སྨན་བཙུན་གཡུ་སྒྲོན་མཆེད་ལྔ་ལ་གསོལ་མཆོད།
༄། །སྨན་བཙུན་གཡུ་སྒྲོན་མཆེད་ལྔ་ལ་གསོལ་མཆོད། །སྨན་བཙུན་གཡུ་སྒྲོན་མཆེད་ལྔ་ལ་གསོལ་མཆོད་གཏོང་བར་འདོད་པས་མཆོད་གཏོར་གཞུང་བཞིན་བཤམས་ཤིང་བྱིན་གྱིས་བརླབས་ལ་འདི་སྐད་དོ། །ཧཱུྃ མ་བཅོས་སྤྲོས་བྲལ་ཆོས་སྐུ་ལས། །མ་འགག་ཐུགས་རྗེ་རོལ་པའི་རྩལ། །མ་མོའི་སྣང་ཆར་ཤར་བ་ནི། །མ་ཅིག་རྡོ་རྗེ་གཡུ་སྒྲོན་མ། །མ་ལུས་ཞིང་གི་མཆོད་སྤྲིན་ཀུན། །མ་མར་ཕུལ་བ་འདི་བཞེས་ནས། །མ་ལ་འབོད་པའི་བུ་རྣམས་ལ། །མ་གཡེལ་བརྩེ་བས་སྐྱོངས་མཛོད་ཅིག །མ་རིག་དབང་གྱུར་བདག་ཅག་གིས། །མ་ཁྱོད་ཐུགས་དང་འགལ་བའི་ལས། །མ་འཆལ་གང་བགྱིས་མཐོལ་བཤགས་ཤིང་། །མ་ཡི་དགྱེས་བསྐང་རྫས་ཀུན་འབུལ། །མ་བུར་འབྲེལ་བའི་དམ་ཚིག་དོན། །མ་གཡེལ་བུ་ལ་གྲོགས་མཛད་ནས། །མ་ལུས་ཞིང་གི་འགྲོ་བ་ཀུན། །མ་སྐྱེས་ཆོས་སྐུར་དབུག་དབྱུང་མཛོད། །ཅེས་མ་མོ་སེམས་ཀྱི་ཆོ་འཕྲུལ་ཙམ་དུ་བལྟས་ལ་གཏོར་མ་གཤེགས་པར་བྱའོ། །ཅེས་པའང་ཀོང་ང་ཕོད་པའི་སྔགས་འཆང་མཐུ་སྟོབས་ཀྱི་མངའ་བདག་ཟླ་བ་ཚེ་བརྟན་རྒྱལ་བོའི་གསུང་གིས་བསྐུལ་ངོར་རྒྱལ་སྲས་གཞན་ཕན་མཐའ་ཡས་པས་ཤར་མར་སྤེལ་བ་མངྒ་ལཾ།། །།