གླིང་སྤྲུལ་རིན་པོ་ཆེ་མཁན་ཁྲིར་ཕེབས་སྐབས་ཞབས་བརྟན་དུ་ཕུལ་བ།
༄། །གླིང་སྤྲུལ་རིན་པོ་ཆེ་མཁན་ཁྲིར་ཕེབས་སྐབས་ཞབས་བརྟན་དུ་ཕུལ་བ་བཞུགས། །ཨོཾ་བདེ་ལེགས་སུ་གྱུར་ཅིག ས་གསུམ་འགྲོ་བའི་གཙུག་གི་རྒྱན་གཅིག་པུ། །ཐུབ་བསྟན་ཡིད་བཞིན་དབང་གི་རྒྱལ་པོ་ཉིད། །བཤད་སྒྲུབ་རྒྱལ་མཚན་མཐོན་པོར་རྩེར་འཛིན་པའི། །མཉམ་མེད་དཔལ་ལྡན་བཟང་པོ་རྒྱལ་གྱུར་ཅིག །ཐུབ་པའི་བསྟན་ལ་ཐུབ་པའི་དབང་པོ་བཞིན། །བདུད་སྡེའི་གཡུལ་ལས་རྒྱལ་བའི་དགེ་མཚན་གྱི། །དཔལ་བཟང་སྲིད་ཞིའི་བླ་ན་མངོན་མཐོ་བའི། །བསྟན་འགྲོའི་མགོན་པོར་ཡུན་རིང་འབར་གྱུར་ཅིག །བཀའ་ཐུབ་མི་ཤིག་འདུལ་བསྟན་རྩ་བ་བརླིངས། །ལུང་དང་རིགས་པའི་རྒྱལ་མཚན་རྩེ་མཐོ་བའི། །གཡོ་མེད་ཏིང་འཛིན་ལྗོན་པ་དཔལ་ཡོན་གྱི། །ཡལ་འདབ་བཟང་པོ་ཕྱོགས་བརྒྱར་གྲོལ་གྱུར་ཅིག །བསྟན་པའི་དཔལ་གྱུར་བླ་མའི་ཞབས་པད་བརྟན། །བསྟན་འཛིན་སྐྱེས་བུས་ས་སྟེང་ཡོངས་ལ་ཁྱབ། བསྟན་པའི་སྦྱིན་བདག་མངའ་ཐང་འབྱོར་བ་རྒྱས། །བསྟན་པ་ཡུན་རིང་གནས་པའི་བཀྲ་ཤིས་ཤོག །ཅེས་པ་འདི་ལུང་དང་རྟོགས་པའི་དབང་ཕྱུག་གླིང་སྤྲུལ་པའི་སྐུ་རིན་པོ་ཆེ་ཐུབ་བསྟན་རྒྱལ་མཚན་དཔལ་བཟང་པོ་ཉིད། བདག་ཅག་གི་སྟོན་པས་ཆོ་འཕྲུལ་ཆེན་པོ་བསྟན་པའི་སྒོ་ནས་བདུད་རིགས་ཕམ་པར་མཛད་པའི་དུས་སྟོན་གྱི་སྐབས་སུ། གངས་རིའི་ལྗོངས་འདིར་བསྟན་པ་རྒྱ་མཚོའི་སྙིང་པོ་བཤད་སྒྲུབ་གཉིས་ལྡན་གྱི་སྒོ་ནས་འཛིན་པ་ཆོས་གྲྭ་ཆེན་པོ་མདོ་ཁམས་རྫོགས་ཆེན་དགོན་ཞེས་ཡོངས་སུ་གྲགས་པ་རུ་དམ་བསམ་གཏན་ཆོས་གླིང་གི་མཁན་ཁྲིར་གསར་དུ་ཕེབས་པའི་ཚེ་ཆོས་སྨྲ་བའི་བཙུན་པ་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་དུ་འབོད་པས་ཤིས་བརྗོད་ཀྱི་ཚིགས་སུ་བཅད་པ་སྟེ་ཇི་ལྟར་སྨོན་པའི་དོན་རྣམས་ཡོངས་སུ་འགྲུབ་པར་ཤོག། དགེའོ། །