ཐ་མར་དགེ་བ་མཇུག
ཚིགས་སུ་བཅད་པས་མཇུག་བསྡུ་བ།
སྨྲས་པ།
སྨྲ་བསམ་བརྗོད་བྲལ་ངང་དུ་འཇོག་ན་གྲུབ་མཐའ་བདེན་བརྫུན་སྨྲ་དོན་མེད། །
འོན་ཏེ་ཐུབ་པའི་གྲུབ་མཐའ་སྨྲ་ན་བདེན་གཉིས་རྣམ་དབྱེ་ཤེས་པ་གཅེས། །
སྐུ་གཉིས་ཟུང་འཇུག་གྲུབ་པར་འདོད་ན་ཚོགས་གཉིས་ཟུང་འཇུག་བརྩོན་པས་སྒྲུབས། །
སྒྲོ་སྐུར་མེད་པའི་སྨྲ་བ་འདོད་ན་བཀའ་བསྡུ་ལྔ་པ་འདི་ལྟར་སྨོས། །
ཀྭ་ཡེ་སྐྱེ་འགྲོའི་གཉེན་འགྱུར་འོད་ཟེར་བརྒྱ་བ་དུས་ཀྱི་དབང་གིས་གླིང་གཞན་སོང་བ་མ་མཐོང་ངམ། །
མར་ངོར་གྱུར་པའི་ཟླ་བ་དེར་ཡང་ཞག་རེ་བཞིན་དུ་ཉམས་ཆུང་གྱུར་བའང་མི་ཤེས་སམ། །
མཚན་མོའི་ཕྱོགས་གྱུར་རྒྱུ་སྐར་དཔུང་རྣམས་རབ་ཏུ་འཁྲིགས་པས་ཕྱོགས་ཀྱི་མཐའ་ཁོབས་འདི་ལའང་ལྟོས། །
ཚུལ་འདི་འདི་ལྟར་གྱུར་པ་སེམས་ལའང་ཁྱོད་ནི་འོ་མའི་མཚོ་ལ་འོ་མ་ལེན་པར་རིགས། །
སྟོན་ཀའི་ཟླ་ལྟར་དཀར་བའི་མདོག་མཛེས་ཁྱོད་སྐུ་སྒེག་ཅིང་འགྱེང་བའི་དབྱིབས་ལེགས་ཡིད་འོང་ཟུང་ཕུད་ལྔ་པ་ཅན། །
སྐྱབས་མེད་མགོན་བྲལ་སྣ་ཚོགས་སྡུག་བསྔལ་བརྒྱ་ཡིས་རབ་གཙེས་ཉམས་ཐག་ཕོངས་པའི་འགྲོ་བ་ཀུན་གྱི་སྐྱབས་གཅིག་པོ། །
རྣམ་དག་ཆོས་དབྱིངས་རབ་འབྱམས་འགེངས་པའི་ཐུགས་རྗེའི་འོད་འགྱེད་དུས་གསུམ་རྒྱལ་བའི་ཐུགས་རྗེ་གཅིག་བསྡུས་སྤྱན་རས་གཟིགས། །
བདག་ཉིད་བྱང་ཆུབ་ཤིང་དབང་དྲུང་དུ་མ་སོན་དེ་སྲིད་ཁྱོད་ཉིད་རྟག་པར་དགེ་བའི་བཤེས་སུ་མི་འབྲལ་འགྲོགས་པར་སྨོན། །
གང་ཟག་ཆོས་ཀྱི་བདག་མེད་འདི་ཡང་མེད་པ་མ་ཡིན་ཆོས་རྣམས་ཀུན་གྱི་ཆོས་ཉིད་ཡིན། །
འཁོར་བའི་རྒྱ་མཚོ་མཐའ་མེད་འདི་ཡང་མེད་པ་མ་ཡིན་མི་ཤེས་རྨོངས་པའི་འཁོར་བ་ཡིན། །
རྒྱལ་བའི་མཁྱེན་པ་མཐའ་མེད་འདི་ཡང་མེད་པ་མ་ཡིན་ཇི་ལྟ་ཇི་སྙེད་མཁྱེན་པ་ཡིན། །
སེམས་ཀྱི་རང་བཞིན་སྤྲོས་མེད་འདི་ཡང་མེད་པ་མ་ཡིན་འོད་གསལ་བདེ་གཤེགས་སྙིང་པོ་ཡིན། །
ཀུན་རྫོབ་ཆོས་ཀུན་བདེན་པར་ཤེས་ཀྱང་ཤེས་པ་མ་ཡིན་བརྫུན་པ་སླུ་བའི་ཆོས་ཅན་ཡིན། །
ཀུན་རྫོབ་ལས་འབྲས་མེད་པར་ཤེས་ཀྱང་ཤེས་པ་མ་ཡིན་ངན་སོང་གསུམ་དུ་འཕེན་བྱེད་ཡིན། །
དོན་དམ་དྲི་མ་དོན་དམ་ཡོད་པར་ཤེས་ཀྱང་ཤེས་པ་མ་ཡིན་མི་ཤེས་རྨོངས་པའི་རྟག་ལྟ་ཡིན། །
དོན་དམ་འོད་གསལ་མེད་པར་ཤེས་ཀྱང་ཤེས་པ་མ་ཡིན་མི་ཤེས་རྨོངས་པའི་ཆད་ལྟ་ཡིན། །
མན་ངག་སྟོན་པའི་ཡོངས་འཛིན་དང་བྲལ་ཞིང༌། །
ཟབ་རྒྱས་མདོ་རྒྱུད་བལྟ་བར་མི་དབང་བའི། །
དྲང་དོན་གཞུང་བརྒྱ་སྨྲ་བའི་དྲེགས་རྣམས་ཀྱང༌། །
མཐར་ཐུག་ངེས་དོན་འདི་ལ་ངལ་སོས་ཤིག།
ཚུལ་ཁྲིམས་བརྟུལ་ཞུགས་དཀའ་ཐུབ་མཆོག་ཏུ་འཛིན། །
རྙེད་བཀུར་གྲགས་པ་ཐོབ་པས་ཡིད་ཚིམ་ཞིང༌། །
ཕྱོགས་ཞེན་ལྟ་བའི་ཞགས་པས་བཅིངས་དེའང༌། །
མཐར་ཐུག་ངེས་དོན་འདི་ལ་ངལ་སོས་ཤིག།
ཀུན་རྫོབ་དཔྱད་ན་སྟོང་པའི་རིགས་པ་ཡིས། །
དོན་དམ་སངས་རྒྱས་མེད་ཅེས་སྐུར་བ་འདེབས། །
སྟོང་ཉིད་དོན་ལ་ལྐུག་པ་དེ་དག་ཀྱང༌། །
མཐར་ཐུག་ངེས་དོན་འདི་ལ་ངལ་སོས་ཤིག།
གྲུབ་མཐའ་བདེན་རྫུན་རྟོག་དཔྱོད་མི་བྱེད་པར། །
དང་པོར་གང་ཐོས་གཞུང་ལ་དམ་འཆོལ་ཞིང༌། །
དབང་རྟུལ་དད་པའི་རྗེས་འབྲང་དེ་དག་ཀྱང༌། །
མཐར་ཐུག་ངེས་དོན་འདི་ལ་ངལ་སོས་ཤིག།
ཨེ་མ་དེང་སང་གངས་རིའི་ཁྲོད་འདི་ན། །
བདེན་གཉིས་ལྟ་བའི་བློ་གྲོས་མིག་མེད་པས། །
ཁ་ཅིག་ཀུན་རྫོབ་ཁོ་ནའི་གཅོང་རོང་ལྷུང༌། །
ལ་ལ་དོན་དམ་ཁོ་ནའི་མཐའ་ལ་འཆེལ། །
དེ་ཕྱིར་དབུ་མའི་གཞི་ལམ་འབྲས་ལ་རྨོངས། །
སངས་རྒྱས་བསྟན་པའི་དེ་ཉིད་མཐོང་བ་མེད། །
བདེན་གཉིས་ཟུང་འཇུག་དབུ་མའི་གཞི་ཡི་མཐིལ། །
ཚོགས་གཉིས་ཟུང་འཇུག་དབུ་མའི་ལམ་གྱི་མཐིལ། །
སྐུ་གཉིས་ཟུང་འཇུག་དབུ་མའི་འབྲས་བུའི་མཐིལ། །
གཞི་ལམ་འབྲས་བུ་ཟུང་དུ་འཇུག་པ་འདི། །
བླ་མ་རྒྱལ་བ་སྲས་བཅས་གསུང་བཞིན་དུ། །
སྒྲོ་སྐུར་སྤངས་ཏེ་འཇམ་དཔལ་གྲགས་པས་སྨྲས། །
ད་དུང་བདག་ལ་ལེགས་བཤད་ཡོད་མོད་ཀྱང༌། །
ཡི་གེ་མང་བས་འཇིགས་ཏེ་འདིར་མ་བྲིས། །
རྒྱས་པར་མདོ་རྒྱུད་རྒྱལ་ཁམས་ཡངས་པར་གཟིགས། །
དྲི་མེད་བསྟན་བཅོས་མན་ངག་ཀླུང་ལྟར་ཉུལ། །
ཁྱད་པར་སྙིང་པོའི་མདོ་བཅུ་ལ་སོགས་དང༌། །
རྒྱུད་བླ་རྩ་འགྲེལ་དབུ་མ་བསྟཽད་ཚོགས་གཟིགས། །
ཆོས་གྲགས་རིགས་པའི་དེ་ཉིད་མ་མཐོང་ཞིང༌། །
རབ་འབྱམས་བཀའ་ཡི་རྒྱལ་ཁམས་མ་མཐོང་བར། །
གྲུབ་མཐའ་བདེན་རྫུན་གཤགས་རལ་བྱེད་པ་དེའང༌། །
འཇིགས་རུང་ངན་འགྲོའི་གཡང་སར་ཤོར་ཉེན་གདའ། །
ཀུན་སྤྱོད་འཁྲུལ་པ་ཅུང་ཟད་མི་མངའ་ཞིང༌། །
ཚངས་དབྱངས་སྒྲོགས་ལ་ཅ་ཅོ་མི་མངའ་བ། །
ཇི་ལྟ་ཇི་སྙེད་ཆོས་ཀུན་ཐུགས་ཆུད་པའི། །
གནས་ལྔ་རིགས་པའི་མ་ཏི་པཎ་ཆེན་རྒྱལ། །
འདི་ནི་ཆོས་རྒྱལ་ས་བཟང་པཎ་ཆེན་དང༌། །
གནས་ལྔ་རིགས་པའི་དཔལ་ལྡན་འཇིགས་མེད་དང༌། །
འགྲོ་མགོན་ཀུན་མཁྱེན་བྱང་ཆུབ་སེང་གེ་དང༌། །
མཁས་གྲུབ་ལྷ་དབང་བློ་ལ་སོགས་པ་ཡི། །
ཡོངས་འཛིན་རྣམས་ཀྱི་ལེགས་བཤད་གང་ཡིན་རྣམས། །
བསྟན་དང་འགྲོ་ལ་ཕན་ཕྱིར་བདག་གིས་བསྒྲིགས། །
དོན་གྱི་ལེགས་ཆ་བླ་མ་རྣམས་ཀྱི་མཐུ། །
ཚིག་གི་སྒྲིག་ཉེས་བདག་བློ་རྨོངས་པའི་སྐྱོན། །
འགལ་དང་མ་འབྲེལ་ཟློས་པ་ཅི་མཆིས་པ། །
མཁས་པའི་མཁས་པ་རྣམས་ལ་བཟོད་པར་གསོལ། །
ལེགས་པར་བཤད་པའི་དགེ་བ་གང་ཡིན་དེས། །
ནམ་མཁའི་མཐས་གཏུགས་གྱུར་པའི་སེམས་ཅན་རྣམས། །
གནས་སྐབས་ཚེ་རིང་ནད་མེད་བདེ་སྐྱིད་ལྡན། །
ཆོས་སྤོངས་ལས་ཀྱི་བསྒྲིབ་པ་མི་གསོག་ཅིང༌། །
བསོད་ནམས་ཡེ་ཤེས་བརྩོན་པས་རབ་བསྒྲུབ་སྟེ། །
མཐར་ཐུག་ཆོས་སྐུ་རྟག་བརྟན་མངོན་གྱུར་ཤོག།
མཛད་བྱང་།
བཀའ་བསྡུ་ལྔ་པ་འདི་ནི། ཟབ་ཅིང་ཡངས་པའི་བློ་གྲོས་ཀྱི་ཤེས་བྱའི་གནས་མ་ལུས་པར་མཁྱེན་པས་མཁས་པའི་ཕུལ་དུ་ཕྱིན་ཞིང༌། སྐུ་གསུང་ཐུགས་ཀྱི་སྤྱོད་པ་ལ་འཁྲུལ་པ་ཅུང་ཟད་ཀྱང་མི་མངའ་ལ། ཚོགས་གཉིས་ཀྱི་དཔལ་ཀྱིས་བརྗིད་ཅིང༌། བདག་ལྟའི་དྲི་མ་མ་ལུས་པར་སྤངས་པས་བཙུན་པའི་ཡང་མཆོག་དུ་གྱུར་ནས། ངུར་སྨྲིག་གི་རྒྱལ་མཚན་འཆང་བ་རྣམས་ཀྱི་གཙུག་གི་ནོར་བུར་གྱུར་པ། བྱང་ཆུབ་ཀྱི་སེམས་ཁྱད་པར་ཅན་ཐུགས་ལ་བཁྲུངས་པའི་བཟང་པོ་ཞེས་བྱ་བའི་གྲངས་སུ་བགྲངས་པ། གནས་ལྔ་རིགས་པ་ས་བཟང་པནྚི་ཏ་ཞེས་ཡོངས་སུ་གྲགས་པ་དེ་ཉིད་ཀྱི་ཞབས་རྡུལ་སྤྱི་པོས་བླངས་ཤིང༌། གཞན་ཡང་འདྲེན་པ་དམ་པ་རྣམས་ཀྱི་གསུང་གི་བདུད་རྩིས་བློ་གྲོས་ཀྱི་ལུས་རབ་ཏུ་རྒྱས་ཤིང༌། འཆད་རྩོད་རྩོམ་པའི་ཚུལ་བློའི་སྣང་བ་ཅུང་ཟད་ཐོབ་ལ། ཐོས་བསམ་སྒོམ་པའི་སྒོ་ནས་ངེས་པའི་དོན་ལ་ངེས་པ་ཐོབ་པའི་བཙུན་པ་འཇམ་དཔལ་གྲགས་པ་ཞེས་བྱ་བས། དཔལ་ས་བཟང་གི་བཙུག་ལག་ཁང་དུ་འཕགས་པའི་གནས་བརྟན་ཆེན་པོའི་སྤྲུལ་བ། ས་བཟང་བ་རིན་པོ་ཆེ་ཤེས་རབ་དཔལ་ཀྱི་མཚན་ཅན་གྱིས་བདག་རྐྱེན་མཛད་དེ། དབྱུག་གུའི་ཟླ་བའི་དཀར་ཕྱོགས་ཀྱི་ཚེས་བརྒྱད་ལ་ལེགས་པར་སྦྱར་བའི་ཡི་གེ་པ་ནི་ངག་དབང་གྲགས་པའོ། །བསྟན་བཅོས་འདི་ལུས་ཅན་ཐམས་ཅད་ཀྱིས་སངས་རྒྱས་མ་ཐོབ་ཀྱི་བར་དུ། ས་སྟེང་འདིར་གནས་ནས་བསྟན་པ་དང་སེམས་ཅན་མཐའ་ཡས་པ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག
མཇུག་སྨོན་ཚིག
དཔལ་ལྡན་བླ་མ་རྣམས་ཀྱི་བྱིན་རླབས་དང༌། །
དཀོན་མཆོག་གསུམ་གྱི་བདེན་པའི་བྱིན་རླབས་དང༌། །
སྤྱན་རས་གཟིགས་དབང་ཐུགས་རྗེའི་བྱིན་རླབས་ཀྱིས། །
སྨོན་ལམ་བཏབ་པ་ཇི་བཞིན་འགྲུབ་པར་ཤོག།
དབང་རྣོན་རྣམས་ལ་ཚིགས་བཅད་ཁོ་ནས་གྲོལ། །
ངེས་པ་འཐོབ་པར་བཞེད་ན་ཐམས་ཅད་གཟིགས། །
འདི་ནི་སྤྱི་བབས་ཆོས་ཀྱི་རྣམ་བཞག་ཡིན། །
ཐུན་མོང་མིན་པའི་རྣམ་བཞག་ཟུར་ནའང་ཡོད། །
མངྒ་ལཾ་བྷ་ཝན་ཏུ། ཞུ་དག