གསོལ་འདེབས་ཞལ་གསུངས་མ།

༄། །གསོལ་འདེབས་ཞལ་གསུངས་མ་བཞུགས། །རྒྱལ་སྲས་ཀུན་གྱི་བགྲོད་པ་གཅིག་པུའི་ལམ། །གཞན་ཕན་བྱང་ཆུབ་སེམས་སུ་ངེས་པའི་ཚུལ། །ཇི་བཞིན་རྟོགས་ནས་མཐའ་ཡས་འགྲོ་བ་ལ། །སྟོན་མཛད་དྲིན་ཅན་བླ་མར་གསོལ་བ་འདེབས། །ཞེས་གཞན་གསལ་ལྟར་གྱི་གསོལ་འདེབས་ཤོ་ལོ་ཀའི་མཇུག་ཏུ། །མནོག་ཆུང་ཚེ་འདིའི་བདེ་ལ་མི་ཞེན་ཞིང་། །སྲིད་པའི་ཕུན་ཚོགས་དུག་ལྡན་ཟས་བཞིན་དུ། །མཐོང་ནས་དབེན་པར་རྒྱལ་བའི་སྲས་ཀྱི་ལམ། །སྒྲུབ་ལ་བར་ཆད་མེད་པར་བྱིན་གྱིས་རློབས། །ཞེས་པའང་བསམ་ཡས་རབ་བྱུང་དབུ་མཛད་དགེ་སློང་དགེ་འདུན་འཕེལ་རྒྱས་ཀྱི་བཞེད་སྐོང་དུ་བཙུན་པ་རང་ཉིད་ཀྱིས་བྲིས་པ་དགེ། །།