སྐུ་ཕྲེང་བརྒྱད་པ་ངག་དབང་མདོ་རྒྱུད་ཡོན་ཏན་རབ་རྒྱས།
༈ ཞབས་དྲུང་བརྒྱད་པ་ངག་དབང་མདོ་རྒྱུད་ཡོན་ཏན་རབ་རྒྱས་དཔལ་བཟང་པོ་ནི། གསེར་རྟའི་ཁུལ་གྱི་སེ་ར་དགོན་པའི་ཉེ་འདབས་ཀྱི་འབྲོག་རྒྱུད་ཅིག་དུ། སྤྱི་ལོ་ ༡༨༥༣ རབ་བྱུང་བཅུ་བཞི་པའི་ཆུ་མོ་གླང་ལོར། ཡབ་ཀརྨ་དར་རྒྱས་དང༌། ཡུམ་སྐྱིད་རིང་གཉིས་ཀྱི་སྲས་སུ་འཁྲུངས། སྐུ་གོང་མས་གཟིམ་ཆུང་ངོས་ཤིག་ལ་སྟག་ཅིག་ལྷ་དང་ལྷ་མོའི་ནམ་མཁར་ཡར་དྲངས་པ་དང༌། གླང་པོ་ཆེ་ཞིག་མར་དྲངས་པ་བྲིས་པ་ནི། ཉིད་དགུང་སྙིང་སྟག་ཡིན་པས་སྐུ་གཤེགས་པ་དང༌། སྐུ་སྐྱེ་དགུང་སྙིང་གླང་ཡིན་པ་ཞིག་ཕེབས་པའི་ལུང་བསྟན་གནང་བ་ཐོག་ཏུ་བབས། བོད་ཀྱི་སྲིད་སྐྱོང་རྭ་སྒྲེང་རྡོ་རྗེ་འཆང་གིས་སྟོང་འཁོར་ཞབས་དྲུང་གི་ཡང་སྲིད་དུ་ངོས་འཛིན་གནང་སྟེ་མཚན་ངག་དབང་མདོ་རྒྱུད་ཡོན་ཏན་རབ་རྒྱས་གསོལ་བ་དང་འབྲེལ་བརྟན་བཞུགས་སྨོན་ཚིག་ཀྱང་གནང༌། དགུང་གྲངས་ལྔར་ལོན་ཚེ་རང་དགོན་དུ་བཞུགས། འབུམ་མདོའི་གྲོང་སྨད་སྔགས་རམས་པ་ལས་ཡི་གེ་འབྲི་ཀློག་དང༌། ཆོས་སྤྱོད་བློ་འདོན་སོགས་སྦྱངས། བཤེས་གཉེན་ཆེན་པོ་བློ་བཟང་བསྟན་འཛིན་མཐུ་སྟོབས་རྒྱ་མཚོ་དཔལ་བཟང་པོ་ལས་དགེ་བསྙེན་དང༌། དགེ་ཚུལ་གྱི་སྡོམ་པ་བཞེས། འབྲུ་ཡག་དགེ་བཤེས་ཆེན་པོ་བློ་གྲོས་ཆོས་འཕེལ་བསྟེན་ཏེ་བསྡུས་གྲྭ་ནས་བཟུང་མཚན་ཉིད་ལེགས་པར་སྦྱངས། སྟོང་འཁོར་སྲས་མོ་ཆོས་མཚོ་དང༌། ཉག་སྐེད་ཚེ་དབང་ཚེ་རིང༌། དབུ་མཛད་འགྱར་འགྱར། ཨ་མདོ་ཆུ་མིག་བླ་མ་སོགས་ཀྱིས་ཕྱག་རོགས་གནང་ནས་འདུས་ཁང་ཀ་བ་བརྒྱད་ཅུ་པ་རྟེན་བརྟེན་པ་ཡོངས་རྫོགས་ལེགས་གྲུབ་མཛད། དགུང་གྲངས་བཅུ་བདུན་ལ་དབུས་སུ་ཕེབས་ཏེ་རྒྱལ་བ་ཡབ་སྲས་མཇལ་འཕྲད་མཛད། སེ་ར་ཐེག་ཆེན་གླིང་དུ་ཆོས་ཞུགས་གནང་ནས་རོང་པོ་མཁས་མཆོག་གི་མདུན་དུ་ཐོས་བསམ་མཛད། དེར་ཡུན་ཐུང་ཙམ་ལས་མ་བཞུགས། རང་ཡུལ་དུ་ཕེབས་རྗེས་བྲག་འགོའི་ཀེའུ་ཚང་སྤྲུལ་སྐུ་བློ་བཟང་བསྟན་པ་ཡར་རྒྱས་ལས་བསྙེན་རྫོགས་བཞེས། རང་དགོན་གྱི་ཆོས་གྲྭར་གསུང་ཆོས་གནང་བ། རྩོད་རྒྱུགས་ལེན་པ། མཚན་མོར་འདོན་སྐྱོར་སྦྱངས་ལ་གཟིགས་རྟོག་མཛད་པ། ཆོས་གྲྭ་བ་ལ་གསོལ་ཕོགས་གནང་བ་སོགས་བསྟན་པ་རྒྱས་པའི་ཐབས་ཚུལ་ལྷུར་བཞེས་མཛད། དགུང་ལོ་ཉེར་ལྔ་མེ་གླང་ལ་གྲུབ་ཆེན་ལི་ཨཱུ་པའི་ལུགས་ཀྱི་དཔལ་འཁོར་ལོ་བདེ་མཆོག་གི་སྒྲུབ་མཆོད་བཙུགས། ཉིད་ཀྱིས་ཀྱང་དེའི་བདག་མདུན་བུམ་གསུམ་སོགས་ཆོ་ག་ཆ་ཚང་ཐུགས་ལ་བླངས་པའི་སྒོ་ནས་ལོ་གསུམ་ཙམ་གྱི་རིང་ལ་གོང་བཞུགས་མཛད་དེ་ཞིབ་གཟིགས་གནང༌། དམིགས་བརྩེ་མའི་ཆུ་འཁོར་སེར་སྲུང༌། ཆར་འབེབས། རྒྱལ་གདོན་གྱི་གནོད་པ་ཞི་བའི་སྤེལ་ཚིག་དང་འབྲེལ་བ་ལེགས་བཞེངས་གནང༌། དགུང་ལོ་སོ་དྲུག་པ་ས་ཕོ་བྱི་བའི་ལོར་དྲེགས་པ་ལྕམ་སྲིང་གི་སྒྲུབ་མཆོད་གར་འཆམ་བཅས་གསར་དུ་བཙུགས། སོ་དགུ་པ་ལྕགས་ཡོས་ལོར་གདུལ་བྱ་བསོད་ནམས་དམན་པའི་མཐུ་ལས་དཀར་ཆས་མཛད་པའི་ཚུལ་བསྟན། རྦ་ལ་མདར་གཟིམ་ཆུང་བཞེངས་ནས་དེར་བཞུགས། སྲས་པདྨ་ཞེས་པ་བྱུང༌། ཡུལ་འདིར་ཕྱུགས་ཟོག་རྣམས་ནད་ཡམས་ཆེན་པོ་བྱུང་བ་ལ་སྐུ་སྲས་པདྨས་ལྕི་ལེབ་སྟེང་གླུད་གཟུགས་བྱས། ལྕི་བ་ལ་ཐག་གུ་བཏགས་པའི་སྣེ་ནས་དྲངས་ཏེ་ཆོ་ག་སོགས་མི་དགོས་པར་ཁྱོད་འགྲོ་གསུངས་ནས་གླུད་འཕངས་པས་རྗེས་ནས་ཕྱུགས་ནད་མིང་ཡང་མེད་པ་བཟོས་ཞེས་ཡུལ་འདིར་རླུང་ལྟར་གྲགས། ཁོང་ནི་སེམས་ཅན་མང་པོ་བཤའ་མཁན་ཞིག་ཀྱང་ཡིན་པས་ཉིན་ཞིག་ལམ་ཁར་སེམས་ཅན་བཤས་ནས་ཡོད་སྐབས་རྡོ་གྲུབ་ཆེན་རིན་པོ་ཆེས་ཕྱག་ན་རྡོ་རྗེ་དངོས་སུ་གཟིགས་ནས་འདི་ལ་སེམས་ཅན་མ་བཤའ་མ་གསུང་ཞེས་གསུངས་སོ།།
ཞབས་དྲུང་གཉིས་པས་རང་གི་གསང་རྣམ་སོགས་ལས་རང་གི་སྐུ་སྐྱེ་ཕྱི་མ་རྣམས་ཀྱི་མཚན་དང༌། ལྷག་པར་སྐུ་ཕྲེང་བརྒྱད་པ་སྔགས་པ་གྲུབ་ཐོབ་ཀྱི་བརྟུལ་ཞུགས་འཛིན་པ་ཞིག་ཏུ་ཕེབས་པ་དང༌། གཞན་ཡང༌། གདུལ་བྱ་དང༌། དེ་དག་གི་བྱ་སྤྱོད་ཚུན་ཇི་འདྲ་འབྱུང་བ་རྣམས་ལུང་བསྟན་གསལ་པོ་གནང་ཡོད་དེ། ཞབས་དྲུང་གཉིས་པ་མཁས་བཙུན་ཡོན་ཏན་རྒྱ་མཚོའི་གསུང་འབུམ་ཐོར་བུ་ཕྱོགས་བསྒྲིགས་ལྡེབ་གྲངས་ ༣༡ ན། སྟོང་འཁོར་ཡུལ་དུ་ཞི་བའི་རྒྱ་མཚོ་སྟེ། །ཡོན་ཏན་རྒྱ་མཚོ་རྒྱལ་བ་རྒྱ་མཚོ་ཉིད། །མདོ་རྒྱུད་རྒྱ་མཚོས་བསྟན་པ་རྒྱས་པར་བྱེད། །ཅེས་དང༌། དེ་ཉིད་ཀྱི་ལྡེབ་གྲངས་ ༨༨ ན། ང་བརྒྱད་པ་སྔགས་འཆང་བརྟུལ་ཞུགས་ཏེ། །ཡུལ་བགྲོད་པར་དཀའ་ཞིང་གདུག་རྩུབ་ཆེ། །ཟས་ཤ་ཁྲག་ཟ་ཞིང་སྡིག་ལ་སྤྱོད། །སེམས་ཁེངས་ཤིང་ང་རྒྱལ་རི་བོ་མཐོ། །ཞེས་གསུངས་པས་སོ། །འདིའི་ཚིག་རྐང་དང་པོ་དེ༌མ་དཔེ་གསེར་བྲིས་མའི་ནང་དུ་སྐྱོ་འབུར་འཐེན་པ་ལྟར་གསེར་གྱིས་འབུར་དུ་དོད་ནས་བྲིས་ཡོད། དེ་ནི་ལུང་བསྟན་ཁྱད་པར་ཅན་ཞིག་ལ་བསམས་ནས་ཡིན་སྙམ། ལུང་བསྟན་གནང་བ་ལྟར་གྱི་ལུང་བ་ཆུང་ཆུང་འདི་འདྲ་བར་སྔ་རྗེས་བར་གསུམ་དུ་བླ་མ་འཇམ་པའི་དབྱངས་ཀྱི་རྣམ་འཕྲུལ་ཤ་སྟག་ཕེབས་ཀྱང༌། གདུལ་བྱ་གདུག་རྩུབ་ཆེ་བ། མི་དགེ་བ་ལ་སྤྱོད་པ། ང་རྒྱལ་ཁེངས་སེམས་ཅན། འདུལ་དཀའ་བ་དུ་མ་འབྱུང་བས་དམ་པ་དག་གིས་ཐུགས་བཞེད་ཇི་བཞིན་པ་ནི་བསྒྲུབས་པར་མཛད་ཀྱང་འགྲུབ་པ་དཀའོ། །མ་འོངས་མཁྱེན་ཚུལ་བཟང་པོ་འདི་འདྲ་བ་ཡང་རང་རེ་སོ་སྐྱེ་རང་ག་བ་རྣམས་ཀྱི་བསམ་ཡུལ་ལས་འདས་པ་ཁོ་ནའོ། །དེའི་ཕྱིར་རང་ཉིད་ལེགས་སུ་འདོད་པ་རྣམས་ཀྱིས་ཚུལ་བཞིན་མ་ཡིན་པའི་བྱ་སྤྱོད་ཕྲ་རགས་ཀུན་རིང་དུ་སྤང་བར་བྱའོ།།
ཤིང་རྟ་ལོར་སྨན་བླའི་ཆོས་ཐོག་བཙུགས་ཏེ་ཆོ་གའི་སྤྱན་འདྲེན་གྱི་སྤེལ་ཚིག་ལ་འདུས་སྡེ་དཔོན་སློབ་འཁོར་དང་བཅས་པའི་སྐུའི་རིམ་གྲོ་ཞེས་སྦྱར་ན་ལེགས་ཚུལ་གསུངས་པ་ཇི་བཞིན་ད་བར་གནས་སོ། །སྤྱི་ལོ་ ༡༨༩༥ དགུང་གྲངས་ཞེ་གསུམ་པ་མེ་ལུག་ལ་ངུར་སྨྲིག་གི་ན་བཟའ་ལེགས་པར་བཞེས་ནས་ཞབས་གཡས་བསྐུམས་གཡོན་བརྐྱངས། ཕྱག་གཡས་སྡིགས་མཛུབ་དང་བཅས་པུས་མོའི་སྟེང་བཞག ཕྱག་གཡོན་མཉམ་བཞག་མཛད་དེ་གདུག་པ་ཅན་ཐམས་ཅད་ཚར་གཅོད་པར་གྱུར་ཅིག་ཅེས་གསུངས་ནས་འོག་མིན་དུ་ཞི་བར་གཤེགས་སོ། །
སྨྲས་པ།
ཁྱོད་ཀྱིས་གསང་སྔགས་བརྟུལ་ཞུགས་མཛད་པ་དེ། །
རྒྱ་གར་གྲུབ་ཆེན་གཅིག་པུར་མཚུངས་ལགས་ཀྱི། །
བོད་ཡུལ་ཁྱོད་ཀྱི་མཚུངས་ཟླ་གཞན་ཡོད་ན། །
དེ་ཡང་ཁྱོད་ཀྱི་དཔེ་རུ་ཅིས་མི་འགོད། །
དམ་པའི་གསང་གསུམ་དམ་པ་ཕན་ཚུན་ལས། །
སོ་སོ་བཟང་འདོད་སོ་སྐྱེས་ག་ལ་དཔོག །
འཕགས་པའི་རིགས་གྱུར་འཕགས་པ་ཐོགས་མེད་ཀྱིས། །
ཁྱི་མིན་རྗེ་བཙུན་ཁྱི་མོར་མཐོང་བ་ལྟར། །ཞེས་སོ། །