སྐུ་ཕྲེང་དགུ་པ་བློ་བཟང་ཐུབ་བསྟན་འཇིགས་མེད་ཚུལ་ཁྲིམས་རྒྱ་མཚོ།
༈ ཞབས་དྲུང་དགུ་པ་རྗེ་བཙུན་བློ་བཟང་ཐུབ་བསྟན་འཇིགས་མེད་ཚུལ་ཁྲིམས་རྒྱ་མཚོ་དཔལ་བཟང་པོ་ནི། སྤྱི་ལོ་ ༡༨༩༦ མེ་སྤྲེལ་ལོར་བྲག་འགོའི་ནོར་བུ་ཁུག་ཏུ། ཡབ་རིག་འཛིན་དང༌། ཡུམ་རྣམ་རྒྱལ་སྒྲོལ་མ་གཉིས་ཀྱི་སྲས་སུ་བལྟམས། མཚན་ལ་བློ་བཟང་ལྷུན་འགྲུབ་ཅེས་གསོལ། འཁྲུངས་ནས་ཞག་གསུམ་ལོན་ཚེ་ཕྱག་གཉིས་ཐལ་མོ་སྦྱར་ནས་སྤྱན་ནམ་མཁའ་ལ་གཟིགས་ཏེ་ཨོཾ་མ་ཎི་པདྨེ་ཧཱུྃ་ཞེས་གསུངས་པ་དང༌། སྐུ་བྱིས་པའི་དུས་བྱིས་པ་གཞན་གྱིས་སྲོག་ཆགས་སྦྲང་བུ་གསོད་པ་མཐོང་བས་སྤྱན་ཆབ་བྱུང་བ་སོགས་དམ་པའི་རང་རྟགས་མངོན། རྒྱལ་དབང་ཐུབ་བསྟན་རྒྱ་མཚོས་གོང་མའི་ཡང་སྲིད་འཁྲུལ་མེད་དུ་ངོས་འཛིན་གནང༌། བློ་བཟང་ཐུབ་བསྟན་འཇིགས་མེད་ཚུལ་ཁྲིམས་རྒྱ་མཚོ་ཞེས་པའི་མཚན་གསོལ་དང་འབྲེལ་བརྟན་བཞུགས་སྨོན་ཚིག་དང༌། ཐུབ་དབང་གི་སྐུ་གནང་སྦྱིན་མཛད། དགུང་གྲངས་གསུམ་ཐོག་རང་དགོན་དུ་གོང་མའི་གསེར་ཁྲིར་མངའ་གསོལ། ནགས་གཙང་རྡོ་རྗེ་འཆང་ལས་ཡི་གེ་འབྲི་ཀློག་སོགས་བསླབ་པས་ཚེགས་མེད་དུ་མཁྱེན། དེའི་དྲུང་དུ་འཇིགས་བྱེད་ལྷ་བཅུ་གསུམ་མའི་དབང་སོགས་ཞུས། དགུང་ལོ་བདུན་སྐབས་བྲག་དཀར་རིན་པོ་ཆེ་བློ་བཟང་དཔལ་ལྡན་བསྟན་འཛིན་སྙན་གྲགས་ཀྱི་མདུན་ནས་ཡོངས་རྫོགས་དགེ་བསྙེན་དང༌། དགེ་ཚུལ་གྱི་སྡོམ་པ་བཞེས། རྗེས་སུ་དེའི་དྲུང་དུ་བསྙེན་པའང་རྫོགས། ན་བཟའ་བཞེས་ལུགས། འཚོ་བའི་ཡོ་བྱད་དང༌། མཁོ་བའི་ཡོ་བྱད་འཆང་ལུགས། བྱིན་ལེན་དང༌། རུང་ཆུ་འདེབས་པ། ཆབ་ལེན་ལྷམ་ཕུད་སོགས་བཅས་མཚམས་ཕྲ་མོ་ཡན་ཆད་ཀྱི་ཕྱག་ལེན་རྒྱུན་སྐྱོང་གནང་སྟེ། ལྷག་པར་ཚུལ་ཁྲིམས་ཀྱི་བསླབ་པ་ལ་གཅེས་སྤྲས་མིག་འབྲས་བཞིན་མཛད། དེའི་འབྲས་རྟགས་སུ་སྐུ་ལུས་ལས་ཚུལ་ཁྲིམས་དག་པའི་དྲི་ངད་རྒྱང་རིང་དུ་ལྡང་ཞིང༌། ཆོས་གྲྭ་སོགས་ཕེབས་བཞུད་སྐབས་སྐུ་མ་མཇལ་བའི་སྔོན་དུ་ཚུལ་ཁྲིམས་དྲི་མ་ཚོར་ཡོང་བ་ཡིན་ཞེས་སྐུ་དངོས་སུ་མཇལ་མྱོང་བའི་རྒན་རབས་དག་གིས་བཤད་ཚུལ་མཐུན་པར་ཕྲན་རང་གིས་ཐོས། ཆོས་གྲྭར་ལོ་རེར་ཟླ་བ་གསུམ་ཙམ་རེ་བསྐྱངས་ནས། སྔོན་འགྲོར་འདུལ་བའི་བསླབ་བྱ། ལམ་རིམ་བླ་མ་བརྒྱུད་པའི་རྣམ་ཐར། གནས་བརྟན་རྟོགས་བརྗོད། སྐྱེས་རབས་སོ་བཞི་པ་སོགས་དང༌། དངོས་གཞིར་རྗེ་ཙོང་ཁ་པའི་ལམ་རིམ་ཆེན་མོ་འཆད་ཁྲིད་མཛད། དགུང་ལོ་བདུན་ནས་ཡོངས་འཛིན་ཡེ་ཤེས་རྒྱལ་མཚན་གྱི་སྐུ་སྐྱེར་གྲགས་པ་བཤེས་གཉེན་བློ་བཟང་ཆོས་གྲགས་ཀྱི་མདུན་ནས་ཆོས་སྤྱོད་ཁག་དང༌། རིག་གནས་མཐའ་དག་ལ་སྦྱངས་པར་གནང༌། གཞན་ཡང༌། བྲག་དཀར་རྡོ་རྗེ་འཆང་བློ་བཟང་དཔལ་ལྡན་བསྟན་འཛིན་སྙན་གྲགས་རིགས་ཀྱི་ཅོད་པན་དུ་བཟུང༌། རྒྱལ་བའི་བཀའ་འགྱུར་རོ་ཅོག རྗེ་ཡབ་སྲས་ཀྱི་གསུང་འབུམ། པཎ་ཆེན་བློ་བཟང་ཆོས་རྒྱན་གྱི་གསུང་འབུམ་རྣམས་ཀྱི་ལུང་དང༌། ཚད་མ་རྣམ་འགྲེལ་གྱི་ཁྲིད་སོགས་ལེགས་པར་ཞུས། མཚན་བརྗོད་པའི་ཚེ་ངའི་བླ་མའི་ཐུགས་རྗེ་འདྲ་བ་གཞན་ལ་མེད་གསུངས་ཏེ་ཕྱག་ཐལ་མོ་སྦྱར་ནས་སྤྱན་ཆབ་ཉིལ་ཉིལ་དུ་གཏོང་བར་མཛད། དགུང་གྲངས་བཅུ་གཉིས་པ་ལ་དབུས་ཕྱོགས་སུ་ཆིབས་ཞལ་བསྒྱུར། སེར་སྨད་དུ་ཆོས་ཞུགས་མཛད། མཁས་མཆོག་དགེ་འདུན་གྲགས་པ་ཡོངས་འཛིན་བསྟེན་ཏེ་གཞུང་པོད་ལྔ་ཕྲག་ལ་སྦྱངས་པ་ཕུལ་དུ་བྱུང་བ་གནང༌། རིགས་ཆེ་ཆུང་གི་ཚོགས་ལངས་མཛད་དེ་སྐལ་ལྡན་དང་བ་འདྲེན་པའི་མིག་རྒྱན་དང་། གཟུར་གནས་མཁས་དབང་དགྱེས་པའི་མཆོད་སྤྲིན་དུ་བགྱིས། དགུང་གྲངས་བཅུ་བདུན་པར་ལྷ་ལྡན་སྨོན་ལམ་ཆེན་མོར་རབ་འབྱམས་པའི་མཚན་བཏགས་བཞེས། ༸རྒྱལ་བ་ཐུབ་བསྟན་རྒྱ་མཚོ། ༸པཎ་ཆེན་ཆོས་ཀྱི་ཉི་མ། སྐྱབས་རྗེ་ཕ་བོང་ཁ་སོགས་ཀྱི་མདུན་ནས་ཟབ་ཆོས་མང་དུ་གསན། དགུང་གྲངས་བཅོ་བརྒྱད་ལ་རང་ཡུལ་དུ་བཞུགས་འཇགས་བསྐྱངས། ཉེར་བདུན་ལ་སློབ་དཔོན་གཡུ་སྒྲ་སྙིང་པོས་གནས་སྒོ་འབྱེད་པའི་གནས་ཆེན་ཉེར་བཞིའི་ཡ་གྱལ་སྐུའི་གནས་མཆོག་སྟོང་འཁོར་སཽ་རཱཥྚྲ་ཞེས་པར་རི་ཁྲོད་ཚུལ་མཐུན་བཏབ་སྟེ་སྒྲུབ་པ་ཉམས་བཞེས་མཛད། སོ་གཅིག་པར་རྗེ་ཟླ་བ་རྒྱལ་མཚན་གྱིས་སྔར་གནས་གཡར་བྱས་པའི་ལོ་རྒྱུས་ལྡན་པའི་གདན་ས་ཆེན་པོ་དེ་མིང་ཙམ་ལ་ཐུག་འདུག་པའི་ཤུལ་དུའང་རི་ཁྲོད་བཞེངས། དེ་ནི་རྒྱུན་གྱི་བཞུགས་གནས་ལྟ་བུར་མཛད། བསྟན་པའི་གཞི་རྩར་དམིགས་ཏེ་རྗེ་ཡབ་སྲས་ཀྱི་གསུང་འབུམ། མཁས་གྲུབ་བསྟན་དར་བའི་ཕར་ཕྱིན་སྤྱི་མཐའ། ཞབས་དྲུང་འཇམ་དཔལ་དགེ་འདུན་རྒྱ་མཚོས་མཛད་པའི་བསྡུས་གཞུང༌། བརྗེད་ཐོ། བློ་རྟགས་གཉིས། དོན་བདུན་ཅུ། རྗེ་རང་གི་གསུང་འབུམ་རྣམས་དཔར་གཞི་གསར་བསྐྲུན་མཛད། སེར་སྐྱ་བགྲང་ལས་འདས་པ་ཐུགས་རྗེ་ཆེན་པོ་ལ་བརྟེན་པའི་སྨྱུང་གནས་དང༌། བསྙེན་གནས་དང༌། ཐེག་ཆེན་གསོ་སྦྱོང་གི་སྡོམ་པ་ལ་གནས་བཅུག་པའི་སྒོ་ནས་སྨིན་གྲོལ་གྱི་ལམ་ལ་བཀོད། གནའ་ནས་ད་བར་སྟོང་འཁོར་གྱི་ཡུལ་གྲུ་སོ་སོར་ཆོ་འཕྲུལ་ཟླ་བ་དང༌། ས་ག་ཟླ་བ་སོགས་དུས་ཆེན་དང་བསྟུན་ཏེ་སྨྱུང་གནས་ཆ་གཉིས་གསུམ་རེ་དང༌། རྒྱུན་གྱི་ཉ་སྟོང་ཚེས་བརྒྱད་དང་བསྟུན་ཏེ་བསྙེན་གནས་དང༌། ཐེག་ཆེན་གསོ་སྦྱོང་གི་སྡོམ་པ་ལ་གནས་པའི་སྲོལ་རྒྱུན་བཟང་པོ་གཞན་དང་མི་འདྲ་བ་ཡོད་པ་ནི། ཉིད་ཀྱིས་གཙོས་དམ་པ་རིམ་བྱོན་རྣམས་ཀྱི་བཀའ་དྲིན་ལས་ཡིན་པ་སྨོས་མ་དགོས་སོ། །ཉིན་བཞིན་ཉམས་ལེན་རྒྱུན་འཁྱོངས་མཛད་རྒྱུ་ལ། ཐུན་དྲུག་བླ་མའི་རྣལ་འབྱོར། སོ་ཐར་བྱང་སེམས་གཉིས་ཀྱི་བསླབ་བྱ་དང༌། སྔགས་ཀྱི་དམ་ཚིག་གི་སྡོམ་པ་རྣམས་ཐུན་དྲུག་ཏུ་ཉམས་ལེན་དང་བསྔོ་བགྲང་མཛད། དམ་ཚིག་གསོ་ཕྱིར་ཡི་དམ་ཆོས་སྐྱོང་གི་གཏོར་འབུལ། ཡིག་བརྒྱ་ཉེར་གཅིག སྡོམ་གསུམ་ཕྱིར་བཅོས་ལན་གསུམ་རེ། བདེ་མཆོག་ལཱུ་དྲིལ་གཉིས་དང༌། འཇིགས་བྱེད། ཐུགས་རྗེ་ཆེན་པོ་སོགས་ཀྱི་བདག་འཇུག་བར་བར་དུ་བླངས་པ་སོགས་རྒྱལ་བའི་གསུང་གི་གནད་མཁྱེན་པའི་རྣམ་ཐར་རྨད་དུ་བྱུང་བ་བསྐྱངས་སོ། །ཞལ་ཆེམས་སུ་རྗེས་སུ་ང་ཡི་ལུས་འདི་ཆུ་ལ་བསྐུར་ན་ལེགས་ཀྱང་དེ་དགོན་པའི་ཐུགས་ལ་མི་བབས། ལུས་རིལ་པོར་བཞག་ན་དུས་ངན་ལ་ངན་པ་ཤ་སྟག་འབྱུང་བས་ཅིར་འགྱུར་ངེས་པ་མེད། དེས་ན་མེ་ལ་བསྲེག་དགོས་གསུངས་ནས་མ་འོངས་མཐའ་དམག་འོང་བའི་ལུང་བསྟན་གྱི་གསུང་ཟུར་ཙམ་རེ་གནང༌། སྤྱི་ལོ་ ༡༩༣༤ དགུང་གྲངས་སོ་དགུ་པར་ཟླ་བ་རྒྱལ་མཚན་གྱི་གདན་ས་གཡར་ཁང་རི་ཁྲོད་དུ། ཞལ་དགོན་པར་ཕྱོགས་ཏེ་ཆོས་སྐུ་མངོན་དུ་མཛད་དོ། །
སྨྲས་པ།
བདེ་གཤེགས་བསྟན་པའི་སྙིང་པོ་མཆོག །
འདུལ་བའི་ཕྱག་ལེན་ཕྲ་རགས་ཀུན། །
སྲོག་བསྡོས་བསྲུངས་པའི་དགེ་མཚན་དུ། །
ཚུལ་ཁྲིམས་དྲི་ངད་རྒྱང་རིང་ལྡང་། །
འདི་ལ་བྱ་མིག་གནམ་བལྟས་ཚུལ་གྱིས་ནི། །
ཚུལ་ཁྲིམས་དྲི་ངད་ཞིམ་པོ་མ་འཐུལ་བར། །
སྡོམ་གསུམ་གཅེས་སྤྲས་བགྱིས་ན་ཅིས་མི་འཐུས། །
མཆེད་གྲོགས་དག་ལ་བདག་གིས་ཆེད་དུ་བརྗོད། །ཅེས་སོ། །