མཆོད་པར་བརྗོད་པ།
སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ཞེས་བྱ་བ་བཞུགས་སོ། །
གཞི་དབྱིངས་དག་པ་སྟོང་པ་ཆེན་པོའི་གནས་ལུགས་མཐའ་བཞིའི་སྤྲོས་ཀུན་ཉེར་ཞི་མཆོག་ཏུ་མི་འགྱུར་ཆོ༵ས་ཀྱི་སྐུ། །
འོད་གསལ་ལྷུན་གྲུབ་སྒྱུ་འཕྲུལ་རོལ་མོ་དབྱིངས་དང་ཡེ་ཤེས་གཉིས་སུ་མེད་གང་ངེས་པ་ལྔ་ལྡན་ལོང༵ས་སྤྱོད་རྫོགས། །
ཀུན་སྣང་དག་ཆེན་མཚན་དཔེའི་རོལ་གར་བཟོ་དང་སྐྱེ་བ་མཆོག་གི་རྣམ་རོལ་སྣ་ཚོགས་སྤྲུ༵ལ་པའི་སྐུར་སྣང་བ། །
ཆོས་ལོངས་སྤྲུལ་གསུམ་སྐུ་གསུམ་སྟོན་པ་དགོ༵ངས་བརྒྱུ༵ད་རྒྱ༵ལ་བ༵་རྒྱ་མཚོའི་ཚོགས་ལ་འདུ་འབྲལ་མེད་པའི་བརྡའ་ཕྱག་འཚལ། །
ཤིན་ཏུ་རྨད་བྱུང་འབྲས་བུའི་ཐེག་པ་གསང་ཆེན་བཀའ་ཡི་བསྡུ་པོར་དབང་བསྐུར་གསང་བའི་བདག་པོ་བཛྲ་ཆོས། །
རྒྱལ་ཚབ་སེམས་དཔའ་རིགས་གསུམ་མགོན་པོ་དམ་པའི་རིགས་ཅན་དྲྭ་མ་ལྔ་དང་ལས་ཅན་ཆོས་བདག་རྒྱལ་པོ་ཛཿ། །
སྡེ་གསུམ་རྫོགས་ཆེན་བསྟན་པའི་ཤིང་རྟ་དགའ་རབ་འཇམ་དཔལ་དྲི་མེད་བཤེས་གཉེན་ཤྲཱི་སེང་ཛྙ་ན་སཱུ་ཏྲ་སོགས། །
བརྡ༵འ་བརྒྱུ༵ད་རི༵ག་འཛི༵ན་མི་དང་མི་མིན་ལྷ་ཀླུ་གནོད་སྦྱིན་སྲིན་པོའི་རིགས་ཅན་འབུམ་ཕྲག་ཚོམ་བུའི་ཚོགས་ལ་འདུད། །
ཚང་ལ་མ་ནོར་གསང་ཆེན་རྒྱུད་སྡེ་ཟབ་ལས་ཆེས་ཟབ་བཀའ་གཏེར་སྨིན་གྲོལ་རིམ་དགུ་ཐེག་པ་རྒྱ་མཚོའི་བཅུད། །
ཆེ་བ་དྲུག་ལྡན་རྨད་བྱུང་ཆོས་ཚུལ་སྙན་ནས་སྙན་བརྒྱུད་བཤད་དང་སྒྲུབ་པས་དུས་ཀྱི་མཐར་ཡང་མ་ཉམས་པར། །
འཛིན་སྐྱོང་སྤེལ་ལ་ཟླ་མེད་ཕྲིན་ལས་ཕྱོགས་ཀྱི་མཐར་ཁྱབ་གྲུབ་བརྙེས་རིག་འཛིན་སྙ༵ན་བརྒྱུ༵ད་བླ༵་མ༵འི་ཚོགས་ཀུན་ལ། །
དངོས་པོ་ཀུན་གྱིས་རབ་ཏུ་འདུད་དོ་དམིགས་པ་མེད་པའི་ཐུགས་རྗེས་དགོངས་ལ་བྱིན་རྒྱུད་རྟོགས་པའི་ཕ་ཕོགས་སྩོལ། །
རྨད་བྱུང་ཚོགས་གཉིས་ཆུ་གཏེར་ལས་འཁྲུངས་མཚན་དཔེའི་འོད་ཟེར་སྟོང་ཕྲག་འབར་བ་ལྷར་བཅས་འགྲོ་བའི་གཙུག་ན་མཐོ། །
རབ་འབྱམས་ཤེས་བྱའི་ཆོས་ཁམས་རྒྱ་མཚོར་གཟིགས་པ་སྒྲིབ་མེད་སྟོབས་བཅུའི་རྩལ་རྫོགས་མཁྱེན་གཉིས་ཡེ་ཤེས་ཕྱོགས་སུ་རྒྱས། །
སྤངས་དང་རྟོགས་པའི་ཡོན་ཏན་མཐར་ཕྱིན་ཀུན་ཁྱབ་ཉེར་བདུན་ཕྲིན་ལས་སྣང་བ་ཐེག་གསུམ་གདུལ་བྱའི་དཔལ་དུ་འཛུམ། །
བདེ་གཤེགས་སང༵ས་རྒྱ༵ས་ཆོས་ཀྱི་ཉི་མའི་ཞབས་སྐྱེས་རྡུལ་བྲལ་རྣམ་པར་དག་པར་མགོ་བོས་བཏུད་དེ་གུས་ཕྱག་འཚལ། །
བརྒྱད་ཁྲི་བཞི་སྟོང་ཆོས་ཀྱི་ཕུང་པོ་ཐོག་མཐའ་བར་དགེའི་རྒྱལ་གསུང་ལེགས་བཤད་མདོ་རྒྱུད་བསྟན་པ་ལུང་གི་མཛོད། །
ཆགས་བྲལ་འགོག་ལམ་སྡུག་ཀུན་ཉེར་ཞི་སྒྲིབ་ཚོགས་དྲི་མ་ནམ་ཡང་མི་མཛའ་བསླབ་གསུམ་བསྟན་པ་རྟོགས་པའི་ཆོས། །
སྲིད་དང་ཞི་བའི་གདུང་བ་ཀུན་སེལ་ལུང་རྟོགས་ཆོས་ཚུལ་ཕན་བདེའི་དཔལ་གྱུར་མ་ལུས་ཡོན་ཏན་རྒྱ་མཚོའི་གཏེར། །
སྐྱོབས་པ་མཚུངས་མེད་ད༵མ་ཆོ༵ས་རིན་ཆེན་དང་བའི་བློ་ཡིས་སྐྱབས་སུ་བསྟེན་ནོ་སྐུ་བཞིའི་རྒྱལ་སར་དབུགས་དབྱུང་མཛོད། །
ཉེས་ལྟུང་འཆལ་བའི་དྲི་མས་མ་གོས་རྣམ་དག་བསླབ་གསུམ་གསེར་གྱི་ས་གཞིར་གཟུངས་དང་སྤོབས་པའི་ཏིང་འཛིན་བརྟན། །
རིག་དང་གྲོལ་བའི་ཡོན་ཏན་བརྒྱད་ལྡན་ཚོགས་གཉིས་དཔལ་གྱིས་མངོན་པར་མཐོ་གང་ལེགས་བྱས་བསོད་ནམས་ཞིང་སར་བརྗིད། །
ཐར་དང་རྣམ་མཁྱེན་ཞི་བའི་དེད་དཔོན་འདྲེན་པ་ཟླ་མེད་ཚོགས་ཀྱི་མཆོག་གྱུར་འཕགས་པའི་གང་ཟག་དགེ༵་འདུ༵ན་སྡེ། །
བྱང་ཆུབ་བར་དུ་སྐྱབས་ཀྱི་དྭངས་མར་མི་ཕྱེད་དད་པས་མངོན་པར་འདུད་དོ་འདི་ཕྱིར་དགེ་བའི་དཔལ་སྩོལ་ཅིག །
མཚན་དཔེའི་ལང་ཚོ་འདབ་མ་རབ་རྒྱས་མཐོང་ན་མི་མཐུན་མེད་པའི་སྐུ༵། །
ཡན་ལག་དྲུག་ཅུའི་ཚངས་པའི་དབྱངས་རྫོགས་ཐོས་གྲོལ་ཞི་བསིལ་བདུད་རྩིའི་གསུ༵ང་། །
མཐའ་དག་ཤེས་བྱའི་དེ་ཉིད་མངོན་གཟིགས་མཁྱེན་གཉིས་དཀྱིལ་འཁོར་རྒྱས་པའི་ཐུག༵ས། །
བདེ་གཤེགས་སྟོན་པ་ལྷ་ཡི་ལྷར་གྱུར་མཉམ་མེད་ཤཱཀྱ་སེང་གེས་སྐྱོངས། །
རྒྱལ་ཀུན་དབྱིངས་རིག་མཁྱེན་གཏེར་ཡེ་ཤེས་བཅུ་དྲུག་ལང་ཚོའི་འཇོ་སྒེག་ཅན། །
སྔོ་སངས་རལ་གྲིའི་འཕྲུལ་འཁོར་རྩེ་ན་ཤེས་རབ་མེ་དཔུང་དབལ་ཚ་བས། །
ཀུན་རྨོངས་སྙིང་གི་མུན་པ་འཇོམས་ལ་གཅིག་ཏུ་དཔའ་བ་ལྷག་པའི་ལྷ། །
འཇམ་དཔལ་དབྱངས་ཁྱེད་ཡུད་ཙམ་དགོངས་ལ་གཟུངས་སྤོབས་བློ་གྲོས་སྣང་བ་སྩོལ། །
བདེ་ལྡན་ཞིང་གི་འོད་མཚན་མགོན་པོའི་དབང་མདོག་ཐུགས་ཀའི་ཧྲཱི་ཡིག་དམར། །
ངོ་མཚར་ལྷོ་ནུབ་སིནྡྷུའི་དྭངས་མཚོར་མ་ཆགས་པདྨའི་རྩེར་སྨིན་པ། །
རྒྱལ་ཀུན་གསང་གསུམ་ཕྲིན་ལས་ནུས་བྱིན་མ་ལུས་གཅིག་ཏུ་བསྡུས་པའི་སྐུ། །
བསིལ་ལྡན་འགྲོ་ལ་བཀའ་དྲིན་མཚུངས་མེད་ཨོ་རྒྱན་སངས་རྒྱས་གཉིས་པ་རྒྱལ། །
གང་གི་མཁྱེན་དཔྱོད་བློ་གྲོས་ཡངས་པར་མ་ཆུབ་ཤེས་བྱའི་དངོས་པོ་འགའ། །
ཅི་ཡང་སྲིད་མིན་སྟོང་དང་རྟེན་འབྱུང་བདེན་གཉིས་ཆོས་ཀྱི་དེ་ཉིད་གཟིགས། །
ཐེག་མཆོག་དབུ་སེམས་ཚུལ་གཉིས་ཟུང་འཇུག་སྔར་མེད་གྲུབ་མཐའི་སྲོལ་ཕྱེས་ཤིང་། །
འདུལ་བསྟན་ཉི་མ་ལྗོངས་འདིར་འདྲེན་མཛད་མཁན་ཆེན་བྱང་ཆུབ་སེམས་དཔར་འདུད། །
ཐུགས་བསྐྱེད་སྨོན་པའི་དམ་བཅའ་མ་ཉམས་ཆོས་སྲིད་འཕྲུལ་གྱི་ཞགས་པ་ཡིས། །
སུམ་གཉིས་ས་ཡི་དཀྱིལ་འཁོར་དབང་བྱས་ངོ་མཚར་བཀའ་རྟགས་གྲགས་སྙན་དབྱངས། །
སྔར་མེད་གངས་རིའི་རྣ་ཆར་བྱིན་པའི་མཛད་རྗེས་ཉི་ཟླའི་གཟུགས་བཞིན་དུ། །
མངོན་པར་འཕགས་པའི་ལྷ་གཅིག་བཙད་པོ་མངའ་བདག་ཁྲི་སྲོང་ལྡེའུ་བཙན་བསྟོད། །
མདོ་རྒྱུད་བཀའ་དང་དགོངས་འགྲེལ་བསྟན་བཅོས་ཕྱི་ནང་གཙུག་ལག་རིག་པའི་གཞུང་། །
ཚང་ལ་མ་ནོར་བསྒྱུར་ཞུས་གཏན་ཕབ་ཉན་བཤད་སྒྲུབ་པའི་སྲོལ་བཟང་གིས། །
བྱང་ཕྱོགས་མཐའ་འཁོབ་མུན་པའི་གླིང་འདིར་ཆོས་རིག་སྣང་བ་གསལ་མཛད་པ། །
བཱི་མ་བཻ་རོ་སྐ་ཅོག་གནུབས་གཉགས་སྔ་འགྱུར་ལོ་པཎ་ཚོགས་ལ་འདུད། །
རྣམ་མང་མཁས་གྲུབ་སྟོང་ཕྲག་རྒྱུ་སྐར་ཕྱོགས་སུ་དཀྲིགས་པའི་ཚལ་དབུས་ན། །
ཀུན་གཟིགས་མཁྱེན་པའི་ཡེ་ཤེས་དཀྱིལ་འཁོར་ལུང་དང་རིགས་པའི་འོད་སྟོང་འབར། །
རྒྱལ་བསྟན་སྤྱི་དང་སྔ་འགྱུར་རིང་ལུགས་ཉིན་མོའི་སྣང་བར་བཀོད་པའི་མགོན། །
རོང་ཀློང་ཞེས་གྲགས་ཉི་ཟླ་ཟུང་གཅིག་བདེ་ཆེན་འཁོར་ལོའི་རྒྱན་དུ་བསྟེན། །
གྲུ་འཛིན་མགོན་པོའི་ཐུགས་རྗེའི་སྒྱུ་འཕྲུལ་ངུར་སྨྲིག་འཛིན་པའི་སྐུར་བཞེངས་པ། །
རྨད་བྱུང་ཕྲིན་ལས་ཟེགས་མ་རེ་རེས་བསྟན་འགྲོའིི་དགེ་མཚན་བཞད་པའི་གཉེན། །
མ་ལུས་ཕན་བདེའི་དེད་དཔོན་མཆོག་གཅིག་གངས་ལྗོངས་འགྲོ་བ་སྐྱོབས་པའི་མགོན། །
མཚུངས་མེད་བླ་མ་བཛྲ་དྷ་རའི་ཞབས་པད་ཚངས་གནས་རྒྱན་དུ་མཆོད། །
གང་མཚན་བདུད་རྩིའི་ཟེགས་མ་ཕྲ་མོ་ལུས་ཅན་རྣ་བའི་དཔྱིད་དཔལ་དུ། །
མངོན་པར་སོན་པས་ངན་འགྲོའི་གཡང་ལས་ཀུན་ཏུ་སྒྲོལ་བའི་ཐུགས་རྗེའི་ཤུགས། །
རྨད་བྱུང་མཐུ་གྲུབ་བདེ་གཤེགས་མི་གཡོ་རྒྱལ་བ་རིན་ཆེན་གཙུག་ཏོར་ཅན། །
རྫོགས་ཆེན་བསྟན་པའི་ཤིང་རྟར་བྱོན་པ་གྲུབ་དབང་པདྨ་རིག་འཛིན་རྒྱལ། །
གང་གི་གསང་གསུམ་སྒྱུ་འཕྲུལ་རོལ་མོ་མཁས་བཙུན་བཟང་པོའི་རྣམ་ཐར་གྱི། །
སྙན་པའི་བ་དན་ཕྱོགས་སུ་གཡོ་ཞིང་བཤད་སྒྲུབ་ལས་ཀྱི་འཁོར་ལོ་ཡི། །
འཕྲིན་ལས་སྣང་བས་ས་འདི་ཁྱབ་མཛད་རིམ་བྱོན་སྐྱེས་རབས་ཡིད་བཞིན་དབང་། །
སྔ་འགྱུར་བསྟན་པའི་གཙུག་ན་མངོན་མཐོ་ཡབ་སྲས་བརྒྱུད་པ་བཅས་པས་སྐྱོངས། །
རླབས་ཆེན་སྨོན་པའི་ཐུགས་བསྐྱེད་ལྷུན་རྫོགས་དཔག་ཡས་མཛད་བཟང་མན་ཤེལ་འོད། །
བཤད་དང་སྒྲུབ་པའི་སྲོག་ཏུ་སྨིན་པའི་གསང་གསུམ་འཕྲིན་ལས་ཕྱོགས་སུ་འཛུམ། །
ཡབ་རྗེའི་རིང་ལུགས་རྣམ་དག་བསྟན་པ་དུས་མཐར་མི་ཉམས་སྤེལ་བའི་གཙོ། །
ཁྱབ་བདག་བླ་མ་པདྨའི་མཚན་འཆང་འཁོར་ལོའི་མགོན་པོ་གང་དེར་འདུད། །
སྟོང་གསལ་ཟུང་འཇུག་འདུས་མ་བྱས་དབྱིངས་མཆོག་ཏུ་མི་འགྱུར་གཉུག་མའི་ཁམས། །
ཟབ་ཞི་རྡུལ་བྲལ་རིག་སྟོང་སྙིང་པོ་འོད་གསལ་སེམས་ཀྱི་གསང་བའི་གནད། །
མངོན་སུམ་ངོ་སྤྲོད་དཔལ་ལྡན་བླ་མ་ཉམས་རྟོགས་ཡོན་ཏན་རྒྱ་མཚོའི་གཏེར། །
བདག་གི་འདྲེན་མཆོག་མ་ཏི་ས་རས་བྱང་ཆུབ་བར་དུ་རྗེས་སྐྱོངས་ཤིག །
གཞན་ཡང་མཆོད་འོས་བླ་ན་མེད་པ་ལུང་དང་རྟོགས་པའི་ཡོན་ཏན་གྱིས། །
མངོན་པར་ཕྱུག་ཅིང་མཁས་བཙུན་བཟང་གསུམ་དམ་པའི་རྣམ་ཐར་རྨད་བྱུང་བ། །
སྙིགས་དུས་བསྟན་དང་འགྲོ་བའི་དཔལ་གྱུར་ཡོངས་འཛིན་དགེ་བའི་བཤེས་གཉེན་ཚོགས། །
རིགས་ཀྱི་ཅོད་པན་རྒྱན་དུ་བསྙེན་ཀུན་བཀའ་དྲིན་དྲན་བཞིན་དད་ཕྱག་བརྩེགས། །
འདི་ན་སྐྱེས་སྦྱངས་བློ་གྲོས་ཤིན་ཏུ་ཉག་ཕྲ་དར་གྱི་སྐུད་པའི་རྗེས་འགྲོ་བས། །
མཁས་པ་དགྱེས་པའི་ལེགས་བཤད་དགའ་སྟོན་ཅི་དགར་སྤེལ་བའི་མཐུ་ཞན་མོད། །
དྲང་པོའི་རྣམ་དཔྱོད་འཁྱོག་ལ་མ་དྲངས་སྔོན་བྱུང་ལོ་རྒྱུས་རི་མོའི་གཟུགས། །
མངོན་གྱུར་ཡི་གེའི་རིས་སུ་བཀོད་པ་གཟུར་གནས་དགའ་བའི་སྐྱེས་སུ་འབུལ། །
རྨད་བྱུང་མཛད་རྗེས་གྲགས་པ་དཀར་པོ་ཕྱོགས་སུ་གཡོ་བའི་ངོ་མཚར་གཏམ། །
སྙན་པའི་རོལ་མོ་དབྱངས་སུ་འགུགས་མཁས་གྲུབ་པའི་དབང་ཕྱུག་རྫོགས་ཆེན་པའི། །
ཆོས་སྲིད་མངའ་ཐང་ཟླུམ་པོའི་གསེར་འཁོར་འཛམ་གླིང་གོ་ལའི་ཁྱོན་ཀུན་ཏུ། །
བསྒྱུར་བའི་འདས་དོན་ལོ་རྒྱུས་རིང་མོ་སྔར་མེད་བྱུང་བ་བརྗོད་ལ་སྤྲོ། །
ཞེས་ཡུལ་དམ་པ་རྣམས་ལ་མཆོད་པར་བརྗོད་པ་དང་དངོས་པོ་ངེས་པར་བསྟན་པའི་ཚིགས་སུ་བཅད་པའི་མེ་ཏོག་གི་ཕྲེང་བ་ཚར་དུ་དངར་བས་རྩོམ་པ་ལ་འཇུག་པའི་སྒོ་ཡངས་པོར་ཕྱེས་ཏེ་གང་ཞིག་གླེང་བར་བྱ་བ་སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ལ། སྟོན་པ་འཇིག་རྟེན་དུ་བྱོན་ནས་དམ་ཆོས་ཇི་ལྟར་དར་ཚུལ་བཤད་པའི་ཚོམས་དང་། བསིལ་ལྡན་ཁ་བའི་ལྗོངས་སུ་མདོ་སྔགས་ཀྱི་བསྟན་པ་རིན་པོ་ཆེ་ཇི་ལྟར་བྱོན་ཚུལ་བསྟན་པའི་རབ་བྱེད། སྔ་འགྱུར་བསྟན་པའི་ཉི་མ་གྲུབ་དབང་རྫོགས་ཆེན་པའི་གདན་རབས་ཆོས་བརྒྱུད་ཀྱི་བྱུང་བ་དངོས་བརྗོད་པའི་སརྒ། ཞར་བྱུང་དུ་གསང་ཆེན་རྙིང་མ་པའི་གདན་ས་ཆེན་མོ་དྲུག་ཏུ་གྲགས་པའི་གཏམ་རགས་ཙམ་བརྗོད་པ་སྟེ་དུམ་བུ་བཞི་ལས།