གཡག་ཟེ་མཆོག་སྤྲུལ་མྱུར་འབྱོན་གསོལ་འདེབས།
༄། །གཡག་ཟེ་མཆོག་སྤྲུལ་མྱུར་འབྱོན་གསོལ་འདེབས་བཞུགས་སོ། །ཨོཾ་སྭ་སྟི། །གང་གི་ཞབས་སེན་ཟླ་ཕྲེང་གིས། །རྣམ་སད་དབང་པོའི་གཙུག་ནོན་པའི། །ཟླ་བྲལ་སྟོན་པ་དྲང་སྲོང་ཆེ། །བདེན་ཚིག་མཐུན་འགྱུར་མཛད་ལ་དགོངས། །པད་མའི་མཚོ་ལ་ཉིན་བྱེད་བཞིན། །ཐུབ་བསྟན་དར་ཞིང་རྒྱས་མཛད་པའི། །དགེ་བའི་བཤེས་ཀྱི་སྒྱུ་འཕྲུལ་གར། །གདུལ་བྱའི་མོས་ངོར་མྱུར་འབྱོན་གསོལ། །གཉིས་སྣང་མུན་པ་ཀུན་ཟ་བའི། །འོད་གསལ་རྟ་ལྗང་དབང་པོའི་གཟིས། །འགྲོ་བློའི་འདབ་ལྡན་སྲིད་མཐའི་བར། །སྐྱོང་བའི་ཞལ་བཞེས་གཡེལ་མེད་གསོལ། །བདག་ལྟའི་རྩ་བ་ལ་སྡང་བའི། །ཕུལ་བྱུང་མཁྱེན་རབ་མྱང་འདས་ཀྱི། །ཟླ་བོར་སོང་ཡང་ཐུགས་རྗེའི་རྒྱུན། །ཞི་བའི་མཐའ་ལ་ཁྲོ་བར་མཛོད། །སྙིང་ནས་གསོལ་བ་བཏབ་པའི་འབྲས། །དད་པའི་ཆུ་མཚོ་ལ་ཤར་བ། །ཡང་སྲིད་འོད་དཀར་གསར་བའི་བཞིན། །ཕྱོགས་ལས་རྣམ་པར་རྒྱལ་གྱུར་ཅིག །ཅེས་པའང་གཡག་ཟེ་དགོན་བླ་གྲྭ་རྣམས་ཀྱི་བཞེད་སྐོང་དུ་བཙུན་པ་གཞན་ཕན་མཐའ་ཡས་པས་སྤེལ་བ་རེ་འབྲས་དོན་ལྡན་དུ་གྱུར་ཅིག། བཀྲ་ཤིས། །དགེའོ། །