དཔལ་ཡུལ་དབོན་སྤྲུལ་རིན་པོ་ཆེའི་དྲིས་ལན་ཟླ་ཞུན་སྣང་བ།

༄། །དཔལ་ཡུལ་དབོན་སྤྲུལ་རིན་པོ་ཆེའི་དྲིས་ལན་ཟླ་ཞུན་སྣང་བ་ཞེས་བྱ་བ་བཞུགས། །དོན་ཟབ་ཚིག་གི་མཚར་སྡུག་མཐའ་ཡས་པས། །དཔྱོད་ལྡན་སྐྱེ་བོའི་ཡིད་དབང་འཕྲོག་མཛད་པའི། །རྒྱ་མཚོའི་བུ་མོ་གང་དང་རྩེན་པའི་ཡབ། །འཇམ་དབྱངས་བླ་མ་སྙིང་གི་པདྨོར་རོལ། །འདིར་ལུགས་ཟུང་དཔལ་གྱིས་མངོན་པར་མཐོ་ཞིང་མཁྱེན་རབ་ཀྱི་སྤྱན་དཀྱུས་རྣམ་པར་ཡངས་པ་སྤྲུལ་པའི་སྐུ་རིན་པོ་ཆེ་ཉིད་ལྟ་བུར་ཆོས་མཐུན་གྱི་དྲིས་ལན་ལུང་རིགས་དང་འབྲེལ་བ་འབུལ་བའི་ནུས་པ་ཁོ་བོ་ཅག་ལ་ཅང་མ་མཆིས་ཀྱང་། དམ་པའི་གསུངས་ལྟོས་མེད་དུ་འདོར་བ་འོས་མ་ཡིན་པའི་ཚུལ་ལ་ལེགས་པར་བསམ་ནས་དྲི་བའི་གོ་རིམ་དང་མཐུན་པའི་ལན་རྣམས་ཀྱང་གང་ཟིན་ཁྲིགས་མེད་དུ་འབུལ་བ་ལ། ཐོག་མར་འདུལ་བའི་གོས་ཀྱི་གཞིའི་སྐབས་འཕྲོས་ལས་སྤྱིར་བཏང་དགེ་སློང་ལ་འཚོ་བའི་ཡོ་བྱད་བཅུ་གསུམ་ཡོད་ཀྱང་། དེའི་ནང་ཚན་ཆོས་གོས་རྣམ་པ་གསུམ་ནི། སྣམ་སྦྱར་དང་། བླ་གོས་དང་། མཐང་གོས་སོ། །དང་པོ་ནི། སྣམ་ཕྲན་དགུ་ནས་ཉེར་ལྔའི་བར་དང་། གླེགས་བུ་ཕྱེད་དང་གསུམ་པ་ལ་སོགས་པ་སྟེ། ཆེ་སྐོར། འབྲིང་སྐོར། ཆུང་སྐོར་གསུམ་ལས་ནང་གསེས་ཀྱི་ཁྱད་པར་དགུ་ཡོད། དེ་ཐམས་ཅད་ཀྱི་རྒྱ་ཚད་ནི་སྲིད་དུ་ཁྲུ་ལྔ་བ་དང་། ཞེང་དུ་ཁྲུ་གསུམ་པ་སྟེ་བླ་གོས་དང་ཚད་མཉམ། གཉིས་པ་ནི། སྣམ་ཕྲན་བདུན་མ་དང་། གླེགས་བུ་ཕྱེད་དང་གསུམ་པ་སྟེ། ད་ལྟ་ཡོངས་གྲགས་ཀྱི་ཆོས་གོས་འདི་ག་ཡིན། གསུམ་པ་ནི་སྣམ་ཕྲན་ལྔ་དང་གླེགས་བུ་ཕྱེད་དང་གཉིས་པ་སྟེ། རྒྱ་ཚད་སྲིད་དུ་ཁྲུ་ལྔ་དང་ཞེང་དུ་ཁྲུ་དོ་ཡོད་པའོ། །དེ་ལས་བླ་གོས་ནི། བླའམ་སྟོད་དུ་གྱོན་རྒྱུའི་གོས་དང་། མཐང་གོས་ནི། སྨད་དམ་ནང་དུ་གྱོན་རྒྱུའི་གོས་ཏེ། ད་ལྟ་ཁ་ཅིག་གིས་ཤམ་ཐབས་ལེའུ་ཅན་ཟེར་བ་དེ་ཡིན། དེ་གཉིས་ཀ་དང་བསྒྲགས་ནས་སོ་སོའི་ནང་དུ་ཉིན་མོ་དང་མཚན་མོར་གྱོན་རྒྱུའི་གོས་ལ། རྔུལ་གཟན་དང་། རྔུལ་གཟན་གྱི་གཟན། ཤམ་ཐབས་དང་ཤམ་ཐབས་ཀྱི་གཟན་ཞེས་གཉིས་གཉིས་ཡོད། དེ་དག་ད་ལྟ་ཡོངས་གྲགས་ཀྱི་གཟན། ཤམ་ཐབས་ཟེར་བ་དག་དང་དོན་གཅིག དེ་རྣམས་གྱོན་པའི་དུས་ཀྱང་རིམ་པ་བཞིན། སྣམ་སྦྱར་གྱོན་པའི་དུས་ལྔའམ་དྲུག་སྟེ། ཟས་ཀྱི་ཐོག་མ་ལ་འདུག་པའི་དུས་དང་། ཆོས་འཆད་པ་དང་ཉན་པའི་དུས་དང་། དཀོན་མཆོག་གི་རྟེན་ལ་ཕྱག་འཚལ་བའི་དུས་དང་། དགེ་འདུན་གྱི་ལས་བྱེད་པའི་དུས་དང་། བསོད་སྙོམས་ལ་རྒྱུ་བའི་དུས་རྣམས་ཏེ་གཞན་དུ་བསྒོ་བར་མི་བྱ། བླ་གོས་ནི་མི་གཙང་བས་གོས་པ་སོགས་འབག་པའི་ལས་བྱེད་སྐབས་མ་གཏོགས་རྟག་ཏུ་བསྒོ་བར་བྱ་བ་དང་། མཐང་གོས་ནི་ཉིན་མཚན་ཀུན་ཏུ་ཅི་བདེར་བསྒོ་བར་བྱ་བའོ། །དེ་ལྟ་ནའང་སྣམ་སྦྱར་ནི་དགེ་སློང་གི་རྟགས་ཐུན་མོང་མ་ཡིན་པར་གྱུར་ཅིང་། ཡང་གོས་ཀྱི་བྱེ་བྲག་ཟླ་གམ་དུ་གྲགས་པ་ནི། རྒྱུད་ལས། སྔགས་པ་རྣམས་ཀྱི་ལས་བཞི་དང་མཐུན་པའི་གོས་གྱོན་པར་བཤད་པའི་ནང་ཚན་དབྱིབས་ཟླ་གམ་དང་། ཁ་དོན་དམར་པོའི་སྒོ་ནས་དབང་གི་གོས་སུ་བཞག་པ་དེ་ཡིན་ཀྱང་། བོད་འདིར་གྲང་བ་ཆེ་བ་དང་། ཟླ་གམ་གོས་སྣ་གུ་ཅན་མ་ཡིན་པའི་རྒྱུ་མཚན་གྱིས་རུང་མཐུན་བརྩིས་ནས་རབ་བྱུང་སྨད་འདུལ་བ་རྣམས་ཀྱིས་ཀྱང་བསྒོ་བར་མཛད་པའོ། །ཡང་ནང་བ་སངས་རྒྱས་པའི་ལྟ་གྲུབ་རྣམ་པ་བཞིར་གྲགས་པ་ནི་ཐེག་དམན་བྱེ་མདོ་གཉིས་དང་། ཐེག་ཆེན་དབུ་སེམས་གཉིས་ཏེ་བཞི་ཡིན་ལ། དེ་དག་གི་རྩེ་མོ་ཡང་དབུ་མ་ཡིན་ཞིང་། དེ་ལ་ནང་གསེས་ཐལ་རང་གཉིས་སམ། ཡང་ན་མདོ་སྡེ་སྤྱོད་པའི་དབུ་མ་པ་དང་། རྣལ་འབྱོར་སྤྱོད་པའི་དབུ་མ་པ་གཉིས་སུ་དབྱེ་བ་སོགས་མང་དུ་ཡོད་ཀྱང་། དེ་རྣམས་ཀྱི་ནང་ནས་མཐར་ཐུག་གང་ཡིན་ལ། ཀུན་མཁྱེན་བླ་མས་ཡིད་བཞིན་རིན་པོ་ཆེའི་མཛོད་དུ། རྒྱལ་བའི་དགོངས་པ་མཐར་ཐུག་སྙིང་པོའི་དོན། །ཐལ་འགྱུར་བས་ནི་སྤྲོས་པ་ཀུན་འགོག་ཅིང་། །ཞེས་གསུངས་པའི་སྐབས་ཀྱི་མཛོད་འགྲེལ་པདྨ་དཀར་པོར་གཟིགས་པས་གསལ་ཞིང་། གཞན་ཡང་འཕགས་པ་ཀླུ་སྒྲུབ་ཞབས་ཀྱིས་རྒྱལ་བའི་བཀའ་འཁོར་ལོ་གསུམ་གྱི་དགོངས་འགྲེལ་གྱི་བསྟན་བཅོས་ཚོགས་གསུམ་མཛད་པ་རྣམས་ནི་གོ་རིམ་བཞིན་སྦྱར་བར་བྱ་བ་ཡིན་ཡང་། སྔ་མ་སྔ་མའི་སྦས་དོན་ཕྱི་མ་ཕྱི་མའི་བརྗོད་བྱ་དངོས་བསྟན་དུ་ཤེས་དགོས་པའི་ཕྱིར་བསྟན་བཅོས་ནང་འགལ་གྱི་ཉེས་པ་མེད་དོ། །ཡང་ཤིང་རྟ་རྣམ་པ་གཉིས་ལས། འཕགས་པ་ཀླུ་སྒྲུབ་སངས་རྒྱས་མྱ་ངན་ལས་འདས་ནས་ལོ་བརྒྱ་འདས་པ་ན་འཁྲུངས་པ་དང་། ཐོགས་མེད་ཞབས་ལོ་བཞི་བརྒྱ་འདས་པ་ན་འཁྲུངས་པ་མདོ་ལས་བཤད་པ་ལྟར་ཡིན་ཡང་བསྟན་བཅོས་ཕྱི་མོ་ལ་ཡིག་སྐྱོན་ཐལ་བར་སེམས་སོ། །ཡང་དབུ་མ་ལ་རང་སྟོང་དང་གཞན་སྟོང་གི་བརྡ་ཆད་བྱེད་པ་འདི་རྒྱ་བོད་ཀྱི་བསྟན་བཅོས་རྙིང་པ་རྣམས་ལ་མ་གྲགས་ཀྱང་། ཕྱིས་སུ་བོད་འདིར་ཡུ་མོ་གྲུབ་ཆེན་མི་བསྐྱོད་རྡོ་རྗེས་དབུ་མ་གཞན་སྟོང་གི་རྣམ་བཞག་མཛད་པ་ནི། ངོ་བོ་ཉིད་མེད་པར་སྨྲ་བའི་དབུ་མ་པ་རྣམས་ལ་རང་སྟོང་པ་ཞེས་གྲགས་ཤིང་། དོན་ལ་གཞན་སྟོང་པ་ནི་དོན་དམ་རང་གི་ངོ་བོ་ནས་མི་སྟོང་ཡང་གཞན་ཀུན་རྫོབ་ཀྱིས་སྟོང་བ་བུམ་པ་དང་ཆུའི་དཔེ་སོགས་ཀྱིས་གཏན་ལ་འབེབ་ཚུལ་སོར་ཕྲེང་གི་མདོར་བཤད་པ་དེ་ཉིད་ངེས་དོན་མཐར་ཐུག་ཏུ་བཞེད་པའི་ལུགས་ཡིན་ནོ། །ཡང་གསར་རྙིང་ཐུན་མོང་གི་རྒྱུད་ནས་བཤད་པའི་རྩ་ལྟུང་བཅུ་བཞིའི་ནང་ཚན། དམ་ཚིག་རྫས་ནི་ཇི་བཞིན་ཉིད། །མི་བརྟེན་པ་ནི་བཅུ་གསུམ་པ། །ཞེས་གསུངས་པ་དང་དོན་གྱི་གནད་གཅིག་པར་གོ་སྟེ། དེ་ལྟར་ན་ཕྱག་རྒྱ་འཛིན་པའི་ཁོངས་སུ་འདུ་བར་སེམས་ཏེ། ཐུགས་མཚན་དམ་ཚིག་གི་ཕྱག་རྒྱ་ཡིན་པའི་ཕྱིར་རོ། །དེ་ཇི་ལྟར་འཆང་བའི་ཚུལ་ལ་ཚིག་སྤྱི་སྦས་དང་མཐར་ཐུག་གི་དོན་སོ་སོར་སྦྱར་ནས་འཆད་དུ་ཡོད་ཀྱང་། ལས་དང་པོ་པ་ལ་དགོངས་ནས། གསར་རྙིང་གི་དམ་པ་འགའ་ཞིག་ཕྱག་མཚན་དངོས་འབྲལ་མེད་དུ་འཆང་བའམ། དེ་ལྟར་མ་གྲུབ་ནའང་ཐ་ན་རི་མོ་ཚུན་ཆད་ཀྱི་དངོས་པོ་མི་འབྲལ་བར་འཆང་བའི་ཕྱག་ལེན་མཛད་དོ། །བཏགས་གྲོལ་གྱི་གླེགས་བམ་ནི། དབུགས་ལ་སླེབ་ན་ལེགས་ཀྱང་། གལ་ཏེ་མ་སླེབ་པར་རོ་ལ་བཏགས་ན་ཡང་ཕན་ཡོན་ནི་ཡོད་དེ། དཔེར་ན་སོར་འཕྲེང་གི་འཁོར་ལོའི་སྔོན་གྱི་འབྱུང་བའི་ལོ་རྒྱུས་བཞིན་ནོ། །གསོན་དུས་རྒྱུན་འཆང་རུང་མིན་ལ་རྫོགས་ཆེན་སྙིང་ཐིག་གི་རྒྱུད་ཆེན་རྣམས་སུ་རྒྱུན་འཆང་མི་རུང་བའི་གསལ་ཁ་མེད་ཀྱང་། གཏེར་རྒྱུད་ཁ་ཅིག་ཏུ་དགེ་སྡིག་གཉིས་ཀར་འགྱུར་ཁྱད་ཡོད་ཕྱིར་དགེ་བ་སྒྲུབ་དུས་མ་གཏོགས་འཆང་མི་རུང་བར་བཤད་པ་དག་སྣང་རུང་། དེ་ལྟར་ན་གསོན་ཚེ་ལུས་ཀྱི་དྲོད་དང་འབྲལ་མེད་དུ་འཆང་བར་བཤད་པ་དང་ཅུང་ཟད་འགལ་བར་འགྱུར་བའི་ཕྱིར། ཕྱི་མ་འདིའི་དགོངས་པ་ཁ་ཅིག་འདི་ཉིད་ཀྱིས་སྙེམས་བྱས་ནས་སྡིག་པ་ལ་མི་འཛེམ་པར་འགྱུར་དུ་དོགས་ནས་དགོངས་པ་ཅན་གྱི་གསུངས་ཡིན་པར་སེམས་སོ། །ཡང་ཁྲེགས་ཆོད་དང་ཐོད་རྒལ་གྱི་ངེས་ཚིག་ནི། རིམ་པ་བཞིན་ཐག་རྦད་དེ་ཆོད་པ་ལ་ཁྲེགས་ཆོད་ཅེས་བྱ་སྟེ། འཇིག་རྟེན་ནའང་ཁྲེགས་སེ་ཆོད་ཟེར་བ་དང་མཚུངས་ཏེ་ཚིག་རང་གི་ངོ་བོ་ནི་བརྡའ་རྙིང་ཡིན་ནོ། །དེ་བཞིན་ཏུ་ལམ་གཞན་བར་ནས་བོར་ཏེ་སོང་བ་ལ་ཐོད་རྒལ་ཞེས་བྱ་སྟེ་ལམ་གཞན་ལས་ཆེས་ཆེར་མྱུར་བའི་རྒྱུ་མཚན་གྱིས་བརྡའ་ཆད་དེ་ལྟར་མཛད་དོ། །ཡང་རྫོགས་ཆེན་སེམས་ཀློང་མན་ངག་གི་སྡེའི་དབྱེ་བ་ལ། རྗོད་བྱེད་ཚིག་གི་དབྱེ་བ་ནི་སེམས་ནམ་མཁའ་ཆེ་སོགས་སེམས་སྨད་བཅོ་བརྒྱད་སེམས་སྡེ་དང་། ཀློང་ཆེན་རབ་འབྱམས་རྒྱལ་པོའི་རྒྱུད་སོགས་ཀློང་སྡེ་དང་། ཐིག་ལེ་ཀུན་གསལ་གྱི་རྒྱུད་སོགས་མན་ངག་གི་སྡེ་སྟེ། དེ་རྣམས་སོ་སོའི་ནང་གསེས་རྒྱུད་སྡེའི་རྣམ་གྲངས་ནི་ཀུན་མཁྱེན་བླ་མས་གྲུབ་མཐའ་མཛོད་དང་ཆོས་དབྱིངས་རིན་པོ་ཆེའི་མཛོད་འགྲེལ་སོགས་སུ་རྒྱ་ཆེར་གསུངས་པ་ལ་གཟིགས་པས་ཁོང་དུ་ཆུད་པར་འགྱུར་ཞིང་། ཡང་བརྗོད་བྱ་དོན་གྱི་ཁྱད་པར་ལ་རྣམ་གྲངས་མང་ཡང་མདོར་བསྡུས་པ། རིག་འཛིན་འཇིགས་མེད་གླིང་བས་ཡོན་ཏན་རིན་པོ་ཆེའི་མཛོད་ལས། སེམས་ཀྱི་སྡེ་ནི་རོལ་པའི་རྩལ་དུ་ཤར། །ཀློང་གི་སྡེ་ནི་རང་སྣང་བཀོད་པའི་རྒྱན། །མན་ངག་སྡེ་ནི་མེད་སྣང་སྟོང་བའི་གཟུགས། །ཞེས་གསུངས་པའི་སྐབས་ཀྱི་རང་འགྲེལ་རྣམ་མཁྱེན་ཤིང་རྟར་གཟིགས་པས་མཁྱེན་པར་འགྱུར་བ་ཡིན་ནོ། །ཡང་ཨ་ཏི་ལས་གོང་དུ་ཡང་ཏི་དང་། སྤྱི་ཏི་ཟེར་བའི་རྣམ་བཞག་འདི་སྔ་འགྱུར་དཀའ་མའི་ཕྱོགས་ལ་མ་གྲགས་མོད་དེ། གཏེར་རྒྱུད་ཁ་ཅིག་ལས་དེ་ལྟར་བཤད་སྣང་བ་ཡང་མན་ངག་སྡེའི་ནང་གསེས་ཀྱི་རྣམ་གྲངས་ཙམ་ལས་གཞན་མ་ཡིན་པར་ཤེས་དགོས་སམ་སྙམ་མོ། །སྨྲས་པ། ཕལ་ཆེར་ལྟ་བ་མཐོང་ཡང་སྤྱོད་པ་རྩིང་། །ལ་ལ་སྤྱོད་པའི་བླང་དོར་ཞིབ་ན་ཡང་། །མཐར་ལྟའི་གཡང་ལ་དོགས་པ་མེད་པར་འཇུག །ཀྱེ་མ་ལྟ་སྤྱོད་འཛོམས་པ་ཉིན་སྐར་ཙམ། །ངན་སོང་སྒོ་གཙང་ཚུལ་ཁྲིམས་བསླབ་པ་སྟེ། །ཤེས་རབ་ཟབ་མོའི་རྟེན་ནི་ཏིང་འཛིན་ཡིན། །སྲིད་རྩ་བདག་འཛིན་གཅོད་བྱེད་ཤེས་རབ་སྟེ། །དེས་ན་ཐར་འདོད་བསླབ་གསུམ་ཟུང་འབྲེལ་འཚལ། །ཀྱེ་ཧུད་འཇིག་རྟེན་གསུམ་གྱི་རིན་ཆེན་མཆོག །ཐུབ་བསྟན་ཉི་མ་ནུབ་རིའི་རྩེ་མོ་རུ། །ལྷུང་ལ་ཐོས་བསམ་སྒོམ་པའི་སོར་རྩེ་ཡང་། །གཡོ་བར་མི་བྱེད་བསྟན་འཛིན་དེས་ཅི་ཞིག །འདི་ལྟར་སྙིགས་མའི་གདོན་གྱིས་ཆེས་ནོན་པའི། །འགྲོ་ལ་བསམ་ན་དམ་ཆོས་བདུད་རྩི་དང་། འབྲེལ་བའི་འབེལ་གཏམ་སྤྱོད་པའི་སྐལ་བཟང་ཡང་། །དམ་པའི་བདག་རྐྱེན་ཡིན་སྙམ་ངལ་གསོ་ཐོབ། །འདི་ན་ལེགས་བཤད་སྙིང་པོས་ཆེས་སྟོངས་ཀྱང་། །ལྷག་བསམ་ཟླ་བ་ཞུན་མའི་མདངས་འཛིན་པའི། །ཆོས་མཐུན་གཏམ་གྱི་དུང་ཆེན་བུས་པའི་སྒྲས། འགྲོ་ཀུན་གཏི་མུག་གཉིད་ལས་སད་པར་ཤོག །ཅེས་མཁྱེན་རབ་ཀྱི་དབང་ཕྱུག་དཔལ་ཡུལ་དབོན་སྤྲུལ་རིན་པོ་ཆེ་ནས་དྲི་ཚིག་ལེབ་རྒན་དར་གྱི་གནང་སྐྱེས་དང་འགྲོགས་པ་སྤྱི་བོར་ཕེབས་པའི་བཞེད་སྐོང་དུ་ཆོས་སྨྲ་བའི་བཙུན་པ་གཞན་ཕན་མཐའ་ཡས་པས་ཤར་མར་སྤེལ་བ་དགེ། དགེའོ།། །།