ཁ༽ ཞར་ལ་ཁམས་སྟོང་འཁོར་ཡུལ་དགོན་བདུན་གྱི་བྱུང་རིམ་སྐོར་བཤད་པ།
གཉིས་པ་ཞར་ལ་ཡུལ་དགོན་བདུན་གྱི་བྱུང་རིམ་སྐོར་བཤད་པ་ལ། སྟོང་འཁོར་ཡུལ་གྱི་དགོན་སྡེ་ཁག་དང་ཡུལ་བ་གཉིས་ཀྱི་བྱུང་རིམ་མདོ་ཙམ་བཤད་པ་དང་། ད་ལྟའི་སྟོང་འཁོར་གཞིས་བྱེས་གཉིས་ཀྱི་གནས་བབས་མདོ་ཙམ་བཤད་པ། སྟོང་འཁོར་རིགས་གསུམ་མགོན་པོའི་གནས་རིའི་སྐོར་བསྡུས་ཙམ་བཤད་པ། དཔོན་རབས་རིམ་བྱོན་གྱི་སྐོར་དང་འབྲེལ་ཏེ་དེ་དག་གི་སྐབས་སུ་འཕོ་འགྱུར་ཇི་ལྟར་བྱུང་ཚུལ་སྐོར་བཤད་པ། དཔྱད་གཞིའི་ཡིག་ཆ་སྐོར་བཤད་པའོ།།
༡༽ སྟོང་འཁོར་ཡུལ་གྱི་དགོན་སྡེ་ཁག་དང་ཡུལ་བ་གཉིས་ཀྱི་བྱུང་རིམ་མདོ་ཙམ་བཤད་པ།
དང་པོ་ནི། ཇི་སྐད་དུ། སྟོད་ཀྱི་མངའ་རིས་སྐོར་གསུམ་རྫིང་གི་ཚུལ། །བར་དུ་དབུས་གཙང་རུ་བཞི་ཡུར་བ་འདྲ། །སྨད་དུ་མདོ་ཁམས་སྒང་དྲུག་ཞིང་ལྟ་བུ། །ཀུན་ཀྱང་ཆུ་ཡི་རྒྱ་མཚོར་གྱུར་པའི་ནང༌། །ཀོང་གི་ཆུ་བརླག་ཅེས་པའི་ཟོམ་བྱེ་བས། །རུ་བཞི་ཆུ་ཡིས་གང་བ་དེ་རུ་ཐིམ། །ཆུ་གཞན་དག་ཀྱང་དེ་ལྟར་ཐིམ་པ་ཡིས། །བོད་ཁམས་ཡུལ་གྱི་རྣམ་པ་གསལ་པོར་དོད། །ཅེས་པ་ལྟར། སྔོན་ཐོག་མར་བོད་ཡུལ་འདི་ཆུ་ཡིས་གང་ནས་ཡོད་འདུག་ལ། དེ་ནས་ཀོང་པོའི་མཐིལ་གྱི་བྲག་རི་ལ་གཤིན་རྗེའི་ཁ་གདངས་པ་ལྟ་བུའི་ཁུང་བུ་ཞིག་བྱེ་བ་ནས་བཟུང་ཆུ་རྣམས་ལྷོ་ཕྱོགས་རྒྱ་གར་དུ་བབས་ཏེ་རིམ་བཞིན་ཡུལ་གྱི་རྣམ་པ་དོད། དེ་ནས་སྟོད་མངའ་རིས་སྐོར་གསུམ་ཤྭ་རྐྱང་རི་དྭགས་གླིང༌། བར་དབུས་གཙང་རུ་བཞི་སྟག་གཟིག་སོགས་གཅན་གཟན་གླིང༌། སྨད་མདོ་ཁམས་སྒང་དྲུག་འདབ་ཆགས་བྱ་ཡི་གླིང་དུ་སོང་བ་སོགས་དང་པོར་མི་མ་ཡིན་གྱི་གནས་སུ་གྱུར་ནའང་། བར་སྐབས་ཤིག་ནས་འཕགས་པས་སྤྲུལ་པའི་སྤྲེའུ་བྱང་ཆུབ་སེམས་དཔའ་དང་འཕགས་མས་སྤྲུལ་པའི་བྲག་སྲིན་མོ་གཉིས་འཚོགས་པ་ལས་རིགས་དྲུག་ནས་ཚེ་འཕོས་པའི་སྤྱོད་ཚུལ་མི་འདྲ་བའི་ཕྲུ་གུ་དྲུག་བྱུང་སྟེ་ཆོལ་ཁ་གསུམ་གྱི་མིའི་འགྲོ་བ་རིམ་གྱིས་ཆགས། ཡིན་ནའང་བར་ཁམས་སྟོང་འཁོར་གྱི་ཡུལ་འདིར་ད་དུང་མི་གྲོང་གི་མིང་ཡང་མེད་པར་རི་ཀླུང་ཐམས་ཅད་དུ་རི་དྭགས་དང་གཅན་གཟན་གྱི་ཡུལ་འབྲོག་དགོན་པར་གྱུར་ནས་ཡུན་རིང་ཙམ་འགོར། ནམ་ཞིག་ན་ཤར་ཕྱོགས་ནས་རྔོན་པ་སྤུན་གཉིས་ཕྱོགས་འདིར་རྔོན་བྱེད་པར་འོངས་ཏེ། ད་ལྟའི་རྦག་གདོང་ནས་བལྟས་ཚེ་ཟླ་ཆུའི་ཕ་རོལ་ཉ་ཁྲི་ཕྱོགས་སུ་སྤང་ཐང་སྟེང་ཤྭ་བ་ཡོད་པས་མདའ་འཕངས་ཏེ་བསད། དེར་ཕྱིན་ཏེ་ཤྭ་བ་བཤས། ཤ་བཙོས། ཚ་འབོག་བརྒྱབ། ཕྱི་ལོར་ཡང་དེ་གཉིས་རྔོན་བྱེད་པར་འོངས་པས་སྔར་གྱི་ས་དེར་ཡང་ཤྭ་བ་ཡོད་པས་བསད། དེར་བལྟ་རུ་ཕྱིན་པས་མདའ་ཟུག་ལུགས་མི་འདྲ་བས་བསད་པ་དང༌། སྔ་ལོར་ནས་ཀྱི་ས་བོན་འཐོར་བ་རྣམས་ཕུན་སུམ་ཚོགས་པ་སྐྱེས་ལུགས་དང༌། ས་ལ་བཀྲ་ཤིས་པའི་མཚོན་བྱེད་ཀྱང་ཚང་བ་བཅས་ལ་བརྟེན་ནས་བུ་སྤུན་གཉིས་དེར་འཚོ་བ་རོལ་ནས་གཏན་སྡོད་བྱེད་པར་གྲོས་མཐུན་བྱུང་སྟེ། དེ་དག་གིས་ཞབས་ཚང་དང་གོང་ཚང་གཉིས་ཆགས་པ་སོགས་རིམ་གྱིས་ཉ་ཁྲི་གྲོང་འདི་བྱུང༌། དེ་ནི་སྟོང་འཁོར་ཡུལ་དུ་མི་གྲོང་བྱུང་བའི་ཐོག་མ་ཡིན་ནོ། །ཉ་ཁྲི་ཞེས་གྲགས་པ་ནི་ས་ལ་བཀྲ་ཤིས་རྟགས་བརྒྱད་ཀྱི་མཚོན་བྱེད་ཚང་བའི་གསེར་ཉའི་སྟེང་ཆགས་པས་དེ་ལྟར་གྲགས། དེ་ནི་སྟོང་འཁོར་གྱི་ས་ཆ་ལ་སྟོད་སྨད་བར་གསུམ་དུ་ཕྱེ་བའི་བར་གྱི་ཆར་གཏོགས། དེ་ནས་བཟུང་སྟོད་སྨད་ཀྱི་མི་གྲོང་རྣམས་རིམ་གྱིས་འཕེལ། འདི་དག་ནི་ཡུལ་དེར་བལྟམས་པའི་མཁས་དབང་བློ་བཟང་ཕུན་ཚོགས་སམ་ཡོངས་འཛིན་ལམ་བསྟན་སོགས་ཀྱི་གསུང་རྒྱུན་ལ་གྲགས་པ་དང༌། ཕྱོགས་འདིའི་ཆོས་འབྱུང་དང་ཡང་མཐུན་ནོ། །དེ་དག་ལ་བསམ་གཞིགས་བྱས་པར་བརྟེན་སྟོང་འཁོར་ཞེས་པའི་རྗེས་གྲུབ་ཀྱིས་མིང་ཞིག་བྱུང་བ་ཡིན་ནམ་སྙམ། འོན་ཀྱང་ད་ལྟར། སྟོང་འཁོར། སྟོང་སྐོར། སྟོང་བསྐོར་ཞེས་མིང་འབྲི་ཚུལ་མི་འདྲ་བ་གསུམ་ཙམ་སྣང༌། དེང་སང་ཁ་ཅིག་དེ་དག་ལ་དགག་སྒྲུབ་བྱེད་པར་སྣང་ཡང་། དེ་དག་ལ་གཅིག་འཐད་གཅིག་མི་འཐད་ཀྱི་དགག་སྒྲུབ་བྱེད་པ་མི་རུང་སྟེ། ཤེས་བྱ་གཅིག་ལ་མིང་དུ་མས་བརྗོད་རུང་བ་དང་། དཔེར་ན་ཉི་མ་དང་ཟླ་བ་རེ་རེ་ལ་མངོན་བརྗོད་ཀྱི་མིང་དུ་མས་བརྗོད་རུང་བ་ལྟ་བུ་ཡིན་པས་སོ། མི་མེད་ལུང་སྟོང་དུ་པདྨོར་བུང་བའི་ཚོགས་འདུས་པ་བཞིན་ཕྱོགས་ཕྱོགས་ནས་མང་དུ་འཁོར་ཡོང་བ་དེ་ལ་དགོངས་ནས་རྒྱལ་མཆོག་གསུམ་པ། རྒྱལ་མཆོག་ལྔ་པ་ཆེན་པོ། ཀློང་རྡོལ་ངག་དབང་བློ་བཟང༌། སྡེ་སྲིད་སངས་རྒྱས་རྒྱ་མཚོ། ཐུའུ་བཀྭན་ཆོས་ཀྱི་ཉི་མ། དུང་དཀར་བློ་བཟང་འཕྲིན་ལས། ཞབས་དྲུང་མང་ཆེ་བ། མཁན་ཟུར་བློ་བཟང་ཆོས་གྲགས། མཁན་ཟུར་བློ་བཟང་འཇམ་དཔལ་སོགས་ཀྱིས་གསུང་འབུམ་ཕྱག་བྲིས་རྣམས་སུ་སྟོང་འཁོར་ཞེས་བྲིས་པ་མང་བས། ཕྲན་རང་གིས་རྨོངས་འཆར་ལ་དེ་འགངས་ཆེ་སྙམ་ནས་འདིར་ཡང་དེ་བཞིན་བྲིས་ཡོད། ཡུལ་སྡེ་མང་བའི་ཆ་ནས་སྟོང་སྡེ་ཞེས་པའི་ཚབ་ལ་བསམས་ནས་སྟོང་སྐོར་ཞེས་འབྲི་བ་ཡིན་སྙམ། ཞབས་དྲུང་དྲུག་པའི་གསུང་འབུམ་གྱི་མཛད་བྱང་དང་། བྲག་དཀར་པཎྜི་ཏའི་གསུང་འབུམ་ནང་དུ་སྟོང་བསྐོར་ཞེས་རེ་འགར་འབྱུང་བ་ནི། མཐའ་ནས་ཡུལ་སྡེ་མང་པོས་བསྐོར་བའི་ཆ་ནས་ཡིན་ནམ་སྙམ། དེ་དག་ནི་དཔྱད་གཞི་ཙམ་མོ།།
གནའ་དུས་ཐོག་མར་ཁུ་རི་ཆུ་དང་སེ་མདའ་གཉིས་བར་གྲོང་ཚོ་སུམ་ཅུ་སོ་བདུན་ཙམ་གོ་ཚོད་ལ་ཡོད་ཀྱང་། ད་ལྟར་འཕོ་འགྱུར་བྱུང་སྟེ་ཉེར་དྲུག་ཙམ་ལས་ལྷག་མེད། ཞབས་དྲུང་གཉིས་པ་སྐུ་བལྟམས་ས་ཝ་ཏི་འབུར། གསུམ་པའི་སྐུ་རྒྱབ་ཀྱི་ཁྱིམ་གཞིས་སྟག་བཟང་འབུར། མཁན་རབས་དང་པོ་གྲུབ་པའི་དབང་ཕྱུག་བློ་བཟང་ཚུལ་ཁྲིམས་འཁྲུངས་ཡུལ་དྲི་རོ་མདའ། བེ་རི་རྒྱལ་པོ་ལ་དམག་དྲངས་སྐབས་གུ་ཤྲཱི་ཧན་བསྟན་འཛིན་ཆོས་རྒྱལ་ཞག་བཞུགས་གནང་མྱོང་ཟེར་ས་ཟུར་སྒང༌། ཙོ། གླ། ད་ཉི། རྦག བེ་དེ། ཆུ་སྔོན་འབུར། རྦ་ལ་ཕུག་ཟེར་བ་རྣམས་གྲོང་ཤུལ་ཙམ་དང་མིང་ཙམ་ལ་ཐུག འདིའི་ནང་གི་སྟག་བཟང་འབུར་ཟེར་བ་དེ་ཁྱིམ་གཞིས་གཅིག་ཁོ་ན་ལས་མེད་པ་རྒྱལ་བ་རྒྱ་མཚོའི་སྐུ་རྒྱབ་ཚང་ཡིན་པས་དང་པོར་ཏྲེ་ཤོད་སྟག་བཟང་ནས་འདིར་སྤོས། རྗེས་སུ་ཀ་སྐོར་གྲོང་དུ་ཡར་སྤོས་ཟེར། མི་གྲོང་གི་གྲངས་ཀ་སོ་བདུན་ནས་ཉེར་དྲུག་ཏུ་མར་ལྷུང་བ་འདི་ལ་དཔྱད་ཚེ་གྲོང་རྡལ་གཅིག་ནས་གཅིག་ཏུ་གནས་སྤོ་བྱེད་པ་རེ་ཟུང་ཡོད་ཀྱང་། དོན་དངོས་ལ་མི་འབོར་ཇེ་ཉུང་ལ་འགྲོ་བཞིན་པའི་འཕོ་འགྱུར་ཞིག་ཡིན་པ་མངོན་གསལ་རེད། ཡུལ་འདིའི་མི་གྲོང་ཇེ་ཉུང་ལ་སོང་བ་འདི་དང༌། ཕ་མའི་བུ་ཕྲུག་ཀྱང་སྔར་ལས་ཇེ་ཉུང་ལ་འགྲོ་ཡོད་པ་དག་ལ་བསམས་ཚེ་ད་གཟོད་གཞི་ནས་༸གོང་ས་མཆོག་གིས་བཀའ་སློབ་ཅིག་ཏུ་སྔོན་བོད་མི་ས་ཡ་དྲུག་ཟེར་ཡང་ད་ལྟར་གྲངས་ཀ་དེར་མ་སླེབས་པ་དང༌། སྔོན་འབྲོམ་སྟོན་པས་མི་བརྩིས་ཆེན་པོ་མཛད་ཚེ་ལས་ཀྱང་ད་ལྟར་ལྡབ་འགྱུར་དུ་ཉུང་བར་གསུངས་པ་འདི་དག་ལས་ངེས་པ་གཏིང་ནས་རྙེད་ཐུབ། འདི་ཡང་གངས་ཅན་བོད་མིའི་ཉེན་ཁ་ཞིག་ཏུ་ངོས་འཛིན་བྱེད་དགོས་གསུངས།
བོད་ཡུལ་སྤྱི་ལ་ཡང་ནང་ཆོས་མ་དར་སྔོན་དུ་བོན་ཆོས་དར་ཁྱབ་ཆེན་པོ་བྱུང་ཡོད་པ་བཞིན། ཡུལ་འདིར་ཡང་རྗེ་ཟླ་བ་རྒྱལ་མཚན་གྱིས་ཞྭ་སེར་ལུགས་བཟང་མ་བཙུགས་གོང་དུ་གཤེན་རབ་མི་བོ་ཆེའི་ལུགས་སྲོལ་བོན་ཆོས་དར་ཁྱབ་ཆེན་པོ་བྱུང་ཡོད་དེ། སྒང་བཞི་གཤོང་བརྒྱད་ལ་བོན་དགོན་རེ་ཁྱོན་བཅུ་གཉིས་ཡོད་པ་ཀུན་ལ་རླུང་ལྟར་གྲགས་པར་མ་ཟད་ཡིག་རྙིང་ལ་ཡང་སྣང་བ་དང༌། དེ་སོ་སོའི་ཤུལ་ཡང་འགའ་ཞིག་ངོས་འཛིན་དུ་ཡོད། བོན་ཁང་སྒང་ཚང་གི་ཤུལ་ནི་ད་ལྟར་ཡང་མིང་མ་ཡལ་བར་དུར་ཁྲོད་དུ་གྱུར་ནས་ཡོད། དེ་མིན་རྣམས་ཀྱི་ཤུལ་ཡང་བོན་པོ་ཁྲ་ལེ། འབྲུ་ཡག་དགོན་པ་ནང༌། མཁར་སྲུང་ཕ་ར་དགོན། ཞབས་རྡོ་གླུ་ཡི་སྒང༌། སྒོ་མང་ཁང་བརྩེགས་ཐོག་རྣམས་ཡིན་ཞེས་ད་ལྟར་ཡང་ཟེར་སྲོལ་འདུག་པས་སོ། །ཟེར་སྒྲོས་ལ་བོན་ཁང་སྒང་ཚང་གིས་དུང་བརྡ་གཏོང་ཚེ་ཐམས་ཅད་ཀྱིས་དུང་བརྡ་བཏང་བ་གཅིག་ནས་གཅིག་ཏུ་རིམ་བཞིན་གོ་བས་ཚོགས་ཚོད་གཅིག་ལྟ་བུར་བྱེད་དགོས་པ་དང༌། འདིར་བོན་དགོན་ཡོངས་ཀྱི་སྤྱི་དཔོན་ནམ་གཙོ་བོ་ལྟ་བུ་བོན་ཁང་སྒང་ཚང་ཡིན་པ་དང་། དེའི་ཡུལ་བ་ལྟ་བུ་གླུ་མདའི་གྲོང་འདི་ཡིན་ཟེར།
བོན་ལ་བོན་དཀར་དང་བོན་ནག་མང་དུ་ཡོད་པ་ཟེར་སྲོལ་འདུག་པའི་ནང་ནས་འདིར་ཡོད་པ་ནི། བོན་དཀར་ཟེར་བ་དེ་ཡིན་སྙམ། གང་ཡིན་ཞེ་ན། འདིའི་སློབ་དཔོན་གྱིས་ཤཱཀྱའི་དགེ་སློང་རྗེ་ཟླ་བ་རྒྱལ་མཚན་དང་པོར་བལྟམས་ཚེ་བདག་ཉིད་ཆེན་པོ་ཞིག་ཏུ་འགྱུར་བའི་ལུང་བསྟན་ཁྱད་པར་ཅན་གནང་ལུགས་དང༌། ཐ་མར་བསྐྱེད་བསྲིངས་ནས་དབེན་གནས་བཏབ་སྐབས་གུས་བཀུར་ཆེན་པོས་གནས་གཡར་བྱེད་ལུགས་དག་ལ་བརྟེན་ནས་སོ། །དེ་ལྟར་ཆོས་ལུགས་ཇི་བཞིན་མ་བྱུང་བའི་དབང་གིས་མི་རྣམས་ཀྱང་ཕན་ཚུན་འཚེ་བའི་སྤྱོད་པ་ཅན་ཤ་སྟག་ཡིན་སྙམ། གང་ཞེ་ན། གནའ་ཤུལ་གྱི་གྲོང་ཚོ་རྣམས་ཆུ་ལམ་སོགས་ཀྱི་ཆ་རྐྱེན་ལ་མ་གཞིགས་པར་རི་ཟུར་དང་རི་འབུར་སོགས་མཐོ་སྒང་ཁོ་ན་ལ་ཆགས་ཚུལ་ལ་བསམ་གཞིགས་བྱས་ན་དགྲ་ཇག་ལ་དོགས་ཟོན་གྱི་བྱ་བ་ཞིག་ཡིན་པར་གོར་མ་ཆག་གོ །དེ་ལྟར་བོན་ཆོས་དར་ནས་ཡུན་རིང་དུ་སོང་མཚམས་དུས་རབས་བཅོ་ལྔ་པའི་སྨད་ཙམ་ལ་ཞྭ་སེར་ལུགས་བཟང་འཛུགས་པའི་དུས་ལ་བབ་པ་ན། རྗེ་ཟླ་བ་རྒྱལ་མཚན་གྱིས་བོན་གྱི་སློབ་དཔོན་ལ་གནས་གཡར་ཞུས་ཚེ་མ་བསྒྲིགས་ལྷུན་འགྲུབ་ཀྱི་རྟེན་འབྲེལ་ཞིག་རང་འགྲིག་བྱུང་བ་ནས་རིམ་བཞིན་སྟོང་འཁོར་དགོན་འདི་ཕྱག་བཏབ། སྟོང་འཁོར་ཞབས་དྲུང་སྐུ་ཕྲེང་བཞི་པ་མདོ་རྒྱུད་རྒྱ་མཚོས་ལྷ་འབངས་རྒྱ་བསྐྱེད་མཛད་པ་ནས་བཟུང་རིམ་གྱིས་ཁམས་སྟོང་འཁོར་དང་ཟི་ལིང་སྟོང་འཁོར་ཏེ་སྟོང་འཁོར་ཕན་ཚུན་གཉིས་དང་ཁམས་སྟོང་འཁོར་ལ་ཡུལ་དགོན་སྡེ་བདུན་ཞེས་ཆགས་ཡོད་ལ། དེ་ཡང་སྟོང་འཁོར་དགོན་ཕྱག་བཏབ་ཚུལ་གོང་དུ་བཀོད་ཟིན།
སྟོང་འཁོར་ཞབས་དྲུང་སྐུ་ཕྲེང་བཞི་པ་གྲོང་འཇུག་མདོ་རྒྱུད་རྒྱ་མཚོས་ལྷ་འབངས་རྒྱ་བསྐྱེད་མཛད་ཚུལ་ནི། མདོ་སྨད་ཆོས་འབྱུང་ལྡེབ་གྲངས་ ༡༨༣ ལ། ཟླ་བ་རྒྱལ་མཚན་གྱིས་བྱང་ཕྱོགས་སུ་འབྲོག་སྡེ་ཆེན་པོ་ཞིག་འབྱུང༌། དེ་ངའི་གདུལ་བྱར་འགྱུར་ཞེས་ལུང་བསྟན་ཡོད་པ་ལྟར། ཞབས་དྲུང་དང་པོ་ནས་ལྔ་པའི་བར་སྐུ་ན་རིམ་རྣམས་ཁམས་ཕྱོགས་རྐྱང་པ་མ་ཡིན་པར་ཨ་མདོ་ཕྱོགས་སུའང་མཛད་འཕྲིན་ཧ་ཅང་རྒྱས་པ་དང༌། ཁྱད་པར་མདོ་རྒྱུད་རྒྱ་མཚོ་ལ་གུ་ཤྲཱི་ཧན་གྱིས་མདོ་མཁར་ས་ཆ་གནང་ནས་དགོན་པ་འདེབས་བཅུག་པ་དང༌། མཆོད་གཞིས་མང་པོ་ཕུལ་བ་ལ་བརྟེན་ཞབས་དྲུང་གི་ལྷ་སྡེ་རྒྱ་བསྐྱེད་བྱུང་སྟེ། ཁམས་སྟོང་འཁོར་དང་ཟི་ལིང་སྟོང་འཁོར་ཞེས་པ་གཉིས་སུ་བྱུང་བ་ནི་མདོ་སྨད་ཆོས་འབྱུང་ལྡེབ་གྲངས་ ༡༨༦ ལ་གསལ་བ་དང༌། ཁམས་སྟོང་འཁོར་ལ་ཡང་སྟོང་འཁོར་ཡུལ་དགོན་སྡེ་བདུན་ཞེས་བྱུང་བ་ཞབས་དྲུང་རྒྱལ་བ་རྒྱ་མཚོས་མ་འོངས་མཁྱེན་པའི་ལུང་བསྟན་ལས་ཤེས་སོ།།
སྡེ་བདུན་ནི། མ་དགོན་སྟོང་འཁོར་བཀྲ་ཤིས་ལྷུན་པོ་འམ་གསང་ཆེན་རྡོ་རྗེ་གླིང་། བུ་དགོན་ལ་ལུ་གུ་དགོན་ཆོས་སྡེ་བཀྲ་ཤིས་འཁྱིལ། སྙི་བཀྲ་ཤིས་དར་རྒྱས་གླིང༌། ཟིལ་གནོན་བཀྲ་ཤིས་ཆོས་འཁོར་གླིང༌། གཞི་ཆེན་མཁར་དམར་གསང་སྔགས་བསྟན་རྒྱས་གླིང་བཅས་བཞི་དང་། དེ་དག་གི་ལྷ་སྡེ་ནི་ཟླ་ཆུའི་རྒྱུད་དུ་ཆགས་པའི་སྟོང་འཁོར་ཟླ་ཁོག་དང་། སྙི་ཆུའི་རྒྱུད་དུ་ཆགས་པའི་སྟོང་འཁོར་སྙི་ཁོག་གཉིས་ཏེ་དགོན་པ་ལྔ་དང་ཡུལ་བ་གཉིས་བཅས་བདུན་པོ་དེ་ཡིན། འདི་ལ་ཉི་ཁོག་ཅེས་འབྲི་བའང་ཡོད། དུས་འགྱུར་སྔོན་ལ་སྟོང་འཁོར་རྒྱལ་ཚབ་སྟེ་སྟོང་འཁོར་ཚང་གི་སྐུ་ཚབ་ཀྱང་དེར་ཕེབས་སྲོལ་ཡོད། ད་ལྟའི་ཆར་སྟོང་འཁོར་ཟླ་ཁོག་ལ་གྲོང་ཚོ་ཉེར་དྲུག་སྟེ། གཟིག་གདོང༌གྲོང་སྡེ། ལམ་གོང་འབུར་གྲོང་སྡེ། ཀ་སྐོར་གྲོང་སྡེ། མཁར་སྲུང༌གྲོང་སྡེ། འབུམ་མདོ་གྲོང་སྡེ། རྦ་ལ་མདའ་གྲོང་སྡེ། གསུམ་རིས་གྲོང་སྡེ། འབྲུ་ཡག་གྲོང་སྡེ། བསྭོ་ཐོག་མདའ་གྲོང་སྡེ། གུག་ར་གྲོང་སྡེ། གླུ་མདའ་གྲོང་སྡེ། ཐ་ཐོག་གྲོང་སྡེ། ཙེ་ངོས་གྲོང་སྡེ། ལ་མཐོ་གྲོང་སྡེ། མྱང་རི་གྲོང་སྡེ། སྒོ་མང་གྲོང་སྡེ། འོག་ཟླ་གྲོང་སྡེ། རྡོ་དོ་གྲོང་སྡེ། སེ་མདའ་གྲོང་སྡེ། བྱི་རི་མདའ་གྲོང་སྡེ། ཞབས་རྡོ་གྲོང་སྡེ། རྦ་མདའ་གྲོང་སྡེ། ཙེ་ར་གྲོང་སྡེ། ཉ་ཁྲི་གྲོང་སྡེ། རྨོག་རི་གྲོང་སྡེ། བུད་ཐོག་ཐང་བཅས་ཡིན།
སྟོང་འཁོར་སྙི་ཁོག་ལ་གྲོང་ཚོ་ཉེར་དགུ་ཙམ་ཡོད། དེ་དག་ནི། ཟོ་གྲོང་སྡེ། ཡ་སྐ་གྲོང་སྡེ། གྲ་མདའ་གྲོང་སྡེ། ཝེ་ཝན་གྲོང་སྡེ། དགུ་རྫོབ་གྲོང་སྡེ། བྲག་ལུང་ཡ་གྲོང་། བྲག་ལུང་གྲོང་སྡེ། ཡུལ་ཆུང་གྲོང་སྡེ། ཡུལ་ཆེན་གྲོང་སྡེ། ཟིལ་མདའ་གྲོང་སྡེ། འུག་ཚང་གྲོང་སྡེ། སྲུབ་ཆེན་གྲོང་སྡེ། མ་ལེ་ཤིང་གྲོང་སྡེ། ཆུ་བཟང་གྲོང་སྡེ། ཕོ་མདའ་གྲོང་སྡེ། འཁྲེབ་གྲོང་སྡེ། གཞི་ཆེན་མདའ་གྲོང་སྡེ། བུ་རི་སྡེ་མཚོ་གྲོང་སྡེ། ཥུ་རྒྱ་གྲོང་སྡེ། མི་ཡས་གྲོང་སྡེ། བྲག་སྒང་གྲོང་སྡེ། དགའ་སྟེང་གྲོང་སྡེ། མདོ་བཞིར་གྲོང་སྡེ། བསུ་རི་གྲོང་སྡེ། མཚོ་འགོ་གྲོང་སྡེ། མི་སྟེང་གྲོང་སྡེ། པང་ཟུར་གྲོང་སྡེ། རྒྱུ་སྡུབ་གྲོང་སྡེ། རྒྱ་མདའ་གྲོང་སྡེ་བཅས་ཡིན། གྲོང་སྡེ་དེ་དག་གི་མིང་ཙམ་ལས་བྱུང་རབས་ལོ་རྒྱུས་སོགས་འདྲི་རྩད་བྱས་ཀྱང་རྙེད་སོན་མ་བྱུང་བས་རེ་ཞིག་བཞག །མ་དགོན་སྟོང་འཁོར་དགོན་གྱི་ལོ་རྒྱུས་ནི་གོང་དུ་སོང་ཟིན། འདིར་བུ་དགོན་རྣམས་ཀྱི་ལོ་རྒྱུས་མདོ་ཙམ་བརྗོད་ན།
ལུ་གུ་དགོན།
ལུ་གུ་ཆོས་སྡེ་བཀྲ་ཤིས་འཁྱིལ་ནི་དང་པོ་བདག་པོ་བྱེད་མཁན་གྱི་ཐོག་མའི་བླ་རབས་ཤིག་གི་མིང་ལ་བོན་པོ་རཏྣའི་མཚན་ཅན་ཞེས་ཡིག་རྙིང་ལས་བྱུང་ཡང་ཕྱག་འདེབས་པ་པོ་ཡིན་མིན་བཤད་སྲོལ་གཉིས་མཆིས། མིན་པའི་ལུགས་ལའང་དེ་མ་ཡིན་པར་འདི་ཡིན་ཟེར་བ་མི་སྣང༌། བོན་པོ་རཏྣའི་མཚན་ཅན་ཁོང་ཡང་དང་པོར་བོན་ཆོས་དང་དེ་ནས་རྙིང་ཆོས་སློབ་མཁན་ཞིག་ཡིན་པའི་ངག་རྒྱུན་ལ་དཔྱད་ན། དགོན་འདི་ཡང་དང་པོར་བོན་དགོན་ཞིག་དང་དེ་ནས་རྙིང་དགོན་ཞིག་ཏུ་གྱུར་པ་ཨེ་ཡིན་སྙམ།
སྟོང་འཁོར་ཞབས་དྲུང་སྐུ་ཕྲེང་གསུམ་པ་རྒྱལ་བ་རྒྱ་མཚོའི་ལུང་བསྟན་ལྟར། སྐུ་ཕྲེང་བཞི་པ་མདོ་རྒྱུད་རྒྱ་མཚོ་དང་དཔོན་པོ་ཧ་ར་དཀའ་བཅུ་གཉིས་ཀྱི་སྐུ་རིང་སྟོང་འཁོར་གྱི་ས་ཆ་དང་སྡེ་འབངས་རྒྱ་བསྐྱེད་བྱུང་ནས་ཟླ་སྙི་གཉིས་ལ་མངའ་དབང་བསྒྱུར་སྐབས་འདི་ཡང་ཞབས་དྲུང་གི་མངའ་འོག་ཏུ་ཚུད། འོན་ཀྱང་ད་དུང་འདིར་གྲྭ་བཙུན་འདྲེས་མ་སྡོད་པ་སོགས་ཀྱིས་རྐྱེན་པས་བསྟན་པ་ཉམས་དམས་ནས་ཡོད་ཚེ་སྟོང་འཁོར་ཞབས་དྲུང་ལྔ་པ་ངག་དབང་བསོད་ནམས་རྒྱ་མཚོས་དགེ་ལྡན་པར་བསྒྱུར་བ་དང༌། སྒྲིགས་ཁྲིམས་ལ་དམ་བསྒྲགས་དང་བཅའ་ཡིག་འཇོག་པར་མཛད། ཞབས་དྲུང་དྲུག་པ་འཇམ་དཔལ་དགེ་འདུན་རྒྱ་མཚོས་སྟོང་འཁོར་དགོན་ཆེན་དུ་ཆོས་གྲྭའམ་མཚན་ཉིད་གྲྭ་ཚང་གསར་དུ་བཙུགས་པ་དེ་ནས་བཟུང་མི་དྲུག་རེ་སྟོང་འཁོར་དགོན་དུ་གྲྭ་སར་ཕེབས་དགོས་པའི་སྲོལ་བྱུང་། དེའི་ཁུངས་འདྲ་བར་ཆོས་གྲྭ་འདེབས་སྐབས་དཔེ་ཆ་བ་རེ་ལ་ཤོག་ཀ་ལི་རེ་ཕུལ་བས་ལུ་གུ་དགོན་གྱི་གྲྭ་པ་རྣམས་ལ་ད་ལྟར་ཡང་ཡོད་ཟེར། མ་ཟད་སྟོང་འཁོར་དགོན་ནས་སེར་སྨད་གྲྭ་ཚང་དུ་གྲྭ་སར་ཕེབས་སྲོལ་ཡོད་པ་བཞིན། དགོན་འདི་ནས་ཀྱང་སེར་སྨད་གྲྭ་ཚང་དུ་ཆོས་ཞུགས་ཀྱི་རབས་འབྱམས་པ་སོགས་ཀྱི་མཚན་གནས་བཞེས་མཁན་ཡང་མི་ཉུང་བ་ཞིག་བྱུང་ཡོད་ལ། དགོན་འདིའི་སྲུང་མ་ནི་སེར་སྨད་གྲྭ་ཚང་ནས་བརྒྱུད་པའི་ཐ་འོག་ཆོས་རྒྱལ་ཆེན་མོ་ཡིན། ཞབས་དྲུང་ལྔ་པའི་སྐབས་ནས་ད་བར་ཞབས་དྲུང་རིམ་བྱོན་དང་ཆོས་དང་ཟང་ཟིང་གི་འབྲེལ་བ་དམ་ཟབ་ཆགས་ཡོད། ནགས་གཙང་བསྟན་པ་རབ་རྒྱས་དགོན་འདིར་ཕེབས་ནས་དུས་འཁོར་གྱི་དབང་བསྐུར་བའི་དབང་ཡོན་གྱིས་ཚོགས་ཆེན་འདུ་ཁང་རྒྱ་བསྐྱེད། དུས་འགྱུར་མ་བྱུང་སྔོན་ལ་དབུ་ཆོས་རྣམ་གསུམ་སྟོང་འཁོར་ཞབས་དྲུང་གིས་བསྐོ་བཞག་མཛད་སྲོལ་ཡོད་པར་མ་ཟད། དགོན་བདག་ཀྱང་སྟོང་འཁོར་ཞབས་དྲུང་སྐུ་ཕྲེང་རིམ་བྱོན་རྣམས་ཡིན། འདིའི་གདུལ་བྱའི་ཞིང་ཡུལ་ལམ་ལྷ་སྡེ་ལ་སྟོད་སྲིབ་རི་གྲོང་གསུམ་སྟེ། སེ་མདའ་དང་། རྡོ་དོ། ཟུར་སྒང་བཅས་ཀྱི་གྲོང་ཚོ་གསུམ་ཡོད་དོ།།
སྙི་བཀྲ་ཤིས་དར་རྒྱས་གླིང་།
སྙི་བཀྲ་ཤིས་དར་རྒྱས་གླིང་ནི། སྟོང་འཁོར་ཞབས་དྲུང་སྐུ་ཕྲེང་བཞི་པ་མདོ་རྒྱུད་རྒྱ་མཚོས་དུས་རབས་བཅུ་བདུན་པའི་ནང་ཕྱག་བཏབ། དེ་ཡང་ཐོག་མར་ཞབས་དྲུང་རིན་པོ་ཆེ་དེ་ཉིད་ཀྱིས་མགོན་པོ་ཕྱག་དྲུག་པ་བསྒྲུབས་པའི་སྤྱིལ་བུ་ཞིག་ཡོད་པའི་ཤུལ་དུ་མགོན་ཁང་ཞིག་བཞེངས། ཁ་རྒྱུན་དུ་སྒྲུབ་སྒྲུབ་བསྟེན་བསྟེན་གྱི་སྲུང་མ་མྱུར་མཛད་ཡེ་ཤེས་ཀྱི་མགོན་པོ་དང་། མ་བསྒྲུབས་རང་འཁོར་གྱི་སྲུང་མ་དཔལ་ལྡན་དམག་ཟོར་མ་ཞེས་ཡོད་པ་ལྟར་དགོན་འདིའི་སྲུང་མ་ནི། མྱུར་མཛད་ཡེ་ཤེས་ཀྱི་མགོན་པོ་དང་། དཔལ་ལྡན་དམག་ཟོར་གྱི་རྒྱལ་མོ་ཡིན། མགོན་ཁང་གི་ཕྱི་ལོགས་སུ་གཙུག་ལག་ཁང་དང་། འདུ་ཁང་ཆེན་མོ། ཇོ་ཁང་། ཆོས་གྲྭ་དང་བླ་མའི་གཟིམས་ཤག་བཅས་ལེགས་པར་བཞེངས། སྟོང་འཁོར་ཞབས་དྲུང་སྐུ་ཕྲེང་བདུན་པ་བློ་བཟང་མདོ་རྒྱུད་ཡེ་ཤེས་བསྟན་པའི་རྒྱལ་མཚན་གྱིས་ཆོས་གྲྭའམ་མཚན་ཉིད་གསར་འཛུགས་མཛད།
དགོན་འདི་ཧོར་ཆོས་རྗེ་ངག་དབང་ཕུན་ཚོགས་ཀྱིས་ཕྱག་བཏབ་པ་མིན་ཡང༌། ཆོས་འབྱུང་ལོ་རྒྱུས་འགའ་རེར་དགོན་འདི་ཧོར་དགོན་སྡེ་བཅུ་གསུམ་གྱི་གྲས་སུ་བགྲང་བ་ཡོད་པ་ནི། ཆོས་རྗེ་འདི་གཉིས་རྒྱལ་མཆོག་ལྔ་པའི་དངོས་སློབ་ཡིན་སྟབས། ཞབས་དྲུང་གིས་ཧོར་ཆོས་རྗེ་ལ་ཕུལ་བས་དེའི་གྲས་སུ་རྩིས་པར་གྲགས།
དགོན་འདིའི་བདག་པོ་ནི་སྟོང་འཁོར་ཞབས་དྲུང་སྐུ་ཕྲེང་རིམ་བྱོན་ཡིན་ལ། དུས་འགྱུར་སྔོན་དུ་དགོན་འདིའི་ལས་སྣེ་རྣམས་སྟོང་འཁོར་ཚང་གིས་བསྐོ་བཞག་མཛད་སྲོལ་ཡོད་ཅིང་། ཞབས་དྲུང་བཅུ་གཅིག་པའི་སྐུ་རིང་ལའང་དགོན་འདིའི་མཁན་པོ་ཁོང་ཉིད་ཀྱིས་བསྐོ་བཞག་མཛད་བཞིན་ཡོད། སྨོན་ལམ་སྐབས་སྐྱེས་རབས་སོ་བཞི་པའི་བཀའ་ཆོས་དང་། སྒྲུབ་མཆོད་སྐབས་རྡོ་རྗེ་སློབ་དཔོན། ཆོས་གྲྭར་འཛིན་གྲྭ་སོ་སོར་བརྩི་བཞག གསོ་སྦྱོང་སྐབས་སོ་ཐར་གྱི་མདོ་གསུང་བ་སོགས་དགོན་པའི་ཆོས་ཕྱོགས་ཀྱི་མཛད་སྒོ་རྣམས་མཁན་པོས་སྐྱོང་དགོས། དེ་ཡང་མཁན་པོའི་འོས་ཆོས་ནི། བཀའ་པོད་ལྔ་གའི་རང་ལུགས་ཚང་མ་བློ་རྒྱུགས་དང་དམ་བཅའ་རྫོགས་པ། འཇིགས་བྱེད་བསྙེན་ཆེན་ལ་བཞུགས་པ། གཅོད་ཀྱི་སྒོ་ནས་ཆུ་མིག་བརྒྱ་རྩ་འགྲིམས་པ། འཕོ་བ་སྦྱངས་པ་སོགས་གྲུབ་པའི་རྗེས་སུ་མཁན་ཁྲིར་ཕེབས་ཆོག་པ་ཡིན།
སྔོན་དུས་སུ་དགོན་པ་འདིར་ཕྲ་ཡུལ་རིག་གྲོལ་རྒྱ་མཚོ་ཞུ་བའི་གྲགས་སྙན་འབར་བའི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ཞིག་བྱུང་། ཁོང་གིས་ནམ་མཁའ་ནས་ཐོག་རྒྱག་པ་སྐུ་གཟན་གྱིས་བཟུང་བ་དང་། རྡེའུ་བཅུད་ལེན་དང་། ས་བཅུད་ལེན། མེ་ཏོག་བཅུད་ལེན་སོགས་མང་དུ་མཛད། གཞན་ཡང་གཤིན་པོའི་རུས་པ་ལ་སཱ་ཙྪ་བཏབ་སྟེ་རབ་གནས་མཛད་སྐབས་ཤར་གྱི་རི་བོ་དང་ནུབ་ཀྱི་རི་བོའི་རྩེ་གཉིས་ནས་འཇའ་ཚོན་སྣ་ལྔ་ཤར་ཏེ་སྣེ་གཉིས་སཱ་ཙྪའི་སྟེང་ལ་ཟུག་པ་སོགས་ངོ་མཚར་བའི་རྣམ་ཐར་ཤིན་ཏུ་མང་། དེའི་གསུང་རྩོམ་ལ་སེང་གདོང་གཏོར་སྒྲུབ་པོད་གཅིག་དང་། ལྷ་མོའི་གཡང་སྒྲུབ། མགོན་དཀར་གཡང་སྒྲུབ། ལྕམ་སྲིང་སྒྲུབ་ཐབས་དང་དེའི་གཡང་སྒྲུབ། མི་འཁྲུགས་པའི་ཆོ་ག་ལྷ་སྒོ་མ། གཅོད་སྐོར་གྱི་གསུང་པོད་གཅིག མཁའ་འགྲོའི་བརྡ་ཡིག་གི་ཆོས་སྐོར་པོད་བཅུ་ཕྲག་འགའ། རྒྱལ་པོ་སྐུ་ལྔའི་གཡང་སྒྲུབ། ཚེ་སྒྲུབ་ཆོ་ག་སོགས་ཤིན་ཏུ་མང་པོ་ཡོད།
ནང་རྟེན་ལ། སྤྱི་ལོ་ ༡༦༦༥ ལོར་སྟོང་འཁོར་མདོ་རྒྱུད་རྒྱ་མཚོ་རྒྱ་ནག་གོང་མ་བདེ་སྐྱིད་རྒྱལ་པོའི་དབུ་བླར་ཕེབས་ཏེ་ལོ་ངོ་གཅིག་ཙམ་བཞུགས་ནས་ཕྱིར་འབྱོན་ཁར་ཆན་ཞི་མཉྫུ་ཤྲཱི་ཞེས་པའི་ཆོ་ལོ་དང་གསེར་གྱི་ཐམ་ཀ་དང་། ཙནྡན་ཇོ་བོའི་སྐུ་སོགས་རིན་ཐང་བྲལ་བའི་གནང་སྐྱེས་མང་དུ་ཕུལ་པ་དག་ལས་ཙནྡན་ཇོ་བོའི་སྐུ་དེ་དགོན་འདིའི་རྟེན་གྱི་གཙོ་བོར་བཞུགས། གཞན་ཡང་གསེར་སྐུ་དང་། ལི་སྐུ། ཞལ་ཐང་། བཀའ་བསྟན། ཤེར་ཕྱིན་འབུམ་པ་དངུལ་བྲིས་མ་གསུམ། རྗེ་ཡབ་སྲས་སོགས་ཀྱི་གསུང་འབུམ་དང་། སྟོང་འཁོར་ཞབས་དྲུང་གི་གསུང་འབུམ་སོགས་སྐུ་གསུང་ཐུགས་རྟེན་གྲངས་ལས་འདས་པ་བཞུགས།
ཙནྡན་ཇོ་བོར་གྲགས་པའི་ཐུབ་དབང་གི་སྐུ་འདི་ནི། སངས་རྒྱས་བཅོམ་ལྡན་འདས་དགུང་ལོ་སོ་བརྒྱད་པ་ལ་རང་གི་ཡུམ་སྒྱུ་མ་ལྷ་མཛེས་ཤི་འཕོས་ནས་སུམ་ཅུ་རྩ་གསུམ་དུ་སྐྱེས་པ་དེའི་དོན་མཛད་པ་དང་། གཞན་ཡང་སུམ་ཅུ་རྩ་གསུམ་གྱི་ལྷ་སྐལ་པ་དང་ལྡན་པ་རྣམས་རྗེས་སུ་བཟུང་བའི་ཆེད་དུ་ལྷ་ཡུལ་དུ་གཤེགས་སྐབས། རྒྱལ་པོ་ཨུ་ཏྲ་ཡ་ནས་སྟོན་པའི་ཞལ་མ་མཇལ་བར་ཡུན་རིང་སོང་བས་ཡིད་གདུངས་པས། སྟོན་པའི་སྐུ་ཚབ་ཏུ་ཙནྡན་གཽ་ཤིརྵ་ལས་སྟོན་པ་རང་དང་འདྲ་བའི་སྐུ་བརྙན་འདི་བཞེངས་པར་གྲགས་ལ། སྟོན་པ་ལྷ་ཡུལ་ནས་སླར་ཕེབས་ཏེ་སྐུ་དངོས་དང་མཇལ་སྐབས་སྐུ་འདིས་དབུ་གུག་གུག་ལན་གསུམ་གྱིས་སྐུ་ཁམས་འདྲི་བའི་ཚུལ་མཛད། སྟོན་པས་སྐུ་བརྙན་འདིའི་དབུ་ལ་ཕྱག་གཡས་པ་བརྐྱངས་ཏེ་བཞག་ནས་སངས་རྒྱས་དངོས་དང་འདྲ་བའི་བསྔགས་པ་མཛད་ཅིང་། ང་ནི་མྱ་ངན་འདས་འོག་ཏུ། །ལོ་ནི་བརྒྱ་ཕྲག་བཅུ་འདས་ནས། །ཤར་ཕྱོགས་ཙི་ནའི་ཡུལ་དུ་ཁྱོད། །བསྟན་དང་འགྲོ་ཕན་དོན་ལ་བཞུད། །ཅེས་ལུང་བསྟན་པ་ལྟར། རྒྱ་ནག་བྱང་ཕྱོགས་སུ་ཆིན་རྒྱལ་ཁབ་སྔོན་མས་སྲིད་དབང་བཟུང་བའི་སྐབས་ཀྱི་གོང་མ་གསུམ་པ་ཞོན་ཀྲའོ་རྟིས་ཧྥུ་ཅན་གྱིས་རྒྱ་གར་ནས་སྐུ་བརྙན་འདི་དང་སྟོན་པའི་རིང་བསྲེལ་ཤཱ་རི་རམ་ཆེ་བ་སོགས་རྒྱ་ནག་ཏུ་གདན་དྲངས་ཞེས་འཁོད་པའི་སྐུ་དེ་འདི་ཡིན་ཞེས་ཡུལ་འདིའི་རྒན་རབས་པ་དག་གི་ངག་རྒྱུན་ལ་རླུང་ལྟར་གྲགས། འདིའི་སྐོར་ཞིབ་པ་ལྕང་སྐྱ་རོལ་པའི་རྡོ་རྗེས་མཛད་པའི་ཙནྡན་ཇོ་བོའི་ལོ་རྒྱུས་དང་། དུང་དཀར་ཚིག་མཛོད་དང་། དུང་དཀར་གྲུབ་མཐའ་སོགས་ལ་གཟིགས།
རྒྱའི་གཞུང་འགྲེལ་ཡིག་ཆ་ཞིག་ཏུ་ཙནྡན་ཇོ་བོའི་སྐུ་འདི་དུས་འགྱུར་སྐབས་འཐོར་བཤིག་ཏུ་སོང་བས། ཕྱག་ཞབས་ཇོ་བོའི་གཟུངས་དང་། དབུ་ཐུབ་དབང་གི་གཟུངས་སུ་ཕུལ་ཚུལ་འཁོད་འདུག་ཀྱང་། གཟུངས་སུ་ཕུལ་ཟིན་པ་མི་བདེན་ཏེ། འཐོར་གྲུམ་རྣམས་དུས་འགྱུར་རྗེས་སུ་ཁང་གསར་ཚང་སོགས་ཀྱིས་དགོན་པར་ཕྱིར་ཕུལ་གནང་བ་ལྟར། སྟོང་འཁོར་ཟླ་ཁོག་ནས་ལྷ་བཟོ་བློ་བཟང་བསྟན་འཛིན་ལ་ཕྱེ་མར་བཏགས་པའི་རིན་པོ་ཆེ་སྣ་ལྔས་བཤིག་གསོ་བྱེད་དུ་བཅུག་ཡོད་ལ། དེང་བྱམས་ཁང་གི་རྟེན་གཙོར་བྱིན་རླབས་ཀྱི་གཟི་འོད་འཕྲོ་བཞིན་བཞུགས་པ་འདི་ཡིན།
དགོན་པ་འདིའི་སློབ་གཉེར་གནང་སའི་གཞུང་ནི། ཡོངས་སུ་གྲགས་པའི་ཡིག་ཆ་ཆེན་མོ་བཞིའི་ཡ་གྱལ་མཁས་གྲུབ་བསྟན་དར་བའི་གསུང་ཡིན། ལོ་རེར་སྨོན་ལམ་གྱི་སྐབས་སུ་སློབ་གཉེར་བ་རྣམས་ཀྱིས་སོ་སོའི་སྐབས་བབ་ཀྱི་གཞུང་གི་རྩོད་པའི་དམ་བཅའ་འཇོག་པ་དང་། བཀའ་པོད་ལྔའི་རང་ལུགས་བློ་རྒྱུགས་སྤྲོད་དགོས། དེ་ཡང་འཛིན་གྲྭ་དང་པོ་བསྡུས་ཆུང་ལོ་གསུམ། འཛིན་གྲྭ་གཉིས་པ་བསྡུས་ཆེན་ལོ་གསུམ། ཕར་ཕྱིན་སྐབས་དང་པོ་ལ་འཛིན་གྲྭ་གཉིས། སྐབས་གཉིས་པ་ནས་སྐབས་བཞི་པའི་བར་འཛིན་གྲྭ་གཉིས། སྐབས་ལྔ་པ་ནས་སྐབས་བརྒྱད་པའི་བར་འཛིན་གྲྭ་གཉིས། དབུ་མ་འཛིན་གྲྭ་གཅིག འདུལ་བ་འཛིན་གྲྭ་གཅིག མཛོད་འཛིན་གྲྭ་གཅིག་བཅས་འཛིན་གྲྭ་རེ་ལ་ལོ་གསུམ་རེ་བཞུགས་དགོས།
ཆོས་ཐོག་གི་སྐོར་ལ། བོད་ཟླ་དང་པོའི་ཚེས་གཅིག་ནས་བཅུ་བདུན་བར་སྨོན་ལམ་ཆེན་མོ། གཉིས་པའི་ཚེས་བཅུ་གསུམ་ནས་གསུམ་པའི་བཅུ་གསུམ་བར་དཔྱིད་ཆོས། བཞི་པའི་ཚེས་གཅིག་ནས་བཅོ་ལྔ་བར་ལམ་རིམ་ཚོགས་ལངས། ཚེས་བཅོ་ལྔ་ནས་ཉེར་དགུ་བར་འཇིགས་བྱེད་དང་གསང་འདུས་སྒྲུབ་མཆོད། དྲུག་པའི་ཚེས་བཅོ་ལྔ་ནས་བདུན་པའི་མཇུག་བར་དབྱར་གནས། བརྒྱད་པའི་ཚེས་ཉེར་བཞི་ནས་དགུ་པའི་བཅུ་གསུམ་བར་སྟོན་ཆོས། གཞན་ཡང་ལྷ་མོའི་གཏོར་སྒྲུབ། མགོན་པོའི་གཏོར་སྒྲུབ་བཅས་ཡོད། བཅུ་པའི་ཚེས་ཉེར་ལྔ་ནས་ཉེར་དགུ་བར་ལྔ་མཆོད་ཆེན་མོ། ད་དུང་སེང་གདོང་མའི་སྒྲུབ་མཆོད་གཏོར་བརྒྱག་བཅས་ཡོད། བཅུ་གཅིག་པའི་ཚེས་བཅོ་ལྔ་ནས་ཉེར་གཉིས་བར་ལྕགས་མཁར་བ་རྣམས་ལྕགས་མཁར་གྱི་སྔོན་འགྲོའི་བསྙེན་མཚམས་ལ་བཞུགས་དགོས། ཚེས་ཉེར་གཉིས་ནས་ཉེར་དགུ་བར་ལྕགས་མཁར་དངོས་གཞི། དེའི་རིང་རྟ་མགྲིན་གཏོར་སྒྲུབ་ཀྱང་ཡོད། བཅུ་གཉིས་པའི་ཚེས་བཅུ་ནས་ཉེར་ལྔ་བར་གར་འཆམ། ཚེས་ཉེར་ལྔ་ནས་ཉེར་དགུ་བར་དགུ་གཏོར་བཅས་ཡོད་དོ།།
འབོས་ཆེན་དང་གཞི་ཆེན་དགོན་གཉིས་ཀྱི་གདུལ་བྱར་གཏོགས་པ་རྣམས་ཕུད། དེ་མིན་སྟོད་གྲ་མདའ་ནས་སྨད་རྒྱ་མདའི་བར་གྱི་ཡུལ་སྡེ་རྣམས་དགོན་འདིའི་གདུལ་བྱའི་ཞིང་ཡུལ་ལམ་ལྷ་སྡེ་ཡིན།
ཟིལ་གནོན་འབོས་ཆེན་དགོན།
ཟིལ་གནོན་བཀྲ་ཤིས་ཆོས་གླིང་ཞེས་པའི་གསང་སྔགས་རྙིང་མའི་དགོན་པ་འདི་ནི། རྒྱལ་དབང་ལྔ་བ་ཆེན་པོའི་དུས་སུ་སྙི་ཆུའི་ཕ་རོལ་གྱི་གཞི་ཆེན་ལུང་བའི་ནང་གི་འབོས་ཆེན་ཟེར་བའི་ལུང་ཆུང་ཞིག་གི་ནང་དུ་གསང་སྔགས་རྙིང་མ་བའི་བླ་མ་ཤེས་རབ་བློ་ལྡན་ཟེར་བ་ཞིག་གིས་ལོ་མང་པོར་ཉམས་ལེན་མཛད་ནས་བཞུགས་སའི་རི་ཁྲོད་ཅིག་ཡོད་པ་ལ་འབོས་ཆེན་རི་ཁྲོད་ཟེར། ཁོང་དང་ཁོང་གི་ཚ་བོ་པད་མ་བསྟན་འཛིན་གཉིས་ཀྱིས་རི་ཁྲོད་དེ་རྒྱ་བསྐྱེད་ནས་དགོན་པ་ཞིག་ཏུ་བསྒྱུར་བ་ལ་འབོས་ཆེན་དགོན་ཟེར། སྐབས་དེར་རྫོགས་ཆེན་པད་མ་རིག་འཛིན་གྱིས་རྒྱལ་དབང་ལྔ་པའི་བཀའ་ལྟར་ཁམས་ཕྱོགས་སུ་གསང་སྔགས་རྙིང་མ་བའི་བསྟན་པ་སྤེལ་དུ་ཕེབས་ནས་རྫོགས་ཆེན་དགོན་ཕྱག་བཏབ་པ་ན། འབོས་ཆེན་ཤེས་རབ་བློ་ལྡན་ཞལ་མཇལ་དུ་ཕྱིན་པ་དང་དེ་ནས་བཟུང་འབོས་ཆེན་དགོན་པ་དེ་རྫོགས་ཆེན་དགོན་པའི་དགོན་ལག་ཏུ་གྱུར་པ་དང་། རྫོགས་ཆེན་རིན་པོ་ཆེས་དེ་ལ་གཟིགས་སྐྱོང་གནང་བར་ཞལ་བཞེས་མཛད། དེར་མ་ཟད་འབོས་ཆེན་ཤེས་རབ་བློ་ལྡན་རྫོགས་ཆེན་པད་མ་རིག་འཛིན་གྱི་ཞལ་མཇལ་བར་ཕེབས་པའི་ལམ་ནས་སྔ་གཞུག་ལྟར་མཇལ་དར་དཀར་པོ། སེར་པོ། སྔོན་པོ་གསུམ་ཐོབ་པ་རིམ་བཞིན་ཕུལ་བས་ཐུགས་དགྱེས་ནས་དེ་རིགས་གསུམ་མགོན་པོའི་བླ་དར་ཡིན་པས་རིགས་གསུམ་མགོན་པོའི་ཆོས་བརྒྱུད་འཛིན་མཁན་རྒྱུན་མི་ཆད་པའི་རྟེན་འབྲེལ་ཡིན་པར་གསུངས། དེ་གཉིས་ཀྱི་རྗེས་སྐྱོང་བ་བསྟན་འཛིན་དར་རྒྱས་ཟེར་བ་ཞིག་གིས་ལུང་བསྟན་ཞིག་ལ་བརྟེན་ནས་ད་ལྟའི་ཟིལ་ལུང་པ་འདི་ལ་སྤོར་བས་ཟིལ་གནོན་དགོན་ཡང་ཟེར། འདིར་སྤོར་པའི་ས་རིན་དུ་འབོས་ཆེན་བླ་བྲང་གིས་ས་འདིའི་མངའ་བདག་སྟོང་འཁོར་ཚང་ལ་ལོ་གཉིས་གསུམ་རེ་ནས་རྟ་རེ་སྤྲོད་དགོས། སྟོང་འཁོར་སྐུ་ཕྲེང་དྲུག་པ་འཇམ་དཔལ་དགེ་འདུན་རྒྱ་མཚོས་བཀའ་ཤོག་དམར་མདོག་མ་ཟེར་བ་ཞིག་ཀྱང་བཞག་ཡོད་པར་གྲགས། བསྟན་འཛིན་དར་རྒྱས་ཀྱི་རིང་ལ་འབོས་ཆེན་དགོན་འདི་དར་རྒྱས་ཆེ་བས་མཚན་ལའང་སྙི་བླ་བསྟན་འཛིན་དར་རྒྱས་ཐོགས། དེའི་རྗེས་སུ་དགོན་པ་འདིར་སྤྲུལ་སྐུ་ངོས་འཛིན་རྒྱུའི་འགོ་ཚུགས་ཏེ་ཁོང་གི་ཡང་སྲིད་འཇིགས་མེད་དཔའ་བོ་རྡོ་རྗེ་ཟེར་བ་རྫོགས་ཆེན་སྤྲུལ་སྐུས་ཐུགས་ཐག་བཅད། སྤྲུལ་སྐུ་འདི་བྲག་དམར་རྩེ་ལུ་རྒོད་ཚང་གི་སྤྲུལ་སྐུ་སྣ་ཚོགས་རང་གྲོལ་དང་མཉམ་དུ་ལྷ་ལྡན་དང་ཙ་རི་ལ་གནས་མཇལ་དུ་ཕེབས་རྗེས་དཀར་མཛེས་ཟླ་ཐང་མའི་ཚ་ཚ་ཞང་གི་འབུམ་ཐང་དགོན་དང་། གསེར་རྟ་རྫོང་ཡར་ལུང་ཞང་གི་སྐྱིད་ལྷུང་དགོན་གཉིས་བཏབ་པ་འབོས་ཆེན་དགོན་གྱི་དགོན་ལག་ཏུ་གྱུར་པ་བཅས་ལ་འབོས་ཆེན་དགོན་ཁག་གསུམ་ཟེར། འཇིགས་མེད་དཔའ་བོ་རྡོ་རྗེ་ལའང་ཡོངས་གྲགས་སུ་འབོས་ཆེན་སྐྱབས་མགོན་ནམ་སྐྱ་ཆེན་ཚང་ཟེར། དེའི་ཡང་སྲིད་རྡོ་ཁོག་སྐྱེས་མཆོག་ཚང་དུ་འཁྲུངས། དེས་དགོན་པ་འདིར་སངས་རྒྱས་མཉམ་སྦྱོར་གྱི་སྒྲུབ་མཆོད་དང་བཤད་གྲྭ་བཙུགས། སྐྱབས་འགྲོའི་འགྲེལ་བ་ལྡེབ་དྲུག་ཅུ་ལྷག་ཅན་ཞིག་དང་བཅས་པ་བརྩམས། ཡོངས་གྲགས་སུ་འབོས་ཆེན་སྐྱེས་མཆོག་སྤྲུལ་སྐུ་ཟེར། དེར་ཡང་སྲིད་གཉིས་ཏེ་སྐྱེས་མཆོག་ཡོན་ཏན་རྒྱ་མཚོ་དང་ཐུབ་བསྟན་ཤེས་རབ་འོད་ཟེར། སྔ་མ་སྐྱིད་ལྷུང་དགོན་ནས་ཁྲི་སར་བཀོད། མཆོད་རྟེན་ཆེན་པོ་ཞིག་བཞེངས་ཤིང་ཚེས་བཅུ་གསར་དུ་བཙུགས། ཕྱི་མས་འབོས་ཆེན་ནས་དབྱར་གནས་བཙུགས། ཁང་བརྩེགས་མཆོད་རྟེན་དང་། འདུ་ཁང་སྟེང་ཞི་ཁྲོའི་ལྷ་གྲངས་ཡོངས་རྫོགས། གུ་རུ་གཙོ་འཁོར། གསེར་ཁང་བཅས་བཞེངས། དགོན་པ་མང་པོ་དང་། མཚོ་སྔོན་པོ། མགོ་ལོག རྨ་སྟོད་སོགས་སུ་དབང་ལུང་ཁྲིད་གསུམ་དང་དགེ་ཚུལ་སློང་གི་སྡོམ་པ་མང་པོ་གནང་བས་སྙན་གྲགས་ཆེ། ཁོང་གཉིས་ཞལ་བཞུགས་དུས་འབོས་ཆེན་དགོན་ཁག་གསུམ་ག་ལ་ཕེབས་སྐྱོད་དང་གཟིགས་སྐྱོང་གནང་ཞིང་གསུམ་གས་བསྟན་པའི་བདག་པོར་ཁས་ལེན།
དགོན་འདིའི་ནང་རྟེན་ལ། བཀའ་འགྱུར་གསེར་བྲིས་མ། འཕགས་པ་བརྒྱད་སྟོང་པ་གསེར་བྲིས་མ། རྗེ་བཙུན་བྱམས་པའི་གསེར་སྐུ། སྒྲོལ་མའི་གསེར་སྐུ། གསེར་གྱི་བཀའ་གདམས་མཆོད་རྟེན། གུ་རུ་གཙོ་འཁོར་གསུམ་གྱི་གསེར་སྐུ། གནས་བརྟན་བཅུ་དྲུག་གི་གསེར་སྐུ་སོགས་ཁྱོན་བསྡོམས་གསེར་སྐུ་བརྒྱ་ལྷག་ཙམ་དང་། གཞན་ཡང་གསུང་རྟེན་ཧ་ཅང་མང་པོ་དང་། ད་ལྟར་ཡང་མཇལ་དུ་ཡོད་པ་སྟོང་འཁོར་ཞབས་དྲུང་སྐུ་ཕྲེང་བཞི་པ་མདོ་རྒྱུད་རྒྱ་མཚོས་གནང་བའི་ཚོགས་ཟངས་ཆེན་པོ་ཞིག་ལ་སོགས་པའི་རིན་ཐང་བྲལ་བའི་གནའ་རྫས་མང་དུ་བཞུགས།
དགོན་པའི་དུས་མཆོད་ནི་ཚེས་བཅུ་དང་། སྒྲུབ་མཆོད། རབ་གནས། དབྱར་གནས། སྨྱུང་གནས། བསང་མཆོད་བཅས་རྙིང་མ་པ་ཀུན་དང་མཐུན།
དགོན་པ་འདི་དང་མཆོད་ཡོན་གྱི་འབྲེལ་བ་ཡོད་པའི་ལྷ་སྡེ་ནི་སྟོང་འཁོར་སྙི་ཁོག་དང་། སྟོང་འཁོར་ཟླ་སྟོད། གསེར་རྟ་བཅས་ན་ཡོད།
གཞི་ཆེན་མཁར་དམར་གསང་སྔགས་བསྟན་རྒྱས་གླིང་།
སྔ་འགྱུར་རྙིང་མའི་དགོན་སྡེ་ཆེན་པོ་དྲུག་གི་ཡ་གྱལ་དཔལ་རྒྱལ་བ་ཀཿཐོག་པའི་གུར་དཀར་མོའི་ཁྱོན་ཆེན་བཞིའམ་བསྟན་པའི་རྒྱལ་མཚན་བསྒྲེངས་པའི་དགོན་ཆེན་བཞིའི་ནང་ཚན་གཞི་ཆེན་མཁར་དམར་གསང་སྔགས་བསྟན་རྒྱས་གླིང་ནི། ཨོ་རྒྱན་ལྷུན་གྲུབ་རྒྱ་མཚོས་བོད་རབ་བྱུང་བཅུ་གཅིག་པའི་ཤིང་འབྲུག་སྤྱི་ལོ་ ༡༦༦༤ ལོར་བཏབ་པའི་སྔ་འགྱུར་རྙིང་མའི་དགོན་པ་ཞིག་ཡིན། ཁོང་དང་པོར་གླང་བཞག་ལུང་ནང་གི་རི་ཁྲོད་དུ་བཞུགས། ཉིན་ཞིག་ལ་ར་མ་བྲག་དཀར་མཇལ་དུ་ཕེབས་པའི་གཞི་ཆེན་མདར་སླེབས་ཚེ་ནམ་ལངས་པ་ན་གཞི་ཆེན་ནང་དུ་ཕེབས། དེར་ཀུན་ཤེས་སྒོམ་ཆེན་རལ་པ་ཅན་བཞུགས་པ་ལ་མཇལ། དེས་འདིར་བཞུགས་ན་རྟེན་འབྲེལ་ལེགས་གསུངས། གཞན་ཡང་རྟེན་འབྲེལ་གྱི་ཆེད་དུ་སྒོམ་ཆེན་པས་མདའ་ཞིག་འཕངས་པ་ད་ལྟའི་གསེར་ཁང་ཡོད་སར་ལྷུང་བས་གཟིམ་ཆུང་དེར་བཞེངས། དེ་ནས་རིམ་གྱིས་དགོན་པ་ཆགས་ཟེར།
ནང་རྟེན་གྱི་སྐོར་ལ། མངའ་བདག་ཉང་ཉི་མ་འོད་ཟེར་གྱི་སྲས་ཆུང་བས་ཁྱེར་འོང་བའི་བཀའ་བརྒྱད་ཀྱི་ལི་སྐུ་གཏེར་མ་ཁྲུ་གང་བ། གུ་རུ་ཟ་ཧོར་མ། དུས་གསུམ་སངས་རྒྱས། བདེ་གཤེགས་སོ་ལྔ། ལྷ་མོ་དབྱངས་ཅན་མ། གུ་རུ་གཙོ་འཁོར་ལྔ། ཆོས་རྒྱལ་མེས་དབོན་རྣམ་གསུམ་སོགས་རྒྱུ་གསེར་ཟངས་ལས་གྲུབ་པའི་ནང་རྟེན་རྩ་ཆེན་ཤིན་ཏུ་མང་། གནའ་དུས་སུ་སྟོང་འཁོར་ཞབས་དྲུང་མདོ་རྒྱུད་རྒྱ་མཚོས་གནང་བར་གྲགས་པའི་ཐུབ་པ་ཚུལ་ཁྲིམས་མ་ཞེས་པའི་རྟེན་ཁྱད་པར་ཅན་ཞིག་ཀྱང་ཡོད།
ཆོས་ཐོག་སྐོར་ལ། ཟླ་དང་པོའི་ཚེས་བརྒྱད་ནས་བཅོ་ལྔའི་བར་ཐུགས་རྗེ་ཆེན་པོའི་སྒྲུབ་མཆོད། གསུམ་པའི་ཚེས་བཅུ་གཉིས་ནས་བཅོ་ལྔ་བར་སྨན་བླའི་སྒྲུབ་མཆོད། བཞི་པའི་ཚེས་གཅིག་ནས་བཅུ་གཉིས་བར་ཚེས་བཅུ། དྲུག་པའི་ཚེས་བཅོ་ལྔ་ནས་བདུན་པའི་ཉེར་དགུ་བར་དབྱར་གནས། བརྒྱད་པའི་ཚེས་ཉེར་གཉིས་ནས་ཉེར་ལྔ་བར་གསོལ་ཁ་བསྐང་གསོ། བཅུ་པའི་ཚེས་བཅོ་ལྔ་ནས་བཅུ་གཉིས་པའི་ཚེས་བཅོ་ལྔ་བར་གྲྭ་མང་འདུ་ཁང་ནང་འཚོགས་ཏེ་ངག་བཅད་མཚམས་སྒྲུབ་གནང་། བཅུ་གཉིས་པའི་ཚེས་བཅུ་དགུ་ནས་ཉེར་དགུ་བར་དགའ་སྟོན་ཆེན་མོ་ཡིན།
རིག་འཛིན་མིང་ཅན་ཉག་ཁོག་ཏུ་ཕེབས་ནས་ཉག་དཔོན་མགོན་པོ་རྣམ་རྒྱལ་ལ་འཕྲུལ་བསྟན་ཏེ་དད་པ་ལ་བཀོད་པས། དེ་ལ་གཏང་རག་གི་ཚུལ་དུ་སྟོང་འཁོར་ཞབས་དྲུང་སྐུ་ཕྲེང་བརྒྱད་པ་ངག་དབང་མདོ་རྒྱུད་ཡོན་ཏན་རབ་རྒྱས་ཀྱིས་གཞི་ཆེན་མདའ་ཚང་། མཚོ་འགོ་ཚང་། དགའ་སྟོན་གདོང་ཚང་། ཀུན་ཤེས་ཚང་། རྒྱལ་རོང་ཚང་། མཁར་ཚང་། གྲོང་སྨད་ཚང་བཅས་དུད་ཚང་བདུན་མཆོད་སྒམ་ཁུར་མིར་ཕུལ་ཟེར།
གཞི་ཆེན་དབོན་སྤྲུལ་རིན་པོ་ཆེ་ཐུབ་བསྟན་ལུང་རྟོགས་རྒྱ་མཚོ་ནི། གསར་རྙིང་རིས་མེད་ཀྱི་བླ་སྤྲུལ་མང་པོའི་ཡབ་ཡུམ་གྱི་མཚན་དང༌། འཁྲུངས་ཡུལ། ལོ་རྟགས་སོགས་ལུང་བསྟན་རྩེ་མཐུན་བྱུང་བ་ལྟར་སྐུ་འཁྲུངས། ཆུང་ངུའི་དུས་ནས་གཞི་ཆེན་དགོན་དུ་གདན་འདྲེན་ཞུས། གཞི་ཆེན་རྒྱལ་སྲས་ཉི་ཟླ་བཟང་པོ་དང་བཻ་རོ་མ་འདས་སྤྲུལ་སྐུ་བློ་བཟང་དྲི་མེད་བསྟན་འཛིན་རྣམ་གཉིས་ནས་ཁྲུས་གསོལ་དང་ན་བཟའ་གསོལ་རྗེས་ཁྲི་འདོན་ཟབ་རྒྱས་བྱས། ཀཿཐོག་གཞི་ཆེན་གྱི་མ་དགོན་གསུམ་དང་བུ་དགོན་ཉེར་གཅིག་གི་བསྟན་པའི་རྒྱལ་མཚན་ཕྱག་ཏུ་གཏད། ཨ་ཁུ་རྒྱ་རོང་པ་སྐལ་བཟང་རྒྱ་མཚོ་ཞེས་དབོན་སྤྲུལ་སྐུ་གོང་མའི་ཞལ་སློབ། བླ་མའི་མཚན་ཁོ་ན་ལོ་གསུམ་དུ་བགྲང་པས་དོན་བརྒྱུད་ཀྱི་རྟོགས་པ་འཕོས་ཤིང་དགོངས་པའི་ཀློང་མཛོད་རྡོལ་བ་དེ་ཉིད་ཡོངས་འཛིན་དུ་བསྐོས། རྒྱལ་སྲས་ཉི་ཟླ་བཟང་པོའི་མདུན་ནས་བདུད་ཀློང་དང་འདོད་འཇོའི་བུམ་བཟང་སོགས་ཀྱི་དབང་ལུང་མཐའ་ཡས་པ་གསན་ཞིང་རྒྱལ་ཚབ་ཏུ་མངའ་གསོལ། ཤུགས་ཆུང་སྤྲུལ་སྐུ་ཚུལ་ལོ་རིགས་བདག་ཏུ་བཀུར་ཞིང༌། བློ་སྦྱོང་ཆོས་ཀྱི་སྒོ་འབྱེད་ཐོག་མའི་ཆོས་འབྲེལ་དུ་གནང་བ་ནས་བཟུང་བཀའ་གདམས་གོང་མའི་རྣམ་ཐར་ལྷུར་བླངས་ཏེ་བླ་ཆེན་གྱི་ཆེ་ཚུགས་སྤངས། འབུལ་སྡུད་ཀྱི་བྱ་བ་བོར། འཚོ་བ་ངན་ངོན་ལ་བརྟེན། འདོད་ཆུང་ཆོག་ཤེས་ཀྱི་ནོར་དང་མི་འབྲལ། ཞི་དུལ་བག་ཡོད་ཀྱི་བཅས་པ་མི་ལྷོད་པར་ཆུང་ངུའི་དུས་ཀྱི་གྲུབ་ཐོབ་ཀྱི་སྤྱོད་པའང་མི་མངོན་པའི་ཚུལ་དུ་སྦས་སོ། །དུས་འགྱུར་སྐབས་གཞུང་ལུགས་ཐོས་བསམ་གནང་བའི་དགོངས་པ་བཞིན་རྒྱ་གར་ཤར་ཕྱོགས་སྦག་སར་ཁུལ་དུ་སེར་འབྲས་དགའ་གསུམ་གཙོ་བོར་བྱས་པའི་བཙན་བྱོལ་ཡོངས་ཀྱི་སློབ་གཉེར་ལྟེ་གནས་ཐོས་བསམ་ཐར་འདོད་གླིང་དུ་བཞུགས་ནས་སློབ་གཉེར་མཛད། ༸འཕགས་མཆོག་མིག་མི་འཛུམ་པ་བཅུ་བཞི་པ་ཆེན་པོའི་མདུན་ནས་དགེ་སློང་གི་སྡོམ་པ་མནོས་ཤིང་ཕམ་ལྷག་གི་སྐྱོན་གྱིས་མ་གོས་པའི་འདུལ་བ་འཛིན་པའི་མཆོག་ཏུ་བསྔགས་ཏེ་དཔལ་ལྡན་འབྲས་དཀར་སྤུངས་པའི་ཚོགས་ཆེན་སྤྲུལ་སྐུའི་གོ་གནས་གནང༌། རིམ་བཞིན་སྒོ་མང་གྲྭ་ཚང་སྤྲུལ་སྐུའི་མཚན་ཐོབ་ཀྱང་བཟུང༌ནའང་། མཁས་ཚུལ་གྱི་ཁེངས་པ་མི་ངོམ། བླ་ཆེན་གྱི་མིང་ལ་མི་ཞེན། བསགས་སྲུང་གི་ཐབས་ལ་མི་བརྩོན། ཆེན་པོའི་ངོ་འཛིན་མི་བྱེད། ལྟོ་སྐྱ་གོས་ཧྲུལ་གྱིས་རྒྱ་ཆེ་བ་མདོ་དང་ཟབ་མོ་སྔགས་ཀྱི་གཞུང་ལུགས་ལ་ཉིན་མཚན་ཁོར་མོ་ཡུག་ཏུ་སྦྱང་བརྩོན་ལྷོད་མེད་བགྱིས་ཏེ་དགེ་བཤེས་ལྷ་རམས་པའི་མཚན་རྟགས་བཞེས། མཁས་བཙུན་བཟང་པོའི་སྙན་པ་ཕྱོགས་བཅུར་རྒྱས་ཤིང་གྲྭ་ས་སེར་འབྲས་དགའ་གསུམ་གྱིདགེ་བའི་བཤེས་གཉེན་ཀུན་གྱིས་གཙུག་གི་ནོར་བུར་བཀུར། ༸ལྷ་མིའི་རྣམ་འདྲེན་འཇིག་རྟེན་དབང་ཕྱུག་བཅུ་བཞི་པ་ཆེན་པོས་ཀྱང་བསྔགས་བརྗོད་ནོར་བུའི་ཕྲེང་བ་བར་མེད་དུ་བསྩལ་བ་དང༌། ཁྱད་པར་རྡོ་རྗེ་གླིང་འབྲུག་གསང་སྔགས་ཆོས་གླིང་དུ་འཇམ་དཔལ་མཚན་བརྗོད་ཀྱི་བཤད་ཁྲིད་བཀའ་དྲིན་སྩོལ་སྐབས་དབོན་སྤྲུལ་རིན་པོ་ཆེ་ནི་གསར་རྙིང་རིས་སུ་མ་ཆད་པའི་གཞུང་ལུགས་ལ་བྱང་ཆུབ་པའི་མཁས་པ་ཆེན་པོ་ཡིན་པས་ཁོང་ལྟ་བུ་འདི་ན་བཞུགས་སྐབས་འཆད་ཉན་ཡག་པོ་བྱེད་དགོས་གསུངས་པ་དང་། གཞན་དུ་དབོན་སྤྲུལ་རིན་པོ་ཆེ་ནི་ངའི་དམ་གཙང་གི་སློབ་མ་ཡིན་ལ་བླ་མ་ཡང་ཡིན། གྲོགས་པོ་ཡང་ཡིན། ངེས་པ་དོན་གྱི་དགེ་བཤེས་ཟེར་བ་དེ་ཁོང་རེད་གསུངས། རྒྱལ་བ་ཀརྨ་པས་བཀའ་བརྒྱུད་མཐོ་སློབ་ན་ལེནྡྲའི་དབུ་འཛིན་མཁན་པོར་གདན་འདྲེན་ཞུས་པ་དང༌། བདུད་འཇོམས་རིན་པོ་ཆེས་སྔ་འགྱུར་རྙིང་མའི་བཤད་གྲྭར་བཞུགས་སུ་གསོལ་བ་དང། གྲུབ་དབང་པདྨ་ནོར་བུས་རྣམ་གྲོལ་གླིང་གི་མཁན་པོར་ཕེབས་པར་བསྐུལ་བ་དང༌། དིལ་མགོ་མཁྱེན་བརྩེ་རིན་པོ་ཆེས་ཞེ་ཆེན་བཤད་གྲྭའི་མཁན་པོ་དང་རབ་འབྱམས་རིན་པོ་ཆེའི་ཡོངས་འཛིན་དུ་བཞུགས་པར་གསོལ་བ་སོགས་གངས་ལྗོངས་ཆོས་བརྒྱུད་ཆེན་པོ་བཞིའི་དབུ་འཛིན་ཕལ་མོ་ཆེས་སོ་སོའི་བསྟན་པའི་མཛེས་རྒྱན་དུ་མངའ་གསོལ་མཛད་ནའང་རྒྱལ་དབང་འབྲུག་ཆེན་རིན་པོ་ཆེའི་ཡོངས་འཛིན་དུ་བཞུགས་པ་དང་ཁོང་གི་མཆེད་གྲོགས་བཻ་རོ་སྤྲུལ་སྐུའི་ཆོས་དམ་དབང་བཞག་གིས་ནན་ཞུའི་དམ་ཚིག་གཉན་པོ་དང༌། ཁོང་རིན་པོ་ཆེའི་འཆད་རྩོད་དུས་ཚོད་གཞན་དབང་ཅན་དུ་གྱུར་པས་གང་དུ་ཡང་མ་ཕེབས་པར་དཔལ་ལྡན་འབྲས་དཀར་སྤུངས་པའི་ཆོས་སྡེར་རྒྱུན་དུ་བཞུགས་པར་མཛད། ཤིང་གླང་ ༡༩༨༥ ལོར་བོད་ཡུལ་དུ་ཕྱིར་ཕེབས་ནས་བསྟན་དགོན་ཡོངས་ལ་ཐུགས་ཁུར་ཆེ་བཞེས་ཀྱིས་དགོན་མ་ལག་ཐམས་ཅད་ལ་དབང་ལུང་ཁྲིད་དང་གདམས་པ་མང་པོ་གནང་ཞིང་བཤད་སྒྲུབ་ཀྱི་བསྟན་པ་སླར་གསོ་མཛད། འབུལ་བའི་དངོས་པོ་ཐམས་ཅད་དགོན་པ་སོ་སོར་ཕྱིར་གནང་ཞིང༌། ས་གནས་སོ་སོའི་ནོར་ཕྱུགས་འབུལ་བ་ཡོད་ཚད་ཚེ་ཐར་བཏང་ཞིང་ཡུལ་སྡེའི་ཉམས་ཆུང་ཚོར་གནང་སྦྱིན་བསྩལ། ཁྱད་པར་རང་དགོན་སླར་གསོའི་ཆེད་དུ་དངོས་རྫས་ཕོན་ཆེན་བཏང་སྟེ་རང་ཉིད་བྱ་བྲལ་ཁོ་ནའི་སྤྱོད་པས་འཚོ་བར་མཛད། སྟོང་འཁོར་དགོན་པས་སྟོང་འཁོར་ཞབས་དྲུང་རིན་པོ་ཆེ་ལ་རབ་བྱུང་གི་སྡོམ་པ་འབོག་པར་བསྐུལ་བར། བདག་འདྲ་བ་དམ་པ་འདིའི་མཁན་པོར་མི་འོས་ཀྱང་། ཐུགས་འདུན་དང་། བཀའ་བཟློག་མི་ཕོད་གསུངས་ནས་ཞལ་གྱིས་བཞེས་ཏེ་རབ་བྱུང་གི་སྡོམ་པ་གནང་། མཚན་ལ་ངག་དབང་བློ་བཟང་འཇམ་དབྱངས་མཁྱེན་རབ་རྒྱ་མཚོ་ཞེས་གསོལ་ཞིང་། འབྲལ་སྤང་གི་ཚུལ་དུ་ཐུབ་དབང་གི་སྐུ་རྩ་ཆེན་ཞིག་ཀྱང་གནང་།
གཞི་ཆེན་བཻ་རོ་རིན་པོ་ཆེ་ནི། དགུང་ལོ་བརྒྱད་ཀྱི་སྟེང་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱིས་ལོ་ཙཱ་བ་བཻ་རོ་ཙ་ནའི་སྐྱེ་ཕྲེང་དུ་ངོས་འཛིན་མཛད། དུས་འགྱུར་སྐབས་འཕགས་ཡུལ་སོགས་སུ་ཕེབས། འབྲུག་པ་བཀའ་བརྒྱུད་ཀྱི་བསྟན་བདག་རྒྱལ་བ་འབྲུག་ཆེན་རིན་པོ་ཆེ་འཇིགས་མེད་པདྨ་དབང་ཆེན་རིགས་སྲས་སུ་འཁྲུངས། བལ་ཡུལ་དུ་ཕེབས་ནས་བཽདྷའི་ཉེ་འཁྲིས་སུ་སྔ་འགྱུར་ཀཿཐོག་གཞི་ཆེན་བཻ་རོ་གླིང་བཏབ་སྟེ། གཞི་ཆེན་དགོན་གྱི་ཐུན་མོང་མ་ཡིན་པའི་ཚེས་བཅུ་སྒྲུབ་མཆོད་སོགས་ཆོ་ག་ཆོས་སྤྱོད། བཅའ་འབུད་རྡུང་གསུམ། གར་ཐིག་དབྱངས་གསུམ་སོགས་མཐོང་བ་བརྒྱུད་པའི་ཕྱག་བཞེས་རྣམས་མི་ཉམས་རྒྱུན་འཛིན་གནང་བཞིན་འཚོ་ཞིང་གཞེས་པའོ།།
གཞི་ཆེན་དགོན་འདི་ལ་དེ་དག་གིས་མཚོན་བླ་མ་སྤྲུལ་པའི་སྐུ་མང་དུ་ཡོད་ལ། བུ་དགོན་ཡང་ཉི་ཤུ་ལྷག་ཙམ་ཡོད་པར་གྲགས། མ་ཟད་གཞི་ཆེན་དགོན་འདི་ནས་ཕྱིས་སུ་མཆེད་པའི་འབུམ་བརྩེགས་དགོན་ཞེས་པ་བསླབ་པ་སློབ་གཉེར་གནང་ཡུལ་གྱི་དགོན་སྡེ་ཞིག་ཀྱང་གསེར་རྟའི་ཕྱོགས་སུ་ཡོད།
སྟོང་འཁོར་ཞབས་དྲུང་སྐུ་ཕྲེང་བཞི་པ་ལ་༸གོང་ས་ལྔ་པ་ཆེན་པོ་དང་། གུ་ཤྲཱི་བསྟན་འཛིན་ཆོས་རྒྱལ་སོགས་ཀྱིས་ཟི་ལིང་ཕྱོགས་ནས་མདོ་མཁར་སོགས་ས་ཆ་མང་པོ་ཆབ་འོག་ཏུ་གནང་རྗེས་ཟི་ལིང་སྟོང་འཁོར་དགའ་ལྡན་ཆོས་འཁོར་གླིང་བཏབ་པ་ནས་བཟུང་སྐུ་ཕྲེང་ལྔ་པའི་བར་ཁམས་སྟོང་འཁོར་དང་ཟི་ལིང་སྟོང་འཁོར་ཕན་ཚུན་གཉིས་ཀའི་བླ་མར་གྱུར་ཅིང་། ལྔ་པའི་ཡང་སྲིད་དུ་འདིར་འཇམ་དཔལ་དགེ་འདུན་རྒྱ་མཚོ་དང༌། ཟི་ལིང་དུ་འཇམ་དབྱངས་བསྟན་འཛིན་རྒྱ་མཚོ་བཅས་སྐུ་སྐྱེ་གཉིས་འཁྲུངས་པ་ནས་ད་བར་བླ་མ་རེ་རེས་སྡེ་འབངས་སོ་སོར་སྐྱོང་བར་མཛད། ཡུལ་ཕྱོགས་འདིར་ཡང་དགོན་ཁག་ལྔ་ཡོད་པ་ལས་སྟོང་འཁོར་མ་དགོན་གསང་ཆེན་རྡོ་རྗེ་གླིང་དང་། བུ་དགོན་སྙི་བཀྲ་ཤིས་དར་རྒྱས་གླིང་དང་། ལུ་གུ་ཆོས་སྡེ་བཀྲ་ཤིས་འཁྱིལ་བཅས་གསུམ་ནི་གནའ་ནས་སྟོང་འཁོར་ཞབས་དྲུང་རིམ་བྱོན་གྱིས་སྒྲིགས་གཞི་དང་ལས་སྣེ་བསྐོ་འཇོག་ཚུན་ཆད་ལ་གཟིགས་སྐྱོང་གནང་སྲོལ་ཡོད།
དགོན་ལག་བཞིའི་ལོ་རྒྱུས་ཉུང་ངུ་འདི་གནའ་དུས་ཡི་གེར་འཁོད་པ་མདོར་བསྡུས་ཙམ་རེ་ལས་མི་སྣང་བས། ཕྲན་རང་ཆེད་དུ་གཉེར་ནས་དགོན་གནས་དེ་དང་དེར་སོང་སྟེ་བརྩད་གཅོད་སྐབས་དགེ་སློང་འགའ་རེའི་ངག་རྒྱུན་ལས་བཤུས་སོ།།
༢༽ ད་ལྟའི་སྟོང་འཁོར་གཞིས་བྱེས་གཉིས་ཀྱི་གནས་བབས་མདོ་ཙམ་བཤད་པ།
འདིར་འཛིན་སྐྱོང་སོ་སོས་ཞབས་འདེགས་ཞུ་ཚུལ་གྱི་སྐོར་རོབ་ཙམ་འབྲི་ན། དུས་འགྱུར་རྗེས་སུ་དགོན་པ་བསྐྱར་དར་བྱུང་བ་ནས་བཟུང་སྟོང་འཁོར་དགོན་ཆེན་ལ་ད་བར་འཛིན་སྐྱོང་སྐབས་དགུ་ཙམ་བྱུང་ཡོད། དེ་དག་ནི། སྐབས་དང་པོ། རྡོ་རྗེ་ཚེ་རིང་། བསོད་ནམས་དངོས་གྲུབ། ནོར་བུ་བཀྲ་ཤིས། བསོད་ནམས་ལྷུན་འགྲུབ། ཐུབ་བསྟན་སྦྱིན་པ། ཨོ་རྒྱན་ཆོས་འཕེལ། སྐབས་གཉིས་པ། ནོར་བུ་བཀྲ་ཤིས། པདྨ་རིན་ཆེན། མགོན་པོ་མཆོག་ལྡན། ཐུབ་བསྟན་སྦྱིན་པ། ངག་དབང་ཕུན་ཚོགས། སྐབས་གསུམ་པ། ཡོན་ཏན་མཐར་ཕྱིན། པདྨ་རིན་ཆེན། མཁས་བཙུན་བཟང་པོ། མགོན་པོ་མཆོག་ལྡན། ནོར་བུ་ཡོན་ཏན། སྐབས་བཞི་པ། རྡོ་རྗེ་ཚེ་རིང་། འཇམ་དགའ། ཡ་མ་དོན་འགྲུབ། ནོར་བུ་ཡོན་ཏན། ཨོ་རྒྱན་ཆོས་འཕེལ། ཡེ་ཤེས་བསྟན་འཛིན། སྐབས་ལྔ་པ། ངག་དབང་ཕུན་ཚོགས། རྡོ་རྗེ་ཚེ་རིང་། ནོར་བུ་ཡོན་ཏན། ཡེ་ཤེས་བསྟན་འཛིན། ཟླ་འོད། སྐལ་བཟང་མཐར་ཕྱིན། སྐབས་དྲུག་པ། རྡོ་རྗེ་ཚེ་རིང་། ནོར་བུ་ཡོན་ཏན། ཟླ་འོད། སྐལ་བཟང་མཐར་ཕྱིན། དགེ་ལེགས། དབང་ཕྱུག །སྐབས་བདུན་པ། དཀོན་མཆོག་དོན་འགྲུབ། ཚུལ་ཁྲིམས་བཟང་པོ། བློ་བཟང་འཇམ་དབྱངས། དཀོན་མཆོག་བསྟན་འཛིན། བློ་བཟང་མཐར་ཕྱིན། སྐབས་བརྒྱད་པ། བློ་བཟང་འཇམ་དབྱངས། ཚུལ་ཁྲིམས་བཟང་པོ། ཐུབ་བསྟན་ཚེ་རིང་། རྟ་མགྲིན་རྒྱ་མཚོ། བློ་བཟང་མཐར་ཕྱིན། སྐབས་དགུ་པ། བསྟན་འཛིན་རབ་རྒྱས། ཡེ་ཤེས་རྡོ་རྗེ། དགེ་ལེགས། རྟ་མགྲིན་རྒྱ་མཚོ། དབང་ཕྱུག་བཅས་ཡིན།
ཁོང་རྣམ་པས་དགོན་འདིའི་མདོ་སྔགས་ཀྱི་བྱེད་སྒོ་ཁག་རྣམས་སྔར་སྲོལ་བཞིན་བསྐྱར་གསོ་གནང་བ་དང་། སྟོང་འཁོར་བའི་ཡུལ་མི་རྣམས་དང་འབྲེལ་བ་དམ་ཟབ་ཐོག་ཞབས་དྲུང་སྐུ་ཕྲེང་བཅུ་གཅིག་པ་ཆེན་པོས་འཕྲལ་ཕུགས་ཀྱི་དོན་ལ་དགོངས་པ་རྒྱ་ཆེར་བཞེས་ཏེ་བཀའ་སློབ་ལམ་སྟོན་ཡང་དག་པ་སྔ་ཕྱི་རིམ་པར་གནང་བའི་འོག་དགོན་པའི་ངོས་ནས་ཀྱང་ཞབས་དྲུང་རྡོ་རྗེ་འཆང་གི་དགོངས་བཞེད་དང་ལམ་སྟོན་རྣམས་གཙིགས་སུ་བཟུང་སྟེ། ཡུལ་མི་རྣམས་ཀྱི་རེ་འདུན་ལྟར་ཞབས་འདེགས་གང་ལེགས་ཞུ་རྒྱུས་མཚོན། ཡུལ་བ་དགོན་པ་ལ་བརྟེན། དགོན་པ་ཡང་ཡུལ་བ་ལ་བརྟེན་ཏེ་མཐུན་འབྲེལ་སྔར་ལྷག་ཡོད་པ་དང་། མདོ་སྔགས་གང་ཐད་ནས་བསླབ་པ་སློབ་གཉེར་ཡར་རྒྱས་ཀྱི་ཕྱོགས་སུ་བསྐྱོད་བཞིན་པར་མ་ཟད། དགོན་པའི་ཕྱི་ནང་གི་བཀོད་པ་རྣམས་ཡར་རྒྱས་བཏང་སྟེ་མིག་དཔེར་འོས་པ་ཞིག་ཏུ་གྱུར། ངག་རྒྱུན་ལ་སྔོན་དུས་སུ་དགོན་འདིར་ཁང་ཚན་བརྒྱད་ཡོད་སྐོར་དང་། དེ་མིན་ཁང་ཚན་བཞི་ཡོད་པའི་སྐོར་རྒན་རབས་པ་རྣམས་ཀྱི་གསུང་རྒྱུན་ཅུང་མི་འདྲ་བ་འདུག མ་ཟད་ཁང་ཚན་རྣམས་ཀྱི་མིང་ཡང་ཁ་གསལ་ཞིག་མི་འདུག་མོད། ད་ལྟའི་དུས་སུ་གྲོང་སྡེ་སོ་སོའི་གྲྭ་པ་རྣམས་ལ་ཁང་ཚན་རེ་བྱས་པ་ལྟ་བུ་ཡིན་ཞིང་། གྲོང་སྡེ་རེའི་གྲྭ་རྒྱུན་ནས་ཁང་ཚན་རྒན་རེ་རེ་ཡོད། དགོན་པའི་འཚོ་བའི་མཐུན་རྐྱེན་དུ་དཔལ་འབྱོར་འདུ་འགོད་སོགས་ཀྱི་དོན་ལ་ངལ་བ་ལྷུར་བཞེས་གནང་། སྡེ་འབངས་ཁྱིམ་པ་རྒན་རྒོན་ཚུན་ཆད་ཤེས་ཡོན་པའི་གྲས་སུ་བཙུད་ཐབས་སུ་ཡིག་རྨོངས་སེལ་བ་དང་། བོད་རང་གི་ཐུན་མོང་མ་ཡིན་པའི་བརྡ་ཆད་ཐ་སྙད་ཀྱི་སྐོར་སོགས་ལ་བསླབ་ཁྲིད་གནང་སྟེ་གོམས་གཤིས་སུ་འགྱུར་བའི་འབད་རྩོལ་གནང་བ། གྲོང་ཚོ་སོ་སོར་ནང་ཆོས་ངོ་སྤྲོད་ཀྱི་ལས་འགུལ་སྤེལ་ཏེ། དགོན་གཞུང་གི་ལས་སྣེ་སོགས་གྲོང་སྡེ་སོ་སོར་ཆེད་ཕེབས་ཀྱིས་རྒྱུགས་ལེན་རྟོག་ཞིབ་སོགས་གནང་གི་ཡོད། ཞབས་དྲུང་རིམ་བྱོན་གྱིས་ཡུལ་འདིའི་མི་དམངས་རྣམས་དགེ་བའི་ཕྱོགས་སུ་བཀོད་ཟིན་ཞེས་བཤད་སྲོལ་ཡོད་པ་བཞིན་ཡུལ་མི་རྣམས་ལྷ་དང་བླ་མ་ལ་གུས་བརྩི་ཆེ་ཞིང་ཆོས་སེམས་ཆེ་བ་དཔེར་མཚོན་ན། ཁྱིམ་རྒྱུད་གཅིག་ལས་བུ་ཡོད་ཚད་གྲྭ་པ་བྱེད་སྲོལ་ཡོད་པ་དང་། རྒན་བཀུར་གཞོན་བྱམས། མི་རིགས་ཀྱི་སྐད་ཡིག་དང་ཆ་ལུགས་ཚུན་ཆད་ལ་དོ་སྣང་ཆེ་ཞིང་། རྐུན་ཇག་དང་དུ་ཆང་སྣ་ཐལ་སོགས་སྤངས་ཏེ་སྡིག་སྤོང་དགེ་སྒྲུབ་ཀྱི་ལས་ལ་བརྩོན་པ་སོགས་ཡུལ་ལུང་གཞན་ལས་ཁྱད་དུ་འཕགས་ཤིང་བསྔགས་པའི་གནས་སུ་ཡོད་ལ། བུ་དགོན་རྣམས་སུའང་ཡུལ་དགོན་བར་གྱི་འབྲེལ་བ་སོགས་དེ་མཚུངས་སུ་ཡོད།
དེ་ལྟར་ཡུལ་འདིའི་མ་དགོན་དང་བུ་དགོན་འདི་རྣམས་བཀའ་དྲིན་གཞལ་ཐབས་བྲལ་བའི་གནའ་བོའི་རྒན་རབས་པ་དག་གིས་བསྐྱར་དར་གྱི་འགན་ཁུར་ལྷུར་བཞེས་གནང་བའི་བཀའ་དྲིན་ལས། དེང་གི་ཆར་དགོན་སྡེ་སོ་སོའི་རྟེན་དང་བརྟེན་པར་བཅས་པ་ཡུལ་མི་རྣམས་ཀྱི་མཆོད་གནས་སུ་མཐོང་ན་དང་བ་འདྲེན་པ་ཞིག་ཏུ་གྱུར་ཡོད་པར་མ་ཟད། རིམ་པས་དགེ་འདུན་པ་རྣམས་ཀྱང་མཚན་ཉིད་བཅུ་ལྡན་གྱི་གནའ་བོའི་དགེ་བའི་བཤེས་གཉེན་རྣམ་པའི་བཀའ་དྲིན་ལས་མདོ་སྔགས་ཀྱི་གཞུང་ལུགས་རྒྱ་མཚོ་ལྟ་བུར་སྦྱོང་བརྩོན་ལྷོད་མེད་གནང་བས་སྔར་ཇི་ལྟར་བ་བཞིན་དུ་དར་རྒྱས་བྱུང་སྟེ། མན་ངག་གི་རྒྱུན་མ་ཆད་པ། བྱིན་རླབས་ཀྱི་དྲོད་མ་ཡལ་བ། ཕྱག་ལེན་གྱི་ཟུར་མ་ཉམས་པ་ཉམས་དགའ་བར་ཡོད།
གདན་ས་འདིའི་མ་དགོན་བུ་དགོན་འདི་རྣམས་སུ་མ་ཟད། བྱེས་སུའང་འཕགས་ཡུལ་གྱི་གདན་ས་ཆེན་པོ་རྣམས་སུ་འདི་ཕྱོགས་ཀྱི་སློབ་གཉེར་བ་མང་དུ་ཡོད། སྟོང་འཁོར་ཞབས་དྲུང་སྐུ་ཕྲེང་དང་པོའི་སྐབས་ནས་བཟུང་ཡུལ་ཕྱོགས་འདིའི་སློབ་གཉེར་བ་རྣམས་ཕེབས་ཡུལ་དུ་ངེས་པའི་སེར་སྨད་རོང་པོ་ཁང་ཚན་དུ་བྱེས་སུ་འབྱོར་བའི་ཐོག་མར་ཡུལ་འདིའི་རྒན་རབས་པ་འགའ་རེ་ཙམ་ལས་མེད་ནའང་། དཀའ་བ་བརྒྱ་ཕྲག་ཁྱད་དུ་བསད་དེ་རོང་པོ་ཁང་ཚན་གྱི་རྒྱུད་འཛིན་གནང་གཤིས། ལྷག་པར་དུ་སྤྱི་ལོ་ ༡༩༩༣ ལོར་སྟོང་འཁོར་ཞབས་དྲུང་སྐུ་ཕྲེང་བཅུ་གཅིག་པ་ཆེན་པོ་འཕགས་ཡུལ་སེ་ར་ཐེག་པ་ཆེན་པོའི་གླིང་དུ་ཞབས་བསྐྱོད་གནང་བ་ནས་བཟུང་རིམ་གྱིས་ཁང་ཚན་འདིར་སྟོང་འཁོར་ཟླ་སྙི་གཉིས་ཀྱི་གྲྭ་རྒྱུན་ཇེ་མང་དུ་སོང་ནས། ད་ལྟའི་ཆར་སེར་སྨད་རོང་པོ་ཁང་ཚན་དུ་དགེ་འདུན་ཞལ་གྲངས་བརྒྱ་ལྷག་ཐུགས་མཐུན་ཁྲིམས་གཙང་ངང་བཞུགས་ཡོད་ཅིང་། མདོར་ན་ཕ་ཡུལ་ནས་བྱེས་སུ་ཕེབས་པའི་ཁྲོད་ན་གཞུང་ཆེན་བཀའ་པོད་ལྔ་ལ་སྦྱངས་པ་མཐར་ཕྱིན་པའི་དགེ་བཤེས་ལྷ་རམས་པ་དང། ཚོགས་རམས་པ། གླེང་བསྲེ་དགེ་བཤེས། སྔགས་རམས་པ་ལ་སོགས་པའི་བཀའ་རབ་འབྱམས་དགེ་བའི་བཤེས་གཉེན་བཅུ་ཕྲག་གཉིས་ཙམ་དང་། དེ་མིན་སློབ་གཉེར་བ་རྣམས་ཀྱི་གཞུང་ཆེན་བཀའ་པོད་ལྔས་གཙོས་བརྡ་སྤྲོད་རིག་གནས་ཚན་རིག་དང་བཅས་པར་སློབ་གཉེར་གནང་བཞིན་ཡོད་པར་མ་ཟད། བླ་སློབ་དམ་ཚིག་གཙང་ཞིང་། སྒྲིགས་ཁྲིམས་ཀུན་སྤྱོད་རྒན་བཀུར་གཞོན་བྱམས་ཚུན་ཆད་མིག་དཔེར་འོས་པ་ཞིག་གི་ཚོད་དུ་བཞུགས་ཡོད།
སྨྲས་པ།
མི་མེད་འབྲོག་དགོན་རྔོན་པའི་མི་གྲོང་ཆགས། །
མགོན་མེད་ཡུལ་དུ་སྤྲུལ་པའི་མགོན་པོ་ཕེབས། །
ཆོས་མེད་མཐའ་འཁོབ་དམ་པའི་ཆོས་མཆོག་དར། །
སྔོན་མེད་གསུམ་བྱུང་ཡིག་ཚོགས་སྔོན་དག་འཁོད། །ཅེས་སོ། །
༣༽ སྟོང་འཁོར་རིགས་གསུམ་མགོན་པོའི་གནས་རིའི་སྐོར་བསྡུས་ཙམ་བཤད་པ།
གཉིས་པ་ནི། སྐུ་བསྭོ་ཐོག་རྒྱལ་བའི་དབེན་གནས་ཞེས་མཆོག་དམན་ཀུན་ལ་ཉི་ཟླ་ལྟར་གྲགས་པའི་བར་ཁམས་སྟོང་འཁོར་ཡུལ་གྱི་གནས་མཆོག་འདི་ཉིད་ཀྱི་ངོ་སྤྲོད་མདོར་བསྡུས་ནི། ཐོག་མར་གནས་སྒོ་འབྱེད་པ་པོ་ནི་སློབ་དཔོན་པདྨ་འབྱུང་གནས་ཀྱི་དངོས་སློབ་གཡུ་སྒྲ་སྙིང་པོ་ཡིན། དེ་ཡང་ལོ་ཆེན་བཻ་རོ་ཙ་ན་རྒྱལ་མོ་ཚ་བ་རོང་ནས་སློབ་མ་གཡུ་སྒྲ་སྙིང་པོ་དང་མཉམ་དུ་འདིར་ཕེབས་པའི་ཚེ་གཡུ་སྒྲ་སྙིང་པོས་གནས་སྒོ་ཕྱེ། བཻ་རོ་ཙ་ནས་གཡུ་སྒྲ་སྙིང་པོ་ལ་མ་འོངས་པ་ན་ཕྱོགས་འདིའི་འགྲོ་བ་རྣམས་ལུགས་གཉིས་ཀྱི་སྒོ་ནས་སྐྱོང་བའི་བདག་པོར་འགྱུར་བར་ལུང་བསྟན་མཛད། དཔོན་སློབ་གཉིས་ཀ་ཡུན་རིང་དུ་འདིར་བཞུགས་ནས་གནས་འདི་བྱ་བྲལ་བ་དང་གྲུབ་པ་ཐོབ་པ་སྟོང་གི་སྒྲུབ་གནས་སུ་བྱིན་གྱིས་བརླབས་པར་མཛད། བཻ་རོའི་སྒྲུབ་ཕུག་ཆོས་གོས་འགེལ་ས་དང་བཅས་པ་ཡོད། སྤྱན་རས་གཟིགས་ཀྱི་གནས་ཀྱི་སྐོར་ལམ་ནང་དུ་ཕ་བོང་ཆེན་པོ་ཞིག་གི་ངོས་སུ་བྱ་ཆེན་པོ་ཞིག་གི་སྒྲོ་རྗེས་དང༌། ཕ་བོང་གི་འོག་ཏུ་རི་བོང་གི་རྣ་བ་གཉིས་དང་བཅས་མགོ་བོའི་རྗེས་གསལ་པོ་ད་ལྟར་ཡང་མཇལ་དུ་ཡོད་པ༌འདི་ནི། བཻ་རོ་དང་གཡུ་སྒྲ་གཉིས་ཀྱིས་གནས་ཀྱི་སྐོར་ལམ་གསར་དུ་བཏོད་པའི་ཚེ་གྲུབ་པའི་རྟགས་མཚན་གསལ་བར་བསྟན་པའི་རྗེས་ཡིན་འདུག དེ་ཡང་གཡུ་སྒྲས་རི་བོང་དུ་སྤྲུལ་ཏེ་ཕེབས་པ་ལ་བཻ་རོས་གླག་ཏུ་སྤྲུལ་ནས་དེད་པས་རྗེས་ཟིན་པ་ན་རི་བོང་ཕ་བོང་གི་གམ་དུ་བྲོས་པ་གླག་གིས་ཀྱང་དེར་བདས་པའི་རྗེས་ཡིན་གསུངས། དེའི་སྔོན་ནས་གུ་རུ་རིན་པོ་ཆེས་འགྲོ་བ་འདྲེན་པའི་དོན་དུ་གཏེར་གནས་བརྒྱ་དང་བརྒྱད་དུ་ཟབ་གཏེར་བརྒྱ་དང་བརྒྱད་མཛད་པ་དང༌། གནས་ཆེན་བརྒྱ་དང་བརྒྱད་དུ་སྤྲུལ་པ་གྲངས་མེད་འགྱེད་དེ་བྱིན་རླབས་མཛད་པའི་གྲས་ཡིན་པ་དང༌། ཕྱིས་སུ་མགོན་པོའི་གྲུབ་བརྙེས་དྷི་རི་ཆོས་གྲགས་ཁྱི་ཐུལ་བ། སློབ་དཔོན་དགའ་རབ་རྡོ་རྗེ། ལྷ་ལུང་དཔལ་གྱི་རྡོ་རྗེ། ཀུན་གཟིགས་༸པཎ་ཆེན་བཅུ་པ་མཆོག ༸ཞབས་དྲུང་རིམ་བྱོན། ཡོངས་འཛིན་གླིང་རིན་པོ་ཆེའི་སྐུ་ཕྲེང་གཉིས་པ་ལྡན་ཆོས་འཁོར་སྤྲུལ་སྐུ། ལམ་བྲག་རིན་པོ་ཆེ་རིམ་བྱོན། བྲག་དཀར་པཎྜི་ཏ། མཁར་གསར་རིན་པོ་ཆེ་རིམ་བྱོན། མཁན་ཆེན་འཇིགས་མེད་ཕུན་ཚོགས། ར་འཕྲོ་མཁན་པོ་ལེགས་བཤད་རྒྱ་མཚོ་སོགས་དངོས་སུ་ཞབས་བཅགས་མཛད་མྱོང་བ་དང༌། ལྷག་པར་ཡོངས་གྲགས་ལྟར་ལྷ་ལུང་དཔལ་གྱི་རྡོ་རྗེས་གླང་དར་བཀུམས་ནས་ཁམས་ཕྱོགས་སུ་བྲོས་པའི་སྐབས་སུ་གནས་ཆེན་འདིའི་འཇམ་དབྱངས་རིའི་མཐོ་ཞིང་ངོས་གཟར་བའི་བྲག་དཀྱིལ་ཆེས་ཤིན་ཏུ་བགྲོད་དཀའ་བའི་བྲག་ཕུག་ཏུ་འཚོ་གནས་མཛད་དེ་སྒོམ་སྒྲུབ་དང༌མཆོད་རྟེན་བཞེངས་གནང་མཛད། དེ་ཡང་རྗེས་སུ་འཐོར་བཤིག་ཏུ་གྱུར་ནས་སྨད་ཙམ་ད་ལྟའང་ལུས་ཡོད་པ་མཇལ་ཐུབ། བྲག་ཕུག་དེར་བགྲོད་དཀའ་བས་ཉེ་ཆར་བགྲོད་ཐུབ་པ་སུ་ཡང་བྱུང་མྱོང་མེད། དེའི་དབང་གིས་མཆོད་རྟེན་དེ་ད་དུང་ཡང་བསྐྱར་གསོ་བྱེད་མ་ཐུབ་པར་འཐོར་བཤིག་ཏུ་ལུས་ནས་ཡོད། དེ་ནི་ལྷ་ལུང་དཔལ་རྡོར་གྱིས་སྒྲིབ་སྦྱང་ཆེད་གནས་ཆེན་བརྒྱ་དང་བརྒྱད་དུ་མཆོད་རྟེན་བརྒྱ་རྩ་བརྒྱད་བཞེངས་པའི་གྲས་ཡིན། རྗེ་ཟླ་བ་རྒྱལ་མཚན་གྲྭ་ས་ནས་ཕྱིར་ཕེབས་མཛད་དེ་གནས་འདིའི་ཕྱག་རྡོར་རི་ངོས་ཀྱི་བྲག་ཕུག་ཏུ་སྒྲུབ་པ་ཉམས་ལེན་ཡུན་རིང་དུ་གནང་བས་ད་ལྟའང་ཟླ་བའི་ཕུག་པ་ཞེས་གྲགས་ནས་ཡོད། མ་ཟད་ཞབས་དྲུང་དང་པོ་རྗེ་ཟླ་བ་རྒྱལ་མཚན་གྱིས་སྟོང་འཁོར་དགོན་ཕྱག་མ་བཏབ་སྔོན་དུ་གནས་འདིའི་མདུན་གྱི་སྨན་ཆུ་ནད་རིམས་ཀུན་སེལ་ནས་གུ་རུའི་སྐུ་རྒྱུ་རྡོ་ལས་གྲུབ་པ། སྐུ་དབྱིབས་ཤིན་ཏུ་ལེགས་པ། སྐུ་ཚད་མཐོ་གང་ཙམ་ཡོད་པ། སྤུས་ཚད་ངོ་མཚར་བ། ཕྱག་མཚན་ཁ་ཊྭཱཾ་ག་མེད་པ་ཞིག་གཏེར་ནས་བཞེས་ཏེ། ཐུགས་ལ་ཕྱག་འདེབས་འགྱུར་གྱི་དགོན་གནས་དེ་གསར་རྙིང་གང་ལེགས་ཞིབ་བརྟག་གི་རྟེན་འབྲེལ་དུ་ལེགས་པར་དགོངས་སོ། །ཞབས་དྲུང་ཟླ་བ་རྒྱལ་མཚན་མ་ཟད་སྐུ་སྐྱེ་རྗེས་མ་རྣམས་ཀྱིས་ཀྱང་འདིར་རི་ཁྲོད་བཏབ་ནས་སྒྲུབ་པ་ཉམས་བཞེས་མཛད་ཡོད། ཞབས་དྲུང་གོང་མ་ལྔ་པ་ཆེན་པོ་འདིར་ཕྱག་དང་པོ་ཕེབས་སྐབས་སྐུ་འཁོར་རྣམས་ཀྱིས་སྐུ་གོང་མ་ཐམས་ཅད་ཀྱིས་འདིར་ཞབས་རྗེས་སོགས་གྲུབ་རྟགས་རེ་བསྟན་པས་ཁྱོད་ཀྱིས་ཀྱང་བསྟན་དགོས་ཚུལ་ཞུས་པས། ཞབས་དྲུང་གིས། སློབ་དཔོན་རིན་པོ་ཆེ་དང༌རྗེ་རིན་པོ་ཆེ་དག་གིས་བོད་ལུང་ཁོག་རྡོ་ལུས་པ་མེད་པར་ཞབས་རྗེས་འཇོག་ཐུབ་པ་ལ་ཅིའི་ཕྱིར་མ་བཞག་ཅེས་བཀའ་བཀྱོན་དང་བཅས་ཞབས་སར་བརྡབས་ཏེ་ཞབས་རྗེས་འཇོག་མྱོང་། ཞབས་དྲུང་དགུ་པས་གནས་འདིར་བདེ་མཆོག་བསྙེན་སྒྲུབ་དང༌། འཕོ་སྦྱངས་སྐབས་ལྟས་དང་རྟེན་འབྲེལ་ངོ་མཚར་བ་བྱུང༌། ཞབས་དྲུང་གོང་མ་ལྔ་པ་ཆེན་པོ་དང༌། གཏེར་ཆེན་ཆོས་རྒྱལ་གླིང་པ་སོགས་ཀྱིས་ཀྱང་ཟབ་གཏེར་བཞེས་ཏེ་སྒྲུབ་གནས་སུ་བྱིན་གྱིས་བརླབས་པར་ཞབས་དྲུང་དྲུག་པའི་གནས་ཡིག་ཏུ་འཁོད་ཡོད། སྤྱི་ལོ་ ༡༩༨༦ ཟླ་ ༨ ཚེས་ ༢༡ ལ་ཀུན་གཟིགས་པཎ་ཆེན་རིན་པོ་ཆེ་ཡོངས་འཛིན་དང་བཅས་ཆེད་དུ་གཉེར་ནས་གནས་འདིར་ཞིབ་གཟིགས་སུ་ཕེབས། གནས་དང་། རྣམ་འདྲེན་ལྔ་པའི་སྐུ་བརྙན་ཞིག་གསོ་ལེགས་གྲུབ་བྱུང་བ་ལ་བརྟན་བཞུགས་རབ་གནས། བསང་མཆོད་སོགས་མཛད། མང་ཚོགས་ལ་གནས་རི་སྲུང་སྐྱོབ་དགོས་པའི་བཀའ་སློབ་ནན་ཏན་ཆེན་པོས་གསུངས། ཡོངས་འཛིན་རྒྱ་ཡག་རིན་པོ་ཆེས། དུང་དཀར་རིགས་གསུམ་མགོན་པོ། །བཀྲ་ཤིས་གནས་ལ་ཆགས་ཡོད། །པཎ་ཆེན་སྣང་བ་མཐའ་ཡས། །མི་འཇིགས་གདན་ལ་བཞུགས་ཡོད། །ཅེས་པ་ལྗགས་རྩོམ་གནང༌། དེ་ལྟར་རྣམ་གཉིས་ཀྱིས་གནས་འདིར་བྱིན་རླབས་ཀྱི་མེ་ཏོག་གཏོར་མྱོང༌། ཡང་དེ་གའི་དགུན་དུས་སུ་མཁན་པོ་འཇིགས་མེད་ཕུན་ཚོགས་དང་། མཁས་དབང་ཚུལ་ཁྲིམས་བློ་གྲོས་སོགས་སྐུ་འཁོར་རྣམས་བསྟན་འགྲོའི་དོན་ཆེན་བསྒྲུབ་སླད་དུ་ཞབས་བསྐྱོད་གནང་ནས་གནས་དེའི་ནོར་བུ་ཁུག་ཏུ་ཞག་ཁ་ཤས་བཞུགས་འཇགས་བསྐྱངས། ཞབས་དྲུང་བཅུ་གཅིག་པ་རྗེ་བཙུན་བསྟན་འཛིན་ཐུབ་བསྟན་འཇིགས་མེད་དཔལ་བཟང་པོ་དང་སྤྱན་གཟིགས་གནས་ཀྱི་སྒྲུབ་ཕུག་ཆེན་པོའི་བྱམས་ཁང་སྟེང་མཇལ་འཕྲད་ཟབ་རྒྱས་གནང་། ཐུགས་ཡིད་གཅིག་ཏུ་གྱུར། སྐལ་ལྡན་གྱི་ཕོ་མོ་རྒན་གཞོན་དུ་མར་དགེ་བསྙེན་དང༌། དགེ་ཚུལ་སློང་བསྒྲུབས་པ་སོགས་བསྟན་འགྲོར་སྨན་པའི་ཐབས་ཚུལ་མཛད། ཁྱད་པར་འཇམ་དབྱངས་རིའི་གཤིན་རྗེ་ཚེ་བདག་སྒྲུབ་ཕུག་ནས་ཟབ་གཏེར་བཞེས་པའི་ལོ་རྒྱུས་ཡོད། གླིང་གེ་སར་གྱིས་བདུད་འདུལ་བ་ལ་རྗེས་དྲན་ཞུས་པ་སོགས་སོ་སྐྱེ་རང་ག་བའི་བློ་ལ་མི་ཤོང་བ་ལྟ་བུའི་མཛད་རྣམ་བསྐྱངས་ཡོད། བྱ་ལོར་ཁོང་ཉིད་འཁོར་བཅས་ལྕོག་རི་དགོན་དུ་ཕེབས་ཞོར་ལན་གཉིས་པར་ཕྱག་ཕེབས་གནང༌། གནས་བར་མའི་རྩེར་ཐུགས་ངལ་བསོ་ཞིང་ཐུགས་སྨོན་གང་རྒྱས་མཛད། དེ་ལྟར་གནས་འདིར་བྱིན་རླབས་ཀྱི་གྲུ་ཆར་སྔ་ཕྱི་ལན་གྲངས་དུ་མར་ཕབ་ཡོད། གནས་འདི་སྟོང་འཁོར་དགོན་རང་གིས་གནའ་ནས་ད་བར་རི་རྒྱ་ཀླུང་རྒྱ་བསྡམས་པ་དང༌། གནས་གྱི་སྐོར་ལམ་ནང་ནས་ཤིང་གཅོད་མི་དང་བྱི་བ་རི་དྭགས་གསད་མི་ཞེས་ལྷ་ལ་བཀའ་བསྒོ་གཉེར་གཏད་མཛད་པ་སོགས་ཐབས་བརྒྱ་ཇུས་སྟོང་གི་སྒོ་ནས་བདག་གཉེར་བྱས་ཡོད། གནའ་དུས་སུ་གནས་སྲུང་གཅིག་དང་གནས་ཀྱི་རི་ཁྲོད་སྐུ་གཉེར་གཅིག་སྟེ་གྲྭ་པ་གཉིས་རེ་འཇོག་སྲོལ་ཡོད་པ་དང༌། དེང་སང་གནས་སྲུང་གྲྭ་པ་གཅིག་རྒྱུན་སྡོད་བྱས་ཡོད། ལོ་རེའི་ཕག་ཟླའི་བཅུ་གསུམ་དང༌། དྲུག་པའི་ཚེས་བཞི་ལ་གྲྭ་མང་བསང་མཆོད་དུ་ཕེབས་ནས་མནོལ་བསང་སོགས་ཕུལ་དགོས་པ་དང༌། ཁྱད་པར་དྲུག་པའི་ཚེས་གསུམ་བཞིའི་སྐོར་ལ་ཡུལ་དགོན་མང་མ་འཛོམ་སར་བླ་མ་ཕར་ཕྱིན་ཚང་གིས་གནས་ཀྱི་ཁོར་ཡུག་སྲུང་སྐྱོབ་དང་གཙང་སྦྲའི་ཐད་ནས་ཁྲིམས་གཏམ་ཕུལ་བའི་ཐོག་གང་ཕྱོགས་ལ་ལྟ་རྟོག་མཛད་སྲོལ་ཡོད། དཀར་མཛེས་རྫོང་གིས་ས་ཁམས་བརྟག་དཔྱད་ལ་ཁ་གཡར་ཏེ་གནས་ཀྱི་ཀླུ་ཡི་བང་མཛོད་སོགས་ལ་གཏོར་བཤིག་ཤུགས་ཆེན་ཞིག་གི་གྲབས་གཤོམ་བྱས་ཀྱང་བསྭོ་ཐོག་མདའ་དང་གུག་ར་བ་མི་མང་གིས་དཔུང་ཤུགས་དང༌། སྔོན་པཎ་ཆེན་རིན་པོ་ཆེ་གནས་འདིར་གདན་འདྲེན་ཞུས་ཐུབ་པ་ལ་བརྟེན་གནོད་རྐྱེན་མ་ཐེབས་སོ།། གནས་འདིའི་སྐོར་རྒྱས་པ་མཁྱེན་འདོད་ན། གཏེར་སྟོན་ཆོས་རྒྱལ་གླིང་པས་གཏེར་ནས་དྲངས་པའི་གནས་ཡིག་དང་། རིགས་གསུམ་མགོན་པོའི་གནས་ཡིག་གསལ་བྱེད་མེ་ལོང་། ཞབས་དྲུང་ལྔ་པ་ངག་དབང་བསོད་ནམས་རྒྱ་མཚོས་མཛད་པའི་གནས་ཡིག ཞབས་དྲུང་དྲུག་པ་འཇམ་དཔལ་དགེ་འདུན་རྒྱ་མཚོས་མཛད་པའི་གནས་ཡིག མ་ཎི་པ་ཙནྡྲ་དྷྭ་ཛ་འམ་སྐུ་ཕྲེང་དང་པོ་སྟོང་འཁོར་ཟླ་བ་རྒྱལ་མཚན་གྱིས་མཛད་པའི་སྟོང་འཁོར་གནས་ཡིག་བཅས་སུ་གཟིགས་པར་འཚལ།
སྨྲས་པ།
དམ་པ་དུ་མའི་སྒྲུབ་གནས་བྱིན་ཆགས་ཤིག །
རིན་ཆེན་གཏེར་ཁ་ཕོན་ཆེའི་བང་མཛོད་ཅིག །
སྐལ་ལྡན་ཕྱག་བསྐོར་ཟམ་མི་ཆད་པ་ཞིག །
ཉམ་ཐག་ནད་པའི་སྲོག་སྐྱོབ་འདི་ཀོ་རྨད།།
དེ་ལྟར་གནས་རིའི་སྐོར་རོབ་ཙམ་ཞུས་ཟིན་པའི་ཞར་ལ་གནས་དེར་ཆགས་པའི་ཇོ་མོ་དགོན་གྱི་སྐོར་ཅུང་ཙམ་བརྗོད་ན། དེ་ཡང་སྟོང་འཁོར་གནས་ནང་ཇོ་མོ་དགོན་ནི། བྲག་དཀར་བླ་མ་བྱམས་པ་རབ་བརྟན་བྱང་ཆུབ་ཆོས་རྒྱལ་གྱིས་སྟོང་འཁོར་བསྭོ་ཐོག་གནས་ཀྱི་ཉེ་འདབས་དབེན་ལུང་ནང་དུ་ཕྱག་བཏབ། དེར་རྐུན་ཇག་ཧ་ཅང་མང་སྟབས་གཟིག་གདོང་གི་ཉེ་འདབས་གད་ཙི་ལ་སྤོས། དུས་འགྱུར་སྐབས་སྤྱི་བྱིངས་ལྟར་དགོན་དེ་ཡང་ཐོར་ཞིག་ཏུ་སོང་། སླར་སྤྱི་ལོ་ ༡༩༩༠ ལོར་སྐུ་བསྭོ་ཐོག་རྒྱལ་བའི་དབེན་གནས་སུ་སྤོས་ནས་རིམ་བཞིན་འདུ་ཁང་དང་སྡོད་ཤག་སོགས་གསར་བསྐྲུན་བྱས་ཤིང། བྲག་དཀར་རིན་པོ་ཆེ་བསྟན་འཛིན་བློ་བཟང་སྙན་གྲགས་ལ་སོགས་པའི་ཐུགས་རྗེ་བཀའ་དྲིན་གྱི་འོག་ནས་ད་ཆར་དགེ་ཚུལ་མ་ཇེ་མང་དུ་སོང་བ་རྣམས་ཀྱིས་ཡི་གེ་འབྲི་ཀློག་ནས་བཟུང་སུམ་རྟགས་དག་གསུམ་དང་། རྒྱལ་བའི་གསུང་རབ་ཀུན་གྱི་གནད་བསྡུས་པ་ལམ་རིམ་སོགས་ལ་ཐོས་བསམ་སློབ་གཉེར་བྱེད་བཞིན་ཡོད།
དུས་མཆོད་སྐོར་ལ། ཟླ་དང་པོའི་ནང་སྨན་བླ་མདོ་ཆོག་ཉིན་བདུན། ཟླ་གསུམ་པའི་ནང་བླ་མ་མཆོད་པའི་ཚོགས་མཆོད་ཉིན་བདུན། ཟླ་བཞི་པའི་ནང་སྨན་བླ་ཉིན་བདུན། རེ་འགར་ཟླ་ཕྱེད་བར་ཚོགས། ཟླ་བརྒྱད་པའི་ནང་བདེ་མཆོག་གི་ཆོ་ག་ཉིན་འགའ་ཚོགས། མདོར་ན་ལོ་གཅིག་གི་ཟླ་རེའི་ཚེས་བརྒྱད་དང་བཅོ་ལྔ། ཉེར་གཉིས། ཉེར་དགུ་བཅས་ལ་ཚོགས་འཁོར་རྒྱུན་དུ་ཚོགས་བཞིན་པ་སོགས་ཀྱིས་བྲག་དཀར་རིན་པོ་ཆེའི་ཕྱག་བཞེས་རྣམས་མི་ཉམས་རྒྱུན་འཛིན་བྱེད་བཞིན་ཡོད།
༤༽ དཔོན་རབས་རིམ་བྱོན་གྱི་སྐོར་དང་འབྲེལ་ཏེ་དེ་དག་གི་སྐབས་སུ་འཕོ་འགྱུར་ཇི་ལྟར་བྱུང་ཚུལ་སྐོར་བཤད་པ།
གསུམ་པ་དཔོན་རབས་རིམ་བྱོན་གྱི་སྐོར་དང་འབྲེལ་ཏེ་དེ་དག་གི་སྐབས་སུ་འཕོ་འགྱུར་ཇི་ལྟར་བྱུང་ཚུལ་སྐོར་བཤད་པ་ནི། ཡུལ་འདིར་སྔོན་གྱི་དཔོན་རབས་ཇི་ལྟར་བྱོན་ཚུལ་སྐོར་ཆ་ཚང་ཞིག་ཡི་གེར་འཁོད་པ་མི་སྣང་བས་རང་སྟོབས་ཀྱིས་འབྲི་བར་མི་སྤོབས་ཀྱང༌། ཡིག་རྙིང་འགའ་རེ་ལས་ཐོར་བུ་ཕྱོགས་བསྡུས་ཀྱིས་གཞིར་བྱས། ངག་རྒྱུན་ཁུངས་ཐུབ་ངེས་འགའ་རེས་ཁ་སྐོང་དང་བཅས་ཞིབ་འཇུག་གིས་གོང་འོག་བསྒྲིགས་ནས་འདིར་ཅུང་ཙམ་འགོད་པ་ལ། ཡུལ་འདིར་མི་གྲོང་ཐོག་མར་ཆགས་པ་ནས་བཟུང་དཔོན་པོ་བྱུང་མོད་ཀྱང་། དེ་དག་གི་ལོ་རྒྱུས་མི་སྣང་བས་རེ་ཞིག་བཞག །རྗེ་ཟླ་བ་རྒྱལ་མཚན་དབུས་ཕྱོགས་གྲྭ་ས་ནས་ཕྱིར་ཕེབས་མཛད་རྗེས་བོན་ཁང་སྒང་གི་སློབ་དཔོན་ལ་གནས་གཡར་ཞུས་པས་གཡར་ཁང་རི་སུལ་དབེན་གནས་འདེབས་ཡུལ་དུ་ཕུལ་བ་དང༌། བོན་དགོན་ཡོངས་ཀྱི་སྤྱི་དཔོན་ལྟ་བུ་བོན་ཁང་སྒང་ཚང་ཡིན་པར་གསུངས་པ་སོགས་ལ་དཔག་ན། སྐབས་དེར་ཡུལ་འདིའི་སྤྱི་དཔོན་ལྟ་བུ་བོན་གྱི་སློབ་དཔོན་དེ་ཡིན་ནམ་སྙམ། བོན་ཁང་སྒང་ཚང་གིས་དབེན་གནས་གདབ་ཡུལ་ཕུལ་སྐབས་གོང་གསལ་རྣམ་ཐར་ལྟར་རྟེན་འབྲེལ་ལེགས་འགྲིགས་བྱུང་བའི་དུས་དེ་ནས་བཟུང་ཡུལ་འདིའི་མི་རྣམས་རྗེ་ཟླ་བ་རྒྱལ་མཚན་གྱི་ཆབ་འབངས་སུ་འདུ་བའི་འགོ་བརྩམས། ཞབས་དྲུང་བཞི་པའི་སྐུ་དུས་ཤིག་ལ་ཨ་མདོའི་ཕྱོགས་ནས་སྔོན་རོང་བུ་ལོང་བའི་ཕའི་བརྒྱུད་པ་ཚ་བ་དང་ཨ་སྐྱ་ཟེར་བའི་དཔོན་གཉིས་ཡུལ་འདི་དབང་བསྒྱུར་འདོད་ཀྱིས་རིམ་བཞིན་འཁོར་ཏེ། རྗེ་ཟླ་བ་རྒྱལ་མཚན་དང་སྐུ་བརྒྱུད་གཅིག་སྟབས་དེའི་དཔོན་བརྒྱུད་ལ་འཚོ་ཐབས་ཀྱིས་བསྡད། འོན་ཀྱང་ཕན་ཚུན་ཀུན་སྲིད་དབང་ལ་མོས་པས་གཞི་རྩ་དེས་ཚ་བ་དང་ཨ་སྐྱ་ཟེར་བའི་དཔོན་གཉིས་དང༌། གཉུག་མར་གནས་པའི་དཔོན་བརྒྱུད་དག་ནང་མ་འཆམས་པར་རྩོད་གླེང་གི་གཞི་ཇེ་ཆེར་སོང༌། མཐར་ནང་ཁུལ་དུ་ཟིང་འཁྲུགས་མང་ཙམ་བསླངས་པ་ལ། ཞབས་དྲུང་བཞི་པས་ཟི་ལིང་དང་མཚོ་སྔོན་ཕྱོགས་ནས་རྩོད་གླེང་དང་འཐབ་འཛིང་མི་རིགས་ཚུལ་གྱི་ཕྱག་བྲིས་ལན་འགར་བཏང་གནང་མཛད་ཀྱང་ཕན་འབྲས་མ་བྱུང་བ་ལ་འདི་ཕྱོགས་སུ་དངོས་ཕེབས་ཀྱིས་འདུམ་འགྲིག་མཛད་དགོས་བྱུང༌། ཁོང་ཡང་རྒྱུན་བཞུགས་ལྟ་བུ་མཛད་ས་ཟི་ལིང་ཕྱོགས་སུ་ཡིན་ཡང་སྐབས་དེར་བསྟན་འགྲོའི་དོན་ཆེན་ཐུགས་ལ་དགོངས་ཏེ་ལོ་ཁ་ཤས་བར་ཁམས་སྟོང་འཁོར་དུ་བཞུགས་འཇགས་བསྐྱངས། དེའི་ཚེ་སྙི་བའི་སྟོད་གྲ་མདའ་ནས་སྨད་རྒྱ་མདའི་བར་གྱི་དཔོན་གཡོག་ཚང་མས་འགོ་གཏད་ཞུས་ཏེ་བཀྲ་ཤིས་དར་རྒྱས་གླིང་ཕྱག་བཏབ། དེ་ནས་བཟུང་སྙི་བ་སྟོད་སྨད་ཚང་མ་ཞབས་དྲུང་འདིའི་ཆབ་འབངས་སུ་འདུས། ཆོས་སྲིད་ལ་རང་དབང་བདག་ཐོབ་འབད་མེད་དུ་བྱུང༌། སྙི་སྐུ་ཚབ་ཅེས་པ་མངགས་སྲོལ་ཆགས། འདིའི་སྙི་བ་ལ་སྟོང་འཁོར་སྙི་བ་ཞེས་གྲགས། འདིར་བཞུགས་སྐབས་སུ་ཚ་བ་དང་ཨ་སྐྱ་གཉིས་ཀྱི་བརྒྱུད་པ་དཔོན་པོ་ཧ་ར་བཀའ་བཅུ་དང༌། རབ་འབྱམས་པ་སྦྱིན་པ་རྒྱ་མཚོ་ཟེར་བ་བྱུང་ཡོད་ལ། འདིར་བཞུགས་ནས་ལོ་ཤས་སོང་རྗེས་ཤར་ཕྱོགས་ནས་གདན་འདྲེན་པ་བྱུང་བས་ཧ་ར་དཀའ་བཅུ་བླ་བྲང་གཟིམ་ཆུང་དུ་སྐུ་ཚབ་ལ་བཞག སྦྱིན་པ་རྒྱ་མཚོ་ཞབས་ཕྱི་ལ་ཁྲིད་དེ་ཤར་ཕྱོགས་སུ་ཆིབས་བསྒྱུར་གནང༌། དེའི་ཚེ་གུ་ཤྲཱི་ཧན་གྱིས་ལྷ་ལྡན་ནས་ཞབས་དྲུང་ལ་མདོ་མཁར་དགོན་གསར་དུ་མཚོ་ཁའི་སྒར་གྱི་གཞི་མ་རྣམས་གསར་སྤོ་མཛད་དགོས་པའི་བཀའ་ཤོག་བསྩལ་དོན་བཞིན་སྦྱིན་པ་རྒྱ་མཚོས་དེར་གཙོ་འགན་བཞེས་ནས་ཞབས་དྲུང་དམུ་དགེར་ལོ་དྲུག་བཞུགས་རིང་ལེགས་གྲུབ་མཛད་རྗེས་ཞབས་དྲུང་གདན་ཞུས་བྱས་ནས་རབ་གནས་ཀྱི་དགའ་སྟོན་རྒྱ་ཆེར་སྤེལ། ཞབས་དྲུང་གིས་སྐུ་ཚབ་འཇོག་དོན་ལྟར་དཔོན་པོ་ཧ་ར་བཀའ་བཅུས་ཁམས་སྟོང་འཁོར་དུ་ཆོས་སྲིད་ཟུང་གི་གཙོ་འགན་བཞེས་ཤིང་། སྟོབས་ཤུགས་ནུས་གསུམ་འཛོམས་པའི་ཐོག་ནས་ཡུལ་དགོན་སྡེ་བདུན་བདག་པོ་བྱས་ཡོད། དེ་ནི་སྟོང་འཁོར་ཡུལ་སྤྱི་ལ་དབང་བའི་དཔོན་པོར་གྱུར་ཡོད་པར་མངོན་དེ། ཧོར་ནམ་མཁའ་རྒྱལ་མཚན་གྱིས་སྟོད་རྫ་ཁོག་མན་ཆད་ནས་སྨད་རྟའུ་ཡན་ཆད་མངའ་འོག་ཏུ་བསྡུས་ཀྱང་སྟོང་འཁོར་དེའི་མངའ་འོག་ཏུ་མ་འདུས་པར་ལུས། སྐབས་ཤིག་ལ་ཧོར་ནམ་མཁའ་རྒྱལ་མཚན་གྱིས་སྟོང་འཁོར་མངའ་འབངས་སུ་བསྡུ་དགོས་སྙམ་ནས་དམག་ཚོགས་བསྡུས་ནས་སྟོང་འཁོར་དམག་གིས་དབང་དུ་བསྡུ་བའི་གྲབས་གཤོམ་བྱེད་སྐབས། འདིའི་སྐུ་གཉེར་ཞིག་གི་མནལ་ལམ་དུ་མི་ཁྲབ་ཅན་ཞིག་གིས་གློ་སྙིང་ཞིག་ཁྱེར་ནས་མཆོད་སྟེགས་སྟེང་འཕངས་པ་རྨིས་པས་ཕྱི་ཉིན་ལ་ཁྲག་ཏིང་ཕོར་གང་མངོན་སུམ་དུ་ཡོད། དེའི་ནུབ་ཏུ་དཔོན་དེ་སྐུ་གཤེགས་པའི་ལོ་རྒྱུས་སྔོན་གྱི་ཡིག་རྙིང་ལ་འཁོད་ཡོད་པ་དང༌། ཧ་ར་དཀའ་བཅུ་རང་ཉིད་ཀྱང་དཔའ་མཛངས་ལྡན་པའི་དབང་གིས་སྟོང་འཁོར་གྱི་ས་ཆའི་རྒྱ་ཁྱོན་ཆེན་པོར་བསྐྱེད་ནས་རང་དབང་བདག་ཐོབ་གཙང་མ་བྱུང་ཡོད། ཏོ་ལོ་ཐང་ས་འབུར་གྱི་སྟེང་དང༌། ཁུ་རིའི་ལ་རྒན་དང༌། ཟླའི་ཐང་དཀར་མ་དང༌། རྒྱུ་མཚེར་ཞིང་ཁ་སོགས་ཕྱོགས་བཞིར་ཁམས་སྟོང་འཁོར་གྱི་ས་མཚམས་ཡིན་པའི་རྡོ་རིང་རྒྱ་བོད་གཉིས་ཀྱི་ཡི་གེར་ཡོད་པ་དག་བསླངས་པར་མཛད། དེ་ནི་ལོ་རྒྱུས་ཡིག་རྙིང་ལས་བྱུང་བར་མ་ཟད་ཕར་ཕྱིན་འཛིན་གྲྭའི་ཁྲིམས་གཏམ་དུ་གནའ་ནས་ད་བར་སྐྱ་སེར་གཉིས་ཀྱི་རྣ་ལམ་དུ་བསྒྲགས་དང་སྒྲོག་བཞིན་པ་འདི་རེད། དེ་ལྟར་དཔོན་པོ་ཧ་ར་དཀའ་བཅུ་ཟེར་བ་ནི་ཡུལ་འདིའི་དཔོན་རབས་སྔ་རྗེས་བར་གསུམ་ལས་ཆབ་སྲིད་མངའ་ཐང་དཔུང་སྟོབས་གང་ཐད་ནས་མི་དམན་པ་ཞིག་ཏུ་གྱུར། ཞབས་དྲུང་བཞི་པ་མྱ་ངན་ལས་འདས་རྗེས་སུ་ཧ་ར་དཀའ་བཅུ་དང་སྦྱིན་པ་རྒྱ་མཚོ་གཉིས་ཀྱིས་ཞབས་དྲུང་ལྔ་པ་སྐུ་བདག་དང་གོང་མའི་གསེར་ཁྲིར་མངའ་གསོལ་མཛད། ཁྱད་པར་ཞབས་དྲུང་ལྔ་པ་སྐུ་ན་ཕྲ་བའི་སྐབས་སུ་སྐུ་མདུན་དུ་གསོལ་དཔོན་གྱི་ཚུལ་དུ་བཞུགས་ནས་ཞབས་ཕྱི་ལེགས་བསྒྲུབས། ཧ་ར་དཀའ་བཅུ་འདས་རྗེས་ཞབས་དྲུང་ཡང་འདིར་མི་བཞུགས་སྟབས། རྡོ་དོ་ཚང་། བསྭོ་ཐོག་མདའ་ཚང་། འབྲུ་ཡག་ཚང་། འབུམ་མདོ་ཚང་དེ་རྣམས་ཀྱིས་བླ་བྲང་གི་མངའ་འོག་ནས་བུད་དེ་སྟོབས་ཤུགས་ཆེ་ཆུང་དང་རང་རང་གི་སྡེ་རྩོད་བྱས་ཏེ་ཟིང་འཁྲུགས་རིམ་བཞིན་བསླངས། འདི་དག་གིས་འཐབ་འཛིང་དགོས་དོན་གཙོ་བོ་ནི་སྟོང་འཁོར་ཡུལ་དགོན་གཉིས་ལ་དབང་སྒྱུར་འདོད་ཀྱི་དོན་རྐྱེན་ལས་བྱུང་བར་མངོན། དམེ་འཁྲུགས་དུ་མ་བྱས་མཐར་ཁག་སོ་སོར་ཡུལ་གྱར་དགོས་ཐུག ཞབས་དྲུང་ལྔ་པ་ཤར་ཕྱོགས་ནས་འདིར་ཆེད་དུ་གཉེར་ནས་ཕེབས་ཏེ། ཡུལ་གྱར་བ་རྣམས་ཕྱིར་བོས་ནས་སྡེ་ཇི་ལྟར་འཚམས་པ་རེ་གནང་ནས་བླ་བྲང་གི་ཆབ་འོག་ཏུ་ཕྱིར་བཅུག་སྟེ་ཞི་བདེ་ལ་བཀོད། དེ་ནས་བཟུང་དེང་སང་གི་བར་དུ་རྡོ་དོའི་དཔོན་ཚང་། འབྲུ་ཡག་དཔོན་ཚང་། འབུམ་མདོའི་དཔོན་ཚང་། བསྭོ་ཐོག་མདའ་ཚང་ཞེས་གྲགས་པ་འདི་རྣམས་བྱུང་བ་ཡིན་པར་སེམས། སྐྱེ་འཕྲེང་ལྔ་པ་འདི་གོང་མ་རྣམས་དེ་ཕྱོགས་སུ་འབྲེལ་ཆེ་བ་དང༌། ཀུན་མཁྱེན་གཉིས་པ་དང་ཁུ་ཚན་ཡིན་པ་དང༌། རང་གི་འཁྲུངས་ཡུལ་ཡང་ཡིན་པའི་དབང་གིས་ལྷ་ལྡན་དུ་ཡང་མ་ཕེབས་པར་རྒྱུན་དུ་ཟི་ལིང་ཕྱོགས་སུ་བཞུགས། འདིར་བསྐོས་མི་བཅོ་བརྒྱད་ཟེར་བའི་གྲས་ནས་སྐུ་ཚབ་རེ་མངགས་གཏོང་མཛད་ཀྱང་ཐམས་ཅད་ས་ཆུ་རྒྱུས་མེད་ལྟ་བུ་ཡིན་པའི་དབང་གིས་འོག་གི་དཔོན་ཆུང་རྣམས་ཀྱིས་བརྙས་བཅོས་དང་རྩིས་མེད་ཁོ་ན་བྱས་ཏེ་རིམ་གྱིས་དཔོན་མགོ་ལས་གཡོག་མགོ་མཐོ་བར་གྱུར། དར་ཧན་དཔོན་པོའི་སྐབས་སུ་མཚོ་སྔོན་དུས་འགྱུར་བྱུང་སྟེ་མདོ་ཁམས་ཐམས་ཅད་རྒྱའི་ས་སྒོ་འོག་ཏུ་ཚུད། དེའི་ཚེ་འདིར་སྐུ་ཚབ་ཨེར་ཁེར་དཔོན་པོ་ལ་དམག་གནང་ནས་དཔོན་ཆུང་རྣམས་དེའི་དབང་འོག་ཏུ་བསྡད་དགོས་པར་བཤད་ཀྱང༌། ཇི་བཞིན་མ་བྱུང་བར་རིམ་གྱིས་རྒུད་དེ་འོག་སྡེ་ཤོག་ཁག་མང་པོ་དཔོན་ཆུང་རྣམས་ཀྱིས་བཙན་དབང་གིས་འཕྲོགས། ཨེར་ཁེར་དམག་དཔོན་ལ་རྟ་སྒ་འཇོག་མི་རེ་དང་ཉིན་གཅིག་ཙམ་ལ་འགྲོ་གྲོགས་རེ་ཡང་རྙེད་དཀའ་བ་དང༌། ཟས་གོས་ཡན་ཆད་ལ་དཀའ་ངལ་བྱུང་ནས་ཉམས་དམས་པར་གྱུར། དཔོན་ཆུང་རྣམས་ཀྱིས་འཚེ་བ་ཧ་ཅང་ཆེ་སྟབས་མངའ་འོག་འདུས་པ་རྣམས་ཀྱང་རྒྱུ་མགོ་ལྟ་ཞོག་སྲོག་མགོ་ཡང་མི་ཐོན་པ་ལྟ་བུར་གྱུར་པའི་དབང་གིས་མང་པོ་ཞིག་ཡུལ་གྱར་དགོས་ཐུག །ཤུལ་དུ་ལུས་པ་རྣམས་ཀྱང་དགུ་གཏོར་དང་སྨོན་ལམ་སོགས་དུས་ཆེན་སོ་སོའི་སྐབས་སུ་ལམ་ཟུར་ནས་མ་གཏོགས་དཀྱིལ་ནས་འགྲོ་མི་ཕོད་པའི་ཚོད་དུ་གདའ། རང་རང་གིས་སྐུ་རིམ་སྒྲུབ་ཚེ་ཡང་ཡས་མས་ནས་རྟ་པ་ཞིག་ཡོང་བ་མཐོང་མ་ཐག་རྔ་སྦུབ་རྡུང་འཕྲོ་གཅོད་དགོས་པ་དང༌། མདང་མཚན་ལ་རྐུན་མས་བརྒྱབ་སོང༌། མཛོ་མོ་བཤས་སོང༌། ར་ལུག་བཤས་སོང༌། བརྒྱབ་སོང་དེད་སོང་ཟེར་བ་སོགས། གནོད་འཚེའི་ཁྲོད་དུ་རང་དབང་མེད་པར་དུས་འགྱུར་ཆེན་པོའི་སྐབས་ལྟར་གྱུར་ནས་དུས་རེ་ཞིག་སོང་ཡོད་པ་བཻཌཱུརྱ་མེ་ལོང་དང་ཞབས་དྲུང་དྲུག་པའི་རྣམ་ཐར་ལ་གསལ། དེ་ཡང་དཔོན་པོ་ཧ་ར་དཀའ་བཅུ་འདས་གྲོངས་སོང་ནས་དྲུག་པས་སྐུ་དབང་མ་ཟིན་བར་ཡུལ་འདིར་རྙོག་གྲ་རིམ་པ་བསླངས་ཏེ་ཞི་བདེ་མེད་པར་གྱུར་ཡོད། དྲུག་པ་སྐུ་ན་ཕྲ་བའི་སྐབས་སུ་འབྲུ་ཡག་དཔོན་ཚང་ལ་སོགས་པའི་དཔོན་ཆུང་རྣམས་ཕན་ཚུན་ཤིན་ཏུ་མི་མཐུན་ཞིང་ནང་ཆེན་གྱི་ཁ་འོག་ཏུ་མི་སྡོད་པར། སྡེ་དགེ། ཁྲོ་སྐྱབས། ཧོར་སོགས་ཀྱི་དཔོན་གཞན་དང་གཞན་ལ་འགོ་གཏད་དང་རྒྱབ་དཔུང་བྱས། བླ་མ་དང་དགོན་གནས་ལ་ལོག་སྒྲུབ་འབའ་ཞིག་བྱས། དྲུག་པ་སྐུ་བདག་དང༌། གོང་མའི་ཁྲི་ལ་མངའ་གསོལ་བྱེད་གྲབས་ཀྱི་ཚེ་ཡུལ་སྡེ་སྤྱི་ནས་བླ་མ་ལ་དད་པ་ཤིན་ཏུ་ཆེ་བས་དགོན་པར་བཞུགས་ན་སྙམ་པའི་འདུན་མོས་ཤུགས་དྲག་ཡོད་ཀྱང༌། དཔོན་ལ་ལས་ཁས་ལེན། ལ་ལས་ཁས་མི་ལེན་པས་ཐམས་ཅད་གྲོས་མཐུན་མ་བྱུང་བར་མ་ཟད། དཔོན་ཆུང་འགའ་རེ་ཞེ་ནག་པ་དང༌གདུག་རྩུབ་ཆེ་སྟབས། ན་ཤི་སོགས་བྱུང་ཚེ་ཕྱི་ཚུལ་གུས་པ་ལྟར་བྱེད་ཀྱང་དེ་མིན་གཞན་གྱི་ཚེ་གནོད་སྐྱེལ་ཅི་ཐུབ་བྱེད། དེ་དུས་སུ་ཁམས་སྟོང་འཁོར་དང༌། ཟི་ལིང་སྟོང་འཁོར་ཏེ། སྟོང་འཁོར་ཕན་ཚུན་གཉིས་སུ་སྤྲུལ་སྐུ་རེ་འཁྲུངས་ཡོད་སྐབས་ཡིན་པས། བྱང་ཕྱོགས་ཟི་ལིང་སྟོང་འཁོར་ནས་ཀྱང་གོང་མའི་ལུང་བསྟན་དང་ཐུགས་བསྐྱེད་ལྟར་སྟོང་འཁོར་ཕན་ཚུན་གཉིས་སུ་ཡང་སྲིད་རེ་ཕེབས་འོང་བ་མ་ཤེས་པར། ཁམས་སྟོང་འཁོར་ཤོར་དོགས་ཀྱིས་སྡེ་དགེ་རྒྱལ་པོ་ལ་འདིར་བླ་མ་ཁྲི་འདོན་བྱེད་མི་ཆོག་པ་ཡང་ཡང་བསྐུལ་བ་ལ་བརྟེན། འདིའི་དཔོན་ཆུང་དག་གིས་ཀྱང་སྡེ་དགེ་རྒྱལ་པོ་ལ་ངོ་འཛིན་བྱས་ཏེ་བླ་མ་ཁྲི་འདོན་བྱེད་པ་ལ་དགག་ངན་པ་སྣ་ཚོགས་བྱེད་པ་དང༌། རང་འདོད་རྔམས་པའི་ཧོར་དང་ཁྲོ་སྐྱབས་ཀྱི་དཔོན་དག་གིས་ཀྱང་མི་ངན་གདུག་རྩུབ་ཅན་རྣམས་ཀྱི་རྒྱབ་སྐྱོར་ཤུགས་ཆེར་བྱས་པའི་རྐྱེན་གྱིས་ཡུལ་དགོན་མང་པོ་བློ་གཟུར་གནས་དང་བསམ་བཟང་ཅན་རྣམས་ཀྱིས་རང་ཚུགས་ཐུབ་དཀའ་བ་ཙམ་ལས་ཡང་སྲིད་གསེར་ཁྲིར་མངའ་གསོལ་བ་ལ་ཐབས་ཤེས་ནུས་གསུམ་ཡོངས་སུ་བྲལ། དེའི་རྐྱེན་གྱིས་ཁམས་སྟོང་འཁོར་གྱི་བློ་གཟུར་གནས་རྣམས་དང་འཇམ་དཔལ་དགེ་འདུན་རྒྱ་མཚོའི་ཡབ་སོགས་ལྕང་སྐྱ་རོལ་པའི་རྡོ་རྗེའམ་ཡེ་ཤེས་བསྟན་པའི་སྒྲོན་མེ་རྒྱ་ནག་ཏུ་ཆིབས་བསྒྱུར་གནང་བར་དར་མདོར་ཕེབས་པའི་སྐུ་དྲུང་དུ་བཅར་ནས་ལོ་རྒྱུས་རྣམས་སྙན་སེང་ཞུས། ལྕང་སྐྱ་རིན་པོ་ཆེས་ཞབས་དྲུང་གོང་མ་རྣམས་བསྟན་པའི་རྩ་ལག་དམ་པ་ལགས་པས་རྒྱལ་བ་ཡབ་སྲས་ཀྱིས་སྐུ་ངོས་འཛིན་དགོས། ད་ལྟར་རྒྱལ་བ་རིན་པོ་ཆེ་མི་བཞུགས་ཀྱང་པཎ་ཆེན་རིན་པོ་ཆེར་ཐུགས་བརྟག་ཞུས་ན་ལེགས་ཚུལ་བཀའ་གནང་བ་དང་ཆབས་ཅིག ཡབ་ལ་པཎ་ཆེན་མདུན་དུ་འབུལ་རྒྱུའི་ཕྱག་བྲིས་ཀྱང་བསྩལ། དར་མདོའི་རྒྱ་དཔོན་ལ་སྤྲུལ་སྐུ་འདི་གཞན་གྱིས་བཙན་དབང་དང་ཤེད་ཁྱེར་མི་བཅུག་པར་ལྟ་སྐྱོང་ཡག་པོ་དགོས་པར་བཀའ་བསྒོ་མཛད། དེས་ནི་སྤྲུལ་སྐུ་ཚང་ཐུགས་གསོས་ཅུང་བདེ་བ་བྱུང༌། དེ་ནས་མི་སྣ་གོ་ཆོད་འགའ་ཞིག་གིས་པཎ་ཆེན་རིན་པོ་ཆེའི་མདུན་དུ་ཐུགས་བརྟག་ཞུས་པས་ཞབས་དྲུང་གི་སྐུ་སྐྱེ་འཁྲུལ་མེད་ཡིན། ཁྱེད་ཀྱི་བླ་མ་རྣམས་ཁམས་སོགས་ཀྱི་མི་སེམས་ཆུང་བློ་གྲོས་དམན་པའི་བུར་སྐྱེ་བས་ལན་ཞེས་བཀའ་བཀྱོན་ཡང་གནང༌། དེ་དང་གཅིག་མཚུངས་སུ་ཕུར་བུ་ལྕོག་ནས་ཀྱང་ཡང་སྤྲུལ་འཁྲུལ་མེད་དུ་ཞལ་བཞེས་གནང༌། འོན་ཀྱང་དེང་སང་རང་རེ་ལྟར། དེ་སྐབས་ཀྱི་མི་དཔོན་ཕལ་ཆེ་བ་ནི་རང་གི་འདོད་པ་ལྟར་མ་བྱུང་ཚེ་རྒྱལ་བ་ཡབ་སྲས་ཀྱི་བཀའ་ཡང་མི་བརྩི་བའི་ཚོད་དུ་སྣང༌། ཡིན་ནའང་ཉི་ཤར་སྦར་མོས་མི་ཁེག་ཟེར་བ་བཞིན་ཞབས་དྲུང་སྐུ་བསོད་དབང་ཐང་ཇེ་རྒྱས་དང་ཇེ་དར་ལ་སོང་སྟེ་དབྱར་མཚོའི་དཔལ་ལ་འགྲན་བཟོད་པར་གྱུར་ཏེ་གོང་མའི་གསེར་ཁྲི་མཐོན་པོ་ལ་མངའ་དབང་བསྒྱུར། འཇིག་རྟེན་གྱི་དཔེར། བསམ་པ་གཞན་ལ་ངན་ན། སྦྱོར་བ་རང་ལ་འཁོར་ཟེར་བ་ལྟར། སྐྱེས་བུ་དམ་པ་ལ་ལོག་སྒྲུབ་མཁན་རྣམས་ཇེ་རྒུད་སོང་ནས་མཐར་རང་གིས་རང་བརླག་པར་གྱུར། དེའི་སྐབས་སུ་ཞབས་དྲུང་གི་སྐུ་བསོད་དབང་ཐང་ལ་བསམ་སྦྱོར་ལོག་པར་སྒྲུབ་མཁན་རྣམས་ནི་ཟླ་ཁོག་པ་རྣམས་ཡིན་ཏེ། ཞབས་དྲུང་དྲུག་པ་དབུས་སུ་ཕེབས་ཁར་སྙི་ཕྱོགས་སུ་ཕེབས་པའི་ཚེ་ཟླ་ཁོག་པས་བྱེད་སྟངས་བཞིན་མིན་པར་ངེད་ཅག་གི་བཀའ་བཞིན་སྒྲུབ་ཡོད་པས་ཐུགས་བརྩེས་མ་བོར་བར་སླར་རང་ཡུལ་དུ་ཕེབས་དགོས་ཞེས་ཞུ་བ་ཕུལ་བ་ལྟར་རོ། །
སྤྱི་ལོ་ ༡༧༨༣ ལ་ཞབས་དྲུང་དྲུག་པ་རྒྱ་ནག་ནས་ཕྱིར་ཕེབས་གནང་ཚེ། གོང་མའི་སྐུ་ཚབ་ཨེར་ཁེར་དཔོན་པོས་ཐམ་ཁ་དང་དབང་ཆ་བླ་མ་ཉིད་ལ་ཕུལ། དེའི་ཕྱི་ལོའི་ཟླ་བ་དང་པོར་གོང་མ་ནས་མངགས་པའི་ཤན་ཐེ་ཧུ་འཁོར་བཅས་ཁམས་སྟོང་འཁོར་དུ་སླེབས། རྡོ་དོ། འབྲུ་ཡག བསྭོ་ཐོག་མདའ། འབུམ་མདོ་སོགས་སྟོང་འཁོར་ཡུལ་དགོན་སྡེ་བདུན་ལ་བླ་མ་ཉིད་ཀྱིས་དབང་བསྒྱུར་བ་ལས་གཞན་སུས་ཀྱང་དབང་བསྒྱུར་མི་ཆོག་པ་དང༌། ཟི་ལིང་སྟོང་འཁོར་དང༌། ཁམས་སྟོང་འཁོར་གཉིས་བླ་མ་སོ་སོས་དབང་བསྒྱུར་བ་ལས་སུས་ཀྱང་རྩོད་གླེང་བྱེད་མི་ཆོག་པའི་བཀས་བཅད་དམ་བསྒྲགས་མཛད། དེའི་རྗེས་ནས་ཝ་སྐྱེས་ཀྱིས་གདོང་ལྔའི་ང་རོ་མི་བཟོད་པ་བཞིན་སྟོང་འཁོར་ཕན་ཚུན་བར་གྱི་རྩོད་གླེང་དང༌། ཁམས་སྟོང་འཁོར་ནང་སྡེ་དག་གི་རྩོད་གླེང་རྣམས་ཞི་ནས་སྟོང་འཁོར་ཕན་ཚུན་བླ་མ་སོ་སོའི་འབངས་སུ་གྱུར་པ་དང༌། དཔོན་ཆུང་རྣམས་ཀྱང་སྟོབས་ཤུགས་ཉམས་ནས་སྔར་སྐུ་ཕྲེང་དྲུག་པས་སྡེ་ཆུང་རེ་གནང་ཡོད་པ་དག་ཀྱང་དབང་བསྒྱུར་མི་ཆོག་པར་རིམ་གྱིས་ཕྱིར་བླ་མའི་མངའ་འོག་ཏུ་འདུས།
གོང་གི་དཔོན་ཆུང་རྣམས་ལས་བསྭོ་ཐོག་མདའ་ཚང་ཅུང་མི་ཤུགས་རྒྱུ་སྟོབས་འཛོམ་པ་ཡིན་སྙམ། གང་ཞེ་ན། ལོ་རྒྱུས་ཡི་གེ་མིག་སྔར་མ་སོན་ཡང་ཟེར་སྲོལ་ཞིག་ལ་གོང་མའི་དམག་གིས་བསྭོ་ཐོག་མདའ་ཚང་གི་ཁང་པ་གཏོར། སྐུ་གསུང་ཐུགས་རྟེན་དང་ཤིང་ཆ་རྣམས་དགོན་པ་ལ་ཕུལ། མི་རྣམས་རྒྱ་ཡུལ་དུ་བཙན་ཁྲིད་བྱས་པ་དང༌། གནའ་དུས་སུ་འདུས་ཁང་སྦུག་གི་ལྷ་སྐུ་ཆེ་གྲས་བར་བར་དུ་བསྭོ་ཐོག་མདའ་ཚང་གི་ཡིན་ཟེར་བའི་སྐུ་ཆུང་ངུ་མང་ཙམ་ཡོད་པ་དང༌། དེ་བཞིན་གཏོར་ཁྲི་བྱ་རྒྱུའི་ཀ་གཞུ་མང་པོ་ཡོད་པ་དང༌། མ་ཟད་གནའ་ནས་ད་བར་གཏོར་རྒྱག་བྱེད་ས་འདི་ཡང་དེ་ཚང་གི་ཁང་ཤུལ་ཡིན་པ་རྣམས་རྒན་རབས་དག་གིས་ངག་རྒྱུན་ལ་གཅིག་མཚུངས་སུ་གསལ་བས་སོ། །
འབྲུ་ཡག་དཔོན་མེད་པར་གྱུར་ཚུལ་གྱི་ངག་རྒྱུན་ཞིག་ཀུན་ལ་རླུང་ལྟར་དུ་གྲགས་པ་བདེན་མིན་ཆ་མ་མཆིས་ཀྱང་འདིར་འགོད་ན། ལྕགས་མཁར་མ་བཙུགས་སྔོན་དུ་ཡིན་ནམ་འབྲུ་ཡག་དཔོན་སྤུན་མཆེད་གཉིས་སྟོང་འཁོར་བླ་བྲང་གིས་འདིར་འོང་དགོས་ཚུལ་གྱི་འབོད་པ་བཏང་བས། བསྭོ་ཐོག་མདའ་རྭ་གྱོང་ལ་ནས་ཡར་སོང་སྐབས་སུ་རྒན་མོ་ཕྱུགས་གཅིག་ཁོ་ན་དེད་པ་ཞིག་གིས་གནས་ཚུལ་ཚོར་ཚར་བས། འདི་གཉིས་ཁ་ཁྲག་དོང་ནང་དུ་འགྲོ་བ་ཨེ་ཡིན་ཞེས་གསང་བརྡ་བསྟན་པ་དེ་གཉིས་ཀྱིས་ཤེས་ཀྱང་མ་ཉན་པར་ཕོ་བྲང་དུ་རྒྱུགས། སྐབས་དེར་ཕོ་བྲང་ནས་བསྒུགས་ཟིན་པས་གཅིག་ཁོང་ཁྲོ་དྲག་ཏུ་སྐྱེས་ནས་ཤི་བས་མི་སྔོན་རྟ་སྔོན་ཞིག་དང༌། གཅིག་བྲོས་ཞོར་དུ་ཤི་བས་མི་དཀར་རྟ་དཀར་ཞིག་ཏུ་སྐྱེས་སོང་བར་གྲགས། དེ་ནས་གཅིག་འབྲུ་ཡག་གྲོང་དང༌། གཅིག་འོག་ཟླའི་གྲོང་གིས་གཞི་བདག་གི་ཚུལ་དུ་བསྟེན་གསོལ་བྱེད་པའི་སྲོལ་གནས་པར་མ་ཟད་ཞབས་དྲུང་རྣམས་ཀྱིས་དེ་དག་ལ་བསྐང་གསོ་དང་འབྲེལ་བའི་ཚོགས་མཆོད་དང༌། བསང་ཡིག་རྣམས་མཛད་ཡོད། གནའ་དུས་འབྲུ་ཡག་གྲོང་སྤྱི་ཚོགས་པའི་དབུས་སུ་མི་ཞིག་ལ་ལྷ་ཆས་ཀྱིས་སྤྲས་ཏེ་སྤྱན་འདྲེན་གཏོང་ཚེ་ལྷ་བབ་ནས་ཐོག་ཏུ་བབ་པའི་ལུང་བསྟན་གནང་བ་ཡོད་ཀྱང་། བར་སྐབས་ཤིག་ནས་སྔོན་ལྷ་བབ་སའི་མི་དེས་མི་ཞིག་བསད་རྗེས་མེད་པར་གྱུར་པར་གྲགས། དུད་ཚང་ཞིག་ལ་འབྲུ་ཡག་གླིང་དུ་རྡོ་ལེབ་ཆེན་པོ་མཐའ་ནས་རྩྭ་སྔོན་པོ་སྐྱེས་ཡོད་ས་ཞིག་ལ་ཁྱོད་ཚོས་རྡོ་འབུམ་ཞིག་བཞེངས་པར་གྱིས་དང་། ཁྱོད་ཚོ་མི་དར་རྒྱུ་དར་ཞིག་ཡོང་བར་འགྱུར་ཞེས་ལུང་བསྟན་ཐོག་བབས་གནང་མྱོང་བ་ནི་ལྷ་བབ་པ་དངོས་མཐོང་བྱུང་བའི་མི་དངོས་ཀྱིས་བདག་ལ་དེ་འདྲ་རེད་གསུངས། ལྕགས་མཁར་སྐབས་ཚེས་ཉེར་དགུ་ཉིན་བླ་བྲང་གིས་ཉི་རྟགས་བལྟས་ཏེ་བསྒྲལ་ཆོག་བྱེད་པ་ནི་འབྲུ་ཡག་དཔོན་ཆུང་བསད་པའི་ཉི་རྟགས་ལ་ལྟ་བ་ཡིན་པར་བཤད།
རྡོ་དོའི་དཔོན་ཤུལ་མེད་དུ་འགྲོ་ཚུལ་ནི་སྟོང་འཁོར་ཚང་གིས་སྡེ་དགེ་ལ་དཔུང་བཅོལ་བྱས་པས་སྡེ་དགེའི་དམག་འོངས། གཡོ་འཕྲུལ་གྱིས་ཐོག་མར་ཆུ་བཅད་པ་སོགས་ཐབས་བཀོད་སྣ་ཚོགས་པས་ཕམ་པར་བྱས་ཏེ་མཐར་བུ་གཅིག་མ་གཏོགས་ཐམས་ཅད་བསད་དེ་ཁང་པ་མེས་བསྲེགས་སོ། །
པཎ་ཆེན་དཔལ་ལྡན་ཡེ་ཤེས་དང༌། ལྕང་སྐྱ་རོལ་པའི་རྡོ་རྗེ་རྣམ་གཉིས་ཀྱི་བཀའ་དྲིན་ལས་ཞབས་དྲུང་དྲུག་པས་གོང་མ་ཆན་ལུང་གི་གསེར་ཞལ་མཇལ་ཕྱིན་ཆད་ཡུལ་དགོན་ཐམས་ཅད་མངའ་འོག་ཏུ་འདུས་ནས་ལུགས་གཉིས་ལ་དབང་འབྱོར་ཞིང་། བདེ་འཇགས་དང་མཐུན་ལམ་གྱིས་གཞི་བཟུང་བའི་རྫོགས་ལྡན་གསར་པ་ཞིག་འདྲེན། ཞབས་དྲུང་བདུན་པ་དགུང་གྲངས་བཅུ་གཉིས་སྐབས་མི་དབང་ཆོས་མཛོད་ཀྱིས་སྙི་དར་རྒྱས་གླིང་གི་ཕོ་བྲང་དུ་སྤྲུལ་སྐུ་གཉིས་པ་ཞིག་ངོས་འཛིན་ནས་བཞག་སྟེ། གདན་ས་ཕན་ཚུན་འདྲ་མཉམ་དང་། སྤྲུལ་སྐུ་གཉིས་སྔ་ཕྱི་མ་གཏོགས་ཁྱད་མེད་ཟེར་ནས་གླེང་གཞི་ཆེ་བར་བྱུང་ཡང་། དེའི་སྐབས་ལྕགས་མོ་དགེ་བཤེས་ནས་ལུང་བསྟན་གནང་བ་ལ། སྤྲུལ་སྐུ་ཅིག་ཤོས་ཀྱིས་ཁྱོད་ཀྱི་འཕྲིན་ལས་ལ་གནོད་མི་ནུས་གསུངས་པ་ལྟར་མི་རིང་བར་ལུང་བསྟན་ཐོག་བབས་བྱུང་ངོ་། །ད་ལྟའང་ཨ་རི་རྭ་རྒྱ་སྤྲུལ་སྐུ་ཟེར་བ་དེ་ནི་རྗེ་རིན་པོ་ཆེའི་མ་ཡུམ་དང་སྐུ་རྒྱུད་གཅིག་ཡིན་ཟེར་ནས་སྐྱེ་ཕྲེང་སྔ་རྗེས་ཀུན་དར་རྒྱས་གླིང་ཚང་གིས་གདན་འདྲེན་ཞུས་ཏེ་འབྲེལ་བ་བྱེད་ས་ཞིག་ཡིན། ཞབས་དྲུང་བདུན་པ་དགུང་ལོ་བཅོ་ལྔ་ལ་ཕེབས་དུས་སུ་དྲུག་པའི་སྐུ་རྒྱབ་ཆོས་མཛོད་དང་ཀུན་དགའ་སྤུན་མཆེད་གཉིས་ཀྱིས་དམག་དཔུང་ཤུགས་ཆེན་བཤམས་ནས་གཡུལ་འགྱེད་བྱས་ཏེ་སྟོང་འཁོར་སྟོད་ནས་གྲོང་ཚོ་ཁ་ཤས་བཙན་ཤེད་ཀྱིས་དབང་དུ་བསྡུས། དགོན་པ་ལ་སོགས་པ་ཐམས་ཅད་གྲོས་མཐུན་གྱིས་གནད་དོན་དེ་སྡེ་དགེ་རྒྱལ་པོ་ལ་སྙན་སེང་ཕུལ་བས། དེས་སོག་མོ་གཉེར་བ་བསམ་གཏན་ལ་རོང་དམག་སྟོང་མ་ལོན་ཙམ་དང༌། ཡ་འགོ་དཀར་མ་ལ་བྱང་དམག་སྟོང་མ་ལོན་ཙམ་ཁྲིད་བཅུག་ནས་ཡུལ་འདིར་མངགས་ཏེ་གཡུལ་འགྱེད་བྱས་ཀྱང་རྒྱལ་ཁ་མ་ཐོབ་པས་རྗེ་ཉིད་སྡེ་དགེར་ཡར་དྲངས་ཏེ་དམག་ཕྱིར་ལོག །དེ་ནས་བླ་བྲང་དང་ཆོས་མཛོད་བར་གྱི་གནས་ཚུལ་ཛ་དྲག་ཅན་དུ་གྱུར་ནས་རིང་ཙམ་འགོར། རྗེ་འདི་སྐུ་ནར་སོན་སྐབས་གྱོད་གཞི་ཞི་འཇགས་ཐད་ནན་ཏན་གནང་སྟེ། ཤེས་ལྡན་འགའ་གྲོགས་སུ་བཙལ་ནས་ཕན་ཚུན་འདུམ་འགྲིག་མཛད། འགྲིག་ཐབས་བརྟན་བརླིང་ཡོང་ཆེད་བསྭོ་ཐོག་གནས་མདུན་དུ་ཕན་ཚུན་ཀུན་ལ་བྲོ་བོར་བྱེད་བཅུག་ཡོད། མི་དབང་ཆོས་མཛོད་ནི་ཕོ་བྲང་དུ་བཞག་ནས་ཕྱི་ནང་གི་ཁྲིམས་གང་ལ་ཡང་ཐབས་མཁས་ཀྱིས་ལྟ་སྐྱོང་གནང་བཅུག དཔོན་མོ་ཆོས་མཚོ་ཟེར་བ་ཕྱག་རྫས་གང་ཡོད་བླ་མའི་དོན་དུ་ཟད་པར་མཛད་པ་ཡེ་ཤེས་མཁའ་འགྲོའི་སྤྲུལ་པར་གྲགས་པ་ཞིག་ཡོད་ལ། དེ་ནི་ཞབས་དྲུང་བདུན་བརྒྱད་གཉིས་ཀའི་སྐབས་སུ་ཡོད་པ་ཞབས་ཕྱི་ཆེ་བ་ཞིག་རེད། སྤྱི་ལོ་ ༡༨༦༡ ལ་ཞབས་དྲུང་བརྒྱད་པ་དགུང་གྲངས་བརྒྱད་སྐབས་སུ་ཉག་སྐེད་དཔོན་མགོན་པོ་རྣམ་རྒྱལ་གྱིས་ཉག་ཁོག་སོགས་དབང་བསྒྱུར་སྐབས་ཞབས་དྲུང་དཔོན་གཡོག་བརྒྱ་ཕྲག་ཙམ་གྱིས་འགོ་ལོག་ཕྱོགས་སུ་དྲངས་པའི་གྲ་སྒྲིག་བྱས་ཀྱང༌། གློ་བུར་དུ་ཉག་སྐེད་ཀྱི་དམག་དཔུང་ཤུགས་ཆེན་བྱུང་ནས་ཉག་ཁོག་ཏུ་དྲངས། དེར་ཁྱིམ་པ་ཕོ་མོ་མང་པོ་དང་ལྷན་ཅིག་ཏུ་ཞག་ལྔ་དྲུག་ཙམ་བཞུགས། དེའི་སྐབས་ནས་ཉག་དཔོན་གྱིས་སྟོང་འཁོར་དུ་ཚེ་དབང་ཚེ་རིང་ཟེར་བ་རྫོང་དཔོན་དུ་མངགས་གཏོང་བྱས་པ་དེས་ཆབ་སྲིད་བཟུང༌། དེས་དང་པོར་བྱ་ངན་གྱི་རིགས་འགའ་ཡིད་ལ་དྲན་ཀྱང་ལྷའི་རྟགས་མཚན་འོངས་པས་སྟབས་མ་བདེ་བར་གྲགས། དེ་ཡང་ངག་རྒྱུན་དུ་རྫོང་དཔོན་འདིས་བླ་བྲང་གི་མཐོ་ས་ཞིག་ནས་ཤར་དུ་བལྟས་ཏེ། དགོན་པ་ལ་ངན་གཡོ་ཞིག་ཅི་འདྲ་དགོས་སྙམ་དུ་ཡིད་ལ་ཤར་ཚེ། མི་ཆེན་པོ་གོས་དཀར་པོ་གྱོན་པ་ཞིག་དགོན་པའི་ཤར་སྒོ་ནས་རིམ་གྱིས་འོང་བ་འཕྲལ་དུ་རང་གི་རྒྱབ་ཏུ་སླེབས་ནས་རྡོག་གཡུགས་གཅིག་གིས་འོག་ཏུ་འཕངས་ཀྱང་དངངས་སྐྲག་ཆེ་ཙམ་ལས་སྐྱོན་མ་བྱུང་བར་སྔར་གྱི་མི་དེ་གློ་བུར་དུ་ཡལ། དེའི་རྐྱེན་པས་སྟོང་འཁོར་བ་ལ་ལྷ་ཡོད་ཟེར་ནས་ལྷ་ལ་ཡིད་ཆེས་ཆེ། ཕྱིར་ལོག་སྐབས་ལྷ་ལ་ཡིན་ཟེར་ནས་ཕྱག་གསུམ་འཚལ། གོང་གི་ལྷ་དེ་ནི་བླ་བྲང་གི་སྲུང་མ་ཚངས་པ་དུང་ཐོད་ཅན་ཡིན་ཞེས་རྒན་རབས་ཀྱི་ངག་རྒྱུན་ལ་ཡོད། དེ་ནས་ཤིང་བཟོ་འདུས་ཁང་གསར་རྒྱག་སོགས་བླ་མ་དང་དགོན་པ་ལ་ཞབས་འདེགས་ཅི་རིགས་བསྒྲུབས་ཡོད། ལོ་ལྔ་དྲུག་ཙམ་ཉག་སྐེད་ཀྱི་དབང་འོག་ཏུ་ཚུད་རྗེས། སྤྱི་ལོ་ ༡༨༦༦ ལ་གཞུང་དགའ་ལྡན་ཕོ་བྲང་དམག་གིས་ཉག་སྐེད་བཅོམ། གཞུང་གིས་མདའ་དཔོན་ཕོ་རོག་པ་རྫོང་དཔོན་དུ་མངགས། དེའི་ཚེ་སྟོང་འཁོར་བ་ལ་ཧོར་ཁག་གི་གྲས་སུ་རྫོང་སྲུང་སོགས་ཁྲལ་འཇལ་བར་འོང་དགོས་ཟེར་ཡང་། ངེད་སྟོང་འཁོར་བ་བླ་མའི་ལྷ་སྡེ་ཆུང་ཆུང་ཞིག་གིས་ཁྲལ་འཇལ་མི་ནུས་ཞུས་པས། ཕོ་རོག་པ་ཁོང་ཁྲོ་སྟེ་དམག་བསྡུས་ཏེ་དྲག་གནོན་བྱེད་ཚེ་བླ་ཁག་དཔོན་ཁག་མང་པོ་བར་པར་བྱུང་ནས་རྫོང་སྲུང་འགྲོ་མི་དགོས་པར་དངུལ་ཁྲལ་ཕྲན་བུ་ཞིག་གིས་འགྲིགས་པར་བྱས། རྗེས་སུ་ཕོ་རོག་པས་ཀྱང་ཞབས་དྲུང་ལ་སྐྱབས་འཇུག་ཞུ་བའི་ཕོ་ཉ་མདུན་དུ་མངགས་པ་སོགས་དད་གུས་གྱིས་ཞབས་ཕྱི་མང་དུ་བསྒྲུབས་ཡོད།
སྟོང་འཁོར་སྲས་པོ་ཞེས་པའི་བྱུང་རབས་ནི། ཞབས་དྲུང་དྲུག་པའི་སྐུ་རྒྱབ་ནས་བྱུང་བ་རེད་འདུག །དང་པོ་རྨོག་རི་གྲོང་དུ་གནས་ཡོད་ཀྱང་རྗེས་སུ་ཙེ་ར་གྲོང་དུ་གནས་སྤོ་བྱས། མི་དབང་ཆོས་མཛོད་ནས་བརྒྱུད་པ་བར་མ་ཆད་པ་ལ་སྲས་པོ་སྲས་མོ་ཞེས་པའི་ཐ་སྙད་འདི་བྱུང་བ་ཡིན། གང་ཡིན་ཞེ་ན། སྲས་པོའི་བརྒྱུད་པ་མཇུག་སྒྲིལ་བ་པོ་ཚུལ་ཁྲིམས་བསྟན་འཛིན་ནས་རྫིག་གཏམ་བཤད་པའི་འགོ་རྒྱན་དུ་དཔོན་ཆོས་མཛོད་ཀུན་དགའ་རིང་ཚུར་བཟུང་ཟེར་བ་དང༌། ཡིག་རྙིང་དུ་ཞབས་དྲུང་བདུན་པས་ཆོས་མཛོད་ལ་ཐོབ་ཐང་གོ་གནས་གནང་ཡོད་པ་གོང་དུ་བཀོད་པས་སོ། །མི་དབང་ཆོས་མཛོད་ནས་སྲས་ཚུལ་ཁྲིམས་བསྟན་འཛིན་བར་བྱུང་བ་རྣམས་མུ་ཏིག་བསྟར་ལ་བརྒྱུས་པ་ལྟ་བུའི་རིམ་པ་ཞིག་མི་གསལ་ཡང་མིང་ཐོག་ནས་རགས་ཙམ་འགོད་ན། སྲས་པོ་བསྟན་སྐྱོང༌། སྲས་མོ་གཡུ་སྒྲོན། སྲས་པོ་སྟོབས་རྒྱལ། སྲས་པོ་དངོས་སྒྲུབ། སྲས་པོ་ཚུལ་ཁྲིམས་བསྟན་འཛིན། སྟོབས་རྒྱལ་ནི་ཞབས་དྲུང་དགུ་པའི་སྐབས་སུ་ཡོད་ལ་སློབ་གཉེར་བ་ལ་དགོས་མཁོའི་ཆེད་དུ་དམིགས་ནས་དྲུག་པའི་གསུང་འབུམ་འགའ་རེའི་པར་གཞི་གསར་དུ་བསྐྲུན། དྲུག་པའི་གསུང་སྤར་མ་དག་གི་མཇུག་ཏུ་ལྷ་སྲས་སྟོབས་རྒྱལ་ཞེས་པ་དེའོ། །དངོས་གྲུབ་དང་སྤུན་མཆེད་ཡིན་ཟེར། གཡུ་སྒྲོན་ནི། དགོན་པ་དང་ཆོས་ལ་དད་ཞེན་ཆེ་ཞིང་དགོན་པར་ནམ་འོང་དུས་སུ་དགོན་པ་མཇལ་ས་ནས་རྟ་ལས་བབ་པ་དང་བསྐོར་བ་རེ་མ་ཆད་པ་བྱེད་ཟེར། ཚུལ་ཁྲིམས་བསྟན་འཛིན་ནི། ཞབས་དྲུང་བཅུ་པའི་སྐབས་སུ་སྲིད་དབང་བཟུང་ནས་སྟོབས་ཤུགས་ནུས་གསུམ་འཛོམས་པ། ཧོར་དཔོན་སོགས་གཞན་གྱིས་འགྲན་ཟླ་དང་བྲལ་བའི་ལོ་རྒྱུས་རྣམས་ཀུན་ལ་གྲགས། བཅོས་བསྒྱུར་སྐབས་སུ་གསེར་རྟར་ཆོས་ལུགས་ནང་བསྟན་མཐུན་ཚོགས་སུ་ཕེབས་རྗེས་སྐུ་གཤེགས་ནས་སྲས་པོ་ཞེས་པའི་ཐོབ་ཐང་གོ་གནས་རྣམས་མཇུག་ཡོངས་སུ་བསྒྲིལ།
སྨྲས་པ།
འཇིག་རྟེན་མཐོ་དམའ་དར་རྒུད་སྣ་ཚོགས་པ། །
ནམ་ཟླ་དུས་བཞིའི་འཕོ་འགྱུར་རེ་རེ་བཞིན། །
འོན་ཀྱང་མཁྲེགས་འཛིན་བླུན་རྨོངས་ལུག་ལྟ་བུས། །
དེ་ལ་བློ་ཁ་ཙམ་ཡང་ཕྱོགས་མི་ཤེས། །ཞེས་སོ།། །།
༥༽ དཔྱད་གཞིའི་ཡིག་ཆ་ཁག
བཞི་པ་དཔྱད་གཞིའི་ཡིག་ཆ་ཁག་ནི། ཕྲན་བདག་ནི་དུས་རབས་ཉི་ཤུ་པའི་ལོ་རབས་བདུན་ཅུར་འཇིག་རྟེན་འདིར་གསར་དུ་སྐྱེས་ཤིང་། གང་ཡང་མ་བསླབས་ཅི་ཡང་མི་ཤེས་པ་ཞིག་ལགས་མོད། འོན་ཀྱང་སྨྱུག་འཛིན་གྲལ་དུ་ཧམ་པས་འགྱིངས་ཏེ་དེར་ཁས་ཆེས་པའི་སྒོ་ནས་དམ་པའི་བཀའ་མ་བཟློག་ཙམ་དུ། སྟོང་འཁོར་ཞབས་དྲུང་སྐུ་ན་རིམ་བྱོན་གྱི་རྣམ་ཐར་བཻཌཱུརྱ་མེ་ལོང༌དང་། དགའ་ལྡན་ཆོས་འབྱུང་བཻ་སེར། ཐུའུ་བཀྭན་གྲུབ་མཐའ། མདོ་སྨད་ཆོས་འབྱུང་དེབ་ཐེར་རྒྱ་མཚོ། ཀློང་རྡོལ་གསུང་འབུམ། རྒྱལ་མཆོག་ལྔ་པ་ཆེན་པོས་མཛད་པའི་རྒྱལ་བ་བསོད་ནམས་རྒྱ་མཚོའི་རྣམ་ཐར། རྒྱལ་མཆོག་ལྔ་པའི་རང་རྣམ་དུ་ཀཱུ་ལའི་གོས་བཟང་། ཞབས་དྲུང་གཉིས་པ་ཡོན་ཏན་རྒྱ་མཚོའི་གསང་རྣམ། ལམ་བྲག་བསྐལ་བཟང་རྣམ་རྒྱལ་གྱིས་མཛད་པའི་ཞབས་དྲུང་དྲུག་པའི་རྣམ་ཐར། ཞབས་དྲུང་དགུ་པའི་གསུང་མགུར། འདིའི་དགོན་གཞུང་གི་བཅའ་ཡིག་ཆེན་མོ། འདིའི་མཚན་ཉིད་གྲྭ་ཚང་གི་ཆོས་འབྱུང༌། དུང་དཀར་ཚིག་མཛོད། བོད་རྒྱ་ཚིག་མཛོད། ཚེ་ཏན་ཞབས་དྲུང་གི་བསྟན་རྩིས་ཀུན་ལས་བཏུས་པ་སོགས་ལས་འདི་སྐོར་གྱི་ལོ་རྒྱུས་ཐོར་བུ་རྣམས་བསྡུས་པའི་སྟེང་ཡུལ་འདིའི་མཁས་བདེན་དག་གི་ངག་རྒྱུན་མི་ཉུང་བ་ཞིག་གིས་ཁ་སྐོང་མཚམས་སྦྱོར་ཅུང་ཟད་དང་བཅས་སུག་ལས་སུ་བགྱིས་ཁུལ་བྱས་པ་འདི་ལ་མཁས་པ་བཞད་གད་སློང་བའི་རྒྱུ་ཞིག་ལས་ཅང་མ་མཆིས་མོད། འོན་ཀྱང༌། སུ་ཡིན་རུང་གཟུ་བོའི་བློས་ཡང་ཡང་དཔྱད་དེ་འཇུག་ན་ཡུལ་འདིའི་འདས་ཟིན་པའི་དམ་པ་སོ་སོའི་མཛད་འཕྲིན་དང༌། ཡུལ་སྲོལ་གོམས་གཤིས་སོགས་ལོ་རྒྱུས་རིང་མོ་ཞིག་ལ་ཚོར་བ་ངེས་ཅན་ཞིག་སྦྱིན་ཐུབ་པས་དོན་མེད་ཁོ་ན་མ་ཡིན་ནོ་ཞེས་ཞུ་མཆིད་དུ་འབུལ་ལོ།།
སྨྲས་པ།
རྗེ་བཙུན་བརྟན་པའི་འཁོར་ལོ་ལོ་རབས་དཔག་མེད་གོང་རོལ་དུས། །
དུས་སྙིགས་སྐྱེས་བུ་མི་བསྲུན་བསྲུན་བྱེད་ལམ་མཆོག་བཀྲི་ཕྱིར་དུ། །
ཐུགས་མཆོག་བསྐྱེད་པའི་རྣམ་སྤྲུལ་སྤྲུལ་སྐུ་དྷྭ་ཛའི་མཚན་ཅན་དེས། །
བཏབ་ལོ་ལྔ་བརྒྱ་ལྷག་བརྒལ་བརྒལ་དཀའ་རིང་གནས་ཆོས་སྡེ་འདིའི། །
གསར་རྙིང་ཟུང་འབྲེལ་དཀར་ཆག་སྐབས་གསུམ་པ་ཡི་རྒྱུད་མང་མཆོག །
མཆོག་གསུམ་མ་དད་གཟིམས་ལས་སློང་བྱེད་ཕྱོགས་ཀྱི་མཛེས་མས་རྡུང༌། །
རྡུང་མཁན་ཕྲན་རང་གནས་འདིར་མི་ཚེའི་འཚོ་བ་རྟག་ཏུ་རོལ། །
རོལ་བའི་ལན་ལྡོན་སུག་བྲིས་ཉུང་ངུ་འདི་ཡིས་འཇལ་བར་བྱེད། །
བདག་ནི་ཐོས་ཉུང་དགེ་སྦྱོང་གྱི་ན་བ། །
བདག་ནི་རྣམ་དཔྱོད་བློ་གྲོས་རྟུལ་པོ་ཅན། །
བདག་ནི་ཤེས་བྱའི་གནས་ལ་སྦྱངས་པ་དམན། །
བདག་ནི་བ་གླང་རྗེས་འབྲང་ཅིས་མ་ཡིན། །
གཞན་ཡང་སྤྱི་བརྟོལ་བསྐྱེད་དེ་ཧམ་པ་ཡིས། །
གཞན་ཟེར་རྗེས་ཟློས་ལད་མོ་བྱེད་བཞིན་དུ། །
གཞན་འགའ་རང་དང་སྐལ་མཉམ་མཆེད་གྲོགས་ལ། །
གཞན་ཕན་སེམས་ཀྱིས་ཀུན་ནས་བསླངས་ཏེ་བྲིས། །
མཆོག་ལུང་དབྱུ་གུས་བསྣུན་ཚེ་ཕྲན་རྔ་ལ། །
སྒྲ་འབྱུང་མི་འབྱུང་རང་དབང་མ་མཆིས་མོད། །
འོན་ཀྱང་དམ་པ་དགྱེས་པའི་མཆོད་སྤྲིན་ཞིག །
སྤྲོ་ནུས་མིན་ཡང་བཀའ་བཞིན་བསྒྲུབ་ཕྱིར་རེམས། །
དགོན་འདིའི་དབུ་ཁྲིད་སྔོན་རྟིང་དང༌། །
དུས་རབས་ལས་བྱེད་འགའ་རེས་ནི། །
ནན་བསྐུར་སྔ་ཕྱིའང་མ་བཟློག་ཕྱིར། །
སྙོམ་ལས་པ་ཡིས་ཆེད་བརྗོད་བྱས། །
ཞིབ་མོས་བརྟག་དཔྱད་ཡང་ཡང་བགྱིས། །
དུས་རབས་ལོ་རབས་གོང་འོག་བསྒྲིགས། །
གནའ་རབས་རྒན་པོའི་ངག་སྒྲོས་རྣམས། །
ཡི་གེའི་གཟུགས་སུའང་བདག་གིས་སྤེལ། །
གདོད་ནས་རྣམ་དག་བྱུང་རབས་ཀུན་གསལ་ངོས། །
ནོར་འཁྲུལ་འགལ་བའི་ནག་ནོག་གིས་སྦགས་ན། །
མཁས་རྣམས་ཐུགས་རྗེའི་དག་བྱེད་ཨ་མྲྀ་ཏས། །
འགྲོ་རྣམས་ཐོག་མེད་སྒྲིབ་དང་ལྷན་ཅིག་ཁྲུས། །
སྒྲོ་སྐུར་རབ་བཏགས་ཚིག་གིས་མ་བསླད་པར། །
དྲང་བདེན་ངག་དང་དཔེ་རྙིང་ལས་བཏུས་ཏེ། །
རང་བློས་ལྕོགས་པའི་རྒྱས་བསྡུས་འཚམས་པ་ཞིག །
མེས་པོའི་རིག་འཕྲུལ་དབྱངས་གསལ་གཟུགས་ཀྱིས་བཀྲམ། །
འདི་ཉིད་བསྐྲུན་པའི་རྣམ་དཀར་ཟླ་འོད་ཀྱིས། །
ཐུབ་བསྟན་ཀུ་མུད་འདབ་རྒྱ་ཡོངས་གྲོལ་ཞིང༌། །
འགྲོ་ཀུན་ཞི་བདེའི་བསིལ་དཔལ་རྟག་རོལ་ནས། །
ཀུན་མཁྱེན་གོ་འཕང་ངལ་གསོ་ཐོབ་པར་ཤོག །
ཅེས་པ་འདི་ནི་སྟོང་འཁོར་ཞབས་དྲུང་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་ཐུབ་བསྟན་འཇིགས་མེད་དཔལ་བཟང་པོའི་ཞལ་སྔ་ནས་ཀྱིས་དཔག་ཚད་དུ་མས་ཆོད་པའི་འཕགས་ཡུལ་ཆོས་ཀྱི་འབྱུང་ཁུངས་ནས་འདི་འདྲའི་མཁོ་དགོས་ཆེ་བའི་བཀའ་གསུང་གསེར་གྱི་ཐིགས་པ་ཞིག་ཕྲན་རང་གི་སྤྱི་བོར་བབས་པའི་གོ་སྐལ་བཟང་པོ་མངོན་དུ་གྱུར་པ་དང་བསྟུན། ཆོས་གྲོགས་རྡོ་རྗེའི་མཆེད་པོ་དང༌། མཛད་རྗེས་ཆེ་བའི་དད་ལྡན་གང་མང་ཞིག་གིས་ལམ་སྟོན་དང་གྲོགས་དན། ཐུགས་ཁུར་དང་རྒྱབ་སྐྱོར་ཚད་མེད་འོག །བརྡ་སྤྲོད་རིག་གནས་ཁབ་པིར་གྱི་རྗེས་སུ་འགྲོ་བ། སྐྱེས་སྦྱངས་ཤེས་རབ་ཁབ་རྩེ་ལས་ཕྲ་བ། བཟང་བྲལ་བཟང་པོའི་མིང་འཛིན། དགེ་སློང་ཚུལ་ཁྲིམས་བཟང་པོར་འབོད་པས་ལྷག་བསམ་དང་ཕུགས་འདུན་ཞིག་གིས་མཚམས་སྦྱར་ཏེ། སྟོན་པའི་འདས་ལོ་ ༢༥༥༦ བོད་རབ་བྱུང་བཅུ་བདུན་པའི་བགྲང་བྱའི་ཉག་མ་ཉེར་དྲུག་པ་ནནྡའམ་དགའ་བ་ཞེས་པའི་ཆུ་འབྲུག་ལོའི་དབོ་ཟླ་བའི་དཀར་ཕྱོགས་དགའ་བ་གཉིས་པ། སྤྱི་ལོ་ ༢༠༡༢ ཟླ་ ༣ ཚེས་ ༢༨ ལ་ཕལ་ཆེར་གྲུབ་པར་བྱས་ཤིང་། སླར་ཡང་སྣོན་འཕྲི་སྤོར་གཅོག་དག་བཅོས་ཅི་རིགས་བགྱིས་མཐར་མེ་སྤྲེལ་ས་ག་ཟླ་བའི་ཚེས་ ༡ དང་། སྤྱི་ལོ་ ༢༠༡༦ ཟླ་ ༥ ཚེས་ ༧ ལ་ངེས་དོན་མཁས་གྲུབ་དུ་མའི་བསྟི་གནས་སྟོང་འཁོར་དགོན་བཀྲ་ཤིས་ལྷུན་པོའམ་གསང་ཆེན་རྡོ་རྗེ་གླིང་དུ་མཇུག་ཡོངས་སུ་གྲུབ་པར་བྱས་སོ།། །།དགེའོ།།