རྡོ་རྗེ་བྲག་ཞབས་དྲུང་སྤྲུལ་བའི་སྐུར་གདམས་པ།

༄། །རྡོ་རྗེ་བྲག་ཞབས་དྲུང་སྤྲུལ་བའི་སྐུར་གདམས་པ་བཞུགས་སོ། །ཨོཾ་སྭ་སྟི། དྲག་པོ་ཚངས་སོགས་མཐུ་ཆེན་ཀུན་གྱིས་གང་ཞབས་བསྙེན་པ་བཅོམ་ལྡན་འདས། རིག་བྱེད་ལ་སོགས་སྨྲ་བ་ངན་ཀུན་ཟིལ་གྱིས་གནོན་བགྱིད་དམ་པའི་ཆོས། །རྣམ་བྱང་མཆོག་གི་མྱུ་གུའི་རང་བཞིན་སྲིད་པའི་སྐྱོན་སྤངས་དགེ་འདུན་ཏེ། །བསླུ་མེད་སྐྱབས་གྱུར་དཀོན་མཆོག་གསུམ་དེས་ཁྱོད་ལ་དགེ་ལེགས་མཛད་གྱུར་ཅིག །འདི་ན་སྐྱེ་བོའི་རང་བཞིན་ནི། །ཁ་ཅིག་ཉེས་པ་ཁོ་ན་བསྒྲུབ། །འགའ་ཞིག་བདེ་བ་དོན་གཉེར་ཡང་། །དེ་ཉིད་སྒྲུབ་པའི་ཚུལ་ལ་རྨོངས། །དེས་ན་རིགས་འབྱོར་དྲེགས་ལྡན་ལ། །འདིར་བཤད་དོན་དང་ལྡན་མིན་ཡང་། །རྗེ་ཁྱོད་བདག་ལ་བརྩེ་དགོངས་པ། །གང་ཕྱིར་སྨྲ་བའི་སྤོབས་པ་རྙེད། །དེ་ལྟར་ན་ནི་མཁྱེན་ལྡན་པ། །ཁྱོད་ནི་རྒྱལ་བུ་དོན་གྲུབ་ཀྱི། །རྣམ་པར་ཐར་བ་ལ་དགྱེས་ན། །འདི་ལས་བསླབ་སྟོན་གཞན་ཅི་བགྱིད། །ཇི་ལྟར་སྤྲུལ་གཞི་སྤྲུལ་གཞི་བཞིན། །སྤྲུལ་པ་ཉིད་ཀྱང་སྤྲུལ་སྐུ་བཞིན། །གདན་ས་མཆོག་ནི་ཤཱཀྱ་ཡི། །རྒྱལ་སྲིད་ཉིད་དང་ཕྱོགས་མཚུངས་པའོ། །འོན་ཀྱང་ཐུབ་པ་ཆེན་པོ་འདིས། །ཚུ་རོལ་མཐོང་བའི་སྣང་ངོ་རུ། དཀའ་བ་སྤྱད་སོགས་མཛད་བདེན་ཀྱང་། །འདི་ལ་དགོས་པ་གཞན་ཡང་ཡོད། །དེས་ན་བཟོ་དང་སྒྱུ་རྩལ་ལ། །ཐོག་མར་སྦྱངས་པ་དེ་ཇི་བཞིན། །དམ་པ་ཉིད་ཀྱང་གཞོན་ནུ་ན། །ཐུན་མོང་རིག་གནས་ལ་སྤྱད་འཚལ། །འོན་ཏེ་འདི་ཡིས་གང་བསླབ་པ། །རྣམ་མཁྱེན་ཁོ་ནའི་རྒྱུར་ཡིན་གྱི། །ཁེངས་དང་གྲགས་དང་ཐོས་རྩོད་དག །དོན་དུ་གཉེར་ཙམ་ག་ལ་ཡིན། །དེ་ཕྱིར་ཉིད་ཀྱང་གང་བསླབ་པའི། །གཞུང་ཀུན་འདི་དང་གཏན་གྱི་དོན། །སྒྲུབ་བྱེད་ནང་དོན་རིག་པ་ཡི། །ཡན་ལག་ཉིད་དུ་འགྱུར་བགྱིད་འཚལ། །འདི་ལྟར་གཞོན་ནུ་དོན་གྲུབ་ནི། །གྲོང་ཁྱེར་མཆོག་གི་སྒོ་བཞི་ནས། །གང་ཞིག་རྒ་དང་ན་བ་དང་། །སྐྱེ་དང་འཆི་བའི་ཚུལ་གཟིགས་ཏེ། །ཅི་ཞིག་འདི་ལ་ཅི་འབྱུང་བ། །ཇི་ལྟར་བདག་ལའང་འབྱུང་ངམ་ཅི། །ཅི་ཞིག་འདི་ལས་ཐར་བགྱིད་པའི། །ཐབས་དེ་ཇི་ལྟར་བཙལ་ལམ་ཞེས། །ཉིད་ཀྱི་ཐུགས་ཀྱི་ཀློང་གང་ལ། །ཇི་ལྟར་དགོངས་པ་དེ་ཇི་བཞིན། །མདུན་ན་གནས་པའི་འདུན་པ་ལ། །སྨྲས་ཀྱང་དེ་ཡང་དེ་བཞིན་སྨྲ། །གང་ཚེ་སྲིད་ན་བདེ་མེད་ཅིང་། །སྡུག་བསྔལ་ཉིད་དུ་གཟིགས་པ་དང་། །དེ་རྒྱུ་འགོག་པའི་ཐབས་གང་ལ། །མྱུར་བརྩོན་དགོས་པའང་ལྷན་ཅིག་མཁྱེན། །གང་ཕྱིར་དམ་པ་ཉིད་ནས་ཀྱང་། །སྲིད་འདིའི་ངང་ཚུལ་ལ་དགོངས་ཏེ། །རེ་ཞིག་བྱིས་པའི་རྣམ་འགྱུར་ཀུན། །ཅི་ཡི་ཕྱིར་ན་འདོར་མི་བགྱིད། །ཁྱེད་ལ་བསྙུན་པ་མི་མངའ་ཞིང་། །སྐུ་ཚེའང་གོད་པ་མེད་གྱུར་ཅེས། །བདག་ནི་དེ་ལྟར་ཤིས་བརྗོད་ཀྱི། །མེ་ཏོག་རྟག་ཏུ་འཐོར་ལགས་ཀྱང་། །གང་ཞིག་འགྲོ་བ་མ་ལུས་པའི། །སྲོག་ལ་རྒོལ་བའི་གཤིན་རྗེ་དེར། །གྲོས་འདི་སྔོན་ཆད་བགྱིས་མིན་ན། །འདི་དེ་ཅི་ཞིག་འགྱུར་རམ་ཨང་། །ཐུབ་པ་ཉིད་ནི་རྒ་ན་འཆིའི། །རྣམ་འགྱུར་གཞན་དེ་མཐོང་བའི་མོད། །དེ་ཚུལ་རང་གིས་མྱོང་བ་ལས། །ལྷག་པའི་བརྟུན་པ་བསྐྱེད་ཅེས་ཐོས། །འདི་ལྟར་གྲགས་འཛིན་ས་འཚོ་སོགས། །ཡིད་གཅུག་མཛེས་མ་ཇི་སྙེད་དང་། །ཀུན་དགའ་བོ་དང་མཛེས་དགའ་སོགས། །སྙིང་བརྩེ་གཞོན་ནུའི་གྲོགས་དག་དང་། །ཟས་གཙང་དང་ནི་མིང་ཅན་སོགས། །ཡབ་དང་ཁུ་བོ་བཅས་པའི་ཚོགས། །འདི་ཀུན་ཟས་ཀྱི་ལྷག་རོ་བཞིན། །དོར་ནས་དབེན་ས་བསྙེན་མིན་ནམ། །གཞན་ཡང་འདི་ཡིས་ནོར་བུ་ཡི། །རྒྱན་གྱི་བྱེ་བྲག་ཇི་སྙེད་དང་། །བརྗོད་པས་བྲལ་བའི་རིན་ཐང་གིས། །ལྕི་བ་ཀ་ཤིའི་རས་དག་ཀྱང་། །དགྲའམ་དུག་ལྡན་ཟས་ཇི་བཞིན། །སྤངས་ནས་ཕྱག་དར་ཁྲོད་པ་ཡི། །བརྟུལ་ཞུགས་ཆེད་དུ་དང་བཞེས་ན། །དམ་པ་སུ་ཞིག་སྲིད་འབྱོར་གཉེར། །གང་ཞིག་ཐ་ཆད་སྐྱེ་བོ་ཡང་། །རང་གི་རིགས་ཉིད་འཛིན་བགྱིད་ན། །དམ་པ་རྣམས་ནི་དམ་པ་ཡི། །རྣམ་ཐར་ཁོ་ན་མི་སྐྱོངས་པར། །བླུན་པོ་གཞུང་ལུགས་མི་ཤེས་ཤིང་། །ཟ་ཉལ་ཙམ་ཞིག་ངོ་མཚར་དུ། །བགྱིད་པའི་ལུགས་ངན་ལ་ཞེན་ནས། །རང་ཚུལ་འདོར་བ་ག་ལ་རིགས། །འོན་ཀྱང་གནས་ཡུལ་ཐག་བསྲིངས་པ། །ཁྱོད་ལ་མཛེས་པ་མ་ལགས་ཀྱང་། །འཁོར་གྱི་དབུས་ན་འཁོར་སྐྱོན་དང་། །བྲལ་བ་དངུལ་ཆུའི་དཔེ་བཞིན་མཛོད། །དེ་ལྟ་ནའང་ཙནྡ་ནའི། །ནགས་ཚལ་ལ་བརྟེན་འགལ་དུམ་དང་། །ཉ་རུལ་གྱིས་བགོས་ཀུ་ཤ་ཡི། །དཔེ་འདིས་ཐུབ་པས་ཡུལ་རྐྱེན་བསྟན། །གང་ཕྱིར་རང་གཞན་ལ་ལྟོས་པའི། །ཁྲེལ་དང་ངོ་ཚའི་ནོར་ལྡན་ཞིང་། །བག་ཡོད་ཀྱིས་ནི་གོ་བགོས་པ། །གང་ལ་རྐྱེན་གྱིས་བརྫི་མིན་ཡང་། །ལུས་སམ་ཡང་ན་སེམས་ཀྱང་རུང་། །བྱིས་པའི་ངང་ཚུལ་མ་སྤངས་དང་། །ཆོས་ལ་བརྩོན་འདོད་དང་པོ་བ། །མཐའ་དག་གྲོགས་དབང་ཁོ་ན་ཡིན། །འདི་ལྟར་རྒྱལ་བ་བརྩེ་ལྡན་པས། །ཚོགས་ལམ་གྱི་ནི་དང་པོ་རུ། །དབང་པོའི་སྒོ་རྣམས་བསྡམ་བྱ་ཞེས། །གསུངས་པའི་དགོས་པ་མཁྱེན་པར་མཛོད། །དེ་ཕྱིར་ཁྱོད་ཐུགས་མེ་འདྲ་ན། །ཆུ་དང་འདྲ་བའི་གཉེན་པོ་དང་། །གལ་ཏེ་གཉིས་འཐུང་མྱོས་འདྲ་ན། །ལྕགས་ཀྱུ་དང་འདྲའི་གཉེན་པོ་བརྟེན། །དེ་མེད་ན་ནི་གཡོ་བའི་བློ། །འདི་དེ་ཅིར་འགྱུར་མ་འཚལ་ཕྱིར། །རབ་དཀར་ཆོས་ཚུལ་སྣང་བ་གང་། །འགྲིབ་པར་བགྱིས་ན་ཅི་བྱར་ཡོད། །ཐུབ་པ་ཉིད་ནི་སྲིད་སྤངས་ནས། །གང་ཚེ་དཀའ་བ་སྤྱོད་པ་ན། །དྭངས་མའི་དབང་པོའང་སྐྱེ་བོ་ཡིས། །གཙེས་ཀྱང་མཉམ་བཞག་ལས་མི་གཡོ། །འོན་ཏེ་འདི་ན་གང་བཤད་པ། །ཕལ་ཆེར་ཐོག་མར་གཅེས་པ་དག །ཕྱོགས་སུ་བསྒྲིགས་ནས་གསོལ་བཏབ་ཀྱི། །ལམ་དངོས་ཇི་ལྟར་བསྒྲུབ་བྱ་ལ། །ཆོས་ཀུན་བྱང་ཆུབ་སེམས་གཉིས་སུ། །བསྡུས་ཏེ་དེ་ཡི་བསླབ་བྱ་ཡང་། །ཚུལ་ཁྲིམས་དང་ནི་ཏིང་འཛིན་དང་། །ཤེས་རབ་ཉིད་དུ་དྲིལ་བར་མཛོད། །དེ་ལས་དང་པོ་རྟེན་ཡིན་ཞིང་། །ཕྱི་མ་གཉིས་ནི་བརྟེན་པ་སྟེ། །དེས་ན་རྒྱལ་བསྟན་མ་ལུས་པའི། །གནད་ཀུན་འདི་རུ་འདུ་བ་ལགས། །གང་ལ་དགོངས་ནས་ཐོག་མ་རུ། །ཚུལ་ཁྲིམས་ཀྱི་ནི་བསླབ་པ་ལ། །ཉེས་སྤྱོད་སྡོམ་དང་དགེ་ཆོས་སྡུད། །སེམས་ཅན་དོན་བྱེད་རྣམ་གསུམ་དུ། །རྒྱལ་བས་གསུངས་པ་འདིའི་གོ་རིམ། །ཚོགས་ལམ་དང་ནི་དེ་བཞིན་དུ། །སྦྱོར་དང་མཐོང་ལམ་ཞེས་བགྱིས་པའི། །ལམ་དེ་དག་གི་རྟེན་དུ་ནི། །དེ་དག་རིམ་པ་ཇི་ལྟ་བུར། །གཙོ་བོར་ཉམས་སུ་བླང་བྱ་སྟེ། །ཁྲིམས་ནི་རྒྱུ་དང་མི་རྒྱུ་བའི། །ས་དང་འདྲ་ཞེས་ཐུབ་དབང་གསུངས། །གང་ཞིག་སྣོད་དང་བྲལ་བ་ལ། །བཅུད་ཀྱིས་ཕན་པར་མི་འགྱུར་བཞིན། །ཡོན་ཏན་གཞན་དག་རྒྱ་ཆེ་ཡང་། །ཚུལ་ཁྲིམས་མེད་ན་ཉམས་པར་འགྱུར། །དེ་ཕྱིར་འདི་ཡི་རྣམ་གྲངས་ཀྱང་། །སོ་སོ་ཐར་དང་བྱང་ཆུབ་སེམས། །རིག་འཛིན་སྔགས་ཀྱི་སྡོམ་པ་སྟེ། །རྣམ་པ་གསུམ་ལ་འདུ་བ་ཡིན། །དེ་དག་སོ་སོའི་རྩ་བ་དང་། །ཡན་ལག་གི་ནི་ལྟུང་བའི་ཁྱད། །དེ་བཞིན་ལྟུང་དང་ལྟུང་མེད་པའི། །མུ་བཞི་དག་ཀྱང་མཁྱེན་པར་མཛོད། །གང་ཚེ་ཚུལ་ཁྲིམས་ལྡན་པ་ན། །གང་ལ་བརྟེན་པའི་ཉམས་ལེན་ཀྱང་། །ཐོས་བསམ་སྒོམ་པ་ལས་བྱུང་བའི། །ཤེས་རབ་གསུམ་གྱིས་གཏན་ལ་ཕོབས། །ཤེས་རབ་མེད་པའི་བསམ་གཏན་དང་། །བསམ་གཏན་མེད་པའི་ཤེས་རབ་ཀྱང་། །ཡང་དག་འདི་ལ་འབྱུང་མིན་ཞེས། །འཕགས་མཆོག་ཀླུ་སྒྲུབ་ཞབས་ཀྱི་གསུངས། །ཇི་ལྟར་མཁའ་ལྡིང་རྒྱལ་པོ་ཡང་། །ཟུང་དང་མི་ལྡན་གཤོག་རྩལ་གྱིས། །ནམ་འཕངས་བཅད་པ་ཡོད་མིན་པའི། །དཔེ་འདིས་དེ་ཉིད་ཉེ་བར་བསྒྲུབས། །འདི་ལྟར་བསྟན་པའི་གཞུང་ལུགས་ལ། །ཐུགས་ནི་ལྷན་ཅིག་ཉིད་གྱུར་ན། །དེ་ཚེ་མན་ངག་གསང་བའི་གནད། །འཚོལ་གང་དོན་ལ་གནས་འགྱུར་ཡིན། །འོན་ཀྱང་འདི་ནི་མཐའ་དྲུག་དང་། །ཚུལ་བཞིས་མངོན་པར་སྒྲིབ་པའི་ཕྱིར་། །གབ་པ་འབྱིན་པའི་མན་ངག་ཀུན། །བླ་མའི་ཞལ་ལ་ཐུག་པར་གསུངས། །དེ་ཡི་ཕྱིར་ན་མ་ནོར་བའི། །ལམ་སྟོན་མཆོག་ཏུ་བསྟེན་པ་ནི། །ལུགས་འདི་སྒྲུབ་པའི་སྲོག་ཟུང་དུ། །ཅི་ནས་ངེས་པ་རྙེད་པ་དགོས། །མདོར་ན་ཆོས་ནི་ཆོས་བཞིན་དུ། །ཉམས་སུ་བླང་བྱ་ཉིད་ཡིན་ཀྱི། །ཆོས་ལྟར་བཅོས་པའི་ཆོས་གཞན་གྱིས། །འདིར་བཤད་འབྲས་བུ་ག་ལ་འཐོབ། །ཇི་ལྟར་ཏིལ་གྱི་ས་བོན་ལས། །སཱ་ལུའི་འབྲས་བུ་འབྱུང་མིན་ཞིང་། །གདོང་ལྔར་བརྫུས་པའི་རྣམ་འགྱུར་གྱིས། །གཞན་དག་གསོད་པར་བགྱིས་མིན་བཞིན། །དེས་ན་གསང་ཆེན་ཐེག་པ་འདིའི། །འཇུག་སྒོ་དབང་དང་དངོས་གཞི་ནི། །བསྐྱེད་དང་རྫོགས་པའི་རིམ་པ་དང་། །མཐུན་གྲོགས་དམ་ཚིག་དག་པ་དགོས། །དེས་ན་ཤཱཀྱའི་སྲས་གང་ཞིག །བྱང་ཆུབ་ཤིང་ལ་བརྟེན་པ་ན། །ནང་ལྟར་སྟུག་པོའི་འོག་མིན་ཏུ། །འོད་ཟེར་ཆེན་པོའི་དབང་མནོས་ཤིང་། །གསང་ཆེན་ཐབས་ཀྱི་ཉེ་ལམ་ལ། །བརྟེན་ནས་མངོན་པར་བྱང་ཆུབ་སྟེ། །འགྲོ་ཀུན་གང་གིས་འདུལ་འགྱུར་བའི། །ཐབས་ཚུལ་ཕྲིན་ལས་གཡེལ་མེད་བཞིན། །དེ་སླད་མཁྱེན་ལྡན་གང་གིས་ཀྱང་། །རང་དོན་སྤང་རྟོགས་མཐར་ཕྱིན་ནས། །འགྲོ་ཀུན་སྲིད་པའི་རྒྱ་མཚོ་ལས། །སྒྲོལ་བའི་དེད་དཔོན་མཛོད་ཅིག་ཅེས། །དེ་ལྟར་བདག་ནི་བརྩེ་བ་དང་། །དད་པས་ཐལ་མོ་སྦྱར་བྱས་ཏེ། །སྙིང་ནས་གསོལ་བ་འདེབས་ལགས་ན། །རེ་འབྲས་གཞན་དུ་མི་བགྱིད་འཚལ། །འདིར་བཤད་གསན་འོས་མཆིས་མིན་ན། །ནན་གྱིས་གསོལ་བས་ཅི་ཞིག་བྱ། །གལ་ཏེ་གསན་དུ་རུང་བ་འགའ། །སྲིད་ཚེ་སླར་ཡང་རིམ་བཞིན་སྤྲོ། །ཁྱོད་ཀྱི་ཐུགས་ནི་པད་ཚལ་དང་། །བདག་གི་བརྗོད་པའང་ཚ་ཟེར་བཞིན། །གྱུར་ན་ཕན་ཚུན་ལྟོས་གྲུབ་ཀྱིས། །མཛའ་བའི་ངང་ཚུལ་སུ་ཞིག་དབྱེ། །ད་ནི་སྲིད་པའི་རང་བཞིན་སྨྲིག་རྒྱུ་ལྟར། །བསླུ་བའི་ཆོས་ཅན་ཁོ་ནར་ངེས་རྙེད་ནས། །དལ་འབྱོར་རིན་ཆེན་སྟོང་ལོག་མི་བགྱིད་པར། །ཐར་དང་རྣམ་མཁྱེན་ལམ་བཟང་བསྒྲུབ་འཚལ་ལོ། །བློ་བཏང་མེད་པའི་ཚེ་ལ་གདེངས་བཅས་ཀྱང་། །དངོས་ཀུན་མི་རྟག་འགྱུར་བའི་ཆོས་ཅན་ཕྱིར། །གློ་བུར་རྐྱེན་གྱིས་ཅིར་འགྱུར་ཆ་མེད་ཅེས། །དགོངས་ནས་གཡེང་བའི་རྒྱུ་རྐྱེན་ཀུན་སྤང་བྱ། །གང་ཞིག་གསོལ་བའི་ཚིག་དོན་ཇི་སྙེད་སྙན་ངག་རྒྱན་གྱིས་མཛེས་མིན་ཡང་། །རབ་དཀར་ལྷག་བསམ་ཟླ་བའི་ངང་ཚུལ་ཐོག་ཐ་བར་དུ་འདོར་མིན་ཕྱིར། །འདི་ལས་བྱུང་བའི་དགེ་ཚོགས་བསིལ་རྒྱུན་ཅུང་ཟད་མཆིས་སྲིད་དེ་ལྟར་ན། །མ་ལུས་འགྲོ་བའི་ཉོན་མོངས་ཚ་གདུང་སྐྱོབ་པའི་སྨན་དུ་ཤོག་ཅིག་གུ། །ཞེས་ཚད་མེད་པའི་ཐུགས་རྗེ་དང་མཁྱེན་རབ་ཀྱི་མངའ་བདག་མ་ལུས་པའི་འགྲོ་བ་ཀུན་གྱི་སྐྱབས་མགོན་དམ་པར་གྱུར་པ་རྡོ་རྗེ་བྲག་ཞབས་དྲུང་རིག་འཛིན་མཆོག་གི་སྤྲུལ་པའི་སྐུ་རིན་པོ་ཆེའི་ཞལ་སྔ་ནས་གངས་རིའི་མདངས་འཛིན་གྱི་ལྷ་རྫས་དང་རིན་ཆེན་གཉིས་པའི་འཁོར་ལོ་ཟུང་གི་སྐྱེས་དང་བཅས་ཞལ་གདམས་ཤིག་དགོས་ཞེས་བཀའ་རྟགས་གསེར་གྱི་ཅོད་པཎ་གཙུག་ཏུ་ཕེབ་པ་འདོར་མ་ནུས་པར་གྲུབ་པའི་དབང་ཕྱུག་རྫོགས་ཆེན་པ་ཡབ་སྲས་ཀྱི་ཞབས་རྡུལ་ལ་རེག་པའི་མདོ་ཁམས་ཀྱི་བནྡེ་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་དུ་འབོད་པས་ཐུབ་བསྟན་རྡོ་རྗེ་བྲག་གི་གཟིམ་ཆུང་བསམ་གཏན་ཡང་རྩེ་ནས་ཤར་མར་སྤེལ་བ་མངྒ་ལཾ།། །།