སྔགས་རྒོད་ལོག་ཏྲི་པཱ་ལའི་བསྙེན་སྒྲུབ་ཇི་ལྟར་བྱ་བའི་མན་ངག་གི་ཡི་གེ་གནམ་ལྕགས་ཞུན་མའི་མཚོན་འཁོར།
༄༅། །སྔགས་རྒོད་ལོག་ཏྲི་པཱ་ལའི་བསྙེན་སྒྲུབ་ཇི་ལྟར་བྱ་བའི་མན་ངག་གི་ཡི་གེ་གནམ་ལྕགས་ཞུན་མའི་མཚོན་འཁོར་ཞེས་བྱ་བ་བཞུགས་སོ། །རྒྱལ་ཀུན་མཐུ་སྟོབས་འབར་བའི་ཕུང་བོ་ཀུན། །གཅིག་བསྡུས་དྲག་སྔགས་དུས་མཐའི་མེ་ཆེན་གྱིས། །སྲིད་གསུམ་འབྱུང་པོའི་གྲོང་ཁྱེར་ཅིག་ཅར་དུ། །སྲེག་མཛད་དཔལ་ཆེན་གསང་བདག་བླ་མས་སྐྱོངས། །གང་ཞིག་གྲུབ་མཆོག་གཉེར་ལ་མ་རུང་པར། །བགྱིད་བརྩོན་ལྷ་སྲིན་དྲེགས་པའི་སྲོག་འཕྲོག་ཕྱིར། །རྡོ་རྗེ་འཛིན་དངོས་དྲང་སྲོང་དྲི་མེད་ཀྱི། །བསྙེན་སྒྲུབ་གནད་ཀྱི་ལག་ལེན་མདོ་ཙམ་འབྲི། །དེ་ཡང་འདིར་སྐྱེས་བུ་གང་ཞིག་སྲིད་པའི་ངང་ཚུལ་ལ་སྐྱོ་བ་དང་། དེ་ལས་ཐར་འདོད་ཀྱི་ངེས་འབྱུང་རྣམ་པར་དག་པས་ཀུན་ནས་བསླངས་ཏེ། ཐར་བ་དང་རྣམ་མཁྱེན་མཆོག་གི་གོ་འཕང་གང་ཞིག་དོན་དུ་གཉེར་བ་ལ། དེའི་མི་མཐུན་པའི་ཕྱོགས་སུ་གྱུར་པ་ནི་འཇིག་རྟེན་ཚེ་འདིའི་འདོད་ཡོན་ལ་མངོན་པར་ཞེན་ནས་ཡང་དག་པའི་ལམ་ལས་ཕྱིར་བཟློག་པར་བགྱིད་པ་ལྷའི་བུའི་བདུད་དང་། རང་རྒྱུད་ལས་སུ་མ་རུང་པའི་ཕྱི་བཞིན་དུ་འབྲང་ནས་ངན་སོང་གི་ས་བོན་བསྐྱེད་པ་ཉོན་མོངས་པའི་བདུད་དང་། ཕུང་བོ་ལྔ་ལ་མངོན་པར་ཞེན་པའི་བདེན་འཛིན་གྱི་དབང་གིས། དེ་ཉིད་ལ་བླང་དོར་བགྱིད་པའི་ཉེ་བར་ལེན་པས་ལས་ཕྱི་མའི་མུ་མཐུད་པར་བྱེད་པ་ཕུང་བོའི་བདུད་དང་། བྱང་ཆུབ་སྒྲུབ་པའི་རྟེན་དལ་འབྱོར་གྱི་ལུས་ཉིད་རིང་དུ་གནས་པའི་ཚེ་སྲོག་ལ་བར་དུ་གཅོད་པར་བགྱིད་པ་འཆི་བདག་གི་བདུད་དེ། དེ་ལྟར་བདུད་བཞི་བོ་ཉིད་ཡིན་པའི་ཕྱིར། དེ་དག་རང་རང་གི་གཉེན་པོ་གང་ཡིན་པ་དེ་ཆེད་དུ་བསྟེན་དགོས་པའོ། །དེ་ལ་ལྷའི་བུའི་བདུད་ཀྱི་གཉེན་པོ་ནི་འཇིག་རྟེན་གྱི་ཕུན་སུམ་ཚོགས་པའི་ལོངས་སྤྱོད་ལ་མངོན་པར་ཞེན་པའི་བློ་གཏིང་ནས་ལོག་པ་ཞིག་བྱུང་ན་དེས་འཐུས་ཏེ། གང་ཞིག་ལྷའི་བུའི་བདུད་ཀྱི་བྱེད་ལས་སུ་འཇིག་རྟེན་གྱི་སྙན་གྲགས་དོན་དུ་གཉེར་པ་ལ་སོགས་པའི་ཆོས་བརྒྱད་པོ་རྣམས་ཀྱང་ཚེ་འདི་ལ་མངོན་པར་ཞེན་པ་མ་ལོག་པར་དེ་ཉིད་སྒྲུབ་པའི་ཆེད་འབའ་ཞིག་ཡིན་པའི་ཕྱིར་རོ། །ཉོན་མོངས་པའི་བདུད་ནི་སྤངས་གཉེན་ལམ་དུ་འཁྱེར་བ་གང་རུང་གི་སྒོ་ནས་བཟློག་པར་བྱའོ། །ཕུང་བོའི་བདུད་ནི། ཕུང་ལྔ་རང་རང་གི་དེ་ཁོ་ན་ཉིད་གཏན་ལ་འབེབས་པའི་བདག་མེད་ཀྱི་ལྟ་བས་བཟློག་པར་བྱའོ། །འཆི་བདག་གི་བདུད་ནི་ལམ་ཟབ་མོ་ཉེ་བར་བསྒྲུབ་པའི་བརྩོན་འགྲུས་དང་ལྡན་པས་ནི་ཟག་མེད་རིག་འཛིན་གྱི་གོ་འཕང་མངོན་དུ་བྱེད་པའི་སྒོ་ནས་དང་། གཞན་དག་གིས་ཀྱང་ཚེ་སྒྲུབ་པའི་ཆོ་ག་ཟབ་མོ་ལ་སོགས་པའི་སྒོ་ནས་བཟློག་པར་བྱའོ། །དེ་ལྟར་བདུད་བཞི་ག་ཡོངས་སུ་བཅོམ་པར་གྱུར་པ་གང་གི་ཚེ་ན་ནི། མཐའ་ཐུག་གི་འབྲས་བུ་བླ་ན་མེད་པའང་དེ་ལས་གཞན་དུ་མེད་དེ། རྒྱུ་མཚན་འདི་ཉིད་ཀྱིས་ནི་གང་ཞིག་བཤད་པར་བྱ་བའི་ལམ་ཉམས་སུ་བླང་བའི་དགོས་པ་འབྲས་བུ་དང་བཅས་པའི་ཚུལ་མདོ་ཙམ་སྨྲོས་པའོ། །ཅི་དེ་ལྟར་ན་གཞུང་འདི་ལ་བདུད་བཞི་ཆར་འཇོམས་པའི་གདམས་པ་ཚང་ངམ་ཞེ་ན། ཚང་སྟེ་འདིར་གང་ཞིག་བསྒྲུབ་པར་བྱ་བའི་ལྷ་ནི་མ་ལུས་པའི་བདེ་བར་གཤེགས་པ་རྣམས་ཀྱི་ཐུགས་རྣམ་པར་མི་རྟོག་པའི་ཡེ་ཤེས་ཉིད་དཔལ་ཆེན་པོ་གསང་འཛིན་རྡོ་རྗེ་གཏུམ་པོའི་རྣམ་པར་ཤར་བ་ཉིད་ཡིན་ཞིང་། འདིས་བདུད་བཞི་བཅོམ་པ་ནི། བཅོམ་ལྡན་འདས་ཀྱིས་རྒྱུད་དུ་གསུངས་པ། བདུད་བཞི་ལ་སོགས་རིག་པའི་གདེངས་ཀྱིས་བཅོམ། །སྐུ་ལྔ་ལ་སོགས་ཡོན་ཏན་བརྗོད་ལས་འདས། །རང་གི་ངོ་བོ་འདི་ཞེས་བསྟན་དུ་མེད། །ཅེས་པ་ལྟར་ཏེ། དེ་བས་ན་གང་གིས་སྒྲུབ་པར་བྱེད་པའི་གང་ཟག་དེས་རང་གི་རྒྱུད་དང་འབྲེལ་བའི་བདུད་བཞི་བོ་དེའི་གཉེན་པོར་དཔལ་ཆེན་རྡོ་རྗེ་འཛིན་པའི་གསང་བ་གསུམ་གྱི་ཕྱག་རྒྱ་ཉིད་མངོན་དུ་སྒྲུབ་པ་སྟེ། དེ་ནི་སྒོ་གསུམ་དང་མཚུངས་པར་ལྡན་པའི་བདུད་དེ་དང་དེ་འཇོམས་པའི་ཐབས་བླ་ན་མེད་པ་ཉིད་ཡིན་པའི་ཕྱིར། གང་གི་སྒོ་གསུམ་དང་མཚུངས་པར་ལྡན་པ་མ་ཡིན་པའི་བདུད་བཞི་ཡང་རང་གི་སྒོར་དམིགས་སུ་མེད་པའི་ཕྱིར་རོ། །རྒྱུ་མཚན་འདི་ཉིད་ཀྱིས་ན་གསང་བདག་ཞི་ཁྲོའི་ལྟར་སྣང་ཡེ་ཤེས་ཀྱི་ཕྱག་རྒྱའི་ཏིང་འཛིན་ལས་གཡོ་མེད་དུ་གནས་པའི་འུབས་སུ་འཇིག་རྟེན་གྱི་ཆོས་བརྒྱད་པོ་རོ་སྙོམས་པར་བགྱིད་པའི་སྒོ་ནས་ལྷའི་བུའི་བདུད་བཅོམ་པ་དང་། མཉམ་པ་ཉིད་ལ་གནས་པ་དེ་ཉིད་ཀྱིས་ནི་ཆགས་སྡང་རྨོངས་གསུམ་ལ་ཞེན་པའི་གྲ་ཟུར་ན་སྨད་པའི་སྒོ་ནས་ཉོན་མོངས་པའི་བདུད་བཅོམ། དུག་གསུམ་གྱི་ས་བོན་མི་གནས་པ་གང་ལ་ནི། དེས་བསྐྱེད་པའི་ཕུང་བོ་ལ་ཞེན་པའི་འབྲས་བུའང་མི་རུང་སྟེ། དེ་ཡིས་ན་ཕུང་བོའི་བདུད་བཅོམ་པ་དང་། ཕུང་བོའི་ས་བོན་སྐྱེ་བ་དང་བཅས་པ་འགགས་པ་ན། དེ་ལ་འཆི་བ་མེད་པ་ཡང་ཞར་གྱིས་འགྲུབ་པའི་ཕྱིར་འཆི་བདག་གི་བདུད་བཅོམ་པ་སྟེ། གནད་འགག་འདི་ནི་གཞུང་འདིའི་ཆིངས་ཉིད་དུ་རིག་པར་བྱའོ། །ད་ནི་ཏིང་ངེ་འཛིན་དེ་ཇི་ལྟར་སྒོམ་པའི་ཆོ་གའི་གོ་རིམ་དགོད་པར་བྱ་སྟེ། དེ་ལ་ཡང་གཞུང་སྤྱིར་གྲགས་པ་ལྟར་ན་བསྙེན་སྒྲུབ་ཡན་ལག་བཞིས་ཁོག་འབུབ་པར་གསུངས་ཏེ། སྒྱུ་འཕྲུལ་དྲྭ་བ་ལས། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཞེས་སོགས་གསུངས་པ་ལྟར་ཏེ་དེའི་དོན་ཡང་བསྙེན་པ་ཞེས་བྱ་བ་ནི་བཀུར་ཞིང་མཆོད་པའི་དོན་ཏེ། དེ་ཡང་འཇིག་རྟེན་ན་རྒྱལ་པོ་ལ་སོགས་པ་ཞིག་ལ་འདོད་པའི་དོན་དུ་གྱུར་པ་གང་རུང་བཅོལ་བ་ཞིག་ནའང་། ཐོག་མར་རེ་བའི་ཡུལ་དེར་བརྔན་པ་ལ་སོགས་པས་བསྙེན་ཏེ་མགུ་བར་བགྱིད་དགོས་པ་དང་། དེ་ནས་ཕན་ཚུན་ནང་གཤིམ་པར་བགྱིད་པའི་གཏམ་ལ་སོགས་པས་མདུན་བསུས་ཏེ་སྙིང་ཉེ་བར་བགྱིད་པ་དང་། དེ་ལྟར་གྱུར་ནས་གདོད་རང་གི་ལས་གང་ཡིན་པ་བསྒྲུབ་ཏུ་བཅོལ་བ་དང་། དེའི་ཚེ་ན་ཕ་རོལ་པོ་དེས་ཀྱང་གང་ཞིག་དམིགས་པའི་དོན་དེ་སྒྲུབ་པ་ལ་བརྩོན་པ་ཆེན་པོ་བསྐྱེད་ནས་བདག་གི་རེ་བའི་འབྲས་བུ་ཡོངས་སུ་རྫོགས་པར་བགྱིད་པ་བཞིན་དུ། འདིར་ཡང་གོ་རིམ་བཞིན་གང་ཟག་ལས་དང་པོ་བ་ཞིག་ཐོག་མར་ཚོགས་ལམ་གྱི་སྣ་ཟིན་པ་ནས་མཐར་ཐུག་སངས་རྒྱས་པའི་གོ་འཕང་མ་ཐོབ་ཀྱི་བར་ལ་བསྙེན་སྒྲུབ་ཡན་ལག་བཞི་སྦྱར་ནས་བཤད་པ་དང་། ཞག་གྲངས་ཅི་རིགས་འབྲེལ་བའི་ཚོགས་ཀྱི་སྒྲུབ་པ་ཞིག་གི་ཐོག་མཐའ་བར་གསུམ་གྱི་དོན་དང་བསྙེན་སྒྲུབ་བཞི་སྦྱར་ནས་བཤད་པ་དང་། ཆོ་ག་གཅིག་གི་དཀྱུས་དང་སྦྱར་བ་སོགས་ལུགས་སྣ་ཚོགས་ཡོད་ཀྱང་། འདིར་ཕྱི་མ་ལྟར་བཤད་ན། སྦྱོར་བ་སྐྱབས་སུ་འགྲོ་བ་དང་། སེམས་བསྐྱེད་པ་ཡན་ལག་བདུན་པ་ལ་སོགས་པའི་སྒོ་ནས་ཚོགས་བསགས་ཀྱི་རིམ་པ་ཇི་སྙེད་པ་ལ་འཇུག་པ་ནི་ལྷ་ལ་བསྙེན་པ་དང་། དངོས་གཞི་རང་དང་ལྷ་དབྱེར་མི་ཕྱེད་པར་སྒོམ་པ་ནི་སྒྲུབ་བྱེད་དང་བསྒྲུབ་བྱའི་ལྷ་ཉེ་བར་བསྙེན་པ་དང་། དེ་ལྟ་བུའི་ལྷ་དེའི་ཐུགས་ཀར་ས་བོན་སྔགས་ཕྲེང་དང་བཅས་པ་གསལ་བ་ལ་དམིགས་པ་རྩེ་གཅིག་ཏུ་གཏད་པ་ནི་མཆོག་དང་ཐུན་མོང་གི་དངོས་གྲུབ་མ་ལུས་པའི་རྒྱུ་ཕུན་སུམ་ཚོགས་པ་སྒྲུབ་པ་དང་སྔགས་ཕྲེང་ལས་འོད་ཟེར་སྤྲོ་བ་དང་བསྡུ་བའི་སྦྱོར་བས་ཞི་རྒྱས་དབང་དྲག་གི་ལས་རབ་འབྱམས་སྒྲུབ་པ་ནི་རྒྱལ་བའི་མཛད་པ་ཆེན་པོ་མངོན་དུ་བྱེད་པ་སྟེ། དེ་ལྟ་བུའི་སྒོ་ནས་ཆོ་གའི་འགྲོས་ཤེས་དགོས་པར་འདོད་དོ། །འདི་ནི་ཇི་ལྟར་གྲགས་པའི་གཞུང་སྤྱིའི་རྣམ་བཞག་ཉིད་དུ་སྨྲོས་པའི་ཕྱིར་ཆོ་ག་འདིར་ཡང་ཤེས་པར་བྱ་བ་ཁོ་ནའོ། །ད་ནི་གཞུང་འདི་ཉིད་ཀྱི་བྱེ་བྲག་གི་དོན་ལ་འཇུག་པར་བྱ་སྟེ། དེ་ཡང་ས་བཅད་ཀྱི་དབང་དུ་ན། ཞི་བར་བསྙེན་པ་དང་། ཁྲོ་བོར་སྒྲུབ་པ་དང་། ལས་ལ་སྦྱར་བ་སྟེ་གསུམ་གྱིས་དོན་བསྡུས་སོ། །ལག་ལེན་ཞིབ་བརྗོད་ཀྱི་དབང་དུ་ན་འཆད་པར་འགྱུར་བ་ལས་རིམ་པ་བཞིན་དུ་ཤེས་པར་བྱ་བ་ཉིད་དོ། །དེ་ཇི་ལྟར་ན་དང་པོ་ཞི་བར་བསྙེན་པ་ལའང་། སྦྱོར་དངོས་རྗེས་གསུམ་ལས། ཐོག་མར་སྦྱོར་བ་སྔོན་དུ་འགྲོ་བའི་རིམ་པ་ནི་ནགས་ཚལ་ལྗོན་པས་ཀུན་ཏུ་བརྒྱན་པ་ལ་སོགས་པའི་གནས་ཡིད་དུ་འོངས་པ། དྲང་སྲོང་རིག་འཛིན་དུ་མས་བྱིན་གྱིས་བརླབས་པར་མཛད་པའམ། མིན་ཀྱང་འདུ་འཛིན་དང་། རྣམ་པར་གཡེང་བས་དབེན་པའི་གནས་སུ། གནས་ཁང་བྱི་དོར་ལེགས་པར་བགྱིས་ཏེ་འཇམ་པའི་སྟེགས་ཁེབ་དང་ལྡན་པ་ལ་འབྲུ་ཚོམ་གྱི་ཁར་དྲང་སྲོང་ཞི་བའི་སྐུ་གཟུགས་ཀྱི་གཙོས་སྐུ་གསུང་ཐུགས་རྟེན་ལེགས་པར་བཀྲམས་ནས། དེའི་མདུན་དུ་ཆུ་གཉིས་སྔོན་དུ་འགྲོ་བའི་མཆོད་པ་རྣམ་བདུན་དང་། དཀར་གསུམ་མངར་གསུམ་གྱི་རྒྱུ་ལས་གྲུབ་པའི་འབུལ་གཏོར་ཤིང་ཏོག་སྣ་ཚོགས་ཀྱིས་བརྒྱན་པ་བཅས་ལེགས་པར་བཤམས། དེ་ནས་རང་ཉིད་ཀུ་ཤ་ལ་སོགས་པའི་གདན་བདེ་བ་ལ་ལུས་གནད་སྐྱིལ་ཀྲུང་དང་བཅས་བག་ཕེབས་པར་གནས་བཞིན་བསམ་པར་བྱ་བ་ནི། ངན་སོང་གསུམ་སོགས་མཐའ་ཡས་པའི་སེམས་ཅན་ཐམས་ཅད་ཀྱི་སྡུག་བསྔལ་སྣ་ཚོགས་པ་ལ་ལེགས་པར་བསམ་སྟེ། ཀྱེ་མ་འདི་ལྟ་བུའི་སྡུག་བསྔལ་གྱི་མནར་བཞིན་པའི་འཁོར་བའི་གྲོང་ཁྱེར་འདིར་བདག་ཅག་རྣམས་ཐོག་མ་མེད་པའི་དུས་རིང་མོ་ཞིག་ནས་འཁྱམས་འཁྱམས་པ་ལ་ད་དུང་ཡང་སྐྱོ་བའི་སེམས་ཙམ་ཡང་མི་བསྐྱེད་པ་འདི་རེ་བླུན། དེ་བས་ན་བདག་གིས་ལུས་རྟེན་འདི་ཉིད་དུ་རྫོགས་པའི་བྱང་ཆུབ་མངོན་དུ་ཐོབ་པ་ཞིག་ཅི་ནས་ཀྱང་བྱའོ། །དེ་ལྟ་ནའང་སེམས་ཅན་འདི་དག་ལ་ཕ་མར་མ་གྱུར་པ་གཅིག་ཀྱང་མེད་པ་ནི་རྒྱལ་བ་རྣམས་ཀྱིས་ཡང་ཡང་གསུངས་པ་བཞིན། འཁོར་བ་ལ་ཐོག་མ་མེད་པའི་རྒྱུས་མངོན་སུམ་དུ་གྲུབ། དེས་ན་དེ་དག་རྣམས་ཀྱང་སྲིད་པའི་དུཿཁར་འཕྱན་བཞིན་འདོར་བ་ག་ལ་རིགས་ཏེ་བདག་ལ་འདི་དག་སྲིད་མཚོ་ལས་སྒྲོལ་པའི་མཐུ་ཆེར་མ་མཆིས་ན། ད་ནི་བདག་གིས་སྐྱབས་གནས་ཀུན་འདུས་ཀྱི་ངོ་བོ་བླ་མ་དང་དབྱེར་མ་མཆིས་པ་ལྷག་པའི་ལྷ་མ་ཧཱ་རི་ཥིའི་གསང་བ་གསུམ་གྱི་དེ་ཉིད་མངོན་དུ་བསྒྲུབས་ཏེ་ཞི་རྒྱས་དབང་དྲག་གི་ལས་རབ་འབྱམས་གྱི་སྒོ་ནས་འགྲོ་བ་རྣམས་ཇི་ལྟར་མཚམས་པར་འདུལ་བར་བགྱིའོ་སྙམ་དུ་བློ་བཅོས་པ་སོགས་སྔོན་དུ་འགྲོ་བས། བླ་མ་དང་ལྷག་པའི་ལྷ་ལ་བཅོས་མིན་གྱི་མོས་གུས་དྲག་པོ་དང་བཅས་པའི་ངང་ནས་གསོལ་བ་སྙན་ཁུང་དུ་ཐེབས་པར་འདེབས་པ་དང་། སྐྱབས་འོག་དམ་པ་གང་གི་གནས་སུ་མཆི་བ་དང་། འགྲོ་དོན་ལ་དམིགས་པའི་སེམས་རྒྱ་ཆེན་པོ་བསྐྱེད་པ་དང་། ཚོགས་བསགས་པའི་སྦྱོར་བ་ཡན་ལག་བདུན་པ་ལ་བརྩོན་པ་རྣམས་མཚམས་སྒྲུབ་ཡུན་རིང་དུ་བྱེད་རྒྱུ་ཡིན་ན་ཞག་ཁ་ཡར་ལ་བསགས་པར་བྱ་ཞིང་། དེ་མིན་ཀྱང་རང་རང་ལ་ངེས་པ་རྙེད་རྙེད་དུ་གྲངས་ཅི་ནུས་བསགས་ཤིང་། སླར་ཚོགས་ཞིང་རང་ལ་བསྟིམས་ཏེ་ཐུགས་ཡིད་བསྲེས་པའི་ངང་ལ་ཅི་ནུས་སུ་མཉམ་པར་བཞག་གོ །དེ་ནས་སྔོན་གཏོར་དཀར་དམར་ཚར་དུ་དངར་བ་བྱིན་གྱིས་བརླབས་ནས། ཐོག་མར་དཀར་ཕྱོགས་རྣམས་ལ་སྡེ་བརྒྱད་ཆ་སྙོམས་མཐོང་བརྒྱུད་བཞིན་བཏང་ནས། བགེགས་འགུག་པའི་བསམ་སྦྱོར་དང་བཅས་དམར་གཏོར་བསྔོས་ནས། དྲག་སྔགས་དང་ཡུངས་ཐུན་གྱིས་བསྐྲད་པར་བྱའོ། །དེ་ནས་ནང་དུ་ལོག་སྟེ་ཕྱི་ནང་གསང་བའི་བསྲུང་འཁོར་གྱི་རིམ་པ་ལེགས་པར་བསྒོམ་པར་བྱ་སྟེ། འདི་ནི་གལ་ཤིན་ཏུ་ཆེའོ། །སྤྲོས་པ་ལ་དགའ་བས་སྐབས་འདིར་རྒྱལ་ཆེན་སྡེ་བཞིའི་ཐོ་གཟུགས་པ་དང་། སྒོ་བྱང་གདག་པ་དག་ཀྱང་ཅི་བདེ་བར་བྱའོ། །དེ་ནས་སླར་ཡང་སྒོ་གསུམ་གུས་པས་མདུན་རྟེན་ལ་ཞལ་ཕྱོགས་ཏེ་ཐལ་མོ་སྦྱར་ནས། སྔོན་ཆད་གཉིས་འཛིན་གྱི་དབང་གིས་དོན་དམ་རང་རིག་གསང་བའི་བདག་པོའི་ཞལ་རས་བསྒྲིབས་ཏེ་མ་མཇལ་བའི་ནོངས་པ་མཐའ་དག་བཤགས་སྦྱངས་བགྱིས་ནས། བདག་གནས་ཡོ་བྱད་རྣམས་ལ་བྱིན་དབབ་པ་དང་། མཆོད་རྫས་བྱིན་གྱིས་བརླབས་ཏེ་འབུལ་བའི་དམིགས་པ་རྣམས་བྱའོ། །འདི་དག་ནི་ད་ལྟའི་ཆོག་ཁྲིགས་གསར་རྙིང་རྣམས་ཀྱི་གོ་རིམ་དང་བསྟུན་གྱི་གཞན་དུ་ན་འདི་གའི་ཞི་བསྙེན་གཅིག་པུ་ཙམ་གྱིས་སྐབས་འདིར་མཆོད་པ་བྱིན་རླབས་དང་། བཤགས་པ་དག་ཀྱང་གོང་དུ་སྨྲོས་པའི་ཚོགས་བསགས་ཡན་ལག་བདུན་པའི་ཡན་ལག་དེ་དང་དེར་དོན་གཅིག་ཏུ་བསྡུ་བ་ལས། ཟུར་དུ་མི་དགོས་པར་སྣང་བའང་ཤེས་པར་བྱའོ། །འདི་དག་གི་ཚིག་དོན་ཞིབ་རྒྱས་སུ་སྤྲོས་ན་ཡི་གེ་མང་བས་འཇིགས་ལ་ཚིག་རང་རང་གི་ཐད་ནས་དོན་དྲན་པར་བགྱིད་པ་ནི་གནད་དམ་པའོ། །དེ་དག་གིས་ནི་སྦྱོར་བ་སྔོན་དུ་འགྲོ་བའི་དོན་བསྟན་ཟིན་ཏོ། །གཉིས་པ་དངོས་གཞི་ལའང་། གང་ཞིག་བསྒྲུབ་པའི་གཞི་ལུས་རྟེན་གྱི་དྲི་མ་སྦྱངས་ནས་ལས་སུ་རུང་བར་བྱ་བ་དང་། གང་དུ་བསྒྲུབས་པའི་འབྲས་བུ་ལྷའི་རྣམ་པ་ལམ་དུ་བྱེད་པ་སྟེ་གཉིས་ལས། དང་པོ་ནི་རང་ལུས་ཐ་ལམ་དུ་གནས་པའི་དབུས་སུ་རྩ་ཨ་ཝ་དྷི་ཏི་སྟེ་དབུ་མ་རོ་རྐྱང་དང་བཅས་པ་གསལ་བའི་དབུ་མའི་ནང་སྙིང་གི་ཐད་དང་། ལྟེ་འོག་རྩ་གསུམ་འདུས་མདོ་གཉིས་སུ་པདྨའི་གདན་རེ་རེའི་ཁར་ཉི་ཟླའི་སྟེང་དུ། ཨཱཿཡིག་དཀར་པོ་ཟླ་བ་ཞུན་མ་ལྟ་བུ་འོད་ཟེར་མཆོག་ཏུ་འབར་བ་རེ་རེ་གསལ་ཞིང་དམིགས་པ་མ་ཟིན་པར་དེ་ཉིད་ལ་བརྩོན། དམིགས་པ་ཟིན་ནས་སྙིང་ཁའི་ཨཱཿཡིག་ལས་འོད་ཟེར་འཕྲོས་པས་སྒོ་གསུམ་གྱི་སྡིག་སྒྲིབ་རྣམས་མུན་ཁུངས་ལ་ཉི་ཟེར་ཤར་བ་བཞིན་སྦྱངས་པར་བསམ། དེ་བཞིན་དུ་ལྟེ་བའི་ཨཱཿཡིག་གི་འོད་ཀྱིས་ཀྱང་ལུས་གང་བས་ནད་གདོན་ཐམས་ཅད་ལྷག་མེད་དུ་སྦྱངས་ནས་མཐའ་ཨཱཿཡིག་དང་བཅས་པའི་ལུས་ཕྱི་ནང་སྒྲིབ་གཡོགས་དང་བྲལ་བར་གསལ་བའི་འོད་ཀྱི་གོང་བུ་གཅིག་ཏུ་གྱུར་པར་བསམ་མོ། །གཉིས་པ་ལྷར་སྣང་ལམ་དུ་བྱ་བ་ནི། སྐད་ཅིག་གིས་འོད་ཀྱི་གོང་བུ་དེ་ཡོངས་སུ་གྱུར་པ་ལས་བདག་ཉིད་དྲང་སྲོང་དྲི་མེད་སྐུ་མདོག་སྔོ་སྐྱ། ཀེང་རུས་པགས་པས་གཡོགས་པ་ལྟར་ཤ་སྐམ་ཞིང་རིད་པ། སྨིན་མ་སོགས་དཀར་ཞིང་། ཨག་ཚོམ་བྲང་གི་རྒྱ་མདོར་སླེབས་པ། རས་དཀར་གྱི་སྨད་དཀྲིས་དང་སྟོད་གཡོགས་གསོལ་བ། ཞབས་རྡོ་རྗེའི་སྐྱིལ་མོ་ཀྲུང་དུ་བཞུགས་ཤིང་། ཕྱག་ན་ལུང་ཐང་གི་ཕྲེང་བ་དང་། གྷུནྡྷེ་སྟེ་རིལ་བ་སྦྱི་བླུགས་བསྣམས་པའམ། ཡང་ན་བསྟོད་པ་ལས་ཇི་ལྟར་བཤད་པ་བཞིན་དུ་ཕྱག་གཡས་ཀྱི་ཕྲེང་བའི་ཚབ་ཏུ་གསེར་གྱི་རྡོ་རྗེ་བསྒོམ་པར་བྱ་སྟེ་དོན་ལ་འདྲའོ། །དེ་ལྟར་གསལ་བའི་འཁོར་དུ་དྲང་སྲོང་འབུམ་གྱིས་བསྐོར་བའི། གཙོ་བོའི་སྙིང་གར་ཉི་མའི་སྟེང་དུ་སྲོག་སྙིང་ཧཱུཾ་ཡིག་མཐིང་ནག་གི་མཐར་ཏྲི་དུའི་སྔགས་ཀྱིས་བསྐོར་བ་ལ་དམིགས་པ་རྩེ་གཅིག་ཏུ་གཏད་ནས་རླུང་བཟླས་དང་སྒྲ་བཅས་གང་རུང་ལ་བརྩོན་པར་བྱ་སྟེ། དེ་ཡང་དམིགས་པ་མི་ཟིན་པར་རླུང་བཟླས་དང་ཡིད་བཟླས་གང་རུང་བྱ་ཞིང་། དམིགས་པ་ཟིན་ནས་རྐྱེན་གྱིས་མི་འཕྲོག་པར་གྱུར་ན་སྒྲ་བཅས་ཀྱི་བཟླས་པ་བྱེད་པའང་དོན་ལ་གནས་པ་ཡིན་ནོ། །བསྙེན་པའི་ཚད་ཀྱང་སྤྱིར་གྲངས་དུས་རྟགས་ཀྱི་བསྙེན་པ་ཞེས་སོ་སོར་གསུངས་ཤིང་གྲངས་བསྙེན་གྱི་སྐབས་སུའང་། དམིགས་བསལ་དགོས་ཆོས་ཡོད་པ་འགའ་ཞིག་མ་གཏོགས། ལྷ་རང་རང་གི་བསྙེན་སྔགས་ཀྱི་གྲངས་ལ་དཔགས་ནས་འབྲུ་འབུམ་དུ་བཟླ་བར་གསུངས་པ་ནི་ཁྱབ་ཆེ་མོད། དུས་བསྙེན་ཡང་། རྫོགས་ལྡན་ལ་སོགས་པའི་ཟླས་ཕྱེ་ནས་རྩོད་དུས་ཀྱི་དབང་གིས་གཞུང་དུ་ཇི་ལྟར་བཤད་པ་ལས་བཞི་འགྱུར་དུ་བཟླ་དགོས་པར་གསུངས་པ་དང་། ཁ་ཅིག་ཏུ་ནི་ཟླ་བ་དང་ལོ་ལ་སོགས་པའི་དུས་ཀྱི་གྲངས་འདི་ཙམ་དུ་བསྒྲུབ་བོ་ཞེས་གསུངས་པའང་ཡོད་དེ། སྒྱུ་འཕྲུལ་ལས། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་གསུངས་པའི་ཕྱིར་རོ། །དེ་དག་ཀྱང་རང་རང་གི་གཞུང་ལས་ཇི་ལྟར་བཤད་པ་བཞིན་བདེན་ཅིང་། གཞུང་གི་དགོངས་པ་འགལ་མེད་དུའང་འཆད་ནུས་པ་ཉིད་དོ། །རྟགས་བསྙེན་ནི་གཞུང་ཁ་ཅིག་ཏུ་མཚན་མའི་བསྙེན་པ་ཞེས་ཇི་ལྟར་གྲགས་པ་ཉིད་དེ། འདི་ནི་ལྷ་གང་བསྙེན་གྱི་རྟགས་མཚན་རང་གཞུང་ནས་བཤད་པ་བཞིན་གྱི་མཚན་མ་དངོས་སུ་ཐོབ་ཐོབ་ཏུ་འབད་དགོས་པའི་ཕྱིར་གྲངས་དུས་ཀྱི་ཚད་བཟུངས་པ་ནི་མེད་དོ། འདིར་དམིགས་ཀྱིས་བསལ་བ་ནི་འདི་ཡིན་ཏེ། སྔོན་དུ་བསྙེན་པ་འབུམ་ཕྲག་གཅིག་ཁ་སྐོང་དང་བཅས་པར་བཟླས་ནས། སླར་ལས་གང་བྱེད་ཀྱང་དེ་ཉིད་སྐབས་སུ་གོང་བསྙེན་ཁ་གསོ་ཕྱིར་ཁྲི་ཚོ་རེ་ལས་མི་ཉུང་བར་བཟླ་བར་བྱའོ། །བསྙེན་པ་སྔོན་སོང་གིས་རྗེས་གནང་ལ་སོགས་པའི་སྐབས་སུ་ནི་སྟོང་ཕྲག་ལ་སོགས་ཅི་རིགས་པར་བཟླ་བར་བྱའོ། །བསྙེན་རྐྱང་གལ་ཏེ་སྤྲོས་པ་ལ་དགའ་བས། ཐུགས་ཀའི་ས་བོན་སྔགས་ཕྲེང་དང་བཅས་བ་ལས་འོད་ཟེར་འཕྲོས་ཏེ་ཡེ་ཤེས་པ་སྤྱན་འདྲེན་པའི་སྐབས་འདིར་ཡང་སྤྱན་འདྲེན་པ་དང་བཞུགས་སུ་གསོལ་བ་ནས་མཆོད་པ་དང་བསྟོད་པ་དག་གི་བར་བགྱིད་པར་འདོད་ནའང་འོག་ཏུ་ཇི་ལྟར་འཆད་པར་འགྱུར་བའི་ཁྲོ་བོའི་བྱེ་བྲག་གི་དགོས་པ་རྣམས་དོར་ནས་གཞན་དག་ཅི་རིགས་པར་སྦྱར་བར་བྱ་སྟེ། འདིར་ཡང་མ་རུང་བ་ནི་མ་ཡིན་ནོ། །ཐུན་མོང་དུ་ནི་གོང་དུ་གོ་རིམ་ཇི་ལྟར་བཀོད་པ་ཉིད་ཀྱིས་འཐུས་ཏེ། འདིར་བསྙེན་པའི་དོན་པོ་ལྷར་སྣང་ཉིད་རྐྱེན་གྱིས་མི་འཕྲོག་པར་ཡིད་ལ་རྩེ་གཅིག་ཏུ་ངེས་པ་གང་ཞིག་ཡིན་པའི་ཕྱིར་རོ། །གང་ལྟར་ཡང་བསྙེན་པ་ཅི་ཙམ་བརྩོན་གྱི་སྟོང་ཚིགས་སམ། བསྙེན་མཇུག་བསྡུ་བ་ན་ནི། ཨརྒྷ་སོགས་ཀྱིས་མཆོད་ཅིང་། བསྟོད་པ་ཇི་ལྟར་རིགས་པས་བསྟོད་པར་བྱ་བ་ཉིད་ཅི་ནས་ཀྱང་དགོས་སོ། །ཚོགས་མཆོད་སོགས་ནི་མ་སྦྱར་ཀྱང་ཆད་པའི་སྐྱོན་ཏུ་མི་འགྲོའོ། །འདི་དག་ནི་བསྙེན་པའི་དངོས་གཞི་ཇི་ལྟར་བྱ་བའི་རིམ་པའོ། །གསུམ་པ་རྗེས་ཀྱི་བྱ་བ་ནི་འདི་ལྟར་ཡིན་ཏེ། ཉིན་ཞག་ཕྲུག་གཅིག་ལ་ཐུན་བཞིའམ་དྲུག་སོགས་གང་བྱེད་ཀྱང་། ཐུན་དེ་གྲོལ་པར་ཉེ་བ་ན། ཐུགས་ཀའི་སྲོག་ཡིག་ལ་དམིགས་པ་རྩེ་གཅིག་ཏུ་གཏད་པའི་རྐྱེན་གྱིས། མེ་ལོང་ལ་ཧས་བཏབ་པ་ལྟར་རམ། ཡང་ན། ཕྱི་རོལ་གྱི་གཞལ་ཡས་ཁང་དྲང་སྲོང་འབུམ་སྡེའི་ཚོགས་དང་བཅས་པ་གཙོ་བོ་ལ་ཐིམ། དེ་ཉིད་ཀྱང་ཐུགས་སྲོག་ཧཱུཾ་ལ་འདུས། ཧཱུཾ་ཡང་ཞབས་ཀྱུ་ནས་རིམ་པར་ནཱ་དའི་བར་འདུས་ཏེ། ནཱ་ད་གང་དུ་མི་དམིགས་པར་གྱུར་པའི་ཐད་དེར་ཤེས་པ་གཡོ་མེད་དུ་གཏད་དེ་ཅི་གནས་སུ་མཉམ་པར་བཞག་པར་བྱ་སྟེ། འདི་ནི་རྫོགས་རིམ་ལ་འཇུག་པའི་ཐབས་མཆོག་ཏུ་ཁྱད་པར་འཕགས་པའོ། །དེ་ནས་སླར་ཡང་རྗེས་ཐོབ་སྒྱུ་མའི་སྐུར་ལངས་ནས་གོང་སྨྲོས་ལྟར་གྱི་མཆོད་བསྟོད་མདོར་བསྡུས་བགྱིས་ནས་བཟང་པོ་སྤྱོད་པའི་སྨོན་ལམ་ལ་སོགས་པའི་སྒོ་ནས་དགེ་བ་རྫོགས་བྱང་དུ་བསྔོ་བ་དང་། རྗེས་སྣང་ལྷའི་ལམ་ཁྱེར་དང་ལྡན་པས་ནང་གི་སྦྱིན་སྲེག་ལ་སོགས་པ་ལ་འཇུག་པར་བྱའོ། །འདི་དག་གིས་ནི་ཞི་བར་བསྙེན་པའི་ཚུལ་མདོ་ཙམ་སྨྲོས་ཟིན་ཏོ། །གཉིས་པ་ཁྲོ་བོར་བསྒྲུབ་པ་ལའང་། སྦྱོར་དངོས་རྗེས་གསུམ་ལས། དང་པོ་སྦྱོར་བ་ནི། ཕལ་ཆེར་བསྙེན་པའི་སྐབས་དང་འདྲ་བ་ལས། བྱེ་བྲག་གི་དགོས་ཆོས་ལ། དྲག་མཆོད་སྨན་རཀ་གཏོར་གསུམ་དང་བཅས་པ་བཤམས་ནས་མཆོད་པ་བྱིན་རླབས་ཀྱི་སྐབས་སུའང་རང་གི་བྱིན་རླབས་དམིགས་བསལ་ཉིད་སྦྱོར་དགོས་སོ། །ཁྲོ་བོའི་སྐུ་རྟེན་ལ་སོགས་པའང་དམིགས་པའི་རྟེན་དུ་ཉེར་བསྡོགས་བྱ་སྟེ་འདི་ཙམ་གྱིས་དཀྱིལ་འཁོར་གྱི་དགོས་ཆོས་རྣམས་འགྲུབ་བོ། །དེ་ནས་བརྒྱུད་པའི་གསོལ་འདེབས་ནས་བརྩམ་ཞི་བསྙེན་ཡན་དཀྱུས་ལྟར་གྲུབ་ནས། བསྙེན་པ་ཅུང་ཟད་བཟླས་ཏེ་འོད་གསལ་དུ་བསྡུ་བ་ཡན་བྱས་མཐར་སྟོང་ཉིད་དེ་གའི་ངང་ནས་ཁྲོ་བོའི་སྐུར་བསྐྱེད་པའམ། ཡང་ན་ཞི་བ་གནས་འགྱུར་གྱི་ཚུལ་དུ་ཁྲོ་བོར་བསྒོམ་པར་བྱ་སྟེ། གར་ལྟར་ཡང་ཐུན་བཞི་ལྟ་བུའི་ཐུན་ཐོག་མ་མ་གཏོགས་གཞན་དག་ལ། གཞི་བགེགས་ཀྱི་གཏོར་མ་གཏོང་མི་དགོས་ཤིང་། གཞུང་ཁ་ཅིག་ལས་ནི་ཉིན་དང་པོ་ལས་གཞན་རྣམས་ལ་བསྲུང་འཁོར་གསལ་འདེབས་ཙམ་ལས་བགེགས་བསྐྲད་པའང་མི་དགོས་པར་གསུངས་སོ། །དེ་དག་གིས་ནི་སྦྱོར་བའི་ཁྱད་པར་ཅུང་ཟད་སྨྲོས་གྲུབ་ནས། གཉིས་པ་དངོས་གཞི་ལའང་། མངོན་རྟོགས་ཀྱི་ཁྱད་པར་སྨོས་བ་དང་། བསྙེན་དམིགས་ལ་སོགས་པའི་ཁྱད་པར་སྨྲོས་པ་སྟེ་གཉིས་ལས། དང་པོ་ནི་རྫོགས་རིམ་དུ་འཇུག་ལྡང་གི་སྒོ་ནས་སམ། ཞི་བ་གནས་འགྱུར་ཀྱི་ཚུལ་གང་ཡིན་ཀྱང་རུང་སྟེ། བསྲུང་བཟློག་བསད་པའི་ལས་སྦྱོར་གྱི་དགོས་དམིགས་གཞན་མེད་པའི་སྐབས་སུ། དཀྱུས་ཉིད་ལ་འཇུག་པར་བྱ་སྟེ། དེ་ཡང་གསེར་གྱི་འཁོར་ལོ་རྩིབས་བརྒྱད་པའི་སྟེང་དུ་སྐད་ཅིག་ཉིད་ལ་རྫུས་སྐྱེས་ཀྱི་ཚུལ་དུ་ཁྲོ་བོའི་སྐུར་བསྐྱེད་དགོས་པ་གསུངས་ཏེ། འདིར་ཡང་སྦྱང་གཞི་སྦྱོང་བྱེད་དང་འབྲེལ་བའི་སྒོ་ནས་འགྲོ་བའི་སྐྱེ་གནས་རྣམ་པ་བཞི་སོ་སོའི་བག་ཆགས་སྦྱོང་ཚུལ་གྱི་དག་བྱ་དག་འབྲས་སྦྱར་ཤེས་ཤིང་། དེ་ལྟར་གྱི་སྦྱང་བའང་། རིམ་པར་རྒྱུད་ལ་འགེལ་ནུས་པ་ཞིག་བྱུང་ན་ནི་མཆོག་ཏུ་ལེགས་མོད། དེ་མིན་པས་ཀྱང་གཞུང་གི་མངོན་རྟོགས་ཀྱི་ཚིག་ལ་ཤིན་ཏུ་བསྒྲིམ་ནས་ལྷ་དེའི་སྤྱན་གྱི་དཀར་ནག་ཚུན་གསལ་ཞིང་ཅུང་ཟད་མི་གསལ་པའི་དུས་སུའང་མདུན་རྟེན་ལ་མིག་ཅེ་རེ་གཏད་ནས་དེའི་རྣམ་འགྱུར་ཡིད་ལ་བྱེད་ཅིང་། གང་ནས་མི་གསལ་བ་དེ་ཆེད་དུ་སྒོམ་དགོས་པ་ནི་སྤྱིའི་ཆིངས་ཉིད་དུ་སྨྲོས་པའོ། །ཁྲོ་བོའི་སྐུ་དེའི་རྣམ་འགྱུར་ནི་སྐུ་མདོག་མཐིང་ནག་ཞལ་གཅིག་ཕྱག་བཞི་ཞབས་གཉིས་དང་ལྡན་པ་ཞིག་སྟེ། དེ་ཡང་ཕྱག་དང་པོ་གཉིས་ཀྱིས་ཐོ་བ་དང་རལ་གྲི་མེ་འབར་བ་གདེངས་ཏེ་འཛིན་པ། ཕྱག་འོག་མ་གཉིས་ནི་བཟློག་པ་སོགས་དང་ཐུན་མོང་དུ་གནམ་ལྕགས་ལས་གྲུབ་པའི་ཐལ་མོ་སྡེབ་པ་དང་། བྱེ་བྲག་ཏུ་ནི་བསྲུང་བ་སོགས་ལ་མཆོད་རྟེན་བཏེགས་པ་དང་། གནན་པ་ལ་རི་རབ་བཏེགས་པ་དང་། ཟོར་ལས་ལ་དྲག་པོའི་ཟོར་རྫས་ཐོགས་པ་དང་། བསད་པ་ལ་ལག་མཐིལ་ཉིད་གནམ་ལྕགས་ཀྱི་སྡིག་པ་ལ་སོར་མོ་རྣམས་མགོ་དགུར་བསྒོམ་པ་སོགས་གནས་སྐབས་དེ་དང་དེར་རིགས་པས་འཕྲུལ་ཤེས་པར་བྱའོ། །དེ་བཞིན་དུ་དབུ་སྐྲ་ཁམ་ནག་གྱེན་དུ་བརྫེས་ཤིང་། ཞབས་གཉིས་བརྐྱང་བསྐུམས་སུ་བསྒྲད་དེ་ཉི་ཟླའི་གདན་ལ་བཞུགས་པ། ཞལ་གྱི་རྣམ་འགྱུར་ཤིན་ཏུ་ཁྲོ་ཞིང་མི་སྡུག་པར་གསལ་ཏེ། དེའི་སྤྱི་བོར་དྲང་སྲོང་དྲི་མེད་འོད་ཟེར་ཞི་བ་རང་གི་མངོན་རྟོགས་བཞིན་གསལ་བ་དང་། སྤྲོས་པ་ལ་དགའ་ན་འཁོར་དྲང་སྲོང་འབུམ་སྡེ་རིགས་བདག་པདྨ་ཐོད་ཕྲེང་ཡབ་ཡུམ་དང་བཅས་པའང་སྒོམ་པར་གསུངས་སོ། །གཙོ་བོའི་ཐུགས་ཀར་འཁོར་ལོ་རྩིབས་བརྒྱད་དང་པདྨ་ཉི་ཟླའི་གདན་ལ་ཡེ་ཤེས་སེམས་དཔའ་ཕྱག་ན་རྡོ་རྗེ་གཙོ་བོ་རང་དང་འདྲ་ཞིང་། དེའི་ཐུགས་ཀར་རིན་པོ་ཆེའི་གུར་ཁང་གི་ནང་དུ་ཉི་མའི་གདན་ལ་ཏིང་འཛིན་སེམས་དཔའ་ཧཱུཾ་མཐིང་ནག་འོད་ཟེར་མཆོག་ཏུ་འབར་བ་སྟེ་སེམས་དཔའ་སུམ་བརྩེག་ཏུ་གསལ་ཞིང་མགྲིན་པ་ཨཱཿལས་ཟླ་བའི་གདན་ལ་སྨྲ་བྱེད་ལྕེ་ཉིད་རྡོ་རྗེ་རྭ་དགུ་བའི་རྣམ་པར་བསྒོམས་པའི་ལྟེ་བར་ཧུཾ་ཡིག་དང་། རྭ་དགུའི་རྩེ་མོར་ཕཊ་ཡིག་དམར་པོའི་མེ་ཚྭ་ཚ་འཕྲོ་བ་དགུས་མཚན་པས་ལོག་འདྲེན་རྣམས་གཟིར་ཞིང་འཇོམས་པར་བསམ་མོ། །དེ་ལྟར་གསལ་བའི་ཐུགས་ཀའི་ཧཱུཾ་ཡིག་སྔགས་ཕྲེང་གིས་བསྐོར་བ་དང་བཅས་པ་ལས་འོད་ཟེར་འཕྲོས་པས་ནགས་ཚལ་དྲྭ་བ་ཅན་དང་། རི་བོ་ཀུན་འདུས་ཀྱི་རྩེ་ལ་སོགས་རང་བཞིན་གར་བཞུགས་ཀྱི་གནས་ནས་བསྒོམ་པ་དང་འདྲ་བའི་ཡེ་ཤེས་སེམས་དཔའ་སྤྱན་འདྲེན་པ་ལ་སོགས་པ་བྱ་དགོས་ཏེ། འདི་སྐབས་སུའང་སྤྱན་འདྲེན་གྱི་སྔོན་དུ་ཐུགས་སྲོག་ལས་རིགས་ལྔའི་ས་བོན་སྤྲོས་ཏེ། དེ་ཡོངས་སུ་གྱུར་བ་ལས་ཕྱག་མཚན་ལྔའི་གུར་ཁང་སོགས་སྒོམ་པ་ཡང་འབྱུང་མོད་དེ། དེ་ནི་བསྲུང་དམིགས་བྱེ་བྲག་པའི་དབང་དུ་བྱས་པ་ཁོ་ནའོ། །དེ་ནས་གནས་གསུམ་བྱིན་གྱིས་བརླབས་པ་ཡང་ཅི་རིགས་པར་སྦྱར་བར་བྱའོ། །སྤྱན་འདྲེན་དངོས་ནི། ཧཱུཾ་དད་པ་དང་ནི་དམ་ཚིག་གིས། སོགས་ཀྱི་ཚིག་གི་རྗེས་སུ་དོན་དྲན་བཞིན་པའི་སྒོ་ནས་སོ། །བཞུགས་སུ་གསོལ་བ་དང་། ཕྱག་འཚལ་བ། ཕྱི་ནང་གསང་བའི་མཆོད་པ་འབུལ་བ། བསྟོད་པ་བྱ་བ་རྣམས་ཀྱང་དཀྱུས་སུ་གསལ་བཞིན་ཅི་བདེར་སྦྱར་བར་བྱའོ། །དེ་ནས་ཆེ་བ་བསྐྱེད་པའི་སྔ་རོལ་དུ་ལས་བཅོལ་གྱི་བསྐུལ་གཏོང་ན་དང་། མིན་ཀྱང་དམིགས་པར་བྱ་བ་ནི་འདི་ཡིན་ཏེ། རང་གི་ལྕེ་རྡོ་རྗེ་རྩེ་དགུ་བའི་ལྟེ་བའི་ཧཱུཾ་ལས་འོད་ཟེར་འཕྲོས་སྡེ་བརྒྱད་ཐམས་ཅད་ཀྱི་སྙིང་ནས་དྲངས་ཏེ་མདུན་དུ་འཁོད་པའི་སྤྱི་བོར་རྡོ་རྗེ་རྒྱ་གྲམ་རེ་བཞག་པས་འགུལ་བསྐྱོད་མི་ཤེས་པར་བསམ་པ་དང་། ལས་གཞུང་རྩ་བ་ལས་ནི། གོང་དུ་འཕྲིན་ལས་བཅོལ་བའི་བསྐུལ་བགྱིས་པའི་རྐྱེན་གྱིས་དྲང་སྲོང་དྲི་མེད་དྲང་སྲོང་འབུམ་སྡེའི་འཁོར་དང་བཅས་པའང་ཁྲོ་བོ་ཞལ་གཅིག་ཕྱག་བཞི་བའི་རྣམ་པར་བཞེངས་ནས་ཐམས་ཅད་ཀྱིས་ང་རྒྱལ་བསྐྱེད་པར་གསུངས་སོ། །གང་ལྟར་ཡང་ཇི་སྐད་བཤད་པའི་དམིགས་གནད་དང་ལྡན་པས། རང་ཉིད་སྲིད་པ་གསུམ་གྱི་མཐུ་བོ་ཆེ་ཐམས་ཅད་ཀྱི་རྗེ་བོར་བསམ་པ་དང་། སྐྱེ་འགྲོ་ཐམས་ཅད་ཀྱི་རྗེ་བོའམ་ཡབ་ཏུ་བསམ་པ་དང་། སྐྱེ་དགུའི་སྲོག་གཅོད་པའི་དྲེགས་པ་ཀུན་གྱི་བདག་པོར་བསམ་པ་དང་། དེ་ཐམས་ཅད་ཀྱི་སྲོག་སྙིང་གི་བདག་པོ་ཡིན་པར་བསམ་པ་དང་། མདོར་ན་སྲིད་ཞི་མ་ལུས་པ་ན་བདག་གི་བཀའ་འོག་ཏུ་མ་འདུས་པ་ནི་སུ་ཡང་མེད་དོ་སྙམ་པའི་ངང་ནས། ཧཱུཾ་ང་ནི་སྲིད་པ་གསུམ་གྱི་རྗེ། །ཞེས་པ་ལ་སོགས་པ་བརྗོད་པར་བྱའོ། །དེའི་གཤམ་དུ་གཟུ་དཔང་དམ་བརྡར་ཡང་སྤྲོ་ན་བྱ་སྟེ། མ་གྲུབ་ཀྱང་རྒྱུན་ཁྱེར་ཙམ་ལ་ཆད་པའི་སྐྱོན་དུ་མི་འགྱུར་རོ། །གཞན་དུ་བསྲུང་བཟློག་བསད་པའི་ལས་དམིགས་བསལ་གྱི་སྐབས་དང་། རྒྱུན་ལྡན་དུའང་བསྲུང་བཟློག་གི་དམིགས་པའི་བྱེ་བྲག་བསྲུང་འཁོར་གཞལ་མེད་ཁང་དང་མཆོད་རྟེན་གྱི་རྣམ་པར་སྒོམ་པ་སོགས་ཀྱང་རྒྱལ་དབང་ལྔ་བ་དང་། གཏེར་ཆེན་ཆོས་ཀྱི་རྒྱལ་པོ་ལ་སོགས་པས་ཆོག་ཁྲིགས་ཀྱིས་ཇི་ལྟར་གཏན་ལ་ཕབ་པ་བཞིན། གཞུང་འདིའི་མན་ངག་གུད་དུ་སྦས་པ་ཉིད་དཀྱུས་སུ་ལག་ལེན་བགྱིད་པའི་ལུགས་ཏེ་ཤིན་ཏུ་ཟབ་པའི་གནད་དོ། །འདིར་ནི་དེ་དང་དེ་ལྟ་བུའི་ཕྲིན་ལས་ཀྱི་བྱེ་བྲག་རྣམས་ནི་སྔོན་ཆད་དམ་པ་དུ་མའི་མན་ངག་གིས་རྒྱ་ཆེར་བཀྲལ་བའི་གཞུང་ཉིད་ཟབ་ཅིང་བརླིངས་པར་མཐོང་ནས་མ་སྤྲོས་ཤིང་། བརྗོད་བྱའི་སྙིང་བོ་སྔོན་དུ་བསྙེན་པ་བྱ་ཚུལ་གྱི་དཀའ་གནད་འགའ་ཞིག་ཅུང་ཟད་གབ་པར་ཉིད་ཆེད་དུ་བརྗོད་པས་ཉེ་བར་བླངས་པའོ། །གཉིས་པ་བསྙེན་དམིགས་ལ་སོགས་པའི་ཁྱད་པར་སྨྲོས་པ་ནི། རང་གཞུང་ལས། གནས་པ་རྩ་ལ་ཤེས་པར་བྱཿ འདྲེན་པ་དཀྱིལ་དུ་ཤེས་པར་བྱཿ གཅོད་པ་རྩེ་ལ་ཤེས་པར་བྱཿ མན་ངག་སེམས་ལ་ཤེས་པར་བྱཿ ཞེས་པའི་དོན་ཏེ། དེ་ཡང་སློབ་དཔོན་སངས་རྒྱས་གཉིས་པ་ཉིད་ཀྱི་ཞལ་སྔ་ནས། ཁ་ཅིག་མགྲིན་པ་ཡང་ཟེར། གནད་གསུམ་སྙིང་འབྲེལ་གྱི་མན་ངག་ཏུ་གསུངས་པ་ནི་འདི་ཡིན་ཏེ། ཇི་སྐད་དུ། གནས་པ་རྩ་ལ་ཤེས་པར་བྱཿ ཞེས་པ་ནི། ལྕེ་དེ་གནམ་ལྕགས་ཀྱི་རྡོ་རྗེ་རྩེ་དགུ་བ་ལྟེ་བར་ཧཱུཾ་གིས་མཚན་པའོ། །འདྲེན་པ་དཀྱིལ་དུ་ཤེས་པར་བྱ་བ་ནིཿ ལྕེ་རྩར་ཨ་ལས་ཟླ་བའི་དཀྱིལ་འཁོར་བསྒོམ་པའོ། །གཅོད་པ་རྩེ་ལ་ཤེས་པར་བྱ་བ་ནི། ལྕེ་རྡོ་རྗེ་རྩེ་དགུ་བའི་ཁོང་སེང་དུ་བསྒོམས་པའི་ལྕེ་རྩེའི་ཁའི་བར་ཐད་དུ། ཕཊ་དམར་པོ་མཆོད་བཅག་པ་འདྲ་བ་དགུ་ལས་མེའི་ཚྭ་ཚྭ་མང་དུ་འཕྲོས་པས། གནམ་ལྕགས་ཀྱི་རྡོ་རྗེ་འབར་བ་སེར་གཞོབ་ལྟ་བུ་འཕྲོས་པ་གནོད་བྱེད་གང་ཡིན་ལ་ཕོག་པས་ཚག་སྒྲ་ནག་སྒྲར་བཏང་བར་བསམ་སྟེ། རྩྭ་སྦུར་བསྲེགས་པ་བཞིན་རྡུལ་དུ་བརླགས་པར་བསམ་མོ། །མན་ངག་སེམས་ལ་ཤེས་པར་བྱ་བ་ནི། སྙིང་གི་ནང་དུ་ཉི་ཟླའི་སྟེང་དུ་ཧཱུཾ་མཐིང་ནག་གཅིག་བསམ་པའོ། །ཞེས་ཇི་ལྟར་གསུངས་པ་བཞིན་ཏེ། དེ་བས་ན་གནས་པ་རྩ་དང་འདྲེན་པ་དཀྱིལ་གྱི་དགོངས་དོན། རང་གི་ལྕེ་ཟླ་བའི་གདན་ལ་རྡོ་རྗེར་སྒོམ་ཚུལ་གོང་དུ་ཇི་ལྟར་བཤད་པ་བཞིན་གསལ་བཏབ་ནས། རྡོ་རྗེའི་ལྟེ་བའི་ཧཱུཾ་ཡིག་གི་མཐར་དྲག་སྔགས་རིང་མོ་གཡས་སུ་འཁོར་ཞིང་འོད་ཟེར་འཕྲོ་བ་དང་ལྕེ་རྩར་གདན་སྟབས་སུ་གནས་པའི་ཟླ་བ་ཨཱཿཡིག་གིས་མཚན་པའི་མཐར་ཞི་སྔགས་གཡས་བསྐོར་འགལ་མེ་ལྟར་འཁོར་ཞིང་འོད་ཟེར་འཕྲོ་བར་བསམས་ཏེ། སླར་ཡང་ལྕེའི་རྡོ་རྗེའི་ལྟེ་བར་གནས་པའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་སྔར་རང་གི་དྲུང་དུ་བཀུག་པའི་སྡེ་བརྒྱད་དེ་དག་གི་སྲོག་ཡིག་རྣམས་རང་རང་གི་སྙིང་གར་གནས་པ་དེ་ལ་ཕོག་མ་ཐག་རང་དབང་མེད་པར་རྡོ་ཁབ་ལེན་གྱིས་ལྕགས་ཕྱེ་བསྡུས་པ་ལྟར་བདག་གི་མདུན་དུ་བཀུག་པར་བསམ་ནས་ཨོཾ་ལོག་ཏྲི་པཱ་ལ་ནན་ལ་སོགས་པའི་སྡེ་བརྒྱད་སྲོག་གི་སྙིང་བོ་དྲག་སྔགས་རིང་མོ་ཉིད་བགྲངས་པས་ཁོས་མ་བཟོད་དེ་ལུས་འདར་ཞིང་ཐལ་མོ་སྦྱར་ནས་སྒོ་གསུམ་གུས་པས་ཕྱག་འཚལ་བཞིན་ཅི་གསུངས་ཀྱི་བཀའ་བགྱིད་པར་འཚལ་ལོ་ཞེས་དམ་བཅས་ནས་རང་རང་གི་སྲོག་སྙིང་མདོངས་གསོལ་དུ་ཕུལ་བ་ན། སྔར་གྱི་འོད་ཟེར་དེས་སྲོག་སྙིང་དེ་དག་དྲངས་ཏེ་བདག་གི་ལྕེ་ཉིད་རྡོ་རྗེར་བསྒོམ་བཞིན་པའི་གདན་གྱི་ཟླ་བ་ལ་ཐིམ་པས་དེ་དག་གི་སྲོག་ལ་རང་དབང་བསྒྱུར་པར་བསམ་མོ། འདི་དག་ཀྱང་རང་བཟོ་མ་ཡིན་ཏེ་གཏེར་གཞུང་རྩ་བ་ལས་རྡོ་རྗེའི་གདན་ཞེས་གསལ་བར་གསུངས་ཤིང་། དེ་ལྟར་ན་ཐུགས་ཀའི་ཏིང་ངེ་འཛིན་སེམས་དཔའ་ནི་ཧཱུཾ་རྐྱང་ཡིན་པས་ན་ལྕེ་ཡི་རྡོ་རྗེ་ལས་མ་འདས་སོ། ཁ་ཅིག་ལས་ཧཱུཾ་གི་གདན་ཞེས་གསུངས་པ་ནི་རྡོ་རྗེ་ཉིད་ཀྱི་ལྟེ་བར་ཧཱུཾ་གིས་མཚན་པ་ལ་དགོངས་སོ། །འདི་ནི་སྒྲུབ་པའི་དངོས་གཞི་ཉིད་ཡིན་པའི་ཕྱིར་ཅི་ཙམ་བསྙེན་པའི་གྲངས་ཀྱང་སྤྱིར་བཏང་འབུམ་ཕྲག་གསུམ་དུ་བཤད་ཅིང་། དམིགས་བསལ་ལ་དེ་ལས་ཀྱང་ཉིས་འགྱུར་རམ། སུམ་འགྱུར་དུ་བཟླ་བར་བཤད་དོ། །གཞན་དུ་འདི་ལ་ཡང་བརྩོན་འགྲུས་རབ་འབྲིང་ཐ་མའི་དབང་གིས་ཞག་གྲངས་ཀྱང་། བདུན་ནམ་ཉེར་གཅིག་ལ་སོགས་པ་བཤད་པ་ཡོད་དེ། འདི་ཉིད་དང་། གཞན་ཡང་འགྲུབ་པའི་རྟགས་དང་། མི་འགྲུབ་པའི་རྟགས་དང་། གྲུབ་པའི་ཚད་དང་། ཇི་ལྟར་སྒྲུབ་པའི་ལག་ལེན་དང་། གྲུབ་པའི་ཕན་ཡོན་དང་། རྫས་ལ་སོགས་པའི་ལག་ལེན་ཕྲ་མོ་དང་བཅས་པ་ཇི་སྙེད་པ་རྣམས་ནི། སློབ་དཔོན་ཆེན་པོ་ཉིད་ནས་མཛད་པའི་ལས་གཞུང་རྩ་བ་ན་གསལ་བ་ཡིན་པས་དེར་བལྟ་བར་བྱའོ། །དམིགས་བསལ་བསྲུང་བཟློག་བསད་པའི་སྔགས་ཀྱིས་མདེའུ་ཁ་སྒྱུར་འདོད་ན་སྡེ་བརྒྱད་བཅུད་ཕུར་གྱི་མདེའུ་ཐུང་ལས་ཇི་ལྟར་བཤད་པ་བཞིན་སྦྱར་བར་བྱ་སྟེ། ཇི་སྐད་དུ་བསྲུང་བཟློག་བསད་གསུམ་གང་བྱེད་ཀྱང་ཤམ་བུ་བསྒྱུར་ཏེ་བསྲུངས་ནས་སྔགས་ཚར་རེའི་མཐར་རཀྵའམ་སྲུངས་ཤིག་ཅེས་གདག་གོཿ བཟློག་ན་བྱད་མ་རྦོད་གཏོང་དང་བཅས་པ་བྷྱོ་བཟློག་ཅེས་སོཿ གསོད་ན་སོད་ཅིག་ཅེས་སམ་མཱ་ར་ཡ་རྦད་ཅེས་སྦྱར་རོཿ ཞེས་གསུངས་པ་ལྟར་གཅིག་ལ་མཚོན་ན་ཨོཾ་ལོག་ཏྲི་པ་ལ་ནན་རཀྵ་ཅེས་པ་ལྟ་བུའོ། །དེ་ནས་དྲག་སྔགས་སྤུ་གྲི་རིང་མོ་བཟླ་བར་འདོད་ན་གཅོད་པ་རྩེ་ལ་ཤེས་པར་བྱ་བའི་དོན། ཁྱད་པར་གྱི་དམིགས་གནད་འདི་ཤེས་དགོས་ཏེ། དེ་ལའང་དང་པོ་སྔོན་དུ་འགྲོ་བ་ནི་བྲུབ་ཁུང་བསྐྱེད་པ་ལ་སོགས་ཏེ། དེ་ཡང་དྲང་སྲོང་དྲི་མེད་ཀྱི་ཕྲིན་ལས་རྣམ་བཞིའི་གཞུང་ལས། མདུན་གྱི་བྲུབ་ཁུང་ལྕགས་ཁང་ནག་པོ་གྲུ་གསུམ་པ་དུག་གི་མེ་འབར་བཿ ནད་ཀྱི་ན་བུན་འཐིབས་པཿ མཚོན་ཆའི་ཆར་འབབ་པའི་ནང་དུ་ཕག་སྤྱང་གི་ཐོད་པ་གཤིན་རྗེ་ཕོ་མོ་འཇིགས་སུ་རུང་བ་གཉིས་ཀྱི་བར་དུ་དགྲ་གདོན་བྱད་མ་ཤིན་ཏུ་ཉམ་ཐག་པའི་མཐའ་བསྐོར་དུ་ལྷ་མ་སྲིན་སྡེ་བརྒྱད་མཚོན་ཆ་སྣ་ཚོགས་ཐོགས་པས་རྔམ་ཞིང་ཟ་བར་གྱུརཿ དགུག་གཞུག་དྲག་ཏུ་བྱ་ཞེས་གསུངས་པ་ལྟར་ཏེ་སྔོན་གྱི་བདག་ཉིད་ཆེན་པོ་དག་གིས་བཞེད་པར་ནི། དེ་དག་རྟེན་དངོས་སུ་བཅའ་མི་དགོས་པར་དམིགས་པས་བསྒོམས་ན། དེ་གས་ཆོག་པར་བཞེད་དོ། །དེ་ནས་གཅོད་བྱེད་སྤུ་གྲིའི་དམིགས་གནད་དངོས་ནི། གོང་དུ་སྨོས་པའི་ལུང་གིས་ཀྱང་གསལ་བར་བསྟན་བཞིན་བཤད་མ་ཐག་པའི་ལུང་ལས། ལྕེ་རྡོ་རྗེ་རྩེ་དགུ་བ་ཁོང་སེང་ཅན་རྭ་ཡོད་པའི་རྭ་བར་གྱི་རྩེ་ཐམས་ཅད་དུ་ཕཊ་དམར་པོ་མཆོད་བཅག་པ་ལྟ་བུ་དགུ་ལས་མེའི་ཚྭ་ཚྭ་མང་དུ་འཕྲོས་པས་གནམ་ལྕགས་ཀྱི་རྡོ་རྗེ་འབར་བ་མགར་གྱི་ཚྭ་ཚྭ་ལྟ་བུ་འཕྲོས་པ་གནོད་བྱེད་རྣམས་ལ་ཕོག་པས་ཚག་སྒྲ་དང་བཅས་ཏེ་རྩ་སྦུར་བསྲེགས་པ་བཞིན་དུ་རྡུལ་དུ་བརླགས་པར་བསམ་ལཿ ལོཀ་ཏྲིའི་བསྙེན་སྔགས་བཟླ་ཞེས་གསུངས་པ་ལྟར་རོ། །འདིར་བཟླ་བར་བྱ་བའི་སྔགས་དངོས་ལའང་ཐུན་སྔགས་དང་སྤུ་གྲི་རིང་མོ་གཉིས་ཀ་ཚང་བར་ཞལ་ཤེས་བཞིན་དབྱེ་དགོས་གསུངས་པ་ཡང་འདི་ཡིན་ཏེ། གཅིག་ལ་མཚོན་ན་ཨོ་ལོཀ་ཏྲི་པ་ལ་ནན། རྦད་ཐུ་ཞེས་པ་སྤུ་གྲི་དང་འཇིག་རྟེན་མགོན་པོའི་སྲོག་ཆོད་སྙིང་ཕྱུངས། ཙིཏྟ་མཱ་ར་ཡ་ཐུན་བྷྱོ་རྦད་ཅེས་པ་ཐུན་སྔགས་སུ་ཤེས་དགོས་ཏེ། དེ་བས་ན་འདིར་ཆེད་དུ་བཟླ་བར་བྱ་བ་ནི། དྲག་སྔགས་སྤུ་གྲི་རིང་མོ་ཉིད་ཡིན་པའི་ཕྱིར། དེ་ཉིད་ཕྱེ་ནས་དཀྱུས་སུ་བཀོད་ན་སྡེ་བརྒྱད་བཅུད་ཕུར་ལས། ཡང་དག་གསང་བའི་སྔགས་ནིཿ ཨོཾ་ལོཀ་ཏྲི་པཱ་ལ་ནན་རྦད་ཐུཾཿ ས་ག་པ་ཤ་ནན་རྦད་ལིངཿ ནཱ་ག་དུ་དུ་ནན་རྦད་ཕཊཿ མ་མཾ་མ་མཾ་རྦད་མྱོགསཿ ཙིར་ཙར་ཙིར་ཙར་རྦད་རྦུདཿ བཾ་རུ་ལུ་བཾ་རུ་ལུ་རྦད་ཐུཾཿ རྦད་ཏྲ་ཀོ་ཤ་ཡ་རྦད་ཏྲ་ཀོ་ཤ་ཡ་རྦད་ཁོསཿ ཧོ་ར་ཧོ་ར་ནན་རྦད་ཤགསཿ ཙི་དུ་སོད་ཙི་དུ་སོད་རྦད་ཤིགཿ ཤིགས་ལྷུ་རུ་གཏུབས་རྦད་མྱོགསཿ ཧ་ལ་པཱ་ཏི་ནན་རྦད་རྨུགསཿ འཁོར་བ་ཐུལ་རྦད་ཆོམསཿ རྒྱལ་བསེན་གནོད་བྱེད་ཀཱ་ཝཱ་ཙི་བརློག་བརློག་རྦད་ཧུརཿ འབྱུང་བོ་ཐམས་ཅད་ཀ་ཏྲི་ཀུ་ཏྲི་སོདཿ རྒྱལ་པོ་ཐམས་ཅད་ར་ཙ་ཧབ་ལེ་ཧབ་ལེ་སོདཿ ཀླུ་ཐམས་ཅད་ནཱ་ག་ལིང་ནཱ་ག་ལིང་སོདཿ འབྱུང་བོ་ཐམས་ཅད་འགུག་གེ་འགུག་གེ་སོདཿ གཟའ་ཐམས་ཅད་ཐེ་རྩེ་ཐེ་རྩེ་སོདཿ ཐེའུ་རང་ཐམས་ཅད་ར་ཏྲི་ར་ཏྲི་མཱ་ར་ཡ་སོདཿ སྲིན་མོ་ཐམས་ཅད་ཏཱ་ཏྲི་ཏཱ་ཏྲི་མཱ་ར་ཡ་སོདཿ དྲི་བོ་ཐམས་ཅད་སུཾ་ཏྲི་སུཾ་ཏྲི་མཱ་ར་ཡ་སོདཿ འབྱུང་བོ་ཐམས་ཅད་ཀུ་ཏྲི་ཀུ་ཏྲི་མཱ་ར་ཡ་སོདཿ གནོད་བྱེད་ཐམས་ཅད་མཱ་ར་ཡ་སོད་སོད་རྦད་རྦད་ཛ་ཛཿ སྤུ་གྲི་དྲག་སྔགས་རིང་མོའོ་ཞེས་གསུངས་པ་ལྟར་རོ། །འོན་ཀྱང་ཐུན་སྔགས་གཏན་ནས་མི་བཟླ་བ་ཡང་མ་ཡིན་ཏེ། དེ་ཉིད་ཀྱི་གཤམ་ལས། དེས་ཀྱང་ཐུལ་བར་མ་གྱུར་ནཿ སྤུ་གྲི་དྲག་སྔགས་རིང་མོ་ལསཿ སྡེ་བརྒྱད་རང་རང་སྲོག་སྔགས་གདགསཿ ཨོཾ་ཏྲང་དུ་ཏྲི་ན་ཏྲང་དུ་ཛཿཛཿ ཨོཾ་ལོཀ་ཏྲི་པཱ་ལ་ནན་རྦད་ཐུཾཿ འཇིག་རྟེན་མགོན་པོའི་སྲོག་ཆོདཿ སྙིང་ཐོནཿ ཙིཏྟ་མཱ་ཡ་ཐུན་བྷྱོ་རྦད་ཅེས་པ་ལ་སོགས་པ་སྤུ་གྲི་དང་ཐུན་སྔགས་སྦྲེལ་ནས་གསུངས་པའི་ཕྱིར་རོ། །མདོར་ན་འདི་དག་གང་ཡིན་ཀྱང་དགོས་པ་དང་བསྟུན་ཏེ། དམིགས་གནད་དང་ལྡན་པའི་སྒོ་ནས་རྩ་སྔགས་ཀྱི་ཤམ་བུར། ཅི་རིགས་པར་བཏགས་ཏེ་བཟླ་བར་བྱ་བ་ཉིད་ཡིན་གྱི། ཞི་བསྙེན་དང་སྒྲུབ་པའི་རྩ་བསྙེན་གང་ཡང་མ་སོང་བར་དྲག་སྔགས་ཉིད་ཐུབ་ཆོད་དུ་བཟླས་པས་ནི་རྒྱལ་འགོང་འདུལ་བ་ལྟ་ཅི། ཚེ་འདིར་ཡང་སྡེ་བརྒྱད་ལ་མི་ནུས་བཞིན་འགྲས་བཙལ་བས། རང་སྲོག་གི་གཤེད་མར་འགྱུར་ཞིང་། ཕྱི་མར་ཡང་བསམ་སྦྱོར་ངན་པའི་འབྲས་བུས་ངན་སོང་གི་སྡུག་བསྔལ་མུ་མེད་པ་ལ་སྤྱོད་པར་འགྱུར་ཏེ། དེ་བས་ན་ཐོག་མར་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པས་དཀྱུས་ཀྱི་བསྙེན་བསྒྲུབ་ཁོ་ན་ལ་བརྩོན་པ་ཉིད་ནི་ནམ་ཡང་འདོར་དུ་མི་རུང་བའི་སྲོག་གི་ཟུངས་གཅིག་པུ་ཉིད་དུ་ཤེས་པར་བྱ་དགོས་སོ། །གང་ལྟར་ཡང་སྔགས་ཐུན་གྱི་མཚམས་སམ་མཇུག་ཅི་རིགས་པར་ལག་པ་གནམ་ལྕགས་ཀྱི་ཐལ་མོ་རྡེབ་བཞིན་དྲང་སྲོང་གི་དམོད་པ་འདི་ཉིད་རྫས་སྔགས་དང་ལྡན་པས་བསྒྲུབ་པར་བྱ་སྟེ། སྡེ་བརྒྱད་བཅུད་ཕུར་ལས། སྨྱོ་འདུལ་ཟོར་ཁམ་ནན་བསད་བསྐྲདཿ དྲག་སྔགས་ལན་བརྒྱད་བཟླས་རྗེས་སུཿ བཀའ་ལྟར་མི་བྱེད་ཅེས་སོགས་ཀྱིཿ དམོད་མོ་འབོར་ཞིང་ཐུན་གྱིས་བྲབཿ དྲི་ཆེན་རྟ་བོན་རྫས་ཀྱིས་བདུགཿ གཅན་གཟན་གདུག་པའི་མཆེ་བས་འབྲདཿ དེས་ནི་མི་འདུལ་མི་སྲིད་དོཿ ཞེས་གསུངས་པའི་ཕྱིར་རོ། །དེ་ལྟར་དམོད་བོར་ནས་སླར་ཡང་རིག་སྔགས་ལ་ངེས་ཤེས་བསྐྱེད་པའི་ཕྱིར། བཀའ་བསྒོ་འདི་ཡི་ནུས་པ་ཡིས། །ཅེས་པ་ལ་སོགས་པ་བརྗོད་ཅིང་ཡིད་ལ་བསམ་མོ། །བཞི་བ་མན་ངག་སེམས་ལ་ཤེས་པར་བྱ་བའི་དོན་ནི། གོང་དུ་ཞི་བའི་སྐབས་སུ་ཇི་ལྟར་བཤད་པ་བཞིན་ཐུན་མཐའ་ཀུན་ཏུ། སྙིང་གའི་ཧཱུཾ་ཡིག་ལ་སེམས་རྩེ་གཅིག་ཏུ་གཏད་དེ་དེ་གའི་ངང་དུ་ལྷར་སྣང་རགས་པ་ཐམས་ཅད་བསྡུས་ནས་དམིགས་མེད་ལ་ཅི་གནས་སུ་མཉམ་པར་འཇོག་པའོ། །དེ་དག་གིས་ནི་སྒྲུབ་པའི་དངོས་གཞི་མདོ་ཙམ་སྨྲོས་ནས། གསུམ་པ་རྗེས་ཀྱི་བྱ་བ་ནི། མཆོད་བསྟོད་ཕུལ་ནས་སྤྱོད་ལམ་བསྐྱང་བ་དང་། དྲང་སྲོང་དང་ཆོས་སྐྱོང་རྣམས་ལ་གཏོར་མ་འབུལ་བ། ཚོགས་ལས་ཀྱི་རིམ་པ་ལ་འཇུག་པ་སོགས་ཏེ། དེ་དག་ནི་ཆོག་ཁྲིགས་ཀྱི་དཀྱུས་སུ་ཇི་ལྟར་གསལ་བ་བཞིན་ཐུན་བཞི་ཆར་རམ་ཅི་ནུས་སུ་བརྩོན་པར་བྱའོ། །ཁྱད་པར་སྲོད་ཀྱི་ཐུན་མཇུག་ཏུ་ཉེར་བསྡུ་བསྔོ་སྨོན་ཤིས་བརྗོད་དང་བཅས་པ་བགྱིས་ནས། རྨི་ལམ་འོད་གསལ་གྱི་སྦུབས་སུ་གཞུག་པ་རྣམས་བྱའོ། །རྒྱུན་གྱི་སྤྱོད་ལམ་འདི་དག་གི་དོན་ཡང་། རང་གཞུང་དུ་གསུངས་པ་ནི་འདི་ཡིན་ཏེ། ཉལ་ན་ཆུ་ལ་ལངས་ན་མེཿ འདུག་ན་བྲག་ལ་འགྲོ་ན་རླུངཿ གསལ་བ་དར་ལྡན་སྤྱོད་ལམ་མོཿ ཞེས་པ་སྟེ། དེ་ཡི་དོན་ཡང་། ཉལ་བའི་དུས་སུ་ནི་ལྷ་སྣང་གི་སྤྲོས་པ་ཐམས་ཅད་དེ་བཞིན་ཉིད་དུ་སྡུད་ཅིང་། ཆོས་ཐམས་ཅད་འོད་གསལ་བ་ལ་རྣམ་པར་རྟོག་པའི་གྲྭ་ཟུར་དང་ཁྲོ་བ་མི་མངའ་བས་ན་མཉེན་པའི་རང་བཞིན་ཅན་ཏེ། རྣམ་པ་གཅིག་ཏུ་ན་ཆུ་ཁམས་རྣམ་པར་དག་པ་ཉིད་དབྱིངས་ཀྱི་ཡུམ་ཆེན་མཱ་མ་ཀིའི་ལམ་ཁྱེར་དང་མ་བྲལ་བར་བྱའོ། །གང་ཞིག་མཉམ་པར་བཞག་པ་ལས་སམ་ཉལ་བ་ལས་ལངས་པའི་དུས་སུ་ནི། ཆུ་ལས་ཉ་འཕར་བའི་ཚུལ་ལམ། ཤིང་ལས་མེ་འབར་བའི་ཚུལ་དུ་ལྷག་པའི་ལྷ་དྲང་སྲོང་ཞི་བའི་རྣམ་པར་གསལ་བའི་ལྷར་སྣང་གི་མེ་དེས་མ་དག་པའི་སྣང་ཞེན་ཐམས་ཅད་བསྲེག་པར་བྱ་བ་དང་། ཡང་ན་མེ་ཁམས་རྣམ་དག་གོས་དཀར་མོའི་ལམ་ཁྱེར་དང་མ་བྲལ་བར་བྱའོ། །ཉིན་སྣང་གི་ལམ་ཁྱེར་བྱེ་བྲག་པ་ལ་ཡང་། གང་དུ་འདུག་པའི་དུས་སུ་ནི་རྟེན་གནས་ཀྱི་རྣམ་པར་སྣང་བ་རྣམས་ཀྱང་སྲ་ཞིང་བརྟན་པ་ས་ཡི་ཁམས་ཉིད་རྣམ་པར་དག་པ་ཡུམ་ཆེན་སངས་རྒྱས་སྤྱན་མའི་མཁའ་ཀློངས་སུ། བརྟེན་པ་བདག་རྒྱུད་ཀྱིས་བསྡུས་པའི་གཟུགས་ཀྱི་ཕུང་བོ་རྣམས་ནི་བདེ་བར་གཤེགས་པ་མ་ལུས་པའི་སྐུ་རྡོ་རྗེའི་བྲག་རི། གཞོན་གཞིག་དང་བྲལ་བ་ཉིད་དོ་སྙམ་དུ་ལམ་ཁྱེར་བྱའོ། །གང་དུ་བསྐྱོད་ནས་འགྲོ་ན་ནི། སྲིད་པའི་རང་བཞིན་གཡོ་བའི་ཆོས་ཅན་ཉིད། རང་དང་གཉིས་སུ་མེད་པའི་རྟེན་ཅིང་འབྲེལ་བར་འབྱུང་བ་ལ་དམིགས་ཏེ། དེའི་དེ་བཞིན་ཉིད་དུ་གྱུར་བ་ཟབ་མོ་སྟོང་བ་ཉིད་ཀྱི་ངང་ནས་འགྲོ་བར་བྱ་བའམ། ཡང་ན་རླུང་ཁམས་རྣམ་དག་དམ་ཚིག་སྒྲོལ་མའི་ལམ་ཁྱེར་ལ་བསླབ་པར་བྱ་སྟེ། འདི་ལ་གཞན་ཡང་དཔྱད་པར་བྱ་བའི་ཡུལ་དུ་མ་ཞིག་ཡོད་མོད་དེ། རེ་ཞིག་དེ་ཙམ་དུ་བསྡུའོ། །དེ་དག་གང་གི་དུས་སུའང་རང་རང་གི་སྐབས་ཀྱི་ལམ་ཁྱེར་རྣམས་མོས་པ་ལམ་བྱེད་ཙམ་མ་ཡིན་པར། ཤིན་ཏུ་གསལ་ཞིང་དེ་དང་དེའི་ང་རྒྱལ་གྱི་ངར་དང་ལྡན་པ་ཞིག་ནི་ཅི་ནས་ཀྱང་དགོས་པར་སྣང་སྟེ། གོང་དུ་གསལ་བ་ངར་ལྡན་ཞེས་གསུངས་པའི་ཕྱིར་རོ། །དེ་དག་གིས་ཁྲོ་བོར་བསྒྲུབ་པའི་ཚུལ་ཅུང་ཟད་སྨྲོས་ཟིན་ཏོ། །སྤྱི་དོན་གསུམ་པ་ལས་ལ་སྦྱོར་བ་ལའང་། གང་ཞིག་དགུག་པ་དང་། བསྐྲད་པ་དང་། བཅིང་བ་དང་། འགྲོ་བ་དང་། གསོ་བ་དང་། གསོད་པ་དང་། གཞན་སྡེ་ཕམ་པར་བྱ་བ་དང་། རང་ཉིད་བསྲུང་བ་དང་། བྱད་ཕུར་བཟློག་པ་ལ་སོགས་པའི་ལས་ཀྱི་རིམ་པ་ཇི་ལྟར་འདོད་པ་རྣམས་ཏེ། འདི་དག་ཀྱང་རང་རང་གི་སྦྱོར་དངོས་རྗེས་གསུམ་ཚང་བའི་སྒོ་ནས་ཉམས་སུ་ལེན་དགོས་མོད་དེ། དེའི་ཚུལ་ནི་མཁས་ཤིང་གྲུབ་པ་བརྙེས་པའི་རིག་འཛིན་དམ་པ་རྣམས་ཀྱིས་ཤིན་ཏུ་གསལ་བར་གཏན་ལ་ཕབ་ཟིན་པས་མ་སྤྲོས་སོ། །འོན་ཀྱང་གོང་དུ་ཇི་ལྟར་སྨྲོས་པ་བཞིན་གྱི་བསྙེན་སྒྲུབ་གནད་དུ་སོང་ཕྱིན་སླར་དམིགས་པའི་བདེ་ཁ་བསྒྱུར་ནས་སྔགས་བཟླས་པ་ཙམ་གྱིས་ཀྱང་། ལས་དེ་དག་འགྲུབ་པ་ལ་ཚེག་མེད་པ་ཡིན་ཏེ། སྔོན་གྱི་དུས་སུ་དྲང་སྲོང་དྲི་མེད་ཀྱི་སྔགས་ལན་བདུན་བཟླས་པ་ཙམ་གྱིས་རྒྱལ་པོ་མྱ་ངན་མེད་ནད་ལས་གྲོལ་པར་མཛད་པ་བཞིན་ནོ། །དེས་ན་ཇི་ལྟར་སྨྲོས་པའི་བསྙེན་སྒྲུབ་ཀྱི་ལག་ལེན་རྣམས་དཔྱིས་ཕྱིན་པར་བགྱིས་ནས། ལྷག་པའི་ལྷ་འདི་ཉིད་ཀྱི་སྒོ་ནས་སྙིགས་དུས་ཀྱི་དམ་སྲི་འབྱུང་བོའི་ཚོགས་རྣམས་མིང་གི་ལྷག་མར་བགྱིད་འཚལ་ལོ། །དེ་ལྟར་བསྙེན་སྒྲུབ་བར་ཆད་མེད་པར་གྲུབ་ནས་མཚམས་འགྲོལ་བ་ལ་བབས་པ་ན། ཁ་སྐོང་གི་སྦྱིན་སྲེག་དང་རྒྱལ་ཐོ་འགྲོལ་བ། གནས་མལ་བསྲུང་བ་སོགས་དང་། ཇི་ལྟར་བསྒྲུབ་པའི་དུས་ཀྱི་སྤངས་བླང་གི་དམ་ཚིག་རྣམས་དང་བཅས་པ་ནི། རང་གཞུང་རྩ་བ་དང་། ཆོ་ག་སྤྱིའི་འགྲོས་ལྟར་ཤེས་པར་བྱའོ། །འདིར་སྨྲས་པ། རིག་སྔགས་གྲུབ་པའི་བསམ་སྦྱོར་མེ་ཆར་གྱིས། །མཐར་ལྟའི་མུ་ལ་སྟེགས་འཆའ་དམ་སྲིའི་མགོ །གཅིག་ཅར་འགེམ་མཛད་འཕྲུལ་གྱི་མཚོན་འཁོར་འདི། །དྲང་སྲོང་རིག་འཛིན་བརྒྱུད་པའི་ཕྱག་ཆ་ཡིན། །ལྷ་དང་བླ་མ་གསང་བདག་དངོས་ཞེས་ནམ་ཡང་འགྱུར་མེད་མོས་གུས་ཀྱིས། །ཅིར་སྣང་གདམས་པར་འཆར་བའི་གསོལ་འདེབས་སྙིང་ལ་རི་མོ་བྲིས་པ་དེའི། །བཤུལ་ལམ་ལོག་སྨྲས་བསུབས་པར་ནུས་མིན་རྟེན་འབྲེལ་ཟབ་མོས་ཉེར་བསྐུལ་ཏེ། །འདི་ན་སླར་ཡང་གཟིགས་མོ་རྣམ་བཀྲ་མཆོག་དགའི་བློ་གྲོས་མགྲོན་དུ་བཀུགས། །ཆོས་ཚུལ་སྣང་བ་ཤིན་ཏུ་རྒྱ་ཆེ་ཉི་མ་ཟླ་བའི་རྗེས་སོང་ཡང་། མཚན་མོར་གྱུར་གང་སྒྲོན་མེའི་འོད་ལ་སྣང་གསལ་མཆོག་ཏུ་འཛིན་པ་ལྟར། །གཞུང་ལུགས་ཀུན་མཁྱེན་མཁས་མཆོག་རྣམས་ལ་འདི་ཡིས་དགོས་པ་ཡོད་མིན་ཀྱང་། །རང་དང་རང་འདྲའི་བློ་རྨོངས་གང་དག་ལམ་ཕྱོགས་ཙམ་ཞིག་མཐོང་ཕྱིར་ཡིན། །མཐུ་སྟོབས་རླན་བྲལ་འགོང་གཟུགས་སྦུར་མའི་ཕུང་། །འཇིགས་འཇིགས་རི་བོའི་ཟོལ་གྱིས་གནས་པ་ཀུན། །ཁྲོ་གཏུམ་མི་བཟད་དྲག་སྔགས་མེ་ཆེན་འདིས། །རྔམས་རྔམ་ཟ་བཞིན་ལྷག་མེད་བསྲེག་གྱུར་ཅིག །ཅེས་སྔགས་རྒོད་ལོག་ཏྲི་པཱ་ལའི་བསྙེན་སྒྲུབ་ཅི་ལྟར་བྱ་བའི་མན་ངག་གི་ཡི་གེ་གནམ་ལྕགས་ཞུན་མའི་མཚོན་འཁོར་ཞེས་བྱ་བ་འདི་ནི། མང་དུ་ཐོས་པའི་བློ་གྲོས་ཀྱི་པདྨོ་རྣམ་པར་བཞད་ཅིང་ལྷག་པའི་ལྷ་རབ་འབྱམས་ཀྱི་བསྐྱེད་རྫོགས་ལ་གཅེས་ནོར་དུ་འཛིན་པའི་དགེ་སློང་རྡོ་རྗེ་འཛིན་པ་བྱམས་པ་ཕྲིན་ལས་ཡོན་ཏན་ནས་ལྷ་རྫས་ཀྱི་མེ་ཏོག་དང་བཅས་ཇི་ལྟར་བསྐུལ་བཞིན། རྨ་བན་རིན་ཆེན་མཆོག་གིས་བྱིན་གྱིས་བརླབས་ཤིང་། རོང་སྟོན་ཤེས་བྱ་ཀུན་གཟིགས་ལ་སོགས་གྲུབ་བརྙེས་ཀྱི་རིག་འཛིན་དུ་མས་རིམ་པར་ཞབས་ཀྱིས་བཅག་པའི་གདན་ས་ཆེན་པོ་དཔལ་ན་ལེནྟྲའི་ཆོས་སྡེ་རུ། ༧གྲུབ་དབང་རྫོགས་ཆེན་པ་ཡབ་སྲས་ཀྱི་བཀའ་འབངས་སུ་གཏོགས་པའི་མདོ་ཁམས་ཀྱི་བནྡེ་ཆོས་སྨྲ་བ་གཞན་ཕན་མཐའ་ཡས་འོད་ཟེར་དུ་འབོད་པས་ལེགས་པར་སྦྱར་བ་འདིས་ཀྱང་སྙིགས་དུས་ཀྱི་རྒྱལ་འགོང་དམ་སྲིའི་ཚོགས་མ་ལུས་པ་རྣམས་ལྷར་སྣང་ཕྱག་རྒྱ་ཆེན་པོའི་ཟིལ་འོག་ཏུ་ནོན་པར་གྱུར་ཅིག་གུ། །སརྦ་མངྒ་ལཾ། །