མདོ་ཁམས་རུ་དམ་ལུང་གི་གནས་ཡིག་སྐོར།
གྲུབ་དབང་བཞི་པ་མི་འགྱུར་ནམ་མཁའི་རྡོ་རྗེའི་རུ་དམ་གནས་ཡིག་བཞུགས་སོ། །
མཁའ་སྤྱོད་ས་ལ་འཕོས་པ་བདེ་ཆེན་ཞིང་། །ཀོང་ཡུལ་པདྨ་བཀོད་ཀྱི་གནས་བཟང་དེའི། །ཆ་ལག་རུ་དམ་སྐྱིད་ཁྲམ་ལུང་པ་ནི། །རི་དབྱིབས་པདྨ་ཁ་ཕྱེས་ལྟ་བུ་ལ། །རྒྱབ་མདུན་དར་དཀར་ཡོལ་བ་དཀྲིས་པ་འདྲ། །ཤར་ཕྱོགས་ཐང་ལ་རྟ་མཆོག་འདྲ་བའི་བྲག །གུ་རུ་ཐོད་ཕྲེང་སྡེ་ལྔའི་རང་བྱོན་ཡོད། །གནས་དེའི་བྱང་ཤར་ཚེས་བརྒྱད་འདྲ་བའི་བྲག །གནོད་སྦྱིན་འབར་བ་སྤུན་བདུན་ཕོ་བྲང་ཡོད། །མདུན་དུ་རྩི་ཤིང་དམར་པོ་ཡལ་འདབ་ལྡན། །དབྱར་དུས་ཁྲག་གི་རྒྱ་མཚོ་ཅུང་ཟད་འཁྱིལ། །ཀླུ་བཙན་མངོན་དུ་རྒྱུ་བའི་ར་གཞོབ་འཐུལ། །ལྷོ་ངོས་གངས་རི་ལྷུན་ཆགས་ངོས་དཀྱིལ་གྱི། །བྲག་ལ་རྗེ་བཙུན་སྒྲོལ་མ་དངོས་སུ་བཞུགས། །མེ་ལྷའི་མཚམས་སུ་འཇམ་དཔལ་གཤིན་རྗེ་ཡི། །ཕོ་བྲང་ངོས་ལ་དེའི་འདབས་འབབ་ཆུའི་རྒྱུན། །གངས་ཆུ་ཤུགས་དྲག་ལྡན་པ་བདུད་རྩིའི་ཆུ། །གཤིན་རྗེའི་དྲག་སྔགས་དུ་ཏྲི་པུ་ཏྲི་དང་། །ཡ་མ་རཱ་ཛ་ཡ་མ་རཀྴ་སྒྲོགས། །དྲང་སྲོང་མཉམ་བཞག་ལྟ་བུའི་སྒྲུབ་སྡེ་ཆགས། །འདབས་སུ་སྨན་བཙུན་མཁའ་འགྲོའི་ཕོ་བྲང་ཡོད། །ནུབ་བྱ་རི་བོང་རྣ་བ་སྦྲེལ་འདྲའི་བྲག །སྤྱན་རས་གཟིགས་དང་སྒྲོལ་མ་དཀར་མོའི་སྐུ། །རང་བྱོན་གཟུངས་སྔགས་མ་ཎི་འབྲུ་དྲུག་དང་། །ཨཪྱ་ཏ་རེ་བྲག་གི་སྡེབ་གཉིས་ཡོད། །བྱང་ཕྱོགས་རླུང་ལྷ་གནས་པའི་ཕ་བོང་བདུན། །རྣམ་སྲས་འཛམ་ལྷའི་ཕོ་བྲང་དངོས་ཡིན་ཀྱང་། །དམ་ཅན་རྡོར་ལེགས་ཆོས་རྒྱལ་སྐུ་ལྔ་སོགས། །རང་བྱོན་བྲག་གི་ངོ་ལ་གསལ་དོད་ཡོད། །འདབས་སུ་འབབ་ཆུའི་སྒྲ་ལ་བཻ་ཤྲཱི་སྒྲོགས། །ཡུལ་དབུས་ཨོ་རྒྱན་བསམ་གཏན་ཆོས་ཀྱི་གླིང་། །སྟེང་ན་རྩ་གསུམ་མཁའ་འགྲོ་སྤྲིན་ལྟར་གཏིབ། །བར་ན་མཆོག་ཐུན་དངོས་གྲུབ་ཆར་ལྟར་འབེབ། །གཤམ་ན་བསྟན་བསྲུང་ཐམས་ཅད་གློག་ལྟར་འཁྱུག །མདོ་སྔགས་བཤད་སྒྲུབ་ཆོས་སྒྲའི་གླུ་དབྱངས་ལེན། །དེ་འདྲའི་གནས་ཀྱི་བཀོད་པ་ངོ་མཚར་བ། །བསམ་མི་ཁྱབ་ཀྱང་མདོར་བསྡུས་ཙམ་ཞིག་བཀོད། །འདི་ལ་ཕྱག་བསྐོར་བྱས་པའི་ཕན་ཡོན་ནི། །དད་མོས་ཅན་གྱིས་སྟོང་ཕྲག་གཅིག་བསྐོར་བ། །དུང་ཕྱུར་གཅིག་ཏུ་འགྱུར་ཞིང་ལས་སྒྲིབ་དག །དངུལ་དཀར་མེ་ལོང་བག་རྡུལ་ཕྱིས་པ་འདྲ། །ཕྱི་མ་སྐུ་གསུམ་ཞིང་ཁམས་མངོན་སུམ་མཐོང་། །གླིང་བསྐོར་ཕན་ཡོན་དེ་འདྲར་ཤེས་པར་གྱིས། །དུས་བཟང་རྣམས་སུ་མཐའ་བསྐོར་སུམ་བརྒྱ་ལ། །གོང་གི་འགྱུར་ཡོད་དེ་འདྲ་སྙིང་ལ་ཞོག །གཙུག་ལག་ཁང་དངོས་འདི་ལ་སྟོང་བསྐོར་གཉིས། །དུང་ཕྱུར་འགྱུར་ཡོད་ཉྭ་སྟོང་བརྒྱད་གསུམ་དང་། །ཆོ་འཕྲུལ་དུས་ཆེན་ཤར་ཚེ་བརྒྱ་བསྐོར་གསུམ། །དཱེ་ཝི་ཀོ་ཊ་བསྐོར་དང་ཁྱད་པར་མེད། །སྤྱིར་ན་ལྔ་བདོའི་སྡིག་སྒྲིབ་རྐྱེན་གོས་རྣམས། །ངེས་བསལ་ཕྱིར་དུ་དམ་སྡོམ་གཙང་མ་ཡིས། །སྨེ་བརྩེགས་རྣམ་འཇོམས་རི་ཁྲུས་ལྷ་བསང་སོགས། །འབད་ན་འཕྲལ་ཕུག་ཡ་མཚན་རིམ་བཞིན་གསལ། །དད་མོས་ཅན་གྱི་དགེ་ལེགས་རེ་བསྐོང་ཕྱིར། །ཨོ་རྒྱན་ཆེ་མཆོག་དཔལ་གྱི་རྡོ་རྗེས་བྲིས། །འབྲེལ་ཚད་སྒྲིབ་སྦྱང་སྐུ་གསུམ་མངོན་གྱུར་ཤོག །མངྒ་ལཾ། །
གཏེར་ཆེན་མཆོག་གྱུར་གླིང་པའི་རུ་དམ་གནས་ཀྱི་མདོ་བྱང་།
ན་མོ་གུ་རུ༔ ཆུ་ཕོ་སྤྲེལ་ལོ་སྤྲེལ་ཟླ་ར་བའི་ཚེས་བཅུ་ལ་ཨོ་རྒྱན་གྱི་གུ་རུ་པདྨ་འབྱུང་གནས་དག་པའི་འཁོར་དུ་མ་དང་བཅས་པ༔ རུ་དམ་གངས་ཀྱི་ར་བའི་དབུས་ཀྱི་ནེའུ་སེང་དུ་དར་གྱི་གུར་ཕུབས༔ རིན་པོ་ཆེའི་ཁྲི་ལ་བཞུགས༔ ཟ་འོག་གི་ན་བཟའ་སྣ་ཚོགས་གསོལ༔ ཞལ་ཟས་དུ་མའི་མཆོད་པ་ཡེ་ཤེས་ཀྱིས་བདུད་རྩིར་བྱིན་གྱིས་བརླབས༔ ཡེ་ཤེས་ཀྱི་མཁའ་འགྲོ་མའི་ཚོགས་མཚན་ལྡན་མང་པོས་ཚོགས་ཀྱི་འཁོར་ལོར་རོལ་བའི་ངོ་མཚར་བདེ་གཤེགས་ཀུན་འདུས་ཀྱི་ཚོམ་བུའི་སྒྲུབ་པ་མཛད་པའི་ཚེ༔ འཁོར་རྣམས་ཀྱིས་མགྲིན་གཅིག་ཏུ༔ ཀྱེ་དུས་གསུམ་རྒྱལ་བ་ཀུན་འདུས་རྗེ༔ ཡེ་ཤེས་སྤྱན་གྱིས་གཟིགས་པ་དགོངས་སུ་གསོལ༔ ཉིད་ཀྱིས་ཞབས་བཅགས་སྒྲུབ་པའི་གནས་སུ་གཟིགས༔ དཔལ་དང་ལྡན་པའི་ཕུན་སུམ་ཚོགས་པའི་གནས༔ འདི་ཡི་བྱུང་ཚུལ་ལོ་རྒྱུས་ཡོན་ཏན་དང༔ མ་འོངས་དུས་སུ་ཇི་ལྟར་འབྱུང་བ་རྣམས༔ ད་ལྟ་བཞུགས་དང་མ་འོངས་འབྱུང་འགྱུར་གྱི༔ སྒྲུབ་པ་པོ་ལ་ངེས་ཤེས་སྤྲོ་བསྐྱེད་ཕྱིར༔ སྤྱན་ལྔ་ལྡན་པ་ཉིད་ཀྱིས་གསུང་དུ་གསོལ༔ ཞུས་པས་གུ་རུ་ཉིད་ཀྱིས་བཀའ་བསྩལ་པ༔ ཀྱཻ་ཉོན་གཅིག་སྐལ་ལྡན་འཁོར༔ རིག་པ་འཛིན་པ་ཕོ་མོ་རྣམས༔ ཕུན་སུམ་ཚོགས་པའི་སྒྲུབ་པ་ནི༔ ཕུན་སུམ་ཚོགས་པའི་གནས་སུ་བསྒྲུབ༔ ཕུན་སུམ་ཚོགས་པའི་འབྲས་བུ་རྣམས༔ ཕུན་སུམ་ཚོགས་པ་ལྔ་ལས་འབྱུང༔ དེ་ལས་གནས་ཀྱི་ཕུན་ཚོགས་ནི༔ ཐོག་མ་ཉིད་དུ་རྒྱལ་བས་གསུངས༔ བསྒྲུབ་པའི་གནས་དེ་མ་ལེགས་ན༔ སྒྲུབ་པ་ཐམས་ཅད་དོན་མེད་འགྱུར༔ བསྒྲུབ་པའི་གནས་ཀྱི་མཆོག་རྣམས་ལ༔ བསྒྲུབས་ན་དངོས་གྲུབ་འབད་མེད་འགྲུབ༔ ས་ཕྱོགས་ཕལ་ལ་སྒྲུབ་པ་བས༔ ཕུན་ཚོགས་གནས་སུ་འབུམ་གྱིས་ལྷག༔ ཕུན་སུམ་ཚོགས་པའི་གནས་དེ་ནི༔ ཨུ་དམ་ཝཱ་རའི་མེ་ཏོག་བཞིན༔ བརྒྱ་ལམ་ལ་ནི་རེ་རེ་ཙམ༔ འདི་ནི་གནས་མཆོག་ཕུན་སུམ་ཚོགས༔ དང་པོ་ལོ་རྒྱུས་བྱུང་ཚུལ་བཤད༔ ཆོས་སྐུའི་གནས་མཆོག་ཆོས་ཀྱི་དབྱིངས༔ རྒྱ་ཆད་ཕྱོགས་ལྷུང་ཀུན་དང་བྲལ༔ ལོངས་སྤྱོད་རབ་རྫོགས་སྟུག་པོ་བཀོད༔ ཡེ་ཤེས་གཟུགས་ཀྱི་ལྷ་རྣམས་ཀྱི༔ ཆ་ལུགས་ཕྱག་མཚན་ཆ་ཤས་ལས༔ སྤྲུལ་པའི་ཞིང་ཁམས་འབུམ་འབུམ་གནས༔ སྟོང་གསུམ་རབ་འབྱམས་འཇིག་རྟེན་རྣམས༔ མཁའ་ལ་རླུང་རྟེན་དེ་ལ་ཆུ༔ དབང་ཆེན་གསེར་གྱི་ས་གཞིའི་སྟེང༔ ལྷུན་པོ་རི་རབ་རོལ་བའི་མཚོ༔ འགྲོ་བ་དྲུག་པོ་ཆགས་པའི་གནས༔ རྟ་གདོང་མེ་དང་བཅས་པ་ནི༔ སོ་སོའི་སྐྱེ་བོས་མ་དག་མཐོང༔ འཕགས་པའི་ཡེ་ཤེས་རོལ་བ་དང༔ དོན་ལ་ཡུམ་ལྔའི་རང་བཞིན་ཡིན༔ ཤཱཀྱའི་སྐྱེས་མཆོག་ཐུབ་པའི་ཞིང༔ འཛམ་གླིང་འདི་རུ་ཡུལ་ཆེན་དྲུག༔ དཔལ་ལྡན་ས་ཡི་ཐིག་ལེ་ཆེ༔ ཚོགས་ཀྱི་འདུ་བ་ཉེར་བཞིའི་གླིང༔ དུར་ཁྲོད་ཆེན་པོ་བརྒྱད་དང་བཅས༔ ཁྱད་པར་རི་མཐོ་ས་གཙང་བ༔ གངས་ཅན་བོད་ཀྱི་ཡུལ་འདི་རུ༔ སྟོན་པས་ཞབས་ཀྱིས་མ་བཅག་ཀྱང༔ སྤྱན་རས་གཟིགས་ཀྱིས་བྱིན་གྱིས་རླབས༔ གངས་རི་ཉི་ཤུ་རྩ་གཅིག་ལ༔ འཕགས་པ་འཁོར་བཅས་དངོས་སུ་བཞུགས༔ གནས་མཆོག་ཀུན་གྱི་རྩ་བ་ཡིན༔ ཨོ་རྒྱན་སློབ་དཔོན་པདྨ་ངས༔ སྒྲུབ་པ་ཟབ་མོ་མང་དུ་བགྱིས༔ སངས་རྒྱས་བྱང་ཆུབ་སེམས་དཔའ་དང༔ བླ་མ་ཡི་དམ་མ་ལུས་པ༔ མཐའ་ཡས་སྤྱན་དྲངས་བཞུགས་སུ་གསོལ༔ མཁའ་འགྲོ་རྣམས་ལ་གཉེར་གཏད་ཅིང༔ དམ་ཅན་ཆོས་སྐྱོང་སྲུང་མར་བསྐོས༔ ཟབ་མོའི་གཏེར་ཁ་མང་དུ་སྦས༔ ཞལ་བྱང་གནས་ཡིག་དཀར་ཆག་བཏབ༔ འབྱེད་པའི་སྐྱེས་བུ་ལས་ཅན་བཅས༔ མཐའ་རྒྱས་མ་ཚང་མེད་པ་བྱས༔ ཀུན་ཏུ་བཟང་པོས་བྱིན་བརླབས་པའི༔ ཆོས་དབྱིངས་ནམ་མཁའི་གནས་སུ་ཆགས༔ ལོངས་སྤྱོད་རྫོགས་སྐུས་བྱིན་བརླབས་པའི༔ འབྱུང་བའི་བཅུད་རྣམས་འདུས་པ་ལས༔ ནམ་མཁའི་བཅུད་འདུས་རྩལ་གདང་ནི༔ དྲག་ཏུ་མཐིང་ཀ་ཁྱབ་པ་ཆེ༔ རྒྱ་ཆེ་དྭངས་ལ་ཟབ་པ་འོད༔ ས་ཡིི་བཅུད་འདུས་གངས་ཅན་རི༔ ཆུ་ཡི་བཅུད་འདུས་གཏན་འཁྱིལ་མཚོ༔ མེ་ཡི་བཅུད་འདུས་དྲོད་ཆེན་འབར༔ དབྱར་བསིལ་གངས་ཁྲོད་ཡིན་ན་ཡང༔ དགུན་དུས་ས་མིག་ཁེངས་པ་མེད༔ རླུང་བཅུད་ནགས་ལྗོན་འབྲས་ལྡན་ཞིང༔ སྨན་གྱི་རིགས་རྣམས་ཐམས་ཅད་རྒྱས༔ དེ་ལྟར་གནས་ཀྱི་བྱུང་ཚུལ་ལོ༔ ས་མ་ཡ༔ གཉིས་པ་གནས་ཀྱི་ཡོན་ཏན་ནི༔ གངས་རི་འགྱུར་མེད་ཆོས་ཀྱི་སྐུ༔ གཡུ་མཚོ་གཏན་འཁྱིལ་ལོངས་སྤྱོད་རྫོགས༔ བྲག་རི་གཡའ་སྤངས་ནགས་ཁྲོད་སོགས༔ ཇི་ལྟར་འདོད་པ་སྤྲུལ་བའི་སྐུ༔ གཙོ་བོ་སྐུ་ཡི་གནས་ཡིན་ཕྱིར༔ ཀུན་ཏུ་བཟང་པོ་ཡབ་དང་ཡུམ༔ དེ་བཞིན་རྣམ་སྣང་རྡོ་རྗེ་སེམས༔ རིགས་ལྔའི་རང་བཞིན་སྐུ་ཡི་གནས༔ ཤེལ་གྱི་གུར་ཕུག་འདྲ་བ་ལྔ༔ ཡབ་ཡུམ་སྐུ་ཡང་གསལ་བར་ཤར༔ བྱང་ཆུབ་སེམས་དཔའ་རིགས་གསུམ་མགོན༔ སྐུ་མཆོག་གསལ་བའི་གངས་རི་གསུམ༔ རྩེ་རྒྱས་དཔལ་བཤོས་བསླང་བ་འདྲ༔ ལུང་ཆེན་ཉི་ཤུ་ལུང་ཕྲན་བརྒྱད༔ དམ་པ་རིགས་བརྒྱའི་དཀྱིལ་འཁོར་རྫོགས༔ གབ་ཅིང་སྦས་པའི་ལུང་པ་བཅུ༔ ཀླ་ཀློ་གདུག་པ་འཐིབ་པའི་ཚེ༔ སྙིང་ནས་ཆོས་བྱེད་དགའ་བའི་གནས༔ དབུས་ཕྱོགས་རུ་ཡི་ལུང་པ་རུ༔ རིག་འཛིན་བླ་མ་སྤྲིན་ལྟར་གཏིབ༔ དབང་ཆེན་རྟ་ཡི་ལུང་པ་རུ༔ རུ་ཏྲ་བསྒྲལ་བའི་བཀོད་པ་ཚང༔ གསང་སྔགས་བསྟན་པ་འབྱུང་བའི་གནས༔ བྱང་ཕྱོགས་མཁའ་འགྲོའི་ལུང་པ་རུ༔ རྡོ་རྗེ་ཕག་མོ་རིགས་ལྔ་བཞུགས༔ དཔའ་བོ་མཁའ་འགྲོ་འདུ་བའི་གླིང༔ ཤར་ཕྱོགས་རྔམ་ཁྲོའི་ལུང་པ་རུ༔ སྒོ་སྲུང་ཁྲོ་བོ་ལས་ལ་རྔམ༔ ཡི་དམ་དཔལ་ཆེན་ཁྲོ་རྒྱལ་རྣམས༔ གར་དགུའི་རོལ་བས་དབུས་ནས་འགྱིངས༔ གུ་རུ་པདྨ་འབྱུངགནས་བདག༔ བདེ་ཆེན་ཚོགས་ལ་རོལ་བ་ཡི༔ རྫུ་འཕྲུལ་གར་གྱིས་ཞབས་བརྡབས་པས༔ མཐོང་བས་སྣང་བ་འགྱུར་བའི་མཚོ༔ བསྒྲུབས་པས་ཡེ་ཤེས་བསྐྱེད་པར་བྱེད༔ མཁའ་འགྲོ་འདུ་བའི་མཚོ་གླིང་གི༔ གླུ་ཡི་ཕོ་བྲང་ཆེན་པོའི་རྩེར༔ མི་འགྱུར་རྟགས་སུ་ཕ་བོང་བཞག༔ རིན་ཆེན་དབྱིབས་ཀྱི་ལུང་བ་རུ༔ རིན་ཆེན་ཤེལ་གྱི་ཕ་བོང་ཡོད༔ རྫོགས་ཆེན་བསྟན་པའི་རྩ་བར་གནས༔ བྱང་ཆུབ་ཤིང་གི་ལྗོན་པའི་ཚལ༔ དགོས་འདོད་འབྲས་བུ་སྣ་ཚོགས་འབྱུང༔ ཁྲོ་བོ་རོལ་བའི་ལུང་པ་རུ༔ བདུད་རྩི་ཁྲུས་ཆབ་འོ་མའི་མཚོ༔ བཏུང་ཞིང་ཁྲུས་བྱས་ཉོན་སྒྲིབ་སེལ༔ ཁྲོ་མོ་རོལ་བའི་ལུང་པ་རུ༔ རཀྟ་ཁྲག་གི་ཞམ་ཆུ་འབབས༔ ཆུ་བོས་ཧཱུྃ་དང་ཕཊ་སྒྲ་སྒྲོགས༔ ཕྱི་ནང་བར་ཆད་བགེགས་ཆེན་འཇོམས༔ ལྷོ་ཕྱོགས་གསང་བའི་ལུང་པ་རུ༔ དར་གྱི་ཡོལ་བ་བྲེས་འདྲའི་གངས༔ ཚེ་ཡི་བུམ་པ་འདྲ་བའི་བྲག༔ འཆི་མེད་ནགས་ཚལ་ལྷ་ཡི་ལྗོངས༔ གཡུ་མཚོ་གཏན་འཁྱིལ་ཚེ་ཡི་བཅུད༔ ལྗོན་པའི་ཤིང་མཆོག་ཚེ་ཡི་མདའ༔ ས་ཡི་ཐིག་ལེ་དཔལ་གྱི་རི༔ ནུབ་ཕྱོགས་མགོན་པོ་ཤྭ་ནཱའི་ལུང༔ ཞིང་སྐྱོང་སེང་གེའི་གདོང་ཅན་གནས༔ གཞན་ཡང་ཕྱོགས་བཞིའི་གངས་ཁྲོད་དུ༔ ཨོ་རྒྱན་ང་ཡི་སྒྲུབ་ཕུག་བཞི༔ ཨོ་རྒྱན་ང་ཡི་ཕྱག་རྗེས་རེ༔ མཁའ་འགྲོ་གནས་པའི་མཚོ་ཆུང་རེ༔ ཡི་དམ་ལྷ་ཡི་དཀྱིལ་འཁོར་རེ༔ ཡ་མཚན་ཅན་གྱི་གཏེར་ཆེན་རེ༔ འདོན་མི་རུང་བའི་བླ་གཏེར་བཞི༔ སུས་ཀྱང་འདོན་རུང་གཏེར་ཕྲན་བརྒྱད༔ འགྱུར་མེད་གངས་རི་ལྷུན་ཆགས་པ༔ བསྒོམས་ན་ལྟ་བའི་གདེང་ཆེན་རྙེད༔ ཆུ་བོ་ལྷང་ལྷང་རྔ་སྒྲ་སྒྲོགས༔ བསྒྲུབས་ན་སྔགས་ཀྱི་དངོས་གྲུབ་མྱུར༔ ལུང་ཁོག་ཡངས་ལ་རྩི་ཤིང་ཕྱུག༔ འཆད་ན་ཤེས་རབ་རྩལ་ཁ་རྒྱས༔ མཚོ་དང་ཆུ་ཀླུང་དྭངས་ཤིང་བསིལ༔ བརྟེན་ན་བློ་གྲོས་རབ་ཏུ་འཕེལ༔ ཆུ་བོ་ཡངས་ཤིང་རྒྱས་པ་ནི༔ སྨིན་བྱེད་དབང་གི་ཆུ་བོ་རྒྱས༔ དབྱིངས་ཕྱུག་གནས་པའི་མཚོ་ཆེན་ལ༔ བདེ་གཤེགས་ཞི་བའི་དཀྱིལ་འཁོར་བཞུགས༔ རིན་ཆེན་བྲག་ཞབས་བྱ་སྐྱིབ་ཁེང༔ བསྒོམས་ན་ཐོད་རྒལ་ཉམས་རྟོགས་འཆར༔ ཁྲོ་བོ་རོལ་བའི་ཕོ་བྲང་དུ༔ སྲ་འཁྲེག་རྡོ་ཡི་ལྡིང་ཁང་དུ༔ བསྒྲུབས་ན་བསྐྱེད་རིམ་ལྷག་པར་གསལ༔ ལྗོན་ཚལ་ཤིང་དྲུང་ཀེའེ་ཚང་དུ༔ བསྒྲུབས་ན་རྣལ་འབྱོར་མོས་གུས་འབར༔ མཁའ་འགྲོ་འདུ་བའི་ཆོས་འབྱུང་དུ༔ མ་མོ་མཁའ་འགྲོ་ཚོགས་སུ་འདུ༔ ནགས་ཁྲོད་སྦས་པའི་གསང་ཕུག་ཏུ༔ ཚོགས་ཀྱི་འདུ་བ་བདེ་ཆེན་ཁོལ༔ རུ་ཏྲ་དམ་སྲིའི་སྙིང་ཁྲག་རྣམས༔ དམར་ནག་རཀྟའི་རྒྱ་མཚོ་འཁྱིལ༔ དམ་ཅན་རྒྱ་མཚོ་ལས་ལ་འདུ༔ རྡོ་ཐུན་རྡོ་ཡི་སྒྲུབ་ཁང་དུ༔ བསྒྲུབས་ན་ཞིང་བཅུའི་སྲོག་གཅོད་འགྲུབ༔ དམ་སྲི་ཐམས་ཅད་དམ་ལ་བཏགས༔ ཚོགས་བསགས་ཡང་ཡང་བསྒྲུབས་པས་ན༔ དམ་སྲི་རྒྱུ་བའི་ལམ་ཆད་ནས༔ བོད་ཁམས་ཐམས་ཅད་རྒྱལ་བར་འགྱུར༔ འགྱུར་མེད་གངས་ཀྱི་ར་བས་བསྐོར༔ ནམ་མཁའི་ལྡིང་ཁང་མཐོ་ལ་དྭངས༔ གཏན་འཁྱིལ་རྒྱ་མཚོ་གཏིང་རིང་ཟབ༔ ཉམས་དང་རྟོགས་པ་འཆར་བའི་གནས༔ མཆོག་གི་དངོས་གྲུབ་མྱུར་དུ་འགྲུབ༔ རྫ་བྲག་རྔམ་ལ་ན་བུན་འཐིབས༔ ཆུ་ཀླུང་དྲག་འབབས་འུར་སྒྲ་ཆེ༔ འབྲུག་སྒྲ་དྲག་པོ་གློག་འོད་འཁྱུགས༔ རྩལ་རྔམ་ཆེ་ཞིང་འཇིགས་རུང་པས༔ དམ་ཉམས་སྡིག་ཅན་སྐྲག་ཅིང་བྲོས༔ མཁའ་འགྲོ་གནས་ཀྱི་སྲུང་མ་ཡིན༔ ལོག་པར་སྤྱོད་ལ་ཆད་པ་འབེབས༔ དམ་ལྡན་རྟུལ་ཞུགས་ལྡན་པ་རྣམས༔ དང་པོ་སེམས་ལ་ཡ་ང་སྐྱེ༔ བར་དུ་བསྙེལ་མེད་གདེང་བསྐྱེད་ནས༔ ཐ་མ་ལུས་བདེ་རིག་པ་དྭངས༔ སྐྱོ་ཤས་ངེས་འབྱུང་ཐུགས་ལ་སྐྱེ༔ ཉམས་དང་རྟོགས་པའི་རྩལ་ཁ་རྒྱས༔ སློང་ཚད་རྟེན་འབྲེལ་འདིར་འགྲིགས་པས༔ རྟུལ་ཞུགས་ལྡན་པས་གནས་འདིར་འགྲིམ༔ ས་ཡི་བཅུད་འདུས་གཏན་ཆགས་གངས༔ ཆུ་ཡི་བཅུད་འདུས་གཏན་འཁྱིལ་མཚོ༔ མེ་རླུང་བཅུད་འདུས་རྩི་བཅུད་ལྡན༔ འཆི་མེད་བཅུད་ལེན་འགྲུབ་པའི་གནས༔ རི་བོ་ལྷུན་ཆགས་ནོར་བུ་ལྡན༔ ས་ཡི་བཅུད་ལྡན་སྟོབས་ཆེ་བས༔ ནོར་དང་ལོངས་སྤྱོད་འདི་རུ་འགྲུབ༔ ཕྱི་ལྟར་ཕུན་ཚོགས་བཀོད་པ་ཚོགས༔ ནང་ལྟར་རྒྱལ་བའི་དཀྱིལ་འཁོར་རྫོགས༔ གསང་བ་ཡེ་ཤེས་ལྔ་ཡི་ཞིང༔ ཡང་གསང་ཧེ་རུ་ཀ་ཡི་གྲོགས༔ བླ་མའི་མཆོད་སྡོང་འདི་ཡིན་པས༔ ལུས་ཀྱིས་ཕྱག་དང་བསྐོར་བ་དང༔ ངག་གིས་བསྟོད་ཅིང་བཟླས་པ་བྱེད༔ ཡིད་ཀྱིས་དད་ཅིང་མོས་པས་བརྟེན༔ དངོས་འབྱོར་ཡིད་ཀྱི་སྤྲུལ་པས་མཆོད༔ བྱ་བ་ཕྲིན་ལས་རྒྱ་ཆེར་སྤེལ༔ དེ་ལྟར་བཀུར་བསྟི་བགྱིས་གང་ལ༔ གནས་སྐབས་ནད་དང་གནོད་པ་ཞི༔ ཚེ་དང་བསོད་ནམས་ལོངས་སྤྱོད་འཕེལ༔ ཡིད་ལ་གང་འདོད་དབང་དུ་གྱུར༔ མཐར་ཐུག་སྒྲིབ་པ་ཀུན་བྱང་ནས༔ ཡེ་ཤེས་བླ་ན་མེད་པ་འཕེལ༔ གཞན་ཡང་འདི་ལ་བཤད་བྱས་ན༔ ཤར་དུ་སྐུ་མཆོག་རོལ་བའི་གནས༔ དེ་བཞིན་ཡེ་ཤེས་ཐུགས་ཀྱི་གནས༔ ཤར་ལྷོ་མ་མོ་རོལ་བའི་གནས༔ ལྷོ་རུ་བདུད་རྩི་རོལ་བའི་གནས༔ ལྷོ་ནུབ་རིག་འཛིན་རོལ་བའི་གནས༔ བྱང་ཤར་དྲག་སྔགས་སྒྲུབ་པའི་གནས༔ རིམ་པ་བཞིན་དུ་འཁོར་ལོ་དང༔ རྡོ་རྗེ་ཐོད་པའི་མཁར་བརྩིག་པ༔ བུམ་ཐོད་ཁ་ཊམ་ཌཱ་མ་རུ༔ མཁར་ཐབས་རྒྱ་གྲམ་ཕུར་བའི་དབྱིབས༔ རིན་ཆེན་མཚོན་ཆ་གཟེང་བ་འདྲ༔ གྲུབ་པའི་སློབ་དཔོན་ཆེན་པོ་དགུ༔ བཀའ་བབས་རིག་པ་འཛིན་པ་རྣམས༔ རྫུ་འཕྲུལ་གྱིས་བྱོན་སྒྲུབ་པའི་གནས༔ བསྒྲུབས་ན་རང་རང་དངོས་གྲུབ་འགྲུབ༔ ཡོན་ཏན་བརྗོད་པའི་རིམ་པའོ༔ ས་མ་ཡཱ༔
གསུམ་པ་མ་འོངས་པ་ཡི་དུས༔ ང་ཡི་རྫུ་འཕྲུལ་དུ་མ་ཡིས༔ གནས་འདིའི་བསྔགས་པ་བརྗོད་པར་བྱེད༔ གཡུང་དྲུང་བོན་གྱི་སྒྲུབ་གནས་བྱེད༔ ཤར་གྱི་ཐུགས་གཏེར་ལ་སྤྱོད་པའི༔ ལས་ཅན་སྐྱེས་བུ་འགྲོ་བ་འདུལ༔ རྡོ་རྗེ་ཅན་གྱི་མིང་ཅན་གྱིས༔ སིདྡྷིའི་མཚོ་ནས་དྲག་སྔགས་འབྱེད༔ མཁའ་འགྲོ་སྒྲུབ་པའི་སྙིང་པོ་ཡི༔ ཞལ་བྱང་འདི་ཉིད་ལོན་ནས་ཀྱང༔ བར་དུ་ཐུགས་གཏེར་སྣ་ཚོགས་འབྱེད༔ འབྲིང་དུ་སྒྲུབ་པའི་གནས་སུ་བྱེད༔ དེ་ནས་ལྷོ་ནས་ལས་ཅན་ཞིག༔ གློག་འགྱུ་བཞིན་དུ་ཞལ་བྱང་ལེན༔ སངས་རྒྱས་བསྟན་པ་ཡུན་དུ་བསྲིང༔ ཆོས་མཛད་ནམ་མཁའི་མིང་ཅན་སོགས༔ ལས་ཅན་སྐྱེས་བུ་དུ་མ་ཡིས༔ བོད་ཁམས་བདེ་ཐབས་བརྩོན་པར་བྱེད༔ གཞན་ཡང་གནས་འདིའི་ཕྱོགས་བཞི་རུ༔ བསྟན་པ་འཛིན་པའི་སྐྱེས་བུ་བཞི༔ སྤྲུལ་དང་ཡང་སྤྲུལ་དུ་མ་འབྱུང༔ ཆོས་ཀྱི་རྒྱལ་པོ་ཆེན་པོ་བཞི༔ གནས་འདིའི་ཕྱོགས་བཞིར་རྒྱུན་པར་འབྱུང༔ བསྟན་ལ་གུས་ཤིང་འགྲོ་ལ་བྱམས༔ ཟབ་མོའི་གཏེར་ལ་དབང་བ་བཞི༔ རྡོ་རྗེ་རིན་ཆེན་པདྨ་དང༔ ཕྲིན་ལས་རྩལ་དུ་གྲགས་པ་འབྱུང༔ གཞན་ཡང་གནས་ཀྱི་མཐའ་སྐོར་དུ༔ རིག་འཛིན་ཕོ་མོ་མང་པོ་འདུས༔ ཁྱད་པར་ཨ་ཏི་རྫོགས་ཆེན་གྱི༔ སྣང་བཞིའི་ཡེ་ཤེས་མཐར་ཕྱིན་པའི༔ ཉམས་རྟོགས་ལྡན་པ་དུ་མ་འབྱུང༔ རིག་པ་ཚད་ལ་ཕེབས་པ་ནི༔ བཅུ་ཕྲག་རྣམ་པ་ཀུན་ཏུ་འབྱུང༔ ཆོས་ཉིད་ཟད་སར་འཁྱོལ་བ་ཡི༔ གྲུབ་ཐོབ་རྒྱུན་མི་ཆད་པ་འབྱུང༔ གཞན་ཡང་གནས་ཀྱི་མཐའ་འཁོར་དུ༔ མཁས་དང་གྲུབ་པ་དཔག་མེད་འབྱུང༔ དད་ལྡན་ཕོ་མོ་མཚན་དང་ལྡན༔ གཏོང་ཕོད་ལྡན་པ་དཔག་མེད་འབྱུང༔ མཉམ་མེད་ཐུབ་པའི་བསྟན་པ་ལ༔ བཀུར་བསྟི་ཕུ་དུད་ཆེ་བ་ཡི༔ རྒྱལ་པོ་བཙུན་མོ་དུ་མ་འབྱུང༔ མདོ་སྔགས་བསྟན་པ་འབྱུང་བའི་གནས༔ སྒྲུབ་པའི་གླིང་དང་བཤད་པའི་གླིང༔ གཙུག་ལག་ཁང་ནི་དུ་མ་འབྱུང༔ བོད་ཆེན་ལྗོངས་སུ་ཆེས་ལྷག་པའི༔ གནས་མཆོག་འདི་ནི་ཁྱད་པར་འཕགས༔ དུས་ཀྱི་ཐ་མ་གྱུར་པ་ན༔ ལས་ཅན་འབྲུག་གི་མིང་ཅན་འབྱུང༔ བསྟན་དང་འགྲོ་ལ་ཕན་བདེ་སྤེལ༔ ཟབ་མོའི་ཐུགས་གཏེར་ལྷོ་ནས་འབྱེད༔ སྔགས་འཆང་སྙིང་པོའི་མིང་ཅན་གྱིས༔ པདྨའི་ཐུགས་གཏེར་ལྷོ་ནས་འབྱེད༔ ཨ་ཏི་སྙིང་པོའི་བསྟན་པ་སྤེལ༔ བྱང་ནས་གསང་སྔགས་ལྷག་པའི་མིང༔ དགོངས་གཏེར་འདྲ་མིན་ཆེ་ཕྲ་འབྱིན༔ ཕྱི་རོལ་མཐའ་དམག་ཐམས་ཅད་བཟློག༔ རྒྱལ་པོ་དྲག་ཤུགས་ལྡན་པ་ཡིས༔ ཀླ་ཀློའི་དཔུང་ཚོགས་སྐབས་གཅིག་འཇོམས༔ མདོ་དང་སྔགས་ཀྱི་བསྟན་པ་སྤེལ༔ རབ་བྱུང་གསལ་བའི་མིང་ཅན་གྱིས༔ ལོག་པར་སྤྱོད་པ་ཚར་བཅད་ནས༔ ཡང་དག་བསྟན་པ་འཛུག་ཅིང་སྤེལ༔ འབྱུང་འགྱུར་བསྟན་པའི་རིམ་པའོ༔ ས་མ་ཡ༔
དེ་ལས་འཕྲོས་པའི་གཏམ་ཚོགས་ཅུང་གླེང་ན༔ གངས་ཅན་ལྗོངས་སུ་གནས་ཀྱི་མཆོག་གྱུར་པ༔ གངས་རི་ཉི་ཤུ་རྩ་གཅིག་དཔལ་གྱི་གནས༔ སྟོད་ཀྱི་མངའ་རིས་སྐོར་གསུམ་གངས་རི་བདུན༔ བར་གྱི་དབུས་གཙང་རུ་བཞི་གངས་རི་བདུན༔ སྨད་ཀྱི་མདོ་ཁམས་སྒང་དྲུག་གངས་རི་བདུན༔ རེ་རེ་ལའང་ཁྱད་པར་གསུམ་གྱིས་དབྱེ༔ གངས་རི་ཉེར་གཅིག་གངས་སྦས་ཉེར་གཅིག་དང༔ གངས་ལྗོངས་ཉེར་གཅིག་དྲུག་ཅུ་རྩ་གསུམ་ལ༔ གངས་རྒྱལ་ཏི་སེ་དང་ནི་དྲུག་བཅུ་བཞི༔ ཡུལ་ཅན་ཡེ་ཤེས་འཁོར་ལོ་དང་ལྡན་པ༔ རྒྱུ་ཡི་ས་བཅུ་འབྲས་བུའི་ས་བཅུ་དང༔ བླ་ན་མེད་པའི་ས་དང་ཉི་ཤུ་གཅིག༔ ནང་རྒྱུད་ཨ་ནུ་ཡོ་གའི་ལུང་ལས་གསུངས༔ ཕྱི་ཡི་ལུས་དང་ནང་གི་རྡོ་རྗེའི་ལུས༔ གཞན་དུ་མ་ཡིན་ཡང་གསང་ཡེ་ཤེས་ཉིད༔ ཕྱག་རྒྱའི་སྐུ་ལ་དཔལ་ཆེན་ཞལ་ཉེར་གཅིག༔ གསང་བའི་སྤྱན་བཅས་དྲུག་བཅུ་རྩ་བཞི་ལས༔ སྤྲུལ་བ་ཁྲག་འཐུང་དྲུག་བཅུ་རྩ་བཞི་ཡི༔ དམ་ཚིག་རྒྱ་མཚོའི་དཀྱིལ་འཁོར་དྲུག་བཅུ་བཞི༔ དེ་བཞིན་རླུང་དང་དཀར་དམར་ཐིག་ལེ་ལ༔ ཁྲག་འཐུང་དྲུག་བཅུ་རྩ་བཞི་ཡབ་དང་ཡུམ༔ འཁོར་དང་རྟེན་གྱི་གཞལ་ཡས་ཁང་དང་བཅས༔ ཡེ་ཤེས་འབར་བ་དྲག་པོ་དྲུག་བཅུ་བཞི༔ དམ་ཚིག་རྒྱ་མཚོ་དཀྱིལ་འཁོར་ལྷུན་གྱིས་གྲུབ༔ དེ་ལྟར་ནང་དང་གསང་བའི་གནས་ལུགས་ལ༔ གསེར་དང་གསེར་གྱི་འོད་བཞིན་ཕྱི་རུ་ཤར༔ དེ་ལྟར་ཞིབ་ཀྱིས་འགྲེལ་ཞིང་བཤད་ཤེས་ན༔ ཨ་ནུ་ལུང་འདི་རྣལ་འབྱོར་པ་རུ་བརྗོད༔ ཕྱི་ནང་ལུས་ཀྱི་གནས་ལུགས་ཤེས་པ་ཡི༔ མ་བསྐྱེད་རྒྱལ་བའི་དཀྱིལ་འཁོར་ལྷུན་གྱིས་གྲུབ༔ རླུང་གི་འཇུག་ལྡང་སྒྲ་སྐད་རང་བྱུང་སྔགས༔ དུག་ལྔའི་རྟོག་པ་བདེ་ཆེན་དབྱིངས་སུ་གྲོལ༔ འདོད་ཡོན་ལྔ་པོ་ཡེ་ཤེས་རྒྱན་དུ་རོལ༔ ཚེ་རབས་བདེ་སྡུག་བདེ་བ་ཆེན་པོར་ཤར༔ དེ་ལྟར་ཀུན་བཟང་སྤྱོད་པའི་རྣལ་འབྱོར་པ༔ བརྟུལ་ཞུགས་ལམ་སློང་བྱེད་པའི་གནས་ཆེན་འགྲིམས༔ སྣང་གྲགས་རྟོག་པ་ལྷ་སྔགས་ཡེ་ཤེས་སྐུ༔ ཤར་བ་ཨ་ནུ་ལུང་གི་རྣལ་འབྱོར་ལ༔ དམ་ཚིག་ཉམས་པ་བྱ་བའི་མིང་ཡང་མེད༔ གལ་མདོ་ངེས་པའི་དམ་ཚིག་སྒོ་གསུམ་དག༔ སྣོད་བཅུད་སྣང་གྲགས་དག་པ་ལྷར་ཤར་བས༔ གནོད་པ་མི་བྱེད་གཞན་ལ་ཕན་པ་འབྱུང༔ རྒྱུ་ཡི་ཚུལ་ཁྲིམས་གསུམ་པོ་རྣམ་པར་དག༔ རྡོ་རྗེ་སློབ་དཔོན་མཆེད་ལྕམ་ལྷ་རུ་མཐོང༔ རྒྱལ་བ་སྲས་བཅས་སྐུ་ཡི་དམ་ཚིག་འགྲུབ༔ ཕྱག་བརྒྱའི་ལྷ་གསལ་སྔགས་ལ་རྒྱུན་ཆད་མེད༔ འདོད་ཡོན་བདེ་ཆེན་ཆགས་པའི་གསང་མཆོག་འགྲུབ༔ ལྟ་བ་དབྱིངས་དང་ཡེ་ཤེས་དབྱེར་མེད་པས༔ རྩོལ་མེད་འགྲོ་དོན་ཐུགས་ཀྱི་དམ་ཚིག་ལྡན༔ དེ་ལྟར་སྡོམ་པ་དམ་ཚིག་ལྷུན་གྲུབ་པས༔ ལམ་གྱི་ཡོན་ཏན་ཐུན་རེ་འབུམ་འབུམ་འཕེལ༔ རྩོལ་མེད་ངང་གིས་མངོན་པར་སངས་རྒྱས་པ༔ ལུང་ཆེན་ཨ་ནུ་ཡོ་གའི་དགོངས་པ་ལ༔ གནས་ཡུལ་ཡོན་ཏན་མན་ངག་ཆེད་དུ་བརྗོད༔ འདི་ཡང་དཔལ་ཆེན་རྡོ་རྗེ་ཆེ་མཆོག་གིས༔ བཀའ་ཡིས་ཇི་ལྟར་བསྔགས་བཞིན་བདག་གིས་བརྗོད༔ སྐལ་ལྡན་སྒྲུབ་པ་པོ་ཡི་སྙིང་ལ་ཆོང༔ གྲུབ་པ་ཐོབ་པའི་རྣལ་འབྱོར་ཕོ་མོ་རྣམས༔ ཞལ་བྱང་ཡི་གེ་ཕབས་ལ་གཏེར་དུ་སྦས༔ སྒྲུབ་པས་ལུང་རྟོགས་བསྟན་པ་གནས་ཤིང་འཕེལ༔ གསང་སྔགས་བསྟན་པའི་འགྲོ་དོན་མཐར་རྒྱས་ཤོག༔ ས་མ་ཡ༔ རྒྱ་རྒྱ་རྒྱ༔
ཨོ་རྒྱན་མཆོག་གྱུར་བདེ་ཆེན་ཞིག་པོ་གླིང་པས་རབ་བྱུང་བཅོ་ལྔ་པའི་ཐོག་མ་མེ་ཡོས་ལོའི་དབྱར་ཟླ་ར་བའི་དུས་ཆེན་ཉིན་རྫོགས་ཆེན་རིན་པོ་ཆེ་མཁན་སློབ་ཀྱིས་བཀས་བསྐུལ་ཞིང་། ཕྱི་ནང་གསང་བའི་རྟེན་འབྲེལ་དུ་མ་འགྲིགས་པས་གླིང་སྤྲུལ་རིན་པོ་ཆེ་དང་རིགས་ཀྱི་མྱུ་གུ་གཉིས་སྐལ་ལྡན་དུ་མ་བཅས། རུ་དམ་གངས་ཁྲོད་ཀྱི་བྲག་ནས་རྡོ་སྒྲོམ་རྣམ་པ་གསུམ་སྤྱན་དྲངས་པའི་ནང་ནས་གནས་ཡིག་ཞལ་བྱང་དང་བདུད་རྩི་ཆོས་སྨན་བཅས་བྱོན་པ། གངས་ཁྲོད་བདེ་བ་ཆེན་པོའི་ཕུག་པ་ནས་སངས་རྒྱས་ཚེ་རིང་གིས་ཚོགས་ཀྱི་མཆོད་པ་རྒྱས་འབུལ་དང་། རྒྱ་རོང་ནམ་སྤྲུལ་རིན་པོ་ཆེས་གསེར་གྱི་མནྡལ་དང་བཅས་བསྐུལ་མ་མཛད་པར་བརྟེན་ཁྲོ་ཕྱོགས་གཡུ་མཚོའི་གནས་སྒོ་འབྱེད་སྐབས་ཤོག་སེར་ལས་བསྒྱུར་བའི་ཡི་གེ་པ་ནི་ལྷོ་ཕྱོགས་ཚངས་པའི་ལྔ་རིག་སྨྲ་བའི་བཙུན་པ་རིན་ཆེན་རྣམ་རྒྱལ་གྱིས་མཛད་པའོ། །མངྒ་ལཾ།
གནས་ཆེན་པད་མོ་ཡང་རྫོང་གི་དཀར་ཆག་མཐོང་གྲོལ་ཨུཏྤལའི་མགུལ་རྒྱན་ཞེས་བྱ་བ་བཞུགས་སོ། །
དུས་གསུམ་རྒྱལ་བའི་རྣམ་འཕྲུལ་འགྲོ་དོན་མཛད༔ བྱང་ཆུབ་སེམས་དཔའ་སངས་རྒྱས་གཉིས་པ་དེ༔ ཚེ་འདི་ཙམ་དུ་མ་ཡིན་བྱང་ཆུབ་བར༔ འབྲལ་བ་མེད་པར་སྒོ་གསུམ་གུས་པས་འདུད༔ དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་གཅིག་ཏུ་འདུས་པའི་ངོ་བོ༔ མ་ཧཱ་གུ་རུ་རིན་པོ་ཆེ་ཞེས་བྱ་བ་དེ་ཉིད་བོད་གངས་ཅན་གྱི་ལྗོངས་འདིར་བྱོན་ནས་འགྲོ་དོན་མཐའ་ཡས་པ་མཛད༔ གནས་ཆེན་བརྒྱ་རྩ་བརྒྱད་དང་གནས་ཕྲན་སྟོང་རྩ་བརྒྱད་དུ་ཞབས་ཀྱིས་བཅགས་ཤིང་བྱིན་གྱིས་བརླབས་ནས་གཏེར་ཁ་གྲངས་ལས་འདས་པ་སྦས་པ་ལས། རྟ་མཛེས་པད་མོ་ཡང་རྫོང་རུ་དམ་ལུང་པ་འདི་ཉིད་ཀྱི་དཀར་ཆག་མཐོང་གྲོལ་མགུལ་རྒྱན་མཁའ་འགྲོའི་བཀའ་རྒྱ་ཟབ་མོ་ཞེས་བྱ་བ་ས་མ་ཡ༔ གནས་ཀྱི་ཆགས་ཚུལ་ཨོ་རྒྱན་མཁའ་འགྲོའི་གླིང༔ གཡས་ཀྱི་ལུང་པ་དམར་སེར་གྲུབ་པ་ནི༔ རོ་མ་དམར་མོ་རྩ་ཡི་ཚུལ་དུ་ཆགས༔ གཡོན་གྱི་ལུང་པ་དཀར་མདོག་འདུག་པ་ནི༔ རྐྱང་མ་དཀར་པོ་རྩ་ཡི་ཚུལ་དུ་ཆགས༔ དབུས་ཀྱི་ལུང་པ་ཡིད་ཙམ་འཛུམ་པ་ནི༔ ཨ་ཝ་བྷུ་རུ་ཡེ་ཤེས་ཆེན་པོར་གནས༔ ཤར་ལ་པད་མོ་བཀོད་པའི་ཆགས་ཚུལ་ཡོད༔ ལྷོ་ན་དུར་ཁྲོད་བསིལ་ཚལ་ཆགས་ཚུལ་ཡོད༔ ནུབ་ན་མ་ལ་ཡ་ཡི་ཆགས་ཚུལ་ཡོད༔ བྱང་ན་ཨོ་རྒྱན་མཁའ་འགྲོའི་བཀོད་པ་ཡོད༔ གཞན་ཡང་ཤར་ལྷོ་ཨོ་རྒྱན་སྤྲིན་ནག་འདུ༔ ལྷོ་ནུབ་ཡང་ལེ་ཤོད་ཀྱི་བཀོད་པ་དང༔ ནུབ་བྱང་དགའ་བའི་ཚལ་གྱི་ཆགས་ཚུལ་ཡོད༔ བྱང་ཤར་ཁྲག་མཚོ་ཁོལ་མའི་དུར་ཁྲོད་ཡོད༔ དེ་ཡི་ཕར་རྒྱབ་ལུང་གསུམ་འདྲ་བའི་ཚུལ༔ བྲག་རི་དམར་པོ་རྡོ་རྗེ་གནམ་ལངས་འདྲ༔ བྱང་ངོས་འདོམ་བདུན་གྱེན་ལ་སོང་མཚམས་ན༔ པད་མའི་ཕྱག་རྗེས་ཨ་ཡིག་རང་བྱོན་ཡོད༔ མ་མོའི་སྙིང་ཁྲག་དྭངས་མའི་ཡི་གེ་ཡོད༔ ཕུར་བའི་ཐུགས་ཐིག་ལས་ཀྱི་མན་ངག་ཡོད༔ དེ་འོག་ཕ་བོང་དཀར་པོ་འབྲི་ཉལ་ཙམ༔ དེ་ལ་ཧ་ཡ་གྷི་ཝའི་ཆོས་སྐོར་ཡོད༔ སྐྱེས་བུ་ཕག་ལོ་པ་ཡི་གཏེར་ཁ་ཡིན༔ དེ་ཡི་ཤར་ན་ལྷ་རྫས་པནྩ་ལི༔ རྒྱལ་པོ་ཁྲི་སྲོང་ལྡེའུ་བཙན་ཟབ་བེར་ཡོད༔ བོད་ཀྱི་རྒྱལ་པོའི་ནོར་གཏེར་མང་པོ་ཡོད༔ བསམ་པ་ལྷུན་གྲུབ་གསོལ་འདེབས་ཁྱད་འཕགས་ཡོད༔ དེ་ཡི་ལྷོ་ན་ཟངས་རི་བཙན་རྒོད་ཡོད༔ བཙན་གྱི་གསང་སྒྲུབ་ལས་རྦད་སྤྱི་ཆིངས་ཡོད༔ དེ་ཡི་ནུབ་ན་མ་གཅིག་ལབ་སྒྲོན་གྱི༔ ཉམས་ཁྲིད་ལྷ་འདྲེ་དབང་སྡུད་གཅོད་ཡུལ་དང༔ མཁའ་འགྲོའི་གདམས་པ་གྲངས་ལས་འདས་པ་ཡོད༔ དེ་ཡི་བྱང་ན་བྲག་རི་སེང་གེ་འདྲ༔ ལྷོ་ངོས་ཕུག་པ་མ་མོའི་ཉལ་ས་ཙམ༔ དེ་ནང་ཕ་རོལ་ཚར་གཅོད་ངན་སྔགས་ཡོད༔ དེ་འོག་དམ་ཅན་སྐྱེས་བུའི་སྲོག་སྒྲུབ་ཡོད༔ མ་ཧཱ་ཀ་ལའི་བིང་དང་ཐོད་ཁྲག་ཡོད༔ སྐྱེས་པ་བུད་མེད་ལྷ་འདྲེ་དབང་སྡུད་ཡོད༔ ཆུ་བོ་བདུད་རྩིའི་བཅུད་ལེན་གྲངས་མང་ཡོད༔ དེ་བྱང་གྲུབ་ཐོབ་ཐང་སྟོང་རྒྱལ་པོ་ཡི༔ རྫུ་འཕྲུལ་ལྕགས་ཆ་ལྡེར་མ་བཅུ་གསུམ་ཡོད༔ ལྷ་ཡི་དཀར་ཆག་མཐོང་བ་འཛུམ་ཤོར་དང༔ དུས་རྟགས་ལུང་བསྟན་སྲོང་བཙན་བཀའ་ཆེམས་ཡོད༔ དེ་ཡི་ཕར་རྒྱབ་རི་ནག་སྦྲུལ་ནག་འདྲ༔ དེ་ལ་པདྨའི་གསང་གཏེར་མང་པོ་ཡོད༔ རིག་འཛིན་རྗེ་འབངས་ཉེར་ལྔའི་སྐྱེས་རབས་དང༔ བོད་ཡུལ་དམ་ཆོས་བསྟན་པའི་གནས་ཚད་ཡོད༔ སེང་གེའི་དཔུང་བ་འདྲ་བའི་རི་ངོགས་ན༔ སྐྱེས་བུ་ཡང་རབ་ལས་འཕྲོ་ཅན་རྣམས་ཀྱིས༔ འགྲོ་དོན་བྱེད་ཚུལ་དཔག་བསམ་ལྗོན་པ་ཡོད༔ དེ་ཡི་བྱང་ཤར་བྲག་གི་སྤོ་ཏོ་ན༔ དཔའ་བོ་མཁའ་འགྲོ་བྲོ་གར་གླུ་དབྱངས་ཚུལ༔ དཔལ་གྱི་བསམ་ཡས་དཀར་ཆག་རྒྱས་པ་ཡོད༔ རྒྱལ་པོ་ཁྲི་སྲོང་ཁམས་གསུམ་དབང་བསྡུས་ཚུལ༔ སྐྱེས་རབས་རྒྱས་པ་ཆོས་ཁྲིམས་སྡོམ་ཚུལ་ཡོད༔ བཻ་རོ་ཙ་ནས་ཆོས་བསྒྱུར་དཀར་ཆག་ཡོད༔ རི་བོ་དཀར་པོ་ཕོ་བྲང་ཏོག་གིས་བརྒྱན༔ རྒྱལ་པོ་རྣམ་སྲས་བང་མཛོད་ཆེན་མོ་ཡོད༔ གཡོན་ཕྱོགས་བྲག་རི་ནག་པོ་མདའ་སྒྲོ་འདྲ༔ སློབ་དཔོན་ནམ་སྙིང་སྐྱེས་རབས་རྒྱས་པ་ཡོད༔ རི་བོ་མཆོད་རྟེན་འདྲ་བའི་ངོས་ཞོལ་ན༔ ཚེ་སྒྲུབ་ཤོག་སེར་པདྨའི་བཀའ་རྒྱ་ཡོད༔ གཡུ་མཚོ་སྔོན་མོ་འཁྱིལ་བའི་ས་ཆ་ན༔ གཞི་འདོམ་ཉེར་གཅིག་ཁྲུ་བདུན་ས་མཚམས་ན༔ བྲག་རི་སྔོན་པོ་ཟླ་བ་ཚེས་འདྲ་ཡོད༔ ལྷ་མོའི་གསང་སྒྲུབ་མཚོ་རྒྱལ་མགུལ་རྒྱན་ཡོད༔ དེ་ཡི་ཐད་ཀྱི་བླ་གཏོར་འདྲ་བའི་བྲག༔ རྣམ་སྲས་བང་མཛོད་དབང་སྡུད་མན་ངག་ཡོད༔ བྱང་སྟོད་གཏོར་མ་འདྲ་བའི་རི་ཞོལ་ན༔ ཆོས་བློན་མགར་དང་ཐོན་མི་སཾ་བྷོ་ཊས༔ ཆོས་བསྒྱུར་རྒྱ་དཔེ་ཆུ་དར་སེར་པོ་ཡོད༔ དེ་ཡི་ཤར་ཕྱོགས་འདོམ་བཅུའི་ས་མཚམས་ན༔ ཕ་འོང་དཀར་པོ་གཡག་རོ་ཙམ་ཞིག་ན༔ མུ་ཁྲི་བཙན་པོའི་མགུལ་རྒྱན་སོར་གདུབ་ཡོད༔ བསྲུང་མ་མ་མོ་གཡུ་ཡི་རྒྱན་ཅན་ཡིན༔ མཚོ་འགྲམ་བྱང་ཕྱོགས་རུ་སྦལ་འདྲ་བའི་ངོས༔ སློབ་དཔོན་པདྨའི་ཆོས་གོས་འཇའ་ཟེར་མ༔ རུ་དམ་ཡུལ་འདིར་ས་ཡི་བཅུད་དུ་སྦས༔ དེ་འོག་གཞུ་འདོན་ལྔ་ཡི་ས་མཚམས་ན༔ རྡོ་རྗེའི་ར་ལ་ལྕགས་ལུང་བརྒྱད་གསོལ་བའི༔ སྒྲོམ་གྱི་ནང་དུ་མི་ཤིགས་རྒྱས་བཏབ་ཡོད༔ ས་ཆ་དེ་ཡི་བྱང་ཕྱོགས་ཕ་ཚད་ན༔ ས་རྡོ་ཡུད་ཙམ་དམར་པོ་འདྲ་བ་ན༔ བྲག་ལ་ཕུག་པ་མི་མགོ་ཐར་ཙམ་ཡོད༔ དེ་ཡི་འོག་ལ་རྡོ་སྨུག་གྲུ་གསུམ་པ༔ དེ་ལ་གཟའ་ཀླུ་རྒྱལ་གསུམ་བླ་རྡོ་ཡོད༔ སྟག་མོ་གཟན་ཆས་འདྲ་བའི་རི་ཞོལ་ན༔ ལོ་ཙཱ་བརྒྱ་རྩ་བརྒྱད་ཀྱི་གསུང་འབུམ་ཡོད༔ དེ་ཡི་བྱང་གི་གངས་རི་རྩེ་མཐོ་ན༔ སྤྱན་རས་གཟིགས་ཀྱི་སྐུ་གསུང་ཐུགས་རྟེན་ཡོད༔ རྒྱལ་པོ་ཆེན་པོ་བེ་ཧར་སྲོག་སྒྲུབ་ཡོད༔ མ་ཧཱ་ཀ་ལའི་བིང་ཆེན་བརྩེགས་རྒྱུད་བཅས༔ སྒྲུབ་རྟེན་མི་འདྲ་དཔག་མེད་གྲངས་འདས་ཡོད༔ དེ་ཡི་ཤར་ཕྱོགས་རི་གསུམ་འདྲ་བའི་ཚུལ༔ འཇམ་དབྱངས་ཕྱག་རྡོར་སྤྱན་གཟིགས་སྒྲུབ་པ་ཡོད༔ དེ་ཡི་ཕར་རྒྱབ་ལུང་པ་རྫ་བྲག་འདྲར༔ ཨོ་རྒྱན་སྤྲིན་ནག་འདུས་པའི་ཆགས་ཚུལ་ཡོད༔ དེ་ཡི་སྨད་ཀྱི་ས་གཞི་ཆ་ལང་འདྲའི༔ དཀྱིལ་ན་ཕ་བོང་དམར་པོ་གཡག་ཤད་ཙམ༔ དེ་ན་གཏེར་གྱི་ཁ་བྱང་མང་པོ་དང༔ གཏེར་སྟོན་བཟང་ངན་འབྲིང་གསུམ་བྱོན་ཚུལ་ཡོད༔ དུས་ཀྱི་ལེགས་ཉེས་ཁ་བྱང་མང་ཙམ་ཡོད༔ དེ་ཡི་ཐད་ཀྱི་མ་མོའི་ཕུག་པ་ན༔ ཕོ་ཡང་གཟའ་ཡི་རྒྱལ་མོའི་མགུལ་རྒྱན་ཡོད༔ དེ་ཡི་གཡས་ཕྱོགས་བྲག་རི་སྨན་གཏོར་འདྲའི༔ ངོས་ལ་བརྡུང་ན་རང་སྒྲ་རྔ་སྐད་ཙམ༔ འོག་ན་ཆུ་མིག་ཡིད་ཙམ་འཛུམ་པ་ཡོད༔ དེ་ན་ཀླུ་གཏེར་ནོར་བུ་མེ་འབར་དང༔ ཁྲི་སྲོང་ལྡེའུ་བཙན་བཀའ་ཆེམས་མང་པོ་ཡོད༔ རྒྱལ་པོ་གདན་བཞུགས་འདྲ་བའི་རི་བོ་ན༔ གླིང་རྗེ་གེ་སར་ཁྲབ་དང་རྨོག་རྗེས་ཡོད༔ དེ་འོག་རྡོ་རྗེ་སྤྲེལ་ཆུང་རྣམ་ཐར་དང༔ ཐུགས་ཀྱི་མེ་ལོང་དངུལ་ལས་གྲུབ་པ་ཡོད༔ ལི་ལས་གྲུབ་པའི་པད་འབྱུང་རང་བྱོན་དང༔ རྒྱལ་པོ་རྣམ་སྲས་སྐྱེས་པའི་རབས་ཀྱང་ཡོད༔ དེ་ཡི་ཤར་ན་བྲག་ནག་མདའ་སྒྲོ་འདྲ༔ དེ་ངོས་བྲག་ལ་སྦལ་བ་འབུར་དུ་དོད༔ རྒྱལ་པོ་སྲོང་བཙན་བཀའ་ཆེམས་དོན་ལྡན་དང༔ ཡི་གེ་དྲུག་མའི་ཕན་ཡོན་བསྡུས་རྒྱས་ཡོད༔ དེ་ཡི་གཡས་ན་བྲག་རི་སྔོན་པོ་ལ༔ ནོར་བུ་བསམ་འཕེལ་མདོ་དང་དངུལ་སྒྲོམ་ཡོད༔ མནྡ་ར་ཡི་ཚེ་སྒྲུབ་བཅུད་ལེན་དང༔ མཁའ་འགྲོའི་གཏེར་ཁ་གྲངས་ལས་འདས་པ་ཡོད༔ བོད་ཡུལ་སྤྱི་ལ་ཕན་པའི་གཏེར་ཁ་ཡོད༔ དེ་འོག་བྲག་རི་གཡག་ཟེ་འདྲ་བ་ལ༔ བོད་ཡུལ་མི་ཕྱུགས་སྤྱི་ལ་ཕན་པའི་གཏེར༔ སེང་གདོང་སྒྲུབ་པ་ལས་ཀྱི་མན་ངག་ཡོད༔ གཡུ་མཚོ་བར་མ་ཀླུ་ཡི་ཕོ་བྲང་ན༔ ནོར་དང་ལོངས་སྤྱོད་འབྱུང་བའི་གཏེར་བུམ་ཡོད། སྐྱེས་བུ་གདུལ་བྱའི་སྣོད་རུང་རྣམས་ཀྱིས་འདོན༔ དེ་ཡི་ཕ་ཚད་རི་རྩེ་བྲག་ལོགས་ན༔ དབང་ཕྱུག་ཉེར་བརྒྱད་ཞལ་འབགས་ཆ་ཚང་ཡོད༔ རི་རྩེ་གོང་བུ་མདའ་སྟོང་འདྲ་བའི་མདུན༔ བྲག་རི་ཧེ་འགུལ་པད་མོའི་སྐྱེད་ཚལ་ན༔ བོན་གྱི་གདམས་པ་གཡུང་དྲུང་འོད་འབར་ཡོད༔ དེ་ཡི་ཐད་ཀྱི་བྲག་རི་སྔོན་པོ་ན༔ ཆོས་ལོངས་སྤྲུལ་གསུམ་སྒྲུབ་པ་ཁྲིད་རིམ་ཡོད༔ པདྨ་དབང་དང་མ་མགོན་ལྕམ་དྲལ་སོགས༔ ཡེ་ཤེས་ཕོ་རྒྱུད་མོ་རྒྱུད་སྒྲུབ་པ་ཡོད༔ བསང་ཡིག་ལྗོན་པ་བདུད་རྩིའི་དུད་སྤྲིན་ཞེས༔ དུས་འཁྲུགས་ནད་རིམ་ཆོད་པའི་བརྔན་མཆོད་ཡོད༔ དེ་ནི་པདྨའི་ཡང་སྤྲུལ་ཁྱི་ལོ་པ༔ སྐྱེས་བུ་དེ་ཡི་གདུལ་བྱའི་དཔལ་དུ་ཤར༔ དེ་ཀུན་ཡོངས་ཀྱི་བཀའ་ཡི་བྱ་ར་བ༔ དགེ་བསྙེན་རྡོ་རྗེ་གཡུང་དྲུང་རྩལ་མཆོག་དེ༔ སྔོན་ཚེ་པདྨས་རུ་དམ་ལུང་བ་འདིར༔ མ་ཡམ་ཐམས་ཅད་དམ་ལ་བཏག་པའི་དུས༔ མི་དཀར་ལྷ་ཡི་སྐྱེས་བུ་འདྲ་བ་ཞིག༔ མི་མཐུན་བར་ཆད་བྱེད་དུ་བྱུང་བའི་དུས༔ པདྨས་དམ་བཏགས་སྲིད་པ་ལས་ཀྱི་རྗེ༔ བོད་ཡུལ་རི་དབང་སྤུན་དགུའི་ཡ་གྱལ་གཙོ༔ གཏེར་གྱི་བསྲུང་མ་གསང་མཚན་གཡུང་དྲུང་རྩལ༔ སྙིགས་དུས་བསང་མཆོད་ལྷ་ཐོ་བྱས་མཆོད་ན༔ ཆོས་པ་རྣམས་ཀྱི་མགོན་དང་སྡོང་གྲོགས་བྱེད༔ མི་ནད་ཕྱུགས་ནད་དུས་འཁྲུགས་ངན་པ་གཅོད༔ མདོར་ན་གནས་མཆོག་ཁྱད་འཕགས་སྦས་ཡུལ་འདིར༔ བོད་ཡུལ་གནས་ཆེན་བརྒྱ་དང་རྩ་བརྒྱད་ཀྱི༔ ཡ་གྱལ་སངས་རྒྱས་གཉིས་པའི་གཏེར་གནས་ཡིན༔ ཡེ་ཤེས་སྤྱན་ལྡན་སྐྱེས་བུ་ལས་ཅན་གྱིས༔ རྩི་ཤིང་ནགས་ཚལ་ས་རྡོ་རི་བྲག་ཀུན༔ དཔལ་རིའི་ཕོ་བྲང་པདྨ་འོད་དང་མཚུངས༔ གནས་འབྲེལ་ཕྱག་བསྐོར་མནྜལ་འབུལ་གྱུར་ན༔ དུས་གསུམ་རྒྱལ་བ་ཕྱག་མཆོད་བྱས་དང་མཚུངས༔ ཚེ་འདིར་འབྱོར་ལྡན་ཚེ་ཡི་བར་ཆད་ཞི༔ ཕྱི་མ་བླ་མེད་ཡང་དག་སངས་རྒྱས་ཐོབ༔ ཡིད་ལ་ཟུངས་དང་ལས་ལྡན་སྙིང་ཅན་རྣམས༔ དེ་སྐད་རང་བྱུང་མཁའ་འགྲོའི་བཀའ་ཚོགས་འདི༔ ཕོ་ཟོབ་འདྲ་ཆོས་རང་བཟོ་མ་ཡིན་པར༔ གདོད་མའི་གཞི་ཡི་གནས་ལུགས་རང་རྩལ་ལས༔ ཐོལ་བྱུང་ཚུལ་དུ་ལས་རབ་སྤྲུལ་མིང་པ༔ རྨོངས་རྒན་པདྨ་ཐེག་མཆོག་བློ་གྲོས་ཀྱིས༔ ཟླ་༡ཚེས་༢༨དགེ་བའི་དུས་སུ་སུག་བྲིས་བྱས༔ དགེ་བས་འགྲོ་ཀུན་རྣམ་གྲོལ་ཐོབ་པར་ཤོག༔ དགེའོ། །
གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེའི་གནས་ཡིག་བཞུགས་སོ། །
སྔོན་ཚེ་སློབ་དཔོན་པདྨ་འབྱུང་གནས་ཀྱིས། །བདེ་ཆེན་བསམ་འགྲུབ་ཤེལ་གྱི་ཕུག་པ་རུ། །བདུད་རྩི་སྨན་གྱི་དཀྱིལ་འཁོར་ཞལ་ཕྱེས་ཚེ། །ཐུགས་རྗེ་ཆེན་པོས་བྱིན་གྱིས་བརླབས་པའི་གནས། །དབུས་ཕྱོགས་རུ་ཡི་ལུང་པ་ཞེས་བྱ་བར། །རིག་འཛིན་བླ་མའི་ཚོགས་རྣམས་སྤྲིན་ལྟར་གཏིབས། །བསྒྲུབས་ན་བསྐྱེད་རིམ་ལྷག་པར་འཕེལ་བའི་གནས། །རབ་མཛེས་ནེའུ་སེང་པདྨས་བརྒྱན་པ་ཡི། །དབུས་ཀྱི་ལྟེ་བ་པདྨ་དགྱེས་པའི་ཐང་། །རིན་ཆེན་ཁྲི་ལ་དར་ཟབ་གདན་སྟེང་དུ། །རྒྱལ་བ་ཀུན་འདུས་པདྨ་ཐོད་ཕྲེང་དང་། །ལས་ཅན་དག་པའི་འཁོར་ཚོགས་རྒྱ་མཚོའི་ཚོགས། །ནམ་མཁའི་སྐར་ཚོགས་ལྟ་བུར་བཞུགས་པ་ལ། །མཁའ་འགྲོའི་གཙོ་མོ་ཡེ་ཤེས་མཚོ་རྒྱལ་མས། །གསེར་དངུལ་གཡུ་ཡི་མནྡལ་ཕུལ་ནས་ཀྱང་། །གནས་འདིར་བྱིན་གྱིས་བརླབ་པར་གསོལ་བཏབ་ཞིང་། །གནས་ཀྱི་ཆེ་བའི་ཡོན་ཏན་གསུང་དུ་གསོལ། །དེ་སྐད་ཞུས་པས་དགྱེས་པའི་ཞལ་བསྟན་ནས། །དབུས་ཕྱོགས་སྲ་འཁྲེགས་རྡོ་ཡི་ལྡིང་ཁང་དུ། །གཤིན་རྗེའི་བསྙེན་པ་ལ་སོགས་རང་བྱུང་ཡོད། །སྒྲུབ་ཚེ་ཡེ་ཤེས་མི་རྟོག་འཕེལ་བ་དང་། །གཡས་ཕྱོགས་བྲག་ལ་པདྨ་ང་སྐུ་བཞུགས། །ལྷ་ཀླུ་མི་ཡི་རིན་ཆེན་སྣ་ཚོགས་ཀྱི། །བཟོ་བོའི་རྒྱལ་པོ་བི་ཤོ་ཀརྨ་ཡིས། །བཞེངས་པའི་སྐུ་ཚབ་མི་ཡི་ལུས་ཚད་ཙམ། །བྱིན་རླབས་སྤྲིན་འཁྲིགས་མཐོང་བ་དོན་ལྡན་ཡོད། །གནས་དུས་རྟེན་འབྲེལ་མངོན་དུ་གྱུར་པའི་ཚེ། །གཏེར་ཆེན་ལས་རབ་གླིང་པས་དྲངས་བར་འགྱུར། །ལྷོ་ཕྱོགས་དབང་ཆེན་རྟ་ཡི་ལུང་བ་རུ། །བདུད་དཔུང་རུ་ཏྲ་བསྒྲལ་བའི་བཀོད་པ་དང་། །ནུབ་ཕྱོགས་མགོན་པོ་ཤྭ་ནའི་ལུང་བ་རུ། །བདུད་མགོན་ཞིང་སྐྱོང་སེང་གེའི་གདོང་ཅན་གནས། །བྱང་ཤར་བདེ་གཤེགས་སྨན་གྱི་རྒྱལ་པོའི་རི། །ཆུ་ཀླུང་བྷྱ་ཁ་ཛེ་ཡི་རང་སྒྲ་སྒྲོག །ཤར་ཕྱོགས་དཔལ་ཆེན་སྒྲུབ་སྡེ་བརྒྱད་ཀྱི་ལྷ། །པདྨའི་སྒྲུབ་མཚོ་སློབ་དཔོན་ཕྱག་རྗེས་ཡོད། །ལྷོ་ནུབ་མཚམས་སུ་རྗེ་བཙུན་སྒྲོལ་མའི་གནས། །ངོ་མཚར་བྱིན་ལྡན་སྐུ་ཡི་རང་བྱོན་ཡོད། །ལྷོ་ནུབ་བྲག་རི་རིན་ཆེན་སྤུངས་པ་ལ། །དབང་ཕྱུག་ཉེར་བརྒྱད་ཞལ་འབག་གཏེར་དུ་སྦས། །ནུབ་བྱང་ནོར་བུ་འབར་བའི་རི་དབྱིབས་ལ། །འདོད་འབྱུང་རིན་ཆེན་སྣ་ཚོགས་གཏེར་གྱིས་གཏམས། །དེ་སོགས་གནས་ཀྱི་ལོ་རྒྱུས་གསུངས་ནས་ཀྱང། །བདེ་གཤེགས་འདུས་པའི་དཀྱིལ་འཁོར་ཞལ་ཕྱེས་ཚེ། །སྣང་སྲིད་ར་སཱ་ཡ་ནར་བྱིན་གྱིས་རླབས། །གཞན་ཡང་མཚོ་དང་གངས་བྲག་ལ་སོགས་པ། །མ་འོངས་དོན་དུ་ཟབ་གཏེར་སྣ་ཚོགས་སྦས། །ཡོན་ཏན་གནས་མཆོག་རུ་དམ་ལུང་པ་ཡི། །ཁྱད་པར་གནོད་སྦྱིན་དབང་པོའི་ཕྱོགས་སྐྱོང་བའི། །སྐྱལ་གྱི་བྲག་དཀར་རིན་ཆེན་སྤུངས་པའི་དབྱིབས། །དོན་ལ་ཟངས་མདོག་དཔལ་གྱི་རི་བོ་སྟེ། །རྣམ་པ་སྒྲུབ་སྡེ་བརྒྱད་ཀྱི་ལྷ་ཚོགས་དང་། །སྤྱན་རས་གཟིགས་དང་རི་བོ་རྩེ་ལྔ་ཡི། །བཀོད་པའི་བྱེ་བྲག་མ་ལུས་ཡོངས་སུ་རྫོགས། །ཁམས་ཀྱི་རི་བོ་རྩེ་ལྔ་ཞེས་བྱ་སྟེ། །གནས་བདག་ཆེན་པོ་ལྕམ་དྲལ་རྣམ་པ་གཉིས། །སྔོན་ཚེ་སློབ་དཔོན་པདྨ་འབྱུང་གནས་ཉིད། །ལོ་གསུམ་བར་དུ་རྡོ་རྗེ་སྙིང་པོ་ཡི། །སྒྲུབ་པ་མཛད་ཅིང་སྨིན་གྲོལ་ལམ་ལ་བཀོད། །བར་དུ་ཨོ་རྒྱན་རྒྱལ་ཚབ་བསམ་གཏན་གླིང་། །རྡོ་བྲག་སྐལ་བཟང་པདྨ་དབང་ཕྱུག་དང་། །ཐ་མ་བསྟན་འཛིན་ཉི་མ་གྲགས་པ་སོགས། །གྲུབ་བརྙེས་རིག་འཛིན་རིམ་པར་བྱོན་རྣམས་ཀྱིས། །ཞབས་ཀྱིས་བཅགས་ཤིང་བྱིན་གྱིས་བརླབས་པའི་གནས། །མ་འོངས་གཏེར་སྟོན་རྡོ་རྗེ་རྒྱལ་མཚན་གྱིས། །ཟབ་གཏེར་འབྱིན་ཅིང་སྨིན་གྲོལ་ལམ་ལ་བཀོད། །གཞན་ཡང་སློབ་དཔོན་པདྨ་འབྱུང་གནས་དང་། །རྒྱ་བོད་རིག་འཛིན་བཀའ་བབས་མི་དགུ་བཅས། །སྐལ་སྡན་སྙིང་གི་བུ་དགུ་ལ་སོགས་པ། །སྐུ་དང་གསུང་དང་ཐུགས་ཀྱི་རྟགས་ཀྱིས་སྤྲས། །ཁྱད་པར་ཀུན་འདུས་ཨོ་རྒྱན་ཆེན་པོ་ཡིས། །ཞབས་རྗེས་མཐོང་བ་རང་གྲོལ་ལ་སོགས་པ། །ངོ་མཚར་རང་བྱུང་རྟགས་ཀྱི་རི་མོ་བཀྲ། །ཁྱད་པར་འཆི་མེད་ཚེ་ཡི་གནས་མཆོག་ཏུ། །གྲུབ་པའི་སྤྱི་མེས་པཎ་ཆེན་བཱི་མ་ལས། །བདུད་རྩི་སྨན་དང་ཚེ་ལྷ་རབ་འབྱམས་ཀྱི། །གསང་བའི་དཀྱིལ་འཁོར་གཉེན་པོ་ཞལ་ཕྱེས་ཚེ། །ཚེ་ཡི་བུམ་པ་འཆི་མེད་ཚེ་ཡི་མདའ། །ཚེ་ཡི་སྙིང་པོ་རང་བྱུང་ཚེ་ཆུ་སོགས། །དུས་བཟང་ཚེས་བཟང་རྔ་དུང་རོལ་མོའི་སྒྲ། །སྤོས་དང་དྲི་བཟང་འཇའ་འོད་གུར་ཁང་འཁྱིལ། །གཞན་ཡང་མེ་ཏོག་ཆར་བ་སིལ་མ་བབ། །འདུ་བ་ཆེན་པོ་ཡོས་སྤྲེལ་ཁྱི་ཡི་ལོ། །འོན་ཀྱང་ལོ་འདིར་གནས་དུས་རྟེན་འབྲེལ་འཛོམས། །གཏེར་ཆེན་རྣམ་གཉིས་ཆོས་ཀྱི་བདག་པོ་སོགས། །མཁས་གྲུབ་སྐྱེས་བུ་འདུ་བའི་ཚོགས་རྣམས་ཀྱིས། །འབད་པ་དྲག་པོས་རྩེ་གཅིག་གསོལ་བཏབ་ཚེ། །དཔག་བསམ་ཤིང་དང་བུམ་པ་བཟང་པོ་ལས། །ཅི་ལྟར་རེ་བ་སྐོང་བ་དེ་བཞིན་དུ། །ཧོར་ཟླ་བདུན་པའི་ཡར་ཚེས་བཅོ་ལྔ་ལ། །ཁྱད་པར་འདུ་བའི་གནས་ནི་རྡོ་རྗེ་གདན། །དུར་ཁྲོད་བརྒྱད་དང་གནས་ཡུལ་ཉེར་བཞི་དང་། །སོ་གཉིས་གནས་དང་བལ་ཡུལ་སེང་གེ་རྫོང་། །པདྨ་བཀོད་དང་ཙཱ་རི་ཙཱ་གོང་གནས། །རྒྱ་ནག་གླང་ཆེན་རི་བོ་བྱ་རྐང་ཅན། །སྤ་གྲོ་སྟག་ཚང་འཆིམས་ཕུ་ཤེལ་བྲག་གནས། །རི་བོ་རྩེ་ལྔ་ཡེར་བ་ལ་སོགས་པ། །གཞན་ཡང་འཕགས་བོད་གནས་ཆེན་གནས་ཕྲན་དང་། །ཁ་བ་དཀར་དང་ནོར་བུ་ཡང་རྩེ་དང་། །ཁ་བ་ལུང་རི་ཀ༔ཐོག་ཀ་འབུར་གནས། །ཤིང་སྒོ་གངས་ར་མཚོ་དང་གངས་གནས་དང་། །ཁྲོ་རི་ཟིལ་ཁྲོམ་འབྲོང་དིལ་ལ་སོགས་པ། །དཀྱིལ་འཁོར་ལྷ་ཚོགས་དཔའ་བོ་མཁའ་འགྲོའི་ཚོགས། །སྙིགས་དུས་འགྲོ་བའི་དོན་དུ་རྗེས་དགོངས་ནས། །ཉི་ཟེར་རྡུལ་དང་ནམ་མཁའི་སྐར་ལྟར་བྱོན། །གནས་པའི་ཚད་ནི་དགུ་བའི་བཅོ་ལྔའི་བར། །རྩེ་སྐོར་དཔྱལ་བྲག་རིན་ཆེན་སྤུངས་འདྲ་ལ། །གནས་ཀྱི་གཙོ་བོ་ཉིད་ནས་སྤང་བྲག་མཚམས། །བར་སྐོར་དཔྱལ་བྲག་གནས་ཀྱི་གཙོ་བོ་དང་། །རི་བོ་བྱ་རྐང་ཅན་དང་གླང་ཆེན་རི། །གཞན་ཡང་རི་བོ་རྩེ་ལྔ་དྲལ་པོ་གཉིས། །ནང་དུ་བཙུད་དེ་དཔྱལ་མོའི་མདུན་ལུང་མདོ། །དེ་ནས་རིམ་བཞིན་ལ་གཉིས་ལ་བརྒལ་ཏེ། །ལྷ་ཤུལ་ཡར་ཁུག་དགོང་གི་བྲག་སྒོམ་ནས། །རིམ་བརྒྱུད་ཐུགས་ཀྱི་ས་བོན་རང་བྱོན་བཅས། །ནང་དུ་ཚུད་ནས་དཔྱལ་མོའི་གཏེར་གཞོང་ཞོལ། །གསུང་མཆོག་ཡི་གེ་བདུན་མ་རང་བྱུང་བཅས། །དྲལ་པོའི་གནས་ཀྱི་འདབ་ནས་རིམ་བཞིན་བསྐོར། །མཐའ་བསྐོར་ནང་གི་རི་བོ་རྩེ་ལྔ་དང་། །རྒྱ་ནག་གླང་ཆེན་རི་བོ་བྱ་རྐང་ཅན། །ཕྱི་ཡི་རི་བོ་རྩེ་ལྔ་རི་ཕྲན་བཅས། །ཇ་དར་ཅན་དང་ཁུག་ཆུང་སུམ་མདོའི་རི། །གདོང་ཁྲམ་བཀྲ་ཡི་རི་ཆེན་རྣམ་པ་བཞི། །མཆོད་རྟེན་གནས་དང་གུར་ལི་དཀར་ལུང་གནས། །པདྨ་རི་དང་སེང་གེ་གནམ་རྫོང་བྲག །ཨོ་རྒྱན་རྫོང་དང་མདོ་སྨད་ཁྱུང་ཆེན་བྲག །བདེ་གཤེགས་སྨན་པའི་རྒྱལ་པོའི་རི་བོ་དང་། །གཞན་ཡང་ཞབས་ཆེན་ཞབས་ཆུང་ལ་སོགས་པ། །ནང་དུ་བཞག་སྟེ་མཐའ་བསྐོར་བྱ་བའི་ལམ། །གདུང་ལུང་འདབ་དང་ཟང་རོག་སུམ་མདོ་ནས། །སྒོམ་ལུང་བརྒྱུད་དེ་སྒང་ཕྲན་སྲིབ་ཆེན་འདབ། །རྒྱ་འོབ་སུམ་མདོ་ནས་བཟུང་དམར་འགུའི་ལ། །བརྒལ་ཏེ་ཧག་ལུང་ནས་ཐོན་རིམ་པ་བཞིན། །འབོས་ཆེན་གཡས་ལག་ནས་བཟུང་ཟེ་ཆེན་གྱི། །རྔམ་ཆེན་ལུང་བ་བཟང་ལུང་ལ་བརྒལ་ཏེ། །ལྷ་ཆེན་དབང་ཕྱུག་བྲག་གི་གཡས་ཞོལ་ནས། །འགམ་ཆེམ་ལུང་བ་ནམ་མཁའ་ཟེ་མདའི་བར། །བཀྲ་ལུང་ནས་བཟུང་རྒྱ་བཞིའི་སྒོང་མ་དང་། །བཀྲ་ཁོག་ལམ་བརྒྱུད་ཕུག་ལུང་ལ་བརྒལ་ཏེ། །འབྲང་ངེར་ནས་ཐོན་ཞབས་ཆུང་གཡས་ཟུར་ནས། །དགོན་གྱི་མདུན་རིའི་ལམ་བརྒྱུད་དུར་ཁྲོད་ཉག །ཕྱིན་ཏེ་དམ་སྒང་བར་དུ་མཐའ་སྐོར་ལམ། །རྩེ་སྐོར་སིདྡྷི་དུང་ཆེན་བཅུ་གསུམ་དང་། །བར་སྐོར་སིདྡྷི་དུང་ཆེན་སུམ་ཅུ་དང་། །མཐའ་སྐོར་སིདྡྷི་དུང་ཆེན་བཅུ་ཕྲག་ལྔ། །རྒྱུན་དུ་རྩེ་སྐོར་སིདྡྷི་དུང་གཅིག་དང་། །བར་སྐོར་དུང་གཉིས་མཐའ་སྐོར་དུང་ཕྱུར་བདུན། །དད་དང་དག་སྣང་དམ་ཚིག་གཙང་གྱུར་ན། །གནས་སྐབས་འཇིགས་པ་བརྒྱད་སོགས་ཞི་བ་དང་། །ཚེ་རབས་ལས་ཀྱི་ནད་ལས་གྲོལ་བར་འགྱུར། །མཐར་ཐུག་འདུས་པའི་མཆེད་ལྕམ་ཕོ་མོ་རྣམས། །རྔ་ཡབ་གླིང་ཕྲན་ཟངས་མདོག་དཔལ་རིའི་རྩེར། །པདྨ་འོད་ཀྱི་གཞལ་ཡས་ཉམས་དགའ་བར། །རིག་འཛིན་སློབ་དཔོན་པདྨ་འབྱུང་གནས་འདུན། །ནམ་ཞིག་ཚེ་འཕོས་ལུས་བརྗེས་གྱུར་མ་ཐག །ཞལ་མཐོང་གསུང་ཐོས་དབྱུགས་དབྱུང་གཟེངས་བསྟོད་དེ། །འགྲོ་བ་འདྲེན་པའི་དེད་དཔོན་བྱེད་པར་འགྱུར། །དེ་ལྟར་གནས་ཡིག་མདོ་ཙམ་བྲིས་པ་འདི། །གསང་བདག་སྤྲུལ་པ་ཧཱུྃ་རལ་རྡོ་རྗེ་ཡིས། །ཟབ་མོའི་བཀའ་ལུང་སྤྱི་བོར་ཕེབས་པ་དང་། །གཞན་ཡང་དོན་གཉེར་ལྡན་པ་འགའ་ཞིག་གིས། །བསྐུལ་ངོར་རྫོགས་སྤྲུལ་ལྔ་པའི་མིང་འཛིན་པ། །ཐུབ་བསྟན་ཆོས་ཀྱི་རྡོ་རྗེ་འབོད་པ་དེས། །སྤྲུལ་པའི་གཏེར་ཆེན་མཆོག་གྱུར་གླིང་པ་དང་། །ཨོ་རྒྱན་ཆེ་མཆོག་དཔལ་གྱི་རྡོ་རྗེ་སོགས། །སྔོན་བྱོན་གོང་མའི་རྡོ་རྗེའི་ལུང་བཞིན་ལས། །རང་བཟོས་བློ་ཡིས་བཅོས་བསླད་མ་བྱས་པར། །ཤིང་གླང་ཧོར་ཟླའི་མར་ངོའི་བཅོ་ལྔའི་ཉིན། །མ་དང་མཁའ་འགྲོ་འདུ་བའི་གནས་མཆོག་ནས། །བྲིས་པ་ནོངས་གང་རྩ་གསུམ་ཚོགས་ལ་བཤགས། །སརྦ་མངྒ་ལཾ། །