སྲིན་རྫོང་དགེ་སློང་པདྨ་བློ་གསལ་གྱི་དྲིས་ལན་སྙིང་པོར་དྲིལ་བ།

༄། །སྲིན་རྫོང་དགེ་སློང་པདྨ་བློ་གསལ་གྱི་དྲིས་ལན་སྙིང་པོར་དྲིལ་བ་བཞུགས་སོ། །མ་རིག་རྐྱེན་བཅས་སྤངས་པའི་ཡེ་ཤེས་ཀྱི། །རང་ཞལ་རྗེན་པར་སྟོན་པའི་བླ་མ་ལ། །བཏུད་ནས་སེམས་རིག་ལས་འཕྲོས་དྲི་ཚིག་གི །དངོས་ལན་སྙིང་པོར་དྲིལ་ནས་བརྗོད་པར་བྱ། །འདི་ལ་གསུམ། ལྟ་བ་དང་། སྒོམ་པ་དང་། སྤྱོད་པ་ལས་འཕྲོས་པའོ། །དང་པོ་ལ་དྲི་བས་མཚམས་སྦྱར་བ་དང་། ལན་གྱིས་བསྙད་པའོ། །དང་པོ་ནི། དྲི་ཚིག་ཏུ། སེམས་ཅན་གྱི་བག་ཆགས་སེམས་དང་མ་རིག་ཇི་ལྟར། སངས་རྒྱས་ཀྱི་དགོངས་པ་ཡེ་ཤེས་གང་ལྟར་ལགས། སེམས་དང་རིག་པ་གཉིས་ཇི་ལྟར། ཞེས་པའོ། །གཉིས་པ་དེའི་ལན་ནི། །སྤྱིར་སེམས་ཅན་དང་། ཡིད་ཅན་དང་། ལུས་ཅན། འགྲོ་བ་དང་འབྱུང་བོ་ལ་སོགས་པ་དོན་གཅིག་མིང་གི་རྣམ་གྲངས་ཏེ། གང་ཞིག་ལས་དང་ལས་ཀྱི་འབྲས་བུ་ལ་སྤྱོད་པ་པོ་དང་། ཟ་བ་པོ་དང་། བྱེད་པ་པོར་སྒྲོ་བཏགས་པའི་བདག་དང་། གང་ཟག་ལ་སོགས་པའི་སྒྲས་བརྗོད་པ་དེའོ། །དེ་ལྟ་བུའི་མ་བརྟགས་མ་དཔྱད་པའི་བདག་འཛིན་ལྷན་སྐྱེས་ཀྱི་དམིགས་ཡུལ་དུ་གྱུར་པའི་བདག་དེའི་རང་བཞིན་དོན་ལ་ཡོད་མེད་བརྟགས་ཤིང་དཔྱད་ནས་གཏན་ལ་འབེབས་པར་བྱེད་པ་ལས་གྲུབ་པའི་མཐའ་དག་རྣམ་པར་དབྱེའོ། །དེ་ཡང་ཕྱི་རོལ་མུ་སྟེགས་པ་དག་ནི། བདག་དེ་ཡོད་པ་གཞིར་བཞག་གི་སྟེང་ནས་དེའི་མཚན་ཉིད་རྟག་པ་དང་ཆད་པ་ཇི་རིགས་པར་སྒྲོ་བཏགས་ནས་སོ་སོའི་གྲུབ་མཐའ་རྣམ་པར་འཇོག་གོ །ནང་བ་སངས་རྒྱས་པ་རྣམས་ནི་རྟག་པ་ལ་སོགས་པའི་མཚན་ཉིད་ཅན་གྱི་བདག་དེ་མེད་པ་གཞིར་བཞག་གི་སྟེང་ནས་རང་རང་གི་གྲུབ་མཐའ་འཇོག་པ་ལས། རེ་ཞིག་ཐེག་དམན་པ་དག་ནི་གང་ཟག་གི་བདག་མེད་དང་ཆོས་ཀྱི་བདག་མེད་ཕྱོགས་གཅིག་རྟོགས་པའི་སྒོ་ནས་རྣམ་པར་འཇོག་གོ །ཐེག་ཆེན་པ་དག་ནི་བདག་མེད་གཉིས་ཀ་རྟོགས་པ་གཞིར་བཞག་ལས་གཟུང་འཛིན་གཉིས་སྟོང་གི་ཤེས་པ་རང་རིག་རང་གསལ་དོན་དམ་དུ་འདོད་མིན་ལ་དབུ་སེམས་རྣམ་པར་རྩོད་དོ། །འདི་དག་གི་ནང་གསེས་ནི་བརྗོད་ཀྱིས་མི་ལངས་པས་གཞུང་ལས་རྟོགས་པར་བྱའོ། །དེ་ལྟར་སེམས་ཅན་དུ་སྒྲོ་འདོགས་པའི་གཞི་ནི་གཟུང་འཛིན་གཉིས་བསྡུས་ཀྱི་ཆོས་ཏེ། དེ་ཡང་ཕུང་པོ་དང་། ཁམས་དང་། སྐྱེ་མཆེད་དུ་རྣམ་པར་དབྱེ་བ་རྣམས་སོ། །དེ་དག་ཀྱང་བསྡུ་ན། འདུས་བྱས་དང་། འདུས་མ་བྱས་ཀྱི་ཆོས་གཉིས་པོ་གང་རུང་དུ་འདུ་བ་ལས་རེ་ཞིག་འདུས་བྱས་ཀྱིས་བསྡུས་པའི་ཆོས་ཐམས་ཅད་ཕུང་བོ་ལྔར་འདུ་ཞིང་དེ་ལས་རྣམ་ཤེས་ཀྱི་ཕུང་པོའི་གཞི་ལ་ཐེག་པ་ཐུན་མོང་གི་མདོ་ལས་རྣམ་པར་ཤེས་པའི་ཚོགས་དྲུག་ཏུ་དབྱེ་བར་མཛད་པ་དང་། ཐེག་ཆེན་ཐུན་མོང་མ་ཡིན་པའི་མདོ་ལས་ཚོགས་བརྒྱད་དུ་དབྱེ་བར་མཛད་པའི་ཕྱི་མའི་ཁྱད་ཆོས་ཀུན་གཞིའི་རྣམ་ཤེས་དང་། ཉོན་ཡིད་ཀྱི་རྣམ་ཤེས་གཉིས་ཏེ། དེ་གཉིས་ཀྱི་ངོས་འཛིན་ཡང་། མདོ་ལས། སེམས་ནི་ཀུན་གཞིའི་རྣམ་ཤེས་ཏེ། །ངར་སེམས་པ་ནི་ཡིད་ཡིན་ནོ། །ཞེས་གསུངས་པ་ལྟར་རོ། །དེས་ན་སེམས་ཀུན་གཞིའི་རྣམ་ཤེས་གཏན་ལ་འབེབས་པར་བྱེད་པ་ལ། ས་སྡེ་ལས་དོན་ཚན་བཅུ་གཅིག་གི་སྒོ་ནས་དབྱེ་བར་མཛད་ཀྱང་། མདོར་ན་ཀུན་གཞིའི་ངོ་བོ་ནི། བག་ཆགས་ཐམས་ཅད་ཀྱི་བསྒོ་གཞིར་གྱུར་པའི་མ་སྒྲིབ་ལུང་མ་བསྟན་གྱི་ཤེས་པ་ཞིག་གོ །མ་རིག་པ་ནི་སེམས་བྱུང་འདུ་བྱེད་ཀྱི་ཕུང་བོས་བསྡུས་པ་རྩ་ཉོན་དྲུག་གི་ནང་ཚན་གང་དག་མི་ཤེས་པ་དང་། མི་གསལ་བ་དང་། མ་རྟོགས་པ་དང་། མ་རིག་པ་ཞེས་བྱ་བ་སྟེ། འདི་ལ་ཡང་། དཀོན་མཆོག་དང་། བདེན་པ་དང་། ལས་ཀྱི་འབྲས་བུའི་རྣམ་པར་སྨིན་པ་ལ་རྨོངས་པའི་མ་རིག་པ་ཞེས་བྱ་བ་གསུམ་མམ། ལྷན་སྐྱེས་དང་། ཀུན་བརྟགས་ཀྱི་མ་རིགས་པ་གཉིས་ཡོད་དོ། །སངས་རྒྱས་ཀྱི་དགོངས་པ་ནི། དེ་ལྟ་བུའི་མ་རིག་པ་དང་དེས་བསྐྱེད་པའི་ལས་ཉོན་རྣམ་སྨིན་དང་བཅས་པ་སྤངས་པའི་ཡེ་ཇི་བཞིན་པའི་ཤེས་པ་སྟེ། ཀ་ནས་དག་པ། དྲི་མ་མེད་པ། མ་བསྒྲིབ་པ། རྣམ་པར་གསལ་བ། རྨོངས་པ་མེད་པ་དག་གིས་རབ་ཏུ་ཕྱེ་བའོ། །དེས་ན་མ་རིག་པ་མཚུངས་ལྡན་དང་བཅས་པ་ནི་སེམས་ཀྱི་ཕྱོགས་དང་། ཡེ་ཤེས་མཚུངས་ལྡན་དང་བཅས་པ་ནི་རིག་པའི་ཕྱོགས་ཡིན་པའང་ཤེས་པར་བྱའོ། །འདི་དག་གི་རྣམ་བཞག་ལ། གནས་དང་། ལམ་དང་། སྒོ་དང་། ཡུལ་གྱི་སྒོ་ནས་དབྱེ་བ་དང་། ཀུན་གཞི་དང་ཆོས་སྐུའི་དབྱེ་བ། སེམས་དང་ཡེ་ཤེས་ཀྱི་དབྱེ་བ། ཡིད་དང་ཤེས་རབ་ཀྱི་དབྱེ་བ་སོགས་མང་དུ་ཡོད་ཀྱང་དེ་དག་གི་རྣམ་དབྱེ་ཕྲ་ཞིབ་ནི་མུ་ཏིག་ཕྲེང་བའི་རྒྱུད་སོགས་རྫོགས་ཆེན་སྙིང་ཐིག་གི་རྒྱུད་སྡེ་རྣམས་དང་། དེའི་དགོངས་འགྲེལ་གྱི་བསྟན་བཅོས་རྒྱ་བོད་ཀྱི་མཁས་གྲུབ་རྣམས་ཀྱིས་མཛད་པ་སྤྱི་དང་། བྱེ་བྲག་ཏུ་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་པའི་བསྟན་བཅོས་ཐེག་པའི་མཆོག་རིན་པོ་ཆེའི་མཛོད་དང་། ཚིག་དོན་མཛོད་སོགས་ལས་རྟོགས་པར་བྱའོ། །དེ་དག་གིས་ནི་ལྟ་བའི་ཕྱོགས་ལས་འཕྲོས་པའི་དྲིས་ལན་བརྗོད་ཟིན་ཏོ། །གཉིས་པ་སྒོམ་པའི་ཕྱོགས་ལའང་གཉིས་ལས། དང་པོ་དྲི་བས་མཚམས་སྦྱར་བ་ནི། དྲི་ཚིག་ཏུ་རྣམ་རྟོག་འཁྲུལ་འབྱམས་སུ་སོང་ན་ཇི་ལྟར་བྱ། མཚམས་ལ་སྡོད་སྐབས་རྣམ་རྟོག་ཉིང་འཁྲུལ་ཤིན་ཏུ་མང་འདུག་པ་ལ་ཅིས་དྲག བསྐྱེད་རིམ་སྒོམ་དུས་རྣམ་རྟོག་མང་ཞིང་བར་ཆད་ཆེ་བར་འདུག་པ་ལ་ཇི་ལྟར་བྱེད་དགོས་ལགས། ཞེས་པའོ། །དེའི་ལན་ནི་སྤྱིར་བཏང་མདོ་སྡེ་དག་ལས་འདོད་ཆགས་ཀྱི་གཉེན་པོར་མི་སྡུག་པ་སྒོམ་པ་དང་། ཞེ་སྡང་གི་གཉེན་པོར་བྱམས་པ་སྒོམ་པ་དང་། གཏི་མུག་གི་གཉེན་པོར་རྟེན་འབྲེལ་སྒོམ་པ་དང་། རྣམ་རྟོག་གི་གཉེན་པོར་རླུང་འབྱུང་འཇུག་ལ་སེམས་འཛིན་སྒོམ་པ་སོགས་གསུངས་ཤིང་། དེ་ལས་རླུང་གི་གདམས་པ་ལའང་ཆོས་མངོན་པ་ལས། བགྲང་དང་རྗེས་འགྲོ་འཇོག་པ་དང་། །ཞེས་སོགས་གདམས་ངག་དྲུག་ཏུ་གསུངས་པ་དང་། གསང་སྔགས་ཀྱི་རྒྱུད་སྡེ་གོང་འོག་རྣམས་ལས་ཀྱང་རླུང་གི་གདམས་ངག་མང་དུ་གསུངས་པ་རྣམས་རྣམ་རྟོག་འདུལ་བའི་ཐབས་ཀྱི་མཆོག་ཡིན་ཞིང་། ཁྱད་པར་ཕྱག་རྫོགས་ཀྱི་མན་ངག་ལས་ནི་རྣམ་རྟོག་ལ་རང་བཞིན་མེད་པའི་ཕྱིར་ཆེད་དུ་སྤང་མི་དགོས་པར་རང་གྲོལ་དུ་གཏོང་བའི་ཚུལ་དག་གསུངས་སོ། །མཚམས་ལ་སྡོད་སྐབས་རྣམ་རྟོག་ལྷག་པར་མང་བ་ནི། དཔེར་ན་ཆུ་རྦ་ཀློང་དྲག་པོ་གཡོ་བའི་སར་དེར་གནས་པའི་སྲོག་ཆགས་སོགས་མི་མངོན་ཞིང་། གཟུགས་བརྙན་མི་སྣང་བ་བཞིན་དུ་རྒྱུན་ལྡན་རྣམ་པར་གཡེང་བའི་སྐབས་སུ་འཁྲུལ་སྣང་གཡོ་དྲག་པས་རྣམ་རྟོག་འཆར་ནུབ་མི་མངོན་ཞིང་ཏིང་ངེ་འཛིན་གྱི་སྣང་བ་མི་གསལ་བ་ལས། ཕྱི་ནང་གི་རྒྱུ་འགྲུལ་བཅད་དེ་མཚམས་ལ་བསྡད་པས་སེམས་ཅུང་ཟད་གནས་པར་གྱུར་པ་ན། ད་བཟོད་རྣམ་རྟོག་ཅུང་ཟད་མངོན་དུ་སོང་བ་དཔེར་ན་ཆུ་དལ་དུ་སོང་བ་ལ་སྲོག་ཆགས་སོགས་མངོན་ཞིང་གཟུགས་བརྙན་སྣང་བ་ལྟ་བུ་ཡིན་གྱི་མཚམས་ལ་བསྡད་པས་རྣམ་རྟོག་མང་དུ་སོང་བ་ནི་མ་ཡིན་ནོ། །དེས་ན་བསྐྱེད་རིམ་བསྒོམས་ནས་རྣམ་རྟོག་མང་བ་ཡང་དེ་དང་འདྲ་ལ། དེ་དག་སེལ་བའི་ཐབས་ནི། སྤྱིར་བཏང་སེམས་གནས་དགུའི་སྐབས་སུ། ཉེས་པ་ལྔ་སྤོང་བའི་འདུ་བྱེད་བརྒྱད་བརྟེན་ཚུལ་གསུངས་པ་རྣམས་དང་། ཁྱད་པར་བསྐྱེད་རིམ་རང་གི་སྐབས་སུ་སྤྱིའི་སྐྱོན་བདུན་དང་བྱེ་བྲག་ཏུ་འགྱུར་བའི་སྐྱོན་བཅུ་གཉིས་བཅོས་ཚུལ་བསྐྱེད་རིམ་གྱི་རྣམ་བཤད་འོག་མིན་བགྲོད་པའི་ཐེམ་སྐས་སོགས་ལས་བཤད་པ་ལྟར་ཐུགས་ཉམས་སུ་བཞེས་པར་བྱའོ། །གཞན་ཡང་རྫོགས་ཆེན་གྱི་སྔོན་འགྲོའི་སྐབས་སེམས་འཛིན་བདུན་གསུམ་ཉི་ཤུ་རྩ་གཅིག་གསུངས་པ་རྣམས་ཀྱང་འདི་དག་དང་གནད་གཅིག་པ་ཡིན་པའང་ཤེས་པར་བྱའོ། །མཚམས་ཀྱི་སྐབས་བར་ཆད་ཆེ་བ་ནི་ཐུགས་མད་དེ། །སྤྱིར་བཏང་དུའང་ཤེས་རབ་སྡུད་པ་ལས། རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བ་མང་། །ཞེས་གསུངས་པ་ལྟར། བདག་ཅག་གི་སྟོན་པ་འདི་ཉིད་འཚང་རྒྱ་ཁར་མི་མཇེད་ཀྱི་འཇིག་རྟེན་འདིའི་བདུད་བྱེ་བ་ཕྲག་བརྒྱའི་དམག་གཡོས་ཏེ་བར་ཆད་བརྩམས་པ་དང་མཚུངས་པར། རང་རེས་ཀྱང་སེམས་རྣམ་པ་གཉིས་བསྐྱེད་དེ་ཚེ་འདི་ཉིད་དུ་རྡོ་རྗེ་འཆང་གི་གོ་འཕང་སྒྲུབ་ཕྱིར་རིམ་པ་གཉིས་ཀྱི་རྣམ་འབྱོར་ལ་འཇུག་པ་ནའང་བདུད་སྡིག་ཅན་ཉིད་རང་སྡེ་བྲི་བར་དོགས་ནས་བར་ཆད་བྱེད་པ་ཆོས་ཉིད་ཡིན་ནའང་དེའི་འཇུག་སྒོ་ནི་སྒྲུབ་པའི་དམ་བཅའ་ལ་ཡིད་གཉིས་སུ་གྱུར་པའི་ཐེ་ཚོམ་ཉིད་ཡིན་ཕྱིར་ཐེ་ཚོམ་གྱིས་དམ་བཅའ་རིས་སུ་མི་འབོར་བར་སྒྲུབ་པ་ལ་རྩེ་གཅིག་ཏུ་བརྩོན་པའི་རྣལ་འབྱོར་བ་ལ་ནི་བར་ཆད་དེ་དག་གིས་གླག་རྙེད་པ་མ་ཡིན་ནོ། །དེས་ན་སྒྲུབ་པ་ལ་ཞེ་བཅད་དང་སྙིང་རུས་གནད་ཆེ་བའང་མཁྱེན་པར་མཛོད་ཅིག དེ་དག་གིས་སྒོམ་པའི་ཕྱོགས་ཀྱི་དྲིས་ལན་ཐལ་ལོ། །གསུམ་པ་སྤྱོད་པའི་ཕྱོགས་ལའང་གཉིས་ལས། དང་པོ་དྲི་བ་ནི། དྲི་ཚིག་ཏུ། ལྷག་པར་ཉམས་ལེན་གྱི་སྙིང་པོ་འདི་ཕྱིར་ཕན་པའི་བླ་མའི་ཞལ་གྱི་མན་ངག་དང་། འཆི་ཁར་ཕན་པའི་བསླབ་བྱ་ཞིག་བཅས་སྤྱི་བོར་སྩོལ་ཐུབ་པ་མཁྱེན་མཁྱེན། མཁྱེན་ལགས། ཞེས་སྨྲས་པའོ། །གཉིས་པ་དེའི་ལན་བཤད་པ། འདི་ཕྱིའི་ལམ་སྟོན་བླ་མ་རྡོ་རྗེ་འཆང་། །གང་གི་ཞབས་ལ་སྤྱི་བོས་ཕྱག་འཚལ་ནས། །འདི་ཕྱིར་ཕན་པའི་གཏམ་འདི་ཁྱེད་ལ་ཞུ། །ཕན་པའི་གདམས་པར་ཤེས་ནས་བླང་དོར་མཛོད། །ད་རེས་མི་ལུས་རིན་ཆེན་ཐོབ་དུས་འདིར། །ཕྱི་མའི་དོན་ཆེན་མྱུར་དུ་མ་བསྒྲུབ་ན། །འཆི་བདག་གཤིན་རྗེ་ནམ་འོང་མི་འདུག་པས། །གློ་བུར་བྱུང་ན་ཇི་ལྟར་བྱ་དགོས་སོམས། །སྲིད་པའི་ཕུན་ཚོགས་མི་དགེའི་སོ་ནམ་འདིའི། །འབྲས་བུ་རྩུབ་མོ་མྱོང་ན་མི་བཟོད་པས། །མཐའ་མེད་འཁོར་བའི་སྡུག་བསྔལ་འདིར་སོམ་ལ། །སྲིད་རྩལ་ལས་ཉོན་འགོག་པའི་ཐབས་ལ་འབོད། །དེ་ལྟ་ན་ཡང་རང་ཉིད་གཅིག་པུ་རུ། །ཐར་འདོད་ཉན་རང་ལམ་ལས་མི་འདའ་བས། །མ་གྱུར་འགྲོ་ཀུན་སྲིད་པའི་ཆུ་གཏེར་ལས། །སྒྲོལ་འདོད་བྱང་ཆུབ་སེམས་གཉིས་སྐྱེད་མཛོད་ཅིག །དེ་ཡི་བསླབ་བྱ་ཕ་རོལ་ཕྱིན་པ་དྲུག །བསླབ་པ་གསུམ་དུ་བསྡུས་ནས་དེ་ཡང་ནི། །རིམ་གཉིས་ལམ་གྱིས་ཉམས་སུ་ལེན་པའི་ཚུལ། །མཁས་གྲུབ་བརྒྱུད་པའི་ཞལ་ལུང་སྙིང་ལ་འཆོངས། །གང་དག་ཚུལ་ཁྲིམས་བསླབ་པས་མ་བསྡམས་ཤིང་། །ཞི་ལྷག་སྒོམ་པའི་ཚུལ་ལ་རྨོངས་བཞིན་དུ། །ཚེ་འདིར་སངས་རྒྱས་འགྲུབ་འདོད་རེ་བ་ནི། །ས་བོན་རུལ་བའི་འབྲས་བུར་སྨོན་པ་བཞིན། །དེ་ཕྱིར་དབང་བཞིའི་རྗེས་འགྲོའི་ལམ་གནད་གང་། །བླ་མའི་ཞལ་ལས་ལེན་པར་མ་མཛད་ན། །གསང་ཆེན་ལམ་གྱིས་མཆོག་ཐུན་སྒྲུབ་པོ་ལ། །གཏམ་དེ་བྲག་ཆ་བཞིན་དུ་རྗེས་མེད་འགྱུར། །འདི་ལྟར་དབང་བཞིའི་ལམ་ལ་གོམས་གྱུར་ན། །གང་ལ་གོམས་པ་དེ་ཡི་འདའ་ཀ་མ། །རྡོ་རྗེ་འཆང་གིས་རྒྱུད་སྡེར་ལེགས་གསུངས་པ། །དེ་ལས་འཆི་ཁར་ཕན་ཐབས་གཞན་མེད་ཀྱང་། །ཚེ་འདིར་རྫོགས་པ་ཆེན་པོའི་གདམས་ངག་གིས། །དྲི་མེད་རིག་པའི་རང་ཞལ་མཇལ་གོམས་ན། །འཆི་ཚེ་དེ་གའི་རུམ་དུ་རྟོག་པའི་རྒྱུན། །འཕོས་ཏེ་འོད་གསལ་རང་ངོ་འཕྲོད་ནས་གྲོལ། །དེ་ཕྱིར་རྟེན་འབྲེལ་འཁོར་ལོ་ལུགས་ལྡོག་ཏུ། །སྐུ་བཞིའི་རྒྱལ་སར་འཕོ་བའི་ཆོ་ག་མཁན། །དབང་བཞིའི་བདག་རྒྱུད་སྨིན་མཛད་བླ་མ་དེས། །ཚེ་རབས་ཀུན་ཏུ་རྗེས་སུ་འཛིན་པར་ཤོག། ཅེས་པའང་སྲིན་རྫོང་ཨོ་རྒྱན་ཆོས་གླིང་གི་གྲྭ་རིགས་དགེ་སློང་པདྨ་བློ་གསལ་ནས་ལྷ་རེག་དངུལ་ཊཾ་བཅས་ཇི་ལྟར་བསྐུལ་བའི་བཞེད་སྐོང་དུ་ཆོས་སྨྲ་བའི་བཙུན་པ་རྒྱལ་བའི་སྲས་པོ་གཞན་ཕན་མཐའ་ཡས་སུ་འབོད་པས་ཁམས་སྲིན་མོ་རྫོང་གི་དབུ་རྩེ་ཕོ་བྲང་གཡུ་མཚོའི་འདབས་རྡོ་རྗེ་སྙིང་རྫོང་གི་མདུན་ཞོལ་ནས་བྲིས་ཏེ་ཕུལ་བ་དགེ། །།