ཡུལ་ལྷ་ཆེན་པོ་རྡོ་རྗེ་གཡུང་དྲུང་རྩལ་གྱི་བསང་མཆོད་འདོད་དགུའི་རེ་བསྐོང་།
༄། །ཡུལ་ལྷ་ཆེན་པོ་རྡོ་རྗེ་གཡུང་དྲུང་རྩལ་གྱི་བསང་མཆོད་འདོད་དགུའི་རེ་བསྐོང་ཞེས་བྱ་བ་བཞུགས་སོ། །སྣང་སྲིད་ཟིལ་གནོན་པདྨ་རྒྱལ་པོ་ལ་ཕྱག་འཚལ་ལོ། །གང་མཚན་རྣ་བར་ལན་གཅིག་ལྷུངས་པ་ཡིས། །ཉེར་བཀུགས་བསོན་ནམས་འདི་ཡང་དམན་མིན་ན། །རྟག་ཏུ་ཡིད་ལ་གོམས་པར་བྱས་པའི་འབྲས། །བསྐལ་བ་བརྒྱར་ཡང་ཆུད་མི་ཟ་བ་ཡིན། །དེ་ཕྱིར་ཨོ་རྒྱན་བླ་མ་དེས། །ལྗོངས་འདིའི་མི་མིན་མཆོག་དམན་ཀུན། །དམ་ལ་བཏགས་པའི་ནང་ཚན་ལས། །ཟོ་དོར་གཉན་པོའི་མཆོད་ཐབས་འབྲི། །དེ་ཡང་བསང་རྫས་དང་བསང་གཏོར་སྐྱེམས་ཕུད་སོགས་མཐོང་བརྒྱུད་ལྟར་ཉེར་བསྡོགས་བགྱིས་ཏེ། སྒྲུབ་པ་པོ་གདན་ལ་འཁོད་དེ། དམ་ཚིག་གི་རྫས་རྡོར་དྲིལ་དང་བཅས་ལྷག་པའི་ལྷའི་ང་རྒྱལ་དང་མ་བྲལ་བའི་ངང་ནས་རྫས་རྣམས་བྱིན་གྱིས་བརླབས་ལ། འདི་སྐད་དོ། །རཾ་ཡཾ་ཁཾ། ལན་གསུམ། རཾ་ཡཾ་ཁཾ་ལས་ཡེ་ཤེས་མེ་རླུང་ཆུ། །བྱུང་བས་མ་དག་དངོས་ཞེན་བསྲེག་གཏོར་བཀྲུས། །ཨོཾ་ཨཱཿཧཱུྃ་གིས་སྟོང་ཆེན་ཀཱ་པ་ལར། །རྫས་རྣམས་ཡེ་ཤེས་བདུད་རྩིར་སྦྱངས་སྤེལ་བསྒྱུར། །ཨོཾ་ཨཱ་ཧཱུཾ་ལན་གསུམ། ཀྱེ་འབྱུང་ལྔ་རྣམ་དག་ཡུམ་ལྔའི་མཁའ་ཀློང་ནས། །བདེ་ཆེན་ཡེ་ཤེས་སྒྱུ་མའི་སྐུར་བཞེངས་པ། །སྐུ་གསུམ་སྟོན་པ་ཞི་དང་ཁྲོ་བོའི་ཚོགས། །དེང་འདིར་བསོད་ནམས་ཞིང་དུ་སྤྱན་འདྲེན་གཤེགས། གཞན་ཡང་གཉུག་གནས་དཀར་ཕྱོགས་སྐྱོང་བའི་སྡེ། །སྤྱི་དང་བྱེ་བྲག་ཡུལ་འདིའི་ཁ་འཛིན་གྱི། །བྱེད་པོ་ལྷ་བཙན་རྡོ་རྗེ་གཡུང་དྲུང་སྩལ། །བཙུན་མོ་སྲས་འཁོར་དང་བཅས་འདིར་གཤེགས་ཤིག །གུ་རུ་དྷེ་ཝ་ཌཱཀྐི་ནི་ཛྙཱ་ན་ལོ་ཀ་པཱ་ལ་སརྦ་ས་མ་ཡ་ཛ་ཛཿ ཞེས་སྤོས་རོལ་དང་བཅས་མཆོད་སྦྱིན་གྱི་ཡུལ་སྤྱན་དྲངས་ནས་སླར་ཡང་འདི་སྐད་དོ༎ ཀྱཻ་ནང་གསལ་རྐྱེན་གྱིས་མ་བསྐྱེད་པའི། །ཡེ་ཤེས་གསུམ་གྱི་རང་བཞིན་ལ། །བདག་དང་ངོ་བོ་རྒྱུ་གཅིག་པའི། །མ་རིག་དྲི་མ་ཕོག་པ་བསངས། །སྤྱི་གཞི་རང་བྱུང་ཆོས་གསུམ་གྱིས། །གྲོལ་བའི་གཞི་རུ་བཅོས་པ་ལ། །དེ་དང་ལྷན་སྐྱེས་མ་རིག་གྲིབ། །ཆོས་དྲུག་ཀུན་བཟང་དགོངས་པར་བསངས། །བདག་རྟོག་གཟུགས་ཀྱི་བག་ཆགས་ལ། །དེར་འཛིན་ཀུན་འབྱུང་འཁྲུལ་བའི་གཞི། །རྐྱེན་བཞིས་བསྐྱེད་པའི་རྟེན་འབྲེལ་ཀུན། །ལུགས་ལྡོག་རྩ་བ་ཆོད་པར་བསངས། །འོན་ཀྱང་བདག་ཏུ་ཞེན་པ་ལས། འགྲོ་བའི་བདེ་སྡུག་སྣ་ཚོགས་པ། །དེ་དེར་མངོན་དུ་སྨིན་པ་གང་། སྒྱུ་མར་རྟོགས་པའི་ལྟ་བས་བསངས། ཁྱད་པར་མི་ཤེས་གཏི་མུག་གིས། །རིགས་མཐུན་གཙང་མ་དོན་གཉེར་བའི། །ལྷ་དང་འཁོར་དུ་གྱུར་པ་གང་། །འཁོར་འདས་མཉམ་པ་ཉིད་དུ་བསངས། །དེ་ལྟར་དོན་དམ་བདེན་པ་ལ། །བསངས་བྱ་བསངས་བྱེད་བྲལ་ན་ཡང་། ཚོགས་གཉིས་རྒྱུ་ལས་རྟོགས་པའི་ཕྱིར། །མཆོག་གསུམ་སྲུང་མར་བཅས་པ་བསངས། །དེ་ཡང་རང་རང་དང་མཐུན་པའི། །མཆོད་པའི་སྤྲིན་ཕུང་བསམ་ཡས་ནི། །ཀུན་ཏུ་བཟང་པོའི་ཡོན་བཞིན་དུ། །སྤྲུལ་ནས་དགྱེས་པ་བསྐྱེད་ཕྱིར་འབུལ། །ཁྱད་པར་ལྷ་བཙན་ཆེན་པོ་ནི། །ཅང་ཤེས་རྟ་དང་ཤེལ་དཀར་ཕྲེང་། །ཤེལ་གྱི་ཁྲབ་རྨོག་མདུང་དར་སོགས། །མངོན་རྟོགས་དྲན་བཞིན་མཆོད་ཅིང་བསྟོད། །དེ་ལྟར་བསངས་མཆོད་ཕུལ་བའི་མཐུས། །པདྨའི་བཀའ་ལུང་དྲན་མཛོད་ལ། །རྒྱལ་བསྟན་སྤྱི་དང་ཁྱད་པར་དུ། །གསང་ཆེན་བསྟན་པ་སྤེལ་བ་དང་། །ལྗོངས་འདིར་སད་སེར་བཙའ་ཐན་དང་། །མི་ནད་ཕྱུགས་ནད་ལ་སོགས་པ། །ཞི་ནས་བདེ་སྐྱིད་དབྱར་མཚོ་བཞིན། །འཕེལ་ཞིང་རྒྱས་པའི་ཕྲིན་ལས་མཛོད། །ཁྱད་པར་བསྟན་པ་རྒྱ་མཚོའི་སྲོག །བླ་མའི་ཞབས་པད་བརྟན་པ་དང་། དེ་འཛིན་ཚོགས་ཀྱང་བཤད་སྒྲུབ་ཀྱི། །མཛད་པས་ཉིན་མཚན་འདའ་བར་ཤོག །ཅེས་མཆོད་བསྟོད་ཟིན་པ་དང་། བཛྲ་མུཿས་གཤེགས་གསོལ་བྱ་ཞིང་ཤིས་པ་བརྗོད། །གྲངས་བསོགས་ཚེ་བསང་རྐྱང་བ་སོགས་པས་འཐུས། །ཞེས་པའང་རྗེ་བླ་མ་སྐུ་མཆེད་ཀྱི་གསུང་ལྟར་བཀའ་འབངས་སུ་གཏོགས་པ་རྒྱལ་བའི་སྲས་པོའི་མིང་གི་ཅོད་པཎ་འཆང་བ་གཞན་ཕན་མཐའ་ཡས་འོད་ཟེར་དུ་འབོད་པས་ཡར་ཚེས་དགེ་བར་སྦྱར་བའོ།། །།