ཞེ་ཆེན་མ་ཧཱ་པཎ་ཆེན་དབོན་སྤྲུལ་མཐུ་སྟོབས་རྣམ་པར་རྒྱལ་བས་དྲིས་པའི་ལན།

༄། །ཞེ་ཆེན་མ་ཧཱ་པཎ་ཆེན་དབོན་སྤྲུལ་མཐུ་སྟོབས་རྣམ་པར་རྒྱལ་བས་དྲིས་པའི་ལན་བཞུགས་སོ། །ལྷག་པའི་ལྷ་དང་དབྱེར་མ་མཆིས་པའི་བླ་མ་དམ་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་པར་མཛད་དུ་གསོལ། ལགས། བཀའ་འདྲི་ཇི་ལྟར་ཕེབས་པ་རྣམས་ཀྱི་ཚིག་དོན་ལ་བརྟགས་དཔྱད་ཞིབ་འཇུག་བགྱིས་པར། ཐོག་མར་དབོན་སྤྲུལ་ཞལ་སྔ་ནས། བླ་མེད་དབང་སྤྱིའི་རྒྱུག་བྱང་ནས་ལོ་ཆེན་དབང་བཤད་འཇུག་པ་གནང་རྒྱུར། སྦྱང་གཞི། སྦྱོང་བྱེད། སྦྱངས་འབྲས་སོགས་ཞིབ་མོར་སྦྱོར་ཟེར་ནས་ཡིག་ཆུང་འདོན་པ་ཀཿརྫོགས་ཞེ་གསུམ་ཕྱག་ལེན་ཡིན་ཡང་མཉན་མཁན་དཔྱོད་ཤེས་ལ་རྣ་བར་མི་འབབ་སྙམ། ངེད་ནས་སྨིན་གླིང་རྗེ་བཙུན་མར་སྙན་སྒྲོན་ཕུལ་ནས་བཤད་པ་གསར་བ་འདི་བཞིན་ཡོད་པ་གཟིགས་ཕུལ་བ་འགལ་འདུ་ཡོད་མེད་གསུང་གསལ་ཞུ། ཞེས་ཕེབས་པར། ཁོ་བོས་ནི་སྦྱང་གཞི་སོགས་ཀྱི་ཚིག་འདི་དག་སྤྱིར་བཏང་ཡིག་ཆུང་ཡིན་པར་མི་སེམས་ཤིང་། ཁྱད་པར་འཆད་པ་པོས་བཀྲལ་ནས་བཤད་དགོས་རྒྱུ་ཡིན་པར་མི་སེམས་ཏེ། ཅིའི་ཕྱིར་ཞེ་ན། འདི་ནི་རྒྱུད་སྡེ་འོག་མ་རྣམས་ལས་མ་ཧཱ་ཡོ་ག་ཁྱད་པར་དུ་འཕགས་པའི་ཚུལ་སྨོས་པའི་སྐབས་ཡིན་པ་གང་ཞིག གོང་དུ། དེ་ཡང་མ་ཧཱ་ཡོ་ག་ཞེས་པའི་སྒྲ་ལས་དྲངས་ན་རྣལ་འབྱོར་ཆེན་པོ་སྟེ། གཉིས་མེད་ཀྱི་དོན་ལ་བློ་འབྱོར་བས་ཡོ་ག་ཕྱི་བ་ལས་ཆེས་ཁྱད་པར་དུ་འཕགས་པའི་ཕྱིར་རོ། །ཞེས་དང་། འདི་ནི་ཐེག་པ་འོག་མ་རྣམས་ཀུན་རྫོབ་རྫས་ཡོད་དང་བཏགས་ཡོད་དུ་བཟུངས་ནས་བཟང་ངན་བླང་དོར་དུ་ལྟ་བ་ལས་འཕགས་ཏེ། ཞེས་གསུངས་ནས་འཕགས་ཆོས་དངོས་འཆད་པའི་སྐབས་སུ། རྒྱུད་སྡེ་འོག་མ་ལས་སྦྱང་གཞི་སོགས་ཕུང་ཁམས་སྐྱེ་མཆེད་ཀྱི་དག་པ་ཞིབ་མོར་མ་སྦྱར་བ་ལ་འདིར་དེ་ཞིབ་མོར་སྦྱོར་བའི་ཁྱད་པར། རྒྱུད་སྡེ་འོག་མར་ཐུན་མཚམས་སུ་སྣང་བ་ལྷར་མི་སྒོམ་པ་ལས། འདིར་དེ་སྒོམ་པའི་ཁྱད་པར་རྒྱུད་སྡེ་འོག་མར་ལུས་ལ་གནད་དུ་སྣུན་པའི་ཐབས་ཀྱིས་བདེ་སྟོང་ཟུང་འཇུག་སྒྲུབ་ཚུལ་མེད་པ་ལས། འདིར་དེ་སྒྲུབ་ཚུལ་ཡོད་པའི་ཁྱད་པར་རྒྱུད་སྡེ་འོག་མར་ཉེ་རྒྱུའི་སྤྱོད་པས་འབྲས་བུ་ལ་སྦྱོར་ཚུལ་མ་བཤད་པ་ལས། འདིར་དེ་བཤད་པའི་ཁྱད་པར་སྟེ་བཞིར་གསུངས་པའི་ཕྱིར། དེ་སྐད་དུ་ཡང་རྩ་བར། ལམ་བསྐྱེད་རིམ། མ་དག་པའི་སྣང་བ་དབྱིངས་སུ་སྦྱངས་པའི་དཀྱིལ་འཁོར་གྱི་འཁོར་ལོར་སྒོམ་ཞིང་། དབང་དང་བསྐྱེད་རིམ་གཉིས་ཀ་ལ། ཡར་འབྲས་བུའི་བཞུགས་ཚུལ་དང་རྣམ་པ་མཐུན་པའི་ལམ་དུ་བྱེད་ཚུལ་དང་། མར་འཁོར་བ་དང་རྣམ་པ་མཐུན་པའི་དྲི་མ་སྦྱོང་ཚུལ་ཏེ། སྦྱང་གཞི། སྦྱང་བྱ། སྦྱོང་བྱེད། སྦྱངས་འབྲས་རྣམས་ཞིབ་མོར་སྦྱོར། ཐུན་མཚམས་སུ་ཡང་སྣང་བ་ཐམས་ཅད་ལྷར་སྒོམ། རྫོགས་རིམ་རྡོ་རྗེའི་ལུས་ལ་གནད་དུ་སྣུན་པའི་ཐབས་ཀྱིས་སེམས་དང་ཡིད་དང་རླུང་རྣམས་དབུ་མར་ཐིམ་པས་མངོན་དུ་གྱུར་པའི་བདེ་སྟོང་ཟུང་འཇུག་སྒྲུབ། སྤྱོད་པ་རྣམ་པ་གསུམ་གྱི་ཉེ་རྒྱུས་འབྲས་བུ་ལ་སྦྱོར་བར་བཞེད། ཅེས་གསུངས། དེ་ལྟར་ན་འཕགས་ཆོས་དང་པོ་སྦྱང་གཞི་སོགས་རྒྱས་པར་བཀྲལ་ནས་འཆད་དགོས་ཚེ། འཕགས་ཆོས་གཉིས་པ་སྣང་བ་ལྷར་སྒོམ་ཚུལ་དང་། གསུམ་པ་ཟུང་འཇུག་སྒྲུབ་ཚུལ་དང་། བཞི་བ་ཉེ་རྒྱུའི་སྤྱོད་པ་སྐྱོང་ཚུལ་མཐའ་དག་རྒྱས་པར་བཀྲལ་ནས་འཆད་དགོས་པར་སྣང་བས་ན་ཧ་ཅང་ཐལ་བར་སེམས་ཏེ། གཞན་དུ་ན་སྔ་མ་བཀྲལ་ནས་ཕྱི་མ་རྣམས་མ་བཀྲལ་བ་ལ་ཤེས་བྱེད་ཀྱི་རྒྱུ་མཚན་ངེས་པ་འགོད་དུ་མེད་པའི་ཕྱིར་རོ། །གལ་ཏེ་ཅི་ནས་ཀྱང་ཁྱད་པར་འཕགས་ཆོས་དང་པོ་སྦྱང་གཞི་སོགས་ཁོ་ན་ཉིད་ཡིག་ཆུང་ཡིན་ཞིང་། དེ་ཡང་འཆད་པ་པོས་བཀྲལ་དགོས་པ་ཞིག་ནའང་། འདིར་སྦྱང་གཞི་དཀྱིལ་འཁོར་བཞིར། སྦྱོང་བྱེད་དབང་བཞིའི་ལམ་བསྐྱེད་རྫོགས་ཡན་ལག་བཞིས། སྦྱང་བྱ་དབང་རང་རང་གི་ངོ་སྐལ་དུ་གྱུར་པའི་སྒྲིབ་པ་བཞི་སྦྱངས་ནས། སྦྱངས་འབྲས་སྐུ་བཞི་ལ་སྦྱོར་ཚུལ་རྣམས་མི་འཆད་པར་གཞན་ཞིག་འཆད་དོན་ཅུང་འདུག་གམ་དགོངས་དཔྱད་མཛོད། ཡང་ཞལ་སྔ་ནས། སྨིན་གླིང་ནས་རྒྱུད་བཤད་ཁོག་དབུབ་ལ་ཨ་ཏི་སྤྱི་དོན་དྲུག་གིས་འཆད་ལུགས་དང་། ཨ་ནུ་ལུང་བདུན་གྱིས་འཆད་ལུགས་བཤད་གསར་དེར་ཡོད་པ་འགྲོ། གདུང་ཚིག་ཉེར་གསུམ་ཤོ་ལོ་ཀས་དོན་ཉེར་གསུམ་ཕྱེས་པ་ཡང་གཟིགས་ལས་ཆེ། ཞེས་གསུངས་པ་ལ། སྔ་མ་གཉིས་ཤྲཱི་ཛྭ་ལས་བྲིས་པ་དེ་མཐོང་བྱུང་། གདུང་ཚིག་ཉེར་གསུམ་ཤོ་ལོ་ཀས་དོན་ཉེར་གསུམ་ཕྱེས་པ་དེ་མ་མཐོང་ཡང་། འདིར་ཀྱེ་མ་ཀྱི་ཧུད་ལ་སོགས་པའི་ཤོ་ལོ་ཀ་གཅིག་དེས་དོན་ཉེར་གསུམ་བསྟན་པར་སྨྲས་ཡོད་ཚེ། གཞུང་མ་མཐོང་བའི་གཟུ་ལུམ་ཡིན་པར་སེམས་ཏེ། འདུས་མདོའི་དམ་པས་གདུང་བ་བཏོན་པའི་ལེའུ་སྟེ་གསུམ་པ་ལས། ཨེ་མ་ཧོ་ཀྱི་ཧུད་ཨེ་མའོ་བློང་། །སྟོན་པའི་སྒྲོན་མའི་འོད་ནུབ་ན། །འཇིག་རྟེན་མུན་པ་གང་གིས་སེལ། །ཞེས་པས་གདུང་ཚིག་དང་པོ་དང་། ཚད་མའི་ཞལ་དེ་མི་བཞུགས་པས། །ཚད་མས་གསུངས་པའི་བསྟན་པ་ལ། །འཇུག་པར་འཚལ་བའི་འགྲོ་བ་རྣམས། །ལོག་པར་འཇུག་པར་མི་འགྱུར་རམ། །ཞེས་པས་གཉིས་པ་དང་། ཚད་མར་དམ་བཅས་གང་ཟག་གིས། །ངེས་མ་རྙེད་པའི་གང་ཟག་ལ། །ཕན་པར་བྱ་ཕྱིར་བཀའ་བཀྲོལ་བས། །གཏན་ལ་ཕེབས་པར་འགྱུར་ཞིག་གུ། །ཞེས་པས་གསུམ་པ་དང་། ལེགས་ཉེས་འབྱེད་པའི་སྤྱན་ཟུམ་པས། །བཀའ་ཉིད་ཁྱད་དུ་གསོད་པ་ཡི། །སྐྱོན་གྱི་སྤྱི་གཙུག་མཐར་ཕྱིན་པས། །ལོག་སྟོབས་འཕེལ་བར་མི་འགྱུར་རམ། །ཞེས་པས་བཞི་བ་དང་། ལོག་པའི་བསྟན་པའི་སྤྲིན་འཁྲིགས་པས། །བདེན་པ་གཉིས་ཀྱི་ཉི་ཟླ་ནུབ། །འགྲོ་བ་གང་ཞིག་ལམ་འཚོལ་བ། །མུན་པར་འཁྱམས་པར་མི་འགྱུར་རམ། །ཞེས་པས་ལྔ་བ་དང་། སྟོན་པ་མྱ་ངན་འདས་འོག་ཏུ། །བདུད་དང་སྲིན་པོ་མུ་སྟེགས་དང་། །གནོད་སྦྱིན་འབྱུང་བོ་མི་མ་ཡིན། །མ་རུངས་གདུག་པ་སུས་འདུལ་འགྱུར། །ཞེས་པས་དྲུག་པ་དང་། དྲི་མེད་བསྟན་པའི་བདུད་རྩི་འདི། །ནུབ་ན་ཤིན་ཏུ་མ་རུང་ན། །རྩལ་དང་ལྡན་པ་སུ་ཞིག་གིས། །འབར་ཞིང་སྣང་བར་བྱེད་པར་འགྱུར། །ཞེས་པས་བདུན་པ་དང་། བསླབ་པ་དམ་པའི་རིན་པོ་ཆེ། །བྲལ་ན་ཤིན་ཏུ་མ་རུང་ན། །སྐྱེས་བུ་དམ་པ་གང་ཞིག་གིས། །ཚུལ་རྣམས་འཛིན་པར་བྱེད་པར་འགྱུར། །ཞེས་པས་བརྒྱད་པ་དང་། སྟོན་པ་མི་བཞུགས་དེ་རྗེས་ན། །སྟོན་པའི་སློབ་མ་ཇི་སྙེད་པ། །འཕགས་དང་གང་ཟག་ཐ་དད་པ། །ལུང་བསྟན་འབྱུང་བ་གང་སུ་ཞིག །ཅེས་པས་དགུ་བ་དང་། བསྟན་པ་ནམ་མཁའ་འདྲ་བ་ལ། །མོས་པ་ཐ་དད་པར་བཟུང་ནས། །ཡིན་དང་མ་ཡིན་ཆ་འཛིན་ཅིང་། །རྩོད་པ་འཕེལ་བར་མི་འགྱུར་རམ། །ཞེས་པས་བཅུ་བ་དང་། དེ་ཉིད་ངེས་པར་རིགས་གཅིག་ལ། །རིགས་མི་མཐུན་པར་ཐ་དད་སྤྱོད། །རིགས་གཅིག་ཐ་དད་རིགས་རྣམས་སུ། །བསླད་ཅིང་བཅོས་པར་མི་འགྱུར་རམ། །ཞེས་པས་བཅུ་གཅིག་པ་དང་། རིན་ཐང་མེད་པའི་རིན་པོ་ཆེ། །མི་མཁས་གང་ཟག་ཐ་དད་པས། །ཉོན་མོངས་འདོད་པས་ཁྲིད་དབང་གིས། །དུག་དང་རྗེ་བར་མི་འགྱུར་རམ། །ཞེས་པས་བཅུ་གཉིས་པ་དང་། ཆོས་ཀྱི་རྒྱལ་པོ་སྟོན་པ་སྟེ། །འདི་སྔོན་ཕན་ཆད་ཞལ་བཞུགས་ཚེ། །མ་རུངས་པ་རྣམས་འཚེ་བགྱིད་ན། །གདུག་པ་དར་བར་མི་འགྱུར་རམ། །ཞེས་པས་བཅུ་གསུམ་པ་དང་། གང་འདིར་བསྟན་པ་གནས་པའི་ཡུན། །ཇི་སྲིད་གཅིག་ཏུ་གནས་པར་འགྱུར། །ཞེས་པས་བཅུ་བཞི་བ་དང་། གང་འདིར་སྔར་འབྱུང་གང་སྔར་འབྱུང་། །ཕྱིས་འབྱུང་དུས་འདི་ཇི་ལྟར་འགྱུར། །ཞེས་པས་བཅོ་ལྔ་པ་དང་། སྟོན་པའི་བསྟན་པ་ཐ་མའི་ཚེ། །ངེས་པར་ཇི་ལྟར་འགྱུར་ཅིག་གུ། །ཞེས་པས་བཅུ་དྲུག་པ་དང་། བསླབ་པ་འཛིན་པའི་སློབ་མ་རྣམས། །ཐ་མ་ཇི་ལྟར་འགྱུར་ཞིག་གུ། །ཞེས་པས་བཅུ་བདུན་པ་དང་། འདི་ནས་མྱ་ངན་འདས་འོག་ཏུ། །གང་ལྟར་སུ་ཡི་སྟོན་པར་གཤེགས། །ཞིང་ཁམས་ཕྱོགས་ནི་གང་ན་བཞུགས། །དེ་ན་བསྟན་པ་ཅི་ཞིག་སྒྲོག །ཞེས་པས་བཅོ་བརྒྱད་པ་དང་། ད་ཡོད་འཇིག་རྟེན་མགོན་མེད་རྣམས། །མགོན་དང་སྐྱབས་སུ་གང་ཞིག་འགྱུར། །ཞེས་པས་བཅུ་དགུ་བ་དང་། འཕྲུལ་གྱི་བློ་དང་གྲོས་སྟོར་ན། །བློ་དང་གྲོས་ནི་གང་ནས་བཙལ། །ཞེས་པས་ཉི་ཤུ་པ་དང་། ངེས་པའི་དོན་འདི་མ་རྙེད་ན། །ད་ཡོད་ངེས་དོན་གང་ལས་གཟུང་། །ཞེས་པས་ཉེར་གཅིག་པ་དང་། མཆོད་གནས་ཡིད་རྟེན་མི་བཞུགས་ན། །སྐུ་གདུང་ཇི་ལྟར་འགྱུར་ཞིག་གུ། །སླད་ཀྱི་མཆོད་གནས་ཅི་ལ་བགྱི། །ཞེས་པས་ཉེར་གཉིས་པ་དང་། ད་ལྟ་སྟོན་པ་འདས་འོག་ཏུ། །གདུང་འཚོབ་སྐྱེས་བུ་འབྱུང་འགྱུར་རམ། །ཨེ་མའོ་ཀྱི་ཧུད་ཨེ་མའོ་བློང་། །ཞེས་པས་ཉེར་གསུམ་པ་སྟེ། དེ་ལྟར་ན་གདུང་ཚིག་ཉེར་གསུམ་པོ་གོ་རིམ་ཇི་ལྟ་བ་བཞིན་དུ་སོ་སོར་གསུངས་པའི་ཕྱིར་རོ། །ཡང་ཞལ་སྔ་ནས། བསྟན་འགྱུར་ནང་དབུ་མ་རིགས་ཚོགས་དྲུག་གི་ནང་དབུ་མ་རིན་ཆེན་ཕྲེང་བ་དེ་སྔ་མ་ཡིན་ཚུལ་གསུངས་པ་བརྗེད་ཤོར་བས་གང་ལ་ངོས་འཛིན་ཕྱག་བྲིས་ཞུ་ཞེས་ཕེབས་པར། སྤྱིར་འཕགས་པ་ཀླུ་སྒྲུབ་ཞབས་ཀྱིས་རྒྱལ་བའི་བཀའ་འཁོར་ལོ་རིམ་པ་གསུམ་གྱི་དགོངས་འགྲེལ་དུ་དབུ་མ་ཚོགས་གསུམ་རིམ་པར་མཛད་པ་ནི་ཐུགས་ལ་དགོངས་བཞིན་པ་ལས། དེའི་བྱེ་བྲག་བར་བ་ལ་དབུ་མ་རིགས་ཚོགས་དྲུག་ཏུ་བཞེད་པ་དང་། རིགས་ཚོགས་ལྔ་རུ་བཞེད་པ་ཅི་རིགས་སྣང་སྟེ། འདི་ལྟར་ཀུན་མཁྱེན་ཀློང་ཆེན་པ་ལ་སོགས་པས་ནི། རྩ་བ་ཤེས་རབ་། རིགས་པ་དྲུག་ཅུ་བ། སྟོང་ཉིད་བདུན་ཅུ་བ། ཞིབ་མོ་རྣམ་འཐག རྩོད་པ་བཟློག་པ། ཐ་སྙད་སྒྲུབ་པ་སྟེ་དྲུག་ཏུ་བཞེད། ཇོ་ནང་ཏཱ་ར་ནཱ་ཐ་སོགས་ཀྱིས་ཐ་སྙད་སྒྲུབ་པ་དོར་བའི་ལྷག་མ་ལྔར་བཞེད། ཕྱིས་བྱོན་གྱི་གསར་མ་བ་ཁ་ཅིག་ནི། སྔ་མ་ལྔའི་སྟེང་དུ་དབུ་མ་རིན་ཆེན་ཕྲེང་བ་བསྣན་ནས་དྲུག་ཏུ་བཞེད་པར་སྣང་མོད་དེ། འོན་ཀྱང་རིན་ཆེན་ཕྲེང་བ་ནི། བསྟན་བཅོས་རང་གི་མཚན་ལ་ཡང་། རྒྱལ་པོ་ལ་གཏམ་དུ་བྱ་བ་རིན་པོ་ཆེའི་ཕྲེང་བ་ཞེས་སྣང་བ་དང་། དེར་ཡང་མ་ཟད་བསྟན་བཅོས་འདིར་སྐྱེས་བུ་ཆུང་འབྲིང་གི་ལམ་དང་བཀའ་དང་པོའི་དགོངས་པ་ཉིད་བརྗོད་བྱའི་གཙོ་བོར་ཡང་བསྟན་པའི་ཕྱིར་གཏམ་ཚོགས་ཡིན་པ་གོར་མ་ཆག་ལ། བཞེད་པ་སྔ་མ་གཉིས་ལས། དང་པོ་ལ་ཡང་ཐ་སྙད་སྒྲུབ་པ་ངོས་འཛིན་གསལ་པོ་མི་སྣང་མོད། དེ་ལྟ་ནའང་། རྩ་ཤེས་ལས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་སྟོན་མི་ནུས། །དམ་པའི་དོན་ནི་མ་རྟོགས་པར། །མྱ་ངན་འདས་པ་ཐོབ་མི་འགྱུར། །ཞེས་གསུངས་པ་ལྟར་དབུ་མ་རང་ལུགས་ཀྱི་ཐ་སྙད་རྣམ་པར་བཞག་པའི་གཞུང་ཞིག་ཡོད་དགོས་པ་ལས། དེ་ཡང་སྔོན་ཆད་བསྟན་འགྱུར་རྣམས་ཀྱི་ཁྲོད་དུ་ཕྱོགས་བསྒྲིགས་མ་མཛད་ཀྱང་ད་ལྟ་དབུ་མ་རང་བཞིན་གསུམ་ལ་འཇུག་པའི་སྒྲུབ་པ་ཟེར་བ་འདི་ཉིད་ཡིན་པར་སེམས་ཏེ། འདི་ཉིད་ལས། ཐ་སྙད་གཙོ་བོར་བྱས་ཕྱིར་དང་། །དེར་འཇུག་གཙོ་བོར་བྱས་པའི་ཕྱིར། །ཞེས་གསུངས་པའི་ཕྱིར་དང་བསྟན་བཅོས་རང་གི་ཞལ་བྱང་ལ་དཔགས་ཀྱང་། རང་བཞིན་གསུམ་དང་། མཚན་ཉིད་གསུམ་སོགས་ནི་ཐ་སྙད་ཀྱི་བྱེ་བྲག་ཡིན་ཞིང་། དེ་ཉིད་ལ་འཇུག་པའི་སྒྲུབ་པར་གསུངས་པའི་ཕྱིར། དེ་ལྟར་ན་འདིར་ཤེས་པར་བྱ་བའི་གནད་འདི་ཡོད་དེ། གངས་རིའི་ལྗོངས་འདིར་དབུ་མ་ལ་ཐལ་རང་གཉིས་སུ་དབྱེ་བ་ཙམ་མཁས་པ་ཕལ་ཆེར་ལ་གྲགས་ཤིང་། དེ་ལ་བུ་སྟོན་རིན་ཆེན་གྲུབ་ཀྱིས། རྒྱ་གར་འཕགས་པའི་ཡུལ་ན་དབུ་མ་ལ་ཐལ་འགྱུར་བ་དང་རང་རྒྱུད་པ་ཟེར་བའི་གྲུབ་མཐའ་ཐ་དད་མེད་ཚུལ་གསུངས་པ་ལ། གློ་བོ་མཁན་ཆེན་སོགས་ས་ལུགས་ཀྱི་མཁས་པ་ཕྱི་མ་འགའ་ཞིག་དེ་ཡོད་པའི་སྒྲུབ་བྱེད་དུ། ཐལ་འགྱུར་དང་རང་རྒྱུད་ཀྱི་རྟགས་སྦྱོར་འགོད་ལུགས་རྒྱ་གཞུང་དུ་གསལ་བ་དེ་འཕེན་པ་མཛད་འདུག་ཀྱང་། ལེགས་པར་བསམ་ཚེ། དེ་ནི་གཞན་ལ་རྩོད་པ་དང་། རང་ཉིད་ཀྱིས་སློབ་བུ་རྗེས་སུ་འཛིན་པ་ན། ཐལ་འགྱུར་དང་། རང་རྒྱུད་ཀྱི་རྟགས་སྦྱོར་སོ་སོར་འགོད་པའི་སྒྲུབ་བྱེད་དུ་ནི་འགྱུར་གྱི། ཐལ་འགྱུར་བ་དང་རང་རྒྱུད་པ་ཞེས་པའི་གྲུབ་མཐའ་ཐ་དད་ཡོད་པའི་སྒྲུབ་བྱེད་དུ་ནི་ཅང་འགྱུར་རམ་སྙམ་མོ། །དེས་ན་རྙིང་མའི་ཕྱོགས་འདིར་ཡང་ཀུན་མཁྱེན་ཆོས་ཀྱི་རྒྱལ་པོ་ལ་སོགས་པ་ཕྱིས་བྱོན་གྱི་རྙིང་མ་པ་ཐམས་ཅད། ཐལ་རང་གི་རྣམ་བཞག་དང་། རང་རྒྱུད་གོང་འོག་གི་རྣམ་བཞག་སོགས་ཐམས་ཅད་དེང་སང་བོད་ཀྱི་མཁས་པ་སྤྱི་ལ་ཡོངས་སུ་གྲགས་པ་ལྟར་མཛད་མོད་དེ། འདིར་ཀུན་གཟིགས་རོང་ཟོམ་པ་ཆེན་པོས་དབུ་མ་ལ་ཐལ་རང་གཉིས་སམ། ཡང་ན་མདོ་སྡེ་སྤྱོད་པའི་དབུ་མ་པ་དང་། རྣལ་འབྱོར་སྤྱོད་པའི་དབུ་མ་པ་གཉིས་ཏེ། འདི་དག་དབྱེ་སྒོ་གཞན་ཡིན་པ་ལས། དབྱེ་ངོ་ཐ་དད་མ་ཡིན་པར་གསུངས་པ་དང་། དབུ་མ་ཐམས་ཅད་ཀྱི་མཐར་ཐུག་གཞུང་ཕྱི་མོའི་དབུ་མ་སྟེ་རྣལ་འབྱོར་སྤྱོད་པའི་དབུ་མ་ཉིད་ཡིན་པར་གསུངས་པ་འདི་རྣམས་ཤིན་ཏུ་འཐད་པར་སེམས་ཤིང་སྔོན་གྱི་ལོ་ཙཱ་བ་ཆེན་པོ་ཡེ་ཤེས་སྡེ་སོགས་རྙིང་མ་མཚན་ཉིད་པ་རྣམས་ཀྱི་བཞེད་པའང་དེ་ག་ཡིན་ནམ་སྙམ་དུ་ཁོ་བོས་སེམས་སོ། །དེས་ན་དབུ་མ་པ་ཐམས་ཅད་དོན་དམ་སྤྲོས་བྲལ་ལ་རྩོད་པ་མ་ཡིན་ཀྱང་། གཞན་ངོར་ཐ་སྙད་འཇོག་ཚུལ་ལ་འདྲ་མིན་ཇི་རིགས་ཡོད་དེ། དེ་ཡང་འཇིག་རྟེན་ན་ཐ་སྙད་ཀྱི་རྣམ་བཞག་བསམ་གྱིས་མི་ཁྱབ་པ་ཞིག་མཆིས་པ་ལས། གཙོ་བོར་རྒྱལ་བའི་བཀའི་རྗེས་སུ་འབྲངས་ནས་གྲུབ་མཐའ་སྨྲ་བ་ལ་ཐེག་པ་ཆེ་ཆུང་གཉིས་ལས། ཐེག་དམན་གྱི་མདོ་སྡེའི་རྗེས་སུ་འབྲངས་ནས་གྲུབ་མཐའ་སྨྲ་བ་མདོ་སྡེ་བ་དང་། ཐེག་ཆེན་གྱི་མདོ་སྡེའི་རྗེས་སུ་འབྲངས་ནས་གྲུབ་མཐའ་སྨྲ་བ་རྣལ་འབྱོར་སྤྱོད་པ་སྟེ། དེ་གཉིས་གང་ཡིན་ཡང་སྤྱིར་བཏང་ཐ་སྙད་ཀྱི་རྣམ་བཞག་མཐའ་དག་རྒྱལ་བའི་བཀའི་རྗེས་སུ་འབྲངས་ནས་འཇོག་པར་མཛད་པའི་ཕྱིར་གང་ལྟར་བཞག་ཀྱང་འགལ་བ་མེད་མོད་དེ་ཉེ་བའི་སྒོ་ནས་བཞག་ན། ཐེག་ཆེན་རང་གི་མདོ་སྡེ་ལས་གསུངས་པའི་ཐ་སྙད་ཀྱི་འཇོག་ཚུལ་དེ་རྣལ་འབྱོར་སྤྱོད་པའི་གཞུང་དུ་གསུངས་པ་དེ་ཉིད་ཡིན་པའི་ཕྱིར། དེ་སྐད་དུའང་ལངྐར་གཤེགས་པའི་མདོ་ལས། ཆོས་ལྔ་དང་ནི་རང་བཞིན་དང་། །རྣམ་ཤེས་བརྒྱད་པོ་ཉིད་དག་དང་། །བདག་མེད་གཉིས་ཀྱི་དངོས་པོར་ནི། །ཐེག་ཆེན་ཐམས་ཅད་བསྡུས་པ་ཡིན། །ཞེས་གསུངས་པའི་ཕྱིར། དེ་ལྟར་ན་རང་བཞིན་གསུམ་ལ་འཇུག་པའི་སྒྲུབ་པ་དེས་ཀྱང་། དོན་དེ་ཉིད་གཏན་ལ་འབེབས་པར་མཛད་པའི་ཕྱིར་དབུ་མ་ཐ་སྙད་སྒྲུབ་པ་ཉིད་ཡིན་ནོ། །དེས་ན་འཕགས་པ་ཉིད་ཀྱིས་མཛད་པའི་དབུ་མ་རང་ལུགས་ཀྱི་ཐ་སྙད་སྒྲུབ་པའི་གཞུང་འདི་ཉིད་ཡོད་པ་མ་མཐོང་བའམ། མཐོང་ཡང་འདི་ཉིད་ལ་ཚད་མར་མི་འཛིན་པའི་གང་ཟག་རྣམས་ལ་དབུ་མའི་ལུགས་ཀྱི་ཐ་སྙད་འཇོག་ཚུལ་མང་པོ་དེ་བྱུང་བ་ཡིན་པའང་ཤེས་པར་བྱའོ། །རང་རེ་མཁན་སློབ་ཆོས་གསུམ་གྱི་རྗེས་སུ་འབྲང་བ་རྣམས་ནི་ཚུལ་དེ་ལ་སོམ་ཉི་བྱ་བར་རིགས་པ་མ་ཡིན་ནོ། །ཡང་ཞལ་སྔ་ནས། དུས་བཟང་གི་མདོ་ལ་ཆོས་བསྒྲགས་ཀྱི་མདོ་འདོན་རྒྱུ་གང་ཡིན་ཞེས་དང་། ཆོས་བསྒྲགས་མདོ་བཀའ་འགྱུར་ནང་མདོ་ཁྲོད་བཞུགས་ན་ངོས་འཛིན་མཛད་མཐུས་ལ། མི་བཞུགས་ཚེ་དཔེ་རྒྱུན་ཕྱག་ཁར་བཞུགས་ན་གནང་དགོས། ཞེས་ཕེབས་པར། སྤྱིར་འདུལ་བའི་གཞུང་དུ་ཉ་སྟོང་བརྒྱད་གསུམ་ལ་སོགས་པའི་དུས་བཟང་རྣམས་སུ། མཁན་སློབ་ཡོད་ན་དེ་ཉིད་ཀྱིས་དང་། གལ་ཏེ་མེད་ཀྱང་དགེ་སློང་གནས་བརྟན་བགྲེས་པ་རྣམས་ཀྱི་མདོ་སྟེ་ཇི་རིགས་གང་ནུས་སུ་འདོན་པར་བྱ་ཞིང་། དེའི་དུས་སུ་ཁྱིམ་པ་རྣམས་ཀྱང་མཉན་པར་བསྐུལ་ཏེ་སྐབས་སུ་བབས་ཤིང་ནུས་ན་མཚན་ཐོག་ཐགས་སུ་ཡང་འདོན་པར་གསུངས་པ་ལ་དུས་བཟང་གི་མདོ་ཞེས་ཟེར་ཞིང་། འདི་ལ་གཏམ་རྒྱུད་མང་པོ་ཡོད། དེ་བཞིན་དུ་གསང་སྔགས་ཀྱི་དབང་བསྐུར་བའི་སྦྱོར་བར་མཚམས་སྦྱོར་གྱི་ཆོས་བཤད་བྱེད་པ་ལྟར་གསོ་སྦྱོང་གི་དུས་སུའང་དེ་ཉིད་ཀྱི་སྦྱོར་བར་ཚུལ་ཁྲིམས་བསྲུང་བའི་ཕན་ཡོན་དང་། མ་བསྲུང་བའི་ཉེས་དམིགས་ལ་སོགས་པ་སྟོན་པའི་མདོ་སྡེ་ཇི་རིགས་འདོན་པ་ལ་ཆོས་བསྒྲགས་ཀྱི་མདོ་ཞེས་བྱ་བ་ལས། དེང་སང་དེ་གཉིས་ཀའི་དོད་ཐུབ་ཏུ་ཚུལ་ཁྲིམས་ཡང་དག་པར་ལྡན་པའི་མདོ་འདོན་པ་ཉིད་ཕྱག་ལེན་དུ་མཛད་པ་ཡིན་ཏེ། རང་རེའི་གཞི་གསུམ་གྱི་ཆོ་ག་ཐར་གླིང་དུ་བགྲོད་པའི་གྲུ་ཆེན་གྱི་གསོ་སྦྱོང་གི་གཞིའི་སྦྱོར་བའི་སྐབས་ལས། སྦྱོར་བ་ལའང་གཎྜི་བརྡུང་བ། དགེ་འདུན་བསྡུ་བ། དྲིས་པའི་ཚིག་གིས་ལན་གདབ་པ། སྟན་བསྟབས་མི་ཉམས་པར་བྱ་བ་རྣམས་སྔོན་དུ་སོང་ནས། ཆོས་འཆད་ཉན་ཉམས་སུ་མྱོང་བ་ཆོས་བསྒྲགས་ཀྱི་མདོ་དང་། དུས་བཟང་གི་མདོའི་དོད་ཚུལ་ཁྲིམས་ཡང་དག་པར་ལྡན་པའི་མདོ་ལ་མཛད་པ་ཕྱག་ལེན་དུ་གདའ་བས་གསན་པར་ཞུ། ཞེས་དང་། རྒྱ་གར་སྐད་དུ། ཤཱི་ལ་ས་མ་ཡུཀྟ་སཱུ་ཏྲ། བོད་སྐད་དུ། ཚུལ་ཁྲིམས་ཡང་དག་པར་ལྡན་པའི་མདོ། །ཞེས་སོགས་གསུངས་པའི་ཕྱིར། འོན་ཏེ་འཆད་པ་པོས་དེ་ལས་མང་དུ་འདོན་པར་སྤྲོ་ནའང་སྐབས་སུ་གང་བབས་ལ་དཔྱད་ནས་འཆད་ཤེས་པར་བྱ་སྟེ། དེ་ཡང་དུས་བཟང་གི་མདོ་ལ་ཆོས་ཉན་ཁྱིམ་པ་ཕོ་མོ་མང་དུ་འདུས་པའི་སྐབས་ལྟ་བུ་ཡིན་ན་ནི། མདོ་སྡེ་ལས་བརྒྱ་བ་དང་། ལས་ཀྱི་རྣམ་པར་སྨིན་པ་བསྟན་པའི་མདོ་ལ་སོགས་པ། གཙོ་བོ་ལས་འབྲས་དང་། སྦྱིན་པའི་ཕན་ཡོན་ལ་སོགས་འཇིག་རྟེན་པའི་ཡང་དག་པའི་ལྟ་བ་སྟོན་པའི་མདོ་རྣམས་འདོན་པར་བྱའོ། །གལ་ཏེ་ཉན་པ་པོ་དགེ་ཚུལ་སློང་ལྟ་བུ་ཁྲིམས་ལྡན་འབའ་ཞིག་ཡིན་ན་ནི་ཚུལ་ཁྲིམས་བསྲུང་བའི་ཕན་ཡོན་ལ་སོགས་དང་། བདེན་བཞིའི་འཇུག་ལྡོག་བསྟན་པའི་མདོ་སྡེ་དྲན་པ་ཉེར་བཞག་ལ་སོགས་ཇི་རིགས་གང་ནུས་སུ་འདོན་པར་བྱ་བ་ཡིན་ནོ། །ཡང་ཞལ་སྔ་ནས། དབྱར་གནས་སྐབས་མཚམས་བུ་ཆུང་གཅོད་ཐབས་དེ་མཁན་པོ་ཞིང་གཤེགས་ནས་གསུང་རྩོམ་མཛད་རྒྱུ་རྐྱེན་དབང་དུ་ལུས་པ། དམ་པ་མཆོག་ནས་དབྱར་གནས་དངོས་གཞིའི་སྐབས་འཛུད་མཚམས་བཅས་འདོན་བདེ་ཞིག་མཛད་ནས་ལྗགས་རྩོམ་བསྐུར་གནང་ཞུ། ཞེས་ཕེབས་པར། འདིར་གཞི་གསུམ་ཆོ་ག་རང་གི་དབྱར་གནས་ཀྱི་སྐབས་སུ། གཉིས་པ་དབྱར་གྱི་གཞིའི་ཆོ་ག་ལ། སྦྱོར་བ་ནི། སྔོན་དུ་གཙུག་ལག་ཁང་བྱི་དོར་བྱ་བ་དང་། རྟེན་དཀྲམ་པ་སོགས་བྱ་ཞིང་། གནས་མལ་གྱི་གདན་སྤྱད་སོགས་སྟོབས་རྒྱུ་ཡོད་ན་སྟ་གོན་བྱས་ལ་དབྱར་སྔ་མ་ཡིན་ན། དབྱར་ཟླ་འབྲིང་པོ་ཆུ་སྟོད་ཀྱི་ཟླ་བ་རྫོགས་པ་ཧོར་ཟླ་དྲུག་པའི་ཉ་དང་། ཕྱི་མ་ཡིན་ན་དབྱར་ཟླ་ཐ་ཆུང་གྲོ་ཞུན་གྱི་ཟླ་བ་རྫོགས་པ་ཧོར་ཟླ་བདུན་པའི་ཉའི་ཉིན་པར་སྔར་བཞིན་གསོ་སྦྱོང་བྱས་ཚར་མ་ཐག གནས་མལ་སྟོབ་པའི་དགེ་སློང་གཅིག་གམ་དུ་མ་བསྐོ་བར་བྱ་སྟེ། ཞེས་གསུངས་པ་ལྟར་དབྱར་སྔ་ཕྱི་གང་ཡིན་ཡང་དེ་ཉིད་ཀྱི་ཚེས་བཅོ་ལྔའི་གསོ་སྦྱོང་དང་འབྲེལ་བར་གནས་མལ་སྟོབ་པ་དང་། ཚུལ་ཤིང་བྲིམ་པ་སོགས་བྱས་ནས། དེས་ཕྱི་ཚེས་བཅུ་དྲུག་གི་ཉིན་དབྱར་ཞལ་བཞེས་དངོས་བྱེད་པར་གསུངས་པའི་ཚེས་བཅོ་ལྔའི་གསོ་སྦྱོང་གི་སྦྱོར་བའི་བྱེ་བྲག་གནས་ལ་བློ་མཐུན་བགྱིས་པའི་མཇུག་དེར་མཚམས་གཅོད་པར་ལས་བརྒྱ་རྩ་གཅིག་པ་སོགས་འདུལ་བའི་གཞུང་དུ་གསུངས་པ་ལྟར། འདིར་ཡང་། གནས་ཀྱི་བློ་མཐུན་ནི། གཉུག་མར་གནས་པའི་དགེ་འདུན་གྱི་གཙུག་ལག་ཁང་ལྟ་བུ་བློ་མཐུན་མ་ཞིག་པ་ཡིན་ན་མ་བྱས་ཀྱང་ཆོག གཞན་དུ་ན་མེད་མི་རུང་གི་སྦྱོར་བར་འགྱུར་ཞིང་། ལས་ཀྱི་མཚམས་ཆེ་ཆུང་གང་རུང་གཅོད་པ་སོགས་ནི་འདིར་བཏང་སྙོམས་སུ་བྱས་སོ། །ཞེས་གལ་ཏེ་མཚམས་གཅོད་ཚེ་སྐབས་འདིར་བྱེད་དགོས་པ་ཤུགས་ཀྱིས་བསྟན་ཏེ། དེ་ལྟར་ན་གནས་ལ་བློ་མཐུན་བྱེད་གྲུབ་པའི་མཇུག ལགས་པ་ནི་བྱས་ནས་ཟིན་པ་སྟེ་སྐབས་སུ་གང་བབ་བརྗོད་དོ། །ཞེས་པའི་མཚམས་འདིར་འཛུད་དགོས་ཤིང་། དེ་ལ་སྤྱིར་འདུལ་བའི་གཞུང་དུ་མཚམས་ཆེན་གཅོད་པ་དང་། མཚམས་དེར་ཆོས་གོས་དང་མི་འབྲལ་བའི་གནང་བ་སྦྱིན་པ་དང་། མཚམས་ཆེན་བཀྲོལ་ནས་མཚམས་བུ་ཆུང་གཅོད་པ་ལ་སོགས་པ་མཚམས་དང་འབྲེལ་བའི་ལས་ཀྱི་ཆོ་ག་དགུ་ཙམ་གསུངས་པ་ལས་འདིར་དེའི་བྱེ་བྲག་མཚམས་བུ་ཆུང་གཅོད་པའི་ཚུལ་དེ་གཅིག་པུ་བཀའ་དྲིན་གནང་བས་དེ་ཉིད་བརྗོད་པར་བྱ་སྟེ། དེ་ཡང་ལས་བརྒྱ་རྩར། གསོ་སྦྱོང་གི་གཞི་ལས་མཐུན་པའི་གསོ་སྦྱོང་གི་གནས་ཀྱི་སྐབས་ནས། མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་བྱའོ། །ཞེས་གསུངས་པ་ནི་འདི་ལྟར་བྱ་སྟེ། ཇེ་དང་པོར་མཚམས་ཆེན་པོ་བཀྲོལ་བ་དེའི་འོག་ཏུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་བྱའོ། །ཞེས་པ་ནས། དེ་ནི་མཚམས་ཆེན་པོ་དཀྲོལ་བའི་ཆོ་ག་དང་ལས་སོ། །ཞེས་གསུངས་པ་ལྟར་སྔར་མཚམས་ཆེན་བཅད་ཡོད་ཚེ། དེ་ཉིད་བཀྲོལ་ནས་སླར་མཚམས་བུ་ཆུང་གཅོད་པར་གསུངས་ཏེ། འདི་ལྟར་དེའི་འོག་ཏུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་བྱ་བ་ནི་འདི་ལྟར་བྱ་སྟེ། ཇེ་དང་པོ་དགེ་སློང་གནས་པ་དང་གཉུག་མར་གནས་པ་རྣམས་ཀྱིས་མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་སེང་ལྡིང་གི་ཕུར་བུ་བཏབ་པའམ་སྲད་བུས་བྲེས་པའམ་རྡོ་བཞག་པའམ་སྲོལ་བཏོད་པ་ལ་སོགས་པའི་མཚན་མ་བརྟན་པོ་གཟུགས་པར་བྱའོ། །ཞེས་གསུངས་པ་ལྟར་ཐོ་རྫི་ལྟ་བུ་དགེ་སློང་གཉུག་མར་གནས་པར་ཕྱོགས་ཀྱི་མཚན་མ་རིམ་པ་བཞིན་ཤར་ཕྱོགས་སུ་སེང་ལྡིང་གི་ཕུར་བུ་འཛུགས་པ་དང་། ལྷོ་ཕྱོགས་སུ་དབྱུག་པ་ལ་སོགས་པ་བཙུགས་ཏེ་དེ་ལ་སྲད་བུས་སྦྲེལ་བ་དང་། ནུབ་ཕྱོགས་སུ་རྡོ་རིང་ལྟ་བུ་འཛུགས་པ་དང་། བྱང་ཕྱོགས་སུ་ལམ་སྲོལ་ཟབ་མོ་གདོད་པ་སྟེ། དེ་ལྟ་བུའི་མཚན་མ་བརྟན་པོ་མི་འཁྲུལ་བ་བྱས་པ། དེ་ནས་དེའི་འོག་ཏུ་གནས་མལ་བཤམས་པ་བྱས་ནས་གཎྜི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོས་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ། དགེ་སློང་གནས་པ་དང་གཉུག་མར་གནས་པ་རྣམས་ཀྱིས་མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་བཙུགས་པ་དག་བརྗོད་པར་བྱའོ། །ཞེས་པ་ལྟར་དགེ་འདུན་འཚོགས་གྲུབ་པ་དང་ཐོ་འཛུགས་པ་པོས་མཚན་མ་རྣམས་བྱས་ཟིན་པའི་བརྡ་སྦྱར། དེ་ནས། དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །ཞེས་པ་ལྟར་མཁན་པོའམ་སློབ་དཔོན་ནམ་གནས་བརྟན་ལས་བྱེད་པ་གང་ཡིན་པ་དེས། ཐལ་མོ་བསྣོལ་བ་ལ་སོགས་པའི་སྤྱོད་ལམ་བསྟུན་ཏེ། འོག་ནས་འབྱུང་བ་ལྟར་གསོལ་བ་དང་གཉིས་ཀྱི་ལས་རིམ་བཞིན་བྱའོ། །དེ་ཡང་། འདི་ལྟར་བྱ་སྟེ། འདུག་ལ་འདི་སྐད་བརྗོད་པར་བྱའོ། །སླར་ཡང་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདི་ན་དགེ་སློང་གནས་པ་དང་གཉུག་མར་གནས་པ་རྣམས་ཀྱིས་མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་སེང་ལྡིང་གི་ཕུར་བུས་བཏབས་པ་ལགས། ལྷོ་ཕྱོགས་སུ་ནི་སྲད་བུས་བྲིས་པ་ལགས། ནུབ་ཕྱོགས་སུ་ནི་རྡོ་བཞག་པ་ལགས། བྱང་ཕྱོགས་སུ་ནི་སྲོལ་བཏོད་པ་བརྟན་པོ་ལགས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མཚན་མ་འདི་རྣམས་ཀྱི་ནང་དུ་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། གསོལ་བའི་མཇུག་ཏུ། བརྗོད་པ་མཇུག་སྡུད་དང་བཅས་པ་ལ་ཐུགས་གཏད་པར་ཞུ། ཞེས་མཚམས་སྦྱར། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདི་ན་དགེ་སློང་གནས་པ་དང་གཉུག་མར་གནས་པ་རྣམས་ཀྱིས་མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་སེང་ལྡིང་གི་ཕུར་བུས་བཏབས་པ་ལགས། ལྷོ་ཕྱོགས་སུ་ནི་སྲད་བུས་བྲེས་པ་ལགས། ནུབ་ཕྱོགས་སུ་ནི་རྡོ་བཞག་པ་ལགས། བྱང་ཕྱོགས་སུ་ནི་སྲོལ་བཏོད་པ་བརྟན་པོ་ལགས་ཏེ། དེའི་སླད་དུ་དགེ་འདུན་གྱི་མཚན་མ་འདི་རྣམས་ཀྱི་ནང་དུ་འདི་ལྟ་སྟེ། གནས་བསྡུ་བ་དང་དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་མཛད་ན་ཚེ་དང་ལྡན་པ་གང་དག་མཚན་མ་འདི་རྣམས་ཀྱི་ནང་དུ་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་མཛད་པར་བཟོད་པ་དེ་དག་ནི་ཅང་མ་གསུངས་ཤིག གང་དག་མི་བཟོད་པ་དེ་དག་ནི་གསུངས་ཤིག དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མཚན་མ་འདི་རྣམས་ཀྱི་ནང་དུ་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་མཛད་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ། །ཞེས་པ་ལན་གཅིག་བརྗོད་དོ། །དེ་ལྟར་དགེ་འདུན་གྱི་ནང་དུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་བྱས་པ་དེར་དགེ་སློང་རྣམས་ཀྱིས་འདུག་ལ་གསོ་སྦྱོང་དང་། དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བྱའོ། །ཞེས་པ་ལྟར་ཇི་བདེར་བྱའོ། །སླར་ཡང་སྨྲས་པ། འདི་ན་བདེན་དོན་མཛེས་མའི་བཞིན་རས་ལ། །ལྟ་བའི་བློ་མིག་ཀུན་རྨོངས་རབ་རིབ་ཀྱིས། །བསྒྲིབས་ཤིང་ཡེ་ཤེས་ལྷ་ཡི་གསུངས་སྙན་ཡང་། །མཉན་པའི་ཐོས་འཛིན་ལོག་ལྟས་ཁེབས་པ་ཞིག །སྒྲ་ཚད་བཟོ་གསོ་སྙན་ངག་སྡེབ་སྦྱོར་སོགས། །རིགས་ལམ་མཐུན་གྲོགས་ཀུན་གྱིས་རིང་སྤངས་ཏེ། །རྒྱུད་ཉུང་ཚིག་གི་སྲང་ཁང་འགྲིམས་པ་ལ། །ཉེས་རྩོམ་སྤངས་པའི་གཏམ་གྱི་རེ་བ་ཟད། །དེ་ལྟ་ནའང་ཤེས་བྱའི་དཀྱིལ་འཁོར་ཀུན། །སྒྲིབ་མེད་ཡེ་ཤེས་སྤྱན་གྱིས་གཟིགས་མཛད་པའི། །མཁས་དབང་སྨྲ་བའི་ཟླ་བ་ལས་འོངས་པའི། །བཀའ་མཆིད་བསིལ་ཟེར་རྨོང་བློའི་ལྡུམ་རར་ལྷག །དེ་ཚེ་རྣམ་དཔྱོད་ལུས་ཀྱི་སྟོབས་ཉམས་ཀྱང་། །ཐུབ་གསུང་སྲོག་གི་མཁར་བ་ལ་བརྟེན་པའི། །སྣ་ཚོགས་རྟོག་པའི་ཀུནྡ་བཞད་པའི་གཏམ། །མཁྱེན་ལྡན་གཟུ་བོར་གནས་པའི་འདུན་སར་བསྒྲགས། །ཚུལ་འདི་སྙན་ངག་དམ་པའི་གླུ་མིན་ཞིང་། །ཆགས་སྡང་གདོན་གྱིས་དཀྲུགས་པའི་ཚིག་ཀྱང་མིན། །གནས་ལུགས་དྲང་བོར་བརྗོད་པའི་སྨྲེ་སྔགས་ཏེ། །དེ་སླད་བྱམས་ལྡན་ཀུན་གྱིས་ཁྲེལ་མི་འཚལ། །འོན་ཀྱང་མཁས་མང་ལེགས་བཤད་མ་གི་ཏ། །བློ་གྲོས་ལྟེ་བའི་དཔལ་དུ་བཟུང་བ་དེ། །དཀར་ནག་ལྕེ་གཉིས་སྐྱོང་བའི་ལྟོ་འབོལ་བའི། །ཕྲག་པར་རྩུབས་ཀྱང་སྔོན་གྱི་ལས་ལས་ཅི། །གང་ཕྱིར་བསམ་པ་དག་པས་བརྗོད་པ་འདིར། །རྒྱལ་བའི་བཀའ་དང་མཐུན་པར་སྤྲོས་པའི་དགེ །ཅུང་ཟད་མཆིས་ན་དེ་ཡང་འགྲོ་བ་ཀུན། །བཏང་སྙོམས་ཆེན་པོའི་གནས་ལ་འགོད་ཕྱིར་བསྔོ། །ཞེས་པའང་ལྔ་རིག་སྨྲ་བའི་དབང་པོ་ཞེ་ཆེན་དབོན་སྤྲུལ་རིན་པོ་ཆེ་འགྱུར་མེད་མཐུ་སྟོབས་རྣམ་རྒྱལ་གྱི་ཞལ་སྔ་ནས་བཀའ་འདྲི་ཇི་ལྟར་ཕེབས་པ་རྣམས་ཀྱི་གསུངས་ལན་མི་ལྡོག་ཙམ་དུ་བཙུན་པ་གཞན་ཕན་མཐའ་ཡས་པས་རང་ཉིད་ཀྱི་སྤོང་ཁང་ནས་ཤར་མར་བྲིས་ཏེ་ཕུལ་བ་དགེ།