བླ་མ་འཇམ་དཔལ་དབྱངས་ཀྱི་རྣམ་པར་སྒྲུབ་པའི་ཐབས་ཤེས་རབ་ཀྱི་རྣལ་འབྱོར་ལ་འཇུག་པ།
༄། །བླ་མ་འཇམ་དཔལ་དབྱངས་ཀྱི་རྣམ་པར་སྒྲུབ་པའི་ཐབས་ཤེས་རབ་ཀྱི་རྣལ་འབྱོར་ལ་འཇུག་པ་ཞེས་བྱ་བ་བཞུགས། །བླ་མ་དང་དབྱེར་མ་མཆིས་པ་རྗེ་མཙུན་མཁྱེན་པའི་གཏེར་ལ་ཕྱག་འཚལ་ཞིང་སྐྱབས་སུ་མཆིའོ། །འདིར་བླ་མ་འཇམ་དཔལ་དབྱངས་སྒྲུབ་པར་འདོད་པས་སྐྱབས་འགྲོ་སྤྱི་དང་སེམས་བསྐྱེད་སྡོམ་བཟུང་སྔོན་དུ་འགྲོ་བས་དམིགས་འདོན་ཡ་མ་བྲལ་བར་འདི་བཞིན་བྱའོ། །ན་མོ་གུ་རུ་མཉྫ་ཤྲི་ཛྙཱ་ན་ས་ཏྭ་ཡེ། རང་མདུན་ནམ་མཁར་པད་སྡོང་ཡངས་པའི་དབུས། །མི་འཇིགས་སེང་གེས་བཏེགས་པའི་ཁྲི་སྟེང་དུ། །ཆུ་སྐྱེས་གེ་སར་ལས་མཐོན་ཟླ་གདན་ལ། །རྒྱལ་ཀུན་འདུས་ཞལ་མཉམ་མེད་བླ་མ་ནི། །དྷིཿཡིག་དམར་སེར་ལས་གྱུར་འཇམ་དཔལ་དབྱངས། །མཚམས་སྤྲིན་གཞོན་ནུའི་མདངས་འཛིན་སྐུའི་དཀྱིལ་འཁོར། །ཞལ་གཅིག་ཕྱག་གཉིས་མཉམ་པའི་སྐྱིལ་དཀྲུང་ཅན། །མཁྱེན་བརྩེའི་སྤྱན་ཟུང་འཛུམ་པས་འགྲོ་ལ་གཟིགས། །ཤེས་རབ་རལ་གྲི་འཛིན་པའི་ཕྱག་གཡས་ཀྱི། །སྟངས་སྟབས་ནམ་མཁར་གདེངས་པས་གདུལ་བྱའི་བློའི། །མི་ཤེས་དྲྭ་བ་མཐའ་དག་གཅོད་མཛད་ཅིང་། །ཕྱག་གཡོན་སྟོང་ཕྲག་བརྒྱ་བའི་གླེགས་བམ་བསྣམས། །སྐུ་ལ་ཟག་མེད་ཕུང་པོའི་དར་གོས་དང་། །རྣམ་བྱང་ཡན་ལག་མཚོན་པའི་རྒྱན་ཆས་སྤུད། །ཡེ་ཤེས་འོད་ཕུང་འཇའ་གུར་འཁྱིལ་བའི་ཀློང་། །སྐྱབས་ཀུན་འདུས་པའི་བདག་ཉིད་ཆེན་པོར་བཞུགས། །དེ་ལྟར་གསལ་བའི་སྤྱི་མགྲིན་སྙིང་ག་རུ། །ཟླ་དཀྱིལ་པད་ཉི་རིམ་པར་གནས་པའི་གཞིར། །རྒྱལ་ཀུན་གསང་གསུམ་རྡོ་རྗེའི་ངོ་བོ་ཉིད་། །ཡི་གེ་གསུམ་གྱི་རྣམ་པར་གསལ་བ་ལས། །འོད་འཕྲོས་རང་བཞིན་གནས་ནས་ཡེ་ཤེས་པ། །སྤྱན་དྲངས་དམ་ཡེ་གཉིས་མེད་གྱུར་པ་ཡི། །སྐུ་ལས་འབྱུང་བའི་འོད་ཀྱིས་བདག་སོགས་འགྲོའི། །མི་ཤེས་རྨོངས་པའི་བློ་མུན་བསལ་བར་གྱུར། །ཞེས་བསམ་ནས། ཨོཾ་ཝ་ཀི་ཤྭ་རི་མཱུཾ། ཨོཾ་ཨཱཿམ་ཧྭ་གུ་རུ་མཉྫུ་ཤྲཱི་པྲ་ཛྙཱ་སརྦ་སིདྡྷི་ཕ་ལ་ཧཱུཾ། ཞེས་དངོས་གྲུབ་གསོལ་བའི་སྔགས་ཅི་ནུས་བཟླས་མཐར། གང་བློ་མའི་བསྟོད་པ་བྱས་རྗེས་དབང་བཞི་ལེན་པའི་དམིགས་པ་དང་མཐར་ཚོགས་ཞིང་རང་ལ་བསྟིམས་ནས་ཐུགས་ཡིད་བསྲེས་ཏེ་ཅི་གནས་སུ་མཉམ་པར་འཇོག་པ་ནི་ཐུན་གྱི་དངོས་གཞི་དང་། སྤྲོ་ན་བསྟོད་པའི་སྔོན་རོལ་ཏུ་རང་གི་སྙིང་ཁ་ནས་མཆོད་པའི་ལྷ་མོ་སྤྲོས་ཏེ་མཆོད་པར་བསམ་ནས། རབ་འབྱམས་རྒྱ་མཚོ་མའི་མཆོད་ཕྲེང་ཡང་སྦྱར་ཞིང་རྗེས་ལ་བསྔོ་སྨོན་སྤྱི་དང་། བཟང་པོ་སྤྱོད་པའི་སྨོན་ལམ་ཡང་གདབ་པར་བྱའོ། །ཞེས་པའང་རང་གི་སློབ་བུ་དགེ་སློང་པདྨ་དམ་ཆོས་བཟང་པོ་ནས་ལྷ་རྫས་དང་ཙི་ནའི་བཏུང་བ་བག་བཅས་བླ་མ་འཇམ་དཔལ་དབྱངས་ཀྱི་ངོ་བོར་སྒྲུབ་པའི་ཐབས་ཉུང་ངུ་ཞིག་དགོས་ཞེས་ནན་ཏན་ཆེན་པོས་བསྐུལ་པའི་ངོར་རྒྱལ་བའི་སྲས་པོའི་མིང་གི་ཅོད་པཎ་འཆང་བ་གཞན་ཕན་མཐའ་ཡས་འོད་ཟེར་དུ་འབོད་པས་སྨྲས་པའི་ཡི་གེ་བ་ནི་འཇིགས་མེད་ངོ་མཚར་རོ། །དགེའོ། །