དགེ་རྒྱལ་སྨོན་ལམ་ལ་གདམས་པ།
༄། །དགེ་རྒྱལ་སྨོན་ལམ་ལ་གདམས་པ། །བླ་མ་ལ་ཕྱག་འཚལ་ལོ། །ཐར་འདོད་རྣམས་ཀྱིས་དམ་ཆོས་སྒྲུབ་པའི་རྟེན། །སྐྱོན་མེད་དལ་རྟེན་ཐོབ་ནས་རང་གཞན་གྱི། །འབྱོར་བའི་རྟེན་འབྲེལ་ལེགས་པར་སྒྲིག་པ་དང་། །མི་རྟག་འཆི་བ་རྗེས་སུ་དྲན་པར་བྱ། །དེ་ཡང་རྣམ་གྲོལ་ལམ་གྱི་གཞིར་གྱུར་ཅིང་། །སྲིད་པའི་འཇིགས་ལས་སྒྲོལ་བྱེད་སྐྱབས་གསུམ་ལ། །སྙིང་ནས་བློ་གཏད་བྱེད་པ་ཉིད་ཡིན་ཕྱིར། །སྐྱབས་འགྲོའི་གནད་ལ་གོམས་པ་ཐོག་མར་གཅེས། །དེ་རྗེས་མ་རྣམས་སྲིད་པའི་སྡུག་བསྔལ་གྱིས། །གདུང་ལ་སྙིང་རྗེ་ཆེན་པོས་གཞི་བཟུངས་ནས། །སྨོན་འཇུག་བྱང་ཆུབ་སེམས་གཉིས་རིམ་བསྐྱེད་དེ། །བསླབ་གསུམ་ནོར་བུའི་མཛོད་ཁང་ལ་འཇུག་བྱ། །དེ་ཡང་ཐོག་མར་རྣམ་དག་ཚུལ་ཁྲིམས་ཀྱིས། །རང་རྒྱུད་བསྡམས་པ་མིན་ན་ཏིང་འཛིན་དང་། །ཤེས་རབ་ཉིད་ཀྱང་དོན་དུ་མི་འགྱུར་བས། །དང་པོ་ཚུལ་ཁྲིམས་བསྲུང་ལ་ནན་ཏན་མཛོད། །དེ་ནས་ཐོས་བསམ་སྒོམ་ལ་རིམ་བཞིན་དུ། །བསླབ་ནས་ས་བཅུ་ལམ་ལྔའི་དཔལ་ཡོན་ཀུན། །ཇི་བཞིན་ཐོབ་མཐར་རྣམ་མཁྱེན་མཆོག་གི་ས། །མངོན་དུ་བྱེད་ཕྱིར་འབད་པས་སྒྲུབ་འཚལ་ལོ། །ཞེས་པའང་དགེ་རྒྱལ་སྨོན་ལམ་ལ་བཙུན་པ་གཞན་ཕན་པས་གདམས་པ་དགེའོ། །བཀྲ་ཤིས།། །།