སྟོན་པ་འཇིག་རྟེན་དུ་བྱོན་ནས་དམ་ཆོས་ཇི་ལྟར་དར་ཚུལ་བཤད་པའི་ཚོམས།

དང་པོ། སྟོན་པ་འཇིག་རྟེན་དུ་བྱོན་ནས་མདོ་སྔགས་ཀྱི་བསྟན་པ་རིན་པོ་ཆེ་ཇི་ལྟར་དར་ཚུལ་བཤད་པ།

གཅིག སངས་རྒྱས་འཇིག་རྟེན་དུ་བྱོན་ཚུལ་སྤྱིར་བསྟན་པ།

དང་པོ་སྟོན་པ་འཇིག་རྟེན་དུ་བྱོན་ཏེ་དམ་པའི་ཆོས་དར་ཚུལ་བཤད་པ་ལ། སྟོན་པ་འཇིག་རྟེན་དུ་བྱོན་ནས་མདོ་སྔགས་ཀྱི་བསྟན་པ་རིན་པོ་ཆེ་ཇི་ལྟར་དར་ཚུལ་བཤད་པ་དང་། རྗེས་འཇུག་འཕགས་པའི་གང་ཟག་རྣམས་ཀྱིས་བཀའ་བསྡུ་འཆད་སྤེལ་གྱིས་རིམ་པར་བསྐྱངས་ཚུལ་བསྙད་པ། གསང་ཆེན་རྡོ་རྗེ་ཐེག་པ་ནང་རྒྱུད་ཡོ་ག་རྣམ་གསུམ་གྱི་ཆོས་ཀྱི་འཁོར་ལོ་བསྐོར་ཚུལ་བྱེ་བྲག་ཏུ་བརྗོད་པ་སྟེ་གསུམ་ལས།

དང་པོ་ལ་སངས་རྒྱས་འཇིག་རྟེན་དུ་བྱོན་ཚུལ་སྤྱིར་བསྟན་པ་དང་། མཛད་པ་བཅུ་གཉིས་བསྟན་ཚུལ་བྱེ་བྲག་ཏུ་བཤད་པ་སྟེ་གཉིས་ལས། དང་པོ་ནི། དེ་ཡང་བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་འགྲོ་བ་ལྷ་དང་བཅས་པའི་སྐྱབས་དང་། མགོན་དང་། དཔུང་གཉེན་གཅིག་པུར་གྱུར་པ། བསྐལ་པ་བཟང་པོའི་རྣམ་འདྲེན་སྟོབས་བཅུ་མངའ་བ་སྟོང་རྩའི་དབུས་ན་སྙིགས་མའི་གདུལ་བྱ་འདུལ་བ་ལ་སྨོན་ལམ་ཆེན་པོ་ལྔ་བརྒྱའི་ཐུགས་དམ་བཅས་པ། ཕྱོགས་བཅུའི་རྒྱལ་བ་སྲས་དང་བཅས་པས་པདྨ་དཀར་པོ་ལྟར་ཡོངས་སུ་བསྔགས་པའི་རྣམ་འདྲེན་བཞི་པ་ཤཱཀྱའི་རྒྱལ་པོ་གང་ཉིད་ནི། ངེས་པའི་དོན་དུ་བསྐལ་པ་གྲངས་མེད་པའི་སྔོན་རོལ་དུ་རང་དོན་སྤངས་དང་རྟོགས་པའི་ཡོན་ཏན་མཐའ་རུ་ཕྱིན་ཏེ་མངོན་པར་རྫོགས་པར་སངས་རྒྱས་ནས། དེ་བཞིན་གཤེགས་པའི་ཐབས་ལ་མཁས་པའི་རྣམ་རོལ་ཚད་མེད་པས་ཆོས་ཀྱི་དབྱིངས་ལས་མ་གཡོས་བཞིན་དུ་དུས་གསུམ་རྟག་ཁྱབ་ལྷུན་གྲུབ་ཏུ་གང་འདུལ་འགྲོ་བའི་དོན་མཛད་པ་སྟེ། མདོ་སྡེ་པདྨ་དཀར་པོ་ལས། རིགས་ཀྱི་བུ་དག་ང་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་གོང་རོལ་དུ་མངོན་པར་རྫོགས་པར་སངས་རྒྱས་སོ། །ཞེས་དང་། ཡབ་སྲས་མཇལ་བའི་མདོ་ལས། སྔོན་འདས་པའི་དུས་བསྐལ་པ་དཔག་ཏུ་མེད་པའི་གོང་རོལ་དུ་འཇིག་རྟེན་གྱི་ཁམས་གང་གའི་ཀླུང་གི་བྱེ་མ་སྙེད་ཀྱི་ཞིང་གཅིག་ཏུ་གྱུར་པ་དེར། དེ་བཞིན་གཤེགས་པ་དབང་པོའི་ཏོག་ཅེས་བྱ་བར་སངས་རྒྱས་ནས་སེམས་ཅན་གྱི་དོན་མཛད་དེ་མྱ་ངན་ལས་འདས་ནས། སླར་ཡང་དེའི་འོག་ཏུ་སངས་རྒྱས་པའི་ཚུལ་བསམ་གྱིས་མི་ཁྱབ་པ་བསྐལ་པ་འདིའི་བར་དུ་བསྟན་ཅིང་། ད་དུང་སོ་སོའི་སྐྱེ་བོ་སེམས་དང་པོ་བསྐྱེད་པ་ནས་བཟུང་སྟེ་སངས་རྒྱས་པའི་ཚུལ་འཁོར་བ་མ་སྟོང་གི་བར་དུ་སྟོན་པར་མཛད་དོ། །ཞེས་དང་། སེམས་ཅན་རྣམས་ལ་ཐུགས་བརྩེ་ཞིང་། །སེམས་ཅན་ཡོངས་སུ་སྨིན་མཛད་ཕྱིར། །དཔའ་བོ་ཆེན་པོའི་རྣམ་པར་འཕྲུལ། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་ཆོག་པའི་འདུ་ཤེས་བསལ། །ཞེས་དང་། དམ་ཆོས་པད་དཀར་ལས། བསྐལ་པ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་འདི་ནི་ངེས་ཐོབ་སྟེ། །ང་ནི་རྟག་ཏུ་ཆོས་ཀྱང་རབ་འཆད་དོ། །ཞེས་དང་། མདོ་སྡེ་ཕལ་པོ་ཆེ་ལས། བྱང་ཆུབ་རྒྱ་མཚོ་རབ་བརྙེས་གྱུར་ནས་ཀྱང་། །སེམས་ཅན་རྒྱ་མཚོ་རབ་ཏུ་སྨིན་བྱའི་ཕྱིར། །བྱང་ཆུབ་སེམས་བསྐྱེད་རྒྱ་མཚོ་སྟོན་མཛད་ཅིང་། །མི་འགྲིབ་སྤྱོད་པ་རྒྱ་མཚོ་ཀུན་སྟོན་པ། །བདེ་གཤེགས་རྣམས་ཀྱི་རྣམ་འཕྲུལ་དེ་འདྲའོ། །ཞེས་དང་། གསང་བ་ཡིད་བཞིན་རིན་པོ་ཆེ་བཀོད་པའི་རྒྱུད་ལས། ཀུན་གྱི་སྔ་རོལ་སངས་རྒྱས་པ། །རྡོ་རྗེ་འཛིན་རྒྱལ་གསང་བ་ཆེ། །བསམ་ཡས་ཞིང་དུ་རྣམ་པར་རོལ། །གྲངས་མེད་སྔ་ཕྱིའི་དུས་ཀུན་ཏུ། །ཞི་དང་ཁྲོ་ཚུལ་དཔག་མེད་ཅིང་། །རྔོན་དང་སྨད་འཚོང་ལ་སོགས་གཟུགས། །སྣ་ཚོགས་ཚུལ་གྱིས་དོན་མཛད་ཀྱང་། །ད་དུང་བསྐལ་པ་བཟང་པོ་འདིར། །འདྲེན་པ་སྟོང་དུ་སྒྱུར་མཛད་ཅིང་། །དེ་བཞིན་སྣ་ཚོགས་ཚུལ་འཆར་ཞིང་། །དཔག་མེད་འགྲོ་བའི་དོན་མཛད་དོ། །ཞེས་པ་ལྟར་གདུལ་བར་བྱ་བའི་སྐྱེ་བོ་སྣ་ཚོགས་པའི་ཁམས་དང་། དབང་པོ། སྐལ་བ་དང་འཚམས་པར། བཟོ་དང་། སྐྱེ་བ། མཆོག་གི་སྤྲུལ་སྐུའི་རྣམ་རོལ་ཚད་མེད་པ་བསམ་གྱིས་མི་ཁྱབ་པར་སྣང་བ་ལས། རེ་ཞིག་མི་མཇེད་འཇིག་རྟེན་གྱི་ཁམས་འདིར་རྩོད་པའི་དུས་ཀྱི་གདུལ་བྱ་རྣམས་ཀྱི་སྣང་ངོར་ཇི་ལྟར་བྱོན་པའི་ཚུལ་ལ་གྲུབ་མཐའི་བྱེ་བྲག་གིས་བཞེད་པ་མི་མཚུངས་པ་མང་དུ་སྣང་བ་ལས། དང་པོ་ཉན་ཐོས་ཐེག་པའི་ལུགས་ལྟར་ན། བདག་ཅག་གི་སྟོན་པ་འདི་བསྐལ་པ་གྲངས་མེད་གསུམ་འདས་པའི་སྔོན་རོལ་དུ་ཚོགས་ལམ་གྱིས་བསྡུས་པའི་ཚོགས་བསྐལ་པ་གྲངས་མེད་གསུམ་དུ་བསགས་ཤིང་། རྒྱལ་བུ་དོན་གྲུབ་སྲིད་པ་ཐ་མ་པའི་སོ་སོའི་སྐྱེ་བོ་འཆིང་བ་ཀུན་ལྡན་ཞིག་གིས་རྡོ་རྗེ་གདན་དུ་ཚོགས་ལམ་ཆེན་པོའི་རྟེན་དེ་ཉིད་ལ་སྦྱོར་མཐོང་སྒོམ་པ་མི་སློབ་པ་བཅས་ལམ་ལྔ་སྟན་ཐོག་གཅིག་ཏུ་བགྲོད་ནས་སངས་རྒྱས་པར་འདོད་དེ། འདུལ་བ་ལུང་ལས། འདྲེན་པ་ཡུལ་འཁོར་སྐྱོང་ནས་ནི། །སངས་རྒྱས་རྣམ་གཟིགས་བར་དག་ཏུ། །ལྔ་ཁྲི་ལྔ་སྟོང་ཚང་པ་ཡི། །སངས་རྒྱས་རྣམས་ནི་ངས་མཆོད་དེ། །དེ་ཚེ་ང་ལ་སྐྱོ་སེམས་མེད། །སངས་རྒྱས་ལེགས་མཛད་ནས་བཟུང་སྟེ། །དབང་པོའི་རྒྱལ་མཚན་ཐུབ་པའི་བར། །དྲུག་ཁྲི་དྲུག་སྟོང་ཚང་པ་ཡི། །སངས་རྒྱས་རྣམས་ནི་ངས་མཆོད་དེ། །དེ་ཚེ་ང་ལ་སྐྱོ་སེམས་མེད། །སངས་རྒྱས་མར་མེ་མཛད་ནས་ནི། །རིན་ཆེན་གཙུག་ཏོར་བར་དག་ཏུ། །བདུན་ཁྲི་བདུན་སྟོང་ཚང་པ་ཡི། །སངས་རྒྱས་རྣམས་ནི་ངས་མཆོད་དེ། །དེ་ཚེ་ང་ལ་སྐྱོ་སེམས་མེད། །ཅེས་པ་དང་། མཛོད་ལས། རྣམ་གཟིགས་མར་མེ་གཙུག་ཏོར་ཅན། །གྲངས་མེད་གསུམ་གྱི་མཐའ་རུ་བྱུང་། །གོ་རིམ་དེ་ལས་བཟློག་པ་སྟེ། །དང་པོ་ཤཱཀྱ་ཐུབ་པ་ཡིན། །ཞེས་གྲངས་མེད་དང་པོ་ལ་སངས་རྒྱས་ཤཱཀྱ་ཐུབ་ཆེན་ནས་རིན་ཆེན་གཙུག་ཏོར་ཅན་གྱི་བར་སངས་རྒྱས་བདུན་ཁྲི་ལྔ་སྟོང་བསྙེན་བཀུར་བ་དང་། དེ་ནས་མར་མེ་མཛད་ཡན་གྱི་སངས་རྒྱས་བདུན་ཁྲི་དྲུག་སྟོང་བསྙེན་བཀུར་ནས་གཉིས་པ་དང། དེ་ནས་རྣམ་གཟིགས་ཡན་གྱི་སངས་རྒྱས་བདུན་ཁྲི་བདུན་སྟོང་བསྙེན་བཀུར་ནས་གསུམ་པ་སྟེ་བསྐལ་པ་གྲངས་མེད་གསུམ་དུ་ཚོགས་བསགས་ཤིང། དེ་ནས་སངས་རྒྱས་སྐར་རྒྱལ་ལ་ཚིགས་བཅད་གཅིག་གིས་ཞག་བདུན་བར་མ་ཆད་དུ་བསྟོད་པས་བསྐལ་པ་དགུའི་ཚོགས་འདུམས། དེ་ནས་བསྐལ་པ་འདི་ལ་སངས་རྒྱས་འོད་སྲུང་བསྙེན་བཀུར་བ་ཡན་ལ་བསྐལ་པ་དགུ་བཅུ་གོ་གཅིག་སྟེ་བསྐལ་ཆེན་བརྒྱར་མཚན་བཟང་གི་རྒྱུ་བསྒྲུབས་ནས་ལྷའི་བུ་དམ་པ་ཏོག་དཀར་པོར་གྱུར་ཅིང་དགའ་ལྡན་ནས་འཕོ་བ་སོགས་མཛད་པ་བཅུ་གཉིས་སྟོན་པར་བཞེད་ཅིང་། དེ་འདྲའི་སྲིད་པ་ཐ་མ་པའི་བྱང་ཆུབ་སེམས་དཔའ་དེ་ཉིད་སོ་སོའི་སྐྱེ་བོ་ཡིན་པར་བཤད་པ་ཡང་། དེ་ཉིད་ལས། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པར་གསུངས། །ཞེས་སོ། །ཐེག་ཆེན་ཐུན་མོང་པའི་ལུགས་ལྟར་ན། མདོ་སྡེ་བསྐལ་བཟང་ལས། ང་ནི་སྔོན་ཚེ་དབུལ་པོར་གྱུར་པའི་ཚེ། །དེ་བཞིན་གཤེགས་པ་ཤཱཀྱ་ཐུབ་དེ་ལ། །འཇམ་གང་དག་གི་དབུལ་བ་བྱས་ནས་ནི། །དང་པོར་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་རྫ་མཁན་གྱི་བུ་ཁྱེའུ་སྣང་བྱེད་དུ་གྱུར་ཚེ་ཤཱཀྱ་ཐུབ་པ་ཆེན་པོ་ལ་འཇམ་ཐུག་ཡོལ་གོ་གང་ཕུལ་ནས་སེམས་བསྐྱེད་པ་དང་། དྲིན་ལན་བསབས་པའི་མདོ་ལས། དམྱལ་བའི་ལྕགས་བསྲེགས་ཀྱི་ས་གཞིར་ཤིང་རྟ་འདྲེན་པའི་གྱད་དུ་གྱུར་ཚེ་ཟླ་བོ་སྟོབས་ཆུང་བ་ལ་བརྩེ་བ་སྐྱེས་ཏེ། དམྱལ་སྲུང་ཨ་ཝང་ལ་འདི་ལ་སྙིང་རྗེ་ཅུང་ཟད་བསྐྱེད་ཅིག་ཅེས་སྨྲས་པས་དེ་ཤིན་ཏུ་ཁྲོས་ནས་རྩེ་གསུམ་བསྣུན་ཏེ་ཚེའི་དུས་བྱས་པས་བསྐལ་པ་བརྒྱད་ཀྱི་སྡིག་པ་བྱང་ཞིང་ཐོག་མར་སེམས་བསྐྱེད། དེ་ནས་གྲངས་མེད་གསུམ་དུ་ཚོགས་བསགས་པའི་མཐར་ལྷའི་བུ་དམ་པ་ཏོག་དཀར་པོ་ཞེས་ས་བཅུའི་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་དེ་འཛམ་བུ་གླིང་དུ་རྒྱལ་བུ་དོན་གྲུབ་ཏུ་སྐྱེ་བ་བཞེས་ནས་སངས་རྒྱས་པར་འདོད་དེ། ཡོན་ཏན་ཡོངས་སུ་བཀོད་པའི་མདོ་ལས། ངས་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་ནས་བཟུང་སྟེ། བསྐལ་པ་ཆེན་པོ་གྲངས་མེད་པ་གསུམ་དུ་བརྩོན་པ་ཆེན་པོས་ཚོགས་བསགས་ཤིང་། ཚེ་ལོ་བརྒྱ་པའི་ཚེ་སེམས་ཅན་ལོང་བ་འདྲེན་པ་མེད་པ་རྣམས་ལ་གཟིགས་ཏེ་ཛམྦུའི་གླིང་འདི་ཉིད་དུ་སངས་རྒྱས་ནས་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་ཡོངས་སུ་བསྐོར་ཏེ། ཞེས་གསུངས་སོ། །དེ་ལས་གཞན་ཐེག་ཆེན་ཐུན་མོང་མ་ཡིན་པ་ལྟར་ན། བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཚད་མའི་བདག་ཉིད་ཅན་དེས་སྔོན་སློབ་པ་ལམ་གྱི་སྐབས་སུ་གོང་དུ་བཤད་པ་ལྟར་བྲམ་ཟེ་རྒྱ་མཚོའི་རྡུལ་དུ་སྐྱེ་བ་བཞེས་ཚེ་དེ་བཞིན་གཤེགས་པ་རིན་ཆེན་སྙིང་པོའི་དྲུང་དུ་སྨོན་ལམ་ཆེན་པོ་ལྔ་བརྒྱ་བཏབ་ཏེ་སེམས་དང་པོ་བསྐྱེད་པ་དང་། རྫ་མཁན་གྱི་བུ་ཁྱེའུ་སྣང་བྱེད་དུ་གྱུར་ཚེ་ཐུབ་པ་ཆེན་པོའི་དྲུང་དུ་བྱང་ཆུབ་མཆོག་ཏུ་ཐུགས་བསྐྱེད་པ་དང་། ཡང་དམྱལ་བའི་གནས་སུ་ཤིང་རྟ་འདྲེན་པའི་ཚེ་གྲོགས་ལ་ཤིན་ཏུ་བརྩེ་བ་སྐྱེས་ཏེ་སེམས་བསྐྱེད་པ་སོགས་དང་པོ་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་ཆེན་གྲངས་མེད་གསུམ་དུ་དེ་བཞིན་གཤེགས་པ་གངྒའི་ཀླུང་གི་བྱེ་མ་སྙེད་ལ་བསྙེན་བཀུར་ཏེ་རྫོགས་སྨིན་སྦྱང་པ་མཐའ་རུ་ཕྱིན་ནས་འོག་མིན་སྟུག་པོ་བཀོད་པའི་ཞིང་དུ་ལྔ་ལྡན་ལོངས་སྐུའི་ངོ་བོར་སངས་རྒྱས། མཐར་སྐུ་དེ་ལས་མ་གཡོས་བཞིན་འཛམ་བུའི་གླིང་འདིར་མཆོག་གི་སྤྲུལ་སྐུའི་ཚུལ་དུ་ཞིང་འདིར་བྱོན་ཏེ་ཡང་སངས་རྒྱས་པའི་ཚུལ་གྱིས་མཛད་པ་བཅུ་གཉིས་བསྟན་པར་གསུངས་ཏེ། ཇི་སྐད་དུ། སློབ་དཔོན་ངག་གི་དབང་ཕྱུག་གྲགས་པའི་ཞལ་ནས། གང་གིས་དཔལ་ལྡན་སྟུག་པོ་བཀོད་པར་དོན་དམ་ཐུགས་ཆུད་ཅིང་། །དགའ་ལྡན་སྐྱེ་བོའི་དོན་མཛད་ཕྱིར་ནི་དམ་པ་ཏོག་དཀར་གྱུར། །དེ་ནས་འདིར་ནི་འགྲོ་བའི་དོན་དུ་ཤཱཀྱའི་ཏོག་གྱུར་པ། །འཆི་བདག་ལས་རྒྱལ་སྒྱུ་མ་མཐའ་ཡས་སྟོན་དེ་རྒྱལ་གྱུར་ཅིག ། ཞེས་དང་། ལང་ཀར་གཤེགས་པའི་མདོ་ལས། འདོད་པའི་ཁམས་དང་གཟུགས་མེད་དུ། །སངས་རྒྱས་མངོན་པར་འཚང་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་འཚང་རྒྱའོ། །ཞེས་དང་། རྒྱན་སྟུག་པོ་བཀོད་པའི་མདོ་ལས། ཡང་དག་སངས་རྒྱས་བྱང་ཆུབ་ཏུ། །འཚང་རྒྱ་འོག་མིན་གནས་མཆོག་ཏུ། །སངས་རྒྱས་མ་གྱུར་འདོད་ཁམས་སུ། །སངས་རྒྱས་མཛད་པ་མི་མཛད་དེ། །དེ་དག་སྟུག་པོའི་ཞིང་གཤེགས་ནས། །སངས་རྒྱས་སྤྲུལ་བ་བྱེ་བ་ཡིས། །རྟག་ཏུ་རྣལ་འབྱོར་མཉམ་པར་བཞག །སྤྲུལ་པ་དག་དང་ཐབས་གཅིག་རོལ། །ཐམས་ཅད་ཞིང་དུ་ཟླ་བ་ལྟར། །གང་ལ་གང་གིས་དབང་སྒྱུར་བ། །དེ་ལ་དེར་སྟོན་འབྱུང་བ་སྟེ། །ཞེས་དང་། ལང་གཤེགས་ལས། གཙང་མའི་གནས་དག་རྣམ་སྤངས་པའི། །འོག་མིན་སྟུག་པོ་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་བ་པོ་ཞིག་འདིར་འཚང་རྒྱ། །ཞེས་དང་། དཔལ་ལྡན་ཟླ་བས། གང་ཕྱིར་ནམ་མཁའ་དྲི་མ་མེད་ལ་ཟླ་སྣང་གསལ་བར་གྱུར་པའི་ཕྱིར། །སྔོན་ཚེ་སྟོབས་བཅུ་བསྐྱེད་པའི་ས་ལ་ཁྱོད་ཀྱིས་སླར་ཡང་འབད་གྱུར་ཅིང་། །འོག་མིན་དུ་ནི་གང་གི་དོན་དུ་འབད་འགྱུར་གོ་འཕང་མཆོག་ཞི་བ། །ཡོན་ཏན་མཐའ་དག་མཐར་ཐུག་མཚུངས་པ་མེད་པ་དེ་ནི་ཁྱོད་ཀྱིས་བརྙེས། །ཞེས་དང་། རྒྱུད་བླ་མ་ལས། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོས་འཁོར་དགྱེས་རོལ་བ་དང་། །ངེས་འབྱུང་བཀའ་བ་སྤྱད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམ་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་དང་། རིན་ཆེན་ཕྲེང་བ་ལས། སྙིང་རྗེའི་དབང་དུ་གྱུར་པ་རྣམས། །གཤེགས་དང་བལྟམས་དང་རོལ་པ་དང་། ཁབ་ནས་འབྱུང་དང་དཀའ་སྤྱད་དང་། །བྱང་ཆུབ་ཆེད་དུ་བདུད་སྡེ་བཅོམ། །ཆོས་ཀྱི་འཁོར་ལོ་བསྐོར་པ་དང་། །ལྷ་རྣམས་ཀུན་ནས་བབས་པ་དང་། །དེ་བཞིན་དུ་ནི་མྱ་ངན་འདས། །འདས་པ་སྟོན་པའི་མཛད་པ་ཡིན། །ཞེས་གསུངས་པ་ལྟར་རོ། །

གཉིས་པ། མཛད་པ་བཅུ་གཉིས་བསྟན་ཚུལ་བྱེ་བྲག་ཏུ་བཤད་པ།

༡ དགའ་ལྡན་གྱི་གནས་ནས་འཕོ་བའི་མཛད་པ།

གཉིས་པ་མཛད་པ་བཅུ་གཉིས་བསྟན་ཚུལ་བྱེ་བྲག་ཏུ་བཤད་པ་ལ། དང་པོ་དགའ་ལྡན་གྱི་གནས་ནས་འཕོ་བའི་མཛད་པ་ནི། དེ་ཡང་བྲམ་ཟེའི་ཁྱེའུ་བླ་མ་ཚེ་འཕོས་ནས་དགའ་བ་བརྒྱ་ལྡན་ལྷའི་གནས་རིས་བཟང་པོར་སྐྱེ་བ་བཞེས་ཤིང་། རིན་པོ་ཆེའི་ཁང་བཟང་ཡིད་དུ་འོང་བར་རིས་མཐུན་ལྷའི་འཁོར་ཚོགས་ཀྱི་དབུས་སུ་ཆོས་ཀྱིས་མངོན་པར་མཐོ་བའི་ཁྲི་ཆེན་པོ་ལ་བཞུགས་ཏེ་དམ་པའི་ཆོས་ཀྱི་འཁོར་ལོ་རབ་ཏུ་སྣང་བར་མཛད་པའི་ཚེ། སྔོན་གྱི་སྨོན་ལམ་གྱི་བདེན་མཐུ་ཟབ་མོ་དུས་སུ་སྨིན་པ་དང་། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་བྱིན་རླབས་ཀྱི་སྟོབས་བསམ་མི་ཁྱབ་པས་ལྷའི་རོལ་མོའི་སྒྲ་ལས། བསོད་ནམས་རྒྱ་ཆེ་ཚོགས་མང་དྲན་རྟོགས་དང་། །བློ་གྲོས་མཐའ་ཡས་ཤེས་རབ་འོད་མཛད་པ། །མཚུངས་མེད་སྟོབས་མངའ་སྒྱུ་རྩལ་རྒྱ་ཆེ་བ། །མར་མེ་མཛད་ཀྱི་ལུང་བསྟན་དགོངས་པར་མཛོད། །སྐྱེས་མཆོག་ཁྱོད་ཀྱི་བསོད་ནམས་དཔལ་གྱིས་ནི། །དགའ་ལྡན་ཕོ་བྲང་ཤིན་ཏུ་མཛེས་མོད་ཀྱི། །འོན་ཀྱང་ཐུགས་རྗེའི་ཐུགས་དང་ལྡན་པས་ན། །ཐུགས་རྗེའི་རྒྱལ་མཚན་དག་ཏུ་ཆར་པ་ཕོབ། །ཅེས་པ་ནས། འདི་ནི་དུས་ལགས་བཏང་སྙོམས་མ་མཛད་ཅེས། །སྙིང་རྗེའི་ཡིད་དང་ལྡན་པས་བསྐུལ་བར་བྱེད། །ཅེས་སོགས་རང་བྱུང་དུ་གྲག་པའི་སྒྲས་དཔལ་ལྡན་འཛམ་བུ་པྲྀཀྵས་མཚན་པའི་གླིང་ཆེན་པོར་བྱོན་པའི་བསྐུལ་མ་མཛད་པ་གསན་ནས་ལྷ་རྣམས་ལ་གསུངས་པ། གྲོགས་པོ་དག་ཆོས་སྣང་བའི་སྒོ་བརྒྱ་རྩ་བརྒྱད་པོ་འདི་དག་ནི་རྒྱལ་སྲས་འཆི་འཕོ་བའི་ཚེ་བསྟན་པར་བྱའོ། །གྲོགས་པོ་དག་དད་པ་ནི་ཆོས་སྣང་བའི་སྒོ་སྟེ་བསམ་པ་མི་ཕྱེད་པར་འགྱུར་རོ། །དྭངས་བ་ནི་ཆོས་སྣང་བའི་སྒོ་སྟེ་སེམས་རྙོག་མ་ཅན་དྭངས་བར་འགྱུར་རོ་ཞེས་པ་ནས། དབང་བསྐུར་བའི་ས་ནི་ཆོས་སྣང་བའི་སྒོ་སྟེ། མངལ་དུ་འཇུག་པ་ནས་མྱ་ངན་ལས་འདས་པ་ཆེན་པོ་སྟོན་པའི་བར་དུ་འགྱུར་རོ། །ཞེས་པའི་བར་དུ་གསུངས་ནས། གང་གི་ཚེ་ན་དགའ་ལྡན་གནས་མཆོག་ནས། །འདྲེན་པ་སྐྱེས་བུ་སེང་གེ་འཆི་འཕོའི་ཚེ། །ལྷ་རྣམས་དག་ལ་ཚིག་ཏུ་སྨྲས་པ་ནི། །གྲོགས་དག་བག་མེད་སྤྱོད་པ་སྤང་བར་གྱིས། །ཞེས་སོགས་གསུངས་པ་ན་ལྷ་རྣམས་མི་དགའ་བར་གྱུར་ཏེ། སྐྱེས་བུ་དམ་པ་ཁྱོད་ནི་མི་བཞུགས་ན། །དགའ་ལྡན་གནས་ནི་མཛེས་པར་མི་འགྱུར་རོ། །ཞེས་དང་། ད་ལྟ་མིའི་འཇིག་རྟེན་ན་སྡིག་པ་མི་དགེ་བས་གོས་ཤིང་སྐྱེ་བོ་རྣམས་རྒྱུད་མ་རུང་པར་གྱུར་ཅིང་། ཁྱད་པར་འཛམ་བུ་གླིང་དུ་འོད་སྲུང་རྫོགས་བྱེད་སོགས་ལོག་པར་སྨྲ་བའི་རྟོག་གེ་སྡེ་དྲུག་དང་། བྲམ་ཟེ་རྒྱུ་རྒྱལ་སོགས་རྗེས་སུ་སྒྲོགས་པ་དྲུག རིངས་བྱེད་ཀྱི་བུ་ལྷག་སྤྱོད་སོགས་སྙོམས་འཇུག་པ་དྲུག་བཅས་མུ་སྟེགས་སྟོན་པ་བཅོ་བརྒྱད་ཀྱིས་གཙེས་པས་མི་འབྱོན་པ་ལེགས་ཞེས་གསོལ་བ་ན། བྱང་ཆུབ་སེམས་དཔས་འཁོར་རྣམས་ལ་རོལ་མོ་ཐམས་ཅད་རྡུངས་ཤིག་ཅེས་ལྷའི་རོལ་མོ་ཐམས་ཅད་བརྡུང་དུ་བཅུག་ཅིང་རང་ཉིད་ཀྱིས་ཆོས་ཀྱི་དུང་འབུད་པར་མཛད། རོལ་མོ་འདི་རྣམས་ལས་སྒྲ་གང་ཆེ་བ་ཡིན་ཞེས་དྲིས་པར། འཁོར་རྣམས་ཀྱིས་དུང་གི་སྒྲ་ལྷག་གོ་ཞེས་གསོལ་བར། བཀའ་སྩལ་པ། དུང་གི་སྒྲ་རོལ་མོའི་སྒྲ་ཐམས་ཅད་དང་མི་འདྲེ་ཞིང་ཟིལ་གྱིས་གནོན་པ་བཞིན་དུ། དེ་དག་གི་ཆོས་དང་ང་མི་འདྲེ་ཞིང་ང་ཉིད་ཀྱིས་ཟིལ་གྱིས་མནན་པར་ནུས་སོ། །ཞེས་ཉིད་ཀྱི་ཅོད་པན་བྱམས་པའི་དབུ་ལ་བསྐོན་ཏེ་དེང་ཕྱིན་ཆད་མ་ཕམ་པས་ཆོས་སྟོན་པར་འགྱུར་ཞེས་རྒྱལ་ཚབ་ཏུ་བསྐོས་ཏེ་རིག་བྱེད་ལས་འབྱུང་བ་བཞིན་གླང་ཆེན་ཐལ་དཀར་མཆེ་བ་དྲུག་ལྡན་གྱི་རྣམ་པར་སྤྲུལ་ཏེ་གཤེགས་སོ། །

༢ ལྷུམས་སུ་ཞུགས་པའི་མཛད་པ།

ལྷུམས་སུ་ཞུགས་པའི་མཛད་པ་ནི། དེ་ནས་རིགས་ལ་གཟིགས་པ་མཆོག་ཏུ་བཙུན་པ་མང་པོས་བཀུར་པའི་རྒྱལ་རིགས་དང་། ཡུལ་ལ་གཟིགས་པ་ཛམྦུའི་གླིང་གི་ཡུལ་དབུས་ཀྱི་གྲོང་ཁྱེར་དམ་པ་སེར་སྐྱ། དུས་ལ་གཟིགས་པ་སྙིགས་མ་ལྔ་བདོ་བའི་དུས་སྐྱོ་ཤས་དང་ངེས་འབྱུང་ཆེ་བ་ཚེ་ལོ་བརྒྱ་པ་དང་། རྒྱུད་ལ་གཟིགས་པ་ཕ་མེས་ཀྱི་བདུན་རྒྱུད་བར་དུ་སྐྱོན་མེད་པ་དང་། ཡུམ་ལ་གཟིགས་པ་བུད་མེད་ཀྱི་སྐྱོན་ཀུན་སྤངས་ཤིང་ཡོན་ཏན་ཀུན་ཚང་བ་ལྷ་མོ་སྒྱུ་འཕྲུལ་མ་སྟེ་གཟིགས་པ་རྣམ་པ་ལྔ་ལ་གཟིགས་ནས། ས་ག་ཟླ་བའི་ཡར་ཚེས་བཅོ་ལྔ་རྒྱུ་སྐར་རྒྱལ་ལ་བབ་པ་ཡུམ་སྒྱུ་འཕྲུལ་ཆེན་མོ་བསྙེན་གནས་ཀྱི་སྡོམ་པ་ཡང་དག་པ་བླངས་ཤིང་གནས་པའི་ཚེ། བྱང་ཆུབ་སེམས་དཔའ་གླང་པོའི་ཕྲུ་གུ་དམ་པ་ཁ་བ་དང་ཀུ་མུ་དཱ་ལྟར་དཀར་པོའི་རྣམ་པས་གློ་གཡས་པ་ནས་ལྷུམས་སུ་ཞུགས་སོ། །སྒྱུ་འཕྲུལ་ལྷ་མོའི་རྨི་ལམ་དུའང་གླང་པོ་ཆེའི་མཆོག་གཅིག་ཡུམ་ཉིད་ཀྱི་གློ་གཡས་པའི་ཕྱོགས་ནས་ཞུགས་པར་རྨིས་ཤིང་། དེ་ནས་བཟུང་འདོད་པའི་གནས་ལ་ཡིད་གཡོ་བ་མེད་པར་བསླབ་པའི་གནས་ལྔ་ལ་རང་བཞིན་གྱིས་གནས་པ་བྱུང་། ཡབ་རྒྱལ་པོ་ཟས་གཙང་མའང་གསོ་སྦྱོང་ལ་གནས་ཤིང་རྒྱལ་པོའི་བྱ་བ་བཏང་ནས་ཆོས་ལ་རྟག་ཏུ་སྤྱོད་ཅིང་། རྒྱལ་སྲིད་ཀྱང་འཁྲུག་པ་དང་དགྲ་ཟླ་མེད་པར་བདེ་ཞིང་ལོ་ལེགས་པས་ཐམས་ཅད་དགའ་སྤྲོ་དང་ལྡན་པར་གྱུར་ཏོ། །

༣ སྐུ་བལྟམས་པའི་མཛད་པ།

སྐུ་བལྟམས་པའི་མཛད་པ་ནི། དེ་ལྟར་ཡུམ་གྱི་ལྷུམས་སུ་ཟླ་བ་བཅུ་རྫོགས་ནས་ལྷ་མོས་བྱང་ཆུབ་སེམས་དཔའ་བཙའ་བའི་དུས་ལ་བབ་པ་ཤེས་ནས་རྒྱལ་པོ་ལ་གསོལ་པའི་ཚེ། ཡབ་རྒྱལ་པོས་ཀྱང་ཡུམ་གྱི་བསམ་པ་བཞིན་དུ་ལུམྦི་ནའི་ཚལ་གྱི་ཁོར་ཡུག་ཐམས་ཅད་ཡིད་དུ་འོང་བའི་རྒྱན་དུ་མས་བརྒྱན་པར་བྱས་ཏེ། རིན་པོ་ཆེ་བརྒྱ་ཕྲག་དུ་མའི་ཕྲེང་བ་དང་ལྷའི་གོས་རིན་ཐང་དང་བྲལ་བ་མང་པོས་ཀུན་ནས་མཛེས་པར་བྱས་པའི་ཤིང་རྟ་ལ་ལྷ་མོ་སྒྱུ་འཕྲུལ་མ་བཞུགས་ཤིང་། ཤཱཀྱའི་བུ་མོ་སྟོང་ཕྲག་དྲུག་ཁྲི་དང་། ཤཱཀྱའི་དཔུང་ཚོགས་ཡན་ལག་བཞི་དང་བཅས་པས་ཀྱང་ཡོངས་སུ་བསྐོར་ཏེ་ལུམྦི་ནའི་ཚལ་དུ་གཤེགས་སོ། །དེའི་ཚེ་འཇིག་རྟེན་སྐྱོང་བ་བཞི་དང་། ཚངས་པ་དང་དབང་པོ་སོགས་ཀྱང་ཕྱི་བཞིན་དུ་འབྲངས་ནས་མཆོད་ཅིང་། ལྷ་མིའི་གླུ་དབྱངས་དང་རོལ་མོའི་ཚོགས་ཀྱིས་མཆོད་པར་བྱེད་དོ། །ནགས་ཚལ་དེ་ན་སྔོན་གྱི་རྒྱལ་བ་རྣམས་ཀྱི་ཡུམ་གྱིས་ཀྱང་བསྟེན་པའི་ཤིང་པླཀྵ་ཞེས་བྱ་བ། ལོ་མ་དང་། མེ་ཏོག་དང་། འབྲས་བུས་བརྒྱན་པ་གཟིགས་ནས་དེའི་ཡལ་ག་ལ་ཡུམ་གྱི་ཕྱག་གཡས་པས་བཟུང་སྟེ་ཅུང་ཟད་བཞུགས་ཚེ་བྱང་ཆུབ་སེམས་དཔའ་གློ་གཡས་པ་ནས་འོད་དང་འོད་ཟེར་གྱི་ཕུང་པོ་རབ་ཏུ་དཀྲིགས་པ་དང་བཅས་ཏེ་གནོད་པ་མེད་པར་བདེ་བར་བལྟམས་སོ། །དེའི་ཚེ་ཚངས་པ་དང་བརྒྱ་བྱིན་གཉིས་ཀྱིས་ཀཱ་ཤི་ཀའི་རས་མཆོག་དྲི་མ་མེད་པས་ལྕིབས་ཏེ་བླངས་ཀྱང་བཟུང་མ་ཐུབ་པར་ས་ལ་བབས། དེ་མ་ཐག་ཏུ་སའི་ལྷ་མོས་པདྨ་རྒྱས་པའི་ཞབས་གདན་ཕུལ་བ་དང་། ཀླུའི་རྒྱལ་པོ་དགའ་བོ་དང་ཉེར་དགའ་གཉིས་ཀྱིས་ནམ་མཁའ་ནས་དྭངས་ཤིང་བསིལ་བའི་སྤོས་ཆུས་ཁྲུས་བྱས། ས་ཆེན་པོའང་རྣམ་པ་དྲུག་ཏུ་གཡོས་ཤིང་འོད་ཀྱི་སྣང་བ་ཆེན་པོས་འཇིག་རྟེན་གྱི་ཁམས་ཐམས་ཅད་ཁྱབ་པར་གྱུར། བྱང་ཆུབ་སེམས་དཔས་དེ་མ་ཐག་ཕྱོགས་བཞིར་གོམ་པ་བདུན་བདུན་བོར་བར་མཛད་དེ། ཞལ་ནས་ཀྱང་འདི་སྐད་དུ། འདི་ནི་ཤར་ཕྱོགས་ཡིན་ཏེ་མྱ་ངན་ལས་འདས་པའི་ཐོག་མར་འགྲོ་བར་བྱའོ། །འདི་ནི་ལྷོ་ཕྱོགས་ཡིན་ཏེ་འགྲོ་བ་ཐམས་ཅད་ཀྱི་ཡོན་གནས་སུ་འགྱུར་པའོ། །འདི་ནི་ནུབ་ཕྱོགས་ཡིན་ཏེ་ངའི་སྐྱེ་བའི་ཐ་མ་ཡིན་ནོ། །འདི་ནི་བྱང་ཕྱོགས་ཡིན་ཏེ་སྲིད་པའི་མཚོ་ལས་བརྒལ་བར་བྱའོ། །ཞེས་གསུངས་སོ། །དུས་དེར་རྒྱལ་པོའི་ཁབ་ཏུ་གཟུགས་ཅན་སྙིང་པོ་དང་། མཉན་ཡོད་དུ་གསལ་རྒྱལ། ཀཽ་ཤམྦིར་ཤར་པ། འཕགས་རྒྱལ་དུ་རབ་སྣང་རྣམས་བཙས་པས་འོད་དང་ཆོ་འཕྲུལ་རྣམས་ཀྱང་རང་རང་གི་མཐུས་ཡིན་པར་སེམས། །བཟང་ལྡན་ལ་སོགས་པ་ཤཱཀྱའི་བུ་ལྔ་བརྒྱ་དང་། གྲགས་འཛིན་མ་ལ་སོགས་ཤཱཀྱའི་བུ་མོ་ལྔ་བརྒྱ། འདུན་པ་ལ་སོགས་པའི་བྲན་ལྔ་བརྒྱ། འདུན་མ་སོགས་བྲན་མོ་ལྔ་བརྒྱ་རྣམས་དུས་གཅིག་ཏུ་བཙས་ཤིང་། གླང་མོ་ལྔ་བརྒྱ་ལ་ཕྲུ་གུ་དང་། རྒོད་མ་ལྔ་བརྒྱ་ལ་རྟ་མཆོག་བསྔགས་ལྡན་སོགས་རྟེའུ་ལྔ་བརྒྱ་ཡང་སྐྱེས། གླིང་དབུས་སུ་བྱང་ཆུབ་ཀྱི་ཤིང་སྐྱེས་པ་དང་མེ་ཏོག་ཨུ་དུམ་ཝ་ར་བཞད། སྐྱེད་ཚལ་གཏེར་ཁ་ལྔ་བརྒྱ་སོགས་བྱུང་བས་བྱང་ཆུབ་སེམས་དཔའི་མཚན་ལ་རྒྱལ་པོ་ཟས་གཙང་མས་དོན་ཀུན་གྲུབ་པར་བཏགས་པ་དང་། ཤཱཀྱ་རྣམས་ཀྱིས་རིགས་ཀྱི་ལྷ་རུ་མཆོད་པ་གནོད་སྦྱིན་ཤཱཀྱ་འཕེལ་གྱིས་གཞོན་ནུའི་ཞབས་ལ་ཕྱག་བྱས་པས་ལྷའི་ལྷར་བཏགས། ཤཱཀྱ་གཟུ་ལུམ་ཅན་གཏུམ་པོ་དག་ཀྱང་སྤྱོད་ལམ་ཞི་དུལ་ལ་བཀོད་པས་ཤཱཀྱ་ཐུབ་པ་ཞེས་བཏགས་སོ། །བྱང་ཆུབ་སེམས་དཔའ་འཁྲུངས་ནས་ཞག་བདུན་ལོན་པ་ན་ཡུམ་ལྷ་མོ་ལྔ་བའི་ལམ་དུ་སོང་སྟེ་སུམ་ཅུ་རྩ་གསུམ་དུ་ལྷའི་རིགས་གྱ་ནོམ་པར་སྐྱེས། སྐྱེ་དགུའི་བདག་མོ་སོགས་མ་མ་སུམ་ཅུ་རྩ་གཉིས་ཀྱིས་གཞོན་ནུ་སྐྱེད་བསྲིངས་པར་མཛད་དོ། །དེའི་ཚེ་མངོན་ཤེས་ལྔ་དང་ལྡན་པའི་དྲང་སྲོང་ནག་པོ་ཞེས་པ་དེ་རང་གི་སྣག་གི་ཚ་བོ་མེས་བྱིན་དང་ལྷན་ཅིག་བྱང་ཆུབ་སེམས་དཔའ་ལ་བལྟ་བའི་ཕྱིར་རྫུ་འཕྲུལ་གྱིས་ནམ་མཁའ་ནས་འཕུར་ཏེ་འོངས་པ་ན་གྲོང་ཁྱེར་སེར་སྐྱ་དང་ཉེ་བའི་ཚེ་བྱང་ཆུབ་སེམས་དཔའི་མཐུས་རྫུ་འཕྲུལ་ཉམས་ཏེ་རྐང་པས་བགྲོད་དགོས་པ་བྱུང་། དེ་ཕོ་བྲང་དུ་ཕྱིན་ཏེ་སྐྱེས་བུ་ཆེན་པོར་མཆོག་ཏུ་རིགས་པར་བྱས་ཤིང་ལེགས་པར་བརྟགས་ནས་སྔོན་ཆད་མཚན་མཁན་རྣམས་ཀྱིས་གཞོན་ནུ་ཇི་ལྟར་ལུང་བསྟན་ཅེས་རིམ་གྲོ་བ་དག་ལ་དྲིས་པ་ན། འདི་ནི་གཉིས་སུ་འགྱུར་གྱིས་གཞན་དུ་མི་འགྱུར་རོ། །གལ་ཏེ་ཁྱིམ་ལ་གནས་ན་ནི་འཁོར་ལོའི་སྒྱུར་བའི་རྒྱལ་པོ་དང་། རབ་ཏུ་བྱུང་ན་ནི་རྫོགས་པའི་སངས་རྒྱས་སུ་འགྱུར་བ་སོགས་རྒྱས་པར་མཚན་མཁན་རྣམས་ཀྱིས་ཇི་ལྟར་སྨྲས་པ་བཞིན་བཤད་པས། དྲང་སྲོང་ན་རེ། ས་བདག་རྟོག་པ་པོ་རྣམས་བློ་འཁྲུལ་ཏེ། །རྩོད་པའི་དུས་སུ་འཁོར་ལོས་སྒྱུར་མི་འབྱུང་། །བསོད་ནམས་མཆོག་གི་ཆོས་ཀྱི་མཛོད་འདི་ནི། །ཉེས་ལས་རྣམ་པར་རྒྱལ་ནས་སངས་རྒྱས་འགྱུར། །ཞེས་མངོན་པར་ཤེས་པས་ལུང་བསྟན་ཏོ། །

༤ བཟོ་ཡི་གནས་ལ་སྦྱངས་པའི་མཛད་པ།

བཟོ་ཡི་གནས་ལ་སྦྱངས་པའི་མཛད་པ་ནི། དེ་ནས་བྱང་ཆུབ་སེམས་དཔའ་ཅུང་ཟད་ནར་སོན་པ་ན་ཤཱཀྱ་གཞོན་ནུ་ལྔ་བརྒྱ་དང་ལྷན་གཅིག་ཏུ། སློབ་དཔོན་ཀུན་གྱི་བཤེས་གཉེན་དང་སྲིད་སྒྲུབ་ལས་ཡི་གེ་དང་རྩིས་ཀྱི་གནས་ལ་སྦྱང་པ་མཛད་ཚེ་བརྡ་བསྟན་པ་ཙམ་གྱིས་ཁོང་དུ་ཆུད་ཅིང་མཁྱེན་པས་རྒྱལ་ཁམས་ཐམས་ཅད་ངོ་མཚར་བའི་གནས་ལ་བཀོད་ཅིང་། དེའི་ཚེ་སློབ་དཔོན་གྱིས། སེམས་ཅན་དག་པ་ངོ་མཚར་ཆེ། །བསྟན་བཅོས་ཀུན་ལ་བསླབ་གྱུར་ཀྱང་། །

འཇིག་རྟེན་འཇིག་རྟེན་རྗེས་བསྙེག་ཕྱིར། །ཡི་གེའི་གྲྭར་ནི་བྱོན་པར་གྱུར། །ཞེས་སོགས་ཀྱིས་བསྟོད་དོ། །དེ་བཞིན་དུ་ཉིད་ཀྱི་ཞང་པོ་བཟང་ལེན་ལས་གླང་པོའི་གཉར་ཞོན་པ་སོགས་དང་། ལྷར་བཅས་ལས་འཕོང་དང་མཚོན་ཆའི་འཕྲུལ་འཁོར་རྣམས་ལ་བསླབ་པར་མཛད་ཚེ་ཚེགས་ལ་མ་བལྟོས་པར་མཁྱེན་ཅིང་། ཤཱཀྱ་གཞོན་ནུ་གཞན་རྣམས་ཀྱིས་ནི་བརྩོན་པས་བསླབས་ཤིང་བྱང་བར་གྱུར་ཏོ། །རེ་ཞིག་ན་ཐམས་ཅད་སྒྱུ་རྩལ་འགྲན་པ་ལ་ཆས་པའི་ཚེ། ལྷས་བྱིན་གྱིས་གླང་པོའི་མཆོག་གཅིག་སྒོ་དྲུང་དུ་ཡོད་པ་ལ་ཐལ་མོས་བསྣུན་ཏེ་བསད་དོ། །གཞོན་ནུ་མཛེས་དགས་གླང་པོའི་རོ་དེའི་མཇུག་མ་ནས་བཟུང་སྟེ་གྲོང་ཁྱེར་ཕྱི་རོལ་དུ་འཕངས་སོ། །བྱང་ཆུབ་སེམས་དཔས་ཤིང་རྟ་ལ་བཞུགས་བཞིན་པའི་ཞབས་ཀྱི་མཐེ་བོས་བླངས་ཏེ་ར་བ་རིམ་པ་བདུན་དང་འོབས་རིམ་པ་བདུན་བརྒལ་བའི་ཕྱི་རོལ་རྒྱང་གྲགས་གཅིག་ཏུ་འཕངས་པས་ས་ཕྱོགས་དེ་ན་གཤོང་ཆེན་པོ་ཞིག་བྱུང་སྟེ་གླང་པོའི་གཤོང་ཞེས་བྱ་བར་གྲགས་སོ། །

དེ་ནས་མདའི་གཅོད་ཚད་འགྲན་པ་ལ་ཞུགས་པ་ན། ལྷས་བྱིན་གྱིས་ལྕགས་ཀྱི་ཕ་གུ་གཅིག་དང་། གཅུང་དགའ་བོས་གཉིས། བྱང་ཆུབ་སེམས་དཔས་ལྕགས་ཀྱི་ཕ་གུ་བདུན་དང་། ཤིང་ཏཱ་ལའི་ལྗོན་པ་བདུན། སླ་ང་བདུན་བརྩེགས་པ་ཐམས་ཅད་ལས་འདས་ཏེ་མདའ་ས་ལ་ཟུག་པའི་ཤུལ་དུ་ཆུ་བྱུང་བར་མདའ་ཆུ་ཁྲོན་པར་གྲགས། གཞན་ཡང་ཡི་གེ་དང་། རྩིས་དང་། མཆོངས་དང་། རྐྱལ་དང་། བང་དང་། སྟོབས་འགྱེད་པ་སོགས་སྒྱུ་རྩལ་འགྲན་པ་ཐམས་ཅད་དོ་ཟླ་མེད་པར་གྱུར་ཏེ་ལྷ་མི་ཀུན་ཀྱིས་བསྟོད་ཅིང་བསྔགས་པ་བརྗོད་དོ། །

༥ བཙུན་མོའི་འཁོར་དུ་དགྱེས་རོལ་གྱི་མཛད་པ།

བཙུན་མོའི་འཁོར་དུ་དགྱེས་རོལ་གྱི་མཛད་པ་ནི། དེའི་ཚེ་ཤཱཀྱ་རྒན་རབས་རྣམས་ཀྱིས་རྒྱལ་པོ་ལ། ལྟས་མཁན་དག་གིས་གཞོན་ནུ་འདིས་ཁབ་བཞེས་ན་འཁོར་ལོས་སྒྱུར་རྒྱལ་དུ་འགྱུར་རོ། །ཞེས་ལུང་བསྟན་ན་བཙུན་མོ་བླང་བར་རིགས་སོ་ཞེས་གསོལ། རྒྱལ་པོས་གཞོན་ནུའི་ཚུལ་དང་མཐུན་པའི་བུ་མོ་གང་ཡོད་ལྟོས་ཤིག་ཅེས་བཀའ་བསྩལ། ཤཱཀྱ་ལྔ་བརྒྱ་ཙམ་གྱིས་ངེད་ཀྱི་བུ་མོ་མཐུན་ནོ་ཞེས་ཟེར། རྒྱལ་པོས་གཞོན་ནུ་ཉིད་ལ་དྲིས་ཤིག་ཟེར་ནས་དྲིས་པའི་ཚེ། གཞོན་ནུའི་ཐུགས་དགོངས་ལ། འདོད་པའི་སྐྱོན་ནི་བདག་གིས་མཐའ་ཡས་རིགས། །འཐབ་མོ་འཁོན་བཅས་མྱ་ངན་སྡུག་བསྔལ་རྩ། །འཇིགས་བྱེད་དུག་གི་ལོ་མ་འདྲ་བ་སྟེ། །མེ་དང་འདྲ་ཞིང་རལ་གྲིའི་སོ་དང་འདྲ། །འདོད་པའི་ཡོན་ཏན་བདག་འདོད་མ་ཡིན་ཏེ། །བདག་དང་བུད་མེད་ཚོགས་དང་མཛེས་མ་ཡིན། །ཞེས་འདོད་པའི་ཉེས་པ་མཐའ་ཡས་པ་ཇི་བཞིན་པ་མཁྱེན་ཞིང་གཟིགས་ཀྱང་རེ་ཞིག་ཐབས་ལ་མཁས་པ་མངོན་དུ་བྱ་བའི་ཕྱིར་བུད་མེད་ཀྱི་ཡོན་ཏན་ཡི་གེ་ལ་བྲིས་ཏེ་འདི་འདྲ་བ་བདག་ལ་མཛའ་ཞེས་པ་དང་། རྒྱལ་པོས་མདུན་ན་འདོན་ལ་ཁྱོད་སོང་ལ་གང་ན་ཡོན་ཏན་འདི་དག་ཡོད་པའི་བུ་མོ་ཁྲིད་ལ་ཤོག་ཅེས་སྨྲས་སོ། །དེ་ཡུལ་ཀུན་ཏུ་སོང་སོང་བས་ཤཱཀྱ་ལག་ན་བེ་ཅོན་གྱི་བུ་མོ་ས་འཚོ་མ་མཐོང་ནས་ཡི་གེ་དེ་བྱིན་པ་དང་དེའང་བཞིན་འཛུམ་སྟེ། བྲམ་ཟེ་ཡོན་ཏན་འདི་དག་བདག་ལ་ཀུན་ཚང་གིས། །དེས་པའི་གཟུགས་ཅན་དེ་ནི་བདག་གི་ཁྱིམ་ཐབ་འོས། །གལ་ཏེ་གཞོན་ནུས་བཞེས་ན་ཕྱི་བཤོལ་མ་མཛད་ཅིག །ཅེས་སྨྲས་སོ། །དེ་ཚུལ་མདུན་ན་འདོན་གྱིས་རྒྱལ་པོ་ལ་གསོལ་བས་རྒྱལ་པོས་བུད་མེད་རྣམས་རྫུན་ཆེ་བས་ཡིད་མི་ཆེས་ཏེ་ད་སྟེ་ཞག་བདུན་ཚུན་བུ་མོ་ཐམས་ཅད་ཕོ་བྲང་དུ་ཤོག་དང་གཞོན་ནུས་ཡིད་དུ་འོང་པའི་ཡོ་བྱད་དག་སྦྱིན་ནོ་ཞེས་ཕྱོགས་ཀུན་དྲིལ་དུ་བསྒྲག་པར་གྱིས་གསུངས། དེ་ནས་བུ་མོ་རྣམས་ཇི་ལྟར་འོངས་པ་བཞིན་ཡོ་བྱད་དག་བྱིན་ཞིང་དེ་དག་གིས་ཀྱང་གཟི་བརྗིད་མ་བཟོད་པར་མྱུར་དུ་སོང་ངོ་། །ས་འཚོ་མ་འོངས་པ་དང་ཡོ་བྱད་ཟད་པས་དེ་འཛུམ་དམུལ་ཏེ་བདག་གིས་ནོངས་པ་ཅི་བགྱིས་ནས་བདག་ལ་རྔན་པ་མི་གནང་ཞུས་པར། གཞོན་ནུས་མི་སྦྱིན་པ་མིན་གྱི་ཁྱེད་འཕྱིས་པས་ལན་ནོ་གསུངས་ཏེ་སོར་གདུབ་གསེར་སྲང་བརྒྱ་སྟོང་རི་བ་དེ་བྱིན་ནོ། །དེ་ནས་དེ་སོང་བ་དང་བྱ་ར་པ་དག་གིས་ཡབ་རྒྱལ་པོ་ལ་གཞོན་ནུ་ས་འཚོ་མ་ལ་སྤྱན་ཆགས་ཏེ་བཀའ་མཆིད་ཀྱང་ཅུང་ཟད་བགྱིས་སོ་ཞེས་གསོལ་ཏོ། །དེ་ནས་རྒྱལ་པོས་ཤཱཀྱ་ལག་ན་བེ་ཅོན་ལ་ཁྱོད་ཀྱི་བུ་མོ་གཞོན་ནུ་མ་བྱིན་ཅིག་ཅེས་ཕོ་ཉ་བཏང་ཏེ་བུད་མེད་ཀྱི་སྐྱོན་ལྔ་དང་བྲལ་ཞིང་ཡོན་ཏན་བརྒྱད་དང་ལྡན་པ་ས་འཚོ་མ་ཁབ་ཏུ་བཞེས་ཤིང་། དེ་བཞིན་གྲགས་འཛིན་མ་དང་རི་དྭགས་སྐྱེས་སོགས་བཙུན་མོའི་ཚོགས་དང་ལྷན་གཅིག་ཏུ་དགའ་ཞིང་རྩེ་བས་དགུང་ལོ་ཉི་ཤུ་རྩ་དགུ་བར་རྒྱལ་སྲིད་སྐྱོང་བར་མཛད་དོ། །

༦ ཁབ་ནས་མངོན་པར་བྱུང་བའི་མཛད་པ།

ཁབ་ནས་མངོན་པར་བྱུང་བའི་མཛད་པ་ནི། དེའི་ཚེ་ཕྱོགས་བཅུའི་སངས་རྒྱས་རྣམས་ཀྱིས་སྔོན་གྱི་དམ་བཅའ་ཡོངས་སུ་བསྐུལ་བའི་ཕྱིར་སིལ་སྙན་དག་ལས་སྒྲ་བྱུང་བ་ནི། སྡུག་བསྔལ་གྱིས་གང་སེམས་ཅན་མཐོང་ནས་ནི། །འགྲོ་བའི་མགོན་དང་སྐྱབས་དང་གནས་གྱུར་ཅིང་། །ཕན་བྱེད་མཆོག་དང་དཔུང་གཉེན་གྱུར་ཅིག་ཅེས། །ཁྱེད་ཀྱིས་སྔོན་གྱི་སྨོན་ལམ་དེ་སྐད་བཏབ། །དགེ་བ་དཔའ་བོ་སྔོན་གྱི་སྤྱོད་པ་དང་། །འགྲོ་ཕན་བྱ་ཞེས་སྨོན་བཏབ་དྲན་པར་བྱོས། །ཞེས་དང་། འཆི་མེད་མྱ་ངན་མེད་ན་སངས་རྒྱས་ཏེ། །སྐོམ་པས་ཉམ་ཐག་བདུད་རྩིས་ཚིམ་བྱ་ཞིང་། །ཁྱོད་ཀྱིས་སྔོན་སྨྲས་ཚིག་མཐོང་དྲན་བྱས་ནས། །གྲོང་ཁྱེར་དམ་པ་འདི་ནས་མྱུར་དུ་བྱོན། །ཞེས་སོགས་བསྐུལ་བའི་ཚིག་བརྒྱ་སྟོང་བྱུང་བས་མངོན་པར་བྱུང་བ་ལ་ཐུགས་ཕྱོགས་པར་གྱུར་ཏོ། །དེ་ནས་གཞོན་ནུ་ཕྱི་རོལ་གྱི་སྐྱེད་མོས་ཚལ་གཟིགས་པའི་ཕྱིར་གྲོང་ཁྱེར་གྱི་སྒོ་བཞིར་གཤེགས་པ་ན། ལྷས་སྤྲུལ་བའི་རྒས་པ་དང་། ན་བ་དང་། ཤི་བར་གྱུར་པའི་རོ་དང་། རབ་ཏུ་བྱུང་བའི་གཟུགས་རྣམས་རིམ་པ་བཞིན་དུ་གཟིགས་པས་ཐུགས་ཤིན་ཏུ་སྐྱོ་སྟེ། རྒ་དང་ན་དང་འཆི་འགྱུར་པ། །གལ་ཏེ་འདི་གསུམ་ཡོད་མིན་ན། །བདག་ཀྱང་ཤིན་ཏུ་ཡིད་འོང་པའི། །ཡུལ་རྣམས་ལ་ནི་དགའ་བར་བྱེད། །ཅེས་སོགས་གསུངས། དེའི་ཚེ་ཡབ་རྒྱལ་པོ་ཟས་གཙང་གིས་གཞོན་ནུ་རབ་ཏུ་བྱུང་བར་འགྱུར་གྱི་དོགས་ནས་གྲོང་ཁྱེར་གྱི་ཁོར་ཡུག་ཐམས་ཅད་དུ་མེལ་ཚེ་པས་བསྲུང་བའི་བཀའ་བསྒྲགས་སོ། །ནུབ་གཅིག་བཙུན་མོ་རྣམས་གཉིད་དུ་སོང་བ་ན་རིམ་གྲོ་བ་འདུན་པ་ལ་རྟ་མཆོག་བསྔགས་ལྡན་ཁྲིད་ལ་ཤོག་ཅེས་བཀའ་བསྩལ་པ་དང་། དེས་ཀྱང་བཀའ་བཞིན་མྱུར་བར་བསྒྲུབས་པས་རྟ་ལ་ཆིབས་ཏེ་ནམ་མཁའི་དབྱིངས་ནས་དཔག་ཚད་བཅུ་གཉིས་ཀྱི་སར་གཤེགས་ཏེ་ཆིབས་ལས་བབ། དེར་སྐུའི་རྒྱན་རྣམས་བཀྲོལ་ཏེ་འདུན་པ་ལ་རྒྱན་དང་རྟ་ཁྱེར་ལ་ཕྱིར་ལོག་ཅིག་ཅེས་བཀའ་བསྩལ། འདུན་པ་གདོང་མཆི་མས་གང་བཞིན་དུ་གསོལ་པ། །སེངྒེ་སྟག་གིས་གཏམས་པ་དང་། །ཕྱུགས་རྫིས་གང་བའི་ནགས་ཚལ་དུ། །འབའ་ཞིག་སྐུ་གཉེན་དང་བྲལ་བར། །འཕགས་པ་ཇི་ལྟར་སྤྱོད་པར་འགྱུར། །ཞེས་སྨྲས་པར། སྐྱེ་དགུ་འདི་ན་སྐྱེ་ནའང་གཅིག་པུ་སྟེ། །དེ་བཞིན་འཆི་ནའང་གཅིག་པུར་འཆི་བར་འགྱུར། །འདི་ན་གཅིག་པུས་སྡུག་བསྔལ་མྱོང་གྱུར་ཏེ། །འཁོར་བ་ལ་ནི་གྲོགས་ཡོད་མ་ཡིན་ནོ། །ཞེས་སོགས་ཞུ་ལན་མང་དུ་མཛད་དེ་འདུན་པ་ཤཱཀྱའི་རྒྱལ་སར་ཕྱིར་ལྷོགས། དེ་ནས་རལ་གྲི་ཨུཏྤལ་མཐིང་གའི་འདབ་མ་དང་འདྲ་བས་ཉིད་ཀྱི་དབུ་སྐྲ་ཉིད་ཀྱིས་བྲེགས་ཏེ་མཁའ་ལ་གཏོར་བ་བརྒྱ་བྱིན་གྱིས་ཁྱེར་ནས་ལྷའི་གནས་སུ་དུས་སྟོན་བཙུགས། ལྷའི་བུ་རྔོན་པའི་གཟུགས་སུ་སྤྲུལ་བས་ངུར་སྨྲིག་གི་གོས་ཕུལ་བ་བླངས་ཏེ་སྐུ་ལ་གསོལ་ནས་བདག་ཉིད་རང་གིས་རབ་ཏུ་བྱུང་བ་དང་བསྙེན་པར་རྫོགས་པར་མཛད་དོ། །

༧ དཀའ་བ་སྤྱད་པའི་མཛད་པ།

དཀའ་བ་སྤྱད་པའི་མཛད་པ་ནི། དེ་ནས་བྱང་ཆུབ་སེམས་དཔའི་སྤྱོད་པ་དྲི་མ་མེད་པར་འཇུག་པའི་གདུལ་བྱ་རྣམས་ལ་བྱང་ཆུབ་དམ་པ་ནི་དཀའ་བ་དཔག་ཏུ་མེད་པས་བསྒྲུབ་དགོས་སོ་ཞེས་བསྟན་པའི་ཕྱིར། ཡངས་པ་ཅན་དུ་སྒྱུ་རྩལ་ཤེས་ཀྱི་བུ་རིང་འཕུར་དང་། རྒྱལ་པོའི་ཁབ་ན་རེངས་བྱེད་དང་ལྷག་སྤྱོད་དག་གིས་ཅི་ཡང་མེད་པའི་སྐྱེ་མཆེད་དང་སྲིད་རྩེའི་སེམས་སྟོན་པ་རྣམས་སུ་བྱོན་ཏེ། དེ་དག་གི་ཚུལ་མྱུར་བར་ཁོང་དུ་ཆུད་པར་མཛད་ཀྱང་ཏིང་འཛིན་ཀུན་ཏུ་སྤྱོད་པ་དེ་དག་ནི་སྲིད་པའི་ཉེས་དམིགས་ལས་གྲོལ་བའི་ལམ་མ་ཡིན་པར་གཟིགས་ནས་ཆུ་ཀླུང་ཆེན་པོ་ནཻ་རཉྫ་ན་འབབ་པའི་འགྲམ་དུ་གཅིག་པུར་བཞུགས་སོ། །དེའི་ཚེ་འདི་སྙམ་དུ་དགོངས་ཏེ། ཀྱེ་ཛམྦུ་གླིང་འདི་སྙིགས་མ་ལྔའི་དུས་ལ་བབས་པས་སེམས་ཅན་དམན་པ་ལ་མོས་པ། མུ་སྟེགས་ཅན་གྱི་སྡེས་གང་བ། ལྟ་བ་སྣ་ཚོགས་ལ་ཞུགས་པ། སྐྱབས་མ་ཡིན་པ་ལ་སྐྱབས་སུ་འདུ་ཤེས་པ། དག་པ་མ་ཡིན་པ་ལ་དག་པར་འདུ་ཤེས་པ་ཁོ་ན་སྟེ། བརྟུལ་ཞུགས་ངན་པ་དང་དཀའ་ཐུབ་ངན་པས་དག་པ་འཛིན་པ་རྣམས་སུན་འབྱིན་པའི་ཕྱིར་བརྟུལ་ཞུགས་དང་དཀའ་ཐུབ་ཀྱི་ཁྱད་པར་བརྩམ་པར་བཞེད་ནས་མཁའ་ཁྱབ་ཀྱི་ཏིང་ངེ་འཛིན་ལ་མཉམ་པར་བཞག་གོ། དེ་ཡང་ལོ་དང་པོ་གཉིས་ལ་འབྲས་ཉག་མ་རེ། བར་པ་གཉིས་ལ་ཆུ་ཐིགས་པ་རེ། ཐ་མ་གཉིས་ལ་ཅི་ཡང་མི་གསོལ་བའི་དཀའ་ཐུབ་ཀྱིས་ལོ་དྲུག་འདས་པའི་ཚེ་ཕྱོགས་བཅུའི་རྒྱལ་བ་སྲས་དང་བཅས་པས་ལམ་དམན་པ་ལས་སད་པར་བྱས་ནས་བྱང་ཆུབ་སྙིང་པོར་བསྐུལ་བ་ན། སྔོན་དུ་ལྷ་རྣམས་ཀྱིས་ཇི་ལྟར་སྦྲན་པ་ལྟར་གྲོང་གི་བུ་མོ་ལེགས་སྐྱེས་མས་བ་སྟོང་གི་འོ་མ་ལན་བཅུ་དྲུག་ཏུ་ཉིང་ཁུར་བྱས་པ་གསེར་གྱི་ཡོལ་གོའི་ནང་དུ་བླུགས་ནས་ཕུལ། བྱང་ཆུབ་སེམས་དཔའ་བསོད་ནམས་དང་ཤེས་རབ་ཀྱི་སྟོབས་ཀྱིས་འོ་ཐུག་གསོལ་མ་ཐག་སྐུ་གསེར་གྱི་མདོག་དང་ལྡན་པ་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བརྒྱད་ཅུས་ཡོངས་སུ་སྤྲས་པའི་འོད་དང་ལྡན་པར་གྱུར་ཏོ། །

༨ བྱང་ཆུབ་སྙིང་པོར་གཤེགས་པའི་མཛད་པ།

བྱང་ཆུབ་སྙིང་པོར་གཤེགས་པའི་མཛད་པ་ནི། དེ་ལྟར་རགས་པའི་ཟས་ཀྱིས་བྱང་ཆུབ་སེམས་དཔའི་སྐུ་ལུས་སྟོབས་དང་ལྡན་པར་བསྐྱེད་ནས་བྲག་རི་མེ་ཏོག་དང་འབྲས་བུས་བརྒྱན་པ་ཞིག་ཏུ་བཞུགས་པའི་དེ་མ་ཐག་རི་དེ་ཉིལ་ལོ། །ལྷ་རྣམས་ཀྱིས་གསོལ་བ། དགེ་བའི་རྩ་བ་ཡོངས་སུ་སྦྱངས་པ་ནི་ས་གཞན་གྱིས་གཟུང་བར་མི་ནུས་པས་འདི་དང་ཉེ་བ་ནུབ་ཀྱི་ཕྱོགས་སུ་རྡོ་རྗེ་གདན་མཆིས་པས་དེར་གཤེགས་པར་འཚལ་ཞེས་ལམ་བསྟན་པ་བཞིན་དུ་གཤེགས་སོ། །དུས་དེར་ཆུ་ཀླུང་ནཻ་རཉྫནར་ཀླུ་དུག་ཅན་ནག་པོ་ཟེར་བ་དུས་གཞན་དུ་མིག་ལོང་བ་སངས་རྒྱས་འཇིག་རྟེན་དུ་བྱོན་པའི་ཚེ་མིག་ཐོབ་པ་ཞིག་ཡོད་པ་དེས་བྱང་ཆུབ་སེམས་དཔའ་མཐོང་བས་རབ་ཏུ་དགའ་སྟེ། བདག་གིས་སྔོན་དུ་མཐོང་བ་ཡི། །སངས་རྒྱས་མཐུ་ཆེན་དེ་རྣམས་དང་། །ཐུབ་པ་ཁྱོད་ནི་མཐོང་གྱུར་ན། །དེ་དག་ཐ་དད་དབྱེར་མ་མཆིས། །ཞེས་པ་སོགས་ཀྱིས་མཆོད་ཅིང་བསྟོད་པར་བྱས་སོ། །ཡང་གཤེགས་པ་ན་རྩྭ་འཚོང་བཀྲ་ཤིས་དང་འཕྲད་པས་དེས་སྤོས་ངད་ལྡན་ལས་བླངས་པའི་རྩྭ་འཇམ་ཞིང་དགེ་ལ་བདེ་བ་ཁུར་གཅིག་ཐོགས་པ་གཟིགས་ཚེ། བཀྲ་ཤིས་རྩྭ་དག་ང་ལ་མྱུར་དུ་བྱིན། །དེ་རིང་ང་ལ་རྩྭས་ནི་དོན་ཆེན་འགྱུར། །དཔུང་དང་བཅས་པའི་བདུད་ནི་བཅོམ་ནས་སུ། །བྱང་ཆུབ་དམ་པ་ཞི་བར་རེག་པར་འགྱུར། །ཞེས་གསུངས་པས་དེས་ཀྱང་གུས་པ་དང་བཅས་པས་ཕུལ་ཏེ། རྩྭ་ཡིས་བྱང་ཆུབ་འཆི་མེད་པ། །སྔོན་གྱི་རྒྱལ་བའི་ལམ་ཐོབ་ན། །ཡོན་ཏན་རྒྱ་མཚོ་ཁྱོད་བཞེས་ཤིག །བདག་ཀྱང་ཐོག་མར་འཚང་རྒྱ་གྱིས། །ཞེས་གསོལ་ཏོ། །དེ་ནས་བྱང་ཆུབ་སྙིང་པོ་རྡོ་རྗེ་གདན་ལ་འཛེགས་ནས་བྱང་ཆུབ་ཤིང་དྲུང་དུ་རྩྭའི་བམ་པོ་དེ་བསྒྱུར་སྟབས་སུ་གཏོར་བ་ན། རང་བཞིན་གྱིས་སྲབ་འཐུག་མེད་པར་གཡས་ཕྱོགས་སུ་འཁྱིལ་ཏེ་འདུག་པའི་སྟེང་སྐྱིལ་ཀྲུང་གིས་སྐུ་དྲང་པོར་བསྲངས་ནས་བཞུགས་ཏེ། སྟན་འདིར་བདག་གི་ལུས་ནི་སྐམ་ཀྱང་རུང་། །པགས་པ་རུས་པ་ཤ་རྣམས་ཞིག་ཀྱང་རུང་། །བསྐལ་མང་རྙེད་དཀའི་བྱང་ཆུབ་མ་ཐོབ་པར། །སྟན་འདི་ལས་ནི་ལུས་བསྐྱོད་མི་བྱའོ། །ཞེས་དམ་བཅའི་གསུང་ཡོངས་སུ་བསྒྲགས་པར་མཛད་དོ། །

༩ བདུད་བཏུལ་བའི་མཛད་པ།

བདུད་བཏུལ་བའི་མཛད་པ་ནི། དེ་ནས་བྱང་ཆུབ་སེམས་དཔས་གླིང་བཞི་པའི་འདོད་པའི་ཁམས་ཀྱི་དབང་ཕྱུག་ནི་གཞན་འཕྲུལ་དབང་བྱེད་ཀྱི་བདག་པོ་བདུད་སྡིག་ཅན་ཡིན་ལ། དེ་ལ་མ་སྦྲན་པར་བདུད་ལས་རྣམ་པར་རྒྱལ་བའི་གོ་འཕང་མངོན་དུ་མི་འགྱུར་བར་དགོངས་ཏེ། སྨིན་མཚམས་ཀྱི་མཛོད་སྤུ་ལས་བདུད་སྐུལ་བར་བྱེད་པ་དང་བདུད་འདུལ་བར་བྱེད་པའི་འོད་ཟེར་བྱུང་སྟེ། འོད་ཟེར་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བདུད་ཀྱི་གནས་ཐམས་ཅད་སྣང་བར་བྱས་ཤིང་མོག་མོག་པོར་གྱུར་ཅིང་སྤུ་ཟིང་བར་བྱས་ཤིང་། ཟས་གཙང་སྲས་ཀྱིས་རྒྱལ་སྲིད་དག་ནི་ཡོངས་སྤངས་ཏེ། །ཕན་བྱེད་དེ་ནི་བདུད་རྩི་མངོན་པར་འདོད་པས་བྱུང་། །བྱང་ཆུབ་ཤིང་དྲུང་འོད་ཀྱིས་དེ་རིང་བསྒྲིམ་པར་གྱུར། །དེས་ན་བདག་ཀྱང་བརྒལ་ལ་གཞན་ཡང་སྒྲོལ་བར་བྱེད། །ཅེས་བྱ་བའི་སྒྲ་ནམ་མཁའ་ནས་བྱུང་བས་བདུད་སྡིག་ཅན་ཤིན་ཏུ་ཁྲོས་ཏེ་རྔོན་པའི་ཆ་བྱད་དུ་བརྫུས་ནས་འོངས་ཏེ། འདི་སྐད་དུ། སེར་སྐྱའི་གྲོང་ནི་ལྷས་བྱིན་གྱིས་མནན། ཕོ་བྲང་ནི་བཅོམ། ཤཱཀྱ་རྣམས་ནི་བསད་ཟིན་ན་ཁྱོད་ཅིའི་ཕྱིར་འདུག་ཅེས་སྨྲས་པར། བྱང་ཆུབ་སེམས་དཔས། བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར་རོ། །ཞེས་བཀའ་བསྩལ་པ་དང་། བདུད་ཀྱིས་སྨྲས་པ། མངོན་པར་རྫོགས་པར་འཚང་རྒྱ་བ་ནི་ཚོགས་དཔག་ཏུ་མེད་པའི་འབྲས་བུ་ཡིན་ན། ཁྱོད་ཀྱི་བསོད་ནམས་དེ་ཙམ་གྱིས་འབྲས་བུ་ག་ལ་ཐོབ། ཅེས་སྨྲས་པ་དང་། བཀའ་བསྩལ་པ། སྡིག་ཅན་ཁྱོད་ཀྱིས་མཆོད་སྦྱིན་གཏན་པ་མེད་པ་གཅིག་བྱས་པས་འདོད་པའི་ཁམས་ཀྱི་དབང་ཕྱུག་ཏུ་གྱུར་ན། ངས་བསྐལ་པ་གྲངས་མེད་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་དུ་མ་བྱས་ཤིང་ཡོངས་སུ་གཏོང་བར་དཀའ་བ་རྣམས་བཏང་བས་བླ་ན་མེད་པའི་ཡེ་ཤེས་ཐོབ་པར་འགྱུར་བ་ལྟ་སྨོས་ཀྱང་ཅི་དགོས། བདུད་ཀྱིས་སྨྲས་པ། ཁོ་བོས་མཆོད་སྦྱིན་གཏན་པ་མེད་པ་བགྱིས་པའི་དཔང་པོ་ནི་ཁྱོད་ཉིད་ཡོད་ན། ཁྱོད་ལ་དཔང་པོ་སུ་ཡང་མེད་དོ་ཟེར། དེའི་ཚེ་བྱང་ཆུབ་སེམས་དཔའི་ཕྱག་གཡས་བསོད་ནམས་བརྒྱ་ཕྲག་དུ་མས་བསྐྱེད་པ་ས་ལ་རེག་པར་མཛད་དེ། ས་འདི་འགྲོ་བ་ཀུན་ཀྱི་གནས་ཡིན་ཏེ། །རྒྱུ་དང་མི་རྒྱུ་སྙོམས་ཤིང་ཉེ་འཁོན་མེད། །འདི་ནི་བདག་གི་དཔང་སྟེ་བདག་རྫུན་མེད། །འདི་ལ་ཁྱོད་ནི་བདག་གི་དཔང་བྱོས་ཤིག །ཅེས་གསུངས་མ་ཐག་ས་རྣམ་པ་དྲུག་ཏུ་གཡོས་ཤིང་སའི་ལྷ་མོ་བརྟན་མ་ལུས་ཕྱེད་མངོན་པར་བྱུང་སྟེ། སྐྱེས་བུ་ཆེན་པོ་དེ་བཞིན་ནོ། །ཁྱོད་ཀྱིས་ཇི་སྐད་གསུངས་པ་དེ་བཞིན་ཏེ། འདི་ནི་བདག་ལ་མངོན་སུམ་མོ། །འོན་ཀྱང་བཅོམ་ལྡན་འདས་ཁྱོད་ནི་ལྷ་དང་བཅས་པའི་འཇིག་རྟེན་གྱི་དཔང་དུ་གྱུར་པ་དང་ཚད་མར་གྱུར་པ་དམ་པའོ་ཞེས་བརྗོད་དེ་མི་སྣང་བར་གྱུར་ཏོ། །དེ་ནས་བདུད་སྡིག་ཅན་གྱིས་རྗེས་སུ་ཆགས་པས་བསླུ་བར་ནུས་སམ་མི་ནུས་སད་པར་བྱའོ་སྙམ་ནས། རང་གི་བུ་མོ་སྲེད་མ་དང་། དགའ་བྱེད་མ་དང་། དགའ་སྤྱོད་མ་རྣམས་བཏང་སྟེ་བུད་མེད་ཀྱི་གཡོ་སྒྱུ་སུམ་ཅུ་རྩ་གཉིས་ཀྱིས་བསླུ་བར་བརྩམས་པ་ན། དེ་དག་རྒན་མོ་མདོག་ཤིན་ཏུ་མི་སྡུག་པར་འགྱུར་བར་བྱིན་གྱིས་བརླབས། སླར་སྟོན་པ་ལ་མོས་པ་བསྐྱེད་པས་རྣམ་པར་གྲོལ་བའི་ལམ་ལ་བཀོད་པར་མཛད་དོ། །དེ་ནས་བདུད་སྡིག་ཅན་བག་འཁུམས་ཤིང་སེམས་ཁོང་དུ་ཆུད་ནས་སོང་སྟེ། བདུད་ཀྱི་རིགས་ཀྱི་དཔུང་ཆེན་པོ་སྦྲན་ཏེ་འབྱུང་པོ་གདོང་གཟུགས་སྣ་ཚོགས་པས་མཚོན་ཆའི་ཆར་ཆེན་པོ་ཕབ་པ་ན། བྱང་ཆུབ་སེམས་དཔའ་བྱམས་པའི་ཏིང་ངེ་འཛིན་ལ་མཉམ་པར་བཞག་པས་ཇི་སྙེད་ཕབ་པའི་མཚོན་ཆ་ཐམས་ཅད་སྐད་ཅིག་གིས་མེ་ཏོག་གི་ཕྲེང་བ་དང་། མེ་ཏོག་གི་བླ་བྲེ་སོགས་བྱང་ཆུབ་ཀྱི་ཤིང་རྣམ་པར་མཛེས་པར་བྱེད་པའི་རྒྱན་དུ་གྱུར་ཏོ། །

༡༠ མངོན་པར་བྱང་ཆུབ་པའི་མཛད་པ།

མངོན་པར་བྱང་ཆུབ་པའི་མཛད་པ་ནི། དེ་ནས་བྱང་ཆུབ་སེམས་དཔས་བདུད་ཀྱི་སྡེ་ཆེན་པོ་བཏུལ་ནས་གཡུལ་ལས་རྣམ་པར་རྒྱལ་བའི་རྒྱལ་མཚན་ཐོབ་སྟེ་ནམ་གྱི་ཆ་སྟོད་ལ་བསམ་གཏན་བཞི་མངོན་དུ་མཛད་ཅིང་། གུང་ལ་རིག་པ་གསུམ་བསྐྱེད་དེ་ནམ་གྱི་ཆ་སྨད་སྐྱ་རེངས་འཆར་བ་རྒྱལ་རྔ་བརྡུང་བའི་ཚོད་ཙམ་ལ་རྟེན་ཅིང་འབྲེལ་བ་བཅུ་གཉིས་དང་། བདེན་པ་བཞིའི་ཆོས་ཉིད་མངོན་དུ་བྱས་ནས་སྐད་ཅིག་གཅིག་དང་ལྡན་པའི་ཤེས་རབ་ཀྱིས་མངོན་པར་རྫོགས་པར་སངས་རྒྱས་པ་སྟེ་དེ་བཞིན་གཤེགས་པའི་ཆོས་ཀྱི་རྒྱལ་སྲིད་ཆེན་པོ་ལ་བཞུགས་སོ། །དེ་ནས་ཚངས་པ་དང་། བརྒྱ་བྱིན་དང་། འོག་མིན་བར་གྱི་ལྷ་རྣམས་ཀྱིས་མེ་ཏོག་གི་ཆར་འབེབས་ཤིང་རྒྱལ་བ་རྒྱལ་བ་ཞེས་བསྔགས་སོ། །དེའི་ཚེ་ཟླ་བ་སྒྲ་གཅན་ལས་གྲོལ་ཞིང་གྲགས་འཛིན་མའི་སྲས་སྒྲ་གཅན་འཛིན་ཡང་བཙས་ཤིང་། བདུད་རྩི་ཟས་ཀྱི་བུ་ཀུན་དགའ་བོ་ཡང་བཙས་སོ། །ས་ཆེན་པོ་འདི་རྣམ་པ་དྲུག་ཏུ་གཡོས་ཤིང་ཕྱོགས་ཐམས་ཅད་འོད་ཀྱི་སྣང་བས་ཁྱབ་པར་གྱུར་ཏོ། །དེ་ལྟར་མངོན་པར་རྫོགས་པར་སངས་རྒྱས་ནས་ཞག་བདུན་ཕྲག་བདུན་ལ་རིམ་པ་ལྟར་བདུན་ཕྲག་དང་པོ་ལ་སྐྱིལ་ཀྲུང་མ་བཤིག་པར་ཤིང་གི་རྒྱལ་པོ་ལ་སྤྱན་མི་འཛུམ་པར་གཟིགས་ནས་དགའ་བའི་བཀོད་པ་ཞེས་བྱ་བའི་ཏིང་ངེ་འཛིན་གྱི་བདེ་བ་ལ་མྱོང་བར་མཛད་དོ། །བདུན་ཕྲག་གཉིས་པ་ལ་ཡང་སྐྱིལ་ཀྲུང་མ་བཤིག་པར་བཞུགས་བཞིན་པས་གཞན་འཕྲུལ་དབང་བྱེད་ཀྱི་གནས་སུ་གཤེགས་ནས། འཇིག་རྟེན་འདོད་པའི་བདེ་བ་གང་། །ལྷ་ཡུལ་བྱུང་བདེ་གང་ཡིན་པ། །སྲིད་པ་ཟད་པའི་བདེ་དེ་ལ། །བཅུ་དྲུག་ཆར་ཡང་མི་ཕོད་དོ། །ཞེས་རྣམ་པར་གྲོལ་བའི་བདེ་བས་དགྱེས་པའི་གསུང་ཡང་བསྩལ་ཏོ། །དེ་ནས་བདུན་ཕྲག་གསུམ་པ་ལ་ང་སངས་རྒྱས་ནས་སྐྱེ་རྒ་ན་འཆིའི་སྡུག་བསྔལ་མཐར་དབྱུང་ངོ་ཞེས་བྱང་ཆུབ་ཀྱི་ཤིང་ལ་གཟིགས། བདུན་ཕྲག་བཞི་པ་ལ་ཤར་ནུབ་རྒྱ་མཚོའི་བར་གྱི་འཛམ་གླིང་ལ་འཆག་པར་མཛད་དེ་བོད་ཡུལ་ཀྱང་ཞབས་ཀྱིས་བཅག་པར་འདོད་དོ། །བདུན་ཕྲག་ལྔ་པ་ལ་ཡུལ་ངན་གྱི་ཚེ་ན་ཀླུ་བཏང་བཟང་གི་གནས་སུ་བཞུགས་ཤིང་ཀླུ་རྣམས་ཀྱིས་བཅོམ་ལྡན་འདས་ཀྱི་སྐུ་ལ་དཀྲིས་ཤིང་ཡུལ་ངན་གྲོལ་ནས་ལྷའི་ལུས་སུ་བསྒྱུར་ནས་མཆོད་ཅིང་བསྙུན་གསོལ་ཏོ། །བདུན་ཕྲག་དྲུག་པ་ལ་ནཻ་རཉྫ་ནའི་འགྲམ་ཤིང་ནེ་གྲོ་དྷའི་དྲུང་རྩའི་གདིང་བ་ལ་བཞུགས་ནས་ཀླུ་དེ་དག་དང་ཀུན་ཏུ་རྒྱུ་གཅེར་བུ་པ་རྣམས་ལ་སྙུན་འདྲིའི་ཚིགས་བཅད་གསུངས། བདུན་ཕྲག་བདུན་པ་ལ་ཤིང་སྒྲོལ་རྒྱུའི་ཚལ་དུ་ཚོང་པ་ག་གོན་དང་བཟང་པོ་གཉིས་ཀྱིས་སྦྲང་རྩི་ཕུལ་བ་བཞེས་ནས་དེ་གཉིས་ལ་བཀྲ་ཤིས་པའི་ཚིགས་སུ་བཅད་པ་རྣམས་གསུངས། དེའི་ཚེ་དེ་བཞིན་གཤེགས་པ་ཅུང་ཟད་བསྙུན་པའི་ཚུལ་བསྟན་པ་ན་བདུད་སྡིག་ཅན་གྱིས་མྱ་ངན་ལས་འདའ་བར་གསོལ་ཚེ། འཁོར་རྣམ་པ་བཞི་ལ་ཆོས་བསྟན་པར་མ་གྱུར་བར་མྱ་ངན་ལས་མི་འདའ་བ་གསུངས་པས་བདུད་སྡིག་ཅན་ཡིད་མི་བདེ་བར་གྱུར་ཏོ། །དེ་ནས་བདག་གིས་རྟོགས་པའི་ཆོས་ཟབ་མོ་འདི་ནི་གཞན་གྱི་ཁོང་དུ་ཆུད་པར་དཀའ་སྟེ། གལ་ཏེ་བདག་གིས་གཞན་ལ་བསྟན་པར་བྱས་ཀྱང་དེས་མི་རྟོགས་པས་བདག་ཉིད་གཅིག་པུ་དགོན་པར་གནས་པར་བྱའོ་སྙམ་དུ་དགོངས་ཏེ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་འདབས་ཉིད་དུ་གནས་པར་བྱ། །ཞེས་གསུངས་ཏེ་ཐུགས་ལས་ཆུང་ངུར་བཞུགས་སོ། །

༡༡ ཆོས་ཀྱི་འཁོར་ལོ་བསྐོར་བའི་མཛད་པ།

ཆོས་ཀྱི་འཁོར་ལོ་བསྐོར་བའི་མཛད་པ་ནི། དེའི་ཚེ་ཚངས་པ་གཙུག་ཕུད་ཅན་གྱིས་ཤེས་ཏེ་ལྷའི་དབང་པོ་བརྒྱ་བྱིན་སྦྲན་ནས་གཉིས་ཀས་ཆོས་ཀྱི་དུང་གཡས་སུ་འཁྱིལ་བ་དང་། གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ནས། འདི་སྐད་དུ། མ་ག་དྷར་ནི་སྔོན་ཆད་ཆོས་བྱུང་བ། །དག་པ་མ་ལགས་དྲི་མར་བཅས་པས་རྟོག །བདུད་རྩི་ཆོས་ཀྱི་སྒོ་ནི་ཕྱེ་མཛོད་ལ། །དྲི་མ་མེད་པས་རྟོགས་པ་བཤད་དུ་གསོལ། །ཅེས་ཆོས་ཀྱི་འཁོར་ལོ་བསྐོར་བར་གསོལ་པ་ན། བདུད་རྩིའི་སྒོ་མོ་དག་ནི་དབྱེ་བར་བྱ། །ཉན་པ་སུ་འདོད་སོམ་ཉི་སོལ་ཅིག་དང་། །ཚངས་པ་མི་རྣམས་ལ་ནི་གྱ་ནོམ་ཆོས། །ཀླན་ཀ་མི་བཅོལ་མདོ་ཙམ་བཤད་པར་བྱ། །ཞེས་ཞལ་གྱིས་བཞེས་སོ། །དེ་ནས་གདུལ་བྱ་འདུལ་བར་སླ་བ་ལྔ་སྡེ་བཟང་པོ་ཡིན་པར་དགོངས་ཏེ་ཝཱ་རཱ་ཎ་སཱིར་གཤེགས་པའི་ལམ་དུ་ཀུན་ཏུ་རྒྱུ་ཉེར་འགྲོ་དང་མཇལ་ཏེ། དེས་གཽའུ་ཏ་མ་ཁྱོད་དབང་པོ་རྣམས་ཤིན་ཏུ་གསལ་ན་སུ་ཞིག་ལས་ཚངས་པར་སྤྱོད་པ་སྤྱད་ཅེས་དྲིས་པས། བཀའ་བསྩལ་པ། ང་ལ་སློབ་དཔོན་གང་ཡང་མེད། །ང་དང་འདྲ་བ་ཡོད་མ་ཡིན། །ང་ནི་གཅིག་པུ་རྫོགས་སངས་རྒྱས། །བསིལ་གྱུར་ཟག་པ་མེད་པ་ཡིན། །ཞེས་གསུངས་སོ། །དེ་ནས་དྲང་སྲོང་ལྷུང་བ་རི་དྭགས་ཀྱི་ནགས་སུ་བྱོན་པ་ན། ལྔ་སྡེས་རྒྱང་རིང་པོ་ནས་གཤེགས་པར་མཐོང་སྟེ་གཽའུ་ཏ་མ་མང་དུ་ཟ་བ་སྤོང་བ་ལས་ཉམས་ནས་འདིར་འོངས་ན་བདག་ཅག་རྣམས་ཀྱིས་ངག་སྨྲ་བར་མི་བྱ། ལྡང་བར་མི་བྱ། ཕྱག་མི་བྱ། སྟན་སྟོབ་པར་མི་བྱ་ཞེས་ནང་ཁྲིམས་བཅས་པ་ལ་ཀཽཎྜི་ནྱ་ནི་སེམས་ཀྱིས་ཁས་མ་བླངས་སོ། །དེ་ནས་བཅོམ་ལྡན་འདས་ཉེ་སར་བྱོན་མ་ཐག་དཔལ་དང་གཟི་བརྗིད་མ་བཟོད་དེ་སྟན་གྱི་སྟེང་འདར་ཞིང་འོག་ཁྲིམས་རལ་ཏེ་སྟན་ལས་ལངས་ནས་ཀཽཎྜི་ནྱས་རིམ་གྲོ་བྱེད། རྟ་ཐུལ་གྱིས་ནི་བསུས། རླངས་པས་ནི་གདན་བཤམས། མིང་ཆེན་གྱིས་ནི་ཞབས་སྟན་བསྟབས། བཟང་ལྡན་གྱིས་ནི་ཞབས་བསིལ་ཕུལ་ཏེ། ཚེ་དང་ལྡན་པ་གཽ་ཏ་མ་ཁྱེད་བྱོན་པར་ལེགས་སོ། །གདན་བཤམས་པར་བཞུགས་ཤིག་ཅེས་གསོལ་བ་དང་། སྟོན་པ་གདན་བཤམས་པ་ལ་བཞུགས་ནས་དགེ་སློང་དག་ངས་ནི་བདུད་རྩི་ཐོབ་བོ། །འཆི་བ་མེད་པར་གྱུར་པའི་ལམ་མངོན་དུ་བྱས་སོ། །ང་ནི་སངས་རྒྱས་སོ། །ཐམས་ཅད་མཁྱེན་པའོ། །ཐམས་ཅད་གཟིགས་པའོ། །བསིལ་བར་གྱུར་པའོ། །ཟག་པ་ཟད་པའོ། །ཆོས་ཐམས་ཅད་ལ་དབང་བའོ། །དགེ་སློང་དག་ངས་ཁྱེད་ལ་ཆོས་བཤད་ཀྱི་ཚུར་ཤོག ཉོན་ཅིག ནན་ཏན་གྱིས་ཤིག་སོགས་བཀའ་བསྩལ་པ་དང་། དེ་དག་གི་མུ་སྟེགས་ཀྱི་རྟགས་རྣམས་སྐད་ཅིག་དེ་ཉིད་ལ་མེད་པར་གྱུར་ཏེ་དགེ་སློང་བསྙེན་པར་རྫོགས་ནས་ལོ་བརྒྱ་ལོན་པ་ལྟ་བུར་གྱུར་ཏོ། །དེ་ཚེ་སྔོན་གྱི་རྒྱལ་བ་རྣམས་ཀྱིས་གང་དུ་ཆོས་ཀྱི་འཁོར་ལོ་བསྐོར་བར་དགོངས་པ་ན། ཕྱོགས་ཀུན་ཏུ་རིན་པོ་ཆེ་སྣ་བདུན་གྱི་ཁྲི་སྟོང་བྱུང་བ་ལས་ཁྲི་སྔ་མ་གསུམ་ལ་འདས་པའི་སངས་རྒྱས་རྣམས་ལ་གུས་པ་བསྐྱེད་པའི་ཆེད་དུ་ཕྱག་དང་སྐོར་བ་མཛད་ནས། ཁྲི་བཞི་པ་ལ་སྐྱིལ་མོ་ཀྲུང་བཅས་ནས་སེང་གེ་ལྟར་བག་ཚ་བ་མེད་པར་བཞུགས་པ་ན་ཁྲི་གཞན་རྣམས་དེ་ཉིད་དུ་མི་སྣང་བར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་སྐུ་ལས་འོད་བཀྱེ་བས་འཇིག་རྟེན་གྱི་ཁམས་ཐམས་ཅད་ཁྱབ་པར་གྱུར་པ་དང་ལྟས་ཆེན་པོ་བཅོ་བརྒྱད་བྱུང་བས། ཕྱོགས་བཅུ་འཇིག་རྟེན་གྱི་ཁམས་ན་ཡོད་པའི་བྱང་ཆུབ་སེམས་དཔའ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་སོགས་ལྷའི་འཁོར་དཔག་ཏུ་མེད་པ་འདུས་པ་ལ། ཚེ་དང་ལྡན་པ་བཞི་པོ། འདི་དག་ནི་འཕགས་པའི་བདེན་པ་བཞི་སྟེ། གང་ཞེ་ན། སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་མོ། ཞེས་ལན་དང་པོས་བདེན་པ་བཞིའི་ངོ་བོ་དང་། ལན་གཉིས་པས་སྡུག་བསྔལ་ཡོངས་སུ་ཤེས་པར་བྱའོ། །ཀུན་འབྱུང་སྤང་བར་བྱའོ། །འགོག་པ་མངོན་དུ་བྱའོ། །ལམ་བསྟན་པར་བྱའོ་ཞེས་བདེན་བཞིའི་བྱ་བ་དང་། སྡུག་བསྔལ་ཡོངས་སུ་ཤེས་སོ། །ཀུན་འབྱུང་སྤང་བར་བྱས་སོ། །འགོག་པ་མངོན་དུ་བྱས་སོ། །ལམ་བསྟན་ནོ་ཞེས་བདེན་པ་བཞི་མཐར་ཕྱིན་པར་ལན་བཅུ་གཉིས་སུ་བཟླས་ཏེ་འཁོར་ལོ་བསྐོར་བས། དང་པོས་ཀཽཎྜི་ནྱ་དང་ལྷ་མང་པོ་ལ་མཐོང་ལམ་སྐྱེས། །གཉིས་པར་ཀཽཎྜི་ནྱ་དགྲ་བཅོམ་པ་ཐོབ། གཞན་བཞི་ལ་མཐོང་ལམ་སྐྱེས། གསུམ་པས་བཞི་པོས་ཀྱང་དགྲ་བཅོམ་པ་ཐོབ་བོ། །གཞན་ལྷ་བྱེ་བ་ཕྲག་བརྒྱ་བཞི་བཅུ་དང་མི་བརྒྱད་ཁྲི་བཞི་སྟོང་གིས་བདེན་པ་མཐོང་ངོ་། །དེ་ནས་རིམ་པར་གནས་རྒྱལ་པོའི་ཁབ་དང་། བྱ་རྒོད་ཕུང་པོའི་རི་ལ་སོ་སོའི་སྐྱེ་བོའི་འཁོར་རྣམ་པ་བཞི་དང་། ཁྱད་པར་ཐེག་པ་ཆེན་པོའི་རིགས་ཅན་བྱང་ཆུབ་སེམས་པའི་ཚོགས་བསམ་གྱིས་མི་ཁྱབ་པ་ལ། བཀའ་བར་པ་རྣམ་ཐར་སྒོ་གསུམ་གྱི་དོན་སྟོན་པ་མཚན་ཉིད་མེད་པའི་ཆོས་ཀྱི་འཁོར་ལོ་ཡུམ་སྲས་བཅུ་བདུན་ལ་སོགས་པ་ཤེར་ཕྱིན་གྱི་མདོ་རྣམས་གསུངས་པ་དང་། གནས་གཅིག་ཏུ་མ་ངེས་པར་འཁོར་གདུལ་བྱ་སྣ་ཚོགས་པའི་རིགས་ཅན་དག་ལ་བཀའ་ཐ་མ་ཆོས་ཐམས་ཅད་མཚན་ཉིད་གསུམ་དུ་གཏན་ལ་ཕབས་པ་ལེགས་པར་རྣམ་པར་ཕྱེ་བའིི་ཆོས་ཀྱི་འཁོར་ལོ་རྒྱ་ཆེར་བསྟན་པ་སྟེ་ཐུན་མོང་གདུལ་བྱའི་སྣང་ངོར་ཆོས་ཀྱི་འཁོར་ལོ་རིམ་པ་གསུམ་བསྐོར་བས་རིགས་ཅན་གསུམ་གྱི་གདུལ་བྱ་རང་རང་གི་ཁམས་དང་། དབང་པོ། བསམ་པའི་བྱེ་བྲག་ལྟར་ཐེག་པ་གསུམ་གྱི་ལམ་ལ་བཀོད་ཅིང་། གདུལ་བྱ་ཐུན་མོང་མ་ཡིན་པ་རྣམས་ཀྱི་སྣང་ངོར། འོག་མིན་གཞན་འཕྲུལ་དབང་བྱེད་ཀྱི་གནས་དང་། རི་རབ་ཀྱི་རྩེ་མོ། མིའི་གནས་དཔལ་ལྡན་འབྲས་སྤུངས། ས་ཧོ་ར། ཨོ་ཌ་ཡ་ན། རི་བོ་བྱ་རྐང་ཅན། དུར་ཁྲོད་བསིལ་བའི་ཚལ་སོགས་གནས་དུས་སྟོན་འཁོར་མ་ངེས་པ་ལ་དཀྱིལ་འཁོར་སྤྲུལ་བཤད་ལ་སོགས་པའི་སྒོ་ནས་གསང་སྔགས་ཕྱི་ནང་གི་རྒྱུད་སྡེ་མཐའ་ཡས་པ་གསུངས་པ་དང་། ཁྱད་པར་ཐེག་པའི་ཡང་རྩེ་ནང་རྒྱུད་སྡེ་གསུམ་གྱི་ཆོས་ཀྱི་འཁོར་ལོ་ཇི་ལྟར་བསྐོར་བའི་ཚུལ་འོག་ཏུ་འབྱུང་བས་འདིར་མི་སྤྲོ་ལ། དེ་དག་ཀྱང་གདུལ་བྱའི་བློ་ལ་བལྟོས་ནས་རིམ་དང་ཅིག་ཆར་སྣ་ཚོགས་སུ་སྣང་ཡང་མི་འགལ་ཏེ། མདོ་སྡེ་ཡོན་ཏན་བཀོད་པའི་རྒྱལ་པོ་ལས། ང་ཡིས་ཅི་ཡང་མ་གསུང་པར། །སེམས་ཅན་རྣམས་ལ་ཁྱབ་བརྡལ་སྣང་། །གང་ཚེ་རིམ་གྱིས་མངོན་འདོད་པ། །དེ་དག་ཀུན་ལ་དེ་བཞིན་ཏེ། །དུས་གཅིག་ཉིད་དུ་འཇུག་པ་ལ། །ཆོས་ཀྱི་རྣམ་གྲངས་རྫོགས་པར་སྣང་། །ཡིད་བཞིན་རེ་བ་རྣམ་སྐོང་བའི། །གསུང་གི་ཆེ་བ་དེ་ཉིད་དོ། །ཞེས་དང་། ཏིང་འཛིན་རྒྱལ་པོ་ལས། འཇིག་རྟེན་ཕན་པ་ཁྱོད་ཀྱི་གསུང་གཅིག་ལས། །མོས་པ་ཐ་དད་བཞིན་དུ་སྒྲ་བྱུང་སྟེ། །རྒྱལ་བས་བདག་ལ་སྟོན་སྙམ་སོ་སོར་སེམས། །གང་གི་སླད་དུ་ཁྱོད་ཀྱིས་འཛུམ་མཛད་སྟོན། །ཞེས་པ་ལྟར་རོ། །

༡༢ མྱ་ངན་ལས་འདའ་བའི་མཛད་པ།

མྱ་ངན་ལས་འདའ་བའི་མཛད་པ་ནི། དེ་ལྟར་མཛད་པ་དང་ཆོ་འཕྲུལ་སྣ་ཚོགས་པའི་སྒོ་ནས་སྐུ་དངོས་ཀྱི་གདུལ་བྱ་རྣམས་རྣམ་པར་གྲོལ་བའི་ལམ་ལ་ཡོངས་སུ་བཀོད་པར་མཛད་དེ། གདུལ་བྱ་རྟག་འཛིན་ཅན་རྣམས་ཀྱི་རྟག་པར་འཛིན་པའི་བློ་ཕྱིན་ཅི་ལོག་བཟློག་པའི་ཕྱིར་མྱ་ངན་འདའ་བ་ཐ་མའི་མཛད་པ་བསྟན་པར་བཞེད་དེ། སངས་རྒྱས་ཀྱི་བསྟན་པ་རིན་པོ་ཆེ་འཁོར་རྣམ་པ་བཞི་དང་བཅས་པ་གནས་བརྟན་འོད་སྲུང་ཆེན་པོ་ལ་གཏད་དེ་གྱད་ཀྱི་ཡུལ་གྲོང་ཁྱེར་རྩ་ཅན་དང་ཉེ་བར་ཤིང་སཱ་ལ་ཟུང་གི་དྲུང་དུ་བྱོན་ནས་མྱ་ངན་ལས་འདའ་བའི་དགོངས་པར་ཉེ་བར་བཞག་གོ །དེའི་ཚེ་བཅོམ་ལྡན་འདས་ཉིད་ཀྱི་གདུལ་བྱ་ཐ་མར་གྱུར་པ་དྲི་ཟའི་རྒྱལ་པོ་རབ་དགའ་དང་ཀུན་ཏུ་རྒྱུ་རབ་བཟང་ཡང་བཏུལ་ལོ། །དེ་ནས་ཀུན་དགའ་བོས་སྐུ་གདུང་ལ་ཇི་ལྟར་བགྱི་ཞུས་པར། འཁོར་ལོས་སྒྱུར་བའི་རྒྱལ་པོ་ལ་བྱ་བ་བཞིན་བྱོས་ཤིག་ཅེས་གསུངས། ཡང་དགེ་སློང་དག་ཐེ་ཚོམ་ཡོད་པ་དག་དྲིས་ཤིག་དེ་བཞིན་གཤེགས་པ་མྱ་ངན་ལས་འདའ་འོ། །ཞེས་ཀྱང་གསུང་བཞིན་སེང་གེའི་ཁྲི་ལ་བཞུགས་ཏེ་སྐུའི་སྟོད་གཡོག་བསལ་ནས། དགེ་སློང་དག་དེ་བཞིན་གཤེགས་པའི་སྐུ་ལ་ལྟོས་ཤིག དེ་བཞིན་གཤེགས་པར་བལྟ་བ་ནི་རྙེད་པ་དཀའ་སྟེ་མེ་ཏོག་ཨུ་དུམྦ་ར་བཞིན་ནོ། །དགེ་སློང་དག་འདི་ལྟར་འདུས་བྱས་ཐམས་ཅད་ནི་འཇིག་པའི་ཆོས་ཅན་ནོ། །ཞེས་གསུང་གི་ཐ་མ་ཉིད་བསྩལ་ཏེ་སྟན་བདུན་གྱི་ཁྲི་ལ་གློ་གཡས་པ་ཕབ་ནས་སེང་གེ་ཉལ་སྟབས་ཀྱིས་གཟིམས་སོ། །དེ་ནས་བསམ་གཏན་བཞི་དང་གཟུགས་མེད་བཞི་དང་འགོག་སྙོམས་ལུགས་འབྱུང་ལུགས་ལྡོག་ལ་མཉམ་པར་བཞག་ནས་སླར་ཡང་བསམ་གཏན་བཞི་པ་ལ་བཞུགས་ཏེ་རབ་མཐའ་ལ་མྱ་ངན་ལས་འདས་སོ། །དེ་ལྟར་དེ་བཞིན་གཤེགས་པའི་ཆོས་ཀྱི་སྐུ་ནི་རྟག་ཏུ་བཞུགས་མོད་ཀྱི་ཐབས་ཀྱི་སྒྲོལ་བའི་སྐུ་མྱ་ངན་ལས་འདས་པའི་ཚུལ་བསྟན་པས་གདུལ་བར་བྱ་བ་མ་ཐུལ་པ་རྣམས་ཀྱང་འདིས་ཐུལ་ཞིང་། མི་རྟག་པར་སྟོན་པ་དང་། སྐྱོ་བ་བསྐུལ་བ་དང་། ཆོས་ཀྱི་སྐུ་ལ་སྦྱོར་བ་སོགས་དོན་བཅུ་ལ་དགོངས་ནས་དཔྱིད་ཟླ་ཐ་ཆུང་ཉའི་གུང་ཐུན་ལ་མྱ་ངན་ལས་འདའ་བའི་ཚུལ་བསྟན་ཏོ། །དེ་ནས་ཀུན་དགའ་བོ་དང་རྩ་ཅན་གྱི་གྱད་རྣམས་ཀྱིས་ཞག་བདུན་བར་དུ་སྐུ་གདུང་མཆོད་ཅིང་། ཞག་བདུན་པ་ལ་གཞོན་ནུ་རྣམས་ཀྱིས་ཁྱོགས་ལ་བཏེགས་ཏེ་གྱད་ཀྱི་དབུ་རྒྱན་ཅན་གྱི་མཆོད་རྟེན་གྱི་དྲུང་དུ་སྤྱན་དྲངས། སྐུ་གདུང་ཤིང་བལ་དང་རས་ཡུག་ལྔ་བརྒྱས་གཡོགས་ཏེ་ལྕགས་ཀྱི་སྒྲོམ་དུ་བཅུག་ནས་འབྲུ་མར་གྱིས་ཁ་བཀང་བ་དྲི་ཞིམ་པོའི་ཤིང་སྤུང་བ་དང་ལྷན་ཅིག་ཏུ་ཞུགས་ལ་འབུལ་བར་བརྩམས་ཀྱང་མེ་འབར་བར་མ་གྱུར་ཏོ། །དེའི་ཚེ་རྒྱལ་པོའི་ཁབ་ནས་གནས་བརྟན་འོད་སྲུང་ཆེན་པོ་འཁོར་ལྔ་བརྒྱ་དང་བཅས་པ་བྱོན་ནས་སྒྲོམ་གྱི་ཁ་ཕྱེ་ཞིང་ཤིང་དང་རས་བལ་རྣམས་ལེགས་པར་བསལ་ནས་སྐུ་གདུང་མ་ཉམས་པ་ལ་ཕྱག་བྱས་ཏེ། སླར་སྔ་མ་ལྟར་བྱས་ནས་བཞག་པ་ན་མེ་རང་འབར་དུ་བྱུང་སྟེ་ཞུགས་བཞེས་པར་གྱུར་ཏོ། །དེ་ནས་སྒྲོམ་བུ་ཁ་ཕྱེས་ནས་བལྟས་པས་གདུང་ཡུང་འབྲུ་ལྟ་བུའི་རིང་བསྲེལ་གྱི་ཕུང་པོར་གྱུར་པ་དང་། རས་ཕྱི་མ་དང་ནང་མ་གཉིས་པོ་མ་ཚིག་པར་གནས་པ་གྱད་རྣམས་ཀྱིས་གྲོང་ཁྱེར་གྱི་དབུས་སུ་སྤྱན་དྲངས། སྐུ་གདུང་ཆ་བརྒྱད་དུ་བྱས་པའི་དང་པོ་གྲོང་ཁྱེར་རྩ་ཅན་གྱི་གྱད་རྣམས་ལ་བྱིན། གཉིས་པ་ཡུལ་སྡིག་པ་ཅན་གྱི་གྱད་རྣམས་ལ་བྱིན། གསུམ་པ་ཡུལ་རྟོགས་པ་གཡོ་བའི་རྒྱལ་རིགས་བུ་ལུ་ཀ་ཆེན་པོ་ལ་བྱིན། བཞི་པ་གྲོང་ཁྱེར་སྒྲ་སྒྲོགས་ཀྱི་རྒྱལ་རིགས་ཀྲོ་ཏྱ་པ་ལ་བྱིན། ལྔ་པ་ཁྱབ་འཇུག་གླིང་གི་བྲམ་ཟེ་རྣམས་ལ་བྱིན། དྲུག་པ་གྲོང་ཁྱེར་སེར་སྐྱའི་རྒྱལ་རིགས་ཤཱཀྱ་པར་གཏོགས་པའི་རི་བྲག་པ་རྣམས་ལ་བྱིན། བདུན་པ་ཡངས་པ་ཅན་གྱི་ལི་ཙྪ་བི་རྣམས་ལ་བྱིན། བརྒྱད་པ་གྲོང་ཁྱེར་མ་ག་དྷ་ལ་བྱིན་པས་དེ་དག་སོ་སོ་ནས་མཆོད་རྟེན་རེ་རེ་བཞེངས་སོ། །དེ་ལྟར་ཡང་འདུལ་བ་ལུང་ལས། སྤྱན་ལྡན་སྐུ་གདུང་བྲེ་བོ་བརྒྱད་དག་ལས། །བདུན་ནི་འཛམ་བུ་གླིང་དུ་མཆོད་པ་ཐོབ། །སྐྱེས་མཆོག་དེ་ཡི་བྲེ་བོ་གང་ཞིག་ནི། །གྲོང་ཁྱེར་སྒྲ་སྒྲོག་ཀླུ་ཡི་རྒྱལ་པོས་མཆོད། །སྐྱེས་མཆོག་དེ་ཡི་མཆེ་བ་བཞི་དག་ལས། །མཆེ་བ་གཅིག་ནི་རྩ་གསུམ་འཇིག་རྟེན་མཆོད། །གཉིས་པ་ཚིག་འཛིན་གྲོང་ཁྱེར་ཡིད་འོང་ན། །གསུམ་པ་ཀ་ལིང་རྒྱལ་པོའི་ཡུལ་ན་སྟེ། །སྐྱེས་མཆོག་དེ་ཡི་མཆེ་བ་བཞི་པ་ནི། །གྲོང་ཁྱེར་སྒྲ་སྒྲོག་ཀླུ་ཡི་རྒྱལ་པོས་མཆོད། །མྱ་ངན་མེད་རྒྱལ་སྐྱ་སྣར་བུར་གནས་པས། །མཆོད་རྟེན་བདུན་པོ་རྒྱ་ཆེར་སྤེལ་བྱས་ཏེ། །དེ་ཡི་མཐུ་ཡིས་དབྱིག་འཛིན་འདིར་ཡང་ནི། །སྨོན་ལམ་དངོས་པོས་མངོན་པར་བརྒྱན་གྱུར་ཏེ། །འདི་ལྟར་སྤྱན་ལྡན་སྐུ་གདུང་དེ་ལ་ནི། །ལྷ་དབང་ཀླུ་དབང་མི་ཡི་དབང་པོ་དང་། །མི་དང་ཀླུ་དང་གནོད་སྦྱིན་བདག་པོ་ཡིས། །རབ་ཏུ་བཀུར་ནས་མཆོད་ཅིང་བསྟོད་པར་བྱས། །རབ་མཁྱེན་ཐུགས་རྗེ་ལྡན་པ་སྟོབས་མངའ་བ། །ཤཱཀྱའི་རིགས་འཁྲུངས་མ་ག་དྷར་བྱང་ཆུབ། །ཀཱ་ཤིར་ཆོས་ཀྱི་འཁོར་ལོ་བསྐོར་གྱུར་ཏེ། །གྲོང་ཁྱེར་རྩ་ཅན་བརྟེན་ནས་མྱ་ངན་འདས། །ཞེས་འབྱུང་ངོ་། །

སྨྲས་པ།

གདོད་ནས་ཞི་བ་ཆོས་སྐུར་བྱང་ཆུབ་ཀྱང་། །རྩོད་ལྡན་འགྲོ་ལ་བརྩེ་བའི་ཐུགས་རྗེའི་སྤྱན། །གཟིགས་པ་རབ་ཡངས་ལྔ་བརྒྱའི་སྨོན་ལམ་སྟོབས། །མི་མཉམ་མཐུ་གྲུབ་འདྲེན་པ་ཤཱཀྱའི་ཏོག །ཚད་མེད་ཐབས་མཁས་ཐུགས་རྗེའི་རླུང་ཤུགས་ཀྱིས། །ཉེ་བར་དྲངས་པའི་མཚན་དཀྱིལ་ཟླ་བ་གཞོན། །ཕུན་ཚོགས་ལྔ་ལྡན་རིགས་ཀྱི་མཁའ་ལམ་དུ། །འཛུམ་པའི་གྲགས་པ་མངོན་དགའི་ཞིང་ན་སྙན། །དཔལ་ལྡན་ཛམྦུ་ཏྲིཀྵས་མཚན་པའི་ལྗོངས། །དབུས་འགྱུར་ཆོས་ཀྱི་ཞིང་ས་མ་གྷ་དྷར། །དོན་ཀུན་གྲུབ་པའི་ཞབས་སེན་ནོར་བུའི་ཏོག །མངོན་པར་བཀོད་པའི་རྫོགས་ལྡན་དུས་སྟོན་དར། །དེ་ཚེ་དགེ་ལེགས་ཤིས་པའི་མེ་ཏོག་ཆར། །ངོ་མཚར་བསྐལ་པ་བཟང་པོའི་མཚན་མ་འབུམ། །སུམ་རྩེན་ཡུལ་ནས་འཆི་མེད་བདག་པོ་ཡིས། །བྱིན་པའི་དཔལ་གྱིས་ས་འདི་མཛེས་པར་བྱས། །ཨེ་མ་རྒྱལ་སྲས་ཚེས་པའི་ཟླ་བ་གཞོན། །ལང་ཚོའི་འཕེལ་ཆ་ཉིན་བཞིན་རྫོགས་པའི་མོད། །འཕང་དང་སྒྱུ་རྩལ་ཡི་གེའི་རིགས་སོགས་ལ། །འགྲན་པ་ཟླ་མེད་མཁྱེན་པའི་བློ་སྟོབས་རྒྱས། །དེ་ལྟའི་མི་མཆོག་སྟོབས་ཀྱི་འཁོར་ལོའི་སྒྱུར། །ཡབ་རྗེའི་བཀའ་རྟགས་གསེར་གྱི་ཅོད་པཎ་གྱིས། །མངོན་པར་བསྟོད་པའི་གྲགས་སྙན་རྔ་སྒྲའི་དབྱངས། །ལྷོ་རྒྱུད་འཛམ་གླིང་ཁྱོན་ན་ཅིར་ཡང་ལྡིར། །ནམ་ཞིག་དུས་ན་སྲིད་པའི་དངོས་འབྱོར་གྱི། །འདོད་པའི་རྩེ་དགའ་རྒྱས་པའི་ཕུན་ཚོགས་ཁབ། །ཉེས་བརྒྱའི་འབྱུང་ཁུངས་མཆིལ་མའི་ཐལ་བ་བཞིན། །དོར་ནས་མངོན་དགའ་ཞི་བའི་ནགས་སུ་གཤེགས། །སྡུག་བསྔལ་མང་ལྡན་སྲིད་པའི་གྲོང་ཁྱེར་འདིའི། །སྐྱེ་རྒ་ན་འཆིའི་ཚོར་བ་རྩུབ་མོའི་རོས། །མངོན་པར་ཡིད་དབྱུང་གྲོལ་བ་དོན་གཉེར་པའི། །དམ་བཅའི་བཀའ་ཐུབ་སྲོག་གི་ཟུངས་སུ་བརྟན། །བགྲང་ཡས་བསྐལ་པར་མི་ཉམས་དམ་བཅའི་ཁུར། །རྫོགས་སྨིན་སྦྱང་པ་རྒྱ་མཚོའི་གོ་བགོས་ཏེ། །གཞོམ་བྲལ་ཏིང་འཛིན་རྡོ་རྗེའི་མཚོན་ཆ་ཡིས། །སྒྲིབ་གཉིས་ཉེས་ཚོགས་འཇོམས་ལ་གཅིག་ཏུ་དཔའ། །ཞི་བའི་ཏིང་འཛིན་རླུང་གིས་བསྐྱོད་པ་ཡི། །རྣམ་པར་མི་རྟོག་ལམ་བདེན་ཡེ་ཤེས་མེས། །ཀུན་འབྱུང་འཇིགས་ཚོགས་ལྟ་བའི་ཚང་ཚིང་ནགས། །མ་ལུས་བསྲེགས་པའི་འགོག་པ་མངོན་དུ་བྱས། །རྒྱ་ཆེན་ཚོགས་གཉིས་གོམ་པའི་སྟབས་ཆེན་གྱིས། ལམ་ལྔ་ས་བཅུའི་བགྲོད་པ་མཐར་ཕྱིན་ཏེ། །སྐུ་བཞིའི་གོ་འཕང་ཆོས་ཀྱི་རྒྱལ་ས་རུ། གཤེགས་པའི་ཐུབ་པ་སྟོབས་བཅུའི་དབང་ཕྱུག་རྒྱལ། །མགོན་པོ་མཆོག་དེས་ཟབ་རྒྱས་ཆོས་ཀྱི་སྒོ། །མདོ་དང་སྔགས་ཀྱི་གྲུ་ཆར་མི་འཛད་པ། །ཐེག་གསུམ་གདུལ་བྱའི་ཞིང་སར་བསྐྱིལ་བ་ལས། །རྣམ་གྲོལ་འབྲས་བུའི་དགའ་སྟོན་ཅི་དགར་སྨིན། །ཨེ་མ་བསླབ་གསུམ་རིན་ཆེན་གཏེར་གྱི་མཛོད། །ཕན་བདེའི་འདོད་པ་འཇོ་བའི་ལུང་རྟོགས་བསྟན། །མ་ལུས་འགྲོ་བའི་བསོད་ནམས་དཔྱིད་དཔལ་དུ། །ཆས་ཚེ་ལྗོངས་འདི་རྫོགས་ལྡན་དཔལ་ལ་འཁུ། །ཞེས་བྱ་བ་ནི་བསྐལ་པ་བཟང་པོའི་སངས་རྒྱས་སྟོང་རྩ་གཉིས་ཀྱི་དབུས་སུ་པདྨ་དཀར་པོ་ལྟར་ཡོངས་སུ་བསྔགས་པའི་རྣམ་འདྲེན་བཞི་པ་སྟོན་པ་ཤཱཀྱའི་རྒྱལ་པོ་འཇིག་རྟེན་དུ་བྱོན་ནས་མདོ་སྔགས་ཀྱི་བསྟན་པ་རིན་པོ་ཆེ་ཇི་ལྟར་དར་ཚུལ་ཉུང་ངུའི་ངག་གིས་མདོ་ཙམ་བརྗོད་པའི་སྐབས་ཀྱི་བསྡུ་བའི་ཚིགས་སུ་བཅད་པའོ། །

སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། སྟོན་པ་འཇིག་རྟེན་དུ་བྱོན་ནས་མདོ་སྔགས་ཀྱི་བསྟན་པ་ཇི་ལྟར་དར་ཚུལ་བཤད་པའི་སྐབས་ཏེ་སརྒ་དང་པོ་རྫོགས་སོ།། །།

གཉིས་པ། རྗེས་འཇུག་འཕགས་པའི་གང་ཟག་རྣམས་ཀྱིས་བཀའ་བསྡུ་འཆད་སྤེལ་གྱིས་རིམ་པར་བསྐྱངས་ཚུལ་བསྙད་པ།

གཅིག ཐུན་མོང་ཐེག་དམན་ལུགས་ཀྱི་བཀའ་བསྡུ་རིམ་པ་གསུམ་མཛད་ཚུལ།

གཉིས་པ་རྗེས་འཇུག་འཕགས་པའི་གང་ཟག་དག་གིས་ཇི་ལྟར་བསྐྱངས་ཚུལ་བཤད་པ་ལ། ཐུན་མོང་ཐེག་དམན་ལུགས་ཀྱི་བཀའ་བསྡུ་རིམ་པ་གསུམ་མཛད་ཚུལ། ཐུན་མིན་ཐེག་ཆེན་མདོ་ལུགས་ཀྱི་བཀའ་བསྡུ་མཛད་ཚུལ། གསང་སྔགས་རྡོ་རྗེ་ཐེག་པའི་བཀའ་བསྡུ་མཛད་ཚུལ་སྟེ་གསུམ་ལས། དང་པོ་ཐེག་དམན་ལུགས་ཀྱི་བཀའ་བསྡུ་རིམ་པ་གསུམ་མཛད་ཚུལ་བཤད་པ་ལས།

བསྡུ་བ་དང་པོ་ནི། ཇི་སྐད་དུ། ལུང་ཕྲན་ཚེགས་ལས། སྟོན་པ་མྱ་ངན་འདས་ནས་ཕྱི་དེའི་དབྱར། །རྒྱལ་པོའི་ཁབ་ཀྱི་གསང་བའི་བྲག་ཕུག་ཏུ། །དགྲ་བཅོམ་ལྔ་བརྒྱ་འདུས་པའི་འཚོ་བ་ནི། །མ་སྐྱེས་དགྲས་སྦྱར་སྡེ་སྣོད་གསུམ་དུ་བསྡུས། །ཞེས་འབྱུང་བ་ལྟར་སྟོན་པ་མྱ་ངན་ལས་མ་འདས་པའི་གོང་ཙམ་དུ་ཤཱ་རིའི་བུ་དང་ལྷན་ཅིག་ཏུ་དགྲ་བཅོམ་པ་བརྒྱད་ཁྲི། མོངྒལ་གྱི་བུ་དང་ལྷན་གཅིག་ཏུ་དགྲ་བཅོམ་པ་བདུན་ཁྲི། བཅོམ་ལྡན་འདས་དང་ལྷན་ཅིག་ཏུ་དགྲ་བཅོམ་པ་ཁྲི་བརྒྱད་སྟོང་དང་བཅས་པ་མྱ་ངན་ལས་འདས་པའི་ཚེ། ལྷ་རྣམས་ཀྱིས་བཅོམ་ལྡན་འདས་དང་དགེ་སློང་དབང་ཡོད་པ་རྣམས་ནི་མྱ་ངན་ལས་འདས་ཤིང་། དམ་པའི་ཆོས་ཀྱང་མེ་ཤི་བའི་དུད་པ་ཙམ་དུ་གྱུར་ཏོ་ཞེས་འཕྱ་བ་བྱས་པས། འོད་སྲུང་ཆེན་པོས་གང་བོ་ལ་དགེ་འདུན་བསྡུ་བའི་གཎྜི་རྡུངས་བར་གྱིས་ཤིག་ཅེས་བཀའ་བསྩལ་བ་བཞིན་མཛད་པས་བ་ལང་བདག་གྲོངས་བས་དགྲ་བཅོམ་པ་ལྔ་བརྒྱ་ལ་གཅིག་གིས་ཁ་མ་གང་བ་ན། འོད་སྲུང་གིས་ཀུན་དགའ་བོ་ལ་སྐྱོ་བས་བསྐུལ་ཏེ་དགྲ་བཅོམ་གྱི་གོ་འཕང་ལ་སྦྱོར་བ་མཛད་པས་དགྲ་བཅོམ་པ་ལྔ་བརྒྱ་འདུས་པའི་ཚེ། རྒྱལ་པོའི་ཁབ་ནྱ་གྲོ་དྷ་ཡི་བྲག་ཕུག་ཏུ་རྒྱལ་པོ་མ་སྐྱེས་དགྲས་འཚོ་བ་སྦྱར་ཏེ་ཉེ་བ་འཁོར་གྱིས་འདུལ་བ། ཀུན་དགའ་བོས་མདོ་སྡེ། འོད་སྲུང་ཆེན་པོས་མངོན་པའི་སྡེ་སྣོད་མཐའ་དག་བསྡུ་བ་མཛད་པས། ལྷ་རྣམས་ནི་འཕེལ། ལྷ་མིན་རྣམས་འགྲིབ། སངས་རྒྱས་ཀྱི་བསྟན་པ་ཡུན་རིང་དུ་གནས་སོ། །ཞེས་ལྷ་རྣམས་ཀྱིས་འོག་མིན་གྱི་བར་དུ་བསྒྲགས་སོ། །དེ་ནས་དབྱར་གྲོལ་བ་ན་འོད་སྲུང་ཆེན་པོས་ཀུན་དགའ་བོ་ལ་བསྟན་པ་གཏད་ནས་རྒྱལ་པོའི་ཁབ་ཀྱི་ལྷོ་ཕྱོགས་རི་བྱ་གག་རྐང་ཅན་གྱི་རྩེ་མོར་སྟོན་པས་གནང་བའི་སྣམ་སྦྱར་སྐུ་ལ་གསོལ་ཏེ་སེང་གེ་ཉལ་སྟབས་ཀྱིས་གཟིམས་ནས་མྱ་ངན་ལས་འདས་སོ། །དེ་རྗེས་ཀུན་དགའ་བོས་ཤཱ་ནའི་གོས་ཅན་བསྙེན་པར་རྫོགས་ཏེ་བསྟན་པ་གཏད། དེས་ཉེར་སྦས་ལ་བསྟན་པ་གཏད། ཉེར་སྦས་ཀྱིས་འཕགས་པ་དྷི་དྷི་ལ་བསྟན་པ་གཏད། དེས་འཕགས་པ་ནག་པོ་ལ་བསྟན་པ་གཏད་ཅིང་། དེས་ཀྱང་ལེགས་མཐོང་ལ་བསྟན་པ་གཏད་པ་བཅས་སངས་རྒྱས་ཉིད་ཀྱི་ལུང་གིས་ཟིན་པའི་གནས་བརྟན་ཆེན་པོ་སྡེ་སྣོད་གསུམ་པ་བསྟན་པ་ལ་བྱ་བ་རྒྱ་ཆེར་མཛད་པ་ཤ་སྟག་བྱོན་ནོ། །

བསྡུ་བ་གཉིས་པ་ནི། སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་འདས་པ་ན། ཡངས་པ་ཅན་གྱི་དགེ་སློང་རྣམས་ཀྱིས། ཧུ་ལུ་ཧུ་ལུ་ཡི་རང་དང་། །ཀུན་སྤྱོད་སྣོད་དང་ལན་ཚྭ་དང་། །ལམ་དང་སོར་གཉིས་དཀྲུག་དང་

གདིང་། །གསེར་ལ་རུང་བ་བྱ་བ་སྟེ། །འདི་དག་རུང་མིན་གཞི་བཅུར་འདོད། །ཅེས་པ་ལྟར་རུང་བ་མ་ཡིན་པའི་གཞི་བཅུ་བྱས་ཏེ་བསྟན་པ་དཀྲུགས་པ་ན། གཞི་བཅུའི་འདོད་པ་བསལ་བའི་ཕྱིར་ཆོས་རྒྱལ་མྱ་ངན་མེད་ཀྱིས་སྦྱིན་བདག་མཛད་དེ། ཡུལ་ཡངས་པ་ཅན་ཀསྨ་པུ་རིའི་གཙུག་ལག་ཁང་དུ་གྲགས་པ་ལ་སོགས་པར་དགྲ་བཅོམ་པ་བདུན་བརྒྱས་སྡེ་སྣོད་གསུམ་རྫོགས་པར་བཏོན་ནས་སུན་ཕྱུང་པ་མཛད་དོ། །

བསྡུ་བ་གསུམ་པ་ནི། བཞེད་པ་མི་མཐུན་པ་ཅི་རིགས་སུ་སྣང་བ་ལས། འཕགས་ཡུལ་གྱི་པཎྜི་ཏ་ཕལ་མོ་ཆེའི་བཞེད་པ་ལྟར་ན་འདས་ལོ་བཞི་བརྒྱར་ཉེ་བ་ན། ཁ་ཆེ་ཛ་ལནྡྷ་རའི་གནས་མེ་ཏོག་བརྩེགས་པའི་ཀུན་དགའ་ར་བར་རྒྱལ་པོ་ཀ་ནི་ཀས་སྦྱིན་བདག་བྱས་ཏེ། བྷ་སུ་མི་ཏྲ་སོགས་གཟུངས་ཐོབ་པའི་བྱང་སེམས་ལྔ་བརྒྱ་དང་། པུརྞི་ཀ་ལ་སོགས་དགྲ་བཅོམ་པ་ལྔ་བརྒྱ། སོ་སྐྱེ་བཙུན་པ་ཁྲི་དྲུག་སྟོང་རྣམས་ཀྱིས་སྡེ་སྣོད་གསུམ་པོ་གླེགས་བམ་ལ་བྲིས་ཏེ་ཉན་ཐོས་སྡེ་བ་བཅོ་བརྒྱད་དུ་གྱེས་པ་གཅིག་ཏུ་འདུམ་པར་བྱས་ནས་བསྡུ་བ་གསུམ་པ་བྱས་པར་འདོད་དོ། །

གཉིས། ཐུན་མིན་ཐེག་ཆེན་མདོ་ལུགས་ཀྱི་བཀའ་བསྡུ་མཛད་ཚུལ།

གཉིས་པ་ཐུན་མིན་ཐེག་ཆེན་རྒྱུ་ཕར་ཕྱིན་ཐེག་པའི་སྡེ་སྣོད་གསུམ་བསྡུས་ཤིང་དར་ཚུལ་ནི། རྒྱལ་པོའི་ཁབ་ཀྱི་ལྷོ་ཕྱོགས་བཱི་མ་སྭ་བྷ་ཝའི་རི་ལ་རྒྱལ་སྲས་འབུམ་ཕྲག་བཅུ་དང་ལྷན་ཅིག་ཏུ་བྱམས་པས་འདུལ་བ། འཇམ་དཔལ་གྱིས་མདོ་སྡེ། གསང་བདག་གིས་མངོན་པའི་སྡེ་སྣོད་རྣམས་བསྡུ་བར་མཛད། ཅེས་བཞེད་པ་དང་། དེ་དང་མཚུངས་པར་རྟོག་གེ་འབར་བ་ལས། ཐེག་པ་ཆེན་པོ་ནི་སངས་རྒྱས་ཀྱིས་གསུངས་པ་ཡིན་ཏེ། རྩ་བའི་སྡུད་པར་བྱེད་པ་པོ་ཀུན་ཏུ་བཟང་པོ་དང་། གསང་བའི་བདག་པོ། བྱམས་པ་ལ་སོགས་པ་རྣམས་ཀྱིས་བསྡུས་པའི་ཕྱིར་རོ། །བདག་ཅག་གི་རྩ་བའི་སྡུད་པ་བྱེད་པོ་ཉན་ཐོས་མ་ཡིན་ཏེ་དེ་དག་གི་ཡུལ་མ་ཡིན་པའི་ཕྱིར་རོ། །ཞེས་དང་། གསང་བ་བསམ་མི་ཁྱབ་པའི་མདོ་ལས་ཕྱག་ན་རྡོ་རྗེ་སངས་རྒྱས་སྟོང་གི་བསྟན་པའི་སྡུད་པ་པོར་བཤད་པ་དང་། ཐེག་ཆེན་གྱི་སྡེ་སྣོད་གཞན་དག་ལས་བྱ་རྒོད་ཕུང་པོའི་རི་བོའི་ལྷོ་ཕྱོགས་ཀྱི་རི་ལ་ཟབ་མོ་ལྟ་བའི་ཕྱོགས་རྣམས་འཇམ་དབྱངས་དང་། རྒྱ་ཆེན་སྤྱོད་པའི་ཕྱོགས་རྣམས་བྱམས་པས་བསྡུས་སོ་ཞེས་བཞེད་དོ། །དེ་ལྟར་བསྡུ་བ་བྱས་མ་ཐག་ཏུ་ལྷ་ཀླུ་མི་མ་ཡིན་རྣམས་ཀྱིས་ཐེག་ཆེན་གྱི་གླེགས་བམ་རྣམས་རང་རང་གི་གནས་སུ་སྤྱན་དྲངས་ནས་མཆོད་པ་ན། ཕྱིས་རྫུ་འཕྲུལ་ལ་མངའ་བརྙེས་པའི་སྐྱེས་བུ་རྣམས་ཀྱིས་སླར་མི་ཡུལ་དུ་ཅི་རིགས་པར་གདན་དྲངས་པ་དང་། མི་ཡུལ་དུ་བཞུགས་པ་རྣམས་ཀྱང་རིམ་པར་དར་ཞིང་རྒྱས་པར་བྱུང་བ་སྟེ། ཐེག་དམན་གྱི་བཀའ་བསྡུ་གསུམ་པ་མ་བྱས་པའི་གོང་ཙམ་དུ་ཡུལ་ཨོ་ཌི་བི་ཤར་བྱ་བའི་རྒྱལ་པོ་ཟླ་སྲུང་གི་ཁྱིམ་དུ་འཕགས་པ་འཇམ་དཔལ་དགེ་སློང་གི་ཚུལ་དུ་བྱོན་ནས་ཐེག་པ་ཆེན་པོའི་ཆོས་བསྟན་ཅིང་གླེགས་བམ་ཞིག་ཀྱང་བཞག་གོ་ཞེས་བྱུང་ལ། མདོ་ལུགས་པ་རྣམས་ཤེར་ཕྱིན་བརྒྱད་སྟོང་པ་ཡིན་པར་འདོད་ཅིང་། གསང་སྔགས་པ་རྣམས་དེ་ཁོ་ཉིད་བསྡུས་པ་ཡིན་ཞེས་ཟེར། གང་ལྟར་སྟོན་པ་མྱ་ངན་ལས་འདས་པའི་འོག་ཏུ་ཐེག་ཆེན་མི་ཡུལ་དུ་དར་བའི་ཐོག་མ་ཡིན་པར་ཐམས་ཅད་བཞེད་པ་མཐུན། དེ་ནས་བཙུན་པ་ཨ་བི་ཏརྒ་སོགས་རྣམ་རིག་སྨྲ་བའི་སློབ་དཔོན་ལྔ་བརྒྱ་ཙམ་བྱོན། རིམ་པར་བྲམ་ཟེ་སྒྲ་གཅན་འཛིན་བྱོན་ཞིང་། དེའི་སློབ་མ་རྗེ་བཙུན་འཇམ་དཔལ་དབྱངས་ཀྱིས་རྗེས་བཟུང་ཐོབ་པ་དཔལ་མགོན་འཕགས་པ་ཀླུ་སྒྲུབ་ཀྱིས་རྩ་ཤེས་སོགས་དབུ་མའི་བསྟན་བཅོས་མཛད་དེ་ཤེར་ཕྱིན་གྱི་དངོས་བསྟན་དབུ་མའི་ལུགས་ཟབ་མོ་ལྟ་བའི་སྲོལ་རྒྱ་ཆེར་ཕྱེས། དེའི་སློབ་མ་ནཱ་ག་ཧཱ། ནཱ་ག་བོ་དྷིའམ་ཀླུའི་བྱང་ཆུབ། ཨཪྱ་དེ་ཝ་བཅས་བྱོན་ཞིང་འདིས་དབུ་མ་བཞི་བརྒྱ་པ་མཛད། ཨཪྱ་དེ་ཝའི་སློབ་མ་དམངས་རིགས་སྒྲ་གཅན་འཛིན་བཟང་པོ་དང་སློབ་དཔོན་དཔའ་བོའི་ཞབས་སོགས་བྱོན། ཡང་ཀླུ་སྒྲུབ་ཀྱི་སློབ་མ་དགེ་སྲུང་ལས་སངས་རྒྱས་བསྐྱངས་དང་ལེགས་ལྡན་འབྱེད་གཉིས་བྱོན་ཏེ་སོ་སོས་བསྟན་བཅོས་མཛད་ནས་དབུ་མ་ཐལ་རང་གི་སྲོལ་གཉིས་སུ་གྱེས། སངས་རྒྱས་བསྐྱངས་ཀྱི་སློབ་མ་ཀ་མ་ལ་བུདྡྷའི་སློབ་མ་ཟླ་བ་གྲགས་པས་ཚིག་གསལ་དང་འཇུག་པ་གཉིས་བརྩམས་ཏེ་ཐལ་འགྱུར་ཤིང་རྟའི་སྲོལ་དངོས་སུ་ཕྱེས། ཡང་སྟོན་པ་འདས་ནས་ལོ་དགུ་བརྒྱ་ན་སློབ་དཔོན་ཐོགས་མེད་སྐུ་མཆེད་བྱོན། གཅེན་ཐོགས་མེད་དགའ་ལྡན་དུ་ཕེབས་ཏེ་རྒྱལ་ཚབ་བྱམས་མགོན་ལས་བྱམས་ཆོས་སྡེ་ལྔ་གསན་ཏེ་མི་ཡུལ་དུ་བསྒྲགས་ཤིང་རྒྱ་ཆེན་སྤྱོད་པའི་སྲོལ་གྱི་ཤིང་རྟའི་བཀའ་སྲོལ་ཐོག་མར་ཕྱེས། དེའི་སློབ་མ་གཅུང་དབྱིག་གཉེན་གྱིས་མངོན་མཛོད་སོགས་བསྟན་བཅོས་བྱས་ནས་ཐེག་པ་ཆེ་ཆུང་གི་ཆོས་མངོན་པ་གསལ་བར་མཛད། དེ་ལ་རང་མཁས་ཀྱི་སློབ་མ་བཞི་ཞེས་ཕྱོགས་ཀྱི་གླང་པོ་དང་། ཡོན་ཏན་འོད། བློ་གྲོས་བརྟན་པ། འཕགས་པ་རྣམ་གྲོལ་སྡེ་བཅས་བྱོན། བློ་བརྟན་གྱི་སློབ་མ་དགེ་བསྙེན་ཙནྡྲ་གོ་མི་བྱོན་ཞིང་དེས་ཐོགས་མེད་ཀྱི་གཞུང་བཟུང་ནས་ཟླ་གྲགས་དང་ཆོས་ཀྱི་བརྒལ་བརྟག་མཛད། ཕྱོགས་ཀྱི་གླང་པོ་སོགས་ཀྱི་སློབ་མ་ནཱ་ལེནྡྲའི་མཁན་པོ་ཆོས་སྐྱོང་བྱ་བ་བྱོན་ནས་དབུ་མ་བཞི་བརྒྱ་པ་རྣམ་རིག་ཏུ་བཀྲལ་བ་སོགས་བསྟན་བཅོས་མང་དུ་མཛད། དེའི་སློབ་མ་རྒྱལ་སྲས་ཆེན་པོ་ཞི་བ་ལྷ་དང་དཔལ་ལྡན་ཆོས་སྐྱོང་སྟེ་ཕྱིས་གྲུབ་ཐོབ་བི་རཱུ་པར་གྲགས་པ་གཉིས་བྱོན། དཔལ་ཆོས་ཀྱི་གྲགས་པས་ཕྱོགས་ཀྱི་གླང་པོའི་སློབ་མ་དབང་ཕྱུག་སྡེ་ལས་ཚད་མ་དང་སློབ་དཔོན་ཆོས་སྐྱོང་ལས་སྡེ་སྣོད་གསུམ་གྱི་ཟིལ་མངར་བཞེས། དེ་ལྟར་ཀླུ་སྒྲུབ་དང་། ཐོགས་མེད། ཕྱོགས་གླང་གསུམ་ནི་གཞུང་བྱེད་པ་པོ་གསུམ་དང་། ཨཪྱ་དེ་ཝ། དབྱིག་གཉེན། ཆོས་གྲགས་གསུམ་ནི་འགྲེལ་བ་བྱེད་པ་པོ་སྟེ་འཛམ་གླིང་མཛེས་པར་བྱེད་པའི་རྒྱན་དྲུག་ཏུ་གྲགས་ཀྱི་མཆོག་གཉིས་ཀྱི་ཐ་སྙད་འཕགས་ཡུལ་དུ་མ་བྱུང་པར་གསུངས། དེ་བཞིན་རྨད་བྱུང་གི་སློབ་དཔོན་ཆེན་པོ་བཞི། མཁས་པ་སྒོ་དྲུག གྲུབ་ཆེན་བརྒྱད་ཅུ་སོགས་རྒྱལ་བའི་གསུང་རབ་ཀྱི་ཚིག་དོན་ལ་རང་དབང་འབྱོར་བའི་སློབ་དཔོན་མཐའ་ཡས་པ་བྱོན་པ་རྣམས་ཀྱིས་བསྟན་པ་ལ་འཇུག་འདོད་ཀྱི་སྐལ་ལྡན་རྣམས་འཆད་པས་རྗེས་སུ་བཟུང་ཞིང་། རྒོལ་འདོད་ཀྱི་རྟོག་གེ་པ་ལུང་དང་རིགས་པས་ཚར་བཅད། བསྟན་པ་ཡུན་རིང་དུ་གནས་པའི་ཕྱིར་དགོངས་འགྲེལ་བསྟན་བཅོས་ཀྱི་ཚོགས་མང་དུ་བརྩམས་ནས་ཐེག་པ་ཆེན་པོའི་བསྟན་པ་རིན་པོ་ཆེ་མཐའ་རྒྱས་སུ་བསྐྱངས་སོ། །

གསུམ། གསང་སྔགས་རྡོ་རྗེ་ཐེག་པའི་བཀའ་བསྡུ་མཛད་ཚུལ།

གསུམ་པ་འབྲས་བུ་གསང་སྔགས་རྡོ་རྗེ་ཐེག་པ་བསྡུས་ཤིང་དར་ཚུལ་ནི། དེ་ལ་རྒྱུད་འགྲེལ་འགའ་ཞིག་ཏུ་རྒྱུད་ཀྱི་ཞུ་བ་པོ་དང་མཇུག་ཏུ་གང་ལ་གཏད་པ་དེས་བསྡུས་པར་བཞེད་དེ། དཔེར་ན་དུས་འཁོར་ཟླ་བཟང་། བརྟག་གཉིས་རྡོ་རྗེ་སྙིང་པོས། སྡོམ་འབྱུང་ཕྱག་རྡོར་སོགས་ཀྱིས་བསྡུས་སོ་ཟེར། གཞན་ཡང་རྩ་རྒྱུད་རྒྱས་པ་རྣམས་ལས་བསྡུས་ནས་བསྡུས་རྒྱུད་རྣམས་གསུངས་པས་སྟོན་པ་པོ་ཉིད་ཀྱིས་བསྡུས་པར་བཤད་པ་དང་། དེ་ལས་གཞན་དཔལ་གསང་བ་གྲུབ་པའི་རྒྱུད་ལས། འདི་ཡི་སྡུད་པར་བྱེད་པ་པོ། །གཞན་འགའ་ཡོད་པ་མ་ཡིན་ཏེ། །བདག་ཉིད་འབའ་ཞིག་སྨྲ་བར་བྱེད། །རྒྱུད་མཛད་པོ་ནི་ཐུགས་རྡོ་རྗེ། །ཞེས་གསུངས་པས་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་དཔལ་གསང་བའི་བདག་པོ་ལས་ལོགས་སུ་བཞག་པ་མེད་པས་གསང་སྔགས་ཀྱི་རྒྱུད་སྡེ་ཐམས་ཅད་གསང་བདག་གིས་བསྡུས་པར་བཤད་ཅིང་། ལྕང་ལོ་ཅན་དུ་བྱང་སེམས་བྱེ་བ་ཕྲག་དགུ་བཅུ་རྩ་དྲུག་འདུས་ཏེ་གསང་བདག་ལ་གསོལ་བ་བཏབ་པས། དེས་སྔགས་ཀྱི་རྒྱུད་མ་ལུས་པ་བསྡུས་ནས་ཡི་གེར་བཀོད་ནས་ཨོ་རྒྱན་དུ་ཀླུ་ལས་གྱུར་པའི་མཁའ་འགྲོ་མ་རྣམས་ལ་དབང་བསྐུར་གདམས་གཏད་མཛད་ཚུལ། ཨིནྜ་བོ་དྷིས་མཛད་པའི་བདེ་མཆོག་རྩ་རྒྱུད་ཀྱི་འགྲེལ་བ་ལས། རྒྱལ་པོ་ཨིནྜ་བོ་དྷི་འཁོར་བཅས་ལ། །དབང་བསྐུར་བྱིན་རླབས་གསང་ཆེན་བླ་མེད་ཆོས། །ལྐོག་གྱུར་དག་ཏུ་རྡོ་རྗེ་ཐེག་མཆོག་གི །ཆོས་ཀྱི་འཁོར་ལོ་སྐོར་བར་མཛད་པའོ། །ཕྱི་དུས་རིམ་པར་ལུང་བསྟན་སྡུད་པ་པོས། །རི་བོ་མཆོག་རབ་བྱང་ཤར་ལྷ་གནས་མཆོག །ལྕང་ལོ་ཅན་གྱི་ཕོ་བྲང་ཆེན་པོར་ནི། །རྒྱུད་རྣམས་མ་ལུས་སེམས་དཔའ་ཆེན་པོའི་ཚོགས། །བྱེ་བ་ཕྲག་ནི་དགུ་བཅུ་རྩ་དྲུག་སོགས། །འདུས་ཏེ་རྗེ་བཙུན་གསང་བའི་བདག་པོ་ལ། །གསོལ་བ་བཏབ་ཚེ་འདི་སྐད་བདག་ཐོས་ཞེས། །རབ་ཏུ་གསུངས་པ་གསེར་གྱི་ཤོག་བུ་ལ། །བཻ་ཌཱུཪྱ་ཡི་ཞུན་མས་ཡི་གེར་བཀོད། །དེ་ནས་མ་འོངས་དུས་ལ་དགོངས་ནས་ནི། །ཨོ་རྒྱན་གནས་སུ་ཀླུ་ལས་བྱུང་བ་ཡི། །མཁའ་འགྲོ་མ་ཡི་ཚོགས་ལ་བྱིན་གྱིས་བརླབས། །དྷརྨ་སཱ་ཛ་གསང་བ་ཆོས་ཀྱི་མཛོད། །དཔལ་ལྡན་རང་བྱུང་ཕོ་བྲང་གནྡྷོ་ལར། །མཁའ་འགྲོའི་དབང་ཕྱུག་མངོན་པར་དགའ་མ་སོགས། །བྱིན་བརླབས་དབང་བསྐུར་ཕྱི་རབས་སྐལ་ལྡན་

ལ། །རྗེས་གནང་ཉེ་བར་གདམས་པ་ལུང་བསྟན་པའོ། །ཞེས་སོ། །དེས་ན་གསང་སྔགས་ཀྱི་རྒྱུད་རྣམས་ཕལ་ཆེར་གསང་བའི་བདག་པོ་དང་། རྡོ་རྗེ་ཆོས། རྡོ་རྗེ་སྙིང་པོ། འཇམ་དཔལ། སྤྱན་རས་གཟིགས། སྤྲུལ་བའི་སྐུ་དགའ་རབ་རྡོ་རྗེ་སོགས་དང་། མཁའ་འགྲོ་མ་པཱུརྞ་ཉེ་བར་ཞི་བ་སོགས་མཁའ་འགྲོའི་ཚོགས། གཞན་ཡང་ལྷ་དང་། ཀླུ་དང་། གནོད་སྦྱིན་སོགས་མ་ངེས་པའི་རིགས་ཅན་གྱིས་ཀྱང་བསྡུ་བར་མཛད་ནས་འཇིག་རྟེན་གྱི་ཁམས་འདིར་ཡོངས་སུ་དར་བ་བྱུང་ངོ་། །སྤྱིར་གསང་སྔགས་ཀྱི་རྒྱུད་སྡེ་རྣམས་འཕགས་ཡུལ་དུ་དར་ནུབ་ཅི་རིགས་བྱུང་བ་དང་། ཁྱད་པར་བླ་མེད་ཀྱི་རྒྱུད་སྡེ་རྣམས་སྐལ་བ་མཆོག་དང་ལྡན་པ་རེ་གཉིས་ལ་ཐོད་རྒལ་དུ་ལྷག་པའི་ལྷ་སོགས་ཀྱིས་བསྟན་ཅིང་རང་ཉིད་གཅིག་པུས་ཉམས་སུ་བླངས་པས་དངོས་གྲུབ་ཐོབ་པ་ལས། རྗེས་སུ་གདམས་པ་དང་བརྒྱུད་པ་རིམ་ཅན་དུ་འདོམས་པ་ཆེར་མེད་པས་མངོན་ཚན་ཅན་དུ་དར་བ་ལྟ་ཅི་མཚན་ཙམ་ཡང་ཤེས་པ་དཀོན་པས་གསར་རྙིང་གཉིས་ལ་ལོ་རྒྱུས་ཀྱི་བབ་མི་འདྲ་བ་ཅི་རིགས་བྱུང་བ་སྟེ། སྔ་འགྱུར་རྙིང་མའི་ནང་རྒྱུད་སྡེ་གསུམ་གྱི་བརྒྱུད་སྲོལ་འོག་ཏུ་འབྱུང་མ་རག་པའི་དུམ་བུར་བརྗོད་པར་འདོད་པས་འདིར་མི་སྤྲོ་ལ། གསང་སྔགས་གསར་མ་པའི་བཤད་སྲོལ་ནི། སྟོན་པས་ཨོ་རྒྱན་གྱི་རྒྱལ་པོ་ཨིནྡྲ་བྷུ་ཏི་ལ་རྒྱུད་རྣམས་གཏད་ཅིང་། རྒྱལ་པོས་རྒྱུད་རྣམས་གླེགས་བམ་དུ་བྱས་ནས་སྐྱེ་བོ་རྣམས་ལ་བསྟན་པས་སྲོག་ཆགས་ཕྲ་མོ་ཡན་ཆད་གྲུབ་པ་ཐོབ་སྟེ་འཇའ་ལུས་སུ་སོང་། དེ་ནས་ཨོ་རྒྱན་གྱི་ཡུལ་སྟོངས་ཤིང་མཚོར་གྱུར་པ་ཀླུས་གང་བ་ལ་གསང་བདག་གིས་རྒྱུད་རྣམས་བསྟན་ཅིང་སྨིན་པར་མཛད། དེ་དག་རིམ་གྱིས་མིར་གྱུར་ནས་མཚོ་འགྲམ་དུ་གྲོང་བཅས་ཏེ་ཉམས་སུ་བླངས་པས་གྲུབ་པ་ཐོབ། དེ་རྣམས་ཀྱི་བུ་དང་བུ་མོ་རྣམས་དཔའ་བོ་དང་མཁའ་འགྲོ་མར་གྱུར་པས་ཨོ་རྒྱན་མཁའ་འགྲོའི་གླིང་ཞེས་གྲགས། མཚོ་དེ་ཡང་བསྐམས་ཏེ་ཧེ་རུ་ཀའི་ལྷ་ཁང་རང་བྱུང་ཞིག་བྱུང་བས། དེའི་དཀོར་མཛོད་དུ་རྒྱུད་ཀྱི་གླེགས་བམ་རྣམས་བཞུགས་པ་ལས། ཕྱིས་རྒྱལ་པོ་བ་སུ་ཀལྤས་གསང་བ་འདུས་པ་དང་། ཀླུ་སྒྲུབ་ཀྱིས་དགྱེས་རྡོར། ཀུ་ཀུ་རི་པས་མ་ཧཱ་མ་ཡ་དང་འཇིགས་བྱེད་སོགས་གྲུབ་ཐོབ་རྣམས་ཀྱིས་གསར་རྒྱུད་ཕལ་ཆེར་ཞིག་དེ་ནས་བླངས་ཤིང་། དེ་བཞིན་དུ་ཙི་ལུ་པ་སོགས་ཀྱིས་ཤམྦྷ་ལའི་ཡུལ་ནས་དུས་འཁོར་བླངས་པ་སོགས་ཡུལ་གཞན་དག་ནས་བླངས་ཏེ་དར་རོ་ཞེས་ལོ་རྒྱུས་ཅུང་ཟད་མི་མཐུན་པ་མང་ཞིང་། གང་ལྟར་དཔལ་ས་ར་ཧ་སོགས་གྲུབ་ཐོབ་བརྒྱད་ཅུ་རྩ་བཞི་དང་། ཡེ་ཤེས་ཞབས་སོགས་སློབ་དཔོན་བཅུ་གཉིས། གཞན་ཡང་མཁས་པ་སྒོ་དྲུག །དུས་འཁོར་ཞབས་པ་ཆེ་ཆུང་སོགས་གྲུབ་ཐོབ་བརྗོད་ཀྱིས་མི་ལངས་པ་བྱོན་ཏེ་གཙོ་བོ་ཐེག་པ་ཆེན་པོ་གསང་སྔགས་ཀྱི་སྒོ་ནས་སྐལ་ལྡན་དཔག་ཏུ་མེད་པ་སྨིན་གྲོལ་གྱི་ས་ལ་བཀོད་པ་སོགས་གསང་བ་སྔགས་ཀྱི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་བར་མཛད་དོ། །

སྨྲས་པ།

ཐུབ་དབང་གངས་ཀྱི་རི་བོ་ལས་འོངས་པའི། །ཐོག་མཐའ་བར་དགེའི་ལེགས་གསུང་མདོ་སྔགས་ཆོས། །བཤད་སྒྲུབ་རྦ་རླབས་འཕྱུར་བའི་རྩེ་དགའ་ཅན། །ལྷོ་རྒྱུད་འཛམ་གླིང་ཆོས་ཀྱི་ཞིང་སར་འཁྱིལ། །ཨེ་མ་མ་ལུས་ཕན་བདེའི་གཏེར། །དགེ་ལེགས་པད་མོ་འཛུམ་པའི་གཉེན། །ཐུབ་བསྟན་ཉི་མ་གཞོན་ནུའི་དཔལ། །གདུལ་བྱའི་མཁའ་ལ་མངོན་པར་འཕགས། །དེ་ཚེ་མདོ་སྔགས་ཆོས་ཀྱི་ཆར། །འཐུང་ལྡན་མཁས་གྲུབ་ལྗོན་པའི་ཚལ། །ཐེག་གསུམ་འབྲས་བུས་རབ་དུད་བཞིན། །བགྲང་ཡས་འགྲོ་བའི་དཔལ་དུ་སྨིན། །རྒྱལ་བ་སྐྱོབས་པ་མཆོག་དེའི་ལེགས་གསུང་ཆོས། །ཐ་དད་གདུལ་བྱའི་ཁམས་དབང་རྗེས་འགྲོ་བའི། །རིམ་དང་ཅིག་ཆར་ཐར་དང་རྣམ་མཁྱེན་སར། །བགྲོད་པའི་ལམ་སྟེགས་ཆོས་ཀྱི་སྒོ་མོ་མང་། །དེ་ལྟ་ནའང་རྒྱུ་འབྲས་ཐེག་པའི་ཚུལ། །སྡེ་སྣོད་གསུམ་དང་རྒྱུད་སྡེ་བཞི་དྲུག་གིས། །བསྡུས་པའི་ཆོས་ཚུལ་དྲང་ངེས་ལྡེམ་དགོངས་སོགས། །ཇི་སྙེད་མཆིས་པ་བདེ་གཤེགས་བསྟན་པའི་ལམ། །རྒྱལ་བའི་རྒྱལ་ཚབ་གནས་བརྟན་གཏད་རབས་བདུན། །རྒྱལ་སྲས་སེམས་དཔའ་རིགས་གསུམ་མགོན་པོ་དང་། །རྒྱལ་བའི་ལུང་ཟིན་རྒྱན་དྲུག་མཆོག་གཉིས་ཀྱིས། །རྒྱལ་གསུང་བཀའ་བསྡུ་འཆད་དང་རྩོམ་པས་སྤེལ། །ཞེས་པ་ནི་རྒྱལ་བསྟན་མདོ་སྔགས་ཀྱི་བསྟན་པ་རིན་པོ་ཆེ་དབུས་འགྱུར་ཆོས་ཀྱི་ཞིང་ས་རྒྱ་གར་འཕགས་པའི་ཡུལ་དུ་བཀའ་བསྡུ་འཆད་སྤེལ་གྱིས་ཇི་ལྟར་བསྐྱངས་ཚུལ་བསྟན་པའི་སྐབས་ཀྱི་ངལ་གསོ་བའི་ཚིགས་སུ་བཅད་པའི་ཕྲེང་བའོ། །

སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། རྗེས་འཇུག་འཕགས་པའི་གང་ཟག་རྣམས་ཀྱིས་བཀའ་བསྡུ་འཆད་སྤེལ་གྱིས་རྒྱལ་བསྟན་རིམ་པར་བསྐྱངས་ཚུལ་བསྙད་པ་སྟེ་སརྒ་གཉིས་པ་རྫོགས་སོ།། །།

གསུམ་པ། གསང་ཆེན་རྡོ་རྗེ་ཐེག་པ་ནང་རྒྱུད་སྡེ་གསུམ་གྱི་བསྟན་པ་དར་ཚུལ་བྱེ་བྲག་ཏུ་བཤད་པ།

གཅིག རྒྱལ་བ་དགོངས་པའི་བརྒྱུད་པ།

གསུམ་པ་གསང་ཆེན་རྡོ་རྗེ་ཐེག་པ་ནང་རྒྱུད་སྡེ་གསུམ་གྱི་བསྟན་པ་དར་ཚུལ་བྱེ་བྲག་ཏུ་བཤད་པ་ལ། དེ་ལ་ཆོས་ཐམས་ཅད་ཀྱི་གཞི་ལྟ་བུ་བསྐྱེད་པ་མ་ཧཱ་ཡོ་ག །ཆོས་ཐམས་ཅད་ཀྱི་ལམ་ལྟ་བུ་ལུང་ཨ་ནུ་ཡོ་ག །ཆོས་ཐམས་ཅད་ཀྱི་འབྲས་བུ་ལྟ་བུ་རྫོགས་པ་ཆེན་པོ་ཨ་ཏི་ཡོ་ག་སྟེ་ནང་རྒྱུད་སྡེ་གསུམ་གྱི་ཆོས་ཀྱི་བྱུང་ཚུལ་ནི། ཇི་སྐད་དུ། སྒྱུ་འཕྲུལ་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །ཅེས་གསུངས་པའི་དོན་བཞིན། རྒྱལ་བ་དགོངས་པའི་བརྒྱུད་པ། རིག་འཛིན་རིག་པའི་བརྒྱུད་པ། གང་ཟག་སྙན་ཁུང་གི་བརྒྱུད་པ་སྟེ་བརྒྱུད་པའི་ཆུ་འགོ་བསྟན་པའི་བབ་ལུགས་ཆེན་མོ་གསུམ་ཞེས་གྲགས་པ་ལས།

དང་པོ་རྒྱལ་བ་དགོངས་པའི་བརྒྱུད་པ་ནི། ཀུན་བྱེད་ལས། སྐུ་གསུམ་སྟོན་པ་དེ་ཡི་བཤད་ལུགས་ནི། །སྟོན་པ་ཆོས་སྐུས་བྱིན་གྱིས་བརླབས་ལས་བཤད། །ལོངས་སྤྱོད་རྫོགས་པས་རང་གིས་ངོ་བོས་བཤད། །སྤྲུལ་པ་སྐུ་ཡིས་ཚིག་དང་དོན་བསྡེབས་ནས། །གང་ཟག་རྣ་བའི་དབང་པོའི་ཚིག་དོན་སྟོན། །ཅེས་པ་ལྟར་གསུམ་ལས།

དང་པོ་སྟོན་པ་ཆོས་སྐུས་རང་བཞིན་བྱིན་གྱིས་རླབས་ཀྱིས་ཇི་ལྟར་གསུང་ཚུལ་ནི། ཀུན་བྱེད་ལས། སྟོན་པ་བསྟན་པ་འཁོར་དུས་གནས་དག་ནི། །ཕུན་སུམ་ཚོགས་པ་ལྔ་ཡི་རང་བཞིན་ནོ། །ཞེས་པ་ལྟར་ལས། གནས་ཕུན་སུམ་ཚོགས་པ་འོག་མིན་ཆོས་ཀྱི་དབྱིངས་ཀྱི་ཞིང་ཁམས་སྤྲོས་པ་དང་བྲལ་བ་སྐྱེ་འགག་མེད་པའི་ཀློང་། འཁོར་བ་དང་མྱ་ངན་ལས་འདས་པ་གང་དུའང་རྒྱ་ཆད་ཕྱོགས་ལྷུང་མེད་པ་ན། སྟོན་པ་ཕུན་སུམ་ཚོགས་པ་དཔལ་ཀུན་ཏུ་བཟང་པོ་གདོད་ནས་མངོན་པར་བྱང་ཆུབ་པའི་རང་བཞིན་ཉིད། དུས་ཕུན་སུམ་ཚོགས་པ་ཆོས་ཉིད་འགྱུར་བ་མེད་པ་དུས་བཞི་མཉམ་པ་ཉིད་ཀྱི་རང་བཞིན་ན། འཁོར་ཕུན་སུམ་ཚོགས་པ་སྟོན་པ་ཉིད་ལས་ཐ་མི་དད་པའི་ཡེ་ཤེས་རྒྱ་མཚོའི་ཚོགས་ལ། ཆོས་ཕུན་སུམ་ཚོགས་པ་རང་བཞིན་མཉམ་རྫོགས་ཆེན་པོ་མ་གསུངས་མི་གསུང་གསུང་བ་མེད་པའི་ཚུལ་གྱིས་རྣམ་པར་དག་པ་སྟེ། སྙིང་འགྲེལ་ལས། སྟོན་པ་ཆོས་ཀྱི་སྐུས་འཁོར་ཡེ་ཤེས་རྒྱ་མཚོ་ལ་སྐྱེ་མེད་དོན་གྱི་གསུང་གིས་བརྡ་སྤྲད་པའོ། །ཞེས་དང་། ཐལ་འགྱུར་ལས། དེས་ན་ཆོས་ཉིད་ནམ་མཁའ་ལ། །ཁྱབ་འཇུག་ཆེན་པོའི་གསུང་གིས་ནི། །བྱིན་གྱིས་བརླབས་ཀྱིས་རང་སྒྲ་སྣང་། །ཞེས་གསུངས་པ་ལྟར་རོ། །

གཉིས་པ་སྟོན་པ་ལོངས་སྐུས་རང་གི་ངོ་བོའི་སྣང་བས་གསུངས་ཚུལ་ནི། སྟོན་པ་ཕུན་སུམ་ཚོགས་པ་ཆོས་སྐུ་སྤྲོས་དང་བྲལ་བའི་ངང་ལས་མ་གཡོས་བཞིན་དུ་ཀུན་ཏུ་བཟང་པོ་ཉིད་ལོངས་སྐུའི་རྣམ་པར་བཞེངས་ཏེ། གནས་ཕུན་སུམ་ཚོགས་པ་རང་སྣང་སྟུག་པོ་བཀོད་པ་གསལ་དག་བདེ་བའི་ཞིང་ན། སྟོན་པ་ཕུན་སུམ་ཚོགས་པ་དཔལ་རྣམ་པར་སྣང་མཛད་ལ། འཁོར་ཕུན་སུམ་ཚོགས་པ་རིགས་ལྔའི་སངས་རྒྱས་ཀྱི་དཀྱིལ་འཁོར་ནམ་མཁའི་དབྱིངས་ཀྱི་མཐའ་ཁྱབ་པ་ཞི་བ་དང་ཁྲོ་བོའི་རང་བཞིན་མངོན་པར་སྣང་བས་བསྐོར་ཏེ། དུས་ཕུན་སུམ་ཚོགས་པ་ཐོག་མ་དང་ཐ་མ་མེད་པའི་ཆོས་ཉིད་འདུ་འབྲལ་མེད་པའི་ངོ་བོ་བསམ་གྱིས་མི་ཁྱབ་པ་ན། ཆོས་ཕུན་སུམ་ཚོགས་པ་རང་བཞིན་གསང་བའི་སྙིང་པོ-དེ་ཁོ་ན་ཉིད་ངེས་པར་རང་བྱུང་རང་ཤར་ཆེན་པོར་རང་སྣང་བའོ། །

གསུམ་པ་སྤྲུལ་སྐུས་སྒྲ་ཚིག་སྡེབ་སྦྱོར་ལེགས་པས་གསུང་པའི་ཚུལ་ལ་གཉིས་ཏེ། རིག་པའི་སྐྱེས་བུ་ཐུབ་པ་དྲུག་སྣང་བས་གདུལ་བྱའི་དོན་མཛད་ཚུལ་ནི། དེ་ལྟར་ལྷུན་གྲུབ་སྟུག་པོ་བཀོད་པའི་ཞིང་ནས་རིག་པའི་སྐྱེས་བུ་རིགས་ལྔ་གངས་ཆེན་མཚོའི་སྐུ་ལས་སྤྲུལ་བའི་དང་པོ་ཡི་གེ་སྤྲིན་གྱི་འོད་ཟེར་བྱེ་བ་ཕྲག་ཁྲིག་དཔག་ཏུ་མེད་པ་འཇིག་རྟེན་དྲུག་གི་ཕྱོགས་བཅུ་ཀུན་ཏུ་འཕྲོས་པའི་རྩེ་མོ་ལས། རིག་པའི་སྐྱེས་བུ་ཐུབ་པ་དྲུག་གྲངས་མེད་བརྗོད་དུ་མེད་པ་ཐོན་ཏེ་ལྷ་དང་ལྷ་མིན་ལ་སོགས་པ་འགྲོ་བ་སོ་སོའི་དོན་མཛད་པ་ལས་མིའི་ཐུབ་པ་བསྐལ་བཟང་སངས་རྒྱས་སྟོང་བྱོན་ནས་འགྲོ་བའི་དོན་མཛད་ཅིང་། ཁྱད་པར་ཚེ་ལོ་བརྒྱ་པའི་ཚེ་ཤཱཀྱ་ཐུབ་པ་ཞེས་བྱ་བའི་མཚན་དང་རྣམ་པས་གདུལ་བར་དགོངས་ནས་འཛམ་བུ་གླིང་བྱེ་བ་ཕྲག་བརྒྱར་སྐུ་མཉམ་དུ་སྣང་བ་མཛད་པ་བཅུ་གཉིས་ཀྱིས་འགྲོ་བའི་དོན་མཐར་ཕྱིན་པའི་ཚེ། གྲོང་ཁྱེར་རྩྭ་མཆོག་ཏུ་ཤིང་སཱ་ལ་ཟུང་གི་དྲུང་དུ་སེང་གེའི་ཁྲི་ལ་ཞི་བར་གཟིམས་ཏེ་འཁོར་རྣམས་ལ་བཀའ་སྩལ་པ། ཀྱེ་གྲོགས་པོ་དག་ཤེས་པར་གྱིས་ཤིག ཆོས་ཐམས་ཅད་ནི་མི་རྟག་པ། འབྱོར་པ་ཐམས་ཅད་ནི་རྒུད་པ། དངོས་པོ་ཐམས་ཅད་ནི་ངེས་པར་འཇིག་པ། གང་ཟག་གི་སྲོག་གི་དབང་པོ་ལ་ངེས་པར་སྐྱེ་ཤི་ཡོད་པའི་ཕྱིར་ང་ཡོངས་སུ་མྱ་ངན་ལས་འདའ་བས། གང་སུ་དག་ཐེ་ཚོམ་དང་སྤྲོས་པ་ཡོད་ན་དྲིས་ཤིག་གསུངས་པ་ན། འཁོར་རྣམས་ཀྱི་ནང་ནས་རིག་འཛིན་ཆེན་པོ་ཀུཉྫར་ཞེས་བྱ་བ་སྟན་ལས་ལངས་ཏེ་གསོལ་པ། ཁྱོད་ནི་ནམ་མཁའི་རང་བཞིན་ཏེ། །འདའ་དང་མི་འདའ་ཡོངས་མི་མངའ། །འཇིག་རྟེན་པ་ལ་མཐུན་འཇུག་ཏུ། །འདའ་བས་ཡོངས་སུ་འདུལ་བར་དགོངས། །ཞེས་སོགས་དྲིས་པར་ལན་ལྔ་གསུངས་པའི་ནང་ནས། འདྲེན་པའི་ཐེག་པ་རྣམ་གསུམ་ལ། །གང་དག་རིམ་པར་བཀོད་ལགས་ན། །མཉམ་པར་བླང་དོར་དུ་སྤྱོད་བྱེད་ཅིང་། །བྱང་ཆུབ་གཞན་ནས་མི་འཚོལ་བའི། །ཐབས་མཆོག་དཔག་གིས་མི་ལངས་པ། །མཉམ་པའི་ཐེག་མཆོག་ཡོངས་མ་གསུངས། །ཞེས་སྔར་གསང་སྔགས་མ་གསུངས་པའི་ཚུལ་དང་ཕྱིས་གསང་སྔགས་འབྱུང་བའི་དུས་ཀྱང་ལུང་དུ་བསྟན་པ་སྟེ། དགོངས་འདུས་ལས། རྨོངས་པར་གདུང་བ་སེལ་ན་ཡང་འབྱུང་། འཇིག་རྟེན་སྒྲོན་མ་བཀོད་པ་ན་ཡང་འབྱུང་། ངེས་པར་རྙེད་པ་ན་ཡང་འབྱུང་། དགོངས་པ་ངེས་པར་འགྲེལ་ན་ཡང་འབྱུང་། བྱིན་གྱིས་བརླབས་པ་ན་ཡང་འབྱུང་། བརྒྱུད་པ་ཐབས་ཀྱིས་གྲགས་པ་ན་ཡང་འབྱུང་། ཆེད་དུ་མཛད་པ་ན་ཡང་འབྱུང་། ལུང་ཆེན་པོ་ངེས་པར་བསྟན་པ་ན་ཡང་འབྱུང་། ལས་རྒྱུན་ཡོངས་སུ་གཅོད་པ་ན་ཡང་འབྱུང་། དགོངས་པ་རྣམ་པར་གྲོལ་བ་ན་ཡང་འབྱུང་། ཞེས་པ་དང་། དཔལ་འཁོར་ལོ་སྡོམ་པའི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་ནི་བརྒྱད་དང་ཉི་ཤུ་ན། །བསྟན་པའི་སྙིང་པོ་དམ་པ་ཞིག །ལྷ་གནས་གསུམ་དུ་གྲགས་པ་དེ། །འཛམ་གླིང་ཤར་གྱི་ཕྱོགས་མཚམས་ཀྱི། །དཔལ་ཞེས་བྱ་བའི་རི་བོ་ལ། །ཐུགས་རྗེ་མཐུན་པའི་བྱིན་རླབས་ཀྱིས། རྒྱལ་པོ་ཛཿཞེས་བྱ་བ་ལ། ལག་ན་རྡོ་རྗེས་སྣང་བར་བྱེད། མི་ལས་སྐལ་ལྡན་དམ་པ་རྣམས། །བྱང་ཆུབ་མཆོག་ཏུ་གྲུབ་གྱུར་པས། །དེ་ལ་རྟག་ཏུ་གུས་པར་གྱིས། །ཞེས་དང་། མདོ་སྡེ་གདམས་ངག་འབོག་པའི་རྒྱལ་པོ་ལས། རྒྱུ་ལ་མོས་པ་རྒྱུའི་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་སོགས་ལུང་དུ་བསྟན་ནས་མྱ་ངན་ལས་འདས་སོ། །གཉིས་པ་རིག་པའི་སྐྱེས་བུ་སེམས་དཔར་སྣང་བས་འགྲོ་བའི་དོན་མཛད་པ་ནི། ལྷུན་གྲུབ་སྟུག་པོ་བཀོད་པའི་ཞིང་དུ་སྟོན་པ་ལོངས་སྐུ་བླ་ན་མེད་པའི་གསང་བ་རང་གི་ངོ་བོ་ལས་ཐ་མི་དད་པའི་སྐུ་གསུང་ཐུགས་ཀྱི་སེམས་དཔའ་རིག་གསུམ་མགོན་པོ་སོགས་སུ་བསྟན་ནས་ལྷ་ཀླུ་མིའི་གནས་རིས་སོ་སོར་འགྲོ་བའི་དོན་མཛད་ཚུལ་སོགས་འོག་མའི་ཚོམས་སུ་འབྱུང་བ་ལྟར་རོ། །

གཉིས། རིག་འཛིན་བརྡ་ཡི་བརྒྱུད་པ།

༡ རིག་འཛིན་མི་མ་ཡིན་པ་ལས་བརྒྱུད་པ།

གཉིས་པ་རིག་འཛིན་བརྡ་ཡི་བརྒྱུད་པ་ལ་གཉིས་ཏེ། རིག་འཛིན་མི་མ་ཡིན་པ་ལས་བརྒྱུད་པ་དང་། མི་དང་མི་མ་ཡིན་གཉིས་ཀ་ལས་བྱུང་པའོ། །

དང་པོ་ནི། སྟོན་པ་ཉིད་ལས་ཐ་མི་དད་པའི་སྤྲུལ་བ་རིགས་གསུམ་དུ་སྣང་བར་མཛད་དེ་གདུལ་བྱ་ལྷ་ཀླུ་གནོད་སྦྱིན་གསུམ་ལ་ནང་རྒྱུད་སྡེ་གསུམ་གྱི་ཆོས་ཚུལ་བརྡའི་སྒོ་ནས་བཤད་ཅིང་བརྒྱུད་པ་སྟེ། དེ་ཡང་སྐུ་ཡི་སྤྲུལ་པ་འཇམ་དཔལ་དབྱངས་ནི་མཁྱེན་རབ་མཆོག་ཏུ་གྱུར་པས་གཙོ་བོར་ལྟ་བའི་ཆོས་སྟོན་ཅིང་། མཚན་དང་དཔེ་བྱད་དུ་འབར་བས་ལྷ་ཡི་གནས་སུ་ལྷ་རྣམས་ཀྱི་དོན་མཛད་ཅིང་གསང་བ་དམ་པ་ལྷ་གྲགས་ལྡན་མཆོག་སྐྱོང་སོགས་ལ་དེ་དག་གི་ཁམས་དབང་དང་མཐུན་པར་བཤད་ཅིང་། དེས་ལྷ་ཚངས་པ་རིན་ཆེན་འོད་འབར་ལ། དེས་ཚངས་པ་སྐྱེ་དགུའི་བདག་པོ། དེས་ཚངས་པ་ཀུན་གྲོལ། དེས་ཚངས་པ་གཙུག་ཕུད་འཛིན་པ་ལ། དེས་ལྷ་དབང་བརྒྱ་བྱིན། དེས་ལྷའི་རིག་འཛིན་ཚོམ་བུ་འབུམ་ཕྲག་ལ་བཤད་པས་ལྷ་རྣམས་ཀྱང་སངས་རྒྱས་ཀྱི་གདུང་འཚོབ་ཅིང་རིག་པ་འཛིན་པར་གྱུར་ཏོ། །གསུང་གི་སྤྲུལ་པ་སྤྱན་རས་གཟིགས་བདུད་རྩི་སྨན་གྱི་སྐུ་དང་ལྡན་པས་གཙོ་བོར་སྤྱོད་པའི་ཆོས་སྟོན་ཅིང་ཀླུའི་གནས་སུ་ཀླུ་རྒྱལ་མགྲིན་པ་ནག་པོ་ལ་བཤད་ཅིང་། དེས་ཀླུ་མོ་མ་མ་ཁ་འདུལ་ལ། དེས་ཀླུ་མོ་འདུལ་ཚང་མ། དེས་ཀླུ་ཡིད་འོང་དགའ། དེས་ཀླུ་འཇོག་པོ་སོགས་ཀླུའི་རིག་འཛིན་ཚོམ་བུ་འབུམ་ཕྲག་དང་བཅས་པར་བཤད་པས་སངས་རྒྱས་པར་གྱུར་ཏོ། །གསང་བའི་བདག་པོ་ཕྱག་ན་རྡོ་རྗེ་འཇིགས་ཚུལ་བསྡིགས་པའི་སྐུ་ཅན་གྱིས་གནོད་སྦྱིན་གྱི་གནས་སུ་གནོད་སྦྱིན་ཀུན་ཏུ་བཟང་པོ་ལ་བསྟན། དེས་གནོད་སྦྱིན་ལག་ན་རྡོ་རྗེ་ལ། དེས་གནོད་སྦྱིན་སྐར་མདའ་གདོང་ལ། དེས་གནོད་སྦྱིན་ཚོམ་བུ་འབུམ་སྡེ་ལ་བཤད་པས་སྔར་བཞིན་རྡོ་རྗེ་འཆང་གི་ས་བརྙེས་པར་གྱུར་ཏོ། །

བྱེ་བྲག་རྫོགས་པ་ཆེན་པོའི་སྐོར་རྣམས་ནི། དེའི་ཚེ་སུམ་ཅུ་རྩ་གསུམ་གྱི་ལྷ་ཡུལ་ན་ལྷ་དེ་བ་བཟང་སྐྱོང་གི་བུ་ཀུན་དགའ་སྙིང་པོ་ཞེས་ལྷ་བུ་གཞན་དག་ལས་བློ་གྲོས་ཀྱི་རྩལ་ཁྱད་དུ་འཕགས་པ་ཞིག་བྱུང་ཞིང་། དེ་ཉིད་ལྷའི་འདོད་ཡོན་ལ་མི་དགའ་བར་རྒྱུན་དུ་བསམ་གཏན་གྱི་ཁང་བུར་འདུག་ཅིང་རྡོ་རྗེའི་བཟླས་པར་བརྩོན་པས་ལྷ་བུ་སེམས་ལྷག་ཅན་ཞེས་གྲགས། དེ་ལ་ཆུ་མོ་གླང་གི་ལོའི་ཆོ་འཕྲུལ་ཟླ་བར་ཕྱོགས་བཅུའི་སངས་རྒྱས་ཐམས་ཅད་ལས་འོད་ཟེར་འཕྲོས་ཏེ་རང་ལ་ཐིམ་པ་སོགས་རྨི་ལྟས་ཁྱད་པར་བ་བཞི་བྱུང་བས་ཤིན་ཏུ་དགའ་སྟེ། ཕྱོགས་བཞིར་གདོང་ཕྱོགས་ནས་སངས་རྒྱས་ཐམས་ཅད་བསྐུལ་བ། གསུང་གི་མངའ་བདག་ཐམས་ཅད་ཀྱིས། །རྩོལ་བའི་ཐེག་པ་མཐར་བཏོན་ནས། །རྩོལ་མེད་ཐེག་པ་མི་གསུང་པར། །ཐུགས་རྗེ་ཆེན་པོ་ཡལ་ལམ་ཅི། །སྐལ་ལྡན་གདུལ་བྱ་མཆིས་པ་ན། །ལྷུན་གྱིས་གྲུབ་པ་གསུང་དུ་གསོལ། །ཞེས་གསོལ་བ་བཏབ་པས་ཕྱོགས་བཅུའི་སངས་རྒྱས་ཐམས་ཅད་དང་རིགས་ལྔའི་སངས་རྒྱས་རྣམས་ཀྱིས་དཔལ་རྡོ་རྗེ་སེམས་དཔའ་ལ་བྱིན་གྱིས་བརླབས་ཤིང་ཚིགས་སུ་བཅད་པ་རྩོལ་མེད་ཀྱི་ཐེག་པ་སྣང་བར་བྱ་བའི་དུས་ལ་བབ་པར་བསྐུལ་བས། རྡོ་རྗེ་སེམས་དཔའི་ཞལ་ནས། རྡོ་རྗེ་སེམས་དཔའ་ནམ་མཁའ་ཆེ། །ཚིག་གི་སྤྱོད་ཡུལ་མ་ཡིན་པས། །བདག་གིས་བགྲོ་བ་ཤིན་ཏུ་དཀའ། །མ་རྟོགས་པ་ལ་ཚིག་སྒོ་ནས། །མཚོན་ནས་རྟོགས་པར་བྱ་བའི་ཕྱིར། །ཅི་རིགས་པ་ནི་རྣམ་པར་བགྲོ། །ཞེས་ཞལ་གྱིས་བཞེས་ནས་སུམ་ཅུ་རྩ་གསུམ་གྱི་གནས་རྣམ་པར་རྒྱལ་བའི་ཁང་བཟང་གི་དབུ་རྩེ་སྲོག་ཤིང་རྡོ་རྗེ་རྩེ་དགུ་པ་དང་བཅས་པའི་གནས་སུ་བྱོན་ནས། ལྷའི་བུ་སེམས་ལྷག་ཅན་ལ་ཐོག་མར་རྒྱལ་ཐབས་སྤྱི་བླུགས་ཀྱི་དབང་བསྐུར་ཏེ་མན་ངག་གི་ལུང་བཅུ་ཕོག ལྷུན་གྲུབ་གསུམ་གྱི་དབང་བསྐུར་ནས་སྐུ་གསུམ་ཐུག་ཕྲད་ཀྱི་གདམས་པ་བྱིན། ཐིག་ལེ་ཆེན་པོའི་དབང་བསྐུར་ནས་སེམས་ཉིད་འགྱུར་མེད་ཀྱི་མན་ངག་བྱིན། མི་འགྱུར་བརྟན་པའི་དབང་བསྐུར་ནས་སྤྱོད་ལམ་རིག་པའི་མན་ངག་བྱིན། གཉིས་མེད་འདྲེས་པའི་དབང་བསྐུར་ནས་ཕྱག་རྒྱ་ཆེན་པོའི་མན་ངག་བྱིན། གཞན་ཡང་དབང་དང་མན་ངག་གི་རྒྱུད་སྡེ་མང་པོ་དུས་མཐའི་སྐད་ཅིག་ལ་རྫོགས་པར་བྱིན་ནས་རྒྱལ་ཚབ་ཏུ་མངའ་གསོལ་བ་སྟེ། ཇི་སྐད་དུ། རྨད་བྱུང་བསྟན་པའི་སྙིང་པོ་འདི། །ལྷ་གནས་གསུམ་དུ་གྲགས་གྱུར་ནས། །ཡང་སྤྲུལ་གང་ཟག་ཐུགས་སྲས་ཀྱིས། །འཛམ་གླིང་དབུས་སུ་རྒྱས་པར་བྱོས། །ཞེས་སོ། །

༢ མི་དང་མི་མ་ཡིན་གཉིས་ཀ་ལས་བྱུང་བ།

གཉིས་པ་རིག་འཛིན་མི་དང་མི་མ་ཡིན་པ་གཉིས་ཀ་ལས་བརྒྱུད་ཚུལ་ནི། ཇི་སྐད་དུ། དགོངས་པ་ལུང་སྟོན་པའི་མདོ་ལས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པ་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ལས་མི་འཚོལ་བའི། །ངེས་པའི་ཐེག་པ་ཅིས་མི་གསུང་། །ཞེས་ཞུས་པའི་ལན་དུ། རྒྱུ་ལ་མོས་པར་རྒྱུའི་ཆོས་ཀྱི། །འཁོར་ལོ་རབ་ཏུ་བསྐོར་ནས་ནི། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་གསུངས་པ་བཞིན། སྟོན་པ་ཤཱཀྱ་ཐུབ་པ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་འདས་པ་ན་ལྷ་གྲགས་ལྡན་མཆོག་སྐྱོང་དང་། ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། མིའི་རིག་འཛིན་ལི་ཙ་བཱི་དྲི་མེད་གྲགས་པ་སྟེ་དམ་པའི་རིགས་ཅན་དྲྭ་མ་ལྔ་པོས་འཇིག་རྟེན་མགོན་པོ་མྱ་ངན་ལས་འདས་པ་མངོན་པར་ཤེས་པས་ཤེས་ནས་ནང་དུ་ཡང་དག་པར་འཇོག་པ་ལས་ལངས་ཏེ་རྫུ་འཕྲུལ་གྱིས་རི་མཱ་ལ་ཡའི་རྩེ་མོར་འདུས་ཏེ། ཀྱེ་མ་ཧོ་ཀྱེ་མ་འཇིག་རྟེན་ཀློང་། །སྟོན་པ་སྒྲོན་མེའི་འོད་ནུབ་ཚེ། །འཇིག་རྟེན་མུན་པ་གང་གིས་བསལ། །ཞེས་སོགས་གདུང་ཚིག་ཉེར་གསུམ་བཏོན་ཅིང་མཆི་མ་ཕྱུང་བ་ན། །དེའི་ཚེ་གསང་བའི་བདག་པོ་སངས་རྒྱས་ཀྱི་གསང་སྔགས་སྟོན་པར་དབང་བསྐུར་བ་བརྙེས་པའི་ཕྱིར་མངོན་སུམ་དུ་སྣང་བར་མཛད་པ་སྟེ། ཇི་སྐད་དུ། སེམས་ཀྱི་དཀྱིལ་འཁོར་མེ་ལོང་བཞིན། །བསྟན་པ་དེ་ལྟར་བདག་གིས་ཀྱང་། །སྐུལ་བའི་དུས་ནི་གང་བྱུང་བར། །བདག་ཀྱང་དེ་བཞིན་ཆོ་འཕྲུལ་སྣང་། །ཞེས་གསུངས་ནས་རིགས་ཅན་ལྔ་དང་གཞན་ཡང་རིག་པ་འཛིན་པའི་དགེ་འདུན་ཕལ་མོ་ཆེ་ལ་སྔོན་སྟོན་པས་འོག་མིན་སོགས་སུ་གསང་སྔགས་ཀྱི་ཆོས་བསྟན་པ་རྣམས་སླར་ཡང་བཟླས་ཏེ་སྟོན་པར་མཛད་ཅིང་། དེ་རྣམས་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻ་ཌཱུཪྱ་ཞུན་མས་ཡི་གེར་བྲིས་ཏེ་དགོངས་པའི་རྩལ་བདུན་གྱིས་ནམ་མཁའ་ལ་མི་མངོན་པར་རྒྱས་བཏབ་སྟེ་སྦས་པ་སྟེ། ཇི་སྐད་དུ། གཞི་རྒྱུད་དགོངས་སྣོད་གནས་བསྲུང་བདག་བརྒྱུད་འཛིན། །ཞེས་པས། གསེར་གྱི་བྱང་བུ་ལ་འབྲི་གཞི་ཕུན་སུམ་ཚོགས་པར་དགོངས་པ། བཻ་ཌཱུཪྱ་ཞུན་མས་བྲིས་པ་རྒྱུ་ཕུན་སུམ་ཚོགས་པ་ལ་དགོངས་པ། རིན་པོ་ཆེའི་སྒྲོམ་བུ་སྣོད་ངོ་མཚར་བར་དགོངས་པ། ནམ་མཁའ་འབྱུང་བཞིས་མི་འཇིག་པས་གཏེར་གནས་དམ་པར་དགོངས་པ། མ་དང་མཁའ་འགྲོ་ཡེ་ཤེས་ཀྱི་སྤྱན་དང་ལྡན་པས་གཏེར་སྲུང་ཁྱད་པར་ཅན་དུ་དགོངས་པ། ཆོས་བདག་རྒྱལ་པོ་ཛ་ལས་ཅན་དབང་པོ་ཡང་རབ་རྟོགས་གྲོལ་དུས་མཉམ་ལ་དགོངས་པ། སྐྱེ་འཕགས་བྱང་སེམས་ས་ལ་གནས་པ་སོགས་གྲུབ་བརྙེས་བརྒྱུད་འཛིན་ལ་དགོངས་པ་སྟེ་དགོངས་པའི་རྩལ་བདུན་གྱིས་ནམ་མཁའ་ལ་སྦས་སོ། །དེ་ལྟར་ལངྐའི་ཡུལ་ན་ཡོད་པའི་རི་མཱ་ལ་ཡ་ནི། ཇི་སྐད་དུ། རྩེ་ན་རྩལ་གྱི་རྒྱལ་པོ་གནས། །ངོས་ལ་བྲག་དཀར་ཁྱི་ཚུགས་པ། །སེང་གེ་གནམ་དུ་མཆོང་འདྲས་བརྒྱན། །རྩི་སྨན་རྩ་བརྒྱད་རྩ་བར་འཁྲུངས། །འདུ་བའི་ནད་ཀྱིས་ཡོངས་མི་ཚུགས། །སྤྱི་བོར་ཀ་ལནྟ་ཀ་ནི། །མི་གཉིས་གཅིག་པུར་གནས་པ་ཡི། །མཛོད་ལྡན་དེ་ཡི་ཚང་བཅས་པ། །སྐལ་ལྡན་རྣམས་ཀྱིས་བགྲོད་པར་སླ། །སྐལ་མེད་རྣམས་ནི་ཡོངས་མི་ཐར། །ཞེས་གསུངས་པ་ལྟར་གླིང་གཞན་ལས་ཁྱད་དུ་འཕགས་པའི་ཡོན་ཏན་གྱིས་འབྱོར་ཞིང་། གནས་དེར་སྔོན་བཅོམ་ལྡན་འདས་ལངྐའི་བདག་པོ་སྒྲ་སྒྲོགས་ཀྱི་བུ་མགྲིན་བཅུས་སྤྱན་དྲངས་ཏེ་བྱང་སེམས་བློ་གྲོས་ཆེན་པོས་ཞུས་པ་ལས་ལང་ཀར་གཤེགས་མདོ་གསུངས་ཤིང་། གཞན་ཡང་ཡུལ་དེར་སློབ་དཔོན་ཆེན་མོ་ཀ་ཧ་ན་པ་བྱོན་ནས་བི་ཤྭ་རཱི་པཱི་ཞེས་པའི་སྲིན་མོ་འཁོར་ལྔ་བརྒྱའི་ཚོགས་དང་བཅས་པ་བཏུལ་ནས་སྔགས་ཀྱི་བསྟན་པ་སྤེལ་བར་མཛད། ཕྱིས་སུ་ཐེག་ཆེན་གྱི་སློབ་དཔོན་ལངྐ་རྒྱལ་བ་བཟང་པོ་འཁྲུངས་ལ། སློབ་དཔོན་ཙནྡྲ་གོ་མི་ཡང་ཡུལ་དེར་བྱོན། ཤཱནྟི་པ་དང་པཎ་ཆེན་ནགས་ཀྱི་རིན་ཆེན་ཡང་བྱོན་ནས་མདོ་སྔགས་ཀྱི་བསྟན་པ་རྒྱ་ཆེར་སྤེལ་བར་མཛད་ཅིང་། དེང་སང་ཡང་ཐེག་དམན་ཉན་ཐོས་པའི་བསྟན་པ་དར་རྒྱས་སུ་བཞུགས་ཤིང་ཡོངས་གྲགས་སུ་རྒྱལ་ཁབ་ཀྱི་མིང་ལ་ཤྲཱི་ལངྐ་ཞེས་འབོད་དོ། །

གསུམ། གང་ཟག་སྙན་ཁུང་གི་བརྒྱུད་པ།

༡ དཔལ་མ་ཧཱ་ཡོ་གའི་བརྒྱུད་ཚུལ།

ཀ རྩ་བར་གྱུར་པ་རྒྱུད་སྡེའི་བརྒྱུད་ཚུལ།

གསུམ་པ་གང་ཟག་སྙན་ཁུང་གི་བརྒྱུད་པ་ལ་གསུམ་ལས། དང་པོ་དཔལ་མ་ཧཱ་ཡོ་གའི་བརྒྱུད་ཚུལ་ནི། དེ་ཡང་མ་ཧཱ་ཡོ་ག་ལའང་རྩ་བར་གྱུར་པ་རྒྱུད་སྡེ་དང་། ཟབ་པ་སྒྲུབ་སྡེ་གཉིས་སུ་ཡོད་པ་ལས། སྔ་མ་ཏནྟྲ་ཆེན་མོ་སྡེ་བཅོ་བརྒྱད་ནི། སྐུ་ཡི་རྒྱུད་སངས་རྒྱས་མཉམ་སྦྱོར། གསུང་གི་རྒྱུད་ཟླ་གསང་ཐིག་ལེ། ཐུགས་ཀྱི་རྒྱུད་གསང་བ་འདུས་པ། ཡོན་ཏན་གྱི་རྒྱུད་དཔལ་མཆོག་དང་པོ། ཕྲིན་ལས་ཀྱི་རྒྱུད་ཀརྨ་མ་ལེ་སྟེ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་གཞི་དང་རྩ་བར་གྱུར་བའི་རྒྱུད་སྡེ་ཆེན་མོ་ལྔ་དང་། ཧེ་རུ་ཀ་རོལ་བའི་རྒྱུད། རྟ་མཆོག་རོལ་བའི་རྒྱུད། སྙིང་རྗེ་རོལ་བའི་རྒྱུད། བདུད་རྩི་རོལ་བའི་རྒྱུད། ཕུར་བ་བཅུ་གཉིས་པ་འབྱུང་བའི་རྒྱུད་བཅས་སྒྲུབ་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ། རི་བོ་བརྩེགས་པ། ཡེ་ཤེས་རྔམས་གློག དམ་ཚིག་བཀོད་པ། ཏིང་འཛིན་རྩེ་གཅིག གླང་ཆེན་རབ་འབོག་གི་རྒྱུད་བཅས་སྤྱོད་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ། དཀྱིལ་འཁོར་གྱི་ཡན་ལག་ཏུ་གྱུར་པ་རྣམ་སྣང་སྒྱུ་འཕྲུལ་དྲྭ་བ་དང་། དངོས་གྲུབ་སྒྲུབ་པའི་ཆ་རྐྱེན་ཆོ་གའི་ཡན་ལག་ཏུ་གྱུར་པ་འཕགས་པ་ཐབས་ཀྱི་ཞགས་པ་པད་མོ་ཕྲེང་བའི་དོན་བསྡུས་ཏེ་མ་ཚང་བ་ཁ་སྐོང་གི་རྒྱུད་ཕྱི་མ་གཉིས། ཐམས་ཅད་ཀྱི་བསྡུས་དོན་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་དཔལ་གསང་བའི་སྙིང་པོ་སྟེ་བཅོ་བརྒྱད་དུ་མཁས་པ་ཕལ་མོ་ཆེས་བཞེད་ཅིང་། དེ་དག་ནང་གསེས་སུ་དབྱེ་ན་རྩ་རྒྱུད་གསང་བ་སྙིང་པོ། རོལ་བ་མངོན་པར་བརྗོད་པ་ལྷ་མོ་སྒྱུ་འཕྲུལ། དཀྱིལ་འཁོར་སྟོན་པ་སྒྱུ་འཕྲུལ་བརྒྱད་པ། ཕྲིན་ལས་སྟོན་པ་སྒྱུ་འཕྲུལ་བཞི་བཅུ་པ། དབང་གཙོ་བོར་སྟོན་པ་སྒྱུ་འཕྲུལ་བླ་མ། ཡོན་ཏན་མཐར་ཕྱིན་པ་སྟོན་པ་སྒྱུ་འཕྲུལ་བརྒྱད་ཅུ་པ། སྡེ་སྣོད་ཡོངས་ལ་ཁྱབ་པར་སྟོན་པ་སྒྱུ་འཕྲུལ་དྲྭ་བ་ཆེན་པོ། དམ་ཚིག་གཙོ་བོར་སྟོན་པ་སྒྱུ་འཕྲུལ་ལེ་ལག་སྟེ་སྒྱུ་འཕྲུལ་སྡེ་བརྒྱད། གྲོལ་ལམ་སྟོན་པ་ཡེ་ཤེས་སྙིང་པོ། ཅིག་ཆར་སྟོན་པ་རྡོ་རྗེ་མེ་ལོང་། ཐབས་ལམ་རིམ་གྱིས་སྟོན་པ་རྡོ་རྗེ་ཐལ་པ། ཅིག་ཆར་སྟོན་པ་རྡོ་རྗེ་རྒྱ་མཚོ་སྟེ་བཤད་རྒྱུད་སྡེ་བཞི་ཞེས་གྲགས་ལ། དེ་ཡང་གསང་བའི་བདག་པོ་ལག་ན་རྡོ་རྗེས་རི་མ་ལ་ཡ་དྲག་ཤུལ་ཅན་གྱི་རྩེ་མོར་དམ་པའི་རིགས་ཅན་དྲྭ་མ་ལྔ་ལ་གསང་སྔགས་ཀྱི་ཆོས་འཁོར་བསྐོར་བའི་ཚེ། ས་ཧོ་རའི་རྒྱལ་པོ་ཛ་གསང་སྔགས་ཕྱི་རྒྱུད་ཀྱི་སྒྲུབ་པར་བཞུགས་པ་ལ་རྨི་ལྟས་ངོ་མཚར་བ་བདུན་བྱུང་སྟེ། ཇི་སྐད་དུ། སྐུ་གསུང་ཐུགས་རྟགས་ཐིམ་པ་དང་། །རིན་ཆེན་གླེགས་བམ་བབས་པ་དང་། །ཆོས་ཀྱི་བགྲོ་བ་བྱེད་པ་དང་། །ཀུན་ཀྱིས་དམ་པར་བསྒྲགས་པ་དང་། །མཆོད་པ་ཆེན་པོ་བྱས་པ་དང་། །རིན་ཆེན་ཆར་དུ་བབ་པ་དང་། །སངས་རྒྱས་ས་ལ་ལུང་བསྟན་པའོ། །ཞེས་སོ། །དེ་ལ་རྒྱལ་པོ་ཛ་ནི་སྟོན་པས་མདོ་རྒྱུད་ཐམས་ཅད་ནས་ལུང་བསྟན་པའི་སྐྱེས་བུ་སྟེ། བདེ་མཆོག་སྡོམ་བྱུང་གི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་གྲངས་བརྒྱ་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །རྒྱལ་པོ་ཛ་ཞེས་བྱ་བ་ལ། །བསོད་ནམས་ཆེན་པོའི་མཐུས་སྣང་བའི། །གསང་བའི་བདག་པོ་སྣང་བར་འགྱུར། །ཞེས་པ་དང་། དེ་དང་མཚུངས་པར་སྤྱི་མདོ་དགོངས་འདུས་ལས་ཀྱང་འབྱུང་ལ། རྒྱལ་པོ་ཛ་དེ་གང་ཡིན་ངོས་འཛིན་ཚུལ་སྣ་ཚོགས་སྣང་ཡང་སློབ་དཔོན་ཀུ་ཀུ་ར་ཛ་དང་དུས་མཚུངས་པས་ཨིནྡྲ་བྷུ་ཏི་བར་པ་ལ་བྱེད་དགོས་པ་འདྲ་ཞེས་སྔོན་གྱི་ལོ་རྒྱུས་སྨྲ་བ་སོགས་བཞེད། གང་ལྟར་རྒྱལ་པོ་དེ་ཉིད་རྒྱུད་སྡེ་འོག་མའི་རྣལ་འབྱོར་སྒོམ་ཞིང་བཞུགས་པའི་ཚེ་སྔར་གྱི་རྨི་ལྟས་དང་མཐུན་པར་རྒྱུད་སྡེའི་གླེགས་བམ་རྣམས་མི་ཡུལ་དུ་དངོས་སུ་བབ་པ་སྟེ། ཀྲི་ཡའི་རྒྱུད་རྣམས་ཝཱ་ར་ཎ་སིར་བབ། ཨུ་པ་ཡའི་རྒྱུད་རྣམས་རི་བོ་བྱ་རྐང་ཅན་དང་བསིལ་བའི་ཚལ་དུ་བབ། ཡོ་གའི་རྒྱུད་དུར་ཁྲོད་མེ་རི་འབར་བའི་རྩེར་བབ། མ་ཧཱ་ཡོ་གའི་རྒྱུད་ཏནྟྲ་ཆེན་པོ་སྡེ་བཅོ་བརྒྱད་ཀྱི་གླེགས་བམ་དང་གསང་བའི་བདག་པོའི་སྐུ་ཁྲུ་གང་བ་གཅིག་བཅས་རྒྱལ་པོ་ཛ་ཉིད་ཀྱི་ཁང་སྟེང་དུ་བབ། ཨ་ནུ་ཡོ་གའི་རྒྱུད་རྣམས་ལངྐའི་གླིང་གི་རི་བོ་མ་ལ་ཡར་གླེགས་བམ་དང་བཅས་ཏེ་ཆར་བབ་པར་གྱུར་ཏོ། །དེ་ནས་གསོལ་བ་བཏབ་པས་རྡོ་རྗེ་སེམས་དཔའ་ཞལ་མཐོང་གི་ལེའུ་རྟོགས་ཤིང་དེ་དང་ཕྱག་ན་རྡོ་རྗེའི་སྐུ་ལ་བརྟེན་ནས་ཟླ་བ་བདུན་ལ་བསྒྲུབས་པས། རྡོ་རྗེ་སེམས་དཔའི་ཞལ་དངོས་སུ་མཐོང་ཞིང་ཡེ་ཤེས་ཀྱི་དབང་བསྐུར་བ་ཐོབ་པས་གླེགས་བམ་གྱི་དོན་མ་ལུས་པ་མཁྱེན་པར་གསུངས་ཏེ། ཉིད་ཀྱིས་མཛད་པའི་སྒྱུ་འཕྲུལ་ལམ་རྣམ་བཀོད་ལས། ཤར་ཕྱོགས་ཨིནྡྲའི་ལུང་པ་ནས། །རྒྱ་ལུང་རྡོ་རྗེ་བརྩེགས་པ་རུ། །རིགས་ཅན་ཨིནྡྲ་བྷུ་ཏི་ངས། །གསང་བའི་བདག་པོས་མངོན་བསྟེན་པའི། །སྒྱུ་འཕྲུལ་དྲྭ་བའི་སྒྲུབ་པ་ཡང་། །ཚོམ་བུ་ལྔ་བཅུ་སྟོང་དང་བཅས། །ཕྱག་ན་རྡོ་རྗེ་མངོན་གྲུབ་སྟེ། །སྤང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུལ་ནས་སྡིག་པ་མེད། །དེ་ནས་ས་ལ་རེག་པར་བྱས། །ཞེས་གསུངས། ལོ་རྒྱུས་འགའ་ཞིག་ཏུ་རྒྱལ་པོས་རྒྱུད་དོན་མ་ལུས་པ་མཁྱེན་པར་གྱུར་ཀྱང་ཕྱི་རབས་ཀྱི་གདུལ་བྱ་ལ་དགོངས་ནས་སློབ་དཔོན་ལ་མ་བསྟེན་པར་མི་རྟོགས་པའི་ཚུལ་གྱིས་སློབ་དཔོན་ཨུ་པ་རཱ་ཛ་ལ་བསྟེན་པས་བརྡ་དང་དོན་མ་མཇལ། དེ་ནས་ཟ་ཧོར་གྱི་ཡུལ་ན་མཁྱེན་པ་ཆེ་བར་གྲགས་པའི་སློབ་དཔོན་ཀུ་ཀུ་རཱ་ཛ་ལ་བསྟེན་པས་དེས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྡོར་སེམས་ལེའུ་རྟོགས་ཏེ་བསྒྲུབས་པས་རྡོ་རྗེ་སེམས་དཔས་ཞལ་བསྟན་ནས་རྒྱུད་དོན་ཡོངས་སུ་རྫོགས་པ་གསང་བདག་གིས་སྟོན་པ་འགྱུར་རོ་ཞེས་ལུང་བསྟན། དེ་ལྟར་སྒྲུབ་པ་མཛད་པས་གསང་བདག་དངོས་སུ་བྱོན་ཏེ་དོན་གྱི་བསྟན་པ་དང་ཐེག་པ་ཐམས་ཅད་རྫོགས་པའི་དབང་བསྐུར་ཞིང་ཚིག་གི་བརྒྱུད་པ་ལི་ཙ་བཱི་དྲི་མེད་གྲགས་པ་ལས་ཞུས་ཤིག་ཅེས་ལུང་བྱིན། སློབ་དཔོན་གྱིས་གསང་བདག་གི་བཀའ་ལྟར་རྒྱུད་སྡེ་ཆེན་པོ་བཅོ་བརྒྱད་དུ་ཕྱེས་ནས་རྒྱལ་པོ་ཛ་ལ་བསྟན་པར་མཛད་དོ་ཞེས་བྱུང་ངོ་། །རྒྱལ་པོ་འདིས་སྒྱུ་འཕྲུལ་ལམ་རྣམ་བཀོད་དང་། རིམ་པ་གཉིས་པ་ལ་སོགས་པ་མཛད་ཅིང་། གཞན་ཡང་བླ་མེད་ཀྱི་བསྟན་བཅོས་བདེ་མཆོག་རྩ་རྒྱུད་ཀྱི་འགྲེལ་པ་དང་། ཡེ་ཤེས་གྲུབ་པ། ལྷན་གཅིག་སྐྱེས་གྲུབ་སོགས་ཀྱང་མཛད། འཕགས་ཡུལ་གྱི་གྲུབ་ཆེན་རྣམས་ཀྱི་རྒྱུད་དང་གདམས་ངག་ཅི་རིགས་པ་ལས་ཕལ་ཆེར་རྒྱལ་པོའི་རིགས་ཀྱི་སློབ་དཔོན་འདི་ཉིད་ལས་བྱུང་བ་ཤས་ཆེ་སྟེ། གྲུབ་ཐོབ་བྱིས་པའི་ཞབས་སམ་ཛ་ལནྡྷ་རི་པ་ནས་ནག་པོ་པ་སློབ་ཚོགས་དང་བཅས་པ། དེ་བཞིན་ཏིལླི་པ་དང་ནཱ་རོ་པ་སློབ་ཚོགས་དང་བཅས་པ་ཐམས་ཅད་ཀྱང་བརྒྱུད་པའི་བཀའ་སྲོལ་འདི་ཉིད་ལས་བྱུང་བར་གྲགས་སོ། །

རྒྱལ་པོ་ཨིནྡྲ་བྷུ་ཏི་ཆེན་པོས་ཏནྟྲའི་རྒྱུད་སྡེ་རྣམས་སློབ་དཔོན་ཀུ་ཀུ་རཱ་ཛ་སྟེ་ཁྱིའི་རྒྱལ་པོ་ལ་བཤད་དེ། སློབ་དཔོན་འདི་ནི་ལོ་རྒྱུས་འགའ་ཞིག་ཏུ་ཀུ་ཏ་རཱ་ཛ་ཞེས་ཀྱང་འབྱུང་སྟེ་ཉིན་མོ་ཁྱིའི་རྣམ་པ་ཅན་གྱི་དཔའ་བོ་དང་རྣལ་འབྱོར་མ་སྟོང་ཕྲག་རེ་ལ་ཆོས་སྟོན་ཅིང་། མཚན་མོ་དེ་དག་དང་ལྷན་དུ་དུར་ཁྲོད་ཀྱི་གནས་སུ་གཤེགས་ནས་ཚོགས་ཀྱི་འཁོར་ལོ་ལ་སོགས་པ་དམ་ཚིག་གི་ཀུན་ཏུ་སྤྱོད་པ་ལ་གནས་ཤིང་། དེ་ལྟར་ལོ་བཅུ་གཉིས་སུ་སྤྱད་པས་མཐར་ཕྱག་རྒྱ་ཆེན་པོའི་དངོས་གྲུབ་བརྙེས་པ་ཡིན་ལ། ཡང་ཁ་ཅིག་གིས་སློབ་དཔོན་འདི་སྤྱོད་པར་གནས་པའི་ཚེ་ཨོ་རྒྱན་གྱི་ཡུལ་དུ་བྱོན་ནས་སླར་ཡང་རྒྱུད་སྡེ་ཆེན་པོ་བཅོ་བརྒྱད་ཀྱི་ནང་ནས་སངས་རྒྱས་མཉམ་སྦྱོར་ལ་སོགས་པའི་ནང་རྒྱུད་སྡེ་ལྔ་རྒྱ་ཆེར་བཤད་ཅིང་མཐར་ཟླ་གསང་ཐིག་ལེ་ལ་བརྟེན་ནས་མཆོག་གི་དངོས་གྲུབ་བརྙེས་པ་ཡིན་ནོ་ཞེས་ཀྱང་ཟེར། སློབ་དཔོན་འདི་ཉིད་ཀྱིས་མཉམ་སྦྱོར་ལ་རྩལ་དུ་བཏོན་ཞིང་། གསང་དོན་རྣམ་པར་དགོད་པ་དྲུག་དང་། དཀྱིལ་འཁོར་ཐམས་ཅད་ཀྱི་རྗེས་སུ་འཇུག་པའི་ཆོ་ག་ལྔ་པ་སོགས་བསྟན་བཅོས་དུ་མ་མཛད་དོ། །

སློབ་དཔོན་འདིས་ཤཱ་ཀྲ་པུ་ཏྲིའམ་ཨིནྡྲ་བྷུ་ཏི་ཆུང་བ་ལ་བཤད་པ་སྟེ། སློབ་དཔོན་འདི་ཉིད་ནི་ཕྱིས་སུ་གྲུབ་པ་བརྙེས་པའི་ཚེ་སློབ་དཔོན་ལྭ་བ་པར་གྲགས་པ་སྟེ། གསང་སྔགས་ཀྱི་སྒྲུབ་པ་ལ་བཞུགས་པའི་ཚེ་ཨོ་རྒྱན་ཡུལ་གྱི་མུ་སྟེགས་ཀྱི་མཁའ་འགྲོ་མ་རྣམས་ཀྱིས་མེ་ཏོག་གི་ཕྲེང་བ་གཏད་པ་ལག་ཏུ་བླངས་པས། ནང་པའི་མཁའ་འགྲོ་མ་རྣམས་ཀྱིས་བུ་ད་ནི་མ་ལེགས་ཀྱི་མུ་སྟེགས་ཀྱི་རྗེས་སུ་འཇུག་དགོས་པར་འགྱུར་རོ་ཟེར། དེར་སློབ་དཔོན་གྱིས་ཏིང་ངེ་འཛིན་བསྒོམས་ཤིང་བཞུགས་པས་ནམ་ཕྱེད་ཙམ་ན་མུ་སྟེགས་པའི་མཁའ་འགྲོ་རྣམས་ཀྱིས་རྡོ་ཆར་ཕབ་པ་བསྐྱེད་རིམ་གྱི་སྲུང་འཁོར་བསྒོམས་པས་མཚམས་ཚུན་ལ་མ་གནོད། ཡང་དུ་བསྐྱེད་རིམ་གྱི་ཕན་ཡོན་དེ་འདྲ་ན་རྫོགས་རིམ་གྱི་ནུས་པ་བསྟན་པར་བྱའོ་དགོངས་ནས་མཚན་མ་མེད་པའི་ཏིང་ངེ་འཛིན་ལ་གནས་པས་རྡོ་ཐམས་ཅད་ནམ་མཁའ་ལ་ཆགས་པ་དེང་སང་ཡང་སྒྲུབ་ཕུག་འདིའི་སྟེང་གི་ནམ་མཁའ་ལ་ཕ་ཝང་ཆེན་པོ་རྟེན་མེད་དུ་ཡོད་པ་དང་། བྲག་མེ་ལོང་ལྟར་འཇམ་པའི་ངོས་ལ་ཕ་ཝང་མང་པོ་ཆགས་པ་མངོན་སུམ་གྱི་སྤྱོད་ཡུལ་དུ་ཡོད་པར་གྲགས། ཡང་ལན་གཅིག་རྒྱལ་པོའི་ཕོ་བྲང་གི་སྒོ་དྲུང་དུ་ལོ་བཅུ་གཉིས་སུ་འོད་གསལ་ཐུན་གཅིག་གི་ངང་དུ་གཟིམས་པའི་ཚེ་སུ་ཞིག་སློབ་དཔོན་ལ་ཕྱག་མ་བྱས་པར་ཕྱིན་ན་བྱིན་པ་རེངས་འགྲོ་བ་བྱུང་བས་ཐམས་ཅད་ཀྱི་ཕྱག་བྱེད་དགོས་པ་བྱུང་། སྐབས་ཤིག་ཨོ་རྒྱན་གྱི་ཕྲ་མེན་ལྔ་བརྒྱས་བར་ཆད་བརྩམས་པར་འདོད་པ་ན་སློབ་དཔོན་གྱི་ཤུལ་དུ་ལྭ་བ་ཞིག་ལས་ཅི་ཡང་མི་འདུག ཀྱེ་མ་ནང་པའི་དགེ་སློང་འདིའི་སྒྱུ་མ་ལ་ལྟོས་རང་གི་ལུས་ལྭ་བར་བསྒྱུར་ནས་འདུག་ན་འདི་དུམ་བུར་བྱའོ་ཟེར་ནས་བགོས་ཏེ་ཟོས་སོ། །དེར་སློབ་དཔོན་གྱིས་ལུས་སྣང་བར་བྱས་ཏེ་དམོད་པ་བོར་བས་ཕྲ་མེན་ལྔ་བརྒྱ་པོ་ཐམས་ཅད་ལུག་མ་མོ་ལྔ་བརྒྱར་གྱུར། དེ་རྣམས་རྒྱལ་པོའི་དྲུང་དུ་ཕྱིན་ཏེ་དགེ་སློང་དུར་ཁྲོད་བདག་པོས་ངེད་ཅག་རྣམས་འདི་ལྟར་བྱས་པས་ལྷས་དགྲོལ་བའི་ཐབས་འཚལ་ལོ་ཞེས་ཟེར། རྒྱལ་པོས་སློབ་དཔོན་ལ་གསོལ་བས་སྐུ་གཅེར་བུར་བཞེངས་ཏེ་ཁྱོད་ཀྱི་སྔགས་འཆང་མ་རྣམས་ཀྱིས་དགེ་སློང་ལ་ནོར་ལྭ་བ་ཞིག་ཡོད་པ་ཟོས་པས་དེ་དག་ཁུག་ཅིག་གསུངས། དེེར་ཐམས་ཅད་བཀུག་པ་རེ་རེ་ལ་སྡིགས་མཛུབ་རེ་བསྟན་པས་མགོ་བརྙན་སྣ་ཚོགས་སུ་གྱུར་ནས་ལྭ་བའི་དུམ་བུ་སོ་སོར་བསྐྱུགས་པ་ཚེམ་བུ་བྱས་པས་ཅུང་ཟད་མ་འགྲིགས། ད་དུང་གསུམ་ཡོད་པ་ཁུག་ཅིག་གསུངས་པས། བཙུན་མོའི་འཁོར་གྱི་ནང་ན་གསུམ་ཡོད་པའང་བཀུག་ནས་སྔར་བཞིན་སྐྱུགས་སུ་བཅུག་པས་འགྲིགས་ནས་སྐུ་ལ་གསོལ་བས་རྗེ་བཙུན་ལྭ་བ་པར་གྲགས། དེ་བཞིན་སློབ་དཔོན་རོལ་བའི་རྡོ་རྗེ་ཐུན་མོང་གི་དངོས་གྲུབ་ཐོབ་པའི་སྐབས་ཤིག་ཨོ་རྒྱན་གྱི་ཡུལ་དུ་སློབ་དཔོན་འདི་དང་ལྷན་ཅིག་པར་བྱོན་པས་མུཎྜ་ཀ་ལར་རྫུ་འཕྲུལ་འགྲན་པའི་ལོ་རྒྱུས་སོགས་གྲུབ་པ་ཐོབ་པའི་རྟགས་སྐྱེ་བོ་རྣམས་ལ་བསྟན་པའི་ལོ་རྒྱུས་ཤིན་ཏུ་མང་། ཕྱིས་ཨོ་རྒྱན་གྱི་ཡུལ་དུ་རྒྱལ་པོ་དང་སློབ་དཔོན་གཉིས་ཆར་གྱིས་གདམས་པ་བསྟན་པས་ཐམས་ཅད་རིག་པ་འཛིན་པའི་ས་ལ་གཤེགས་པས་ཡུལ་སྟོང་བར་ཉེ་བར་གྱུར་སྐད་དོ། །

དེས་སེང་ཧ་རཱ་ཛ་ལ་བཤད་པས་འཁོར་ཚོམ་བུ་སྟོང་དང་བཅས་པ་རྡོ་རྗེ་འཆང་གི་སར་གཤེགས། དེས་ཨུ་པ་རཱ་ཛ་ལ་བཤད་དེ་འཁོར་ཚོམ་བུ་བརྒྱ་དང་། དེས་སྲས་མོ་གོ་མ་དེ་བཱི་ལ་བཤད་པས་འཁོར་ཚོམ་བུ་ལྔ་བཅུ་དང་བཅས་ཀུན་ཀྱང་ཟུང་འཇུག་རྡོ་རྗེ་འཆང་གི་སར་གཤེགས་པ་སྟེ། ལམ་རིམ་ལས། གསང་བའི་བདག་པོ་མངོན་གཤེགས་ནས། །ལྷ་ཀླུ་གནོད་སྦྱིན་སྲིན་པོ་དང་། །མི་ལས་སྐལ་ལྡན་འདུས་པ་ལ། །དབང་པོའི་ཇི་ལྟར་ལུང་བསྟན་དུས། །རྒྱལ་བུ་རིགས་ཅན་ལྟས་ཤར་བ། །འབྲེལ་བས་སྣང་བ་མངོན་བརྟགས་པས། །ཐུགས་ཀྱི་སྒྲུབ་པ་མངོན་རྟོགས་ཏེ། །དེ་ཉིད་སྒོ་ནས་དེ་ཉིད་བསྒྲུབས། །བསྟན་པའི་དངོས་གྲུབ་དེ་ནས་ཐོབ། །དོན་དམ་བཅུད་ཀྱིས་དེ་ནས་རྒྱས། །འདོད་པའི་བསམ་པ་དེ་ནས་འགྲུབ། །སྨོན་པའི་ལྷ་དང་དེ་རུ་མཇལ། །དེ་ནས་རྡོ་རྗེ་གདན་སྟེང་གི །འཛམ་གླིང་ཤར་གྱི་ཕྱོགས་མཚམས་སུ། །ཕོ་བྲང་རིན་ཆེན་དམ་པ་དེར། །བཀྲ་ཤིས་པ་ཡི་ལྷ་ཁང་དུ། །ཀུ་ཀུ་རཱ་ཛ་ཨིནྡྲ་བོ། །སིངྷ་ཨུ་པ་རཱ་ཛ་དང་། །སྲས་མོ་གོ་མ་དེ་བཱི་སོགས། །སྒྱུ་འཕྲུལ་དྲྭ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་བསྒྲུབས་ཏེ། །རྡོ་རྗེ་འཆང་སར་མངོན་དུ་གཤེགས། །ཞེས་གསུངས་སོ། །སྲས་མོ་གོ་མ་དེ་བཱིས་རྒྱལ་པོ་ཀུ་ཀུ་རཱ་ཛ་ལ་བཤད་དེ་འདི་ལ་ཀུ་ཀུ་རཱ་ཛ་ཕྱི་མ་ཞེས་གྲགས། དེས་སློབ་དཔོན་སྒེག་པ་རྡོ་རྗེ་དང་། རོ་ལངས་བདེ་བའི་དངོས་གྲུབ། དྲང་སྲོང་བྷཱ་ཥི་ཏ། ནཱ་ག་རྫུ་ན་བཞི་ལ་བཤད་ཅིང་། སློབ་དཔོན་སྒེག་པ་རྡོ་རྗེ་ནི། ཡུལ་ཥམ་ཥར་ཞེས་པར་སྐུ་འཁྲུངས་ཤིང་ཨོ་རྒྱན་གྱི་གནས་སུ་རབ་ཏུ་བྱུང་བའི་མཚན་ལ་དཔལ་ལྡན་བྱང་ཆུབ་མཆོག་གི་སྐལ་བ་དང་ལྡན་པ་ཞེས་གྲགས། སྡེ་སྣོད་གསུམ་ལ་སྦྱངས་ཤིང་ཐོགས་མེད་ལུགས་ཀྱི་གྲུབ་མཐའ་ལ་ལྷག་པར་དུ་མཁས། ཨོ་རྒྱན་ཡུལ་གྱི་གླིང་ཕྲན་མ་དྷིམ་ཞེས་བྱ་བར་འཇམ་དཔལ་སྒྲུབ་སྐབས་བྲིས་སྐུའི་ཞལ་ནས་འོད་ཟེར་བྱུང་སྟེ་གླིང་དེར་ཡུན་རིང་སྣང་བས་ཉི་མ་དང་འདྲ་བ་ཞེས་བྱ་བར་མཚན་གསོལ། ལྟ་བ་ལོག་པ་ཞིག་བཀྲོང་དུ་འོངས་པ་ན་གླང་པོ་ཆེ་དང་། རྟ་དང་། ཁྱེའུ་དང་། བུ་མོ་དང་། མ་ཧེ་དང་། རྨ་བྱ་སོགས་སྣ་ཚོགས་པའི་གཟུགས་སུ་སྣང་བར་མཛད་པས་སྣ་ཚོགས་གཟུགས་ཅན་ཞེས་མཚན་དུ་གྲགས། སྐུ་ཚེའི་སྨད་དུ་ཨོ་རྒྱན་གྱི་ཡུལ་དུ་འགྲོ་བའི་དོན་རྒྱ་ཆེན་མཛད་པ་དང་། ནཱ་ལེནྡྲར་ཡང་ལོ་བཅུར་བཞུགས་ནས་གསང་སྔགས་ཀྱི་བསྟན་པ་སྤེལ། སློབ་དཔོན་འདི་རྒྱུད་སྡེ་སྤྱི་དང་ཁྱད་པར་སྒྱུ་འཕྲུལ་དྲྭ་བ་ལ་མཁས་ཤིང་གྲུབ་པ་བརྙེས་པས། མཚན་ཡང་དག་པར་བརྗོད་པ་བླ་མེད་ལུགས་སུ་བཀྲལ་བའི་ཊཱི་ཀ་དང་། དགྱེས་པ་རྡོ་རྗེའི་རྫོགས་རིམ་ཐིག་ལེ་ཆེན་པོའི་རིམ་པ། འདུས་པ་ལ་རྒྱུད་ཀྱི་བཤད་པ་བླ་མའི་མན་ངག་གིས་བཤད་པ། ལྷན་སྐྱེས་སྒྲུབ་ཐབས་སོགས་རྒྱུད་གཞན་དང་། གསང་སྙིང་འགྲེལ་པ་རིན་ཆེན་སྤར་ཁབ་དང་། ཐུགས་ཐིག དམ་ཚིག་གསལ་བཀྲ། རིམ་པ་དྲུག་པ། ཕྲ་རྒྱས་སོགས་སྒྱུ་འཕྲུལ་སྐོར་གྱི་བསྟན་བཅོས་མང་དུ་མཛད་ནས་མཐར་རྡོ་རྗེའི་སྐུ་བརྙེས་སོ། །

སྒེག་པས་སངས་རྒྱས་གསང་བ་ལ་བཤད་པ་སྟེ་སློབ་དཔོན་འདི་ཉིད་ནི། རྒྱ་གར་ཡུལ་དབུས་སུ་སྐུ་འཁྲུངས་ཤིང་ནཱ་ལེནྡྲར་རབ་ཏུ་བྱུང་། སྐུ་ཚེའི་སྟོད་དུ་སློབ་དཔོན་སངས་རྒྱས་ཡེ་ཤེས་བླ་མར་བསྟེན། ཝཱ་ར་ཎཱ་སིའི་གནས་ཤིག་ཏུ་འཇམ་དཔལ་བསྒྲུབས་པས་བྲིས་སྐུ་བཞད་ཅིང་དངོས་གྲུབ་ཀྱི་རྫས་བ་དམར་གྱི་མར་ཁུ་ཡང་ཁོལ། མེ་ཏོག་རྙིང་པ་རྣམས་ཀྱང་ཁ་འབུས་པས་གྲུབ་པའི་རྟགས་སུ་མཁྱེན་ཞིང་། ཐོག་མར་མེ་ཏོག་འབུལ་ལམ་མར་ཁུ་གསོལ་སྙམ་པའི་ཐེ་ཚོམ་གྱི་ངང་དུ་ཅུང་ཟད་ལུས་པ་ན་གནོད་སྦྱིན་མོ་ཞིག་གིས་བར་ཆད་བརྩམས་ནས་སློབ་དཔོན་གྱི་འགྲམ་པར་ཐལ་ལྕགས་བསྣུན་པས་ཅུང་ཟད་བརྒྱལ། སངས་ཙ་ན་བྲིས་སྐུ་རྡུལ་གྱིས་གོས། མེ་ཏོག་རྙིང་། མར་ཁུ་ཡང་སར་བོ་བ་གཟིགས། འོན་ཀྱང་རྡུལ་ཕྱིས། མེ་ཏོག་དབུ་ལ་ཕུལ། མར་ཁུ་གང་ཡོད་གསོལ་བས་སྐུ་ལུས་ནད་ཐམས་ཅད་དང་བྲལ་ཏེ་སྟོབས་དང་གཟི་བརྗིད་ལྡན་པ། བློ་ཤིན་ཏུ་རྣོ་ཞིང་མངོན་པར་ཤེས་པ་ལ་དབང་འབྱོར་བ་བྱུང་། དེ་སྐབས་ཨོ་རྒྱན་ཡུལ་དུ་བྱོན་པས་སློབ་དཔོན་སྒེག་པ་རྡོ་རྗེ་དང་མཇལ། རྣལ་འབྱོར་རྒྱུད་དང་བླ་མེད་ནང་རྒྱུད་སྡེ་ལྔ་གསན་ཞིང་ཁྱད་པར་སྒྱུ་འཕྲུལ་ལ་མཁས། དུས་གཞན་ཞིག་ཏུ་སངས་རྒྱས་ཞི་བ་དང་མཉམ་དུ་རི་བོ་ཏ་ལར་འཕགས་པ་སྤྱན་རས་གཟིགས་མཇལ་བར་བྱོན་པས། རིའི་རྩ་བར་འཕགས་མ་སྒྲོལ་མས་ཀླུའི་ཚོགས་ལ་ཆོས་སྟོན་པ་དང་། སྐེད་པར་ཁྲོ་གཉེར་ཅན་མས་ལྷ་མ་ཡིན་དང་གནོད་སྦྱིན་གྱི་ཚོགས་ལ་ཆོས་སྟོན་པ་དང་། རྩེ་མོར་འཕགས་པ་མངོན་སུམ་དུ་བཞུགས་པ་ཡང་རང་རང་གི་སྣང་བ་དང་མཐུན་པར་མཇལ། དེར་སངས་རྒྱས་གསང་བས་ཞབས་ས་ལ་མི་རེག་པ་སོགས་ཀྱི་དངོས་གྲུབ་ཀྱང་བརྙེས། འཕགས་མ་སྒྲོལ་མས་རི་ཁ་བ་ཅན་གྱི་གངས་ཏི་སེར་སོང་ལ་སྒྲུབ་པ་གྱིས་ཞེས་ལུང་བསྟན། ཚུར་སླེབས་ནས་ཝཱ་རཱ་ཎཱ་སི་སོགས་སུ་ལོ་མང་པོར་ཆོས་བཤད། སླར་ཡང་འཕགས་པ་འཇམ་དཔལ་གྱིས་སྔར་སྒྲོལ་མས་ལུང་བསྟན་པ་ལྟར་བསྐུལ་བས། གངས་རི་ཏི་སེར་བྱོན་ནས་སྒྲུབ་པ་མཛད་པས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལན་གྲངས་དུ་མར་གཟིགས་ཤིང་འཇམ་དཔལ་དབྱངས་མི་དང་མི་ལབ་པ་བཞིན་དུ་གྱུར། འདི་དུས་བོད་ཀྱི་རྒྱལ་པོ་ལ་ཆོས་སྐྱེས་བསྐུར་བར་མཛད་པ་སོགས་བོད་ཡུལ་ལའང་བཀའ་དྲིན་དང་ཕྲིན་ལས་རྒྱ་ཆེ། སློབ་དཔོན་འདིས་གསང་བ་སྙིང་པོའི་འགྲེལ་པ་རྣམ་དབྱེ་འགྲེལ་དང་། རྡོ་རྗེ་ལས་རིམ་དང་། དཀྱིལ་འཁོར་ཆོས་དོན། དམ་པ་རྒྱན། དྲྭ་ཆེན་དྲྭ་ཆུང་། ལམ་རིམ་ཆེ་ཆུང་། ཞི་ཁྲོའི་མངོན་པར་རྟོགས་པའི་རིམ་པ་རྣམས་དང་། རྣལ་འབྱོར་རྒྱུད་ལའང་རྡོ་རྗེ་དབྱིངས་ཀྱི་སྒྲུབ་ཐབས་ཡོ་ག་ལ་འཇུག་པ་དང་། རྣམ་སྣང་མངོན་བྱང་གི་བསྡུས་འགྲེལ། བསམ་གཏན་ཕྱི་མའི་རྒྱས་འགྲེལ་སོགས་མཛད་ནས་མཐར་སྐུ་ལུས་མི་སྣང་བར་རིག་འཛིན་གྱི་སར་གཤེགས་སོ། །

རོ་ལངས་བདེ་བས་རྡོ་རྗེ་བཞད་པ་སྟེ་དགའ་རབ་རྡོ་རྗེ་ལ་བཤད། དེ་དང་དྲང་སྲོང་བྷཱ་ཥི་ཏ་གཉིས་ཀྱིས་ཟ་ཧོར་གྱི་རྒྱལ་པོ་པྲ་བྷ་ཧསྟི་ལ་བཤད་པ་སྟེ་སློབ་དཔོན་འདི་ཉིད་ནི། རྒྱ་གར་ནུབ་ཕྱོགས་ཀྱི་རྒྱལ་རིགས་སུ་སྐུ་འཁྲུངས། ཙི་ཏ་བ་རིའི་ཡུལ་གྱི་སློབ་དཔོན་ཞི་བ་འོད་དང་། མ་རུའི་ཡུལ་གྱི་འདུལ་འཛིན་ཆེན་མོ་བསོད་ནམས་གྲགས་པ་ལས་རབ་ཏུ་བྱུང་ཞིང་མཚན་ཤཱཀྱ་འོད་དུ་གྲགས། སྡེ་སྣོད་གསུམ་ཀ་ལ་མཁས་པར་སྦྱངས་ཤིང་སློབ་དཔོན་རྡོ་རྗེ་བཞད་པ་སོགས་སྔགས་ཀྱི་རྡོ་རྗེ་འཛིན་པ་ཆེས་མང་བར་བསྟེན་ནས་རྒྱུད་སྡེ་ཐམས་ཅད་ཐུགས་སུ་ཆུད་ཅིང་མཆོག་གི་དངོས་གྲུབ་བརྙེས་པར་གྲགས། སྔགས་སུ་ཞུགས་པའི་མཚན་ལ་གླང་པོའི་འོད་དེ་པྲ་བྷ་ཧསྟི་ཞེས་འབྱུང་། སློབ་དཔོན་འདིའི་སློབ་མ་ཤཱཀྱ་བཤེས་གཉེན་གྱིས་རྣལ་འབྱོར་གྱི་རྒྱུད་དེ་ཁོ་ན་ཉིད་བསྡུས་པའི་འགྲེལ་བ་ཀོ་ས་ལའི་རྒྱན་ཞེས་བྱ་བ་བརྩམས། སློབ་དཔོན་འདི་གཉིས་ཀ་ཁ་ཆེར་བྱོན་ནས་འགྲོ་དོན་རྒྱ་ཆེན་བྱུང་བ་དང་། སློབ་དཔོན་ཆེན་པོ་པདྨ་སམྦྷ་ཝས་ཀྱང་འདི་ལས་རིང་བརྒྱུད་ཀྱི་ཚུལ་དུ་གསན་པར་མཛད་ཅིང་། སློབ་དཔོན་ཆེན་པོ་ལ་རྒྱལ་པོ་ཛ་ཉིད་ལས་གསན་པའི་ཉེ་བརྒྱུད་ཀྱང་བཞུགས། སློབ་དཔོན་སངས་རྒྱས་གསང་བས་ཀྱང་འདི་ལས་གསན་པར་གྲགས་ཤིང་། སྒེག་པ་རྡོ་རྗེ་དང་སངས་རྒྱས་གསང་བ་གཉིས་ལས་སློབ་དཔོན་བཱི་མ་ལས་གསན་ནས་སྙིང་འགྲེལ་ཁོག་གཞུང་གསལ་སྒྲོན་ཡང་མཛད། སློབ་དཔོན་དགའ་རབ་རྡོ་རྗེ་དང་། པཎ་ཆེན་བཱི་མ་མི་ཏྲ། པདྨ་སམྦྷ་ཝ་བཅས་ཀྱི་རྣམ་ཐར་འོག་ཏུ་རྫོགས་པ་ཆེན་པོ་གསང་བ་སྙིང་ཐིག་གི་བརྒྱུད་ཚུལ་རྒྱས་པར་བཤད་པའི་སྐབས་སུ་འབྱུང་ཞིང་། གཞན་ཡང་ནཱ་གརྫུ་ནས་སློབ་དཔོན་ཧཱུྃ་ཀ་ར་དང་། དགའ་རབ་རྡོ་རྗེས་ཤྲཱི་སེང་ཧ་ལ་བཤད་པར་མཛད་པ་བཅས་འཕགས་ཡུལ་དུ་བརྒྱུད་པའི་ཆུ་འགོ་མི་འདྲ་བ་དུ་མ་བཞུགས་ཀྱང་བོད་དུ་གཉགས་གནུབས་ཟུར་གསུམ་ལ་བཀའ་བབ་ནས་ཆུ་བོ་གཅིག་འདྲེས་སུ་གྱུར་པའི་བཀའ་སྲོལ་ད་ལྟའི་བར་ཇི་ལྟར་བཞུགས་ཚུལ་འོག་ཏུ་གངས་རིའི་ལྗོངས་སུ་རྒྱལ་བསྟན་དར་ཚུལ་བཤད་པའི་ཚོམས་སུ་སྤྲོ་བར་འདོད་པས་འདིར་མ་སྨྲོས་སོ། །

ཁ ཟབ་པ་སྒྲུབ་སྡེའི་བརྒྱུད་ཚུལ།

(༡) སྒྲུབ་སྡེ་བཀའ་མ།

གཉིས་པ་མ་ཧཱ་ཡོ་གའི་ཟབ་པ་སྒྲུབ་སྡེ་ལ་བཀའ་གཏེར་གཉིས་ལས། དང་པོ་སློབ་དཔོན་འཇམ་དཔལ་བཤེས་གཉེན་ནི་སྐུ་རྣམ་སྣང་གི་རིགས་འཇམ་དཔལ་ཁྲོས་པ་གསང་རྒྱུད་སོགས་གཤིན་རྗེ་གཤེད་ཀྱི་བཀའ་བབ་ཏེ། རྒྱ་གར་ནུབ་ཕྱོགས་རིམ་པ་གཉིས་པ་ཞེས་བྱ་བའི་གྲོང་ཁྱེར་དུ། ཡབ་སཱ་དྷུ་སཱ་སྐྲྀ་དང་ཡུམ་སྣང་བ་སྒྲོན་མའི་སྲས་སུ་འཁྲུངས། རིག་བྱེད་ཡན་ལག་དང་བཅས་པར་མཁས་པར་གྱུར། སློབ་དཔོན་དགའ་རབ་རྡོ་རྗེ་སོགས་ལས་གསང་སྔགས་ཕྱི་ནང་གི་དབང་དང་གདམས་ངག་ཐུན་མོང་ཐུན་མིན་ཐམས་ཅད་ཐོབ། སློབ་དཔོན་རོལ་བའི་རྡོ་རྗེ་ལས་དགྲ་གདོང་འཇིགས་གསུམ་སོགས་ཀྱང་གསན། སྤྱོད་པ་ལ་གཤེགས་པའི་ཚེ་མུ་སྟེགས་ཀྱི་རྒྱལ་པོ་ཆེན་པོ་ཞིག་གླང་པོར་ཞོན་ནས་འོང་བ་དང་ཟམ་པ་གཅིག་གི་སྟེང་ནས་འཕྲད་པ་ན་ལམ་མ་བཟུར་བས་སྡིགས་མཛུབ་གཏད་པས་རྒྱལ་པོ་གླང་ཆེན་དང་བཅས་ལུས་ཕྱེད་ཚལ་དུ་གས། སླར་བཟོད་པར་གསོལ་བས་བསོས་ནས་ནང་པའི་བསྟན་པ་ལ་བཀོད། འཕགས་པ་འཇམ་དཔལ་དང་མི་གཉིས་པའི་ཟུང་འཇུག་གི་གོ་འཕང་མཐོན་པོར་གཤེགས། འཇམ་དཔལ་ཡ་མནྟ་ཀ་མངོན་སུམ་དུ་སྣང་བས་དབང་བསྐུར་ཞིང་རྒྱུད་དང་གདམས་ངག་བསྟན། སྤྲུལ་པ་ལས་ཀྱི་གཤིན་རྗེ་མང་པོས་སྐོར་བ་བྱེད་ཅིང་སྲོག་སྙིང་ཕུལ། རི་མ་ལ་ཡ་ནས་ལས་བཞི་ཚང་བའི་གསེར་གྱི་གླེགས་བམ་ལ་བཻ་ཌཱུཪྱས་བྲིས་པ་གཏེར་ནས་བཏོན་ཞིང་གཟིགས་པའི་མོད་ལ་ཐུགས་སུ་ཆུད་ཅིང་ལས་ལ་སྦྱར་བས་མུ་སྟེགས་ཀྱི་རྒྱལ་ཁམས་བརླགས། གླེགས་བམ་དེ་ཉིད་རྡོ་རྗེ་གདན་གྱི་བྱང་དུ་མི་སྣང་བར་རྒྱས་བཏབ་བོ། །སློབ་མ་བསམ་གྱིས་མི་ཁྱབ་པ་ཡོད་པ་ལས་གཙོ་བོ་ཧཱུྃ་ཀཱ་ར་དང་། པདྨ་འབྱུང་གནས། དྷ་ན་ཏེ་ལ་རྣམས་ལ་གསུངས་ནས་དར་བར་མཛད་དོ། །ལོ་རྒྱུས་རྙིང་པ་རྣམས་སུ་འཇམ་དཔལ་བཤེས་གཉེན་འདི་ལ་རྒྱལ་རིགས་གཅིག བྲམ་ཟེའི་རིགས་གཅིག བརྫུས་ཏེ་སྐྱེས་པ་གཅིག་བཅས་གསུམ་དུ་སྣང་ཡང་རང་ས་རང་སར་གསུམ་ག་འཐད་དེ་སྤྲུལ་པ་སྒྱུ་མ་ལྟ་བུས་འགྲོ་བའི་དོན་མཛད་པའི་བདག་ཉིད་ཅན་ནོ་ཞེས་མཁས་མཆོག་གུ་རུ་བཀྲ་ཤིས་བཞེད་དོ། །

སློབ་དཔོན་འཕགས་པ་ཀླུ་སྒྲུབ་ལ་གསུང་སྣང་མཐའི་རིགས་རྟ་མཆོག་རོལ་བ་སོགས་པདྨ་གསུང་གི་ཏནྟྲ་རྣམས་ཀྱི་བཀའ་བབ་ཅིང་། འདི་ཉིད་ཀྱི་ཐུན་མོང་ཕྱིའི་རྣམ་ཐར་ཡོངས་གྲགས་འོག་ཏུ་སོ་ཐར་སྡོམ་བརྒྱུད་ཀྱི་སྐབས་སུ་འབྱུང་བ་ལྟར་ལ། ཁྱད་པར་ཡེ་ཤེས་ཀྱི་མཁའ་འགྲོ་མ་རྣམས་ལས་གདམས་པ་ཐོབ། རྟ་མཆོག་ཧེ་རུ་ཀའི་དགོངས་པ་རིག་འཛིན་ཆེན་པོ་པདྨ་འབྱུང་གནས་དང་སློབ་དཔོན་ཧཱུྃ་ཀཱ་ར་ལ་གནང་། ཤྲཱི་པར་ཏར་མི་ལོ་ཉིས་བརྒྱར་གནོད་སྦྱིན་མོ་རྣམས་ཀྱི་འཁོར་དང་བཅས་སྔགས་ཀྱི་སྤྱོད་པ་ལ་ཞུགས་ནས་མཐར་རྡོ་རྗེའི་སྐུ་གྲུབ་པ་གྲགས་སོ། །

སློབ་དཔོན་ཧཱུྃ་ཀཱ་ར་ལ་ཐུགས་མི་བསྐྱོད་པའི་རིགས་ཧེ་རུ་ཀ་གལ་པོ་སོགས་ཡང་དག་ཐུགས་ཀྱི་བཀའ་བབ་པ་སྟེེ་རྒྱ་གར་མཐའ་འཁོབ་ཅིག་ཏུ་བྲམ་ཟེའི་རིགས་སུ་སྐུ་འཁྲུངས། རིག་བྱེད་སོགས་མུ་སྟེགས་ཀྱི་གཞུང་ལུགས་ལ་ཤིན་ཏུ་མཁས་ཤིང་ནུས་པའང་ཐོབ། ཕྱིས་སངས་རྒྱས་པའི་བསྟན་པ་ལ་དད་ནས་ནཱ་ལེནྡྲར་སངས་རྒྱས་ཡེ་ཤེས་དང་སྒྲ་གཅན་འཛིན་བཟང་པོ་ལས་རབ་ཏུ་བྱུང་། ཕ་རོལ་ཏུ་ཕྱིན་པ་ནས་བཟུང་གསང་སྔགས་ཕྱི་ནང་གི་བར་གྱི་ཐོས་པས་རྒྱུད་སྦྱངས། དབང་བསྐུར་དང་གདམས་པ་རྗེས་སུ་གདམས་པ་མཐའ་དག་ཡོངས་སུ་ནོས་ཤིང་། ཁྱད་པར་ཤྲཱི་ཧེ་རུ་ཀའི་དབང་གི་ཚེ་མེ་ཏོག་ཧཱུྃ་མཛད་ལ་ཕོག་ཅིང་བསྒོམས་པས་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེས། གདོལ་བའི་བུ་མོ་ཨུཏྤལ་སྔོན་པོའི་མདོག་ལྟ་བུ་རྡོ་རྗེ་རིགས་ཀྱི་མཚན་རྟགས་ཚང་བའི་ལས་རྒྱ་དང་ལྷན་ཅིག་ཏུ་ཟླ་བ་དྲུག་ལ་བསྙེན་སྒྲུབ་མཛད་པས་བཛྲ་ཧེ་རུ་ཀའི་དཀྱིལ་འཁོར་ཐམས་ཅད་མངོན་སུམ་དུ་མཐོང་བ་དང་ནམ་མཁའ་ནས་ཧཱུྃ་གི་སྒྲ་ཆེན་པོ་གྲགས་ཏེ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། རུ་ལུ་གསེར་ཕྲེང་དང་ཡང་དག་གྲུབ་པ་སོགས་བསྟན་བཅོས་མང་དུ་མཛད་ནས་མཐར་སྐུ་ལུས་དེ་ཉིད་ཀྱིས་སངས་རྒྱས་མི་འཁྲུགས་པའི་ཞིང་ཁམས་སུ་བཞུད་དོ། །སློབ་དཔོན་འདི་དང་བལ་པོ་ཧཱུྃ་ཀཱ་ར་གཉིས་འགའ་ཞིག་གཅིག་ཏུ་བཞེད་ཀྱང་གཏེར་བདག་གླིང་པ་དང་གུ་རུ་བཀྲ་ཤིས་སོགས་ཀྱིས་ཐ་དད་ཡིན་པར་གསུངས་སོ། །

སློབ་དཔོན་བཱི་མ་མི་ཏྲ་ལ་ཡོན་ཏན་རིན་ཆེན་འབྱུང་ལྡན་གྱི་རིགས་བདུད་རྩི་བམ་བརྒྱད་སོགས་བདུད་རྩི་ཡོན་ཏན་གྱི་བཀའ་བབ་ཏེ། ནུབ་ཕྱོགས་གླང་པོའི་ཚལ་དུ་ཡབ་ཁྱིམ་བདག་བདེ་ལྡན་དང་། ཡུམ་བདག་ཉིད་གསལ་རིག་གཉིས་ཀྱི་སྲས་སུ་སྐུ་འཁྲུངས། ཐུན་མོང་ཐུན་མིན་གྱི་ཤེས་བྱའི་གནས་ཀུན་ལ་མཁས། སློབ་དཔོན་སངས་རྒྱས་གསང་བ་སོགས་རྡོ་རྗེ་འཛིན་པ་ཆེན་པོ་དུ་མ་ལས་རྒྱུད་སྡེ་མཐའ་དག་གསན། བསྒོམས་པས་ཕྱག་རྒྱ་ཆེན་པོའི་དངོས་གྲུབ་ཉམས་འོག་ཏུ་ཆུད། སྒྱུ་འཕྲུལ་གཙོ་བོར་གྱུར་པའི་བསྟན་བཅོས་མང་པོ་མཛད་པ་སོགས་རྣམ་ཐར་རྒྱས་པ་འོག་ཏུ་འབྱུང་ངོ་། །

སློབ་དཔོན་པྲ་བྷ་ཧསྟི་དང་པདྨ་འབྱུང་གནས་རྣམ་གཉིས་ལ་དོན་གྲུབ་རིགས་ཕྲིན་ལས་ཕུར་བའི་བཀའ་བབ་པ་སྟེ། དང་པོའི་རྣམ་ཐར་གོང་དུ་སོང་ཟིན་པས་འདིར་ཡང་དུ་མི་ཟློས་ལ། སློབ་དཔོན་སངས་རྒྱས་གཉིས་པས་ནི་བལ་ཡུལ་དུ་ཕྱག་རྒྱའི་རིག་འཛིན་སྒྲུབ་པའི་ཚེ། ཀླུ་གྱོང་པོ་དང་། གནོད་སྦྱིན་རྒོད་མ་ཁ་སོགས་ཀྱིས་ཐོ་བརྩམས་པའི་གཉེན་པོར་རྡོ་རྗེ་ཕུར་པའི་དཀྱིལ་འཁོར་ཞལ་ཕྱེས་པས་ཤྲཱི་བཛྲ་ཀུ་མཱ་རས་ཞལ་བསྟན། བར་ཆད་ཀྱི་གཡུལ་ལས་རྒྱལ་ཏེ་མ་མོ་བཅུ་གཉིས་སོགས་དམ་འོག་ཏུ་བཅུག སླར་ཡང་སློབ་དཔོན་པྲ་བྷ་ཧསྟི་ལས་ཀཱི་ལ་ཡའི་རྒྱུད་ཚར་བཅོ་བརྒྱད་གསན་པས་ཕྲིན་ལས་ཕུར་བའི་བཀའ་བབ་ཏུ་གྱུར་པ་བཅས་རྣམ་ཐར་རྒྱས་པ་འོག་ཏུ་འབྱུང་བ་ལྟར་རོ། །

(༢) སྒྲུབ་སྡེ་གཏེར་མ།

གཉིས་པ་མ་ཧཱ་ཡོ་ག་སྒྲུབ་སྡེ་གཏེར་མའི་ཕྱོགས་ནི། དེ་ཡང་འོག་མིན་གྱི་གནས་སུ་ཀུན་ཏུ་བཟང་པོ་དཔལ་ཧེ་རུ་ཀས་ཡོངས་སུ་དག་པའི་འཁོར་རྣམས་ལ་རྡོ་རྗེའི་ཚིག་ཏུ་གསུངས་པ་རྣམས་སྡུད་པ་པོ་བྱང་ཆུབ་སེམས་དཔའ་རྡོ་རྗེ་ཆོས་ཀྱིས་རང་ཉིད་ཚོམ་བུ་དགུའི་དཀྱིལ་འཁོར་དུ་སྣང་བར་མཛད་ནས་ཐོག་མར་ངག་ཏུ་བསྡུས། དེ་ནས་གླེགས་བམ་དུ་བྲིས་ཤིང་དགོངས་འགྲེལ་ལུང་ལྔ་ཡང་མཛད་དེ་རེ་ཞིག་འཇིག་རྟེན་དུ་བསྟན་པའི་ཡུལ་མ་གཟིགས་པས་མཁའ་འགྲོ་མ་ལས་ཀྱི་དབང་མོ་ཆེ་ལ་གཉེར་དུ་གཏད་པར་མཛད། དེས་སྒྲུབ་པ་བཀའ་བརྒྱད་ཀྱི་སྤྱི་དང་བྱེ་བྲག་གི་རྒྱུད་རྣམས་སོ་སོར་ཕྱེས་ཏེ། བདེ་གཤེགས་འདུས་པ་རྩ་བའི་རྒྱུད། ཕྱི་མ་ངེས་པ་འབྱུང་བའི་རྒྱུད། ཕྱི་མའི་ཕྱི་མ་སྔགས་ཀྱི་རྒྱུད། མ་ཚང་བ་ཁ་སྐོང་བའི་རྒྱུད། འབྱེད་པར་བྱེད་པ་ལྡེའུ་མིག་གི་རྒྱུད་བཅས་སྤྱི་རྒྱུད་ལྔ། ཞི་བ་འདུས་པ་རྩ་བའི་རྒྱུད། ཆེ་མཆོག་འདུས་པ་རྩ་བའི་རྒྱུད་ལ་སོགས་པ་བརྒྱད་དང་། རིག་འཛིན་འདུས་པ་རྩ་བའི་རྒྱུད་བཅས་སྒོས་རྒྱུད་བཅུ་བཅས་རྒྱུད་ཆེན་བཅོ་ལྔ་གཙོ་བོར་གྱུར་པའི་བདེ་གཤེགས་འདུས་པ་རྩ་བའི་སྐོར་རྣམས་རིན་པོ་ཆེ་སྣ་བརྒྱད་ཀྱི་སྒྲོམ་བུར་བཅུག གཞན་འཇམ་དཔལ་གསུང་རྒྱུད་སོགས་འཇམ་དཔལ་སྐུ་ཡི་སྐོར། རྟ་མཆོག་རོལ་བའི་རྒྱུད་སོགས་པདྨ་གསུང་གི་སྐོར། འཇིག་རྟེན་འདས་མདོ་སོགས་ཡང་དག་ཐུགས་ཀྱི་སྐོར། ཀཱི་ལ་ཡའི་རྒྱུད་སོགས་ཕུར་བ་ཕྲིན་ལས་ཀྱི་སྐོར། ལུང་བམ་བརྒྱད་སོགས་ཆེ་མཆོག་ཡོན་ཏན་གྱི་སྐོར། གསང་བ་གཏན་ཚིག་གི་རྒྱུད་སོགས་མ་མོའི་སྐོར། དྲེགས་པའི་སྲོག་ཏིག་སོགས་མཆོད་བསྟོད་སྐོར། དྲག་སྔགས་ཙིཏྟ་དམར་འབྱིན་སོགས་དྲག་སྔགས་ཀྱི་སྐོར་ཏེ་བྱེ་བྲག་གི་སྒོས་རྒྱུད་རྣམས་སྒྲོམ་བུ་ཐ་དད་པར་བཅུག་ནས་དུར་ཁྲོད་བསིལ་བའི་ཚལ་གྱི་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་སོ། །དུས་གང་གི་ཚེ་དུར་ཁྲོད་རོ་གླིང་བསིལ་བའི་ཚལ་ཞེས་འཇིགས་སུ་རུང་བའི་གནས་སུ་སློབ་དཔོན་ཧཱུྃ་ཀ་ར་དང་། འཇམ་དཔལ་བཤེས་གཉེན། ནཱ་གརྫུ་ན། པདྨ་འབྱུང་གནས། དྷ་ན་སཾ་ཀྲྀ་ཏ། བཱི་མ་ལ་མི་ཏྲ། རོམ་བུ་གུ་ཧྱ། ཤཱནྟིཾ་གརྦྷ་དང་བརྒྱད་དགོངས་པ་མཛད་དེ་བཞུགས་པའི་ཚེ་ན། ཡ་མཚན་རྨད་དུ་བྱུང་བའི་སྒྲོམ་བུ་བརྒྱད་ལ་འོད་དང་འཇའ་ཚོན་དཀྲིགས་པ་སོགས་ཀྱི་ལྟས་དང་། མཁའ་འགྲོ་དང་དྲེགས་པའི་ཚོགས་ཀྱིས་སྐོར་བ་བྱེད་པ་གཟིགས་པ་ན་འདིར་འཇིག་རྟེན་ཕུང་འཚེངས་ནུས་པའི་གདམས་པ་ཟབ་མོ་འདུག་སྙམ་དུ་དགོངས་ཏེ་སློབ་དཔོན་རྣམས་ཀྱིས་དེར་དགོངས་པ་གཏད་ཅིང་། བཀའ་སྲུང་གི་ཚོགས་རྣམས་ལ་དམ་རྫས་བྱིན་ནས་དམ་བསྒྲགས་ཤིང་དབང་དུ་བསྡུས་པས་མ་མོ་མཁའ་འགྲོ་རྣམས་སྐད་གཅིག་གིས་ལྷགས་ཏེ་བཀའ་ཅི་སྩལ་ཟེར་བར། སྒྲོམ་བུ་རྣམས་གཏོད་ཅེས་གསུངས་པས་དངུལ་གྱི་སྒྲོམ་བུ་ཡང་དག་གི་ཆོས་སྐོར་གནས་པ་སློབ་དཔོན་ཧཱུྃ་ཀཱ་རའི་ཕྱག་ཏུ་གཏད། ལྕགས་སྒྲོམ་དུ་འཇམ་དཔལ་སྐུའི་ཆོས་སྐོར་གནས་པ་འཇམ་དཔལ་བཤེས་གཉེན་གྱི་ཕྱག་ཏུ་གཏད། ཟངས་སྒྲོམ་དུ་པདྨ་གསུང་གི་ཆོས་སྐོར་གནས་པ་ཀླུ་སྒྲུབ་སྙིང་པོའི་ཕྱག་ཏུ་གཏད། གཡུ་ཡི་སྒྲོམ་བུར་ཕུར་བའི་ཆོས་སྐོར་གནས་པ་པདྨ་འབྱུང་གནས་ཀྱི་ཕྱག་ཏུ་གཏད། གསེར་གྱི་སྒྲོམ་བུར་ཆེ་མཆོག་གི་ཆོས་སྐོར་གནས་པ་བི་མ་མི་ཏྲའི་ཕྱག་ཏུ་གཏད། བསེ་སྒྲོམ་དུ་མ་མོའི་ཆོས་སྐོར་ཡོད་པ་དྷ་ན་སཾ་ཀྲྀ་ཏའི་ཕྱག་ཏུ་གཏད། མཆོང་སྒྲོམ་དུ་མཆོད་བསྟོད་ཀྱི་ཆོས་སྐོར་ཡོད་རམ་བུ་གུ་ཧྱ་དེ་བ་ཙནྟྲའི་ཕྱག་ཏུ་གཏད། གཟི་སྒྲོམ་དུ་དྲག་སྔགས་ཀྱི་ཆོས་སྐོར་ཡོད་པ་ཕུང་བྱེད་ཤནྟིཾ་གརྦྷའི་ཕྱག་ཏུ་གཏད། རིན་ཆེན་སྣ་ལྔའི་སྒྲོམ་བུ་ཕྲ་མེན་གྱི་རྒྱས་བཏབ་པ་ཞིག་སློབ་དཔོན་རྣམས་ཀྱི་དབུས་སུ་བཞག་གོ །ལོ་རྒྱུས་གཞན་ན་ཕུར་པའི་ཆོས་སྐོར་གྱི་སྒྲོམ་བུ་པྲ་བྷ་ཧསྟིའི་ཕྱག་ཏུ་གཏད་ཅིང་། རིན་ཆེན་སྣ་ལྔའི་སྒྲོམ་བུ་བཀའ་བརྒྱད་དཀྱིལ་འཁོར་གཅིག་ཏུ་སྒྲུབ་པའི་ཆོས་སྐོར་ནི་ཐམས་ཅད་ཀྱི་བཀའ་བབ་པ་པདྨ་འབྱུང་གནས་ཀྱི་ཕྱག་ཏུ་གཏད་ཅེས་རིགས་དགུའི་བཀའ་བབ་ཀྱི་ལོ་རྒྱུས་ཀྱང་འབྱུང་ངོ་། །དེ་ནས་སློབ་དཔོན་རྣམས་ཀྱིས་སོ་སོ་རང་གི་སྒྲོམ་བུ་ཁ་ཕྱེས་ནས་སོ་སོའི་ཆོས་སྐོར་བཏོན། དབུས་ཀྱི་སྒྲོམ་བུ་སློབ་དཔོན་གང་གིས་ཀྱང་ཁ་འབྱེད་མ་ནུས་ལ། རྒྱ་བཅག་པས་ཀྱང་མ་ཆོག་ནས་སློབ་དཔོན་བརྒྱད་ཀྱིས་དགུང་བདུན་དུ་དགོངས་པ་རྩེ་གཅིག་ཏུ་མཛད་དེ་མཁའ་འགྲོ་མ་རྣམས་ལ་གསོལ་བ་བཏབ་པས། སྒྲོམ་བུ་རང་གྲོལ་དུ་གྱུར་པའི་ནང་ནས་བཀའ་བརྒྱད་བདེ་གཤེགས་འདུས་པའི་ཆོས་སྐོར་བྱུང་བར་བཤད་པ་དང་། ཡང་བདེ་གཤེགས་འདུས་པའི་ཆོས་སྐོར་གྱི་སྒྲོམ་བུ་དེ་དུས་རྒྱ་མ་ཁྲོལ་བས་སླར་མཆོད་རྟེན་དེ་ཉིད་དུ་སྦས་པ་ཕྱིས་པདྨ་འབྱུང་གནས་ཀྱིས་རྒྱ་བཀྲོལ་ཞིང་། མཁའ་འགྲོ་རྣམས་ཀྱིས་བཤད་པ་དང་སྒྲུབ་བཀའ་གནང་བའོ་ཞེས་ལོ་རྒྱུས་འགའ་ཞིག་ལས་འབྱུང་ངོ་། །མདོར་ན་སློབ་དཔོན་དེ་རྣམས་ཀྱིས་གནས་སོ་སོར་སྒྲུབ་པའི་ཚུལ་མཛད་པས་དཔལ་ཆེ་མཆོག་གཙོ་བོ་བརྒྱད་དང་མི་གཉིས་པའི་གོ་འཕང་བརྙེས་ཤིང་། རྒྱལ་དབང་པདྨ་ཀ་རས་སློབ་དཔོན་དེ་དག་ལས་སྒྲུབ་ཐབས་བྱེ་བྲག་གི་རྒྱུད་ལུང་མན་ངག་རྣམས་གསན་ནས་དེ་རྣམས་ལས་ཀྱང་གོ་འཕང་མཐོན་པོར་གཤེགས་པའི་ཚུལ་བསྟན་པ་དང་། དཔལ་ཧེ་རུ་ཀ་དང་གསང་བའི་བདག་པོ་ལ་སོགས་པས་གསང་སྔགས་ཀྱི་རྒྱུད་སྡེ་མ་ལུས་པའི་བཀའ་དབང་བསྒྱུར་བར་མངའ་གསོལ་ཞིང་ལྷུན་གྱིས་གྲུབ་པའི་རིག་འཛིན་གྱི་སར་གཤེགས་ནས་སྔོན་གྱི་སློབ་དཔོན་ཆེན་པོ་བརྒྱད་ལའང་ཆོས་སྐྱེས་ཕུལ་བར་གྲགས་སོ། །

༢ ལུང་ཨ་ནུ་ཡོ་གའི་བརྒྱུད་ཚུལ།

གཉིས་པ་ལུང་ཆེན་ཨ་ནུ་ཡོ་གའི་བརྒྱུད་ཚུལ་ནི། དེ་ཡང་ལུང་ཨ་ནུ་ཡོ་གའི་རྒྱུད་སྡེའི་དཔེ་རྣམས་ལངྐའི་གླིང་གི་རི་མཱ་་ལ་ཡར་ཆར་དུ་བབ་ཅིང་། གསང་བདག་ཕྱག་ན་རྡོ་རྗེས་ཆོས་རྒྱལ་ལུང་བསྟན་རྡོ་རྗེའམ་སྐལ་ལྡན་རྒྱལ་པོ་ཛཿལ་ཞལ་དངོས་སུ་བསྟན་ནས་ཡེ་ཤེས་ཀྱི་དཀྱིལ་འཁོར་དུ་དབང་བསྐུར་ཏེ། བསྟན་པ་དང་ཐེག་པ་ཐམས་ཅད་ཀྱི་དོན་ཐུགས་སུ་ཆུད་པར་གྱུར་ནའང་། ཚུར་མཐོང་གི་སྣང་ངོར་གསང་སྔགས་ལ་རང་དགར་འཇུག་པ་དགག་པའི་ཕྱིར། མིའི་རིག་འཛིན་དགེ་བསྙེན་ལི་ཙ་བཱི་དྲི་མེད་གྲགས་པ་བསྟེན་པའི་ཚུལ་བསྟན་པ་སྟེ། དེ་ཉིད་ལ་རིན་པོ་ཆེ་ཨིནྡྲ་ནཱི་ལ་ཁྲུ་གང་ཕུལ་ནས་ཏྲི་ཤཾ་ཨ་སུ་རའི་བྲག་ཕུག་ཏུ་ཆུ་བོ་བཞིའི་དབང་རྫོགས་པར་ཞུས། གསང་མཚན་རྡོ་རྗེ་ཉི་འོད་རྩལ་དུ་བཏགས་ཤིང་ཚིག་གི་བསྟན་པ་རྒྱུད་སྡེ་རྣམས་ཀྱི་བཤད་པ་ཐམས་ཅད་ཀྱང་གསན། ལུང་གི་མདོ་ལྔ་མདོ་ཕྲན་དང་བཅས་པ་རྣམས་སོ་སོར་ཕྱེ་ནས་བཤད་ཅིང་སྤྱི་མདོའི་འགྲེལ་པ་ལུང་བསྟན་མ་དང་སྒྱུ་དྲྭའི་ལམ་རྣམ་བཀོད་སོགས་དགོངས་འགྲེལ་ཀྱང་མཛད། ཚོགས་ཀྱི་སྤྱོད་པའི་ཉེ་རྒྱུས་འཁོར་ཚོམ་བུ་སྟོང་ལྔ་བཅུ་སྟེ་ཁྲི་ཕྲག་ལྔ་དང་བཅས་པ་བདེ་བ་ཆེན་པོའི་ལམ་གྱིས་རྡོ་རྗེ་འཆང་གི་སར་མངོན་དུ་གཤེགས་སོ། །རྒྱལ་པོ་ཛཿས་སྔར་རང་ཉིད་ལི་ཙ་བཱི་ལ་བསྟེན་པའི་དུས་ཀྱི་ཆོས་གྲོགས་ཨུ་པ་རཱ་ཛ་དང་། རང་གི་སྲས་རྒྱལ་བུ་བུ་ཏྲི་གསུམ་ལ་སྤྲུལ་པའི་དཀྱིལ་འཁོར་དུ་དབང་བསྐུར་ཞིང་གདམས་ངག་བཞག་པ་སྟེ། ཨུ་པ་རཱ་ཛ་ལ་གྲོང་ཁྱེར་དཔལ་ཡོན་ཅན་དུ་དབང་བསྐུར་བས་རྒྱལ་སྲིད་རིན་པོ་ཆེ་སྣ་བདུན་ཡོན་དུ་ཕུལ། གསང་མཚན་རྡོ་རྗེ་ཡང་དག་རྩལ་ཞེས་བཏགས། གྲོང་ཁྱེར་སྐྱིད་པའི་འབྱུང་གནས་སུ་རང་གི་སྲས་གསུམ་ལ་དབང་བསྐུར་སྐབས་ཡོན་དུ་ལྷའི་རིན་པོ་ཆེ་བསམ་འཕེལ་ཕུལ། དེ་གསུམ་གྱི་གསང་མཚན་ནི། ཤ་ཀྲ་པུ་ཏྲིའམ་ཨནྡྲི་བོ་དྷི་ལ་རྡོ་རྗེ་གསལ་མཛེས་རྩལ། ནཱ་ག་པུ་ཏྲི་ལ་ཐིག་ལེ་བསྐྱོད་མེད་རྩལ། གུ་ཧྱ་པུ་ཏྲི་ལ་རྡོ་རྗེ་གསལ་འཕྲོ་རྩལ་ཞེས་བཏགས། དེ་བཞི་ཀ་བདེ་བ་ཆེན་པོའི་ལམ་གྱི་ཉེ་རྒྱུ་སྤྱད་པས་རང་རང་གི་ཚོམ་བུ་དང་བཅས་ཏེ་རིག་འཛིན་གྱི་སར་གཤེགས། དེ་ལས་ནཱ་ག་པུ་ཏྲི་ནི་ཀླུ་བ་སུ་རིགས་དྲུག་གིས་ལོ་དགུའི་བར་དུ་གཞན་ལ་ཤོད་དུ་མ་བཅུག་ཅེས་ཀྱང་གྲགས་སོ། །སྲས་གསུམ་གྱི་ནང་ནས་ཨིནྡྲ་བོ་དྷིས། རྒྱལ་པོ་སིདྷ་པུ་ཏྲ་དང་། ཀུ་ཀུ་རཱ་ཛ་ཕྱི་མ་གཉིས་ལ་ཕྱིའི་རྒྱ་མཚོའི་འགྲམ་དུ་དབང་བསྐུར་ཅིང་བཤད། སིདྷས་བཻ་ཌཱུཪྱ་སྔོན་པོ་ཕུལ་ཞིང་གསང་མཚན་རྡོ་རྗེ་འོད་ཟེར་རྩལ། ཀུ་ཀུ་རཱ་ཛས་རིན་པོ་ཆེའི་དྲིལ་གཡེར་སྟོང་ཕུལ་ནས་གསང་མཚན་རྡོ་རྗེ་བདེ་མཆོག་རྩལ། གཉིས་ཀ་འཁོར་ཚོམ་བུ་དང་བཅས་པས་རིག་འཛིན་གྱི་གནས་ཐོབ་བོ། །ཀུ་ཀུ་རཱ་ཛས་སློབ་དཔོན་ཆེན་པོ་རོ་ལངས་བདེ་བའི་དངོས་གྲུབ་ལ་གླང་ཆེན་སྣའི་བྲག་ཕུག་ཏུ་དབང་བསྐུར་ཅིང་བཤད་པས་ལྷ་ཀླུ་མིའི་ཡུལ་གྱི་རྩི་སྨན་སྣ་ཚོགས་ཕུལ། གསང་མཚན་བདུད་འདུལ་དྲག་པོ་རྩལ་དུ་བཏགས། དེ་ཡང་རོ་ལངས་བདེ་བ་ནི་སྤྲུལ་པའི་སྐུ་དགའ་རབ་རྡོ་རྗེའི་མཚན་གྱི་རྣམ་གྲངས་ཡིན་པ་ཆོས་རྗེ་སྨིན་གླིང་པས་གསུངས་ཤིང་། རོ་ལངས་ཐལ་མདོག་དང་དགྱེས་པ་རྡོ་རྗེ་དང་བཞད་པ་རྡོ་རྗེ་ཞེས་ཀྱང་གྲགས། ཕྱག་ན་རྡོ་རྗེས་རྒྱལ་ཐབས་སྤྱི་བླུགས་རྫོགས་པའི་དབང་བསྐུར་ཅིང་། བསྟན་པའི་རྩེ་མོ་ཀློང་དགུ་བམ་པོ་ཉི་ཁྲི་ལ་སོགས་པ་རྫོགས་པ་ཆེན་པོའི་རྒྱུད་ལུང་ཐམས་ཅད་བཤད་པ་སློབ་དཔོན་གྱིས་གླེགས་བམ་དུ་བཀོད་དེ་ཌཱ་ཀི་མ་རྣམས་ལ་གཏད། མདོ་ཡོངས་རྫོགས་ཀྱི་དབང་གི་ཆུ་བོ་བྱེ་བྲག་པ་རྣམས་ཀྱི་བཀའ་ཡང་བབ། ཨཽ་ཌཱི་ཡ་ནའི་ཡུལ་དང་རྒྱ་གར་གྱི་མཚམས་མ་ག་ཏའི་ཕུག་ཏུ་ཚོགས་བསྒྲུབས་པས་འཁོར་ཁྲི་ཕྲག་གཅིག་དང་བཅས་པས་ཟུང་འཇུག་གི་སྐུ་བརྙེས་སོ། །དེས་སངས་རྒྱས་རྣམ་པར་གཟིགས་ཀྱི་སྤྲུལ་པ་སློབ་དཔོན་རྡོ་རྗེ་བཞད་པ་ལ་ཨུ་ཏ་པ་རའི་ཚལ་དུ་དབང་བསྐུར་ཅིང་བཤད། ཡོན་དུ་ནོར་བུ་རིན་པོ་ཆེ་འོད་འབར་བ་ཕུལ་བས་གསང་མཚན་རྡོ་རྗེ་བདེ་བྱེད་རྩལ་དུ་བཏགས། བདེ་བ་ཆེན་པོའི་ལམ་གྱིས་མཆོག་གྲུབ་ཅིང་རྣལ་འབྱོར་རིག་པའི་ཉི་མ་ཞེས་བྱ་བ་མདོའི་ཟབ་ལམ་གཏན་ལ་འབེབས་པའི་བསྟན་བཅོས་ཀྱང་མཛད་དོ། །དེས་སློབ་དཔོན་པྲ་བྷ་ཧསྟི་ལ་ག་ཛ་ནིའི་ཡུལ་ཆུ་བོ་སིནྡྷུའི་འགྲམ་དུ་དབང་བསྐུར་ཅིང་བཤད། ཡོན་དུ་རིན་པོ་ཆེ་ཀེ་ཀེ་རུ་ཕུལ་ཞིང་གསང་མཚན་ཐིག་ལེ་བདེ་བྱེད་རྩལ་དུ་བཏགས། སློབ་དཔོན་འདི་ནི་རིག་འཛིན་འདུས་པ་རྩ་བའི་རྒྱུད་ལས། ཐོར་ཅོག་ཡུལ་དུ་སྐྱེས་པ་དེས། །ཕྲིན་ལས་སྤྱོད་པ་གཙོ་བོར་སྟོན། །ཞེས་ལུང་བསྟན་པ་དང་། ཕུར་པ་བཀའ་མའི་ཡིག་རྙིང་ལས། ཨོ་རྒྱན་ཐོར་ཅོག་ཅན་གྱི་ཡུལ། །རིགས་ནི་ཟ་ཧོར་རྒྱལ་པོའི་རིགས། །དགེ་སློང་མིང་ནི་ཤཱཀྱ་འོད། །སློབ་དཔོན་པྲ་ཆེན་ཧསྟི་རྩལ། །ཞེས་འབྱུང་བ་ལྟར་ལ་རྣམ་ཐར་རྒྱས་པ་གོང་དུ་སོང་། དེས་སློབ་མ་ཤཱཀྱ་གསུམ་ལ་ས་ཧོ་རའི་རྒྱལ་ཁབ་ཏུ་དབང་བསྐུར་ཅིང་བཤད། རང་རང་གི་བདོག་དགུའི་འབྱོར་པས་མཆོད་ཅིང་གསང་མཚན་ཤཱཀྱ་སེང་གེ་ལ་རྡོ་རྗེ་ཐོད་ཕྲེང་རྩལ། ཤཱཀྱ་པྲ་བྷཱ་ཆུང་བ་ལ་རྡོ་རྗེ་ཐིག་ལེ་རྩལ། ཤཱཀྱ་མུ་དྲ་ལ་རྡོ་རྗེ་ཐོགས་མེད་རྩལ་དུ་བཏགས། དེ་ལ་ཤཱཀྱ་སེདྒེ་ནི། དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་སྤྲུལ་པའི་སྐུ་ཨཽ་ཌཱི་ཡ་ནའི་སློབ་དཔོན་ཆེན་པོ་པདྨ་འབྱུང་གནས་ཏེ་དྷ་ན་ཀོ་ཥའི་མཚོ་དབུས་སུ་པདྨའི་སྡོང་པོ་ལས་སྐུ་འཁྲུངས། རིག་པའི་གནས་ཐམས་ཅད་ལ་བྱང་ཞིང་རིག་སྔགས་ཀྱི་མཐུས་ཐུན་མོང་གི་དངོས་གྲུབ་ཐམས་ཅད་ལ་དབང་འབྱོར་ནའང་། མཆོག་གི་དངོས་གྲུབ་འདོད་པས་ཤཱཀྱ་པྲ་བྷཱ་ཆེན་པོ་སྟེ་པྲ་བྷ་ཧསྟི་ལས་རབ་ཏུ་བྱུང་། མཱ་ར་ཏི་ཀ་ཞེས་པའི་གནས་སུ་ལས་རྒྱ་པདྨ་ཅན་མནྡཱ་ར་བ་ལ་བརྟེན་ནས་བདེ་བ་ཆེན་པོའི་ལམ་གྱི་ཉེ་རྒྱུའི་སྤྱོད་པས་མཐོང་ལམ་འོད་གསལ་གྱི་སྐུ་ཚེ་ལ་དབང་བའི་རིག་འཛིན་གྲུབ། དེ་ནས་ནེ་པཱ་ལའི་ཡུལ་ཡང་ལེ་ཤོད་ཀྱི་བྲག་ཕུག་ཏུ་དཔལ་ཧེ་རུ་ཀའི་སྒྲུབ་པ་ཚོམ་བུ་ལྔ་པའི་ཚོགས་ཀྱི་སྤྱོད་པས་འོད་གསལ་ལས་ཟུང་འཇུག་གི་སྐུར་བཞེངས་ཏེ། ཕྱག་རྒྱ་ཆེན་པོ་མཆོག་གི་དངོས་གྲུབ་ཧེ་རུ་ཀའི་གོ་འཕང་མངོན་དུ་མཛད། རྒྱ་བལ་བོད་ཡུལ་རྔ་ཡབ་གླིང་སོགས་སུ་མི་དང་མི་མ་ཡིན་གདུག་པ་ཅན་ཐམས་ཅད་བཏུལ། འགྲོ་བ་མཐའ་དག་རྫུ་འཕྲུལ་གྱིས་དད་པར་བྱས་ཏེ་དམ་པའི་ཆོས་ལ་བཀོད་པའི་ཕྲིན་ལས་ཀྱི་མཐའ་ནི་འདི་ཙམ་མོ་ཞེས་གཞལ་དུ་མེད་ཅིང་། ཉེ་བརྒྱུད་ལ་རྒྱལ་པོ་ཛཿཉིད་ལའང་གསན་པར་ཨ་ཏིའི་ལོ་རྒྱུས་སོགས་ལས་བཤད། དེས་ལྷའི་བཤོས་ཁང་དགུ་ཐོག་ཏུ་སློབ་དཔོན་དྷ་ན་རཀྵི་ཏ་ལ་དབང་བསྐུར་ཅིང་རྒྱུད་དང་གདམས་ངག་ཐམས་ཅད་བཤད་པས་ཡོན་དུ་ལྷའི་བདུད་རྩི་བསིལ་མཆོག་གིས་མཆོད། གསང་མཚན་སེང་གེ་སྒྲ་སྒྲོགས་རྩལ་དུ་བཏགས་ཤིང་མདོའི་རྣམ་གྲངས་འཆད་པའི་བསྟན་བཅོས་ཀྱང་བརྩམས། ཡིག་རྙིང་འགའ་ཞིག་ཏུ་སློབ་དཔོན་འདི་ཤཱཀྱ་སེང་གེ་དང་གཅིག་ཅེས་གསུངས་པ་ནི་མདོའི་ཁོག་དབུབ་ཏུ་ཤཱཀྱ་སེང་གེས་ཞེས་པའི་རྣམ་དབྱེ་གསུམ་པའི་ས་སྒྲ་ཆད་དེ་ཤཱཀྱ་སེང་གེ་དྷ་ན་ར་ཀྵི་ཏ་ཞེས་པའི་ཡིག་སྐྱོན་དང་། ཕུར་པའི་ལོ་རྒྱུས་འགར་ཨོ་རྒྱན་གྱི་ཡུལ་དུ་རྒྱལ་རིགས་སྲིག་དྷ་རིའི་བུ་དྷ་ན་རཀྵི་ཏའམ་ཤཱནྟ་རཀྵི་ཏ་ཞེས་མཚན་འདྲ་བར་བྱུང་བས་ཀྱང་འཁྲུལ་ལམ་སྙམ་མོ་ཞེས་ཆོས་རྗེ་སྨིན་གླིང་པའི་འདུས་མདོའི་དབང་གི་སྤྱི་དོན་དུ་གསུངས། སློབ་དཔོན་དྷ་ན་རཀྵི་ཏས་ནུབ་ཕྱོགས་ཨོ་རྒྱན་གྱི་ཡུལ་རྡོ་རྗེའི་ཕུག་ཏུ་ཧཱུྃ་མཛད་རྡོ་རྗེ་ལ་དབང་བསྐུར་ཅིང་བཤད། གསང་མཚན་རྡོ་རྗེ་ཉི་འོད་རྩལ་དུ་གྲགས་ཤིང་རྩ་རྒྱུད་ཀྱི་རྒྱ་བདུན་འགྲེལ་དང་། འགྲེལ་ཆུང་རྣལ་འབྱོར་སའི་སྒྲོན་མ་མཛད། དེས་སློབ་དཔོན་སྠི་ར་མ་ཏི་ལ་གཽ་རུམ་གྱི་བྲག་ཕུག་ཏུ་དབང་བསྐུར་ཅིང་བཤད་པའི་ཡོན་དུ་གསེར་སྲང་བརྒྱ་ཕྲག་གིས་མཆོད། གསང་མཚན་རྡོ་རྗེ་ཡང་དག་རྩལ་དུ་བཏགས་ཤིང་མདོའི་སྐབས་འགྲེལ་རྣམ་པར་བཤད་པ་དང་། སྐབས་འགྲེལ་བྱེ་བྲག་ཏུ་བཤད་པ། དཀའ་གཅོད། ཐེག་པ་གསལ་བྱེད་སྒྲོན་མེ་ལ་སོགས་པའི་བསྟན་བཅོས་ཀྱང་བརྩམས། རྒྱ་གར་དང་ཏཱ་སིག་གི་མཚམས་ཨ་སུ་རའི་བྲག་ཕུག་ཏུ་ལས་ཀྱི་ཕྱག་རྒྱ་མ་ག་ག་སིདྡྷི་ལ་བརྟེན་ནས་དངོས་གྲུབ་ཐོབ། དེས་སློབ་དཔོན་བདེ་བ་གསལ་མཛད་ལ་གྲོང་ཁྱེར་དཔལ་ཡོན་ཅན་དུ་དབང་བསྐུར་ཅིང་བཤད་པས་ཅི་མཉེས་ཀྱི་དངོས་པོ་མཆོག་གིས་བཀུར། གསང་མཚན་དབང་ཕྱུག་འཇིགས་མེད་རྩལ་དུ་བཏགས། འདིས་སློབ་དཔོན་ཧཱུྃ་མཛད་རྡོ་རྗེ་ལའང་གསན་ཞེས་གྲགས་ཤིང་རིག་སྔགས་གྲུབ་སྟེ་འཆི་མེད་ཀྱི་རིག་འཛིན་བརྙེས། མདོ་དབང་གི་ཡིག་སྣ་དྲུག་གསུམ་བཅོ་བརྒྱད་དང་། རྣལ་འབྱོར་གྱི་རིམ་པ་ཐེག་ཆེན་སྒྲོན་མེ་སོགས་བསྡུས་ཤིང་བརྩམས་པར་མཛད། དེས་སྐལ་པ་མཆོག་ཏུ་གྱུར་པའི་སྐྱེས་བུ་བཞི་ལ་དབང་བསྐུར་ཏེ་མ་གྷ་དྷར་མདོ་མཁན་དྷརྨ་བོ་དྷི་ལ་དབང་བསྐུར། རྟ་དང་གླང་པོ་ཆེ་ཡོན་དུ་ཕུལ། གསང་མཚན་ཤེས་རབ་མཐར་ཕྱིན་རྩལ་དུ་བཏགས། མདོའི་དོན་བསྡུས་དང་། ཤེས་རབ་སྒྲོན་མེ། བཀོལ་མདོ་རྣམས་བརྩམས། ཤྲཱི་ནཱ་ལེནྡར་མཁན་པོ་ཆོས་རྒྱལ་སྐྱོང་ལ་དབང་བསྐུར་སྐབས་འདོད་པའི་ཡོན་ཏན་ལྔས་མཆོདཅིང་གསང་མཚན་རྡོ་རྗེ་བདེ་བྱེད་རྩལ་དུ་བཏགས། འདི་ཉིད་ཀྱིས་བལ་པོའི་རྒྱལ་པོ་བ་སུ་དྷ་ར་དང་། རྒྱ་གར་གཙུག་ལག་དཔལ་དགེ་གཉིས་ལ་རྒྱལ་པོའི་ཁབ་ཏུ་དབང་བསྐུར་པས་གསེར་བཟང་པོའི་ཡོན་ཕུལ། བ་སུ་དྷ་རའི་གསང་མཚན་རྡོ་རྗེ་ཐུགས་མཆོག་རྩལ་དང་། གཙུག་ལག་དཔལ་དགེའི་གསང་མཚན་རྡོ་རྗེ་གཙུག་ཏོར་རྩལ་ཞེས་བཏགས། དྷརྨ་བོ་དྷི། དྷརྨ་རཱ་ཛ། བ་སུ་དྷ་ར་གསུམ་གྱིས་བྲུ་ཤའི་ལོ་ཙཱ་བ་ཆེ་བཙན་སྐྱེས་ལ་རྒྱ་གར་གྱི་ཡུལ་དབུས་སུ་དབང་བསྐུར་ཅིང་། སུ་ཝཪྞའི་དཀོར་ཆ་མང་པོས་སོ་སོར་མཆོད་ཅིང་གསང་མཚན་རྡོ་རྗེ་ལེགས་ཐོབ་རྩལ་དུ་བཏགས། ཡང་ཉེ་བརྒྱུད་དབང་བསྐུར་བ་པོའི་སློབ་དཔོན་དེ་གསུམ་ཀས་དྷ་ན་རཀྵི་ཏ་ལའང་ཐོབ་ཅེས་བྱུང་ཡང་གཏད་རྒྱ་ལྟར་ན་དབང་བཀའི་བརྒྱུད་པ་དཀྱུས་སུ་བཀོད་པ་ཉིད་ཡིན་པར་གསལ་བས་བཤད་བཀའ་དང་མན་ངག་བཀའི་ཉེ་བརྒྱུད་དུ་སྣང་ངོ་ཞེས་ཚད་མའི་ཡིག་ཆར་གསལ། དེ་ལྟར་སྨོས་པའི་བརྒྱུད་པ་དེ་ཐམས་ཅད་ཀྱང་དབང་བརྒྱུད་ཙམ་དུ་མ་ཟད། རྒྱུད་ཀྱི་བཤད་བཀའ་དང་མན་ངག་གི་བཀའ་ཐམས་ཅད་འདུས་པའི་བརྒྱུད་ལུགས་ཡིན་ཞིང་། བཤད་བཀའ་ལ་རྣམ་པ་གཅིག་ཏུ་ན། དྷ་ན་རཀྵི་ཏ་བྲུ་ཤའི་སློབ་དཔོན་ཆེ་བཙན་སྐྱེས་ཀྱིས་སྤྱན་དྲངས་ཏེ་མདོ་དགོངས་འདུས་བྲུ་ཤའི་ཡུལ་དུ་སྒྱུར་བར་བརྩམས་ཚེ་མོས་པ་ཆུང་བས་མ་འགྱུར་ཏེ་བལ་ཡུལ་དུ་བྱོན། དེར་དྷརྨ་བོ་དྷི་དང་བ་སུ་དྷ་ར་ལ་བཤད། ཕྱིས་བྲུ་ཤའི་ཡུལ་དུ་མདོ་མཁན་དྷརྨ་བོ་དྷི་དང་དྷ་ན་རཀྵི་ཏའི་སྤྱན་སྔར་ལོ་ཙཱ་བ་ཆེ་བཙན་སྐྱེས་ཀྱིས་བྲུ་ཤའི་སྐད་དང་ཡི་གེ་ལས་བོད་སྐད་དུ་བསྒྱུར་བ་ཡིན་ལ། དེའི་དུས་སུ་མི་མ་ཡིན་ཞིག་གིས་ཛམ་བུ་གླིང་ན་མེད་པའི་ལྷའི་མེ་ཏོག་པ་ཏ་ལའི་མདོག་ཤིང་རྟའི་འཕང་ལོ་ཙམ་ཞིག་ལག་ཏུ་ཐོགས་ཏེ་འོངས་ནས། སུ་ལས་ཐོས་ཞེས་གླེང་བ་ན། མཁན་པོ་དག་གིས། དཔལ་རྡོ་རྗེ་སེམས་དཔའ་ལས་ཐོས་ཞེས་སྨྲས་པས། དེས་མེ་ཏོག་གཏོར་ཞིང་སྐོར་བ་ལན་གསུམ་བསྐོར་ཏེ་མངོན་པར་བཏུད་ཅིང་གླང་པོ་ཆེའི་བརྟུལ་ཞུགས་ལྟ་བུས་ཐེ་ཚོམ་མེད་པར་བཀུར་ནས་ཛི་ན་རཱ་ཛ་ཞེས་ཟེར་ནས་སླར་སོང་ངོ་། །དེ་ལ་མཁན་པོ་དག་ངོ་མཚར་སྐྱེས་ཤིང་ལེགས་པའི་ཡོན་ཏན་ཡང་མང་དུ་བྱུང་ཞེས་གྲགས། དེ་ལ་ལོ་ཙཱ་བ་ཆེ་བཙན་སྐྱེས་ནི། ཡུལ་ཡར་ལུང་པ་ཡིན། སྐད་རིགས་གསུམ་ལ་སྦྱངས་ནས་ཕྱིས་བྲུ་ཤའི་ཡུལ་དུ་ཕྲིན་ལས་བསྐྱངས་པས་བྲུ་ཤའི་སློབ་དཔོན་དུ་གྲགས་ཤིང་། སྡེ་སྣོད་གསུམ་དང་གསང་སྔགས་ཕྱི་ནང་གི་རྒྱུད་སྡེ་མཐའ་དག་ལ་མཁས། རིག་པའི་གནས་སུ་གྱུར་པ་གང་ཡང་མི་མཁྱེན་པ་མེད་ཅིང་རིག་སྔགས་གྲུབ་པས་ཡེ་ཤེས་ཀྱི་ལྷས་མངོན་སུམ་དུ་དབང་བསྐུར་བ་དང་། ཡི་དམ་གྱི་ལྷ་དང་བཀའ་མཆིད་མོལ་བར་མཛད། རྡོ་རྗེའི་མཁའ་འགྲོ་ཐམས་ཅད་དབང་དུ་འདུས་ཤིང་བྲན་དུ་ཁོལ། རིམ་པ་གཉིས་ཀྱི་ལམ་གྱིས་དངོས་གྲུབ་བརྙེས་པས་རིག་པ་འཛིན་པའི་ས་ལ་བཞུགས་སོ། །རྒྱ་བལ་བྲུ་ཤའི་སློབ་དཔོན་རྣམ་བཞི་ལས་གནུབས་ཆེན་སངས་རྒྱས་ཡེ་ཤེས་ཀྱིས་གཞུང་བཤད་དབང་བཀའ་ཕྱག་བཞེས་ཕྲ་གཅོད་སོགས་གདམས་ངག་གི་གནད་ལ་ཞུན་མཐར་བཅད་དེ་བོད་ཡུལ་དུ་རྒྱས་པར་སྤེལ་ཚུལ་འོག་ཏུ་འབྱུང་བ་ལས་མཁྱེན་པར་འཚལ་ལོ། །

༣ མན་ངག་རྫོགས་པ་ཆེན་པོ་ཨ་ཏི་ཡོ་གའི་བརྒྱུད་ཚུལ།

ཀ རྒྱལ་བ་དགོངས་བརྒྱུད།

གསུམ་པ་མན་ངག་རྫོགས་པ་ཆེན་པོ་ཨ་ཏི་ཡོ་གའི་བརྒྱུད་ཚུལ་ནི། དེ་ཡང་ཐེག་པའི་རྩེ་རྒྱལ་འོད་གསལ་རྫོགས་པ་ཆེན་པོ་ཨ་ཏི་ཡོ་གའི་བརྒྱུད་ཚུལ་བྱེ་བྲག་ཏུ་རྒྱས་པར་བཤད་པ་ལ། ལུགས་འདིའི་ཐུན་མོང་མ་ཡིན་པའི་བཞེད་པ་རྒྱལ་བ་དགོངས་པའི་བརྒྱུད་པ་བཱི་མ་སྙིང་ཐིག་དང་ཐེག་མཆོག་རིན་པོ་ཆེའི་མཛོད་ལས་བྱུང་བ་ལྟར་མདོ་ཙམ་བཀོད་པར་འདོད་དེ། དེ་ལ་བདག་ཅག་གི་སྟོན་པ་དཔལ་ཀུན་ཏུ་བཟང་པོ་ཉིད་གཞི་གདོད་མའི་དབྱིངས་སུ་མངོན་པར་བྱང་ཆུབ་སྟེ། སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ལས་མ་གཡོས་པར་བཞུགས་པའི་ཚུལ་ལ། ནང་གསལ་ཆོས་སྐུའི་གནས་སྐབས་ན་ངོ་བོ་རང་བཞིན་ཐུགས་རྗེ་གསུམ་དབྱིངས་ཀྱི་སྐུ་གསུམ་དུ་གནས་པའི་རྣམ་པ་ཡུལ་ལ་མི་སྤྱོད་པའི་ཕྱིར་ཐམས་ཅད་མཁྱེན་པའི་ཡེ་ཤེས་ངང་གིས་འོད་གསལ་བའོ། །དེའི་ཚེ་གནས་ཕུན་སུམ་ཚོགས་པ་ཆོས་སྐུའི་ཞིང་ན། སྟོན་པ་ཕུན་སུམ་ཚོགས་པ་ཀུན་ཏུ་བཟང་པོ། འཁོར་ཕུན་སུམ་ཚོགས་པ་ཡེ་ཤེས་རྒྱ་མཚོ་ལ། དུས་ཕུན་སུམ་ཚོགས་པ་ཆོས་ཉིད་འཕོ་འགྱུར་མེད་པའི་ཚེ། ཆོས་ཕུན་སུམ་ཚོགས་པ་རང་བཞིན་རྫོགས་པ་ཆེན་པོ་རང་ཆས་ལྷུན་གྱིས་གྲུབ་པའི་ངང་དུ་འོད་གསལ་བའོ། །དེ་ནས་དེ་ཉིད་ཀྱི་ངང་ལས་མ་གཡོས་བཞིན་དུ་རང་སྣང་ལོངས་སྤྱོད་རྫོགས་པའི་སྐུར་རང་བྱུང་བ་ནི། རང་བཞིན་གྱི་སྣང་ཆ་ལས་རྣམ་དག་སྟུག་པོ་བཀོད་པ་བདེ་བའི་ཞིང་ཐམས་ཅད་ཀྱང་ཡེ་ཤེས་ལྔའི་རང་མདངས་ལས་བྱུང་བ། སྟེང་དང་འོག་དང་ཕྱོགས་མཚམས་མ་ཡིན་ཞིང་འོད་ཁྱིམ་རིན་པོ་ཆེའི་ཁང་བུ་བཀོད་ལེགས་པ་ན། རིགས་ལྔའི་སངས་རྒྱས་སོ་སོའི་དཀྱིལ་འཁོར་གྱི་ཚོམ་བུ་འབུམ་ཕྲག་བརྗོད་ལས་འདས་པས་བསྐོར་བ་རྣམས་ཀྱང་། གདུལ་བྱ་དང་འདུལ་བྱེད་མ་ཡིན་ཞིང་རང་སྣང་ལྷུན་གྱིས་གྲུབ་པའི་མངའ་དབང་དུ་རང་བྱུང་བ་དེ་ཉིད་ཀྱི་སྣང་ཆ་ལས་རིགས་ལྔའི་སངས་རྒྱས་གྲངས་མེད་བསམ་གྱིས་མི་ཁྱབ་པ་འཕྲོ་ཞིང་སྣང་བ་ཐམས་ཅད་ཀྱང་། ཟ་འོག་གི་བེར་ཁྱིམ་བཀྲ་བ་ལྟར་བཀོད་ལེགས་ཤིང་ཁ་དོག་ལྔར་འོད་འབར་བ་ནི། ཞལ་དང་ལྗགས་ཀྱི་དཀྱིལ་འཁོར་ལས་ཡི་གེ་དྲུག་གི་འོད་ཟེར་མུ་མེད་པར་འཕྲོ་བ་ལས་རང་བྱུང་བའོ། །དེའི་ཚེ་གནས་ཕུན་སུམ་ཚོགས་པ་རྣམ་དག་སྟུག་པོ་བཀོད་པར། སྟོན་པ་ཕུན་སུམ་ཚོགས་པ་རིགས་ལྔའི་སངས་རྒྱས། འཁོར་ཕུན་སུམ་ཚོགས་པ་སངས་རྒྱས་ཀྱི་དཀྱིལ་འཁོར་ཚད་མེད་པས་བསྐོར་བ་ལ། ཆོས་ཕུན་སུམ་ཚོགས་པ་ཡེ་ཤེས་འོད་གསལ་བའི་དགོངས་པ། དུས་ཕུན་སུམ་ཚོགས་པ་ཆོས་ཉིད་བསམ་གྱིས་མི་ཁྱབ་པའི་ཚེ་རང་ཆས་སུ་ངང་གིས་འོད་གསལ་བའི་དགོངས་པ་རང་བཞིན་བརྗོད་དུ་མེད་པར་སྟོན་ཏོ། །དེ་ཉིད་ཀྱི་ངང་ལས་སྤྲུལ་པའི་སྐུ་མངོན་པར་འཕྲོ་བ་ནི། གདུལ་བྱའི་དབང་ལས་འོད་འཕྲོ་བ་རང་སྣང་བ་ཆུའི་ཟླ་བ་ལྟ་བུ་སྟེ། འདིའི་དུས་སུ་སྟེང་འོག་ཕྱོགས་མཚམས་ཀྱི་འགྲོ་བ་དྲུག་སོ་སོར་འཁྲུལ་པའི་དབང་གིས་རང་གི་གནས་དང་བདེ་སྡུག་གི་སྣང་བ་དུ་མ་ལ་སྤྱོད་པས་སེམས་ཀྱི་འཁྲུལ་སྣང་ལ་ཞེན་པའི་ཚེ། ས་དང་པོ་ནས་ས་བཅུ་པའི་བར་གྱི་སེམས་དཔའ་རྣམས་ལ། ཕྱོགས་བཅུའི་ཞིང་དུ་རང་བཞིན་སྤྲུལ་པའི་རིགས་ལྔ་སོ་སོར་སྣང་བས་དོན་མཛད་ཅིང་། འགྲོ་བ་དྲུག་གི་གནས་སུ་ཐུབ་པ་བཅོམ་ལྡན་འདས་གྲངས་མེད་པས་ཆོས་ཀྱི་འཁོར་ལོ་བསྐོར་ཅིང་དོན་མཛད་པ་ལས། རེ་ཞིག་མི་མཇེད་འདིར་སྤྲུལ་པའི་འཕྲོ་ཚུལ་ནི། དེ་ལྟར་རང་སྣང་ལྷུན་གྲུབ་སྟུག་པོ་བཀོད་པའི་ཞིང་ནས་སྤྲུལ་པ་ཆེན་པོ་གཉིས་སྣང་བ་ལས་བྱིན་རླབས་མཆོག་གི་སྤྲུལ་པ་ནི་གསུམ་སྟེ། རིན་པོ་ཆེ་བརྒྱ་རྩ་གཅིག་གི་རྒྱུ་ལས་བྱུང་བར་རང་སྣང་བའི་སྐུ་གཟུགས་འགྲོ་བ་གང་གི་ཚེ་ལོའི་ལུས་བོངས་དང་མཉམ་པ་ལས་ཆོ་འཕྲུལ་དུ་མ་འབྱུང་བས་འགྲོ་བ་གྲོལ་བར་བྱེད་པ་དང་། རིན་པོ་ཆེ་ལས་རང་བྱུང་བར་སྣང་བའི་ཡི་གེ་ཆེན་པོ་བསྟན་པ་བུ་གཅིག་གི་རྒྱུད་ལས་ཆོས་ཀྱི་རྣམ་གྲངས་བརྗོད་དུ་མེད་པར་རང་གྲག་པས་དོན་བྱེད་པ་དང་། ཆོས་ཉིད་ཀྱིས་རྡོ་རྗེ་ཚེ་ལོ་དང་པོའི་མི་རྣམས་ཀྱི་ཆག་གང་བ་ལས་གང་ལ་གང་འདུལ་གྱི་ཆོས་དང་ཡོ་བྱད་ཀྱི་ཆར་འབེབས་པར་བྱེད་ཅིང་གྲོལ་བར་བྱེད་པ་དང་གསུམ་སྟེ། ཡི་གེ་དེ་ཡང་སྐད་རིགས་མི་གཅིག་པ་གང་གི་སྒྲ་སྐད་དེར་གྲག་པའོ། །དེ་དག་གིས་འཇིག་རྟེན་དྲུག་གི་ཕྱོགས་བཅུ་ཀུན་ཏུ་འོད་ཟེར་འགྱེད་ཅིང་འགྲོ་བ་དཔག་ཏུ་མེད་པ་རང་བཞིན་གྱིས་འབད་པ་མེད་པར་གྲོལ་བའི་ཕྲིན་ལས་མཛད་དེ་སྐུ་གསུང་ཐུགས་ལས་རང་བྱུང་གི་སྤྲུལ་པ་ཆེན་པོ་ཞེས་བྱའོ། །ཡེ་ཤེས་དམ་པའི་སྤྲུལ་པ་ནི། འགྲོ་བ་གང་ལ་གང་འདུལ་གྱིས་དེ་དང་དེའི་གཙོ་བོ་ལ་སོགས་པར་སྣང་བས་དོན་མཛད་པ་སྟེ། དེའང་རང་སྣང་ལྷུན་གྲུབ་སྟུག་པོ་བཀོད་པའི་རྒྱལ་བ་ཐམས་ཅད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལས་རང་བྱུང་བ། སྤྲུལ་པའི་སྐུ་རྡོ་རྗེ་འཆང་ཆེན་པོ་ལོངས་སྤྱོད་རྫོགས་པའི་ཆ་བྱད་དུ་ཞིང་འདིའི་བསྐལ་པ་དང་པོ་དགའ་ལྡན་བརྩེགས་པ་ཞེས་བྱ་བ་ལ། པདྨའི་སྟེང་དུ་རང་བྱོན་ནས་རྡོ་རྗེ་སེམས་དཔའ་དང་ཕྱག་ན་རྡོ་རྗེ་ལ་རང་བཞིན་རྫོགས་པ་ཆེན་པོའི་ཆོས་ཐམས་ཅད་ཚིག་དང་ཡི་གེ་ལས་འདས་པ་དགོངས་པས་རང་སྣང་དུ་གོ་བར་མཛད་ལ། དེའི་ཚེ་རྡོ་རྗེ་འཆང་ཆེན་རྫོགས་པའི་སངས་རྒྱས་དེས་གདུལ་བྱ་བསམ་གྱིས་མི་ཁྱབ་པའི་དོན་དུ་འདུལ་བྱེད་ཀྱི་སྐུ་ཡང་དེ་སྙེད་དུ་སྤྲུལ་པ་ནི། འཁོར་རྣམས་ཀྱི་ཕུང་པོ་ལྔ་དག་པར་བྱེད་པའི་དོན་དུ་ཕུན་སུམ་ཚོགས་པ་ལྔ་དང་ལྡན་པ་ཉིད་ཡིན་ནོ། དེ་ཡང་སྟོན་པ་ཕུན་སུམ་ཚོགས་པ་རྡོ་རྗེ་འཆང་ཆེན་པོ་དེས་ཡུལ་དགའ་ལྡན་བརྩེགས་པར། གནས་ཕུན་སུམ་ཚོགས་པ་མེ་ཏོག་པདྨའི་སྟེང་དུ། སྟོན་པ་ཁྱེའུ་སྣང་བ་བསམ་གྱིས་མི་ཁྱབ་པས། འཁོར་སངས་རྒྱས་སྟོང་རྩ་གཉིས་ལ། བསྟན་པ་རྒྱུད་ཐམས་ཅད་ལས་སྔ་བ་བསྟན་པ་ཀུན་ཀྱི་རྩ་བ་སྒྲ་ཐལ་འགྱུར་གསུངས་པར། རྒྱུད་ཀྱི་སྡུད་པ་པོ་ནི་ལྷའི་བུ་དགའ་བྱེད་དབང་ཕྱུག་གིས་མཛད། གྲོགས་ནི་ལྷའི་བུ་ཉི་མ་རབ་ཏུ་སྣང་བྱེད་ལ་སོགས་པ། དུས་ཚེ་ལོ་དཔག་ཏུ་མེད་པའི་དུས་ནའོ། དེའང་སྟོན་པ་དང་འཁོར་ཐ་དད་མེད་ཀྱང་འགྲོ་བ་འདུལ་བ་ལ་དགོངས་ནས་སོ་སོར་སྣང་བ་ཡིན་ཏེ། བསྐལ་པ་འདི་ལ་སངས་རྒྱས་ཀྱི་མཚན་ཐ་དད། དུས་ཐ་དད། ཆོས་ཐ་དད་པས་འདུལ་བར་དགོངས་ནས་རིམ་པ་ཐ་དད་པར་བྱོན་པའོ། །

དེ་ནས་སྤྲུལ་སྐུ་རིམ་གྱིས་མཆེད་ཚུལ་ནི། གཉིས་པ་གནས་མི་མཇེད་འཇིག་རྟེན་དུ། སྟོན་པ་ཁྱེའུ་འོད་མི་འཁྲུགས་པ། འཁོར་མཁའ་འགྲོ་མ་འབུམ་ཕྲག་གཉིས། བསྟན་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་ལྔ། ཐབས་འབྱུང་བ་ཚ་གྲང་གི་རང་སྒྲ་ལས་ཁྱབ་འཇུག་ཟུར་ཕུད་ལྔ་པའི་སྐད་ཀྱིས་གསུངས། དུས་ཚེ་ལོ་བྱེ་བ་གཅིག་ཐུབ་པའི་དུས་ནའོ། །ཡང་གསུམ་པ། གནས་དྲོད་གཤེར་འདུས་པ་འོད་ཀྱི་ཕུང་པོར། སྟོན་པ་འཇམ་དཔལ་འཇིགས་པ་སྐྱོབ་པ། འཁོར་བྱང་ཆུབ་སེམས་དཔའ་འབུམ་ཕྲག་དྲུག བསྟན་པ་འཁོར་བ་དོང་སྤྲུགས་དང་། རྨ་བྱ་མཇིང་བསྣོལ་དང་། དཔལ་འབྱུང་བཞི་ཟད་པའི་རྒྱུད་བར་སྣང་གི་ཁམས་སུ་བབ་ནས་རླུང་གི་སྒྲ་མ་ར་ཤ་ཤུ་ལས་དྲངས་ཏེ་མཁའ་ལྡིང་ཟུར་ཕུད་གསུམ་པའི་སྐད་ལ་བསྒྱུར་ཏེ་གསུངས་ལ། དུས་ཚེ་ལོ་འབུམ་པའི་དུས་ནའོ། །ཡང་བཞི་པ། གནས་འདོད་ཆགས་འབྱུང་བ་མངལ་དུ་སྣང་བར། སྟོན་པ་གཞོན་ནུ་རོལ་པ་རྣམ་པར་རྩེ་བས། འཁོར་གནོད་སྦྱིན་དང་བྲག་སྲིན་སྟོང་ཕྲག་ལྔ་ལ། བསྟན་པ་སེམས་སྡེ་རྩ་བའི་རྒྱུད་ལྔ་དང་། ཡན་ལག་གི་རྒྱུད་དྲུག་སྟེ་བཅུ་གཅིག་གསུངས། དུས་ཚེ་ལོ་བརྒྱད་ཁྲིའི་དུས་ནའོ། །ཡང་ལྔ་པ། གནས་འཚོ་བྱེད་གཞོན་ནུའི་ལྡུམ་རར། སྟོན་པ་དྲུག་པ་རྡོ་རྗེ་འཆང་གིས། འཁོར་སངས་རྒྱས་རབས་བདུན་ལ། བསྟན་པ་ཕ་རོལ་ཏུ་ཕྱིན་པ་དྲུག་ལ་སོགས་པ་དཔག་ཏུ་མེད་པ་གསུངས། དུས་ཚེ་ལོ་བདུན་ཁྲིའི་དུས་ནའོ། །ཡང་དྲུག་པ། གནས་གསང་ཆེན་རོལ་པའི་དུར་ཁྲོད་མེ་རི་འབར་བར། སྟོན་པ་གཞོན་ནུ་དཔའ་བོ་སྟོབས་ལྡན་ཆེན་པོས། འཁོར་བྱང་ཆུབ་སེམས་དཔའ་སྤྲིན་གྱི་ཤུགས་ཅན་བདུན་ལ། ཆོས་ཕ་རྒྱུད་མ་རྒྱུད་ལ་སོགས་པའི་རྒྱུད་སྡེ་དུ་མ་གསུངས་པར། དུས་ཚེ་ལོ་དྲུག་ཁྲིའི་དུས་ནའོ། །ཡང་བདུན་པ། གནས་སྲིན་པོ་རུ་ལུའི་སྒྲ་དང་ལྡན་པར། སྟོན་པ་དྲང་སྲོང་ཁྲོས་པའི་རྒྱལ་པོས། འཁོར་སྲིན་པོ་བྱེ་བ་གཅིག་ལ། ཆོས་རགས་པ་འདུལ་བའི་རྒྱུད་བཅུ་ལ་སོགས་པ་བསྟན་ཏེ། དུས་ཚེ་ལོ་ཁྲི་པའི་དུས་ནའོ། །ཡང་བརྒྱད་པ། གནས་བྱ་རྒོད་ཕུང་པོའི་རི་རྒྱལ་པོའི་ཁབ་ཏུ། སྟོན་པ་དགྲ་བཅོམ་པ་གསེར་འོད་དམ་པས། འཁོར་འཕགས་པ་ཉན་ཐོས་རྫུ་འཕྲུལ་དང་ལྡན་པ་དཔག་ཏུ་མེད་པ་ལ། ཆོས་དམ་པའི་ཆོས་འདུལ་བ་ཁྲི་ཕྲག་དཔག་ཏུ་མེད་པ་གསུངས་ཏེ། །དུས་ཚེ་ལོ་ལྔ་སྟོང་གི་དུས་ནའོ། །ཡང་དགུ་པ། གནས་སོག་པོ་གཡུ་ཡི་སྨིན་མ་ཅན་བྱང་ཆུབ་ཀྱི་ཤིང་རྣམ་པར་རྒྱལ་བའི་ཁང་པར། སྟོན་པ་བརྩེ་བས་རོལ་པའི་བློ་གྲོས་ཀྱིས། འཁོར་ས་བརྒྱད་པའི་བྱང་ཆུབ་སེམས་དཔའ་རྣམས་ལ། ཆོས་ཕྲ་རྒྱུད་བདུན་ལ་སོགས་པ་གསུངས་ལ། དུས་ཚེ་ལོ་སྟོང་གི་དུས་ནའོ། །ཡང་བཅུ་པ། གནས་བྱ་རྒོད་སྤུངས་པར། སྟོན་པ་འོད་སྲུང་བགྲེས་པོས། འཁོར་ཚེ་དང་ལྡན་པ་དགྲ་བཅོམ་པ་བདུན་ལ། དམ་པའི་ཆོས་མདོ་སྡེ་དང་། སྔགས་ཀྲི་ཡ་དང་། ལུང་ཨ་ནུ་ཡོ་གའི་ཆོས་ཁྲི་ཕྲག་ཕྱེད་དང་བརྒྱད་ལ་སོགས་པ་གསུངས་པར། དུས་ཚེ་ལོ་ལྔ་བརྒྱའི་དུས་ནའོ། །ཡང་བཅུ་གཅིག་པ། གནས་རྡོ་རྗེ་གདན་བྱང་ཆུབ་འབྱུང་བར། སྟོན་པ་མངོན་རྫོགས་རྒྱལ་པོས། འཁོར་རིགས་གསུམ་མགོན་པོ་ལ། ཆོས་ངེས་པའི་དོན་འབའ་ཞིག་ཏུ་གསུངས་པའི། དུས་ཚེ་ལོ་སུམ་བརྒྱ་པའི་དུས་ནའོ། །ཡང་བཅུ་གཉིས་པ། གནས་ཕུན་སུམ་ཚོགས་པ་མགོན་མེད་ཟས་སྦྱིན་གྱི་ཀུན་དགའ་ར་བར། སྟོན་པ་ཕུན་སུམ་ཚོགས་པ་ཤཱཀྱ་ཐུབ་པས། འཁོར་རྣམ་པ་བཞི་ལ། ཆོས་ཕུན་སུམ་ཚོགས་པ་བདེན་པ་བཞིའི་ཆོས་ཀྱི་འཁོར་ལོ་ལན་བཅུ་གཉིས་སུ་བསྐོར་ཏེ། དེ་ཡང་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་དང་། རྒྱུ་དང་། ཀུན་འབྱུང་། རབ་སྐྱེ། རྐྱེན་གྱི་རྣམ་པ། ལམ། རིགས་པ། སྒྲུབ་པ། ངེས་འབྱིན། འགོག་པ། ཞི་བ། གྱ་ནོམ་པ། ངེས་འབྱུང་སྟེ་ལན་བཅུ་གཉིས་སུ་བསྐོར་ལ། དུས་ཚེ་ལོ་བརྒྱ་པའི་དུས་ནའོ་ཞེས་འབྱུང་ངོ་། །

ཁ རིག་འཛིན་བརྡའ་བརྒྱུད།

གཉིས་པ་རིག་འཛིན་བརྡ་ཡི་བརྒྱུད་པ་ནི། ཇི་སྐད་དུ། ཉོན་མོངས་རྒྱུད་དྲག་ནུས་མཐུ་ཞན། །ལས་ཀྱིས་ཚེ་ཐུང་བཀའ་རྙིང་སྟོར། །བསྟན་སྙིང་གྲུབ་མཐའ་ངན་པས་བསྒྱུར། །གཉེན་པོས་མི་ནོན་སྒྲུབ་ཚུགས་ཞན། །དེ་ཚེ་རིག་པའི་རྣམ་རྟོག་ཤར། །ཞེས་རྩོལ་མེད་ཨ་ཏིའི་བསྟན་པ་འབྱུང་བའི་དུས་དྲུག་ལ་བབས་པའི་ཚེ། སུམ་ཅུ་རྩ་གསུམ་གྱི་ལྷ་དེ་བ་བཟང་སྐྱོང་གི་བུ་སེམས་ལྷག་ཅན་ལ་རྨི་ལྟས་ཁྱད་པར་ཅན་བཞི་བྱུང་བ་དང་མཐུན་པར་རྡོ་རྗེ་སེམས་དཔས་རྩ་དབང་རྒྱལ་ཐབས་སྤྱི་བླུགས་ཀྱི་དབང་བསྐུར་ནས་ལྷའི་གནས་སུ་དར། དེ་ནས་མི་ཡུལ་དུ་གསང་བའི་བདག་པོས་དུར་ཁྲོད་མེ་རི་འབར་བར་མཁའ་འགྲོ་དང་། མཁའ་འགྲོ་མ། གྲུབ་པ་དང་། རིག་པ་འཛིན་པའི་ཚོགས་ལ་གསང་བ་སྔགས་ཀྱི་ཆོས་བསྟན་པའི་ཚེ་སློབ་དཔོན་དགའ་རབ་རྡོ་རྗེ་མི་ཡུལ་དུ་བྱོན་པ་སྟེ། ཇི་སྐད་དུ། སྒྲ་ཐལ་འགྱུར་རྩ་བའི་རྒྱུད་ལས། ང་ནི་མྱ་ངན་འདས་འོག་ཏུ། །ནུབ་ཕྱོགས་ཨོ་རྒྱན་དག་གི་ཡུལ། །དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་སྟེ་བཛྲ་ཧེ། །འདིས་ནི་དམ་པའི་བསྟན་པ་འཛིན། །ཞེས་པ་ལྟར་ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་ཞེས་བྱ་བར། བདེ་བྱེད་བརྩེགས་པའི་མཆོད་རྟེན་ཞེས་གྲགས་པ་ལྷ་ཁང་ཆེན་པོ་གཅིག་ལ་ལྷ་ཁང་ཆུང་ངུ་སྟོང་དྲུག་བརྒྱ་བརྒྱད་ཀྱིས་བསྐོར་བའི་དཔལ་འབྱོར་ཕུན་སུམ་ཚོགས་པའི་གནས་སུ། ཡབ་རྒྱལ་པོ་དྷ་ཧེ་ན་ཏ་ལོ་དང་ཡུམ་བཙུན་མོ་བརྩོན་རྒྱལ་གཉིས་ལ་སྲས་མོ་པྲ་ར་ནི་བྱ་བའི་དགེ་སློང་མ་ཞིག་བྱུང་། དེ་ཉིད་ཡུལ་དེ་ནས་དཔག་ཚད་ཙམ་འདས་པའི་གསེར་གྱི་བྱེ་མ་བརྡལ་བའི་མཚོ་གླིང་ཞིག་ཏུ་རྩའི་སྤྱིལ་བུ་ཆུང་ངུ་ཞིག་ལ་བརྟེན་ཏེ། གཡོག་མོ་བདེ་བའི་སྙིང་ལྡན་མ་བྱ་བ་དང་ལྷན་གཅིག་ཏུ་རྣལ་འབྱོར་བསྒོམས་ཤིང་གནས་སོ། །ཤིང་མོ་གླང་གི་ལོའི་དབྱར་ཟླ་ར་བའི་ཚེས་བརྒྱད་ཀྱི་ཐོ་རངས་ཁའི་རྨི་ལམ་ན། དེ་བཞིན་གཤེགས་པ་ཐམས་ཅད་ལས་འོད་ཟེར་འཕྲོས་ཏེ་ཉི་ཟླ་གཉིས་སུ་གྱུར་པ་ལས་ཉི་མ་སྤྱི་བོ་ནས་མར་དང་ཟླ་བ་རྐང་མཐིལ་ལས་ཡར་ཐིམ་པ་རྨིས་སོ། །དེའི་ནང་པར་མཚོ་ཀུ་ཏྲིའི་འགྲམ་དུ་ཁྲུས་བྱས་ནས་ཁ་ཤར་དུ་ཕྱོགས་ནས་འདུག་པ་ལ། ཕྱག་ན་རྡོ་རྗེ་གསེར་གྱི་ངང་པ་ཞིག་ཏུ་སྤྲུལ་ནས་ལྷའི་བུ་སེམས་ལྷག་ཅན་ཡི་གེ་ཧཱུྃ་ཞིག་ཏུ་བསྡུས། སྤྲུལ་པའི་བྱ་ངང་པ་བཞི་དང་བཅས་ནམ་མཁའ་ལས་བབ་སྟེ་སྲས་མོའི་མདུན་དུ་ཁྲུས་བྱས་པའི་མཐར་སྤྲུལ་གཞི་ནམ་མཁའ་ལ་འཕུར། སྤྲུལ་པའི་གཙོ་བོ་གསེར་གྱི་བྱས་སྲས་མོའི་སྙིང་ཁར་མཆུ་ལན་གསུམ་གཏུགས་ནས་ཧཱུྃ་འོད་འབར་བ་ཞིག་བསྟིམས་ནས་སྔར་གྱི་གནས་སུ་འཕུར་རོ། །དེ་ནས་མི་རིང་བར་ཟླ་དུས་ཚང་བ་ན་རྩིབ་མ་གཡས་པའི་གོ་བར་ནས་ཁྱེའུ་མཚན་དང་དཔེ་བྱད་ཀྱིས་བརྒྱན་པ་ཞིག་བལྟམས་པ་ན། ཡུམ་དགེ་སློང་མ་ཤིན་ཏུ་ངོ་ཚ་ནས་སྨྲས་པ། ཕ་མེད་བུ་འདི་འདྲེ་བས་གཞན་པ་སུ། །གལ་ཏེ་ལྷ་དང་ལྷ་མིན་སྣ་ཚོགས་གཟུགས། །འདི་ལྟར་འབྱུང་བའི་དཔེ་ནི་སུས་མཐོང་མེད། །རྒྱལ་ཁམས་ཆོས་མེད་འདི་ནི་སུ་ལ་སྲིད། །ཅེས་སོགས་སྨྲེ་སྔགས་མང་དུ་བཏོན་ཏེ་ཐལ་དོང་དུ་བསྐྱུར་བ་ན་སྒྲ་དང་འོད་ལ་སོགས་པའང་བྱུང་བར་གྱུར་ཏོ། །དེ་ནས་ཞག་གསུམ་ནས་བལྟས་པས་ཅི་ཡང་མ་ཉེས་པར་མཐོང་བས་སྤྲུལ་བ་ཡིན་པར་ཤེས་ཏེ་བཀུར་སྟི་ཆེན་པོ་དང་བཅས་པས་སྤྱན་དྲངས་པ་ན། བར་སྣང་ནས་ལྷ་རྣམས་ཀྱིས། མགོན་པོ་ཆེན་པོ་བཅོམ་ལྡན་འདས། །བདག་ཀྱང་རབ་ཏུ་སྐྱབས་པ་དང་། །ནམ་མཁའི་རྡོ་རྗེ་དེང་བདག་གསོལ། །ཞེས་བཀྲ་ཤིས་པར་བརྗོད་ཅིང་མཁའ་འགྲོ་མ་རྣམས་ཀྱིས་མཆོད་པའི་སྤྲིན་གཏིབས་ཏེ་ལྷ་དང་ཀླུ་དང་གནོད་སྦྱིན་ལ་སོགས་པས་ཙནྡན་དང་གུར་གུམ་གྱི་ཆར་འབེབས་པ་སོགས་བྱུང་ངོ་། །ལོ་བདུན་སོང་བ་ན་སྲས་ཀྱིས་ཡུམ་ལ། ཀྱེ་བདག་གིས་པཎྜི་ཏ་རྣམས་ལ་ཆོས་ཀྱི་གཏམ་བགྲོ་གླེང་བྱེད་པར་འཚལ་ན་ཡུམ་བདག་ལ་ཅི་བདེར་གནང་བ་སྩོལ་ཅིག །ཅེས་གསུངས་པ་ན། ཡུམ་གྱིས་བུ་ཁྱོད་ནི་ཤིན་ཏུ་གཞོན་པས་པཎྜི་ཏ་རྣམས་མཁས་ཤིང་གཞུངས་པས་ཁྱོད་ཀྱིས་ཐུབ་པ་དཀའ་འོ་ཟེར། ཅིས་ཀྱང་བགྱི་བར་གསོལ་བ་ན། རྒྱལ་པོས་ཁྱེའུ་འདི་ནི་གཞོན་པས་པཎྜི་ཏ་རྣམས་དང་ཆོས་ཀྱི་གཏམ་འོང་པ་དཀའ་མོད་ཀྱི། འོན་ཀྱང་ལུས་ལ་སྐྱེས་བུ་ཆེན་པོས་མཚན་མང་པོ་འདུག་པས་སྤྲུལ་བ་ཡིན་ཡང་སྲིད་སྙམ་ནས་མཆོད་གནས་པཎ་ཆེན་ལྔ་བརྒྱ་ལ་ཚུལ་དེ་བསྙད། དེ་ནས་པཎྜི་ཏ་རྣམས་ལ་ཕྱག་མཛད་ཅིང་བགྲོ་གླེང་དང་བརྒལ་བརྟག་གི་རིམ་པ་མང་དུ་མཛད་པས་པཎྜི་ཏ་རྣམས་ཀྱི་སྤོབས་པ་བཅོམ་པས་ཞབས་སྤྱི་བོར་བླངས་ཤིང་མཆོད་ནས་པྲ་ཛྙཱ་བྷ་བ་ཞེས་མཚན་གསོལ། རྒྱལ་པོ་ངོ་མཚར་ཞིང་དགའ་བས་དགའ་རབ་རྡོ་རྗེ་ཞེས་མཚན་བཏགས། སྔར་ཡུམ་གྱིས་ཐལ་དོང་དུ་བསྐྱུར་ཀྱང་མ་ཉེས་པས་རོ་ལངས་ཐལ་མདོག་ཏུ་གསོལ། དེ་ནས་བྱང་ཕྱོགས་རི་བོ་ཉི་མ་རབ་ཏུ་སྣང་བྱེད་ཅེས་བྱ་བར་བྲག་རི་ཤིན་ཏུ་འཇིགས་པ་ཡི་དྭགས་ཀྱི་ཚོགས་མངོན་སུམ་དུ་རྒྱུ་བ་ཞིག་གི་སྟེང་དུ་རྩྭའི་སྤྱིལ་བུར་ལོ་སུམ་ཅུ་རྩ་གཉིས་ཀྱི་བར་དུ་ཏིང་ངེ་འཛིན་ལ་བཞུགས་པའི་ཚེ། ས་ཆེན་པོ་ལན་དུ་མར་གཡོས་ཤིང་ནམ་མཁའ་ལས་མུ་སྟེགས་ཀྱི་བསྟན་པ་ཉམས་པར་བྱས་སོ་ཞེས་སྒྲ་གྲག དེ་མུ་སྟེགས་ཀྱི་རྒྱལ་པོས་ཐོས་པས་གཤེད་མ་བཏང་ནས་སློབ་དཔོན་བཀྲོང་བར་བརྩམས་པ་ན་ནམ་མཁའི་ལམ་ནས་གཤེགས་པ་མཐོང་བས་རྒྱལ་པོ་འཁོར་བཅས་དད་དེ་སངས་རྒྱས་པའི་བསྟན་པར་ཞུགས། དེ་ནས་ཐེག་པ་ཕྱི་ནང་གི་སྡེ་སྣོད་རྣམས་དང་། ཁྱད་པར་འོད་གསལ་རྫོགས་པ་ཆེན་པོ་ཤྭ་ལོ་ཀ་འབུམ་ཕྲག་དྲུག་ཅུ་རྩ་བཞི་ཐུགས་ལ་བཞུགས་པ་རྣམས། རྡོ་རྗེ་སེམས་དཔས་ཞལ་མངོན་སུམ་དུ་བསྟན་ནས་རིག་པ་སྤྱི་བླུགས་ཀྱི་དབང་གིས་མི་སློབ་པའི་ཡེ་ཤེས་མངོན་དུ་མཛད་པའི་ཚུལ་བསྟན། ཚིག་གི་རྒྱུད་རྣམས་ཡི་གེར་འགོད་པའི་ལུང་བྱིན་ཏེ་རི་མཱ་ལ་ཡའི་རིན་ཆེན་སྤུངས་པ་རྒྱས་པའི་རྩེ་མོར་སློབ་དཔོན་ཉིད་དང་། རྡོ་རྗེ་དབྱིངས་ཀྱི་མཁའ་འགྲོ་མ་འཇིག་རྟེན་བདེ་བའི་རོ་དང་ལྡན་པ་དང་། བདེ་བྱེད་སེར་མོ། ཡོན་ཏན་མཐའ་ཡས་པའི་མཁའ་འགྲོ་མ་གསུམ་གྱིས་ལོ་གསུམ་གྱི་བར་དུ་ཚིག་དང་ཡི་གེར་དཀར་ཆག་ཏུ་བཏབ། རང་བྱུང་རང་བབ་ཀྱི་ཡི་གེ་སྤྲུལ་བའི་སྐུ་དང་བཅས་པ་ཕྱིན་ཅི་མ་ལོག་པར་ལེགས་པར་བཀོད་ནས་མཁའ་འགྲོ་མ་མངོན་པར་འབྱུང་བའི་ཕུག་ཏུ་བཞུགས་སུ་གསོལ། དེ་ནས་རྡོ་རྗེ་གདན་གྱི་བྱང་ཤར་དུར་ཁྲོད་ཆེན་པོ་བསིལ་བའི་ཚལ་ཞེས་བྱ་བ་དབུས་སུ་མཆོད་རྟེན་ཆེན་པོ་ཡོད་ཅིང་སེམས་ཅན་རབ་ཏུ་གདུག་པ་ཚོགས་པའི་གནས་སུ་བྱོན་ནས་མཁའ་འགྲོ་མ་ཉི་མའི་འོད་ཟེར་སོགས་ལ་ཆོས་བསྟན་པས་མཁའ་འགྲོ་མ་འབུམ་ཕྲག་མང་པོ་འཇའ་ལུས་སུ་གྲུབ་ཅིང་། སློབ་དཔོན་ཉིད་ཀྱང་ཆུ་བོ་དན་ཏིག་བྱ་བར་འོད་ཕུང་དུ་ཡལ་ལོ། །

དེ་ལས་སློབ་དཔོན་འཇམ་དཔལ་བཤེས་གཉེན་གྱིས་གསན་པ་སྟེ། ཇི་སྐད་དུ། ཐལ་འགྱུར་ལས། དེ་ཡི་རྗེས་འཛིན་ནུབ་ཀྱི་ཕྱོགས། །བྲམ་ཟེའི་ཕྲུ་གུ་སྐལ་ལྡན་པ། །མཉྫུ་ཤྲཱི་པ་ཏི་ཞེས། །ལོ་ནི་བདུན་ཅུ་རྩ་ལྔར་འཛིན། །ཞེས་པ་ལྟར་མ་གྷ་དྷ་རྡོ་རྗེ་གདན་གྱི་ནུབ་ཕྱོགས་སུ་ཡབ་བྲམ་ཟེ་དཔལ་ལྡན་སྐྱོང་དང་། ཡུམ་བྲམ་ཟེ་མོ་ཀུ་ཧ་ན་ཞེས་བྱ་བ་ལ་འཇམ་དཔལ་གྱི་སྤྲུལ་པ་ཁྱེའུ་མཚན་དང་ལྡན་པ་ཞིག་བྱུང་སྟེ། མཚན་ལ་བྲམ་ཟེ་སྙིང་པོ་གྲུབ་པའམ་བདེ་མཆོག་སྙིང་པོ་ཞེས་སུ་གྲགས། ནང་བའི་ཆོས་སྒོར་ཞུགས་ནས་རིག་པའི་གནས་ལྔ་ལ་མཁས་པའི་དགེ་སློང་རྒྱུ་འབྲས་ཀྱི་ཆོས་ཐམས་ཅད་ཐུགས་སུ་ཆུད་པ་ཞིག་ཏུ་གྱུར་ཏོ། །པཎྜི་ཏ་ལྔ་བརྒྱའི་མཆོག་ཏུ་གྱུར་པའི་ཚེ་སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བས་རྒྱུ་འབྲས་ལས་འདས་པའི་ཆོས་རྩོལ་མེད་རྫོགས་པ་ཆེན་པོ་སྒྲོག་གོ་ཞེས་ཕྱོགས་ཀུན་ཏུ་གྲགས། དེའི་ཚེ་བྲམ་ཟེ་སྙིང་པོ་གྲུབ་པ་ལ་རྗེ་བཙུན་འཇམ་དཔལ་གྱིས་ལུང་བསྟན་པ། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་། མཚོ་ཆེན་པོ་ཀུ་ཤའི་འགྲམ། དུར་ཁྲོད་གསེར་གླིང་ཧེ་ཆེན་བརྡལ་བའི་འདབས་རྡོ་རྗེ་གླིང་གི་ཕུག་པ་ན། སངས་རྒྱས་ཐམས་ཅད་ཀྱིས་རྩོལ་མེད་བསྟན་པའི་སྒྲོན་མེར་དབང་བསྐུར་བ་རྡོ་རྗེ་སེམས་དཔའི་སྤྲུལ་པ་དགའ་རབ་རྡོ་རྗེ་བྱ་བ་ཡོད་ཀྱི། དེ་ལ་རྨད་བྱུང་བསྟན་པའི་སྙིང་པོ་ཨ་ཏི་ཡོ་ག་ཞེས་བྱ་བ་རྩོལ་མེད་སྐད་ཅིག་ལ་འཚང་རྒྱ་བའི་ཆོས་ཡོད་པས་དེ་ལོངས་ལ་སྡུད་པ་པོ་གྱིས་ཤིག་ཅེས་ལུང་བསྟན་ཏོ། །དེར་པཎྜི་ཏ་གཞན་རྣམས་ན་རེ། རྒྱུ་འབྲས་ལས་འདས་པའི་ཆོས་ཡོད་པ་མི་རིགས་པས་སུན་དབྱུང་བར་འཐད་ཅེས་བགྲོས་སོ། །བྲམ་ཟེ་སྙིང་པོ་གྲུབ་པས་མཁྱེན་བཞིན་དུ་ཆོས་དང་གང་ཟག་གི་ཆེ་བ་འབྱིན་པའི་ཕྱིར་ཞལ་འཆམ་པའི་ཚུལ་གྱིས་རཱ་ཛ་ཧསྟི་སོགས་པཎྜི་ཏའི་མཆོག་བདུན་དང་ལྷན་ཅིག་ཏུ་སོང་ངོ་། །དགའ་རབ་རྡོ་རྗེའི་དྲུང་དུ་ལྷགས་ནས་རྒྱུའི་སྡེ་སྣོད་གསུམ་དང་འབྲས་བུ་གསང་སྔགས་ཕྱི་ནང་གང་གི་སྒོ་ནས་བརྩད་ཀྱང་མ་ཐུབ། བདེ་མཆོག་སྙིང་པོས་པཎྜི་ཏ་གཞན་རྣམས་ལ་འུ་ཅག་གིས་རྩོད་པ་ནོངས་པས་སྤྲུལ་བའི་སྐུ་འདི་ལས་རྒྱུ་འབྲས་ལས་འདས་པའི་ཆོས་མི་ཞུའམ་ཞེས་བགྲོ་བ་ལྟར་མཛད་པས། ལ་ལ་ནི་སྐྱེངས་ནས་ངོ་གནག་པར་གྱུར་ཅིང་། ལ་ལ་ནི་འོ་ཅག་གིས་བརྩད་ཅིང་བརྙས་པ་བྱས་པས་ཞུ་བར་མི་སྤོབས་ཟེར། དེར་བདེ་མཆོག་སྙིང་པོ་ལ་སོགས་པས་བཤགས་པ་བྱ་བར་བགྲོས་ཏེ་པཎྜི་ཏ་རྣམས་ཀྱིས་དགའ་རབ་རྡོ་རྗེ་ལ་ཕྱག་དང་སྐོར་བ་བྱས། སྙིང་པོ་གྲུབ་པས་རང་གི་ལྕེ་བཅད་དེ་བཤགས་པ་བྱ་བར་དགོངས་པ་ན། རིག་འཛིན་དགའ་རབ་རྡོ་རྗེས་མཁྱེན་ཏེ་ཚིགས་སུ་བཅད་པ་འདི་སྐད་གསུངས་སོ། །མཉམ་ཉིད་ཕྱོགས་བྲལ་ལྷུན་གྲུབ་བདེ་བ་ཆེ། །ཆོས་རྣམས་ཐམས་ཅད་བྱང་ཆུབ་སྙིང་པོ་ལ། །འགྲོ་དྲུག་རང་ལ་ཡུལ་བཟུང་ཞེན་པས་བཅིངས། །མུ་སྟེགས་མཐར་འཛིན་རྟག་ཆད་ལོག་ལྟར་ཞུགས། །ཐེག་བརྒྱད་ངང་ལ་གཉིས་བཟུང་ཡིན་མིན་གྱི། །ཞེ་འདོད་ཕྱོགས་རིས་དབྱིངས་ལ་ཕྱོགས་སུ་ཞེན། །མཉམ་པའི་དོན་ལ་ཕྱོགས་དང་རིས་སུ་བཅད། །རང་ལ་ཡོད་བཞག་མེད་པ་གཞན་དུ་འཚོལ། །ལྷུན་གནས་བདེ་བོར་རྩོལ་བས་དང་དུ་ལེན། །རང་སེམས་སངས་རྒྱས་ནམ་ཞིག་དུས་ལ་ལྟོས། །མཉམ་ཉིད་མ་རྟོགས་ཞེ་འདོད་ཕྱོགས་ལྟ་ལ། །འདི་ཡི་ཐང་ཆད་ཡུས་རྒྱས་སྙིང་རེ་རྗེ། །དེ་བས་ཕྱོགས་འཛིན་ཞེན་པའི་དུག་ཆོམས་ལ། །མཉམ་ཉིད་ཕྱོགས་བྲལ་བདེ་བའི་དོན་ལ་ཞུགས། །ཞེས་གསུངས་ནས་ཁྱོད་ཀྱིས་ལྕེ་བཅད་པས་སྡིག་པ་མི་འདག །རྒྱུ་འབྲས་ལས་འདས་པའི་ཆོས་ཁྱད་དུ་འཕགས་པ་ཞིག་རྩོམས་དང་དེས་སྡིག་པ་དག་པར་འགྱུར་རོ་གསུངས། ཕྱིས་སུ་བྱང་སེམས་སྡེ་ལ་འགྲེལ་པ་གསེར་ཞུན་བརྩམས་ཤིང་བཀའི་བསྡུ་བ་པོ་མཛད། དེར་བརྡ་བསྟན་པ་ཙམ་གྱིས་རྟོགས་གྲོལ་དུས་མཉམ་དུ་གྱུར་ཀྱང་བསྟན་པ་ཡོངས་སུ་རྫོགས་པར་བྱ་བའི་ཕྱིར་རིན་པོ་ཆེའི་མཎྜལ་སྣ་ཚོགས་པ་ཕུལ་ནས་སྙིང་པོའི་དོན་ཞུས་པས། སེམས་སྡེའི་སྐོར་རྩ་བའི་རྒྱུད་བརྒྱད་དང་། ཡན་ལག་གི་རྒྱུད་མཐའ་ཡས་པ། དབང་མན་ངག་ལ་སོགས་པ་རྒྱས་པར་གནང་། དེ་ནས་ཀློང་སྡེའི་སྐོར་ཕྱི་ནང་གསང་བའི་རྒྱུད་ཆེ་ཆུང་། དགོངས་པ་གཏད་རྒྱའི་སྐོར་ལ་སོགས་པ་རྒྱུད་མན་ངག་དང་བཅས་པས་མཚོན་ཨ་ཏི་ཡོ་གའི་རྒྱུད་དཔག་ཏུ་མེད་པ་གསུངས་སོ། །དེས་ཀྱང་ཐུགས་མ་ཚིམས་པར་ཕྱག་དང་སྐོར་བ་བྱས་ཏེ་རིན་པོ་ཆེའི་མེ་ཏོག་ཕུལ་ནས་གསོལ་བ་བཏབ་པས། རྒྱལ་ཐབས་སྤྱི་བླུགས་ཀྱི་དབང་བསྐུར། རང་གྲོལ་མངོན་སུམ་དུ་སྟོན་པ་མན་ངག་སྡེའི་སྐོར་ཡང་བྱིན་ཏེ་ཕྱི་ལྟར་འཇམ་དཔལ་བཤེས་གཉེན་དང་ནང་ལྟར་རྡོ་རྗེ་བདེ་བ་རྩལ་དུ་མིང་བཏགས། སླར་ཆུ་བོ་དན་ཏིག་བྱ་བར་དགའ་རབ་རྡོ་རྗེ་འོད་ཕུང་དུ་ཡལ་བའི་ཚེ། འཇམ་དཔལ་བཤེས་གཉེན་གྱིས་གདུང་ཚིག་ལན་གསུམ་བཏོན་པས་ནམ་མཁའ་འོད་ཕུང་གི་དཀྱིལ་ནས་སྐུ་མངོན་སུམ་སྣང་བར་མཛད་དེ། གསེར་གྱི་ཟ་མ་ཏོག་སེན་གང་བ་གཅིག་ཕྱག་ཏུ་བབ་པས་ཚིག་གསུམ་གནད་དུ་བརྡེག་པའི་མན་ངག་འདས་རྗེས་སུ་འདུག་པ་གཟིགས་པ་ཙམ་གྱིས་ཐུགས་སུ་ཆུད། དགའ་རབ་རྡོ་རྗེ་དང་རྟོགས་པ་མཉམ་པ་བྱུང་བས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་སྡེ་གསུམ་དུ་ཕྱེས་ཏེ། སེམས་གནས་རྣམས་ལ་སེམས་ཀྱི་སྡེ། །བྱ་བྲལ་རྣམས་ལ་ཀློང་གི་སྡེ། །གནད་གཙོ་བ་ལ་མན་ངག་སྡེ། །ཞེས་པ་ལྟར་རྫོགས་ཆེན་སྡེ་གསུམ་དུ་ཕྱེས་ཤིང་གནད་ལས་ཟབ་པ་སྙིང་གི་ཐིག་ལེའི་སྐོར་ལ་བཤད་རྒྱུད་དང་། རྣ་རྒྱུད་གཉིས་སུ་ཕྱེས་ནས་རྣ་རྒྱུད་མཆན་དུ་བཏབ། བཤད་རྒྱུད་སྙིང་གི་ཐིག་ལེ་རེ་ཞིག་སྤེལ་བའི་སྣོད་མ་རྙེད་པས་རྡོ་རྗེ་གདན་གྱི་བྱང་ཤར་ཕ་ཝང་རྡོ་རྗེ་རྒྱ་གྲམ་གྱིས་རྒྱས་བཏབ་པའི་འོག་ཏུ་སྦས་ཏེ་མི་སྣང་བར་བྱས། རྒྱལ་པོ་དྷ་ཧེ་ན་ཏ་སོགས་ལ་དགོངས་པའི་དོན་སྟོན་བཞིན་སོ་ས་གླིང་གི་དུར་ཁྲོད་དུ་ལོ་བརྒྱ་དང་ཉི་ཤུ་རྩ་དགུའི་བར་ཏིང་ངེ་འཛིན་ལ་བཞུགས་ཤིང་། དེར་མི་སྡུག་པའི་མཁའ་འགྲོ་མ་རྣམས་དང་སྤྱོད་པ་ལ་གནས་པའི་སྒྲུབ་པ་པོ་སེམས་ཅན་དཔག་ཏུ་མེད་པའི་དོན་མཛད་དོ། །སློབ་དཔོན་སངས་རྒྱས་ཡེ་ཤེས་ཞབས་ཀྱང་འདིའི་སློབ་མ་ཡིན་ཞིང་གྲོལ་བའི་ཐིག་ལེ་དང་། སྒྲུབ་ཐབས་ཀུན་བཟང་སོགས་བསྟན་བཅོས་ཀྱང་ཤིན་ཏུ་མང་པོ་མཛད་ལ། སློབ་དཔོན་འདིའི་རྫོགས་རིམ་གྱི་མན་ངག་བོད་དུ་འགྱུར་བ་རྣམས་སེམས་སྡེ་ཁོ་ནའི་གྲུབ་མཐའ་གཙང་སིང་ངེ་བར་གནས་ཞེས་སྔོན་གྱིས་མཁས་པ་དག་གསུངས་ཤིང་། འགའ་ཞིག་གིས་སློབ་དཔོན་ཤྲཱི་སེང་ཧ་དང་གཅིག་ཡིན་ཞེས་ཀྱང་བཞེད་དོ། །

དེ་ཉིད་ལས་རིག་འཛིན་ཆེན་མོ་ཤྲཱི་སེངྷས་གསན་པ་སྟེ། ཐལ་འགྱུར་ལས། དེ་ཡི་རྗེས་སུ་སྐལ་ལྡན་པ། །སོ་ས་གླིང་ཞེས་བྱ་བ་རུ། ཁྱིམ་བདག་རིགས་སྐྱེས་ཤྲཱི་སེང་། །ཞེས་བྱ་བ་ཡིས་འཛིན་པར་འགྱུར། །ཞེས་པ་ལྟར། རྒྱ་ནག་པོའི་གྲོང་ཁྱེར་ཤོ་ཁྱམ་ཞེས་པར་ཁྱིམ་བདག་དགེ་བའི་ཡིད་ཅན་དང་། ཡུམ་སྣང་བ་གསལ་བ་རབ་ཏུ་མཁྱེན་མ་གཉིས་ཀྱི་སྲས་སུ་སྐུ་འཁྲུངས། ལོ་བཅོ་ལྔ་ནས་སློབ་དཔོན་ཧ་རི་བྷ་ལ་སོགས་པཎྜི་ཏ་ལྔ་བརྒྱ་ལས་སྒྲ་ཚད་སོགས་ཐུན་མོང་གི་རིག་པ་རྣམས་ལོ་གསུམ་ལ་སྦྱངས་པ་མཛད་པས་མཁས་པ་ཆེན་པོར་གྱུར། སྐབས་ཤིག་ནུབ་ཕྱོགས་ཀྱི་གྲོང་ཁྱེར་གསེར་གླིང་བྱ་བར་འགྲོ་བའི་ལམ་བར་ནས་འཕགས་པ་སྤྱན་རས་གཟིགས་ནམ་མཁར་བྱོན་ཏེ་སྐལ་ལྡན་འབྲས་བུ་ངེས་པར་འདོད་ན་རྒྱ་གར་གྱི་དུར་ཁྲོད་སོ་ས་གླིང་དུ་སོང་ཞིག ཅེས་ལུང་བསྟན་པས་སློབ་དཔོན་ཉིད་ཡིད་ཚིམས་པར་མ་གྱུར་ཏེ་ད་དུང་འབྲས་བུ་བླ་ན་མེད་པ་གོ་སླ་བའི་ཕྱིར་གསང་སྔགས་ཀྱི་རྒྱུད་གཞན་ལ་མཁས་པར་བྱ་སྙམ་དུ་དགོངས་ཏེ་རི་བོ་རྩེ་ལྔ་རུ་གདོལ་བའི་རིགས་ཀྱི་སློབ་དཔོན་བྷེ་ལ་ཀིརྟི་ལས་སྔགས་ཕྱི་ནང་གི་ཆོས་མ་ལུས་པར་གསན་ཅིང་ཉམས་འོག་ཏུ་ཆུད་པར་མཛད། རབ་ཏུ་བྱུང་ནས་དགེ་སློང་སྡེ་སྣོད་འཛིན་པ་མཛད་ཅིང་ལོ་སུམ་ཅུའི་བར་དུ་སྦྱངས་པའི་ཡོན་ཏན་ལ་གནས། སླར་འཕགས་པའི་ལུང་གིས་སྔོན་བཞིན་བསྐུལ་བས་རྒྱ་གར་དུ་བགྲོད་པའི་ལམ་ལ་དཀའ་བ་མེད་པ་ཞིག་དགོངས་ཏེ་ལོ་གསུམ་དུ་སྒྲུབ་པ་ལ་བཞུགས་པས་རིག་པ་འཛིན་པའི་སྐུར་གྱུར། དེ་ནས་ཞབས་ས་ལ་ཁྲུ་གང་ཙམ་གྱིས་མ་རེག་པར་དུར་ཁྲོད་སོ་ས་གླིང་དུ་བྱོན་ནས་སློབ་དཔོན་ཆེན་པོ་འཇམ་དཔལ་བཤེས་གཉེན་དང་མཇལ་བ་སྟེ། ཐོག་མར་ཞལ་མཇལ་སྐབས་སློབ་དཔོན་འཇམ་དཔལ་བཤེས་གཉེན་ཐོང་གཤོལ་ཕྲག་པ་ལ་བཟུང་ནས་ཤམ་ཐབས་ཐོད་དུ་བཅིངས་པ་ཞིག་འདུག་པས་ངོ་མ་ཤེས་ཤིང་། དེ་ནི་པཎྜི་ཏའི་ཆ་བྱད་དམ་ཡང་ན་རྣལ་འབྱོར་བའི་ཆས་སུ་འོང་སྙམ་ནས་བཟའ་བ་ཞིག་བསླངས་པས། ངའི་ཆུང་མ་ལ་སློངས་ཟེར། དེ་ནས་གྲོང་ཁྱེར་དུ་ཕྱིན་ནས་བསླངས་པས། ཕྱག་རྒྱ་མས་ཚོང་དུས་ནས་བྱེའུ་མཆིལ་བ་བདུན་ཉོས་པ་བཙོས་ཤིང་འབྲས་ཆན་དང་བསྲེས་ནས་དྲངས། ང་དགེ་སློང་ཡིན་པས་བཟའ་བ་མི་རུང་བྱས་པས་རྗེས་སུ་ཡི་རང་ཟེར། ཕར་ལག་མཐིལ་དུ་བཞག་པ་མོས་ཕུས་བཏབ་པས་ཐམས་ཅད་ཅོ་དིར་གྱིས་ནམ་མཁའ་ལ་དེངས་སོང་། ཅུང་ཟད་ནས་ཁྱིམ་བཙུན་བྱུང་སྟེ་འདི་ལ་བཟའ་བ་བྱིན་ནམ་ཟེར་བར། ཆུང་མས་བཟའ་བ་བྱིན་ཀྱང་ཁོང་མི་འདོད་པ་གདའ་ཞུས་པར། གང་ཟག་འཆིང་བ་ཅན་གསུངས། ཤྲཱི་སེངྷས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞལ་འདོན་མཛད་པས་སློབ་དཔོན་གྱིས་དང་པོ་མལ་ན་གཟིམས་བཞིན་གསན། དེ་ནས་བཞེངས་ཏེ་གསན་ཞིང་ཐམས་ཅད་རྫོགས་པ་ན་དོན་ལ་ལྟ་ཅི་ཚིག་ལའང་རྨོངས་གསུངས་པས་ད་གཟོད་འཇམ་དཔལ་བཤེས་གཉེན་ཡིན་པ་དགོངས། རྗེས་སུ་བཟུང་བར་གསོལ་བ་བཏབ་པས་བླ་མས་ཀྱང་དགྱེས་བཞིན་དུ་གནང་། ལོ་ཉེར་ལྔའི་བར་ལ་གདམས་པ་དང་རྗེས་སུ་གདམས་པ་རྣམས་བསྩལ་པའི་རྗེས་སུ་སློབ་དཔོན་ཉིད་སྐུ་འོད་ཕུང་དུ་ཡལ། དེའི་ཚེ་ཤྲཱི་སེངྷས་སྨྲེ་སྔགས་ཀྱི་གདུང་དབྱངས་བཏོན་པས་ནམ་མཁའ་ནས་སློབ་དཔོན་གྱི་སྐུ་དངོས་སུ་བསྟན་ཏེ་རིན་པོ་ཆེའི་ཟ་མ་ཏོག་སེན་གང་བ་ཞིག་ཕྱག་ཏུ་གཏད་པར་སྒོམ་ཉམས་དྲུག་པ་ཞེས་བྱ་བའི་འདས་རྗེས་བབ་པས་སློབ་དཔོན་ཉིད་དོན་གྱི་གདེང་དང་ལྡན་པར་གྱུར་ཏོ། །དེ་ནས་སློབ་དཔོན་ཤྲཱི་སེངྷས་རྡོ་རྗེ་གདན་གྱི་འོག་ནས་སྔར་སྦས་པའི་རྒྱུད་རྣམས་བཏོན་ཏེ་རྒྱ་ནག་ཏུ་བྱོན་ཞིང་། རྫོགས་པ་ཆེན་པོའི་མན་ངག་གི་སྡེ་ལ། ཕྱི་སྐོར། ནང་སྐོར། གསང་སྐོར། གསང་བ་བླ་ན་མེད་པའི་སྐོར་བཞིར་ཕྱེས་ནས་སྐོར་སྔ་མ་གསུམ་ལ་སྤྲོས་བཅས་ཀྱི་དོན་དུ་བསྡེབས་ནས་བྱང་ཆུབ་ཤིང་གི་ལྷ་ཁང་བྱ་འདབས་སུ་གཏེར་དུ་སྦས། གསང་བ་བླ་ན་མེད་པའི་སྐོར་མཁའ་འགྲོས་ལུང་བསྟན་པ་ལྟར་བཀྲ་ཤིས་ཁྲི་སྒོའི་ཀ་བར་སྨོན་ལམ་གྱི་རྒྱས་བཏབ་ནས་སྦས། སློབ་དཔོན་ཉིད་བསིལ་སྦྱིན་ཞེས་པའི་དུར་ཁྲོད་ཆེན་པོ་རུ་གདུག་པའི་མི་མ་ཡིན་རྣམས་ཀྱིས་བཀུར་སྟི་དང་བཅས་པས་ཏིང་ངེ་འཛིན་ལ་བཞུགས་སོ། །

སློབ་དཔོན་དེ་ལས་མཁས་པ་ཛྙཱ་ན་སུ་ཏྲའམ་ཡེ་ཤེས་མདོ་དང་པཎ་ཆེན་བཱི་མ་ལ་གཉིས་ཀྱིས་གསན་པ་སྟེ། དེ་ལ་ཛྙཱ་ན་སུ་ཏྲ་ནི། ཐལ་འགྱུར་ལས། དེ་རྗེས་འཛིན་པ་གདོལ་བའི་རིགས། །ཛྙཱ་ན་སུ་ཏྲས་འདི་ཉིད་འཛིན། །ཞེས་པ་ལྟར། ཤར་ཕྱོགས་ཀ་མ་ཤཱི་ལའི་གྲོང་ཁྱེར་དུ་ཡབ་གདོལ་བའི་རིགས་ཨུ་པ་རྡ་ཛ་ན་བྱ་བ་དང་། ཡུམ་རྒྱ་མཚོ་མ་བྱ་བའི་བུ་སྦྲུལ་གྱི་གདེངས་ཀས་མཚན་པ་ཞིག་བྱུང་བ་ཕ་མ་གཉིས་སྐྲགས་ཏེ་དུར་ཁྲོད་དུ་བསྐྱལ་བས་ཁྱེའུ་ན་རེ། སྙིང་པོའི་དོན་ལ་ཐུགས་ཕངས་པའི་སྤྲུལ་པ་ཡིན་ཞིང་ལས་ཀྱིས་འབྲེལ་བའི་ཕ་མ་ཡིན་པས་གསོས་ཤིག་ཅེས་ཟེར་བས། བདེན་པར་བཟུང་ནས་བླངས་ཏེ་གསོས། ཁྱེའུ་དེ་གཞན་ལས་སྐྱེད་ཆེ་ཞིང་བློ་གྲོས་དང་ལྡན་པར་གྱུར་ནས་རྒྱལ་པོ་ཧསྟི་དང་། སྲས་མོ་པྲ་ར་ནི་སོགས་ལས་སེམས་ཕྱོགས་ཀྱི་ཆོས་མང་དུ་གསན། དེ་ནས་རེ་ཞིག་ན་སློབ་དཔོན་བཱི་མ་ལ་ནས་སློབ་དཔོན་ཤྲཱི་སེངྷའི་རྣམ་ཐར་གསན་པས་འབད་རྩོལ་ཆེན་པོས་རྒྱ་ནག་ཏུ་བྱོན་ཏེ་མཁའ་འགྲོ་མས་ལུང་བསྟན་པ་བཞིན་བསིལ་སྦྱིན་དུ་ཤྲཱི་སེངྷ་དང་མཇལ། ལོ་དགུའི་བར་དུ་རྫོགས་ཆེན་གསུངས་ནས་སྙན་བརྒྱུད་དཔེ་དང་བཅས་པ་གནང་། དེས་ཚིམས་ནས་བྱོན་པར་བརྩམ་པ་ན། སློབ་དཔོན་གྱིས་གཏད་པ་མེད་དོ་གསུངས་པས། ཡེ་ཤེས་མདོ་དོགས་པ་སྐྱེས་ཏེ་སླར་ཡང་རབ་ཏུ་ཟབ་པའི་གདམས་པ་གནང་བར་ཞུས་པས། ཕྱི་སྤྲོས་བཅས་ཀྱི་དབང་རྫོགས་པར་གནང་ནས་གསང་བ་བླ་ན་མེད་པའི་མན་ངག་རྣམས་ལོ་གསུམ་གྱི་བར་དུ་གནང་། དེ་ནས་ཉམས་སུ་བླང་བར་ཞུས་པས། སྤྲོས་མེད་ཀྱི་དབང་རྫོགས་པར་གནང་ཞིང་རི་བོ་ཀོ་ས་ལའི་རྩེ་མོར་འཁོར་འདས་རུ་ཤན་དབྱེ་བའི་སྤྱོད་པ་མཛད་ཅིང་རབ་ཏུ་སྤྲོས་མེད་ཀྱི་དབང་དང་། རིམ་པས་ཤིན་ཏུ་སྤྲོས་མེད་ཀྱི་དབང་ཡང་རྫོགས་པར་གནང་། དེ་ནས་ལོ་བཅུ་དྲུག་ཏུ་ཉམས་སུ་བླངས་པས་སྒོམ་པར་མཛད། སློབ་དཔོན་འདི་ཁྱད་པར་གྱི་སྤྱོད་པ་སྣ་ཚོགས་པར་གནས་པས་དུས་གཞན་ཞིག་ཏུ་ལི་ཡུལ་གྱི་རྒྱལ་པོས་སྤྱན་དྲངས་ནས་དེར་བཞུད་པའི་ཞག་བདུན་ན། སྒྲ་དང་ལྟས་ཆེན་པོ་བྱུང་བས་ནམ་མཁར་གཟིགས་ཚེ་ཤྲཱི་སེང་ཧ་བཞུགས་པ་མཇལ་བས་སྨྲེ་སྔགས་ཀྱི་གདུང་ཚིག་བཏོན་པས་གཟེར་བུ་བདུན་པའི་ཞལ་ཆེམས་ཕྱག་ཏུ་བབས་པ་དང་། བཀྲ་ཤིས་ཁྲི་སྒོའི་ཀ་བ་ན་ཡོད་པའི་སྙིང་ཐིག་གསང་བའི་མན་ངག་གི་དཔེ་རྣམས་ལོངས་ལ་དུར་ཁྲོད་བྷ་སིང་དུ་སོང་ཞིག་ཅེས་པ་ཐོས། དེ་ནས་གསང་བའི་དཔེ་རྣམས་བཏོན་ནས་རྒྱ་གར་གྱི་དུར་ཁྲོད་བྷ་སིང་དུ་བྱོན་ཞིང་དེར་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་མ་རྣམས་ལ་གསང་བ་སྙིང་ཐིག་གི་ཆོས་ཀྱི་འཁོར་ལོ་བསྐོར་ཏེ་བཞུགས་བཞིན། བཱི་མ་ལའང་རྗེས་སུ་བཟུང་ནས་གསང་བ་མཆོག་གི་གདམས་པ་ཐམས་ཅད་ལྷག་མེད་དུ་བསྩལ་བའི་མཐར་སྐུ་འོད་ཕུང་དུ་ཡལ་ལོ། །

སློབ་དཔོན་བཱི་མ་མི་ཏྲའམ་པཎ་ཆེན་དྲི་མེད་བཤེས་གཉེན་ནི། ཐལ་འགྱུར་ལས། དེ་རྗེས་འཛིན་པ་ཁྱིམ་བདག་རིགས། །ཕྱག་རྒྱ་རྒྱ་ཆེན་དག་གིས་འཛིན། །ཞེས་པ་སྟེ་སློབ་དཔོན་འདིའི་རྣམ་ཐར་གདུལ་བྱའི་མོས་སྣང་ལྟར་སྣ་ཚོགས་པར་བཞུགས་པ་ལས་ལོ་རྒྱུས་ཁ་ཅིག་ལྟར་ན། ཕ་མེད་ཀྱི་བུར་གྱུར་བས་ཡུམ་གནོད་དེ་གཡོག་མོ་བྱེ་མའི་ཁུང་དུ་སྦ་བར་མངགས། ཉིན་འགའི་རྗེས་བལྟས་ཙ་ན་མིག་བཀྲ་ཧྲིག་གེ་མ་ཤི་བར་འདུག་པས་སྤྲུལ་པའི་སྐུ་ཡིན་པར་ཤེས་ནས་བླངས། རིག་པའི་གནས་ལྔ་ལ་བསླབས་པས་པཎྜི་ཏ་ལྔ་བརྒྱའི་སྤྱི་ཕུད་དུ་གྱུར། སློབ་དཔོན་ཛྙཱ་ན་སུ་ཏྲ་དང་སྐྱེ་བ་སྔ་མ་སྤུན་ཟླར་གྱུར་པའི་རྟེན་འབྲེལ་ལས་ཐུགས་ཤིན་ཏུ་མཐུན་པར་གནས་ཤིང་། རེ་ཞིག་ན་སྐྱོ་སངས་ལ་ལྷན་དུ་ཕེབས་སྐབས་རྡོ་རྗེ་སེམས་དཔའ་ནམ་མཁའ་རུ་མངོན་སུམ་དུ་བྱོན་ནས། ཀྱེ་རིགས་ཀྱི་བུ་གཉིས། ཁྱེད་གཉིས་སྐྱེ་བ་ལྔ་བརྒྱ་པཎྜི་ཏའི་ལུས་བླངས་ཤིང་དམ་པའི་ཆོས་སྤྱད་ཀྱང་འབྲས་བུ་མ་ཐོབ། ད་ཡང་མི་ཐོབ་པས་ཚེ་འདི་ཉིད་ལ་ཟག་བཅས་ཀྱི་ཕུང་པོ་མི་སྣང་བར་འཚང་རྒྱ་བར་འདོད་ན་རྒྱ་ནག་པོའི་བྱང་ཆུབ་ཤིང་དྲུང་གི་ལྷ་ཁང་དུ་སོང་ཞིག །ཅེས་ལུང་བསྟན་པས་བཱི་མ་མི་ཏྲ་བརྩོན་འགྲུས་ཆེ་བས་དེ་ཉིད་དུ་ལྷུང་བཟེད་བླངས་ཏེ་བྱོན། ལུང་བསྟན་ལྟར་སློབ་དཔོན་ཤྲཱི་སེང་ཧ་མཇལ་ནས་ལོ་ཉི་ཤུའི་བར་ལ་སྙན་བརྒྱུད་ཕྱི་ནང་གསང་གསུམ་གྱི་གདམས་པ་བསྩལ་ཀྱང་དཔེ་མ་གནང་། བཱི་མ་ལ་ཐུགས་ཚིམས་ཏེ་སླར་རྒྱ་གར་དུ་བྱོན་ནས་ཛྙཱ་ན་སུ་ཏྲ་ལ་ཇི་ལྟར་བྱུང་བ་རྣམས་བསྙད་དེ་རང་ཉིད་སྤྱོད་པ་ལ་གནས་པར་མཛད། རེ་ཞིག་ན་མཁའ་འགྲོའི་ལུང་གིས། ཀྱེ་སྐལ་ལྡན། སྔར་བས་ཟབ་པའི་སྙིང་ཐིག་གི་གདམས་པ་བཞེད་ན་དུར་ཁྲོད་ཆེན་པོ་བྷ་སིང་གི་ནགས་སུ་སོང་ཞིག །ཅེས་ལུང་བསྟན་པ་བཞིན་དེ་ཉིད་དུ་བྱོན་པས་ཛྙཱ་ན་སུ་ཏྲ་དང་མཇལ་ཞིང་ཆེས་ཟབ་པའི་གདམས་པས་རྗེས་སུ་བཟུང་བར་གསོལ་བ་བཏབ། སློབ་དཔོན་གྱིས་ཆོ་འཕྲུལ་སྣ་ཚོགས་པ་སྣང་བར་མཛད་ནས་སྤྲོས་བཅས་སྤྲོས་མེད་ཀྱི་དབང་རྣམས་བསྐུར། རི་བོ་སྣང་བྱེད་ཀྱི་རྩེ་མོར་འཁོར་འདས་རུ་ཤན་འབྱེད་པའི་སྤྱོད་པ་དང་། ཤིན་ཏུ་སྤྲོས་མེད་ཀྱི་དབང་རྣམས་རྫོགས་པར་མཛད་པས་ཐུན་མོང་མ་ཡིན་པའི་རྟོགས་པ་འཁྲུངས། ཤངས་ཀྱི་རྩེ་མོར་ཡི་གེ་ཨ་དཀར་པོ་ཟགས་ལ་ཁད་པ་གཅིག་ཀྱང་བྱུང་། དེ་ནས་རབ་ཏུ་སྤྲོས་མེད་ཀྱི་དབང་རྫོགས་པར་གནང་བས་སེམས་ཀྱི་དེ་ཉིད་ཁོ་ན་རྗེན་པར་མཐོང་། དབང་དེ་དག་གི་རིམ་པ་བཞིན་རྫོགས་པ་ཆེན་པོ་སྐོར་བཞིའི་གདམས་པ་དཔེ་དང་བཅས་པ་མ་ལུས་པ་གནང་། ལོ་བཅུའི་བར་ལ་ཞུན་མཐར་བཅད་ཅིང་ཛྙཱ་ན་སུ་ཏྲ་འོད་ཕུང་དུ་ཡལ་བའི་ཚེ་བཱི་མས་སྨྲེ་སྔགས་དང་གདུང་དབྱངས་བཏོན་པ་ན། སླར་ཡང་སྐུ་མངོན་སུམ་དུ་སྣང་བར་མཛད་ནས་རིན་པོ་ཆེ་སྣ་ལྔའི་ཟ་མ་ཏོག་ཅིག་ཕྱག་ཏུ་གཏད་པ་ལས་བཞག་ཐབས་བཞི་པ་ཞེས་པའི་འདས་རྗེས་ཐོབ་ཅིང་ཚིག་དོན་ལ་འཁྲུལ་བ་མེད་པའི་གདེང་ཐོབ་པར་གྱུར་ཏོ། །དེ་ནས་སློབ་དཔོན་བཱི་མ་ཉིད་ཤར་ཕྱོགས་ཀ་མ་རུའི་གྲོང་ཁྱེར་དུ་རྒྱལ་པོ་སེངྒེ་བཟང་པོའི་བླ་མཆོད་དུ་ལོ་ཉི་ཤུར་བཞུགས་ཤིང་། དེ་ནས་ནུབ་ཕྱོགས་སུ་གྲོང་ཁྱེར་བྷིར་ཡ་ཞེས་པར་རྒྱལ་པོ་དྷརྨ་པཱ་ལའི་མཆོད་གནས་ཀྱང་མཛད། དེའི་འོག་ཏུ་རབ་ཏུ་སྣང་བྱེད་ཅེས་པའི་དུར་ཁྲོད་ཆེན་པོར་ཕྱོགས་ལས་རྣམ་པར་རྒྱལ་བའི་བརྟུལ་ཞུགས་ཀྱི་སྤྱོད་པ་སྤྱད་ཅིང་གདུག་པའི་ཚོགས་ལ་ཆོས་སྟོན་ཞིང་བཞུགས། གསང་བ་མཆོག་གི་དཔེ་རྣམས་ཚར་གསུམ་དུ་བྲིས་ནས། ཚར་གཅིག་ཨོ་རྒྱན་གྱི་ཡུལ་རྒྱ་མཚོ་གསེར་གྱི་བྱེ་མ་བརྡལ་བའི་གླིང་དུ་སྦས། ཚར་གཅིག་ཁ་ཆེའི་ཡུལ་གསེར་གླིང་ཞེས་པའི་བྲག་སྐྱིབས་སུ་སྦས། ཚར་གཅིག་དུར་ཁྲོད་དེར་མཁའ་འགྲོ་མ་རྣམས་ཀྱི་མཆོད་པའི་རྟེན་དུ་བཞག །སློབ་དཔོན་འདི་འཕོ་བ་ཆེན་པོའི་སྐུ་གྲུབ་པས་འཕགས་ཡུལ་དུ་ཅི་རིགས་པར་བཞུགས་ཤིང་བོད་དང་རྒྱ་ནག་ཏུ་བྱོན་ནས་འགྲོ་དོན་རྒྱ་ཆེར་མཛད་ཚུལ་གྱི་རྣམ་ཐར་ཡང་ཤིན་ཏུ་མང་ངོ་། །

ཡང་རིག་འཛིན་ཤྲཱི་སེང་ཧ་ལས་སློབ་དཔོན་ཆེན་པོ་པདྨས་གསན་པ་སྟེ། སྤྱིར་སློབ་དཔོན་ཆེན་པོ་འདི་ཉིད་སྐུ་གསུམ་གྱི་སྟོན་པ་རྒྱ་མཚོའི་ངོ་བོ་ཡིན་པས་བརྒྱུད་པ་བྲེང་ཆགས་ཀྱི་མཚན་ཉིད་ལ་ལྟོས་པ་མེད་ཀྱང་ཚུར་མཐོང་གི་སྣང་ངོར་པཎ་གྲུབ་སྤྱི་ལྟར་བླ་བརྒྱུད་བར་མ་ཆད་པ་ལས་ཟབ་མོའི་མན་ངག་གི་བདུད་རྩི་གསན་བཞེས་ཀྱི་ཚུལ་བསྟན་པ་སྟེ། བཏགས་གྲོལ་སྙིང་པོའི་རྒྱུད་ལས། སྟོན་པ་ཀུན་བཟང་ཡབ་ཡུམ་གྱིས། །ཉིད་ལས་མི་གཞན་སེམས་དཔའི་སྣོད། །བྱིན་གྱིས་རླབས་ཀྱི་བདག་ཉིད་ལ། །བཏགས་པས་གཅིག་ཤེས་ཀུན་གྲོལ་ལོ། །བཅིངས་དང་གྲོལ་བའི་མཐའ་ལས་འདས། །རྡོ་རྗེ་སེམས་དཔའི་བྱིན་རླབས་ཀྱིས། །རང་བྱུང་དགའ་རབ་ཐུགས་ལ་ཤར། །སེང་ཧ་ཉིད་ལ་རྒྱུད་གཏད་པ། །འབྲས་བུ་ཡོངས་རྫོགས་བཏགས་གྲོལ་རྒྱུད། །ཨོ་རྒྱན་པདྨ་ཉིད་ལ་གཏད། །ལྔ་ལྡན་བུ་ལ་འདི་སྟོན་ཅིག །ཅེས་གསུངས་པ་ལྟར་དགའ་རབ་རྡོ་རྗེ་དང་འཇམ་དཔལ་བཤེས་གཉེན་ལས་ཀྱང་གསན་པར་གྲགས་ཀྱང་། གཙོ་ཆེར་རྡོ་རྗེ་ཕག་མོས་ལུང་བསྟན་པ་ལྟར་གུ་རུ་ཤྲཱི་སེང་ཧ་ལས་བླ་མ་བསྟེན་ནས་གསན་པའི་ཚུལ་མཛད་པ་སྟེ། དེ་ཡང་བདག་ཉིད་ཆེན་པོ་འདིའི་གསང་བ་བསམ་མི་ཁྱབ་པའི་རྣམ་ཐར་བཀའ་གཏེར་གྱི་ཡི་གེ་རྣམས་ལས་སྣ་ཚོགས་པ་བྱུང་བ་ལས། འདིར་ཐང་ཡིག་སོགས་གཏེར་མ་ཡོངས་གྲགས་ཀྱི་ལུགས་སུ་བྱས་ཏེ་ཅུང་ཟད་གླེང་བ་ལ། ཇི་སྐད་དུ། དབུས་འགྱུར་འཆང་ལུང་བསྟན་པའི་མདོ་ལས། ང་ནི་འདི་ནས་མི་སྣང་ནས། །ལོ་ནི་བཞི་གཉིས་ལོན་པ་ན། །དྷ་ན་ཀོ་ཤའི་མཚོ་གླིང་དུ། །པདྨ་གེ་སར་སྡོང་པོ་ལས། །ཀུན་ལས་ལྷག་པའི་སྐྱེས་བུ་འབྱུང་། །ཞེས་དང་། བླ་མེད་དོན་རྫོགས་འདུས་པའི་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་བཅུ་རུ་གཉིས་ཆད་ན། །ཨོ་རྒྱན་ཡུལ་དུ་ང་ཉིད་འབྱུང་། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པའི་བདག་པོར་འགྱུར། །ཞེས་དང་། འཇམ་དཔལ་སྒྱུ་འཕྲུལ་དྲྭ་བ་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་སངས་རྒྱས་རིགས་སྔགས་འཆང་། །ཞེས་མདོ་རྒྱུད་དུ་མ་ནས་གསལ་བར་བསྟན་པ་ལྟར་དེ་བཞིན་གཤེགས་པ་ཐམས་ཅད་ཀྱི་གསུང་གི་རྡོ་རྗེའི་བདག་ཉིད་སངས་རྒྱས་འོད་དཔག་ཏུ་མེད་པའི་སྤྲུལ་སྐུ་སྟེ། དེ་ཡང་ནུབ་ཕྱོགས་ཨོ་རྒྱན་གྱི་ཡུལ་གྱི་ལྷོ་ནུབ་སྲིན་ཡུལ་དང་ཐག་ཉེ་བའི་རྒྱ་མཚོའི་གླིང་དུ། སངས་རྒྱས་ཐམས་ཅད་ཀྱི་བྱིན་རླབས་ལས་བྱུང་བའི་པདྨའི་སྡོང་པོ་ཁ་དོག་སྣ་ཚོགས་པའི་སྦུབས་སུ་བདེ་ལྡན་ཞིང་གི་མགོན་པོའི་ཐུགས་ཀ་ནས་གསེར་གྱི་རྡོ་རྗེ་ཧྲཱིས་མཚན་པ་ཞིག་སྤྲོས་པ་ལས། རྫུས་སྐྱེས་ཀྱི་ཁྱེའུ་ལོ་བརྒྱད་པའི་ན་ཚོད་མཚན་དང་དཔེ་བྱད་ཀྱིས་བརྒྱན་པར་སྤྲུལ་ཏེ་བཞུགས་ཤིང་། ལྷ་དང་མཚོ་གླིང་གི་མཁའ་འགྲོ་མ་རྣམས་ལ་ཟབ་མོའི་ཆོས་སྟོན་པར་མཛད་པའི་ཚེ་ན། ཡུལ་དེའི་རྒྱལ་པོ་ཨིནྡྲ་བྷོ་དྷི་ལ་སྲས་མེད་པས་དཀོན་མཆོག་མཆོད་ཅིང་དཀོར་མཛོད་སྦྱིན་པ་བཏང་བ་ཟད་དེ་རྒྱ་མཚོའི་གླིང་ནས་ཡིད་བཞིན་གྱི་ནོར་བུ་བླངས་ཏེ་ཚུར་བྱོན་པའི་དུས་ཆོས་བློན་ཀྲིཥྞ་འཛིན་གྱིས་ཐོག་མར་མཇལ། དེ་ནས་རྒྱལ་པོས་མཇལ་ཞིང་སྲས་ཀྱི་སྐལ་བར་བྱོན་པར་གསོལ་བ་བཏབ་པ་ལྟར་ཞལ་གྱིས་བཞེས་ནས་ཕོ་བྲང་དུ་སྤྱན་དྲངས། ནོར་བུའི་མཐུ་ལས་བྱུང་བའི་རིན་པོ་ཆེའི་ཁྲིའི་སྟེང་ལ་བཞུགས་སུ་གསོལ་ཏེ་པདྨ་འབྱུང་གནས་དང་མཚོ་སྐྱེས་རྡོ་རྗེ་ཞེས་མཚན་གསོལ། གཞོན་ནུའི་རོལ་རྩེད་ཀྱིས་གདུལ་བྱ་མཐའ་ཡས་པ་སྨིན་པར་མཛད་ཅིང་མཁའ་འགྲོ་འོད་འཆང་མ་ཁབ་ཏུ་བཞེས། ཟས་གོས་རིན་པོ་ཆེའི་ཆར་གྱིས་སྐྱེ་བོ་ཐམས་ཅད་ཚིམས་པར་བྱས་ཤིང་ཨོ་རྒྱན་གྱི་རྒྱལ་སྲིད་ཆོས་བཞིན་དུ་བསྐྱངས་པས་རྒྱལ་པོ་ཐོར་ཅོག་ཅན་ནམ་པདྨ་རྒྱལ་པོར་གྲགས། དེའི་ཚེ་རྒྱལ་སྲིད་བཟུང་བས་གཞན་དོན་རླབས་ཆེན་མི་འགྲུབ་པར་དགོངས་ནས་ཡབ་ལ་ཞུས་ཀྱང་མ་གནང་བས་ཕོ་བྲང་ཡང་རྩེ་ནས་གར་མཛད་དེ་རྩེ་གསུམ་ཤོར་བའི་བརྫུ་བག་གིས་བདུད་བློན་གྱི་བུ་དབྱིངས་སུ་སྤར། བུ་བསད་པའི་ཁྲིམས་ཀྱིས་དུར་ཁྲོད་དུ་སྤྱུགས་པས། བསིལ་བའི་ཚལ་དང་། དགའ་བའི་ཚལ། སོ་ས་གླིང་རྣམས་སུ་བརྟུལ་ཞུགས་ཀྱི་སྤྱོད་པ་མཛད་པ་ན། མཁའ་འགྲོ་བདུད་འདུལ་མ་དང་ཞི་བ་འཚོས་དབང་བསྐུར་ཞིང་བྱིན་གྱིས་བརླབས། དུར་ཁྲོད་ཀྱི་མཁའ་འགྲོ་མ་རྣམས་དབང་དུ་བསྡུས་པའི་ཚེ་ཤཱནྟ་རཀྵི་ཏ་ཞེས་གྲགས། ངྷ་ན་ཀོ་ཥའི་མཚོ་གླིང་དུ་བྱོན་ཏེ་གསང་སྔགས་མཁའ་འགྲོའི་བརྡ་སྐད་ཀྱིས་བསྒྲུབས་པས་མཚོ་གླིང་གི་མཁའ་འགྲོ་མ་དབང་དུ་བསྡུས། རྩུབ་འགྱུར་ཚལ་དུ་སྤྱོད་པ་མཛད་པས་རྡོ་རྗེ་ཕག་མོས་ཞལ་བསྟན་ནས་བྱིན་གྱིས་བརླབས། རྒྱ་མཚོའི་ཀླུ་དང་བར་སྣང་གི་གཟའ་སྐར་ཐམས་ཅད་དམ་ལ་བཞག གནས་གསུམ་གྱི་དཔའ་བོ་མཁའ་འགྲོ་མ་རྣམས་ཀྱིས་དངོས་གྲུབ་བསྩལ་ཏེ་མཚན་རྡོ་རྗེ་དྲག་པོ་རྩལ་དུ་གྲགས་སོ། །དེ་ནས་རྡོ་རྗེ་གདན་དུ་བྱོན་ནས་ཆོ་འཕྲུལ་སྣ་ཚོགས་བསྟན་པས་མི་རྣམས་ཀྱིས་ཁྱོད་སུ་ཡིན་དྲིས་པ་ལ། རང་བྱུང་གི་སངས་རྒྱས་ཡིན་པར་ཞལ་གྱིས་བཞེས་པ་ཡིད་མ་ཆེས་ཏེ་སྐུར་པ་བཏབ་པ་ན། དགོས་པའི་དབང་མང་དུ་གཟིགས་ནས་ཟ་ཧོར་གྱི་ཡུལ་དུ་བྱོན་ཏེ་སློབ་དཔོན་པྲ་བྷ་ཧསྟི་ལས་རབ་ཏུ་བྱུང་བའི་མཚན་ཤཱཀྱ་སེངྒེར་གྲགས། ཡོ་གའི་རྒྱུད་རྣམས་ཚར་བཅོ་བརྒྱད་གསན་པས་དེ་ཉིད་དུ་ལྷ་རྣམས་ཀྱི་ཞལ་མཐོང་། སླར་ལྷོ་ཕྱོགས་བྷཻདྷེའི་ཡུལ་གྱི་དུར་ཁྲོད་སྐུ་ལ་རྫོགས་སུ་མཁའ་འགྲོ་མ་རྣམས་ཀྱིས་མཆོད་ནས་ཆོས་གསུངས་པས་མཚན་ཉི་མ་འོད་ཟེར་དུ་གྲགས། དེ་ནས་ནགས་ཚལ་དྲྭ་བ་ཅན་དུ་བྱོན་ནས་སྲས་མོ་གོ་མ་དེ་ཝིས་ཕྱི་ནང་གསང་བའི་དབང་བསྐུར་ཞིང་། སློབ་དཔོན་འཇམ་དཔལ་བཤེས་གཉེན་དང་མཇལ་ཚེ་ངས་ཁྱོད་འདུལ་བའི་དུས་ལ་མ་སླེབས་པས་མཁའ་འགྲོ་གསང་བ་ཡེ་ཤེས་དགེ་སློང་མའི་ཚུལ་དུ་བྱོན་པ་ཀུན་དགའ་མོ་ལས་ཞུས་ཞེས་ལུང་བསྟན། དེ་ལས་ཕྱི་ནང་གསང་བའི་དབང་རྣམས་རྫོགས་པར་མཛད། སངས་རྒྱས་གསང་བ་ལས་ཕར་ཕྱིན་དང་སྒྱུ་འཕྲུལ་སོགས་མདོ་སྔགས་ཀྱི་ཆོས་མང་པོ་གསན། གཞན་ཡང་འཕགས་ཡུལ་གྱི་མཁས་གྲུབ་དུ་མ་ལས་རིག་པའི་གནས་ཐམས་ཅད་གསན་ཅིང་སྦྱངས་པའི་ཚུལ་བསྟན་པས་ཆོས་ཐམས་ཅད་ཚར་རེ་རེས་མཁས་པར་མཁྱེན་པས་མཚན་བློ་ལྡན་མཆོག་སྲེད་དུ་གྲགས། དེ་ནས་སྤྲུལ་པའི་སྐུ་དགའ་རབ་རྡོ་རྗེ་དང་། འཇམ་དཔལ་བཤེས་གཉེན། ཤྲཱི་སེང་ཧ་གསུམ་ལས་རྫོགས་པ་ཆེན་པོ་དོན་བརྒྱུད་ཀྱི་མན་ངག་རྒྱལ་ཐབས་སྤྱི་བླུགས་ཀྱི་ཚུལ་དུ་ཐོབ་པས་ཟབ་གསལ་གཉིས་སུ་མེད་པའི་ཡེ་ཤེས་ཀྱི་དགོངས་པར་རང་དབང་བརྙེས། ཁྱད་པར་སློབ་དཔོན་ཤྲཱི་སེངྷའི་མདུན་ནས་ལོ་ཉི་ཤུ་རྩ་ལྔའི་རིང་འོད་གསལ་རྫོགས་པ་ཆེན་པོའི་ཚིག་དོན་གྱི་ཆ་ཐམས་ཅད་ལྷག་མེད་དུ་གསན་པའི་ཚུལ་ནི། རྡོ་རྗེ་ཕག་མོས་ལུང་བསྟན་ལས། སྐལ་ལྡན་འབྲས་བུ་ཚེ་གཅིག་ངེས་པའི་ལུང་། །གང་དང་མི་འདྲ་ཀུན་ཀྱིས་མ་རྟོགས་པ། །ཤྲཱི་སེངྷ་རྡོ་རྗེའི་ཐུགས་ལ་གནས། །རྩུབ་འགྱུར་ཚལ་དུ་དགོངས་པ་རྙེད་པར་འགྱུར། །ཞེས་གསུངས་པ་དང་། སྐད་ཅིག་གིས་རྩུབ་འགྱུར་ཚལ་གྱི་དུར་ཁྲོད་ཆེན་པོར་རྫུ་འཕྲུལ་གྱིས་བྱོན་ཏེ་སློབ་དཔོན་ཤྲཱི་སེངྷ་ལ་ཕྱག་དང་སྐོར་བ་མཛད་ནས་རྗེས་སུ་བཟུང་བར་ཞུས་པས་གནང་སྟེ། རྫོགས་པ་ཆེན་པོ་ནམ་མཁའ་དང་མཉམ་པའི་རྒྱུད་ལ་སོགས་པ་སེམས་ཀློང་མན་ངག་གི་སྐོར་མཐའ་དག་གསུངས་ཤིང་། ཁྱད་པར་དུ་ཐིག་ལེ་ཕྱི་ནང་གསང་བའི་སྐོར་མ་ལུས་པ་གསན་དུས། ཡང་ཞུས་པ། སློབ་དཔོན་ཆེན་པོ་ལགས། ཚེ་འདི་ཉིད་ལ་ཟག་བཅས་ཀྱི་ཕུང་པོ་མི་སྣང་བར་ལོངས་སྤྱོད་རྫོགས་པ་སྐུའི་ཞིང་ཁམས་མཐོང་ཞིང་། ཆོས་ཀྱི་སྐུའི་ཞིང་ཁམས་སུ་སངས་རྒྱས་པའི་གདམས་ངག་གཅིག་གནང་བར་འཚལ་ཞེས་གསོལ་བ་དང་། ཤྲཱི་སེངྷས་གསུངས་པ། རིགས་ཀྱི་བུ་ཤིན་ཏུ་ལེགས་ཀྱི་ཆོས་ཐམས་ཅད་ཀྱི་ཡང་རྩེ། ལྟ་བ་ཐམས་ཅད་ཀྱི་ཞེ་ཕུགས། ཐེག་པ་ཐམས་ཅད་ལས་འདས་ཤིང་། མཁའ་འགྲོ་ཐམས་ཅད་ཀྱི་སྙིང་ཏིག གསང་བ་བས་ཀྱང་ཆེས་ཤིན་ཏུ་གསང་བའི་དོན། འོད་གསལ་རྡོ་རྗེ་སྙིང་པོའི་ཐེག་པ་ཆེན་པོ། སེམས་ལས་འདས་པ། ཡིད་དཔྱོད་དང་བྲལ་བ། རྣམ་པར་ཤེས་པ་ཐམས་ཅད་ཀྱི་སྤྱོད་ཡུལ་དུ་མ་གྱུར་པ། ཡིན་མིན་གྱི་མཐའ་ལ་མི་གནས་ཤིང་། ལྟ་སྒོམ་བསྐྱེད་རྫོགས་ཀྱི་ཡུལ་ལས་འདས་པ། དུས་གསུམ་རྒྱལ་བ་ཐམས་ཅད་ཀྱི་ཡུམ། རིག་འཛིན་ཆེན་པོ་རྣམས་ཀྱི་ཉེ་ལམ། མཐར་ཐུག་པའི་མན་ངག་བླ་ན་མེད་པ། ལོ་གསུམ་གྱིས་སངས་རྒྱས་ཀྱི་བྱང་ཆུབ་འགྲུབ་པའི་གདམས་པ་ཞིག་ཡོད་ཀྱིས་བསྟན་པར་བྱའོ། །གསུངས་ནས། རྫོགས་པ་ཆེན་པོ་ཡང་གསང་བླ་ན་མེད་པ་མཁའ་འགྲོ་སྙིང་ཏིག་གི་དབང་དང་། དེའི་ཉམས་ལེན་མན་ངག་གི་ཡི་གེ་རབ་ཏུ་མང་པོ་དང་། དེའི་རྒྱབ་རྟེན་དུ་སྒྲ་ཐལ་འགྱུར་རྩ་བའི་རྒྱུད། ཡི་གེ་མེད་པ་གཞིའི་རྒྱུད། སྐུ་གདུང་འབར་བ་རྟགས་ཀྱི་རྒྱུད། རྫོགས་པ་རང་བྱུང་དབང་གི་རྒྱུད། ངོ་སྤྲོད་སྤྲས་པའི་རྒྱུད། སྒྲོན་མ་འབར་བའི་རྒྱུད། རིག་པ་རང་ཤར་གྱི་རྒྱུད། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད། རིན་པོ་ཆེ་སྤུངས་པའི་རྒྱུད། ཉི་ཟླ་ཁ་སྦྱོར་གྱི་རྒྱུད། ནོར་བུ་ཕྲ་བཀོད་ཀྱི་རྒྱུད། རིག་པ་རང་གྲོལ་གྱི་རྒྱུད། མུ་ཏིག་ཕྲེང་བའི་རྒྱུད། ཀུན་ཏུ་བཟང་པོ་ཐུགས་ཀྱི་མེ་ལོང་གི་རྒྱུད། བཀྲ་ཤིས་མཛེས་ལྡན་གྱི་རྒྱུད། སེང་གེ་རྩལ་རྫོགས་ཀྱི་རྒྱུད། ཀློང་དྲུག་པའི་རྒྱུད། ཀུན་ཏུ་བཟང་མོ་ཀློང་གསལ་ཉི་མའི་རྒྱུད་དང་བཅོ་བརྒྱད་ཡོངས་སུ་རྫོགས་པར་གསུངས་ཤིང་བསྟན་པ་གཏད་དོ། །དེ་ནས་དུར་ཁྲོད་ཆེན་པོ་སོ་ས་གླིང་དུ་བྱོན་ཏེ་ལོ་གསུམ་ཉམས་སུ་བླངས་པས་སྐྱེ་ཤི་གཉིས་སྤངས་ཆུའི་ཟླ་བ་ལྟ་བུའི་སྐུ་གྲུབ་ནས་རྫུ་འཕྲུལ་གྱིས་གནས་རྣམ་པ་སྣ་ཚོགས་སུ་མི་དང་མི་མིན་གྱི་འགྲོ་བ་རབ་ཏུ་མང་པོ་ལ་ཕན་པར་མཛད་ཅིང་། ཁྱད་པར་རྒྱ་གར་གྱི་རྒྱལ་པོ་ངྷརྨ་པ་ལའི་མཆོད་གནས་སུ་ཉིན་པར་བཞུགས་ཤིང་། མཚན་མོ་དུར་ཁྲོད་ཆེན་པོ་བསིལ་བའི་ཚལ་དང་། སོ་ས་གླིང་དང་། རབ་ཏུ་སྣང་བྱེད་དང་། དགའ་བྱེད་དང་། བྷ་སིང་དང་། ཐ་ཆུང་དང་། འཇིགས་བྱེད་ལ་སོགས་པར་བྱོན་ཏེ། མཁའ་འགྲོ་འབར་བའི་སྤྲིན་ཕུང་དང་ལྷན་ཅིག་གསང་སྔགས་ཀྱི་ཀུན་ཏུ་སྤྱོད་པས་གནས་པར་མཛད་དོ། །དེ་ནས་ཟ་ཧོར་གྱི་རྒྱལ་པོ་གཙུག་ལག་འཛིན་གྱི་སྲས་མོ་མནྡ་ར་བ་ཞེས་མཁའ་འགྲོའི་མཚན་དང་ལྡན་པ་དེ་དབང་དུ་བསྡུས་ནས་སྒྲུབ་རྟེན་གྱི་ཕྱག་རྒྱ་མོར་ཁྲིད་ནས་བལ་ཡུལ་བྲག་ཕུག་མཱ་ར་ཏི་ཀར་ཚེའི་སྒྲུབ་པ་ཟླ་བ་གསུམ་མཛད་པས་མགོན་པོ་ཚེ་དཔག་མེད་དངོས་སུ་བྱོན་ནས་དབང་བསྐུར་ཞིང་ཉིད་དང་གཉིས་སུ་མེད་པར་བྱིན་གྱིས་བརླབས། ཚེ་རྒྱུད་བྱེ་བ་ཕྲག་བརྒྱ་གནང་བས་ཚེ་ལ་དབང་བའི་རིག་པ་འཛིན་པའི་དངོས་གྲུབ་བརྙེས་ནས་སྐྱེ་འཆི་མེད་པ་རྡོ་རྗེའི་སྐུ་གྲུབ་ནས་ཟ་ཧོར་གྱི་རྒྱལ་ཁམས་འདུལ་བའི་དོན་ལ་གཤེགས། རྒྱལ་བློན་རྣམས་ཀྱིས་ལོག་པའི་སྤྱོད་པས་མེ་ལ་བསྲེགས་པ་ན་ཏིལ་མར་མཚོར་འཁྱིལ་བའི་དབུས་སུ་པདྨའི་སྡོང་པོའི་རྩེར་བཞུགས་པའི་རྫུ་འཕྲུལ་བསྟན་ནས་དད་པ་ལ་བཀོད་ཅིང་ཐམས་ཅད་ཆོས་ལ་བཙུད། སླར་ཨོ་རྒྱན་གྱི་རྒྱལ་ཁམས་འདུལ་བའི་ཕྱིར་བསོད་སྙོམས་ལ་ཕེབས་པས། ཡུལ་མི་རྣམས་ཀྱིས་ངོ་ཤེས་ཏེ་སྔོན་གྱི་བདུད་བློན་རྣམས་ཀྱིས་ཙནྡན་གྱི་མེ་ལ་བསྲེགས་པས་མཚོ་དབུས་པདྨའི་སྡོང་པོར་ཡབ་ཡུམ་གཉིས་བཞུགས་ཏེ། སེམས་ཅན་རྣམས་འཁོར་བ་ལས་སྒྲོལ་བ་མཚོན་ཕྱིར་ཐོད་ཕྲེང་སྐུ་ལ་གསོལ་བའི་རྫུ་འཕྲུལ་བསྟན་པས་པདྨ་ཐོད་ཕྲེང་རྩལ་དུ་གྲགས། རྒྱལ་པོའི་བླ་མཆོད་ལོ་བཅུ་གསུམ་མཛད་ནས་རྒྱལ་ཁམས་ཐམས་ཅད་ཆོས་ལ་བཀོད། བཀའ་འདུས་ཆོས་ཀྱི་རྒྱ་མཚོའི་སྨིན་གྲོལ་བསྩལ་ཏེ་རྒྱལ་པོ་ཡབ་ཡུམ་སོགས་ལས་ཅན་ཐམས་ཅད་མཆོག་གི་རིག་འཛིན་གྱི་ས་ལ་བཀོད་པས་མཚན་པདྨ་རྒྱལ་པོར་གྲགས། སྐུ་ལ་རྫོགས་པ་སོགས་དུར་ཁྲོད་ཆེན་པོ་རྣམས་སུ་བྱོན་ཏེ་མཁའ་འགྲོ་རྣམས་ལ་གསང་སྔགས་ཀྱི་ཆོས་བསྟན། ཕྱི་ནང་གི་དྲེགས་པ་ཅན་ཐམས་ཅད་ཀྱི་སྲོག་སྙིང་བླངས་ནས་བསྟན་སྲུང་དུ་བསྐོས་པ་སོགས་མཛད་པའི་ཚེ་མཚན་ཉི་མ་འོད་ཟེར་གྲགས། རྡོ་རྗེ་གདན་དུ་མུ་སྟེགས་ཀྱི་སྟོན་པ་ལྔ་བརྒྱས་བསྟན་པ་ལ་རྒོལ་བ་རྩོམ་པའི་ཚེ་རྩོད་པ་དང་ནུས་པ་འགྲན་པས་སློབ་དཔོན་ཉིད་རྒྱལ། ཁོང་རྣམས་ཀྱིས་ངན་སྔགས་སྒྲུབ་པའི་ཚེ་མཁའ་འགྲོ་བདུད་འདུལ་མས་ཕུལ་བའི་དྲག་སྔགས་ཀྱིས་ཕྱིར་བཟློག་སྟེ་ཐོག་ཆེན་ཕབ་ནས་མུ་སྟེགས་ཀྱི་སྟོན་པ་རྣམས་བསྒྲལ། གྲོང་ཁྱེར་མེས་བསྲེགས། ལྷག་མ་སངས་རྒྱས་ཀྱི་བསྟན་པ་ལ་བཙུད་ནས་ཆོས་ཀྱི་རྒྱལ་མཚན་དགུང་དུ་བསྒྲེངས་བའི་ཚེ་སེང་གེ་སྒྲ་སྒྲོག་ཏུ་གྲགས་ཏེ། འདི་ཡན་ཆད་ཟག་པ་གསུམ་ཟད་ལམ་མཆོག་ཡོངས་སུ་རྫོགས་པ་ཚེ་དབང་རིག་འཛིན་གྱི་ཚུལ་དུ་བཞུགས་པ་ཡིན་ནོ། །དེ་ནས་བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ་བལ་པོའི་རྒྱལ་པོ་དགེ་འཛིན་གྱི་སྲས་མོ་བལ་མོ་ཤཱཀྱ་དེ་བ་སྒྲུབ་རྟེན་མཛད་ནས་དཔལ་ཡང་དག་གི་སྒོ་ནས་མཆོག་གི་དངོས་གྲུབ་སྒྲུབ་པའི་ཚེ་འདྲེ་སྲིན་མཐུ་བོ་ཆེ་གསུམ་གྱིས་བར་ཆད་བྱས་ཏེ། ལོ་གསུམ་དུ་ཆར་མ་བབ། ནད་དང་མུ་གེ་བཏང་བ་ལ། རྒྱ་གར་དུ་བླ་མ་རྣམས་ལས་བར་ཆད་འདུལ་བའི་ཆོས་ལེན་པར་བཏང་བས་ཕུར་པའི་རྒྱུད་ལུང་མི་ཁུར་གཉིས་བརྫངས་པ་ཕེབས་པ་ཙམ་གྱིས་བར་ཆད་རང་བཞིན་གྱིས་ཞི། ཆར་བབ་ཅིང་ནད་མུག་རྒྱུན་ཆད། ཡབ་ཡུམ་གཉིས་མཆོག་གི་དངོས་གྲུབ་བརྙེས་ཏེ་ཕྱག་རྒྱ་ཆེན་པོའི་རིག་འཛིན་གྱི་སྐུར་བཞུགས་སོ། །གཞན་ཡང་དུས་སྐབས་ཅི་རིགས་པར། ཨོ་རྒྱན་གྱི་གླིང་ཕྲན་ཧུརྨུ་ཛུ་དང་། སི་ཀོ་ངྷ་ར་དང་། ངྷ་ན་ཀོ་ས་དང་། རུཀྨ་སོགས་དང་། ཏི་ར་ཧུ་ཏི་སོགས་ཐ་རུའི་རྒྱལ་ཁམས་དང་། ཀཱ་མ་རུ་ལ་སོགས་པ་རྣམས་སུ་གཅིག་དང་དུ་མའི་རོལ་གར་གྱིས་གདུལ་བྱའི་སྐལ་པ་དང་འཚམས་པར་ཆོས་སྟོན་པ་དང་མཆོག་དང་ཐུན་མོང་གི་དངོས་གྲུབ་ཀྱིས་སེམས་ཅན་མང་པོ་ལ་ཕན་བཏགས་པ་སྟེ། ཧོར་དང་རྒྱ་ནག་སོགས་འདུལ་བ་ལ་རྒྱལ་པོ་མངོན་ཤེས་ཅན་དང་། རྣལ་འབྱོར་པ་སྟོབས་ལྡན་དུ་སྤྲུལ་པ་དང་། ཞང་ཞུང་ཡུལ་དུ་ཏ་བི་ཧྲི་ཙ་ཞེས་རང་བྱུང་གི་ཁྱེའུར་སྤྲུལ་ནས་རྫོགས་ཆེན་སྙན་བརྒྱུད་ཀྱི་གདམས་པས་སྐལ་ལྡན་མང་པོ་འོད་ལུས་སུ་བསྐྱལ་བས་མཚོན་ཡུལ་རིས་དང་སྐད་རིགས་མི་གཅིག་པ་རྣམས་སུ་གང་འདུལ་གྱི་ཕྲིན་ལས་སྣ་ཚོགས་པས་སྐྱེ་རྒུ་རྣམས་ཐར་ལམ་དུ་བཀོད་པའི་ཕྲིན་ལས་ནི་ཚད་གཟུང་དུ་མེད་པ་སྟེ་རྒྱལ་བའི་ཕྲིན་ལས་བསམ་མི་ཁྱབ་པའི་ཆོས་ཉིད་དོ། །ཁྱད་པར་རང་ཅག་གངས་རིའི་ལྗོངས་པ་རྣམས་ལ་རྒྱལ་བསྟན་མདོ་སྔགས་ཀྱི་བསྟན་པ་ཉི་མ་ཤར་བ་ལྟར་བྱུང་བ་སློབ་དཔོན་འདི་ཉིད་ཁོ་ནའི་བཀའ་དྲིན་དང་ཕྲིན་ལས་ཡིན་པ་སྔོན་གྱི་རྒྱལ་རབས་ཆོས་འབྱུང་དག་ན་རྒྱས་པར་གསལ་ཞིང་འོག་ཏུ་ཡང་ཅུང་ཟད་འབྱུང་བར་འགྱུར་བས་འདིར་མི་སྤྲོའོ། །དེ་ལྟར་དངོས་རྒྱུད་རྫུ་འཕྲུལ་གྱི་རོལ་གར་ཚད་མེད་པས་རྒྱ་བལ་བོད་གསུམ་གཙོ་བོར་གྱུར་པའི་གདུལ་བྱ་མཐའ་ཡས་པ་སྨིན་གྲོལ་གྱི་ས་ལ་བཀོད་ནས་སྤྱི་ལོ་༨༧༦པར་རྔ་ཡབ་སྲིན་པོའི་གླིང་དུ་སྐུ་ལུས་མ་སྤངས་པར་འཇའ་འོད་ཀྱི་ཀློང་ནས་མངོན་སུམ་དུ་གཤེགས་པར་མཛད་དོ། །དེ་ཡན་ཆད་རིག་འཛིན་བརྡའི་བརྒྱུད་པ་སྟེ་སྟོན་པའི་ཐུགས་ཡེ་ཤེས་རིག་པའི་རང་རྩལ་ལས་ཤར་བ་ཁོ་ན་ལས་གང་ཟག་རང་རྒྱུད་པ་མིན་པས། བརྡ་ཐབས་བསྟན་པ་ཙམ་གྱིས་རྟོགས་གྲོལ་དུས་མཉམ་དུ་སོང་བ་ཤ་སྟག་ཡིན་ཕྱིར། རིག་འཛིན་བརྡ་ཡི་བརྒྱུད་པ་ཞེས་གསང་ཆེན་སྔ་འགྱུར་པའི་བརྡ་ཆད་ཐུན་མོང་མ་ཡིན་པའོ། །

སྨྲས་པ།

སྐུ་གསུམ་སྟོན་པའི་ལྷ་ལམ་ཡངས་པར་ཐུགས་རྗེའི་སྤྲིན་ཆེན་རབ་དཀྲིགས་པས། །རྣམ་གསུམ་ཡོ་ག་འབྲས་བུའི་ཐེག་པ་སྨིན་གྲོལ་བདུད་རྩིའི་ཆོས་ཆར་འབེབས། །བརྒྱུད་གསུམ་བླ་མའི་ཞལ་ཆབ་མ་ཉམས་བྱིན་བརྒྱུད་རྟོགས་པའི་ཟིལ་མངར་ཅན། །ས་གསུམ་གདུལ་བྱའི་བསོད་ནམས་ཞིང་སར་དུས་ཀུན་དགེ་བའི་དཔྱིད་དུ་འཇོ། །གཞི་དབྱིངས་སྟོང་གསལ་ཆོས་སྐུའི་ཞིང་ཁམས་རྒྱ་ཆད་ཕྱོགས་ལྷུང་ཀུན་དང་བྲལ། །གདོད་ནས་ཡེ་གྲོལ་ཆོས་སྐུའི་སྟོན་པ་ཁྱབ་བདག་རིགས་དྲུག་ཀུན་ཏུ་བཟང་། །ཉིད་ལས་མི་གཞན་རྒྱལ་བ་རྒྱ་མཚོ་ཡེ་ཤེས་དག་པའི་འཁོར་ཚོགས་ལ། །བྱིན་གྱིས་བརླབས་པའི་ངོ་བོར་སྣང་བ་སྐྱེ་མེད་བརྗོད་བྲལ་དགོངས་པའི་གསུང་། །ངེས་པ་ལྔ་ལྡན་ལོངས་སྐུའི་ཕོ་བྲང་ལྷུན་གྲུབ་སྟུག་པོ་བཀོད་པའི་ཞིང་། །མཆོག་ཏུ་མི་འགྱུར་ཁ་སྦྱོར་བདུན་ལྡན་ལོངས་སྤྱོད་རྫོགས་སྐུ་རྣམ་སྣང་མཛད། །ཐ་མི་དད་ཅིང་སྤྲོ་བསྡུ་བྲལ་བ་རང་སྣང་དག་པའི་འཁོར་ཚོགས་ལ། །བསམ་གྱིས་མི་ཁྱབ་རང་གི་ངོ་བོས་བརྡ་ཐབས་རྟགས་ཀྱི་གསུང་མཆོག་སྣང་། །བྱེ་བ་ཕྲག་བརྒྱ་སྟོང་གསུམ་འཇིག་རྟེན་དག་དང་མ་དག་འགྲོ་མང་ཁམས། །དཔག་ཡས་སྒྱུ་འཕྲུལ་ཆུ་ཟླའི་རོལ་གར་སྣ་ཚོགས་སྤྲུལ་པའི་སྐུར་སྣང་བས། །ཐ་དད་དྲང་ངེས་མདོ་དང་སྔགས་ཀྱི་ཟབ་དང་རྒྱ་ཆེའི་ཆོས་ཚུལ་འབུམ། །མ་ལུས་གདུལ་བྱའི་དབྱངས་ཀྱིས་བསྙད་པ་སྒྲ་ཚིག་སྡེབ་སྦྱོར་ལེགས་པས་གསུངས། །ཇི་སྙེད་སྣང་ཞིང་སྲིད་པའི་ཆོས་སོ་ཅོག །ལྷ་སྔགས་བདེ་བ་ཆེན་པོའི་རོལ་རྩལ་དུ། །བསྐྱེད་པའི་རྣལ་འབྱོར་དག་མཉམ་དབྱེར་མེད་པས། །དཀྱིལ་འཁོར་གསུམ་དུ་རྟོགས་པ་མ་ཧཱའི་ལམ། །ཤེས་དང་ཤེས་བྱ་མཚན་བཅས་དངོས་སྣང་ཀུན། །ཐབས་མཆོག་མི་འགྱུར་ཞུ་བདེའི་ཡེ་ཤེས་ཁམས། །རྫོགས་པའི་རིམ་པས་བདེ་སྟོང་དབྱེར་མེད་དུ། །རྣལ་འབྱོར་ལམ་བྱེད་ལུང་ཆེན་ཨ་ནུའི་ལུགས། །སྣང་སྲིད་འཁོར་འདས་བཟང་ངན་མཚན་རྟོག་ཀུན། །གདོད་ནས་དག་པ་སྟོང་ཆེན་ཆོས་ཀྱི་སྐུར། །ཤར་གྲོལ་དུས་མཉམ་རིག་སྟོང་དབྱེར་མེད་དུ། །མ་ལུས་འུབ་ཆུབ་བྱར་མེད་ཨ་ཏིའི་གནད། །རྒྱལ་ཀུན་གསང་བ་བླ་ན་མེད་པའི་མཛོད། །ངེས་དོན་ཆོས་ཚུལ་རྒྱ་མཚོའི་ཉིང་ཁུའི་བཅུད། །ཟབ་ལས་ཆེས་ཟབ་ནང་རྒྱུད་ཡོ་ག་གསུམ། །བསྟན་པའི་སྙིང་པོ་རྡོ་རྗེ་ཐེག་པ་འཕགས། །ཐུབ་བསྟན་ཡོངས་སུ་རྫོགས་པའི་ཁང་བཟང་རྩེར། །གསང་ཆེན་བསྟན་པའི་བ་གམ་མངོན་མཐོ་ཞིང་། །སྡེ་གསུམ་ནོར་བུའི་ཏོག་གིས་ཉེར་མཛེས་པ། །སྔ་འགྱུར་ཆོས་ཀྱི་རྒྱལ་ཐབས་འདི་ཀོ་རྨད། །ཅེས་པ་ནི་གསང་སྔགས་རྡོ་རྗེ་ཐེག་པ་ནང་རྒྱུད་ཡོ་ག་གསུམ་གྱི་བསྟན་པ་རིན་པོ་ཆེ་ཇི་ལྟར་དར་ཚུལ་བཤད་པའི་སྐབས་ཀྱི་ཆེད་དུ་བརྗོད་པའི་ཚིགས་སུ་བཅད་པའི་ཕྲེང་བའོ། །

སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། གསང་ཆེན་རྡོ་རྗེ་ཐེག་པ་ནང་རྒྱུད་ཡོ་ག་རྣམ་གསུམ་གྱི་ཆོས་ཀྱི་འཁོར་ལོ་བསྐོར་ཚུལ་བྱེ་བྲག་ཏུ་བརྗོད་པའི་སྐབས་སྟེ་སརྒ་གསུམ་པ་རྫོགས་སོ།། །།