[༢] ཀུན་མཁྱེན་འཇིགས་མེད་གླིང་པ།

གཡོ་རུ་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་རམ་ཀུན་མཁྱེན་འཇིགས་མེད་གླིང་པ་ནི། ཇི་སྐད་དུ། དཔལ་ཨོ་རྒྱན་ཆེན་པོའི་བསླུ་མེད་རྡོ་རྗེའི་ལུང་བྱང་ཟབ་གཏེར་མཁའ་འགྲོས་ཞུས་པ་ལས། འཕྱོངས་རྒྱས་ནང་དུ་ང་སྤྲུལ་དོན་བྱེད་འོང༔ སུ་ཡིན་མི་ཤེས་གཅིག་ཆར་སྨྲ་བ་འབྱུང༔ འཕྱིང་བར་མདོའམ་བང་སོ་དམར་པོའི་ལྷོར༔ ལྷ་བབས་མཆོད་རྟེན་དགོན་སྡེ་འཆའ་ཡང་སྲིད༔ ཅེས་པ་ལྟར་གཡོ་རུ་བཀྲ་ཤིས་སྲོང་བཙན་བང་སོ་དམར་པོའི་ལྷོ་ཕྱོགས་དཔལ་རི་དགོན་དང་ཉེ་བའི་ཡུལ་འཕྱོངས་རྒྱས་ནང་དུ། ཆོས་རྗེ་འབྲུག་པའི་ཐུགས་སྲས་ཆེ་བ་དྲུག་གི་ནང་ཚན་རྒྱ་བྲག་པའི་དབོན་རིགས་སུ། སྤྱི་ལོ་༡༧༢༨པ་སྟེ་རབ་བྱུང་བཅུ་གཉིས་པའི་ཞི་བ་ཞེས་པ་ས་མོ་བྱའི་ལོ་རྒྱལ་ཟླ་བའི་ཚེས་བཅོ་བརྒྱད་ཀྱི་སྔ་དྲོའི་ཆ་ལ་མཚན་དཔེའི་འདབ་སྟོང་མངོན་པར་བཞད། ཆུང་ངུ་ནས་གཏེར་ཆེན་སངས་རྒྱས་བླ་མ་དང་ཆོས་རྗེ་གླིང་པའི་སྔོན་རབས་གསལ་བ་སོགས་དམ་པའི་རིགས་སད། དགུང་ལོ་དྲུག་པ་ཤིང་སྟག་ལོར་གསང་ཆེན་སྔ་འགྱུར་པའི་གདན་ས་ཆེན་མོ་དྲུག་ཏུ་གྲགས་པའི་ཡ་གྱལ་དཔལ་རི་ཐེག་མཆོག་གླིང་དུ་ཆོས་སྒོར་ཞུགས། མཚོ་རྒྱལ་སྤྲུལ་སྐུ་ངག་དབང་བློ་བཟང་པདྨར་གཙུག་ཕུད་ཕུལ་བས་པདྨ་མཁྱེན་བརྩེའི་འོད་ཟེར་ཞེས་མཚན་གསོལ། གནས་གསར་པ་ངག་དབང་ཀུན་དགའ་ལེགས་པའི་འབྱུང་གནས་ཀྱི་དྲུང་ནས་ཡོན་ཏན་མཐའ་དག་གི་གཞི་རྟེན་དགེ་བསྙེན་དང་དགེ་ཚུལ་གྱི་བསླབ་སྡོམ་རིམ་པར་ནོད་པར་མཛད། དགུང་ལོ་བཅུ་གསུམ་དུས་གྲུབ་དབང་རིན་པོ་ཆེ་ཐུགས་མཆོག་རྡོ་རྗེ་དང་མཇལ་ཞིང་ཕྱག་རྒྱ་ཆེན་པོ་ཡེ་ཤེས་མཐོང་གྲོལ་ཀྱི་རྩ་དབང་དང་། བསམ་པ་ལྷུན་གྲུབ་མ་སོགས་སྨིན་བྱེད་དང་འབྲེལ་བའི་གྲོལ་བྱེད་ཀྱི་གདམས་པ་ཆིག་རྫོགས་སུ་བཏབ་ནས་བྱིན་གྱིས་བརླབས། ཞིང་དུ་གཤེགས་རྗེས་ཀྱང་ཡེ་ཤེས་སྒྱུ་མའི་སྐུ་དང་མཇལ་ཞིང་སྔོན་སྨོན་ལས་དབང་གི་བླ་མ་བཀའ་དྲིན་ཆེ་བ་ཞིག་ཡིན་གསུངས། གཞན་ཡང་གྲུབ་དབང་ཤྲཱི་ན་ཐ་དང་། བསྟན་འཛིན་ཡེ་ཤེས་ལྷུན་གྲུབ། ཐང་འབྲོག་དབོན་པདྨ་མཆོག་གྲུབ། མོན་རྫ་དཀར་བླ་མ་དར་རྒྱས་སོགས་ཡོངས་ཀྱི་བཤེས་གཉེན་དུ་མ་ལས་རྫོགས་པ་ཆེན་པོ་རྒྱུད་བཅུ་བདུན་གྱི་ལུང་སོགས་བཀའ་གཏེར་གྱི་ཆོས་བཀའ་ཅི་རིགས་གསན། གསར་མའི་སྨིན་གྲོལ་ཡང་ཅི་རིགས་གསན་ཞིང་ཞར་བྱུང་སྐར་རྩིས་སོགས་ཐ་སྙད་ཀྱི་རིགས་པའང་ཆ་ཤས་ཙམ་གསན་པར་གྲགས། སྤྱིར་རྗེ་ཉིད་སྐུ་ན་གཞོན་ནུ་ནས་སྐྱེས་ཐོབ་ཀྱི་རྣམ་དཔྱོད་མཆོག་ཏུ་ཡངས་ཤིང་སྔོན་སྦྱང་གི་བག་ཆགས་སད་པའི་སྟོབས་ལས་སློབ་དཔོན་དང་དཀའ་སྤྱད་ལ་མ་ལྟོས་པར་མདོ་རྒྱུད་རིག་གནས་དང་བཅས་པའི་གཞུང་ལུགས་མཐའ་དག་ལ་མཁས་པའི་རྩེར་སོན་པའི་གང་ཟག་ཅིག་ཆར་བ་སྟེ། ཉིད་མཛད་རང་རྣམ་ཆེན་མོ་ལས། ལར་ཁོ་བོ་ཅག་གི་ནི་ཡི་གེའི་བརྡ་སྤྲོད་པ་ནས་བརྩམས་ཏེ། རྒྱལ་བའི་བཀའ་དང་། དགོངས་འགྲེལ་བསྟན་བཅོས། ཐ་སྙད་ཀྱི་གཞུང་། ཡིན་ལུགས་ཀྱི་མན་ངག་སོགས་རྡོ་རྗེའི་གནས་ཇི་སྙེད་པ་མཐོང་བ་དེ་དག་གུས་པས་ཉེ་བར་བླངས་ཏེ་ཉིན་མོའི་སྣང་བ་དང་སྒྲོན་མེའི་འོད་ལ་མཇལ་བར་སྤྲོ་བའི་བག་ཆགས་བཟང་བ་ཙམ་ལས་དགེ་བའི་བཤེས་གཉེན་དང་ཉིན་གཅིག་ཀྱང་འགྲོགས་ནས་སྦྱངས་པའི་སྟོབས་ཀྱི་བློ་གྲོས་འཕེལ་བའི་གནས་སུ་མ་གྱུར་མོད། དཔལ་གྱི་བསམ་ཡས་མཆིམས་ཕུར་རྒྱལ་བ་ཀློང་ཆེན་པའི་ཡེ་ཤེས་ཀྱི་སྐུ་དང་ལན་གསུམ་མཇལ་ཞིང་བརྡ་ཐབས་རྟེན་འབྲེལ་དུ་མས་བྱིན་གྱིས་བརླབས་པ་ལ་བརྟེན་ནས་ཁོ་བོའི་ལས་འབྲེལ་རྫོགས་པ་ཆེན་པོ་ནས་སད་པ་ཡིན་ནོ། །ཞེས་དང་། ཉི་ཤུ་རྩ་ལྔ་མ་ལོན་བར་ཆོས་དང་མཐུན་པའི་བྱ་བར་གཏོགས་པ་ཆོས་སྤྱོད་བློ་འཛིན་དང་ཟ་ཆོག་ཉི་ཚེ་བའི་བསླབ་གཉེར་སྤྱི་མཐུན་ཙམ་ལས་གཞུང་ལུགས་ལ་ཐོས་བསམ་བྱེད་པ་སོགས་བཏང་སྙོམས་ཀྱི་ཕ་རོལ་ཏུ་ཕྱིན་པ་དེ་ཀར་གདའ། ཞེས་གསུངས་པ་ལྟར་རོ། །དགུང་ལོ་ཉེར་ལྔའི་དུས་དཔལ་ཨོ་རྒྱན་གྱི་སློབ་དཔོན་ཆེན་པོའི་རྣམ་ཐར་དང་སྒྲུབ་གནས་མཐོང་བའི་རྐྱེན་བྱས་ཏེ་ཉིན་མཚན་ཀུན་ཏུ་དྲན་ཞིང་ལྷོ་ནུབ་སྲིན་པོའི་ཡུལ་ལ་ཞལ་བསྟན་ནས་ངུ་བཞིན་སྤྱན་ཆབ་ཡང་ཡང་ཤོར་བ་དང་། དེ་ནས་བཟུང་ཕྱི་མ་ཟངས་མདོག་དཔལ་རིར་ཟང་ཐལ་དུ་བགྲོད་པའི་སྒྲུབ་པ་བཙན་ཐབས་སུ་བྱེད་དགོས་སྙམ་པའི་ཐུགས་དམ་བཅས། ཉེར་བརྒྱད་པ་མེ་མོ་གླང་གི་ཆོ་འཕྲུལ་ཆེན་པོ་ནས་བཟུང་དབེན་གནས་ཤྲཱི་པར་ཏ་དང་། མཆིམས་ཕུ་དཔལ་གྱི་ནགས་ཁྲོད། གསང་ཆེན་མེ་ཏོག་ཕུག་བཅས་སུ་ལོ་ངོ་བདུན་ལ་སྙིང་པོའི་སྒྲུབ་པ་ལ་ཞུགས་ཤིང་། དུས་དེར་དཔལ་ཨོ་ཌཱི་ཡ་ནའི་སློབ་དཔོན་ཆེན་པོ་པདྨ་འབྱུང་གནས་དང་ཀུན་མཁྱེན་ཀློང་ཆེན་རབ་འབྱམས་ཀྱི་ཡེ་ཤེས་ཀྱི་སྐུས་རྗེས་སུ་བཟུང་བས་བྱིན་བརྒྱུད་རྟོགས་པའི་ཡེ་ཤེས་བཙན་ཐབས་སུ་བརྙེས། མགྲིན་པ་ལོངས་སྤྱོད་ཀྱི་འཁོར་ལོའི་རྩ་མདུད་གྲོལ་བས་སྣང་གྲགས་བརྡ་དང་དཔེ་ཆར་ཤར་ནས་གཉུག་མ་རྡོ་རྗེའི་གླུ་མགུར་དུ་བཞེངས་ཤིང་། སྒོམ་བྱུང་གི་ཤེས་རབ་ཀློང་ནས་བརྡོལ་བ་དང་མཛོད་ཆེན་བདུན་ལ་ཞིབ་གཟིགས་མཛད་པས་རང་གཞན་གྲུབ་མཐའ་རྒྱ་མཚོ་ལ་མི་འཕྲོག་པའི་མཁྱེན་རབ་ཀྱི་རྩལ་འབར་བ་སྟེ། རྣམ་ཐར་ཆེན་མོ་ལས། ཁོ་བོས་རྫོགས་པ་ཆེན་པོའི་གྲུབ་མཐའི་ངོས་འཛིན་ཐུན་མོང་མ་ཡིན་པ་དང་དཀའ་བའི་གནས་མ་ལུས་པ་མཛོད་ཆེན་བདུན་ལས་རྙེད་པ་ཡིན། འཛམ་བུ་གླིང་གི་རྒྱན་དྲུག་མཆོག་གཉིས་མངོན་སུམ་དུ་བྱོན་ཡང་རྒོལ་བ་མི་འཇུག་པའི་གྲུབ་པའི་མཐའ་ཆེན་པོ་འདིའི་དགོངས་པ་ལེན་མི་ཤེས་ན་གཞན་ལྟ་བ་སུ་མཐོ་ཟེར་ཡང་ཀུན་འབྱུང་གི་གཡོགས་པ་ཅན་དུ་འདུག་གོ། ཅེས་གསུངས་པ་དང་། གཞན་ཡང་གནས་འདི་དག་ཏུ་སྒྲུབ་པ་མཛད་སྐབས་ཀྱི་ཉམས་སྣང་གསང་བའི་རྣམ་ཐར་འགའ་ཞིག་རྟོགས་བརྗོད་ཆུ་ཟླའི་གར་མཁན་དང་ཌཱཀྐིའི་གསང་གཏམ་ཆེན་མོ་ལས་བྱུང་བ་རྡོ་རྗེའི་ཚིག་དོན་ལ་བཅོས་སླད་མ་ཕོད་པས་གཞུང་ལྟར་བཀོད་པ་ནི། ཨ་ཧོ། དུས་དེ་ཡི་གནས་སྐབས་ཐམས་ཅད་དུ། །ཕྱི་བཟུང་ཡུལ་རགས་པའི་རྣམ་རྟོགས་འགགས། །ནང་འཛིན་བྱེད་ཤེས་པ་གཏད་མེད་གྲོལ། །སེམས་བདེ་སྟོང་གི་ནམ་མཁའ་དྭངས་པའི་ཀློང་། །ལམ་མངོན་སུམ་རིག་མདངས་ལྷག་མཐོང་གིས། །དཔལ་མ་ཧཱ་གུ་རུའི་ཞལ་དཀྱིལ་མཇལ། །ཉམས་རྟོགས་འབུལ་ཞིབ་རྒྱས་ཞུས་པ་ན། །སྒོམ་ཡལ་གྲབས་ཡིན་འདུག་གསུངས་པ་ཐོས། །སྒོམ་བྱས་ཚད་ཉམས་ཞེན་རྣམ་རྟོག་ཡིན། །དེ་ཡལ་ན་ཉམས་ཡལ་རྟོགས་པ་ཤར། །དོན་སྤྲོས་བྲལ་བདེན་པ་མཐོང་བའི་བརྡ། །ཞེས་དང་། གཉིད་མི་རྟོག་ཀུན་གཞིའི་མུན་པ་ནས། །ཡིད་གཅིག་པུར་ལངས་པའི་གསལ་སྣང་ལ། །གནས་འོག་མིན་དཔལ་གྱི་མཆིམས་ཕུ་ཡི། །བྲག་དམར་གྱི་ཀེའུ་ཚང་དུ་སླེབས། །དབྱིབས་རྣམ་འགྱུར་ཇི་བཞིན་མ་ཡིན་པའི། །རང་བྱུང་གི་བྲག་སྐྱིབས་ཆེན་པོའི་ནང་། །ཕ་མཚོ་སྐྱེས་རྡོ་རྗེའི་སྣང་བརྙན་ལ། །འཁོར་རྒྱལ་བ་རིགས་ལྔས་མཛེས་པ་དེའི། །སྐུ་ཆེ་ཆུང་མི་ཚད་ཉིས་འགྱུར་ཙམ། །རིགས་གཙོ་དང་ཨོ་རྒྱན་གཉིས་ཀའི་ཕྱག །རཏྣའི་པྲོག་ཞུས་མཚན་པར་སྣང་། །དེར་རིག་འཛིན་ཧཱུྃ་ཆེན་འགྲོ་འདུལ་དང་། །མིག་འཕྲུལ་ལྟ་བུར་མཇལ་བ་ན། །བྲག་ལ་གུ་རུའི་ཞབས་རྗེས་ཡོད། །བདག་ཅག་གཉིས་འཚོལ་ལོ་གསུངས་པ་ལ། །གཉིས་ཀས་འཚོལ་བའི་འདུ་ཤེས་ངང་། །གནས་དེའི་དཀོན་གཉེར་ཡིན་སྙམ་པའི། །བན་རྒན་བགྲེས་སོང་ཞིག་འདུག་པ་དེས། །མཛུབ་རིས་དང་བཅས་པས་བསྟན་བྱུང་བར། །དེ་ན་ཞབས་རྗེས་ཁྲུ་དོ་ཙམ། །འདམ་ལ་བརྒྱབ་ལྟར་ཤིན་ཏུ་གསལ། །ཞེས་དང་། དེའི་ཐོ་རེངས་ལྡངས་པའི་རྣལ་འབྱོར་ཚེ། །གཞི་སྣང་བའི་འོད་གསལ་དྭངས་པའི་ངོར། །རང་གནས་པའི་སྨིན་མཚམས་ནམ་མཁའི་ཐད། །འཇའ་ཚོན་སྣ་ལྔའི་གུར་ཁྱིམ་ནང་། །སྐྱབས་ཀུན་འདུས་མཚོ་སྐྱེས་རྡོ་རྗེ་མཇལ། །དེ་བལྟ་བྱ་དང་ལྟ་མཁན་དབྱེར་མེད་པས། །རེ་དོགས་ཀྱི་འཆིང་བ་གང་ཡང་མེད། །དེའི་ངང་ལ་དེ་ཉིད་གནས་འགྱུར་ཏེ། །ཡུལ་སིང་ག་ལ་ཡི་ཨཱ་ཙར་ཡ། །འཇམ་དཔལ་བཤེས་གཉེན་དུ་ལམ་གྱིས་སོང་། །སྐུ་དམར་སྨུག་མཆོང་ལྟར་དྭངས་པ་ཡི། །ཕྱག་གཡས་ན་བེ་ཅོན་ཁྱད་འཕགས་བསྣམས། །གཡོན་བདག་གི་སྙིང་ཁར་སྡིགས་མཛུབ་ཀྱི། །ཕྱག་རྒྱས་བརྡ་ཐབས་སྟོན་པའི་མོད། །ཕྱག་མཚན་གྱི་བེ་ཅོན་རང་ཉིད་ལ། །བྱིན་ཏེ་རང་ལ་དབྱེར་མེད་ཐིམ། །སྐུ་སྒྱུ་མ་ལྟ་བུའི་གསལ་སྣང་དེ། །ཀ་དག་གི་དབྱིངས་སུ་གཏད་མེད་ཡལ། །དུས་འདི་ནས་དགོངས་པའི་གསང་མཛོད་རྡོལ། །གསུང་རབ་ཀུན་ཀྱི་དགོངས་པ་ཁྲོལ། །ཀློང་ཆེན་རིག་པའི་རྩལ་ཆེན་རྫོགས། །སྣང་ཡུལ་བརྡ་དང་དཔེ་ཆར་ཤར། །མཆོག་གི་དངོས་གྲུབ་རྒྱུད་ལ་བཞག །ཅེས་དང་། མེ་གོས་སུ་བཀླུབས་པའི་གླང་གི་ལོའི། །དུས་ཆོ་འཕྲུལ་ཟླ་བའི་ཚེས་བཅུའི་ཉིན། །ཕ་རྗེ་བཙུན་ཨོ་རྒྱན་སྙིང་ནས་དྲན། །མིག་མཆི་མའི་རྦ་རླབས་གཡོ་བཞིན་དུ། །ངག་གདུང་བའི་འོ་དོད་ལྷང་ལྷང་བོས། །ཕ་སངས་རྒྱས་གཉིས་པ་དེ་ཉིད་ཀྱི། །རྣམ་ཐར་དང་བཀའ་དྲིན་དྲན་པའི་མོད། །ཚེས་བཅུའི་དུས་དྲན་གསོལ་འདེབས་བརྩམས། །དེས་ཐུན་མཚམས་ཀུན་ཏུ་གསོལ་བཏབ་པས། །ཞག་གསུམ་འདས་པའི་ཐོ་རེངས་ཁར། །སྒོ་ལྔའི་སྣང་གསལ་ནུབ་པ་ཡིས། །ཀུན་གཞིའི་རྣམ་ཤེས་ཀྱི་མེ་ལོང་ངོར། །ལྗོངས་འདི་ཡིན་ངོ་མི་འཚལ་བའི་སར། །མདུན་ངོས་ནས་ལྷགས་པར་ལྟར་སྣང་བའི། །གདུགས་རྒྱལ་མཚན་བ་དན་འཕན་འཕུར་སོགས། །བློས་དཔག་ཏུ་མེད་པས་སྔོན་བསུས་ཏེ། །སྤྲུལ་བའི་གུ་རུ་མཚན་བརྒྱད་རྣམས། །སྐུ་ཆེ་ཆུང་མི་ཚད་ཉིས་འགྱུར་ཙམ། །ལྷམ་མེ་ལྷན་ནེར་བྱོན་པ་མཇལ། །དེར་མིག་འཕྲུལ་ལྟ་བུའི་གསལ་སྣང་ལ། །འཇའ་འོད་ཟླུམ་འཁྱིལ་དྭངས་པའི་ནང་། །སྐས་གདང་བུ་ལྔ་ལྡན་བཙན་ཐབས་སུ། །ནམ་མཁའི་ངོས་སུ་བཙུགས་པ་མཐོང་། །དེར་རྟོག་མེད་དུ་འཛེགས་ཏེ་འགྲོ་བའི་ངང་། །ཕ་ཨོ་རྒྱན་དང་མཇལ་ལོ་སྙམ་ཙ་ན། །བུ་མ་ཆགས་པད་མའི་ས་ལ་ཤོག །ཅེས་གསུངས་པ་རྣ་བར་ལྷང་གིས་གོ། དེའི་མོད་ལ་རང་སྣང་རྔ་ཡབ་གླིང་། །དཔལ་གཡོ་རུའི་ཁྲ་འབྲུག་ཡིན་སྙམ་པའི། །ངོ་མཚར་གྱི་གཞལ་མེད་ཁང་དུ་སླེབས། །དབུས་འཇའ་ཚོན་གྱི་ལྡིང་གུར་བཀྲ་བའི་ཀློང་། །ཡབ་རིག་འཛིན་པདྨ་འབྱུང་གནས་དེ། །སྐུ་གསུམ་རིག་འདུས་ཀྱི་རྣམ་རོལ་ཅན། །རྟེན་མེད་དུ་བར་སྣང་དབྱིངས་ལ་བཞུགས། །གཡས་གཡོན་ན་བཱི་མ་བ་གོར་ཞབས། །འཁོར་དཔའ་བོ་ཌཀྐིའི་ཚོམ་བུས་མཛེས། །དབུས་རྡོ་ཡི་བཞུགས་ཁྲི་ཆེན་པོའི་སྟེང་། །རྟོག་མེད་ལ་རང་ཉིད་སླེབས་པའི་མོད། །མོས་གུས་ཀྱི་དྲན་པ་དབང་མེད་སྟོར། །རིག་པ་སྐར་མདའ་འཕངས་པ་བཞིན། །རྗེ་བཙུན་གུ་རུའི་ཐུགས་ཀར་ཐིམ། །དེར་རིག་པ་རྩལ་གྱི་དབང་ཆེན་ཐོབ། །ལམ་རྫོགས་པ་ཆེན་པོའི་གནད་ཤེས་ཤིང་། །དབྱིངས་གཞོན་ནུ་བུམ་སྐུའི་ཞིང་ཁམས་དེ། །རྒྱ་ཆད་དང་ཕྱོགས་ལྷུང་མེད་པར་མཐོང་། །ཞག་གཅིག་འདས་པའི་ཉམས་སྣང་བྱུང་། །དེ་སད་པའི་ཤེས་པ་སྐད་ཅིག་མར། །གསང་མཆོག་བདེ་བ་ཆེན་པོ་ནི། །ཡུམ་ཡེ་ཤེས་ཌཀྐི་མཚོ་རྒྱལ་མ། །བུ་མོ་མཛེས་པའི་ཆ་བྱད་ཅན། །དེས་མཚན་ལྡན་གྱི་བྷན་དྷ་སྲུབས་མེད་ཅིག །བདག་ཉིད་ཀྱི་ལག་ཏུ་སྤྲད་པ་དང་། །འདི་ཆོས་རྒྱལ་ཁྲི་སྲོང་ལྡེའུ་བཙན་གྱི། །དབུ་ཐོད་ངོ་མ་ཡིན་ནོ་གསུངས། །ཡང་ཅུང་ཞིག་དགོངས་ནས་ཐོད་པ་དེ། །རེ་ཞིག་ཕར་ལ་བླངས་པའི་མོད། །མིག་འཕྲུལ་ལྟ་བུའི་སྣང་ཆ་ལ། །སྔ་མ་དང་དབྱེ་བ་མི་བཟོད་པའི། །ཐོད་པ་ཞིག་དེ་ཡི་ཟླ་ལ་སྦྱར། །གཉིས་ཀ་ལྷན་ཅིག་སྩོལ་བ་དང་། །ད་འདི་གཉིས་དབྱེ་བ་ཨེ་ཕྱེད་གསུངས། །དེ་དཔྱད་དུ་མ་བཟོད་ནེམ་ནུར་ངང་། །གསལ་སྣང་དེ་ནམ་མཁའི་འཇའ་ལྟར་ཡལ། །ཞེས་དང་། དུས་རེ་ཞིག་བསྙེན་བསྒྲུབ་དམ་པོའི་ཚེ། །རང་གཉུག་མའི་བསྟི་གནས་ཡིན་སྙམ་པའི། །ཁང་པ་བཀོད་མཛེས་ཞིག་གི་ནང་། །རྗེ་རིག་འཛིན་ཧཱུྃ་ཆེན་ཀཱ་ར་དེ། །ཞལ་ཁྱིམ་ཟླ་བ་ལྟ་བུ་ལ། །སྐུ་ཤ་ཡང་རྒྱགས་པ་ལྟར་སྣང་བའི། །གཟི་བྱིན་མཚུངས་པ་མེད་པ་ཞིག །སྒྱུ་མ་ལྟ་བུའི་སྣང་ཆར་མཇལ། །ཉམས་རྟོགས་གླེང་མོ་མང་ཞུས་མཐར། །ད་ངེད་ཀྱི་སྒྲུབ་ཁང་འདི་ཉིད་དུ། །བློས་བསླངས་ཀྱི་དཀྱིལ་འཁོར་བཞེངས་ཞུས་པས། །ད་བློས་བསླངས་གསར་དུ་བཞེངས་པ་ལས། །ཆུང་ངུ་ཞིག་ཞིག་གསོས་དགོས་པ་ཞིག །གནས་གཞན་དུ་འདུག་པ་ངས་བླངས་ཏེ། །བུ་ཁྱོད་ལ་སྤྲད་ཀྱི་ཞིག་གསོ་གྱིས། །ཞེས་གསུངས་ཏེ་མི་སྣང་གཞན་དུ་ཐལ། །ཀྱེ་ཧོཿ ལོ་དེ་ཡི་ཆུ་སྟོད་ཟླ་བའི་ཉིན། །རྗེ་མཆོག་སྤྲུལ་མངའ་རིས་པཎ་ཆེན་གྱིས། །གཏེར་གནས་གསུམ་ནས་སྤྱན་དྲངས་པའི། །བཙན་རྒོད་ཡ་བ་སྐྱ་བདུན་གྱི། །སྲོག་གཏད་དང་རྒྱུད་ལུང་ནོད་པའི་མོད། །ནམ་ཐོ་རེངས་ཀྱི་ཐུན་གྱི་སྨད་ཆ་ནས། །གཉིད་ཡིན་མིན་དཔྱད་དུ་མ་བཟོད་པའི། །ཉམས་སྣང་བའི་འཁྲུལ་བ་རྫུན་པོ་ཆེ། །ཁོང་གནོད་སྦྱིན་ཆེན་པོ་བན་དྷེའི་གཟུགས། །ན་ཆེར་ཡོལ་གྱོན་པ་སྣུམ་བག་ཅན། །འཁོར་དང་བཅས་པ་བདག་དྲུང་ལྷགས། །ཕྱག་ཕུ་དུད་ཆེན་པོས་འཚལ་བ་ལ། །བདག་ཀུན་རྟོག་རང་ཁའི་བག་ཆགས་བློང་། །རང་ན་ཚོད་ཆུང་ངུའི་བན་གཞོན་ལ། །ཁོང་ཆེ་བགྲེས་ཀྱི་གུས་ཕྱག་མི་འཐད་སྙམ། ཁྱེད་དེ་ལྟར་བགྱི་བ་མི་འོས་ཞེས། །ནན་ཆེན་པོས་བཟློག་ཀྱང་བཙལ་བ་ན། །དེའི་སྐེ་ནས་འུབ་ཀྱིས་བསྡམས་པ་ལས། །ཡིད་གུས་པའི་ཚུལ་གྱིས་འདི་སྐད་ཟེར། །ཁྱེད་ལ་གཏེར་སྟོན་རིན་པོ་ཆེས། །གཅུང་དགའ་བོའི་སྐྱེ་བ་ཡིན་གསུངས་པས། །དེས་གུས་པས་ལྷ་ཕྱག་འཚལ་བ་ཡིན། །སྔར་བྱང་པ་རིག་འཛིན་སྤྲུལ་པའི་སྐུས། །ཁྱེད་དབུ་བླར་བཞེས་ཤིང་གུས་འདུད་དང་། །བདག་རྐྱེན་དེ་འདྲ་མཛད་མོད་ཟེར། །ལོ་དེ་ཡི་སྨིན་དྲུག་ཟླ་བའི་ནང་། །དུས་ཡར་ངོའི་ཚེས་བཅུའི་ཐོ་རེངས་ཁར། །དབྱིངས་འོད་གསལ་གྱི་ནམ་མཁའ་དྭངས་པ་ལ། །བོད་གངས་ཅན་གྱི་ལྷ་གཅིག་སྙིང་རྗེའི་གཏེར། །ལྷ་འཕགས་མཆོག་ཕྱག་ན་པད་མོའི་སྐུ། །ཤར་ནམ་མཁས་གར་ཁྱབ་སྐུས་ཁྱབ་པའི། །མཚན་དཔེའི་སྣང་བརྙན་བཞེངས་སྟབས་ཅན། །དེ་མཐོང་བས་མོས་གུས་ཀྱི་མཆི་མ་འཁྲུགས། །གསོལ་འདེབས་ཀྱི་ཚིགས་བཅད་གསར་དུ་བརྩམས། །ཞེས་དང་། དུས་ཡར་ངོའི་ཚེས་བཅུའི་ནུབ་མོ་དེ། །དཔལ་ཨོ་ཌཱི་ཡ་ནའི་སངས་རྒྱས་ཆེ། །སྐུ་གཞོན་མཛེས་གཡས་ན་ཧཱུྃ་ཀཱ་ར། །གཡོན་ཕྱོགས་ན་རང་ཉིད་འདུག་པའི་མོད། །དེས་ཕྱག་རྒྱའི་བརྡ་ཐབས་ནམ་མཁར་གདེངས། །མ་དབྱིངས་ཕྱུག་བདེ་ཆེན་མཚོ་རྒྱལ་དང་། །རྒྱ་གར་གྱི་རིག་འཛིན་ཧཱུྃ་ཀཱ་ར། །ཐུགས་ཡེ་ཤེས་ཆེན་པོ་གཉིས་སུ་མེད། །ཧཱུྃ་ཀཱ་ར་གསང་འཛིན་རྡོ་རྗེ་འཆང་། །བདག་ཉིིད་ནི་འཕགས་མཆོག་སྙིང་རྗེའི་གཏེར། །ངེད་རྣམ་གསུམ་རིག་གསུམ་སྤྲུལ་བའི་གར། །ཞེས་གསུངས་པའི་མོད་ལ་གཏད་མེད་ཡལ། །ཞེས་དང་། དེའི་ཟླ་བ་བརྒྱད་པའི་ཚེས་བཅུ་དྲུག་གི་ཉིན་སྒྲུབ་གནས་དེ་ཉིད་ལ་གནས་བསྟོད་གཅིག་བརྩམས་ཏེ་འོད་གསལ་འགྲོ་འོང་མེད་པའི་ངང་དུ་མནལ་བ་ན། དབང་པོ་ཡུལ་ལྔའི་ཐ་མལ་གྱི་འཛིན་པ་དྭངས། གཟུང་ཡུལ་རགས་པ་ཡིད་ཤེས་ཀྱི་ཆུ་མཚོར་ཐིམ། ཀུན་གཞི་མི་རྟོག་པའི་ངང་དུ་སྣང་ཆའི་རྟེན་འབྲེལ་ནུབ་པ་དང་། ལྷག་མཐོང་ཡེ་ཤེས་ཀྱི་སྣང་བའི་འོད་གསལ་གྱི་མེ་ལོང་ཕྱིས་པའི་ངོས་ཤིན་ཏུ་དྭངས་པར། མ་བྱོན་བདེ་གཤེགས་སྙིང་པོ་རི་རབ་མར་མེའི་རྒྱལ་མཚན་སྣང་བའི་གྲོང་ཁྱེར་དུ་ཁམས་དྲུག་ལྡན་གྱི་མིའི་ཟོལ་ལ་བརྟེན་པ། དཔལ་བསམ་ཡས་པ་ཀུན་མཁྱེན་ངག་གི་དབང་པོ་སྐུ་གཟུགས་བཟང་ལ་ན་བཟའ་ཆོས་གོས་རྣམ་གསུམ་གྱིས་མཛེས་ཤིང་། སྐུ་ན་ཅུང་ཟད་སྨིན་པ། དེ་བཞིན་གཤེགས་པ་ལྟར་མཐོང་ན་མི་མཐུན་པ་མེད་པ་ཞིག་མིག་འཕྲུལ་ལྟ་བུར་མཇལ་ཏེ། བརྗོད་བྱ་དོན་གྱི་ཐུགས་རྒྱུད་འཕོ་བར་གྱུར་ཅིག །འཕོ་བར་གྱུར་ཅིག །རྗོད་བྱེད་ཚིག་གི་བརྒྱུད་པ་རྫོགས་པར་གྱུར་ཅིག །རྫོགས་པར་གྱུར་ཅིག །ཅེས་གསུང་སྒྲ་ལྷང་ལྷང་ཞལ་འདོན་མཛད་པ་ཐོས། དེར་དྲན་པ་འཐོར་འགྲོ་བ་ལྟ་བུའི་དད་པ་དང་མོས་གུས་བཟོད་བླག་མེད་པ་ཞིག་སྐྱེས། ཕྱག་འཚལ་ལོང་མེད་པར་ཀུན་མཁྱེན་བླ་མའི་ཕྱག་གཉིས་ནས་འུབ་ཀྱིས་འཇུས། སྤྱི་བོ་བདེ་ཆེན་གྱི་འཁོར་ལོའི་ཅོད་པན་དུ་བཏེགས་ནས། ཀུན་མཁྱེན་ཆོས་ཀྱི་རྒྱལ་པོ་མཁྱེན། ཀུན་མཁྱེན་ཆོས་ཀྱི་རྒྱལ་པོ་མཁྱེན། ཀུན་མཁྱེན་ཆོས་ཀྱི་རྒྱལ་པོ་མཁྱེན། ཞེས་མོས་གུས་ཀྱིས་བརྒྱལ་བ་ཙམ་དུ་གསོལ་བ་བཏབ། ཁོ་བོ་ལ་དུས་ཕྱིས་དེ་སྐད་ཟེར་བ་ཡོང་ཕེབས་གསུངས། ཁམས་འདུས་མེ་ཏོག་ཕྲེང་ལྡན་ལ་སོགས་པར་གསུངས་པ་ལྟར་སེམས་ཅན་བསོད་ནམས་དམན་པས་སྐུ་དངོས་སུ་བཞུགས་དུས་དད་མོས་མེད་ཅིང་ལོག་སྒྲུབ་ཆེ་བའི་ཤུགས་ཀྱིས་ཐུགས་མུག་པར་བྱུང་འདུག་པའི་གསུང་ཅུང་ཡིན་པར་གོ་སྟེ། ངོས་ནས་ཁྱེད་ཀྱི་མཛོད་བདུན་དང་། སྙིང་ཐིག་རྣམས་ཀྱི་དགོངས་གཏེར་གཅིག་པུའི་སྒོ་ནས་བསྟན་པ་དང་སེམས་ཅན་ལ་ཕན་བཏགས་པའི་བཀའ་དྲིན་དྲན་ཅིང་། ཆེ་བའི་ཡོན་ཏན་སངས་རྒྱས་དངོས་དང་མཚུངས་པའི་མོས་གུས་རྒྱུན་གཏན་བྱེད་བཞིན་པར་ལགས་མོད་ཞུས་པས། ང་ལ་སྤྱན་ཧུར་གྱིས་གཟིགས་ནས། རིགས་ཀྱི་བུ་ཁྱོད་ལ་ད་སྨོན་ལམ་གཏད་རྒྱའི་སྒོ་ནས་དོན་བརྒྱུད་ཀྱི་དགོངས་པ་འཕོས་པ་ཡིན་པས་སྒྲུབ་པའི་སྲོག་མཁར་ཚུགས་ལ་སྐལ་ལྡན་ལ་རྒྱ་ཆེར་སྟོན་ཅིག ཁྱེད་རང་གི་མགུར་མའང་ཤིན་ཏུ་ལེགས་པ་བྱུང་འདུག་གསུངས་པའི་མོད་ལ་བསླབ་བྱ་འདྲ་ཞུ་སྙམ་པ་དང་། སྐུ་གསུམ་གྱི་སྣང་ཆ་མིག་འཕྲུལ་ལྟ་བུར་དབྱིངས་སུ་ནུབ་སྟེ། ཀུན་མཁྱེན་བླ་མ་དྲན་པ་ལ་ཚུགས་ཐབས་མེད་པ་ཞིག་བྱུང་ངོ། །བྲག་ཕུག་འགྲིམ་པའི་སྤྲང་བཙུན་བྷུ་སུ་ཀུ། །དབེན་པར་གནས་ནས་ན་ཚོད་མ་རྒས་པས། །རྟོགས་པ་སྐྱེ་བ་ཤེས་བྱར་མི་སྲིད་སྙམ། །དྲེགས་རློམ་ཅན་གྱིས་ག་ཞ་བྱེད་ན་ཡང་། །རྒྱལ་སྲས་པདྨ་དགེ་བའི་བཤེས་གཉེན་གྱི། །རྫུ་ལ་ཞུགས་པ་ཀློང་ཆེན་དྲི་མེད་ཀྱི། །ཞལ་མཐོང་ཙམ་གྱི་བག་ཆགས་སྡིག་སྒྲིབ་ཟད། །གསུང་ཐོས་ཙམ་གྱིས་རྟོགས་པའི་ཀློང་ཆེན་རྡོལ། །ཐ་སྙད་ཆོས་ལ་བསླབ་གཉེར་མ་བགྱིས་ཀྱང་། །དཔེ་མཐོང་ཙམ་གྱིས་གདམས་པའི་གནད་མཚང་རིག །ཉིན་ཞག་གཅིག་ལ་སེམས་ཅན་སངས་རྒྱས་སུ། །སྒྱུར་བའི་བཀའ་དྲིན་བསམ་གྱིན་བླ་མ་དྲན། །ཕྱི་ལྟར་འགྲོ་འདུལ་དྲི་མེད་ཧཱུྃ་ཆེན་རྗེ། །ནང་ལྟར་སིངྒའི་སློབ་དཔོན་མཉྫུ་ཤྲི། །གསང་བ་ཡེ་ཤེས་སྐུ་ཅན་ཀློང་ཆེན་པས། །བརྡ་ཐབས་རྟེན་འབྲེལ་དུ་མས་དོན་བརྒྱུད་བྱིན། །མཐོང་སྣང་ཟ་ཟི་ནམ་མཁའི་གློག་དང་འདྲ། །རྡོ་ལ་ཞབས་རྗེས་མུ་སྟེགས་ནག་པོས་འཇོག །ཉམས་རྟོགས་དབང་པོའི་ཡུལ་དུ་མི་སྣང་བས། །གཞན་ལ་རྟག་བརྟན་ཐེར་ཟུག་སྨྲ་དོན་ཅི། །སྐུ་ཡིས་བྱིན་གྱིས་བརླབས་པ་སྟེ་དང་པོའོ། འདི་གནས་ཡིག་རྙིང་པར་ཉང་ཕུག་འོག་མར་གྲགས་པའི་དོན་ཉང་ཏིང་འཛིན་བཟང་པོའི་སྒྲུབ་ཕུག་བྱ་སྐྱིབས་ཕུག་པ་ལྟ་བུའི་སྒོ་ལོགས་གཡས་ཟུར་ན་ད་ལྟ་བྲག་གསེང་དུ་ཤིང་སྒྲོ་དཀར་སྐྱེས་ཤིང་། །བྲག་ལོགས་ལ་མཆོད་རྟེན་གྱི་རི་མོ་གསུམ་ཡོད་པའི་བྲག་ཞོལ་འདབས་དེར་འཇག་མའི་ལྷགས་སྐྱོབ་ཙམ་ལ་བརྟེན་ནས་འདུག་པའི་སྐབས་ཡིན་ནོ། །དེ་ནས་ཉང་ཕུག་འོག་མའི་ཐ་སྙད་གྲགས་པ་ལ་བརྟེན་ནས་སྔ་རབས་པ་དག་གིས་ལྷོ་ཕྱོགས་ཀྱི་ཕྱིས་བྱུང་གི་བྲག་ཕུག་དེ་ལ་ཉང་ཕུག་གི་ཁ་བྱང་བྲིས་འདུག་ཀྱང་། སྔར་བཤད་པ་ལྟར་གསལ་སྣང་གི་བདེན་པས་ངེས་ཤེས་རྙེད་པའི་སྔོན་ ཆོས་རྒྱལ་ཚངས་པ་ལྷའི་མེ་ཏོག་དང་། དེ་རྗེས་མངའ་བདག་ཉང་གི་སྒྲུབ་ཕུག ་ཡིན་པས་ཉང་ཕུག་འོག་མར་གྲགས་པ་ངེད་རང་གིས་ངོས་བཟུང་ཞིང་མེ་ཏོག་ཕུག་ཏུ་བཏགས་པའི་གནས་སུ་བཅད་མཚམས་ཤིན་ཏུ་དམ་ཞིང་ངེས་འབྱུང་གིས་རྒྱུད་བརླན་པ་ཞིག་གི་ཚེ། ཨ་འཐས་གཟུང་ཡུལ་གྱི་འཛིན་ཆ་ཞིག་པའི་སྣང་ངོར་ཡང་གཅིག་ཀུན་མཁྱེན་སངས་རྒྱས་གཉིས་པ་དང་མཇལ་པ་ན། དཔེ་ཆ་བམ་པོ་ཞིག་གནང་ནས་འདིས་ཤིང་རྟ་ཆེན་མོ་ན་གབ་པའི་ཚུལ་དུ་ཡོད་པ་མཐའ་དག་གསལ་བ་ཡོད། ཅེས་དང་། གསང་མཛོད་ཆེན་མོའི་བརྡ་འགྲོལ་གྱི་སྐོར་སྐབས་འདིར་གསུངས་པ་ཡིན། ཡང་ཁྱེད་རང་གི་སྐྱེ་རྒྱུད་ལུང་བྱང་ཡིན་ནོ། །ཞེས་ཤོག་དྲིལ་ཞིག་གནང་བྱུང་བ་ཁ་ཕྱེས་པས། ཡི་གེ་གོང་འོག་གཉིས་ཀྱི་རྣམ་པ་འདུག་པའི་གོང་མར། སྐྱེ་བ་སྔ་མ་ནི་ཀུན་མཁྱེན་ཆོས་རྗེའོ། །ཞེས་འདུག ཕྱི་མ་རྣམས་ཀློག་པར་རྩོམ་པ་ན། གསལ་སྣང་དེ་ནམ་མཁའ་ལ་སྤྲིན་དེངས་པ་བཞིན་སོང་ལ། འདིའི་ཚེ་སྐུའི་བྱད་དབྱིབས་སོགས་འདི་ལྟར་འདུག་སྙམ་པའི་འཛིན་ཤེས་རགས་པ་གང་ཡང་མ་བྱུང་ངོ་། །གསུང་གི་བྱིན་གྱིས་བརླབས་ནས་བསྟན་བཅོས་བརྩམ་པར་རྗེས་སུ་གནང་བ་སྟེ་ཞལ་མཐོང་གཉིས་པའོ། །དེ་ནས་ཟླ་ཤས་སོང་ཙ་ན། ཀུན་མཁྱེན་བླ་མ་ཉིད་པཎྜི་ཏའི་ཆ་བྱད་སྣུམ་བག་དང་ལྡན་ཞིང་། ཤིན་ཏུ་གཞོན་ཤ་ཆགས་པ་དགུང་ལོ་ཉི་ཤུ་རྩ་གྲངས་ཀྱི་སྐུ་ན་ཅན། དབུ་ལ་པཎ་ཞྭ་རྣ་རིང་བཞེས་པ་ཞིག་དང་མཇལ་ཏེ། རྡོ་རྗེ་ཕུང་པོའི་དཀྱིལ་འཁོར་རྨད་དུ་བྱུང་བའི་རྟ་བབ་གོང་མ་གཉིས་ཀྱི་འཕྱང་འཕྲུལ་ལ་བརྟེན། ལྷུན་གྲུབ་རིགས་ལྔ་ཡབ་ཡུམ་ཟུང་དུ་འཇུག་པའི་བརྡས། འོད་གསལ་དག་པ་རབ་འབྱམས་ཀྱི་དབང་བསྐུར་ནས། ཅི་ཡང་མི་གསུང་པར་ཤིན་ཏུ་དགྱེས་པ་ཆེན་པོའི་ཞལ་འཛུམ་མུ་ལེ་བའི་ངང་ལ། དག་ཆེན་ཡེ་ཤེས་ཀྱི་སྣང་ཆ་དབྱིངས་སུ་ཐིམ་པ་ནི་ཐུགས་ཀྱི་བྱིན་གྱིས་བརླབས་ནས་དོན་རྒྱུད་རྟོགས་པའི་བདག་པོར་རྗེས་སུ་གནང་སྟེ་ཞལ་མཐོང་གསུམ་པའོ། །དེའི་ཚེ་ཕྱི་ཡུལ་གྱི་སྣང་བ་གཏད་མེད་དུ་གྲོལ་ཏེ་མཉམ་བཞག་གི་དགོངས་པ་ལ་ཕྱོགས་ལྷུང་གི་རིས་མེད། ནང་འཛིན་པའི་འདུ་ཤེས་ལ་རྩིས་གདབ་ཀྱི་རིས་མེད་པས་རང་གྲོལ་ཕྱོགས་ཡན་དུ་སངས། རྗེས་ཐོབ་ཤེས་པའི་སྣང་ཆར་དགའ་བ་དང་སྐྱོ་བའི་ཡིད་ཀྱིས་དུས་འདས་ཏེ། དད་པ་དང་གདུང་ཤུགས་དྲག་པོའི་རྐྱེན་གྱིས་བསྟོད་པ་དཔྱིད་ཀྱི་རྒྱལ་མོའི་རྒྱང་གླུ་ཞེས་བྱ་བ་དེ་ཡང་བརྩམས། ཞེས་སོགས་གསུངས་པ་ལྟར་ཀུན་མཁྱེན་དངོས་ལས་འོད་གསལ་གསང་བ་སྙིང་ཐིག་གི་རྒྱུད་ལུང་མན་ངག་གི་གནད་འཕྱུགས་པ་མེད་པ་ཕ་ཕོག་ཏུ་ཐོབ་པས་ཐུགས་ཁེངས་པའི་གསུང་བྱོན་པ། དེའི་ཕྱིར་ཆོས་ཀྱི་བརྒྱུད་པ་གང་ཞེ་ན། ཁོ་བོའི་གཙུག་ན་དྲི་མེད་འོད་ཟེར་བཞུགས། །བརྒྱུད་པ་ཐག་ཧྲུལ་བྲེང་ཧྲུལ་ལ་མི་ལྟོས། །ཞེས་གསུངས་པ་ལྟར་ལགས་ཀྱང་ཐུན་མོང་བའི་སྣང་ངོར་རྒྱ་བོད་ངེས་པའི་མན་ངག་སྙན་བརྒྱུད་ཀྱི་ཆུ་བོ་བར་མི་ཆད་པའི་ཕྱིར་གསན་ཡིག་ཉི་ཟླའི་རྣ་ཆར་གསལ་བ་ལྟར་གྲུབ་དབང་ཤྲཱི་ན་ཐ་དང་། ཐང་འབྲོག་པདྨ་རིག་འཛིན། མོན་པ་བླ་མ་ཀུན་བཟང་སོགས་ལས་རྒྱུད་བཅུ་བདུན། སྙིང་ཐིག་ཡ་བཞི་དང་། ངལ་གསོ་སྐོར་གསུམ། མཛོད་ཆེན་བདུན་བཅས་ཀྱི་ཚིག་དོན་མཐར་ཆགས་སུ་གསན། ཀུན་མཁྱེན་ཆེན་པོས་བསྐུལ་ཞིང་དབྱིངས་ཀྱི་གཙོ་མོས་བརྡ་འགྲོལ་གྱིས་སྐབས་དབྱེ་ནས་ས་ཕོ་སྤྲེལ་ལོ་སྤྲེལ་ཟླའི་ཚེས་བཅུའི་ཚོགས་འཁོར་ཆེན་མོའི་ཆོ་གའི་སྤྱན་འདྲེན་སྐབས། དཔལ་ཨོ་རྒྱན་གྱི་སློབ་དཔོན་ཡབ་ཡུམ་དཔའ་བོ་མཁའ་འགྲོ་ཏིལ་གྱི་གོང་བུ་ལྟར་འཁྲིགས་པའི་ཀློང་ནས་སྐུ་རྡོ་རྗེའི་གར་སྟབས་ལིང་ངེར་མངོན་སུམ་དབང་པོའི་སྤྱོད་ཡུལ་དུ་གྱུར་པས། མོས་གུས་བརྒྱལ་བ་ཙམ་གྱིས་རིག་སྟོང་མི་ཤིགས་པའི་དབྱིངས་སུ་འབྱམས་ཀླས་པ་ན། ལྷོ་རྒྱུད་སྤྲུལ་པའི་སྐུ་རྣམ་པ་གསུམ་སོགས་ཀྱིས་ད་ལན་ཐུགས་གཏེར་ཆེན་མོ་གཏན་ལ་འབེབས་པར་བསྐུལ་བ་རྟེན་འབྲེལ་དུས་ལ་བབ་པར་གཟིགས་ཏེ། ཆོས་ཀྱི་མཚན་ལ་ཀློང་ཆེན་སྙིང་གི་ཐིག་ལེ་ཞེས་གསོལ་ཏེ་ཐོག་མར་ཕྱི་སྒྲུབ་བླ་མའི་རྣམ་འབྱོར་གཏན་ལ་ཕབ་པས་སིདྡྷི་དུང་ཕྱུར་སོགས་ཁས་ལེན་བྱེད་མཁན་མང་དུ་བྱུང་བས་འབྲེལ་ཚད་དོན་ལྡན་གྱི་རྟེན་འབྲེལ་འགྲིགས། དེ་ནས་རིམ་བཞིན་ཡི་དམ་རྩ་བ་གསུམ་དང་། བླ་རྫོགས་ཐུགས་གསུམ་གྱི་སྐོར་རྣམས་ཕབ་པས་སྙིང་ཐིག་རྩ་པོད་གཉིས་དང་། ཁྱད་པར་མདོ་སྔགས་གཉིས་ཀའི་དགོངས་པའི་གསལ་བྱེད་ཡོན་ཏན་མཛོད་རྩ་འགྲེལ། ཁྲིད་ཡིག་ཡེ་ཤེས་བླ་མ་སྔོན་འགྲོ་རྒྱབ་ཆོས་དང་བཅས་པ། སྒོམ་ཕྱོགས་དྲིས་ལན། དྲིས་ལན་ལུང་རིགས་གཏེར་མཛོད། དགོངས་འདུས་རྣམ་བཤད་ཆེན་མོ། བསྟོད་ཚོགས། གཏམ་ཚོགས་སོགས་འཆོས་སྐྱོབ་ཡོན་ཏན་གཉིས་ལྡན་གྱི་བསྟན་བཅོས་སྣ་ཚོགས་པོད་ཆེན་དགུར་ལོངས་པ་སྙིང་པོའི་བསྟན་པའི་བཙས་སུ་བསྐྲུན། ཕྱི་ནང་གསང་བའི་རྟེན་འབྲེལ་གྱི་ལེགས་ཚོགས་གཅིག་ཏུ་འཛོམས་པས་ཚེ་རིང་ལྗོངས་བྱང་ཆུབ་ལྗོན་པའི་ཚལ་དུ་ཕེབས་ནས་ས་གཞི་བྱིན་གྱིས་བརླབས་ཏེ་གནས་གཞི་ཀ་བ་ཉི་ཤུའི་རྒྱ་ཁྱོན་ཅན་ལེགས་པར་འགྲུབ་པར་མཛད་རྗེས་ལོ་གསུམ་ལ་སྒྲུབ་པ་མཛད་ནས་བཞུགས། དེ་རྗེས་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་དང་། གཡོ་རུ་ཁྲ་འབྲུག་གི་གཙུག་ལག་ཆེན་མོ། པདྨ་འོད་གླིང་། མཆིམས་ཕུ་རི་མོ་ཅན་སོགས་ཆོས་སྡེ་གནས་ཆེན་ཁག་རྣམས་སུ་ཕེབས་ཏེ་རྟེན་བཞེངས་ཚོགས་བསགས་ཀྱི་མཆོད་སྤྲིན་རྒྱ་ཆེན་པོ་སྤྲོས་ཤིང་སྒྲུབ་པ་ལ་ཅི་རིགས་བཞུགས་པ་དང་། རིམ་གྱིས་དོན་མཁར་ཚེ་རིང་ལྗོངས་སུ་གདན་སའི་གཏན་ཆགས་མཛད་ནས་རང་གཏེར་སྙིང་ཐིག་དང་། ཀུན་མཁྱེན་ཆེན་པོའི་གསུང་རབ་རྣམས་ཀྱི་གཙོས་ཆོས་འཁོར་དཔག་མེད་བསྐོར་བས། མཁས་དང་གྲུབ་པའི་ཁྱུ་མཆོག་ཐམས་ཅད་ཡིད་དབང་མེད་དུ་འཕྲོག་པས་བུང་བ་མེ་ཏོག་གི་ཚལ་ལ་འདུ་བ་བཞིན་སྟོད་ལྷོ་འབྲུག་ནས། སྨད་མདོ་ཁམས་ཀཿརྫོགས་ཡན་གྱི་སློབ་ཚོགས་ནམ་མཁའི་སྐར་ཚོགས་ལྟར་བྱོན་ནས་འོད་གསལ་སྙིང་པོའི་བསྟན་པ་ཉི་མ་ཤར་བ་ལྟར་གསལ་བར་མཛད། ཤིང་སྦྲུལ་ལོར་དཔལ་ས་སྐྱ་གོང་མ་རིན་པོ་ཆེ་མཆོག་གིས་མགྲོན་གཉེར་ཆེད་བཏོང་གི་གདན་ཞུས་ལྟར་ཕེབས་ནས་བཀའ་གཏེར་གྱི་དབང་ཁྲིད་གདམས་ཟབ་དུ་མ་བསྩལ་ཏེ་གདན་སར་ཕྱིར་ཕེབས། དེ་སྐབས་ཙམ་ན་རྫོགས་ཆེན་གསུམ་པ་ངེས་དོན་བསྟན་འཛིན་བཟང་པོ་མཆོག་གིས་རྡོ་གྲུབ་རིན་པོ་ཆེ་འཇིགས་མེད་ཕྲིན་ལས་འོད་ཟེར་དཔོན་གཡོག་ལྔ་བླ་མཆན་པའི་ཚུལ་དུ་གསུང་བྲིས་བཅས་ཀུན་མཁྱེན་བླ་མ་རུ་དམ་ཆོས་སྡེར་གདན་ཞུས་སུ་བཏང་བ་དང་། དེ་མཚུངས་སྡེ་དགེའི་རྒྱལ་ཁབ་ནས་ཀྱང་བློན་པོ་གཤེན་རབ་སྟག་རྒྱལ་དཔོན་གཡོག་སྡེ་དགེའི་རྒྱལ་སར་གདན་འདྲེན་ལ་འབྱོར་ཞིང་ནན་ཞུས་བྱས་ཀྱང་དགུང་ལོ་མཐོན་པོར་ཕེབས་རྐྱེན་གསུང་བྲིས་ཕྱག་རྟེན་རྩ་ཆེན་གྱི་གནང་སྐྱེས་བཅས་ཕྱིར་བཟློག །རྡོ་གྲུབ་རིན་པོ་ཆེ་ཐུན་མིན་ཆོས་བདག་སློབ་བུར་ངོས་འཛིན་གནང་ནས་དབང་ཁྲིད་གདམས་ཟབ་ཀུན་ལྷག་མེད་བསྩལ་ཏེ་རྗེས་འཛིན་མཛད། གཞན་ཡང་སྐུ་ཚེའི་སྨད་དུ་ཁམས་ཕྱོགས་ནས་གྲུབ་དབང་རྫོགས་ཆེན་པ་འཇིགས་མེད་བློ་གསལ་དང་། འཇིགས་མེད་ངོ་མཚར་རྒྱ་མཚོ། འཇིགས་མེད་རྒྱལ་བའི་མྱུ་གུ། རྒྱ་རོང་སྐུ་སྐྱེ། སྡེ་དགེའི་མཆོད་དཔོན་སངས་རྒྱས་བཟང་པོ། ཀཿཐོག་པ་དགེ་རྩེ་སྤྲུལ་སྐུ་དང་། ཕྱག་ཚ་སྤྲུལ་སྐུ་རྣམ་གཉིས་སོགས་སྐྱེས་ཆེན་དང་སྒྲུབ་བརྩོན་བརྒྱ་ཕྲག་དུ་མ་རིམ་པར་ཞབས་བཅར་བྱུང་བ་ཀུན་ལ་དབང་ཁྲིད་ཟབ་ཆོས་ཀྱིས་རྗེས་བཟུང་དབུགས་དབྱུང་གནང་། སྐུ་ཚེ་གང་པོར་སྟོད་སྨད་ཀྱི་ཆོས་སྡེ་ཁག་ལ་མཆོད་འབུལ་མང་ཇ་སོགས་ཚོགས་བསགས་ཀྱི་སྒོ་རྒྱ་ཆེར་སྤེལ་བ་དང་སྐུ་གསུང་ཐུགས་རྟེན་གསར་བཞེངས་ཞིག་གསོ་རྒྱ་ཆེར་མཛད་པ་སོགས་བསྟན་འགྲོའི་ཕན་བདེ་འབའ་ཞིག་བསྒྲུབས་པ་གྲངས་ཀྱིས་མི་ལང་སྟེ། དཔལ་རིར་མདོའི་སྒྲུབ་མཆོད་གསར་འཛུགས། བྱང་ཐེག་ཆེན་གླིང་དུ་ཞི་ཁྲོ། ཆོས་འཁོར་རྣམ་གསུམ་ལ་ཁྲི་མཆོད། བསམ་ཡས་བྱང་ཆུབ་ཆེན་མོ་ལ་གསེར་འཁོར། གསེར་དངུལ་གྱིས་རྒྱུད་འབུམ་རིན་པོ་ཆེ་བཞེངས་པ་སོགས་དང་། འཆི་ངེས་ཀྱི་སེམས་ཅན་མང་པོ་སྲོག་བླུ་མཛད་པ་སོགས་དགེ་རྩ་མཐའ་ཡས་པ་བསྐྲུན། སྡེ་དགེའི་ཆོས་རྒྱལ་ཡུམ་སྲས་ལ་བཀས་བསྐུལ་ཏེ་སྔ་འགྱུར་རྒྱུད་འབུམ་རིན་པོ་ཆེ་པར་དུ་འཁོད་ནས་དཔེ་རྒྱུན་མ་ཆད་པ་འདི་གཅིག་པུའི་བཀའ་དྲིན་ཀྱང་གཞལ་བ་ལས་འདས་པ་སྨོས་མ་དགོས། རྗེ་ཉིད་སྐུ་ཚེ་གང་པོར་བྱ་བྲལ་གུ་ཡངས་ཀྱི་རྣམ་པས་སྔགས་དཀར་དཀྱུས་མའི་སྤྱོད་པ་བསྐྱངས་པ་ལས་ཆེ་ཐབས་ཆོས་བརྒྱད་ཀྱི་བྱ་བ་ལ་ཐུགས་མི་དགྱེས་ཚུལ། གསུང་ལས། རས་དཀར་གྱི་གུར་ཆུང་འཁོར་བ་ཡི་འཇིགས་སྐྱོབ། །སྲ་མཁྲེགས་ཀྱི་རྡོ་གདན་འགྱུར་མེད་ཀྱི་གདེང་ཆེན། །ཞེས་དང་། རི་ཆོས་ལས། ཕྱི་ནང་གི་བདག་འཛིན་སྤངས་ནས་མཛོད་རྒྱབ་ཁུར་གཅིག་ལས་མེད་ཅེས་གསུངས་པ་ལྟ་བུའི་མཛད་པ་ཁོ་ན་བསྐྱངས། དགུང་ལོ་བདུན་ཅུ་པར་སྐུའི་འདུ་བྱེད་ཤིན་ཏུ་འཁྲུགས་པས་བདུན་ཕྲག་གཅིག་ཙམ་གྱི་བར་ཞིང་ཁམས་འཕོ་ཉེར་བྱུང་བའི་ཚུལ་གྱིས་སྐུ་ཚེའི་འདུ་བྱེད་བཏང་ཡང་འཚོ་བའི་འདུ་བྱེད་དུ་བྱིན་གྱིས་བརླབས་པས་བསྙུན་གཞི་མེད་པ་ལྟར་བྱུང་། སྐུའི་རིམ་གྲོ་གནང་བ་སོགས་གཞི་བྱེས་ཀྱི་དད་མོས་ཅན་དག་གིས་གསོལ་བ་ནན་ཆེར་བཏབ་པ་ན། ཞལ་ནས་ལར་སྐྱེས་མཐའ་འཆི་བ་ཆོས་ཉིད་ཡིན། ངེད་ནི་བྱ་བ་ཐམས་ཅད་འགྲུབ་པ་ཞིག་ཡིན་པས་ཤི་ཡང་བློ་བདེ། དེ་བས་འཆི་ཁར་ལག་སྟོང་དུ་འགྲོ་བ་ཚོ་སྙིང་རེ་རྗེ། འོན་ཀྱང་ཁྱོད་རྣམས་བློ་མི་བདེ་ན་སྨན་བཅོས་བྱ་ཆོག སྐུ་རིམ་འདི་དང་འདི་སོགས་གྱིས་ཞེས་ཞལ་སློབ་རྣམས་སྡུག་བསྔལ་གྱིས་ནོན་པའི་སྣང་བ་བྲིད་པའི་ཞལ་བཞེས་ཙམ་མཛད། སྐབས་རེར་གསུངས་འཕྲོས་སུ་བླ་མ་ཞི་བར་གཤེགས་དུས་སྐུ་གདུང་རིལ་པོར་བཞག་ན་ཚྭ་བསྡམ་བྱེད་ལུགས་དང་། མཆོད་བསྔོ་བརྡ་མཚོན་རེ་འབུལ་ན་འདི་དང་འདི་ཞེས་དཔེར་བརྗོད་ཀྱི་ཚུལ་དུ་གནང་བ་བཅས་ཞིང་ཁམས་གཞན་དུ་དགོངས་པ་གཏད་པའི་གསུང་གི་རིགས་རིམ་པར་ཕེབས། དེ་ནས་སྤྱི་ལོ་༡༧༩༨པ་བོད་རབ་བྱུང་བཅུ་གསུམ་པའི་ས་རྟ་དབྱུ་གུ་ཟླ་བའི་ཚེས་གསུམ་གྱི་མཚན་མོའི་ཐུན་དང་པོ་ལ་བབ་པ་ན་དྲང་སྲོང་ཙོག་པུའི་བཞུགས་སྟངས་མཛད་དེ་མཆོད་པ་ཤོམས་ཤིག་ཅེས་བཀའ་བསྩལ་ནས་རེ་ཞིག་གདོད་མའི་གཞི་དབྱིངས་སུ་སྤྲོས་པ་ཉེ་བར་བསྡུ་བར་མཛད་ཅིང་། ཆོས་ཀྱི་སྐུ་མངོན་དུ་མཛད་པའི་རྟགས་སུ་ནམ་མཁའ་གཡའ་དག་པའི་ངོགས་སེར་བུ་ཙམ་ཡང་ལྡང་བ་མེད་པར་མེ་ཏོག་གི་ཆར་ཆལ་ཆིལ་དུ་བབ་པ་སོགས་ངོ་མཚར་གྱི་བཀོད་པ་མཐའ་ཡས་པ་བྱུང་། སླར་མཆོག་གི་སྤྲུལ་བའི་སྐུ་རྣམ་པ་ལྔ་བྱོན་པ་ལས། སྐུའི་སྤྲུལ་པ་འཇམ་དབྱངས་མཁྱེན་བརྩེའི་དབང་པོ། གསུང་སྤྲུལ་དཔལ་སྤྲུལ་སེམས་དཔའ་ཆེན་པོ། ཐུགས་ཀྱི་སྤྲུལ་པ་མཁྱེན་བརྩེ་ཡེ་ཤེས་རྡོ་རྗེ། ཡོན་ཏན་གྱི་སྤྲུལ་པ་མི་འགྱུར་ནམ་མཁའི་རྡོ་རྗེ། ཕྲིན་ལས་ཀྱི་སྤྲུལ་པ་རྒྱལ་སྲས་གཞན་ཕན་མཐའ་ཡས་རྣམས་བྱོན་པར་གྲགས་ཤིང་དེ་དག་རེ་རེའི་སྐུ་གསུང་ཐུགས་ཀྱི་ཆེ་བའི་ཡོན་ཏན་ཀྱང་བརྗོད་ཀྱིས་མི་ལང་ཞིང་སྔ་འགྱུར་གྱི་བསྟན་པ་ཕྱོགས་བཅུར་ཁྱབ་པར་མཛད། གསུང་གི་བདུད་རྩིས་བསྐྱངས་པའི་སློབ་ཚོགས་ཀྱང་དུས་དེའི་བོད་ཁམས་སྤྱིའི་ཆེ་རྒུ་ཐམས་ཅད་ཀྱིས་ཞབས་ལ་མ་གཏུགས་པ་མེད་པ་སྟེ། གཙོ་བོ་ས་སྐྱའི་བདག་ཆེན། དགའ་ལྡན་ཤར་རྩེ་བྱང་རྩེ། སྡེ་དགེ་ཆོས་རྒྱལ་ཡུམ་སྲས་སོགས་དང་། ཁྱད་པར་རྟོགས་པ་དོན་བརྒྱུད་ཀྱི་བསྟན་པ་འཛིན་པའི་ཐུགས་སྲས་ཁམས་པ་འཇིགས་མེད་རྣམ་བཞི་ཞེས། རྡོ་གྲུབ་འཇིགས་མེད་ཕྲིན་ལས་འོད་ཟེར། མཚམས་པ་བླ་མ་འཇིགས་མེད་རྒྱལ་བའི་མྱུ་གུ། འབར་ཆུང་འཇིགས་མེད་གོ་ཆ། དགེ་རྩེ་བླ་མ་འཇིགས་མེད་ངོ་མཚར་རྒྱ་མཚོ་རྣམས་བྱོན་ཞིང་རེ་རེ་ལའང་སློབ་ཚོགས་བརྒྱུད་འཛིན་མཐའ་ཡས་པ་བྱོན་ཏེ་སྙིང་པོའི་བསྟན་པ་འཛིན་མའི་ཁྱོན་ཀུན་ཁྱབ་ཚུལ་འོག་ཏུ་རྒྱ་ཆེར་འབྱུང་ངོ་། །