སྐུ་ཕྲེང་གསུམ་པ་རྒྱལ་བ་རྒྱ་མཚོ།
༈ ཞབས་དྲུང་གསུམ་པ་རྒྱལ་བ་རྒྱ་མཚོ་ནི། སྤྱི་ལོ་ ༡༥༨༨ བོད་རབ་བྱུང་བཅུ་པའི་ས་བྱི་ལོར་དཀར་མཛེས་ཏྲེ་ཤོད་སྟག་བཟང་དུ་རིགས་གསུམ་མགོན་པོ་དང་སྒྲོལ་མའི་གཟུངས་སྒྲ་རང་གྲགས་དང༌། འཇའ་གུར་འཁྲིགས་པ་སོགས་ངོ་མཚར་བའི་ལྟས་དུ་མ་དང་བཅས། ཡབ་བསོད་ནམས་རྣམ་རྒྱལ་དང༌། ཡུམ་པདྨ་འཚོ་གཉིས་ཀྱི་སྲས་སུ་བལྟམས། ཁང་དམར་དགོན་གྱི་དྭགས་པོ་ཆོས་རྗེས་ཕྱག་རོགས་གནང་སྟེ་ལན་དང་པོར་ཁང་དམར་དགོན་གྱི་དཔོན་སློབ་ཡོངས་རྫོགས་ཀྱིས་གསོལ་དཔོན་མངགས་ནས། ཕྱག་ཕྲེང༌། རྡོར་དྲིལ། ཌ་མ་རུ་རྣམས་གཞན་རེ་དང་གོང་མའི་ཕྱག་རྫས་ངོ་མ་རེ་མདུན་དུ་ཕུལ་བས་དགྱེས་ཉམས་ཀྱིས་ངོ་མ་རྣམས་ཡར་བཞེས་ནས་གཞན་རྣམས་གསོལ་དཔོན་གྱི་པང་དུ་གཡུགས། ཡང་རྗེས་ཤིག་ལ་ལན་གཉིས་པར་སྐུ་གོང་མའི་མདུན་འདུག་པ་རྒྱལ་མཚན་བཟང་པོས་རྟེན་གསུམ་དང་ཕྱག་དྲིལ་རྣམས་གཞན་རེ་དང་ངོ་མ་གཉིས་རེ་ཕུལ་བས་ཁྲོས་ཉམས་ཀྱིས་ཚང་མ་ངོས་འཛིན་མཛད། སླར་ཡང་ལན་གསུམ་པར་སྐུ་ངོས་འཛིན་གཟབ་སྒྲུབ་ཀྱི་ཆེད་དུ་དྭགས་པོ་ཆོས་རྗེ་སོགས་ཀྱིས་དཔལ་ལྡན་ལྷ་མོ་ལ་འཕྲིན་ལས་བཅོལ་ཏེ་ཐུགས་བརྟག་ཞུས་པས་ཀྱང་ལེགས་པར་ཤར། དེ་ལྟར་བརྟག་དཔྱད་ཐེངས་གསུམ་བྱས་མཐར་ཀུན་གྱིས་གོང་མའི་ཡང་སྲིད་དུ་ཡིད་ཆེས་ཐོབ་པའི་སྒོ་ནས་གསེར་ཁྲི་མཐོན་པོར་མངའ་གསོལ། སྐུ་ན་ཤིན་ཏུ་ཕྲ་བའི་སྐབས་སུ་ཚེ་དཔག་མེད་ཀྱི་སྙིང་པོ་ཐོལ་བྱུང་དུ་གསུངས། འཇིགས་བྱེད་དབང་གནང་སྐབས་སུ་དབང་རྫས་བཞེས། རྡོར་དྲིལ་བསྣམས་ནས་གར་སྟབས་མཛད། ཁྱད་པར་དགུང་གྲངས་གཉིས་ཙམ་ལོན་དུས་རྗེ་བླ་མ་ཡ་གིར་བཞུགས་འདུག་གསུངས། གང་དུ་བཞུགས་ཞུས་པ་ལ། ཉི་མ་དང་ནི་ཉེ་བ་ན། །སྐུ་ལ་ཆོས་གོས་བཟང་པོ་གསོལ། །དབུ་ལ་པཎ་ཞྭ་སྣེ་རིང་གསོལ། །ཆོས་འཆད་ཕྱག་རྒྱ་མཛད་ནས་བཞུགས། །ཞེས་དག་སྣང་ཤར་བའི་ངོ་མཚར་བའི་ཚིག་དག་གསུངས། བླ་མ་ཡི་དམ་སངས་རྒྱས་བྱང་སེམས་ཆོས་སྐྱོང་མང་པོའི་ཞལ་གཟིགས་རྒྱུན་པར་བྱུང༌། ནམ་ཞིག་ལ་ཆིབས་པ་འཆིབ་ཚུལ་དང༌། སྒར་འདེགས་ཚུལ་སོགས་རྩེད་མོ་ལྟ་བུ་མཛད་པ་ལ་ཞབས་འབྲིང་བས་གང་དུ་འགྲོ་ཞུས་པར། སོག་པོར་འགྲོ་གསུངས་ནས་སྔོན་གནས་རྗེས་དྲན་གྱི་མངོན་ཤེས་མངའ་ཚུལ་དང་། སྐུ་གོང་མ་སོག་ཡུལ་དུ་ཕེབས་པའི་མཛད་པ་རྣམས་དྲན་ཚུལ་མཛད། མི་ཞིག་གི་ཁོག་ཏུ་གདོན་ཞུགས་ནས་གྲོགས་པོ་ངེད་གཉིས་ཞབས་དྲུང་ལ་གནོད་བྱེད་དུ་ནམ་སོང་ཡང་གླང་མགོ་ཅན་གྱི་སྲུང་བས་རྭ་གཡུགས་གཅིག་གིས་ངའི་གྲོགས་པོ་མེད་པར་བཟོས་སོང་ཟེར་ནས་ཆོ་ངེ་འདོན་པ་ལ་ཉིད་ཀྱིས་སྲུང་མདུད་ཅིག་བཏགས་པས་གདོན་རང་སར་ཞི་བ་མཛད་པ་སོགས་དམ་པའི་རང་རྟགས་རྒྱ་མཚོའི་རླབས་ཕྲེང་བཞིན་དུ་ངོམ། དགུང་གྲངས་བཞིར་སོན་པ་ན་མཁས་མཆོག་བློ་བཟང་བསྟན་པའི་རྒྱ་མཚོའི་དྲུང་ནས་དགེ་བསྙེན་བཞེས་ཏེ་མཚན་རྒྱལ་བ་རྒྱ་མཚོར་གསོལ། ཆུང་ངུའི་དུས་སུ་སྐུ་བསྭོ་ཐོག་གནས་སུ་ཕེབས་ཚེ་རི་གསུམ་ལ་ཕྱག་མཛུབ་གཏད་ནས་རིམ་བཞིན་སྤྱན་རས་གཟིགས། འཇམ་དབྱངས། ཕྱག་རྡོར་གྱི་གནས་རི་ཡིན་ཞེས་ངོས་འཛིན་གནང་བ་ནས་བཟུང་རིགས་གསུམ་གནས་ཞེས་པའི་སྙན་གྲགས་ཀྱི་རོལ་མོ་འཁྲོལ། དགུང་གྲངས་ལྔ་ལ་ཆོས་རྗེ་རིན་པོ་ཆེའི་དྲུང་ནས་བར་མ་རབ་བྱུང་དང་དགེ་ཚུལ་བསྒྲུབས། དགེ་རྩེ་ཞེས་པའི་འབྲོག་དུད་ལྔ་བརྒྱ་ཙམ་ཡོད་པ་དེས་གདན་འདྲེན་པ་ལ་ཕེབས་ཏེ་ནང་ཆོས་ངོ་སྤྲོད་དང༌། ཁྲི་དྲུང་གི་རྡོ་ཞིག་ལ་ཞབས་རྗེས་འཇོག་པ་སོགས་ཀྱིས་གདུལ་བྱ་རྣམས་སྨིན་གྲོལ་ལ་བཀོད། དེ་བཞིན་དུ་ཝ་ཤུར་ཞེས་པ་འབྲོག་སྡེ་དུད་ཚང་སྟོང་ཚོ་གཉིས་ཙམ་ཡོད་པ་དེས་དྲངས་པ་ལ་ཞབས་བསྐྱོད་གནང་སྟེ་ཁྲོམ་ཚོགས་ཆེན་པོ་ལ་བཀའ་སློབ་གནད་སྨིན་སྐྱོང་ཚེ་འཇའ་ཚོན་བཀྲ་བ་སོགས་ལྟས་བཟང་ཡ་མཚན་པ་བྱུང༌།
སྔོན་རྗེ་ཟླ་བ་རྒྱལ་མཚན་གྱིས་འདི་ནས་བྱང་ཕྱོགས་སུ་འབྲོག་སྡེ་ཆེན་པོ་ཞིག་ཆགས་པ་དེ་ང་ཡི་གདུལ་བྱར་འགྱུར་རོ་ཞེས་ལུང་བསྟན་ལྟར་སོག་ཡུལ་གྱི་སའི་ཚངས་པ་ཆེན་པོ་ཁོ་ལོ་ཆི་ཞེས་བྱ་བས་ཀྱང་གདན་དྲངས་པ་ལ་ཟབ་རྒྱས་ཆོས་ཀྱི་ཆར་ཕབ་སྟེ་སྐལ་ལྡན་རྣམས་ཀྱི་རྒྱུད་ལ་དགེ་བའི་ལོ་ཏོག་བསྐྲུན། སོག་ཡུལ་དུ་ཕེབས་ཚེ་བཞུགས་གྲལ་ཆེན་པོའི་དབུས་སུ་སྐུ་གོང་མའི་སྐུ་ཆས་དང་ཡོན་བདག་ཕལ་ཆེ་ངོ་མཁྱེན་པ་བྱུང༌། གཞན་ཡང་དཔོན་པོ་སངས་རྒྱས་སྐྱབས། ཕུ་ཚའི་དཔོན་ཤེས་རབ་གྲགས་པ། འགོ་ལོག་དཔོན་ཨ་སྐྱོང་ཚེ་འབུམ་ཐར། ནང་སོ་ངག་དབང་རྣམ་རྒྱལ་སོགས་སྡེ་འབངས་དང་བཅས་པའི་སྤྱི་བོའི་གཙུག་རྒྱན་དུ་གྱུར་ཏེ་མི་ལོ་གསུམ་གྱི་རིང་ལ་ཕྱོགས་དེར་བཞུགས་ནས་བསྟན་འགྲོའི་དོན་རྒྱ་ཆེར་མཛད། རྗེ་འདིའི་གཟིམ་མལ་གྱི་སྐོར་ལ་རྡོ་ཧྲིལ་དཀར་ནག་མང་ཙམ་ཡོད་པ་ལ་ཞབས་འབྲིང་བ་དཔོན་པོས་འདི་དག་གིས་ཅི་བྱེད་ཟེར་ནས་ཕྱི་རོལ་ཏུ་དོར་ཡང༌། མལ་སྟན་གྱི་གསེབ་ཏུ་རྡོ་ཧྲིལ་ཆུང་ངུ་གཉིས་ཙམ་ལུས་འདུག་པས། འོ་ད་རྟེན་འབྲེལ་འཆུགས་སོང༌། དཔོན་པོ་ཁྱོད་ལུང་བ་སྣ་ཁུང་འདྲ་བ་གཉིས་ཀྱི་བདག་པོ་ལས་མི་འོང་ཞེས་གསུངས། རྟེན་འབྲེལ་མ་འཆུགས་ན་ཁམས་དང་ཨ་མདོ་ཕྱོགས་གཉིས་ཀ་ལ་བླ་མ་དང་དཔོན་པོའི་སྡེ་འབངས་རྒྱ་བསྐྱེད་ཆེར་འབྱུང་བ་འདྲ་ཡང་། དེས་ནི་སྟོང་འཁོར་ཟླ་སྙི་གཉིས་ལས་གཞན་ཆབ་འོག་ཏུ་འདུ་མི་ཐུབ་པའི་རྟེན་འབྲེལ་མི་ལེགས་པ་བྱུང་བ་རེད། སྐྱིད་ཤོད་ཞབས་དྲུང་བསྟན་འཛིན་བློ་བཟང་རྒྱ་མཚོའི་དྲུང་ནས་བསྙེན་རྫོགས་བཞེས། རྒྱལ་བ་ཡོན་ཏན་རྒྱ་མཚོའི་སྐུ་དུས་སུ་དབུས་ཕྱོགས་སུ་ཕེབས་ཏེ་སེར་སྨད་རོང་པོར་ཆོས་ཞུགས་གནང་ནས་ཐོས་བསམ་མཛད། དགེ་བཤེས་དམ་འཇོག་སྐབས་སུ། བདག་མེད་ཡིན་ན། ཡོད་པས་ཁྱབ་ཅེས་ཁས་བླངས་ཐུན་མོང་མ་ཡིན་པ་ཞིག་གནང་བ་ནི། རང་ཉིད་འཕོ་བ་གྲོང་འཇུག་ལ་དབང་སྒྱུར་བ་སོགས་རྟོགས་པའི་ཆུ་ཚོད་མཐོན་པོར་སླེབས་པའི་བརྡ་རྟགས་སུ་ངོམ་པ་ཡིན་ཏེ། རྗེ་མི་ལས་བླ་མའི་བཀའ་དང་འགལ་ན་འགལ་བ་ཡིན་གསུངས་པ་དང༌། ཀློང་རྡོལ་བླ་མ་རིན་པོ་ཆེས་ཀ་བ་སྟོང་ཉིད་ཡིན་གསུངས་པ་དང༌། མཁས་གྲུབ་ནོར་བཟང་རྒྱ་མཚོས། གཞི་གྲུབ་ན། འདུས་བྱས་ཡིན་པས་ཁྱབ་གསུངས་པ་རྣམས་ཀྱང་སྐྱེ་བོ་ཕལ་པ་གཞན་དང་མི་འདྲ་བས་རང་རང་གིས་ཁྱད་ཆོས་རེ་སྟོན་པ་བཞིན་ནོ། །ཞབས་དྲུང་དགོན་འདིར་བཞུགས་མེད་དུས་ཤིག་ལ་ཡུལ་འདིར་ས་གཡོས་འཇིག་པ་ཤུགས་ཆེན་ཞིག་བྱུང་བས་ཟླ་བ་རྒྱལ་མཚན་གྱིས་བཞེངས་པའི་གཙུག་ལག་ཁང་རྟེན་བརྟེན་པ་ཆ་ཚང་འཐོར་བཤིག་ཏུ་སོང༌། རྗེ་འདིས་དེ་དག་གསར་བཞེངས་དང༌། བསྐྱར་གསོ་ལེགས་པར་གནང༌། ཁྱད་པར་དུ་བླ་མ་གསེར་གླིང་པའི་ཐུགས་དམ་གྱི་རྟེན་ཐུབ་དབང་གི་སྐུ་འདི་དང༌། ཆོས་རྒྱལ་སྲོང་བཙན་སྒམ་པོའི་ཐུགས་དམ་གྱི་རྟེན་ཇོ་བོ་ལོ་ཀེ་ཤྭ་ར་གཉིས་མཉམ་དུ་འདིའི་སྐུ་རིང་ལ་གསེར་ཁང་དུ་བཞུགས་ཞེས་བཻཌཱུརྱ་མེ་ལོང་དུ་བྲིས་ཡོད་པ་དང༌། དུང་དཀར་ཚིག་མཛོད་མཇུག་གི་ལོ་ཚིགས་དྭངས་ཤེལ་མེ་ལོང་དུ། སྤྱི་ལོ་ ༡༦༤༥ ལོར་ཕོ་བྲང་དཀར་པོ་བཞེངས་འགོ་བཙུགས། འཕགས་པ་ལོ་ཀེ་ཤྭ་རའི་སྐུ་བརྙན་བར་སྐབས་མདོ་སྨད་ཁུལ་དུ་ཡུལ་གྱར་བ་འདི་ཉིད་འབྱོར་ཞེས་འཁོད་པ་ལ་གཞིགས་ན། ལ་ལའི་ངག་རྒྱུན་ལ་ལོ་ཀེ་ཤྭ་ར་ལྷ་ལྡན་དུ་ཡར་ཕུལ་བས་འབྱོར་ལན་དུ་གསེར་གླིང་པའི་ཐུགས་དམ་གྱི་རྟེན་ཇོ་བོ་འདི་མར་གནང་བ་ཡིན་ཟེར་བ་ནི་འགྲིག་ཐབས་མེད་པ་ཞིག་རེད། གང་ཡིན་ཞེ་ན། འབྱོར་ལན་ཡིན་ན། མདོ་རྒྱུད་རྒྱ་མཚོའི་སྐུ་དུས་སུ་འདིར་གསར་དུ་འབྱོར་དགོས་པས་སོ། །གང་ལྟར་ཡང་ལོ་ཀེ་ཤྭ་ར་འདིར་བཞུགས་མྱོང་བ་བདེན་པ་ཁོ་ནར་འདུག འདི་ཆོས་རྒྱལ་སྲོང་བཙན་སྒམ་པོའི་ཐུགས་དམ་གྱི་རྟེན་ཡིན་པས་སྔོན་དུས་སུ་པོ་ཏ་ལ་ཁོ་ནར་བཞུགས་པ་ཡིན་ཡང་བར་སྐབས་ཤིག་ཏུ་སྡེ་པ་ཨ་དཔལ་གྱིས་ཐུ་མེད་ཀྱི་སེ་ཆེན་ཐའི་ཇི་ལ་ཕུལ། ཐའི་ཇིས་མཚོ་ཁར་གདན་དྲངས་པ་ནས་བཟུང་བོད་ཡུལ་ཀུན་ཏུ་མི་བདེ་བ་བྱུང་བར་གྲགས། ཞབས་དྲུང་གསུམ་པའི་སྐུ་རིང་འདིར་ཕེབས་པ་ཡིན་སྙམ། ༸རྒྱལ་མཆོག་ལྔ་པའི་རང་རྣམ་དུ་མཉྫུ་ཤྲཱི་ཆོས་རྗེ་བཏང་ཞེས་འཁོད་པས་དབུས་སུ་ཡར་སྐྱེལ་བར་ཞབས་དྲུང་བཞི་པ་ཕེབས་པ་འདྲ། ཕོ་བྲང་དཀར་པོ་བཞེངས་འགོ་བཙུགས་པའི་ས་འདུལ་གྱི་ཐོག་དེར་སླེབས་པས་མ་བསྒྲིགས་ལྷུན་འགྲུབ་ཀྱི་རྟེན་འབྲེལ་འགྲིགས་སོ།།
རྗེ་འདི་དགུང་གྲངས་བཅུ་དགུ་ཙམ་ཕེབས་པ་ནས་བཟུང་གུ་ཤྲཱི་ཧན་བསྟན་འཛིན་ཆོས་རྒྱལ་དང་འབྲེལ་བ་ཆེན་པོ་བྱུང་ཡོད་དེ། སྤྱི་ལོ་ ༡༦༠༦ ལ་ཁལ་ཁ་དང༌། ཨོ་རོད་ཇུན་གར་གཉིས་མ་མཐུན་པར་འཁྲུགས་ཆེན་བྱུང་སྐབས་གུ་ཤྲཱི་ཧན་ཁལ་ཁའི་དམག་ཁྲོད་དུ་ཕེབས་ནས་ཕན་ཚུན་བར་འདུམ་འགྲིག་མཛད་པར་གྲུབ་འབྲས་ཆེན་པོ་བྱུང་བར་བརྟེན། ཆོས་རྗེ་འདི་དང་ཁལ་ཁའི་རྒྱལ་བློན་རྣམས་མགུ་ནས་ཏཱ་གུ་ཤྲཱི་ཞེས་པའི་ཆོ་ལོ་ཕུལ། དེའི་སྐོར་ཐུའུ་བཀྭན་གྲུབ་མཐའ་ལྡེབ་གྲངས་ ༤༥༧ དང༌། དུང་དཀར་ཚིག་མཛོད་ལྡེབ་གྲངས་ ༥༠༦ ནང་གསལ། དེའི་ཚེ་རྗེ་འདི་དགུང་གྲངས་བཅུ་དགུ་ཡིན་པ་དང༌། གུ་ཤྲཱི་ཧན་ཉེར་ལྔ་ཡིན་པ་དུང་དཀར་ཚིག་མཛོད་ཀྱི་ལོ་ཚིགས་སུ་གསལ། གུ་ཤྲཱི་ཧན་ནི་བོད་ཀྱི་སྲིད་དབང་ཡོངས་རྫོགས་༸གོང་ས་ལྔ་པ་ཆེན་པོ་ལ་ཕུལ་ཏེ་དགའ་ལྡན་ཕོ་བྲང་གི་སྲིད་དབང་ཐོག་མར་འཛུགས་པར་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་ཞིང༌། གཏེར་བཏོན་དྲི་མེད་ལྷུན་པོའི་ལུང་བསྟན་ལས་ཕྱག་ན་རྡོ་རྗེའི་རྣམ་འཕྲུལ་དུ་གསུངས། ཐུའུ་བཀྭན་གྲུབ་མཐའི་ནང་དུའང༌སར་གནས་ཀྱི་བྱང་སེམས་ཆོས་ལྡན་རྒྱལ་པོའི་རྣམ་པར་བྱོན་པར་གསུངས་སོ། །རྗེ་འདིས་རེ་ཞིག་ཨེ་ཐུག་མི་ཤེས་ཞེས་གསུང་གི་ཐ་མ་བསྩལ་ཏེ། ཨ་ཚ་མོ་ཁོར་ཞེས་པའི་ལུང་པར་གློ་བུར་དུ་སྙུང་གཞི་བཞེས་ཚུལ་བསྟན། དགུང་གྲངས་ང་གཉིས་པ། སྤྱི་ལོ་ ༡༦༣༩ བོད་རབ་བྱུང་བཅུ་གཅིག་པའི་ཤིང་ཡོས་ལོར་སྐུ་གཤེགས་ཏེ་སྐུ་ལུས་དོར། རྒྱ་ནག་ཤུ་གྲུ་ཞེས་པའི་ཡུལ་གྱི་སུག་ཆུའི་འགྲམ་དུ་རྒྱ་ཕྲུག་ལོ་ཉི་ཤུ་ལོན་པ་ཞིག་ཤི་བའི་རོ་ལ་གྲོང་འཇུག་མཛད་དེ་སྐྱེས་མཆོག་སྒྲ་སྒྱུར་ཡབ་སྲས་ཀྱི་རྣམ་ཐར་ལ་འགྲན་བཟོད་པར་གྱུར་ཏོ། །
དུང་དཀར་ཚིག་མཛོད་ཀྱི་གྲོང་འཇུག་ཚིག་འགྲེལ་ཐད་དུ་སྟོང་འཁོར་རིན་པོ་ཆེ་བསོད་ནམས་རྒྱ་མཚོ་ཡང༌། ཕ་མ་གཉིས་མི་དགོས་པར་སྐུ་ཕྲེང་སྔ་མ་མདོ་རྒྱུད་རྒྱ་མཚོ་སྐུ་གཤེགས་རྗེས་བྱིས་པ་ལོ་བརྒྱད་ལོན་པ་ཞིག་ཤི་བའི་རོ་ལ་གྲོང་འཇུག་མཛད་པ་ཡིན་ཟེར་སྲོལ་ཡོད་ཅེས་བྲིས་འདུག་ཀྱང༌དེ་ནི་ཅུང་མི་འཐད་པར་སྣང་སྟེ། དུང་དཀར་ཚིག་མཛོད་གཤམ་གྱི་ལོ་ཚིགས་དྭངས་ཤེལ་མེ་ལོང་སྐབས། ས་སྟག་སྤྱི་ལོ་ ༡༦༣༩ ལོར་སྟོང་འཁོར་མདོ་རྒྱུད་རྒྱ་མཚོ་རྒྱ་ཕྲུག་ཅིག་ལ་གྲོང་འཇུག་མཛད་པ་དེ་ཡིན་ཞེས་བྲིས་གནང་ཡོད་པ་དེ་ནི་ཡོངས་གྲགས་དང་ཡང་མཐུན་ལ་ལོ་རྒྱུས་ཁུངས་ཐུབ་གཞན་ཀྱང་ཡོད་དོ། །
གྲོང་འཇུག་སྐོར་མདོ་སྨད་ཆོས་འབྱུང་དེབ་གཟུགས་ལྡེབ་གྲངས་ ༧༨༤ ལ་གསལ། འདིའི་སྐོར་ལ་རྒྱལ་མཆོག་ལྔ་པའི་རང་རྣམ་དུ། སྟོང་འཁོར་བ་རྒྱལ་བ་རྒྱ་མཚོ་མངལ་དུ་སྲིད་པ་འཛིན་མ་དགོས་པར་རྒྱ་ཕྲུག་ལོ་ཉི་ཤུ་ཙམ་འགྲོ་བ་ཞིག་གི་ཕུང་པོ་དུར་ཁྲོད་དུ་བསྐྱལ་བར་བྱ་འཕུར་བ་བཞིན་སྐད་ཅིག་ལ་འཕོས་ནས་ང་སྟོང་འཁོར་བ་ཡིན་ཞེས་ངོས་བཟུང་བར་བརྟེན་སྟོང་འཁོར་འཕོ་བ་གྲོང་འཇུག་པར་གྲགས་པ་མདོ་རྒྱུད་རྒྱ་མཚོ་མཇལ་དུ་བྱོན། འབྲོག་མིའི་རྣམ་ཐར་བཞིན་གྲུབ་པའི་དབང་ཕྱུག་ཆེན་པོ་རྣམས་སླར་རང་གི་ཕུང་པོ་ལ་ནི་འཇུག་པ་བཤད་ཀྱང་གྲོང་འཇུག་རྒྱུད་ནས་འདི་འདྲའི་ལས་སླ་བ་མ་བསྟན་པས་གང་ཡིན་ཆ་མ་ཐིངས་ཞེས་གསུངས་པ་ལ་བརྟེན། ཚད་གྲུབ་ཡིན་མིན་གྱི་བཤད་ཚུལ་མི་མཐུན་པ་མཆིས་ཀྱང་། དེབ་ཐེར་རྒྱ་མཚོར་དཔྱད་གཞི་མཛད་པ་སྤྱིར་དགོས་པ་ཤིན་ཏུ་ཆེ་ལ་ཞེས་གསུངས་པ་བཞིན། དཔྱད་གཞི་ཙམ་མཛད་པ་ལས་གྲོང་འཇུག་མིན་པར་ཐག་བཅད་པ་ག་ལ་ཡིན་ཏེ། སྟོང་འཁོར་ཞབས་དྲུང་ལྔ་པ་ཆེན་པོས། གསང་སྔགས་ཟབ་ལམ་གྲོང་འཇུག་གདམས་པ་ཡི། །བརྟེན་བློ་སྦྱངས་རྟོགས་ཡོན་ཏན་ཕུལ་དུ་ཕྱིན། །བསྟན་དང་འགྲོ་ལ་ཕན་པ་ཆེར་མཛད་པ། །མདོ་རྒྱུད་རྒྱ་མཚོའི་ཞབས་ལ་གསོལ་བ་འདེབས། །ཞེས་གསུངས་པ་དང༌། གྲུབ་དབང་ཤར་སྐལ་ལྡན་རྒྱ་མཚོས་ཀྱང་། སྔགས་བསྟན་པའི་ཆོས་ཀྱི་བཅུད་བཟང་པོས། །ཐུགས་བརྩེ་བས་གྲོང་འཇུག་བདེ་ལམ་ནས། །དཔལ་མདོ་རྒྱུད་རྒྱ་མཚོའི་སྐྱེ་བ་བཞེས། །ཞེས་ཚད་གྲུབ་གནང་ཡོད་པར་མ་ཟད་མཁས་དབང་བྲག་དཀར་རིན་པོ་ཆེས་ཀྱང་། འདིས་གྲོང་འཇུག་མཛད་པ་ནི་གྲོང་འཇུག་གི་བརྒྱུད་པ་ལས་ད་རེས་གསར་དུ་བྱུང་བ་ཞིག་མ་ཡིན་པར་གྲོང་འཇུག་སྦྱངས་པའི་སྔོན་གྱི་སྐྱེས་རབས་གསུངས་ནས་དེ་དུས་ཀྱི་བག་ཆགས་སད་པ་ཡིན་པར་གསུངས་སོ། །
འབྲས་སྤུངས་ཁྲི་པ་གུང་རུ་བསྟན་པ་བསྟན་འཛིན་གྱིས་མཛད་པའི་འཇམ་མགོན་རྒྱལ་བའི་རྒྱལ་ཚབ་གསེར་ཁྲི་རིམ་བྱོན་རྣམས་ཀྱི་ཁྲི་རབས་ཡོངས་འདུའི་ལྗོན་བཟང༌ལས། ལྔ་པའི་རང་རྣམ་དུ་གྲོང་འཇུག་རྒྱུད་ནས་འདི་འདྲའི་ལས་སླ་བ་མ་བསྟན་པས་གང་ཡིན་ཆ་མ་ཐིངས་གསུངས་ཀྱང་། ཕ་བོང་ཁ་པས་འཇམ་མགོན་སྙན་བརྒྱུད་ཀྱི་མན་ངག་ལ་བརྟེན་པར་བཤད་ཅེས་དང་། ཡང་དེ་ཉིད་ལས། ཕྱོགས་གཞན་དུ། དར་མ་མདོ་སྡེ་ནས་དེ་ལྟའི་གདམས་རྒྱུན་ཆད་པར་གྲགས་ཀྱང༌། མཚུར་སྟོན་དང་རྔོག་སྟོན་སོགས་ལ་གྲོང་འཇུག་གི་གདམས་པ་མེད་ན་དེང་དུས་དྭགས་པོ་བཀའ་བརྒྱུད་ལ་ཆོས་དྲུག་གི་གདམས་པ་ཆ་ཚང་བ་ཞིག་མེད་པར་འདོད་དགོས་ཤིང་། དེ་ལྟར་འདོད་ན། བར་དོ་ངོ་སྤྲོད་སྒྱུ་མ་གསུམ་རྒྱུད་དང༌། །མགྱོགས་འགྲོ་འཕོ་ཉ་འཕོ་བ་གྲོང་འཇུག་སོགས། །རྒྱུད་གཉིས་གདམས་པའི་གཏེར་གྱུར་གསེར་ལྡིང་པ། །གཞོན་ནུ་འོད་ཅེས་གྲགས་ཤིང་གྲུབ་པ་དང་འགལ་ལ། གཞན་ཤངས་པ་བཀའ་བརྒྱུད་ལའང་ནི་གུའི་ཆོས་དྲུག་གི་གདམས་པ་མེད་ཅེས་སྐུར་བ་འདེབས་ཕོད་དམ། དེར་མ་ཟད། ན་རོ་པ་ལས་གྲུབ་ཆེན་གཞན་ལའང་གདམས་པ་དེ་མེད་པར་འདོད་དགོས་ན། དེ་འདྲའི་ལོ་རྒྱུས་ཇི་སྙེད་ཅིག་བྱུང་བ་ཐམས་ཅད་མ་དག་པར་སྨྲ་དགོས་སོ། །ཞེས་ཚད་མའི་ལུང་རིགས་ཀྱིས་བསྒྲུབས་འདུག་པ་གནད་དུ་མཐོང་ནས་འདིར་བཀོད།
སྨྲས་པ།
ཁྱོད་ཐུགས་ཨ་དར་ཤ་ཡི་ངོས། །
མ་འོངས་འཕོ་འགྱུར་གཟུགས་རིས་གསལ། །
འོན་ཀྱང་སྤྱི་བོ་གནམ་བསྟན་འགའ། །
དེ་ལའང་སོམ་ཉི་དཔྱང་ཐག་འཛིན། །
ཀྭ་ཡེ་ཡུལ་དགོན་སྡེ་བདུན་ཚོ། །
ཕ་མེས་དུས་ཀྱི་བླ་མར་བསྟེན། །
གནའ་རབས་དུས་ཀྱི་དགོན་གནས་བརྩི། །
སྔོན་མའི་རྟེན་གསུམ་དད་ན་མཛེས། །ཞེས་སོ། །