འབྲས་བུ་སྐུ་གཉིས་ཟུང་འཇུག་གཏན་ལ་དབབ་པ།
དེ་ལ་གཞི་ལམ་འབྲས་བུའི་གནས་སྐབས་ཐམས་ཅད་དུ་ཟུང་དུ་འཇུག་པ་ཡང༌། ཐོག་མར་འབྲས་བུ་ཟུང་དུ་འཇུག་པ་གཏན་ལ་དབབ་པར་བྱ་སྟེ། དེ་ལྟ་བུའི་མཚན་ཉིད་ཡང་རྒྱུ་རྐྱེན་གྲུབ་པ་ལ་འབྲས་བུ་གྲུབ་པའི་ངེས་པ་མེད་ཅིང༌། འབྲས་བུ་གྲུབ་ན་རྒྱུ་རྐྱེན་གྲུབ་པའི་ཕྱིར་རོ། །
སྒྲོ་འདོགས་མཐར་ལྟུང་གཞན་ལུགས་དགག་པ།
དེ་ལ་ཡང་གཉིས་ལས། དང་པོ་སྒྲོ་འདོགས་ཀྱི་མཐར་ལྟུང་བའི་གཞན་ལུགས་དགག་པ་ནི། ཁ་ཅིག་སྣང་བ་འདི་ཆོས་སྐུ་ཡིན་ནོ་ཞེས་སྒྲོ་འདོགས་མཛད། འདི་ནི་སྔོན་གྱི་མཁས་པ་རྣམས་ཀྱིས་བཀག་ཟིན་པའི་ཕྱིར་འདིར་མ་སྤྲོས་སོ། །
སྐུར་འདེབས་མཐར་ལྟུང་གཞན་ལུགས་དགག་པ།
གཉིས་པ་སྐུར་འདེབས་ཀྱི་མཐར་ལྟུང་བའི་གཞན་ལུགས་དགག་པ་ནི། ཁ་ཅིག་དོན་དམ་པའི་སངས་རྒྱས་ཡོད་པའང་མ་ཡིན་མེད་པའང་མ་ཡིན། ཡོད་མེད་གཉིས་ཀའང་མ་ཡིན། ཡོད་མེད་གཉིས་ཀ་མ་ཡིན་པའང་མ་ཡིན་ཞེས་སྨྲ་ཞིང་འདི་དབུ་མ་པའི་གྲུབ་མཐའ་མཐར་ཐུག་ཡིན་ཏེ། དེའི་རྒྱུ་མཚན་ཡང༌། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་མིན་པའང་མིན། །མུ་བཞི་ལས་ནི་རྣམ་གྲོལ་བ། །དེ་ཉིད་དབུ་མ་པའི་རིག། ཅེས་དང༌། ཡོད་མིན་མེད་མིན་ཡོད་མེད་མ་ཡིན་ཡོད་མེད་ལས་གཞན་དུའང༌། བརྟག་པར་མི་ནུས། ཞེས་སོགས་ཀྱིས་བསྟན་ཏོ་ཞེས་ཟེར་རོ། །ལུང་འདི་སྒྲ་ཇི་བཞིན་དུ་འཛིན་པ་སྔོན་ཡང་མང་དུ་བྱུང་ཞིང༌། ད་ལྟ་ཡང་མཁས་པ་ཕལ་མོ་ཆེ་འདི་ཁོ་ནའི་རྗེས་སུ་འབྲང་བ་མང་ངོ༌། །
འདི་འགོག་པ་ལ་ཞི་བའི་སྒོ་ནས་ལུང་རིགས་ཀྱི་དགག་སྒྲུབ་བཅུ་ཕྲག་གཅིག་དགོད་པ་དང༌། དྲག་པོའི་སྒོ་ནས་ལྟ་ངན་གྱི་མགོ་ལ་དངོས་འགལ་གྱི་ཐོག་དབབ་པ་གཉིས་ལས།
ཞི་བའི་ལུང་རིགས་ཀྱི་དགག་སྒྲུབ་དགོད་པ།
དང་པོ་ནི། དེ་ལ་དོན་དམ་པའི་སངས་རྒྱས་དེ་མུ་གཉིས་པ་མེད་པ་མ་ཡིན་པ་དེ་བདེན་ཏེ་ཡོད་པའི་ཕྱིར་རོ། །མུ་གསུམ་པ་ཡོད་མེད་གཉིས་ཀ་མ་ཡིན་པ་ཡང་བདེན་ཏེ། ཡོད་མེད་གཉིས་འགལ་བའི་ཕྱིར་རོ། །མུ་བཞི་པ་མིན་པ་འདི་འོག་ཏུ་བརྒལ་ལན་གྱིས་གཏན་ལ་འབེབས་སོ། །མུ་དང་པོ་དོན་དམ་པའི་སངས་རྒྱས་ཡོད་པ་མ་ཡིན་ཞེས་པ་འདི་ནི། སངས་རྒྱས་ལ་སྐུར་བ་འདེབས་པ་ཡིན་ཞིང༌། མདོ་སྡེ་དུ་མ་ལས། འཇིག་རྟེན་རྒྱང་འཕེན་པའི་གསང་ཚིག་འཛིན་པ་ཞེས་གསུངས་པ་དེ་འདི་ཡིན་ནོ། །དེ་ལ་ཁ་ཅིག་ན་རེ། རྒྱང་འཕེན་པ་ནི་ལས་རྒྱུ་འབྲས་སྐྱེ་བ་སྔ་ཕྱི་ཐམས་ཅད་མཁྱེན་པ་སོགས་མེད་པར་འདོད་པ་ཡིན་ལ། ཁོ་བོ་ཅག་ནི་དོན་དམ་པའི་སངས་རྒྱས་ཡོད་པར་མི་འདོད་པས། རྒྱང་འཕེན་པའི་གསང་ཚིག་འཛིན་པར་མི་འགྱུར་རོ་ཞེ་ན། འོ་ན་འདི་ལ་ལན་ཐོབ་མཛོད་ཅིག
དེ་ཡང་དགག་སྒྲུབ་བཅུའི་དང་པོ་ནི། དོན་དམ་སངས་རྒྱས་ཆོས་ཀྱི་སྐུ་ཡོད་པ་མ་ཡིན་ན། ཀུན་རྫོབ་ལོངས་སྐུའི་རྟེན་དུ་གྱུར་པའི་དོན་དམ་ཆོས་སྐུ་ཡོད་པ་མ་ཡིན་པར་འགྱུར། ལོངས་སྐུའི་རྟེན་ཆོས་སྐུ་ཡོད་པ་མ་ཡིན་ན། སྤྲུལ་སྐུས་གསུངས་པའི་ཆོས་རྣམས་ཡོད་པ་མིན་པར་འགྱུར། སྤྲུལ་སྐུས་གསུངས་པའི་ཆོས་ཡོད་པ་མིན་ན་ཆོས་ལ་བླང་དོར་བྱེད་པའི་དགེ་འདུན་དང་སྐྱེས་བུ་ཡོད་པ་མིན་པར་འགྱུར། ཆོས་ལ་བླང་དོར་བྱེད་མཁན་གྱི་སྐྱེས་བུ་ཡོད་པ་མ་ཡིན་ན། ལས་རྒྱུ་འབྲས་ལ་བླང་དོར་བྱེད་པ་པོ་ཡོད་པ་མིན་པར་འགྱུར། ལས་རྒྱུ་འབྲས་ལ་བླང་དོར་བྱེད་པ་པོ་ཡོད་པ་མིན་ན། ལས་རྒྱུ་འབྲས་ལ་བླང་དོར་བྱེད་པ་ལས་བྱུང་བའི་འབྲས་བུ་མཐོ་རིས་དང་ཐར་བ། འཁོར་བ་དང་ངན་སོང་སོགས་མེད་པར་ཁས་བླང་དགོས་ཏེ། རྒྱང་འཕེན་པའི་གསང་ཚིག་འཛིན་པ་དང་བཟོད་བྱུང་མི་གདའ་འམ། འདི་རྣམས་ལས་ལུང་གི་སྒྲུབ་བྱེད་ནི་ཡུམ་བསྡུས་པ་ལས། ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། །ཞེས་སོགས་དང༌། རིགས་པའི་སྒྲུབ་བྱེད། རྟེན་མེད་པའི་བརྟེན་པ་མི་སྲིད་པའི་ཕྱིར་དང༌། ཁྱབ་བྱེད་མེད་པའི་ཁྱབ་བྱ་མི་སྲིད་པའི་ཕྱིར་དང༌། རྒྱུ་མེད་པའི་འབྲས་བུ་མི་སྲིད་པའི་ཕྱིར་རོ། །
འདི་དག་ཐལ་འགྱུར་དུ་བཀོད་ན། རྒྱུ་མ་དམིགས་པ་དང༌། ཁྱབ་བྱེད་མ་དམིགས་པ་དང༌། རང་བཞིན་མ་དམིགས་པའི་ཐལ་འགྱུར་སོགས་སུ་འགྱུར་རོ། །
དེ་རྣམས་དཔེའི་སྒོ་ནས་སྒྲུབ་པ། དཔེར་ན་ནམ་མཁའ་ཡོད་པ་མིན་ན། རླུང་གི་རྟེན་དུ་གྱུར་པའི་ནམ་མཁའ་ཡོད་པ་མིན་པར་འགྱུར། རླུང་གི་རྟེན་ནམ་མཁའ་ཡོད་པ་མིན་ན། བརྟེན་པ་རླུང་མེད་པར་འགྱུར། ནམ་མཁའ་ལ་བརྟེན་པའི་རླུང་ཡོད་པ་མིན་ན། རླུང་ལ་བརྟེན་པའི་ཆུའི་ཕུང་པོ་ཡོད་པ་མིན་པར་འགྱུར། རླུང་ལ་བརྟེན་པའི་ཆུའི་ཕུང་པོ་ཡོད་པ་མ་ཡིན་ན། ཆུའི་ཕུང་པོ་ལ་བརྟེན་པའི་ས་ཆེན་ཡོད་པ་མིན་པར་འགྱུར། ཆུའི་ཕུང་པོ་ལ་བརྟེན་པའི་ས་ཆེན་ཡོད་པ་མ་ཡིན་ན། ས་ལ་བརྟེན་པའི་འགྲོ་བ་རྣམས་ཡོད་པ་མིན་པར་འགྱུར། ས་ཆེན་པོ་ལ་བརྟེན་པའི་འགྲོ་བ་རྣམས་ཡོད་པ་མ་ཡིན་ན། འགྲོ་བ་རྣམས་ལས་རྒྱུ་འབྲས་ལ་སྤྱོད་པའང་མེད་པར་གྱུར་པ་ལས་དེ་ལྟར་ཡང་མ་ཡིན། ནམ་མཁའ་ལ་རླུང་བརྟེན་དེ་ལ་ཆུའི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། །སེམས་ཅན་ལས་ལ་སྤྱོད་པའི་རྒྱུ་ཡང་དེ་འདྲའོ། །ཞེས་གསུང་པའི་ཕྱིར་འགྲོ་བ་ལས་རྒྱུ་འབྲས་ལ་བླང་དོར་བྱེད་པ་ཡོད་པས་འགྲོ་བ་ཡོད་པར་གྲུབ། འགྲོ་བ་ཡོད་པས་འགྲོ་བའི་རྟེན་ས་གཞི་ཡོད་པར་གྲུབ། འགྲོ་བའི་རྟེན་ས་གཞི་ཡོད་པས་སའི་རྟེན་ཆུའི་ཕུང་པོ་ཡོད་པར་གྲུབ། སའི་རྟེན་ཆུ་ཡོད་པས་ཆུའི་རྟེན་རླུང་ཡོད་པར་གྲུབ། ཆུའི་རྟེན་རླུང་ཡོད་པས་རླུང་གི་རྟེན་ནམ་མཁའ་ཡོད་པར་གྲུབ་པོ། །
དཔེ་དེ་བཞིན་དུ་ལས་རྒྱུ་འབྲས་ལ་བླང་དོར་བྱས་པ་ལས་བྱུང་བའི་འབྲས་བུ་མཐོ་རིས་ཐར་པ་དང༌། འཁོར་བ་ངན་སོང་སོགས་ཡོད་པས་ལས་རྒྱུ་འབྲས་ལ་བླང་དོར་བྱེད་པའི་སྐྱེས་བུ་ཡོད་པར་གྲུབ། ལས་རྒྱུ་འབྲས་ལ་བླང་དོར་བྱེད་པའི་སྐྱེས་བུ་དང་དགེ་འདུན་ཡོད་པས་དམ་པའི་ཆོས་ཡོད་པར་གྲུབ། དམ་པའི་ཆོས་ཡོད་པའི་ཕྱིར་ཆོས་གསུང་པའི་སྤྲུལ་སྐུ་ཡོད་པར་གྲུབ། སྤྲུལ་སྐུ་ཡོད་པའི་ཕྱིར་དེའི་རྟེན་ལོངས་སྐུ་ཡོད་པར་གྲུབ། ལོངས་སྐུ་ཡོད་པའི་ཕྱིར་ལོངས་སྐུའི་རྟེན་དོན་དམ་པའི་ཆོས་སྐུ་ཡོད་པར་གྲུབ་པོ། །འདི་རྣམས་ཀྱི་ལུང་གི་སྒྲུབ་བྱེད། ཆོས་ཀྱི་སྐུ་ལ་བརྟེན་ནས་ལོངས་སྤྱོད་རྫོགས་པའི་སྐུ་འབྱུང་ངོ་ལོངས་སྤྱོད་རྫོགས་པའི་སྐུ་ལ་བརྟེན་ནས་སྤྲུལ་པའི་སྐུ་འབྱུང་ངོ༌། །ཞེས་བྱམས་མགོན་གྱིས། དང་པོ་གཉིས་པའི་རྟེན་ཡིན་ནོ། །ཞེས་དང༌། དོན་འདི་རྟེན་དང་བཅས་པ་བསྟན། །ཅེས་དང༌། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དོ། །ཞེས་སོགས་ཀྱིས་གྲུབ་པོ། །རིགས་པའི་སྒྲུབ་བྱེད་འབྲས་བུ་ཡོད་ན་རྒྱུ་ཡོད་པའི་ཕྱིར་དང༌། ཁྱབ་བྱ་ཡོད་ན་ཁྱབ་བྱེད་ཡོད་པའི་ཕྱིར་དང༌། བརྟེན་པ་ཡོད་ན་རྟེན་ཡོད་པའི་ཕྱིར་རོ། །
གཞན་ཡང་དགག་སྒྲུབ་གཉིས་པ། མོ་གཤམ་གྱི་བུ་ཡོད་པ་མིན་ན། མོ་གཤམ་གྱི་བུའི་སྟོབས་སོགས་ཀྱི་ཡོན་ཏན་ཡོད་པ་མིན་པ་བཞིན་དུ། དོན་དམ་པའི་སངས་རྒྱས་ཆོས་སྐུ་དེ་ཡོད་པ་མ་ཡིན་ན། དོན་དམ་ཆོས་སྐུ་ལ་མངའ་བའི་སྟོབས་བཅུ་མི་འཇིགས་པ་བཞི་མ་འདྲེས་པའི་ཆོས་བཅྭོ་བརྒྱད་ལ་སོགས་པའི་ཡོན་ཏན་རྣམས་ཀྱང་ཡོད་པ་མིན་པར་འགྱུར་བ་ལས་དེ་ལྟར་ཡང་མ་ཡིན་ཏེ། རྒྱུད་བླ་མ་ལས། དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་རྣམས་དང་ལྡན། །ཞེས་པའི་ལུང་གིས་གྲུབ་པོ། །
དགག་སྒྲུབ་གསུམ་པ་གཞན་ཡང་རི་བོང་རྭ་ཡོད་པ་མ་ཡིན་པའི་ཕྱིར། རི་བོང་རྭ་རྟོགས་པར་དཀའ་བ་མཆོག་དུ་ཟབ་པ་མཆོག་དུ་ཕྲ་བ་སོགས་ཡོད་པ་མིན་པ་བཞིན་དུ། དོན་དམ་ཆོས་སྐུ་ཡོད་པ་མིན་ན་དོན་དམ་ཆོས་སྐུ་རྟོགས་པར་དཀའ་བ་མཆོག་ཏུ་ཟབ་པ་མཆོག་ཏུ་ཕྲ་བ་རྣམས་ཀྱང་ཡོད་པ་མིན་པར་འགྱུར་བ་ལས་དེ་ལྟར་ཡང་མ་ཡིན་ཏེ། མདོ་དགོངས་འགྲེལ་ལས་དོན་དམ་པའི་ཆོས་ཀྱི་སྐུ་ནི་མཆོག་ཏུ་རྟོགས་པར་དཀའ་བ་མཆོག་ཏུ་ཟབ་པ་མཆོག་ཏུ་ཕྲ་བ་ཞེས་གསུངས་པའི་ཕྱིར་དོན་དམ་ཆོས་སྐུ་ཡོད་པར་གྲུབ་པོ། །
དགག་སྒྲུབ་བཞི་པ། གཞན་ཡང་ནམ་མཁའི་མེ་ཏོག་དེ་ཡོད་པ་མིན་པའི་ཕྱིར། ནམ་མཁའི་མེ་ཏོག་དེ་སུས་ཀྱང་མི་མཐོང་བ་བཞིན་དུ། དོན་དམ་ཆོས་སྐུ་ཡོད་པ་མིན་ན་དོན་དམ་ཆོས་སྐུ་དེ་སུས་ཀྱང་མི་མཐོང་བར་འགྱུར་པ་ལས། དེ་ལྟར་ཡང་མ་ཡིན་ཏེ། རྒྱུད་བླ་མར། ནང་གི་དམ་པ་ཆོས་སྐུ་ནི། །ཡེ་ཤེས་མིག་གིས་མཐོང་བར་འགྱུར། །ཞེས་དང༌། །ཆོས་དབྱིངས་རང་བཞིན་གང་ཡིན་དེ་རྟོགས་པ། །མཉམ་པར་བཞག་པའི་རྣལ་འབྱོར་པ་ཡིས་མཐོང༌། །ཞེས་དང༌། སོ་སོ་རང་གིས་རྟོགས་བྱའི་ཕྱིར། །ཞེས་དང༌། སོ་སོ་རང་གིས་མཐོང་བ་ཉིད། །ཅེས་དང༌། མདོ་སྡེ་དུ་མ་ལས། དོན་དམ་པའི་ཆོས་ཀྱི་དབྱིངས་ནི་སོ་སོ་རང་གིས་རིག་པའི་ཡེ་ཤེས་ཀྱི་སྤྱོད་ཡུལ་ལོ། །ཞེས་སོགས་མང་དུ་གསུངས་པའི་ཕྱིར། དོན་དམ་ཆོས་སྐུ་ཡོད་པར་གྲུབ་པོ། །
དགག་སྒྲུབ་ལྔ་པ། གཞན་ཡང་མོ་གཤམ་གྱི་བུ་ཡོད་པ་མིན་པའི་ཕྱིར། མོ་གཤམ་གྱི་བུ་འགྲུབ་པར་བྱ་བའི་ཕྱིར་དུ་འབད་པ་བྱས་པ་ལ་དགོས་པ་མེད་པ་བཞིན་དུ། དོན་དམ་ཆོས་སྐུ་ཡོད་པ་མིན་ན་ཆོས་སྐུ་འགྲུབ་པར་བྱ་བའི་ཕྱིར་དུ། ལམ་ཡེ་ཤེས་ཀྱི་ཚོགས་བསགས་པ་ལ་དགོས་པ་མེད་པར་འགྱུར་བ་ལས་དེ་ལྟར་ཡང་མ་ཡིན་ཏེ། བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱི་དབུ་མའི་རིགས་པ་དྲུག་ཅུ་པར། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ཤིང༌། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་པོ་ཐོབ་པར་ཤོག། ཅེས་དང༌། དབུ་མ་རིན་ཆེན་འཕྲེང་བར། སངས་རྒྱས་རྣམས་ཀྱི་གཟུགས་ཀྱི་སྐུ། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་དེ་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་སོགས་ལུང་རྣམ་དག་མང་དུ་གསུངས་པའི་ཕྱིར་དོན་དམ་ཆོས་སྐུ་ཡོད་པར་གྲུབ་པོ།
དགག་སྒྲུབ་དྲུག་པ། གཞན་ཡང་རུས་སྦལ་གྱི་སྤུ་ཡོད་པ་མ་ཡིན་པའི་ཕྱིར། རུས་སྦལ་གྱི་སྤུ་ལྷུན་གྱིས་གྲུབ་པ་ཡོད་པ་མ་ཡིན་པ་བཞིན་དུ། དོན་དམ་ཆོས་སྐུ་ཡོད་པ་མ་ཡིན་ན་དོན་དམ་ཆོས་སྐུ་འདུས་མ་བྱས་ཤིང་ལྷུན་གྱིས་གྲུབ་པའང་མིན་པར་འགྱུར་བ་ལས་དེ་ལྟར་ཡང་མ་ཡིན་ཏེ། རྒྱུད་བླ་མར། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །ཞེས་གསུངས་པའི་ཕྱིར་དོན་དམ་ཆོས་སྐུ་ཡོད་པར་གྲུབ་པོ། །
དགག་སྒྲུབ་བདུན་པ། མོ་གཤམ་གྱི་བུ་ཡོད་པ་མ་ཡིན་པའི་ཕྱིར་མོ་གཤམ་གྱི་བུའི་རང་དོན་ཕུན་ཚོགས་ཡོད་པ་མིན་པ་བཞིན་དུ། དོན་དམ་ཆོས་སྐུ་ཡོད་པ་མིན་ན་དོན་དམ་ཆོས་སྐུའི་རང་དོན་ཕུན་ཚོགས་ཀྱི་ཡོན་ཏན་ཡོད་པ་མིན་པར་འགྱུར་བ་ལས་དེ་ལྟར་ཡང་མ་ཡིན་ཏེ། རྒྱུད་བླ་མར། དང་པོ་གཉིས་གྱིས་རང་དོན་ཏེ། །ཞེས་པ་དང༌། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དོ། །ཞེས་དང༌། བདག་ཉིད་ཀྱི་ནི་འབྱོར་པའི་གནས། །དམ་པའི་དོན་གྱི་སྐུ་ཡིན་ཏེ། །ཞེས་གསུང་པའི་ཕྱིར་དོན་དམ་ཆོས་སྐུ་ཡོད་པར་གྲུབ་པོ། །
དགག་སྒྲུབ་བརྒྱད་པ། གཞན་ཡང་མི་སྲིད་པའི་ཆོས་ཡོད་པ་མིན་པ་དེའི་ཕྱིར། མི་སྲིད་པའི་ཆོས་དེ་ཕལ་བ་རྣམས་ཀྱི་བསམ་གྱིས་མི་ཁྱབ་པའི་གནས་སུ་ཡང་མི་རུང་ཞིང༌། ཐམས་ཅད་མཁྱེན་པའི་ཡང་ཡུལ་དུ་མི་འགྱུར་བ་བཞིན་དུ། དོན་དམ་ཆོས་སྐུ་ཡོད་པ་མིན་ན་དོན་དམ་ཆོས་སྐུ་དེ་ཐ་མལ་པ་རྣམས་ཀྱི་བསམ་གྱིས་མི་ཁྱབ་པའི་གནས་དང༌། ཐམས་ཅད་མཁྱེན་པའི་ཡང་ཡུལ་དུ་མི་འགྱུར་བ་ལས་དེ་ལྟར་ཡང་མ་ཡིན་ཏེ། རྒྱུད་བླ་མར། དྲི་བཅས་དེ་བཞིན་ཉིད་དང་དྲི་མ་མེད། །དྲི་མེད་སངས་རྒྱས་ཡོན་ཏན་རྒྱལ་བའི་མཛད། །གང་ལས་དཀོན་མཆོག་དགེ་བ་གསུམ་འབྱུང་བ། །དོན་དམ་གཟིགས་པ་རྣམས་ཀྱི་ཡུལ་ཉིད་དོ། ཞེས་དང༌། དེ་ཡང་རྣམ་བཞི་གོ་རིམ་བཞིན། །རྒྱུ་བཞི་ཡིས་ནི་བསམ་མི་ཁྱབ། །ཅེས་སོགས་གསུངས་པའི་ཕྱིར་དོན་དམ་ཆོས་སྐུ་ཡོད་པར་གྲུབ་པོ། །
དགག་སྒྲུབ་དགུ་པ། གཞན་ཡང་རི་བོང་གི་རྭ་དེ་ཡོད་པ་མིན་པའི་ཕྱིར། རི་བོང་རྭ་སྐྱབས་གནས་མཐར་ཐུག་ཏུ་མི་འགྱུར་བ་བཞིན་དུ། དོན་དམ་ཆོས་ཀྱི་སྐུ་ཡོད་པ་མིན་ན་དོན་དམ་ཆོས་ཀྱི་སྐུ་དེ་སྐྱབས་གནས་མཐར་ཐུག་མིན་པར་འགྱུར་ལ། དེ་ལྟ་ན་འདུས་བྱས་གང་ཡིན་པ་དེ་ནི་བརྫུན་པ་བསླུ་བའི་ཆོས་ཅན། མི་བདེན་པ། མི་རྟག་པ་གང་མི་རྟག་པ་དེ་སྐྱབས་མ་ཡིན་ནོ། །ཞེས་གསུངས་པས་ཀུན་རྫོབ་གཟུགས་སྐུ་ནི་མཐར་ཐུག་གི་སྐྱབས་གནས་མ་ཡིན་པར་བཤད་ལ། དེའི་ཕྱིར་མཐར་ཐུག་གི་སྐྱབས་གནས་མི་སྲིད་པར་འགྱུར་ལ། ལམ་ལ་འབད་པ་བྱས་པ་ལ་ཡང་མཐར་ཐུག་གི་དགོས་པ་མེད་པར་འགྱུར་མོད་དེ་ལྟར་ཡང་མ་ཡིན་ཏེ། མཐར་ཐུག་གི་སྐྱབས་གནས་ཡོད་པར་དྲིན་ལན་བསབ་པའི་མདོ་ལས་གསུངས་ཏེ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་གསོལ་བ། སངས་རྒྱས་གང་ལ་སྐྱབས་སུ་འགྲོ་བ་ལགས།བཀའ་སྩལ་པ། ཆོས་ཀྱི་སྐུ་ལ་སྐྱབས་སུ་འགྲོ་ཡི་གཟུགས་ཀྱི་སྐུ་ལ་ནི་མ་ཡིན་ནོ། །གསོལ་པ་ཆོས་གང་ལ་སྐྱབས་སུ་འགྲོ་བ་ལགས། བཀའ་སྩལ་པ། དོན་དམ་པའི་ཆོས་ལ་སྐྱབས་སུ་འགྲོ་ཡི་བསྟན་པའི་ཆོས་ལ་ནི་མ་ཡིན་ནོ། །གསོལ་པ་དགེ་འདུན་གང་ལ་སྐྱབས་སུ་འགྲོ་བ་ལགས། བཀའ་སྩལ་པ། དོན་དམ་པའི་དགེ་འདུན་ལ་སྐྱབས་སུ་འགྲོ་ཡི་ཀུན་རྫོབ་ཀྱི་དགེ་འདུན་ལ་ནི་མ་ཡིན་ནོ། །ཞེས་གསུང་པའི་དོན་བསྡུས་ན། མགོན་པོ་བྱམས་པའི་རྒྱུད་བླ་མར། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིག་དང་བཅས་པའི་ཕྱིར། །ཆོས་རྣམ་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཡིན། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེའི་མཐར་ཐུག་ཕྱིར། །ཞེས་གསུང༌། དེའི་འགྲེལ་བར་འཕགས་པ་ཐོགས་མེད་ཀྱིས། དོན་དམ་པའི་སྐྱབས་ནི་གཅིག་པུ་ཉིད་ཅེས་གསུང་པའི་ཕྱིར་དོན་དམ་པའི་ཆོས་སྐུ་ཡོད་པར་གྲུབ་པོ། །
དགག་སྒྲུབ་བཅུ་པ། གཞན་ཡང་རི་བོང་གི་རྭ་ཡོད་པ་མིན་པའི་ཕྱིར་རི་བོང་གི་རྭ་ལས་མ་གཡོས་བཞིན་དུ། དོན་བྱེད་པ་སོགས་མི་སྲིད་པ་ལྟར། དོན་དམ་ཆོས་སྐུ་ཡོད་པ་མིན་ན་སངས་རྒྱས་ཀྱི་འཕྲིན་ལས་རྒྱུན་ཆད་པར་འགྱུར་ཞིང༌། ཆོས་ཀྱི་སྐུ་ལས་མ་གཡོས་བཞིན་དུ། ཀུན་རྫོབ་གཟུགས་སྐུས་མཛད་པ་བཅུ་གཉིས་ལ་སོགས་པས་དོན་བྱེད་པ་ཡང་མེད་པ་དང༌། གདུལ་བྱ་རྒྱ་དང་རིས་སུ་མ་ཆད་པའི་སངས་རྒྱས་ཀྱང་ཡོད་པ་མིན་པར་འགྱུར་བ་ལས་དེ་ལྟར་ཡང་མ་ཡིན་ཏེ། བྱམས་མགོན་གྱི་ཞལ་ནས། ཆོས་ཀྱི་སྐུ་ལ་སྐྱེ་འཇིག་མེད། །སྐྱེ་མེད་འགག་མེད་ཆོས་སྐུ་ལས། །སྲིད་པ་ཇི་སྲིད་གནས་བར་དུ། །སྟོན་པ་ལ་སོགས་མཛད་པ་འཇུག། ཅེས་དང༌། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །མཛད་པ་བཅུ་གཉིས་ལ་སོགས་པ། །སྲིད་པ་ཇི་སྲིད་གནས་པར་སྟོན། །ཞེས་དང༌། མདོ་སྡེ་དུ་མ་ལས། སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་སྐུ་ལས་མ་གཡོས་བཞིན་དུ། མཐའ་ཡས་པའི་སྤྲུལ་པ་སྣ་ཚོགས་ཀྱིས་མཐའ་ཡས་པའི་སེམས་ཅན་འདུལ་བར་བཤད་པ་སོགས་དང༌། དེ་བཞིན་གཤེགས་པའི་འཕྲིན་ལས་གང་ཡིན་པ་དེ་ནི་བསམ་གྱིས་མི་ཁྱབ་པ། སངས་རྒྱས་ཀྱི་ཞིང་ཐམས་ཅད་དུ་གནས་པ་ནམ་མཁའ་དང་མཉམ་པའི། ཆོས་ཀྱི་དབྱིངས་ཀྱི་བྱ་བ་ཉིད་ཀྱི་ཐ་དད་དུ་དབྱེར་མེད་པ་ཞེས་སོགས་མང་དུ་གསུངས་པའི་ཕྱིར་དོན་དམ་ཆོས་སྐུ་ཡོད་པར་གྲུབ་པོ། །དོན་དམ་པར་སངས་རྒྱས་ལ་སོགས་པ་ཆོས་གང་ཡང་ཡོད་པ་མ་ཡིན་ཟེར་བ་འདིར། མཁས་པར་ཁས་འཆེ་བ་མང་པོ་མཐུན་པས་འདི་ཧ་ཅང་མི་རིགས་པར་མཐོང་ནས་དགག་སྒྲུབ་འདི་བྱས་སོ། །
འདི་དག་ནི་དོན་དམ་གྱི་སངས་རྒྱས་ཡོད་པ་མིན་པའི་སྐྱོན་དང༌། ཡོད་པ་ཡོན་ཏན་གྱི་ལུང་རིགས་ཆེ་ལོང་ཙམ་ཞིག་བརྗོད་པ་ཡིན་ལ། རྒྱས་པར་ནི་མདོ་རྒྱུད་བསྟན་བཅོས་རབ་འབྱམས་ལས་གསལ་བར་འགྱུར་རོ། །
སྨྲས་པ།
དོན་དམ་ཆོས་སྐུ་ཡོད་པ་མ་ཡིན་ན། །
ཆོས་སྐུའི་ཡོན་ཏན་མཐའ་ཡས་ཇི་ལྟར་ཡོད། །
ཁྱད་གཞི་མ་གྲུབ་ཁྱད་ཆོས་སུ་ཡིས་མཐོང༌། །
དེ་ཕྱིར་དོན་དམ་ཆོས་སྐུ་ཡོད་པར་གྲུབ། ཅེས་པ་བསྡུ་བའི་ཚིགས་སུ་བཅད་པའོ།། །།
དྲག་པོའི་དངོས་འགལ་གྱི་ཐོག་དབབ་པ།
གཉིས་པ་ལྟ་ངན་གྱི་མགོ་ལ་དངོས་འགལ་གྱི་ཐོག་དབབ་པ་ནི། དོན་དམ་གྱི་སངས་རྒྱས་ཡོད་པའང་མིན་མེད་པའང་མིན། གཉིས་ཀའང་མ་ཡིན། གཉིས་ཀ་མ་ཡིན་པའང་མ་ཡིན་ཞེས་སྨྲ་བ་ཇི་བཞིན་དུ་ཁས་ལེན་པ་ཐམས་ཅད་སོམས་ཤིག འདི་ནི་ཁྱེད་ཀྱི་འགལ་བའི་དུས། །འདི་ནི་ཁྱེད་རྣམས་ཕམ་པའི་དུས། །ཁོ་བོས་ཁྱེད་ལ་དངོས་འགལ་སྒྲིགས་ཀྱིས། ཁྱེད་ཀྱིས་ཡིན་པ་ལ་ཡང་ཡིན་ཞེས་ལན་ཐོབ་མཛོད་ཅིག མ་ཡིན་པ་ལ་ཡང་མ་ཡིན་ཞེས་སྨྲོས་ཤིག ཁྱེད་ཀྱིས་ཡོད་མེད་གཉིས་ཀ་མ་ཡིན་པར་ཁས་བླངས་སམ་བླངས་ལགས། དེ་ཀའི་རྗེས་ལ་ཡོད་མེད་གཉིས་ཀ་མ་ཡིན་པའང་མ་ཡིན་ནོ། །ཞེས་ཁས་བླངས་སམ་བླངས་ལགས། འོ་ན་འདི་གཉིས་དངོས་སུ་འགལ་ལོ། །
དངོས་འགལ་བྱ་བ་མེད་ན་ཁྱེད་བདེན། ཡོད་ན་ནི་འདི་བས་ལྷག་པའི་དངོས་འགལ་གང་ན་ཡོད་སྨྲོས་ཤིག ཡིན་ན་ཡིན་པ་ལས་འོས་ཅི་ཡོད། མ་ཡིན་ན་མ་ཡིན་པ་ལས་འོས་ཅི་ཡོད། མིན་པར་ཁས་བླངས་ནས་དེ་ཀའི་རྗེས་ལ་མིན་པའང་མིན་ཞེས་བློ་ལྡན་སུས་ཁས་ལེན། མ་ཡིན་པ་མ་ཡིན་ན་ཡིན་པར་འགྱུར་མོད། དགག་པ་གཉིས་ཀྱི་རྣལ་མ་གོ་བའང་ད་དུང་མ་དགོངས་སམ་མ་ཤེས་སམ། ཁྱི་སྐད་ལ་རྒྱུག་པ་འདིའང་མ་མཛད་པར་ལུང་རིགས་མཁྱེན་པའི་སྐབས་དོན་ལགས་པས། རྟོག་དཔྱོད་ཐུགས་བསམ་དུམ་རེ་ལ་བཏང་དུ་གསོལ་ཞེས་གནད་ནས་བསྐུལ་ཏེ་ཞུས་པ་དང༌། དངོས་འགལ་གྱི་ཐོག་གཉིས་འཛོམ་ནས་ཅང་མི་གསུང་བར་བཞུགས་པས་དེ་དེ་བཞིན་དུ་འཛིན་ཏོ། །འདི་ཡང་ཁོ་བོའི་བློ་གྲོས་ཀྱིས་གསར་དུ་རྙེད་པའི་རིགས་པ་ཡིན་ནོ། །
སྨྲས་པ།
ཡིན་ན་ཡིན་པར་མི་འགྱུར་ཞིང༌། །
མིན་ན་མིན་པར་མི་འགྱུར་བས། །
འགལ་བ་ལྟག་སྤྲོད་ཁས་ལེན་པ། །
གྲུབ་མཐའ་ལོགས་སུ་རྩོམ་པ་བདེན། །
དེང་སང་དུས་ཀྱི་ཆོས་པ་བདག་ལྟ་བུས། །
ལྟ་སྒོམ་གཉིས་ཀྱི་ཤན་འབྱེད་མ་ཤེས་པས། །
རྒྱལ་བའི་བཀའ་ལ་ཁྱད་གསོད་བྱས་ནས་ཀྱང༌། །
གཡེམ་མའི་མུ་ཅོར་སྨྲས་པ་མཐོལ་ལོ་བཤགས། །
ཞེས་པ་བར་སྐབས་ཀྱི་ཚིགས་བཅད་དོ།། །།
འོ་ན་ལུང་དེ་ལ་འབྲུ་ཅི་ལྟར་སྣོན་ཅེ་ན། དུས་འཁོར་རྒྱུད་འགྲེལ་དུ་ལུང་འདི་ལ། རྗེ་བཙུན་སྤྱན་རས་གཟིགས་ཀྱིས། ཡོད་པ་ཤེས་རབ་གྱི་ཆ་དཀར་ཕྱོགས་མ་ཡིན། མེད་པ་ཐབས་ཀྱི་ཆ་ནག་ཕྱོགས་མ་ཡིན། དཀར་ཕྱོགས་ནག་ཕྱོགས་གཉིས་འགལ་བའི་ཕྱིར་གཉིས་ཀའང་མ་ཡིན། དཀར་ཕྱོགས་ནག་ཕྱོགས་འདི་དག་ལས་མ་གཏོགས་པའི་ལྷན་སྐྱེས་ཀྱི་བདེ་བ་ཟུར་ན་ཡོད་པ་མ་ཡིན་ཞེས་འབྲུ་བསྣན་གདའ། བྱམས་མགོན་གྱི་མདོ་སྡེ་རྒྱན་དུ། ཡོད་མིན་མེད་མིན་དེ་བཞིན་མིན་གཞན་མིན། །ཞེས་པའི་འགྲེལ་པར་ཀུན་མཁྱེན་གཉིས་པ་དབྱིག་གཉེན་གྱིས། དེ་ཁོ་ན་ཉིད་ཀྱི་དོན་དེ་ཀུན་བརྟགས་གཞན་དབང་གི་མཚན་ཉིད་ཀྱིས་ནི་ཡོད་པ་མ་ཡིན། ཡོངས་སུ་གྲུབ་པའི་མཚན་ཉིད་ཀྱིས་ནི་མེད་པ་མ་ཡིན། ཀུན་བརྟགས་གཞན་དབང་ཡོངས་གྲུབ་གཅིག་པ་ཉིད་གཉིས་མེད་པས་དེ་བཞིན་ཉིད་མ་ཡིན་ནོ། །དེ་དག་ཁོ་ན་དང་གཞན་པ་མེད་པས་གཞན་མ་ཡིན་ནོ། །ཞེས་འབྲུ་བསྣན་གདའ། ཡང་བྱམས་མགོན་གྱི་རྒྱུད་བླ་མར། ཡོད་མིན་མེད་མིན་ཡོད་མེད་མ་ཡིན་ཡོད་མེད་ལས་གཞན་དུའང༌། །བརྟགས་པར་མི་ནུས་ངེས་ཚིག་དང་བྲལ་སོ་སོ་རང་གིས་རིག་བྱ་བ། །ཞེས་པའི་རྒྱས་བཤད་དུ། བརྟག་མིན་ཕྱིར་དང་ཞེས་གསུང་པས། ཡོད་པ་མིན་པར་ཡང་བརྟག་པར་མི་ནུས། མེད་པ་མིན་པར་བརྟག་པར་མི་ནུས། ཡོད་མེད་གཉིས་ཀ་མིན་པར་ཡང་བརྟག་པར་མི་ནུས། ཡོད་མེད་གཉིས་ཀ་ལས་གཞན་དུའང་བརྟག་པར་མི་ནུས་ཞེས་པའང་གི་སྒྲས་གོང་མ་རྣམས་ཀྱང་བརྟག་མི་ནུས་པར་བཤད་པར་གདའ།
བྱམས་མགོན་གྱི་དངོས་སློབ། འཕགས་པ་ཐོགས་མེད་ཀྱིས་ཀྱང༌། དེའི་འགྲེལ་བར་མེད་པ་དང་ཡོད་པ་དང་ཡོད་མེད་གཉིས་ཀ་མ་ཡིན་པ་སྟེ། རྣམ་པ་བཞི་ཀ་ལྟར་ཡང་རྟོག་གེའི་ཡུལ་མ་ཡིན་པའི་ཕྱིར་རོ། །ཞེས་གསུངས། འདི་ཡང་ཁོ་བོས་གསར་དུ་རྙེད་པའི་ཁྱད་ཆོས་ཡིན་ནོ། །
ཁོང་དཔོན་སློབ་གཉིས་ཀྱི་བསྟན་བཅོས་ལ་ཁོ་རང་གཉིས་ཀ་རྒྱུས་ཆེ། ཁོང་གཉིས་ཀྱིས་དོན་དམ་གྱི་ཆོས་དཀོན་མཆོག་དེ། རྟོག་གེས་མུ་བཞི་གང་དུའང་བརྟག་པར་མི་ནུས། རྟོག་གེའི་ཡུལ་མིན། རྟོག་གེའི་མི་ཤེས་ཞེས་གསུངས་གདའ། སུས་ཀྱང་མི་ཤེས་སུ་ཡི་ཡང་ཡུལ་མིན་གསུངས་པ་མིན་པར་གདའ། དེའི་རྗེས་སུ་བྱམས་མགོན་གྱིས། སོ་སོ་རང་གིས་རིག་ཅེས་དང་དེའི་རྒྱས་བཤད་དུ། འཕགས་པས་མཁྱེན་ཕྱིར། ཞེས་གསུངས། དེའི་འགྲེལ་པར་ཐོགས་མེད་ཀྱིས་འཕགས་པ་རྣམས་ཀྱིས་སོ་སོ་རང་གིས་རིག་པར་བྱ་བའི་ཕྱིར་རོ། །ཞེས་གསུངས་པས། མི་རྟོག་ཡེ་ཤེས་ཀྱི་ཡུལ་དུ་ཡོད་པར་གྲུབ་པོ། །
སྨྲས་པ།
མཉམ་བཞག་བསྒོམ་པ་གཏན་ལ་འབེབས་པའི་ཚེ། །
ཡོད་མེད་ལ་སོགས་མུ་བཞི་གང་དུ་ཡང༌། །
ཅིར་ཡང་མི་འཛིན་ཅིར་ཡང་མི་རྟོག་ཅིང༌། །
སྣང་བ་དགག་སྒྲུབ་མི་བྱེད་རང་སོར་འཇོག།
ཡིན་ལུགས་ལྟ་བ་གཏན་ལ་འབེབས་པའི་ཚེ། །
དོན་དམ་སེམས་ཀྱི་རང་བཞིན་འོད་གསལ་དེ། །
མཉམ་བཞག་མི་རྟོག་ཡེ་ཤེས་ཡུལ་དུ་ལྟ། །
ཀུན་རྫོབ་སྣང་བ་རྣམ་པ་སྣ་ཚོགས་འདི། །
རྗེས་ཐོབ་རྨི་ལམ་སྒྱུ་མ་ལྟ་བུར་བལྟ། །
མཉམ་རྗེས་གཅིག་ཏུ་འདྲེས་པ་སངས་རྒྱས་ཡིན། །
དེ་དང་རྗེས་མཐུན་དག་པ་ས་གསུམ་ཡིན། །
དེ་དང་ཆ་མཐུན་མ་དག་ས་བདུན་ཡིན། །
མོས་སྤྱོད་ས་ལ་མཉམ་རྗེས་རེས་འཇོག་བྱེད། །
མདོ་རྒྱུད་བསྟན་བཅོས་ཀུན་གྱི་དགོངས་པ་ཡིན། །
གྲུབ་ཐོབ་བླ་མ་རྣམས་ཀྱི་མན་ངག་ཡིན། །
ཆོས་ཀྱི་ལྟ་སྒོམ་རྣམ་དག་དེ་ལྟར་ཡིན། །
མི་ཤེས་ལོག་རྟོག་ཐེ་ཚོམ་བསལ་བའི་ཕྱིར། །
ཆོས་ཀྱི་གསང་བ་ཟབ་མོ་བྲིས་པ་ལ། །
གསང་སྒྲོགས་ཉེས་ལྟུང་བར་ཆད་མི་འབྱུང་བར། །
བླ་མ་དཀོན་མཆོག་མཁའ་འགྲོའི་བྱིན་གྱིས་རློབས། །
དེ་རྣམས་ཡན་ཆད་ཀྱིས་བརྟེན་པ་གཞན་དོན་ཕུན་ཚོགས། ཀུན་རྫོབ་གཟུགས་ཀྱི་སྐུ་ཡོད་པའི་རྒྱུ་མཚན་གྱིས་དེའི་རྟེན་དོན་དམ་ཆོས་སྐུ་ཡོད་པར་བསྒྲུབས། ཆོས་ཀྱི་སྐུ་སྐྱེ་འཇིག་མེད་པར་ལྷུན་གྱིས་གྲུབ་པའི་རྒྱུ་མཚན་རྟག་པ་དང་བརྟན་པར་བཞུགས་པ་ལས། གདུལ་བྱ་རིང་བ་སོ་སོའི་སྐྱེ་བོ་རྣམས་གདུལ་བྱ་ནམ་དུས་ལ་བབ་པ་ན། བཟོ་དང་སྐྱེ་བ་བྱང་ཆུབ་ཆེ། །མྱ་ངན་འདས་པ་རྟག་སྟོན་པ། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་པོ། །ཞེས་གསུང་པ་ལྟར། གང་ལ་གང་འདུལ་གྱི་སྤྲུལ་པའི་སྐུ་སྣ་ཚོགས་སྟོན་པ་དང༌། གདུལ་བྱ་ཉེ་བ་བྱང་ཆུབ་སེམས་དཔའ་རྣམས་འདུལ་བ་ལ། ལོངས་སྤྱོད་རྫོགས་པའི་སྐུ་ཞིང་ཁམས་མཐའ་ཡས་པའི་འོག་མིན་མཐའ་ཡས་པར། བྱང་ཆུབ་སེམས་དཔའ་མཐའ་ཡས་པ་ལ་ལོངས་སྤྱོད་རྫོགས་པའི་སྐུ་མཐའ་ཡས་པས། ཐེག་པ་ཆེན་པོའི་ཆོས་མཐའ་ཡས་པ་བསྟན་ནས། དུས་འཁོར་བ་མ་སྟོང་གི་བར་དུ་སངས་རྒྱས་ཀྱི་འཕྲིན་ལས་རྒྱུན་མི་ཆད་པར་ལྷུན་གྱིས་གྲུབ་པའི་ཕྱིར། དོན་གཉིས་ཕུན་ཚོགས་སྐུ་གཉིས་ཟུང་དུ་འཇུག་པར་གྲུབ་པོ། །
དོན་དམ་ཆོས་སྐུ་རྟག་ཅིང་བརྟན་པའི་སྒྲུབ་བྱེད་དུ། མདོ་རྒྱུད་བསྟན་བཅོས་རྣམས་ནས་སྐྱེ་འཇིག་མེད་པའི་ཆོས་ཉིད་ལྷུན་གྲུབ་ཡིན་པར་གསུངས། ཇོ་ནང་པའང་འདི་བས་ལྷག་པའི་རྟག་བརྟན་མི་བཞེད། ཁོ་བོ་ཅག་ཀྱང་མི་འདོད་དོ། །དཔལ་ཆོས་ཀྱི་གྲགས་པས་ཀྱང༌། གང་གི་རང་བཞིན་འཇིག་མེད་པ། །དེ་ལ་མཁས་རྣམས་རྟག་ཅེས་བརྗོད། །ཅེས་གསུངས། ངེད་ཅག་གིས་ཁོང་རྣམ་པའི་རྗེས་ཟློས་བྱས་པ་ལགས་སོ། །སྐྱོན་གདའ་ན་དེར་གཏོང་བར་ཞུས།
སྨྲས་པ།
ཁ་ཅིག་མཆོག་གསུམ་ཀུན་རྫོབ་བདེན་པ་ཡིན། །
སངས་རྒྱས་རྟག་བརྟན་བྱ་བ་མི་སྲིད་པས། །
དོན་དམ་ཆོས་སྐུའང་སངས་རྒྱས་མ་ཡིན་ཟེར། །
དེ་བཞིན་འགོག་བདེན་ཆོས་ཀྱང་ཆོས་མ་ཡིན། །
དོན་དམ་དགེ་འདུན་དགེ་འདུན་མིན་ནོ་ལོ། །
དོན་དམ་དཀོན་མཆོག་གསུམ་ལ་སྐུར་པ་འདེབས། །
འདི་ཡང་ཀུན་རྫོབ་ཁོ་ནའི་ཕྱོགས་སུ་ལྷུང༌། །
ཕྱོགས་རེའི་མཐའ་ལ་ཞེན་ནས་ཕན་ཚུན་འགོག།
ཁ་ཅིག་མཆོག་གསུམ་དོན་དམ་བདེན་པ་ཡིན། །
སྐྱེ་འཇིག་ཅན་གྱི་སངས་རྒྱས་གོ་མི་ཆོད། །
དེ་ཕྱིར་ཀུན་རྫོབ་གཟུགས་སྐུ་སངས་རྒྱས་མིན། །
དེ་བཞིན་ལམ་གྱི་ཆོས་ཀྱང་ཆོས་མ་ཡིན། །
ཀུན་རྫོབ་དགེ་འདུན་དགེ་འདུན་མིན་ཞེས་སྨྲས། །
ཀུན་རྫོབ་དཀོན་མཆོག་གསུམ་ལ་སྐུར་པ་འདེབས། །
འདི་ཡང་དོན་དམ་ཁོ་ནའི་ཕྱོགས་སུ་ལྷུང༌། །
ཕྱོགས་རེས་མཐའ་ལ་ཞེན་ནས་ཕན་ཚུན་འགོག།
ཐམས་ཅད་དྲིལ་ནས་མཆོག་གསུམ་ཡུལ་ནས་ཕུད། །
མཆོག་གསུམ་སྐུར་འདེབས་སྡིག་པའི་ཁུར་ཆེན་འདི། །
གང་ཟག་གཅིག་གིས་བསྒྱུར་བར་མི་ནུས་ཞེས། །
ཕྱོགས་ཕྱོགས་ཉིད་དུ་བགོ་བཤའ་བྱས་པ་འདྲ། །
སངས་རྒྱས་ལ་ཡང་བདེན་གཉིས་ཟུང་དུ་འཇུག།
དམ་ཆོས་ལ་ཡང་བདེན་གཉིས་ཟུང་དུ་འཇུག།
དགེ་འདུན་ལ་ཡང་བདེན་གཉིས་ཟུང་དུ་འཇུག།
མཐའ་བྲལ་དབུ་མ་ཆེན་པོའི་གྲུབ་མཐའ་ཡིན། །
མདོ་རྒྱུད་བསྟན་བཅོས་མན་ངག་སྙིང་པོ་ཡིན། །
རྒྱལ་བ་སྲས་དང་བཅས་པས་མགྲིན་གཅིག་གསུངས། །
རྣལ་འབྱོར་གྲུབ་པ་ཐོབ་པ་རྣམས་ཀྱིས་རྟོགས། །
ཐོས་བསམ་སྒོམ་པས་གཏན་ལ་ཕབ་པ་ཡིན། །
ཚིག་ཙམ་གྱིས་ནི་དོན་རྣམས་ཅི་ཞིག་འགྲུབ། །
དོན་གྱི་ཆ་ལ་གཟུ་བོའི་བློ་ཡིས་དཔྱོད། །
དེ་སྐད་སྨྲ་བའི་འཇམ་དཔལ་གྲགས་པ་དེས། །
འབྲས་བུ་ཟུང་འཇུག་བཀའ་བསྡུ་ལྔ་པ་བྱས། །
འབྲས་བུ་སྐུ་གཉིས་ཟུང་དུ་འཇུག་པའི་སྐབས་དེ་དང་པོའོ།། །།