མདོ་ཕྱོགས་ལ་སྤྲོ་བ་བསྐྱེད་ཚུལ།
དང་པོ་ནི། སྐྱབས་རྗེ་འཇམ་དཔལ་དགེ་འདུན་རྒྱ་མཚོས། གཞུང་ཆེན་པོ་སློབ་གཉེར་རྒྱག་དང་གཅིག །ཆོས་བྱང་ཆུབ་ལམ་རིམ་ཐོས་དང་གཉིས། །ནང་སེམས་རྒྱུད་ཆོས་ལ་ཕྱོགས་དང་གསུམ། །ད་སྐྱིད་ཀྱི་ཉི་མ་འདི་གསུམ་ཤར། །ཞེས་གསུངས་པ་ལྟར། རང་རང་གི་སྔོན་བསགས་དགེ་བའི་ལས་དང་མཐུན་པར་དངོས་དང་རྗེས་མཐུན་ཅི་རིགས་ཀྱི་སྒོ་ནས་དལ་འབྱོར་ཚང་བའི་མི་ལུས་ནི་ཐོབ། རྒྱལ་བ་ཡབ་སྲས་དང༌ཞབས་དྲུང་རིན་པོ་ཆེས་གཙོས་བཤེས་གཉེན་དག་དང་ནི་ཕྲད། བསྟན་པ་རིན་པོ་ཆེ་སྤྱི་དང༌། ཁྱད་པར་ཡབ་རྗེ་རྒྱལ་བ་གཉིས་པའི་བསྟན་པ་བཙོ་སྦྱངས་གསེར་གྱི་ཡང་ཞུན་ལྟ་བུ་འདི་ཉིད་དང་མཇལ་བར་མ་ཟད། གཞུང་ཆེན་པོ་ལྔ་སློབ་གཉེར་གནང་ས་ཡོད་པའི་སྐྱིད་ཀྱི་ཉི་མ་འདི་དང་གཅིག ཆོས་བྱང་ཆུབ་ལམ་རིམ་ཐོས་པ་བྱེད་ས་ཡོད་པའི་སྐྱིད་ཀྱི་ཉི་མ་འདི་དང་གཉིས། ནང་སེམས་རྒྱུད་ཆོས་ལ་ཕྱོགས་པའི་སྐྱིད་ཀྱི་ཉི་མ་འདི་དང་གསུམ་ཤར་བ་འདི་ཅི་འདྲའི་སྐལ་བ་བཟང་པོ། དོན་བཟང་པོ། དུས་བཟང་པོ་ཞིག་ཀྱང་མ་ཡིན་ནམ། སྤྱིར་ཉི་མ་ཤར་ཡང་ཉི་འོད་དུ་མ་བསྡད་ན་གང་ཡང་མི་ཕན་པ་བཞིན། དཔེ་ཆ་མ་གཟིགས་པའམ། ལམ་རིམ་ལ་ཐོས་བསམ་མ་བྱས་པའམ། ནང་ཆོས་ལ་ཤེས་ནས་དད་པ་ཐོབ་པར་མ་བྱས་པ་དག་ལ་ནི་སྐྱིད་ཉི་མ་འདི་གསུམ་རང་གིས་རང་ལ་ཤར་མ་བཅུག་པར་འགེབས་པར་བྱས་པ་དང་འདྲ་བར་འགྱུར། གལ་ཏེ་འདི་དག་དང་འཕྲད་པ་དོན་མེད་དུ་བཏང་ན་དེ་ལས་གྱོང་གུན་ཆེ་བ་ཞིག་འཇིག་རྟེན་འདིར་ཡོད་པ་མ་ཡིན་ནོ། །དེས་ན་རྒྱུ་མཚན་དེའི་ཕྱིར་རྒྱལ་བསྟན་ནོར་བུའི་བང་མཛོད་ཕྱོགས་ལས་རྣམ་རྒྱལ་འཇམ་དབྱངས་ཀུན་དགའ་མཐོང་གྲོལ་ཞེས་པའི་ཆོས་གྲྭ་འདིར་བཞུགས་ཀྱི་དགེ་འདུན་རྣམས་ཀྱིས་རྨོངས་པའི་དབང་གིས་ཐོས་བསམ་ཡལ་བར་བོར་ནས་ཚོང་གྲོང་ཆོག་འཚེམ་འདྲུབ་སོགས་ནོར་སྒྲུབ་པའི་ཐབས་ཙམ་ལ་འབད་པ་ནི། དལ་རྟེན་ཆུད་ཟོས་སུ་བཏང་ནས་འབྲས་མེད་ཀྱི་སྤུན་པ་འཕྱར་བ་དང༌། དུད་འགྲོའི་ཀུན་སྤྱོད་ལས་མ་འདས་པས་ཤིན་ཏུ་རྨོངས་པ། ཆེས་བླུན་པ་ཡིན་ནོ། །དེས་ན་དེ་དག་དགོན་པར་བསྡད་པ་དང༌། སྐྲ་བྲེགས་པའི་དགོས་པ་སྟོར་ཏེ། ཏིང་ངེ་འཛིན་རྒྱལ་པོའི་མདོ་ལས། སངས་རྒྱས་བསྟན་པ་འདི་ལ་རབ་བྱུང་ནས། །སྡིག་པའི་ལས་རྣམས་ཤིན་ཏུ་སྤྱོད་པར་བྱེད། །ནོར་དང་འབྲུ་ལ་སྙིང་པོར་འདུ་ཤེས་ཤིང༌། །བཞོན་དང་བ་ལང་ཤིང་རྟ་རྣམས་ལ་ཆགས། །གང་ལ་བསླབ་པའི་ནན་ཏན་མེད་པ་རྣམས། །དེ་དག་གིས་ཀྱང་ཅིའི་ཕྱིར་མགོ་བོ་བྲེགས། །ཞེས་གསུངས་སོ། །དེ་ལྟར་མི་མཛད་པར་ཐར་པ་དང་ཐམས་ཅད་མཁྱེན་པ་དོན་དུ་གཉེར་བ་རྣམས་ཀྱིས་བཀའ་པོད་ལྔས་གཙོས་རིག་གནས་ལྔ་ལ་བསླབས་ནས་ཆོས་རབ་ཏུ་རྣམ་འབྱེད་ཀྱི་ཤེས་རབ་བསྐྱེད་དགོས་ཏེ། ནང་པའི་བསྟན་པ་ནི་ཤེས་རབ་ཀྱི་ཁྱད་པར་དུ་བྱས་པ་ཡིན་པས། ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་ནས་སྒྲུབ་པ་མ་གཏོགས་དད་པ་རྐྱང་པས་མི་ཆོག་པའི་ཕྱིར་དང༌། ཐོས་བསམ་མི་དགོས་པར་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པའང་མེད་ལ། ཡོད་ན་བཅོམ་ལྡན་འདས་དང༌། དཔལ་མགོན་འཕགས་པ་ཀླུ་སྒྲུབ། སློབ་དཔོན་ཐོགས་མེད། ཙོང་ཁ་པ་སོགས་འཁྲུལ་ཞེས་སྨོས་དགོས་པར་འགྱུར། དེ་སྐད་དུ་ཡང་མདོ་སྡེ་དཀོན་མཆོག་བརྩེགས་པ་ལས། ང་ཡི་བསྟན་པ་ཤེས་རབ་ཀྱི་ཁྱད་པར་དུ་བྱས་པ་ཡིན་ཞེས་གསུངས་པ་དང༌། རྗེ་བཙུན་བྱམས་པ་མགོན་པོས། རིག་པའི་གནས་ལྔ་དག་ལ་བརྩོན་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །དེ་ལྟ་བས་ན་གཞན་དག་ཚར་བཅད་རྗེས་གཟུང་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱེད། །ཅེས་གསུངས་པ་དང༌། སློབ་དཔོན་དབྱིག་གཉེན་གྱིས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱ་བའི་ཐབས་མེད་ལ། །ཉོན་མོངས་པས་ཀྱང་འཇིག་རྟེན་སྲིད་མཚོ་འདིར་འཁྱམས་ཏེ། །དེ་བས་དེ་ཕྱིར་འདི་ནི་སྟོན་པས་གསུངས་སོ་ལོ། །ཞེས་དང༌། འཇམ་དཔལ་དགེ་འདུན་རྒྱ་མཚོས། རབ་འབྱམས་གཞུང་ལ་སྦྱངས་པ་མི་བྱེད་པར། །རྣམ་གྲོལ་སྒྲུབ་པའི་མོ་བཤམ་བུ་འདོད་རྣམས། །བདེན་ན་སངས་རྒྱས་ཀླུ་སྒྲུབ་ཐོགས་མེད་དང༌། །ཙོང་ཁ་པ་སོགས་འཁྲུལ་ཞེས་ད་སྨོས་ཤིག །ཅེས་གསུངས་པ་དང༌། ༸གོང་ས་མཆོག་གིས། རང་རེའི་སངས་རྒྱས་ཀྱི་བསྟན་པ་ནི་ཆོས་རབ་ཏུ་རྣམ་འབྱེད་ལ་བརྟེན་ནས་ཉམས་ལེན་བྱེད་དགོས་པ་ལས་དད་པ་གཅིག་པུས་མི་འགྲིགས་གསུངས་སོ།།
གཞན་ཡང་ལ་ལ་དག་བདག་ཉིད་ལ་བརྙས་པའི་ལེ་ལོས་དབང་པོ་རྟུལ་བ་རྒྱུ་མཚན་དུ་བྱས་ནས་མི་འབད་པ་འདི་ཡང་རིགས་པ་མ་ཡིན་ཏེ། དེང་སང་འཛམ་གླིང་ན་དོམ་གྱིས་རྐང་འཁོར་གཏོང་བ་དང༌། གླང་པོ་ཆེས་རི་མོ་འབྲི་བ་དང༌། སྤྲེའུས་ཞབས་བྲོ་རྒྱག་པ་སོགས་ཡོད་ཚུལ་འདི་དག་ལ་གཟིགས་ན། སྨྲས་ཤིང་བསྐུལ་ན་དུད་འགྲོ་ལའང་གོ་བ་ཡོད་པ་ཤེས་ནུས་པས། རྣམ་དཔྱོད་དང་ལྡན་པའི་མི་རྣམས་ཀྱིས་རིག་གནས་སྦྱངས་པ་དེ་བས་ཀྱང་ལས་སླ་བ་ལྟ་ཅི། དེ་ཡང༌། སྤྱོད་འཇུག་ལས། གོམས་ན་སླ་བར་མི་འགྱུར་བའི། །དངོས་དེ་གང་ཡང་ཡོད་མ་ཡིན། །ཞེས་དང༌། ས་སྐྱ་ལེགས་བཤད་ལས། སྨྲས་ཤིང་བསྐུལ་བར་གྱུར་པ་ན། །དུད་འགྲོ་ལ་ཡང་གོ་བ་སྐྱེ། །གསུངས་ཡོད།
འགའ་ཞིག་ན་ཚོད་མཐོ་བ་རྒྱུ་མཚན་དུ་བྱས་ནས་མི་འབད་པ་འདི་ཡང་རིགས་པ་མ་ཡིན་ཏེ། ནངས་པར་འཆི་ཡང་དེ་རིང་དཔེ་ཆ་གཟིགས་པ་སྔོན་བྱོན་དམ་པའི་རྣམ་ཐར་དང༌། རིག་པ་བསླབ་པ་དེས་ཚེ་འདིར་མཁས་པར་མ་གྱུར་ཀྱང་དེས་བག་ཆགས་ཁྱད་པར་ཅན་ཐེབས་ནས་བཅོལ་བའི་ནོར་དགོས་དུས་ཕྱིར་ལེན་ཆོག་པ་ལྟར་ཕྱི་མར་བེད་སྤྱོད་གཏོང་ཆོག་པའི་ཕྱིར། དེ་ཡང༌། ས་སྐྱ་ལེགས་བཤད་ལས། རིག་པ་ནངས་པར་འཆི་ཡང་བསླབ། །ཚེ་འདིར་མཁས་པར་མ་གྱུར་ཀྱང༌། །སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་དང་མཚུངས། །ཞེས་གསུངས་པས་སོ།།
གཞན་ཡང༌། ཁ་ཅིག་གིས་ཐོས་བསམ་སྒོམ་གསུམ་མི་ནུས་པས་ཁ་ཏོན་དང་ཕྱག་བསྐོར་ཙམ་གྱིས་ཆོག་སྙམ་ན་དེ་ཡང་མི་རིགས་ཏེ། ཚིག་བཟང་པོ་ཞལ་ནས་གསུང་དུས། དོན་བཟང་པོ་ཡིད་ལ་བསྒོམས་ཏེ་ཁ་དོན་བྱས་ན་ཤིན་ཏུ་བཟང་ཡང༌། དེ་ནི་ཐོས་བསམ་མ་བྱས་པར་ཡོང་ཐབས་རྩ་བ་ནས་མེད་པས། དེ་མིན་གྱི་ཁ་ཏོན་སོགས་ནེ་ཙོའི་མ་ཎི་དང་མཚུངས་པ་ལས་ཕན་བྱེད་གང་ཡིན་དཀའ། ཕན་བྱེད་ཡོད་ན་ཐོག་མ་མེད་པ་ནས་ཉོན་མོངས་ཀྱི་གཞན་དབང་དུ་སོང་བ། རྡོ་ལྟར་སྲ་ཞིང་རྭ་ལྟར་འཁྱོགས་པའི་རང་སེམས་འདི་ལ་ཕན་དགོས་པ་ལས་དེ་མི་རྙེད་པའི་ཕྱིར་ཏེ། རྒྱལ་སྲས་ཞི་བ་ལྷས། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱོད་བྱས་ཀྱང་། །སེམས་གཞན་གཡེང་བས་བྱས་པ་ནི། །དེ་ཉིད་རིག་པའི་དོན་མེད་གསུངས། །ཞེས་དང་། སྐྱབས་རྗེ་འཇམ་དཔལ་དགེ་འདུན་རྒྱ་མཚོས་ཀྱང༌། ཚིག་རྐང་གཅིག་གི་དོན་ལ་བསམ་བྱ་དང༌། །བྲལ་བའི་ནེ་ཙོའི་མ་ཎི་ཁ་ཏོན་མཁན། །དེ་ཡི་ཤེས་རྒྱུད་རྡོ་དང་རྭ་ཅོ་ལྟར། །སྲ་ཞིང་འཁྱོགས་ལ་ཕན་བྱེད་གང་ཡིན་སྨོས། །ཞེས་གསུངས་སོ།།
དེས་ན་བདག་ལེགས་སུ་འདོད་པ་རྣམས་ཀྱིས་ཐོས་བསམ་ལ་ཤ་ཐང་དུ་འབད་དགོས། དེའི་ཚུལ་ཡང་༸གོང་ས་མཆོག་གིས། སེམས་རྒྱུད་འདུལ་ཐབས་ཡིན་བསམ་པའི་ཐོག་ནས་དཔེ་ཆ་བལྟ་རྒྱུ་མ་བྱུང་ན། དཔེ་ཆ་ཇི་ཙམ་ཤེས་པ་ཡིན་ཡང་རྒྱུད་གོག་པོ་མ་དུལ་ཧྲེང་པོར་མུ་མཐུད་དེ་གནས་ན་གྲྭ་པའི་ཞབས་འདྲེན་དང༌། ཆོས་པའི་ཞབས་འདྲེན། གདན་སའི་ཞབས་འདྲེན་ཐོན་གྱི་ཡོད། གཞི་རྩའི་དཔེ་ཆ་བ་ཞིག་ཡིན་ཕྱིན་ཐ་ན་གྲྭ་ཆས་གྱོན་སྟངས་གོམས་པ་སྤོ་སྟངས་ཚུན་ཞི་ཞིང་དུལ་བ་ཏན་ཏན་ཡོད། ཧ་ཅང་ལེགས་པའི་གནས་རེད་གསུངས་པ་ལྟར། རབ་བྱུང་སྤྱི་དང༌། ཁྱད་པར་དཔེ་ཆ་བ་རྣམས་ཀྱིས་སེམས་རྒྱུད་འདུལ་ཐབས་ཡིན་པ་ལ་བསམ་བློ་ལེགས་པར་བཏང་སྟེ་སེམས་ཀྱི་འཁྱེར་སོ་འཇིག་རྟེན་རང་ག་བ་ལྟ་བུ་མ་ཡིན་པར། ཐོས་དོན་རྒྱུད་ལ་སྦྱར་ཏེ་རང་རྒྱུད་ཀྱི་ཉོན་མོངས་ཇེ་ཆུང་དང་ཇེ་ཉུང་ལ་ཡང་ཡང་བཏང་བ་ནི་དོན་ཤིན་ཏུ་ཆེན་པོ་ཡིན་ལ། གཟི་བརྗིད་ཤིན་ཏུ་ཆེན་པོའང་ཡིན་ནོ། །དེ་མ་ཡིན་པར་གཞན་ལ་བརྙས་བཅོས་དང་ཁྱད་གསོད། སྐྱོན་བརྗོད་དང་སྐུར་འདེབས་ཁོ་ནས་དུས་འདའ་བར་བྱེད་པ་ནི་དོན་མ་ཡིན་ཏེ། ཐམས་ཅད་མཁྱེན་པ་དགེ་འདུན་གྲུབ་པས། དགྲ་ཉོན་མོངས་འདུལ་ཐབས་མི་བྱེད་པར། །གཤགས་འགྱེད་པ་ཙམ་གྱི་འཆད་ཉན་ཡང༌། །འདྲེ་ཤར་སྒོའི་ཕྱོགས་སུ་གནས་པ་ལ། །གླུད་ནུབ་སྒོར་གཏོང་བ་དོན་རེ་ཆུང་། །ཞེས་དང༌། ཇོ་བོ་ལྷ་གཅིག་གིས། དམན་པ་རྣམས་ལ་སྙིང་རྗེ་བསྐྱེད་ལ་ཁྱད་དུ་གསོད་དང་བརྙས་པ་སྤོངས། །དགྲ་ཟིན་སྡེ་རིས་ཀུན་ལ་ཞེན་ཅིང་ཆགས་པའི་ཕྱོགས་རིས་མེད་པར་མཛོད། །ཡོན་ཏན་ཅན་ལ་ཕྲག་དོག་མི་བྱ་གུས་པར་གྱིས་ལ་ཡོན་ཏན་བླང༌། །གཞན་སྐྱོན་མི་བརྟག་རང་སྐྱོན་བརྟག་ལ་རང་སྐྱོན་ཁྲག་ངན་བཞིན་དུ་ཕྱུང༌། །ཞེས་དང༌། རྗེ་བླ་མས། ཆོས་མཛད་འདུག་ཚད་རྣམས་ལ་མོས་གུས་བསྐྱེད། །ཅེས་དང༌། འབྲོམ་སྟོན་པས། རང་ལ་ཡོན་ཏན་ཇི་ཙམ་ཡོད་ན་ཡང༌། །གཞན་ལ་ཁྱད་གསོད་བརྙས་པ་ཆུང་བ་མཛོད། །ཅེས་གསུངས་སོ།།
འདིར་སློབ་གསོ་ཞིག་སྤེལ་བ་ནི་རྫིག་པོ་དང་ཟུར་ཟ་ལྟ་བུའི་ཆེད་དུ་མ་ཡིན་པར། ལེགས་བཤད་རེ་ཟུང་བྱིས་པའི་ཁ་སྒོ་ནས་ཀྱང་འབྱུང་བ་སྲིད་ཅེས་པའི་དཔེ་ལྟར། བླུན་རྨོངས་རང་དང་སྐལ་མཉམ་དག་ལ་སློབ་གསོ་ཅུང་ཙམ་རེ་ཐེབས་ན་སྙམ་པའི་ལྷག་བསམ་གྱིས་ཀུན་ནས་བསླངས་ཏེ། གཟུ་བོའི་བློས་ཉན་འཇོག་རེ་བྱས་ན་སློབ་གསོའི་བྲོ་བ་རེ་སྟེར་ངེས་ཀྱི་སྔོན་བྱོན་མཁས་པའི་གདམས་ངག་འགའ་བསླབ་བྱར་བཀོད་དོ། །