སྐུ་ཕྲེང་བཞི་པ་གྲོང་འཇུག་མདོ་རྒྱུད་རྒྱ་མཚོ།
༈ ཞབས་དྲུང་བཞི་པ་གྲོང་འཇུག་མདོ་རྒྱུད་རྒྱ་མཚོ་ནི། སྤྱི་ལོ་ ༡༦༣༩ བོད་རབ་བྱུང་བཅུ་གཅིག་པའི་ས་ཡོས། ཧོར་ཟླ་བཅུ་པའི་ཚེས་བཅུ་གཅིག་གི་ཉིན་ཤུ་གྲུ་ཞེས་པའི་ཡུལ་གྱི་སུག་ཆུའི་འགྲམ་དུ་རྒྱ་ཕྲུག་ལྕགས་སྤྲེལ་ལོ་པ་རང་ལོ་ཉི་ཤུར་ཚེ་ཡི་དུས་བྱས་པ་ཞིག་གི་རོ་དུར་ཁྲོད་དུ་བསྐྱལ་བ་ལ། སྐུ་གོང་མ་རྒྱལ་བ་རྒྱ་མཚོས་བྱ་འཕུར་བ་བཞིན་སྐད་ཅིག་ལ་འཕོ་བ་གྲོང་འཇུག་མཛད་པའི་རྒྱ་ཕྲུག་པུར་སྒྲོམ་གྱི་སྟེང་དུ་དཀྱིལ་ཀྲུང་གིས་བཞུགས་པ་ལ། མི་རྣམས་ཀྱིས་རོ་ལངས་ཞེས་འཇིགས་ཤིང་སྐྲག་སྟེ། ཐེ་ཇུ་དམག་གི་དཔུང་ཁྲིད་ནས་དགྲོང་བར་བརྩམས་ཚེ། མཚོན་ཆས་གནོད་མ་ནུས་པར་ལུས་པ་ན། རྒྱ་ཕྲུག་གིས་བདག་ནི་རོ་ལངས་མིན་གྱི་སྟོང་འཁོར་རྒྱལ་བ་རྒྱ་མཚོས་གྲོང་འཇུག་བྱས་པ་ཡིན་གསུངས་ནས་མི་རྣམས་དངངས་སྐྲག་ལས་དབུགས་དབྱུང་སྟེ། ཀུན་དད་པ་ལ་བཀོད། རྒྱལ་བ་རྒྱ་མཚོས་མྱ་ངན་ལས་འདས་ཁར་སྐུ་སྐྱེ་ཕྱི་མ་ཕེབས་ཡུལ་གྱི་ས་ཆའི་དབྱིབས་དང༌། མི་རིགས་སོགས་ཀྱི་ལུང་བསྟན་དར་དཀར་གྱི་ངོས་ལ་བྲིས་ནས་བཞུགས་གདན་གྱི་གསེབ་ཏུ་སྦས་ཡོད་པ་རྙེད་པས་ཀྱང་སྐུ་འཁོར་སོགས་ཀྱི་རྒྱུད་ལ་ཡིད་ཆེས་ཆེར་སྐྱེད་པར་བྱེད། རྒྱ་དཔོན་ཅང་ཇུན་གྱིས་རིན་པོ་ཆེ་གདན་དྲངས། ལོ་རྒྱུས་རྣམས་གོང་མ་ལ་ཞུས། གོང་མ་ནས་སྐུ་གདུང་དང༌རིན་པོ་ཆེ་གཉིས་ཀ་གདན་སར་ཡར་དྲངས་ཆོག་པའི་གནང་བ་དང༌། དངོས་པོའི་གནང་སྦྱིན་ཚད་མེད་བསྩལ། རིན་པོ་ཆེ་ཤར་ཕྱོགས་ནས་གདན་དྲངས་ཚེ། རྒྱལ་བ་ཡོན་ཏན་རྒྱ་མཚོའི་དངོས་སློབ་རྣམ་རྒྱལ་དཔལ་འབྱོར་རྒྱལ་མཚན་གྱིས་དགྱེས་པའི་གསུང་གིས་ཞབས་དྲུང་གསུམ་པའི་ཡང་སྲིད་དུ་ངོས་འཛིན་མཛད། རོང་པོ་སྐལ་ལྡན་རྒྱ་མཚོའི་སྤྱན་སྔར་རབ་ཏུ་བྱུང་། མཚན་འཇམ་དབྱངས་རྒྱ་མཚོ་གསོལ། དབུས་ཕྱོགས་སུ་ཕེབས་ཏེ་པཎ་ཆེན་བློ་བཟང་ཆོས་རྒྱན་ལས་བསྙེན་རྫོགས་བཞེས། སྔར་འཇམ་དབྱངས་རྒྱ་མཚོ་ཞེས་པ་དེ་མདོ་རྒྱུད་རྒྱ་མཚོ་ཞེས་མཚན་བསྒྱུར་མཛད།
དགའ་ལྡན་ཆོས་འབྱུང་བཻ་སེར་གྱི་མཇུག་ཕྱོགས་སུ། སྟོང་འཁོར་བ་ནི། རྒྱལ་དབང་བསོད་ནམས་རྒྱ་མཚོ་དང་དུས་མཉམ་ཙམ་དུ་སྟོང་འཁོར་ཡོན་ཏན་རྒྱ་མཚོ། དེའི་སྐྱེ་བ་རྒྱལ་བ་རྒྱ་མཚོ། དེའི་སྐྱེ་བ་འཇམ་དབྱངས་རྒྱ་མཚོ། ཞེས་དང་། ཡང་ཀློང་རྡོལ་བཀའ་འབུམ་དུ། མཐའ་འཁོབ་འདུལ་བ་རྒྱལ་མཚན། སྟོང་འཁོར་ཡོན་ཏན་རྒྱ་མཚོ། སྟོང་འཁོར་འཇམ་དབྱངས་རྒྱ་མཚོ། སྟོང་འཁོར་འཇམ་དབྱངས་ལྷུན་འགྲུབ་ཅེས་སོགས་ཅུང་མི་འདྲ་བ་འབྱུང་བ་ནི། དགའ་ལྡན་ཆོས་འབྱུང་བཻ་སེར་ལས། སྟོང་འཁོར་ཆོས་རྗེ་ཡོན་ཏན་རྒྱ་མཚོ། དེའི་སྐུའི་སྐྱེ་བ་སྤྲུལ་པའི་སྐུ་གཉིས་བྱུང་སྟེ། སྟོང་འཁོར་སྤྲུལ་པའི་སྐུ་འཇམ་དབྱངས་རྒྱ་མཚོ་དང༌། རྒྱལ་བ་རྒྱ་མཚོ་གཉིས་ལྷན་ཅིག་ཏུ་བྱུང་བར་གྲགས་སོ་ཞེས་གསལ་བ་ལྟར། ཞབས་དྲུང་སྐུ་ཕྲེང་གསུམ་པ་རྒྱལ་བ་རྒྱ་མཚོའི་ཡང་སྲིད་འཇམ་དབྱངས་རྒྱ་མཚོའམ་མདོ་རྒྱུད་རྒྱ་མཚོ་དང་། ཞབས་དྲུང་གཉིས་པ་ཡོན་ཏན་རྒྱ་མཚོ་ལ་ཡོངས་གྲགས་སུ་ཡང་སྲིད་གསུམ་བྱུང་བ་ལས་འཇམ་དབྱངས་རྒྱ་མཚོ་ཞུ་བ་གཅིག་སྟེ། འཇམ་དབྱངས་རྒྱ་མཚོ་མཚན་ཅན་གྱི་སྟོང་འཁོར་སྤྲུལ་སྐུ་གཉིས་བྱུང་ཡོད་པ་དག་གཅིག་ཏུ་འཁྲུལ་བར་དོགས་ནས་གསལ་བཤད་མདོར་བསྡུས་ཤིག་བྲིས།
༸གོང་ས་༸ལྔ་པ་ཆེན་པོ་འབྲས་སྤུངས་སུ་བཞུགས་པ་དང་གསེར་ཞལ་མཇལ། མ་ཟད་སའི་ཚངས་པ་ཆེན་པོ་བསོད་ནམས་ཆོས་འཕེལ་དང༌། གུ་ཤྲཱི་བསྟན་འཛིན་ཆོས་རྒྱལ་རྣམ་གཉིས་དང་ཡང་མཇལ་འཛོམས་མཛད། སེ་རར་ཆོས་ཞུགས་མཛད། དགའ་ལྡན་དུ་ཕེབས་ཚེ། དགའ་ལྡན་གྱི་གནས་རི་དེ་དཔལ་གསང་བ་འདུས་པའི་ཕོ་བྲང་དུ་དངོས་སུ་གཟིགས་པའི་དག་སྣང་ཤར། ༸གོང་ས་ལྔ་པ་ཆེན་པོས་དགོན་གནས་འཛུགས་པ་སོགས་བསྟན་འགྲོ་ལ་ཕན་པ་བསྒྲུབ་དགོས་ཚུལ་གྱི་བཀའ་སློབ་དང༌། ཕེབས་རྫོངས་གནང་སྦྱིན་རྒྱ་ཆེན་པོར་བསྩལ། དེ་བཞིན་དུ་སྡེ་སྲིད་བསོད་ནམས་ཆོས་འཕེལ་དང༌། གུ་ཤྲཱི་ཧན་གཉིས་ཀྱིས་ཀྱང་ཕེབས་རྫོངས་རྒྱ་ཆེར་གནང༌། ཁྱད་པར་གུ་ཤྲཱི་ཧན་གྱིས་མདོ་མཁར་དགོན་གནས་འདེབས་སའི་ས་ཆ་གསོལ་རས་དང༌། སླན་ཆད་དགོན་གནས་དེ་ཞབས་དྲུང་རིམ་བྱོན་གྱིས་བདག་དབང་བྱེད་པ་ལས། གཞན་སུས་ཀྱང་རྩོད་གླེང་མི་ཆོག་པའི་བཀའ་ཤོག་ཐམ་ག་ཅན་གནང༌། སྤྱི་ལོ་ ༡༦༤༦ ལོར་མདོ་མཁར་ཟི་ལིང་སྟོང་འཁོར་དགོན་གསར་དུ་བཏབ། སྤྱི་ལོ་ ༡༦༤༧ ལོར་དཔའ་རིས་མཆོད་རྟེན་ཐང་ཕྱག་བཏབ། བོད་རབ་བྱུང་བཅུ་གཅིག་པའི་ཤིང་སྦྲུལ། སྤྱི་ལོ་ ༡༦༦༥ ལ་རྗེ་ཉིད་དགུང་གྲངས་ཉེར་བདུན་ཐོག་གོང་མ་ཁང་ཤིས་ཀྱི་དབུ་བླར་ཕེབས་ཏེ་ལོ་གཅིག་ཙམ་བཞུགས། དེས་ཀྱང་ཆན་ཞི་མཉྫུ་ཤྲཱིའི་གོ་གནས་དང་འཇའ་ས་གནང༌། གོང་མ་འདི་ནི་མན་ཆིང་རྒྱལ་རབས་ཀྱི་ཁྲི་ཐོག་གཉིས་པ་ཡིན། སྲིད་ལོ་དྲུག་ཅུ་རེ་གཅིག་བཟུང་ཡོད། བཻཌཱུརྱ་མེ་ལོང་དུ། འཇམ་དབྱངས་གོང་མ་ཤུན་ཀྲི། བོད་སྐད་དུ། བདེ་སྐྱིད་རྒྱལ་པོ་ཁྲི་བཞུགས་ལོ་བརྒྱད་དུ་ཕེབས་པ་དང་མཇལ་འཕྲད་མཛད་སྐབས་ཞེས་འཁོད་ཀྱང༌། དེ་ཅུང་མ་དག་པར་མངོན་དེ། གོང་མ་ཤུན་ཀྲི་ནི་མན་ཆིང་རྒྱལ་རབས་ཀྱི་ཁྲི་ཐོག་དང་པོ་ཡིན་པས་འདི་ཁྲི་ལོ་བརྒྱད་ཕེབས་སྐབས་སུ་དབུ་བླར་ཕེབས་པ་ཡིན་ན། འཁྲུངས་རབས་རང་དུ་རབ་བྱུང་བཅུ་གཅིག་པའི་ཤིང་སྦྲུལ། ཞབས་དྲུང་དགུང་ལོ་ཉེར་བདུན་ཐོག་པེ་ཅིན་དུ་ཕེབས་ཚུལ་གསུངས་པ་དང་མི་འགྲིག དུང་དཀར་ཚིག་མཛོད་སོགས་དང་ཡང་མི་མཐུན། དེས་ན་ཞབས་དྲུང་དབུ་བླར་ཕེབས་སའི་གོང་མ་ནི། ཁང་ཤིས་ཡིན་པ་ལོ་རྒྱུས་ཁུངས་ཐུབ་དང་མཐུན་པར་སེམས་སོ། །སྐུ་གོང་མས་ལུང་བསྟན་ལྟར། སྙི་བ་རྣམས་ཀྱིས་འགོ་གཏད་ཞུས་ནས་སྙི་སྟོད་སྨད་རྣམས་ཆབ་འབངས་སུ་འདུས། སྙི་བཀྲ་ཤིས་དར་རྒྱས་གླིང་ཕྱག་བཏབ། རང་དགོན་དུ་གདུལ་བྱའི་བསོད་ནམས་ཀྱི་ཞིང་དུ་གསེར་དངུལ་གྱིས་བྲིས་མའི་བཀའ་བསྟན་ཆ་ཚང་ཞིག་བཞེངས། དཔའ་རིས་ཕྱོགས་སུ་གནས་སྒོ་གསར་དུ་ཕྱེ། སྨན་ཆུ་དང་། བདེ་མཆོག་བླ་མཚོ་ངོས་འཛིན་གནང༌། གང་བཞུགས་ཡིད་ལ་དྲན་པ་ཙམ་གྱིས་ཀྱང༌། །མཆོག་དང་ཐུན་མོང་དངོས་གྲུབ་མ་ལུས་པ། །སྩོལ་མཛད་ཉེར་བཞིའི་ཆ་ཤས་གཡུ་མཚོ་ལ། །བདག་ཅག་ལུས་ངག་ཡིད་གསུམ་གུས་པས་འདུད། །ཅེས་པ་མཚོ་མཇལ་བ་རྣམས་ལ་ཞལ་འདོན་ལྗགས་རྩོམ་གནང༌། གནས་དེའི་རྡོའི་ངོས་ལ་ཕྱག་གཉིས་ཀྱི་རྗེས་བཞག་སྟེ་གྲུབ་རྟགས་མཛད། གུ་ཤྲཱི་ཧན་གྱིས་དམུ་དགེ་ཚོ་བ་བཅོ་བརྒྱད། རྨེ་ཚ་ཤོག་ཆེན་བཅུ་བདུན། མཁར་ལུང་ཤོག་པ་དྲུག་རྣམས་འདིའི་དབང་འོག་ཏུ་འབུལ་གནང་མཛད། རྒྱ་མཱ་སིང་ཡེས་ཀྱིས་རྗེ་ཉིད་ལ་ངའི་ཡི་དམ་གང་ཡིན། ད་ནངས་ཞོགས་པར་ཅི་བསྒོམས་འདུག སེམས་ཐོག་ཏུ་ཡོང་རྒྱུ་ཞིག་ཡོད་པ་མི་འདུག་པ་ཅིས་ལན་ཞུས་པར། ཉིད་ཀྱི་ཡི་དམ་ཐུགས་རྗེ་ཆེན་པོ་རེད། ནངས་པར་ཡང་དེ་བསྒོམས་འདུག དེ་ང་དང་ཁྱོད་ལ་ལས་འབྲེལ་མེད། དེའི་རྣམ་འཕྲུལ་ཞིག་དང་ཁྱོད་འཕྲད་འོང་བ་དེས་ལུང་སྟོན་ཞེས་གསུངས་པ་ལྟར། ཕྱིས་སུ་རྒྱལ་སྲས་དོན་ཡོད་ཆོས་ཀྱི་རྒྱ་མཚོ་ལ་ཞུས་པས་སྔར་ལྟར་གསུངས་པས་ཡིད་ཆེས་བརྟན་པོ་བྱེད། དགོན་ལུང་དུ་འབུལ་དཔོན་པ་ཀུན་དགའ་རྒྱ་མཚོ་བཙོན་དུ་བཅུག་པ་རྗེ་འདིས་འཕྲུལ་གྱིས་ཐར་པར་མཛད། དེའི་སྐོར་ངོ་མཚར་བ་མང་ཡང་ཡི་གེ་མང་དོགས་པས་དེ་ཙམ་ལས་མ་བྲིས། ཞིབ་པར་གཟིགས་འདོད་ན་དེབ་ཐེར་རྒྱ་མཚོའི་ལྡེབ་གྲངས་ ༡༡༤ ལ་གཟིགས། སེམས་ཉིད་དགོན་དུ་གདན་རབས་བཅུ་བཞི་པ་ཏོབ་ཚང་དཔོན་སློབ་གྲགས་པ་དར་རྒྱས་ཀྱིས་གདན་དྲངས་པ་ལྟར་ཕེབས་ཏེ་ཀུན་རིག་དབང་ཆེན་གནང༌། དེའི་གདན་རབས་བཅོ་ལྔ་པ་བསྟན་འཛིན་འཕྲིན་ལས་རྒྱ་མཚོ་ལ་འཇམ་དཀར་དང༌། མགོན་པོའི་རྗེས་གནང་བསྩལ། དངོས་སློབ་ཀྱང་གནས་བརྟན་བ་ཀུ་ལའི་རྣམ་འཕྲུལ་དུ་གྲགས་པ་སྔོ་ཁོ་ཁྲི་རྒན་གྱི་སྤྲུལ་སྐུ་བསོད་ནམས་དཔལ་བཟང་དང༌། སེང་གེ་བཟང་པོ། རྟིས་ཚང་མ་ཎི་བ་ཤེས་རབ་གྲགས་པ་སོགས་མང༌། དུག་ཆུ་ཞིག་ལ་བདུད་རྩིའི་མིང་བཏགས་པ་ནས་བཟུང་ཁྲག་མཁྲིས་ཀྱི་ནད་ལ་ཤིན་ཏུ་ཕན་པའི་སྨན་ཆུར་གྱུར། ཤུས་གྲུས་ཕྱོགས་སུ་ལྷ་ཁང་ཞིག་རབ་གནས་སྐབས་སུ་རྗེས་སོར་འདུས་ཁང་ཡོང་བར་ལུང་བསྟན། མཆོད་རྟེན་ཐང་དུ་བདེ་རྒུ་མཁན་སྤྲུལ་ཡེ་ཤེས་བསྟན་འཛིན་འགའ་ཞིག་གི་བྱེད་སྤྱོད་དབང་གིས་ཁྲི་ལས་ཟུར་བཞུགས་མཛད་སྐབས་རྗེ་ཉིད་པེ་ཅིན་དུ་བཞུགས་པ་ལ་ཞུས་ཏེ་མཚན་གྱིས་ཁྲི་བྱིན་གྱིས་བརླབས། མདོར་ན། རྗེ་འདི་༸པཎ་ཆེན་༸བློ་བཟང་ཆོས་རྒྱན། ༸གོང་ས་༸ལྔ་པ་ཆེན་པོ། རོང་པོ་སྐལ་ལྡན་རྒྱ་མཚོ་རྣམས་ཀྱི་དངོས་སློབ་ཏུ་གྱུར་ཏེ་ཅི་གསུང་བསྒྲུབས་པ་དང༌། གོང་མ་ཁང་ཤིས། གུ་ཤྲཱི་ཧན། ཚ་ཁོ་རྒྱལ་པོ་སོགས་ཀྱི་དབུ་བླར་གྱུར་ནས་ཆོས་སྲིད་ཀྱི་མངའ་ཐང་རྣམས་ལ་གཞན་གྱིས་འགྲན་པའི་ཟླ་དང་བྲལ་བ་མཛད་དོ། །དགུང་གྲངས་ཞེ་ལྔར་ཕེབས་པ། སྤྱི་ལོ་ ༡༦༨༣ བོད་རབ་བྱུང་བཅུ་གཅིག་པའི་ཆུ་ཕག་ལོར་དགོངས་པ་གཞན་དོན་དུ་གཤེགས་སོ། །
སྨྲས་པ།
འཇམ་མགོན་ཐུགས་བཅུད་ཕྱུང་བའི་མན་ངག་མཆོག །
དགའ་ལྡན་སྙན་བརྒྱུད་གདམས་པའི་གངས་རི་ལས། །
ལེགས་འོངས་ཟབ་ལམ་གྲོང་འཇུག་ཆུ་རྒྱུན་ཅིག །
གང་གི་བགོ་སྐལ་ཐོབ་འདི་ཨ་ཧོ་རྨད། །
གནའ་དུས་ཕལ་པའི་མི་ལ་དེང་གི་མིས། །
ལྟ་སྤྱོད་ཀུན་ནས་བསྒྲུན་པ་མི་བཟོད་ན། །
སྔོན་དུས་དམ་པའི་གསང་གསུམ་རྒྱ་མཚོ་ལ། །
དེང་དུས་གཟུ་ལུམ་མཁན་གྱིས་ཇི་ལྟར་སྒྲུན། །ཅེས་སོ། །