བླ་མ་དམ་པ་དམ་ཆོས་ལྷུན་འགྲུབ་ཀྱི་དྲིས་ལན་བསྙེན་པའི་གསལ་བྱེད།

༄། །བླ་མ་དམ་པ་དམ་ཆོས་ལྷུན་འགྲུབ་ཀྱི་དྲིས་ལན་བསྙེན་པའི་གསལ་བྱེད་ཅེས་བྱ་བ་བཞུགས། །དྲི་མེད་རྒྱུད་སྡེའི་དགོངས་པ་ཇི་བཞིན་དུ། །རྟོགས་ནས་རིམ་གཉིས་ལམ་གྱིས་རྡོ་རྗེ་འཆང་། །མངོན་དུ་བྱས་པའི་རིག་པ་འཛིན་རྣམས་ལ། །སྙིང་ནས་འདུད་དོ་བདག་རྒྱུད་བྱིན་གྱིས་རློབས། །འདིར་དམ་པ་མཆོག་ནས་བཀའ་ཕེབས་གནང་དོན་རྣམས་རིམ་བཞིན་ཞུ་བ་ལ། ཐོག་མར་གསུང་ཤོག་ལས། འདིར་དབེན་མཚམས་ཞིག་ཏུ་སྙིང་པོའི་སྒྲུབ་པ་ལ་བརྩོན་སྟངས་བྱས་ཡོད་པས། དེ་ལ་ཕན་པའི་གདམས་ངག་ཐུན་དང་ཐུན་མཚམས་གཉིས་ལས། ཐུན་དངོས་ལ་སྔོན་འགྲོ་རྣམས་སོང་རྗེས་དངོས་གཞི་དེ་ཏིང་ལ་ངེས་པ་གཏིང་ནས་ཚུགས་ཐུབ་པའི་ཡན་ལག་མེད་དུ་མི་རུང་བ་རྣམས་དཔེ་ཆ་གཞན་ལ་ལྟོས་མི་དགོས་པའི་གེགས་སེལ་བོགས་འདོན་གནད་དུ་འགྲོ་བ་ཞིག་ཕྱག་བྲིས་མཛད་ནས་གནང་བ་ཐུབ་པ་ཞིག་ཞུ། ཞེས་ཕེབས་པར། སྤྱིར་བཏང་གསང་ཆེན་རྡོ་རྗེ་ཐེག་པའི་ལམ་མཐའ་དག་དབང་བཞིའི་ལམ་རིམ་བསྐྱེད་རྫོགས་ཡན་ལག་བཞི་བསྙེན་སྒྲུབ་བཞིའི་ཆིངས་ཀྱིས་བཅིངས་ནས་ཉམས་སུ་ལེན་པ་འདིར་འདུ་ཞིང་། དེའི་ཚུལ་རྒྱུད་སྡེ་ལས་གསུངས་པ་ལྟར་བརྗོད་ན། སོ་སོའི་སྐྱེ་བོའི་ས་ནས་རྫོགས་པའི་སངས་རྒྱས་ཀྱི་སའི་བར་བསྙེན་སྒྲུབ་བཞིས་བསྒྲོད་པའི་དབང་དུ་བྱས་ཏེ། དེའི་ཡན་ལག་བཞི་པོ་རེ་རེར་ཡང་བསྙེན་པའི་བསྙེན་པ་ལ་སོགས་བཞི་བཞིར་དབྱེ་བས་ནང་བསེས་ཀྱི་ཡན་ལག་བཅུ་དྲུག་ཏུ་གསུངས་ཤིང་། དེ་ཡང་ཚོགས་སྦྱོར་གྱི་ལམ་གཉིས་བསྙེན་པའི་ཡན་ལག་བཞིས་བསྒྲོད་པ་དང་། མཐོང་ལམ་ཉེ་བསྙེན་གྱི་ཡན་ལག་བཞིས་བསྒྲོད་པ་དང་། སྒོམ་ལམ་སྒྲུབ་པའི་ཡན་ལག་བཞིས་བསྒྲོད་པ་དང་། མི་སློབ་པའི་ལམ་སྒྲུབ་པ་ཆེན་པོའི་ཡན་ལག་བཞིས་མངོན་དུ་བྱེད་པའི་དགོངས་པའོ། །དེ་ལ་འདིར་བསྙེན་སྒྲུབ་དང་པོའི་ཡན་ལག་ཅུང་ཟད་སྨོས་པ་ལ། སློབ་དཔོན་ཆེན་པོའི་མན་ངག་ལྟ་བའི་ཕྲེང་བ་ལས། བསྙེན་པ་ནི་བྱང་ཆུབ་ཀྱི་སེམས་པའོ། །ཉེ་བར་བསྙེན་པ་ནི་བདག་ཉིད་ལྷར་ཤེས་པའོ། །སྒྲུབ་པ་ནི་ཡུམ་བསྐྱེད་པའོ། །སྒྲུབ་པ་ཆེན་པོ་ནི་ཐབས་དང་ཤེས་རབ་ཟུང་དུ་འཇུག་པའོ། །ཞེས་གསུངས་པའི་དོན། དཔལ་སྒྱུ་འཕྲུལ་དྲྭ་བ་ཆེན་པོ་དང་། ཧེ་རུ་ཀའི་གལ་བོ་ལས་ཇི་ལྟར་གསུངས་པ་བཞིན་འཆད་པ་ལ། བསྐྱེད་རྫོགས་ཀྱི་རིམ་པ་གཉིས་ལས། དང་པོ་ལའང་། སྟོང་པ་ཆེན་པོའི་རྣལ་འབྱོར། སྙིང་རྗེ་སྒྱུ་མའི་རྣལ་འབྱོར། ཕྱག་རྒྱ་གཅིག་པའི་རྣལ་འབྱོར། ཕྱག་རྒྱ་སྤྲོས་བཅས་ཀྱི་རྣལ་འབྱོར། ཚོམ་བུ་ཚོགས་སྒྲུབ་ཀྱི་རྣལ་འབྱོར་ཏེ། ཟག་བཅས་ཀྱི་ལམ་ལྔའི་རྣལ་འབྱོར་ལྔར་གྲགས་པ་ལས། དང་པོ་སྟོང་ཆེན་ནམ་དེ་བཞིན་ཉིད་ཀྱི་ཏིང་ངེ་འཛིན་དང་། གཉིས་པ་སྙིང་རྗེ་སྒྱུ་མའམ་ཀུན་སྣང་གི་ཏིང་འཛིན་ཏེ། དེ་གཉིས་རིམ་པ་བཞིན་དོན་དམ་པ་དང་ཀུན་རྫོབ་བྱང་ཆུབ་ཀྱི་སེམས་བསྒོམ་པའི་རིམ་པ་སྒྱུ་འཕྲུལ་རྩ་རྒྱུད་ལེའུ་གཉིས་པས་བསྟན་དོན་དེ་ཡིན་ཞིང་། དེའི་སྟེང་ཕྱག་རྒྱ་གཅིག་པ་ལ་ཕྲ་རགས་གཉིས་སུ་དབྱེ་བའི་ཕྲ་བ་ཡིག་འབྲུ་ལ་བསླབ་པའམ་རྒྱུའི་ཏིང་ངེ་འཛིན་དུ་གྲགས་པ་དེ་བསྣན་པས་ཏིང་འཛིན་རྣམ་གསུམ་ཞེས་ཟེར་ཞིང་རིམ་པ་ལྟར་སྟོང་བ་ཉིད་ཀྱི་ཏིང་ངེ་འཛིན་དང་། སྨོན་པ་མེད་པའི་ཏིང་ངེ་འཛིན་དང་། མཚན་མ་མེད་པའི་ཏིང་ངེ་འཛིན་ཏེ་རྣམ་པར་ཐར་བའི་སྒོ་གསུམ་དུའང་འགྱུར་རོ། །གཞན་དུ་རྡོ་རྗེ་ལྟ་བུ་དང། དཔའ་བར་འགྲོ་བ་དང་། སྒྱུ་མ་ལྟ་བུའི་ཏིང་ངེ་འཛིན་གསུམ་དུ་ཡང་བཤད་དོ། །སྒྱུ་འཕྲུལ་ལས་ནི་ཐབས་ལས་ཐབས་བྱུང་ཐབས་བསམ་ཡས། ཞེས་པའི་སྐབས་ཀྱི་ཐབས་དང་པོ་རྒྱུའམ་རྩ་བའི་ཐབས་ཞེས་བྱ་བ་དེ་ཡིན་ཞིང་། འདི་རྣམས་དཔལ་ཧེ་རུ་ཀ་མངོན་པར་འབྱུང་པའི་རྒྱུད་ལས། སྦྱོར་བ་ཡན་ལག་དྲུག་གིས་བསྙེན། ཞེས་བསྙེན་པའི་ཡན་ལག་ཏུ་བསྡུས་པ་དེ་ཡིན་ལ། དེ་བཞིན་དུ་ཕྱག་རྒྱ་གཅིག་པ་རགས་པ་ལྷ་སྐུ་ལ་བསླབ་པ་དེ་བདག་ཉིད་ལྷ་རུ་ཤེས་པ་སྟེ་ཉེ་བསྙེན་དང་། ཕྱག་རྒྱ་སྤྲོས་བཅས་ཀྱི་སྦྱོར་བར་ཡུམ་བསྐྱེད་པ་དེ་སྒྲུབ་པ་དང་། སྤྲོས་བཅས་དངོས་གཞི་དང་འབྲེལ་བའི་ཚོགས་སྒྲུབ་ནི་སྒྲུབ་ཆེན་ཏེ། རིམ་པ་བཞིན། ཚོགས་ལམ་ཆུང་འབྲིང་ཆེ་གསུམ་དང་། སྦྱོར་ལམ་སྟེ་ཟག་བཅས་ཀྱི་ལམ་བཞི་བོའི་མངོན་རྟོགས་ཡིན་པའང་ཤེས་པར་བྱའོ། །འདིར་ཟག་མེད་རིག་འཛིན་གྱི་གོ་འཕང་མངོན་དུ་སྒྲུབ་པ་ལ་ནི་གསང་དབང་དང་ཤེར་དབང་གི་ལམ་གྱིས་བསྡུས་པའི་རྫོགས་རིམ་དག་སྐབས་དེ་དང་དེར་འབྲེལ་དགོས་པའང་ཤེས་པར་བྱའོ། །དེ་ལྟར་ན་ཚོགས་ལམ་ཆུང་ངུའི་མངོན་པར་རྟོགས་པ་སྟོང་ཆེན་སོགས་ཏིང་འཛིན་རྣམ་པ་གསུམ་པོ་དེ་སྦྱོར་བ་ཡན་ལག་དྲུག་གི་སྒོ་ནས་ཉམས་སུ་ལེན་པའི་ཚུལ་རྣམས་འདིར་བརྗོད་པ་ལ། སྤྱིར་བཏང་དཔལ་དུས་ཀྱི་འཁོར་ལོ་ལ་སོགས་པའི་རྒྱུད་སྡེ་ཁ་ཅིག་ལས་ནི་སྦྱོར་བ་ཡན་ལག་དྲུག་ཀ་རྫོགས་རིམ་དང་སྦྱར་ནས་བཤད། རྒྱུད་སྡེ་ཁ་ཅིག་ལས་ནི་བསྐྱེད་རྫོགས་ཕྱེད་མར་བཤད། ཡང་རྒྱུད་སྡེ་ཁ་ཅིག་ལས་ནི་བསྐྱེད་རྫོགས་ཇི་རིགས་སུ་བཤད་པའང་ཡོད་མོད་དེ། འདིར་བསྐྱེད་རིམ་ཁོ་ནའི་དབང་དུ་བྱས་ཏེ་བརྗོད་པ་ལ། དཔལ་ཧེ་རུ་ཀ་གལ་བོ་ལས། སོ་སོར་སྤོང་བ་འདོད་ཡོན་ལྔ། །མི་རྟོག་རིག་ལྔ་དོན་དམ་མཆོག

བསམ་གཏན་རྟོག་དཔྱོད་སྐུ་གསུང་ཐུགས། དགའ་བ་སྐྱེ་ཞིང་བདེ་བ་འབྱུང་། །དབུག་དགག་འབྱུང་བའི་ཡེ་ཤེས་ལྔ། །རིན་ཆེན་ཡིག་འབྲུ་སྣ་རྩེར་སྤྲོས། །སེམས་གཟུང་རང་སྔགས་སྙིང་ག་རུ། །ཡིག་འབྲུ་ཕྱག་མཚན་མི་སྤྲོ་བཟུང་། །རྗེས་དྲན་ལོ་ཟླར་རྩེ་གཅིག་འབད། །སྨིག་རྒྱུ་དུ་སྲིན་མེ་སྤྲིན་མཁའ། །ཏིང་འཛིན་ཕྱི་ནང་གོང་བུར་བྱས། །བདག་ཉིད་ལྷ་རུ་སྒོམ་པ་ཡིན། །སྦྱོར་བ་ཡན་ལག་དྲུག་གིས་བསྙེན། །ཞེས་གསུངས་ཏེ། དེ་ཡང་ཚིགས་བཅད་རྐང་བ་གཉིས་གཉིས་ཀྱིས་རིམ་པ་ལྟར། སོར་སྡུད་དང་། བསམ་གཏན། སྲོག་རྩོལ་དང་འཛིན་པ། རྗེས་དྲན་དང་ཏིང་འཛིན་ཏེ་སྦྱོར་བ་ཡན་ལག་དྲུག་པོ་བསྟན་ནས་རྐང་བ་ཐ་མས་མཇུག་སྡུད་དང་དེ་ཡང་བསྙེན་པའི་ཡན་ལག་ཡིན་པར་ཞར་གྱིས་བསྟན་ཏོ། །དེ་ལྟར་ན་སོར་སྡུད་སྟོན་པའི་རྐང་བ་གཉིས་ཀྱིས་དེ་ཏིང་སྒོམ་པའི་རིམ་པ་བསྟན་ཅིང་། དེ་བཞིན་དུ་བསམ་གཏན་སྟོན་པའི་རྐང་བ་གཉིས་ཀྱིས་ཀུན་སྣང་དང་། སྲོག་འཛིན་གཉིས་སྟོན་པའི་རྐང་བ་བཞིས་རྒྱུ་ཏིང་དང་། རྗེས་དྲན་སྟོན་པའི་རྐང་བ་གཉིས་ཀྱིས་དེ་ལྟར་བསྒོམས་པའི་ནང་གི་རྟགས་མཚན་དང་ཏིང་འཛིན་སྟོན་པའི་རྐང་བ་གཉིས་ཀྱིས་དེའི་རྗེས་སུ་ཕྱི་མ་ཕྱག་རྒྱ་གཅིག་པའི་ལྷ་སྐུ་དང་མཚམས་སྦྱོར་ཚུལ་རྣམས་རིམ་བཞིན་བསྟན་པའི་དང་པོ། དེ་བཞིན་ཉིད་ཀྱི་ཏིང་ངེ་འཛིན་སོ་སོར་སྤོང་བའམ་སོ་སོར་སྡུད་པའི་དོན་ཅན་དེ་ཐོག་མར་འཆད་པ་ལ། སྦྱོར་བ་ཉན་རང་གི་ཐེག་པ་དང་ཐུན་མོང་བའི་སྐྱབས་སུ་འགྲོ་བ་དང་། རྒྱུའི་ཐེག་ཆེན་དང་ཐུན་མོང་བ་སེམས་བསྐྱེད་པ་དང་། རྡོ་རྗེའི་ཐེག་པའི་ཐུན་མོང་མ་ཡིན་པ་བླ་མ་རྡོ་རྗེ་སེམས་དཔའི་རྣལ་འབྱོར་ཏེ། དེ་རྣམས་སྔོན་དུ་འགྲོ་བས་རྡོ་རྗེ་སེམས་དཔའི་བསྒོམ་བཟླས་དེ་ཉིད་དང་རྗེས་སུ་འབྲེལ་བའི་ཏིང་ངེ་འཛིན་གྱིས་དབང་བཞི་བླང་རྗེས་རྡོར་སེམས་འོད་དུ་ཞུ་ནས་རང་གི་སྒོ་གསུམ་དང་དབྱེར་མེད་དུ་གྱུར་པར་བསམ་པའི་ངང་ལ་དབང་དོན་གྱི་ལྟ་བ་སྐྱོང་བ་སྟེ། དེ་ཡང་རྒྱུ་དུས་སུ་བླ་མས་ངོ་སྤྲད་པའི་འཁོར་འདས་དབྱེར་མེད་ཀྱི་ལྟ་བའམ། ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བ་ཞེས་བྱ་བ་དེ་ཉིད་གསལ་བཏབས་ཏེ། དེའི་དོན་ལ་མཉམ་པར་འཇོག་པ་ནི་དེ་བཞིན་ཉིད་ཀྱི་ཏིང་ངེ་འཛིན་ནོ། །དེའི་ངོ་བོ་ཡང་གཟུགས་ལ་སོགས་པ་འདོད་པའི་ཡོན་ཏན་ལྔ་བོ་དག་ལ་སོ་སོའི་མཚན་མ་བཟུངས་ནས་དེ་དང་དེར་བདེན་པར་མི་རྟོག་པར། ཀུན་རྫོབ་ཏུ་དེ་བཞིན་གཤེགས་པའི་རིགས་ལྔའི་རང་བཞིན་དང་། དོན་དམ་པར་ཡིད་བྱེད་ཐམས་ཅད་དང་བྲལ་བའི་བློ་འདས་སུ་སེམས་སྡུད་པའི་མཚན་ཉིད་ཅན། སྣང་བཅས་རྣམ་ཀུན་མཆོག་ལྡན་གྱི་སྟོང་བ་ཉིད་སྒོམ་པ་སྟེ། འདིར་རྣམ་པ་ནི་ཀ་བུམ་ལ་སོགས་པའི་རྣམ་པ་ཡིན་ཞིང་། དེ་ཀུན་གྱི་མཆོག་ཏུ་གྱུར་པ་ནི། དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་སྟེ། དེ་ཉིད་སྟོང་གཞིར་བྱས་པའི་སྟོང་ཉིད་ནི་རྣམ་པ་ཀུན་གྱི་མཆོག་དང་ལྡན་པའི་སྟོང་བ་ཉིད་དོ། །དེ་ལྟ་བུའི་སྟོང་ཉིད་དེ་ནི་སྣང་བཅས་ཀྱི་སྟོང་པ་ཉིད་ཡིན་པའང་ཤེས་པར་བྱའོ། །འདི་དག་ཚིག་གིས་གསལ་འདེབས་པར་སྤྲོ་ན། སྒྱུ་འཕྲུལ་རྩ་རྒྱུད་ལས། ཨེ་མ་ཧོ་རྡོ་རྗེ་ཕུང་བོའི་ཡན་ལག་ནི་སོགས་ནས། །སངས་རྒྱས་ཉིད་ཀྱིས་མི་བརྙེས་སོ། །ཞེས་པའི་བར་གྱིས་ལྷག་པ་ཀུན་རྫོབ་ཀྱི་བདེན་པ་དང་། ཀྱེ་མ་ཧོ་ཕྱོགས་བཅུ་སྟོང་ཁམས་ཡེ་ནས་དབེན། །ཞེས་པ་ནས། བཙལ་ཀྱང་རྒྱལ་བས་མི་བརྙེས་སོ། །ཞེས་པའི་བར་ཀྱིས་ལྷག་པ་དོན་དམ་པའི་བདེན་པ་དང་། ཨེ་མ་ཧོ་ངོ་མཚར་རྨད་ཀྱི་ཆོས། །ཞེས་པ་ནས། །འགྲོ་འོང་ཉིད་ན་འགྲོ་འོང་མེད། །ཅེས་པའི་བར་གྱིས་ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བ་ཉིད་གསལ་འདེབས་པར་བྱ་ཞིང་། གལ་ཏེ་ཆེས་ཉུང་བར་འདོད་ན་ཆེད་དུ་བརྗོད་པ་སྔ་མ་གཉིས་ཀའི་དོད་དུ། སློབ་དཔོན་སངས་རྒྱས་གསང་བས་ཞི་བའི་ཆོ་ག་རིན་པོ་ཆེའི་དྲྭ་བར་གསུངས་པ་ལྟར། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་དེ། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་གསུངས་པ་དེ་ཙམ་ཞིག་བརྗོད་པར་བྱའོ། །འདིར་ཡི་གེའི་འབྲུ་དོན་མཐའ་དག་ཞིབ་ཆར་འདྲི་མ་ནུས་པས་མཁྱེན་པར་འདོད་ཚེ་རྒྱུད་འགྲེལ་དུ་གཟིགས་མཛོད། དེ་ལྟར་སྒོམ་པ་ཉིད་སྦྱང་གཞི་སོགས་དང་སྦྱར་ན། མར་སྐྱེ་བ་དང་བར་དོའི་སྔ་ལོག་ཏུ་འབྱུང་བའི་འཆི་སྲིད་དག་པར་བྱེད་ཅིང་། ཡར་སངས་རྒྱས་ཆོས་ཀྱི་སྐུའི་ཡོན་ཏན་མ་ལུས་པ་རྫོགས་པའི་གཞི་འདིང་བར་བྱེད། རྫོགས་རིམ་གྱི་དུས་སུ་སེམས་དབེན་དང་འོད་གསལ་མྱུར་དུ་འགྲུབ་པའི་སྨིན་བྱེད་དུ་འགྱུར་ཞིང་། དེའི་རྗེས་ཐོབ་ཏུ་ཡང་སྟོང་ཆེན་དེ་ཉིད་ལམ་དུ་བྱེད་པ་ལ་ཤེས་རབ་དང་མཐུན་པའི་སྤྱོད་པ་ཞེས་བྱའོ། །དེ་ལྟར་དེ་ཏིང་སྒོམ་པ་ལ་ལུང་གི་སྦྱོར་བ་ཡང་མང་དུ་མཆིས་མོད་དེ་མ་སྤྲོས་སོ། །དེ་ནས་འགྲོ་བ་གཞན་མཐའ་དག་ཀྱང་གདོད་ནས་སྐུ་གསུང་ཐུགས་སུ་རྣམ་པར་དག་པའི་ཚུལ་ལ་ཡང་དག་པར་རྟོག་ཅིང་དཔྱད་པ་ལ་ཞུགས་ཏེ། དེ་ལྟར་མ་རྟོགས་པ་ལ་དམིགས་མེད་ཀྱི་སྙིང་རྗེ་ཆེན་པོ་སྒོམ་པ་ནི་སྙིང་རྗེ་ཀུན་སྣང་གི་ཏིང་ངེ་འཛིན་ཏེ་འགྲོ་བའི་སྣང་ཚུལ་སྨོན་པ་མེད་པ་ལ་དམིགས་པའི་ཏིང་ངེ་འཛིན་ཡང་ཡིན་ནོ། །དེ་ལྟར་བསྒོམས་པས་བསམ་གཏན་གྱི་ཡན་ལག་དགའ་བདེ་སོགས་ཀྱང་རིམ་བཞིན་འགྲུབ་པར་འགྱུར་བ་ཡིན་ནོ། །འདིར་ཡང་ཚིག་གིས་གསལ་གདབ་པ་ནི། སྒྱུ་འཕྲུལ་ལས། ཨེ་མ་ཧོ། ཡེ་ནས་གསང་བའི་ཆོས། ཞེས་སོགས་ཤོ་ལོ་ཀ་གཅིག་དང་། ཨེ་མ་ཧོ་བདེ་གཤེགས་སྙིང་པོ་ལས། ཞེས་པ་ནས། བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པའི་བར་གྱིས་ཆེད་དུ་བརྗོད་པ་གཉིས་པོ་བརྗོད་པའམ། ཡང་ན་རིན་ཆེན་དྲྭ་བ་ལས། དེ་བཞིན་ཉིད་ནི་སྤྲོས་མེད་ཀྱང་། །རང་བཞིན་ཀུན་ཏུ་སྣང་བའི་དབྱིངས། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་སྒོམ། །ཞེས་པ་ལྟ་བུ་ཇི་རིགས་བརྗོད་པར་བྱའོ། །དེས་མར་བར་སྲིད་དག་པར་བྱེད་ཅིང་། ཡར་སངས་རྒྱས་ལོངས་སྐུའི་ཡོན་ཏན་རྫོགས་པའི་གཞི་འདིང་། རྫོགས་རིམ་ཀྱི་དུས་སུ་དག་དབེན་རྡོ་རྗེའི་བཟླས་པ་དང་། སྒྱུ་ལུས་དང་ཟུང་འཇུག་གི་སྐུར་ལྡང་བའི་འཕེན་པ་དག་གི་སྨིན་བྱེད་དུ་འགྱུར་ཞིང་། རྗེས་ཐོབ་ཏུ་ཡང་སྙིང་རྗེས་སྒྱུ་མའི་རྣལ་འབྱོར་དེ་ཉིད་ལམ་དུ་བྱེད་པ་ལ་ཐབས་དང་མཐུན་པའི་སྤྱོད་པ་ཞེས་བྱའོ། །དེ་ལྟར་སྙིང་རྗེ་ཆེན་པོ་བསྒོམས་པའི་རྐྱེན་གྱིས་རང་གི་སྙིང་གར་སོ་སོ་རང་གི་རིག་པའི་ཡེ་ཤེས་ཉིད་ཡི་གེ་ཨ་དཀར་པོ་ལ་སོགས་པའི་རྣམ་པར་བསྒོམས་པ་ལ་རླུང་སེམས་འཇུག་པ་གཅིག་པའི་གནད་ཀྱིས་འབྱུང་བ་ལྔའི་རླུང་ཡེ་ཤེས་ལྔ་ཡི་འོད་ཟེར་ཀུན་ཏུ་འཕྲོ་བཞིན་པར་བསྒོམ། དེ་ནས་དབུག་འགྲོ་འོང་གི་རྟ་ལ་བསྐྱོན་ཏེ་སྙིང་རིན་པོ་ཆེའི་གོ་སར་གནས་པའི་ཡིག་འབྲུ་ལས་ཐོག་མར་དབྱངས་ཀྱི་ཡི་གེ་གྲངས་མེད་པ་གདོང་གི་སྣ་རྩེར་འཕྲོས། དེ་ལས་ཀྱང་འཇིག་རྟེན་གྱི་ཁམས་ཐམས་ཅད་ཁྱབ་པར་སྤྲོ། སླར་ཡང་སྤྲོ་གཞིའི་ཡི་གེ་ལ་སེམས་བཟུང་བས། རང་ཉིད་ལས་འཕྲོས་པའི་སྔགས་ཀྱི་ཡི་གེ་ཐམས་ཅད་སྙིང་ག་རུ་ཚུར་འདུས་ཏེ་ཡིག་འབྲུས་མཚན་པའི་ཕྱག་མཚན་ལ་སེམས་རྩེ་གཅིག་ཏུ་འཛིན་པ་སྟེ་གསལ་བྱེད་ཀྱི་ཡི་གེའི་སྤྲོ་བསྡུའང་དེ་བཞིན་དུ་བྱའོ། །འདི་དབུག་དགག་སྟེ་སྲོག་རྩོལ་དང་། སེམས་བཟུང་སྟེ་འཛིན་པའི་ཡན་ལག་རྒྱུའི་ཏིང་ངེ་འཛིན་སྒོམ་པའི་རིམ་པ་སྟེ། དེ་དག་ཀྱང་ཚིག་གིས་གསལ་འདེབས་ན། སྒྱུ་འཕྲུལ་ལས། ཨ་རབ་ཏུ་བརྟན་གྱུར་ཨ་དཀར་ལས། །སོགས་ནས་བརྟན་འབྱུང་ཡེ་ཤེས་རྒྱུ་ཡིན་ནོ། །ཞེས་པའི་བར་དུ་བརྗོད། དེ་ནས་རྗེས་དྲན་ནི། དེ་ལྟར་ལོ་དང་ཟླ་བའི་བར་དུ་སེམས་རྩེ་གཅིག་པས་བསྒོམ་པ་ལ་བརྟེན་ནས་འབྱུང་ལྔའི་རླུང་རང་གནས་སུ་ཟིན་པའི་རྟགས། སྨིག་སྒྱུ་དང་། དུ་བ་དང་། སྲིན་བུ་མེ་ཁྱེར་དང་། མར་མེ་དང་། སྤྲིན་མེད་ཀྱི་ནམ་མཁའ་ལྟ་བུའི་རྟགས་རྣམས་རིམ་བཞིན་འབྱུང་བའོ། །ཏིང་ངེ་འཛིན་ནི། སླར་ཡང་ཐུགས་སྲོག་ལ་སེམས་རྩེ་གཅིག་ཏུ་བཟུང་བ་ལས། སྣོད་བཅུད་ཐམས་ཅད་ཡེ་ཤེས་ལྔ་ཡི་འོད་ཟེར་དང་ཡི་གེའི་རྣམ་པ་འོད་དུ་ཞུ་སྟེ་རྩ་བའི་ཡི་གེར་འདུས་པས་འོད་ཀྱི་གོང་བུར་གྱུར་པ་ལ་སེམས་མཉམ་པར་འཇོག་པ་སྟེ། འདི་ནི་སྣང་སྟོང་གཉིས་སུ་མེད་པ་དོན་དམ་པའི་ལྷ་སྒོམ་པ་ཉིད་ཡིན་ཏེ། དངོས་པོའི་མཚན་མ་རྣམ་པར་གཞིག་པའི་རྒྱུ་མཚན་གྱིས་མཚན་མ་མེད་པའི་ཏིང་ངེ་འཛིན་ཞེས་ཀྱང་བྱ་ལ། སྣང་མེད་ཀྱི་སྟོང་ཉིད་ཡིན་པའང་ཤེས་པར་བྱའོ། །དེས་མར་སྐྱེ་སྲིད་ཀྱི་དྲི་ཟའི་སེམས་དག་པར་བྱེད་ཅིང་། ཡར་སྤྲུལ་སྐུའི་ཡོན་ཏན་རྫོགས་པར་བྱེད། རྫོགས་རིམ་ཀྱི་དུས་སུ་སྒྱུ་ལུས་དང་ཟུང་འཇུག་ཉིད་འགྲུབ་པའི་སྨིན་བྱེད་དུ་འགྱུར་རོ། །འདིའི་འོག་མ་ལྷ་སྐུ་དངོས་སྒོམ་པ་སོགས་ཀྱི་དག་རྫོགས་སྨིན་གསུམ་ཡང་། སྐྱེ་བའི་རིམ་གསུམ་གཉིས་མེད་དོན། །ཞེས་པ་ལྟར་ཕྲ་རགས་མ་གཏོགས་འདི་དང་ཕལ་ཆེར་གཅིག་གོ །དེས་ན་དེ་ཡན་ཆད་ཀྱི་བསྙེན་པའི་ཡན་ལག་མདོར་བསྡུས་ཙམ་བཤད་ཟིན་ནས། གཉིས་པ་ཉེ་བསྙེན་དང་། གསུམ་པ་སྒྲུབ་པ་དང་། བཞི་པ་སྒྲུབ་ཆེན་རྣམས་ནི་རིམ་པ་བཞིན་དུ། ཧེ་རུ་ཀའི་གལ་བོ་ལས། ཉེ་བསྙེན་བདག་ཉིད་ལྷར་བསྒོམས་ཏེ། །ཡེ་ཤེས་བདག་ལ་ལྕགས་ཀྱུས་བསྟིམ། །སྒྲུབ་པ་ཡུམ་ལ་དཀྱིལ་འཁོར་གདོན། །སྐུ་གསུང་ཐུགས་སུ་ཟླ་དྲུག་བསྒྲུབ། །སྒྲུབ་ཆེན་ལྷ་ཡི་སྐུར་གསལ་བས། །བདག་འདྲའི་དཀྱིལ་འཁོར་དབྱུང་ཞིང་བསྒྲུབ། །འདི་ནི་ཤེས་རབ་ཆུང་རྣམས་ལ། །རིམ་གྱིས་བསྒྲུབ་པའི་རིམ་པའོ། །ཞེས་གསུངས་པ་ལྟར་ཤེས་པར་བྱའོ། །དེ་ལྟར་མོས་སྤྱོད་ཀྱི་སར་གཙོ་བོར་བསྐྱེད་རིམ་དང་འབྲེལ་བའི་བསྙེན་སྒྲུབ་ཡན་ལག་བཞི་སྒོམ་པ་ལ་རྫོགས་རིམ་ལམ་གྱིས་ཟིན་པར་བྱས་ནས། སྦྱོར་ལམ་ཆོས་མཆོག་ཏུ་ཚོམ་བུ་ཚོགས་ཀྱི་སྒྲུབ་པ་སྟེ་སྤྲོས་བཅས་ཉེ་རྒྱུའི་སྤྱོད་པ་ལ་བརྟེན་ནས། རླུང་སེམས་ཙམ་ལས་གྲུབ་པའི་སྒྱུ་མའི་སྐུ་རྣམ་པར་སྨིན་པའི་རིག་འཛིན་ནམ། ལམ་མཆོག་ཡོངས་སུ་རྫོགས་པའི་ཚེ་དབང་རིག་འཛིན་ཏེ། དབང་པོ་རྣོན་རྟུལ་གྱི་དབང་དུ་བྱས་པའི་མཐོང་ལམ་གཉིས་པོ་གང་རུང་འཐོབ་པ་དང་། དེ་ཡན་སློབ་པ་དང་མི་སློབ་པའི་ཟུང་འཇུག་དག་གིས་བསྡུས་པའི་ཕྱག་རྒྱ་ཆེན་པོའི་རིག་འཛིན་དང་། ལྷུན་གྱིས་གྲུབ་པའི་རིག་འཛིན་དག་མངོན་དུ་བྱས་ནས་མཐར་ཐུག་གི་འབྲས་བུ་ལ་ཇི་ལྟར་སྦྱོར་བའི་ཚུལ་རྣམས་ནི་འདིར་བཏང་སྙོམས་སུ་བཞག་པས་གཞན་དུ་རྟོགས་པར་བྱའོ། །དེ་ཡན་ཆད་ཀྱིས་དེ་ཏིང་སྒོམ་ཚུལ་འཕྲོས་དོན་དང་བཅས་པ་མདོར་བསྡུས་ཙམ་བཤད་ཟིན་ཏོ། །ཡང་གསུང་ཤོག་ལས། བསྙེན་སྒྲུབ་ཡན་ལག་བཞིའི་སྐབས་སུ་བདག་སྲས་གཞན་སྲས་གསུངས་པ་དེ་ལ་གོ་བ་ངེས་པ་ཅན་ཞིག་མ་བྱུང་བས་དེ་ལ་བསྡུས་འགྲེལ་གསལ་ཁ་ཅན་ཞིག་གནང་ཐུབ་པ་བཀའ་དྲིན་ཆེ་ལགས། ཞེས་གསུངས་པ་ལ། འདིར་ཀུན་གཟིགས་རོང་ཟོམ་པ་ཆེན་པོའི་རྒྱུད་འགྲེལ་དུ། བདག་སྔོན་གྱི་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱ་བ་དང་། རིགས་མི་ནུབ་པར་བྱ་བའི་ཕྱིར་དེ་བཞིན་གཤེགས་པའི་སྲས་སུ་བདག་བྱ་བའོ། །ཞེས་གསུངས་པ་ལྟར་བདག་གཞི་དུས་ཀྱི་སངས་རྒྱས་ཡིན་པའི་ཕྱིར། བདག་ཉིད་ཏིང་འཛིན་རྣམ་པ་གསུམ་གྱི་རིམ་པས། རྒྱུ་རྡོ་རྗེ་འཛིན་པའི་ངོ་བོར་བསྒོམས་ཏེ། དེ་ཉིད་ཀྱི་སྲས་སུ་དེ་བཞིན་གཤེགས་པ་རྣམས་དགུགས་པའི་ཆོ་ག་ལ་བདག་སྲས་ཀྱི་ཆོ་ག་དང་། དེ་བཞིན་གཤེགས་པའི་རིགས་མི་ནུབ་པར་བྱ་བའི་ཕྱིར་སླར་ཡང་དཀྱིལ་འཁོར་གྱི་འཁོར་ལོ་དེ་ཉིད་ཞུ་བ་གླུས་བསྐུལ་གྱིས་འོང་དུ་ཞུ་ནས་གཙོ་བོའི་རྣམ་པར་གྱུར་པའི་སྐུའི་དབྱིབས་སུ་བདག་ཉིད་སྔར་རྒྱུ་རྡོ་རྗེ་འཛིན་པའི་ངོ་བོར་གྱུར་པ་དེ་ཉིད་ཀྱི་རྟོག་པ་མཐའ་དག་བྱང་ཆུབ་སེམས་ཀྱི་རྣམ་པར་གནས་པ་དེ་སླར་ཡང་ཡུམ་གྱི་མཁའ་སྤྲོས་ཏེ་སྲས་ཀྱི་དཀྱིལ་འཁོར་དུ་གྱུར་པ་ཉིད་ཕྱིར་བཏོན་ཏེ་རང་རང་གི་གདན་ལ་བཀོད་པར་དབང་བསྐུར་རྒྱས་གདབ་སོགས་བྱེད་པ་ལ་གཞན་སྲས་ཀྱི་ཆོ་ག་ཞེས་ཟེར་ཞིང་། འདི་ལ་བཀའ་མའི་གཞུང་རྣམས་སུ་བདག་སྲས་གཞན་སྲས་ཀྱི་རྣམ་གཞག་ཙམ་ལས་ཆོ་གའི་ཡན་ལག་ངེས་པ་མ་གསུངས་ཀྱང་། རིག་འཛིན་འཇིགས་མེད་གླིང་བས་བཀའ་བརྒྱད་ཀྱི་ལུང་ཁུངས་སྨྲོས་ནས། བདག་གི་སྲས་སུ་གཞན་བྱ་བ་ལ་ལྔ། ས་བོན་ལས་ནི་གཙོ་བོ་བསྐྱེད་པ་དང་། ཕྱོགས་བཅུའི་བདེ་གཤེགས་བཀུགས་ནས་མཁའ་བསྟིམ་དང་། སེམས་ཅན་བཀུགས་ནས་སྒྲིབ་པ་སྦྱང་བ་དང་། གཉིས་སུ་མེད་ལ་ཆེ་བ་བསྐྱེད་པ་དང་། མཁའ་ནས་བཏོན་ཏེ་གདན་ལ་འཁོད་པའོ། །ཞེས་བདག་སྲས་ཀྱི་ཆོ་ག་ལ་ཡན་ལག་ལྔ་དང་། གཞན་གྱི་སྲས་སུ་བདག་བྱ་བ་ལ་བརྒྱད། གཙོ་བོ་འོད་ཞུ་ས་བོན་གྱུར་པ་དང་། །དེ་ལས་ཡབ་ཡུམ་སྐྱེ་མཆོད་རྫོགས་པ་དང་། །ཡབ་ཀྱི་རྟོག་པ་ཡི་གེར་གྱུར་པ་དང་། །ཡུམ་ལས་འོད་འཕྲོས་ལྷ་ལ་གསོལ་བཏབ་དང་། །ཀུན་ཀྱང་རང་བསྟིམ་ང་རྒྱལ་བཟུང་བ་དང་། །སྙོམ་པར་ཞུགས་ནས་མཁའ་རུ་དཀྱིལ་འཁོར་བསྐྱེད། །རྟོག་པ་ཞེ་གཉིས་ལྷར་གསལ་ཕྱིར་འདོན་དང་། །ཕྱག་རྒྱ་བཞི་ཡིས་བཅིང་དང་རྒྱས་གདབ་བོ། །ཞེས་གཞན་སྲས་ཀྱི་ཆོ་ག་ལ་ཡན་ལག་བརྒྱད་དུ་གསུངས་སོ། །འདི་དག་ལ་སྒོམ་པའི་སྐབས་སུ་གོ་རིམ་གྱི་ངེས་པ་ནི་མེད་པ་འདྲའོ། །དེ་དག་གིས་ནི་བདག་སྲས་གཞན་སྲས་ཀྱི་གསལ་བྱེད་ཅུང་ཟད་སྨྲས་ཟིན་ཏོ། གཞན་ཀར་གླིང་ཞི་ཁྲོའི་དོགས་སེལ་སོགས་ནི་ཟུར་དུ་འགོད་ལ། ཁོ་བོའི་གསང་བའི་རྣམ་ཐར་དགོས་ཞེས་ཕེབས་པ་ནི། བདག་ཅག་བྱིས་པའི་དུས་ནས་སྤྲང་འཁྱམས་བྱས་ཏེ་ས་མཐར་བསྐོར་རབས་དང་། གཤིན་གསོན་གྱི་དཀོར་ནག་བསྡུས་རབས་ཙམ་ལས་གཞན་དམ་པས་བསྔགས་འོས་ཀྱི་རྣམ་ཐར་ནི་ཅི་ཡང་མ་མཆིས་མོད་དེ། འོན་ཀྱང་གསུངས་རྣམས་ཡིད་ཡུལ་དུ་འཇག་པར་མཆིས་པས་མ་འོངས་པ་ན་རྣམ་ཐར་བཟང་པོ་འགོད་པའི་རྟེན་འབྲེལ་ཞུ། །འདིར་སྨྲས་པ། དབང་བཞིས་བསྟན་དོན་བསྐྱེད་རྫོགས་ཡན་ལག་བཞིས། །རིག་འཛིན་རྣམ་བཞིའི་གྲུབ་མཐའ་སྙོགས་པའི་ཐབས། །བསྙེན་སྒྲུབ་ཡན་ལག་བཞི་ཡི་ལམ་རིམ་ལ། །བརྟེན་ནས་སྐུ་བཞིའི་འབྲས་བུ་མངོན་བྱེད་མཛོད། །སྟོང་ཆེན་སྙིང་རྗེ་སྒྱུ་མའི་རྣལ་འབྱོར་དང་། །ཕྱག་རྒྱ་གཅིག་པའི་བསྐྱེད་རིམ་ལ་གོམས་པས། །དབེན་པ་གསུམ་གྱི་རྫོགས་པའི་རིམ་པ་ལ། །བརྟེན་ནས་སྒྱུ་མའི་ལྷ་སྐུ་མངོན་བྱེད་མཛོད། །བསྐྱེད་རིམ་ཕྲ་མོ་ཕྱག་རྒྱ་སྤྲོས་བཅས་ལ། བརྟན་པ་ཐོབ་ནས་ཐིག་ལེའི་རྣལ་འབྱོར་གྱིས། །དགའ་བཞིས་དྲངས་པའི་དཔེ་ཡི་འོད་གསལ་ཉིད། བསྐྱེད་པའི་ཉེ་རྒྱུས་འཕགས་ལམ་མངོན་བྱེད་མཛོད། །སྣང་སྟོང་མཆོག་གི་འོད་གསལ་ལ་བརྟེན་ནས། །སྒོམ་པའི་ལམ་དུ་སློབས་དང་མི་སློབ་པའི། །ཟུང་འཇུག་ཕྱག་ཆེན་ལྷུན་གྲུབ་རིམ་བགྲོད་ནས། །ཚེ་འདིར་རྡོ་རྗེ་འཆང་དབང་མངོན་བྱེད་མཛོད། །དེ་ལྟར་གསང་ཆེན་བླ་མེད་རྒྱུད་སྡེའི་གནད། །མངོན་བྱེད་རྣམ་བཞིར་བསྡུས་ནས་གདམས་པ་དེས། །མ་ལུས་འགྲོ་ཀུན་སྲིད་པའི་མཚོ་ཆེན་ལས། །ཐར་མཆོག་ཞི་བའི་གོ་འཕང་མངོན་བྱེད་ཤོག །ཅེས་པའང་དད་དམ་མཁྱེན་རབ་ཀྱི་མངའ་བདག་བླ་མ་དམ་པ་དམ་ཆོས་ལྷུན་འགྲུབ་ཀྱི་དྲིས་ལན་དུ་བཙུན་པ་གཞན་ཕན་མཐའ་ཡས་པས་སྨྲས་པ་དགེ། དགེའོ། །