བླ་མའི་རྣལ་འབྱོར་འོག་མིན་གསང་ལམ།
༄། །བླ་མའི་རྣལ་འབྱོར་འོག་མིན་གསང་ལམ་ཞེས་བྱ་བ་བཞུགས་སོ། །བླ་མ་ལ་ཕྱག་འཚལ་ལོ། །འདིར་བླ་མའི་རྣལ་འབྱོར་བསྒོམ་པར་འདོད་པས་དད་དམ་རྣམ་པར་དག་པ་གཞིར་བཞག་སྟེ། སྐྱབས་སེམས་སྔོན་དུ་འགྲོ་བས་ཆོས་ཐམས་ཅད་བདེན་སྟོང་སྒྱུ་མ་ལྟ་བུའི་མཚན་ཉིད་དུ་བལྟས་ཏེ། སྭ་བྷ་ཝའི་སྔགས་དོན་ལ་བསམ་མཐར། ཆོས་ཀུན་མི་དམིགས་སྟོང་བའི་ངང་ཉིད་ལས། །སྣང་སྲིད་དག་པ་འོག་མིན་སྟུག་པོའི་གཞིར། །ཡེ་ཤེས་རང་སྣང་ལས་གྲུབ་གཞལ་མེད་ཁང་། །མཚན་ཉིད་ཀུན་རྫོགས་དབུས་སུ་སེང་གེའི་ཁྲི། །སྐྱོན་བྲལ་པདྨ་ཐབས་ཤེས་ཉི་ཟླའི་སྟེང་། །རྒྱལ་ཀུན་འདུས་ཞལ་བླ་མ་རྣམ་སྣང་མཛད། །ཞི་འཛུམ་སྤྲུལ་སྐུའི་ཆས་རྫོགས་པད་ཞྭས་མཛེས། །ཆོས་འཆད་ཕྱག་རྒྱ་དང་བཅས་སྐྱིལ་ཀྲུང་བཞུགས། །དེ་ཡི་ཐུགས་ཀར་རྣམ་པར་སྣང་མཛད་ཆེ། །གསེར་མདོག་སྐྱིལ་ཀྲུང་མཉམ་བཞག་ཕྱག་རྒྱ་ཅན། །དར་ལའི་གོས་དང་རལ་བའི་ཅོད་པཎ་འཕྱང་། །ཐུགས་སྲོག་ཟླ་དཀྱིལ་ཨ་དཀར་སྔགས་བཅས་བསྒོམ། །དེ་ལས་འོད་འཕྲོས་འོག་མིན་ཆེན་པོ་ནས། །དཔག་མེད་རྒྱལ་བའི་ཡེ་ཤེས་ཆུ་ཟླའི་གར། །མོས་བློར་འཚམས་པ་མཁའ་ལ་ཆར་སྤྲིན་བཞིན། །སྤྱན་དྲངས་བསྐྱེད་པའི་ལྷ་དང་རོ་གཅིག་གྱུར། །ཨོཾ་མ་ཧཱ་གུ་རུ་བཻ་རོ་ཙ་ན་ཛྙཱ་ན་བཛྲ་ས་མཱ་ཛཿ ཛཿཧཱུཾ་བཾ་ཧོ༔ ན་མཿཨ་ཏི་པཱུ་ཧོ། ཨོཾ་དངོས་འབྱོར་ཡིད་སྤྲུལ་མཆོད་པའི་སྤྲིན། །དཔག་མེད་ནམ་མཁའི་ཁམས་གང་བ། །བླ་མ་བཅོམ་ལྡན་རྣམ་སྣང་མཛད། །རྒྱལ་བ་སྲས་དང་བཅས་ལ་འབུལ། །ཐུགས་རྗེས་དགོངས་ཏེ་བཞེས་ནས་ཀྱང་། །བདག་ལ་བྱིན་གྱིས་བརླབ་ཏུ་གསོལ། །ཨོཾ་གུ་རུ་བཻ་རོ་ཙ་ན་ས་པཱ་རི་ཝ་ར་རུ་པ་ཤབྟ་གྷནྡྷེ་ར་ས་སྤཪྴེ་པཱུ་ཙ་ཧོ། །ཀྱེ་ཀྱེ་བླ་མ་རྡོ་རྗེ་འཛིན་པ་ཀྱེ། །ཐུགས་རྗེས་དགོངས་ཤིག་མགོན་པོ་ཐུགས་རྗེ་ཅན། །བདག་འཛིན་དམ་པོས་དཀྲིས་པའི་འཆིང་ལྡན་དག །བདེ་ཆེན་ཞིང་དུ་དྲོངས་ཤིག་བདེ་བར་གཤེགས། །གང་གི་ཡེ་ཤེས་ཚོགས་ཀྱི་སྐུ་དགེ་འདུན། གང་གི་ཆགས་བྲལ་ཟབ་ཞིའི་གསུང་དམ་ཆོས། །གང་གི་རྣམ་ཀུན་མཁྱེན་པའི་ཐུགས་སངས་རྒྱས། །གང་གི་གསང་གསུམ་དཀོན་མཆོག་རིན་པོ་ཆེ། །སྐྱབས་གནས་ཀུན་འདུས་བླ་མ་རྣམ་སྣང་མཛད། །ཁྱོད་ལ་སྙིང་ནས་གུས་པས་ཕྱག་འཚལ་ཞིང་། །སྙིང་ནས་གུས་པས་སྐྱབས་སུ་མཆི་ལགས་ན། །བདག་ལུས་ལོངས་སྤྱོད་དང་བཅས་ཉིད་ཀྱིས་བཞེས། །ཐོག་མེད་ནས་བསགས་སྒྲིབ་པའི་ཕུང་བོ་ཀུན། །དེ་རིང་གནོང་འགྱོད་དྲག་པོས་བཤགས་བགྱི་ཞིང་། །མགོན་པོ་ཁྱོད་ཀྱི་མཛད་ལ་ཡི་རང་བས། །རྟག་པར་ཆོས་འཁོར་བསྐོར་བཞིན་བཞུགས་གསོལ་འདེབས། །དེ་བཞིན་གཤེགས་པ་ཁྱེད་སྐུ་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཁྱོད་ཀྱི་མཚན་མཆོག་བཟང་པོ་ཅི་འདྲ་བ། །དེ་འདྲ་ཁོ་ནར་བདག་ཀྱང་འགྱུར་བར་ཤོག །ཨོཾ་ཨཱཿགུ་རུ་བཻ་རོ་ཙ་ན་ཛྙཱ་ན་སིདྡྷི་ཧཱུཾ༔ ཞེས་ཅི་ནུས་བཟླས་མཐར། སླར་ཡང་གསོལ་འདེབས་ཅི་རིགས་པས་མཚམས་སྦྱར་ཏེ་དབང་བཞི་བླང་རྗེས་ཡེ་ཤེས་པ་ཆོས་ཀྱི་དབྱིངས་སུ་གཤེགས་ནས་ཐུགས་ཡིད་བསྲེས་ཏེ་ཅི་གནས་སུ་མཉམ་པར་བཞག དེ་རྗེས་ཆོས་ཐམས་ཅད་ཡེ་ཤེས་སྒྱུ་མར་ལམ་དུ་བྱེད་པས་དགེ་བ་རྫོགས་བྱང་དུ་བསྔོ་བ་སོགས་བྱའོ། །ཞེས་པའང་མཆོག་གཟིགས་སྤྲུལ་པའི་སྐུ་རིན་པོ་ཆེ་ཐུབ་བསྟན་རྒྱལ་མཚན་དཔལ་བཟང་པོའི་ཞལ་སྔ་ནས་ལྷ་རྫས་དང་བཅས་ཡང་ཡང་བསྐུལ་བའི་ཐུགས་བཞེད་ལྡོག་མ་ནུས་པར་བཙུན་པ་གཞན་ཕན་མཐའ་ཡས་པས་ཤར་མར་སྤེལ་བ་དགེ། །།