རྟགས་གསལ་འགོད་ཚུལ་གྱི་རྣམ་བཞག་ཉུང་ངུ་།

༄༅། །རྟགས་གསལ་འགོད་ཚུལ་གྱི་རྣམ་བཞག་ཉུང་ངུ་བཞུགས་སོ། །ཐམས་ཅད་མཁྱེན་པ་ལ་ཕྱག་འཚལ་ལོ། །ཟབ་ཡངས་ཆོས་ཚུལ་ཟླ་བའི་མ་མ་ལས། །འོངས་པའི་ལེགས་བཤད་རིན་ཆེན་སུ་ཝཪྞའི། །ཆ་ཤས་ཙམ་ཞིག་འདི་རུ་སྦྱིན་བགྱི་ན། །གང་ལ་རྒྱན་དུ་རེ་རྣམས་དང་ལོངས་ཤིག །དེ་ཡང་འདིར་གང་ཞིག་བཤད་པར་བྱ་བ་ལ། ཐོག་མར་གཞུང་མཛད་པ་པོའི་དབང་དུ་བྱས་ཏེ། དམ་པའི་ཆོས་ཀྱི་འབྱུང་གནས་རྒྱ་གར་འཕགས་པའི་ཡུལ་དུ་མཁས་པ་དང་། གྲུབ་པའི་དབང་ཕྱུག་བསམ་གྱིས་མི་ཁྱབ་པ་ཞིག་བྱུང་བ་ཡིན་ནའང་། དེ་དག་གི་ནང་ནས་ཀྱང་མཁས་པའི་མཆོག་ཏུ་གྱུར་པ་ནི། འཛམ་གླིང་མཛེས་པར་བྱེད་པའི་རྒྱན་དྲུག་རྣམས་ཡིན་ཏེ། དེ་དག་གི་ངོས་འཛིན་ཀྱང་ཟུང་ཟད་མི་འདྲ་བ་ཙམ་གཞན་དག་འཆད་པར་བྱེད་མོད་དེ། འདིར་ནི་གཞུང་བཤད་བྱེད་པོ་རྣམ་གསུམ་དང་། དགོངས་འགྲེལ་མཛད་པོ་རྣམ་གསུམ་ཞེས་དྲུག་ཏུ་འཆད་པའི་ལུགས་ལྟར་བཤད་པར་བྱའོ། །དེ་ཡང་ཡིན་ཏེ། རིམ་པ་ལྟར་དབུ་མའི་གཞུང་མཛད་པ་པོ་དེ་སློབ་དཔོན་ཀླུ་སྒྲུབ། དེའི་དགོངས་པ་འགྲེལ་བ་པོ་སློབ་དཔོན་ཨརྱ་དཱེ་བ། རྣལ་འབྱོར་སྤྱོད་པའི་གཞུང་མཛད་པ་པོ་དེ་སློབ་དཔོན་ཐོགས་མེད། དེའི་དགོངས་པ་འགྲེལ་བ་པོ་སློབ་དཔོན་དབྱིན་གཉེན། ཚད་མའི་གཞུང་མཛད་པ་པོ་དེ་སློབ་དཔོན་ཕྱོགས་གླང་། དེའི་དགོངས་པ་འགྲེལ་བ་པོ་སློབ་དཔོན་ཆོས་ཀྱི་གྲགས་པ་རྣམས་ཡིན་པའི་ཕྱིར། འདི་དག་ལ་རྩོད་སྒྲུབ་གཞན་ཡང་ཡོད་དེ་རེ་ཞིག་དེ་ཙམ་མོ། །འདིར་དོན་བསྡུ་བ་ལ། སློབ་དཔོན་སྔ་མ་བཞི་བོས་ཐེག་ཆེན་གྱི་གྲུབ་མཐའ་གཉིས་པོ་གཙོ་བོར་བཀྲལ་བ་ཡིན་ཞིང་། ཕྱི་མ་གཉིས་པོས་ཐེག་དམན་གྱི་གྲུབ་མཐའི་བྱེ་བྲག་མདོ་སྡེ་བའི་གཞུང་ཉིད་དང་། དེ་ལས་ཀྱང་རིགས་པའི་རྗེས་འབྲང་གི་མདོ་སྡེ་བའི་གཞུང་ཉིད་གཙོ་བོར་བཀྲལ་བ་ཡིན་ཡང་། སློབ་དཔོན་དེ་དང་དེ་གྲུབ་མཐའ་དེ་དང་དེ་ཁོ་ན་འཛིན་པའི་ཁྱབ་པ་ནི་མེད་དོ། །དཔེར་ན་སློབ་དཔོན་ཀླུ་སྒྲུབ་ཀྱི་མཚན་ཉིད་གསུམ་ལ་འཇུག་པ་ལ་སོགས་རྣལ་འབྱོར་སྤྱོད་གཞུང་དང་འབྲེལ་བའི་བསྟན་བཅོས་དང་གཞན་ཡང་བཤེས་སྤྲིང་དང་དགེ་ཚུལ་གྱི་ཀ་རི་ཀ་ལྔ་བཅུ་པ་ལ་སོགས་ཐེག་དམན་དང་ཡང་ཐུན་མོང་དུ་གྱུར་པའི་བསྟན་བཅོས་སོགས་མང་དུ་མཛད་པའི་ཕྱིར་དང་། སློབ་དཔོན་ཐོགས་མེད་སྐུ་མཆེད་ཀྱིས་མངོན་པ་གོང་འོག་སོགས་ཐེག་དམན་དང་འབྲེལ་ཆེ་བའི་བསྟན་བཅོས་དང་། ཁྱད་པར་མངོན་པ་འོག་མར་གྲགས་པ་དབྱིག་གཉེན་གྱིས་མཛད་པའི་མངོན་པ་མཛོད་ནི་རྩ་བར་བྱེ་བྲག་སྨྲ་བའི་གཞུང་དང་། འགྲེལ་བར་མདོ་སྡེ་བའི་གཞུང་གཙོ་བོར་བསྟན་ནས་མཛད་པའི་ཕྱིར་དང་སློབ་དཔོན་ཕྱོགས་གླང་ཡབ་སྲས་ཐོགས་མེད་སྐུ་མཆེད་ཀྱི་རྒྱུད་འཛིན་ཁོ་ན་ཡིན་པའི་ཕྱིར་གྲུབ་མཐའ་འོག་མ་རང་འཛིན་པའི་ངེས་པ་མེད་མོད་དེ། འོན་ཀྱང་དགོས་པའི་དབང་གིས་གྲུབ་མཐའ་ཐེག་ཆེན་འཛིན་ལ་ལམ་ཐེག་དམན་དུ་ཞུགས་པའི་གང་ཟག་ཀྱང་ཡོད་པ་དང་། གྲུབ་མཐའ་ཐེག་དམན་འཛིན་ལ་ལམ་ཐེག་ཆེན་དུ་ཞུགས་པའི་གང་ཟག་ཀྱང་ཡོད་པའི་ཕྱིར། སློབ་དཔོན་འདི་རྣམས་ནི་དགོས་དབང་ཁོ་ནས་གྲུབ་མཐའ་དེ་དང་དེ་འབྱེད་པའི་བསྟན་བཅོས་གཙོ་བོར་མཛད་པ་ཙམ་ཉིད་ཀྱི་སྒོ་ནས་བཞག་པའང་རིག་པར་བྱའོ། །དེས་ན་འདིར་དབུ་མའི་གཞུང་ལུགས་དང་འབྲེལ་བའི་ཐལ་འགྱུར་འགོད་པ་དང་། ཚད་མ་མདོ་དང་རྒྱས་པའི་བསྟན་བཅོས་ཀྱི་རྗེས་སུ་འབྲང་ནས་རྟགས་གསལ་ཁྱབ་གསུམ་གྱི་རིགས་ལམ་འགོད་པ་སོགས་རྒྱས་པ་འཆད་རྒྱུ་སྐབས་སུ་མ་བབས་ཀྱང་། བརྗོད་བྱའི་གོ་བ་ཙམ་སྨྲོས་པ་ལ། སྤྱིར་བཏང་མདོ་སྡེ་བ་ཉིད་ཀྱི་བཞེད་པའི་སྙིང་བོར་དྲིལ་ན། རྣམ་འགྲེལ་ལས། དོན་བྱེད་ནུས་པ་གང་ཡིན་པ། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་བཤད། །ཅེས་པའི་དོན་འགྲེལ་བ་ལ། གྲུབ་མཐའ་འདིའི་ལུགས་ཀྱིས་སྣང་བ་དང་མཐུན་པར་དོན་བྱེད་ནུས་པ་དངོས་པོའི་མཚན་ཉིད། འདི་དང་དོན་དམ་བདེན་པ་དོན་གཅིག དངོས་པོར་གྲུབ་པ་དང་། དོན་དམ་པར་ཡོད་པའང་དོན་གཅིག་གོ །དེ་ལས་གཞན་ཏེ། དོན་བྱེད་མི་ནུས་ཀྱང་ཡོད་པ་དེ་ནི་ཀུན་རྫོབ་ཙམ་དུ་ཡོད་པ་སྟེ། དེའི་སྒྲ་བཤད་ལ། ཀུན་མང་ཚིག་དང་། རྫོབ་ཅེས་པ་ཡ་མ་བརླའམ་སྙིང་པོ་མེད་པའི་དོན་ཅན་ནོ། །འདིའི་ལུགས་ཀྱིས་གཞི་གྲུབ་ལ་ཡོད་པས་ཁྱབ་ཀྱང་། ཡོད་པ་ལ་དངོས་པོར་གྲུབ་པས་མ་ཁྱབ་སྟེ། དཔེར་ན། ཀུན་རྫོབ་བདེན་པ་ཆོས་ཅན། དངོས་པོར་གྲུབ་པར་ཐལ། ཡོད་པ་ཡིན་པའི་ཕྱིར་ཞེས་པ་ལ། འདོད་ཅེ་ན། དེ་ཆོས་ཅན། དངོས་པོར་མ་གྲུབ་པར་ཐལ། དངོས་པོ་དང་དོན་དམ་དོན་གཅིག་པར་གཞུང་ལས་བཤད་ཅིང་། དེ་ཉིད་ཀུན་རྫོབ་ལས་ཐ་དད་པ་ཡིན་པའི་ཕྱིར་རོ། །ཞེས་པ་ལྟ་བུའི་སྒོ་ནས་རྟོགས་པར་བྱའོ། །དེ་དག་གི་མཚན་ཉིད་གཏན་ལ་འབེབ་པར་བྱེད་པ་ནི་རང་སྤྱིའི་མཚན་ཉིད་ཀྱི་སྒོ་ནས་ཏེ། དེ་ཡང་མངོན་སུམ་གྱི་སྣང་ཡུལ་ཡིན་ན་རང་མཚན་ཡིན་པས་ཁྱབ། རང་མཚན་དང་། དོན་དམ་བདེན་པ་དང་། དངོས་པོ་དང་། འདུས་བྱས་དང་། མི་རྟག་པ་རྣམས་དོན་གཅིག་མིང་གི་རྣམ་གྲངས། རྟོག་པའི་སྣང་ཡུལ་ཡིན་ན་སྤྱི་མཚན་ཡིན་པས་ཁྱབ། སྤྱི་མཚན་དང་། དངོས་མེད་དང་། ཀུན་རྫོབ་བདེན་པ་དང་། འདུས་མ་བྱས་དང་། རྟག་པ་རྣམས་དོན་གཅིག་མིང་གི་རྣམ་གྲངས། འདི་བས། དོན་དམ་མི་རྟག་པར་འདོད་པ་དང་། ཀུན་རྫོབ་རྟག་པར་འདོད་པ་སོགས་ཁས་ལེན་ཚུལ་ཐེག་ཆེན་དང་གོ་ལྡོག་པ་ལྟ་བུར་ཡོད་ཀྱང་། རང་ལུགས་ཀྱི་དམིགས་དོན། དོན་དམ་བདེན་པའི་མཚན་གཞིར། བློ་རྫས་སྐད་ཅིག་ཆ་མེད་ལྟ་བུ་དང་། གཟུགས་རྫས་རྡུལ་ཕྲན་ཆ་མེད་ལྟ་བུ་བཞག་པའི་ཕྱིར་དང་། ཀུན་རྫོབ་བདེན་པའི་མཚན་གཞིར་སྐྱེས་བུ་དང་གང་ཟག་ཅེས་པ་ལྟ་བུ་བཞག་པར་མཛད་པའི་ཕྱིར་དོན་ལ་མི་འགལ་བར་འཆད་ཤེས་སོ། །དེས་ན་ལུགས་འདིའི་བདེན་གཉིས་ཀྱི་འཇོག་ཚུལ་ཐུན་མོང་མ་ཡིན་པ་དེ་ཤེས་པར་བྱས་ནས། ད་ནི་རྟགས་གསལ་ཁྱབ་གསུམ་གྱི་གོ་བ་ཅུང་ཟད་བཤད་པར་བྱ་སྟེ། དེ་ཡང་སྔ་རྒོལ་གྱི་དམ་བཅའ་འདོད་དང་། རྟགས་མ་གྲུབ་དང་། ཁྱབ་མ་ཁྱབ་དང་། ཐེ་ཚོམ་ལ་དྲིས་ཏེ་ལན་གདབ་པ་ཅིས་ཕྱིར་ཟེར་བ་རྣམས་དང་ཕྱི་རྒོལ་གྱི་རྟགས་གསལ་བཀོད་ནས་འདྲི་བ་རྣམས་ཤེས་པར་བྱ་བ་གཞིར་བཞག་ནས། དངོས་དོན་ཚད་མ་རང་ལ་སྤྱིར་བཏང་། རྒྱལ་བའི་བཀའ་ལུང་ཚད་མ་དང་། རང་གི་རིགས་པ་ཚད་མ་དང་། བླ་མའི་མན་ངག་ཚད་མ་དང་། དཔེ་ཉེར་སྦྱར་ཚད་མ་སྟེ་བཞི་ལས། བྱེ་བྲག་རིགས་པ་ཚད་མ་ལ་ནང་གསེས་གཞལ་བྱ་མངོན་གྱུར་དང་། ལྐོག་གྱུར་གྱི་ཁྱད་པར་ལ་ལྟོས་ནས། འཇལ་བྱེད་གཏན་ཚིགས་ཀྱང་། མངོན་སུམ་ཚད་མ་དང་། རྗེས་དཔག་ཚད་མ་གཉིས་སུ་ཡོད་དེ། དེ་སྐད་དུའང་རྣམ་འགྲེལ་ལས། གཞལ་བྱ་གཉིས་ཕྱིར་ཚད་མ་གཉིས། །ཞེས་གསུངས་པ་ཡིན་ནོ། །འདིར་མངོན་སུམ་ལ། མངོན་སུམ་དང་མངོན་སུམ་ཚད་མ། རྗེས་དཔག་ལ་རྗེས་དཔག་དང་། རྗེས་དཔག་ཚད་མ་སྟེ་སོ་སོར་ཚད་མ་དང་ཚད་མིན་གཉིས་གཉིས་སུ་ཡོད་དོ། །དེ་དག་སྤྱིར་ཤེས་པར་བྱས་ནས། བྱེ་བྲག་རྟགས་གསལ་འགོད་ལུགས་ལ། ཀ་བ་ཆོས་ཅན་ལྟ་བུ་རྩོད་གཞི་འགོད་པ་དང་། མི་རྟག་པ་ཡིན་པར་ཐལ་ལྟ་བུ་ཆོས་ཅན་དེའི་རང་བཞིན་གསལ་བར་བྱས་པ་ཡིན་པའི་ཕྱིར་གསལ་བ་དང་། འདུས་བྱས་ཡིན་པའི་ཕྱིར། ཞེས་པ་ལྟ་བུ་མི་རྟག་པ་ཡིན་པའི་རྟགས་ལ་འདུས་བྱས་ཡིན་པ་བསྟན་པའི་ཕྱིར་བསྒྲུབ་བྱ་དེ་དེ་ཡིན་པའི་རྟགས་སམ། བསྒྲུབ་བྱེད་དམ། གཏན་ཚིག་སྨྲོས་པ་སྟེ། དཔེར་ན། མེ་ཡོད་པར་ཐལ། དུ་བ་ཡོད་པའི་ཕྱིར། ཞེས་པ་ལ་མེ་ཡོད་པའི་རྟགས་སུ་དུ་བ་བཀོད་པ་ལྟ་བུའོ། །འདུས་བྱས་ཡིན་ན་མི་རྟག་པ་ཡིན་པས་ཁྱབ་པར་ཐལ་ཞེས་པ་ལྟ་བུ་ཁྱབ་པ་འགོད་སྟེ། འདིའི་ཁྱབ་པ་ནི་སྔོན་དུ་ཁས་བླངས་གྲུབ་བོ། །དེ་དག་ལས་དང་པོ་རྩོད་གཞི་འགོད་པ་ལ་མཚན་མཚོན་གཞི་གསུམ་དང་། མཚོན་ཆོས་དང་། སྒྲུབ་ཆོས་སོགས་ཀྱི་ཁྱད་པར་ཀྱང་ཤེས་དགོས་ལགས། རྟགས་གསལ་ཁྱབ་གསུམ་གྱི་རྣམ་དབྱེ་རྣམས་ཀྱང་རང་རང་གི་སྒྲ་བཤད་ཀྱི་སྟེང་ནས་ངེས་པ་རྙེད་དགོས་སོ། །འདིར་དཀོན་མཆོག་གསུམ་གྱི་སྒྲ་དོན་མདོ་ཙམ་བཤད་ན། ལེགས་སྦྱར་གྱི་སྐད་དུ་ན་མོ་རཏྞ་་་ཏྲ་ཡ་ཡ། ཞེས་པ་དེ་བོད་སྐད་དུ་བསྒྱུར་ན། ན་མོ་ཕྱག་འཚལ་ལོ། །གང་ལ་ན་རཏྞ་་་རིན་པོ་ཆེ། ཏྲ་ཡ་ཡ་གསུམ་ལ་སྟེ། དེ་ལྟར་ན་རིན་ཆེན་གསུམ་ལ་ཕྱག་འཚལ་ལོ། །ཞེས་འབྱུང་བ་འདི་དེ་ལྟར་མི་སྒྱུར་བར་དཀོན་མཆོག་གསུམ་ལ་ཕྱག་འཚལ་ལོ། །ཞེས་པར་བསྒྱུར་པ་འདི་ལ་དགོས་པ་ཅི་ཡོད་ཅེ་ན་ཡོད་དེ། སྤྱིར་རིན་ཐང་ཆེ་བ་ཙམ་ནི་གསེར་དང་དངུལ་ལ་སོགས་པ་དག་ཀྱང་ཡིན་མོད་དེ། དེ་དག་ལས་ཁྱད་པར་དུ་བྱས་ཏེ། འདིར་རིན་ཐང་ཆེ་བ་ཙམ་དུ་མ་ཟད་དཀོན་པ་ཐམས་ཅད་ཀྱི་མཆོག་ཡིན་ནོ། །ཞེས་སྟོན་པའི་ཆེད་དུ་ཡིན་པའི་ཕྱིར། དེ་ཡང་ཡིན་ཏེ། གསེར་དང་དངུལ་ལ་སོགས་པའི་རིན་ཆེན་དེ་དག་ལ་བརྟེན་ནས་ཚེ་འདིར་ཟས་ནོར་གྱི་དབུལ་བ་སེལ་ནུས་པ་ཙམ་ཡིན་ཡང་། དེ་ལ་བརྟེན་ནས་མཐར་ཐུག་མྱ་ངན་ལས་འདས་པའི་གོ་འཕང་མངོན་དུ་བྱེད་མི་ནུས་པ་གང་ཞིག འདིར་དཀོན་མཆོག་གསུམ་ལ་བརྟེན་ནས་དེ་མངོན་དུ་བྱེད་ནུས་པའི་ཕྱིར་རོ། །དེ་ལ་གསུམ། དང་པོ་སངས་རྒྱས་དཀོན་མཆོག་ཆོས་ཅན། ཁྱོད་ལ་སངས་རྒྱས་ཞེས་པའི་རྒྱུ་མཚན་ཡོད་པར་ཐལ། མ་རིག་པ་གཉིད་སྟུག་པོ་ལྟ་བུ་སངས་པའི་སྤང་བ་ཕུན་སུམ་ཚོགས་པ་དང་། ཤེས་བྱའི་ཆོས་ཐམས་ཅད་ལ་བློའི་པདྨོ་ཕྱོགས་མེད་དུ་རྒྱས་པའི་རྟོགས་པ་ཕུན་སུམ་ཚོགས་པ་སྟེ། དེ་ལྟ་བུའི་སྤང་རྟོགས་ཀྱི་ཡོན་ཏན་གཉིས་པོ་དེ་ཁྱོད་ལ་མངའ་བའི་ཕྱིར། དེ་ཡང་ཡིན་ཏེ། སློབ་དཔོན་ཟླ་བ་གྲགས་པས་མཛད་པའི་སྐྱབས་འགྲོ་བདུན་བཅུ་བ་ལས། མ་རིག་གཉིད་ནི་རྒྱུན་བཅད་ཅིང་། །ཡང་དག་ཡེ་ཤེས་ངེས་འབྱུང་བས། །གང་ཞིག་རྣམ་སད་དེ་སངས་རྒྱས། །སྐྱེས་བུ་གཉིད་སངས་ཇི་བཞིན་ནོ། །ཞེས་དང་། དུས་གསུམ་ལམ་ལས་ངེས་གྲོལ་ཞིང་། །ཤེས་བྱ་ལ་ནི་བློ་རྣམས་རྒྱས། །རྨོངས་པའི་ཟུམ་པ་བཅོམ་པས་ན། །སངས་རྒྱས་པདྨ་ལྟར་རྣམ་རྒྱས། ཞེས་གསུངས་པའི་ཕྱིར། གཉིས་པ་ཆོས་དཀོན་མཆོག་དེ་ཆོས་ཅན། ཁྱོད་ལ་དམ་པའི་ཆོས་ཞེས་བརྗོད་པའི་རྒྱུ་མཚན་ཡོད་པར་ཐལ། སྤྱིར་བཏང་དྷརྨ་ཞེས་པའི་སྒྲ་ཤེས་བྱ་དང་ལམ་ལ་སོགས་པའི་དོན་བཅུར་འཇུག་ཀྱང་། དམིགས་གསལ་དམ་པའི་ཆོས་ཀྱི་དབང་དུ་བྱས་ཏེ། ཟད་པ་དང་ཆགས་པ་དང་བྲལ་བ་དང་། མྱ་ངན་ལས་འདས་པ་དང་། འགོག་པ་དང་། སྟོང་བ་ཉིད་དང་། ཞི་བ་དང་། དེ་བཞིན་ཉིད་དེ། དེ་ལྟ་བུའི་ཆོས་སམ། རང་གི་མཚན་ཉིད་འཛིན་པས་ན་དམ་པའི་ཆོས་ཞེས་བརྗོད་པའི་ཕྱིར། དེ་ཡང་ཡིན་ཏེ། དཔལ་ལྡན་ཟླ་བས། ཟད་དང་ཆགས་བྲལ་མྱ་ངན་འདས། །འགོག་དང་སྟོང་བ་ཉིད་ཞི་བ། །དེ་གཞིན་ཉིད་ཀྱང་ཆོས་རྣམས་ཀྱི། །རང་གི་ངོ་བོ་དེ་ཉིད་བཤད། །ཅེས་གསུངས་པའི་ཕྱིར། གསུམ་པ་དགེ་འདུན་དཀོན་མཆོག་ཆོས་ཅན། ཁྱོད་ལ་འཕགས་པའི་དགེ་འདུན་ཞེས་པའི་རྒྱུ་མཚན་ཡོད་པར་ཐལ། སཾགྷ་ཞེས་པའི་སྒྲ་མཆོག་ཏུ་གྱུར་པ་དང་མི་ཕྱེད་པའི་དོན་ལ་འཇུག་པས་ན་འདིར་ཡང་འཕགས་པའི་བདེན་པ་བཞི་རྟོགས་ནས་དད་པས་འདུན་པ་དང་མི་ཕྱེད་པའི་སྐྱེས་བུ་ཟུང་བཞི་ཡ་བརྒྱད་པོ་ཉིད་དམ། སངས་རྒྱས་དང་ཆོས་དག་ལ་འདུན་པ་མི་ཕྱེད་པ་ཉིད་ཀྱི་ཕྱིར་ཡང་འཕགས་པའི་དགེ་འདུན་ཞེས་བརྗོད་པའི་ཕྱིར། དེ་ཡང་ཡིན་ཏེ། གཞུང་སྔ་མ་ལས། འཕགས་པའི་བདེན་པ་རྣམ་པ་བཞི། །རྟོགས་ཏེ་ཤེས་ནས་དད་གྱུར་པས། །སྐྱེས་བུ་གང་ཟག་ཟུང་བརྒྱད་པོ། །མི་ཕྱེད་དགེ་འདུན་ཞེས་བཤད་དོ། །ཞེས་དང་། སངས་རྒྱས་ཆོས་དང་དགེ་འདུན་ནི། །བདུད་རྣམས་བྱེ་བ་བརྒྱ་ཡིས་ཀྱང་། །གང་ཕྱིར་དབྱེ་བར་མི་ནུས་པ། །དེ་ཕྱིར་དགེ་འདུན་ཞེས་བཤད་དོ། །ཞེས་གསུངས་པའི་ཕྱིར། འདི་དག་ལ་རང་རང་གི་མཚན་ཉིད་བཤད་པ་རྣམས་དང་ནི་ལྡན་པས་ཁྱབ་ལ། རིམ་པ་བཞིན་མ་ཁྱབ་པ་ནི་སངས་རྒྱས་ཡིན་ན་རྫོགས་པའི་སངས་རྒྱས་ཡིན་པས་མ་ཁྱབ་སྟེ། རང་སངས་རྒྱས་སོགས་བཞག་ཏུ་ཡོད་པའི་ཕྱིར་དང་། ཆོས་ཡིན་ན་དམ་པའི་ཆོས་ཡིན་པས་མ་ཁྱབ་སྟེ། འཁོར་བའི་ཆོས་ལ་སོགས་པའི་བཞག་ཏུ་ཡོད་པའི་ཕྱིར་དང་། དགེ་འདུན་ཡིན་ན་འཕགས་པའི་དགེ་འདུན་ཡིན་པས་མ་ཁྱབ་སྟེ། སོ་སྐྱེས་དགེ་འདུན་བཞག་ཏུ་ཡོད་པའི་ཕྱིར་དང་། གཞན་ཡང་དཀོན་མཆོག་གསུམ་སོ་སོའི་དབྱེ་བ་ལ་སོགས་པ་ནི་འདིར་འབྲིར་མ་ལྡང་བའི་ཕྱིར་བཏང་སྙོམས་སུ་བཞག་གོ །དེ་ལྟར་ན་དྲིས་པའི་དོན་རྣམས་མདོ་ཙམ་ཐལ་དེ་རེ་ཞིག་དེ་ཙམ་མོ། །འདིར་སླར་ཡང་སྨྲས་པ། དམ་པའི་ཆོས་ཚུལ་ཉི་མ་ཕལ་ཆེར་ནུབ། །བླུན་ཚིག་རྒྱུ་སྐར་ཕྲེང་བ་དེང་ཤར་ན། །འདི་འདྲའི་ཚིག་ཚོགས་སྣང་བར་རེ་བ་ནི། །རང་ཉིད་བསམ་པ་དགེ་བ་ཙམ་ལས་ཅི། །འོན་ཀྱང་བསྐུལ་ངག་དབྱར་གྱི་རྔ་གསང་ལ། །གཅིག་ཏུ་ཆགས་པའི་བློ་གྲོས་མདོངས་མཐའ་ཅན། དེང་འདིར་ཟློས་གར་བསྒྱུར་པའི་རྣམ་འགྱུར་གཟུགས། །ཆེད་དུ་མ་བཀག་ཅི་དགར་གློད་པའང་ཡིན། །འདིར་བཤད་དགེ་བ་ནམ་མཁའི་གླང་བོ་ལས། །བྱུང་བའི་ཕན་བདེའི་སྦྲང་ཆར་བསིལ་ལྡན་དེས། །འགྲོ་བ་ཉོན་མོངས་ཚད་པས་གདུང་རྣམས་ཀུན། །རྟག་ཏུ་བདེ་བའི་གོ་སར་དབུགས་འབྱིན་ཤོག །ཅེས་རྟགས་གསལ་འགོད་ཚུལ་གྱི་རྣམ་གཞག་ཉུང་ངུ་འདི་ནི་མངའ་རིས་གློ་བོ་ཆོས་སྡེའི་གྲྭ་བཙུན་བྱམས་པ་བསྟན་འཛིན་ནས་ཇི་ལྟར་དྲིས་པའི་ལན་དུ་རྒྱལ་སྲས་གཞན་ཕན་མཐའ་ཡས་པས་སེམས་ལ་གང་དྲན་ཤར་མར་སྤེལ་བའོ།། །།