ཕྱི་ནང་གི་གྲུབ་མཐའ་མདོར་བསྡུས་སུ་བཀོད་པ་འཇམ་མགོན་ཞལ་ལུང་།

༄༅། །ཕྱི་ནང་གི་གྲུབ་མཐའ་མདོར་བསྡུས་སུ་བཀོད་པ་འཇམ་མགོན་ཞལ་ལུང་ཞེས་བྱ་བ་བཞུགས་སོ། །ངག་གི་དབང་ཕྱུག་འཇམ་དབྱངས་མཁྱེན་པའི་གཏེར། །དབྱངས་སྙན་རྒྱུད་མང་འཁྲོལ་བའི་མཚོ་བྱུང་མ། །སྙིང་ལ་རྟག་ཏུ་མཛའ་བའི་བློ་གྲོས་མིག །ཐུབ་བསྟན་རྒྱ་མཚོའི་མགོན་རྣམས་ཕྱག་གི་ཡུལ། །བསྟན་ལ་མཁས་པར་འདོད་རྣམས་སྨྲ་བའི་རྒྱན། །རང་གཞན་གྲུབ་མཐའི་གནས་ལ་བསླབ་པ་གཅེས། །དེ་ཕྱིར་ཐོ་ཅོལ་སྨྲ་ལ་བྲེལ་བ་ཡི། །བྱིས་པའི་བློ་ཡང་གྲུབ་མཐའ་འཆད་ལ་སྤྲོ། །ཚེ་རབས་སྔ་ཕྱི་དགེ་སྡིག་རྒྱུ་འབྲས་སོགས། །མེད་པར་འདོད་པ་རྒྱང་འཕེན་པ་ཡི་ལུགས། །སྐྱེ་ཀུན་ངོ་བོ་ཉིད་ལས་འབྱུང་ངོ་ཞེས། །ཚུལ་འདི་འཆད་རྣམས་ཆད་ལྟའི་རྗེས་འབྲང་ཡིན། །གཅེར་བུ་པ་རྣམས་དགེ་སྡིག་བསླུ་མེད་ཀྱི། །འབྲས་བུ་འདོད་ཕྱིར་ལས་རྣམས་མ་ཟད་བར། །ཐར་བ་མིན་པས་ལས་འབྲས་ཟད་ཕྱིར་བརྩོན། །དེ་ཡང་སྔར་བྱས་དཀའ་ཐུབ་མཐུ་ཡིས་ཟད། །ཕྱིན་ཆད་མི་བྱའི་སྡོམ་པ་ལྡན་གྱུར་ན། །འཇིག་རྟེན་སྟེང་དུ་གདུགས་བཀན་ལྟ་བུ་ཡི། །གནས་སུ་ཐར་བར་འདོད་པ་འདི་ཡི་ལུགས། །གྲངས་ཅན་པ་རྣམས་འཁོར་བ་སྣང་བའི་གཞི། །ཤེས་རིག་སྐྱེས་བུ་སྙིང་དཀྱིལ་ཡོད་པར་འདོད། །དེ་ཉིད་བསམ་གཏན་བསྒོམས་པས་རིག་བྱས་ཏེ། །སྣང་བ་བསྡུས་ནས་གྲོལ་པ་ཐོབ་ཅེས་སྨྲ། །མུ་སྟེགས་འགའ་ཞིག་ཚངས་པ་དབང་ཕྱུག་དང་། །ཁྱབ་འཇུག་རྣམས་ཀྱིས་འཇིག་རྟེན་བྱས་པར་འདོད། །དེ་ཡི་ལུགས་ལ་ལྷ་གཉིས་ཐལ་འགྱུར་ཞེས། །མཆོད་སྦྱིན་རྒྱ་ཆེར་བགྱིད་པ་དེ་རྣམས་སྲོལ། །ཁ་ཅིག་དྲི་མ་སེམས་ཀྱི་ཆོས་ཉིད་ཀྱིས། །ཆགས་སོགས་སྤངས་པས་ཐར་བ་མིན་ཞེས་སྨྲ། །འདི་རྣམས་ལུགས་ཀྱི་བསམ་གཟུགས་ཙམ་ཐོབ་ཀྱང་། །བདག་མེད་གནས་ལུགས་རྟོགས་པའི་སྐབས་མེད་པས། །ཐར་བ་ཡང་དག་ཐོབ་པར་མི་འགྱུར་བས། །ཕྱི་རོལ་གྲུབ་མཐའི་ལུགས་ཞེས་སྨོད་པའི་གཞི། །གྲུབ་མཐའ་མདོར་བསྡུས་ལས་ཕྱི་རོལ་པའི་གྲུབ་མཐའ་མདོར་བསྡུས་སོ། །སངས་རྒྱས་པ་ལ་གྲུབ་མཐའ་སྨྲ་བ་བཞི། །བྱེ་སྨྲས་ཤེས་བྱ་ཐམས་ཅད་གཞི་ལྔར་བསྡུས། །སྣང་བ་གཟུགས་ཀྱི་གཞི་ལ་ཕྱི་ནང་གཉིས། །གཟུགས་སོགས་དོན་ལྔ་ཕྱི་ཡི་གཟུགས་དང་ནི། །དྭངས་པའི་དབང་པོ་ནང་གི་གཟུགས་སུ་བཤད། །སེམས་ཀྱི་ གཞི་ནི་རྣམ་ཤེས་ཚོགས་དྲུག་དང་། །སེམས་བྱུང་ཀུན ་འགྲོ་ལ་སོགས་ལྔ་བཅུ་གཅིག །མིང་ཚིག་ཕྱོགས་དུས་ལྡན་མིན་འདུ་བྱེད་དེ། །ནང་གསེས་དབྱེ་བ་བཅུ་བཞིར་མངོན་པར་གསུངས། །ནམ་མཁའ་འགོག་པ་རྣམ་གཉིས་འདུས་མ་བྱས། །གཞན་དུ་བདག་མེད་དེ་བཞིན་ཉིད་གཞིར་གསུངས། །རྡུལ་ཕྲན་སྐད་ཅིག་ཆ་ཤས་ཀུན་རྫོབ་དང་། །ཆ་མེད་དོན་དམ་བདེན་པ་རྟག་པར་འདོད། །མདོ་སྡེ་བ་རྣམས་སྣང་བ་སེམས་སུ་འདོད། །རྣམ་པ་གཏོད་བྱེད་རྡུལ་ཕྲན་ཕག་ན་ཡོད། །ནང་གསེས་གྲུབ་མཐའི་དབྱེ་བ་གཞན་ལས་ཤེས། །མདོར་ན་ཆོས་ཀུན་བདག་མེད་གཏན་ལ་དབབ། །ཁམས་གསུམ་འདོད་ཆགས་བྲལ་བ་འབྲས་བུར་བཞེད། །རྣམ་རིག་པ་རྣམས་ཚོགས་དྲུག་སྣང་བ་ཀུན། །སེམས་ཙམ་ལས་ཡིན་ཕྱི་དོན་མ་གྲུབ་ཅིང་། །མྱོང་བ་གསལ་རིག་ཆ་འདི་བདེན་གྲུབ་བཞེད། །གྲུབ་མཐའི་དབྱེ་བ་གཞན་ཡང་ཤེས་པར་བྱ། །དབུ་མ་པ་ལ་རང་སྟོང་གཞན་སྟོང་གཉིས། །རང་སྟོང་སྨྲ་ལ་ཐལ་འགྱུར་རང་རྒྱུད་དེ། །ཀུན་རྫོབ་ཆོས་ཅན་སྒྱུ་མ་ལྟ་བུ་དང་། །དོན་དམ་ཆོས་དབྱིངས་ངོ་བོ་ཉིད་མེད་ཀྱི། །སྤྲོས་བྲལ་འདོད་པ་དབུ་མ་སྤྱི་ཡི་ལུགས། །རང་རྒྱུད་པ་ལ་ཀུན་རྫོབ་ཡང་ལོག་དང་། །ཐ་སྙད་ཚད་གྲུབ་གཞན་སྐྱེ་འདོད་པ་སོགས། །ཁྱད་པར་ཅུང་ཟད་ཙམ་ལས་དོན་དམ་མཐུན། །ཀུན་རྫོབ་ཡིན་ན་ཡང་དག་མེད་པ་དང་། །དོན་དམ་དཔྱད་མཐར་འཇོག་པ་ཐལ་འགྱུར་ལུགས། །དང་པོ་རྣལ་འབྱོར་སྤྱོད་དང་ཕྱི་མ་ནི། །འཇིག་རྟེན་གྲགས་སྡེ་སྤྱོད་པའི་དབུ་མར་གྲགས། །འདི་གཉིས་ངོ་བོ་ཉིད་མེད་སྨྲ་བའི་ལུགས། །འཁོར་ལོ་བར་པ་རིགས་ཚོགས་རྗེས་འབྲང་བཞེད། །གྲུབ་མཐའ་མདོར་བསྡུས་ལས་སངས་རྒྱས་པའི་སྐབས་སོ། །ཁྱད་པར་ཟབ་མོ་གཞན་སྟོང་དབུ་མའི་ཚུལ། །ཆོས་ཀུན་རང་བཞིན་གསུམ་དུ་བསྡུ་བར་བཞེད། །སྟོང་པ་ཉིད་ལ་ཀུན་རྫོབ་དོན་དམ་གཉིས། །ཀུན་རྫོབ་སྟོང་ཉིད་རྟེན་འབྲེལ་ངོ་བོས་སྟོང་། །དོན་དམ་སྟོང་ཉིད་རྟེན་འབྲེལ་ལས་འདས་པའི། །ཆོས་ཉིད་ངོ་བོ་རྟག་བརྟན་གཞན་སྟོང་གསུངས། །བདེ་གཤེགས་སྙིང་པོ་འོད་གསལ་ཆོས་ཀྱི་སྐུ། །གཉུག་མ་ལྷན་སྐྱེས་གཞོམ་མེད་བདེ་བ་ཆེ། །ཕྱི་ནང་གཞན་གསུམ་ངོ་བོར་མཁའ་ལྟར་ཁྱབ། །ཡོན་ཏན་ཡེ་ལྡན་རང་བཞིན་རྣམ་དག་བཞེད། །དྲི་མ་གློ་བུར་རླུང་གི་རྒྱུ་བ་བཅས། །ཁམས་གསུམ་སེམས་དང་སེམས་ལས་བྱུང་བ་ཡི། །འཕོ་བའི་བག་ཆགས་མ་སྤངས་པ་ཉིད་བཞེད། །ཀུན་གཞིའི་ཆ་ལ་རྣམ་ཤེས་ཡེ་ཤེས་གཉིས། །རྣམ་ཤེས་འཁྲུལ་ཆ་ཀུན་ཏུ་བརྟགས་པ་ཙམ། །ཡེ་ཤེས་དོན་དམ་ཡོངས་གྲུབ་དབུ་མ་ཉིད། །ཆོས་སྐུའི་ཡོན་ཏན་གདོད་ནས་ལྷུན་གྲུབ་ལ། །གཟུགས་སྐུའི་ཡོན་ཏན་སྔར་མེད་གསར་སྐྱེས་གསུངས། །མདོར་ན་དབུ་མ་ཐམས་ཅད་དགོངས་པའི་མཐིལ། །བཟང་མཉམ་ཡིན་ཞེས་མཁས་གྲུབ་ཚད་མས་གསུངས། །ཁྱད་པར་མདོ་སྔགས་དགོངས་པ་གཅིག་སྒྲིལ་གྱི། །ངེས་དོན་མཐར་ཐུག་དབུ་མ་འདི་ཡིན་ཞེས། །གཟུར་གནས་མཁས་པའི་ཚོགས་རྣམས་མགྲིན་གཅིག་བསྔགས། །གངས་ཅན་ལྗོངས་སུ་མ་ཕམ་གཉིས་པའི་གཟུགས། །ཀུན་མཁྱེན་ཡུ་མོ་བ་དང་དོལ་བོའི་ཞབས། །པད་དཀར་འཆང་བ་རང་བྱུང་རྡོ་རྗེ་སོགས། །འཛམ་གླིང་བསྟན་པའི་རྒྱན་གྱུར་འདི་རྣམས་ཀྱི། །ཐུགས་དམ་ཉམས་བཞེས་རྩ་བ་ཡིན་པས་ན། །ཡང་དག་ལམ་བཟང་ཚོགས་རྣམས་མཁྱེན་པར་མཛོད། །གྲུབ་མཐའ་མདོར་བསྡུས་ལས་ངེས་དོན་དབུ་མའི་རྣམ་གཞག་མདོར་བསྡུས་པའོ། །དེ་ལྟར་ཕྱི་ནང་བཞེད་གཞུང་མདོར་བསྡུས་འདི། །དམ་པ་དགྱེས་པའི་མཆོད་སྤྲིན་མ་ལགས་ཀྱང་། །སྙིང་ནས་ཆོས་ལ་གུས་པའི་བློ་ཆུང་རྣམས། །ཅི་དགར་སྤྱོད་པའི་དགའ་སྟོན་མཚོན་བྱེད་ཡིན། །འདི་འཆད་རྣམ་དཀར་ཉིན་བྱེད་གསར་བ་ཡིས། །ཐེག་གསུམ་སྦྲང་རྩིའི་རྒྱལ་མཚན་རྒྱས་གྱུར་ཏེ། །ཐུབ་བསྟན་ཕྱོགས་ཀུན་སྣང་བས་ཡིད་འཕྲོག་རོལ། །སྐལ་བཟང་འགྲོ་ཀུན་ཚིམས་པའི་རྒྱུར་གྱུར་ཅིག །ཅེས་པ་འདིའང་ཉམས་མཚར་ཀུ་རེའི་ཚུལ་གྱིས་ཤཱཀྱའི་དགེ་སློང་འཇམ་དབྱངས་བློ་གྲོས་གཞན་ཕན་མཐའ་ཡས་ཀྱིས་རྡོ་གཡུ་ཐོའི་དགོན་དུ་ཕྱི་དྲོའི་ཐུན་མཚམས་ཞིག་ལ་བྲིས་པའོ། །དགེ་ལེགས་འཕེལ། །