འཇུ་དབོན་སངས་རྒྱས་ཆོས་འཕེལ་ལ་དྲིས་ལེན་དུ་གནང་བ།
༄། །འཇུ་དབོན་སངས་རྒྱས་ཆོས་འཕེལ་ལ་དྲིས་ལེན་དུ་གནང་བ་བཞུགས་སོ། །ཀུན་མཁྱེན་རྒྱལ་བའི་བསྟན་པ་སྔ་འགྱུར་ལ། །རྙིང་མ་བ་ཞེས་གྲགས་པ་རྣམ་དཀར་པའི། །ལུགས་དེ་ལས་འཕྲོས་གཏམ་གྱི་སྦྱོར་བ་ནི། །འགའ་ཞིག་དྲིས་པའི་ལན་དུ་འདིར་སྤེལ་བྱ། །དེ་ལ་དྲི་བ་དང་པོ། གསང་སྔགས་རྙིང་མ་པ་ཞེས་པའི་ངེས་ཚིག་དང་གསང་བར་སྔགས་ལུགས་ཀྱི་རྒྱུ་མཚན་ཞེས་པ་ལ། སྤྱིར་སྔ་འགྱུར་རྙིང་མ་ཞེས་བྱ་བ་ནི། གསང་སྔགས་ཁོ་ནའི་སྒོ་ནས་བཞག་པར་བྱ་བའང་མ་ཡིན་ལ། རྒྱ་གར་འཕགས་པའི་ཡུལ་དུ་འདི་ལྟར་གསར་རྙིང་གི་བརྡ་ཆད་བཞག་པའང་མེད་མོད་དེ། གངས་རིའི་ལྗོངས་འདིར་རྒྱལ་པོ་གླང་དར་མས་རྒྱལ་བསྟན་དར་བ་ལ་བར་ཆད་བྱས་པའི་རྐྱེན་གྱིས་དེ་ལྟར་གྲགས་ཏེ། དེ་ཡང་རྒྱལ་པོ་ལྷ་ཐོ་ཐོ་རི་གཉན་བཙན་གྱི་སྐུ་རིང་ལ་དམ་པའི་ཆོས་ཀྱི་དབུ་བརྙེས་པ་ནས་མངའ་བདག་རལ་བ་ཅན་གྱི་བར་སྐྱིད་པའི་གདུང་རབ་བཅུ་གསུམ་གྱི་རིང་དང་། པཎྚི་ཏ་ལྷ་རིགས་པའི་སེངྒེ་ནས་སྨྲི་ཏི་ཛྙཱ་ན་ཀིརྟིའི་བར་དང་། ལོ་ཙཱ་བ་ཐུ་མི་སཾ་བྷོ་ཊ་ནས་རང་ཟོམ་ཆོས་བཟང་གི་བར་དུ་དམ་པའི་ཆོས་བསྒྱུར་རོ་ཅོག་རྣམས་སྔ་འགྱུར་རྙིང་མ་དང་། ཕྱིས་སུ་ལྷ་བླ་མ་ཡེ་ཤེས་འོད་ཀྱི་སྐུ་རིང་དུ་ལོ་ཙཱ་བ་རིན་བཟང་སོགས་རྒྱ་གར་དུ་བརྫངས་པ་དང་། ཇོ་བོ་རྗེ་བོད་དུ་ཕེབས་པ་ནས་དེ་ཕྱིན་གྱི་ཆོས་བསྒྱུར་པ་ཐམས་ཅད་ལ་ཕྱི་འགྱུར་གསར་མར་གྲགས་སོ། །དེས་ན་སྔ་འགྱུར་དེ་ལ་མདོ་སྔགས་ཀྱི་ཟླས་ཕྱེ་བའི་གསང་སྔགས་ལའང་རྒྱུད་སྡེ་དྲུག་གི་རྣམ་གཞག་ཡོད་པ་ཡིན་ནོ། །ཡང་གསང་སྔགས་ཀྱི་དོན་ལའང་ཚིག་ཟུར་གཉིས་ལས། དང་པོ་གསང་བ་ལའང་། རང་བཞིན་གྱིས་གསང་བ་དང། གབ་པའི་གསང་བ་དང་། སྦས་པའི་གསང་བ་དང་། མི་བསྟན་པའི་གསང་བ་སྟེ་དེ་བཞི། མི་བསྟན་པ་ལའང་། སྤྱི་གསང་བཞི། བར་གསང་བཞི། གསང་འོས་གཉེར་གཏད་གཉིས་ཏེ་བཅུ་ལ་སོགས་པ་དབྱེ་བསྡུ་རྣམ་པ་ཅི་རིགས་པ་ཡོད་ལ། ཚིག་ཟུར་གཉིས་པ་སྔགས་ཀྱི་དོན་ལའང་ངོ་བོའི་སྒོ་ནས་དབྱེ་བ་གསང་སྔགས། རིགས་སྔགས། གཟུང་སྔགས་དང་གསུམ། དེ་དག་རེ་རེར་ཡང་ངོ་བོ་དང། བྱེད་ལས་དང་། རྟགས་ཀྱི་སྒོ་ནས་དབྱེ་བ་གསུམ་གསུམ་དང་། བཟླས་པ་སྒོའི་སྒོ་ནས་དབྱེ་ན། རྒྱུ་མ་ནོར་བ་རྩ་བའི་སྔགས་དང་། བསྐྱེད་པ་རྐྱེན་གྱི་སྔགས་དང་། བཟླས་པ་ལས་ཀྱི་སྔགས་ཏེ་གསུམ་སོགས་དབྱེ་བསྡུ་ཅི་རིགས་པར་ཡོད་དོ། །སྔགས་རང་གི་སྒྲ་བཤད་ནི། མནྡྲ་ཞེས་པའི་སྒྲ་ལས་དྲངས་ན། མན་ཡིད་དང་། ཏྲ་ཡ་སྐྱོབ་པ་ལ་འཇུག་སྟེ། དེ་ལྟར་ན་ཡིད་ཀྱི་ཤེས་པ་གང་ཞིག་གིས་གདུང་བར་གྱུར་པ་ལས་དེ་མྱུར་དུ་སྐྱོབ་པར་བྱེད་པའི་ཐབས་ལ་འཇུག་གོ །འདི་ནི་འདུལ་བའི་འགྲེལ་བ་སོགས་ལས་དེ་ལ་ནི་སྔགས་སོ་ཞེས་པ་དང་། སྔགས་ཀྱི་བསད་པ་སོགས་ཀྱི་སྐབས་ཐབས་ཀྱི་སྦྱོར་བ་ཁོ་ན་ལ་བཤད་དོ། །དྲི་བ་གཉིས་པར། རྫོགས་པ་ཆེན་པོའི་རྫོགས་ལུགས། ཞེས་པ་ལ་སྤྱིར་རང་བཞིན་རྫོགས་པ་ཆེན་པོ་ཞེས་བྱ་བ་ནི། ཆོས་ཐམས་ཅད་ཀྱི་གནས་ལུགས་ལ་བྱ་སྟེ། དེ་ནི་སྟོང་བ་ཉིད་དང་། ཤེར་རབ་ཀྱི་ཕ་རོལ་དུ་ཕྱིན་པ་དང་། བདེ་གཤེགས་སྙིང་པོ་དང་། ཆོས་ཀྱི་དབྱིངས་སྤྲོས་པ་དང་བྲལ་བ་དང་། དོན་དམ་བདེན་པ་དང་། བྱང་ཆུབ་ཀྱི་སེམས་ལ་སོགས་པའི་སྒྲས་བསྟན་ཏེ། དེས་ན་དེའི་རང་བཞིན་དུ་འཁོར་འདས་ཀྱི་ཆོས་ཐམས་ཅད་ནམ་མཁའི་ངང་དུ་སྣོད་བཅུད་ཐམས་ཅད་རྫོགས་པ་ལྟར་རྫོགས་པའི་ཕྱིར་དང་། གནས་ལུགས་དེ་བསམ་གྱིས་མི་ཁྱབ་པ་ཡིན་པའི་ཕྱིར་ཆེན་པོའི་སྒྲས་བསྟན་ཅིང་། དེའི་ངོ་བོ་ལ་དབྱེ་བསྡུའི་རྣམ་པ་མི་དམིགས་ཀྱང་། བརྟེན་ཆོས་ལ་ལྟོས་ནས་སྒྲས་བརྗོད་རིགས་ཀྱི་སྒོ་ནས་དབྱེ་ན། གཞི་རྫོགས་པ་ཆེན་པོ་དང་། ལམ་རྫོགས་པ་ཆེན་པོ་དང་། འབྲས་བུ་རྫོགས་པ་ཆེན་པོ་དང་གསུམ་དུ་འགྱུར་ཏེ། དེ་ཡང་གཞི་རྫོགས་པ་ཆེན་པོའི་རང་བཞིན་དུ་ནི་ཕྱི་ནང་གི་ཆོས་ཐམས་ཅད་རྫོགས་སོ། །ལམ་རྫོགས་པ་ཆེན་པོའི་རང་བཞིན་དུ་ནི་ལམ་གྱིས་བསྡུས་པ་ཐེག་པ་རིམ་པ་དགུའི་ཆོས་ཐམས་ཅད་རྫོགས་སོ། །འབྲས་བུ་རྫོགས་པ་ཆེན་པོའི་རང་བཞིན་དུ་ནི་འབྲས་བུའི་ཡོན་ཏན་སྐུ་དང་ཡེ་ཤེས་ཐམས་ཅད་རྫོགས་སོ། །དེ་ལྟར་ན་དེ་ལྟ་བུའི་དོན་ཉིད་སྟོན་པའི་གཞུང་འཛིན་པའི་གང་ཟག་ལའང་། རྫོགས་ཆེན་པ་ཞེས་གྲགས་སོ། །དྲི་བ་གསུམ་པ། ཁྱད་ཆོས་དྲུག་ལྡན་གྱི་རྣམ་གྲངས་མདོར་བསྡུས་ཤིག་གསུངས་པར་ཞུ་ཞེས་པ་ལ། འདིར་ཁྱད་ཆོས་དྲུག་ལྡན། ཞེས་པ་ལ་དམིགས་པ་གཉིས་ལས། སྡོམ་གསུམ་གང་ཟག་རྒྱུད་གཅིག་ལ་མི་འགལ་བར་ཇི་ལྟར་བསྲུང་ཚུལ་ལས་དྲིས་པ་ཡིན་ན། དེ་ནི་སྡོམ་པ་གསུམ། རང་ལྡོག་མ་འདྲེས་པ། དགག་དགོས་ཡོངས་རྫོགས། ངོ་བོ་གནས་འགྱུར། ཡོན་ཏན་ཡར་ལྡན། གནད་ཀྱི་མི་འགལ། དུས་སྐབས་གཙོར་སྤྱད་རྣམས་ཡིན་ཞིང་འདིའི་རྣམ་བཞག་ཧ་ཅང་མང་བས་འདིར་མ་སྤྲོས་སོ། །གལ་ཏེ་མཐར་ཐུག་གི་གྲོལ་སའི་ཁྱད་ཆོས་དྲུག་ལ་དམིགས་པ་ཡིན་ན། དེ་ནི། གཞི་ལས་འཕགས་པ་དང་། རང་ངོར་སྣང་བ་དང་། བྱེ་བྲག་ཕྱེད་པ་དང་། ཕྱེད་ཐོག་དུ་གྲོལ་པ་དང་། གཞན་ལས་མ་བྱུང་བ་དང་། རང་སར་གནས་པ་སྟེ་དྲུག་ཡིན་ལ། འདིའི་རྣམ་དབྱེ་རྒྱས་པ་ཐེག་པའི་མཆོག་རིན་པོ་ཆེའི་མཛོད་ལས་ཤེས་པར་བྱ་ཞིང་། མདོར་བསྡུ་ན། ཀ་དག་དང་ལྷུན་གྲུབ་གཉིས་ལས། ཀ་དག་གི་ངོས་ནས་གཞལ་ན་གཞི་འབྲས་ལ་རྣམ་དབྱེ་མེད་པར་དགོངས་ནས། གྲོལ་ས་ཐོག་མ་གང་ཡིན་པའོ། །ཞེས་པ་ལ་སོགས་པ་གསུངས་པ་དང་། རང་སར་གནས་ཞེས་པ་གསུངས་ལ། ལྷུན་གྲུབ་ཀྱི་ཆ་ནས་ཐོག་མ་གཞིའི་ལྷུན་གྲུབ་ལ་འཁྲུལ་བ་འབྱུང་རུང་གོ་མ་འགག་པ་སྟེ་ལམ་གྱིས་སྦྱངས་ནས། མཐར་ཐུག་འབྲས་བུའི་ལྷུན་འགྲུབ་ལ་དེ་མི་སྲིད་པ་ཡིན་པའི་ཕྱིར་གཞི་ལས་འཕགས་ཞེས་པ་དང་། བྱེ་བྲག་ཕྱེད་ཅེས་པ་ལ་སོགས་པ་ཡིན་ནོ། །འདིར་སྨྲས་པ། གསང་སྔགས་དོན་གྱིས་གཞི་རྒྱུད་ལ་འཇུག་ཅིང་། རྫོགས་པ་ཆེན་པོས་ལམ་གྱི་ཉམས་ལེན་བསྟན། །འབྲས་བུའི་གྲོལ་ས་ཁྱད་ཆོས་དྲུག་ལྡན་གྱིས། །ཚུལ་དེས་གཞི་ལམ་འབྲས་གསུམ་མཐར་ཕྱིན་ཤོག། ཅེས་པའང་དད་དམ་བརྩོན་པའི་ནོར་གྱིས་ཕྱུག་པ་འཇུ་དབོན་སངས་རྒྱས་ཆོས་འཕེལ་ནས་ལྷ་རྫས་ཀྱི་སྐྱེས་བཅས་དྲི་བ་ཇི་ལྟར་ཕེབས་པ་རྣམས་ཀྱི་ལན་མི་ལྡོག་ཙམ་དུ་རྒྱལ་སྲས་གཞན་ཕན་མཐའ་ཡས་སུ་འབོད་པས་ཤར་མར་སྤེལ་བ་མངྒ་ལམ།། །།