ས་སྐྱོང་བླ་མ་ལ་གཏམ་དུ་བྱ་བ་པདྨའི་ཕྲེང་བ།

༄། །ས་སྐྱོང་བླ་མ་ལ་གཏམ་དུ་བྱ་བ་པདྨའི་ཕྲེང་བ། །ས་དབང་རྒྱལ་པོའི་རིགས་ཉིད་ལས། །ཤཱཀྱའི་བསྟན་ལ་རབ་བྱུང་ཞིང་། །རྒྱུད་དོན་གཟིགས་པའི་སྤྱན་བརྙེས་པའི། །རྡོ་རྗེ་འཛིན་ཁྱོད་རྒྱལ་གྱུར་ཅིག །ཐུབ་ཆེན་གསུང་གི་བདུད་རྩི་ཡིས། །གང་ཐུགས་ནོར་བུའི་བུམ་བཟང་ཉིད། །སྔ་ནས་གང་བར་མཛད་ལགས་ཀྱང་། །ད་དུང་བཀའ་མཆིད་གླེང་འདིར་གསོན། །རྣམ་སྣང་རྒྱལ་བའི་དབང་པོ་ཡི། །ཕྱག་འཚན་པདྨ་ལ་གནས་པའི། །མི་མཇེད་འཇིག་རྟེན་བྱེ་བ་བརྒྱའི། །སྟོན་པ་ཀུན་མཁྱེན་ཉི་མའི་གཉེན། །གང་གི་བསྟན་པ་རིན་ཆེན་ནི། །ས་གསུམ་འགྲོ་བའི་མིག་གཅིག་ཅེས། །ལྷར་བཅས་སྐྱེ་རྒུས་སྒྲོགས་པ་ལ། །རྒོལ་བའི་གླན་ཀ་ཡོད་མ་ལགས། །དེ་སླད་ལུང་དང་རྟོགས་པ་ཡིས། །རབ་ཏུ་ཕྱེ་བའི་ཐུབ་བསྟན་ཉིད། །འཛིན་བྱེད་བཤད་དང་སྒྲུབ་པའོ་ཞེས། །དམ་པ་མཐའ་དག་མགྲིན་གཅིག་གླེང་། །འདི་དག་རྣམ་གྲོལ་རྣམ་གྲོལ་ཆེར། །འཇོགས་པའི་ལམ་དང་ལམ་ཉིད་ཀྱི། །དམིགས་པར་འཕགས་ཡུལ་འཕགས་པའི་མཆོག །ཐོགས་མེད་ལེགས་བཤད་ལས་ལེགས་གསུངས། །གང་ཕྱིར་ལམ་དམིགས་ལུང་བསྟན་ནི། །བཤད་པས་འཛིན་པ་ཡིན་ཞེ་ན། །བཤད་བྱའི་ཡན་ལག་ངེས་པའི་གྲངས། །བརྒྱད་ཁྲི་ལ་སོགས་གསུངས་ལགས་ཀྱང་། །སྡེ་སྣོད་དབང་གིས་གསུམ་སོགས་དང་། །ཐེག་པའི་དབང་གིས་གཉིས་སོགས་གཞན། །གཞུང་དང་མན་ངག་སྦས་དོན་གྱིས། །ཕྱེ་བས་རིམ་དགུར་བཞག་པའང་ཡོད། །རྟོགས་བསྟན་ལམ་གྱི་གཙོ་བོ་ནི། བྱང་ཆུབ་གསུམ་པོ་གང་རུང་ལ། །དམིགས་པའི་སེམས་ཡིན་དེ་བསྐྱེད་པའི། །ཡན་ལག་བསླབ་པ་རིན་ཆེན་གསུམ། །དེ་ཡི་དང་པོ་ཚུལ་ཁྲིམས་ཀྱི། །བསླབ་པའང་ངེས་པར་འབྱུང་བ་ཡི། །དབང་བྱས་གང་ཕྱིར་སྡུག་ཀུན་ལ། །དམིགས་པའི་འགོག་བདེན་མངོན་བྱེད་འཚལ། །འདིར་ནི་དང་པོར་ཤེས་བྱ་བའི། །དམིགས་པ་སྡུག་བསྔལ་བདེན་པ་ཡི། །མཚན་ཉིད་མི་རྟག་ལ་སོགས་བཞིའི། །འཕྲོས་དོན་འགའ་ཞིག་ཆེད་དུ་བརྗོད། །ས་བདག་མི་ཁོམས་གནས་གཞན་ལ། །བསམ་ན་དལ་བའི་ངོ་བོ་ལ། །འབྱོར་བཅུའི་ཁྱད་པར་ཚང་བའང་། །ཕྱི་ནས་ཡང་ཡང་རྙེད་དཀའ་ཕྱིར། །སྔོན་བྱོན་དམ་པའི་རྣམ་ཐར་བཞིན། །དགེ་བའི་བཤེས་གཉེན་ལ་བསྟེན་ནས། །ཚེ་འདི་མི་རྟག་གཡོ་བ་ལ། །དགོངས་ཏེ་ཕྱི་མ་དོན་གཉེར་འཚལ། །གང་ཚེ་མཐོ་དམན་སྲིད་པ་འདི། །ལས་དང་ལས་ཀྱི་འབྲས་བུ་རུ། །བསླུ་མེད་ངེས་པ་རྙེད་པ་ཡི། །འཇིག་རྟེན་པ་ཡི་ཡང་དག་ལྟ། །འདི་ཉིད་གང་ལ་ཡོད་པ་དེས། །ད་གདོད་མཆོག་གསུམ་འཁོར་གཞན་བཅས། །རྗེས་སུ་དྲན་པ་ལ་བརྟེན་ནས། །མཚན་ཉིད་ཚང་བའི་སྐྱབས་འགྲོ་ཕྱིར། །དེ་རྗེས་གཏོང་དང་ཚུལ་ལྡན་པས། །ཚངས་གནས་བཞི་ཡིས་ཁྱད་པར་དུ། །བྱས་པའི་བསམ་གཟུགས་ཏིང་འཛིན་བརྒྱད། །བསྒོམ་པ་ལྷ་མིའི་ཐེག་པའི་གནད། །གང་འདིར་ངེས་པ་རྙེད་ནས་སླར། །འདུས་བྱས་མཐའ་དག་སྐད་ཅིག་མས། །འཕོ་ཕྱིར་མི་རྟག་ཉིད་ཡིན་ཞེས། །བསམས་ནས་ཉན་རང་ཐེག་གནད་བཙལ། །འདི་ལྟར་སྡུག་བསྔལ་སྡུག་བསྔལ་གྱིས། །འཇིགས་པ་དུད་འགྲོའི་འགྲོ་བ་ལའང་། །ཡོད་ཕྱིར་སྲིད་བདེ་དོན་གཉེར་ཙམ། །དམན་ཞེས་འཕགས་པའི་སྐྱེ་བོས་དགོངས། །དེ་སླད་ཚོར་བ་མཐའ་དག་ཀུན། །འདུས་བྱས་ཉིད་ཕྱིར་མི་རྟག་པས། །དུག་ལྡན་ཟས་བཞིན་སྡུག་བསྔལ་བར། །བཤད་འདིས་ཐུབ་གསུངས་རབ་ཏུ་ཕྱེ། །གང་ཞིག་ཡིད་དུ་འོང་བ་ཡི། །ཡུལ་ལ་བརྟེན་ནས་སྐྱེས་གྱུར་བའི། །ཚོར་འདི་གལ་ཏེ་བདེ་ཡིན་ན། །དེར་མི་བཟོད་པ་ཇི་ལྟར་རུང་། །འདི་ན་སྲིད་པའི་ལོངས་སྤྱོད་ནི། །གཅིག་སྤྱད་ནས་ནི་དེ་བོར་ཏེ། །གཞན་ལ་འཇུག་པ་འབའ་ཞིག་ལས། །གཅིག་ཏུ་བདེར་བཟོད་འགའ་མ་མཐོང་། །དེས་ན་སྤྱི་དང་བྱེ་བྲག་གི །རིག་པས་སྤྱིར་བཏང་འདུས་བྱས་ཀུན། །མི་རྟག་ཉིད་ཕྱིར་འདུ་བྱེད་ཀྱི། །སྡུག་བསྔལ་བསྟན་འདི་ཨེ་མ་མཚར། །མི་དབང་ཕྲ་བའི་མི་རྟག་ལ། །ངེས་པ་རྙེད་ན་སྟོང་ཉིད་ཀྱི། །དམིགས་པའང་རྙེད་པ་དཀའ་མིན་གྱི། །གཞན་དུ་གཏམ་འདི་ཚིག་ཙམ་པས། །གང་ཞིག་རིལ་བོར་འཛིན་པའི་བློ། །དེར་ནི་འཇིག་རྟེན་སྐྱེ་བོ་སྤྱོད། །གང་ཞིག་ཕྲ་བའི་ཕྲ་བ་ལ། །དཔྱད་ནས་འཕགས་རྣམས་བདེན་པ་གཟིགས། །དེ་སླད་ཕུང་ཁམས་སྐྱེ་མཆེད་ཀྱིས། །མཚོན་པ་ཤེས་པར་བྱ་བའི་གཞི། །ལམ་གསུམ་གྱིས་བསྡུས་རྟེན་འབྲེལ་གྱི། །ཡན་ལག་བཅུ་གཉིས་བདག་ཉིད་འདིར། །གཅིག་དང་དུ་བྲལ་རིག་པ་ཡིས། །གདགས་གཞིའི་སྟེང་ན་བཏགས་པའི་དོན། །ང་བདག་ཡོད་མེད་ལེགས་དཔྱད་ནས། །འཇིག་ལྟའི་རི་བོ་གཞིག་པར་བྱ། །འདི་ལྟར་རྟག་པ་གཅིག་པུ་དང་། །རང་དབང་ཅན་གྱི་བདག་མེད་པའི། །མཚང་རིག་ནས་ནི་གཟུང་འཛིན་གྱིས། །བསྡུས་པའི་ཆོས་ལ་བརྟགས་པར་བྱ། །དེ་ཡང་ཡོད་མེད་སྐྱེ་བྲལ་དང་། །རང་གཞན་ལས་སྐྱེ་འགོག་བྱེད་པའི། །གཏན་ཚིག་དག་གི་རྒྱུ་རྐྱེན་ཡང་། །བརྟེན་ནས་གདགས་པ་ཙམ་དུ་ཤེས། །གང་ཞིག་རྒྱུ་རྐྱེན་གཞན་དག་ལ། །བརྟེན་ནས་གདགས་དེར་རང་སྐྱེ་བའི། །རང་བཞིན་ཡོད་མིན་གང་གི་ཕྱིར། །སྐྱེ་མེད་པ་ལ་འགག་པའང་མེད། །དེས་ན་རྟག་མེད་མ་སྐྱེས་ཕྱིར། །མ་འགགས་གང་ཕྱིར་ཆད་མེད་པ། །འདི་ནི་སྤྲོས་པའི་མཐའ་བརྒྱད་དང་། །བྲལ་བའི་གནས་ལུགས་སྟོང་བ་ཉིད། །ཟབ་མོ་རྟོགས་པར་དཀའ་བའི་གནས། །གང་འདིར་ལེགས་པར་མཁྱེན་ནས་སླར། །རྟེན་འབྱུང་བསླུ་བ་མེད་པ་ལ། །ཐུགས་ཡིད་གཞོལ་བར་མཛོད་ཅིག་གུ། །འདི་ལྟར་སྡུག་བསྔལ་བདེན་པའི་མཚང་། །ལེགས་པར་རྟོགས་ན་ལས་ཉོན་གྱི། །ཀུན་འབྱུང་སྤང་ལ་ཚེགས་མེད་ཅིང་། །འགོག་པའང་དེ་ཡི་བྲལ་བ་ཙམ། །དེས་ན་བྱང་ཆུབ་མཆོག་ཉིད་ལ། །དམིགས་པའི་བསམ་པས་ཁྱད་པར་དུ། །བྱས་པའི་བསླབ་གསུམ་རིན་ཆེན་ནི། །ཐེག་ཆེན་ལམ་བདེན་ངོ་བོ་ཉིད། །འདི་ལས་ཚུལ་ཁྲིམས་བསླབ་པ་ནི། །ལམ་གྱི་རྟེན་དུ་ཤེས་བྱས་ནས། །དེར་བརྟེན་ཏིང་འཛིན་ཤེས་རབ་ཟུང་། །ལམ་དངོས་སུ་ནི་མཁྱེན་འཚལ་ལོ། །མདོར་ན་མང་དུ་སྨོས་ཅི་འཚལ། །སོ་བྱང་སྔགས་ཀྱི་སྡོམ་པ་ལ། །གནས་པས་ཐུན་མོང་ཞི་ལྷག་དང་། །ཐུན་མིན་རིམ་པ་གཉིས་ལ་བརྩོན། །དེ་ཡིས་ཚེ་འདིའམ་གཞན་དག་ཏུ། །སློབ་ལམ་རིག་འཛིན་རྣམ་པ་བཞི། །རིམ་གྱིས་བསྒྲོད་ནས་མི་སློབ་པའི། །ཟུང་འཇུག་སྐུ་བཞིའི་བདག་ཉིད་འཐོབ། །འདིར་ནི་རྒྱལ་སྲས་ཐེག་པ་ཡི། །གཞུང་དང་མན་ངག་ཐུན་མོང་བའི། །ལམ་གནད་འགའ་ཞིག་གསོལ་བཏབ་ཀྱི། །མཐའ་དག་བརྗོད་པས་ག་ལ་ལང་། །འོན་ཏེ་བསྟན་བཅོས་མི་ཤེས་དང་། །སྙན་ཚིག་དང་ནི་སྡེབ་སྦྱོར་གྱི། །མཛེས་བྲལ་གཏམ་དང་ཡུལ་ཉིད་ལ། །ཕན་པ་ཆུང་རྣམས་དོན་མེད་ཀྱང་། །རིགས་དང་རུས་དང་ཆོ་འབྲངས་ཀྱིས། །ཁྱོད་ཐུགས་དྲེགས་པར་མ་གྱུར་ཅིང་། །ཐོས་དང་བསམ་དང་སྒོམ་པ་ཡིས། །དུལ་བར་གྱུར་ཅེས་སྐྱེ་བོས་སྒྲོགས། །དེ་སླད་དམན་ལ་མི་བརྙས་ཤིང་། །ཁེངས་ལའང་འདུད་པར་མི་མཛད་པའི། །མི་དབང་རིན་ཆེན་དང་པོ་ཡི། །མཚན་ཉིད་འཛིན་པ་གང་དེ་ལ། །དམན་པ་ནོར་གྱིས་མགུ་བ་ལྟར། །དམ་པ་རྣམས་ནི་ལེགས་བཤད་ཀྱིས། །དགྱེས་པ་བསྐྱེད་སླད་བདག་གི་ཚིག །སྨན་དང་འདྲ་བ་འདི་ཐལ་ལོ། །དེ་ལྟར་གཞུང་ལུགས་ཀུན་གསལ་མའི། །ཕ་མཐའ་གཞལ་བས་ངལ་བརྟེན་ཀྱང་། །རང་གི་བློ་ནུས་རྩལ་བསྐྱེད་ཕྱིར། །སྤྲིངས་ཡིག་འདབ་མ་གཡོ་བར་བྱས། །ཚུལ་འདིར་ལེགས་བཤད་རྩ་བ་ཆེས་ཕྲ་ཡང་། །ལྷག་བསམ་གངས་ཀྱི་རི་བོའི་མདངས་འཛིན་ཞིང་། །དམ་པའི་གསུངས་རབ་དབྱིག་གི་བློ་གྲོས་མའི། །ཕངས་པར་འཁྲུངས་ཕྱིར་ནོངས་པའི་དྲི་མ་མེད། །དེ་སླད་ཞུ་མཆིད་པདྨ་དཀར་བོའི་ཕྲེང་། །ལྷ་ཅིག་སྙན་དབང་མཛེས་པའི་རྒྱན་ཉིད་དུ། །དད་དང་གུས་པའི་སོར་རྩེས་སྒྲོན་པ་ལ། །བདུད་རིགས་ལྷག་པས་གཡོ་བར་མ་གྱུར་ཅིག །ཡང་ཡང་གསོལ་བ་བཏབ་འདིས་མིའི་དབང་པོས། ཆེས་ཆེར་རྒྱལ་བའི་བསྟན་པ་གསལ་མཛད་ཅིང་། །དམན་དམན་འགྲོ་ལ་བུ་ལྟར་བརྩེར་དགོངས་པའི། །ངེས་ངེས་ཐུགས་དམ་རང་གིར་མཛད་པར་ཤོག། ཅེས་པའང་ས་སྐྱོང་བླ་མ་རྡོ་རྗེ་འཛིན་པ་ཆེན་པོའི་ཞབས་པད་གསེར་གྱི་པདྨ་ལ་ཉེ་བར་བཏུད་དེ་ཆོས་སྨྲ་བའི་བཙུན་པ་རྒྱལ་སྲས་གཞན་ཕན་མཐའ་ཡས་སུ་འབོད་པ་ནས་གུས་པས་ཕུལ་བ་དགེའོ།། །།