ཆོས་སྐྱོང་གནམ་ལྷའི་མཆོད་འཕྲིན་བསམ་དོན་མྱུར་འགྲུབ།

༄། །ཆོས་སྐྱོང་གནམ་ལྷའི་མཆོད་འཕྲིན་བསམ་དོན་མྱུར་འགྲུབ་ཅེས་བྱ་བ་བཞུགས། །དཔལ་ཧེ་རུ་ཀ་དང་དབྱེར་མ་མཆིས་པ་རྗེ་བཙུན་བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །འདིར་བཀའ་སྲུང་གནམ་ལྷ་ཆེན་པོ་མཆོད་པར་འདོད་པའི་གང་ཟག་གིས་མཐུན་རྫས་མཆོད་གཏོར་སོགས་གཞུང་བཞིན་བཤམས་ལ་འབྲུ་གསུམ་གྱིས་སྦྱང་སྤེལ་བསྒྱུར་ནས་ཚིག་འདི་དག་གིས་རིམ་བཞིན་འབུལ་བར་བྱའོ། །སྤྱན་འདྲེན་ནི། །ཧྲཱིཿ སྤྱན་རས་གཟིགས་དབང་རྟ་མཆོག་ཧེ་རུ་ཀའི། །རྣམ་རོལ་རྗེ་བཙུན་པདྨ་ཐོད་ཕྲེང་གི་། །བཀའ་རྟགས་ཕྱག་རྒྱས་བཅིང་ལས་མི་འདའ་བའི། །ཆོས་སྐྱོང་གནམ་ལྷ་ཆེན་པོ་གནས་འདིར་གཤེགས། །བཞུགས་གསོལ་ནི། བདེ་ཆེན་དབང་དྲག་རོལ་བའི་ཕོ་བྲང་འདིར། །པད་ཉི་དགྲ་བགེགས་བསྣོལ་བའི་ཁྲི་སྟེང་དུ། །དམ་ཉམས་སྲོག་དབུག་རྟེན་གྱི་རཀྟ་ལ། །རྔམས་པའི་སྟབས་ཀྱིས་རོལ་བཞིན་བཞུགས་སུ་གསོལ། །བསྐང་བཤགས་ནི། ཧྲཱིཿ བསྟན་སྲུང་ཆེན་པོ་བརྩེ་བས་བདག་ལ་དགོངས། །རིག་འཛིན་བླ་མ་བརྒྱུད་པའི་ཐ་ཚིག་བཞིན། །རྣལ་འབྱོར་བདག་གིས་བརྟེན་པའི་ལྷ་ཁྱོད་ལ། །མཐུན་རྫས་འདོད་པའི་ལོངས་སྤྱོད་འབུལ་བ་ནི། །དབང་ལྔའི་མེ་ཏོག་བཀྲ་པའི་ལྷུན་པོ་ལ། །ཚིལ་ཆེན་བདུག་སྤོས་སྤྲིན་གྱི་བླ་བྲེ་དང་། །ཞུན་ཆེན་སྣང་གསལ་ཉི་ཟླའི་རྣ་ལུང་དཔྱངས། །མཁྲིས་པའི་དྲི་ཆབ་མཁྱིལ་བའི་རྒྱ་མཚོ་ཡི། །ཤ་རུས་ཞལ་ཟས་རྒྱུ་སྐར་ཕྲེང་བ་དང་། །སྣ་ཚོགས་མཆོད་པའི་དབང་གཞུ་ལྷན་ཅིག་འཛིན། །ཀུན་བཟང་མཆོད་སྤྲིན་མུ་མཐའ་མེད་པ་འདིས། །ཆོས་དབྱིངས་ནམ་མཁའི་ཁྱོན་ཀུན་ཡོངས་བསྐངས་ཏེ། ཏིང་འཛིན་སྔགས་དང་ཕྱག་རྒྱའི་བྱིན་རླབས་ཀྱིས། །དགྲ་ལྷའི་དབང་པོ་དགྱེས་ཕྱིར་འབུལ་ལགས་ན། །རྟག་ཏུ་སྲུང་སྐྱོབ་གཡེལ་མེད་མཛད་པ་དང་། ཆོས་མཐུན་བསམ་དོན་ལྷུན་གྱིས་གྲུབ་པར་མཛོད། །ལྷ་ཁྱོད་འཇིག་རྟེན་དྲེག་པའི་ཚུལ་འཛིན་ཕྱིར། །བདག་ཅག་རྨོངས་དང་གཡེང་བའི་དབང་གྱུར་པའི། །ནོངས་པ་མ་ལུས་མཐོལ་བཤགས་བཟོད་གསོལ་ན། །བླ་མེད་ཚངས་པ་མཆོག་གི་དངོས་གྲུབ་སྩོལ། །ཅེས་བརྗོད་པར་བྱའོ། །དེ་ལྟར་གནམ་ལྷ་ཆེན་པོའི་མཆོད་འཕྲིན་ཉུང་ངུ་འདི་ཡང་སྒོམ་ཆེན་རིག་འཛིན་ཆོས་གྲགས་ནས་ལྷ་རྫས་བཅས་བསྐུལ་ངོར་མདོ་ཁམས་ཀྱི་བཙུན་པ་རྒྱས་སྲས་གཞན་ཕན་མཐའ་ཡས་པས་ཤར་མར་སྤེལ་བ་མངྒ་ལཾ།། །།