འོག་མིན་གཉིས་པ་ཨོ་རྒྱན་སྨིན་གྲོལ་གླིང་ནས་དྲི་བ་ཇི་ལྟར་ཕེབས་པ་རྣམས་ཀྱི་དྲིས་ལན་སྐོར།

༄། །འོག་མིན་གཉིས་པ་ཨོ་རྒྱན་སྨིན་གྲོལ་གླིང་ནས་དྲི་བ་ཇི་ལྟར་ཕེབས་པ་རྣམས་ཀྱི་དྲིས་ལན་སྐོར་བཞུགས་སོ། །རྣམ་དག་རིགས་པས་གྲུབ་དོན་སྤྲོས་བྲལ་ལས། །མི་འགྱུར་ལྷན་སྐྱེས་མཆོག་ཏུ་བདེ་བའི་དངོས། །དཀྱིལ་འཁོར་རྒྱ་མཚོའི་ཁྱབ་བདག་ཧེ་རུ་ཀར། །ཡོངས་ཤར་དྲིན་ཆེན་བླ་མས་དགེ་ལེགས་སྩོལ། །གང་ཞིག་དཀའ་གནས་དགྲོལ་བའི་ལེགས་བཤད་རྣམས། །དམ་པའི་ཞལ་གྱི་བདུད་རྩི་ལས་ཐོས་བཞིན། །འདིར་ཡང་བློ་ལྡན་དགྱེས་པ་བསྐྱེད་པའི་ཕྱིར། །ཆ་ཤས་ཙམ་ཞིག་ཟུར་དུ་འགོད་པར་བྱ། །དེ་ཡང་འདིར་དམ་པ་གང་ལས་དྲི་བ་ཇི་ལྟར་ཕེབས་པའི་དོན། རང་རེའི་རྒྱུད་བཤད་ཀྱི་གཞུང་ལས་རྡོ་རྗེའི་ཆོས་བདུན་གྱི་དོན་བཤད་རྡོ་རྗེ་རྣམ་པར་འཇོམས་པའི་གཟུངས་ལ་ཁ་འཕངས་པ་ལས་ཞིབ་པར་མ་གསུངས་པར་འདུག་ཕྱིར་དེའི་དོན་གང་ཡིན་དང་། དབང་གི་སྐབས་སུ་དབང་གི་གེགས་བརྒྱད་བཤད་ནས་ཟེར་བ་དེ་གང་ཡིན་དང་། འབྲས་དུས་ཀྱི་ཁ་སྦྱོར་ཡན་ལག་བདུན་ལྡན་དེ་གང་ལྟར་ཡིན་རྣམས་གསལ་པོར་དགོས་ཞེས་གསུངས་པའི་དོན་ལ། ལེགས་པར་དཔྱད་ན་གཞིའི་ཆོས་ཉིད་རྡོ་རྗེ་ཆོས་བདུན་ལྡན་དུ་གནས་པ་དང་། ལམ་དུས་ཀྱི་འཇུག་སྒོ་དབང་གི་གེགས་བརྒྱད་བཤད་པ་དང་། གསང་སྔགས་རྡོ་རྗེ་ཐེག་པའི་ལམ་དུས་ཀྱི་རྫོགས་རིམ་ཁྱད་པར་ཅན་ཉམས་སུ་བླང་བའི་འབྲས་བུ་ཐུན་མོང་མ་ཡིན་པ་ཁ་སྦྱོར་ཡན་ལག་བདུན་གྱི་ལོངས་སྤྱོད་རྫོགས་པའི་སྐུ་མངོན་དུ་ཇི་ལྟར་བྱེད་པའི་ཚུལ་ལ་སོགས་ཞིབ་ཆར་བརྗོད་ན་གཞི་ལམ་འབྲས་བུའི་རྣམ་གཞག་ཡི་གེའི་སྤོམ་མང་ཙམ་ཞིག་འབྱུང་བར་སྣང་ཡང་། རེ་ཞིག་བྲེལ་བའི་དབང་གིས་དེ་དག་གི་འགྲོས་སྤྱི་རྣམས་གཞུང་གཞན་ལས་རྟོགས་པར་འགྱུར་བའི་དབང་དུ་བྱས་ཏེ་འདིར་བཏང་སྙོམས་སུ་བཞག་ནས། བརྗོད་དོན་དངོས་ལ་འཇུག་པར་བྱེད་པ་ལས། ཐོག་མར་རྡོ་རྗེའི་ཆོས་བདུན་ལྡན་གྱི་དོན་བཤད་པ་ལ། སྤྱིར་རྡོ་རྗེ་ཞེས་པའི་སྒྲ་གང་ལ་འཇུག་པའི་གཞི་ངོས་བཟུང་བ་དང་། དེའི་དོན་བཤད་པ་གཉིས་ལས། དང་པོ་ལའང་མཚོན་བྱེད་རྫས་ཀྱི་རྡོ་རྗེ་དང་། མཚོན་བྱ་དོན་གྱི་རྡོ་རྗེ་གཉིས་ཀྱི་དང་པོ་ནི། བཛྲ་གྱི་སྒྲ་ལས་རྡོ་རྗེ་སྟེ། དེ་ཡང་འཇིག་རྟེན་ན་རྡོ་བ་རྣམས་ནི་སྲ་ཞིང་མཁྲེགས་པར་བརྩི་བ་ལ། དེ་ལས་ཀྱང་ཆེས་ཆེར་སྲ་བའི་མཆོག་ཏུ་གྱུར་པས་ན་རྡོ་ཐམས་ཅད་ཀྱི་རྗེ་བོའི་ཐ་སྙད་སྦྱར་ཏེ། དེ་གང་ཞེ་ན་སྔོན་གྱི་དུས་སུ་དྲང་སྲོང་ཞོ་འཐུང་ཞེས་བྱ་བ་ཞིག་བྱུང་ཞིང་། དེའི་ཐུགས་བསྐྱེད་ཀྱི་མཐུ་ལས་རང་གི་རུས་པ་ཐམས་ཅད་རྡོ་རྗེ་ཕ་ལམ་ཞེས་བྱ་བའི་རིན་པོ་ཆེ་འབའ་ཞིག་ཏུ་གྱུར་ཏེ། རྒྱུ་དེ་ལས་གྲུབ་པ་བརྒྱ་བྱིན་གྱི་རྡོ་རྗེ་རྩེ་བརྒྱ་བ་དང་། ཁྱབ་འཇུག་གི་འཁོར་ལོ་དང་། དབང་ཕྱུག་གི་མདུང་ཐུང་རྣམས་ཀྱང་ཡིན་ནོ་ཞེས་རིག་བྱེད་ཀྱི་གཞུང་ལས་ཀྱང་གྲགས་ལ། གཞན་དུ་རྒྱ་གར་རྡོ་རྗེ་གདན་དུ་དྲང་སྲོང་དེ་ཉིད་ཀྱི་རུས་པ་འཐོར་བའི་ཕྱིར་བསྐལ་བའི་མེས་ཀྱང་མི་འཇིག་པའི་རྒྱུ་མཚན་ཡང་དེ་ཡིན་ནོ་ཞེས་གྲགས་སོ། །དེ་ལྟ་བུའི་རྡོ་རྗེ་དེ་ནི་དམ་བཅའ་བཞི་དང་ལྡན་པའམ་རྡོ་རྗེའི་ཆོས་བདུན་དང་ལྡན་པ་ཞིག་སྟེ་འོག་ནས་འཆད་དོ། །གཉིས་པ་མཚོན་བྱ་དོན་གྱི་རྡོ་རྗེ་ནི། དཔེ་དེ་ཉིད་ཀྱིས་ཉེ་བར་མཚོན་ནུས་པ་ཞིག་སྟེ། དེ་གང་ཞེ་ན། ཆོས་གཟུགས་ཀྱི་ཟླས་ཕྱེ་བའི་ཆོས་ཀྱི་སྐུ་དང་། སྣང་སྟོང་གི་ཟླས་ཕྱེ་བའི་སྟོང་བ་ཉིད་དང་། ཐབས་ཤེས་ཀྱི་ཟླས་ཕྱེ་བའི་ཤེས་རབ་ཁྱད་པར་ཅན་རྣམས་ཏེ། དེ་ཡང་ཆོས་ཀྱི་སྐུ་དང་། དེའི་ཆོས་ཉིད་སྟོང་བ་ཉིད་ལ་རྡོ་རྗེའི་སྒྲ་འཇུག་པ་ནི། རྡོ་རྗེ་རྣམ་པར་འཇོམས་པའི་གཟུངས་ཀྱི་རྒྱ་ཆེར་འགྲེལ་བ་གསལ་བའི་སྒྲོན་མེ་ཞེས་བྱ་བ་སློབ་དཔོན་ཡེ་ཤེས་རྡོ་རྗེས་མཛད་པ་པཎ་ཆེན་སངས་རྒྱས་གསང་བ་དང་སྐ་བ་དཔལ་བརྩེགས་ཀྱི་འགྱུར་ལས། རྡོ་རྗེ་ཞེས་བྱ་བ་ནི་རང་གི་དོན་ཕུན་སུམ་ཚོགས་པ་སྟེ། ཆོས་ཀྱི་སྐུ་སྟོང་བ་ཉིད་དོ། །ཞེས་དང་རང་གཞུང་ལས་ཀྱང་། རྡོ་རྗེ་སྟོང་བ་ཉིད་ལ་བྱ། སེམས་དཔའ་ཡེ་ཤེས་ཆེན་པོ་སྟེ། ཞེས་སོགས་གསུངས་པ་ལྟར་རོ། །དེ་ཉིད་རྟོགས་བྱེད་ཀྱི་ཤེས་རབ་ཁྱད་པར་ཅན་ལ་ཡང་རྡོ་རྗེའི་སྒྲ་འཇུག་པ་ནི། རྡོ་རྗེ་རྣམ་པར་འཇོམས་པའི་གཟུངས་ཀྱི་འགྲེལ་བ་རིན་ཆེན་ཕྲེང་བ་ཞེས་བྱ་བ་སློབ་དཔོན་ཆེན་པོ་པོ་ཝ་རི་བས་མཛད་པ་ལས། རྡོ་རྗེ་ནི་འཇོམ་བྱ་འཇོམས་པ་ལ་བྱ། ཁྲོ་བོ་ནི་འཇོམ་བྱེད་ལ་བྱའོ། །དེའི་དོན་ནི་ཤེས་རབ་དང་སྙིང་རྗེ་ཞེས་པའོ། །ཞེས་རྡོ་རྗེ་ནི་ཤེས་རབ་ཀྱི་དོན་ཅན་དུ་སྨྲས་སོ། །དེ་ལྟར་ན་དེ་དག་རྫས་རྡོ་རྗེ་ཕ་ལམ་གྱིས་ཇི་ལྟར་མཚོན་ནུས་ཞེ་ན། རྒྱུ་མཚན་དེ་སྨྲོས་པའི་ཕྱིར་འགྲེལ་ཆེན་གསལ་སྒྲོན་ལས། ཆོས་ཀྱི་སྐུ་སྟོང་བ་ཉིད་ལ་རྡོ་རྗེར་འདོག་པའི་རྒྱུ་མཚན་དགོས་པ་ཅིའི་ཕྱིར་ཞེ་ན། སྟོང་བ་ཉིད་ལ་རྡོ་རྗེར་འདོག་པའི་རྒྱུ་མཚན་ནི། འདུས་བྱས་རྫས་ཀྱི་རྡོ་རྗེ་ཕ་ལམ་དང་ཆོས་མཐུན་པ་རྣམས་ཡོད་དེ། རྡོ་རྗེ་ཕ་ལམ་ལ་མི་ཆོད་པ་བྱ་བ་ནས། མ་ཕམ་པ་བྱ་བའི་བར་དུ་ཆོས་བདུན་ཡོད་པ་དེ་བཞིན་དུ། ཆོས་ཀྱི་སྐུ་སྟོང་བ་ཉིད་ལ་མི་ཆོད་པ་བྱ་བ་ནས་ཐམས་ཅད་དུ་མ་ཕམ་པ་བྱ་བའི་བར་དུ་ཆོས་བདུན་ཡོད་དོ། །ཞེས་གསུངས་པ་ལྟར་རྡོ་རྗེའི་ཆོས་བདུན་དཔེ་དོན་གཉིས་ཀར་མཚུངས་པར་སྦྱར་དུ་ཡོད་པའི་ཕྱིར་ན་མཚོན་ནུས་སོ། །གཉིས་པ་དེའི་དོན་བཤད་པ་ལ་དཔེ་དོན་གཉིས་ལས། དང་པོ་དཔེ་འདུས་བྱས་རྫས་ཀྱི་རྡོ་རྗེ་ཕ་ལམ་གྱི་དོན་བཤད་པ་ལའང་གོང་སྨྲོས་ལྟར་གཉིས་ལས། དང་པོ་དམ་བཅའ་བཞི་ལྡན་ནི་རྒྱུ་དེ་ལས་གྲུབ་པ་དབང་པོའི་རྡོ་རྗེ་ལ་སོགས་པ་ལ་ཆེད་དུ་གྲགས་ཏེ། དེ་གང་ཞིག་ལག་ཏུ་བླང་ནས་མི་འཕེན་མི་སྲིད་པ་དང་། འཕངས་ནས་མི་ཕོག་མི་སྲིད་པ་དང་། ཕོག་ནས་མི་འཆི་མི་སྲིད་པ་དང་། ཤི་ནས་ངན་སོང་དུ་ལྟུང་མི་སྲིད་པ་དང་བཞི་ཡིན་ནོ། །ཞེས་རིག་བྱེད་ཀྱི་གཞུང་ལས་གྲགས་སོ། །གཉིས་པ་རྡོ་རྗེ་དེ་ལ་ཆོས་བདུན་དང་ལྡན་པ་ནི། དེ་ཡིན་པ་གང་ཞིག་ལ། ས་ཡིས་མི་ཆོད་པ་དང་། ཆུས་མི་ཤིགས་པ་དང་། མེ་ཡིས་བསྲེགས་མི་ནུས་པས་བདེན་པ་དང་། རླུང་གིས་གཏོར་དུ་མེད་པས་སྲ་བ་དང་། བསྐལ་བ་ལ་སོགས་པའི་དུས་ཀྱིས་རྒུད་ནས་འཇིག་པར་འགྱུར་བ་ཡང་མེད་པས་ན་བརྟན་པ་དང་། དེ་ཉིད་ཀྱི་མཐུས་དངོས་པོ་གཟུགས་སུ་གྲུབ་པ་ཐམས་ཅད་ཕར་ཐོགས་མེད་དུ་འབིགས་པར་ནུས་པས་ན་ཐམས་ཅད་དུ་ཐོགས་པ་མེད་པ་དང་། དེ་ལ་ཚུར་དེ་དག་གིས་གནོད་པར་བྱེད་མི་ནུས་པས་ན་ཐམས་ཅད་དུ་མ་ཕམ་པ་ཞེས་སྨྲོས་ཏེ། དེ་སྐད་དུ་ཡང་འགྲེལ་ཆེན་གསལ་སྒྲོན་ལས། འོ་ན་རིན་པོ་ཆེ་རྡོ་རྗེ་ཕ་ལམ་དེ་ལ་ཇི་ལྟར་ས་ཡིས་མི་ཆོད་ཅེ་ན། འབྱུང་བ་ཆེན་པོ་ས་ཡིས་བཅད་པ་དང་གཏུབ་པར་མི་ནུས་པས་ན། མི་ཆོད་པ་ཞེས་གསུངས་སོ། །ས་དག་གིས་བཅད་པར་མི་ནུས་པར་འདུག་སྟེ། རྡོ་རྗེ་ཕ་ལམ་དེ་འབྱུང་བ་ཆེན་པོ་ཆུ་ཡིས་སྤྲུལ་པ་ལ་སོགས་པས་གནོད་པར་བྱ་བར་མི་ནུས་སམ་ཞེ་ན། མ་ཡིན་ཏེ། དེས་གནོད་པར་མི་ནུས་པས་ན་མི་ཤིགས་པ་ཞེས་གསུངས་སོ། །དེ་གཉིས་ཀྱིས་ཀྱང་གནོད་པར་བྱ་བར་མི་ནུས་པས་འདུག་སྟེ། འབྱུང་བ་མེས་ཐལ་བའམ་སོལ་བར་བསྲེག་པར་མི་ནུས་སམ་ཞེ་ན། མ་ཡིན་ཏེ། དེས་བསྲེག་པར་མི་ནུས་པས་ན་བདེན་པ་ཞེས་གསུངས་ཏེ། དེ་གསུམ་གྱིས་ཀྱང་གནོད་པར་བྱ་བར་མི་ནུས་པར་འདུག་སྟེ། རླུང་སྤུ་གྲི་ལྟ་བུས་ཀྱང་གཞིག་པར་མི་ནུས་སམ་ཞེ་ན། དེས་གཞིག་པར་མི་ནུས་པས་ན་སྲ་བ་ཞེས་གསུངས་སོ། །དེ་བཞིས་ད་ལྟར་གནོད་པར་བྱ་བ་མི་ནུས་པར་འདུག་སྟེ། ལོའམ་བསྐལ་བར་ལོན་ནས་གནོད་པར་བྱ་བ་མི་ནུས་སམ་ཞེ་ན་མ་ཡིན་ཏེ། དེ་བཞིས་དུས་ད་ལྟར་གནོད་པར་བྱ་བ་མི་ནུས་པ་བཞིན་དུ། དུས་སམ་གནས་སྐབས་ཐམས་ཅད་དུ་མི་འགྱུར་བས་ན་བརྟན་པ་ཞེས་གསུངས་སོ། །འོ་ན་རྡོ་རྗེ་ཕ་ལམ་དེ་ལ་ཚུར་ལ་གང་གིས་ཀྱང་མི་གནོད་པར་འདུག་སྟེ། རྡོ་རྗེ་ཕ་ལམ་དེ་མཐུ་ཅི་ཙམ་དང་ལྡན་ཞེ་ན། དཔེར་ན་ཐོག་དང་འདྲ་སྟེ་དངོས་པོ་ཐམས་ཅད་འབིགས་པར་བྱེད་པས་ན། ཐམས་ཅད་དུ་ཐོགས་པ་མེད་པ་ཞེས་གསུངས་སོ། །དེ་ལ་ཚུར་ལ་གནོད་པར་མི་འགྲོའམ་ཞེ་ན། མ་ཡིན་ཏེ། རྡོ་རྗེ་རིན་པོ་ཆེ་ཕ་ལམ་དེས་ཕར་ནི་ཐམས་ཅད་འཇོམས་པར་ནུས་ལ། རང་ལ་ཚུར་ལ་གནོད་པ་མི་ནུས་པས་ན། ཐམས་ཅད་དུ་མ་ཕམ་པ་ཞེས་གསུངས་སོ། །ཞེས་ཇི་ལྟར་བཤད་པ་བཞིན་ནོ། །གཉིས་པ་མཚོན་བྱ་དོན་གྱི་རྡོ་རྗེའི་དོན་བཤད་པ་ལའང་། འགྲེལ་བ་རིན་ཆེན་ཕྲེང་བ་ལས། ཤེས་རབ་ཀྱི་དོན་ནི་ཅི་ཞེ་ན། མི་ཆོད་པ། མི་ཤིགས་པ། བདེན་པ། སྲ་བ། བརྟན་པ། ཐམས་ཅད་དུ་ཐོགས་པ་མེད་ཐམས་ཅད་དུ་མ་ཕམ་པའོ། །དེའི་ཐབས་ཀྱི་དོན་ནི་ཅི་ཞེ་ན། སེམས་ཅན་ཐམས་ཅད་སྐྲགས་པར་བྱེད་པ་སོགས་སྨྲོས་ནས་ཤེས་རབ་རྣམ་པར་དག་པས་གཏན་ལ་དབབ་པར་བྱ་བ་ཆོས་ཀྱི་་སྐུ་སྟོང་བ་ཉིད་ཀྱི་དོན་ནི་རྡོ་རྗེའི་ཆོས་བདུན་དང་ལྡན་པར་བཤད་དེ། དེ་ཡང་འགྲེལ་ཆེན་གསལ་སྒྲོན་ལས། དཔེར་ན་རྡོ་རྗེ་ཕ་ལམ་ལ་གཞན་གྱིས་གནོད་པར་བྱ་བར་མི་ནུས་པ་དེ་བཞིན་དུ། སྟོང་བ་ཉིད་ཀྱི་རྡོ་རྗེ་དེ་ལ་ཡང་སྐྱེ་བ་ལ་སོགས་པའི་སྡུག་བསྔལ་གྱིས་མི་གནོད་པས་ན་མི་ཆོད་པ་ལ་སོགས་པ་གསུངས་སོ། །ཞེས་མདོར་བསྟན་པའི་དོན། སྐྱེ་བའི་སྡུག་བསྔལ་གྱིས་མི་གནོད་པས་མི་ཆོད་པ་དང་། རྒས་པའི་སྡུག་བསྔལ་གྱིས་མི་གནོད་པས་མི་ཤིགས་པ་དང་། གནས་པའི་སྡུག་བསྔལ་གྱིས་མི་གནོད་པས་ན་བདེན་པ་དང་། འཆི་བའི་སྡུག་བསྔལ་གྱིས་མི་གནོད་པས་སྲ་བ་དང་། དུས་ཀྱི་འགྱུར་བས་མི་གནོད་པས་བརྟན་པ་དང་། སྟོང་ཉིད་དེས་དངོས་པོ་ཐམས་ཅད་ལ་ཐོགས་མེད་དུ་ཁྱབ་པས་ན་ཐོགས་པ་མེད་པ་དང་། རང་གི་ངོ་བོ་ལ་གཞན་གང་གིས་ཀྱང་གནོད་པའམ་གོས་པར་མི་ནུས་པར་ན་ཐམས་ཅད་དུ་མ་ཕམ་པ་ཞེས་གསུངས་ཏེ། དེ་སྐད་དུའང་འགྲེལ་ཆེན་གསལ་སྒྲོན་གྱི་སྔ་མའི་མུར། འདུས་བྱས་ཀྱི་དངོས་པོ་འདི་ལ་སྐྱེ་བ་སྔ་མ་ནས་འདི་རུ་སྐྱེས། འདི་ནས་ཕྱི་མར་སྐྱེ་བས། སྐྱེ་བའི་སྡུག་བསྔལ་གྱིས་བར་དུ་ཆོད་ཅིང་འདུག་པས་ན། སྟོང་པ་ཉིད་ལ་སྐྱེ་བ་མེད་པས་སྐྱེ་བའི་སྡུག་བསྔལ་གྱིས་བར་དུ་མི་ཆོད་པས་ན། མི་ཆོད་པ་ཞེས་གསུངས་སོ། །འདུས་བྱས་ཀྱི་དངོས་པོ་འདི་ལ་རྣམ་པ་གཞན་ནས་གཞན་དུ་འགྱུར་བ་ཡོད་པས། རྒས་པའི་སྡུག་བསྔལ་གྱིས་བར་དུ་ཆོད་ཅིང་འདུག་པ་ལ། སྟོང་པ་ཉིད་དེ་ལ་རྣམ་པ་གཞན་ནས་གཞན་དུ་འགྱུར་བ་མེད་པས་ན། རྒས་པའི་སྡུག་བསྔལ་གྱིས་བར་དུ་མི་ཆོད་པས་ན་མི་ཤིགས་པ་ཞེས་གསུངས་སོ། །འདུས་བྱས་ཀྱི་དངོས་པོ་དེ་ཉིང་མཚམས་སྦྱོར་བའི་ཚེ། སྐྱེ་གནས་སུ་དང་པོ་མིང་དང་གཟུགས་གྲུབ་ནས་ཐ་མ་ཤི་བའི་བར་དུ་སྡུག་བསྔལ་རྣམ་པ་གསུམ་མམ་བརྒྱད་ཀྱིས་གདུང་བས་ན། གནས་པའི་སྡུག་བསྔལ་གྱིས་བར་དུ་ཆོད་ཅིང་འདུག་པ་ལ། ཆོས་ཀྱི་སྐུ་སྟོང་པ་ཉིད་ལ་གཟུགས་ཀྱི་དངོས་པོ་གྲུབ་པ་མེད་པས། སྡུག་བསྔལ་རྣམ་པ་གསུམ་དང་བརྒྱད་ལ་སོགས་པས་བར་དུ་གཅོད་པ་མི་ནུས་པས་ན་བདེན་པ་ཞེས་གསུངས་སོ། །འདུས་བྱས་ཀྱི་དངོས་པོ་འདི་ཐ་མ་ཤི་ནས་རྒྱུན་ཆད་དེ་འགྲོ་བས་འཆི་བའི་དུས་ན་གནད་གཅོད་པའི་ཚོར་བའི་སྡུག་བསྔལ་ཡོད་པས་འཆི་བའི་སྡུག་བསྔལ་གྱིས་ཆོད་ཅིང་འདུག་པ་ལས། ཆོས་ཀྱི་སྐུ་སྟོང་བ་ཉིད་ལ་སྐྱེ་བ་མེད་པས་ན་ཐ་མ་འགགས་ཏེ་རྒྱུན་ཆད་པའང་མེད་པས་འཆི་བའི་སྡུག་བསྔལ་གྱིས་བར་དུ་མི་ཆོད་པས་ན་སྲ་བ་ཞེས་གསུངས་སོ། །འོ་ན་སྟོང་བ་ཉིད་དེ་དུས་ད་ལྟར་སྡུག་བསྔལ་རྣམ་པ་བཞི་བོ་དེས་མི་གནོད་པར་འདུག་པ་ལ་ལོའམ་བསྐལ་བ་ལོན་ནས་གནོད་པར་མི་ནུས་སམ་ཞེ་ན་མ་ཡིན་ཏེ། དུས་ད་ལྟར་མི་གནོད་པ་བཞིན་དུ་དུས་དང་གནས་སྐབས་ཐམས་ཅད་དུ་གནོད་པར་མི་ནུས་པས་ན་བརྟན་པ་ཞེས་གསུངས་སོ། །འོ་ན་སྟོང་བ་ཉིད་དེ་ལ་སྡུག་བསྔལ་རྣམ་པ་བཞི་བོ་དེ་དག་གིས་ཀྱང་གནོད་པར་མི་ནུས་པར་འདུག་སྟེ། ཆོས་ཀྱི་སྐུ་སྟོང་བ་ཉིད་དེ་མཐུ་ཇི་ཙམ་དང་ལྡན་ཞེ་ན། ཐམས་ཅད་དུ་ཐོགས་པ་མེད་པ་ཞེས་གསུངས་ཏེ། སྟོང་བ་ཉིད་ཀྱི་ཡེ་ཤེས་དེས་ནི་བདག་དང་གཞན་ཡང་འཇིག་པར་བྱེད། འཁོར་བ་དང་མྱ་ངན་ལས་འདས་པའང་འཇིག་པར་བྱེད། དངོས་པོ་ལ་མངོན་པར་ཞེན་པ་ཐམས་ཅད་འཇིག་པར་བྱེད་པས་ན་ཐམས་ཅད་དུ་ཐོགས་པ་མེད་པ་ཞེས་གསུངས་སོ། །དེ་ལ་ཚུར་ལ་གནོད་པ་མི་ནུས་སམ་ཞེ་ན། མ་ཡིན་ཏེ། དེས་ན་མ་ཕམ་པ་ཞེས་གསུངས་ཏེ། ཆོས་ཀྱི་སྐུ་སྟོང་བ་ཉིད་དེ་ལ་ཚུར་ལ་གང་གིས་ཀྱང་གནོད་པར་མི་ནུས་ལ། ཕར་ལ་ཐམས་ཅད་འཇོམས་པས་མ་ཕམ་པ་ཞེས་གསུངས་སོ། །དེས་ན་སྟོང་བ་ཉིད་དེ་རིན་པོ་ཆེ་རྡོ་རྗེ་ཕ་ལམ་དང་ཆོས་མཐུན་པས་ན་སྟོང་བ་ཉིད་ལ་རྡོ་རྗེ་ཞེས་བཏགས་སོ། །ཞེས་གསུངས་པ་ལྟར་རོ། །དེ་ལྟར་ནའང་སྟོང་བ་ཉིད་དེ་དཔེ་གཞན་གྱིས་མཚོན་དུ་མི་རུང་བའམ། གལ་ཏེ་མཚོན་དུ་རུང་ཕྱིན་རྡོ་རྗེ་ཕ་ལམ་ཙམ་དུ་མ་ཟད་དཔེ་གཞན་དང་གཞན་ཡང་འགོད་དུ་རུང་བ་ཞིག་ན། འདིར་ཆེད་དུ་རྡོ་རྗེ་ཁོ་ནས་མཚོན་པར་བྱས་པ་ལ་དགོས་པ་ཁྱད་པར་ཅན་ཅི་ཡོད་ཅེ་ན། ཡོད་དེ། རྫས་རྡོ་རྗེ་ཕ་ལམ་ལའང་དངོས་པོ་གཞན་ལ་མེད་པའི་ཁྱད་ཆོས་དེ་དག་ལྡན་པ་བཞིན། འདིར་སྟོང་བ་ཉིད་ལའང་ཁྱད་ཆོས་དེ་དག་དང་ལྡན་པར་ཤེས་ན། རྗེས་འཇུག་རྣམས་ཀྱིས་ཀྱང་ཁྱད་ཆོས་དེ་དག་མངོན་དུ་འཐོབ་པར་འགྱུར་བའི་ཕྱིར་ལམ་བསྒོམ་པ་དང་བསྒྲུབ་པ་ལ་མྱུར་དུ་འཇུག་པའི་དགོས་པ་ཡོད་པའི་ཕྱིར། དེ་སྐད་དུའང་སློབ་དཔོན་ཡེ་ཤེས་རྡོ་རྗེས་སྟོང་བ་ཉིད་ལ་རྡོ་རྗེར་བཏགས་པའི་དགོས་པ་ནི། སྟོང་བ་ཉིད་ལའང་ཡོན་ཏན་དེ་ཚོ་དང་ལྡན་པར་ཤེས་པར་བྱ་བའི་དགོས་པ་དང་། དེ་ལྟར་ཤེས་པ་དེ་ཐོབ་པར་བྱ་བའི་དོན་དུ་གཞན་དག་སྒྲུབ་པ་དང་སྒོམ་པ་ལ་འཇུག་པར་འགྱུར་བའི་དགོས་པའོ། །དེས་ནི་སྟོང་བ་ཉིད་ལ་རྡོ་རྗེ་ཞེས་གསུངས་སོ། །ཞེས་བཤད་པ་ལྟར་རོ། །འདིར་དཔྱོད་ལྡན་ཡོད་ན། རྒྱ་གཞུང་གི་ལུང་དེ་དག་ལས་སྐབས་འགར་སྟོང་བ་ཉིད་དང་ཡེ་ཤེས་དོན་གཅིག་ཏུ་གསུངས་པ་དང་། སྟོང་ཉིད་དང་ཆོས་སྐུ་དང་། ཤེས་རབ་རྣམས་ཀྱི་ཁྱད་པར་དང་། རྫས་རྡོ་རྗེ་ཕ་ལམ་དེ་དུས་ཀྱི་ནམ་ཡང་མི་འགྱུར་བར་འདོད་ན། དངོས་པོ་ཡིན་ན་འདུས་བྱས་ཡིན་པས་ཁྱབ་པ་དང་། འདུས་བྱས་ཡིན་ན་མི་རྟག་པ་ཡིན་པས་ཁྱབ་པ་དང་། མི་རྟག་པ་ཡིན་ན་སྐད་ཅིག་མའི་རྒྱུན་གྱིས་འཕོ་བར་འདོད་དགོས་པས་ན། དཔྱད་པ་ཉམས་མཚར་བ་ཞིག་སྣང་ངོ་། །སྨྲས་པ། དམ་པའི་བཤེས་གཉེན་རིང་དུ་བསྟེན་བྱས་ནས། །ཐོས་བསམ་སྒོམ་ལ་རྟག་པར་བརྩོན་བྱས་ན། །དཀའ་གནས་གཞན་དང་གཞན་ཡང་དགྲོལ་ནུས་པའི། །ཚུལ་འདི་མཐོང་བའང་ཆོས་རྗེ་བླ་མའི་དྲིན། །ད་ནི་སྤྱི་དོན་གཉིས་པ་དབང་གི་གེགས་བརྒྱད་ཀྱི་དོན་བཤད་པ་ལ་འཇུག་པར་བྱ་སྟེ། དེ་ཡང་སྤྱིར་གསང་སྔགས་རྡོ་རྗེ་ཐེག་པའི་འཇུག་སྒོ་ཐོག་མ་སྨིན་བྱེད་ཀྱི་དབང་ཡིན་པ་དང་། དབང་དེའི་ཐོག་མར་མཚན་ཉིད་དང་ལྡན་པའི་དགེ་བའི་བཤེས་གཉེན་མཉེས་པ་གསུམ་གྱི་སྒོ་ནས་ལེགས་པར་བསྟེན་དགོས་པ་དང་། དེ་ལྟར་མ་བསྟེན་པའི་སྐྱོན་རྣམས་ནི། སྒྱུ་འཕྲུལ་རྩ་རྒྱུད་ལས། སློབ་དཔོན་མཉེས་པར་མ་བྱས་ཤིང་། དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩམས་པ་རྣམས། འབྲས་བུ་མེད་ཅིང་བརླག་པར་འགྱུར། ཞེས་གསུངས་པ་ལྟར་ཏེ། དེ་ལྟར་ན་རང་བཟོ་དང་ཕོ་རུས་དང་། སློབ་དཔོན་གྱི་ཞལ་ཁྲིད་མེད་པའི་དཔེ་ལྟས་ཙམ་གྱིས་ཀྱང་གསང་སྔགས་རྡོ་རྗེ་ཐེག་པའི་དེ་ཁོ་ན་ཉིད་ཟབ་མོ་རྟོགས་མི་ནུས་པ་ལ་དགོངས་ནས། ཆུ་ཀླུང་ཆེན་པོའི་རྒྱུད་ལས་ཀྱང་། དོན་དམ་ལྷན་ཅིག་སྐྱེས་པའི་ཡེ་ཤེས་ནི། ‘།ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་པ་རྨོངས་པར་ཤེས་པར་བྱ། །ཞེས་དང་། འཕགས་མཆོག་ཀླུ་སྒྲུབ་ཀྱི་ཤེས་རབ་སྡོང་བོ་ལས་ཀྱང་། རིག་པ་གླེག་བམ་ལ་བསླབ་ཀྱི། །བླ་མའི་ཐད་ནས་མ་བསླབ་པ། །འཕྱོན་མའི་བུད་མེད་སྦྲུམ་མ་བཞིན། །ཚོགས་པའི་ནང་དུ་མཛེས་པ་མིན། །ཞེས་སོགས་མདོ་རྒྱུད་བཀའ་དང་བསྟན་བཅོས་ཀྱི་ལུང་མཐའ་ཡས་པ་དག་མཆིས་ཤིང་། ཁྱད་པར་གསང་སྔགས་རྡོ་རྗེ་ཐེག་པའི་གཞུང་འདིར་ནི། བླ་མ་བསྟེན་པ་ཁོ་ན་ལམ་གྱི་གཞི་མར་གསུངས་ན། རྒྱུ་མཚན་དེ་ལས་འཕྲོས་ཏེ། བསྟེན་བྱ་སློབ་དཔོན་གྱི་མཚན་ཉིད་དང་། སྟེན་པ་པོ་སློབ་མའི་མཚན་ཉིད་དང་། དེས་དེ་ཉིད་ཇི་ལྟར་བསྟེན་པའི་ཚུལ་ལ་སོགས་པ་རྒྱ་ཆེར་གསུངས་པ་དག་གཞན་ལས་ཤེས་པར་བྱ་ལ། འདིར་རང་བཞིན་བརྒྱད་ལ་སོགས་པའི་མཚན་ཉིད་དང་ལྡན་པའི་རྡོ་རྗེ་སློབ་དཔོན་དེས། སློབ་མ་མཚན་ཉིད་དང་ལྡན་པ་ལ་རྒྱུ་གཉིས་དང་རྐྱེན་བཞི་ཚོགས་པའི་སྒོ་ནས་དབང་བཞི་རྣམ་པར་དག་པ་སྐུར་བ་ལ། བསྙེན་པ་དང་། སའི་ཆོ་ག་དང་། སྟ་གོན་དང་། སློབ་མ་འཇུག་ཅིང་སྨིན་པར་བྱ་བ་སྟེ་སྤྱི་དོན་བཞི་བོ་རེ་རེ་ལའང་ཡན་ལག་བཞི་བཞི་དང་ལྡན་པར་བྱས་ནས་སློབ་བུའི་རྒྱུད་སྨིན་ངེས་སུ་བྱེད་དགོས་པ་ལ། དེ་ལྟ་བུའི་དབང་དོན་གྱི་ཡེ་ཤེས་ངོ་འཕྲོད་པའི་དབང་བཞི་རྣམ་པར་དག་པ་ལ་ནི། གསང་སྔགས་རྡོ་རྗེ་ཐེག་པའི་ལམ་བསྐྱེད་རྫོགས་ཀྱི་གནད་མཐའ་དག་འདུ་ཞིང་ལམ་གྱི་སྒྲོམ་དབང་གི་ཁོང་ནས་འཛིན་ཤེས་ན་གསང་སྔགས་ཀྱི་ལམ་མ་ལུས་པ་དབང་གི་ཁོང་ནས་འབྱུང་བའང་རྟོགས་ནུས་པ་ཡིན་ནོ། །དེ་ལྟར་ན་བསྙེན་པ། ས་ཆོག སྟ་གོན་རྣམས་རྫོགས་པའི་རྗེས་ཐོག་དེ་ཉིད་དུ་སང་དཀྱིལ་འཁོར་ཆེན་པོར་ཞུགས་ནས་མངོན་པར་དབང་བསྐུར་བ་འཐོབ་བམ་མི་འཐོབ་འཇུགས་པ་ལ། ཐོག་མར་དངོས་གྲུབ་ཀྱི་སྣོད་སྐྱོན་ངོ་ཤེས་དགོས་པའི་ཕྱིར། དབང་གི་གེགས་བརྒྱད་ངོ་སྤྲོད་དགོས་པ་ཡིན་ཏེ། དེ་ཡང་གང་ཞེ་ན། རང་གཞུང་ལས། སངས་རྒྱས་ཀུན་གྱི་དངོས་གྲུབ་མཆོག །དབང་དང་བྱིན་རླབས་འབྱུང་བ་ནི། །དཔེར་ན་དྭངས་པའི་རྒྱ་མཚོ་ལ། །ཉི་ཟླའི་གཟུགས་བརྙན་འབྱུང་འགྱུར་གྱིས། །རྙོགས་པའི་ཆུ་ལ་འགོགས་འགྱུར་བཞིན། །བྱིན་རླབས་དབང་ཆོག་འཐོབ་པའི་གེགས། །རྣམ་པ་བརྒྱད་དུ་རྒྱལ་བས་བཤད། །ཅེས་མདོར་བསྟན་ཏེ། དེ་ཡང་དུས་གསུམ་གྱི་སངས་རྒྱས་ཀུན་གྱི་མངོན་དུ་བརྙེས་པའི་དངོས་གྲུབ་ཀྱི་མཆོག་དམ་པ་ནི་གང་ཞེ་ན། ལྷན་སྐྱེས་ཕྱག་རྒྱ་ཆེན་པོའི་ཡེ་ཤེས་ཡིན་ཏེ། དེ་ཐབས་གང་གིས་རྟོགས་པར་འགྱུར་ན། གསང་སྔགས་ཀྱི་དབང་བསྐུར་བ་རྣམ་པར་དག་པ་དང་དེའི་བྱིན་རླབས་ལས་རྟོགས་པར་འགྱུར་བའི་ཕྱིར་ན། དེ་ཡང་ཡིན་ནོ་ཞེས་དོན་གཅིག་པར་སྨྲོས་ནས། དེ་ལྟ་བུའི་དབང་སྐུར་བ་དེ་འཐོབ་པའམ་འབྱུང་བ་ནི་སློབ་བུའི་རྒྱུད་དག་པ་ལ་ལྟོས་པའི་ཚུལ། དཔེར་ན་རྙོགས་པ་མེད་ཅིང་ཤིན་ཏུ་དྭངས་པའི་རྒྱ་མཚོ་ལ་ནི་ཉི་ཟླའི་གཟུགས་བརྙན་རྩོལ་མེད་དུ་འབྱུང་བར་འགྱུར་གྱིས། གང་ཞིག་རྙོགས་པར་གྱུར་པའི་ཆུ་ལ་ནི་དེའི་གཟུགས་བརྙན་འགགས་པར་འགྱུར་བའི་དཔེ་དེ་བཞིན་དུ། གོང་དུ་སྨྲོས་པའི་བྱིན་རླབས་དབང་གི་མཆོག་དེ་ཡང་སློབ་བུའི་རྒྱུད་ལོག་ལྟ་ལ་སོགས་པས་རྙོགས་པར་མ་གྱུར་ཞིང་དད་པ་དང་མོས་གུས་རྣམ་པར་དག་པས་སེམས་དྭངས་པར་འགྱུར་བ་ལ་ནི་འཐོབ་པར་འགྱུར་ལ། གཞན་དུ་དེ་ལས་ལྡོག་པའི་གེགས་རྣམ་པ་བརྒྱད་དུ་རྒྱལ་བས་གང་ཞིག་བཤད་པ་རྣམས་དང་ལྡན་པར་གྱུར་ན་ནི་དོན་དེ་འཐོབ་པར་འགྱུར་བ་མ་ཡིན་ནོ། །ཞེས་མདོར་བསྟན་ནས། དེ་ཉིད་རྒྱས་པར་བཤད་པ་ལ་བརྒྱད་ལས། དང་པོ་གང་ཞེ་ན། དེ་འཆད་པའི་ཕྱིར། སྟོན་པ་སྔོན་བྱུང་སློབ་དཔོན་ལ། བཀའ་གཅོག་བརྙས་པར་བྱེད་པ་ནི། དབང་དང་དངོས་གྲུབ་དང་པོའི་གེགས། ཞེས་གསུངས་ཏེ། དེ་ཡང་བདག་ཅག་མ་རིག་པའི་དབང་གིས་འཁོར་བའི་གཡང་ས་ཆེན་པོར་འཁྱམས་བཞིན་པ་ལ། ཐར་བ་དང་ཐམས་ཅད་མཁྱེན་པའི་ལམ་ཟབ་མོ་སྟོན་པ་པོར་སྔོན་དུ་བྱུང་བ་ནི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཉིད་དེ། དེ་ཉིད་འདིར་རང་གི་སྒོར་ཡང་སློབ་དཔོན་གྱི་རྣམ་པར་སྣང་བ་ཡང་། མདོ་ལས། མྱ་ངན་མ་བྱེད་ཀུན་དགའ་བོ། སྨྲེ་སྔགས་མ་འདོན་ཀུན་དགའ་བོ། ང་ནི་ཕྱི་མའི་དུས་ཀྱི་ཚེ། དགེ་བའི་བཤེས་གཉེན་ཉིད་གྱུར་ནས། ཁྱོད་ལ་སོགས་པའི་དོན་བྱེད་འགྱུར། ཞེས་གསུངས་པ་ལྟར་ཏེ། དེ་ལྟར་ན་མཚན་ཉིད་དང་ལྡན་པའི་བཤེས་གཉེན་གྱི་བཀའ་མི་བཅག་པར་ཚུལ་བཞིན་དུ་བསྟེན་པར་རིགས་ཏེ། འཕགས་མཆོག་ཀླུ་སྒྲུབ་ཀྱི་བཤེས་སྤྲིངས་ལས། དགེ་བའི་བཤེས་གཉེན་བསྟེན་པ་ཚངས་པར་སྤྱོད། ཡོངས་སུ་རྫོགས་པར་ཐུབ་པས་གསུངས་དེའི་ཕྱིར། སྐྱེས་བུ་དམ་པ་བསྟེན་བགྱི་རྒྱལ་བ་ལ། བསྟེན་ནས་རབ་ཏུ་མང་པོས་ཞི་བ་འཐོབ། ཅེས་གསུངས་པ་ལྟར་རོ། །དེ་ལྟར་ནའང་དམ་ཚིག་གསལ་བཀྲ་ལས་བཤད་པ་ལྟར་གྱི་སྤྱིར་སློབ་དཔོན་དྲུག་དང་། བྱེ་བྲག་ཐུན་མོང་མ་ཡིན་པའི་སློབ་དཔོན་གསུམ་ལ་སོགས་པ་ལ་གུས་པ་མི་བསྐྱེད་པའི་ཁར། དེ་དག་གི་བཀའ་བཅགས་ཤིང་། སྒོ་གསུམ་གྱི་སྤྱོད་པས་བརྙས་པར་བྱེད་པ་དེ་ནི་དབང་བསྐུར་བ་དང་། དེ་ཉིད་ཀྱིས་དོན་དུ་གཉེར་བྱ་ལྷན་སྐྱེས་ཕྱག་རྒྱ་ཆེན་པོ་མཆོག་གི་དངོས་གྲུབ་འཐོབ་པ་ལ་བར་དུ་གཅོད་པར་བྱེད་པའི་མཐུ་ཤིན་ཏུ་ཆེ་བ་དང་པོའི་གེགས་སོ། །ཞེས་གསུངས་ཏེ་ཚིག་མཇུག་འདིའི་དོན་འོག་མ་རྣམས་ལའང་རིགས་འགྲེ་ཤེས་པར་བྱའོ། །འོ་ན་གེགས་གཉིས་པ་དེ་གང་ཞེ་ན། དེ་འཆད་པའི་ཕྱིར། བླ་མེད་འགྲོ་བའི་རྡོ་རྗེའི་སྤུན། འཁུ་ལྡོག་གདུང་བའི་སེམས་མེད་ན། དབང་དང་དངོས་གྲུབ་གཉིས་པའི་གེགས། ཞེས་གསུངས་ཏེ། བདག་ཅག་རྣམས་ཀྱིས་བླ་ན་མེད་པའི་འབྲས་བུའི་མཆོག་རྣམ་པ་ཐམས་ཅད་མཁྱེན་པའི་གོ་འཕང་དོན་དུ་གཉེར་བར་བྱེད་པ་ལ། དེ་རུ་འགྲོ་བའི་ལམ་གྱི་ཟླ་བོར་གྱུར་པ་ནི་རྡོ་རྗེའི་སྤུན་གྲོགས་རྣམས་ཏེ། དེ་ལའང་གསལ་བཀྲ་ལས་བཤད་པ་ལྟར་གྱི་སྤྱི་རིང་ཉེ་དང་ནང་འདྲེས་ཀྱི་སྤུན་བཞིར་དབྱེ་བའི་ཕྱི་མ་གསུམ་ལ་ལྷག་པར་དུ་ཡང་བྱམས་པའི་བསམ་སྦྱོར་གྱིས་བཀུར་སྟི་བྱེད་དགོས་པའི་ཚུལ་རྩ་རྒྱུད་ལས། ཡང་དག་ལམ་དུ་ཞུགས་ལ་བྱམས། ཞེས་གསུངས་པ་ལྟར་ཏེ། དེ་ལྟ་ནའང་བསྙེན་བཀུར་མི་བྱེད་པར་མ་ཟད་འཁུ་ཞིང་ལྡོག་པའི་བསམ་སྦྱོར་གྱིས་བརྩེ་ཞིང་གདུང་བའི་སེམས་མེད་པར་གྱུར་ན་ནི། དབང་དང་དངོས་གྲུབ་འཐོབ་པ་ལ་བར་དུ་གཅོད་པ་གཉིས་པའི་གེགས་སོ། །ཞེས་གསུངས་པའོ། །གེགས་གསུམ་པ་དེ་ཡང་གང་ཞེ་ན། དེ་འཆད་པའི་ཕྱིར། བྱང་ཆུབ་སེམས་ལ་འདུད་མེད་ཅིང་། ཐར་ལམ་འདྲེན་པའི་ལྷ་སྤོང་བ། དབང་དང་བྱིན་རླབས་གསུམ་པའི་གེགས། ཞེས་གསུངས་ཏེ། དེ་ཡང་དབུ་མ་འཇུག་པ་ལས། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། སྙིང་རྗེའི་སེམས་དང་གཉིས་སུ་མེད་བློ་དང་། བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། ཞེས་བཤད་པ་ལྟར་ཉན་རང་འཕགས་པའི་དགེ་འདུན་རྣམས་ཀྱང་སངས་རྒྱས་ལ་བརྟེན་ནས་བྱུང་ཞིང་། སངས་རྒྱས་རྣམས་ནི་བྱང་ཆུབ་སེམས་དཔའ་ལས་བྱུང་། བྱང་ཆུབ་སེམས་དཔའ་ནི་བྱང་ཆུབ་ཀྱི་སེམས་རིན་པོ་ཆེ་ལས་བྱུང་བའི་ཕྱིར་མཐར་ཐུག་གི་སྐྱབས་གནས་ནི་བྱང་ཆུབ་ཀྱི་སེམས་རིན་པོ་ཆེ་ཁོ་ནར་ངེས་པས་ན་དེ་ཉིད་དང་། དེ་ཉིད་ཕྱག་རྒྱའི་རྣམ་པར་ཤར་བའི་ལྷག་པའི་ལྷ་རབ་འབྱམས་ལའང་རྣམ་པ་ཀུན་ཏུ་གུས་འདུད་བྱེད་པར་རིགས་ཏེ། དཀོན་ཅོག་འགྲེལ་ལས། དཀོན་ཅོག་གསུམ་གྱི་རང་བཞིན་བྱང་ཆུབ་སེམས། དེ་སྩོལ་བླ་མ་དེ་རྒྱུ་ལྷག་པའི་ལྷ། དེ་དབང་སྤྲུལ་པའི་འཁོར་ལོ་བཅས་པ་ལ། ཕྱག་འཚལ་དེ་སྟོན་ལམ་དང་སྒྲུབ་བཅས་ལའོ། །ཞེས་གསུངས་པའི་ཕྱིར་རོ། །དེ་ལྟ་ནའང་བྱང་ཆུབ་ཀྱི་སེམས་གང་ལ་གུས་པ་མེད་ཅིང་། ཐར་བའི་ལམ་དུ་འདྲེན་པར་བྱེད་པའི་ལྷག་པའི་ལྷ་རྣམས་ཀྱང་སྤོང་བར་བྱེད་པ་དེ་ནི་དབང་དང་བྱིན་རླབས་འཐོབ་པ་ལ་བར་དུ་གཅོད་པར་བྱེད་པ་གསུམ་པའི་གེགས་སོ། །ཞེས་པའོ། །འོ་ན་གེགས་བཞི་བ་དེ་གང་ཞེ་ན། དེ་འཆད་པའི་ཕྱིར། སྙིང་རྗེའི་ཡུལ་གྱུར་སེམས་ཅན་ལ། །ཐག་པ་གཅོད་པ་བཞི་བའི་གེགས། ཞེས་གསུངས་ཏེ། དེ་ཡང་འཁོར་བ་ལ་ཐོག་མ་མེད་པའི་ཕྱིར་མཐའ་ཡས་པའི་སེམས་ཅན་འདི་དག་ཐམས་ཅད་ཀྱིས་བདག་ཅག་གི་ཕ་མ་མ་བྱས་པ་གཅིག་ཀྱང་མེད་དེ། ཤིང་རྟ་ཆེན་པོ་ཀླུ་སྒྲུབ་ཀྱི་ཞལ་སྔ་ནས། རེ་རེས་རྒྱ་མཚོ་བཞི་ལས་ལྷག་པ་ཡི། འོ་མ་འཐུངས་ཏེ་ད་དུང་སོ་སོ་ཡི། སྐྱེ་བོའི་རྗེས་སུ་སྤྱོད་པའི་འཁོར་བ་བས། དེ་བས་ཆེས་མང་བ་ཞིག་འཐུང་འཚལ་ལོ། །རེ་རེས་བདག་ཉིད་རུས་པའི་ཕུང་བོ་ནི། ལྷུན་པོ་མཉམ་པ་སྙེད་ཅིག་འདས་གྱུར་ཏེ། མ་ཡི་ཐུག་མཐའ་རྒྱ་ཤུག་ཚིག་གུ་ཙམ། རི་བུར་བསྒྲངས་ཀྱང་ས་ཡིས་ལངས་མི་འགྱུར། ཞེས་ས་ཆེན་པོ་འདི་རྒྱ་ཤུག་གི་ཚིག་གུ་ཙམ་གྱི་རིལ་བུ་བགྲངས་ནས་འདི་ནི་བདག་གི་མའོ། །འདི་ནི་བདག་གི་མའི་མའོ་ཞེས་བགྲངས་ཀྱང་། ས་ཆེན་པོ་ལ་འཛད་པའི་དུས་དེ་ཡོད་ཀྱི་མའི་མཐའ་ལ་ནི་ཐུག་པ་མེད་དོ། །ཞེས་མིང་ཚིག་ཏུ་འདོམས་ནས། དེ་ལྟ་བུའི་མ་དེ་དག་གིས་ཀྱང་བདག་ཅག་རྣམས་བྱམས་བརྩེའི་དབང་གིས་ནུ་ཞོ་ཁོ་ནའི་དྲིན་གྱིས་བསྐྱངས་ཕྱིར། སེམས་ཅན་རེ་རེས་ཀྱང་རྒྱ་མཚོ་བཞི་བས་ལྷག་པའི་མའི་ནུ་ཞོ་འཐུངས་སོ་ཞེས་གསུངས་ཏེ། དེ་ལྟར་ན་ད་ལྟའི་གནས་སྐབས་སུ་དྲིན་ཅན་གྱི་མ་དེ་དག་ལ་ལ་ནི་དམྱལ་བ་ན་ཚ་གྲང་གི་སྡུག་བསྔལ་ལ་སྤྱོད། ལ་ལ་ནི་ཡི་དྭགས་ཀྱི་གནས་ན་བཀྲེས་སྐོམས་ཀྱི་སྡུག་བསྔལ་ལ་སྤྱོད། ལ་ལ་ནི་དུད་འགྲོའི་གནས་ན་བཀོལ་སྤྱོད་དང་གླེན་རྨོངས་ཀྱི་སྡུག་བསྔལ་ལ་སྤྱོད་ཅིང་ཤིན་ཏུ་ཉམས་ཐག་པས་ན། དེ་དག་རྣམས་སྡུག་བསྔལ་དེ་ལས་བསྒྲལ་འདོད་ཀྱི་སྙིང་རྗེ་ཆེན་པོ་དབང་མེད་དུ་བསྐྱེད་པར་རིགས་ཏེ། སློབ་དཔོན་སངས་རྒྱས་གཉིས་པའི་ཞལ་སྔ་ནས། སྙིང་རྗེ་མེད་ན་ཆོས་ཀྱི་རྩ་བ་རུལ། ཞེས་གསུངས་པའི་ཕྱིར། དེ་ལྟ་བུའི་སྙིང་རྗེའི་ཡུལ་དུ་གྱུར་པའི་སེམས་ཅན་ཐམས་ཅད་ལ་སྙིང་རྗེ་སྒོམ་པ་ནི་ས་ལམ་གྱི་ཡོན་ཏན་ཁྱད་པར་ཅན་བསྐྱེད་པའི་ཐབས་ཀྱི་མཆོག་ཏུ་གྱུར་པའང་ཡིན་པའི་ཚུལ་སློབ་དཔོན་བཻ་རོ་ཙ་ནས། རྟོགས་པ་ཤུགས་ལས་འཆར་གྱི་སྙིང་རྗེ་གཏོང་ཕོད་བསྐྱེད། ཅེས་གསུངས་པ་ལྟར་ནའང་། བློ་ལས་སུ་མ་རུང་བ་དག་སྙིང་རྗེ་དང་གཏོང་ཕོད་མི་བསྐྱེད་པའི་ཁར་ད་དུང་སེམས་ཅན་དེ་དག་གི་རེ་བ་བཟློག་ནས་ཞེ་ཐག་པ་ནས་གཅོད་པར་བྱེད་པ་འདི་ནི་བཞི་བའི་གེགས་སོ། །ཞེས་པའོ། །འོ་ན་གེགས་ལྔ་བ་དེ་ཡང་གང་ཡིན་ཞེ་ན། དེ་འཆད་པའི་ཕྱིར། གསང་བས་གསང་བའི་ལྟ་སྤྱོད་རྣམས། །ཡོངས་ལ་བྱིན་པ་གེགས་ལྔ་ཡིན། ཞེས་གསུངས་ཏེ། དེ་ཡང་སྤྱིར་གསང་བ་ཙམ་ལ་དབྱེ་ན་རྩ་རྒྱུད་ལས། གབ་པའི་གསང་བ་མ་རྟོགས་པར་སྦས་པའི་གསང་བ་ལ་མངོན་པར་འཆེལ་ཏེ། ཞེས་སོགས་གསུངས་པ་ལྟར་གབ་སྦས་ཀྱི་གསང་བ་གཉིས་དང་། དེ་ལས་ཀྱང་གབ་པའི་གསང་བ་ལ་རང་བཞིན་གྱི་གསང་བ་དང་། གབ་གསང་དངོས་གཉིས། སྦས་པའི་གསང་བ་ལ་མི་བསྟན་པའི་གསང་བ་དང་སྦས་གསང་དངོས་གཉིས་ཏེ་བཞི་ལས། འདིར་གསང་བ་བས་ཀྱང་ཆེས་གསང་བ་མི་བསྟན་པའི་གསང་བ་ཉིད་ལའང་། དམ་ཚིག་གསལ་བཀྲ་ལས་བཤད་པ་ལྟར་གྱི། སྤྱི་གསང་བཞི་དང་བར་གསང་བཞི། གསང་བར་འོས་དང་གཉེར་གཏད་གཉིས་ཏེ་བཅུ་ཡོད་པ་དེ་དག་ནི་རང་རང་གི་གསང་བའི་དུས་དེ་ལས་མ་འདས་ཀྱི་བར་སུ་ལའང་བསྟན་པར་བྱ་བ་མ་ཡིན་པ་ཞིག་ལ། དེ་དག་ལས་སྤྱིར་གསང་བཞིའི་ནང་ཚན་གསང་བའི་ལྟ་བ་ཟབ་མོ་དང་སྤྱོད་པ་བརླངས་པོ་ལ་སོགས་པ་རྣམས་སྣོད་དང་ལྡན་མི་ལྡན་མ་བརྟགས་པར་ཁྱབ་མཉམ་དུ་ཡོངས་ལ་སྦྱིན་པར་བྱེད་པ་ནི་འོས་པ་མ་ཡིན་ཏེ། སྒྱུ་འཕྲུལ་རྩ་རྒྱུད་ལས། གསང་བའི་དོན་ཕྱིར་སྨྲ་མི་བྱ། ཞེས་དང་། བཤགས་གཞུང་ལས། གསང་བཅུ་བསྒྲགས་ཤིང་བླ་མ་བསླུས། །རྩ་བའི་དམ་ཉམས་མཐོལ་ལོ་བཤགས། ཞེས་གསུངས་པ་ལྟར་ཏེ། དེ་ལྟར་ན་གསང་བ་ཁྱབ་མཉམ་དུ་བྱིན་པ་དེ་ནི་གེགས་ལྔ་བ་ཡིན་ནོ། །འོ་ན་གེགས་དྲུག་པ་དེ་གང་ཞེ་ན། དེ་འཆད་པའི་ཕྱིར། ཐར་ལམ་སྟོན་ལ་འདུད་མེད་ཅིང་། སེར་སྣས་བཅིང་བ་དྲུག་པའི་གེགས། །ཞེས་གསུངས་ཏེ། དེ་ཡང་མཚན་ཉིད་དང་ལྡན་པའི་རྡོ་རྗེ་སློབ་དཔོན་གྱིས་ཐར་བའི་ལམ་ཟབ་མོ་མ་ནོར་བར་སྟོན་པར་མཛད་པ་ལ། ད་དུང་ཡང་འདི་ནི་ལམ་ངེས་པ་ཡིན་ནམ་མ་ཡིན་ནམ་སྙམ་དུ་ཐེ་ཚོམ་པར་གྱུར་ནས་ལམ་དེ་ལ་གུས་འདུད་མེད་པར་གྱུར་ན་ནི་གསང་སྔགས་ཀྱི་དངོས་གྲུབ་མི་ཐོབ་པའི་དཔེ་འཇིག་རྟེན་ན་ནོར་རྫས་ཕྲ་མོའི་ཆེད་དུ་གཞན་དག་ལ་རེ་ལྟོས་འཆའ་བ་ནའང་། སྙིང་གཏད་དེ་མ་བཅོལ་ན་དོན་དེ་མི་འགྲུབ་པ་དང་ཆོས་མཚུངས་པར། འདིར་ཡང་བླ་མས་གང་ཞིག་བསྟན་པའི་ལམ་དེ་ལ་ཐེ་ཚོམ་མེད་པའི་འདུན་པ་བརྟན་པོར་བཟུངས་ནས་ཞུགས་ན་བསླུ་བ་མེད་ཅིང་དེ་ལས་བཟློག་ན་རེ་བ་མི་འགྲུབ་པའི་ཚུལ། ལུང་ལས། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །དབང་བསྐུར་བྱིན་གྱིས་རློབས་པ་ཡིན། ཞེས་དང་། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །ཞེས་གསུངས་པ་ལྟར་ངེས་སོ། །དེ་ལྟར་ནའང་ལམ་དེ་ལ་གུས་པ་མི་བསྐྱེད་ཅིང་རང་རྒྱུད་སེར་སྣས་ཡོངས་སུ་བཅིངས་པའི་དབང་གིས་དཀོན་མཆོག་ལ་མཆོད་པ་དང་། ངན་སློང་ལ་སྦྱིན་པ་གང་ཡང་མི་ནུས་པ་འདི་ནི་དྲུག་པའི་གེགས་སོ། །ཞེས་པའོ། །འོ་ན་གེགས་བདུན་པ་དེ་གང་ཞེ་ན། དེ་འཆད་པའི་ཕྱིར། གཟུ་ལུམ་དབང་བྱེད་ལས་ལ་སྤྱོད། །དངོས་གྲུབ་མྱུར་བའི་གེགས་བདུན་པ། ཞེས་གསུངས་ཏེ། དེ་ཡང་རྒྱལ་བའི་བཀའ་ལུང་ཚད་མ། བླ་མའི་མན་ངག་ཚད་མ། རང་གི་རིགས་པ་ཚད་མ་སྟེ། ཚད་མ་གསུམ་གྱིས་གཞལ་ན་མདོ་རྒྱུད་ཀྱི་དགོངས་པ་ཕྱིན་ཅི་ལོག་པར་སྟོན་ནུས་པ་ཡང་། བཤད་རྒྱུད་རྡོ་རྗེ་མེ་ལོང་ལས། ལུང་དང་རིགས་པ་མན་ངག་གི །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། །ཞེས་གསུངས་པ་ལྟར་ལ། དེ་ལྟར་མ་ཡིན་པའི་རང་འདོད་ཀྱི་དབང་གིས་རྒྱལ་བའི་བཀའ་ཟབ་མོ་དག་གི་དོན། ཕོ་ཚོད་དང་གཟུ་ལུམ་གྱིས་ཕྱིན་ཅི་ལོག་ཏུ་རང་དབང་བྱེད་ཅིང་། བསྙེན་སྒྲུབ་ལ་སོགས་སྔོན་དུ་མ་སོང་བཞིན་དུ་ཞི་རྒྱས་དབང་དྲག་གི་ལས་རབ་འབྱམས་ལ་སྤྱོད་པ་ནི་ལམ་དུ་ཞུགས་ཟིན་པ་རྣམས་ལའང་ཡན་ལག་སྦོམ་པོའི་ལྟུང་བ་ཆེ་ཤོས་སུ་འགྱུར་ཞིང་། འདིར་ཡང་དངོས་གྲུབ་ཟབ་མོ་མྱུར་དུ་འཐོབ་པར་བྱེད་པ་ལ་བར་དུ་གཅོད་པར་འགྱུར་བའི་གེགས་བདུན་པ་ཡིན་ནོ། །ཞེས་པའོ། །འོ་ན་གེགས་བརྒྱད་པ་དེ་གང་ཡིན་ཞེ་ན། དེ་འཆད་པའི་ཕྱིར། འདོད་པའི་ཁེ་གྲགས་ལྷུར་ལེན་ཅིང་། །གསང་བའི་དམ་ཚིག་སྤོང་བ་སྟེ། །འདི་ནི་བརྒྱད་པའི་གེགས་སུ་བཤད། ཅེས་གསུངས་ཏེ། དེ་ཡང་གསང་བའི་དམ་ཚིག་རྣམས་ནི་སྲོག་ལ་བབས་ཀྱང་འདའ་བར་བྱ་བ་མ་ཡིན་པས་རྣམ་པ་ཀུན་ཏུ་མིག་གི་འབྲས་བུ་བཞིན་དུ་བསྲུང་དགོས་ཏེ། དེ་ལྟར་མ་བསྲུང་ན་ཚེ་འདིར་ཡང་མི་འདོད་པའི་རྐྱེན་ངན་རླུང་ལྟར་འཚུབས་ཤིང་ཕྱི་མར་རྡོ་རྗེའི་དམྱལ་བར་སྐྱེ་བར་གདོན་མི་ཟ་སྟེ། དབང་གི་སྔོན་དུ་དམ་ཆུ་སྦྱིན་པའི་སྐབས་སུ་ཡང་། འདི་ནི་ཁྱོད་ཀྱི་དམྱལ་བའི་ཆུ། །དམ་བསྲུང་དངོས་གྲུབ་རྣམ་གཉིས་འཐོབ། །དམ་ཚིག་ཉམས་ན་དམྱལ་བར་ལྟུང་། ཞེས་གསུངས་པའི་ཕྱིར་རོ། །དེ་ལྟར་ཁེ་ཉེན་གྱི་རང་བཞིན་ཤེས་སམ་མི་ཤེས་ཀྱང་རུང་སྟེ། འདོད་པའི་དབང་གིས་ཚེ་འདིའི་ཁེ་དང་སྙན་གྲགས་ལྷུར་ལེན་ཞིང་། གསང་བའི་དམ་ཚིག་ཟབ་མོ་རྣམས་ལ་ཅང་མི་སེམས་པར་སྤོང་བར་བྱེད་པ་སྟེ། འདི་ནི་དངོས་གྲུབ་ལ་བར་དུ་གཅོད་པར་བྱེད་པ་བརྒྱད་པར་གྱུར་པའི་གེགས་སུ་རྒྱལ་བ་རྣམས་ཀྱིས་བཤད་དོ། །ཞེས་སོ། །དེ་ལྟར་ན་བར་དུ་གཅོད་པའི་ཉེས་པ་འདི་དག་ཡོངས་སུ་སྤོང་བར་བྱེད་པའི་གང་ཟག་དེ་ནི་དངོས་གྲུབ་དམ་པ་དབང་གི་སྣོད་དུ་འགྱུར། དེ་ལས་ལྡོག་པ་ནི་མི་འགྱུར་བས་ན། ཁྱེད་ཅག་རྣམས་ཀྱིས་ཀྱང་སྐྱོན་འདི་དག་ཡོངས་སུ་སྤོངས་ཤིག་ཅེས་གདམས་པའི་ཕྱིར། ཉེས་པ་འདི་དག་སྤང་བ་ནི། །དངོས་གྲུབ་དབང་གི་སྣོད་དུ་འགྱུར། ཞེས་གསུངས་སོ། །དེ་ལྟར་དབང་གི་གེགས་བརྒྱད་ངོ་སྤྲད་ནས་བར་ཆད་ཡོད་མེད་བརྟགས་ཕྱིར་རྨི་ལམ་བཟུངས་ཏེ། ཞག་དེའི་ཕྱི་ཉིན་ནས་དབང་བསྐུར་དངོས་ལ་འཇུག་དགོས་པ་ཡིན་ཏེ། མདོར་བསྡུས་ཙམ་བཤད་གྲུབ་བོ། །སྨྲས་པ། གསང་ཆེན་སྨིན་བྱེད་དབང་གི་སྔོན་རོལ་དུ། གེགས་བརྒྱད་ཤེས་ནས་རང་རྒྱུད་མ་བཅོས་ན། ཟབ་ཟབ་དབང་བརྒྱ་ཐོབ་པའང་འཕྱང་མོ་ཉུག དེ་ཕྱིར་ཕན་པའི་སེམས་ཀྱིས་འདི་བྲིས་སོ། །ད་ནི་སྤྱི་དོན་གསུམ་པ་ཁ་སྦྱོར་ཡན་ལག་བདུན་ལྡན་གྱི་དོན་བཤད་པར་བྱ་སྟེ། དེ་ཡང་སྤྱིར་རྒྱུ་མཚན་ཉིད་ཀྱི་ཐེག་པའི་དབང་དུ་བྱས་ནས་ཐར་ལམ་དོན་གཉེར་གྱི་གང་ཟག་དེ་དབང་པོ་རྣོ་རྟུལ་གྱི་རིམ་པས་བསྐལ་བ་གྲངས་མེད་གསུམ་མམ་བདུན་ལ་སོགས་པ་ན་ལམ་ལྔ་ས་བཅུའི་ཡོན་ཏན་མཐར་ཕྱིན་ཏེ་རྒྱུན་མཐའི་བར་ཆད་མེད་ལམ་དུ་རྡོ་རྗེ་ལྟ་བུའི་ཏིང་ངེ་འཛིན་གྱིས་ཤེས་སྒྲིབ་ཕྲ་བ་བཅོམ་ནས་མངོན་པར་རྫོགས་པར་འཚང་རྒྱའོ་ཞེས་གསུངས་པ་གང་ཞིག་གསང་སྔགས་ཀྱི་ལམ་འདིར་བསྐྱེད་རྫོགས་རིམ་པ་གཉིས་ལ་བརྟེན་ནས་དབང་པོ་དང་བརྩོན་འགྲུས་མཆོག་དམན་གྱི་དབང་གིས་ཚེ་གཅིག་ལ་སོགས་པར་མཆོག་གི་དངོས་གྲུབ་སྐུ་གསུམ་ཡན་ལག་བདུན་ལྡན་མངོན་དུ་བྱེད་དོ་ཞེས་འདོད་པ་ལ། དེ་འཆད་པའི་ཕྱིར། སློབ་དཔོན་ངག་གི་དབང་ཕྱུག་གྲགས་པའི་ཞལ་སྔ་ནས། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ངེས་གང་རྒྱུན་མི་འཆད་དང་འགོག་པ་མེད། །ཡན་ལག་བདུན་བཤད་དོན་དང་ལྡན་པ་བསྒྲུབ་བྱ་འདིར། བདག་འདོད་ཚད་མས་ཡོངས་བསྒོམ་བློ་ཅན་གྱིས་ཀྱང་བསྔགས། ཞེས་གསུངས་ཏེ། དེ་ཡང་ལོངས་སྤྱོད་རྫོགས་པ་དང་། ཁ་སྦྱོར་དང་། བདེ་བ་ཆེན་པོ་སྟེ་གསུམ་ནི་ལོངས་སྐུ་རང་གི་ངོས་ནས་བཞག་པའི་ཡན་ལག་དང་། རང་བཞིན་མེད་པ་ནི་དེ་ཉིད་ཀྱི་ངོ་བོ་བཞུགས་ཚུལ་རྣམ་པར་དག་པ་ཆོས་ཀྱི་སྐུའི་ངོས་ནས་བཞག་པའི་ཡན་ལག་དང་། སྙིང་རྗེས་ངེས་གང་དང་། རྒྱུན་མི་འཆད་པ་དང་། འགོག་པ་མེད་པ་སྟེ་གསུམ་ནི་རྩལ་སྣང་སྤྲུལ་སྐུའི་ངོས་ནས་བཞག་པའི་ཡན་ལག་སྟེ། ཁ་སྦྱོར་ཡན་ལག་བདུན་ནོ། །དེ་ལྟར་ན་ལོངས་སྤྱོད་རྫོགས་སྐུས་ནི་ཆོས་སྐུ་དང་སྤྲུལ་པའི་སྐུ་ཡང་བཟུང་བ་ཡིན་ཏེ། སྐུ་གསུམ་ལ་ཐ་དད་པ་ཉིད་མི་མངའ་བའི་ཕྱིར་རོ། །འོ་ན་དེའི་དོན་གང་ཞེ་ན། གོ་རིམ་བཞིན་དུ་འཆད་པ་ལ། ཐོག་མར་ལོངས་སྤྱོད་རྫོགས་པའི་དོན་ནི། གང་ཞིག་ལོངས་སྐུ་དེ་ཉིད་རང་གི་ངོ་བོ་ཆོས་ཀྱི་སྐུ་ལས་མ་འདས་པས་ན་མྱ་ངན་ལས་འདས་པ་དང་། རྩལ་སྣང་གདུལ་བྱའི་ཁམས་དང་འཚམས་པར་ཅིར་ཡང་འཆར་བས་ན་འཁོར་བའི་ཆོས་ཏེ་དེ་གཉིས་ཀ་ལ་གཉིས་སུ་མེད་པའི་ཚུལ་གྱིས་ལོངས་སྤྱོད་པའི་མཛད་པ་ཡོངས་སུ་རྫོགས་པ་མཚན་དཔེས་སྤྲས་པའི་གཟུགས་ཀྱི་སྐུ་དེའོ། །གཉིས་པ་ཁ་སྦྱོར་གྱི་དོན་ནི། སྤྱིར་ལོངས་སྐུ་ཙམ་ཞིག་ནི་ཕར་ཕྱིན་ཐེག་པ་ལས་ཀྱང་གསུངས་པས་ན། འདིར་དེ་ལས་ཁྱད་པར་དུ་བྱ་བའི་དོན་དུ་ལྷ་ཡབ་དེ་ཉིད་དང་མཚུངས་པའི་ལྷ་མོ་དང་ཁ་སྦྱོར་དུ་སྙོམས་པར་ཞུགས་པའི་རྣམ་པར་བསྟན་པའོ། །འོ་ན་དེ་ཅི་དགོས་ཏེ་ལུས་ཐམས་ཅད་ལ་ཁྱབ་པར་བྱེད་པའི་དགའ་བའི་ངོ་བོ་ཙམ་གྱིས་སེམས་ཅན་གྱི་དོན་ཐམས་ཅད་འགྲུབ་པའི་ཕྱིར་རོ་ཞེ་ན། དགོས་པ་ཡོད་དེ། འདོད་ཁམས་ཀྱི་སེམས་ཅན་ལྷག་པར་དུ་ཡང་ཆགས་པའི་སྤྱོད་པ་ལ་མོས་པ་གང་ཞིག་རྗེས་སུ་བཟུང་བའི་ཕྱིར་འདིར་ཡང་སྙོམས་པར་འཇུག་པ་བསྟན་པ་ཡིན་པའི་ཕྱིར་རོ། །གསུམ་པ་བདེ་བ་ཆེན་པོའི་དོན་ནི། དཔེར་ན་སྒྱུ་མ་མཁན་གྱིས་སྤྲུལ་པའི་སྐྱེས་པ་དང་བུད་མེད་ཀྱི་ཁ་སྦྱོར་ལྟ་བུ་ལས་ནི་བདེ་བ་ཙམ་ཡང་བསྐྱེད་དུ་མི་གཏུབ་པ་གང་ཞིག འདིར་དེ་ལས་ཁྱད་པར་དུ་གྱུར་པ་ཉིད་འབྱེད་པའི་ཕྱིར་བདེ་ཆེན་དུ་སྨྲོས་ཏེ། དེ་ཡང་ལུས་ལས་བྱུང་བའི་བདེ་བ་དང་། སེམས་ལས་བྱུང་བའི་བདེ་བ་ཉམས་སུ་མྱོང་བ་ནི་བདེ་བ་ཙམ་སྟེ། དེ་ཉིད་ཀྱང་ཤིན་ཏུ་རྒྱ་ཆེ་བ་དང་། ཟག་པ་མེད་པ་དང་། གྱ་ནོམ་པ་དང་། འཁོར་བ་ཇི་སྲིད་བར་གནས་པས་ན་ཆེན་པོ་ཞེས་བྱའོ། །བཞི་བ་རང་བཞིན་མེད་པའི་དོན་ནི། དེ་ལྟ་བུའི་སངས་རྒྱས་དེ་ཡང་རང་བཞིན་མེད་པ་གཅིག་བསྒྲུབ་བྱ་ཡིན་གྱི་བདེན་པར་བཟུངས་ནས་མ་ཡིན་ནོ། །ཞེས་སྟོན་པའི་ཕྱིར། དེ་སྐད་ཅེས་སྨྲོས་ཏེ། ཡུམ་གྱི་མདོ་ལས་ཀྱང་། མྱ་ངན་ལས་འདས་པ་ཡང་སྒྱུ་མ་ལྟ་བུ་རྨི་ལམ་ལྟ་བུ། མྱ་ངན་ལས་འདས་པ་ལས་ལྷག་པའི་ཆོས་གཞན་ཞིག་ཡོད་ན། དེ་ཡང་རྨི་ལམ་ལྟ་བུ་སྒྱུ་མ་ལྟ་བུ་ཞེས་ང་སྨྲའོ། །ཞེས་གསུངས་པ་ལྟར། སྦྱོར་བ་བདུན་པ་ལས་ཀྱང་། དངོས་པོ་ཀུན་གྱི་ནང་ནས་ཀྱང་། །རང་བཞིན་མེད་པ་གཙོ་བོར་བཤད། །ཅི་ཕྱིར་རྒྱལ་བའི་སྲས་རྣམས་ཀྱིས། །འདི་བསྒོམ་པས་ན་སངས་རྒྱས་ཀྱི། །ཕུན་སུམ་ཚོགས་པ་ཐམས་ཅད་འགྲུབ། ཅེས་རྒྱལ་བའི་སྲས་རྣམས་ཀྱིས་ལམ་བསྒོམ་པའི་དུས་སུ་ཡང་དངོས་པོ་རང་བཞིན་མེད་པར་རྟོགས་པ་ཉིད་བསྒོམ་བྱའི་གཙོ་བོར་བཤད་པ་བཞིན་མཐར་ཐུག་གི་འབྲས་བུ་ཆོས་ཀྱི་སྐུ། རང་བཞིན་མེད་པ་ཡང་འཐོབ་བྱའི་མཆོག་ཏུ་འགྱུར་ལ། དེ་ལྟ་བུའི་རང་བཞིན་མེད་པ་དེ་ཡང་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་བ་ཉིད་ཡིན་གྱི། ནམ་མཁའི་མེ་ཏོག་གམ། རི་བོང་གི་རྭ་བཞིན་དུ་སོང་བའི་སྟོང་བ་ནི་མེད་པ་ཡིན་པས་མངོན་དུ་བྱ་བར་མི་རུང་སྟེ། གཙུག་ན་རིན་པོ་ཆེའི་མདོ་ལས་ཀྱང་། སྦྱིན་པ་ནས་སངས་རྒྱས་ཀྱི་ཆོས་ཀྱི་བར་རྣམས་དང་མ་བྲལ་བའི་སྟོང་པ་ཉིད་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་བ་ཉིད་དུ་གསུངས་པའི་ཕྱིར། སྦྱིན་པ་ལ་སོགས་པ་དང་། ལོངས་སྐུ་ལ་སོགས་པའི་རྣམ་པ་རྣམས་ནི་མཆོག་ཡིན་ཏེ། དེ་རྣམས་བུམ་པ་ལ་སོགས་པའི་རྣམ་པ་གཞན་རྣམས་ལས་ཁྱད་པར་དུ་འཕགས་པའི་ཕྱིར་རོ། །རྣམ་པ་དེ་དག་དང་ལྡན་ཞིང་འབྱོར་བ་དེ་ནི་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་བ་ཉིད་དོ། །ལྔ་བ་སྙིང་རྗེས་ངེས་གང་ཞེས་པའི་དོན་ནི། ཇི་ལྟར་ལུས་ཀྱི་རྣམ་པ་མེད་ན་དེའི་བྱེད་ལས་ཀྱིས་གཞན་དོན་སྒྲུབ་པའང་མེད་པ་བཞིན་དུ། སྙིང་རྗེ་ཆེན་པོ་མེད་པའང་སེམས་ཅན་ཐམས་ཅད་ཀྱི་དོན་མི་འགྲུབ་པས་ན། སྙིང་རྗེས་ལུས་ངེས་པར་གང་བའམ་སྟོབས་སུ་གྱུར་པ་སྟེ། གང་ཞིག་དམིགས་པ་མེད་པའི་སྙིང་རྗེས་ཡིད་བཞིན་ནོར་བུ་ལྟར་རྣམ་པར་མི་རྟོག་བཞིན་དུ་སེམས་ཅན་གྱི་དོན་མཛད་པའོ། །དྲུག་པ་རྒྱུན་མི་འཆད་པ་ནི། དེ་ལྟ་བུའི་ལོངས་སྐུ་གང་ཞིག ཇི་སྐད་བཤད་པའི་ཡོན་ཏན་རྣམས་དང་ལྡན་པའི་རྒྱུན་ཉིད་ལ་རབ་ཏུ་འཇུག་ཅིང་། དེ་སྲིད་དུ་མཐའ་གཉིས་ཀ་ལ་མི་གནས་པའི་མྱང་འདས་ཡིན་པའི་ཕྱིར་རོ། །དེས་ན་སྐབས་འགའ་ཞིག་ཏུ་འཇུག་པ་དང་ལྡོག་པའི་མཚན་ཉིད་བར་ཆད་དང་བཅས་པ་ནི་མ་ཡིན་ནོ། །བདུན་པ་འགོག་པ་མེད་པའི་དོན་ནི། ལོངས་སྐུ་དེ་དུས་ཅུང་ཞིག་བཞུགས་ནས་རྣམ་པར་ཆད་པ་མ་ཡིན་གྱི་འཁོར་བ་ཇི་སྲིད་པར་བཞུགས་ཏེ་ཕྲིན་ལས་རྣམ་པ་བཞི་འགོག་པ་མེད་པས་གདུལ་བྱ་རྣམས་གང་ལ་གང་འདུལ་གྱིས་གདུལ་བར་འགྱུར་ཏེ། སྙིང་རྗེ་ཆེན་པོའི་གཞན་དབང་དུ་གྱུར་པའི་ཕྱིར་དང་། སེམས་ཅན་རྒྱུན་མི་འཆད་པའི་ཕྱིར་རོ། །ཞེས་སྨྲོས་ནས་དེ་དག་གི་མཇུག་བསྡུ་བའི་ཕྱིར། དེ་ལྟར་ཁ་སྦྱོར་ཡན་ལག་བདུན་དང་ལྡན་པའི་ལོངས་སྤྱོད་རྫོགས་པའི་སྐུ། ཇི་སྐད་བཤད་པའི་དོན་འདི་དག་དང་ལྡན་པ་དེ་ནི་གསང་ཆེན་རྡོ་རྗེ་ཐེག་པའི་ལམ་གྱིས་གང་ཞིག་བསྒྲུབ་པར་བྱ་བའི་འབྲས་བུ་ཀུན་གྱི་མཐར་ཐུག་པའོ། །ཞེས་དེ་སྐད་འདིར་བདག་ངག་དབང་གྲགས་པས་འདོད་ལ། དེར་མ་ཟད་ཚད་མས་ཡོངས་སུ་བསྒོམ་པ་སྟེ་བློ་ཡོངས་སུ་དག་པར་བྱས་པའི་བློ་གྲོས་ཅན་མཁས་པ་རྣམས་ཀྱིས་ཀྱང་ཚུལ་འདི་ཁོ་ན་བསྔགས་ཤིང་བསྟོད་དོ། །ཞེས་གསུངས་པ་སྟེ། དེ་ལྟར་ན་ཁ་སྦྱོར་ཡན་ལག་བདུན་ལྡན་གྱི་དོན་བཤད་པ་དེ་ཡང་གྲུབ་བོ། །འདིར་སྨྲས་པ། ལེགས་བཤད་ཆུ་གཏེར་ཆེན་པོ་ལས་འོངས་པའི། །བརྗོད་དོན་ཡིད་བཞིན་ནོར་བུའི་ཕྲེང་བ་འདི། །སྐལ་ལྡན་གདེང་ཅན་དབང་པོའི་གཙུག་རྒྱན་དུ། །འདི་ན་དོན་གཉེར་དག་གི་མཐུ་ཡིས་བླངས། །ཀྱེ་ཧོ་ད་ནི་དོན་འདིས་དབུལ་བ་ལ། །ཐབས་གཞན་བསྟན་པའི་བློ་དེ་རབ་སྤོངས་ནས། །ཚུལ་འདི་ཁོ་ནར་གསོལ་བར་འདེབས་མཛོད་དང་། །དགོས་དགུ་འབྱུང་བའི་ཁྱད་ཆོས་མངའ་བ་ལགས། །གང་ལ་རྨོངས་པའི་སྡུག་བསྔལ་གྱིས་གདུངས་པ། །དེ་ལ་ལྷག་པར་བརྩེ་བ་མཁྱེན་པའི་གཏེར། །མགོན་པོ་དེ་ཡིས་ཚེ་རབས་ཐམས་ཅད་དུ། །བདག་བློ་ནེམ་ནུར་མེད་པ་སྐྱོང་བར་ཤོག །འདི་ལྟར་བརྩོན་པའི་དགེ་ཚོགས་འོད་དཀར་ཅན། །མ་རྟོགས་ལོག་པའི་མུན་པར་འཕྱན་རྣམས་ལ། །སྣང་བ་དམ་པ་ཉིད་དུ་རབ་གྱུར་ཏེ། །དེ་རིང་ཉིད་ནས་ལམ་བཟང་རྙེད་པར་ཤོག། ཅེས་པའང་ཨོ་རྒྱན་སྨིན་གྲོལ་གླིང་གི་རྒྱུད་བཤད་མཁན་ཟུར་བ་སྔགས་རྒྱུད་རབ་འབྱམས་སྨྲ་བའི་དགེ་སློང་རྡོ་རྗེ་འཛིན་པ་འགྱུར་མེད་ཆོས་དབང་ནས་དྲི་བ་ཇི་ལྟར་ཕེབས་པའི་དོན་བཞིན་གྲུབ་དབང་རྫོགས་ཆེན་པ་ཡབ་སྲས་ཀྱི་ཞབས་པད་གཙུག་ཏུ་འཛིན་པའི་མདོ་ཁམས་ཀྱི་བནྡེ་ཆོས་སྨྲ་བ་རྒྱལ་བའི་སྲས་པོའི་མིང་གི་ཅོད་པཎ་འཆང་བ་གཞན་ཕན་མཐའ་ཡས་འོད་ཟེར་དུ་འབོད་པས་འོག་མིན་གཉིས་པ་མཁའ་སྤྱོད་བདེ་ཆེན་གླིང་གི་དབེན་གནས་སུ་ཤར་མར་སྤེལ་བ་མངྒ་ལཾ། །