ཀོང་པོ་འགྲོ་མགོན་གྱིས་དྲིས་ལན།

༄། །ཀོང་པོ་འགྲོ་མགོན་གྱིས་དྲིས་ལན་བཞུགས། །ལྷན་སྐྱེས་བདེ་ཆེན་བདེ་བའི་རོལ་མོ་ལ། །དགྱེས་རོལ་བདེ་མཆོག་དཔའ་བོར་རྟག་འཁྱུད་པའི། །སྐྱེ་མེད་ཆོས་འབྱུང་རྒྱལ་བ་ཀུན་གྱི་ཡུམ། །གང་ལ་བཏུད་ནས་དེ་དོན་མདོ་ཙམ་བྲི། །དེ་ཡང་གང་ལས་དྲི་བ་གནང་བའི་དོན། །འཇམ་དཔལ་གཤིན་རྗེ་གཤེད་དྲེགས་པ་འཇོམ་བྱེད་ཀྱི་སྐྱབས་སེམས་དང་བདུན་རྣམ་དག་རྣམས་གྲུབ་ནས་མཚམས་ལྷ་བསྐྱེད་དེ་ལྷ་ཡི་ང་རྒྱལ་བྱ་བའི་སྐབས་འདི་ནས་མར། ཧཱུཾ་ཨྱཻ་ཉིད་སྟོང་བ་ཆོས་འབྱུང་སྟེ། །མ་སྐྱེས་འགག་པ་མེད་པ་ལས། །རྒྱུ་རྐྱེན་སྔགས་ལས་མ་སྐྱེས་པར། །རོལ་པ་ཆེན་པོའི་སྐུ་རུ་གསལ། །ཨོཾ་ཧྲིཿཥྚི་ཝི་ཏྲི་ཏཱ་ན་ན་ཧཱུཾ་ཧཱུཾ་ཕཊ༔ ཅེས་གསུངས་འདུག་སྟེ། དེ་ལྟར་ན་ཐོག་མར་རྒྱུ་རྐྱེན་སྔགས་ལས་མ་སྐྱེས་པ་ཞེས་སོགས་སྨྲོས་ནས། སླར་སྔགས་བརྗོད་པས་འགལ་བ་མ་ཡིན་ནམ་ཞེས་ཕེབས་པ་ལ། སྨྲས་པ་འགལ་བ་མ་ཡིན་ཏེ། སྤྱིར་བསྐྱེད་པའི་རིམ་པ་ལ་དབྱེ་ན། ཡུལ་སྣང་བདེན་མེད་དུ་ཤེས་པ་སྒྱུ་མའི་བསྐྱེད་རིམ། ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ། ལྷ་སྐུ་ཞལ་ཕྱག་དང་བཅས་པ་སྤྲུལ་པའི་བསྐྱེད་རིམ་ཞེས་གསུམ་དུ་དབྱེ་ནས། དེའི་ཕྱི་མ་སྤྲུལ་པའི་བསྐྱེད་རིམ་ལའང་། གང་ཟག་གི་བློའི་གོམས་སྟོབས་དང་སྦྱར་ནས། སྐྱེ་གནས་བཞིའི་བག་ཆགས་སྦྱང་ཕྱིར་བསྐྱེད་རིམ་ཡང་། བསྡུས་འབྲིང་རྒྱས་དང་རྒྱས་པ་ཆེན་པོ་བཞི་རུ་གསུང་བ་རྣམས་ཀྱི་གོ་བ་ཡིད་ལ་ངེས་པར་བྱེད་པ་ནི། ལམ་འདི་སྒོམ་པ་ལ་ཐོག་མར་ཤེས་དགོས་པའི་གནད་དེ། གཞན་དུ་ན། བྱ་བའི་རྒྱུད་དུ་སྟོང་བ་ཡི་གེ་སྒྲ་གཟུགས་དང་། ཞེས་པ་ལ་སོགས་པས་བསྟན་པ་ལྟར་གྱི་ལྷ་དྲུག་ཏུ་དབྱེ་བ་སོགས་རྒྱུད་སྡེ་བཞི་སོ་སོའི་དགོས་ཆོས་དང་བསྟུན་པའི་ལྷའི་ངོས་འཛིན་དང་རང་བཞིན་གྱི་དཀྱིལ་འཁོར་སོགས་དཀྱིལ་འཁོར་གྱི་དབྱེ་བ་དག་ལེགས་པར་ཁོང་དུ་ཆུད་ན་ནི་གནས་འདི་ལ་སོམ་ཉི་མེད་པར་འགྱུར་བ་ཞིག་ཏེ། དེ་ལྟ་ནའང་གནས་སྐབས་སུ་དྲི་བ་དངོས་ཀྱི་རྣལ་ལན་གདབ་པ་ལ། རྩ་བའི་ཚིག་སྔ་མ་ཨྱཻ་ཉིད་སྟོང་བ་སོགས་ཀྱིས་རང་བཞིན་གྱི་དཀྱིལ་འཁོར་དང་། རྐང་བ་བཞི་བའི་ཚིག་མཇུག་གིས་དེ་ཉིད་ཏིང་ངེ་འཛིན་གྱི་ལྷ་སྐུར་ཤར་བ་བསྟན་པས་ན་མི་འགལ་བའི་ཕྱིར་རོ། །སྔགས་ནི་སྤྱིར་སྔགས་ལ་གསང་སྔགས་རིགས་སྔགས་གཟུངས་སྔགས་ཏེ་དོན་གྱི་སྒོ་ནས་དབྱེ་བ་གསུམ་དང་། རྒྱུ་མ་ནོར་བ་རྩ་བའི་སྔགས་སོགས་བཟླས་པའི་སྒོ་ནས་དབྱེ་བ་གསུམ་སྟེ་དྲུག་ཏུ་འགྱུར་བ་ལས། འདི་སྐབས་ཨོཾ་ཧྲཱིཿཥྚི་སོགས་ནི་ཏིང་ངེ་འཛིན་གྱི་ལྷ་སྐུ་དེ་ཉིད་གསལ་བ་བརྟན་པར་བྱ་བའི་ཆེད་དམ། །ལྷའི་ང་རྒྱལ་བྱ་བའི་ཆེད་ཙམ་དུ་བརྗོད་པ་ལས། བསྐྱེད་པ་རྐྱེན་གྱི་སྔགས་དངོས་ནི་མ་ཡིན་ཏེ། ལྷ་བསྐྱེད་ཟིན་པའི་རྗེས་ནས་བྱུང་བས་ན། དེ་བསྐྱེད་བྱེད་ཀྱི་རྐྱེན་དུ་མི་རུང་བའི་ཕྱིར་རོ། །འོ་ན་འདིའི་དོན་དངོས་གང་སྙམ་པ་ལ། འཆད་པར་བྱེད་དེ། ཐོག་མར་ཧཱུཾ་ཞེས་བརྗོད་པ་ནི་རྒྱལ་བ་ཐམས་ཅད་ཀྱི་ཐུགས་རྣམ་པར་མི་རྟོག་པའི་ཡེ་ཤེས་གཉིས་སུ་མེད་པའི་རྡོ་རྗེ་སྤྲོས་པ་ཀུན་དང་བྲལ་བའི་ས་བོན་ཏེ། དེ་ཉིད་དེའི་དུས་སུ་དྲན་པར་བྱེད་པའི་ཐ་ཚིག་གོ །དེ་ཇི་ལྟར་ན། བརྗོད་པར་བྱ་བའི་ཕྱིར་ཨྱཻ་ཉིད་སྟོང་བ་སོགས་སྨྲོས་ཏེ། ཡེ་གེ་ཨྱཻ་ཉིད་ནི་སྟོང་བ་ཉིད་དང་། མཚན་མ་མེད་པ་དང་། སྨོན་པ་མེད་པ་སྟེ་རྣམ་པར་ཐར་བའི་སྒོ་གསུམ་གྱི་བདག་ཉིད་དུ་གྱུར་པའི་སྟོང་བ་ཆོས་ཐམས་ཅད་ཀྱི་འབྱུང་གནས་སམ། རང་རང་གི་དེ་བཞིན་ཉིད་དུ་གྱུར་པ་གང་ཞིག་མཚོན་པར་བྱེད་པ་སྟེ་ཞེས་སྨྲོས་ཏེ། དེ་ལྟར་བརྗོད་པ་ཡང་། རི་བོང་གི་རྭ་དང་མོ་གཤམ་གྱི་བུ་ལྟ་བུར་སོང་བའི་སྟོང་བ་ནི་མ་ཡིན་ནོ་ཞེས་སྟོན་པའི་དོན་དུའོ། །འདི་དག་ལ་ལུང་གི་སྤྲོས་པ་ནི་ཡོད་མོད་དེ་མ་བྱས་སོ། །ཆོས་འབྱུང་དེ་ནི་ཡེ་ནས་རང་གི་མཚན་ཉིད་ཀྱིས་སྐྱེ་བ་མེད་པས་ན་མ་སྐྱེས་པའོ། །མ་སྐྱེས་པ་དེའི་ཕྱིར་ན་འགག་པ་མེད་པའོ། །སྐྱེ་འགག་མེད་པ་དེའི་ཕྱིར་ན་རྟག་པ་དང་ཆད་པར་མ་དམིགས་པའོ། །རྟག་ཆད་མེད་པའི་ཕྱིར་ན་གཅིག་དང་ཐ་དད་གང་དུའང་མ་གྲུབ་པའི་ཕྱིར་རོ། །གཅིག་པར་ཡང་མ་གྲུབ་ལ་ཐ་དད་དུའང་མ་གྲུབ་པས་འགྲོ་བ་དང་འོང་བར་ཡང་མི་རུང་བའོ། །འདི་ནི་དེ་ཡི་ཆོས་ཉིད་དེ་གང་སྐྱེ་བ་ལ་སོགས་པ་གཅིག་འགག་པ་ན་ཀུན་འགག་པར་འགྱུར་བ་ཞིག་སྟེ། ལུང་གིས་ཀྱང་འགྲུབ་བོ། །དེ་ནི་སྒྲ་ཅན་འཛིན་གྱིས་ཡུལ་ལ་བསྟོད་པ་ལས་ཀྱང་། མ་སྐྱེས་མི་འགགས་ནམ་མཁའི་ངོ་བོ་ཉིད། །ཅེས་སོགས་དང་། རྒྱུད་ལས་བཤད་པ་ནི་རྒྱུད་ཀྱི་རྒྱལ་པོ་ལས། ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་པ་ལ་སོགས་པའི་ཚིགས་སུ་བཅད་པ་ལྔས་བསྟན་པ་ལྟར་རོ། །བླ་མའི་མན་ངག་ཀྱང་ཡོད་དེ། དབུ་མ་རྩ་བ་ལས། གང་གིས་རྟེན་ཅིང་འབྲེལ་བར་འབྱུང་། །འགག་བ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་པ་དང་། དེ་ཉིད་ཀྱི་རྐང་བ་དང་པོའི་སྒྲུབ་བྱེད་དུ་སླར་ཡང་། །རྟེན་ཅིང་འབྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མི་ཡིན་ནོ། །ཞེས་པ་ལ་སོགས་པ་མཐའ་ཡས་སོ། །ཡང་མཐའ་གཅིག་འགགས་པས་མཐའ་གཞན་ཀུན་འགག་པར་འགྱུར་བ་ཡང་། གཞུང་དེ་ཉིད་ཀྱི་རང་འགྲེལ་ལས། གང་སྐྱེ་བ་མེད་པ་ནི། འགག་པ་མེད་པའི་ཕྱིར་རོ། །འགག་པ་མེད་པ་ནི་སྐྱེ་བ་མེད་པའི་ཕྱིར་རོ། །ཞེས་པ་ལ་སོགས་པ་ཁྱབ་མཉམ་དུ་རྒྱ་ཆེར་གསུངས་པའི་ཕྱིར་རོ། །དེ་ལྟ་བུའི་སྐྱེ་འགག་ལ་སོགས་པ་མེད་པའི་ཆོས་ཉིད་གང་ཞིག་ལས་རྒྱུ་དང་རྐྱེན་གྱིས་བསྐྱེད་པའི་ལྷ་སྐུའི་རྣམ་པ་ཞིག་འབྱུང་བ་ནི་མི་རུང་སྟེ། བརྩད་ན་མཐའ་བརྒྱད་ཀྱི་སྐྱོན་དེ་དག་འབབ་པའི་ཕྱིར་རོ། །དེ་བས་ན་གང་སྤྲོས་པ་དང་བྲལ་བའི་དུས་ཉིད་ནས། འབྱུང་རུང་གི་ས་བོན་ལ་སོགས་པའི་རྒྱུ་དང་། བསྐྱེད་བྱེད་ཀྱི་རྐྱེན་སྔགས་ལ་སོགས་པ་ལས་མ་བསྐྱེད་པར་རང་གི་ངང་གིས་ལྷའི་དཀྱིལ་འཁོར་དུ་སྣང་ལ། དེ་ལྟར་སྣང་བའི་དུས་ཉིད་ནས་རང་བཞིན་གྱིས་མ་གྲུབ་པ་སྟེ། ལྷ་དང་སྤྲོས་བྲལ་ལ་སྔ་ཕྱི་མེད་པར་ཡེ་ཤེས་སྒྱུ་མའི་སྐུར་རྟེན་ཅིང་འབྲེལ་འབྱུང་དུ་སྣང་བ་འདི་ནི་འགལ་བ་མ་ཡིན་ཏེ། རང་གི་མཚན་ཉིད་བཞག་ཏུ་ཡོད་པའི་ཕྱིར་རོ། །དེ་ལྟར་ན་དོན་འདི་རྟོགས་པར་གྱུར་པའི་རྣལ་འབྱོར་བའི་ཡིད་ངོར། རོལ་པ་དཔལ་ཆེན་པོ་གཤིན་རྗེའི་གཤེད་པོའི་ཕྱག་རྒྱ་སྒྱུ་མའི་སྐུ་རུ་ཡེ་ནས་ཡིན་པ་ལ་ཡིན་པར་རྟོགས་པའི་ཤེས་རབ་ཀྱིས་གསལ་འདེབས་པ་སྟེ། དོན་འདིས་སྔ་འགྱུར་གྱི་རིང་ལུགས་ལ་ལྷག་པའི་བདེན་པ་དབྱེར་མེད་བློས་སྤྱོད་ཡུལ་དང་བྲལ་བ་ཞེས་སྔགས་ཀྱི་ཐུན་མོང་མ་ཡིན་པའི་ལྟ་བའི་ཁྱད་པར་བཤད་པ་ལའང་ངེས་ཤེས་འགྲོང་དགོས་སོ། །དེ་དག་ཀྱང་དཔལ་དུས་ཀྱི་འཁོར་ལོ་ལས། ཨཱ་ལི་ཀཱ་ལི་སྙོམས་འཇུག་དང་། །ཧཱུཾ་ཕཊ་ཡི་གེ་སོགས་སྤངས་ཀྱང་། །འགྱུར་བ་མེད་ལས་འཁྲུངས་པའི་སྐུ། །དུས་ཀྱི་འཁོར་ལོ་དེ་ལ་འདུད། །ཅེས་སོགས་གསུངས་པ་དང་མཐུན་པ་ཡིན་ནོ། །རྒྱུ་མཚན་འདི་རྣམས་ལ་ལུང་སྦྱོར་དང་མཐའ་དཔྱད་རྒྱས་པ་ནི་དོན་བསྡུས་ཏེ་དགོས་ཞེས་ཕེབས་པས་མ་སྤྲོས་སོ། །སྨྲས་པ། དཔྱད་ན་ལུང་དང་རིགས་པའི་མེ་བཙའ་ཡིས། །དོན་ལ་རྨོངས་པའི་ནད་མིག་འབྱིན་སྲིད་ཀྱང་། །དེང་དུས་འགྲོ་ཀུན་ལེགས་བཤད་ནོར་བུ་ལས། །བླུན་ཚིག་འགལ་དུམ་འཕྲེང་བར་སྤྲོ་བ་མཐོང་། །ཤེས་ལྡན་ཡོད་ན་ཁེངས་པའི་རུ་མཚོན་དེ། །དར་ཅིག་སྙོལ་ལ་གཟུ་བོར་གནས་པའི་བློས། །གོ་སའི་སྤྲིན་པ་ཟས་སུ་མ་རློམ་པར། བརྒྱུད་ལྡན་མན་ངག་ནུ་ཞོ་འཐུངས་ཤིག་ཀྱེ། ཡང་གང་ལས་དྲི་བ་ཕེབས་པར། །གཞུང་དག་ལས་ལོག་པའི་ལྕི་བ་བཞི་སོགས། ལྕི་བ་བཅུ་གཉིས་ཙམ་དུ་དབྱེ་བ་ཡོད་ཚོད་དུ་འདུག་པས། དེ་དག་གི་ངོས་འཛིན་དང་། རྣམ་དབྱེ་གསལ་བོ་དགོས་ཞེས་གནང་བ་ལ། ལན་བཤད་པ། སྤྱིར་ཐུན་མོང་གི་ཐེག་པ་ལས་ཀྱང་ལྕི་བ་བཞིའི་ངོས་འཛིན་ནི་གསལ་བོར་གནང་མོད། འོན་ཀྱང་འདིར་གསང་སྔགས་རྡོ་རྗེ་ཐེག་པའི་དབང་དུ་བྱས་ཏེ། དེ་ཉིད་ཀྱི་དམ་ཚིག་གི་བཤགས་པའི་སྐབས་སུ། ལྕི་བ་བཅུ་དྲུག་ལོག་པ་བརྒྱད་ལ་སོགས། །ཞེས་ལྕི་བ་བཅུ་གཉིས་ཙམ་དུ་མ་ཟད་ལྕི་བ་བཅུ་དྲུག་ཏུ་བཤད་དེ། དེ་བས་འདིར་དེ་ཉིད་ཀྱི་ངོས་འཛིན་དང་རྣམ་དབྱེ་མདོ་ཙམ་བརྗོད་པ་ལ། ཐོག་མར་ལོག་པའི་ལྕི་བ་བཞི་ནི། མཁས་པའི་གོང་ལྕི། དགེ་སློང་གི་ཕྱག་ལྕི། སྒྲུབ་པ་པོའི་ཟས་ལྕི། སྔགས་པའི་རྫས་ལྕི་བ་སྟེ་བཞི་ལས། དང་པོ་ནི། མགོན་པོ་བྱམས་པས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་ཐོབ་མི་འགྱུར། །དེ་ལྟ་བས་ན་གཞན་དག་ཚར་གཅོད་རྗེས་འཛིན་དང་། །རང་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ། །ཞེས་གསུངས་པའི་དོན་འཕགས་པའི་ཡུལ་དུ་གྲགས་པ་ལྟར་ན། སྒྲ་དང་ཚད་མ་གཉིས་གཞན་ཚར་གཅོད་ཀྱི་རིག་གནས། བཟོ་དང་གསོ་བ་གཉིས་གཞན་རྗེས་སུ་འཛིན་པའི་རིག་གནས། མདོ་རྒྱུད་ཀྱི་གཞུང་དོན་ལ་སློབ་པ་རང་ཉིད་ཀྱིས་ཀུན་ཤེས་པར་བྱ་བའི་ནང་གི་རིག་གནས་ཏེ། དེ་ལྟར་རིག་པའི་གནས་ཆེན་ལྔ་པོ་ཤེས་པའི་གང་ཟག་ལ་མ་ཧཱ་པཎྜི་ཏ་ཞེས་མཁས་པ་ཆེན་པོའི་ཐ་སྙད་དང་། སྐར་རྩིས་སྙན་ངག་སྡེབ་སྦྱོར་ཟློས་གར་མངོན་བརྗོད་དེ་རིག་པའི་གནས་ཆུང་ལྔ་ཤེས་པ་ལ་ཨལ་པ་པཎྜི་ཏ་ཞེས་མཁས་པ་ཆུང་ངུའི་ཐ་སྙད་བཏགས་ཏེ། དེ་ལྟར་ནའང་ནང་དོན་རིག་པ་ནི་ཐུན་མོང་མ་ཡིན་པའི་རིག་གནས་དང་། གཞན་རྣམས་དེའི་ཡན་ལག་ཐུན་མོང་གི་རིག་གནས་སུ་ཤེས་དགོས་སོ། །འདི་དག་གི་ནང་གསེས་ཀྱི་དབྱེ་བ་དང་། ད་ལྟ་བོད་འདིར་གཞུང་གང་ཙམ་ཞིག་འགྱུར་ཡོད་པ་ལ་སོགས་པའི་ཞིབ་བཤད་ནི་ཡི་གེ་མང་གིས་དོགས་ནས་མ་སྤྲོས་སོ། །དེ་བས་ན་རང་ཉིད་ལ་མཁས་པ་ཆེ་ཆུང་གང་དུའང་གདག་རུང་བའི་ཡོན་ཏན་མེད་བཞིན། གཞན་ཡོན་ཏན་དེ་དག་དང་ལྡན་པའི་མཁས་པའི་དབང་པོ་དག་གི་གོང་དུ་གྱུར་པའི་གོ་ས་མཐོན་པོ་བཟུང་ནས་དེ་ཉིད་ཀྱི་སྙེམས་པས་ཕ་རོལ་པོ་ཁྱད་དུ་གསོད་པའམ། གྲལ་གོང་ལ་སོགས་པར་སྡོད་པར་བྱེད་པ་འདི་ནི་སྤྱོད་པ་གོ་ལོག་ཏུ་གྱུར་པའི་ནང་ནས་ཀྱང་ལྷག་པར་ལྕི་བ་དང་པོའོ། །ཚིག་མཇུག་འདི་ལྷག་མ་གསུམ་པོ་ལའང་སྦྱར་བར་བྱ་སྟེ། དེ་ལྟར་ན་གང་ཞིག་སོ་སོ་ཐར་བའི་བསླབ་པའི་གོ་རིམ་གྱི་དབང་དུ་བྱས་ན་དགེ་བསྙེན་ལ་སོགས་པའི་བསླབ་པ་ཚིག་གསུམ་པོ་གང་རུང་འཛིན་པའི་གང་ཟག་བསླབ་པ་འོག་མར་གྱུར་པ་གང་ཡིན་པ་དེས་རང་ལས་བསླབ་པ་གོང་མར་གྱུར་པ་དེ་ལ་ཕྱག་འཚལ་དགོས་ཤིང་། དེ་ལྟར་མ་ཟད་གཉིས་ཀ་དགེ་སློང་གི་དངོས་པོར་གནས་པ་ཞིག་ནའང་གང་བསྙེན་པར་རྫོགས་སྔ་བའི་བསླབ་པ་རྒན་རིམ་དེ་ལ་དེ་ལས་ཕྱི་བའི་བསླབ་པ་གཞོན་པ་དག་གིས་རིམ་པ་བཞིན་དུ་ཕྱག་འཚལ་དགོས་པ་དེ་ཉིད་རང་གི་ལུགས་དང་གཞན་ཡང་ཡེ་ཤེས་ཁོང་ཆུད་ཀྱི་དབང་དུ་བྱས་ནས་རིག་འཛིན་ནང་གི་དགེ་སློང་གི་རྣམ་བཞག་ཀྱང་ཡོད་དེ། བྲམ་ཟེ་ཆེན་པོ་ས་ར་ཧ་བས་སྨྱིག་མཁན་མ་དང་ལྷན་གཅིག་གནས་བཞིན་འདི་སྐད་དུ། ཁ་སང་ཕན་ཆད་དགེ་སློང་མིན། །དེ་རིང་ཕྱིན་ཆད་དགེ་སློང་ཡིན། །ཧེ་རུ་ཀ་དཔལ་དགེ་སློང་མཆོག །ཅེས་གསུངས་པས་མཚོན་དེ་ཉིད་སྒྲུབ་བྱེད་ཀྱི་རྒྱུད་སྡེའི་ལུང་ཡང་མང་ཞིག་ཡོད་དོ། །གཞན་དུ་ན་སོ་སོར་ཐར་བ་ལས་ཀྱང་། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ཅིང་། །དུལ་ཞིང་ཡང་དག་སྡོམ་ལ་ཚངས་པར་སྤྱོད། །འབྱུང་བོ་ཀུན་ལ་ཆད་པ་རབ་སྤངས་ཏེ། །དགེ་སློང་དགེ་སྦྱོང་དེ་ཡིན་བྲམ་ཟེའང་དེ། །ཞེས་གསུངས་པ་དང་། སྤྱིར་ཚུལ་ཁྲིམས་རྣམ་པ་གསུམ་ལས། སོ་སོ་ཐར་བ་ནི་ངེས་འབྱུང་གི་ཚུལ་ཁྲིམས་ཁོ་ནའི་དབང་དུ་བྱས་ཀྱི། ལེགས་སྨོན་དང་འཇིགས་སྐྱོབ་ཀྱི་བློས་ཉིས་བརྒྱ་ལྔ་བཅུའི་ཁྲིམས་བསྲུང་ཀྱང་བསླབ་པ་གནས་འགྱུར་གྲུབ་ན་མ་གཏོགས། དེ་ཉིད་སོ་སོར་ཐར་བ་དང་དགེ་སློང་གང་ཡང་མ་ཡིན་པར་གསུངས་པ་འདི་དག་ལ་དཔྱད་ན། སོ་ཐར་ཀྱི་སྡོམ་པ་ཀུན་སློང་ལ་མ་ལྟོས་པར་ལུས་ངག་ཁོ་ནའི་སྟེང་ན་ཡོད་པར་འདོད་པ་འདི་ལ་ཡང་ཁྱབ་པ་རང་མ་བྱུང་ཞིང་། མ་ཟད་དགེ་སློང་གི་ངོས་འཛིན་ལའང་དཔྱད་གཞི་དུ་མ་སྣང་མོད། འོན་ཀྱང་འདིར་བརྟན་མཁས་བཙུན་པ་ཕན་འདོགས་ཀྱི་ཡོན་ཏན་བཞི་དང་ལྡན་པའི་དགེ་སློང་ཡིན་ན་ནི་སྨྲོས་མ་དགོས་ཤིང་ཞར་བྱུང་རིག་འཛིན་ནང་གི་དགེ་སློང་སོགས་མདོར་ན་དགེ་སློང་གི་དངོས་པོར་གདགས་སུ་རུང་བ་གང་ཡང་རུང་སྟེ། དེ་དག་གིས་ཕྱག་འཚལ་བ། རང་ཉིད་དེ་འདྲའི་དགེ་སློང་མིན་བཞིན་དང་དུ་ལེན་པར་བྱེད་པ་འདི་ནི་ལོག་པའི་ལྕི་བ་གཉིས་པའོ། །གལ་ཏེ་རང་གི་དབང་ལ་སོགས་པ་ཞུ་ཡུལ་གྱི་བླ་མ་ལྟ་བུ་རང་ལས་རྟེན་དམའ་པའམ། བསླབ་པ་གཞོན་པར་གྱུར་ན་དེ་ལ་ཕྱག་འཚལ་རུང་ངམ་མི་རུང་སྙམ་ན། འདི་ནི་དམིགས་བསལ་ཏེ། སྤྱིར་བླ་མ་དེ་ཉིད་རིག་འཛིན་ནང་གི་དགེ་སློང་གི་དངོས་པོར་གྲུབ་ཟིན་ན་ནི་སྨྲོས་མ་དགོས་ལ། དེ་མིན་ཀྱང་རང་གི་ངོར་སངས་རྒྱས་ལས་ཀྱང་ལྷག་པའི་ཐུགས་རྗེ་ཆེན་པོ་དང་ལྡན་པར་གྱུར་པས་ཕྱག་འཚལ་དགོས་པ། སློབ་དཔོན་དཔའ་བོའི་བླ་མ་ལྔ་བཅུ་པ་ལས། མཆོག་ཏུ་དང་བས་དུས་གསུམ་དུ། །དཀྱིལ་འཁོར་མེ་ཏོག་བཅས་ཐལ་མོས། །སྟོན་པ་བླ་མ་བསྙེན་བཀུར་ཞིང་། །ཞབས་ལ་སྤྱི་བོས་ཕྱག་བྱའོ། །ཞེས་པ་ལ་སོགས་པ་གསུངས་པ་ལྟར་དེས་ནའང་རེ་ཞིག་འཇིག་རྟེན་པའི་སྐྱེ་བོ་ཐ་མལ་པ་རྣམས་དང་། དམན་ལམ་ཕྱོགས་གཅིག་ཏུ་ཞེན་པ་དག་གི་མདུན་དུ་ནི། དེ་དག་གིས་སྨོད་པ་སྤོང་བའི་ཕྱིར། དམ་པའི་ཆོས་ལ་སོགས་པའི་སྐུ་གསུང་ཐུགས་རྟེན་གང་རུང་མདུན་དུ་བཀྲམ་ཞིང་དེ་ཉིད་ལ་ཕྱག་བྱ་བའི་ཟོལ་གྱིས། བློས་བླ་མ་ཉིད་དཀོན་མཆོག་ཀུན་འདུས་ཀྱི་ངོ་བོར་ཤེས་བཞིན་གུས་པ་ཆེན་པོས་ཕྱག་འཚལ་བར་བཞེད་དེ། ལུང་སྔ་མའི་མུར། ཁྱིམ་པའམ་ནི་གསར་བུ་ལ། །འཇིག་རྟེན་སྨོད་པ་སྤང་བའི་ཕྱིར། །དམ་ཆོས་ལ་སོགས་མདུན་བདར་ཏེ། །བརྟུལ་ཞུགས་འཛིན་པས་བློས་ཕྱག་བྱ། །ཞེས་གསུངས་པས་ཤེས་སོ། །དེ་བཞིན་དུ་གང་ཞིག་ནང་བ་སངས་རྒྱས་པ་རྣམས་ཀྱིས་རང་གི་ཆོས་ལུགས་ཉམས་སུ་ཇི་ལྟར་ལེན་པའི་ལག་ལེན་གྱིས་གོ་རིམ་ནི་འཁོར་ལོ་གསུམ་གྱི་རིམ་པས་ཏེ། དེ་བས་ན་ཐོག་མར་ཀློག་པ་ཐོས་བསམ་གྱི་འཁོར་ལོས་ཆོས་དང་ཆོས་མ་ཡིན་པ་འབྱེད་པའི་ཤེས་རབ་ཀྱི་མིག་དང་ལྡན་པར་བྱས་ནས། བར་དུ་སྤོང་བ་བསམ་གཏན་གྱི་འཁོར་ལོས་སྒྲུབ་པ་ཉམས་ལེན་སྙིང་པོར་བྱས་ཏེ། ཐ་མ་བྱ་བ་ལས་ཀྱི་འཁོར་ལོས་བསྟན་པ་དང་སེམས་ཅན་གྱི་དོན་རླབས་པོ་ཆེན་སྒྲུབ་པ་སྟེ། དེ་ལྟར་འཁོར་ལོ་གསུམ་གྱི་དུས་འདའ་བ་ནི་ལུགས་འདི་འཛིན་པ་རྣམས་ཀྱིས་ཇི་ལྟར་སློབ་པའི་གོ་རིམ་མ་ནོར་བ་ཉིད་ཡིན་གཞན་ལག་ལེན་དུ་བཀལ་ནས། ཀློག་པ་ཐོས་བསམ་གྱི་བྱ་བ་རྣམས་རྫོགས་ཏེ། རྣམ་མཁྱེན་དོན་གཉེར་གྱི་བློས་སྒྲུབ་པ་ལ་རྩེ་གཅིག་ཏུ་གཞོལ་བར་བྱེད་པ་པོའི་གང་ཟག་དེ་ནི་རྒྱལ་བ་རྣམས་ཀྱི་གདུང་འཚོབ་ཅིང་། སེམས་ཅན་མ་ལུས་པའི་སྐྱབས་གནས་དམ་པ་གཅིག་པུར་གྱུར་པའི་ཕྱིར་དེ་དག་ལ་བསྙེན་བཀུར་ལ་སོགས་པས་མཆོད་པའི་ཕན་ཡོན་ཡང་གཞལ་དུ་མེད་ལ། གལ་ཏེ་མ་གུས་པའི་ལས་བགྱིས་པའི་ཉེས་པ་ཡང་གཞལ་དུ་མེད་པའི་ཕྱིར། རྣམ་པ་ཀུན་ཏུ་རང་འབྱོར་དང་བསྟུན་པས་མཆོད་པར་རིགས་ཀྱི་དེ་དག་གི་ཟས་སུ་བགྱིས་པའི་བཟའ་བཏུང་ལས་ཕྲིས་ནས་རང་ཉིད་ཀྱིས་ཟ་བ་ནམ་ཡང་མི་རིགས་པ་གང་ཞིག ཅི་སྟེ་ཟོས་ན་ལོག་པའི་ལྕི་བ་གསུམ་པའོ། །འདིར་ཡང་སྒྲུབ་པ་པོ་རང་ཉིད་ཀྱིས་ཆེད་དུ་གནང་བ་ཡིན་ན་དེ་ལ་ལྕི་བར་འགྱུར་རམ་མི་འགྱུར་སྙམ་པ་ལ། སྤྱིར་རབ་བྱུང་ལ་ཟང་ཟིང་གི་སྦྱིན་པ་གནང་མིན་དང་། ཐེག་ཆེན་ཐུན་མོང་དང་ཐུན་མོང་མ་ཡིན་པའི་བསླབ་པ་དག་ལ་སྦྱར་ནས་དཔྱད་ན་དཔྱད་གཞི་དུ་མ་སྣང་མོད་ཚུལ་དེ་དང་མཚུངས་པར་གང་ཞིག་སྔགས་ལ་སྤྱོད་པ་སྟེ། སྤྱིར་མནྟྲའི་སྒྲ་ཕྲལ་ན། མན་ཤེས་པ་དང་། ཏྲ་ཡ་སྐྱོབ་པ་ལ་འཇུག་པའི་ཕྱིར་ཡིད་ཤེས་བདེ་མྱུར་དུ་སྐྱོབ་པར་བྱེད་པས་ན་སྔགས་ཏེ། རྒྱུ་མཚན་འདིའི་དབང་གིས་འདུལ་བའི་གཞུང་དག་ལས་ཀྱང་ལས་བརྗོད་པ་ཁ་ཅིག་གི་མཇུག་ཏུ། དེ་ནི་དེ་ལ་སྔགས་སོ། །ཞེས་བྱ་བ་ལ་སོགས་པ་འབྱུང་བ་ཡིན་པས་ན་སྔགས་ཞེས་བྱ་བ་འདི་ཡང་སྒྲ་ཡངས་པ་ཞིག་མོད་དེ། འོན་ཀྱང་འདིར་རེ་ཞིག་མདོ་སྔགས་ཀྱི་ཟླས་ཕྱེ་བའི་སྔགས་ལ་སྤྱོད་པའི་གང་ཟག་དེ་ནི་གདན་གསུམ་ལྷ་ཡི་འཁོར་ལོ་ལས་ནམ་ཡང་མི་འདའ་བ་ཞིག་སྟེ། དེ་བས་ན་དེ་ཉིད་ཀྱི་ཉེར་སྤྱོད་ཀྱི་རྫས་དག་ཀྱང་ལྷག་པའི་ལྷའི་མཆོད་རྫས་བསྟན་སྲུང་དྲེགས་པའི་དཀོར་ཆ་འབའ་ཞིག་ལས་མ་འདས་པའི་ཕྱིར། རྣམ་པ་ཀུན་ཏུ་དེ་དག་ལ་དོགས་ཟོན་བགྱིད་ཅིང་བསྙེན་བཀུར་གྱི་ཡུལ་གཉེན་པོར་བརྩི་དགོས་རྒྱུ་ལ། གལ་ཏེ་རང་རྒྱུད་གཡོ་སྒྱུས་ཟིལ་གྱིས་ནོན་པའི་དབང་གིས་ཉེར་སྤྱད་དེ་དག་ལ་མ་འཛེམ་པར་སྤྱད་ན་ཅུང་ཟད་ཙམ་གྱིས་ཀྱང་ཚེ་འདིར་དཀོར་སྲུང་དམ་ཅན་རྣམས་ཀྱིས་བཀའ་ཆད་དྲག་པོ་འཕྲལ་དུ་ཕེབས་ཤིང་། ཕྱི་མར་དཀོར་སྒྲིབ་ཀྱིས་ངན་སོང་གི་སྡུག་བསྔལ་མུ་མེད་པ་ལ་སྤྱོད་དགོས་པའི་ཕྱིར་ལོག་པའི་ལྕི་བ་བཞི་བ་སྟེ། འདི་བཞིན་ཐུན་མོང་དུའང་ལྕི་བ་བཞི་ཞེས་གྲགས་པས་ན་ཅུང་ཟད་ཕྲལ་བ་ཡིན་ནོ། །དེ་བཞིན་དུ་ཉམས་པའི་ལྕི་བ་བཞི་ནི། མི་ཆོས་ཀྱི་མནའ་ཟོས་པ་ལྕི་ཞེས་པ་སྟེ། འདི་ནི་མིའི་ཆོས་ལུགས་ཉམས་པ་རྣམས་ཀྱི་ནང་ནས་ཤིན་ཏུ་ཐ་ཆད་པ་སྟེ། ཕྱི་མའི་སྡུག་བསྔལ་ཕར་ཞོག །རང་གི་གཉེན་ཚན་དུ་གྱུར་བ་དག་གིས་ཀྱང་། དེ་ལ་བློ་གཏད་ཀྱི་ཡུལ་མི་རྙེད་པས་འཇིག་རྟེན་གྱི་བྱ་བའི་རེ་ཐག་ཆད་པའི་ཕྱིར་རོ། །གཉིས་པ་ཉན་ཐོས་ཀྱི་ཁྲིམས་ཉམས་པ་ལྕི་ཞེས་པ་སྟེ། ཉན་ཐོས་དག་ནི་ཚུལ་ཁྲིམས་མ་ཉམས་ན། ཏིང་ངེ་འཛིན་དང་ཤེས་རབ་ལ་སོགས་པ་ཉམས་པ་ཙམ་གྱིས་རང་ཉིད་དགེ་ཚུལ་སློང་གི་རྟེན་གང་ཡིན་པའི་གནས་དེ་ལས་ཉམས་པར་བགྱིད་མི་ནུས་ལ། ཚུལ་ཁྲིམས་ཉམས་པ་ནི་རང་གི་གནས་ལས་ཉམས་པར་བགྱིད་པའི་སྐྱོན་ཆེ་ཤོས་ཡིན་ནོ། །གསུམ་པ་ནི། བྱང་སེམས་ཀྱི་བསླབ་པ་ཉམས་པ་ལྕི་ཞེས་པ་སྟེ། འདིས་ནི་སེམས་ཅན་ཐམས་ཅད་སྲིད་མཚོ་ལས་སྒྲོལ་བ་དམ་བཅས་པའི་ཕྱིར། གལ་ཏེ་དེ་ལྟར་བསྒྲུབ་པའི་བསླབ་པ་ཉམས་ན་སེམས་ཅན་ཐམས་ཅད་བསླུས་པར་འགྱུར་བའི་ཕྱིར་བྱང་ཆུབ་སེམས་དཔའ་རང་གི་གནས་ནས་ཉམས་པར་འགྱུར་བར་མ་ཟད་ཉེས་པ་གཞལ་དུ་མེད་པ་དང་ལྡན་པ་ཡིན་ནོ། །བཞི་བ་ནི་གསང་སྔགས་ཀྱི་དམ་ཚིག་ཉམས་པ་ལྕི་ཞེས་པ་སྟེ། གསང་སྔགས་ནི་ཁེ་ཉེན་ཆེ་བའི་རང་བཞིན་ཅན་གྱི་ཕྱིར་དམ་ཚིག་མ་ཉམས་ན་ཚེ་འདི་ལ་སོགས་པར་མགོན་པོ་རྡོ་རྗེ་འཆང་གི་གོ་འཕང་འཐོབ་པར་འགྱུར་ཞིང་། གལ་ཏེ་ཉམས་ན་མནར་མེད་པའི་སེམས་ཅན་རྡོ་རྗེའི་དམྱལ་བ་རང་ཉམས་སུ་མྱོང་བར་འགྱུར་བའི་ཕྱིར་དོན་ཆེན་པོ་བསྒྲུབ་པ་ལས་ཤིན་ཏུ་ཉམས་པར་གྱུར་པའོ། །དེ་དང་མཚུངས་པར་སྨོད་པའི་ལྕི་བ་བཞི་ནི། གཏི་མུག་གི་དབང་གིས་སྟོན་པའི་སྐུ་ལ་སྨད་པ་ལྕི། ང་རྒྱལ་གྱི་དབང་གིས་མཁས་པའི་ཡོན་ཏན་ལ་སྨད་པ་ལྕི། ཕྲག་དོག་གི་དབང་གིས་བདེན་པའི་ཚིག་ལ་སྨད་པ་ལྕི། ཕྱོགས་རིས་ཀྱི་དབང་གིས་ཆོས་ལ་དགག་སྒྲུབ་བགྱིས་པ་ལྕི་བ་སྟེ། དེ་དག་ཀྱང་ཉོན་མོངས་པ་དེ་དང་དེས་རང་ཉིད་ཟིལ་གྱིས་ནོན་པའི་དབང་གིས་ཕོ་རོལ་པོའི་ཡོན་ཏན་དེ་དག་ཡོད་བཞིན་དུ་མི་འདུག་གོ་ཞེས་སྨད་པ་དང་། ཕ་རོལ་པའི་ཚིག་བདེན་པར་རིགས་བཞིན་དུ་མི་བདེན་ནོ་ཞེས་སྨྲ་བ་དང་། རང་གི་ཆོས་ལ་གཞན་ལས་ལྷག་པའི་ཡོན་ཏན་མེད་ཀྱང་ཡོད་པར་སྒྲོ་བཏགས་ནས་སྒྲུབ་ཅིང་། གཞན་གྱིས་ཆོས་ལ་སྐྱོན་མེད་ཀྱང་ཡོད་པར་སྒྲོ་བཏགས་ཏེ་དགག་པར་བྱེད་པ་སྟེ། འདི་དག་ནི་ཉེས་པའི་ནང་ནས་ཀྱང་ཤིན་ཏུ་ལྕི་བར་གྱུར་པ་རྣམས་ཡིན་ནོ། །ཚུལ་དེ་དང་མཐུན་པར་བསྒྱུར་བའི་ལྕི་བ་བཞི་ནི། མཚམས་མེད་ལྔའི་ནང་ནས་སངས་རྒྱས་ཀྱི་སྐུ་ལ་ངན་སེམས་ཀྱིས་ཁྲག་འབྱིན་པ་ལྕི། མི་དགེ་བ་བཅུའི་ནང་ནས་ལོག་པར་ལྟ་བ་ལྕི། མཉམ་པའི་ཆོས་ལ་ཁྱད་དུ་གསོད་པ་ལྕི། རང་བཞིན་མེད་ལ་གལ་དུ་འཛུག་པ་ལྕི། ཞེས་པ་སྟེ། འདི་བཞི་ནི་ཚིག་སྒྲོམ་ཆེ་བའི་ཕྱིར། ཕྲལ་ན་མང་དུ་འབྱུང་བའི་ཕྱིར་མ་སྤྲོས་ལ། འོན་ཀྱང་ཕ་མ་བསད་པ་ལ་སོགས་པའང་སངས་རྒྱས་ལ་བརྟེན་ནས་བཤགས་སུ་ཡོད་ཀྱང་། དེ་ཉིད་ལ་གནོད་པའི་བསམ་སྦྱོར་བགྱིས་ན་བཤགས་ཡུལ་སྤངས་པའི་ཕྱིར་ལྕི་བ་དང་། མི་དགེ་བ་གཞན་ཡང་ལོག་ལྟ་དང་མི་ལྡན་ན་ཕྱི་བཞིན་དུ་འཆོས་པར་གཏུབ་མོད་དེ། གང་ཞིག་ལོག་པར་ལྟ་བ་དང་ལྡན་ཕྱིན་ཆད་ཕྱིར་འཆོས་པའི་རྟེན་འབྲེལ་ཚོགས་པའི་ཐབས་མེད་པ་དང་། ཕན་ཚུན་མཉམ་པ་གང་ཞིག་ལ་འདི་ནི་འདིའི་ནང་ནས་ཐ་ཆད་པའོ་ཟེར་བ་ལྟ་བུ་དང་། ཕ་རོལ་པོ་ལ་ཉེས་པ་བརྗོད་པའི་ས་བོན་གང་ཡང་མེད་བཞིན་འདིས་འདི་ལྟ་བུ་བགྱིས་སོ་ཞེས་ཆེད་དུ་གླེང་བར་བགྱིད་པ་རྣམས་ཏེ། འདི་དག་ཀྱང་སྐྱོན་གྱི་ཕྱོགས་མེད་པའི་ཆ་ཞིག་ལ་ཆེད་དུ་ཡོད་པར་སྒྲོ་བཏགས་ཤིང་། ཡོན་ཏན་གྱི་ཕྱོགས་ཡོད་པའི་ཆས་ཞིག་ལ་ཆེད་དུ་མེད་པར་སྐུར་བ་འདེབས་པ་ཞིག་ནི་དགོས་པར་སྣང་སྟེ། སྐུར་བའི་ལྕི་བ་ཞེས་དམིགས་ཀྱིས་བསལ་བའི་ཕྱིར་རོ། །དེ་ལྟར་ན་ལོག་པའི་ལྕི་བ་བཞི་དང་ཉམས་པའི་ལྕི་བ་བཞི་དང་སྨད་པའི་ལྕི་བ་བཞི་དང་། སྐུར་བའི་ལྕི་བ་བཞི་སྟེ། བཞི་ཚན་བཞི་བསྡོམ་པས་བཅུ་དྲུག་གོ །དེ་དག་ཀྱང་གོ་སླ་བའི་ཆེད་ཙམ་གཙོ་བོར་བཟུང་ནས་སེམས་ལ་གང་དྲན་ཤར་མར་སྤེལ་བ་ལས་ལུང་སྦྱོར་སོགས་ནི་རྒྱ་ཆེར་མ་སྤྲོས་སོ། །སྨྲས་པ། མཁས་པ་དགྱེས་པའི་ལེགས་བཤད་འགའ་མེད་ཀྱང་། །ཉེས་པ་འདི་འདྲར་དོགས་ཟོན་ཅི་དགོས་ཞེས། །རྒྱུ་འབྲས་ཁྱད་གསོད་ཧམ་རྒྱུག་མ་བགྱིས་པར། །རང་དང་རང་འདྲར་ཕན་ཕྱིར་འདི་བྲིས་སོ། །༈ ཡང་བཀའ་མའི་ཆོག་གྲྭ་དག་གི་འདོད་གསོལ་གྱི་ཚིག་རིས་ལས་དྲི་བ་ཕེབས་པར། དོན་འདི་ཉིད་ལ་རང་ཉིད་ཀྱང་ཤིན་ཏུ་དོན་གཉེར་དང་བརྗོད་འདོད་ཡོད་པར་མ་ཟད་རྡོ་རྗེའི་གནས་ཟབ་མོ་འདི་དག་ཚིག་ཙམ་དུ་བཞག་ནས་གསེར་དང་སོལ་བ་མཉམ་འགྲོགས་བགྱིད་པའི་གནས་ཚུལ་འདི་འདྲ་སེམས་ཀྱིས་མི་བཟོད་པའི་ཕྱིར། གཞུང་འདིའི་བཤད་པ་རྒྱས་པ་ཞིག་ཟུར་དུ་འདྲི་འདོད་ཡོད་ཕྱིར། སྐབས་འདིར་དྲི་བ་དངོས་ཀྱི་ལན་ཙམ་ལས་སྤྲོ་བར་མི་བྱ་སྟེ། དེ་ཡང་འདི་ལྟར་བདག་ཅག་གསང་སྔགས་རྡོ་རྗེ་ཐེག་པའི་དམ་ཚིག་ཟབ་མོས་རྒྱུད་རྡོ་རྗེ་བཞིའི་ངོ་བོར་སྡོམ་པར་བྱེད་པའི་ལམ། གསང་བའི་དཀྱིལ་འཁོར་གཉེན་པོ་འདི་ལ་མངོན་དུ་ཞུགས་ནས་རིག་པ་འཛིན་པའི་གོ་འཕང་ལ་དབང་བསྐུར་བ་ནོད་པ་རྣམས་ནི། དེང་ཕྱིན་ཆད་དབང་དུས་ཀྱི་དམ་ཚིག་རྣམས་མ་ཉམས་པར་བསྲུངས་ན་ནི་བཅད་པ་དང་གཏུབ་པ་ལ་སོགས་པའི་ངན་སོང་གི་སྡུག་བསྔལ་དག་ལུས་ལ་འབྱུང་བར་མི་འགྱུར་བ་ཞིག་སྟེ། དེ་སྐད་དུ་ཡང་སྒྱུ་འཕྲུལ་རྩ་རྒྱུད་ལས། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཞེས་པ་ལ་སོགས་པ་གསུངས་པའི་ཕྱིར་རོ། །འོན་ཏེ་དེ་ལྟར་ན་ཡང་ཐོག་མ་མེད་པའི་དུས་ནས་རང་རྒྱུད་དང་ལྷན་ཅིག་ཏུ་གནས་པ་ཤེས་བྱའི་སྒྲིབ་པ་དང་ཉོན་མོངས་པའི་སྒྲིབ་པ་ལ་སོགས་པའི་གྲིབ་མ་ཇི་སྙེད་མཆིས་པ་དང་། གྲོགས་དམ་ཉམས་གཞན་དང་འགྲོགས་པའི་ཟླས་ཉམས་ལྟ་བུའི་ཉམས་པའི་གྲིབ་མ་ཕོག་པས་མཚོན་སེམས་རྒྱུད་ལ་མཆོག་གི་རྟོགས་པ་ཁྱད་པར་ཅན་གསར་དུ་སྐྱེ་བ་ལ་བར་གཅོད་བགྱིད་ཅིང་། སྐྱེས་ཟིན་འགྲིབ་པར་བྱེད་པའི་ཉེས་པ་འདི་དང་ལྷན་ཅིག་ཏུ་འགྲོགས་པར་བགྱི་བའི་སྡུག་བསྔལ་འདི་ནི་ཤིན་ཏུ་མི་བཟད་པའི་ཕྱིར་བཟོད་མི་ནུས་པས་ན། དེང་དཔལ་ཆེན་པོ་སྐབས་བབས་ཀྱི་རིགས་ལྔ་གང་རུང་གི དོན་དམ་པའི་ཆོས་ཀྱི་སྐུ་དེ་བཞིན་ཉིད་དུ་གྱུར་པའི་ཕྱོགས་ཙམ་མཐོང་བས་སམ། ཡེ་ཤེས་སྒྱུ་མའི་སྐུ་ཏིང་ངེ་འཛིན་གྱི་ཡུལ་དུ་བྱས་ནས་དེ་ཡི་གནས་ཚུལ་ཡིད་ཀྱིས་ཕྱོགས་ཙམ་མཐོང་བའི་མོད་འདི་ལ། གོང་སྨྲོས་ཀྱི་ཉེས་པ་རྣམས་ནོངས་པར་མི་འགྱུར་བའི་དབྱིངས་སུ་འཚོ་བ་དང་དེ་ལྟར་སེམས་ལ་སྒྲིབ་པ་དག་ནས་རྟོགས་པ་སྐྱེས་པའི་གཟི་མདངས་སམ་མཚན་མ་ལུས་ཀྱི་ཡུལ་ལ་མངོན་སུམ་དུ་འཇུག་པར་གྱུར་པའི་མཐུས། ལུས་ཀྱང་མཚན་དཔེས་བརྒྱན་པའི་གཟུགས་སྐུ་ཉི་མ་སྟོང་ཕྲག་གི་འོད་ཟེར་གཅིག་ཏུ་བསྡོམས་པ་ལྟ་བུའི་སྐུར་མངོན་དུ་གྱུར་ནས། ཉི་མའི་འོད་ཀྱིས་མུན་པ་སེལ་བ་བཞིན་དུ་གཟུགས་སྐུ་དེ་ཉིད་ཀྱི་ངང་ནས་འགྲོ་བ་རྣམས་གང་ལ་གང་འདུལ་གྱི་སྤྲུལ་པ་སྣ་ཚོགས་འཇིག་རྟེན་གྱི་ཁམས་འདིར་རྒྱུན་མི་འཆད་པར་རྟག་ཏུ་འབྱུང་བ་དང་དེ་ལྟར་བདག་གི་ལུས་དག་སེམས་གསུམ་ལ་ཚེ་རབས་བརྒྱུད་མི་དགོས་པར་ད་ལྟའི་ཚེ་འདིར་དཔལ་ཆེན་པོའི་གསང་གསུམ་རྡོ་རྗེ་གསུམ་གྱི་རང་བཞིན་ཅན་གང་ཞིག་མངོན་པར་རབ་ཏུ་སྣང་ནས་ཡིད་ལ་གང་རེ་བའི་འདོད་དོན་གྱི་སྨོན་ཚིག་གོང་དུ་ཇི་ལྟར་གསོལ་བ་ཐམས་ཅད་སྒྲུབ་པའི་དུས་འདི་ཉིད་ལ་ཐོབ་པར་མཛད་དུ་གསོལ་ཞེས་པ་སྟེ་མདོ་ཙམ་སྨྲོས་ཟིན་ཏོ། །སྨྲས་པ། དྲི་ཚིག་སོར་མོས་དལ་གྱིས་བརྡུང་བ་ལས། །སྙན་སྙན་ཟབ་དགུའི་གདམས་པའི་སྒྲ་འབྱིན་པ། །འདི་ཀོ་བདག་བློའི་རིན་ཆེན་ཏམ་བུར་ར། །དེས་ན་དཔྱོད་ལྡན་སྒེག་མོའི་རྣ་བར་རློག །བསམ་ན་ཁོང་ནས་འཛུམ་བག་སྟོན་པའི་ཉམས། །བགྱིད་འདི་ཁེངས་དང་དྲེགས་པས་མ་ཡིན་ཏེ། །སྔོན་སྦྱངས་གློ་བ་དགའ་བའི་ངང་ཚུལ་དང་། །ཤེས་བྱའི་ལས་མོར་སྤྲོས་པའི་རྣམ་འགྱུར་ཡིན། །རང་གི་གདམས་པ་ཚད་མར་འཛིན་པ་ཙམ། །གསང་ཆེན་ལམ་གྱི་ཕྱག་ལེན་ཡིན་མོད་ཀྱང་། །རང་མིན་གཞན་ཀུན་ཡང་དག་མ་ཡིན་པར། །ལྟ་གང་འདོད་ལྷའི་ཉེ་རྒྱུ་མ་ཡིན་ནམ། གང་ཞིག་ངང་བས་ཆུ་དང་འོ་མ་ཟུང་། །སོ་སོར་འབྱེད་བཞིན་ཤེས་ལྡན་དེ་དག་ནི། །སྣ་ཚིགས་ཤེས་བྱའི་སྤྲོས་ཐག་རབ་ཆོད་ནས། །ལེགས་བཤད་གང་ཡིན་བརྩོན་པས་དང་ལེན་མཛོད། །འདིར་འབད་དགེ་བའང་ལྷ་ཡི་བདུད་རྩི་དང་། །ཟླ་བ་ཇི་བཞིན་སྲིད་པའི་ཁམས་འདི་ན། །ཉོན་མོངས་ནད་ཀུན་འཚོ་བའི་བྱེད་པོ་དང་། །ཐར་ལམ་གསལ་བའི་སྣང་བ་དམ་པར་ཤོག། ཅེས་པ་འདི་ཡང་ཤེས་བྱའི་གནས་ལ་དཔྱོད་པའི་བློ་གྲོས་ཀྱི་སྤྱན་དཀྱུས་རྣམ་པར་ཡངས་པ་ཨུ་རྒྱན་སྨིན་གྲོལ་གླིང་གི་གྲྭ་རིགས་འགྱུར་མེད་འགྲོ་མགོན་ནས་དྲི་བ་ཇི་ལྟར་ཕེབས་བཞིན། ༧ གྲུབ་དབང་རྫོགས་ཆེན་པ་ཡབ་སྲས་ཀྱི་ཞབས་པད་གཙུག་ཏུ་འཛིན་པའི་མདོ་ཁམས་ཀྱི་བནྡེ་གཞན་ཕན་མཐའ་ཡས་འོད་ཟེར་དུ་འབོད་པས། གཞུངས་ལུགས་ལེགས་བཤད་རྒྱ་མཚོའི་འབྱུང་གནས་འོག་མིན་ཨོ་རྒྱན་སྨིན་གྲོལ་གླིང་གི་བླ་བྲང་ཆོས་འཁོར་ལྷུན་པོ་ནས་ཤར་མར་སྤེལ་བ་མངྒ་ལམ།། །།