཞབས་བརྟན་གསོལ། །སྙིང་རྗེའི་རང་གཟུགས་འགྲོ་ལ་རྗེས་ཆགས་པའི། །བྱམས་པ་ཆེན་པོའི་ཐུགས་བསྐྱེད་གཏིང་མཐའ་ཡས། །རྒྱ་ཆེན་ཕྲིན་ལས་ཡིད་བཞིན་དབང་གི་རྒྱལ། །ཀུན་གྱི་འབྱུང་གནས་དམ་པར་ཞབས་བརྟན་གསོལ། །གང་སྐུ་སྐྱེ་མེད་སྒྱུ་མའི་སྐུར་སྣང་བ། །འཕོ་འགྱུར་མཚན་མ་ཡོངས་སུ་བྲལ་མོད་ཀྱང་། །ཞིང་འདིར་བསྟན་འགྲོའི་དཔལ་མགོན་མཆོག་དམ་པར། །བསྐལ་པ་དུ་མར་ཞབས་པད་བརྟན་བཞུགས་གསོལ། །ཆོས་དབྱིངས་རང་བཞིན་དོན་དམ་བདེན་པ་དང་། །ཆོས་ཅན་ཀུན་རྫོབ་བསླུ་མེད་ནུས་པ་ཡིས། །སྐུ་བཞིའི་བདག་ཉིད་ཆོས་ཀྱི་རྒྱལ་པོ་གང་། །བསྐལ་བརྒྱར་ཞབས་བརྟན་ཕྲིན་ལས་རབ་རྒྱས་ཤོག །ཅེས་པའང་སྲིད་ཞིའི་གཙུག་རྒྱན་དམ་པ་དཔལ་ཀརྨ་པ་ཆེན་པོ་བསྐལ་བརྒྱར་ཞབས་པད་བརྟན་པའི་ཆེད་དུ། གང་དེའི་བཀའ་འབངས་སི་ཏུ་པས་འོག་མིན་དཔལ་གྱི་མཚུར་ཕུའི་གནྡྷོ་ལ་ཡི་བྱ་འདབས་སུ་བྲིས་པ་དོན་ལྡན་དུ་གྱུར་ཅིག །སརྦ་མངྒ་ལཾ། །
ༀ་སྭ་སྟི། སྲས་བཅས་རྒྱ་མཚོ་བྱང་སེམས་མ་ལུས་པའི། །ཐུགས་རྗེའི་རང་གཟུགས་བདེ་ལྡན་ཞིང་གི་མགོན། །འོད་སྣང་མཐའ་ཡས་མཚོ་སྐྱེས་པདྨ་འབྱུང་། །རྒྱལ་བ་རྣམས་ཀྱི་ཐུགས་རྗེའི་ཀློང་ཡངས་ནས། །སྒྱུ་འཕྲུལ་གར་སྟོན་སྣ་ཚོགས་འོད་ཟེར་བཞིན། །ཇི་སྙེད་ཤེས་བྱའི་འོད་ཀྱི་སྣང་བ་ཡིས། །ལོག་ལྟའི་མུན་ཚོགས་དྲ་བ་གཏན་ནས་བཅོམ། །བསྟན་པའི་གསལ་བྱེད་བསྐལ་བརྒྱར་འཚོ་གཞེས་གསོལ། །ཡོན་ཏན་རིན་ཆེན་ཀུན་གྱི་འབྱུང་གནས་གཏེར། །ཕུན་ཚོགས་ཟབ་མོའི་ཆོས་སྒོ་མཐའ་ཡས་ཀྱིས། །འགྲོ་རྣམས་བྱང་གྲོལ་ལམ་ལ་བཀོད་མཛད་པ། །ཚད་མེད་སྙིང་རྗེའི་དབང་ཕྱུག་འཚོ་གཞེས་གསོལ། །འགྱུར་མེད་རྡོ་རྗེ་ལྟ་བུའི་སྐུ་མངའ་བ། །ཡན་ལག་དྲུག་ཅུའི་དབྱངས་ལྡན་ཚངས་པའི་གསུང་། །བློ་གྲོས་ཀུན་ཁྱབ་མཐའ་མི་མངོན་པའི་ཐུགས། །གསང་གསུམ་མི་ཤིགས་བསྐལ་བརྒྱར་འཚོ་གཞེས་གསོལ། །མཆོག་གསུམ་ངོ་བོ་རྩ་བའི་བླ་མ་དང་། །དཔལ་ཆེན་རྡོ་རྗེ་གཞོན་ནུའི་བྱིན་རླབས་ཀྱིས། །མགོན་ཁྱོད་བསྟན་འགྲོའི་དཔལ་དང་མགོན་དམ་པར། །བསྐལ་བརྒྱར་འཚོ་ཞིང་ཞབས་པད་བརྟན་གྱུར་ཅིག །ཅེས་ཁྱབ་བདག་འཁོར་ལོའི་མགོན་པོ་དཔལ་ལྡན་བླ་མ་དམ་པ་བཀའ་བརྒྱུད་བསྟན་པའི་རྒྱལ་མཚན་འགྱུར་མེད་ཡོངས་གྲུབ་དམ་ཆོས་ཉི་མའི་སྡེ་ཞབས་པད་རྒྱ་མཚོར་བརྟན་པའི་ཕྱིར་ཀྭན་ཏིང་ཏཱ་ཡི་སི་ཏུས་དཔལ་གྱི་མཚུར་
ཕུའི་གཙུག་ལག་ཁང་ནས་གསོལ་བ་དེ་བཞིན་རེ་འབྲས་དོན་ལྡན་དུ་གྱུར་ཅིག །སརྦ་མངྒ་ལཾ། །ༀ་སྭ་སྟི། མི་ཤིགས་རང་བྱུང་ལྷུན་གྱིས་གྲུབ་པའི་སྐུ། །རྣམ་དག་ཆོས་ཚུལ་ནཱ་དའི་སྒྲ་དབྱངས་ཅན། །ཟབ་ཞི་སྤྲོས་བྲལ་ཏིང་འཛིན་མཆོག་བརྙེས་པའི། །གསང་གསུམ་འགྱུར་མེད་རྡོ་རྗེ་བརྟན་བཞུགས་གསོལ། །མཐའ་བྲལ་ཟབ་མོའི་གནས་རྣམས་ཇི་སྙེད་པ། །འགྲོ་ཁམས་མོས་ངོར་དེ་སྙེད་སྟོན་མཁས་པའི། །གསུང་གི་དབང་ཕྱུག་འཇམ་དཔལ་དཔའ་བོ་ཆེ། །དངོས་སྣང་ཞིང་འདིར་ཆོས་སྟོན་འཚོ་གཞེས་གསོལ། །གསང་སྔགས་བླ་མེད་ཟུང་འཇུག་སྙིང་པོ་ཡི། །སངས་རྒྱས་བསྟན་པའི་ཉི་འོད་འབུམ་བརྡལ་བ། །བདེ་གཤེགས་ཀུན་གྱིས་དབུགས་དབྱུང་བསྔགས་པའི་གནས། །རྣམ་འདྲེན་འཇིག་རྟེན་མགོན་པོ་ཞབས་བརྟན་གསོལ། །སྣང་སྲིད་དབང་བསྒྱུར་ཕྲིན་ལས་རྒྱ་ཆེན་གྱི། །རྨད་བྱུང་གཞན་ཕན་ཐུགས་བསྐྱེད་དཔལ་འབར་བ། །ཡེ་ཤེས་གྲུབ་གཉིས་བྱིན་རླབས་སྩོལ་བའི་གཉེན། །པདྨཱ་ཀཱ་ར་དབྱེར་མེད་རྟག་བཞུགས་གསོལ། །དོན་དམ་འཕོ་འགྱུར་མཚན་མ་བྲལ་མོད་ཀྱང་། །ཀུན་རྫོབ་སྣང་བའི་རིགས་གསུམ་གདུལ་བྱའི་ངོར། །འཆི་མེད་ཚེ་མཐའ་ཡས་པའི་ངོ་བོ་རུ། །བསྐལ་པ་རྒྱ་མཚོར་ཞབས་པད་བརྟན་གྱུར་ཅིག །སྟོན་པ་མཉམ་མེད་བཅོམ་ལྡན་རྡོ་རྗེ་འཆང་། །རྩ་བའི་བླ་མ་སྐུ་བཞིའི་
བདག་ཉིད་ཅན། །བཀའ་བརྒྱུད་བསྟན་པའི་རྒྱལ་མཚན་འབྲུག་པའི་ཞབས། །སྒོ་གསུམ་འདུད་དོ་རྙེད་བཀུར་སྒྲུབ་པས་མཆོད། །ནོངས་བཤགས་ཡི་རངས་ཆོས་འཁོར་བསྐོར་བར་བསྐུལ། །མི་འགྱུར་ཁྲི་ལ་མི་གཡོ་བཞུགས་གསོལ་འདེབས། །དུས་གསུམ་དགེ་ཚོགས་བྱང་ཆུབ་ཆེན་པོར་བསྔོ། །འགྲོ་མགོན་ཁྱོད་དང་འབྲལ་མེད་བྱིན་གྱིས་རློབས། །ཞེས་བཀའ་བརྒྱུད་ཡོངས་ཀྱི་གཙུག་རྒྱན་འབྲུག་པ་རིན་པོ་ཆེ་བཀའ་བརྒྱུད་བསྟན་པའི་རྒྱལ་མཚན་གདོད་ནས་ཡོངས་གྲུབ་དམ་ཆོས་ཉི་མའི་སྡེ་བསྐལ་བརྒྱར་ཞབས་བརྟན་གསོལ་འདེབས་འདི་བཞིན་ཀྭན་ཏིང་ཏཱའི་སི་ཏུ་པདྨ་ཉིན་བྱེད་དབང་པོས་ས་སྤྱོད་གསུང་གི་གནས་མཆོག་ཀརྨ་རི་གླིང་ཆོས་འཁོར་གྱི་གཙུག་ལག་ཏུ་གསོལ་བ་བཏབ་པ་དོན་དང་ལྡན་པར་གྱུར་ཅིག །ཛ་ག་ཏཾ། །ༀ་སྭ་སྟི། གང་ཞིག་དུས་གསུམ་རྒྱལ་བའི་ཐུགས་རྗེའི་འཕྲུལ། །དཔལ་ལྡན་འཇིག་རྟེན་དབང་ཕྱུག་རིགས་ཀུན་གྱི། །ཁྱབ་བདག་གདོད་ནས་ལྷུན་གྲུབ་འགྱུར་མེད་སྐུ། །ཐེག་པ་མཆོག་གི་རྡོ་རྗེ་འཚོ་གཞེས་གསོལ། །ཆོས་འཁོར་རིམ་གསུམ་མཐར་ཐུག་དགོངས་པའི་དོན། །དྭགས་པོ་བཀའ་བརྒྱུད་ངེས་དོན་ཀཾ་ཚང་གི། །བསྟན་པ་ཡོངས་རྫོགས་འཛིན་པའི་ཐམས་ཅད་མཁྱེན། །གསང་གསུམ་རྡོ་རྗེའི་ཁམས་སུ་བརྟན་བཞུགས་གསོལ། །ཨོ་རྒྱན་རྡོ་རྗེའི་བཀའ་གསང་ཆོས་ཀྱི་སྒོ། །ཇི་སྙེད་གདུལ་བྱའི་ཁམས་དབང་མོས་པའི་ངོར། །སྟོན་པའི་བདག་ཉིད་
བདེ་ཆེན་འཁོར་ལོའི་མགོན། །ཞབས་པད་བསྐལ་པ་རྒྱ་མཚོར་བརྟན་གྱུར་ཅིག །ཅེས་རྒྱལ་མཆོག་ཕྱག་ན་པདྨ་འཆང་བ་གྲུ་འཛིན་ཕྲེང་བ་རིམ་བྱོན་ལས། བཅུ་བཞི་པ་ཐེག་པ་མཆོག་གི་རྡོ་རྗེ་ཞབས་པད་བརྟན་པའི་གསོལ་འདེབས་སུ། སི་ཏུ་པདྨའི་མིང་ཅན་གྱིས་མཚུར་གནྡྷོ་ལར་བཀོད་པ་དགེའོ། །འཇིག་རྟེན་དབང་ཕྱུག་སྤྱན་རས་གཟིགས་དབང་གི། །སྙིང་རྗེ་ཆེན་པོའི་ཐུགས་ཀྱི་ཀློང་ཡངས་ནས། །གདུལ་དཀའི་འགྲོ་རྣམས་ཡལ་བར་མ་དོར་སླད། །དེང་འདིར་འགྲོ་བའི་མགོན་པོ་ཀརྨ་པ། །གང་དང་དབྱེར་མེད་འོད་སྣང་མཐའ་ཡས་ཀྱི། །སྒྱུ་འཕྲུལ་སྤྲུལ་པའི་ཟློས་གར་ཡོངས་ཤར་བ། །སྙིགས་དུས་འདྲེན་པ་ཞྭ་དམར་ཅོན་པན་ཅན། །ཞིང་འདིར་ཞབས་པད་བསྐལ་བརྒྱར་བརྟན་གསོལ་འདེབས། །རྒྱལ་བའི་ཕྲིན་ལས་བྱེད་པོར་དབང་བསྐུར་བ། །ཏཱ་ཡི་སི་ཏུ་པདྨ་ཉིན་བྱེད་དབང་། །པདྨའི་རྣམ་རོལ་དམ་ཆོས་ཀུན་འབྱུང་གཏེར། །རིག་པ་འཛིན་དབང་རྡོ་རྗེ་དྲག་པོ་རྩལ། །ཞིང་འདིར་ཞབས་པད་བསྐལ་བརྒྱར་བརྟན་གསོལ་འདེབས། །བསླུ་མེད་དཀོན་མཆོག་ཀུན་འདུས་ངོ་བོ་ཉིད། །བཀའ་བརྒྱུད་བླ་མ་རྣམས་ཀྱི་བྱིན་རླབས་དང་། །མ་ཧཱ་གུ་རུ་པད་འབྱུང་མཐུ་སྟོབས་ཀྱིས། །འགྲོ་དོན་ཕྲིན་ལས་ཉིན་བྱེད་འོད་སྟོང་གིས། །རྒྱལ་བསྟན་པད་ཚལ་རྒྱས་པའི་རྒྱུར་གྱུར་ཅིག །ཤོ་བུ་བླ་མ་གང་དེས་བསྐུལ་བཞིན། སི་ཏུས་སྤེལ། དགེ་ལེགས་འཕེལ་རྒྱས་ཤོག། །ལྷ་དང་བཅས་པའི་སྐྱེ་
དགུའི་རྣམ་པར་འདྲེན། །བྱང་ཆུབ་སེམས་དཔའ་བདུད་འདུལ་རྡོ་རྗེ་འཆང་། །བསྐལ་པ་དུ་མར་ཞིང་འདིར་རྟག་བཞུགས་ནས། །བདག་སོགས་གདུལ་བྱ་རྗེས་སུ་འཛིན་མཛད་གསོལ། ལྷ་རྒྱལ་ངོར་སྤེལ། །ༀ་སྭ་སྟི་སིདྡྷནྟུ། གདོད་མའི་ཡེ་ཤེས་ཀུན་ཁྱབ་ཀློང་ཡངས་པར། །བདེ་ཆེན་འགྱུར་མེད་ཐུགས་རྗེའི་རང་བཞིན་ལས། །མ་འགག་སྣ་ཚོགས་རོལ་པའི་གར་སྒྱུར་མཁན། །རང་རིག་སྐུ་གསུམ་དབྱེར་མེད་འཚོ་གཞེས་གསོལ། །མི་གཡོ་རྡོ་རྗེའི་རང་བཞིན་མཚན་དཔེའི་སྐུ། །མི་ཤིགས་རྡོ་རྗེ་ནཱ་དའི་དབྱངས་ལྡན་གསུང་། །མི་རྟོག་རྡོ་རྗེའི་ཏིང་འཛིན་མངའ་བའི་ཐུགས། །མི་འགྱུར་རྡོ་རྗེའི་ཁྲི་ལ་འཚོ་གཞེས་གསོལ། །ཆོས་ཉིད་དོན་དམ་བདེན་པའི་སྟོབས་དག་དང་། །ཆོས་ཅན་ཀུན་རྫོབ་རྟེན་འབྲེལ་བསླུ་མེད་བདེན། །དེང་འདིར་དག་གཙང་དམ་ཚིག་རྣམ་དག་མཐུས། །བསྐལ་བརྒྱར་འཚོ་གཞེས་ཞབས་པད་བརྟན་གྱུར་ཅིག །ཅེས་པའང་གངས་ཅན་ལྷ་གཅིག་རྗེ་བཙུན་འབྲུག་པ་རིན་པོ་ཆེ་བསྐལ་བརྒྱར་ཞབས་པད་བརྟན་པའི་གསོལ་འདེབས་བདེན་ཚིགས་སུ། གང་གི་སློབ་འབངས་སི་ཏུ་པདྨ་ཉིན་བྱེད་དབང་པོས་འཛིན་བྱེད་ཅེས་པ་མེ་བྱི་ལོའི་ནག་ཟླའི་དཀར་ཕྱོགས་རྒྱལ་བ་དང་པོའི་ཚེས་ལ་བཀོད་དེ་ཕུལ་བ་སརྦ་མངྒ་ལཾ། ༈ །ༀ་སྭ་སྟི། དཔལ་ལྡན་ཡེ་ཤེས་རང་བྱུང་ངེ༵ས་པའི་དོ༵ན། །ལྷུ༵ན་གྱིས་གྲུ༵བ་པ་བསྟ༵ན་པ༵འི་ཉི༵ན་མོར་བྱེ༵ད། །མི༵་ཕ༵མ་ཐུགས་རྗེའི་
འོད་ཟེར་འབུམ་བརྡལ་བ། །ཁམས་གསུམ་ཆོ༵ས་ཀྱི་རྒྱ༵ལ་པོར་ཞབས་བརྟན་གསོལ། །གདོ༵ད་ན༵ས་འཆི་མེད་ཡོ༵ངས་གྲུ༵བ་ངོ་བོ་ཉིད། །ཡིད་སྲུབས་ཕྱོགས་ལས་རྣམ་པར་རྒྱལ་བའི་གཟིས། །སྡེ་བཞིའི་པད་ཚལ་ཕྱོགས་བཅུར་རྒྱས་བཞིན་པར། །བསྐལ་མང་འཚོ་གཞེས་ཕྲིན་ལས་མཐར་ཕྱིན་ཤོག །ཆོས་དབྱིངས་རྟག་པ་དམ་པའི་བདེན་པ་དང་། །ཆོས་ཅན་ཀུན་རྫོབ་རྟེན་འབྲེལ་བསླུ་མེད་བདེན། །བདེན་པའི་བདེན་ཚིག་མཐུ་སྟོབས་རྨད་བྱུང་བས། །རེ་བའི་ཤིང་རྟ་ཡོངས་སུ་གང་གྱུར་ཅིག །ཅེས་བཀའ་བརྒྱུད་བསྟན་པའི་གཙུག་རྒྱན་གངས་ལྗོངས་འགྲོ་བའི་མགོན་པོ་དཔལ་ལྡན་འབྲུག་པ་རིན་པོ་ཆེའི་མཆོག་གི་སྤྲུལ་སྐུ་ཉིན་བྱེད་གསར་དུ་ཚེས་པའི་ཞབས་བརྟན་འདི་ཉིད་གུ་རུའི་ལུང་ཟིན་དུ་རློམ་པ། སི་ཏུ་པདྨའི་མིང་ཅན་གྱིས་རྗེ་དབོན་མི་ཕམ་བསྟན་འཛིན་ཕྲིན་ལས་རྣམ་པར་རྒྱལ་བ་གང་དེས་བསྐུལ་ངོར་གསོལ་བ་བཏབ་པ་དགེ་ལེགས་སུ་གྱུར་ཅིག །མངྒ་ལཾ། །ༀ་སྭ་སྟི། བསླུ་མེད་རྒྱལ་ཀུན་འདུས་པའི་སྤྱི་གཟུགས་མཆོག །དཔ༵ལ་ལྡ༵ན་སངས་རྒྱས་གཉིས་པ་པདྨ་འབྱུང་། །དཔའ་བོའི་དབང་ཕྱུག་རྟ་མཆོག་ཧེ་རུ་ཀ །འཆི་མེད་ལྷ་ཡིས་དགེ་ལེགས་མཆོག་སྦྱིན་མཛོད། །ལྷུན་གྲུབ་རྟག་བརྟན་གཞོམ་བྲལ་རྡོ་རྗེའི་ཁྲིར། །གསང་གསུམ་གཡོ་མེད་འགྱུར་བ་མེད་པའི་སྐུ། །ཕྲིན་ལས་གཟི་ཡིས་ལོག་སྨྲའི་མུན་ཚོགས་བཅོམ། །བསྟན་འགྲོ་ཕན་བདེའི་གཞིར་གྱུར་ཞབས་བརྟན་གསོལ། །དྭགས་བརྒྱུད་སྙིང་པོ་དྲི་མེད་པད་དཀར་
གྱི། །རིང་ལུགས་འདབ་སྟོང་ཕྱོགས་བཅུར་རྒྱ༵ས་པ༵འི་ཕྱིར། །དམ་ལྡན་ཆོས་སྲུང་དཀར་པོའི་སྡེ༵་སྐྱོང་བ། །མཐུ་ལྡན་དྲེགས་པའི་ཚོགས་ཀྱིས་ཕྲིན་ལས་སྒྲུབས། །འགྲོ་མགོན་རྗེ་བཙུན་བླ་མ་སྤྲུལ་པའི་སྐུའི། །དམ་པ་ཆོས་ཀྱི་བདུད་རྩིའི་ཆར་ཆེན་གྱིས། །སྐལ་བཟང་ཐར་པའི་མྱུ་གུ་སྐྱེད་བྱེད་པ། །གཙུ༵ག་ལ༵ག་ཆོ༵ས་ཀྱི་རྒྱ༵ལ་པོ་ཞབས་བརྟན་གསོལ། །མཆོག་གསུམ་རྩ་གསུམ་རྒྱ་མཚོའི་ངོ་བོ་ཉིད། །དཔལ་ལྡན་ཀརྨ་པ་ཡི་བྱིན་རླབས་དང་། །ལྷ་མཆོག་རྡོ་རྗེ་གཞོན་ནུའི་ནུས་རྩལ་གྱིས། །སྨོན་པའི་བདེན་ཚིག་ཡོངས་སུ་འགྲུབ་མཛད་གསོལ། །ཞེས་གྲུབ་པའི་དབང་ཕྱུག་རྗེ་བཙུན་མཆོག་གི་སྤྲུལ་པའི་སྐུ་ཞབས་པད་བསྐལ་པ་དུ་མར་བརྟན་པའི་ཕྱིར། གང་དེའི་ཉེ་གནས་པ་ཀརྨ་བདེ་ཆེན་གྱིས་རྟེན་དང་བཅས་བསྐུལ་བར་ཆོ་འཕྲུལ་ཅན་གྱི་ཡར་ཚེས་ལ་འོག་མིན་མཚུར་ཕུ་ནས་གསོལ་བ་དགེ་ལེགས་འཕེལ། །རྒྱལ་བ་ཀུན་འདུས་འཆི་མེད་པདྨ། །རྒྱལ་ཀུན་སྐྱེད་ཡུམ་ཡིད་བཞིན་འཁོར་ལོ། །ཚེ་ཡི་དབང་ཕྱུག་ལྷ་མཆོག་རྣམས་ཀྱིས། །ཚེ་ཡི་དངོས་གྲུབ་འགྱུར་མེད་རྡོ་རྗེ། །གཞོམ་བྲལ་མི་ཤིགས་རྟག་བརྟན་ངོ་བོར། །གཞོམ་བྲལ་གསང་གསུམ་ཉིན་བྱེད་དབང་པོ། །དཔལ་ལྡན་སྙིང་པོའི་དོན་བརྒྱུད་གསལ་བྱེད། །དཔལ་ལྡན་བླ་མ་བསྐལ་བརྒྱར་བཞུགས་གསོལ། །མགོན་ཁྱོད་གདོད་ནས་ལྷུན་གྲུབ་བརྙེས་ཀྱང་། །མགོན་ཁྱོད་ཀུན་རྫོབ་འགྲོ་བློའི་མོས་
ངོར། །ཕྲིན་ལས་སྣང་བས་ཕྱོགས་མཐར་ཀུན་ཁྱབ། །ཕྲིན་ལས་རབ་རྒྱས་བཀྲ་ཤིས་དགེ་ལེགས། །དེ་ལྟར་རྒྱལ་བ་ཀུན་གྱི་ཕྲིན་ལས་གདུགས་དཀར་སྲིད་རྩེར་བསྒྲེངས་པ་བླ་མ་དམ་པ་རྡོ་རྗེ་དྲག་པོ་བསྐལ་བརྒྱར་ཞབས་པད་བརྟན་ཕྱིར། སི་ཏུས་སྤེལ་བ་སུ་ཛ་ཡ། །།ༀ་སྭ་སྟི། རྒྱལ་སྲས་མཚོ་སྐྱེས་ཀུན་མཁྱེན་པདྨ་རྒྱལ། །རྒྱལ་ཀུན་རྣམ་རོལ་མཚུངས་མེད་ཆོས་ཀྱི་རྒྱལ། །མཆོག་གི་གསང་གསུམ་རྡོ་རྗེའི་རང་བཞིན་ཅན། །མཆོག་ཏུ་འགྱུར་མེད་ཁམས་སུ་བརྟན་གྱུར་ཅིག །ཆོས་འཁོར་ཟབ་མོའི་བདུད་རྩི་དམ་པའི་ཆོས། །ཆོས་སྒོ་ཇི་སྙེད་སྐལ་བར་འཚམས་པའི་ཆོས། །སྟོན་པའི་རྒྱལ་ཐབས་དམ་པ་སྲིད་ཞིའི་དཔལ། །སྟོན་མཆོག་ཞབས་བརྟན་ཕྲིན་ལས་རྒྱས་གྱུར་ཅིག །ཅེས་ཚངས་པ་ལྷ་ཡི་མེ་ཏོག་བཀའ་བརྒྱུད་བསྟན་པའི་སྒྲོན་མེར་གྱུར་པ་རྡོ་རྗེ་དྲག་པོའི་བརྟན་བཞུགས་སྒྲུབ་བརྒྱུད་དར་རྒྱས་གླིང་གི་རྟོགས་ལྡན་རྣམས་ཀྱི་ཞལ་འདོན་ཁྱེར་བདེར་ཏཱའི་སི་ཏུས་བཀོད་པ་མངྒ་ལཾ། །དཀོན་མཆོག་གསུམ་གྱི་ཐུགས་རྗེའི་མཁའ་ཀློང་ནས། །འགྲོ་ལ་རྗེས་བརྩེའི་སྙིང་རྗེའི་རང་རྩལ་མདངས། །རྒྱལ་ཀུན་ཕྲིན་ལས་མི་ཟད་གཏེར་ཆེན་པོ། །འཕགས་ཆེན་ཕྱག་ན་པདྨོའི་རྣམ་པར་རོལ། །དུས་གསུམ་ཐོགས་མེད་སྤྲུལ་བསྒྱུར་དུ་མ་ཡིས། །མཐའ་ཡས་གདུལ་བྱ་རྗེས་སུ་འཛིན་གྱུར་པའི། །ཐུགས་རྗེ་ཚད་མེད་སྲིད་པའི་མཚོ་སྒྲོལ་བ། །སྐྱེ་དགུའི་འདྲེན་པ་ཆོས་ཀྱི་རྒྱལ་མཚན་མཆོག །མི་འགྱུར་གཡུང་དྲུང་ཁྲི་ལ་
མི་ཤིགས་དང་། །གསང་གསུམ་རྡོ་རྗེའི་རང་བཞིན་བརྟན་གྱུར་ཏེ། །བྱང་ཆེན་ཐུགས་བསྐྱེད་གོ་ཆ་ཆེ་བཞེས་ནས། །ཞིང་འདིར་བསྐལ་པ་འབྱམས་ཀླས་བརྟན་བཞུགས་གསོལ། །ཞེས་པའང་རྒྱལ་མཆོག་བདུད་འདུལ་རྡོ་རྗེ་འཆང་གང་སླར་ཡང་སྤྲུལ་པའི་ཟླ་ཞལ་འཆར་བའི་གཏམ་རྣ་བའི་བདུད་རྩི་ཐོས་སྐབས་གྲུབ་པའི་རྗེས་འཛིན་རས་སྤྲུལ་ཤེས་རབ་རྒྱ་མཚོའི་བཞེད་ལྟར་སི་ཏུས་སྤེལ་བ་ཛ་ག་ཏཾ། །འགྱུར་མེད་གདོད་ནས་རྒྱལ་ཀུན་གསང་གསུམ་གྱི། །ཡོན་ཏན་མཐའ་ཀླས་གཅིག་བསྡུས་རིན་ཆེན་འབྱུང། །མཚན་དཔེ་ལྷུན་པོའི་ཕྲིན་ལས་མངོན་མཐོ་བ། །ཐེ༵ག་པ༵་མཆོ༵ག་གི༵་སྣང་བྱེད་ཞབས་བརྟན་གསོལ། །ཐུབ་བསྟན་རྒྱ་མཚོའི་གཞུང་ལུགས་གངྒཱའི་ཀླུང་། །གཅིག་གྱུར་ངེས་གསང་རིང་ལུགས་རྨ་མེད་པ། །སྐྱེ་དགུའི་སྐྱབས་སུ་ནུབ་མེད་འཛིན་པའི་བདག །རྡོ་རྗེའི་ཆོས་བདུན་རང་བཞིན་ཞབས་བརྟན་གསོལ། །ཇི་སྙེད་བསྐལ་པར་གདུལ་བྱའི་སྣང་ངོ་རུ། །དེ་སྙེད་སྤྲུལ་སྐུའི་བཀོད་པ་འདི་ཁོ་ན། །ཚེ་འོད་མགོན་བཞིན་རྟག་བརྟན་ལྷུན་གྲུབ་ཀྱི། །ངོ་བོར་འཚོ་གཞེས་ཞབས་པད་བརྟན་གྱུར་ཅིག །ཅེས་པའང་གངས་ཅན་མགོན་པོ་རྒྱལ་མཆོག་བཅུ་གསུམ་པ་བདུད་འདུལ་རྡོ་རྗེ་བསམ་བཞིན་སྐྱེ་བའི་ཟློས་གར་གསར་དུ་བཞད་པའི་སྐབས་བསླབ་གསུམ་ནོར་ལྡན་བླ་མ་སྤྲུལ་སྐུའི་བཞེད་ལྟར་སྤེལ། །གདོད་ནས་རྟག་བརྟན་རྡོ་རྗེ་ལྷུན་གྲུབ་ཀྱི། །རང་བཞིན་མཆོག་ལ་གནས་ཀྱང་གདུལ་བྱའི་ངོར། །མི་ཤིགས་མི་
འགྱུར་བསྐལ་བརྒྱར་འཚོ་གཞེས་ནས། །ཐུགས་བསྐྱེད་ཟབ་མོའི་ཕྲིན་ལས་སྣང་བ་ཡིས། །བསྟན་འགྲོའི་དགེ་ལེགས་དབྱར་མཚོ་ལྟར་རྒྱས་ཤིང་། །ཐུབ་བསྟན་འཁོར་ལོ་གསུམ་གྱི་དགོངས་པའི་དོན། །ཉམས་མེད་ཡུན་གནས་གཉུག་མར་གནས་རྣམས་ཀྱང་། །དམ་ཆོས་བདུད་རྩིའི་རྒྱུན་གྱིས་འཚོ་གྱུར་ཅིག །ཅེས་གཅོད་ཡུལ་བ་ཀརྨ་ཡེ་ཤེས་ཀྱི་བཞེད་ལྟར། རྒྱལ་བའི་མཆོག་སྤྲུལ་གསར་འཆར་གྱི་ཞབས་བརྟན་དུ་སི་ཏུས་སྤེལ། །ༀ་སྭ་སྟི། གདོད་ནས་རང་བྱུང་ཟག་མེད་བདེ་ཆེན་དབྱིངས། །སྒྱུ་འཕྲུལ་གར་སྟོན་ཐེ༵ག་མཆོ༵ག་བླ་མེད་ཀྱི། །རྡོ༵་རྗེ༵་འཛིན་དབང་ཟློས་གར་སྤྲུལ་པའི་སྐུ། །གསང་གསུམ་འགྱུར་མེད་རྟག་བརྟན་ཡོངས་གྲུབ་ཤོག །འགྲོ་ལ་ཕན་བདེའི་གཞིར་གྱུར་སྨན་སྩོལ་བ། །སངས་རྒྱས་གཉིས་པ་ལྟ་བུའི་ཐུགས་བསྐྱེད་ཀྱི། །འཇུག་པ་ཟབ་མོའི་ཕྲིན་ལས་རྒྱས་མཛད་པ། །གསང་གསུམ་མི་འགྱུར་རྡོ་རྗེར་ལྷུན་གྲུབ་ཤོག །མཆོག་གསུམ་རབ་འབྱམས་བདེན་པ་ཟབ་མོ་དང་། །ཆོས་དབྱིངས་རང་བཞིན་དོན་དམ་བདེན་པ་ཡིས། །གཞོམ་བྲལ་རྡོ་རྗེའི་ཁྲི་ལ་གཡོ་མེད་པར། །ཚེ་འོད་མགོན་བཞིན་བསྐལ་བརྒྱར་བརྟན་གྱུར་ཅིག །ཅེས་པའང་བསླབ་གསུམ་ནོར་ལྡན་འབྲུག་སྐྱིད་ཕུག་པ་ཚུལ་ཁྲིམས་དར་རྒྱས་བཞེད་ལྟར་རྒྱལ་བའི་ཞབས་བརྟན་དུ་སི་ཏུས་སྤེལ་བ་དགེ། །བསྐལ་མང་ཐུགས་བསྐྱེད་རྒྱ་མཚོའི་འཇུག་ངོགས་ལས། །སྒྱུ་འཕྲུལ་རྡོ་རྗེའི་རོལ་གར་ཡིད་བཞིན་དབང་། །ཚངས་དབང་
གཙུག་གི་རྒྱན་དུ་མཆོད་པ་གང་། །འཚོ་གཞེས་སྲིད་མཐའི་བར་དུ་བརྟན་གྱུར་ཅིག །ཟབ་མོའི་ཕྲིན་ལས་འདོད་འཇོའི་བུམ་བཟང་བཞིན། །འབད་མེད་ལྷུན་གྲུབ་དོན་གཉིས་དངོས་གྲུབ་ཆར། །སྐལ་བཟང་ཡིད་མཁར་མངོན་སུམ་སྐྱེད་མཛད་པ། །ཐར་ལམ་སྟོན་མཆོག་སྲིད་མཐར་བརྟན་གྱུར་ཅིག །གསང་གསུམ་ཡོན་ཏན་རྒྱ་མཚོའི་རང་བཞིན་ཅན། །མི་ཤིགས་གཡུང་དྲུང་མི་ནུབ་རྡོ་རྗེའི་ཁྲིར། །བསྟན་འགྲོའི་དཔལ་དང་མགོན་པོ་དམ་པ་རུ། །མི་ནུབ་རྒྱལ་མཚན་ཇི་བཞིན་བརྟན་གྱུར་ཅིག །ཅེས་པའང་གཏེར་སྟོན་ལྷུན་གྲུབ་རབ་བརྟན་གྱིས་དཔལ་ཀརྨ་པའི་ཟླ་ཞལ་གསར་དུ་འཆར་བའི་ཞབས་བརྟན་བསྐུལ་བཞིན་སི་ཏུས་སྤེལ། །ངེས་པ་ལྔ་ལྡན་ལོངས་སྤྱོད་ཡོངས་རྫོགས་པ། །བཅོམ་ལྡན་ཚེ་འོད་ཡེ་ཤེས་སྣང་མཐའ་ཡས། །རྣམ་རོལ་འཕགས་ཡུལ་གྲུབ་པ་མཆོག་རྣམས་དང་། །གངས་ལྗོངས་བསྟན་འཛིན་སྐྱེས་རབས་ཕྲེང་བ་ལས། །ཚར་དུ་དངར་བ་རྗེ་བཙུན་སྤྲུལ་པའི་སྐུ། །གང་འདིར་རྒྱལ་དབང་ཀརྨའི་རིང་ལུགས་ཀྱི། །ཤིང་རྟ་ཆེན་པོར་ཐུགས་བསྐྱེད་ཡོངས་གྲུབ་པའི། །ཕྲིན་ལས་ཕྱོགས་མཐར་རྒྱས་བཞིན་ཞབས་བརྟན་གསོལ། །མཁས་བཙུན་བཟང་གྲུབ་དམ་པའི་སྐྱེས་བུ་ཡི། །རྣམ་ཐར་རྨད་བྱུང་འཛིན་སྤེལ་བསྟན་དང་འགྲོའི། །དོན་རྣམས་མཐར་ཕྱིན་གསང་གསུམ་མི་འགྱུར་བ། །གཞོམ་བྲལ་རྡོ་རྗེའི་ཁམས་སུ་བརྟན་གྱུར་ཅིག །ཅེས་སི་ཏུ་པདྨའི་མིང་ཅན་གྱིས་དགེ་སློང་ཀརྨ་དབང་རྒྱལ་
ངོར། ཞབས་དྲུང་ཏྲེ་ཧོ་རིན་པོ་ཆེར་ཞབས་བརྟན་བདེན་ཚིགས་སུ་སྤེལ་བ་དགེ། །ༀ་སྭ་སྟི། གདོད་ནས་འཕོ་འགྱུར་བྲི་གང་ལས་འདས་ཤིང་། །བདེ་བ་ཆེན་པོའི་རང་བཞིན་འདུས་མ་བྱས། །རྒྱལ་ཀུན་སྤྲོ་དང་བསྡུ་བའི་གཞིར་གྱུར་པ། །འཕགས་ཆེན་ཕྱག་ན་པདྨོ་ཞབས་བརྟན་གསོལ། །བརྡར་བཏགས་ངག་གི་ལམ་འདས་ཆོས་ཀྱི་སྐུ། །ཡེ་ནས་ཡེ་ཤེས་ནམ་མཁའི་རང་བཞིན་ཅན། །སྐྱེ་འགགས་གནས་བྲལ་རྟག་པའི་རྡོ་རྗེ་དངོས། །ཆོས་དབྱིངས་མཐའ་བྲལ་ཀློང་དུ་ཞབས་བརྟན་གསོལ། །མཁའ་དང་མཉམ་པའི་འགྲོ་བ་སྤྱི་དང་ནི། །ལྷག་པར་སྒྲུབ་བརྒྱུད་ཀཾ་ཚང་རིང་ལུགས་ཉིད། །ཕྱོགས་དང་ཐ་གྲུར་ཁྱབ་པའི་བྱེད་པོ་རུ། །བསྐལ་དང་བསྐལ་པར་ཞབས་པད་བརྟན་པར་གསོལ། །ཞེས་རྒྱལ་དབང་རིན་པོ་ཆེ་བསྐལ་བརྒྱར་ཞབས་པད་བརྟན་པའི་རྟེན་འབྱུང་ཆེད་དུ་སི་ཏུ་པདྨ་ཉིན་བྱེད་དབང་པོས་བཀོད་པ་དགེ་བར་གྱུར་ཅིག །ཤུ་བྷཾ། །ༀ་སྭ་སྟི། གང་ཞིག་དུས་གསུམ་རྒྱལ་བའི་ཐུགས་རྗེའི་འཕྲུལ། །དཔལ་ལྡན་འཇིག་རྟེན་དབང་ཕྱུག་རིགས་ཀུན་གྱི། །ཁྱབ་བདག་གདོད་ནས་ལྷུན་གྲུབ་འགྱུར་མེད་སྐུ། །ཐེ༵ག་པ་མཆོ༵ག་གི་རྡོ༵་རྗེ༵་འཚོ་གཞེས་གསོལ། །ཆོས་འཁོར་རིམ་གསུམ་མཐར་ཐུག་དགོངས་པའི་དོན། །དྭགས་པོ་བཀའ་བརྒྱུད་ངེས་དོན་ཀཾ་ཚང་གི། །བསྟན་པ་ཡོངས་རྫོགས་འཛིན་པའི་ཐམས་ཅད་མཁྱེན། །གསང་གསུམ་རྡོ་རྗེའི་ཁམས་སུ་བརྟན་བཞུགས་གསོལ། །ཨོ་རྒྱན་རྡོ་རྗེའི་བཀའ་
གསང་ཆོས་ཀྱི་སྒོ། །ཇི་སྙེད་གདུལ་བྱའི་ཁམས་དབང་མོས་པའི་ངོར། །སྟོན་པའི་བདག་ཉིད་བདེ་ཆེན་འཁོར་ལོའི་མགོན། །ཞབས་པད་བསྐལ་པ་རྒྱ་མཚོར་བརྟན་གྱུར་ཅིག། ཅེས་རྒྱལ་མཆོག་ཕྱག་ན་པདྨ་འཆང་བ་གྲུ་འཛིན་ཕྲེང་བ་རིམ་བྱོན་ལས། བཅུ་བཞི་པ་ཐེག་པ་མཆོག་གི་རྡོ་རྗེ་ཞབས་པད་བརྟན་པའི་གསོལ་འདེབས་སི་ཏུ་པདྨའི་མིང་ཅན་གྱིས་མཚུར་གནྡྷོ་ལར་བཀོད་པ་དགེ། །ཚེ་དང་ཡེ་ཤེས་དཔག་མེད་བཅོམ་ལྡན་འདས། །སྒྱུ་འཕྲུལ་རྣམ་པར་རྒྱལ་མ་ལྷ་མོའི་སྐུ། །ཐུགས་རྗེ་ཚད་མེད་ཡིད་བཞིན་འཁོར་ལོ་ཡི། །བྱིན་རླབས་འཆི་མེད་བདུད་རྩིའི་གྲུ་ཆར་ནི། །གང་འདིར་སིམ་པའི་ལེགས་བྱས་དཔལ་དེ་ཡིས། །མི་ཤིགས་དྭངས་མ་རྡོ་རྗེའི་སྐུ་བརྙེས་ཤིང་། །བསླབ་གསུམ་རྒྱུད་སྨིན་ཐོས་སྒོམ་མཐར་ཕྱིན་ནས། །བསྟན་དང་འགྲོ་དོན་ལྷུན་གྱིས་འགྲུབ་གྱུར་ཅིག །ཅེས་སི་ཏུ་པདྨའི་མིང་ཅན་གྱིས་གཏེར་སྤྲུལ་གསར་བཞད་ལ་ཀརྨ་གསང་སྔགས་བསྟན་འཛིན་བཟང་པོ་མཚན་དང་ཡུན་འཚོའི་བདེན་ཚིག །གང་དེའི་དབོན་སྤྲུལ་ཀརྨ་རབ་སྒྲུབ་ཀྱིས་བཞེད་ལྟར་སྤེལ་བ་དགེ། །དུས་གསུམ་རྒྱལ་བ་ཡོངས་འདུས་ཀརྨ་པའི། །རིང་ལུགས་ཕྲིན་ལས་ཤིང་རྟར་དབང་བསྒྱུར་བའི། །སྤྲུལ་པའི་རོལ་གར་སྟོན་གང་འཚོ་གཞེས་ཤིང་། །གཞོམ་བྲལ་འགྱུར་མེད་ཁམས་སུ་ལྷུན་འགྲུབ་ཤོག །བསླབ་གསུམ་རྣམ་པར་དག་པའི་གཞི་བརྟན་ཅིང་། །བསྡུ་དངོས་བཞི་དང་འཕགས་ནོར་བདུན་ལ་སོགས། །ཆོས་ཚུལ་སྤྱོད་ལ་ཉེར་
འཚོའི་གེགས་བྲལ་བར། །འགྲོ་དོན་རླབས་ཆེན་མཐའ་རུ་ཕྱིན་པར་ཤོག །ཅེས་སི་ཏུ་པས་གཅོད་བླ་ཚེ་དབང་བཞེད་ངོར་བསོད་ཆོས་སྤྲུལ་སྐུར་ཡུན་འཚོའི་ཆེད་དུ་སྤེལ་བ་དགེ། །ཚེ་དང་ཡེ་ཤེས་དཔག་མེད་བཅོམ་ལྡན་འདས། །སྒྱུ་འཕྲུལ་གར་སྟོན་ཡིད་བཞིན་འཁོར་ལོ་ཡུམ། །རྣམ་པར་རྒྱལ་མ་ལ་སོགས་རྩ་བ་གསུམ། །བྱིན་རླབས་ཐུགས་རྗེའི་དབྱིངས་ལས་འཆི་མེད་ཀྱི། །བདུད་རྩིས་དམ་པའི་སྒྱུ་འཕྲུལ་པདྨ་དཀར། །ཡོངས་སུ་བྲན་མཐུས་གསང་གསུམ་མི་ཤིགས་པ། །གདོད་མའི་རྡོ་རྗེ་གསུམ་དངོས་བརྟན་གྱུར་པས། །བཀའ་བརྒྱུད་བསྟན་པ་རྒྱས་པའི་བཀྲ་ཤིས་ཤོག། །ༀ་སྭ་སྟི། ཚེ་དབང་ཡེ་ཤེས་འགྱུར་མེད་གདོད་ནས་གྲུབ། །ཚེ་བརྟན་མགོན་གྱུར་པདྨ་སམྦྷ་ཝ། །ཚེ་ཡི་ལྷ་ཚོགས་རབ་འབྱམས་ཞིང་གང་བས། །ཚེ་དཔལ་སྣང་བ་རབ་རྒྱས་དགེ་ལེགས་སྩོལ། །སྐུ་མཆོག་གསེར་གྱི་ལྷུན་པོ་བཞིན་ཏུ་བརྟན། །གསུང་གསང་མི་ཤིགས་གྲགས་སྙན་ཆོས་རྔ་སྤྲིན། །ཐུགས་ནི་མི་གཡོ་ཏིང་འཛིན་བརྒྱ་ཕྲག་མངའ། །གསང་གསུམ་མི་འགྱུར་བསྐལ་བརྒྱར་འཚོ་གཞེས་བརྟན། །ངེས་དོན་སྙིང་པོའི་རྒྱལ་བསྟན་ཉིན་མོར་བྱེད། །འཛིན་སྐྱོང་སྤེལ་བའི་ཕྲིན་ལས་ཤིང་རྟ་ཡིས། །འགྲོ་ཀུན་ཕན་བདེའི་འོད་སྟོང་སྤྲོ་བཞིན་ཏུ། །རྟག་པར་བཀྲ་ཤིས་ཀུན་ཏུ་ཁྱབ་པར་ཤོག །ཅེས་པའང་སྒྲུབ་བརྒྱུད་བསྟན་པའི་རྒྱན་གྱུར་དམ་པ་དབོན་སྤྲུལ་ཕྲིན་ལས་རབ་རྒྱས་གང་དེར་བརྟན་བཞུགས་སུ་སི་
ཏུའི་མིང་ནས་ཡར་ཚེས་བཟང་པོར་བྲིས་པ་ཛ་ཡནྟུ། །།ༀ་སྭ་སྟི། མཆོག་གསུམ་ངོ་བོ་མཚོ་སྐྱེས་པད་འབྱུང་གི། །ངེས་གསང་རིང་ལུགས་དྲི་མེད་འདབ་སྟོང་ཅན། །ཕྱོགས་བཅུར་སྤེལ་མཁས་དཀོན་མཆོག་འབྱུང་གནས་དང་། །དབྱེར་མེད་ཟབ་གཏེར་མངའ་བདག་ཀློང་གསལ་སྙིང་། །མགོན་དེའི་སྒྱུ་འཕྲུལ་གར་གྱི་རོལ་པ་ལས། །རྒྱལ་བསྟན་གསལ་བྱེད་དབང་གི་རྡོ་རྗེ་གང་། །མཐའ་ཀླས་བསྐལ་པའི་བར་དུ་འཚོ་གཞེས་ནས། །ཕྲིན་ལས་འཛིན་མའི་ཁྱོན་ཀུན་འགེངས་མཛད་གསོལ། །ཚུལ་དེར་སྣང་བའི་ལོག་པའི་བློ་ཅན་རྣམས། །རྨེག་མེད་ཉིད་དུ་ཐལ་བར་བརླག་གྱུར་ཅིག །དགེ་ལེགས་གྲགས་སྙན་བ་དན་སྲིད་པའི་རྩེར། །མི་ནུབ་རྟག་པར་རབ་བརྟན་འཕེལ་རྒྱས་ཤོག །ཅེས་པའང་དད་ནོར་ལྡན་པ་བསོད་ནམས་དབང་རྒྱལ་ངོར་སི་ཏུས་སྤེལ་བ་ཛ་ག་ཏཾ། །རྒྱལ་ཀུན་ཐུགས་རྗེའི་རྣམ་རོལ་པདྨ་འབྱུང་། །ཚེ་དབང་རིག་འཛིན་གྲུབ་པའི་ཚོགས་རྣམས་དང་། །རྩ་གསུམ་ལྷ་ཡིས་དེང་འདིར་འཆི་མེད་ཀྱི། །བདུད་རྩི་དམ་པའི་དཔལ་གྱིས་འཚོ་གྱུར་ཅིག །ངེས་གསང་དྲི་མེད་སྙིང་པོ་དྭགས་བརྒྱུད་ཀྱི། །བསྟན་པ་མི་ནུབ་སྲིད་རྩེར་བསྒྲེང་བའི་སླད། །གྲགས་སྙན་དབྱར་གྱི་རྔ་ཆེན་ལྡིར་བཞིན་དུ། །ཆོས་ཀྱི་རྒྱལ་སྲིད་སྐྱོང་བཞིན་འཚོ་གྱུར་ཅིག །དོན་དམ་འགྱུར་མེད་རྟག་བརྟན་ལྷུན་གྲུབ་ཀྱང་། །ཀུན་རྫོབ་སྣང་ངོར་བསྐལ་བརྒྱར་འཚོ་གཞེས་ནས། །བསྟན་འགྲོའི་རྒུད་པའི་མུན་
པ་དྲུངས་ཕྱུང་སྟེ། །ཡང་དག་སྣང་བའི་འོད་སྟོང་སྤྲོ་གྱུར་ཅིག །ཅེས་གྲུབ་པའི་དབང་ཕྱུག་གར་དབང་རིན་པོ་ཆེའི་ཞབས་བརྟན་འདི་བཞིན་བརྩོན་འགྲུས་ཀྱིས་བསྐུལ་ལྟར་སི་ཏུས་སྤེལ་བ་མངྒ་ལམ། །ཚེ་དང་འོད་སྣང་དཔག་མེད་པ། །ཚེ་འཕེལ་ཨཱཪྻ་ཏཱ་རེ་མ། །ཚེ་སྦྱིན་རྣམ་པར་རྒྱལ་མ་སོགས། །ཚེ་ལ་དབང་བའི་ལྷ་རྣམས་ཀྱིས། །དེང་འདིར་འཆི་མེད་མཆོག་སྩོལ་མཛོད། །དམ་ཆོ༵ས་སྐྱོ༵ང་བའི་འདྲེན་པ་གང་། །འགྱུ༵ར་མེ༵ད་རྟག་བརྟན་འཚོ་གཞེས་ཤིང་། །ཕྲི༵ན་ལ༵ས་སྣང་བ་ར༵བ་རྒྱ༵ས་ཤོག །རྒྱལ་དབང་ཀརྨའི་རིང་ལུགས་ནི། །སྐྱེ་དགུའི་བསོད་ནམས་དཔལ་གྱུར་ཅིང་། །ནུབ་མེད་ཡུན་ཏུ་བརྟན་པ་དང་། །འགྲོ་རྣམས་མྱང་འདས་ཆེ་ཐོབ་ཤོག །བླ་མ་བསྟན་པས་བཞེད་ལྟར་སྤེལ་བ་དགེ་བར་གྱུར་ཅིག། །ཚེ་དང་ཡེ་ཤེས་དཔག་མེད་ལ་སོགས་པའི། །དཀོན་མཆོག་རྩ་གསུམ་བདེན་པ་ཆེན་པོ་ཡིས། །རྒྱལ་བསྟན་གསལ་མཛད་མཆོག་ཏུ་སྨིན་པའི་སྐུ། །ངག་དབང་ཡོན་ཏན་རྒྱ་མཚོ་འཚོ་གྱུར་སྨོན། །མཁས་ཚུལ་གསུམ་སོགས་དམ་པའི་ཚུལ་བཟང་པོས། །སྒྲུབ་བརྒྱུད་གཙོར་གྱུར་རྒྱལ་བའི་བསྟན་པ་ཀུན། །སྤེལ་བའི་ཕྲིན་ལས་མི་ནུབ་དབྱར་གྱི་ཆུ། །ཡར་ངོའི་ཟླ་བ་བཞིན་དུ་གོང་འཕེལ་ཤོག །ཅེས་མཁས་བཙུན་བཟང་པོའི་རྣམ་ཐར་རྨད་དུ་བྱུང་བ་ཀོང་པོ་བཾ་སྟེང་པའི་སྐྱེ་སྲིད་ཀརྨ་ངག་དབང་ཡོན་ཏན་རྒྱ་མཚོ་གང་དེར་རིང་འཚོའི་སྨོན་ཚིག་ཏུ་སི་ཏུ་པདྨའི་མིང་གིས་དགེ་བར་སྤེལ། །ༀ་སྭ་སྟི། ཆོས་དབྱིངས་འགྱུར་མེད་བདེ་ཆེན་སྒྱུ་འཕྲུལ་གར། །ཐུགས་
རྗེའི་རོལ་པ་སྣ་ཚོགས་ཅིར་ཡང་སྟོན། །མཚན་དཔེའི་རྒྱན་གྱིས་སྤྲས་པའི་སྐུར་སྣང་བ། །མཐོང་བས་རྣམ་དག་ལམ་སྟོན་འཚོ་གཞེས་གསོལ། །རྒྱལ་ཀུན་གསུང་གི་གསང་བའི་བདག་པོ་མཆོག །ཡན་ལག་དྲུག་ཅུའི་ཆོས་སྒོ་ཇི་སྙེད་ཀྱི། །དེ་སྙེད་གདུལ་བྱའི་ཁམས་དབང་མོས་པའི་ངོར། །ཐོས་པས་ཡང་དག་དོན་གནས་འཚོ་གཞེས་གསོལ། །ཐུགས་མཆོག་རྡོ་རྗེ་ལྟ་བུའི་ཏིང་འཛིན་ལྡན། །སྒྲིབ་བྲལ་ཡེ་ཤེས་རང་སྣང མངོན་དུ་གྱུར། །དྲན་པས་ངན་འགྲོའི་འཇིགས་ཀུན་སེལ་བའི་མགོན། །ཞིང་འདིར་བསྐལ་བརྒྱར་འཚོ་གཞེས་བརྟན་གྱུར་ཅིག །རྒྱལ་དབང་མཆོག་སྤྲུལ་གྱི་ཞབས་བརྟན་དུ་ཕུལ་བ་དགེ། །དུས་གསུམ་རྒྱལ་ཀུན་ཕྲིན་ལས་ཀྱི། །སྣང་བའི་འོད་ཟེར་གཅིག་བསྡུས་པ། །པད་འབྱུང་ཉིན་མོའི་མགོན་པོ་ཡིས། །བསྟན་འགྲོ་རྒུད་པའི་མུན་ཚོགས་གཞིལ། །ཀརྨ་བཀའ་བརྒྱུད་རིང་ལུགས་ཀྱི། །ཤིང་རྟ་རིག་གྲོལ་འདུས་པ་ཀུན། །རྒྱ་མཚོའི་གོས་ཅན་ཡོངས་སུ་ཁྱབ། །བཤད་སྒྲུབ་འཁོར་ལོའི་ལྗོན་བཟང་པོ། །གེགས་མེད་ལྷུན་གྱིས་གྲུབ་གྱུར་ཏེ། །སྐྱེ་དགུའི་དཔལ་དུ་ཇི་སྲིད་བར། །ནམ་ཡང་གཡོ་མེད་འཚོ་གཞེས་ནས། །ཀུན་ཀྱང་བྱང་ཆུབ་ལམ་སྟོན་ཤོག །ཅེས་འབྲུག་པ་བླ་མ་ཀརྨ་རིག་གྲོལ་རྒྱ་མཚོ་ཡུན་འཚོའི་རྟེན་འབྱུང་བསྐུལ་བཞིན་སྤེལ། །སྟོན་མཆོག་ཞི་བ་ཆགས་བྲལ་ཚོགས་ཀྱི་མཆོག །མཉམ་མེད་ཆོས་དབྱིངས་བདེན་པ་ཟབ་མོ་ཡིས། །
དེང་འདིར་བསྟན་འགྲོའི་གསོས་སྨིན་སྤྲུལ་པའི་སྐུ། །བདུད་བཞིའི་གཡུལ་ལས་རྣམ་པར་རྒྱལ་གྱུར་ནས། །སྤངས་རྟོགས་ཡོན་ཏན་བདུད་རྩིའི་འོད་དཀར་གང་། །ཆ་ཤས་ཡོངས་རྫོགས་གདུལ་བྱ་ཀུ་མུཏ་ཀྱི། །ཐར་པའི་ལམ་གྱི་འདབ་གྲོལ་གཉེན་དམ་པར། །བསྐལ་པར་ཡུན་དུ་འཚོ་ཞིང་བརྟན་གྱུར་ཅིག །ཅེས་སྒྲུབ་པ་དཀར་པོའི་སྐྱེ་སྤྲུལ་གསར་དུ་བཞད་སྐབས་གང་དེའི་འདུས་སྡེ་རྣམས་ཀྱི་ངོར་སྤེལ། །རྒྱལ་ཀུན་འདུས་གཟུགས་པདྨ་འབྱུང་། །ལྔ་བདོའི་དུས་འདིར་ཁྱད་པར་གྱི། །ཐུགས་རྗེས་འགྲོ་ལ་རྗེས་ཆགས་པའི། །བསྟན་པའི་ཉི་འོད་འབུལ་བརྡལ་བའི། །དེ་ཕྱིར་སྤྲུལ་པའི་གཏེར་སྟོན་གྱི། །འདུལ་བའི་དུས་བབས་ཡོལ་མེད་པར། །བརྒྱུད་པ་དགུ་ལྡན་བྱིན་རླབས་མཆོག །དེང་འདིར་མྱུར་དུ་སྨིན་གྱུར་ནས། །བསྟན་འགྲོའི་དོན་ཀུན་ལྷུན་གྲུབ་ཅིང་། །བསྐལ་བརྒྱར་རབ་ཏུ་ཞབས་བརྟན་ཤོག །བླ་མ་ཕྲིན་ལས་རབ་རྒྱས་ངོར་སྤེལ། །སྭ་སྟི། ཆོས་དབྱིངས་ཀུན་ཁྱབ་རང་བཞིན་གདོད་མའི་མགོན། །སྐུ་གསུམ་ཡེ་ཤེས་ལྔ་ཡི་བདག་ཉིད་ཅན། །བླ་མེད་རྒྱལ་བ་སྲས་དང་བཅས་པ་ཡིས། །དེང་འདིར་དགེ་ལེགས་དཔལ་ཡོན་ལྷུན་གྲུབ་སྩོལ། །གང་སྐུ་ཚོགས་གཉིས་གསེར་གྱི་བང་རིམ་མཐོ། །གསུང་གསང་ཟབ་མོའི་ཆོས་ཀྱི་འོད་བརྒྱ་འཕྲོ། །ཐུགས་མཆོག་རྣམ་པར་མི་རྟོག་ཡེ་ཤེས་རྒྱས། །གསང་གསུམ་བསྐལ་པར་ཞིང་འདིར་འཚོ་གཞེས་གསོལ། །བདེན་པའི་བདག་ཉིད་བཅོམ་ལྡན་སངས་
རྒྱས་དང་། །ཆགས་བྲལ་འཕགས་ཚོགས་ཐུགས་རྗེའི་གྲུ་ཆར་གྱིས། །རྨད་བྱུང་ཕན་བདེའི་གསོས་སུ་ཡོངས་སྨིན་ནས། །བཀྲ་ཤིས་རྫོགས་ལྡན་དགའ་སྟོན་གསལ་གྱུར་ཅིག །ཅེས་པའང་མཚུངས་མེད་དམ་པ་རྒྱལ་བའི་དབང་པོ་མཆོག་གི་སྤྲུལ་པའི་སྐུ་རིན་པོ་ཆེའི་ཞབས་བརྟན་བདེན་ཚིག་རྟེན་འབྱུང་དུ་སྤེལ། །ༀ་སྭ་སྟི། ཆོས་དབྱིངས་འོད་གསལ་བདེ་ཆེན་སྙིང་པོའི་ཁམས། །སྒྱུ་འཕྲུལ་དྲ་བའི་རྣམ་རོལ་སྤྲུལ་པའི་སྐུ། །མཆོག་ཏུ་མི་འགྱུར་དོན་གྱི་ཡེ་ཤེས་ཀྱི། །སྣང་བའི་ཉིན་བྱེད་བསྐལ་བརྒྱར་འཚོ་གྱུར་ཅིག །གཞན་སྐྱོན་མཚན་མས་རིང་སྤོང་ཡང་དག་གི། །ཟབ་དོན་ཐེག་གསུམ་བླ་མེད་ངེས་པའི་དོན། །ཇི་བཞིན་སྟོན་པའི་རྡོ་རྗེ་སློབ་དཔོན་ཆེ། །འོད་དཀར་བདུད་རྩི་སྤེལ་བཞིན་འཚོ་གྱུར་ཅིག །རྒྱལ་རྣམས་ཐུགས་རྗེའི་སྤྱི་བཅུད་ཡོངས་སྨིན་པ། །གང་འདུལ་ཕྲིན་ལས་ངོ་བོར་ལྷུན་གྲུབ་པའི། །ཡོངས་རྫོགས་བསྟན་པའི་རྒྱལ་མཚན་དཔལ་མངའ་བ། །སྟོན་པའི་རྒྱལ་ཐབས་དམ་པར་འཚོ་གྱུར་ཅིག། །དེ་ལྟར་ལྷག་བསམ་གྱིས་མཚོན་ཀུ་མུདྡའི། །ཕྲེང་སྤེལ་ལེགས་བྱས་དགེ་ལེགས་ཀྱིས་བསྐུལ་བའི། །རྣམ་མང་དུས་གསུམ་རྒྱལ་བའི་ནུས་སྟོབས་ཀྱིས། །ཇི་ལྟར་སྨོན་པ་དེ་བཞིན་འགྲུབ་གྱུར་ཅིག། ཅེས་པའང་སྐྱབས་རྗེ་འཛི་སྒར་རིན་པོ་ཆེའི་མཆོག་སྣང་གསར་འཆར་སྐབས། གང་དེའི་ཕྲིན་ལས་པ་དཔལ་དགའ་སྤྲུལ་སྐུ་ཚེ་དབང་བསྟན་འཛིན་དཔལ་བཟང་གི་བཞེད་ངོར་སི་ཏུ་པདྨ་ཉིན་བྱེད་དབང་པོས་སྤེལ། །དུས་གསུམ་རྒྱལ་ཀུན་
ཐུགས་རྗེའི་གཏེར་ཆེན་པོ། །མཚོར་འཁྲུངས་པདྨ་འབྱུང་གནས་བྱིན་རླབས་ཀྱི། །ཆ་ཤས་མོས་ཐོབ་པདྨ་ཉིན་བྱེད་དབང་། །བསྐལ་མང་སྨོན་ལམ་ཇི་བཞིན་དེ་ལྟར་གྱིས། །ངེས་གསང་མཐར་ཐུག་འོད་གསལ་སྙིང་པོའི་བསྟན། །ཉམས་མེད་ཡུན་གནས་ལྷག་བསམ་ཟླ་སྣང་དཀར། །མི་མཐུན་བར་ཆད་ཆུ་འཛིན་རིང་དུ་བསྲིངས། །བསྟན་འགྲོའི་དོན་སྐྱོང་འོད་ཀྱིས་ཐ་གྲུར་ཁྱབ། །བསྐལ་མང་ཞིང་འདིར་འཚོ་གཞེས་བརྟན་གྱུར་ནས། །ཟབ་དོན་རིམ་གཉིས་བཅུད་ཀྱི་བདུད་རྩི་ཡིས། །རང་གཞན་རྒྱུད་བརླན་བྱང་ཆུབ་འབྲས་སྨིན་ཅིང་། །རྟག་ཏུ་བསམ་དོན་ལྷུན་གྲུབ་བཀྲ་ཤིས་ཀྱི། །དཔལ་འབར་ཧེ་རུ་ཀ་དཔལ་རྡོ་རྗེ་བེར། །མཆོག་གི་གསང་གསུམ་དབྱེར་མེད་སྒྲུབ་བརྒྱུད་བསྟན། །སྤེལ་ཕྱིར་ཚེ་མཐའ་ཡས་པའི་ངོ་བོ་རུ། །མི་ཤིགས་མི་འགྱུར་མི་ནུབ་ཞབས་བརྟན་ཤོག །ཅེས་པའང་རྣལ་འབྱོར་བི་ཛ་ཡའི་ངོར་སྤེལ། །ༀ་སྭ་སྟི། དཔལ་ལྡན་དོན་ཀུན་ཡོངས་གྲུབ་བཅོམ་ལྡན་འདས། །དཔལ་མཆོག་ཕྱོགས་བཅུའི་བདེར་གཤེགས་མ་ལུས་པའི། །དཔལ་ཀུན་གཅིག་བསྡུས་མཚོ་སྐྱེས་པདྨ་འབྱུང་། །དཔལ་འབར་དགེ་ལེགས་དངོས་གྲུབ་ཟླ་རྒྱས་སྩོལ། །མི་ཤིགས་ཡོངས་གྲུབ་བདེ་ཆེན་ངོ་བོ་རུ། །མི་འགྱུར་གསང་གསུམ་གཞོམ་བྲལ་རྡོ་རྗེའི་སྐུ། །མི་གཡོ་རྟག་བརྟན་རང་བཞིན་གཡུང་དྲུང་ཁམས། །མི་ནུབ་རྒྱལ་མཚན་ལྟ་བུར་སྒྱུ་འཕྲུལ་གྱི། །རོལ་པ་འདི་ཡང་བསྐལ་པ་བསྐལ་པའི་བར། །སྒྲུབ་བརྒྱུད་
རིང་ལུགས་ཕྲིན་ལས་བ་དན་དཀར། །ཕྱོགས་མཐར་བསྒྲེངས་བའི་ཐུགས་བསྐྱེད་རྨད་བྱུང་བ། །དེང་འདིར་འབད་མེད་ཡིད་བཞིན་འགྲུབ་པར་ཤོག །དྲི་མེད་ངེས་གསང་རྡོ་རྗེ་སྙིང་པོ་ཡི། །བསྟན་དང་བསྟན་འཛིན་འཚོ་གཞེས་ཞབས་བརྟན་ཅིང་། །བསླབ་གསུམ་ནོར་ལྡན་དགེ་འདུན་འདུས་པ་རྒྱས། །མི་མཐུན་གཡུལ་རྒྱལ་རྣམ་ཀུན་བཀྲ་ཤིས་ཤོག །ཅེས་པའང་དད་གསུམ་མངོན་པར་མཐོ་བ་ཡོངས་དགེ་སྤྲུལ་སྐུ་ནས་རྟེན་དང་བཅས་བསྐུལ་བའི་ངོར། བཀའ་བརྒྱུད་བསྟན་པའི་ཕྲིན་ལས་པ་ཆེན་པོ་ལྷ་ཐོག་རྗེ་དྲུང་འགྱུར་མེད་ཀྱི་མཆོག་སྤྲུལ་དང་། སར་གནས་བྱང་སེམས་ངོ་བོ་སྲས་པོ་བླ་མ་བཅས་ཀྱི་ཞབས་བརྟན་དུ་སི་ཏུས་སྤེལ། །སྐྱབས་གསུམ་འདུས་པ་རྡོ་རྗེ་ཅན། །པདྨ་འབྱུང་གནས་ཐུགས་རྗེའི་མཐུས། །ངེས་གསང་རིང་ལུགས་རྨ་མེད་པ། །འཛིན་སྐྱོང་ཕྲིན་ལས་དཔལ་ཡོན་འཆང་། །དབང་གི་རྡོ་རྗེ་གསང་བ་གསུམ། །མི་ཤིགས་གཡུང་དྲུང་ངོ་བོ་རུ། །བསྐལ་པ་ལས་ཀྱང་བསྐལ་པའི་བར། །འཚོ་གཞེས་ཞབས་པད་བརྟན་གྱུར་ཅིག །དེ་མཐུས་བདག་ཀྱང་རྣམ་ཀུན་ཏུ། །བསམ་པ་ལྷུན་གྱིས་གྲུབ་པ་དང་། །རང་བྱུང་ཡེ་ཤེས་མཐར་ཕྱིན་ནས། །སྐུ་བཞིའི་བདག་ཉིད་འགྱུར་བར་ཤོག །རིག་འཛིན་བསམ་འཕེལ་ནས་བསྐུལ་ངོར་སྤེལ། །ༀ་སྭ་སྟི། མཆོག་གསུམ་འདུས་ཞལ་རྒྱལ་བ་རྒྱལ་བའི་གཙོ། །དཔལ་ལྡན་རིགས་རྣམས་ཁྱབ་བདག་འཁོར་ལོའི་མགོན། །གངས་ཅན་མགོན་པོ་ཕྱག་ན་
པད་དཀར་ཅན། །ཀརྨ་ཀ་ཞེས་གང་དེས་བདེ་ལེགས་སྩོལ། །དེ་ཡང་མདོ་སྔགས་བསྟན་གཉིས་ཟབ་མོའི་སྲོལ། །དྲི་མེད་གཅེས་སྤྲས་འཛིན་པའི་དཔལ་མངའ་བ། །མི་འགྱུར་རྡོ་རྗེ་ཅན་ཞེས་གྲགས་དེ་ཡི། །སྤྲུལ་པའི་སྣང་བརྙན་གང་ཁྱོད་རྟག་པ་རུ། །གསང་གསུམ་འགྱུར་མེད་རི་དབང་ལྷུན་པོ་བཞིན། །རྟག་བརྟན་བསྐལ་མང་འཚོ་གཞེས་བརྟན་གྱུར་ནས། །མཐའ་ཀླས་སྲིད་མཚོ་མ་སྐེམ་དེ་སྲིད་དུ། །ཐུགས་བསྐྱེད་དམ་བཅའི་ཁུར་ཆེན་ཡོལ་མེད་ཤོག །ཅེས་པའང་རིག་འཛིན་མཆོག་གི་སྤྲུལ་སྐུར་ཤིས་བརྗོད་དུ་སི་ཏུས་སྤེལ་བ་མངྒ་ལཾ། །ༀ་སྭ་སྟི། དཔ༵ལ་ལྡ༵ན་སྒྲུབ་བརྒྱུད་ཀཾ་ཚང་ངེས་དོན་གྱི། །འགྱུ༵ར་མེ༵ད་བསྟ༵ན་པ་འཛི༵ན་ལ་མངའ་བརྙེས་པ། །ཕྱོ༵གས་རྣམས་ཀུན་ལ༵ས་རྣ༵མ་གྲོ༵ལ་ཕྲིན་ལས་ཅན། །པ༵དྨ༵་ཀཱ་ར་ཇི་བཞིན་ཞབས་བརྟན་ཤོག །ཉི༵ན་བྱེ༵ད་གསང་གསུམ་ཡོན་ཏན་དཔལ་འབར་བས། །ཚངས་དང་དབ༵ང་པོ༵འི་སྡེ༵་སོགས་གུས་པའི་གནས། །དགོས་འབྱུང་དབ༵ང་གི༵་རྒྱལ་བཞིན་རྡོ༵་རྗེ༵་གསུམ། །འཚོ་གཞེས་གསོལ་འདེབས་འགྲོ་རྣམས་བྱང་ཆེན་ལམ། །བཀོད་པའི་ཕྲིན་ལས་རྣམ་བཞི་ལྷུན་གྲུབ་ནས། །བསྐལ་བརྒྱར་གཡོ་མེད་ཞབས་པད་བརྟན་གྱུར་ཅིག །ཅེས་དངོས་ཅག་སྤྲུལ་སྐུ་རྣམས་ཀྱི་ཞབས་བརྟན་དུ་ཕུར་སྒྲུབ་བླ་མ་བསྟན་པ་དར་རྒྱས་ཀྱི་ངོར་སྤེལ་བ་ཤུ་བྷ་པུཥྚིཾ། །བསྐལ་བཟང་རྣམ་འདྲེན་བཞི་པ་ཤཱཀྱའི་རྒྱལ། །དབྱེར་མེད་སངས་རྒྱས་པད་སྐྱེས་རིང་ལུགས་ཀྱི། །དོན་བརྒྱུད་མཐར་ཐུག་ངེས་
གསང་བསྟན་པའི་བདག །གྲུ་འཛིན་བདག་པོ་ཀརྨ་ཀ་དེས་སྐྱོངས། །གང་འདིར་བསྟན་དང འགྲོ་ལ་ཕན་བདེའི་གཞིར། །རིང་ནས་ཐུགས་བསྐྱེད་ཟབ་མོས་ཉེར་གྲུབ་པའི། །གཟུགས་སྐུ་བསྐལ་པར་འཚོ་བརྟན་རྣམ་ཀུན་དུ། །གཞན་རྐྱེན་ནོངས་པའི་དྲི་མ་རྒྱང་བསྲིང་ཤོག །གསང་གསུམ་རྡོ་རྗེའི་ཁམས་སུ་ལྷུན་གྲུབ་ནས། །རྟག་པར་བྱང་སེམས་དམ་པའི་ངང་ཚུལ་གྱི། །ཕྲིན་ལས་བཟང་པོས་སྐྱེ་དགུ་སྨིན་གྲོལ་ལམ། །བཀོད་པའི་གཞན་དོན་མཐའ་རུ་ཕྱིན་གྱུར་ཅིག །ཅེས་པའང་བཀྲམ་དྲུང་པ་སྤྲུལ་པའི་སྐུའི་ཞབས་བརྟན་དུ་སྐུ་ཞང་བླ་མ་ཚེ་དབང་རྣམ་རྒྱལ་གྱི་བཞེད་ལྟར་སི་ཏུས་སྤེལ་བ་དགེ། །རབ་འབྱམས་ཞིང་བདག་རྒྱལ་བ་ཚེ་མཐའ་ཡས། །རྡོ་རྗེ་གསུམ་བདག་འཆི་མེད་ལྷ་ཡི་ཚོགས། །དེང་འདིར་དོན་ཀུན་ཡོངས་སུ་གྲུབ་པའི་ཆར། །བྱིན་རླབས་མཆོག་སྩོལ་བདེ་ལེགས་ཀུན་དགར་མཛོད། །རིགས་ཀུན་ཁྱབ་བདག་བདེ་ཆེན་འཁོར་ལོའི་མགོན། །དཔལ་ལྡན་རྡོ་རྗེ་ཅན་དངོས་གྲུབ་པའི་གཙོ། །བཀའ་བརྒྱུད་བསྟན་པའི་རྒྱལ་མཚན་འཛིན་པ་གང་། །གདོད་ནས་ཡོངས་གྲུབ་རྟག་བརྟན་འཚོ་གཞེས་གསོལ། །དམ་ཆོས་ཉི་མའི་སྡེ་ཞེས་གྲགས་སྙན་གྱི། །སྤྲིན་སྒྲས་ཕྱོགས་ཀྱི་མདངས་ལྡན་ཡིད་སིམ་སླད། །བསྐལ་པ་ལས་ཀྱང་བསྐལ་ཆེན་བགྲང་ཡས་པར། །མི་འགྱུར་རྡོ་རྗེའི་རང་བཞིན་ཞབས་བརྟན་གསོལ། །དེ་ལྟར་དཔལ་ལྡན་བླ་མའི་ཞབས་བརྟན་ཅིང་། །བདག་སོགས་རྣམས་ཀྱང་ཚེ་དཔལ་ཆོས་ལྡན་ཞིང་། །བསམ་པའི་
དོན་གཉིས་མཐའ་རུ་ཕྱིན་པ་ཡི། །བཀྲ་ཤིས་ཀུན་ཁྱབ་རྟག་བརྟན་རབ་རྒྱས་ཤོག །ཅེས་པའང་དཔལ་ལྡན་འབྲུག་པ་རིན་པོ་ཆེ་མཆོག་གི་རྡོ་རྗེ་འཛིན་དབང་ཐམས་ཅད་མཁྱེན་གཟིགས་ཆེན་པོའི་ཞབས་བརྟན་གསོལ་འདེབས་སུ། སི་ཏུ་པདྨ་ཉིན་བྱེད་དབང་པོས་གུས་པས་གསོལ་བ་བཏབ་པའོ། །མངྒ་ལཾ། །ཕྱོགས་བཅུའི་ཞིང་ཁམས་རྒྱ་མཚོའི་རྒྱལ་དང་སྲས། །ཐུགས་རྗེའི་གཏེར་ཆེན་མགོན་པོ་ཚེ་མཐའ་ཡས། །འཆི་མེད་རྡོ་རྗེ་ལྷ་ཡི་མཆོག་རྣམས་ཀྱིས། །དཔལ་འབར་དངོས་གྲུབ་ཤིས་པ་སྩོལ་གྱུར་ཅིག །བཀའ་བརྒྱུད་རིང་ལུགས་ཕྲིན་ལས་སྣང་བྱེད་བདག །འགྲོ་ལ་སྨན་པའི་ཡོན་ཏན་རང་བཞིན་ཅན། །དཀྱིལ་འཁོར་ཀུན་བདག་རྡོ་རྗེ་འཛིན་དབང་པོ། །བསྐལ་ཆེན་རིང་དུ་ཞབས་བརྟན་འཚོ་གཞེས་གསོལ། །དཀོན་མཆོག་ཀུན་འདུས་བླ་མའི་ཐུགས་བསྐྱེད་དང་། །ཡི་དམ་ལྷ་དང་ཆོས་སྲུང་མཐུ་བྱིན་གྱིས། །དེང་འདིར་སྨོན་པ་ཡོངས་གྲུབ་འབྲས་སྨིན་ཞིང་། །རྟག་པར་བདེ་ལེགས་བསམ་དོན་ལྷུན་གྲུབ་ཤོག །ཅེས་པའང་རིགས་དཀྱིལ་བདག་པོ་གར་དབང་ཆོས་སྐྱོང་འགྱུར་མེད་མཆོག་གི་ཞབས་པད་རིང་འཚོའི་རྟེན་འབྱུང་ཆེད། སི་ཏུ་པདྨ་ཉིན་བྱེད་དབང་པོས་སྤེལ་བ་མངྒ་ལཾ། །དཔ༵ལ་ལྡ༵ན་འཆི་མེད་རྡོ་རྗེ་ལྷའི་དཀྱིལ་འཁོར། །ཡོངས་བསྡུས་འ ཆི༵་མེ༵ད་པ༵དྨ༵འི་བྱིན་རླབས་ཀྱིས། །གང་འདིར་འཆི་མེད་ཚེ་དངོས་གྲུབ་པ་ཡི། །རྟག་བརྟན་འཆི་མེད་ཡོངས་གྲུབ་དགེ་ལེགས་སྩོལ། །གསང་གསུམ་མི་འགྱུར་གཞོམ་བྲལ་འཚོ་གཞེས་ཤིང་། །ཐུགས་བསྐྱེད་ཟབ་མོས་བསྟ༵ན་
པ༵འི་ཕྲིན་ལས་ཀྱི། །འདོད་དགུར་བསྒྱུར་བཞིན་གདུལ་བྱའི་ལས་སྐལ་དང་། །འཚམས་པའི་ཆོས་འཁོར་བསྐོར་བཞིན་བརྟན་བཞུགས་གསོལ། །བདག་སོགས་དད་དང་དམ་ཚིག་རྣམ་དག་དང་། །ཆོས་ཅན་ཆོས་ཉིད་བདེན་པའི་སྟོབས་ཆེན་པོས། །གང་ཁྱོད་བདུད་བཞི་ལས་རྒྱལ་བཞེད་དོན་ཀུན། །ལྷུན་གྱིས་གྲུབ་པའི་བཀྲ་ཤིས་ར༵བ་རྒྱ༵ས་ཤོག །ཅེས་ཀརྨ་ཆགས་མེད་མཆོག་སྤྲུལ་ཡུན་འཚོའི་རྟེན་འབྱུང་དུ་དྲུང་ངམ་བླ་མའི་བཞེད་ངོར་སི་ཏུ་པས་སྤེལ་བ་མངྒ་ལཾ། །དཔག་ཡས་ཚེ་ཡི་མཆོག་སྩོལ་རྒྱལ་དང་རྒྱལ། །ཕུན་ཚོགས་འདོད་དགུའི་འབྱུང་གནས་ལྷ་ཡི་ཚོགས། །གང་འདིར་མི་འགྱུར་འཆི་མེད་དངོས་ཀུན་གྱི། །དགའ་ཆར་དམ་པའི་སྣང་བ་སྩོལ་གྱུར་ཅིག །དཔལ་ལྡན་ངེས་གསང་བསྟན་པའི་རྒྱན་གྱུར་པའི། །གང་དེའི་གསང་གསུམ་གཞོམ་བྲལ་རྡོ་རྗེ་ལྟར། །ལྷུན་གྲུབ་ཕྲིན་ལས་དཔལ་གཟི་འབར་བཞིན་དུ། །ཞིང་འདིར་འཚོ་གཞེས་ཆོས་སྟོན་བཞུགས་གསོལ་འདེབས། །རྒྱལ་བསྟན་སྙིང་པོ་རབ་རྒྱས་དེ་འཛིན་གྱི། །སྐྱེས་མཆོག་ཞབས་བརྟན་དགེ་འདུན་སྡེ་འཕེལ་ཞིང་། །ཡུལ་རིས་བདེ་ལེགས་རྫོགས་ལྡན་ལང་ཚོ་རྒྱས། །བཀྲ་ཤིས་ཀུན་ཏུ་ཁྱབ་ཅིང་རབ་བརྟན་ཤོག །ཅེས་པའང་ཚེ་དབང་རབ་འབྱོར་བཞེད་ལྟར་ཀརྨ་བདེ་ཆེན་སྤྲུལ་སྐུའི་ཞབས་བརྟན་དུ་སྤེལ། །ཆོས་དབྱིངས་གདོད་མའི་གནས་ལུགས་དོན་དམ་པ། །རང་
བྱུང་ལྷན་སྐྱེས་གཉུག་མ་སྤྲོས་བྲལ་ངང་། །འགྱུར་མེད་བདེ་བ་ཆེན་པོའི་རང་མདངས་ཀྱི། །རྩལ་སྣང་མ་འགག་སྤྲུལ་སྒྱུར་གར་རོལ་པ། །ཅིར་ཡང་སྟོན་པའི་རྣམ་འཕྲུལ་གཟུགས་ཀྱི་སྐུ། །ཚར་དུ་དངར་བའི་འགྲོ་སྒྲོལ་དེད་དཔོན་ཆེ། །གང་ཁྱོད་གདུལ་བྱ་སྙིགས་ལྔར་ཆེས་དགོངས་ནས། །སྙིང་སྟོབས་དཔའ་བའི་སྟོབས་ཀྱིས་གསང་བ་གསུམ། །མི་ཤིགས་འགྱུར་མེད་གཤིས་ཀྱི་རང་བཞིན་ལ། །ནམ་ཡང་གཡོ་མེད་བྱིས་བློའི་སྣང་ངོ་རུ། །གཞན་རྐྱེན་མཚན་མས་མི་བསྐྱོད་བདེ་ལྡན་མགོན། །ཇི་ལྟར་ཞབས་བརྟན་བསྟན་འགྲོར་དགེ་ལེགས་ཤོག། ཅེས་པའང་རྟོགས་ལྡན་རབ་འབྱོར་ངོར་བདེ་ཆེན་སྙིང་པོའི་སྤྲུལ་སྐུའི་ཞབས་བརྟན་དུ་སྤེལ། །འཆི་མེད་བཅོམ་ལྡན་ལྷ་ཡི་ལྷར་གྱུར་པ། །ཚེ་དང་འོད་སྣང་མཐའ་ཡས་པདྨ་འབྱུང། །མཆོག་དངོས་གྲུབ་པའི་སར་བཞུགས་རྒྱལ་དང་རྒྱལ། །གང་རྣམས་ཐུགས་རྗེས་རིང་དུ་སྐྱོང་གྱུར་ཅིག །དཔལ་ལྡན་ཀརྨའི་རིང་ལུགས་སྐྱོང་བ་དང་། །ལུས་ཅན་ཉེར་འཚོའི་གཞིར་གྱུར་མཆོད་གནས་སུ། །གང་དེའི་ཟློས་གར་སྣང་བ་གསལ་འདི་དག །འཕྲལ་ཡུན་བདུད་བཞིའི་གཡུལ་རྒྱལ་འཚོ་བརྟན་ཤོག། བསྟན་པའི་ཕྲིན་ལས་གཞན་དོན་ཇི་སྙེད་པ། །གེགས་མེད་ཡོངས་སུ་གྲུབ་པའི་དཔལ་ཐོབ་ཅིང་། །མི་འགྱུར་རྡོ་རྗེའི་ངོ་བོར་རྟག་བརྟན་ནས། །དོན་གཉིས་མཐར་ཕྱིན་རྣམ་ཀུན་བདེ་ལེགས་ཤོག། འཇའ་མོ་སྤྲུལ་སྐུ་ཡུན་འཚོའི་བདེན་ཚིག་དབང་འཛིན་གྱིས་བསྐུལ་ངོར་སྤེལ། །
མཆོག་གསུམ་རྒྱ་མཚོའི་ཐུགས་རྗེའི་མཁའ་ཀློང་ནས། །ཕྲིན་ལས་ཕན་བདེའི་ཉི་མ་རབ་གསལ་བ། །གང་ཞིག་ཉེས་པའི་མུན་ཚོགས་ཀུན་འཇོམས་པའི། །རྨད་བྱུང་འོད་སྣང་ཟེར་ཕྲེང་སྤྲོ་གྱུར་ཅིག །ཐུགས་བསྐྱེད་དཔྱིད་ཀྱི་དཔལ་ལས་གྲུབ་པ་ཡི། །གཟུགས་སྐུའི་པད་ཚལ་བསླབ་གསུམ་དྲི་བསུང་ལྡན། །ཡིད་ཅན་བུང་ཚོགས་འདུ་ཞིང་རྒྱལ་བསྟན་གྱི། །མཛེས་པའི་རྒྱན་གྱུར་དེང་འདིར་འཚོ་བརྟན་ཤོག། སྒྲུབ་བརྒྱུད་རིང་ལུགས་ཕྱོགས་མཐར་ཁྱབ་ཡུན་གནས། །བསྟན་འཛིན་ཞབས་བརྟན་དགེ་འདུན་སྡེ་རྒྱས་ཤིང་། །རྒྱལ་ཁམས་བདེ་ཞིང་དཀར་ཕྱོགས་སྐྱོང་རྣམས་ཀྱིས། །རྟག་ཏུ་དགེ་བའི་དཔལ་ཡོན་སྩོལ་གྱུར་ཅིག །གར་བསྟན་བྱ་བཏང་མཁན་སློབ་ནས་བཞེད་ངོར་རས་སྤྲུལ་ཡུན་འཚོའི་བདེན་ཚིག་ཏུ་སྤེལ། །ཚེ་དང་ཡེ་ཤེས་ཡོན་ཏན་དཔག་མེད་མགོན། །དུས་གསུམ་རྒྱལ་ཀུན་སྐྱེད་ཡུམ་སྒྲོལ་མ་དཀར། །རྣམ་པར་རྒྱལ་སོགས་འཆི་མེད་མཆོག་སྟེར་ལྷས། །གང་འདིར་དགེ་ལེགས་སྣང་བ་འབར་གྱུར་ཅིག །བསྟན་འགྲོའི་ཕན་དང་བདེ་འབྱུང་ཀུན་གྱི་གཞི། །ཡོངས་གྲུབ་སྔོན་སྨོན་ཇི་བཞིན་སྤྲུལ་པའི་སྐུ། །མི་མཐུན་ཉེར་འཚེའི་ཚོགས་ལས་རབ་གྲོལ་ནས། །ཞིང་འདིར་རྟག་པར་གཡོ་མེད་འཚོ་གཞེས་ཤོག །གཞན་དོན་ཕྲིན་ལས་ཡར་ཟླ་ལྟར་འཕེལ་ཞིང་། །སྒྲུབ་བརྒྱུད་རིང་ལུགས་དར་ཞིང་རྒྱས་པ་དང་། །དགེ་འདུན་ཐུགས་མཐུན་ཆོས་སྤྱོད་བཅུ་དང་ལྡན། །སྐྱེ་དགུ་བདེ་
སྐྱིད་དཔལ་གྱིས་དགེ་གྱུར་ཅིག །པད་སྙིང་སྐྱེ་སྤྲུལ་ཡུན་འཚོར་གང་དེའི་དབོན་རིགས་ནས་བསྐུལ་ལྟར་སྤེལ། །དུས་གསུམ་རྣམ་འདྲེན་ཐུགས་རྗེའི་སྒྱུ་འཕྲུལ་ལས། །ཡོངས་ཤར་སྤྲུལ་པའི་གཟུགས་སྐུའི་རྣམ་པར་རོལ། །འགྲོ་བའི་མགོན་དུ་བསྙེལ་མེད་ཕྲིན་ལས་ཅན། །བཀའ་བརྒྱུད་བསྟན་པའི་རྒྱལ་མཚན་འཚོ་གཞེས་གསོལ། །འཕགས་ཆེན་བྱང་ཆུབ་སྤྱོད་པའི་རང་བཞིན་གྱི། །སྙིང་སྟོབས་གོ་ཆ་མཆོག་ཏུ་དཔའ་བ་ཡིས། །སྙིགས་དུས་གདུལ་བྱར་འཚམས་པའི་དམ་ཆོས་ཀྱི། །སྨིན་གྲོལ་སྟོན་བཞིན་བསྐལ་བརྒྱར་ཞབས་བརྟན་གསོལ། །དོན་དམ་འཕོ་མེད་རྟག་བདེའི་རང་བཞིན་ཀྱང་། །སྣང་ཚུལ་གཞན་རྐྱེན་དྲི་མ་རིང་སྤངས་ཞིང་། །རྡོ་རྗེ་ཆོས་བདུན་ངོ་བོར་ལྷུན་གྲུབ་ནས། །འཚོ་གཞེས་བཞེད་དོན་ཇི་ལྟར་འགྲུབ་གྱུར་ཅིག །ཅེས་དམ་པ་གཞན་ལའང་མཚན་གྱི་ཁ་བསྒྱུར་བདེ་ཁྱད་ཅན་དུ། ཀརྨ་ཆོས་མཆོག་ནས་བསྐུལ་ལྟར་སི་ཏུ་པདྨ་ཉིན་བྱེད་དབང་པོས་སྤེལ། །ཕྱོགས་བཅུའི་རྒྱལ་ཀུན་ལྷ་ལམ་ཁྱོན་ཡངས་པོར། །མི་བཟད་བྱིན་རླབས་འོད་སྟོང་འཆར་བའི་མཐུས། །དེང་འདིར་གང་དེའི་གསང་གསུམ་དགའ་ཚལ་གྱི། །ལེགས་བྱས་འདབ་བརྒྱ་རྣམ་ཀུན་གྲོལ་གྱུར་ཅིག །སྤངས་རྟོགས་ཡོན་ཏན་གེ་སར་འཛུམ་ཕྲེང་རྒྱས། །རྒྱལ་བསྟན་སྐྱོང་བའི་ལྷག་བློའི་རྩ་བ་བརྟན། །ཡིད་ཅན་འཚོ་བའི་དཔལ་གྱིས་གང་བཞིན་པར། །དུས་ཀྱི་ཉེར་འཚེ་རིང་དུ་བསྲིང་གྱུར་ཅིག །ཆོས་དབྱིངས་དོན་དམ་བདེན་
དང་ཆོས་ཅན་གྱི། །ཀུན་རྫོབ་རྟེན་འབྲེལ་བསླུ་བ་མེད་བདེན་པས། །ཇི་ལྟར་སྨོན་པའི་འབྲས་གང་ཡོངས་འགྲུབ་ནས། །དགེ་འདུན་སྡེ་རྒྱས་འཇིག་རྟེན་བདེ་ལེགས་ཤོག །ཅེས་གྲུབ་ཚ་བླ་ཆོས་ཀྱི་ངོར་སི་ཏུ་པས་སྤེལ་བ་དགེ། །ༀ་སྭ་སྟི། གདོད་ནས་ཡེ་ཤེས་ལྔ་བདག་ཚེ་འོད་མགོན། །དབྱེར་མེད་སངས་རྒྱས་པད་སྐྱེས་མཐུ་སྟོབས་ཀྱི། །ཐུགས་རྗེའི་སྣང་བྱེད་གང་འདིར་རབ་གསལ་ནས། །རྣམ་ཀུན་འཆི་མེད་ཚེ་དབང་རྒྱས་གྱུར་ཅིག །རྒྱལ་བསྟན་འཛིན་དང་ལུས་ཅན་ཕན་བདེའི་གཞི། །ཕྲིན་ལས་རྨད་བྱུང་དམ་པའི་རྣམ་ཐར་ལྡན། །སྤངས་དང་རྟོགས་པའི་ཡོན་ཏན་ཀུན་འབྱུང་གནས། །གསང་གསུམ་རྟག་བརྟན་རྡོ་རྗེ་ཡོངས་གྲུབ་ཤོག །སྟོང་ཉིད་གཞོམ་བྲལ་རང་བྱུང་གུར་ཁང་དབུས། །མ་བཅོས་དོན་དམ་འགྱུར་མེད་སྐུ་མངའ་བ། །ཡེ་གྲུབ་མི་ཤིགས་ངོ་བོར་འཚོ་གཞེས་ནས། །བཞེད་དོན་ཡིད་བཞིན་འདོད་འཇོའི་བཀྲ་ཤིས་ཤོག །ཅེས་བླ་མ་དཔལ་དགའི་ཞབས་བརྟན་འདི་བཞིན་ཀུན་དགའ་ཡེ་ཤེས་པས་བསྐུལ་བར་སྤེལ་བ་སརྦ་ཐཱ་མངྒ་ལ་ཤུ་བྷ་པུཥྚིཾ། །རྒྱལ་བ་སྟོབས་བཅུའི་མངའ་བདག་སངས་རྒྱས་དང་། །ཤེས་རབ་ཕར་ཕྱིན་ཞི་བ་ཆོས་ཀྱི་མཆོག །རིག་དང་གྲོལ་བའི་སར་གནས་འཕགས་ཚོགས་ཏེ། །རིན་ཆེན་རྣམ་གསུམ་ཐུགས་རྗེས་དེང་འདིར་སྐྱོངས། །དྲུག་པ་སེང་གེ་ཀརྨ་པར་གྲགས་པའི། །སྙིང་པོའི་རིང་ལུགས་གསལ་བྱེད་སྤྲུལ་པའི་སྐུ། །གསང་གསུམ་མི་མཐུན་
ཉེར་འཚེ་ལས་རྒྱལ་ནས། །བསྟན་ལ་བྱ་བ་བྱེད་པའི་དཔལ་ཐོབ་ཤོག །འབྲེལ་ཚད་གདུལ་བྱར་ཕན་བདེའི་ཕྲིན་ལས་དང་། །རང་དོན་ཐོས་བསམ་སྒོམ་པར་དབང་སྒྱུར་ཞིང་། །བཞེད་དོན་རྣམ་དག་ལྷུན་གྱིས་གྲུབ་གྱུར་པའི། །དགེ་ལེགས་ཡོངས་འདུའི་བཀྲ་ཤིས་རབ་རྒྱས་ཤོག །ཅེས་པའང་གནས་སྒོ་སྤྲུལ་པའི་སྐུར་དགེ་བའི་ཤིས་བརྗོད་འདི་བཞིན་བླ་མ་གཞན་ཕན་རྒྱ་མཚོས་བསྐུལ་ངོར་སྤེལ་བ་དགེ། །ༀ་སྭ་སྟི། དཔལ་ལྡན་སྟོབས་བཅུའི་མངའ་བདག་རྫོགས་སངས་རྒྱས། །བརྒྱད་ཁྲི་བཞི་སྟོང་འབྱུང་གནས་དམ་པའི་ཆོས། །ལུང་རྟོགས་ཡོན་ཏན་གཏེར་མངའ་རིག་གྲོལ་སྡེ། །བླ་མེད་མཆོག་གསུམ་རྒྱལ་བས་དེང་འདིར་སྐྱོངས། །གང་སྔོན་བྱང་ཆུབ་བརྙེས་པར་གྱུར་མོད་ཀྱང་། །འགྲོ་ལ་བརྩེ་ཆེན་དགོངས་ཟབ་མ་སྨད་པས། །གཞན་དྲིང་མི་འཇོག་སྙིང་རྗེའི་ཐབས་ཚུལ་གྱིས། །གཟུགས་སྐུར་བསམ་བཞིན་བཞེངས་གང་རྒྱལ་གྱུར་ཅིག །གསང་གསུམ་རྟག་བརྟན་བདེ་བ་ཆེན་པོའི་ངང་། །ལྷུན་གྲུབ་གཞན་རྐྱེན་དང་བྲལ་ཕྲིན་ལས་ཀྱིས། །རྒྱ་མཚོའི་གོས་ཅན་ཡོངས་ཁྱབ་རྣམ་པ་ཀུན། །བདེ་ལེགས་དཔལ་འབར་ཕྱོགས་ལས་རྣམ་རྒྱལ་ཤོག །ཅེས་པའང་གྲུབ་པའི་དབང་ཕྱུག་དམ་པ་ས་ཐམ་བླ་མ་དབང་རྒྱལ་རིན་པོ་ཆེའི་སྤྲུལ་སྐུ་འཁྲུལ་མེད་ཀརྨ་རྒྱ་མཚོ་བདེ་ལེགས་དཔལ་འབར་ཕྱོགས་ལས་རྣམ་རྒྱལ་ཞེས་པར་ཡུན་འཚོའི་ཤིས་བརྗོད་དུ་སི་ཏུ་པས་སྤེལ་བ་ཤུ་བྷ་མ སྟུ་སརྦ་ཛ་ག་ཏཾ། །སྐུ་གསུམ་སྟོན་པ་མཆོག་གི་རྣམ་པར་
འཕྲུལ། །མཁས་དང་གྲུབ་པ་ཡོངས་ཀྱི་འཁོར་ལོས་སྒྱུར། །རྣལ་འབྱོར་དབང་ཕྱུག་རྗེ་བཙུན་ཨ་རཱ་གའི། །ཐུགས་རྗེ་ཆེན་པོས་གང་འདིར་སྐྱོང་གྱུར་ཅིག། མགོན་ཁྱོད་བསྟན་དང་འགྲོ་ལ་རྗེས་བརྩེའི་མཐུས། །འཁོར་བ་སྲིད་དུ་སྤྲུལ་པའི་རོལ་རྩེད་ཀྱིས། །ངེས་གསང་བསྟན་སྤེལ་གདུལ་བྱ་སྨིན་གྲོལ་ལམ། །འགོད་མཛད་མཆོག་གི་རྣམ་རོལ་ཞབས་བརྟན་གསོལ། །འཁོར་ལོ་གསུམ་གྱི་བསྟན་པའི་རྩ་ལག་དང་། །སྒྲུབ་བརྒྱུད་སྙིང་པོའི་རིང་ལུགས་འཛིན་སྤེལ་སྐྱོང་། །གཞན་དྲིང་མི་འཇོག་སྔོན་སྨོན་ཐུགས་བསྐྱེད་སྟོབས། །དེང་འདིར་ཡོངས་སྨིན་མཛད་ཕྲིན་ལྷུན་གྲུབ་ཤོག །ཅེས་པའང་སི་ཏུ་པདྨའི་མིང་ཅན་གྱིས་གང་དེའི་བླ་མཆན་སྤྲུལ་སྐུ་དང་དབོན་པོ་མཛོད་པ་སོགས་ཀྱི་བཞེད་ངོར་སྤེལ། །ཚེ་དང་ཡེ་ཤེས་དཔག་མེད་བཅོམ་ལྡན་འདས། །སྒྱུ་འཕྲུལ་རྣམ་པར་རྒྱལ་མ་ལྷ་མོའི་སྐུ། །ཐུགས་རྗེ་ཚད་མེད་ཡིད་བཞིན་འཁོར་ལོ་ཡི། །བྱིན་རླབས་འཆི་མེད་བདུད་རྩིའི་གྲུ་ཆར་རྒྱུན། །གང་འདིར་སིམ་པའི་ལེགས་བྱས་དཔལ་དེ་ཡིས། །མི་ཤིགས་དྭངས་མ་རྡོ་རྗེའི་སྐུ་བརྙེས་ཤིང་། །བསླབ་གསུམ་རྒྱུད་སྨིན་ཐོས་སྒོམ་མཐར་ཕྱིན་ནས། །བསྟན་དང་འགྲོ་དོན་ལྷུན་གྱིས་གྲུབ་གྱུར་ཅིག །ཅེས་སི་ཏུ་པདྨའི་མིང་ཅན་གྱིས་མི་འགྱུར་རྡོ་རྗེའི་སྤྲུལ་སྐུ་གསར་བཞད་ལ་ཀརྨ་གསང་སྔགས་བསྟན་འཛིན་བཟང་པོ་ཞེས་པའི་མཚན་དང་ཡུན་འཚོའི་བདེན་ཚིག་གང་དེའ་ིདབོན་སྤྲུལ་ཀརྨ་རབ་སྒྲུབ་ཀྱིས་བཞེད་ལྟར་སྤེལ་བ་དགེ། །
འགྱུར་མེད་བདེ་ཆེན་ཐིག་ལེར་དངོས་ཀུན་གྱི། །དྲྭ་བ་སྡོམ་པ་ལྷན་སྐྱེས་བཅོམ་ལྡན་འདས། །རྣམ་ཀུན་མཆོག་ལྡན་ཕྱག་རྒྱ་ཆེར་རོལ་པའི། །སྒྱུ་འཕྲུལ་ུའགྲོ་བློའི་གྲངས་སྙེད་བསྟན་པ་ལས། །གནོད་གནས་དབང་པོས་སྐྱོང་བའི་ལྗོངས་ཀྱི་དཔྱིད། །བསོད་ནམས་རྡུལ་བརྩེགས་མཆོག་སྐུའི་ཟླ་གཞོན་གང་། །འཆི་མེད་གཉུག་མའི་ཆ་ཤས་རབ་རྫོགས་པའི། །འོད་སྣང་བསྟན་འགྲོའི་དཔལ་དུ་རྟག་འཆར་བས། །བསླབ་པ་གསུམ་དང་ཐོས་བསམ་སྒོམ་པ་ཡིས། །སྟོན་པའི་བསྟན་པ་ཆེས་ཆེར་སྤེལ་བ་དང་། །རྫོགས་ལྡན་དང་པོའི་དཔལ་འབྱོར་རྒྱ་མཚོ་ཡིས། །ལུས་ཅན་བདེ་དགར་སྤྱོད་པའི་བཀྲ་ཤིས་ཤོག །ཅེས་པའང་སི་ཏུ་པདྨའི་མིང་ཅན་གྱིས་གཙང་ཆེན་མཆོག་གི་སྤྲུལ་པའི་སྐུ་ཟླ་གསར་བཞད་པའི་ཡུན་འཚོའི་ཆེད་དུ་བསྐུལ་བར་སྤེལ་དགེ་ཛ་ཡནྟུ། །ༀ་སྭ་སྟི། རྒྱལ་ཀུན་འདུས་ཞལ་རྩ་བརྒྱུད་བླ་མ་དང་། །ཡི་དམ་མཁའ་གྲོ་ཆོས་སྐྱོང་ཚོགས་རྣམས་ཀྱི། །ཐུགས་བསྐྱེད་བདེན་པ་ཟབ་མོས་སྤྲུལ་པའི་སྐུ། །བདུད་བཞིའི་གཡུལ་རྒྱལ་འཚོ་གཞེས་བརྟན་གྱུར་ཅིག །བསླབ་གསུམ་རྣམ་དག་རིན་ཆེན་རྒྱན་གྱིས་སྤྲས། །སྟོབས་བཅུའི་བདག་ཉིད་སྤོས་གླང་ཇི་བཞིན་པར། །སྒྲུབ་བརྒྱུད་བསྟན་པའི་ཁུར་འདེགས་ངལ་མེད་ཅིང་། །ཐོས་བསམ་སྒོམ་པ་མཐར་ཕྱིན་འཚོ་བརྟན་ཤོག །གཞན་དོན་སྙིང་རྗེའི་ཁྱུང་སྔོན་སྐྱེས་དྲངས་པའི། །རང་དོན་ཆོས་སྐུ་
གཉུག་མའི་ཉིན་བྱེད་གང་། །མདོ་སྔགས་རིང་ལུགས་པད་ཚལ་བཞད་པའི་གཉེན། །ཡོངས་གྲུབ་གསང་གསུམ་གཞོམ་བྲལ་བརྟན་གྱུར་ཅིག །ཅེས་སི་ཏུ་པདྨའི་མིང་ཅན་གྱིས་གཏེར་སྒར་རྒྱལ་སྲས་སྤྲུལ་སྐུ་ཡུན་འཚོའི་ཆེད་དུ་དབོན་བླ་མ་ཀརྨ་ཚེ་རྒྱལ་ངོར་སྤེལ། །ཕྱོགས་བཅུའི་རྒྱལ་བའི་ཐུགས་རྗེའི་རང་གཟུགས་མཆོག །དཔལ་ལྡན་སངས་རྒྱས་མཚོ་སྐྱེས་རྣམ་པར་རོལ། །བསམ་བཞིན་སྐྱེ་བའི་སྒྱུ་འཕྲུལ་རྡོ་རྗེའི་གར། །ཞིང་འདིར་བསྐལ་བརྒྱར་འཚོ་གཞེས་བརྟན་གྱུར་ཅིག །བསྐལ་བཟང་སངས་རྒྱས་དྲུག་པ་སེངྒེའི་མཚན། །ཞིང་འདིར་ཀརྨ་ཀ་ཞེས་ས་གསུམ་དུ། །གྲགས་པའི་འོད་དཀར་ཅན་དེའི་རིང་ལུགས་གང་། །ཕྲིན་ལས་ཕྱོགས་མཐར་སྤེལ་བཞིན་འཚོ་གཞེས་གསོལ། །དཀོན་མཆོག་རྩ་གསུམ་བྱིན་རླབས་མཐུ་སྟོབས་དང་། །ཆོས་ཅན་ཆོས་ཉིད་རྟེན་འབྲེལ་བསླུ་མེད་ཀྱིས། །གསང་གསུམ་རྡོ་རྗེའི་ཆོས་བདུན་ངོ་བོ་རུ། །བསྟན་འགྲོའི་དོན་ཆེན་མཐར་ཕྱིན་བཀྲ་ཤིས་ཤོག །དཔལ་ལྡན་དཔའ་བོ་རིན་པོ་ཆེའི་མཆོག་སྤྲུལ་ཞབས་བརྟན་དུ། དབོན་བསོད་ནམས་ཐོགས་མེད་ནས་བསྐུལ་ངོར་སྤེལ་བ་ཛ་ཡ། །རྒྱལ་མཆོག་འཇིག་རྟེན་དབང་ཕྱུག་ཀརྨ་པའི། །ཕྲིན་ལས་རྒྱ་མཚོའི་གོས་ཅན་སྤེལ་བའི་ཕྱིར། །བྱང་སེམས་ཀུན་ཏུ་བཟང་པོའི་རྣམ་པར་རོལ། །གང་ཁྱོད་གསང་གསུམ་འཚོ་གཞེས་བརྟན་གྱུར་ཅིག །མཁྱེན་པས་ཤེས་དང་ཤེས་བྱ་ཐུགས་སུ་ཆུད། །བརྩེ་བས་སྙིགས་
མའི་གདུལ་བྱ་རྗེས་སུ་འཛིན། །ནུས་པས་མི་སྲུན་བདུད་སྡེ་ཕ་མཐར་བསྐྲད། །དམ་པའི་སྐྱེས་མཆོག་བསྐལ་པར་འཚོ་བརྟན་གསོལ། །ཁྱད་པར་ངེས་དོན་སྙིང་པོའི་ཆོས་སྒོ་ཡིས། །འགྲོ་ཁམས་ལེགས་པའི་ལམ་མཆོག་སྟོན་བྱེད་པའི། །འཁོར་ལོ་བླ་ན་མེད་པ་བསྐོར་བཞིན་དུ། །སྟོན་མཆོག་རིང་ལུགས་ཤིང་རྟ་འདྲེན་གྱུར་ཅིག །རྒྱལ་ཚབ་ཕྱག་མཛོད་བཞེད་ལྟར་མཆོག་སྤྲུལ་རིན་པོ་ཆེའི་ཞབས་བརྟན་རྟེན་འབྱུང་ཆེད་དུ་སྤེལ་བ་དགེ། །རབ་འབྱམས་ཕྱོགས་བཅུའི་རྒྱལ་ཀུན་འདུས་པའི་སྐུ། །དཔལ་ལྡན་ཀརྨ་པ་ཡི་ངེས་དོན་གྱི། །རིང་ལུགས་ཆོས་ཀྱི་ཉི་མ་ཡོངས་འཆར་བ། །རྟག་པར་འཚོ་གཞེས་ཕྲིན་ལས་རྒྱས་གྱུར་ཅིག །སྙིང་པོའི་དོན་བརྒྱུད་བསྟན་གསལ་སྔོན་སྨོན་མཐུས། །འབྲས་བཟང་སྨིན་པའི་སྟོབས་ལས་གྲུབ་པ་ཡི། །འགྲོ་བའི་དཔལ་དང་དཔུང་གཉེན་གང་དག་རྣམས། །བར་ཆད་ཉེར་འཚེ་ལས་གྲོལ་འཚོ་བརྟན་ཤོག །སངས་རྒྱས་བསྟན་པ་དར་ཞིང་རྒྱས་པ་དང་། །དགེ་འདུན་རྣམས་ཀྱང་བསླབ་གསུམ་ཆོས་ལྡན་ཞིང་། །རྒྱལ་ཁམས་བདེ་ཞིང་མི་མཐུན་རྒུད་པ་ཞི། །བཀྲ་ཤིས་བདེ་ལེགས་ལྷུན་གྱིས་འགྲུབ་གྱུར་ཅིག །དྲུང་རམ་སྤྲུལ་སྐུ་གཉིས་ལ་ཡུན་འཚོ་ཁོ་པ་དམ་ཆོས་ངོར་སྤེལ། །རྡོ་རྗེའི་ཚེ་ལ་དབང་སྒྱུར་དཀྱིལ་འཁོར་ལྷ། །གཙོ་མཆོག་པདྨཱ་ཀ་རའི་མཁའ་ཀློང་ལ། །ཐུགས་རྗེའི་སྤྲིན་ཚོགས་འདུས་པའི་གྲུ་ཆར་གྱིས། །དེང་འདིར་འཆི་མེད་ཡོངས་གྲུབ་བྱིན་གྱིས་
རློབས། །མཉམ་མེད་དྭགས་པོ་བཀའ་བརྒྱུད་རིང་ལུགས་ཀྱི། །འཛིན་སྤེལ་སྐྱོང་བའི་ཕྲིན་ལས་ཤིང་རྟ་པ། །ཀརྨ་ཡེ་ཤེས་བསྟན་པའི་ཉི་མ་མཆོག །བསྟན་དང་འགྲོ་དོན་སྤེལ་ཕྱིར་འཚོ་གཞེས་གསོལ། །སྔོན་ཚེ་གཞན་ཕན་བྱང་ཆུབ་ཐུགས་བསྐྱེད་ནས། །སྤྱོད་པ་རྨད་བྱུང་རྗེས་སུ་དགོངས་པ་ཡིས། །སྙིགས་ལྔའི་གདུལ་བྱར་ལྷག་པར་བརྩེ་ཆེན་གྱིས། །ཞིང་འདིར་འཚོ་གཞེས་བཞེད་དོན་ལྷུན་གྲུབ་ཤོག །ཁྲ་ལེགས་པའི་ཞབས་གྲས་ཕན་བདེའི་ངོར་སྤེལ། །དཔལ་ལྡན་མཚོ་སྐྱེས་རྒྱལ་བའི་ཟབ་གཏེར་འཆང་། །རིག་པ་འཛིན་དབང་ལ་ལི་ཏ་བཛྲ། །གང་འདུལ་སྤྲུལ་པའི་རོལ་རྩེད་ཡང་འཆར་བ། །བསྟན་འགྲོའི་མགོན་དུ་ཞིང་འདིར་འཚོ་གཞེས་གསོལ། །རྣམ་དག་བསླབ་གསུམ་ཡར་ངོའི་ཟླ་ལྟར་འཕེལ། །མི་མཐུན་མཁའ་ཡི་གླང་པོས་མ་གོས་པར། །རྒྱལ་མཆོག་ཕྱག་ན་པད་འཆང་ཀརྨ་པའི། །རིང་ལུགས་ཀུནྡའི་དགའ་ཚལ་རྒྱས་བྱེད་ཤོག །བསླུ་མེད་རྩ་གསུམ་ཐུགས་རྗེའི་འོད་སྟོང་གིས། །བར་ཆད་ཉེས་ཚོགས་ཁྲི་མུན་རྒྱང་བསྲིངས་ནས། །ཕུན་ཚོགས་ལྔ་ལྡན་དཔལ་ལ་དབང་འབྱོར་བའི། །སྣང་བ་དམ་པས་རྟག་པར་སྐྱོང་གྱུར་ཅིག །ཅེས་གཏེར་སྤྲུལ་ཡུན་འཚོའི་ཆེད་དུ་བན་དབོན་ཀརྨ་མཐར་ཕྱིན་ངོར་སྤེལ་བ་དགེ། ཛ་ཡནྟུ། །།སངས་རྒྱས་པདྨ་སྐྱེས་མཆོག་རྡོ་རྗེ་འཆང་། །ངོ་མཚར་རྣམ་རོལ་རྒྱལ་ཀུན་ཕྲིན་ལས་ཀྱི། །གསང་བའི་
མཛོད་འཆང་གྲུབ་པ་ཨོ་རྒྱན་མཚན། །གང་གི་རང་བཞིན་བསམ་མི་ཁྱབ་པའི་འཕྲུལ། །རྣལ་འབྱོར་ཀརྨ་ཏིཥྛ་བསྟན་དང་འགྲོའི། །ཕན་བདེའི་སྣང་བ་སྤེལ་ཕྱིར་གསང་བ་གསུམ། །ཡེ་ཤེས་རྡོ་རྗེ་གཞོམ་བྲལ་རྟག་བརྟན་གྱི། །ངོ་བོ་ཉིད་དུ་ཡུན་རིང་འཚོ་གཞེས་ནས། །དམ་པའི་སྤྱོད་པས་མོས་ལྡན་སྨིན་ཅིང་གྲོལ། །ཐར་པའི་ལམ་བཟང་མཆོག་ལ་སྤྱོད་གྱུར་ཅིག །ཅེས་དབོན་པདྨ་མགོན་གྱི་གཡར་ངོར་སྤེལ། །ༀ་སྭ་སྟི། གདོད་ནས་འགྱུར་མེད་རང་བྱུང་ཡེ་ཤེས་རྩལ། །བདེ་ཆེན་ལྷུན་གྲུབ་ལོངས་སྤྱོད་ཡོངས་རྫོགས་པ། །སྒྱུ་འཕྲུལ་དྲ་བའི་རང་གཟུགས་སྣ་ཚོགས་ཀྱི། །ཕྲིན་ལས་གར་སྟོན་དཔལ་ལྡན་ཀརྨ་པ། །མཆོག་གི་རིང་ལུགས་ངེས་དོན་སྙིང་པོའི་བསྟན། །རྒྱལ་མཚན་སྲིད་རྩེར་བསྒྲེང་བའི་དཔལ་མངའ་བ། །བསམ་བཞིན་སྤྲུལ་པའི་ཟློས་གར་ཉི་ཟླ་ཟུང་། །གསང་གསུམ་རྡོ་རྗེའི་ཁམས་སུ་འཚོ་བརྟན་ཤོག །ཆོས་དབྱིངས་རྟག་པ་དོན་དམ་འཕོ་བྲལ་དང་། །གཞན་རྐྱེན་ཆུ་འཛིན་དྲི་མ་རྒྱང་བསྲིང་ནས། །བསྐལ་པར་འཚོ་བརྟན་བསྡུ་བཞི་ཆོས་བཅུ་ཡི། །སྣང་བས་ཀུན་གསལ་འཛམ་གླིང་རྒྱན་དུ་ཤོག །ཅེས་པའང་ཟུར་མང་གར་བསྟན་སྤྲུལ་པའི་སྐུ་ལྷན་རྒྱས་ཡུན་འཚོར་དབོན་བླ་མ་གཉིས་ནས་བསྐུལ་ངོར་སྤེལ། །འགྲོ་མགོན་པདྨཱ་ཀཱ་རའི་ཐུགས་རྗེའི་འོད། །ཉིན་བྱེད་ལྷ་དབང་རྡོ་རྗེ་རྩེ་བརྒྱ་པས། །མི་མཐུན་བདུད་བཞིའི་དཔུང་ཚོགས་གཞོམ་བཞིན་དུ། །སྒྲུབ་བརྒྱུད་བསྟན་
པ༵་འཛིན་སྐྱོང་མཐར་ཕྱིན་པའི། །རྣམ་བཞིའི་ཕྲི༵ན་ལ༵ས་ར༵བ་རྒྱ༵ས་ཡོངས་གྲུབ་ཅིང་། །དམ་པའི་རྣམ་ཐར་ཟབ་མོའི་རྒྱུན་བསྐྱང་ནས། །ལུས་ཅན་འགྲོ་བའི་ཕན་བདེའི་རྩ་ལག་ཏུ། །རྟག་པར་འཚོ་བརྟན་འགྲོ་དོན་ལྷུན་འགྲུབ་ཤོག །དེ་ལྟར་རབ་དཀར་ལྷག་བློ་པུཎྜཱ་རི། །ཇི་བཞིན་མཆོག་གསུམ་ཐུགས་རྗེ་བསྐུལ་བའི་མཐུས། །སྨོན་པ་ཡོངས་གྲུབ་དགེ་འདུན་སྡེ་རྒྱས་ཤིང་། །སངས་རྒྱས་བསྟན་པ་རྒྱས་པའི་དཔལ་གྱུར་ཅིག །ཅེས་བློ་མཆོག་ངོར་སྤེལ་བ་དགེ། །སྭསྟི། སྟོན་པ་བདེར་གཤེགས་སྟོབས་བཅུའི་མངའ་བདག་མཆོག །ལུང་རྟོགས་ཡོན་ཏན་འབྱུང་གནས་དམ་པའི་ཆོས། །རིག་དང་གྲོལ་བའི་སར་གནས་ཚོགས་མཆོག་སྡེ། །བླ་མེད་དམ་པའི་ཐུགས་རྗེས་སྐྱོང་རྒྱུར་ཅིག །ངེས་གསང་རིང་ལུགས་དྲི་མེད་འཛིན་པའི་བདག །གང་དེའི་གསང་གསུམ་གཞོམ་བྲལ་གཡོ་མེད་པ། །བསྐལ་བརྒྱར་འཚོ་བརྟན་ཕྲིན་ལས་སྣང་བ་ཡིས། །རྒྱ་མཚོའི་གོ་ཅན་ཁྱབ་པའི་བཀྲ་ཤིས་ཤོག །ཅེས་བྱ་བཏང་སྤྲུལ་སྐུར་སྡེ་བ་བསྟན་རྣམ་ངོར་སྨོན་ལམ་དུ་སྤེལ། །།ༀ་སྭ་སྟི། དུས་གསུམ་རྒྱལ་ཀུན་འདུས་པའི་ངོ་བོ་ཉིད། །སྐུ་གསུམ་བདག་ཉིད་མཚོ་སྐྱེས་པདྨ་འབྱུང་། །རྩ་གསུམ་ཞི་ཁྲོའི་སྐུར་སྟོན་ལྷ་ཚོགས་ལ། །སྒོ་གསུམ་རྩེ་གཅིག་གསོལ་བཏབ་བདེན་པ་ཡིས། །འཆི་མེད་རྡོ་རྗེ་དྭངས་མའི་སྐུ་བརྙེས་ཤིང་། །རྣམ་དག་བསླབ་གསུམ་ལྗོན་པའི་རྩ་བ་བརྟན། །ཐོས་བསམ་སྒྲུབ་དང་
སྒོམ་པའི་ལོ་འདབ་རྒྱས། །རིམ་གཉིས་མཆོག་གི་འབྲས་བཟང་མྱུར་སྨིན་ཤོག །འཕགས་ནོར་བདུན་དང་བསྡུ་བའི་དངོས་པོ་བཞི། །ཕར་ཕྱིན་དྲུག་ལྡན་རང་གཞན་དོན་མཐར་ཕྱིན། །ཞི་སོགས་རབ་འབྱམས་ཕྲིན་ལས་དབང་བསྒྱུར་ནས། །འགྲོ་ཁམས་རྒྱ་མཚོའི་དོན་ཆེན་ལྷུན་འགྲུབ་ཤོག །རྒྱལ་བསྟན་སྤྱི་དང་སྒྲུབ་བརྒྱུད་ངེས་དོན་གྱི། །རིང་ལུགས་རྒྱལ་མཚན་མི་ནུབ་སྲིད་རྩེར་བསྒྲེང་། །སྟོབས་དང་མི་འཇིགས་མ་འདྲེས་ཆོས་ལ་སོགས། །རྒྱུད་སྨིན་སྐུ་བཞིའི་གོ་འཕང་མངོན་གྱུར་ཤོག། སྐྱོ་བྲག་བསྟན་སྙིང་སྤྲུལ་སྐུ་ལ་ཡུན་འཚོའི་བཞེད་ལྟར་སྤེལ་བ་དགེ། །རྒྱལ་ཀུན་སྤྱི་གཟུགས་ཐོད་ཕྲེང་རྩལ། །རྒྱལ་བ་སྲས་བཅས་བྱིན་རླབས་ཀྱིས། །རྒྱལ་བསྟན་འཛིན་པའི་དབང་ཕྱུག་གང་། །རྒྱལ་མཆོག་ཚེ་འོད་མགོན་ཇི་ལྟར། །གང་ཞིག་བསྐལ་བརྒྱར་བརྟན་བཞུགས་འཚལ། །གང་དག་མི་མཐུན་ཉེར་ཞི་ཞིང་། །གང་གི་ཕྲིན་ལས་རྒྱ་མཚོའི་དཔལ། །གང་རྣམས་མི་ནུབ་རབ་རྒྱས་ཤོག། ཅེས་ཨུ་རྒྱན་ཚེ་དབང་གིས་བསྐུལ་ངོར་ཀརྨ་རྣམ་རྒྱལ་རྡོ་རྗེ་རབ་བརྟན་གྱི་བརྟན་བཞུགས་རྒྱུར་སི་ཏུས་བརྗོད་པ་དགེ། །།