༡ མདོ་ཕྱོགས་ཀྱི་ཆོས་ཐོག་སྐོར་བཤད་པ།
དང་པོ་ལ། མདོ་ཕྱོགས་ལ་སྤྲོ་བ་བསྐྱེད་ཚུལ་དང༌། མདོ་ཕྱོགས་ཀྱི་ཆོས་ཐོག་སྐོར་བཤད་པའོ།།
མདོ་ཕྱོགས་ལ་སྤྲོ་བ་བསྐྱེད་ཚུལ།
དང་པོ་ནི། སྐྱབས་རྗེ་འཇམ་དཔལ་དགེ་འདུན་རྒྱ་མཚོས། གཞུང་ཆེན་པོ་སློབ་གཉེར་རྒྱག་དང་གཅིག །ཆོས་བྱང་ཆུབ་ལམ་རིམ་ཐོས་དང་གཉིས། །ནང་སེམས་རྒྱུད་ཆོས་ལ་ཕྱོགས་དང་གསུམ། །ད་སྐྱིད་ཀྱི་ཉི་མ་འདི་གསུམ་ཤར། །ཞེས་གསུངས་པ་ལྟར། རང་རང་གི་སྔོན་བསགས་དགེ་བའི་ལས་དང་མཐུན་པར་དངོས་དང་རྗེས་མཐུན་ཅི་རིགས་ཀྱི་སྒོ་ནས་དལ་འབྱོར་ཚང་བའི་མི་ལུས་ནི་ཐོབ། རྒྱལ་བ་ཡབ་སྲས་དང༌ཞབས་དྲུང་རིན་པོ་ཆེས་གཙོས་བཤེས་གཉེན་དག་དང་ནི་ཕྲད། བསྟན་པ་རིན་པོ་ཆེ་སྤྱི་དང༌། ཁྱད་པར་ཡབ་རྗེ་རྒྱལ་བ་གཉིས་པའི་བསྟན་པ་བཙོ་སྦྱངས་གསེར་གྱི་ཡང་ཞུན་ལྟ་བུ་འདི་ཉིད་དང་མཇལ་བར་མ་ཟད། གཞུང་ཆེན་པོ་ལྔ་སློབ་གཉེར་གནང་ས་ཡོད་པའི་སྐྱིད་ཀྱི་ཉི་མ་འདི་དང་གཅིག ཆོས་བྱང་ཆུབ་ལམ་རིམ་ཐོས་པ་བྱེད་ས་ཡོད་པའི་སྐྱིད་ཀྱི་ཉི་མ་འདི་དང་གཉིས། ནང་སེམས་རྒྱུད་ཆོས་ལ་ཕྱོགས་པའི་སྐྱིད་ཀྱི་ཉི་མ་འདི་དང་གསུམ་ཤར་བ་འདི་ཅི་འདྲའི་སྐལ་བ་བཟང་པོ། དོན་བཟང་པོ། དུས་བཟང་པོ་ཞིག་ཀྱང་མ་ཡིན་ནམ། སྤྱིར་ཉི་མ་ཤར་ཡང་ཉི་འོད་དུ་མ་བསྡད་ན་གང་ཡང་མི་ཕན་པ་བཞིན། དཔེ་ཆ་མ་གཟིགས་པའམ། ལམ་རིམ་ལ་ཐོས་བསམ་མ་བྱས་པའམ། ནང་ཆོས་ལ་ཤེས་ནས་དད་པ་ཐོབ་པར་མ་བྱས་པ་དག་ལ་ནི་སྐྱིད་ཉི་མ་འདི་གསུམ་རང་གིས་རང་ལ་ཤར་མ་བཅུག་པར་འགེབས་པར་བྱས་པ་དང་འདྲ་བར་འགྱུར། གལ་ཏེ་འདི་དག་དང་འཕྲད་པ་དོན་མེད་དུ་བཏང་ན་དེ་ལས་གྱོང་གུན་ཆེ་བ་ཞིག་འཇིག་རྟེན་འདིར་ཡོད་པ་མ་ཡིན་ནོ། །དེས་ན་རྒྱུ་མཚན་དེའི་ཕྱིར་རྒྱལ་བསྟན་ནོར་བུའི་བང་མཛོད་ཕྱོགས་ལས་རྣམ་རྒྱལ་འཇམ་དབྱངས་ཀུན་དགའ་མཐོང་གྲོལ་ཞེས་པའི་ཆོས་གྲྭ་འདིར་བཞུགས་ཀྱི་དགེ་འདུན་རྣམས་ཀྱིས་རྨོངས་པའི་དབང་གིས་ཐོས་བསམ་ཡལ་བར་བོར་ནས་ཚོང་གྲོང་ཆོག་འཚེམ་འདྲུབ་སོགས་ནོར་སྒྲུབ་པའི་ཐབས་ཙམ་ལ་འབད་པ་ནི། དལ་རྟེན་ཆུད་ཟོས་སུ་བཏང་ནས་འབྲས་མེད་ཀྱི་སྤུན་པ་འཕྱར་བ་དང༌། དུད་འགྲོའི་ཀུན་སྤྱོད་ལས་མ་འདས་པས་ཤིན་ཏུ་རྨོངས་པ། ཆེས་བླུན་པ་ཡིན་ནོ། །དེས་ན་དེ་དག་དགོན་པར་བསྡད་པ་དང༌། སྐྲ་བྲེགས་པའི་དགོས་པ་སྟོར་ཏེ། ཏིང་ངེ་འཛིན་རྒྱལ་པོའི་མདོ་ལས། སངས་རྒྱས་བསྟན་པ་འདི་ལ་རབ་བྱུང་ནས། །སྡིག་པའི་ལས་རྣམས་ཤིན་ཏུ་སྤྱོད་པར་བྱེད། །ནོར་དང་འབྲུ་ལ་སྙིང་པོར་འདུ་ཤེས་ཤིང༌། །བཞོན་དང་བ་ལང་ཤིང་རྟ་རྣམས་ལ་ཆགས། །གང་ལ་བསླབ་པའི་ནན་ཏན་མེད་པ་རྣམས། །དེ་དག་གིས་ཀྱང་ཅིའི་ཕྱིར་མགོ་བོ་བྲེགས། །ཞེས་གསུངས་སོ། །དེ་ལྟར་མི་མཛད་པར་ཐར་པ་དང་ཐམས་ཅད་མཁྱེན་པ་དོན་དུ་གཉེར་བ་རྣམས་ཀྱིས་བཀའ་པོད་ལྔས་གཙོས་རིག་གནས་ལྔ་ལ་བསླབས་ནས་ཆོས་རབ་ཏུ་རྣམ་འབྱེད་ཀྱི་ཤེས་རབ་བསྐྱེད་དགོས་ཏེ། ནང་པའི་བསྟན་པ་ནི་ཤེས་རབ་ཀྱི་ཁྱད་པར་དུ་བྱས་པ་ཡིན་པས། ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་ནས་སྒྲུབ་པ་མ་གཏོགས་དད་པ་རྐྱང་པས་མི་ཆོག་པའི་ཕྱིར་དང༌། ཐོས་བསམ་མི་དགོས་པར་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པའང་མེད་ལ། ཡོད་ན་བཅོམ་ལྡན་འདས་དང༌། དཔལ་མགོན་འཕགས་པ་ཀླུ་སྒྲུབ། སློབ་དཔོན་ཐོགས་མེད། ཙོང་ཁ་པ་སོགས་འཁྲུལ་ཞེས་སྨོས་དགོས་པར་འགྱུར། དེ་སྐད་དུ་ཡང་མདོ་སྡེ་དཀོན་མཆོག་བརྩེགས་པ་ལས། ང་ཡི་བསྟན་པ་ཤེས་རབ་ཀྱི་ཁྱད་པར་དུ་བྱས་པ་ཡིན་ཞེས་གསུངས་པ་དང༌། རྗེ་བཙུན་བྱམས་པ་མགོན་པོས། རིག་པའི་གནས་ལྔ་དག་ལ་བརྩོན་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །དེ་ལྟ་བས་ན་གཞན་དག་ཚར་བཅད་རྗེས་གཟུང་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱེད། །ཅེས་གསུངས་པ་དང༌། སློབ་དཔོན་དབྱིག་གཉེན་གྱིས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱ་བའི་ཐབས་མེད་ལ། །ཉོན་མོངས་པས་ཀྱང་འཇིག་རྟེན་སྲིད་མཚོ་འདིར་འཁྱམས་ཏེ། །དེ་བས་དེ་ཕྱིར་འདི་ནི་སྟོན་པས་གསུངས་སོ་ལོ། །ཞེས་དང༌། འཇམ་དཔལ་དགེ་འདུན་རྒྱ་མཚོས། རབ་འབྱམས་གཞུང་ལ་སྦྱངས་པ་མི་བྱེད་པར། །རྣམ་གྲོལ་སྒྲུབ་པའི་མོ་བཤམ་བུ་འདོད་རྣམས། །བདེན་ན་སངས་རྒྱས་ཀླུ་སྒྲུབ་ཐོགས་མེད་དང༌། །ཙོང་ཁ་པ་སོགས་འཁྲུལ་ཞེས་ད་སྨོས་ཤིག །ཅེས་གསུངས་པ་དང༌། ༸གོང་ས་མཆོག་གིས། རང་རེའི་སངས་རྒྱས་ཀྱི་བསྟན་པ་ནི་ཆོས་རབ་ཏུ་རྣམ་འབྱེད་ལ་བརྟེན་ནས་ཉམས་ལེན་བྱེད་དགོས་པ་ལས་དད་པ་གཅིག་པུས་མི་འགྲིགས་གསུངས་སོ།།
གཞན་ཡང་ལ་ལ་དག་བདག་ཉིད་ལ་བརྙས་པའི་ལེ་ལོས་དབང་པོ་རྟུལ་བ་རྒྱུ་མཚན་དུ་བྱས་ནས་མི་འབད་པ་འདི་ཡང་རིགས་པ་མ་ཡིན་ཏེ། དེང་སང་འཛམ་གླིང་ན་དོམ་གྱིས་རྐང་འཁོར་གཏོང་བ་དང༌། གླང་པོ་ཆེས་རི་མོ་འབྲི་བ་དང༌། སྤྲེའུས་ཞབས་བྲོ་རྒྱག་པ་སོགས་ཡོད་ཚུལ་འདི་དག་ལ་གཟིགས་ན། སྨྲས་ཤིང་བསྐུལ་ན་དུད་འགྲོ་ལའང་གོ་བ་ཡོད་པ་ཤེས་ནུས་པས། རྣམ་དཔྱོད་དང་ལྡན་པའི་མི་རྣམས་ཀྱིས་རིག་གནས་སྦྱངས་པ་དེ་བས་ཀྱང་ལས་སླ་བ་ལྟ་ཅི། དེ་ཡང༌། སྤྱོད་འཇུག་ལས། གོམས་ན་སླ་བར་མི་འགྱུར་བའི། །དངོས་དེ་གང་ཡང་ཡོད་མ་ཡིན། །ཞེས་དང༌། ས་སྐྱ་ལེགས་བཤད་ལས། སྨྲས་ཤིང་བསྐུལ་བར་གྱུར་པ་ན། །དུད་འགྲོ་ལ་ཡང་གོ་བ་སྐྱེ། །གསུངས་ཡོད།
འགའ་ཞིག་ན་ཚོད་མཐོ་བ་རྒྱུ་མཚན་དུ་བྱས་ནས་མི་འབད་པ་འདི་ཡང་རིགས་པ་མ་ཡིན་ཏེ། ནངས་པར་འཆི་ཡང་དེ་རིང་དཔེ་ཆ་གཟིགས་པ་སྔོན་བྱོན་དམ་པའི་རྣམ་ཐར་དང༌། རིག་པ་བསླབ་པ་དེས་ཚེ་འདིར་མཁས་པར་མ་གྱུར་ཀྱང་དེས་བག་ཆགས་ཁྱད་པར་ཅན་ཐེབས་ནས་བཅོལ་བའི་ནོར་དགོས་དུས་ཕྱིར་ལེན་ཆོག་པ་ལྟར་ཕྱི་མར་བེད་སྤྱོད་གཏོང་ཆོག་པའི་ཕྱིར། དེ་ཡང༌། ས་སྐྱ་ལེགས་བཤད་ལས། རིག་པ་ནངས་པར་འཆི་ཡང་བསླབ། །ཚེ་འདིར་མཁས་པར་མ་གྱུར་ཀྱང༌། །སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་དང་མཚུངས། །ཞེས་གསུངས་པས་སོ།།
གཞན་ཡང༌། ཁ་ཅིག་གིས་ཐོས་བསམ་སྒོམ་གསུམ་མི་ནུས་པས་ཁ་ཏོན་དང་ཕྱག་བསྐོར་ཙམ་གྱིས་ཆོག་སྙམ་ན་དེ་ཡང་མི་རིགས་ཏེ། ཚིག་བཟང་པོ་ཞལ་ནས་གསུང་དུས། དོན་བཟང་པོ་ཡིད་ལ་བསྒོམས་ཏེ་ཁ་དོན་བྱས་ན་ཤིན་ཏུ་བཟང་ཡང༌། དེ་ནི་ཐོས་བསམ་མ་བྱས་པར་ཡོང་ཐབས་རྩ་བ་ནས་མེད་པས། དེ་མིན་གྱི་ཁ་ཏོན་སོགས་ནེ་ཙོའི་མ་ཎི་དང་མཚུངས་པ་ལས་ཕན་བྱེད་གང་ཡིན་དཀའ། ཕན་བྱེད་ཡོད་ན་ཐོག་མ་མེད་པ་ནས་ཉོན་མོངས་ཀྱི་གཞན་དབང་དུ་སོང་བ། རྡོ་ལྟར་སྲ་ཞིང་རྭ་ལྟར་འཁྱོགས་པའི་རང་སེམས་འདི་ལ་ཕན་དགོས་པ་ལས་དེ་མི་རྙེད་པའི་ཕྱིར་ཏེ། རྒྱལ་སྲས་ཞི་བ་ལྷས། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱོད་བྱས་ཀྱང་། །སེམས་གཞན་གཡེང་བས་བྱས་པ་ནི། །དེ་ཉིད་རིག་པའི་དོན་མེད་གསུངས། །ཞེས་དང་། སྐྱབས་རྗེ་འཇམ་དཔལ་དགེ་འདུན་རྒྱ་མཚོས་ཀྱང༌། ཚིག་རྐང་གཅིག་གི་དོན་ལ་བསམ་བྱ་དང༌། །བྲལ་བའི་ནེ་ཙོའི་མ་ཎི་ཁ་ཏོན་མཁན། །དེ་ཡི་ཤེས་རྒྱུད་རྡོ་དང་རྭ་ཅོ་ལྟར། །སྲ་ཞིང་འཁྱོགས་ལ་ཕན་བྱེད་གང་ཡིན་སྨོས། །ཞེས་གསུངས་སོ།།
དེས་ན་བདག་ལེགས་སུ་འདོད་པ་རྣམས་ཀྱིས་ཐོས་བསམ་ལ་ཤ་ཐང་དུ་འབད་དགོས། དེའི་ཚུལ་ཡང་༸གོང་ས་མཆོག་གིས། སེམས་རྒྱུད་འདུལ་ཐབས་ཡིན་བསམ་པའི་ཐོག་ནས་དཔེ་ཆ་བལྟ་རྒྱུ་མ་བྱུང་ན། དཔེ་ཆ་ཇི་ཙམ་ཤེས་པ་ཡིན་ཡང་རྒྱུད་གོག་པོ་མ་དུལ་ཧྲེང་པོར་མུ་མཐུད་དེ་གནས་ན་གྲྭ་པའི་ཞབས་འདྲེན་དང༌། ཆོས་པའི་ཞབས་འདྲེན། གདན་སའི་ཞབས་འདྲེན་ཐོན་གྱི་ཡོད། གཞི་རྩའི་དཔེ་ཆ་བ་ཞིག་ཡིན་ཕྱིན་ཐ་ན་གྲྭ་ཆས་གྱོན་སྟངས་གོམས་པ་སྤོ་སྟངས་ཚུན་ཞི་ཞིང་དུལ་བ་ཏན་ཏན་ཡོད། ཧ་ཅང་ལེགས་པའི་གནས་རེད་གསུངས་པ་ལྟར། རབ་བྱུང་སྤྱི་དང༌། ཁྱད་པར་དཔེ་ཆ་བ་རྣམས་ཀྱིས་སེམས་རྒྱུད་འདུལ་ཐབས་ཡིན་པ་ལ་བསམ་བློ་ལེགས་པར་བཏང་སྟེ་སེམས་ཀྱི་འཁྱེར་སོ་འཇིག་རྟེན་རང་ག་བ་ལྟ་བུ་མ་ཡིན་པར། ཐོས་དོན་རྒྱུད་ལ་སྦྱར་ཏེ་རང་རྒྱུད་ཀྱི་ཉོན་མོངས་ཇེ་ཆུང་དང་ཇེ་ཉུང་ལ་ཡང་ཡང་བཏང་བ་ནི་དོན་ཤིན་ཏུ་ཆེན་པོ་ཡིན་ལ། གཟི་བརྗིད་ཤིན་ཏུ་ཆེན་པོའང་ཡིན་ནོ། །དེ་མ་ཡིན་པར་གཞན་ལ་བརྙས་བཅོས་དང་ཁྱད་གསོད། སྐྱོན་བརྗོད་དང་སྐུར་འདེབས་ཁོ་ནས་དུས་འདའ་བར་བྱེད་པ་ནི་དོན་མ་ཡིན་ཏེ། ཐམས་ཅད་མཁྱེན་པ་དགེ་འདུན་གྲུབ་པས། དགྲ་ཉོན་མོངས་འདུལ་ཐབས་མི་བྱེད་པར། །གཤགས་འགྱེད་པ་ཙམ་གྱི་འཆད་ཉན་ཡང༌། །འདྲེ་ཤར་སྒོའི་ཕྱོགས་སུ་གནས་པ་ལ། །གླུད་ནུབ་སྒོར་གཏོང་བ་དོན་རེ་ཆུང་། །ཞེས་དང༌། ཇོ་བོ་ལྷ་གཅིག་གིས། དམན་པ་རྣམས་ལ་སྙིང་རྗེ་བསྐྱེད་ལ་ཁྱད་དུ་གསོད་དང་བརྙས་པ་སྤོངས། །དགྲ་ཟིན་སྡེ་རིས་ཀུན་ལ་ཞེན་ཅིང་ཆགས་པའི་ཕྱོགས་རིས་མེད་པར་མཛོད། །ཡོན་ཏན་ཅན་ལ་ཕྲག་དོག་མི་བྱ་གུས་པར་གྱིས་ལ་ཡོན་ཏན་བླང༌། །གཞན་སྐྱོན་མི་བརྟག་རང་སྐྱོན་བརྟག་ལ་རང་སྐྱོན་ཁྲག་ངན་བཞིན་དུ་ཕྱུང༌། །ཞེས་དང༌། རྗེ་བླ་མས། ཆོས་མཛད་འདུག་ཚད་རྣམས་ལ་མོས་གུས་བསྐྱེད། །ཅེས་དང༌། འབྲོམ་སྟོན་པས། རང་ལ་ཡོན་ཏན་ཇི་ཙམ་ཡོད་ན་ཡང༌། །གཞན་ལ་ཁྱད་གསོད་བརྙས་པ་ཆུང་བ་མཛོད། །ཅེས་གསུངས་སོ།།
འདིར་སློབ་གསོ་ཞིག་སྤེལ་བ་ནི་རྫིག་པོ་དང་ཟུར་ཟ་ལྟ་བུའི་ཆེད་དུ་མ་ཡིན་པར། ལེགས་བཤད་རེ་ཟུང་བྱིས་པའི་ཁ་སྒོ་ནས་ཀྱང་འབྱུང་བ་སྲིད་ཅེས་པའི་དཔེ་ལྟར། བླུན་རྨོངས་རང་དང་སྐལ་མཉམ་དག་ལ་སློབ་གསོ་ཅུང་ཙམ་རེ་ཐེབས་ན་སྙམ་པའི་ལྷག་བསམ་གྱིས་ཀུན་ནས་བསླངས་ཏེ། གཟུ་བོའི་བློས་ཉན་འཇོག་རེ་བྱས་ན་སློབ་གསོའི་བྲོ་བ་རེ་སྟེར་ངེས་ཀྱི་སྔོན་བྱོན་མཁས་པའི་གདམས་ངག་འགའ་བསླབ་བྱར་བཀོད་དོ། །
མདོ་ཕྱོགས་ཀྱི་ཆོས་ཐོག
༈ གཉིས་པ་ནི། ཆོས་མདོ་སྔགས་གཉིས་ཀ་གང་ཟག་གཅིག་འཚང་རྒྱ་བའི་ཆ་རྐྱེན་མེད་དུ་མི་རུང་བ། དཔེར་ན། བྱ་ནམ་མཁར་འཕུར་བ་ལ་གཤོག་སྒྲོ་ཟུང་དགོས་པ་ལྟར་ཡིན་ཞེས་སྔོན་དེང་མཁས་གྲུབ་རྣམས་ཀྱི་གསུང་རྒྱུན་ལ་ཡོད་པ་ལྟར། གནད་ཀ་དེའི་དབང་གིས་འདི་ཡང་མདོ་སྔགས་ཟུང་འབྲེལ་གྱི་དགོན་པ་ཞིག་ཏུ་ཆགས་ཡོད་ལ། དེས་ན་གཞུང་པོ་ཏི་ལྔའི་འཆད་རྩོད་དང༌། རྗེ་བླ་མའི་ཡི་དམ་གསང་བདེ་འཇིགས་གསུམ་གྱི་བསྐྱེད་རིམ་སྒོམ་བཟླས་སོགས་ཉམས་སུ་ལེན་སའི་མདོ་སྔགས་ཀྱི་ཆོས་ཐོག་སོ་སོར་ཡོད་ཅིང་། དགོན་པ་འདིའི་མདོ་ཕྱོགས་ཀྱི་སློབ་གཉེར་གནང་སའི་གཞུང་ནི། ཡོངས་སུ་གྲགས་པའི་ཡིག་ཆ་ཆེན་མོ་བཞིའི་ཡ་གྱལ་མཁས་གྲུབ་བསྟན་དར་བའི་གསུང་ཡིན་གཤིས། བསྡུས་གྲྭ་འཛིན་གྲྭར་རྭ་སྟོད་བསྡུས་གྲྭ་དང་། ཞབས་དྲུང་དྲུག་པའི་བསྡུས་གཞུང་དང་། བརྗེད་ཐོ་སོགས་དང་། བསྡུས་ཆེན་འཛིན་གྲྭར་ཞབས་དྲུང་དྲུག་པ་ཆེན་པོའི་བློ་རིག་དང་རྟགས་རིགས། དོན་བདུན་ཅུ་སོགས་དང་། གཞུང་གསར་འཛིན་གྲྭ་ནས་རྒྱན་རྩ་བ་གཞིར་བཟུང་ནས་མཁས་གྲུབ་བསྟན་དར་བའི་ཕར་ཕྱིན་སྤྱི་མཐའ་དང་། འགྲེལ་བ་དོན་གསལ། གསེར་ཕྲེང་། རྣམ་བཤད་སྙིང་རྒྱན། རྟོགས་དཀའི་སྣང་བ། དྲང་ངེས་ལེགས་བཤད་སྙིང་པོ། དགོན་འདིའི་བཤེས་གཉེན་མཁྱེན་རབ་ཀྱི་ས་ལམ་གྱི་རྣམ་བཞག་དགོངས་དོན་གསལ་བའི་སྒྲོན་མེ་སོགས་རྒྱ་བོད་ཀྱི་གཞུང་ཆེན་རྣམས་དང་། དབུ་མ་འཛིན་གྲྭ་ལ་དབུ་མ་འཇུག་པ་གཞིར་བཟུང་ནས་མཁས་གྲུབ་བསྟན་དར་བའི་དབུ་མ་སྤྱི་མཐའ་དང་། དགོངས་པ་རབ་གསལ། རྩ་ཤེ་ཊཱིཀ་ཆེན་སོགས་དང་། འདུལ་བ་འཛིན་གྲྭར་པཎ་ཆེན་བློ་གྲོས་ལེགས་བཟང་གི་འདུལ་བ་གཞུང་འགྲེལ་དང་སྤྱི་དོན། ཤར་ཆེན་ངག་དབང་ཚུལ་ཁྲིམས་ཀྱི་འདུལ་སྡོམ་སོགས་དང་། མཛོད་འཛིན་གྲྭར་ཆོས་མངོན་པའི་མཛོད་རྩ་བ་གཞིར་བཟུང་ནས་མཆིམས་མཛོད་དང་། རྒྱལ་དབང་མཛོད་སོགས་ཡིན།
མདོ་ཕྱོགས་ཀྱི་ཆོས་ཐོག་སྐོར་ནི། ལོ་རེ་ལ། དཔྱིད་ཆོས། དབྱར་ཆོས། བཅུ་ཆོས། དབྱར་གནས། སྟོན་ཆོས་རྣམས་ཡོད་པ་ལ། བཅུ་ཆོས་ཉིན་བཅུ། དབྱར་གནས་ཟླ་བ་གཅིག་དང་ཕྱེད། དེ་མིན་ཟླ་བ་རེ། ཧོར་ཟླ་གཉིས་པའི་ཚེས་བཅུ་གཅིག་གི་དགོང་མོར་ཁ་དོག་འཛིན་གྲྭ་བ་རྣམས་ཀྱིས་དྷཱིཿསྐད་བཏང་སྟེ་ཡར་ཚོགས། རྩོད་པ་བཙུགས། མཁར་བརྡ་བཏང་བ་དང་མཉམ་དུ་འདུས། སྐྱབས་འགྲོ་སེམས་བསྐྱེད། སྒྲོལ་མ་ཚར་བཅུ་གཅིག རྒྱལ་བ་བྱེ་བ་མ། ཤེར་སྙིང་ཚར་དགུ། ཆོས་སྐྱོང་ཞལ་ཚང་ལ་གཏོར་འབུལ། བསྟན་འབར་མ་བཅས་གསུངས་རྗེས་གྲྭ་མང་ནས་དྷཱིཿསྐད་བཏང༌སྟེ། རྩོད་ཟླ་ཡུན་ཙམ་གནང་ནས་གྲོལ། དེ་ཆོས་ཐོག་ཡར་ཚོགས་ཐམས་ཅད་ལ་འདྲ།
ཆོས་གྲྭའི་སྒྲིག་གཞི་ནི། ༡ཡར་ཚོགས་སྒྲིགས། ༢གྲལ་ལ་བཞུགས་སྒྲིགས། ༣འདོན་པ་གསུང་སྒྲིགས། ༤ཁ་ཁྲིམས་ཀྱི་བཀོད་པ། ༥གོང་ལ་གཅིག་ལ་གཉིས་ཐུག་གི་ཟླ་བོ་སྒྲིག་ལུགས། ༦རྩོད་པ་མཛད་ཚུལ། ༧བརྩི་བཞག་ཞུ་ལུགས། ༨འཛིན་གྲྭ་འུབས་ལུགས། ༩བརྩི་བཞག་སྐྱོར་ལུགས། ༡༠ཕྲེང་བ་དཀྲུག་ལུགས། ༡༡འཛིན་གྲྭ་སོ་སོའི་ནང་དུ་རྩོད་པ་མཛད་ཚུལ། ༡༢ན་བཟའ་ཆས་སྐོར། ༡༣མཁོ་བའི་ཡོ་བྱད་སྐོར། ༡༤སྐྲ་རིང་དང་གྲི་རིང་སྐོར། ༡༥གནང་བ་ཞུ་ལུགས། ༡༦མར་གྲོལ་སྒྲིགས། ༡༧མཚན་སྐྱོང་སོ་སོའི་སྐོར། ༡༨རྩོད་རྒྱུགས་རིང་ཐུང་གི་སྐོར། ༡༩བློ་རྒྱུགས་སྐོར། ༢༠བུ་ཚབ་དང་སྐུ་གཉེར་གྱི་སྐོར། ༢༡ཆོས་ཕོགས་སོ་སོའི་སྐོར་སོགས་རིམ་པ་མང་དུ་ཡོད་པ་ལས།
དང་པོ་ཡར་ཚོགས་སྒྲིགས་ནི། སྔ་མོར་མདུན་རིའི་རྩེར་ཉི་ཟེར་ཕོག་པ་དང༌བླ་མ་ཚོགས་སྐད་བས་ས་གཞི་བྱིན་རླབས་སྔོན་དུ་བཏང་ནས་རྡོ་ཏིང་རྡུང༌། ཚོགས་སྐད་རིང་ཐུང་དྲུག་སྒོ་སྐད་དང་བཅས་པ་བརྒྱབས། དུང་འབུད་གཉིས་ཀྱིས་ཟླ་གམ་དབུ་ཞྭ་བཅས་ལེགས་བཞེས་ཀྱིས་དུང་བརྡ་རྒྱུན་རིང་བ་ཞིག་བཏང༌། གནའ་བོའི་དུས་སུ་ཆོས་གྲྭའི་སྐབས་སྔ་མོར་རྒྱུན་ཇ་རྒྱུན་དུ་ཡོད་པ་དང༌། ཞོགས་ཚོགས་གྲོལ་ནས་མཚམས་མཚམས་སུ་གྲྭ་ཇ་དང༌། མཚམས་མཚམས་སུ་མང་ཇ་ཡོད་ངེས་ཀྱང་རིམ་བཞིན་ཉམས་ཆག་ཏུ་སོང་བ་ཡིན་ཏེ། སྔོན་གྱི་ཡིག་རྙིང་ལ་དེ་ལྟར་སྣང་བ་དང་། མ་ཟད་ད་ལྟ་ཆོས་གྲྭའི་རིང་ཚོགས་སྐད་རྒྱག་པ་འདི་གནའ་སྔ་མོར་རྒྱུན་ཇ་ཡོད་པས་དེའི་ཚོགས་བརྡ་ཡིན་ཟེར་སྲོལ་ཡང་འདུག་པ་དང༌། ཞོགས་ཚོགས་གྲོལ་ནས། གྲྭ་ཚང་ལས་སྣེ་གཉིས། ཚོགས་བཤད་པ། ཆབ་རིལ་བ་བཞིས་གྲྭ་ཇ་ཚོགས་བཞིན་པ་ལས་ཤེས་ཐུབ་བོ། །དེང་སང་ནི་ཚོགས་སྐད་དྲུག་གི་རིང་ལ་རང་ཤག་ཏུ་གསོལ་ཇ་བཞེས། དབྱར་དུས་སུ་འདུས་ཁང་དབུ་རྩེ་དང༌། དགུན་དུས་སུ་ཕོ་བྲང་དབུ་རྩེར་ཉི་ཟེར་ཕོག་སྐབས་མཁར་བརྡ་བཏང་ནས། དེ་དང་མཉམ་དུ་གྲྭ་མང་ཟླ་གམ་དང་དབུ་ཞྭ་ལེགས་བཞེས་ཀྱིས་ཕྱི་སྐལ་ལྡན་དང་བ་འདྲེན་པའི་མིག་རྒྱན། ནང་འབྱོར་ལྡན་བསོད་ནམས་བསོག་པའི་ཞིང་ས་ཟེར་བ་ལྟར་ཕེབས་ཏེ་ཞོགས་ཆོས་ཚོགས།
གཉིས་པ་གྲལ་ལ་བཞུགས་སྒྲིགས་ནི། ཟླ་གམ་ཐང་ལ་བཏིང་པ་ལྟ་བུ་གཡས་བུད་དང་གཡོན་བུད་མེད་པ་དཀྱིལ་མ་བུག་པ་དང༌། ཆོས་འདོན་ཡོད་པའི་སྐབས་ལ་དང་པོར་གྲལ་འཁྱོག་པོ་དང་རིང་ཐུང་མེད་པ། སྐེད་མ་ཆད་པ་བཞི་བསྒྲིགས། མཁར་རྔ་འཐེང་བརྡུངས་ཟིན་པ་དང༌། ཚོགས་མང་གྲལ་ལ་འཇགས་པ་དང༌། དབུ་མཛད་ཆེན་མོས་འདོན་པའི་དབུ་ལེན་པ་གསུམ་དུས་མཉམ་དགོས་ཟེར་བ་ཚོགས་གཏམ་གྱི་གཙོ་བོ་ཡིན།
གསུམ་པ་འདོན་པ་གསུང་སྒྲིགས་ནི། ཆོས་འདོན་ཡོད་པའི་སྐབས་ལ་འབུམ་གླེགས་བམ་གཉིས་ཞལ་ཕྱེ། གྲལ་རེར་ཕྱེད་ཀ་རེ་བྲིམས་ནས་གསུང་དགོས། དག་འདོན་གྱི་ཆེད་དུ་དཔེ་རིང་གཅིག་གི་སྔོན་རྒྱབ་ཀྱི་ཡིག་ཕྲེང་བསྡོམས་པས་བཅུ་བཞི་གང་དུ་གསུང་མཚམས་ཡོད་ཀྱང་འདིར་ཡོད་ཅེས་ཆོས་བརྡ་མི་འདྲ་བ་བཅུ་བཞིའི་སྒོ་ནས་སྤྲད་རྒྱུ་ཡོད། དེ་ནི་སྔོན་གྱི་ལྡེབ་ངོས་ཀྱི་ཡིག་ཕྲེང་དང་པོ་ལ་ཡོད་ན་དབུ་གཟུགས་ལ་ཡོད་དོ་ཟེར་ནས་ཆོས་བརྡ་གཏང་དགོས། དེ་བཞིན་དུ་ཡིག་ཕྲེང་གཉིས་པ་ལ་གཅིག་འོག་མ། གསུམ་པ་ལ་གཉིས་འོག་མ། བཞི་པ་ལ་མཚམས་གཟིགས། ལྔ་པ་ལ་གསུམ་མཇལ་མ། དྲུག་པ་ལ་གཉིས་མཇལ་མ། བདུན་པ་ལ་གཅིག་མཇལ་མ་ལ་ཡོད་དོ་ཟེར་བ་དང༌། རྒྱབ་ཀྱི་ཡིག་ཕྲེང་དང་པོ་ནས་བདུན་པའི་བར་དུ་རིམ་པ་བཞིན་རྒྱབ་མཐོན་པོའི་དབུ་གཟུགས། རྒྱབ་ལོགས་གཅིག་འོག་མ། རྒྱབ་ལོགས་གཉིས་འོག་མ། རྒྱབ་ལོགས་མཚམས་གཟུགས། རྒྱབ་ལོགས་གསུམ་མཇལ་མ། རྒྱབ་ལོགས་གཉིས་མཇལ་མ། རྒྱབ་ལོགས་གཅིག་མཇལ་མ་ཟེར་ནས་སྔོན་གྱི་ཕྱག་སྲོལ་ལྟར་ཆོས་བརྡ་སྤྲད་དེ་རྡོ་ལག་བརྒྱུད་ཀྱི་ཚུལ་དུ་དབུ་མཛད་ཀྱི་གཡོན་ཕྱོགས་ཀྱི་གྲལ་སྣེར་བསྐུར། དགེ་སྐོས་ཀྱིས་བརྡ་སྤྲད་པ་བཞིན་གྲལ་སྣེ་ནས་དགེ་འདུན་པ་གཉིས་ཀྱིས་ཡི་གེ་ལ་ཚགས་འཛིན་དང་སྐུ་འཆིང་བཅིང་དགོས། ཆོས་འདོན་ཟླ་ཆོས་རེའི་འགོར་གསུམ། དེ་ནས་བཅོ་ལྔ། ཉེར་ལྔ། གནམ་སྟོང་རྣམས་ལ་རེ་རེ་སྟེ་ཁྱོན་དྲུག་ཡོད། དབྱར་གནས་ལ་དེའི་སྟེང་ཆོས་འདོན་གསུམ། བཅུ་ཆོས་ལ་ཆོས་འདོན་གསུམ་ལས་མེད། ཐུན་རེ་ལ་གླེགས་བམ་གཉིས་རེ་དང༌། ཟླ་ཆོས་རེ་ལ་ཡུམ་རྒྱས་པ་ཚར་རེ་འགྲོ་ངེས་དགོས། ཞོགས་ཚོགས་ལ་ཞབས་དྲུང་གི་སྐུ་བསྟོད་གསོལ་འདེབས་དྲུག་ཉིན་རེར་གཉིས་རེ་གསུངས་ནས་རེས་མོ་དང༌། ཤེར་སྙིང་ཚར་གསུམ་རྣམས་གསུངས། དགེ་སྐོས་ཀྱིས་སྐྱབས་འཇུག་སྙན་ཞུས་ཕབ། གུང་ཚིགས་ལ་ཤེར་སྙིང་ཚར་གསུམ། ༸གོང་ས་མཆོག་དང༌ཞབས་དྲུང་གཉིས་ཀྱི་ཞབས་བརྟན་སྨོན་ཚིག མཁན་བརྒྱུད་གསོལ་འདེབས་བཅས་གསུངས། དགོང་མོའི་སྐུ་རིམ་ལ། སྐྱབས་འགྲོ་སེམས་བསྐྱེད། དགའ་ལྡན་ལྷ་བརྒྱ་མ་དང་འབྲེལ་དམིགས་བརྩེ་མ་སྟོང༌། ཨ་ར་པ་ཙ་སྟོང༌། སྒྲོལ་མ་དར་ཅོག་མ་ཟེར་བ་ཚར་ཉེར་གཅིག ལེགས་བྲིས་མ་དང༌། ཡན་ལག་བདུན་པ་གཉིས་རེས་མོ། གདུགས་དཀར་མཛོ་འགྲོས་མ་ཟེར་བ་ཚར་གཅིག ཤེར་སྙིང་གི་དོན་ཟབ་མོ་ལ་ཐུགས་བསམ་བཞེས་ཁོམ་ཡོད་པ་ལྟ་བུའི་རྒྱས་པ་ཚར་གཅིག་སྟེ་ཁྱོན་ཚར་བཅོ་བརྒྱད། དེའི་རིང་དགེ་སྐོས་ཀྱིས་སྒོ་བརྒྱབ་སྟེ་ཁྲི་ལ་བཞུགས་དགོས། དེ་ནི་དགེ་འདུན་པས་ཟབ་མོ་སྟོང་པ་ཉིད་ལ་ཐུགས་གཞོལ་བའི་གནད་ཀྱིས་ཡིན་གསུངས། སེང་གདོང་མ། ལོ་གྱོན་མའི་གཟུངས་སྔགས་སྟོང༌། ཆོས་སྐྱོང་རྣམས་ལ་གཏོར་འབུལ་བསྡུས་འདོན། བསྟན་འབར་མ། བཀྲ་ཤིས་ཚིགས་སུ་བཅད་པ་བདུན་རེས་མོ་གསུངས་ནས་གྲྭ་མང་གིས་དྷཱིཿསྐད་བཏང་ནས་རྩོད་ཟླ་གནང་། ཡར་ཚོགས་ཀྱི་སྐུ་རིམ་ལ་དགའ་ལྡན་ལྷ་བརྒྱ་མ་དང༌། དམིགས་བརྩེ་མ། ཨ་ར་པ་ཙ། སེང་གདོང་མ། ལོ་གྱོན་མ་བཅས་གསུང་མི་དགོས། མདོར་ན་འགོའི་སྐུ་བསྟོད་ནས་མཐར་བསྟན་འབར་མའི་བར་གྲྭ་པ་ཆོས་གྲྭ་བ་ཡིན་ཕྱིན་ཐུགས་ལ་ཡོད་དགོས།
བཞི་པ་ཁ་ཁྲིམས་ཀྱི་བཀོད་པ་ནི། ལྟག་འགབ་སུ་ཡིན་རུང་ཆོས་གྲྭ་འདིའི་ནང་ཕེབས་པ་ནས་བཟུང་ངག་འཁྱལ་བཤད་པ་ལྟ་ཞོག གྲལ་འཛིན་གཡས་གཡོན་ཧ་གོ་མི་ཆོག་པ་ལྟ་བུས་བཞུགས་དགོས།
ལྔ་པ་གོང་ལ་གཅིག་ལ་གཉིས་ཐུག་གི་ཟླ་བོ་སྒྲིག་ལུགས་ནི། ལྟག་མ་ལྟག་མ་ལ་སང་བརྡ་གནངས་བརྡ་ཕུལ་ནས་བློ་སྐྱེད་ཐོན་ངེས་པ་རེ་དང་ཟླ་བོ་སྒྲིག་པ་མ་གཏོགས་རྡོ་དང་རྡོ་ཐུག་པ་ལྟ་བུར་བཞུགས་མི་ཆོག
དྲུག་པ་རྩོད་པ་མཛད་ཚུལ་ནི། གཞུང་གསར་རྙིང་དང༌ཁ་དོག་ལྟག་འགབ་མེ་འབར་འབར། ཆུ་ཁོལ་ཁོལ་ལྟ་བུ་ཡིན་ཟེར་དོན་ལྟར། ཐམས་ཅད་ཀྱིས་ལུང་དང་རིགས་པ་ཤ་རེ་བར་ཤ་ཆོད་རུས་ཆོད་ཀྱིས་རྩོད་པ་མཛད་དགོས།
བདུན་པ་བརྩི་བཞག་ཞུ་ལུགས་ནི། འཛིན་གྲྭ་གསུམ་པོས་གཏང་རག་གི་ཚུལ་དུ་ཕྱག་གསུམ་དང༌། གཟན་རྐྱང་དང་པོ་མན་ཆད་ཀྱིས་གུས་པའི་ཚུལ་དང༌། གཏང་རག་གི་ཚུལ་དུ་ཕྱག་གསུམ་རེ་འཚལ་དགོས། ཕྱག་དེ་ཡང་ཡན་ལག་ལྔ་ཐུག་གི་ཕྱག་མཚན་ཉིད་པ་ཕུལ་བ་ལས་རྒྱའི་ཙོང་ཡུས་ལྟ་བུ་མི་ཆོག དེའི་སྐབས་མཛོད་པ་བ་ལ་མཛོད་རྩ་བ་དང༌། འདུལ་བ་འཛིན་གྲྭ་ལ་ཀུན་མཁྱེན་བློ་གྲོས་ལེགས་བཟང་གི་འདུལ་བ་གཞུང་འགྲེལ། དབུ་མ་འཛིན་གྲྭ་ལ་མཁས་གྲུབ་བསྟན་དར་བའི་དབུ་མའི་མཐའ་དཔྱོད། ཕར་ཕྱིན་པ་རྣམས་ལ་མཁས་གྲུབ་བསྟན་དར་བའི་ཕར་ཕྱིན་མཐའ་དཔྱོད། བསྡུས་ཆེན་འཛིན་གྲྭ་ལ་ཞབས་དྲུང་དྲུག་པ་འཇམ་དཔལ་དགེ་འདུན་རྒྱ་མཚོའི་བློ་རིག་དང་རྟགས་རིགས། དེ་མན་གྱི་བསྡུས་གྲྭ་བ་རྣམས་ལ་རྭ་སྟོད་བསྡུས་གྲྭ་བཅས་ནས་མཁན་པོས་བརྩི་བཞག་རྒྱུན་དུ་གནང༌བ་དང་། འཛིན་གྲྭ་སོ་སོས་ངེས་པར་དུ་ཐུགས་ཐོག་ནས་སྐྱོར་དགོས།
བརྒྱད་པ་འཛིན་གྲྭ་སྒྲིག་ལུགས་ནི། སྐྱོར་དཔོན་དབུས་སུ་བཞུགས་ནས་གྲལ་གྲུ་བཞི་མ་ཁོ་ན་སྒྲིག་པ་ལས། རྔ་གཡོག་གི་དབྱིབས་ལྟ་བུའི་གྲལ་སྣེ་ཕན་ཚུན་རིང་ཐུང་ཤོར་བ་དང༌། སྲན་འུབས་ལྟ་བུ་ཟླུམ་པོ་སོགས་སྒྲིག་མི་ཆོག
དགུ་པ་བརྩི་བཞག་སྐྱོར་ལུགས་ནི། རྩོད་པའི་རྩ་བ་བརྩི་བཞག་ཡིན་ཞེས་ཚོགས་གཏམ་ལ་ཡོད་པ་ལྟར། བརྩི་བཞག་འདི་ནི་གནད་གལ་ཤིན་ཏུ་ཆེ་བས་དགེ་སྐོས་གྲལ་མཇུག་ཏུ་རིམ་བཞིན་ཕེབས་ཚེ་གཟན་རྐྱང་དང་པོ་ནས་ཁ་དོག་བར་ལྟག་འགབ་ཀུན་གྱིས་ཐུགས་ཐོག་ནས་རིམ་བཞིན་སྐྱོར་དགོས། དགེ་སྐོས་ཀྱིས་བརྩི་བཞག་ཐུགས་ལ་ཡོད་མེད་ཞིབ་གཟིགས་གནང་སྟེ་མེད་པ་ལ་ཉེས་ཆད་མཛད་སྲོལ་ཡོད།
བཅུ་པ་ཕྲེང་བ་དཀྲུག་ལུགས་ནི། གཅིག་བབས་ན་དམ་བཅའ་བ། གཉིས་བབས་ན་རིགས་ལམ་བ་ཟེར་བ་ལྟར། ཕྲེང་བ་དཀྲུག་པ་མ་གཏོགས་ལྟག་མ་བས་རྒྱུན་དུ་རིགས་ལམ་དང་དམ་བཅའ་མཛད་ནས་འགབ་མ་བ་ཚོའི་ཆོས་སྐལ་གཅད་མི་ཆོག
བཅུ་གཅིག་པ་འཛིན་གྲྭ་སོ་སོའི་ནང་དུ་རྩོད་པ་མཛད་ཚུལ་ནི། མཆོག་གི་ཆོས་གྲྭ་ཆེན་པོའི་རྩ་བའི་རྩ་བ། སྙིང་པོའི་སྙིང་པོ་རྩོད་པ་ཡིན་པས། འཛིན་གྲྭ་སོ་སོའི་ནང་དུ་བརྩི་བཞག་སྐྱོར་རྗེས་རྩོད་པ་གོང་ལྟར་མཛད། སྒྲིགས་ལྟ་བ་པོས་ཀྱང་འཆད་ཉན་ཡར་རྒྱས་འགྲོ་བའི་ཐབས་ཚུལ་འདི་ལ་ཐུགས་རྟོག་ཆེན་པོ་གནང་དགོས་པ་དང༌། སྒྲིགས་ཁུར་བ་པོ་རྣམས་ཀྱིས་ཀྱང་ཆོས་གྲྭ་འགྲིམ་པ་ཟེར་བ་སྐུ་རིམ་འདོན་པ་ཙམ་ལ་མི་ཟེར་བར། རང་ནུས་དང་བསྟུན་ཏེ་འཆད་རྩོད་བྱེད་པ་ལ་ཟེར་བ་ནི་གནའ་དེང་ཚོགས་གཏམ་གྱི་རྩ་བ་ཡིན། རྩ་བ་བོར་ནས་ཡལ་གའི་སྟེང་འགྲོ་བ་ནི་ཤིན་ཏུ་ཐ་ཆད་པ་དང༌མི་རིགས་པ་ཡིན་པས། སྒྲིགས་གཞི་གཞན་རྣམས་ཆོས་གྲྭ་འདིའི་ཡན་ལག་ལྟ་བུ་ལས་གཙོ་བོ་ནི་མ་ཡིན་ནོ། །དེས་ན་རྩོད་པ་མེད་ན་གཅིག་ནས་འདི་ཉིད་རྒྱལ་བསྟན་ནོར་བུའི་བང་མཛོད་ཕྱོགས་ལས་རྣམ་རྒྱལ་འཇམ་དབྱངས་ཀུན་དགའ་མཐོང་གྲོལ་མ་ཡིན་པར་འགྱུར་བ་དང༌། གཉིས་ནས་བཙུགས་པའི་དགོས་པ་སྟོར་བར་འགྱུར་རོ། །
བཅུ་གཉིས་པ་ན་བཟའ་ཆས་སྐོར་ནི། རྩེ་ཞྭ་ནི། ཟེ་སྒྲོ་དང་ཞྭ་ལག་མེད་པ། ཞྭ་གདོང་རལ་བ། ཁ་དོག་ཕོ་རོག་ལྟར་ནག་པོ་མ་ཡིན་པར་ཞྭ་སེར་བསྟན་པའི་ཞྭ་མོ་ལེགས་པར་བཞེས་དགོས། ཟླ་གམ་ལ་གོང་རྒྱན་པདྨ་ཧྭ་གོས་མེད་པ། སྐེད་མ་བཅད་པ། ནང་ནས་གྲྭའི་ལྷན་སེར་པོས་མ་ཁྱབ་པ་ལྟ་བུ་མ་ཡིན་པ་ཚད་མཐུན་གྱི་ཟླ་གམ་མནབ་དགོས། སྟོད་འགག་ནི། གྲྭའི་ལྷན་མེད་པ་སོགས་དང༌། ལྤགས་རིགས་ཀྱི་འགག་རིང་བསྡུས་གྲྭ་བས་མནབ་མི་ཆོག །སྐུ་གཟན་དང་སྐུ་ཤམ་ནི། དམ་ཆོས་འདུལ་བ་དང་མཐུན་པའི་ཁ་དོག་དང་ཚད་མཐུན་མ་གཏོགས། སྐུ་ཤམ་གྲྭའི་ལྷན་མེད་པ། སྐུ་གཟན་ཐུང་དང་ཕྲ་དྲགས་པ་སོགས་མནབ་མི་ཆོག ཞབས་ལྷམ་ཡང་མོ་ལྷམ་དང་ཐོང་ལྷམ་ལྟ་བུ་མ་ཡིན་པར་གང་ལེགས་བཞེས་དགོས་སོ། །
བཅུ་གསུམ་པ་མཁོ་བའི་ཡོ་བྱད་ནི། ཆོས་གྲྭ་བ་ཡིན་ཕྱིན་ཟླ་གམ། རྩེ་ཞྭ། བྱང་ཆུབ་གདོང་དྲུག་གམ་བོདྷི་ཙིཏྟའི་ཕྲེང་བ། ཆབ་རིལ། མཎྜལ་རྣམས་ཡིན།
བཅུ་བཞི་པ་སྐྲ་རིང་དང་གྲི་རིང་སྐོར་ནི། སྐྲ་སོར་གཅིག་གྲི་སོར་གཉིས་ཟེར་བ་དཔེ་ལ་ཡོད་ཀྱང་། རབ་ཏུ་བྱུང་བས་མཚོན་འདོགས་མི་ཆོག་པ་དངོས་བསྟན་རེད། དབུ་སྐྲ་སོར་གཅིག་ཙམ་ནས་འབྲེག་དགོས། དེ་ཡང་སྐྲ་གྲིས་བསིལ་བ་མ་གཏོགས་འདུལ་བའི་བཅས་ཁྲིམས་དང་མི་མཐུན་པ་ཆན་པས་བྲེག་མི་ཆོག་གོ།
བཅོ་ལྔ་པ་གནང་བ་ཞུ་ལུགས་ནི། རྒྱུ་མཚན་མེད་པའི་གནང་བ། རྒྱུ་མཚན་མ་ངེས་པའི་གནང་བ། རྒྱུ་མཚན་སྔོན་དུ་མ་སོང་བའི་གནང་བ། གནང་བ་འབོག་སྒྲིལ་མ། བཞེངས་པ་ལ་འདུག་ནས་ཞུ་བ། བཞུགས་པ་ལ་ལངས་ནས་ཞུ་བ། ནད་པ་མ་གཏོགས་གྲྭ་ཤག་ཏུ་ཞུ་བ་སོགས་གཏན་ནས་མི་ཆོག མདོར་ན་མཆོག་གི་ཆོས་གྲྭ་ཆེན་པོའི་རིང་ལ་རྔ་ལུ་གནམ་ལ་འགེལ་མི་ཆོག་ཟེར་ནས་ཚོགས་གཏམ་འབུལ་བ་ལྟར། གནང་བ་ཚོད་མེད་ཞུ་མི་ཆོག
བཅུ་དྲུག་པ་མར་གྲོལ་སྒྲིགས་ནི། བརྩི་བཞག་ཡོད་པའི་སྐབས་ལ། དགེ་སྐོས་ཀྱིས་འཛིན་གྲྭ་གསུམ་པོ་ལ་རིམ་བཞིན་ཕྱག་བརྐྱངས་ཏེ་གྲྭ་ཤག་ལ་ཕེབས། དེ་རྗེས་གཟན་རྐྱང་དང་པོས་གྲོལ་ཚོད་བཟུང་ནས་ཁ་དོག་བར་རིམ་གྱིས་གྲོལ། བརྩི་བཞག་མེད་པའི་ཚེ་རྩོད་ཟླ་བསྒྲིགས་ནས་རྩོད་པ་མཛད་དགོས། དེ་ཡང་དགེ་སྐོས་ཀྱིས་དམིགས་བརྩེ་མ་ཕྲེང་སྐོར་གསུམ་གྱི་རིང་སྐོར་གཡེང་བརྒྱབ་ནས་གྲྭ་ཤག་ཏུ་ཕེབས་རྗེས་གསོལ་ཇ་བཞེས་དཀར་གང་གསོལ་ཚར་བའི་ཚོད་ཙམ་ལ་མ་གཏོགས་གྲོལ་མི་ཆོག
བཅུ་བདུན་པ་མཚན་སྐྱོང་སོ་སོའི་སྐོར་ནི། ཆོས་གྲྭ་གང་ཡིན་གྱི་དུས་ཆེན་སོ་སོར་མཁན་པོས་བརྡ་སྤྲད་དེ་ཁ་དོག་ནས་ཡར་གཟན་རྐྱང་དང་པོའི་བར་འཛིན་གྲྭ་རེ་རིམ་བཞིན་ཆོས་གྲྭར་ཕེབས་ནས། འཛིན་གྲྭ་སོ་སོའི་སྐབས་ཐོབ་ཀྱི་རྩོད་པ་གནང་དགོས།
བཅོ་བརྒྱད་པ་རྩོད་རྒྱུགས་རིང་ཐུང་གི་སྐོར་ནི། དཔྱིད་ཆོས་ནས་འགོ་བཟུང་གཟན་རྐྱང་དང་པོ་ནས་གཞུང་གསར་བར་དང༌། དེ་ནས་ཁ་དོག་ནས་བསྡུས་ཆེན་བར་མཁན་པོ་དང་དགེ་སྐོས་གཉིས་ཀྱིས་གཟིགས་རྟོག་ནན་ཆེར་མཛད་དེ། ལེགས་གྲས་ལ་དར་དཀར་དང་གཟེངས་བསྟོད། ཉེས་གྲས་ལ་སྨད་ར་དང་ཉེས་ཆད་མཛད་ནས་རྩོད་རྒྱུགས་ལེན་དགོས།
བཅུ་དགུ་པ་བློ་རྒྱུགས་ཀྱི་སྐོར་ནི། ཧོར་ཟླ་གསུམ་པའི་གནམ་སྟོང་ནས་གཟན་རྐྱང་དང་པོ་མན་ཆད་ལ་བློ་རྒྱུགས་ལེན། དེ་ཡང་ཤོག་གྲངས་མདའ་ཚད་མ་ཉེར་ལྔ་ཡན་ཆད་རེ་འཕྲོད་ངེས་དགོས། མ་འཕྲོད་ན་ཤོག་གྲངས་དང་མཉམ་པའི་ཆོས་གྲྭའི་ཤིང་སྡོང་རྩར་ཆུ་བླུག་དགོས། མ་ཟད་མང་ཚོགས་མཐའ་ནས་ཆུ་སྣོད་སྟོང་པ་ཁུར་དེ་བསྐོར་བ་བྱེད་བཅུག་པ་སོགས་ཀྱིས་ཆད་ལས་འགེལ་སྲོལ་ཡོད།
མཚན་སྐྱོང་དང༌། རྩོད་རྒྱུགས། བློ་རྒྱུགས་རྣམས་ལ་དགེ་སྐོས་དང་མཁན་པོ་གཉིས་ཀྱིས་འགན་བཞེས་དགོས།
ཉི་ཤུ་པ་བུ་ཚབ་ལྷ་གཉེར་གྱི་སྐོར་ནི། བུ་ཚབ་ནི་སྟོང་འཁོར་དགོན་པའི་མངག་པའི་ཕོ་ཉ་ཡིན་པས་ཉིན་ཕྱེད་མཚན་ཕྱེད་ནམ་བོས་ཀྱང་རྔ་ཐོག་སྲན་མ་ཡར་བ་ལྟར་རྒྱུག་དགོས། ཆོས་གྲྭ་གསར་རྙིང་གི་ལྷ་གཉེར་ནི་ཆོས་གྲྭ་ཚོགས་མ་འཚོགས་གང་གི་སྐབས་ཡིན་ཡང་རང་རང་གི་འགན་ལ་ཡོད་པ་ལྟར། ལྷ་ཁང་སོ་སོ་དང་ཀུན་དགའ་ར་བ་གསར་རྙིང་གཙང་སྦྲ་དང་བདག་གཉེར་ཡག་པོ་བྱེད་དགོས། བུ་ཚབ་དང་ལྷ་གཉེར་རྣམས་ལ་རྟེན་དོད་དང་དཀར་རྩི་སྨུག་རྩི་གསོལ་བའི་འགྲོ་གྲོན་ཐད་དུ་འགྱེད་ཕོགས་ལྷག་པོ་ཡོད་པས་རང་རང་གི་འགན་འཁྲི་རྣམས་མ་བསྐུལ་དང་ལེན་བྱེད་དགོས།
ཉེར་གཅིག་པ་ཆོས་ཕོགས་སོ་སོའི་སྐོར་ནི། གསོལ་ཕོགས་འདི་ནི་གྲྭ་པ་ཆོས་གྲྭ་བའི་འཚོ་བའི་རྟེན་དོད་ཡིན་པས། དུས་ཚོད་གཏན་འཁེལ་ལྟར་གཉེར་བ་སོ་སོས་བཤས་ཚོང༌། ཆང་ཚོང༌། དུ་ཚོང༌། སྐུ་གསུང་ཐུགས་རྟེན་གྱི་ཚོང་སོགས་ཀྱི་སྐྱེད་ཀ་ལྟ་བུ་མ་ཡིན་པར་རྒྱུ་རྫས་གཙང་སིང་ངེ་བས་གསོལ་ཕོགས་སྤྲད་དགོས།
ཧོར་ཟླ་གསུམ་པའི་ཚེས་བཅུའི་ཉིན་ལ་གྲོལ་བས་ཞོགས་ཆོས་ལ་སྐྱབས་འགྲོ་སེམས་བསྐྱེད། སྒྲོལ་མ་ཚར་གསུམ། རྒྱལ་བ་བྱེ་བ་མ། ཤེར་སྙིང་ཚར་གསུམ། གཏོར་འབུལ་ཆ་ཚང༌། མཁའ་མཉམ་མ། སྐུ་བསྟོད། ༸གོང་ས་མཆོག་དང་ཞབས་དྲུང་གཉིས་ཀྱི་བརྟན་བཞུགས་གསོལ་འདེབས། བསྟན་རྒྱས་མ། ཡོན་ཏན་གཞིར་གྱུར་མ། དེའི་མཚམས་མཁན་པོས་འཕྲོས་གཞུང་དང་བསྔོ་ཡིག་རྣམས་གསུངས། བསྟན་འབར་མ་དང་བཀྲ་ཤིས་གསུངས་ནས་གྲོལ། མཁན་པོའི་དྲུང་དུ་བཅར་ཏེ་སྐྱེ་བ་ཀུན་ཏུ་རྗེ་བླ་མའི་བསྟན་པ་དང་མཇལ་བའི་རྟེན་འབྲེལ་དུ་རྗེ་སྐུས་ཕྱག་དབང་གནང་བ་ལེན་ནས་གྲོལ། དེ་ཉིན་བྱང་དུ་ཤམྦྷ་ལའི་ཞིང་བཀོད་ཐང་ག་བཤམས་པ་དང༌། མཁན་པོས་དེར་སྐྱེ་བའི་སྨོན་ཚིག་གསུངས་པ་དང༌། དབུ་མཛད་ཞལ་བྱང་དུ་ཕྱོགས་ནས་བཞུགས་པ་གསུམ་གྱིས་དེར་སྐྱེ་བའི་རྟེན་འབྲེལ་ཕུན་སུམ་ཚོགས་པ་བསྒྲིགས། དེ་རྣམས་ཆོས་གྲྭ་གང་ཡིན་ལ་འདྲ།
མཁན་པོའི་ལས་སུ་བྱ་བ་ནི་དཔྱིད་ཆོས་སྐབས་གཟའ་སྐར་བཟང་པོར་ཆོས་འཁོར། བཀའ་བསྟན་བཅོས། བྱམས་གཞུང༌། ཡང་དག་མཐའ། སེམས་བསྐྱེད། སྐྱབས་གསུམ། སྦྱོར་ལམ། རིགས་རྣམས་ཀྱི་ཚོགས་ལངས་བ་བཅུ་དྲུག་བསྐོ་གཞག་དང༌། ཤི་བོའི་སྔས་མགོར་ཕེབས་པ་མ་གཏོགས་ཆོས་གྲྭར་ཕེབས་ཏེ་བརྩི་བཞག་གནང་བ་དང༌། ཆོས་འཆད་པ། རྩོད་རྒྱུགས་དང་འདོན་རྒྱུགས་བླང་བ་སོགས་ཡིན།
གྲྭ་ཚང་དགེ་སྐོས་ཀྱི་འགན་ལས་ནི། སྒྲིགས་གཞིའི་བདག་པོ་ལྟ་བུ་ཡིན་པས་རྒྱུན་དུ་སྒྲིགས་གཞི་གཙོ་སྐྱོང་གནང་བ་དང༌། དཔྱིད་ཆོས་ཀྱི་མགོར་ཕྱོགས་འདིའི་ཆོས་འབྱུང་མདོར་བསྡུས་དང་འབྲེལ་སྒྲིགས་གཞིའི་སྟེང་ནས་ཚོགས་གཏམ་དང༌། མཇུག་ཏུ་བསྔོ་བ་རྫོགས་བྱང་དང་འབྲེལ་བའི་ཚོགས་གཏམ་མཛད། ཆོས་གྲྭ་གཞན་གྱི་སྐབས་སུ་ཆོས་འབྱུང་གསུང་མི་དགོས་པ་དང༌། བཅུ་ཆོས་འགོར་ཚོགས་གཏམ་མེད་པ་མ་གཏོགས་གཞན་ཐམས་ཅད་ལའང་འདྲའོ། །
གྲྭ་ཚང་དབུ་མཛད་ཀྱི་འགན་ལས་ནི། གཙོ་བོ་འདོན་པའི་ཁུར་བཞེས་པའི་ཞར་ལ་སྒྲིགས་གཞི་ལ་ལྟ་སྐྱོང་མཛད་དགོས། ཆོས་གྲྭ་འདིའི་ཐད་ཀྱི་བྱ་གཞག་ཕྲ་རགས་ཐམས་ཅད་ལ་གྲྭ་ཚང་ལས་སྣེ་གསུམ་གྱིས་འགན་བཞེས་ཡང་དག་པ་གནང་དགོས་སོ། །
གླིང་བསྲེ་དམ་བཅའ་ཡོད་ན་དཔྱིད་ཆོས་ཟླ་གཅིག་གི་རིང་གླིང་བསྲེ་བཞིས་ཁ་དོག་ནས་འདུལ་བའི་བར་དུ་བློ་སྐྱེད་འདོན་པའི་ཆེད་དུ་དམ་བཅའ་འཇོག
འདིར་ཟུར་བཀོལ་གྱི་ཚུལ་དུ་ཞུ་རྒྱུ་ལ། རྩོད་པའི་སྐབས་ཀྱི་ཕྱག་ཞབས་ཀྱི་རྣམ་འགྱུར་སོགས་སྲོལ་གཏོད་པ་པོ་དང་མཚོན་དོན་རྣམས་གང་ཞེ་ན། འདི་དག་ནི་སྔོན་གསང་ཕུ་དགོན་པར་ཆ་པ་ཆོས་ཀྱི་སེངྒེས་སྲོལ་དེ་གཏོད་པ་ཡིན་པར་གྲགས། དེ་ནས་བཟུང་དེང་སང་གི་བར་བོད་ཀྱི་གྲུབ་མཐའ་ཆེན་པོ་རྣམས་ལ་རིམ་གྱིས་ས་དར་རྡོ་དར་དུ་བྱུང་བ་ཡིན་འདུག རྩོད་པའི་དབུ་བཟུང་ཚུལ་ལ་ཀྭ་ཡེ་ཇི་ལྟར་ཆོས་འཆད་ཅེས་དང༌། དྷཱིཿཇི་ལྟར་ཆོས་འཇལ་ཞེས་རྣམ་པ་གཉིས་བྱུང་ཡོད། དང་པོ་ནི་ཀྭ་ཡེ་ཞེས་པ་རྣམ་དབྱེ་བརྒྱད་པ་བོད་སྒྲ་ཡིན་པས། སྔ་རྒོལ་ལ་བོས་ནས་ཆོས་ཉན་པར་བསྐུལ་བ་ཡིན་པ་དང༌། གཉིས་པ་ནི་དྷཱིཿཞེས་པ་མི་ཤེས་པ་དང་མ་རིག་པའི་གཉེན་པོ་གཞོན་ནུའི་རྣམ་པར་ཤར་བ་རྗེ་བཙུན་འཇམ་པའི་དབྱངས་ཀྱི་ས་བོན་ངག་ཏུ་བརྗོད་ནས་ཇི་ལྟར་ཇི་སྙེད་ཀྱི་ཆོས་རྣམས་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱི་སྲང་ལ་འཇལ་ཚུལ་འདི་ལྟར་རོ་ཞེས་བརྡ་སྔོན་དུ་བཏང་བ་ཡིན་གསུངས།
ཕྱག་ཞབས་ཀྱི་རྣམ་འགྱུར་ནི། བཀའ་གདམས་གླེགས་བམ་ལས། རྐང་གཡས་ས་ལ་རབ་བསྣུན་པས། །ངན་སོང་ཡོང་ཡེ་ཡོང་མ་གྱུར། །རྐང་གཡོན་ཅུང་ཟད་གྱེན་བཏེག་པས། །ཐམས་ཅད་ང་དང་ལྷན་ཅིག་ཏུ། །ཐར་པའི་ལམ་དུ་ཕྱིན་པར་ཤོག །ཕྱག་རྒྱ་ཕྱོགས་སུ་རབ་སྤུར་བས། །བཀྲ་ཤིས་ཕྱོགས་མཐར་རྒྱས་པར་ཤོག །ཕྱག་རྒྱ་ཕྱོགས་སུ་རབ་བསྐྱོད་པས། །དཔལ་འབྱོར་དབང་དུ་འདུ་བར་ཤོག །ཅེས་གསུངས་པ་ལྟར། ཞབས་གཡས་ས་ལ་བསྣུན་པས་ངན་སོང་གི་སྒོ་བཀག་པ་དང༌། ཞབས་གཡོན་གྱེན་དུ་བཏེག་པས་ཐམས་ཅད་ཐར་ལམ་དུ་འདྲེན་པ་དང༌། ཕྱག་གཉིས་ཀྱིས་ཕྱག་རྒྱ་ཕྱོགས་སུ་སྤུར་བ་དང་བསྐྱོད་པས་བཤད་སྒྲུབ་ཕྱོགས་མཐར་རྒྱས་ཤིང་དཔལ་འབྱོར་གཡང་དུ་འདུ་བར་མཚོན་ནོ། །
༈ ཧོར་ཟླ་བཞི་པའི་ཚེས་བརྒྱད་ལ་དབྱར་ཆོས་ཡར་ཚོགས་བྱེད། སྐུ་རིམ་སོགས་གོང་བཞིན། ཚོགས་ལངས་པ་རྣམས་ཀྱིས་གཞུང་གསར་ཡན་གྱི་སྐྱོར་དཔོན་སོ་སོར་སང་བརྡ་གནངས་བརྡ་ཕུལ་ནས་འཛིན་གྲྭ་སོ་སོར་དམ་བཅའ་འཇོག དེའི་རིང་དང་པོ་ཉིན་གསུམ་ལ་དགུང་མོར་སྐུ་རིམ་ཡོད་ལ། དེ་ནས་འཇིགས་བྱེད་བདག་འཇུག་སྐབས་ཉིན་བཅུ་གསུམ་ལ་དགོང་མོར་སྐུ་རིམ་མེད། དགུང་ཚིགས་དགོང་མོར་ཚོགས། དགུང་ཚིགས་སྐབས་སུ་མཁན་པོས་ཕུན་ཚོགས་དགེ་ལེགས་སོགས་དབུ་སྐུལ་གནང༌། གྲྭ་མང་གིས་མཎྜལ་འབུལ། དེ་ནས་མཁན་པོས་སངས་རྒྱས་ཆོས་ཚོགས་མ་དབུ་སྐུལ་ལན་གསུམ་གནང་སྟེ། སྔོན་འགྲོ་ལ་དཔལ་རྡོ་རྗེ་འཇིགས་བྱེད་ཀྱི་དབང་དོན་ངོ་སྤྲོད་མཛད། དེ་ནི་གྲྭ་མང་གིས་བདག་འཇུག་ལེན་བཞིན་པའི་སྐབས་དང་འཁེལ་བའི་གནད་ཀྱིས་ཡིན། དངོས་གཞི་ལ་རྗེའི་ལམ་རིམ་ཆེན་མོའི་བཀའ་ཆོས་གནང་སྲོལ་ཡོད། འདིར་མ་ཟད་དབྱར་གྱི་རིང་ཆོས་གྲྭ་གང་ཡིན་ལ་ལམ་རིམ་བཀའ་ཆོས་ཡོད། སྔོན་འགྲོར་དབང་དོན་རྫོགས་མཚམས་སུ་སྟོན་པའི་བཀའ་དྲིན་རྗེས་དྲན་གྱི་དོན་དུ་སྐྱེས་རབས་སོ་བཞི་པ་དང༌། སེམས་བསྐྱེད་ཀྱི་སྟ་གོན་སྦྱོར་བའི་ཚོགས་བསོག་གི་ཆེད་དུ་སྦྱོར་བའི་ཆོས་དྲུག་རྣམས་རིམ་བཞིན་སྙན་ཞུ་མཛད་དགོས། དེའི་ཉེར་བཞི་དང༌། ཉེར་ལྔ་ལ་ཆོས་མཚམས། ཧོར་ཟླ་ལྔ་པའི་ཚེས་བདུན་གྱི་ཞོགས་པར་དབྱར་ཆོས་གྲོལ། ཉིན་བཅུ་ལ་ཆོས་མཚམས། དེའི་བཅུ་བདུན་ལ་བཅུ་ཆོས་ཡར་ཚོགས། ཉེར་དྲུག་གི་ཞོགས་པ་ནས་གྲོལ། ཕྱི་ཉིན་ནས་ཕར་ཕྱིན་འཛིན་གྲྭ་ཆིབས་གྲལ་བསྒྲིགས་ནས་སྐུ་བསྭོ་ཐོག་གནས་སུ་ཕེབས། ཕར་ཕྱིན་ཆོས་ཐོག་དེར་ཚོགས། ཉིན་རེར་དགེ་སྐོས་བརྗེ་ལེན་གྱིས་ཚོགས་གཏམ་འབུལ་བའི་ཐོག་ནས་སྒྲིགས་གཞི་བསྐྱངས། ཚེས་བཞིའི་རྗེས་སུ་མ་གཏོགས་སྒར་འཁྱམས་དང་གནས་ལ་བསྐོར་བ་ཕེབས་པ་སོགས་མི་ཆོག སྐྱོར་དཔོན་ནས་མདོ་གསུངས་ཏེ་གསོ་སྦྱོང་ཚོགས། སྐབས་དེར་ཡུལ་དགོན་གཉིས་ཀ་སྤྲོ་སྐྱིད་ལ་རོལ་པའི་དུས་ཡིན་པས། ཕར་ཕྱིན་འཛིན་གྲྭ་མ་ཡིན་པའི་གྲྭ་པ་གཞན་རྣམས་ཀྱིས་ཀྱང་དེར་གསོ་སྦྱོང་མཛད་ན་དགོན་པར་གསོ་སྦྱོང་ལ་ཕེབས་མི་དགོས་པའི་གནང་བ་ཡོད། ཚེས་གསུམ་དང་བཞི་ལ་ཕར་ཕྱིན་མཛད་སྒོ་ཆེན་མོ་ཡིན། གསུམ་གྱི་ཞོགས་པར་ཡུལ་དགོན་མང་ཚོགས་ཁྲོད་དུ་སྐྱོར་དཔོན་གྱིས་བཀའ་ཆོས་གསུངས་པ་དང༌། དགེ་སྐོས་ཀྱིས་ཁྲིམས་གཏམ་བཏང་བ་ལ། ཀྱལ་ཀ་དང་ཀུ་རེའི་ཆེད་དུ་དགའ་སྤྲོ་དགེ་སྐུལ་གྱིས་ཕྱིར་རྒོལ་གྱི་གཏམ་དང་རྟེན་འབྲེལ་ལེགས་པའི་རྒོད་གཏམ་སྣ་ཚོགས་བཤད་སྲོལ་ཆགས། མ་ཟད་ཚོགས་ལངས་མཛད་པ། བརྒྱ་འབུལ་གྱི་འབུལ་བ་ཕུལ་བ། སེངྒེ་དང༌། གཡག་འཆམ་པ་སོགས་ཡོད། དགུང་ཚིགས་རྗེས་སུ་བླ་མ་མཆོད་པའི་ཚོགས་མཆོད་ཕུལ་ནས་ཐབ་རེའི་ཐོག་ལ་ཚོགས་དང་བཞེས་སྤྲོ་ཆེན་པོ་རེ་སྟེར་བའི་ཕྱག་སྲོལ་བཟང་པོ་གནས། ཕྱག་སྲོལ་འདི་ལ་རྒྱ་རིགས་ཡུལ་སྐོར་སྤྲོ་འཁྱམ་པ་ཞིག་གིས་ཟེར་རྒྱུ་ལ་མི་དམངས་ཁུངས་ནས་ཡར་བསྡུ་བ་ལས་དགོན་པའི་ཁུངས་ནས་མར་འགྲོ་གྲོན་བཏང་བ་གང་དུའང་དཀོན་པས་འདི་རིགས་ཤིན་ཏུ་ལེགས་ཟེར། དེར་བརྟེན་རང་གི་ཚོར་སྣང་ལའང་བདེན་པ་འདྲ་ཞིག་མཐོང་ནས་དེས་མཚོན་སྔར་ཡོད་དེ་དག་ལ་དོ་སྣང་དང༌། གསར་དུ་ཁ་ཚ་དགོས་གཏུགས་བྱེད་པ་ནི་དམངས་གཙོའི་སྤྱི་ཚོགས་ཀྱི་སྐབས་འདིར་གལ་ཆེན་དོན་ཆེན་ཞིག་རེད་བསམ་གྱིན་འདུག ཆོས་ལུགས་ལ་དར་ནག་དང་ཆོས་པ་ལ་དར་ནག་འཕྱར་མཁན་གྱི་མིང་ཐོགས་དོན་ཡང་། ཡར་བསྡུ་བ་ལས་མར་བཏང་བ་མེད་པའི་གནས་ཚུལ་འདི་འདྲའི་རྐྱེན་པས་རེད་སྙམ།
དགོན་སྡེ་ཞིག་ལ་བསླབ་པ་ཡོངས་སུ་སྦྱོང་བའི་གཞི་གསུམ་གྱི་ཕྱག་ལེན་ཡོད་དགོས་ལ། ཟླ་བ་རེའི་བཅོ་ལྔ་དང༌། གནམ་གང་གཉིས་ལ་གསོ་སྦྱོང་རེ་དང༌། ཟླ་བ་དྲུག་པའི་ཚེས་བཅུ་དྲུག་ནས་བདུན་པའི་ཉེར་དགུ་བར་དབྱར་ཁྲིམས་ཁས་བླངས་པའི་དབྱར་གནས་དང༌། དེའི་གནམ་གང་ལ་དབྱར་གནས་གྲོལ་ནས་དགག་དབྱེ་སྟེ། བསླབ་པ་ཡོངས་སུ་སྦྱོང་བའི་གཞི་གསུམ་ཡོད་པས། འདིར་ཧོར་ཟླ་དྲུག་པའི་ཚེས་བཅུ་བཞི་བཅོ་ལྔ་གང་རུང་ལ་གསོ་སྦྱོང༌། དེ་ལ་མདོ་རྩ་བ་ལས། ཚུལ་ཤིང་འབྲིམ་པར་འགྱུར་གྱི་དགེ་འདུན་ཐམས་ཅད་འདུ་བར་བྱའོ། །ཞེས་དང༌། ལུང་ལས། རབ་བྱུང་སྡེ་ལྔ་གས་ཁས་བླང་བར་བྱའོ། །ཞེས་དང༌། མཚམས་ནང་དེ་ན་གནས་པ་རྣམས་ཀྱིས་ཀྱང་ཁས་བླང་བར་བྱའོ། །ཞེས་པ་ལྟར། དགེ་ཚུལ་སློང་ཐམས་ཅད་ཀྱིས་ཚུལ་ཤིང་བླངས་ནས་དབྱར་གནས་པར་ཞལ་གྱིས་བཞེས་དགོས། ཚུལ་ཤིང་བླངས་རྗེས་དགེ་ཚུལ་སློང་དེ་སྙེད་ཀྱིས་ཚུལ་ཤིང་བཞེས་སོ་ཞེས་གོ་བར་བྱ། དེ་ལ་ཐམས་ཅད་ཀྱིས་ལེགས་པར་བཞེས་སོ་ཤིན་ཏུ་བཞེས་སོ་ཞེས་བརྗོད་དགོས་སོ། །དེ་ནས་གནས་མལ་སྟོབ་པ་དང་བསྔོ་སྨོན་མཛད་ནས་གྲོལ། ཕྱི་ཉིན་སྐྱ་རེངས་ཤར་བ་ན་དགེ་ཚུལ་སློང་ཀུན་གྱིས་འདུས་ཁང་དུ་དབྱར་ཁས་ལེན་མཛད། དབྱར་གནས་ཁས་ལེན་པ་ལ་དགོས་པ་ཡོད་དེ། ལུང་ལས། གཞན་གྱི་ལུས་སྲོག་ལ་གནོད་པ་སྤོང་བ་དང༌། བྱ་བ་མང་བ་སྤོང་པ་དང༌། འདོན་པ་དང༌། བསམ་གཏན་དང༌། ཀློག་པ་སོགས་དགེ་བའི་བྱ་བ་འཕེལ་བ་དང་ཞེས་གསུངས་པ་ལྟར་ཡིན་ནོ། །
དེང་སང་དབྱར་གྱི་ཁྲིམས་སུ་གྲྭ་ཤག་གི་ཉེ་འཁོར་གྱི་ལྡུམ་བུ་ཆེ་ཆུང་མང་པོ་བཅད་ནས་སྲོག་ཆགས་ཕྲ་མོ་མང་པོར་གནོད་པ་མངོན་སུམ་དུ་བཏང་བ་འདི་ཕན་ལས་གནོད་ཆེ་སྙམ། གཅིག་ལ་དགེ་སློང་གིས་ཉེ་འཁོར་གཙང་བ་ལ་གད་སྙིགས་གཙང་བ་ལས་གཞན་སྐྱེས་པ་གཅོད་མི་རིགས། གཉིས་ལ་དབྱར་གནས་སྲུང་བ་རང་གཞན་གྱི་ལུས་སྲོག་ལ་གནོད་པ་ཉུང་ཐབས་ལས་མང་ཐབས་མ་ཡིན། གསུམ་ལ་དབྱར་གནས་སྐབས་སུ་སད་སེར་བཟློག་ཐབས་མཛད་པ་སྲོག་ཆགས་ལ་གནོད་པ་སྤོང་བ་ཡིན་ནོ། །
བཅུ་དྲུག་ལ་དབྱར་གནས་ཡར་ཚོགས། ཉིན་གུང་ལ་གླིང་བསྲེ་བཞིའི་བསང་གསོལ། དགོང་མོར་མཆོད་ཁ་གསོལ། བཅུ་བདུན་ནས་གླིང་བསྲེ་དམ་བཅའ་ཉིན་བཞི་ལ་ཡོད། དེ་ལ་ཞོགས་ཆོས་ལ་འདོན་པ་ཚར་རྗེས་གླིང་བསྲེ་རང་གིས་བཤད་པ་གསུངས། དེ་ནས་མཁན་པོས་རྟགས་གསལ་གསུང་བའི་བར་མཚམས་སུ་གྲོལ་ཆུང་ལ་ཕེབས། དགེ་སྐོས་ཀྱིས་དེ་ཙམ་ལགས་ཞེས་པ་གཉིས་དང༌། ཡོངས་མངའ་ལགས་ཞེས་པ་གཅིག་སྟེ་གསུམ་གྱིས་བཞུགས་བརྡ་ཕུལ་དགོས། དེ་མཁན་ཟུར། གླིང་བསྲེ། དགེ་བཤེས་ཀུན་ལ་འདྲ། མཁན་པོས་རྟགས་གསལ་ཚར་རྗེས་གྲོལ་ཏེ་ཚོགས་ཆེན་འཚོགས། དེ་ལ་གླིང་བསྲེ་རང་གིས་སྐུ་ཡོན་སོགས་ཀྱིས་བསྙེན་བཀུར་གྱ་ནོམ་པ་མཛད་པ་དང༌། སྤོས་བསྐོར་ལ་ཕེབས་སྲོལ་ཡོད། དེ་གྲོལ་ཏེ་དགུང་ཚིགས་ཚོགས། དེ་ལ་མཁན་ཟུར་ནས་གླིང་བསྲེ་བར་རིམ་གྱིས་རྟགས་གསལ་གསུངས་ནས་གྲོལ། དེ་ནས་གྲྭ་ཤག་ཏུ་མཁན་པོ། མཁན་ཟུར། གླིང་བསྲེ། དགེ་བཤེས། མཛོད་པ་བ། ལས་སྣེ། ཁང་ཚན་གཅིག་པའི་གྲྭ་པ་རྣམས་ཀྱིས་གཙོས་བཞུགས་གྲལ་བ་སེར་སྐྱ་མང་ཙམ་དྲངས་ཏེ། འབྲས། ཞོ་མར་ཁུ་སོགས་ཀྱིས་བསྙེན་བཀུར། དགོང་མོར་ཚོགས་ཏེ་མཛོད་ཀྱི་སྐྱོར་དཔོན་ནས་རྟགས་གསལ་གསུང་པ་ལ་དགེ་སྐོས་ཀྱིས་ཡོངས་མངའ་ལགས་ཞེས་པས་བཞུགས་བརྡ་ཕུལ་ཚེ་བཞུགས་ཆོག གཞན་ལའང་དེ་འདྲ་ཡིན། ཉི་མ་ནུབ་རྗེས་སུ་འཛིན་གྲྭ་གསུམ་པོ་མ་གཏོགས་པ་རྣམས་ཐུག་གྲལ་ལ་ཕེབས་ནས་མཚན་སྐྱོང་ཚོགས། མཚམས་འཇོག་ཁར་ཚིག་བཀྲ་གསུངས་ཏེ་གྲོལ། ཉེར་བཞི་ནས་ཚོགས་ལངས་བ་བཞི་རེས་རིམ་བཞིན་བསང་བསྐོར་དང༌། མཆོད་ཁ་གསོལ། ཉེར་ལྔར་ཆོས་འཁོར། བཀའ་བསྟན་བཅོས། ཉེར་དྲུག་ལ་བྱམས་གཞུང༌། ཡང་དག་མཐའ། ཉེར་བདུན་ལ་སེམས་བསྐྱེད། སྦྱོར་ལམ། ཉེར་བརྒྱད་ལ་སྐྱབས་གསུམ། རིགས་རྣམས་ཀྱི་ཚོགས་ལངས། དེ་ལ་གྲྭ་པ་རེས་ཚོགས་ལངས་གསུམ་རེ་རྒྱག་དགོས་པས་གསར་པ་བརྒྱད་དང༌། རྙིང་པ་བརྒྱད། གསར་པས་བཞུགས་གྲལ་ལ་མཁན་པོ། མཁན་ཟུར། གླིང་བསྲེ། དགེ་བཤེས། ལས་སྣེ་རྣམས་དྲངས་ཏེ་འབྲས་ཚོད། ཞོ་མར་ཁུ་སོགས་གསོལ་ཆས་གྱ་ནོམ་པ་འབྲིམ། ཚེས་བདུན་ནས་དགུ་བར་དབྱར་གནས་ཕྱེད་ཀྱི་ཆོས་མཚམས། ཕྱིར་ཚོགས་ནས་རྗེ་ཙོང་ཁ་པའི་ལམ་རིམ་བླ་བརྒྱུད་གསོལ་འདེབས་ལམ་མཆོག་སྒོ་འབྱེད་ཅེས་བྱ་བ་བདུད་རྩི་འབེབས་སྦྱངས་བཅས་དབྱངས་རྟ་ཐུན་མོང་མིན་པས་གསུངས། ཉེར་བདུན་ལ་ཆོས་གྲྭ་གྲོལ། དགོང་མོར་སེམས་བསྐྱེད་སྟ་གོན། གྲྭ་མང་གིས་ཆོས་གོས་བགོས། གདིང་བ་བཏིང༌། གྲྭ་མང་འཛོམས་རྗེས་མཆོད་གཡོག་པས་མཁན་པོ་དྲངས། དམིགས་བརྩེ་མ་རྟ་བཏང༌། ཁྲི་ཕྱག་འཚལ་ཏེ་གདན་ལ་འཁོད་རྗེས་གྲྭ་མང་གིས་ཀྱང་ཕྱག་འཚལ་ཏེ་བཞུགས། དགའ་ལྡན་ཁྲི་རིན་པོ་ཆེའི་ཕྱག་ལེན་ལྟར། མཁན་པོས་དབུ་བསྐུལ་ཏེ། མཁའ་ལ་སྤྱོད་པ་ནས་སེང་གདོང་བསྙེན་པ། ཏདྱཐཱ་ནས་བགེགས་རིགས་སྟོང་ཕྲག་བར། ཕུན་ཚོགས་དགེ་ལེགས་སོགས་ནས་ལྷ་དང་ལྷ་མིན་བར་གསུངས། དབུ་མཛད་ཀྱིས་གསུང་ཆོས་ཟབ་མོ་ཞུ་བའི་ཡོན་དུ་མཎྜལ་ཞིག་དབུ་སྐུལ་གནང་། ཚོགས་ཞིང་གསལ་འདེབས་སོགས་ཞིབ་རྒྱས་བསྩལ་ཏེ་དབུ་མཛད་ལ་གསུང་དབྱངས་བཟང་པོས་འདོན་པར་གསུང་བར་སྐུལ། དབུ་མཛད་ཀྱིས་ས་གཞི་བྱིན་རླབས་ནས་བཟུང༌། ཚོགས་ཞིང་སྤྱན་འདྲེན། ཁྲུས་གསོལ། དྲི་གོས་རྒྱན་འབུལ། འདོད་ཡོན་སྣ་ལྔ། བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། ལྟུང་བཤགས། སྤྱི་བཤགས། ལམ་མཆོག་སྒོ་འབྱེད་སོགས་ཞལ་འདོན་གྱི་རིམ་པ་ཚར་རྗེས། སེམས་བསྐྱེད་སྟ་གོན་གྱི་གསུང་ཆོས་ཞུ་བའི་ཡོན་དུ་མཎྜལ་ཕུལ། སྟ་གོན་གྱི་བཀའ་ཆོས་བསྩལ། ཆོས་ཚོགས་མ་ལན་གསུམ། ཕ་མ་སེམས་ཅན། བྱང་ཆུབ་སེམས་མཆོག དཔལ་ལྡན་བླ་མའི་ཞེས་སོགས་གསུངས། དེ་ནས་གཏང་རག་གི་མཎྜལ་ཕུལ་ཏེ་གྲོལ། དངོས་གཞིའི་ཉིན་སྔ་མོར་ཁ་དོག་འཛིན་གྲྭས་ཆག་ཆག་དང་གད་བདར་བྱེད་པ། དེའི་གོང་མས་གཙང་སྦྲ་དང་ལྡན་པས་མཆོད་པ་བཅའ་བཟོ་བྱེད་པ། ལྟག་མ་བ་རྣམས་ཀྱིས་ཆོས་ཀློག་པ། མཎྜལ་འབུལ་བ། ཕྱག་འཚལ་བ། སཙྪ་དང་སྐུ་གཟུགས་བཞེངས་པ། གཏོར་མ་བརྒྱ་རྩ་གཏོང་བ་སོགས་ཀྱིས་སྦྱོར་བའི་ཚོགས་བསོག་ལ་འབད་དེ་ཞོགས་ཚོགས་བྱེད། གུང་ཚིགས་ལ་བླ་མཆོད་ཚོགས་འཁོར་ལ་རོལ། དགོང་མོར་ཞལ་འདོན་གྱི་རིམ་པ་ཅུང་རྒྱས་ཙམ་ལས་ཕལ་ཆེར་སྟ་གོན་དང་འདྲ། སེམས་བསྐྱེད་སྡོམ་པ་ཞུ་བའི་ཡོན་དུ་མཎྜལ་ཕུལ། མཁན་རིན་པོ་ཆེ་ནས་བྱང་ཆུབ་ལམ་རིམ་ཆེན་མོ་སོགས་ནས་འབྱུང་བ་ལྟར་གྱི་འབོག་ཆོག་རྒྱས་པའི་སྒོ་ནས་སེམས་བསྐྱེད་ཀྱི་སྡོམ་པ་འབོག བསྔོ་ཡིག་གསུངས། དགེ་རྩ་བཅོལ། གཏང་རག་མཎྜལ་ཕུལ། བསྟན་འབར་མ་གསུངས་ཏེ་གྲོལ། དེའི་ཕྱི་ཉིན་གསོ་སྦྱོང་བཅུ་བཞི་པ་དང་བསྟུན་ཏེ་དགག་དབྱེ་བཅུ་བཞི་པ་བྱ། དགག་དབྱེ་དགེ་འདུན་རྣམས་ལ་རྩྭ་བྲིམས་ཏེ་གསུམ་རེའི་མདུན་དུ་སྔགས་ཚིག་ལན་གསུམ་རེ་དང༌། ཐབས་ལེགས་བྱ། མཇུག་དུ་དགེ་ཚུལ་སློང་འདི་སྙེད་ཀྱིས་དགག་དབྱེ་མཛད་དོ། །ཞེས་གོ་བར་བྱ། ཐམས་ཅད་ཀྱིས་ལེགས་པར་དགག་དབྱེ་མཛད་དོ། །ཤིན་ཏུ་དགག་དབྱེ་མཛད་དོ། །ཞེས་བརྗོད། རྩྭ་ཆོག་ནི། རྩྭ་ཕན་ཚུན་རྩེ་སྤྲོད་དུ་ཉལ་བ་འདྲ་བར་བྱས་ཏེ་ཕྱོགས་གཉིས་ནས་ཕན་ཚུན་འདུད་པར་འགྱུར་བའི་བརྡ་ཐབས་སུ་གནང་བའི་ཕྱག་ལེན་ཞིག་གོ །དེ་ནས་དར་དཀར་རེ་ཡར་བསྡུས་ཏེ་རྫས་ཀྱི་དགག་དབྱེ་བྱ། དེང་སང་དབྱར་རལ་བ་རྣམས་ཀྱིས་དགག་དབྱེ་མི་བྱེད་པ་ལྟ་བུ་སྣང་ཡང༌། མི་རིགས་ཏེ་དབྱར་རལ་མ་རལ་གང་ཡིན་ཡང་དགག་དབྱེ་མ་བྱས་ན་ཉེས་བྱས་འབྱུང་བར་འདུལ་བ་ལས་གསུངས་སོ། །ལྗོངས་རྒྱུ་ལ་བསྭོ་ཐོག་གནས་ནང་དུ་ཕེབས་པའི་སྲོལ་ཡོད་འདུག
ཧོར་ཟླ་དགུ་པའི་ཚེས་བཅུ་བདུན་ལ་སྟོན་ཆོས་ཡར་ཚོགས། འདིའི་སྐབས་མཁན་པོས་བཀའ་ཆོས་དང་གྲྭ་མང་གིས་མཎྜལ་འབུལ་མི་དགོས། དེ་མིན་གཞན་དང་འདྲ། དེའི་ཉེར་གཉིས་རྒྱལ་བ་ལྷ་ལས་བབས་པའི་དུས་ཆེན་ཁྱད་པར་ཅན་གྱི་ཉིན་ལ་ཚོགས་ཆེན་དུ་ཞབས་དྲུང་སྐྱེ་ཕྲེང་བདུན་པས་མཛད་པའི་རྗེ་བླ་མ་ལ་བརྟེན་པའི་དམིགས་བརྩེ་མའི་བུམ་སྒྲུབ། རིལ་བུ་དགེ་འདུན་པ་སོ་སོ་དང༌། རང་སྡེའི་དུད་ཚང་སོ་སོར་སྐལ་ལྷག་ཆད་མེད་པར་སྦྱིན། འདིས་ཆམ་རིམས་སོགས་འགོག་པ་མངོན་སུམ་གྱིས་གྲུབ་པས་ཡུལ་འདིས་དམ་རྫས་རྩ་ཆེན་གྱི་གྲས་སུ་རྩི་མཐོང་ཤིན་ཏུ་ཆེ། དེའི་བཅུ་དྲུག་ལ་སྟོན་ཆོས་གྲོལ།
མདོར་ན་ཡུལ་དུས་དང་བསྟུན་པའི་དམིགས་བསལ་འགའ་རེ་མ་གཏོགས་འདིའི་ཚོགས་གཏམ་དུ་ཡོད་པ་ལྟར། སྔགས་ལུགས་ལྟར་ན་དཔལ་ལྡན་སྨད་རྒྱུད་གྲྭ་ཚང་ནང་ལྟར། མདོ་ལུགས་ལྟར་ན་གྲྭ་ཚང་སེ་ར་སྨད་པ་ནང་ལྟར་ཡིན་ཞེས་པ་ལྟར་ཡིན་ནོ། །
སྨྲས་པ།
འཇམ་དབྱངས་དགེ་ལ་འདུན་པ་རྒྱ་མཚོ་ཡིས། །
ཕྱོགས་འདིའི་སྐྱེ་རྒུ་ཆོས་ནོར་གྱིས་ཕོངས་ལ། །
དབྱིག་སྙིང་ཅི་དགར་རོལ་བའི་གཏེར་བསྐྲུན་གང༌། །
བྱང་ཆུབ་འབུམ་པས་ཕྱག་བཏབ་ནོར་གླིང་སྤུན། །ཞེས་སོ།། །།