བསྟོད་ཚོགས་ཕྱོགས་བསྡུས།
ཆོས་ཉིད་བཟོད་པའི་སྣང་བ་ཆེ། །ཤིན་ཏུ་ཡུན་རིང་བསྟན་བྱས་པས། །ཟབ་མོའི་ཆོས་རྣམས་ཀུན་གྱི་གཤིས། །སྟོན་པ་ཟླ་མེད་དེ་ལ་འདུད། །སྲིད་ན་རྣམ་པར་ཀུན་མཁྱེན་པའི། །གྲགས་པ་ཙམ་ལ་ངལ་འཚོ་བ། །རྣམ་དོར་ལ་སོགས་ཆེས་མང་ཡང༌། །ཉེས་ཀུན་རྩ་བ་བཟློག་ནུས་མིན། ཁྱོད་
ཀྱི་སྲིད་པའི་རྒུད་མང་པོ། །ལས་ཀྱི་རྒྱུ་ལས་གྱུར་མཁྱེན་ནས། །འདུ་བྱེད་རྩ་བ་མ་རིག་པ། །རྨིང་ནས་འདོན་པའི་ཐབས་འདི་བསྟན། །འདི་ན་འཇིག་རྟེན་རྒྱང་འཕེན་སོགས། །སྲིད་པའི་རྩེ་མོའི་ཉེས་ཚོགས་ལས། །ངེས་འབྱུང་ཐབས་ལ་རྣམ་རྨོངས་ཤིང༌། །སྲིད་པའི་སྙོམས་འཇུག་ཙམ་ཞིག་འཛིན། ཁྱོད་ཀྱིས་མ་རིག་དྲུང་འབྱིན་པ། །རྟེན་འབྱུང་སྟོན་པ་སེང་གེའི་སྒྲས། །ཆོས་ཀྱི་རང་བཞིན་ཇི་ལྟ་བ། །སེམས་ཅན་ཁམས་ལ་སྣང་བར་མཛད། །སྲིད་རྩ་ལས་དང་ལུས་ཡིན་ཞེས། །དཀའ་ཐུབ་དག་གིས་གདུངས་བྱེད་པ། །དེ་དག་བཙོ་བླག་མཁན་བཞིན་དུ། ཁམས་གསུམ་ཉིད་ལས་ཡོངས་མི་འདའ། ཁྱོད་ཀྱིས་གདུངས་བས་མ་གཟིར་བཞིན། །བདག་མེད་རྟོགས་པ་ཟབ་མོའི་བློ། །འདི་ཉིད་གཅིག་པུས་ཁམས་གསུམ་གྱི། །རྒྱུ་བ་བདེ་བླག་ཉིད་དུ་གཅད། །འདོད་ཉོན་བྲལ་ལ་ཐར་པ་ཞེས། །བསམ་གཏན་ཙམ་ཞིག་བསྟན་བྱེད་པ། །དེ་དག་ས་བོན་མ་སྤངས་ཕྱིར། །འདོད་ཉོན་ལག་པའི་དྲེགས་ལྟར་སྐྱེ། ཁྱོད་ཀྱིས་ཉེས་ཀུན་འབྱུང་བའི་
གཞི། །བདག་ལྟ་ཆ་དང་བཅས་ལྡོག་པའི། །ལམ་འདི་བསྟན་ནས་ཀུན་ཉོན་མོངས། །སྐྱེ་བའི་གཞི་ཉིད་ཞི་བར་མཛད། །མདོར་ན་སྨྲ་བ་ཟླ་མེད་པ། ཁྱོད་ཀྱིས་སེམས་ཅན་ཁམས་སྨིན་ཕྱིར། །སྟོང་དང་རྟེན་འབྱུང་ཟུང་འཇུག་ཏུ། །བསྟན་གང་སྟོན་པ་གཞན་ལ་མེད། །སྐྱེ་བོ་མཛངས་པ་མིན་བློ་ཅན། །སྟོང་པས་སྣང་ཙམ་ཉིད་འཇིག་ཅིང༌། །རྟེན་འབྱུང་ཉིད་ཕྱིར་མི་སྟོང་ཞེས། །འགལ་བར་འཁྲུལ་ནས་སྒྲོ་སྐུར་འདོགས། ཁྱོད་ཀྱིས་ཇི་སྙེད་ཆོས་རྣམས་ཀུན། །འགྲོ་དང་འོང་མེད་མཚན་མ་བྲལ། །རང་བཞིན་གདོད་ནས་མ་སྐྱེས་ཞེས། །སྟོང་པའི་ཚུལ་འདི་བསྟན་ནས་སླར། །སྒྱུ་མ་འཕྲུལ་འདྲའི་ཆོས་འདི་དག་མ་བརྟགས་ཉམས་དགའི་སྣང་བ་སྟེ། །རྟེན་ནས་འབྱུང་བ་ཉིད་ཡིན་ཞེས། །ཐ་སྙད་གཏམ་གྱི་རོལ་མོར་འདོམས། །རྟེན་ཅིང་འབྲེལ་འབྱུང་ཉིད་ལོག་ན། །དུ་མའམ་གཅིག་ཏུ་གྲུབ་པར་འགྱུར། །དུ་མ་གཅིག་ཉིད་བསགས་པ་སྟེ། །གཅིག་བསགས་མིན་པའི་དུ་མ་མེད། །གལ་ཏེ་ཆོས་འདི་གཅིག་ཉིད་ན། །མིན་ལས་ལོག་དང་ཡིན་མ་ལོག་ཆ་ཤས་འདི་དག་མི་འགྲུབ་སྟེ། །ངོ་བོ་ཉིད་ཀྱི་གཅིག་ཕྱིར་རོ། །དེ་སླད་ཁྱོད་ཀྱིས་ཤེས་བྱ་ཀུན། །བློ་ཡིས་བཞག་པ་མ་གཏོགས་པ། །འགའ་ཡང་ཡོད་པ་མ་ཡིན་ཞེས། །སྨྲ་བ་སྐྱོན་མེད་
འདི་བསྟན་གྱུར། །བརྟེན་ནས་བཏགས་ལ་རང་བཞིན་གྱིས། །གྲུབ་པ་ནམ་ཡང་མ་མཆིས་ཞིང༌། །སྟོང་བཞིན་སྣང་བ་འདི་སྣང་ཞེས། །དོན་འདི་དོན་གཟིགས་མཆོག་ཁྱོད་གསུངས། །སྣང་བ་མེད་ཅིང་སྟོང་མ་མཆིས། །རྟག་མིན་ཆད་པ་མ་ཡིན་པའི། །ཆོས་ཉིད་འདི་ལ་ཁྱོད་བཞུགས་ནས། །སྣང་དང་སྟོང་པའི་ཐ་སྙད་འདོགས། ཁྱོད་ཀྱིས་ཇི་སྙེད་བསྟན་པའི་ཆོས། །ཆོས་ཉིད་གཅིག་ལ་འབབ་ཅིང་གཞོལ། །དེ་ཕྱིར་ཁྱོད་ཀྱིས་ཐེག་པ་གསུམ། །བསྟན་པ་མཐར་ཐུག་དོན་དུ་གཅིག་ཉན་ཐོས་རང་སངས་རྒྱས་རྣམས་ལ། །སྟོང་ཉིད་སེང་གེའི་སྒྲ་བསྒྲགས་པ། ཁམས་གསུམ་རྒྱུ་བ་ཟད་ཕྱིར་ཏེ། །རེ་ཞིག་ཐེག་པ་གཉིས་སུ་བསྟན། །བློ་མཆོག་སྙིང་རྗེ་ཆེ་ལྡན་ལ། །ཟབ་པའི་ཆོས་ཉིད་གང་བསྟན་པ། །བྱང་ཆུབ་མཆོག་ལ་འཇོག་ཕྱིར་ཏེ། །ཐབས་ཀྱིས་ཁྱད་པར་བྱས་པ་ལགས། །ཇི་ལྟར་མགར་བ་བདག་གིས་གསེར། །བཞུ་བཏུལ་ཤུགས་དྲག་ཤུགས་དྲག་མིན། ཁྱད་པར་འདི་ལས་གསེར་གྱི་མདངས། །དག་དང་མ་དག་ཁྱད་པར་སྣང༌། །དེ་བཞིན་སློབ་མ་བསེ་རུའི་ལམ། །ཐེག་པ་ཆེ་དང་མི་མཚུངས་པ། །ཕ་རོལ་ཕྱིན་པའི་སྒོ་མང་པོ། །རྣམ་པར་བསྟན་པས་ཁྱད་པར་བྱས། །དེ་ལྟར་ཁྱོད་ཀྱིས་སེམས་ཅན་ཁམས། །སྣ་ཚོགས་
ཆོས་རྣམས་སྣ་ཚོགས་ཀྱིས། །གདུལ་བའི་ཆོ་འཕྲུལ་འཛད་མེད་ཀྱང༌། །ཆོས་ཉིད་འཁྲུགས་པར་བྱས་པ་མེད། ཁྱོད་ཀྱིས་ཆོས་རྣམས་མ་བཤིགས་ཤིང༌། ཁྱོད་ཀྱིས་ཁམས་རྣམས་བསྐྱེད་པའང་མེད། །དེ་ལྟ་མོད་ཀྱི་ཆོས་ཉིད་གཤིས། །བྲི་གང་མེད་འདི་ཁྱོད་ཀྱིས་བསྟན། །དོན་ཟབ་སེང་གེའི་སྒྲ་འདི་ཡིས། །མ་རིག་རྒྱུ་བ་འགོག་མཛད་དེ། །དེ་བཀག་པས་ནི་སྐྱེ་འཆིའི་སྒོ། །ཀུན་ལའང་འགོག་པ་ཐོབ་པ་ལགས། །ཆོས་ཀུན་རང་བཞིན་ཟད་བསྟན་ནས། །འཛད་མེད་སྲིད་པའི་སྣང་བ་འདི། །མི་ཟད་ཚུལ་གྱིས་ཟད་མཛད་པ། །སྟོན་མཆོག་ཁྱོད་ཀྱི་ཐབས་མཁས་སྒོ། །སྐྱེ་ཉིད་རྒ་ཤིར་འཕོས་མིན་ཞིང༌། །རྒ་ཤི་སྐྱེ་ལས་མ་བྱུང་མིན། །སྐྱེ་ཤི་རྐྱེན་ཉིད་འདི་བ་ཞེས། །སྐྱེ་ཤིའི་རྩ་བ་འགོག་ཕྱིར་བསྟན། །མདོར་ན་སྟོན་པ་ཀུན་མཁྱེན་ཞབས། །སྟོན་པའི་ནང་ན་ཟླ་མེད་ཅིང༌། །སྨྲ་བ་ཀུན་ལས་ཁྱུ་མཆོག་ཏུ། །རིགས་པ་མཁྱེན་པ་རྣམས་ལ་གྲུབ། །དེ་རྗེས་འབྲངས་ནས་མི་མཁས་པ། །བདག་འདྲའནག་མཁས་པ་ལྟར་བཅོས་ཏེ། །བསྟོད་ཚིག་མེ་ཏོག་དོག་པ་འདིས། །འདྲེན་པ་མཆོག་ལ་ཕུ་དུད་བྱས། །དགེ་ཚོགས་ཡིད་བཞིན་སྤྲིན་དཀར་ལས། །དགེ་ལེགས་ཆར་ཆེན་འབུམ་བསྙིལ་ནས། །དགེ་ཞིང་དགེ་བའི་བཀྲ་ཤིས་ཀྱིས། །
ས་གསུམ་རྟག་ཏུ་གདལ་གྱུར་ཅིག་ཅེས་པའང་གཞོན་ནུ་འཇིགས་མེད་པས་རང་ལོ་བཅུ་དགུ་པ་ཆུ་ལུག་གི་ལོ་ཧོར་ཟླ་གསུམ་པའི་ཚེས་བཅུའི་ཉིན་གུང་སྐད་ཅིག་ཡུད་ཙམ་ལ་སྨྱོ་གཏམ་བྱས་པ་དགེ་བར་གྱུར་ཅིག ༈ །དཔལ་་སེང་གེ་ལ་ཕྱག་འཚལ་ལོ། །གྲངས་མེད་བསྐལ་པའི་ནོར་འཛིན་ཡངས་པ་རུ། །དཔག་མེད་ཚོགས་གཉིས་ས་བོན་ལེགས་བཏབ་པས། །ཚད་མེད་སྟོབས་བཅུའི་མྱུ་གུ་བསྐྱེད་བསྲིངས་པའི། །ཀུན་མཁྱེན་ཉི་མའི་གཉེན་ལ་ཕྱག་འཚལ་ལོ། །བསྐལ་མང་གོང་ནས་མངོན་པར་སངས་རྒྱས་ཀྱང༌། །རིས་བྲལ་འགྲོ་ལ་སྙིང་རྗེས་རབ་བསྐུལ་ཏེ། །ཞིང་འདིར་མཛད་པ་བཅུ་གཉིས་སྟོན་པ་པོ། །མགོན་པོ་་ཏོག་ལ་ཕྱག་འཚལ་ལོ། །རྣམ་མང་དགའ་བའི་འབྱུང་གནས་ལྷ་ཡུལ་ན། །རྒྱལ་སྲས་ས་བཅུའི་སེམས་དཔའ་ཕྱིན་དྲུག་སྤྱོད། །དམ་པ་ཏོག་དཀར་ཞེས་བྱའི་སྙན་པའི་རྔ། །སྲིད་གསུམ་འགྲོ་བའི་ཐོས་འཛིན་བཅུད་དུ་གསལ། །གང་ཚེ་སིལ་སྙན་སྒྲ་མིས་བསྐུལ་བའི་མོད། །དཀར་གསལ་ཟླ་བའི་མདངས་ཀྱི་རྗེས་འགྲོ་བའི། །གླང་པོ་མཆོག་ཏུ་དལ་བའི་ངང་ཚུལ་གྱིས། །སྒྱུ་འཕྲུལ་ལྷུམས་སུ་ཞུགས་ལ་ཕྱག་འཚལ་ལོ། །དབུགས་སྐྱེས་བཅུ་ཡི་གྲངས་སུ་བརྒལ་བའི་ཚེ། །སུམ་རྩེན་གནས་ལ་འགྲན་པའི་དགའ་ཚལ་དུ། །གླག་ཤའི་ཤིང་དྲུང་ངོ་མཚར་ལྟས་དང་
བཅས། །མཚན་དཔེའི་སྐུ་མཆོག་བལྟམས་ལ་ཕྱག་འཚལ་ལོ། །སྒྱུ་རྩལ་ས་སྲུང་དབང་པོར་སྟེགས་བཅས་ནས། ། མུ་ཅོར་སྨྲ་བའི་ད་ནུའི་བུའི། ཁེངས་དྲེགས་རུ་མཚོན་སྟོབས་ཆེན་སྤྲིན་སྐྱེས་ཀྱིས། །གཞོམ་བགྱིད་དོན་ཀུན་གྲུབ་ལ་ཕྱག་འཚལ་ལོ། །རིགས་བཟང་ཆུ་གཏེར་ལས་འོངས་ལང་ཚོའི་དལ། །མཛེས་སྡུག་རི་བོང་གཟུགས་ཀྱིས་འཁྱུད་གྱུར་པའི། །མིག་ཡངས་གཞོན་ནུའི་དབང་མོ་དྲུག་ཁྲིའི་འཁོར། །ས་བདག་ཞི་བའི་རྒྱན་གྱུར་དེར་ཕྱག་འཚལ། །འཁོར་བའི་གནས་རིས་དུག་ཅན་བུ་མོའི་ལྟོ། །སྡུག་བསྔལ་ཀུམྦྷི་ར་ཡིས་ཉེར་བཟུང་བའི། །ངང་ཚུལ་ཤེས་ནས་རྣམ་གྲོལ་གླིང་བཟང་དུ། །ཚུལ་ཁྲིམས་འགྲོས་ཀྱིས་ཆས་དེར་ཕྱག་འཚལ་ལོ། །དལ་འབབ་བདུད་རྩིའི་ཀླུང་གི་ཉེ་དྲུང་ན། །ཚངས་སྤྱོད་ལྔ་སྡེའི་འཁོར་དང་ཆབས་གཅིག་ཏུ། །མཁའ་ཁྱབ་ཏིང་ངེ་འཛིན་ལ་རབ་ཞུགས་ནས། །དཀའ་སྤྱད་ཁུར་དུ་བཟུང་ལ་ཕྱག་འཚལ་ལོ། །དེ་ཚེ་ཕྱོགས་བཅུའི་རྒྱལ་བ་ཐམས་ཅད་དང༌། །བློ་ལྡན་མཁར་ཉལ་ཚོགས་ཀྱིས་བསྐུལ་ཚིག་གིས། །དཀའ་ཐུབ་ཁོ་ནས་གྲོལ་བ་མེད་མཁྱེན་ནས། །བཅུད་ལྡན་བསོད་པར་དགྱེས་མཛད་དེར་ཕྱག་འཚལ། །བག་མེད་རྣམ་པར་སྤངས་པའི་སྤྱོད་ལམ་
དང༌། །ཞི་དུལ་ངང་ཚུལ་ལྡན་པའི་སློང་ཚིག་གིས། །བཀྲ་ཤིས་གཞོན་ནུའི་མཆོག་ལས་རྩ་བླངས་ཏེ། །གནས་ཀྱི་གཙོ་བོར་གཤེགས་དེར་ཕྱག་འཚལ་ལོ། །རྐང་འཐུང་དབང་པོའི་མཆོད་རྟེན་ལྗོན་པའི་དྲུང༌། །བདུད་འདུལ་ཏིང་འཛིན་འོད་སྟོང་བསྐྲུན་པའི་མཐུས། །ཡིད་བསྲུབ་དཔུང་བཅས་མཐུ་ནུས་ཀུ་མུ་ད། །ཀུན་ཏུ་ཟུམ་པར་མཛད་ལ་ཕྱག་འཚལ་ལོ། །ཞི་བའི་ཏིང་འཛིན་ཤེལ་དཀར་ཁྲིར་བཞུགས་ཏེ། །རྣམ་དྲུག་མངོན་པར་ཤེས་པའི་གོ་གྱོན་ནས། །འདོད་ཉོན་གཞན་རྒོལ་སྡེ་ཚོགས་གཞོམ་མཛད་པའི། །དཔའ་བོ་བློ་གྲོས་མཆོག་ལ་ཕྱག་འཚལ་ལོ། །དུས་ཀྱི་མཆོག་གྱུར་ཉིན་མོའི་སྒོ་ཡི་སྐབས། ཁྱོད་ཀྱི་བྱང་ཆུབ་ཆེན་པོ་བརྙེས་པའི་ཚེ། །འོད་སྲུང་བྱིན་ཡང་དགའ་བས་གར་བསྒྱུར་ཞིང༌། །འོད་སྣང་སྟོང་དུ་འགྱེད་ལ་ཕྱག་འཚལ་ལོ། །གཏི་མུག་ཀུན་ཁེབས་ཁྲོད་དུ་ཞུགས་གྱུར་ཅིང༌། །ཤེས་རབ་སྒྲ་འཛིན་ཤིན་ཏུ་ཉམས་གྱུར་པ། །འགྲོ་ལ་ཁྱོད་ཀྱི་ཐུགས་ནི་དབྱུང་གྱུར་ཏེ། །སྐྱོ་བའི་ངང་ཚུལ་སྟོན་དེར་ཕྱག་འཚལ་ལོ། །འཇིག་རྟེན་གསུམ་ན་གྲགས་པའི་ལྷ་དབང་ཟུང༌། །གྲོང་ཁྱེར་གསུམ་ན་དཀོན་པའི་སྐྱེས་དང་བཅས། །ལན་གྲངས་གསུམ་དུ་བསྐུལ་བ་དོན་ཡོད་ཕྱིར། །ཆོས་གསུང་
ཞལ་གྱིས་བཞེས་དེར་ཕྱག་འཚལ་ལོ། །བསོད་ནམས་བྱེ་བའི་འབྱུང་གནས་མཚན་དཔེའི་སྐུ། །དམར་སེར་ངུར་སྨྲིག་གསུམ་གྱིས་མཛེས་བྱས་ཏེ། །དགེ་ལེགས་སྟོང་གིས་ཉེར་བསྐྲུན་གྲོང་ཁྱེར་མཆོག་ཝ་ར་ཎ་སིར་གཤེགས་ལ་ཕྱག་འཚལ་ལོ། །བསམ་གྱིས་མི་ཁྱབ་ཚངས་པའི་དབྱངས་སྙན་ལས། །གདུལ་བྱའི་སྐལ་བར་འཚམས་པའི་ཆོས་འཁོར་གསུམ། །དྲང་ངེས་ལྡེམ་དགོངས་ཚུལ་གྱིས་ལེགས་བསྟན་ནས། །འགྲོ་ཀུན་ཐར་པར་འདྲེན་ལ་ཕྱག་འཚལ་ལོ། །རྟག་འཛིན་ལེ་ལོའི་ལྕགས་ཀྱུའི་དབང་བྱས་པའི། །སྐྱེ་བོའི་ཚོགས་ལ་སྙིང་རྗེས་མ་བཟོད་ནས། །སཱ་ལའི་འདབ་བསྐྱོད་དྲུང་དུ་གཟུགས་སྐུའི་དལ། །དབྱིངས་སུ་བསྡུ་བའི་ཚུལ་སྟོན་ལ་ཕྱག་འཚལ། །སྟོབས་བཅུའི་དབང་ཕྱུག་སྲིད་ཞིའི་མིག་གཅིག་པུ། །ཐུགས་རྗེའི་མངའ་བདག་རིས་བྲལ་འགྲོ་བའི་སྐྱབས། །སྟོན་མཆོག་བུ་རམ་ཤིང་པའི་ཡོན་ཏན་ཆར། །སྲིད་འདིར་འགྲན་ཟླས་དབེན་ལ་ཕྱག་འཚལ་ལོ། །དེ་ལྟར་བསྟོད་དབྱངས་ཚངས་པའི་རྒྱུད་མངས་ནི། དད་གསུམ་སོར་མོས་བསྐྱོད་པ་ལས་འོངས་པའི། །དགེ་ཚོགས་སྙན་པའི་སྒྲ་དབྱངས་མ་ལུས་པ། །འགྲོ་ཀུན་སངས་རྒྱས་ཐོབ་སླད་བསྔོ་བར་བགྱི། །བསྟན་པའི་
བདག་པོ་རྣམ་འདྲེན་བཞི་པའི་རྣམ་ཐར་དྲན་པའི་བསྟོད་པ་མིའམ་ཅི་རབ་དགའི་གླུ་ཕྲེང་ཞེས་བྱ་བ་འཇིགས་མེད་རབ་རྒྱས་ཀྱིས་བྲིས་གཞི་ཤོག་སྡེབ་འདིའི་གྲངས་ལྡན་བྱིན་ནས་དེར་གང་དྲན་ཞིག་བྲིས་ཤིག་ཅེས་བསྐུལ་བ་ལྟར་རྨོངས་བློའི་ཆུ་བུར་གྱི་སྦུབ་ན་ཤེས་གསུམ་རི་བོང་འཛིན་མངོན་པར་གབ་པའི་བྱིས་པ། འཇིགས་མེད་བསྟན་པའི་རྒྱལ་མཚན་ཞེས་བྱ་བའི་བླ་དྭགས་འཆང་བས་སོ། ༈ །ཡེ་ཤེས་སྒྱུ་མ་འབར་བའི་ཕྱག་རྒྱ་ཆེ། །རྗེས་ཆགས་སྙིང་རྗེ་ཆེན་པོའི་སྣང་བ་ཅན། །དམར་སེར་སྐུ་ཡི་བརྡ་ཐབས་འདིས་མཚོན་ཏེ། །སྣང་བ་གཅིག་གིས་ནམ་མཁའི་ཁྱོན་ཀུན་འགེང༌། །མཁྱེན་གཉིས་ཡེ་ཤེས་ཤིན་ཏུ་རྒྱ་ཆེན་པོ། །ཞི་བའི་དབྱིངས་སུ་གཡུང་དྲུང་སྐུར་བཞུགས་ཏེ། །དྭངས་མའི་གཟུགས་སྐུ་ངེས་དང་མ་ངེས་པའི། །སྒྱུ་འཕྲུལ་རོལ་མོས་སྲིད་པ་ཀུན་ཏུ་ཁྱབ། །བགྲེས་དང་མི་བགྲེས་མཚན་མ་བཏུལ་ཟིན་ཀྱང༌། །ལྷུན་གྲུབ་ཡེ་ཤེས་རྒྱུན་ཆད་མེད་མཚོན་ཕྱིར། །གཞོན་ནུའི་གཟུགས་སྐུ་རྟག་བརྟན་འགྱུར་མེད་ཆེས། །ནམ་མཁའ་ཇི་སྲིད་སྒྱུ་མའི་གར་གྱིས་རོལ། །ཡེ་ཤེས་རྡོ་རྗེ་གསང་བ་ཟབ་མོའི་སྲོག །འཆི་བདག་བདུད་ཀྱིས་རྒོལ་དུ་ག་ལ་ཞིག །འཆི་མེད་དབྱིངས་སུ་ཞི་བའི་ཆོས་ཉིད་ཅན། །རྟག་ཆེན་སྐུ་ནི་འགྲེས་རྒུད་ཀུན་དང་བྲལ། །སྒྲིབ་མེད་ཡེ་ཤེས་ཤིན་ཏུ་རྒྱ་ཆེན་པོ། །ཟབ་མོའི་དབྱིངས་སུ་རོ་
མཉམ་འུབ་ཆུབ་ཅིང༌། །རྒྱ་ཆེའི་ཆོས་ལ་གཟིགས་པ་རྣམ་དག་པ། །ཀུན་ཁྱབ་སྐུ་ནི་ཆོས་ཀུན་རྗེས་སུ་འགྲོ། །རྩོལ་དང་རྟོག་པའི་འཆིང་བ་ཉེར་ཞི་ཡང༌། །གང་འདུལ་གདུལ་བྱའི་མོས་ངོར་འཚམས་པའི་གཟུགས། །ཕྱོགས་དང་དུས་ཀྱི་རྗེས་སུ་སོང་གྱུར་པ། །ལྷུན་གྲུབ་སྐུ་ནི་དཔག་པར་དཀའ་བ་ཡིན། །སྲིད་དང་ཞི་བ་མི་དམིགས་མཉམ་པའི་དབྱིངས། །མཐའ་བྲལ་ཀློང་དུ་བཟོད་པའི་མཆོག་བརྙེས་ཤིང༌། །གཞོམ་གཞིག་སྤངས་པའི་ཁྱད་པར་མཆོག་གྲུབ་པ། །ཡེ་ཤེས་སྐུ་ནི་རྡོ་རྗེའི་སྐུ་མཆོག་ཡིན། །བསིལ་གྱུར་ཡེ་ཤེས་མི་ཟད་གངས་ཆེན་མཚོ། །སྒྲིབ་གསུམ་ཉེས་པའི་དྲ་བ་མཐར་མཛད་དེ། །དབང་སྔོན་རལ་གྲིའི་དཔའ་རྟགས་རྗེས་འཛིན་པ། །གཙུག་ཏོར་ཆེན་པོ་འཇམ་དཔལ་སྨྲ་བའི་ལྷ། །དངོས་སྣང་ཤིན་ཏུ་ཞི་བའི་ཆོས་ཉིད་དུ། །སྒྲ་དང་སྒྲ་མིན་སྣང་བ་མ་མཆིས་མོད། །སྒྲ་ལས་དོན་མང་རྟོགས་པའི་གདུལ་བྱའི་ངོར། །སྒྲ་དབྱངས་སྟོང་གི་རོལ་མོ་རྟག་ཏུ་སྦིར། །འབད་རྩོལ་རི་མོར་བྲིས་པ་མ་ཡིན་ཀྱང༌། །གསུང་གི་ཆེ་བ་རྣམ་པ་ཐམས་ཅད་པས། །སྣ་ཚོགས་དབང་པོར་འཚམས་པའི་སྣ་ཚོགས་དོན། །རིམ་དང་རིམ་མིན་དུས་རྣམ་ཀུན་ཏུ་སྟོན། །སྡེབས་ལེགས་སྒྲ་ལ་ཞེན་པའི་ཚུར་མཐོང་ངོར། །བྱིང་རྐྱེན་རྣམ་དབྱེའི་སྦྱོར་བས་དག་བྱས་
པའི། །ལེགས་སྦྱར་འཕགས་པའི་སྐད་དུ་ཆོས་སྟོན་ཏེ། །འཕགས་པའི་སྐད་ལ་རྟོག་གེས་བརྫི་བ་མེད། །བྱིང་ལས་བསྒྲུབ་པའི་སྒྲ་སྐད་བབས་ཞིག་པས། །སེམས་ཅན་ཁམས་མང་འདུལ་བའི་ཡུལ་མིན་ཕྱིར། །མཆོག་དང་མཆོག་མིན་རྣམ་པར་མ་ཕྱེས་པའི། །སྒྲ་སྐད་དུ་མས་ཆོས་ཕུང་རབ་འབྱམས་སྟོན། །གསུང་གི་གདངས་གཅིག་འཁོར་གྱི་དཀྱིལ་འཁོར་དུ། །ཡན་ལག་རྒྱ་མཚོའི་དབྱིངས་སུ་སྣང་བའི་འཕྲུལ། །ཡེ་ཤེས་ཆེན་པོའི་བྱིན་རླབས་རྨད་བྱུང་སྟེ། །གསུང་གི་ཆེ་བ་བརྟག་པར་དཀའ་བ་ལགས། །སྐད་ཅིག་ཙམ་ཞིག་རྣ་བར་སོན་པས་ཀྱང༌། །ཉོན་མོངས་བག་རྡུལ་ཕྱིས་པ་བཞིན་གྱུར་ཏེ། །བློ་གྲོས་སྣང་བ་སྙིང་ལ་རྒྱས་བྱེད་པ། །གསུང་གི་བྱིན་རླབས་ངོ་མཚར་ཕུལ་བྱུང་ཡིན། །ཟློས་དང་མ་འབྲེལ་སྡེབ་སྦྱོར་ཉམས་ལ་སོགས། །ངག་གི་དྲི་མ་གཞར་ཡང་མ་མཆིས་ཏེ། །ཚིག་གི་སྦྱོར་བ་ཤིན་ཏུ་མ་སྨད་པ། །མི་འཇིགས་སེང་གེའི་དབྱངས་སུ་རྟག་པར་སྒྲོག །ཟབ་པའི་རང་བཞིན་སྟོང་དང་རྟེན་འབྱུང་དོན། །ཐོག་མ་བར་དང་ཐ་མར་དགེ་གྱུར་པ། །གསུང་གི་དོན་བཟང་བདུད་རྩིའི་སྣང་བ་སྟེ། །གསུང་གསང་བསམ་གྱིས་མི་ཁྱབ་འཇམ་པའི་ལྷ། །མཐའ་བརྒྱད་སྤྲོས་པ་བྲལ་བའི་གནས་ལུགས་སུ། །སྲིད་དང་སྲིད་མིན་གདོད་ནས་མཉམ་གྱུར་ཅིང༌། །མཉམ་དང་མི་
མཉམ་ངང་གིས་ཉེར་ཞི་བའི། །ཆོས་ཉིད་ཀློང་དུ་ཆོས་ཅན་འཛིན་པ་ཟད། །མཐའ་གྲོལ་གཞི་ལས་གཡོ་བ་མེད་བཞིན་དུ། །ཇི་སྙེད་སྣང་བ་སྣ་ཚོགས་ཤེས་བྱའི་ཁམས། །མཁྱེན་པའི་ཡེ་ཤེས་གཅིག་གིས་ཉེར་བཅིངས་ཏེ། །གསུང་གི་ཆེ་བས་ཤེས་བྱ་རབ་འབྱམས་སྟོན། །ཡིད་ཀྱི་ཉེས་པ་སྒྲོག་བཞིན་འཆིང་བྱེད་པས། །བློ་ཡི་ནུས་སྟོབས་བཅིས་པ་བཞིན་བྱས་པ། །རྡོ་རྗེ་ལྟ་བུའི་ཏིང་འཛིན་རལ་གྲི་ཡིས། །ལྷག་མར་བགྱིས་དེས་ཤེས་བྱ་ཅིས་མི་གཟིགས། །འབྱིན་འཇུག་སེམས་ཀྱི་རི་མོ་ཕྱིས་བཞིན་དུ། །ཏིང་འཛིན་རྣམ་པར་ཐར་པའི་ཡེ་ཤེས་སྒོར། །འཇུག་པའི་སྤྱོད་ཡུལ་བསམ་གྱིས་མི་ཁྱབ་པས། །ཐོས་སྒྲོག་རང་སངས་རྒྱས་ཀུན་ཟིལ་གྱིས་གནོན། །ལམ་གྱི་མཆོག་དང་ལོག་པར་ལྟུང་བའི་ལམ། །བདེ་འགྲོར་འགྲོ་བའི་ལམ་རྣམས་ཀུན་གཟིགས་ཏེ། །ལམ་དང་ལམ་མིན་སྨྲ་ལ་མ་བསྙེངས་པ། །ཀུན་མཁྱེན་ཐུགས་ནི་སྤོབས་པའི་ཕུང་པོ་ཡིན། །དུས་གསུམ་ཀུན་ཏུ་འཇུག་པའི་ཡེ་ཤེས་ནི། །ཆགས་དང་ཐོགས་པའི་རྡུལ་གྱིས་མ་བཟུང་སྟེ། །བསྙེལ་བ་མེད་པའི་ཆོས་ཉིད་མཆོག་བརྙེས་པ། །ཀུན་མཁྱེན་ཐུགས་ནི་དྲན་པའི་གཏེར་ཆེན་ཡིན། །འགྲོ་འོང་མེད་པ་སྲིད་པའི་སྒྱུ་མ་ན། །བདེ་སྡུག་སྣང་བ་ཆུ་ཟླ་བཞིན་སྤྱོད་པའི། །སེམས་ཅན་ཁམས་ལ་དུས་
ཀུན་དགོངས་མཛད་པ། །ཀུན་མཁྱེན་ཐུགས་ནི་སྙིང་རྗེའི་རང་བཞིན་ཡིན། །ཡོན་ཏན་རང་བཞིན་རྣམ་པར་གྲོལ་བའི་ཆོས། །ཤིན་ཏུ་ཡོངས་རྫོགས་རྫོགས་པའི་སངས་རྒྱས་ནི། །ཡོན་ཏན་མངའ་བའི་རྩེ་མོར་གཤེགས་པ་སྟེ། །སངས་རྒྱས་ཀུན་དངོས་འཇམ་དཔལ་དཔའ་བོ་ཡིན། །གྲངས་མེད་ཞིང་ན་རྒྱལ་དང་དེ་སྲས་ཚོགས། །འཇམ་དཔལ་དཔའ་བོའི་ཡོན་ཏན་བསྔགས་མཛད་ཀྱང༌། །མཛད་པའི་ཕ་མཐའ་དམིགས་སུ་ཡོད་མིན་ན། །བླུན་ཆེན་བདག་འདྲས་བརྗོད་དུ་ག་ལ་ཞིག །མོས་གུས་ཡིད་ཀྱིས་བསྔགས་བརྗོད་ཐུང་ངུ་ཞིག །བགྱིས་པའི་ལེགས་བྱས་སྟོན་ཟླ་ལྟར་དཀར་བས། །མཐའ་ཡས་འགྲོ་ལ་ཕན་དང་བདེ་སྟེར་ཞིང༌། །འཇམ་མགོན་ཐུགས་ཀྱི་གསང་བ་མངོན་གྱུར་ཅིག །གུས་པའི་ཡིད་ཅན་སྤྲང་ཕྲུག་སྨྱོན་པ་ཡང༌། །འཇམ་དཔལ་དཔའ་བོའི་བྱིན་རླབས་དོན་གཉེར་ཞིང༌། །མཁྱེན་པའི་ལྷ་དེ་སྤྱི་བོས་རྟག་མཆོད་པའི། །སྐལ་བཟང་སྣང་བ་མཆོག་དང་འབྲལ་མ་གྱུར། །ཞེས་པའང་གཞོན་ནུ་འཇིགས་མེད་པས་རང་ལོ་བཅོ་བརྒྱད་པ་ཆུ་རྟའི་ལོའི་ཟླ་བ་བདུན་པའི་དམར་ཕྱོགས་ཉེར་གཅིག་གི་ཉིན་བྲིས་ཤིང་གསོལ་བ་བཏབས་པ་ཛ་ག་ཏཾ། ༈ །མིག་ཡོར་ལྟ་བུའི་གཟུགས་ཀྱིས་རྣམ་རོལ་ཕྱོགས་དང་དུས་ཀྱི་རྗེས་སུ་སོང༌། །བྲག་ཆ་ལྟ་བུའི་གཏམ་གྱི་རྔ་སྒྲས་འཁོར་གྱི་དཀྱིལ་འཁོར་ཀུན་ཏུ་ཁྱབ། །སྒྱུ་མ་ལྟ་བུའི་ཡེ་ཤེས་མཆོག་གིས་ཇི་ལྟ་ཇི་སྙེད་ཆོས་
ཀུན་གཟིགས། །ནམ་མཁའ་ལྟ་བུའི་སྤྱོད་ཡུལ་མཆོག་བརྙེས་འཇམ་དཔལ་མགོན་ལ་ཕྱག་བགྱིའོ། །སེམས་དང་ཡིད་ཀྱི་རྒྱུ་བ་ཉེར་ཞི་རྣམ་པར་ཤེས་ལས་རབ་འདས་པའི། །ཆོས་རྣམས་རང་བཞིན་ཤིན་ཏུ་བརྟག་དཀའ་སྤྲོས་བྲལ་ཟབ་མོ་དེ་ཁོ་ན། །སོ་སོ་རང་རིག་ཡེ་ཤེས་གཅིག་གིས་མཚན་མ་མེད་པའི་ཚུལ་གཟིགས་ཏེ། །སྲིད་དང་ཞི་བ་མཉམ་པའི་ཀློང་དུ་མི་མཉམ་སྣང་བ་ངང་གིས་ཞི། །ཤེས་དང་ཤེས་བྱའི་སྣང་བ་མཐའ་དག་མ་བརྟག་ཐ་སྙད་བདེན་པའི་ངོར། །རྟེན་ཅིང་འབྲེལ་འབྱུང་སྣ་ཚོགས་ཚུལ་ཅན་ཆུ་ཟླ་ལྟ་བུའི་རོལ་མོ་རུ། །མཁྱེན་པའི་ཡེ་ཤེས་སྐད་ཅིག་གཅིག་གིས་ཆགས་ཐོགས་མེད་པར་མངོན་གཟིགས་ཏེ། །མཁའ་དང་ལག་མཐིལ་མཉམ་པར་བརྫུ་བའི་འཕྲུལ་ཆེན་ནམ་ཡང་བསྙེལ་བ་མེད། །བདག་ཉིད་གཞན་བཅས་གཉིས་ཀ་ལས་མིན་རྒྱུ་མེད་སྣང་བ་མ་ཡིན་པའི། །ཕྱོགས་དང་དུས་ཀྱི་ཤེས་བྱ་རབ་འབྱམས་རྟོག་བཏགས་སྣང་བ་རྫུན་པོ་ཆེར། །དྲི་མེད་མཁྱེན་པའི་ཡེ་ཤེས་གཅིག་གིས་མ་འདྲེས་ཇི་བཞིན་མངོན་གཟིགས་ཏེ། །རྟེན་འབྱུང་ཟབ་མོའི་གཏམ་གྱི་རོལ་པས་བློ་ཆེན་ལྡན་རྣམས་སྨིན་པར་མཛད། །ཆོས་ལ་ཆོས་སུ་མངོན་རློམས་དེ་དག་སྡང་དང་ཞེན་པའི་ཕ་མཐར་ལྟུང༌། །གང་ལ་ཆོས་ཀྱི་རློམས་སེམས་མེད་རྣམས་ནམ་མཁའ་
བཞིན་དུ་ཆགས་པ་མེད། །ཆོས་དང་ཆོས་མིན་མཚན་མར་མེད་གཟིགས་དེ་ཡི་ཕྱིར་ན་བདག་ཉིད་ཆེ། ཁྱོད་དང་ཁྱོད་འདྲའི་སྤྱོད་ཡུལ་མཆོག་ནི་ཟག་པའི་ཁམས་དང་མཛའ་བ་མིན། །སྐྱེ་བའི་ཆོས་ལ་སྐྱེ་བ་མེད་བཞིན་གཟུགས་བརྙན་ལྟ་བུའི་ཚུལ་སྐྱེ་ཞིང༌། །སྐྱེ་མེད་ཆོས་ལ་ངོ་བོ་མེད་བཞིན་མི་དམིགས་ཚུལ་ཏུ་རབ་བརྟགས་པའི། །ཚུལ་གཉིས་ཆོས་ལ་ཆོས་མིག་རྡུལ་བྲལ་ཕུལ་བྱུང་བཟོད་པ་མཆོག་བརྙེས་ཏེ། །ཆགས་མེད་ཡེ་ཤེས་ནམ་མཁའ་ལྟ་བུས་དུས་གསུམ་ཀུན་ཏུ་གཟིགས་པ་འཇུག །སོ་སོ་ཡང་དག་རིག་པ་རྣམ་བཞིའི་ཡོན་ཏན་ཕུང་པོ་འཛད་མེད་ཅིང༌། །ཀུན་རྨོངས་ཉེས་པ་གཞར་ཡང་མ་མཆིས་མི་འཇིགས་ཡེ་ཤེས་མཆོག་མངའ་བས། །དག་དང་མ་དག་འཁོར་གྱི་དཀྱིལ་འཁོར་ཞིང་གི་རྡུལ་སྙེད་བཀོད་པའི་དབུས། །ཐོག་མ་བར་དང་ཐ་མར་དགེ་བའི་ཆོས་ཚུལ་སྣང་བ་འབུམ་དུ་འཇོ། །མཐའ་བྲལ་སྟོན་པ་རྡོ་རྗེའི་དབྱངས་ཀྱིས་འཇིག་ཚོགས་ལྟ་བའི་རི་བོ་སྙིལ། །བདེན་དོན་སྟོན་པ་གདོང་ལྔའི་ང་རོས་རྒོལ་བ་ངན་པའི་རི་དྭགས་འཇོམས། །ཚུལ་གཉིས་དོན་སྟོན་གཏམ་གྱི་མེ་ལྕེས་དངོས་པོར་སྨྲ་བའི་ཚང་ཚིང་སྲེག །སྨྲ་བའི་དབང་ཕྱུག་སྨྲ་བ་ཟླ་མེད་འཇམ་དཔལ་མཁྱེན་པ་མཆོག་བརྙེས་རྒྱལ། །སྡེ་སྣོད་ཐེག་པའི་རྣམ་གྲངས་རྒྱ་ཆེར་དཔག་ཡས་ནམ་མཁའི་མཐའ་འདྲ་བ། །
རིམ་དང་རིམ་མིན་གདུལ་བྱའི་ཁམས་ལྟར་ཚངས་དབྱངས་རྔ་སྒྲས་སྣང་མཛད་དེ། །ཇི་སྙེད་ཐེག་པའི་ཆོས་ཚུལ་མཐའ་དག་ཐེག་པ་གཅིག་ཏུ་གཞོལ་སྟོན་པས། །དཔའ་ཆེན་ཁྱོད་ཀྱི་གསུང་གི་གསང་བ་ནམ་ཡང་བསམ་པར་སླ་བ་མིན། །དེ་སླད་ཁྱོད་ཀྱི་ངོ་མཚར་ཡོན་ཏན་རྨད་བྱུང་བ། །རྗེས་དྲན་ཡིད་ཀྱིས་བསྔགས་བརྗོད་མེ་ཏོག་འདི་བྱས་ཏེ། །གཏམ་གྱི་རྒྱུད་འདིས་ཡིད་ཅན་ཡིད་ཀྱི་མུན་བསལ་ནས། །རྡུལ་མེད་བྱང་ཆུབ་ཞི་བ་མཆོག་ལ་རེག་གྱུར་ཅིག །ཅེས་པའང་གཞོན་ནུ་འཇིགས་མེད་བསྟན་པའི་རྒྱལ་མཚན་དུ་འབོད་པས་སྦྱར་བའོ། །མངྒ་ལཾ།། ༈ །།འདི་ན་ལང་ཚོས་རྒྱགས་པ་འབུམ་ཕྲག་གི༌།སྲོག་ཤིང་ལུས་ཀྱི་སྦུབས་སུ་ཞུགས་པ་བཞིན། །གྱུར་པའི་གཞོན་ཆུང་འདུ་བ་བརྒྱ་སྟོང་ཞིག །དར་གྱི་ལྷབ་ལྷུབ་མང་པོས་གཡོགས་ཤིང་འདུག་ཁེངས་དྲེགས་རྒྱགས་པས་བཟུང་བ་མ་ཡིན་ཀྱང༌། །མཚན་དཔེའི་རྡུལ་མང་བརྩེགས་པའི་ཡེ་ཤེས་སྐུ། །ལྷ་ཀླུའི་དྲེགས་པ་ཁྲག་ཁྲིག་ཟིལ་གནོན་པ། །གཞོན་ནུ་ཟུར་ཕུད་ལྔ་པའི་ངང་ཚུལ་ཡིན། །སྐྱེ་གནས་དུར་ཁྲོད་འདྲ་བའི་འདུན་ས་ནས། ཁྲག་གི་ཐིགས་པ་བླངས་པའི་སྒྱུ་ལུས་ཀྱིས། །ཡིད་ལ་རྒྱགས་པ་རྒྱས་པའི་གཞོན་པ་ཡང༌། །སྐྱེ་བོའི་གྲལ་ན་ཟླ་བ་བཞིན་དུ་གསལ། །དག་ཆེན་ཡེ་ཤེས་སྒྱུ་མའི་སྣང་བརྙན་ནི། །ཡིད་ཅན་མོས་པ་བཞིན་
དུ་རབ་འཇུག་སྟེ། །འདི་ལའང་རློམ་སེམས་མངའ་བར་མི་མཛད་པ། །གཞོན་ནུ་སྨྲ་བའི་སེང་གེའི་བརྟུལ་ཞུགས་ཡིན། ཁྲག་ཆེན་ཚོན་གྱིས་པགས་པ་དམར་པོ་རུ། །བྱས་པའི་མཁུར་ཚོས་གདོང་ལ་འཆང་བ་ཡང༌། །གཞོན་ནུའི་རྒྱན་དུ་རློམ་པའི་མི་ལྷོད་པའི། །མི་ལའང་སྲེད་ལྡན་མང་ཞིག་ལྟད་མོར་སེམས། །སྣང་དང་སྟོང་པ་མི་ཕྱེད་རྡོ་རྗེའི་སྐུར། །མཚམས་སྤྲིན་སྣང་བ་འབུམ་གྱིས་ཉེར་བྱུགས་ཤིང༌། །ནོར་བུའི་རྒྱན་ཕྲེང་ཡང་དང་ཡོང་ངོམས་པ། །དེ་ལ་ངོ་མཚར་མི་བྱེད་སུ་ཞིག་ཡོད། །རུས་པའི་ཚལ་བུ་ཞིང་ལྤགས་བགོ་བ་ཅན། །ཕུང་པོར་བྱས་ལ་གཉེར་རིས་ཉུང་གྱུར་པ། །གང་ལའང་གཞོན་ནུའི་ལུས་ཞེས་གྲགས་པའི་རྔ། །དོགས་པ་མེད་པར་སྲིད་འདིར་རྟག་ཏུ་རྡུང༌། །དེ་ཡི་སྤོ་ན་གཞན་མེད་ཡེ་ཤེས་ཆེ། །མི་ཤིགས་དྭངས་མའི་ལང་ཚོར་སྣང་བའི་གར། །རྒ་བའི་ཁུར་ཚོན་ནམ་ཡང་མི་འཛིན་པ། །དེ་ལ་སྙེན་པའི་རྫ་རྔ་ཅིས་མི་རྡུང༌། །མཚར་སྡུག་ཉམས་བརྒྱར་སྣང་བའི་གཞོན་ནུའི་གཟུགས། །རིང་བ་མིན་པར་རྒུད་པས་ཉམས་འགྱུར་ཞིང༌། །ཉམས་པ་མེད་ཀྱང་སྒྱུ་མའི་ཞགས་པ་ཡིས། །སྡུག་པ་མེད་བྱས་དེས་ཀྱང་བྱིས་པ་མགུ། །དག་གསལ་མཛེས་པའི་སྐུ་མཆོག་ལྷང་ངེ་བ། །འཁྲིལ་ལྡེམ་ཞི་བའི་ཉམས་བཟང་མི་ཟད་པས། །གཏོང་བའི་གོ་སྐབས་དབྱེ་བ་
མ་མཆིས་པ། །དེ་ལ་འཇིག་རྟེན་མཐའ་དག་ཅིས་མི་མགུ། །ཀླད་པའི་ཁང་བཟང་ཐོད་རུས་སྲ་བའི་ཁམས། །སྣུམ་བག་བྱུག་པས་གོས་པའི་སྐྲ་ལོ་ཅན། །ཉེ་རེག་བྱ་བའི་ཡུལ་དུ་འདི་རུང་ཞེས། །འཇིག་རྟེན་སྐྱེ་བོའི་མདུན་སར་གྲགས་པ་བརྟན། །དཀར་པོའི་བརྟུལ་ཞུགས་སྙེམ་སྨིན་པའི་ཞལ། །མཐོན་མཐིང་རལ་པའི་འབྲས་བཟང་ལྔ་འཆང་བ། །འཕགས་ཆེན་གཞོན་ནུའི་འཇོ་སྒེགས་འདི་ཡང་སྟེ། །ལྷ་ཆེན་དྲེགས་པ་བརྒྱས་ཀྱང་གཟུང་བར་དཀའ། །རྔུལ་ཆུའི་ཐིག་པ་ལྟོ་བར་སྦྲུམ་པའི་ཤ་ཁྲུས་ཀྱི་ཆོ་གས་ལན་བརྒྱར་བཀྲུས་པ་ལས། །རེ་ཞིག་ཀུན་ད་ལྟ་བུར་སྣང་ལ་ཡང༌། །གཞོན་ཤ་གསར་པ་གསར་པའི་བླ་དྭགས་སྟེར། །དྲི་མས་འཁྱུད་པ་མ་ཡིན་གཞོན་ནུའི་སྐུ། །རྫིང་བུར་བཀྲུས་པ་མ་ཡིན་ངང་གིས་མཛེས། །ཚོན་གྱིས་བྱུག་པ་མ་ཡིན་དམར་སེར་མདངས། །མོག་མོག་ཁ་དོག་མ་ཡིན་ལྷན་ནེར་འབར། །ལྷོད་ལྷོད་འགྲོས་ཀྱིས་བསྐྱོད་པའི་ལྷབ་ལྷུབ་འདབ། །གཡོ་ཞིང་གཡོ་ཞིང་ལྡེམ་ལྡེམ་འགྲོ་བ་ལའང༌། །དུལ་བའི་ལུས་ཞེས་སྐྱེ་བོ་དགའ་བྱེད་ན། །འཕགས་པའི་གཟུགས་ལ་ངོ་མཚར་ཅིས་མི་སྐྱེ། །ལྟ་བས་མི་ངོམ་མཚན་དཔེ་འབར་བའི་སྐུ། །མཐོང་ན་མི་མཐུན་ངང་གིས་ཉེར་ཞི་བ། །བྱེ་བ་ཁྲག་ཁྲིག་འོད་ཟེར་སྣང་བའི་གཞི། །འཇམ་དཔལ་གཞོན་ནུའི་སྐུ་
ནི་དེ་འདྲའོ། །བཟོད་དཀའ་འདུ་བ་རྣམ་བཞིའི་ནད་ཀྱི་མེས། །བུད་ཤིང་ཐ་ཚིག་མནོས་པའི་ལུས་ཀྱིས་ཀྱང༌། །ཆགས་བྲལ་བརྐམ་པ་འཕེལ་བའི་གྲོགས་གྱུར་ན། །འཇམ་དཔལ་གཞོན་ནུའི་གཟུགས་སྐུ་ཅིས་མི་མཆོད། །གཞོམ་གཞིག་མཚན་མ་ཞི་བའི་རྟག་ཆེན་སྐུ། །དྲན་པས་ཡིད་ལ་དགའ་བ་མཆོག་སྩོལ་བ། །དགེ་བའི་མཆོད་སྡོང་མཆོག་ནི་འདི་ཡིན་ཞེས། །འཇིགས་མེད་སྤྲང་པོའི་ཡིད་ནི་དེ་ལྟར་ཕྱོགས། །ཞེས་པའང་སྤྲང་སྨྱོན་འཇིགས་མེད་པས་སོ། ༈ །བསྟོད་ཚིག་ཐོལ་བྱུང་མ། བསྐལ་པ་བྱེ་བ་མང་པོ་ནས། །ཕ་རོལ་ཕྱིན་དྲུག་རྫོགས་བྱས་ཏེ། །སྟོབས་བཅུའི་རྒྱལ་ཐབས་མཐོན་པོ་ལ། །རྟག་བཞུགས་འཇམ་དཔལ་ལ་ཕྱག་འཚལ། །ཟབ་མོ་ཆོས་རྣམས་ཀུན་གྱི་གཤིས། །མཐའ་བརྒྱད་སྤྲོས་བྲལ་ཆེན་པོ་རུ། །གཉིས་སྣང་མཚན་མ་ཉེར་ཞི་བ། །འཇམ་དཔལ་དེ་ལ་བདག་ཕྱག་འཚལ། །རྟག་ཆེན་ངེས་པ་ལྔ་ལྡན་སྐུ། །འོག་མིན་ཆེན་པོར་སྣང་བའི་གར། །རྣམ་མང་ཞིང་ན་སྒྱུར་མཛད་པ། །འཇམ་དཔལ་དབྱངས་ལ་རྟག་ཏུ་འདུད། །གཞོན་ནུའི་གཟུགས་དང་རྒན་པོའི་གཟུགས། །བདེ་གཤེགས་སྐུ་དང་ཉན་རང་གཟུགས། །གཟུགས་ཀྱི་རོལ་པ་མང་པོ་ཡིས། །སྲིད་པ་སྐྱོབ་ལ་ཕྱག་འཚལ་ལོ། །སྙན་པར་སྨྲ་བ་རབ་མང་པོ། །ཟབ་མོའི་ཕྱོགས་དང་རྒྱ་ཆེའི་ཕྱོགས། །ལེགས་འདོམས་ཚངས་པའི་སྒྲ་དབྱངས་ལ། །དབང་མཛད་དེ་ལ་ཕྱག་
འཚལ་ལོ། །ནམ་མཁའི་ཀློང་ལྟར་བལྟར་མེད་ཅིང༌། །ཤེས་དང་ཤེས་བྱ་ཉེར་ཞི་བའི། །དབྱིངས་སུ་མི་རྟོག་ཡེ་ཤེས་ཆེ། །རོ་གཅིག་གྱུར་ལ་ཕྱག་འཚལ་ལོ། །རྣམ་པར་རྩོལ་ཞིང་རྟོག་མེད་ཀྱང༌། །དཔག་བསམ་ཤིང་ལས་ཆར་འབེབས་བཞིན། །རྟག་ཁྱབ་ལྷུན་གྲུབ་ཕྲིན་ལས་ཆེ། །ཀུན་ཏུ་འབྱུང་ལ་ཕྱག་འཚལ་ལོ། །གྲངས་མེད་ཚོགས་གཉིས་བསགས་པའི་མཐུ། །ནམ་ཡང་རྒྱུན་ཆད་མེད་སྟོན་ཕྱིར། །གཟུགས་སྐུ་བྱེ་བ་རྣམ་མང་པོས། །གཞན་ཕན་སྤྱོད་ལ་ཕྱག་འཚལ་ལོ། །མཐའ་ཡས་ཇི་ལྟ་ཇི་སྙེད་ཆོས། །མཐའ་དག་སྐད་ཅིག་གཅིག་གིས་ཀྱང༌། །གཟིགས་པར་མི་ཐོགས་ཡེ་ཤེས་ཅན། །འཇམ་དབྱངས་མགོན་ལ་ཕྱག་འཚལ་ལོ། །འགྲོ་རྣམས་རང་བཞིན་མེད་གཟིགས་བཞིན། །རྨི་ལམ་ལྟ་བུའི་འཁོར་བ་པར། །མི་དམིགས་ཐུགས་རྗེ་རྟག་འབྱུང་བ། །འཇམ་དབྱངས་དེ་ལ་གུས་ཕྱག་འཚལ། །རྒྱལ་སྲས་ཁྲག་ཁྲིག་དུ་མའི་དབུས། །སྨོན་ལམ་ཆེན་པོའི་གཟི་བརྗིད་ཀྱིས། །སྐར་མའི་དབུས་ན་ཟླ་བ་བཞིན། །བརྗིད་བྱས་དེ་ལ་ཕྱག་འཚལ་ལོ། །ཡོན་ཏན་བདག་ཉིད་ཆེ་རྣམས་ཀྱང༌། །གང་ཞབས་ཕུ་དུད་ཡུལ་ཉིད་དུ། །བསྔགས་པ་ནམ་ཡང་མི་ལྷོད་པ། །ཐོད་ཀྱི་ཐོད་ལ་ཕྱག་འཚལ་ལོ། །བསྔགས་འོས་
བསྔགས་མཛད་སྲས་བཅས་ཀྱི། །འདྲེན་པ་བགྲང་ལས་འདས་མོད་དེ། །སྤྲང་སྨྱོན་བདག་གི་ངག་འདི་ཡང༌། །བདག་ཉིད་ཆེན་པོའི་སྙན་དུ་ཕུལ། །ཅི་སླད་ཅེ་ན་ཐོག་མེད་ཀྱི། །དུས་ནས་ངག་གི་ཉེས་བྱས་པ། །དེ་ཀུན་ཚངས་པར་བགྱིད་སླད་དུ། །གཏམ་གྱི་རྫ་རྔ་འདི་བརྡུངས་སོ། །ཅེས་སྨྱོ་གཏམ་ཅལ་ཅོལ་མ་འདིའང་ཡུད་ཙམ་ལའང་བསམ་གཞིག་མ་བཏང་བར། འཇིགས་མེད་པས་བྲིས་པའོ། ༈ །འཇམ་དཔལ་གཞོན་ནུར་གྱུར་པའི་ཡོན་ཏན་གྱི་ཆེ་བ་ལ་བསྔགས་པའི་རབས་པར་ཤི་ཀའི་མེ་ཏོག་གི་ཆུན་འཕྱང་ཞེས་བྱ་བ། ཚོགས་གཉིས་ཕྱོགས་ཀྱི་ཆུ་གཏེར་དྭངས་པའི་ངོགས། །མཁྱེན་གཉིས་མནྡྷ་ར་བའི་འཁྲི་ཤིང་ཆེ། །ཚུལ་གཉིས་གཏམ་གྱི་བསུང་ཞིམ་འབུམ་འཇོ་བ། །འཇམ་དཔལ་གཞོན་ནུའི་རྣམ་ཐར་ཡང་ཡང་དྲན། །གང་ལ་བདག་ཉིད་ཆེ་ཞེས་གྲགས་པའི་དྲི། །སྟོབས་དང་མི་འཇིགས་འདབ་བརྒྱས་ཉེར་བཟུང་ཞིང༌། །གཞན་ཕན་ལང་ཚོའི་འཇོ་སྒེགས་མ་སྨད་པའི། །དབང་ཕྱུག་འཇམ་དཔལ་དཔའ་བོའི་མཚོ་སྐྱེས་བཞད། །སྨོན་ལམ་འཁྲི་ཤིང་དཀར་པོའི་དཔུང་བ་ལས། །རྗེས་ཆགས་རྣམ་པར་རོལ་པའི་འདབ་མ་ཁྲིས། །ཕྱོགས་དང་དུས་ཀྱིས་ཐ་གྲུ་ཟླུམ་པོ་རུ། །འཆིང་མཛད་འཕགས་པའི་མེ་ཏོག་འཇམ་པའི་ལྷ། །ཕུལ་བྱུང་ཐབས་ལ་མཁས་པའི་མེ་ཏོག་གིས། །ཡང་དང་ཡང་དུ་འཁྱུད་མོས་ཉེར་བཅིང་བའི། །ཕན་བཞེད་ལྷག་པའི་ཐུགས་
མཆོག་སྐྱེད་མོའི་ཚལ། །གང་ལ་མངའ་མཛད་མགོན་པོ་རལ་གྲི་ཅན། །འཕགས་མཆོག་མེ་ཏོག་མཛུམ་པའི་འདུན་ས་ན། །རྟེན་འབྱུང་གཏམ་གྱི་དྲི་བསུང་མི་ཟད་པས། །བློ་གྲོས་ཆེན་པོའི་ཁྱད་པར་གསལ་བྱས་པའི། །མེ་ཏོག་ཟུར་ཕུད་ལྔ་པར་གྲགས་དེ་རྨད། །གཟུངས་ཀྱི་ཡེ་ཤེས་རྨད་བྱུང་ཛ་ཏའི་ནགས། །སྤོབས་པ་ཆེན་པོའི་སྣ་མའི་མེ་ཏོག་གདོང༌། །འཛུམ་བཞད་ལང་ཚོས་ལན་བརྒྱར་སྒེགས་བྱས་པ། །འཇམ་དཔལ་དཔའ་བོའི་རྣམ་ཐར་རྒྱ་ཆེན་ཡིན། །ཡེ་ཤེས་གཟིགས་པའི་ཟླ་རྒྱས་གཅིག་གིས་ཀྱང༌། །དོན་ཟབ་ལེགས་པར་བཤད་པའི་པད་དཀར་བརྒྱ། །འབྱེད་པའི་ཚུལ་འདི་འཇམ་དཔལ་གཞོན་ནུའི་སྟེ། །ལྷ་དབང་སྨིན་དྲུག་ཁྲིས་ཀྱང་བཟུང་མ་གྱུར། །ནོར་འདོད་སློང་མོའི་བུང་བ་ཁྲག་ཁྲིག་སྟོང༌། །སྙན་གྲགས་དྲི་བསུང་དངར་པོས་ཉེར་བཀུག་སྟེ། །གཏོང་བ་དམ་པའི་སྦྲང་རྩིས་སིམ་མཛད་པ། །འཇམ་དཔལ་དཔའ་བོའི་བརྟུལ་ཞུགས་མེ་ཏོག་ཡིན། །ཉེས་སྤྱོད་སྤྲིན་གྱི་རུས་པས་མ་རེག་ཅིང༌། །བསྡུ་བཞིའི་འདབ་མ་རིང་པོས་འཇིག་རྟེན་ཁྱོན། ཁྱབ་མཛད་དགེ་བ་ཆོས་སྡུད་མེ་ཏོག་འདིས། །འཇམ་དཔལ་གཞོན་ནུའི་སྤྱོད་མཆོག་མཛེས་པར་བྱས། །ཕས་རྒོལ་གཡུལ་གྱི་ཆར་པ་གང་བབ་པ། །བཟོད་པའི་མེ་ཏོག་འཛུམ་པའི་གྲོགས་གྱུར་ཏེ། ཁྲོ་ཚིག་གདུང་བ་རྩུབ་མོའི་
སྐབས་མེད་པས། །འཇམ་པའི་ལྷ་ཞེས་གྲགས་པ་ལྕི་བར་བྱས། །ལེགས་བྱས་པདྨའི་རྩ་བ་རབ་བརྟན་པ། །བརྩོན་འགྲུས་རླན་གྱི་ཐིགས་པས་བསྐྱེད་བསྲིངས་ཏེ། །འཇམ་དཔལ་གཞོན་ནུའི་ཡེ་ཤེས་པདྨ་དཀར། །ནམ་མཁའ་ཇི་སྲིད་སྣང་བར་མ་བྱས་སམ། །ཏིང་འཛིན་མེ་ཏོག་དཔལ་མོའི་འཛུམ་དཀར་ལས། །སྤྱན་དང་མངོན་ཤེས་བསུང་བ་རྣམ་འཕྲོ་ཞིང༌། །སྙིང་ལ་མི་ཟད་འདོད་དགུའི་བཅུད་སྩོལ་བ། །འཇམ་དཔལ་གཞོན་ནུའི་སྤྱོད་ཡུལ་རླབས་ཆེན་ཡིན། །རྡུལ་མེད་ཤེས་རབ་མང་པོ་བཞད་པའི་ཚོར། །དྲན་དང་རྟོགས་པའི་ཆུ་རླབས་རྣམ་གཡོ་ཞིང༌། །བདེན་དོན་གཏམ་གྱི་ངང་མོ་འབུམ་རྩེ་བ། །གཞོན་ནུ་སྨྲ་བའི་སེང་གེའི་བློ་གྲོས་ཡིན། །སྲིད་པའི་ཆུ་གཏེར་ཟབ་མོའི་ཀློང་འཁོར་ན། །སྣ་ཚོགས་སྤྲུལ་པའི་མེ་ཏོག་སྟོང་ངོམས་ཀྱང༌། །སྲེད་དང་ལེན་གྱི་འདམ་གྱིས་མ་བཟུང་བའི། །གནས་འདི་ཟབ་མོའི་བཟོད་པའི་ལག་རྗེས་ཡིན། །ལྷག་བསམ་མཆོག་གི་རྩ་བ་མ་སྨད་ཅིང༌། །ཕུལ་བྱུང་ཐབས་ཀྱི་ལོ་འདབ་མ་རྙིང་བའི། །དོན་དམ་གཟིགས་པའི་ཡེ་ཤེས་དཔག་བསམ་ཤིང༌། །དེ་ལ་སྟོབས་བཅུའི་མེ་ཏོག་གཡུར་དུ་ཟ། །ཤེས་བྱ་ཐམས་ཅད་མཁྱེན་པའི་ཡེ་ཤེས་མཚོར། །རྫོགས་སྨིན་སྦྱང་བའི་མེ་ཏོག་རྒྱུན་ཆགས་པས། །གྲགས་པའི་དྲི་བསུང་ལྡང་བ་དོན་ཡོད་དུ། །བྱེད་པོ་འཕགས་བཞིའི་དེད་དཔོན་འཇམ་པའི་ལྷ། །སྐུ་མཆོག་
མཚན་དཔེའི་མེ་ཏོག་བཀྲག་ཏུ་བརྟས། །ཚངས་དབྱངས་ཆོས་ཀྱི་མེ་ཏོག་དར་ལ་རྒྱས། །རིགས་པ་ཆེན་པོའི་མེ་ཏོག་མཚུངས་པ་མེད། །འཕགས་མཆོག་མེ་ཏོག་ཁྱུ་མཆོག་རལ་གྲི་ཅན། །མཆོད་འོས་མཆོད་པའི་ཞིང་མཆོག་འཇམ་པའི་ལྷར། །བསྔགས་བརྗོད་མེ་ཏོག་མཆོད་སྤྲིན་འདིས་མཆོད་ཀྱིས། །དགྱེས་སྤྲིན་ཡེ་ཤེས་གཟིགས་པས་བཞེས་ནས་སླར། །བྱིན་རླབས་སྣང་བ་ཡངས་པོས་སྲིད་འདི་སྐྱོངས། །བདག་ཀྱང་ཐེག་མཆོག་བསྟན་པའི་དགའ་ཚལ་དུ། །ལུང་རིགས་མེ་ཏོག་དོ་ཤལ་ཉེར་བཟུང་ནས། །འཆད་རྩོད་རྩོམ་པའི་རྒྱང་གླུ་ལེན་བཞིན་པར། །བཟོད་པ་ཆེན་པོའི་གར་གྱིས་རོལ་པར་ཤོག །གཏམ་འདི་ཐར་པ་དོན་གཉེར་ཅན། །འཇིགས་མེད་བསྟན་པའི་རྒྱལ་མཚན་ཞེས། །གཞོན་པ་རང་ལོ་བཅོ་བརྒྱད་པས། །སྙན་ངག་བཟང་པོའི་ཕྲེང་བར་སྦྲེལ། །ཤུ་བྷཾ། མསྟུ་སརྦ་ཛ་ག་ཏཾ།། ༈ །།མེ་ཏོག་ཆུན་འཕྱང་འཛིན་པའི་ཐོར་ཚུག་རྩེར། །མཐིང་མདོག་ནོར་བུས་མཛེས་པ་འབུམ་བྱིན་པས། །རལ་པའི་ཕོན་པོ་ལྷང་ངེ་ལྷན་ནེ་བ། །ལྔ་ཕྲག་སྤྱི་བོར་བཅིངས་དེ་གང་ཞིག་ཡིན། །སྐྲ་ཅོག་མཐོན་མཐིང་འབར་བའི་ལང་ཚོ་ཞིག །མཐོ་རིས་སྐབས་གསུམ་ལྷས་ཀྱང་བཟུང་གྱུར་མོད། །སྣང་སྟོང་ཡེ་ཤེས་སྒྱུ་མའི་འཇོ་སྒེགས་ཅན། །གཞོན་ནུ་ཟུར་ཕུད་ལྔ་པའི་ངང་ཚུལ་ཡིན། །འཁྲིལ་ལྡེམ་ཉམས་བརྒྱས་སྒེགས་པའི་ཡེ་
ཤེས་སྐུ། །རྒྱལ་བའི་ཞིང་ཁམས་གང་དུ་སྣང་གྱུར་པ། །དེ་ན་འཕགས་ཆེན་བྱེ་བས་མེ་ཏོག་ཆར། །ནམ་མཁའི་ལམ་ནས་སྤྲིན་ཕུང་བཞིན་དུ་འཐོར། །སྲིད་ན་བསོད་ནམས་བྱེ་བའི་གཏེར་མཛོད་དུ། །གྲགས་པ་རྔ་ལྟར་ལྡིར་བའི་ལྷ་རྣམས་ཀྱང༌། ཁྱོད་ཀྱི་ཟུར་ཕུད་མཆོད་པའི་བརྟུལ་ཞུགས་ཀྱིས། །མནྡ་ར་བའི་འཁྲི་ཤིང་གསར་པ་སློང༌། །བྱེ་བ་ཁྲག་ཁྲིག་འོད་ཟེར་སྣང་བ་དང༌། །ལྷན་ཅིག་མཚན་དཔེའི་ཞལ་བཟང་རྟག་ངོམས་པ། །ཐུགས་ཀྱི་རྡོ་རྗེ་བདེ་གཤེགས་མི་བསྐྱོད་ལྷ། ཁྱོད་གཙུག་རལ་པའི་རྒྱན་དུ་སྣང་ཞེས་ཐོས། །སྟོབས་བཅུ་མངའ་བ་རྣམས་ཀྱི་ཡེ་ཤེས་ཆེ། །རྟག་ཆེན་གཞོན་ནུའི་གཟུགས་སུ་ངོམས་པའི་གར། །དེ་ལ་མཛེས་པའི་སྐྲ་ཅོག་འདི་ཡོད་ཅེས། །གཅིག་ཏུ་ངོ་མཚར་བགྱི་བ་ཅི་ཞིག་མཆིས། །མཐོན་མཐིང་ཟུར་ཕུད་རྣམ་ལྔའི་གཟི་བྱིན་ཆེས། །དགེ་ལེགས་ཤིས་པའི་ཆར་བསིལ་འབེབས་ནུས་ན། །དེ་ལ་ནོར་བུའི་སྐ་རགས་ཅི་སླད་འཆང༌། ཁྱོད་ཀྱིས་འདི་ལ་དགོས་དོན་གཟིགས་ཞེས་གྲགས། །ཕྱོགས་དུས་མཉམ་པ་ཉིད་ཀྱི་ཡེ་ཤེས་ནི། །དོ་ཀེར་ཆས་སུ་འཆད་པར་མ་གྱུར་མོད། །བླ་ན་མེད་པའི་ཡེ་ཤེས་རྣམ་པ་ལྔ། །མཚོན་པའི་རྟགས་སུ་ཟུར་ཕུད་ལྔ་ཞིག་སྣང༌། །བདེ་བར་གཤེགས་པའི་བྱིན་རླབ་བསམ་མི་ཁྱབ། །ཡེ་ཤེས་མཆོག་གི་འཕྲུལ་ཆེན་བསམ་མི་ཁྱབ། །དེ་སླད་
མཁྱེན་གཉིས་མངོན་པར་རྫོགས་པའི་ཐུགས། །རལ་པའི་དོག་པར་འཆར་བ་མི་རིགས་མེད། །དེ་སྐད་ཅོ་ལེ་ཉོ་ལེའི་གཏམ། །ཅི་ཡིན་འདི་ཡིན་མེད་པ་འདི། །སྤྲང་ཕྲུག་ཀི་བོ་ཞེས་བྱ་བས། །ཨ་མཚར་ཐོ་ཅོའི་ཚིག་ཏུ་བྲིས། །༈། །རྒྱལ་ཀུན་གསང་བ་ཟབ་མོའི་ཡེ་ཤེས་ནི། །མཚན་རྫོགས་སྒྱུ་མའི་ལང་ཚོར་ཡོངས་བཞེངས་པ། ཁྱབ་བདག་མཚོ་སྐྱེས་བླ་མར་དབྱེར་མེད་པའི། །འཇམ་མགོན་སྨྲ་བ་ཟླ་མེད་རྒྱལ་གྱུར་ཅིག །བསམ་གྱིས་མི་ཁྱབ་སྟོང་ཉིད་དབུ་མ་ཆེ། །གཟུང་འཛིན་གཉིས་མེད་ཚུལ་གྱིས་མཉམ་བཞག་པས། །མཁའ་དང་ལག་མཐིལ་བསྐལ་པ་སྐད་ཅིག་ཏུ། །སྣང་བའི་སྤྱོད་ཡུལ་ཆུ་ཟླ་བཞིན་དུ་སྟོན། །འཁོར་གསུམ་རང་བཞིན་མེད་གཟིགས་ཤེས་རབ་དང༌། །ཆབས་གཅིག་སྦྱིན་སོགས་རླབས་ཆེན་སྤྱོད་པའི་ཁུར། །མཐའ་ཀླས་ཡིད་ཅན་རྒྱ་མཚོར་སྨན་སླད་དུ། །འཛིན་མཛད་ཚོགས་གཉིས་ཡོངས་རྫོགས་མཁྱེན་པའི་གཏེར། །སྙིང་སྟོབས་གོ་ཆ་ཚད་མེད་རབ་བགོས་ཏེ། །ཐབས་མཁས་འཕྲུལ་དང་འགྲོགས་པའི་མཛད་བཟང་ནི། །གང་འདུལ་གདུལ་བྱའི་མོས་ངོར་སྣང་མཛད་པས། །ཕྲིན་ལས་རྒྱལ་བ་ཀུན་དང་ཐུན་མོང་གྱུར། །དྲི་མེད་ཤེས་རབ་རང་བཞིན་ཐུགས་རྗེས་ནི། །ཕྱོགས་དུས་ཁོང་ན་ཅི་མཆིས་ལུས་ཅན་ཚོགས། །ཀུན་ལ་གཡོ་མེད་གཟིགས་པའི་མགོན་པོ་གང༌། །
གཞན་ཕན་སྤྱོད་ལ་དུས་ལས་ཡོལ་བ་མེད། །ཏིང་འཛིན་རྣམ་ཐར་བྱེ་བའི་གཏེར་གྱུར་ཅིང༌། །གཟུངས་སྤྲིན་ཡེ་ཤེས་དཔག་མེད་སྙིང་ལ་འཁྲིགས། །བློ་གྲོས་མཁའ་ལྟར་རྣམ་དག་ངག་གི་དབང༌། །མི་ཟད་སྤོབས་པ་མཆོག་ལ་མངའ་དབང་འབྱོར། །ཚངས་དང་དབང་ཕྱུག་དཔལ་གྱིས་མཚོན་མིན་པའི། །ཟག་མེད་རྣམ་གྲོལ་བདེ་བ་བརྒྱ་ཕྲག་བརྒྱ། །སྦྱིན་པའི་ལྷ་མཆོག་རྗེ་བཙུན་འཇམ་པའི་དབྱངས། །གྲགས་པས་སངས་རྒྱས་ཞིང་མང་ཀུན་ཏུ་ཁྱབ། །བརྗོད་མེད་རང་བཞིན་གནས་ལུགས་ཟབ་མོ་ནི། །སྣ་ཚོགས་ཐབས་ཀྱིས་གདུལ་བྱར་སྟོན་མཛད་པས། །འཆིང་བ་ཀུན་གྱིས་བཅིང་བའི་སེམས་ཅན་ཡང༌། །འཆིང་བྲལ་ཞི་བ་དམ་པའི་གནས་ལ་སྦྱོར། །ཇི་ལྟ་ཇི་ལྟར་ཆོས་དབྱིངས་རྒྱ་ཆེ་བ། །དེ་ལྟ་དེ་ལྟར་ཁྱོད་ཀྱི་ཡེ་ཤེས་རྒྱས། །ཇི་ལྟ་ཇི་ལྟར་སེམས་ཅན་ཚད་མེད་པ། །དེ་ལྟ་དེ་ལྟར་ཁྱོད་ཀྱི་སྙིང་རྗེ་རྒྱས། །རྒྱལ་བ་བྱེ་བས་ལན་བརྒྱར་ཁྱོད་བསྔགས་ཤིང༌། །རྒྱལ་སྲས་འབུམ་གྱི་ཁྱུ་མཆོག་ཁྱོད་ལགས་ན། །ལྷ་ཀླུ་མིའམ་ཅི་ཡི་ཐོར་ཚུག་ཏུ། ཁྱོད་ཀྱི་ཞབས་པད་བཀོད་ལ་ཇི་ལྟར་བསྙོན། །གང་གིས་ལན་གཅིག་དང་བའི་ཡིད་ཀྱིས་ནི། །འཇམ་དཔལ་དབྱངས་ཞེས་མཚན་ཙམ་དྲན་པས་ཀྱང༌། །མཐའ་ཡས་བསོད་ནམས་རླབས་ཆེན་འགྲུབ་གསུངས་ན། །བསྟོད་ཅིང་སྒོམ་སྒྲུབ་བགྱིད་ལ་ལྟ་ཅི་སྨོས། །རྟག་ཏུ་འགྲོ་ཁམས་རྒྱ་མཚོར་བརྩེར་དགོངས་
ཤིང༌། །འགོག་མེད་ཕྲིན་ལས་སྣང་བ་འཇུག་ལགས་ན། །ཅི་སླད་བདག་གིས་གདུང་བས་གསོལ་བཏབ་ཀྱང༌། །བྱིན་རླབས་སྙིང་ལ་མི་སྟེར་འདི་ཅི་ཞིག་འོན་ཏེ་བདག་ཉིད་སྐལ་པ་ཆེས་དམན་ཞིང༌། །སྒྲིབ་པའི་མུན་རུམ་སྟུག་པོར་འཐུམ་གྱུར་པས། །རེ་ཞིག་ཁྱོད་ཞལ་མཐོང་བའི་མཐུ་མེད་གྲང༌། །ནམ་ཞིག་འཕགས་པའི་ཞལ་བཟང་མཐོང་བར་ཤོག །ཚེ་རབས་འདི་དང་སྐྱེ་བའི་ཕྲེང་བ་ཀུན། །རྒྱལ་བ་ཀུན་གྱི་དམ་ཆོས་མཛོད་འཛིན་ཅིང༌། །བློ་གྲོས་ཟབ་ཡངས་ནོར་བུའི་ལྡེ་མིག་གིས། །གཞུང་ལུགས་སྒོ་བརྒྱ་འབྱེད་པའི་མཐུ་ཐོབ་ཤོག །ཅེས་པའང་བྱིས་པ་འཇིགས་མེད་པས་གསོལ་བ་བཏབ་པ་སྟེ་དེ་དེ་བཞིན་དུ་འགྲུབ་པའི་མཐུན་འགྱུར་སྐྱེས་བུ་དམ་པ་ཁྱོད་ཀྱང་མཛད་པར་གསོལ་ལོ། ༈ །མཆོག་གི་ཡེ་ཤེས་ཆུ་གཏེར་མ་དྲོས་པ། །དགེ་ལེགས་ཤིས་པའི་ཆུ་གཏེར་འབུམ་གྱི་གཞིར། །སྨོན་ལམ་དམ་པས་ལྷུན་གྱིས་གྲུབ་བྱས་པ། །འཇམ་པའི་ལྷ་དེས་བཀྲ་ཤིས་མེ་ཏོག་གཏོར། །བརྗེད་ངས་འདམ་གྱི་དྲི་མས་མ་བཟུང་ཞིང༌། །རྣམ་གཡེང་མེད་པའི་བྱེད་ལས་བསུང་ཞིམ་ཅན། །དྲན་པའི་ཡིད་འོང་མེ་ཏོག་མནྡ་རས། །བདག་སྙིང་མཛེས་པར་མཛོད་ཅིག་འཇམ་པའི་ལྷ། །ཆོས་རབ་རྣམ་པར་འབྱེད་པའི་འདབ་མ་རྒྱས། །རྨད་བྱུང་ལེགས་པར་བཤད་པའི་དྲི་བསུང་འཇོ། །ཐོགས་པ་མེད་པ་བློ་གྲོས་པད་མའི་ཆར། །སྙིང་ལ་ལན་བརྒྱར་ཕོབ་ཅིག་འཇམ་པའི་ལྷ། །
ཕུལ་བྱུང་ཟབ་དོན་བྱེ་བའི་ཀེ་ས་ར། །གཏོང་བ་མ་ཡིན་ཡིད་ལ་དམ་འཆང་བ། །རྟོགས་པའི་གཏེར་ཆེན་དོང་ཀའི་མེ་ཏོག་ཆར། །འཛད་མེད་སྙིང་ལ་སྙོལ་ཅིག་འཇམ་པའི་ལྷ། །གདམས་ངག་སྦྲང་རྩིའི་རོ་བཅུད་མི་ཟད་པ། །སྐད་ཅིག་རེར་ཡང་བློ་ལ་འཛིན་བྱེད་པའི། །གཟུངས་ཀྱི་ཡོན་ཏན་མེ་ཏོག་རྐོན་བུའི་ཆར། །ཡིད་ལ་འཆར་བ་བཀྲམ་མཛོད་འཇམ་པའི་ལྷ། །ཟབ་མོའི་འབེལ་གཏམ་བསུང་བ་ཁྲག་ཁྲིག་གིས། །སྐལ་བཟང་ངུར་བའི་དགའ་སྟོན་སྟེར་བྱེད་པ། །མི་འཇིགས་སྤོབས་པའི་མེ་ཏོག་ཆར་པ་སྟོང༌། །འགོག་མེད་ཡིད་ལ་ཕོབ་ཅིག་འཇམ་པའི་ལྷ། །དཔྱད་གསུམ་རྣམ་དག་རྒྱལ་བསྟན་སྙིང་པོའི་བཅུད། །འཆད་རྩོད་རྩོམ་པའི་ཟེ་བར་རྟག་འཆར་བ། །ཆོས་ཀྱི་གཏེར་ཆེན་འདབ་སྟོང་བཞད་པའི་ཆར། །བདག་ཡིད་ཁྱབ་པར་འབེབས་མཛོད་འཇམ་པའི་ལྷ། །དགེ་ཚོགས་མེ་ཏོག་འཛུམ་པའི་ཚལ་ཆེན་པོར། །ངོ་མཚར་ཡོན་ཏན་བྱེ་བའི་མངོན་འཕགས་པ། །བྱང་ཆུབ་སེམས་མཆོག་ཨུ་དུམ་ཝ་རའི་ཆར། །སྙིང་ལ་འཇོ་བར་མཛོད་ཅིག་འཇམ་པའི་ལྷ། །འཁྲུལ་རྟོག་སད་ཀྱིས་གདུང་བའི་སྐབས་མེད་ཅིང༌། །ཆོས་མིག་རྡུལ་བྲལ་ལང་ཚོ་མ་རྙིང་བ། །བཟོད་པ་ཆེན་པོའི་མེ་ཏོག་འབུམ་ཕྲག་གསུམ། །སྙིང་ལ་བཞད་པར་མཛོད་ཅིག་འཇམ་པའི་ལྷ། །དྲི་མ་མེད་པའི་ཡེ་ཤེས་
ནམ་མཁའི་ལམ། །ཞི་བསིལ་ཐུགས་རྗེའི་སྤྲིན་དཀར་གཡོ་བ་ལས། །ཕུལ་བྱུང་ཤིས་པའི་ཆར་ཆེན་མི་ཟད་པས། །སྲིད་ཁམས་དགེ་ལེགས་མཛོད་ཅིག་འཇམ་པའི་ལྷ། །ཆོས་མཆོག་སྙན་པའི་རྔ་སྒྲ་རྟག་ཏུ་སྒྲོག །ཕན་དང་བདེ་བའི་མེ་ཏོག་ཆར་དུ་འབབ། །གཟུངས་དང་སྤོབས་པའི་སྣང་བ་ཅིར་ཡང་རྒྱས། །བཀྲ་ཤིས་དེ་འདྲས་ས་གསུམ་ཁྱབ་གྱུར་ཅིག །བཀྲ་ཤིས་ངོ་མཚར་མཆོག་གི་ཚིགས་བཅད་འདི། །བཀྲ་ཤིས་མེ་ཏོག་འཛིན་པའི་ལོ་འདབ་ངོས། །བཀྲ་ཤིས་ཡིད་ལ་གཅགས་པའི་གཞོན་ནུ་དེས། །བཀྲ་ཤིས་ཟླ་བ་ཉ་བའི་ཚེས་ལ་བྲིས། ༈ །མཐའ་བཞིའི་མཚན་མ་ཞི་བའི་ཆོས་དབྱིངས་སུ། །མཐར་འཛིན་ལྟ་བའི་ཉེས་ཚོགས་རབ་བསལ་ཏེ། །མཐའ་བྲལ་ལྟ་བའི་ཡེ་ཤེས་མཆོག་བརྙེས་པ། །མཐའ་ཡས་རྒྱལ་ཀུན་སྤྱི་གཟུགས་འཇམ་པའི་ལྷ། །རྣམ་མང་རྣམ་ཐར་རྒྱ་མཚོའི་གཏེར་གྱུར་ཅིང༌། །ཀུན་མཁྱེན་ཀུན་ཏུ་བཟང་པོའི་ཕྲིན་ལས་ཅན། །གཞན་ཕྱིར་གཞན་ཕན་མཛད་པ་མཆོག་བརྙེས་པའི། །འཕགས་ཆེན་འཕགས་པའི་གཙོ་མཆོག་འཇམ་པའི་ལྷ། །སྒྲིབ་གསུམ་ཉེས་པའི་གཡུལ་ལས་རྣམ་པར་རྒྱལ། །རྒྱལ་བའི་སྲས་ཀྱི་སྤྱོད་ཡུལ་ཀུན་ལ་དབང༌། །དབང་བཅུའི་ཡོན་ཏན་ཆེ་བ་བསམ་མི་ཁྱབ། ཁྱབ་བདག་རྒྱལ་བ་ཀུན་དངོས་འཇམ་པའི་ལྷ། །ཡེ་ཤེས་
མཆོག་བརྙེས་མཆོག་གཟིགས་བློ་གྲོས་མཆོག །སྤངས་པ་རྒྱ་ཆེན་མཐུ་ཆེན་བདག་ཉིད་ཆེ། །མཁྱེན་བརྩེའི་དཔལ་མངའ་དཔལ་ལྡན་སྨྲ་བའི་དཔལ། །མགོན་པོ་ལྷ་ཡི་ལྷར་གྱུར་འཇམ་པའི་ལྷ། །གང་འདུལ་ཐབས་ལ་མཁས་པ་བསམ་མི་ཁྱབ། །གཟུངས་དང་ཏིང་འཛིན་འཇུག་པ་བསམ་མི་ཁྱབ། །མངོན་ཤེས་སྟོབས་ཀྱི་མཐུ་ནུས་བསམ་མི་ཁྱབ། །ཡོན་ཏན་བསམ་གྱིས་མི་ཁྱབ་འཇམ་པའི་ལྷ། །ཟག་བཅས་ཁམས་ལ་ཆགས་པ་མ་མཆིས་ཤིང༌། །ཟག་མེད་ཆོས་ལ་རློམ་སེམས་མི་མཛད་དེ། །ཟག་དང་མ་ཟག་རྣམ་པར་རྟོག་མེད་པའི། །ཟག་བྲལ་བློ་གྲོས་ཆེ་ལྡན་འཇམ་པའི་ལྷ། །ཡུལ་དང་ཡུལ་ཅན་གཉིས་མེད་སྤྲོས་བྲལ་ཀློང༌། །ཡེ་ཤེས་མཆོག་གི་གཟིགས་པས་རྟག་རོལ་ཞིང༌། །ཡིད་བཞིན་ནོར་ལྟར་འབད་རྩོལ་ཀུན་བྲལ་བའི། །ཡ་མཚན་རྣམ་ཐར་ཆེ་མངའ་འཇམ་པའི་ལྷ། །འོད་སྟོང་ལྡན་ཞིང་ཞིང་རྣམས་སྣང་བར་མཛད། །མཚན་སྙན་རབ་གྲགས་གྲགས་པ་དོན་དང་ལྡན། །ལྷ་བརྒྱས་གུས་མཆོད་མཆོད་འོས་ཡོངས་ཀྱི་གཙོ། །འཕགས་ཆེན་ཆེན་པོ་གསུམ་ལྡན་འཇམ་པའི་ལྷ། །སྨྲ་བའི་ཁྱུ་མཆོག་ལོག་སྨྲ་ཟིལ་གྱིས་གནོན། །ཚངས་པའི་དབྱངས་ལྡན་ཚངས་པ་ཀུན་ལས་ལྷག །ངག་གི་དབང་ཕྱུག་ངག་རྣམས་ཀུན་གྱི་བདག །མཁྱེན་ལྡན་མཁྱེན་རབ་མཆོག་སྩོལ་
འཇམ་པའི་ལྷ། །ལམ་མིན་ལམ་དུ་གོལ་བའི་ཕྱོགས་བཅོམ་སྟེ། །ལམ་མཆོག་ཚུལ་གཉིས་སྣང་བས་གསལ་མཛད་ཅིང༌། །ལམ་ཀུན་ཐེག་ཆེན་ངང་དུ་ཚུལ་གཅིག་པའི། །ལམ་གྱི་བགྲོད་པ་ཀུན་དམིགས་འཇམ་པའི་ལྷ། །ཤིང་དབང་དྲུང་སོགས་བདེ་གཤེགས་སྐུར་བཞུགས་ཤིང༌། །གནས་རིས་གཞན་དུ་ཉན་རང་གཟུགས་སུའང་གནས། །གཟུགས་རྣམས་ཀུན་ཏུ་འཆར་བའི་ཡེ་ཤེས་གཟུགས། །ལྷ་མཆོག་གཟུགས་ཀྱི་བདག་ཉིད་འཇམ་པའི་ལྷ། །གཏམ་གྱི་ཉེས་པ་ཀུན་སྤངས་ཟབ་མོའི་གཏམ། །ངག་གི་དྲི་མ་ཀུན་ཟད་རྡོ་རྗེའི་ངག །ཚིག་གི་འཁྲུལ་བ་ཀུན་བྲལ་ཡང་དག་ཚིག །ལྷ་མཆོག་གསུང་གི་དབང་ཕྱུག་འཇམ་པའི་ལྷ། །རྣམ་པར་མི་རྟོག་ཆོས་ཉིད་གཟིགས་པའི་ཐུགས། །རྣམ་པ་ཀུན་མཁྱེན་ཇི་སྙེད་མཁྱེན་པའི་ཐུགས། །རྣམ་གཉིས་ཟུང་འཇུག་སྒྲིབ་མེད་ཡེ་ཤེས་ཐུགས། །རྣམ་དག་ཐུགས་ལ་མངའ་བརྙེས་འཇམ་པའི་ལྷ། ཁྱོད་ལ་གུས་པའི་བློ་བཞག་སྟེ། ཁྱོད་ཀྱི་ཡོན་ཏན་བསྔགས་པའི་གཏམ། ཁྱོད་ཉིད་དགྱེས་སླད་འདི་བྱས་པས། ཁྱོད་ཞལ་མངོན་སུམ་མཐོང་བར་ཤོག །ཅེས་པའང་གཞོན་ནུ་འཇིགས་མེད་པས་ཚིག་ཕྲེང་བྱིས་པའི་རྩེད་མོར་སྤེལ་བ་དགེ། མངྒ་ལཾ།། ༈ །།སོར་མོའི་ཞགས་པ་ནང་དུ་བསྡུས་ནས་ནི། །བྲང་རུས་ཡང་དང་ཡང་དུ་
བརྡེག་བཞིན་དུ། །སྐལ་ངན་བདག་ནི་ཉེས་པས་བཅོམ་མོ་ཞེས། །ལག་ན་རལ་གྲིའི་སྤྱན་སྔར་རྟག་ཏུ་ངུ༌། །སྐྱེ་བོ་རྒན་རབས་རྣམས་ཀྱི་འདུན་སར་ཡང༌། །ཕོངས་པས་ཡང་ཡང་འབོད་པ་ཐོས་གྱུར་ཚེ། །བཏུང་བའི་ཆུ་རྒྱུན་རིང་པོར་སྦྲེང་བྱེད་ན། །ལག་ན་རལ་གྲིའི་དབང་ཕྱུག་ལྟ་ཅི་སྨོས། །བདག་ནི་དེ་ལྟར་ཡིད་ལ་རབ་བྱས་ཏེ། །བཀྲེན་ཆེན་དེ་རིང་སྐྱོབས་ཞེས་སྟོང་པོས་ཀྱང༌། ཁྱོད་ཀྱི་སྙན་ལམ་གྲགས་པར་མ་གྱུར་བཞིན། །བཞུགས་པའི་ཚུལ་འདི་ཅི་ལས་གྱུར་པ་ལགས། །བདག་ནི་ནོར་གྱི་ལོངས་སྤྱོད་ཆེན་པོ་མིན། །ཉེ་དུ་མཛའ་བཤེས་མང་པོས་སྲུང་བའང་མིན། །དེ་ལྟ་མོད་ཀྱི་ཁྱོད་ཐུགས་བརྩེ་བ་ནི། །བསོད་ནམས་ཅན་ལ་ཕྱོགས་ལྷུང་མིན་ཞེས་ཐོས། །འོན་ཏེ་བདག་ནི་ཁྱོད་འབངས་ཟུངས་ཤིག་ཅེས། །གདུང་བའི་སྨྲེ་སྔགས་རྟག་ཏུ་བཏོན་གྱུར་ཀྱང༌། །མཚན་དཔེའི་འཛུམ་ཞལ་གཅིག་ཀྱང་མ་བསྟན་ན། །ཉམ་ཐག་འགྲོ་ལ་ཁྱོད་ཐུགས་མི་བརྩེའམ། །གདོང་པ་མཆི་མས་གཡོག་པའི་རྣམ་འགྱུར་བཅས། །ཡུས་ཀྱིས་བརྣང་ཞིང་བརྣང་ཞིང་ཁྱོད་བོས་ཀྱང༌། །བདག་གཙུག་ཕྱག་གིས་ལན་གཅིག་ཉུག་པའང་མེད། །དེ་སླད་བདག་ནི་སྐལ་པ་ངན་པ་ལགས། །མ་བཀུར་མ་བསྙེན་པར་ཡང་འགྲོ་བ་མང༌། །ཉེས་སྤྱོད་ཆེན་པོའི་ཞུགས་ལས་སྐྱོབ་མཛད་མོད། །བདག་ནི་ཁྱོད་
ཞབས་གུས་པས་མཆོད་བཞིན་དུ། ཁྱོད་ཀྱིས་སླར་ལ་ཁོ་བོ་ཅིའི་ཕྱིར་བཏང༌། །འཇིགས་པ་ཆེན་པོའི་གཡང་ནི་བདག་གིས་ཐོབ། །སྡིག་ལྟུང་ཆེན་པོའི་ཐོག་ནི་བདག་ལ་བབས། །བདག་འདྲ་ཁྱོད་ཀྱིས་ཐུགས་བརྩེས་མ་བཟུང་ན། །སྙིང་རྗེ་ཆེན་པོའི་ཡུལ་དེ་སུ་ཞིག་ཡིན། །མ་བོས་བཞིན་དུ་སེམས་ཅན་ཁམས་མང་པོ། །སྲིད་པ་ཇི་སྲིད་གཏོང་བར་མི་བགྱི་ཞེས། ཁྱོད་ཀྱི་ཐུགས་བསྐྱེད་དམ་བཅའ་མ་འགོག་ན། ཁོ་བོ་སེམས་ཅན་གྲངས་སུ་མེད་དམ་ཅི། །ཅི་སྟེ་སྐལ་བ་ངན་པས་ནོངས་ཞེ་ན། །སྐལ་བ་མཆོག་ལ་ཁྱོད་ཞལ་མ་བསྟན་ཀྱང༌། །རང་གི་ཡོན་ཏན་ཉིན་རེ་བཞིན་དུ་འཕེལ། །དེ་སླད་སྐལ་ངན་བདག་ལ་སྐྱོབ་མཛད་གསོལ། །ཞེས་འཇིགས་མེད་པས་སོ།། ༈ །།གང་གི་ཞབས་སེན་ཟླ་གཞོན་གསར་པའི་དཀྱིལ་འཁོར་ཆེ། །བློ་ཆེན་མཁས་དབང་མིག་གསུམ་འབུམ་གྱི་ཅོད་པན་དུ། །ཕུ་དུད་བྱ་བའི་རྣམ་འགྱུར་སྟོང་གིས་མཆོད་གྱུར་པ། །ལག་ན་རལ་གྲིའི་འཁྲི་ཤིང་འཛིན་དེས་ཤིས་པར་མཛོད། །ཕུལ་བྱུང་འཛད་མེད་རྣམ་དཀར་སྤྱོད་པའི་ཆུ་གཏེར་ཆེའི། །སྙིང་པོར་གྲུབ་པ་ཡེ་ཤེས་ཉི་མ་འབར་བའི་སྐུ། །མི་ཟད་མཚན་དཔེའི་སྣང་བ་ཁྲག་ཁྲིག་འཇོ་བའི་དཔྱིད། །མིག་གི་བདུད་རྩི་དགའ་སྟོན་མཚུངས་མེད་འཇམ་པའི་ལྷ། །སྐུ་ཡི་ཆ་ཤས་བ་སྤུའི་ལྗོན་བཟང་རེ་རེ་ཡང༌། །ལེགས་བྱས་བསོད་ནམས་བྱེ་བའི་ཆུ་གཏེར་ལས་
འོངས་པ། །དེ་ཡི་ཕྱིར་ནི་ལྷ་ཁྱོད་བསོད་ནམས་ཕུང་པོ་ཞེས། །སྟོབས་བཅུ་མངའ་བ་ཡོངས་ཀྱི་མདུན་སར་གྲགས་མིན་ནམ། །ཇི་སྙེད་རྒྱལ་དང་རྒྱལ་སྲས་ཡོངས་ཀྱི་ཡོན་ཏན་མི་ཟད་གངས་ཆེན་མཚོ། །ངོ་མཚར་མཚན་གྱི་རི་མོ་འབུམ་བཀྲ་རྟག་ཆེན་གཞོན་ནུའི་ལང་ཚོ་རུ། །སྣང་བའི་འཕྲུལ་ཆེན་བསམ་གྱིས་མི་ཁྱབ་ཟུང་འཇུག་ཡེ་ཤེས་སྒྱུ་མའི་སྐུ། །མཁའ་ཁྱབ་རབ་འབྱམས་རྒྱལ་བའི་ཞིང་ན་ཅིར་ཡང་སྣང་མཛད་འཇམ་པའི་ལྷ། །དྲི་མེད་ཚངས་དབྱངས་ཡན་ལག་བརྒྱད་ལྡན་གང་གཱའི་ཀླུང༌། །བཀྲ་ཤིས་ངོ་མཚར་བྱེ་བའི་རླབས་ཕྲེང་རྣམ་གཡོ་བ། །ཕུལ་འབྱུང་ལེགས་ལམ་གདོང་པ་བཞི་པའི་ཞབས་བསིལ་དུ། །སྦྲེང་ལ་མི་བསྙེད་བློ་གྲོས་ཆེན་པོ་འཇམ་པའི་དཔལ། །སུམ་ཅུ་རྩ་གཉིས་མཚན་བཟང་མེ་ཏོག་གསར་པའི་ཕུལ། །མགྲིན་པའི་ཆོས་དུང་དྲི་མེད་མེ་ཏོག་མནྡྷ་ར། །ཟབ་ཅིང་རྒྱ་ཆེའི་ལེགས་བཤད་སྦྲང་རྩིའི་སྙིང་པོ་ཅན། །སྐལ་བཟང་རིགས་གསུམ་རྐང་པ་དྲུག་པའི་གསོས་སུ་ཆེ། །རྩོལ་རྟོག་འཆིང་བ་དབྱིངས་སུ་བརྟུལ་ཡང་རྨད་བྱུང་བརྩོན་པས་གཞན་ཕན་མཛད། །ཡི་གེ་གཅིག་ཙམ་བསྟན་པ་མེད་ཀྱང་ཚིག་དང་ཡི་གེའི་སྤྲོས་པར་སྣང༌། །སྒྲ་དང་སྒྲར་འཛིན་མཚན་མ་མེད་ཀྱང་ཡན་ལག་དྲུག་ཅུའི་རྒྱལ་རྔ་བརྡུང༌། ཁྱོད་ཀྱི་ཡུལ་འདི་འགལ་བར་སྣང་ཡང་དོན་ལ་འགལ་བ་ཆ་ཙམ་མེད། །ཚིག་དང་དོན་ཞེས་རང་གི་ངོ་བོས་མ་གྲུབ་ཀྱང༌། །
གནས་ལུགས་རང་བཞིན་ཟབ་མོ་མཚོན་པའི་ཡི་གེ་ཨ། །སྒྱུ་འཕྲུལ་དྲྭ་བ་ཡི་གེ་སྤྲིན་གྱི་རོལ་མོ་རུ། །མངོན་པར་སྣང་བའི་བྱེད་པོ་མཚུངས་མེད་འཇམ་པའི་ལྷ། །དཔག་པར་དཀའ་བའི་ཡེ་ཤེས་མཆོག་ནི་ཕྱོགས་ཀྱི་ཆུ་གཏེར་ཟབ་མོ་བཞིན། །ཀུན་གཟིགས་བློ་གྲོས་རྒྱ་ཆེན་མཆོག་ནི་མཐའ་མེད་ལྷ་ཡི་རྫིང་རིང་བཞིན། །གཟིགས་པ་སྒྲིབ་མེད་མཁྱེན་རབ་མཆོག་ནི་སྤྲིན་མེད་སྟོན་ཀའི་ཟླ་རྒྱས་བཞིན། །ཆགས་ཐོགས་བྲལ་བའི་སྤོབས་པ་མཆོག་ནི་འཇིགས་བྱེད་རལ་གྲིའི་འཁྲུལ་འཁོར་བཞིན། །སྤྲོས་པ་ཀུན་བྲལ་ཆོས་ཉིད་ཞི་བའི་ནམ་མཁའ་ལ། །སྟོབས་བཅུའི་ཡེ་ཤེས་ཕྱོགས་ཀྱི་མུ་ཁྱུད་རྒྱས་པའི་དལ། །རྟག་ཁྱབ་ལྷུན་གྲུབ་ཕྲིན་ལས་སྣང་བ་སྟོང་བདལ་བ། །ས་བཅུའི་ཡེ་ཤེས་གཉའ་ཤིང་འཛིན་རིའི་བླ་ན་མཐོ། ཁྱོད་སྐུ་ལན་ཅིག་ཡིད་ལ་བྱས་པས་བློ་གྲོས་སྣང་བ་སྟོང་དུ་འཇོ། ཁྱོད་མཚན་ལན་ཅིག་རྣ་བར་སོན་པས་ངན་འགྲོར་རྒུད་ལ་རྣམ་པར་སྨོད། ཁྱོད་ཞབས་ལན་ཅིག་སྤྱི་བོར་བཅིངས་པས་ཡིད་ལ་ཡེ་ཤེས་མཆོག་ཏུ་སྩོལ། ཁྱོད་ཀྱི་རྨད་བྱུང་མཛད་པའི་རླབས་ཆེན་ཕྱོགས་དང་དུས་ཀྱི་ཁོངས་སུ་གཡོ། །རྣམ་དཀར་མཛད་བཟང་བཅུ་གཉིས་བདུན་གྱི་མ་དྲོས་ཀླུང༌། །ལྷ་ཡི་ལྷར་གྱུར་སྟོབས་བཅུའི་དབང་ཕྱུག་དཔག་བསམ་ཤིང༌། །གྲངས་ཀྱི་ཡུལ་དུ་མཛའ་བ་མིན་པའི་འབྱུང་གནས་ཆེ། །གང་ཁ་དབང་བསྒྱུར་འཕགས་པའི་དེད་དཔོན་
འཇམ་པའི་ལྷ། ཁྱོད་ཀྱི་ཡོན་ཏན་རྗེས་སུ་དྲན་ཞིང་ཡང་ཡང་ཡིད་ལ་རབ་བྱས་ཏེ། །དད་པའི་ཆུ་གཏེར་སྙིང་ལ་བསྐྲུན་ཚེ་མཆི་མའི་རྦ་རླབས་དྲག་ཏུ་གཡོ། །མོས་བློའི་ཟླ་གཞོན་གསར་དུ་ཤར་ཚེ་ལག་པའི་པདྨོ་ཀུན་ནས་ཟུམ། །གུས་པའི་ཆུ་འཛིན་ཡིད་ཁར་འཁྲིག་ཚེ་བསྔགས་བརྗོད་མེ་ཏོག་ཆར་དུ་སྙིལ། །བསླབ་གསུམ་ལུས་ཟུང་རིད་ཅིང་སྐམས་པའི་ཉམ་ཐག་གཞོན་པ་ནགས་ན་འབོད། །འཇམ་པའི་རྡོ་རྗེ་སྤྲིན་གྱི་འཛུམ་དཀར་གང་དུ་མོས་པའི་གདོང་ཕྱོགས་ནས། །གསོལ་འདེབས་ངག་གི་རྒྱུད་མངས་སྙན་པོས་ཕུ་དུད་རི་མོར་རྟག་བགྱིད་ན། །གཟུངས་དང་སྤོབས་པའི་ཆར་རྒྱུན་བསིལ་བས་བདག་སོགས་ཀུན་ནས་ངོམས་པར་མཛོད། །དབྱངས་བདུན་འགྱུར་བ་འབུམ་དུ་སྒྲོགས་པའི་བསྟོད་ཚིག་གླུ། །མགྲིན་པའི་ལམ་ནས་ལྷོད་ལྷོད་འཇོ་བའི་ལེགས་བྱས་འདིས། །ཇི་སྙེད་འགྲོ་བའི་ཡིད་ཀྱི་མུན་པ་ཀུན་བསལ་ཏེ། །སྟོབས་བཅུ་མངའ་བའི་རྒྱལ་ཐབས་ཁྲིལ་དབང་བསྒྱུར་ཤོག །ཅེས་པའང་གཞོན་ནུ་འཇིགས་མེད་བསྟན་པའི་རྒྱལ་མཚན་དུ་འབོད་པས་གང་དྲན་ལྷུག་པར་སྦྱར་བ་མངྒ་ལཾ།། ༈ །།ཟླ་བྲལ་བླ་མ་ཁྱབ་བདག་འཇམ་དཔལ་དབྱངས། །དབང་དང་རྣམ་ཐར་མཐའ་ཡས་རང་དབང་མཛད། །རྣམ་དག་ལམ་བཟང་བསྟན་པས་གཞན་ཕན་མཛད། །ཚངས་དང་ལྷ་དབང་བརྒྱ་ཕྲག་གང་ལ་དད། །མཐའ་བྲལ་ལྟ་བས་མཐར་ལྟ་ལྷག་མར་བྱས། །རབ་ཟབ་
གདམས་ངག་ཚངས་དབྱངས་རྔ་སྒྲས་འཆད། །གང་ཞལ་དྲན་པས་གནས་ངན་གཡང་ལས་དྲང༌། །གྲགས་པ་རབ་འབར་དཔལ་མངའ་རྒྱལ་སྲས་དབང༌། །དཔག་བསམ་རྒྱས་ལྟར་གང་བསམ་སྩལ་བར་མཛད། །བསམ་གཏན་གྲངས་མང་མངའ་མཛད་འགྲན་ཟླ་བྲལ། །མྱང་འདས་རྒྱལ་ཐབས་ལ་དབང་མཐའ་ལས་འདས། །རྟག་ཆད་ལྟ་ངན་མཐར་མཛད་སྨྲ་བསམ་དང༌། །རྣམ་བྲལ་རྣམ་གྲངས་མ་ལགས་གསལ་བར་མཛད། །ཨ་ངེས་པའོ། །མི་ཤིགས་ཞི་བའི་དབྱངས་ཉིད་ཇི་བཞིན་གཟིགས། །མི་དམིགས་ཏིང་འཛིན་ཉི་མའི་གཟི་བརྗིད་ཀྱིས། །གཉིས་འཛིན་སྤྲིན་གྱི་འཁྲི་ཤིང་འཇིག་བགྱིད་ཅིང༌། །མི་འཇིགས་བཞི་ཡིས་ཤེས་པའི་གཟི་བྱིན་སྦྱིན། །ཨི་ངེས་པའོ། །ཀུན་འབྱུང་ཆུ་ཀླུང་དྲུང་ཕྱུངས་བདུད་དཔུང་འདུལ། །སྐུ་གསུམ་ཀུན་འདུས་རྫུ་འཕྲུལ་ནུས་མཐུ་གྲུབ། །ཀུན་ཏུ་ཕུལ་བྱུང་སྐུ་གསུང་ཐུགས་གསུམ་གྲུབ། །སྒྱུ་འཕྲུལ་འབུམ་འབྱུང་གཞུང་ཀུན་ཐུགས་སུ་ཆུད། །ཨུ་ངེས་པའོ། །རྟེན་འབྲེལ་ལེགས་ཤེས་བདེན་མེད་ངེས་མཁྱེན་རྗེ། །ཐེག་ཆེན་སྤེལ་བྱེད་བརྩེ་ཆེན་ཡེ་ཤེས་སྟེར། །དགེ་ལེགས་མེ་ཆེན་མཆེད་བྱེད་བདེ་ཆེན་གཏེར། །སྲེད་ལེན་ཉེས་བསྲེགས་ངེས་ལེགས་ཆེས་ཆེར་བརྙེས། །ཨེ་ངེས་པའོ། །སྟོབས་སོགས་ཡོངས་རྫོགས་འགྲོ་དོན་ཡོངས་སྤྱོད་མགོན། །སྒྲོ་འདོགས་ཡོངས་
གཅོད་ལོག་རྟོག་ཚོགས་འཇོམས་མཆོག །ཉོན་མོངས་ཚོགས་འཇོམས་བློ་གྲོས་མཆོག་སྩོལ་ཁྱོད། །ཆོས་འཁོར་ཡོངས་བསྐོར་ཆོས་མཆོག་དོན་མཐོང་སྦྱོར། །ཨོ་ངེས་པའོ། །དེ་སྐད་ཚིག་བཟང་ལེགས་སྐྱེ་མས། །དོན་བཟང་ནམ་མཁའི་སྙེ་མ་ཏོག །དགེ་ལེགས་བྱེ་བའི་བསིལ་གྲིབ་ཅན། །འཇམ་མགོན་དགྱེས་པའི་དཔྱིད་དུ་བསྒྲིགས།། ༈ །།ཇི་ལྟ་ཇི་ལྟར་གུས་པས་རབ་མཆོད་པ། །དེ་ལྟ་དེ་ལྟར་བྱམས་པའི་ཕྱག་སྐྱོང་བ། །འཇམ་དཔལ་དཔའ་བོ་ལྷ་ཡི་ལྷ་མཆོག་གིས། །སྐྱབས་མེད་བདག་ལ་སྐྱོབ་པར་མཛད་དུ་གསོལ། །ཇི་ལྟ་ཇི་ལྟར་སྲིད་པའི་གྲོང་གནས་པ། །དེ་ལྟ་དེ་ལྟར་ཉོན་མོངས་རྣམས་འཕེལ་བའི། །བདག་དང་བདག་འདྲའི་འགྲོ་ལ་བརྩེར་དགོངས་ཏེ། །སྐྱབས་མཛོད་སྐྱབས་གསུམ་ཀུན་འདུས་འཇམ་པའི་ལྷ། །ཇི་ལྟ་ཇི་ལྟར་བྱ་བའི་ལམ་གནས་པ། །དེ་ལྟ་དེ་ལྟར་སྡིག་ལྟུང་རྣམ་འཕེལ་བའི། །སྐལ་ངན་བདག་ལ་ཐུགས་རྗེས་བརྩེར་དགོངས་ཏེ། །སྐྱབས་མཛོད་སྐྱབས་གསུམ་ཀུན་འདུས་འཇམ་པའི་ལྷ། །ཇི་ལྟ་ཇི་ལྟར་ཚེ་ཡི་གཞུག་ཕྱིན་པ། །དེ་ལྟ་དེ་ལྟར་རྟག་འཛིན་རྣམ་འཕེལ་བའི། །བླུན་ཆེན་བདག་ལ་ཐུགས་རྗེས་བརྩེར་དགོངས་ཏེ། །སྐྱབས་མཛོད་སྐྱབས་གསུམ་ཀུན་འདུས་འཇམ་པའི་ལྷ། །ཇི་ལྟ་ཇི་ལྟར་མི་ཡི་རྟེན་རྙེད་ཀྱང༌། །དེ་ལྟ་དེ་ལྟར་ཆོས་མིན་སྤྱོད་འཕེལ་བའི། །བྱུར་ངན་བདག་ལ་ཐུགས་རྗེས་བརྩེར་དགོངས་ཏེ། །
སྐྱབས་མཛོད་སྐྱབས་གསུམ་ཀུན་འདུས་འཇམ་པའི་ལྷ། །ཇི་ལྟ་ཇི་ལྟར་ཟབ་མོའི་ཆོས་ཉན་པ། །དེ་ལྟ་དེ་ལྟར་ཆོས་ལས་བློ་ཉམས་པའི། །ཆོས་དྲེད་བདག་ལ༴༌།སྐྱབས༴༌།ཇི་ལྟ་ཇི་ལྟར་ཐོས་པའི་སྒོ་བསྟན་པ། །དེ་ལྟ་དེ་ལྟར་ཡིད་གཉིས་རྣམ་འཕེལ་པའི། །རྨོངས་ཆེན་བདག་ལ༴༌།སྐྱབས༴༌།ཇི་ལྟ་ཇི་ལྟར་དགེ་བའི་བཤེས་མཐོང་བ། །དེ་ལྟ་དེ་ལྟར་སྡིག་གྲོགས་ལ་དགའ་བའི། །ཕུང་འདྲེན༴༌།སྐྱབས་མཛོད༴༌།ཇི་ལྟ་ཇི་ལྟར་བདུད་ལས་རིང་འདོད་ཀྱང༌། །དེ་ལྟ་དེ་ལྟར་བདུད་ཀྱིས་ཟིལ་གནོན་པའི། །མཐུ་མེད༴༌།སྐྱབས༴༌།ཇི་ལྟ་ཇི་ལྟར་ཆགས་པའི་དགྲ་བྱུང་བ། །དེ་ལྟ་དེ་ལྟར་གཉེན་པོའི་ཕྱོགས་ཉམས་པའི། །ནུས་མེད༴༌།སྐྱབས༴༌།ཇི་ལྟ་ཇི་ལྟར་ཁྲོ་བའི་དགྲ་ལྡང་བ། །དེ་ལྟ་དེ་ལྟར་བཟོད་པའི་མཚོན་རུལ་བའི། །སྐལ་དམན༴༌།སྐྱབས་མཛོད༴༌།ཇི་ལྟ་ཇི་ལྟར་ཀུན་རྨོངས་མེས་གདུངས་པ། །དེ་ལྟ་དེ་ལྟར་ཤེས་རབ་མཚོ་སྐམ་པའི། །སྐྱབས་མེད༴༌།སྐྱབས་མཛོད༴༌།ཇི་ལྟ་ཇི་ལྟར་བག་མེད་མཚོན་ལྡང་བ། །དེ་ལྟ་དེ་ལྟར་དགེ་བའི་གོ་རལ་བའི། །སྐལ་དམན་བདག་ལ༴༌།སྐྱབས༴༌།ཇི་ལྟ་ཇི་ལྟར་ཐེག་ཆེན་གཞུང་བསམ་པ། །དེ་ལྟ་དེ་ལྟར་སྙིང་རྗེའི་བློ་ཉམས་པའི། །གོ་ལོག༴༌།སྐྱབས་མཛོད༴༌།ཇི་ལྟ་ཇི་ལྟར་རྒྱལ་བའི་གཞུང་འདྲིས་པ། །དེ་ལྟ་དེ་ལྟར་འདྲེན་པ་བརྗེད་ངས་པའི། །མ་
རབས༴༌།སྐྱབས༴༌།ཇི་ལྟ་ཇི་ལྟར་ཆོས་ལམ་སློབ་འདོད་པ། །དེ་ལྟ་དེ་ལྟར་ཆོས་ཀྱི་གེགས་ལྡང་བའི། །ལས་ངན༴༌།སྐྱབས་མཛོད༴༌།ཇི་ལྟ་ཇི་ལྟར་ཉེས་པའི་སྒོ་བྱུང་ཡང༌། །དེ་ལྟ་དེ་ལྟར་ཉེས་ལ་སླར་འཇུག་པ། ཁྲེལ་མེད༴༌།སྐྱབས༴༌།ཇི་ལྟ་ཇི་ལྟར་སེམས་འདུལ་ཐབས་བསམ་ཀྱང༌། །དེ་ལྟ་དེ་ལྟར་རང་རྒྱུད་ཆེས་གྱོང་བའི། །གཞུང་ངན༴༌།སྐྱབས་མཛོད༴༌།ཇི་ལྟ་ཇི་ལྟར་དམ་པའི་གྲལ་བཞག་པ། །དེ་ལྟ་དེ་ལྟར་ཟོག་པོའི་གྲལ་རྒྱུག་པའི། །ཐུར་བལྟས་ཡ་བོ་བརླག་འདྲེ་ང་འདྲ་ལ། །ཐུགས་རྗེས་གཟིགས་ཤིག་རྗེ་བཙུན་ཐུགས་རྗེ་ཅན། །ཞེས་པའང་ཕུང་བཤིག་གི་སྤྲང་རྒན་འཇིགས་མེད་པས་མགོན་པོ་འཇམ་དཔལ་དབྱངས་ལ་སྨྲེ་སྔགས་ཀྱིས་གསོལ་འདེབས་གྲོང་ཚིག་དུམ་ཆོད་མར་བྲིས་པའོ།། ༈ །།མཁྱེན་གཉིས་ཡེ་ཤེས་དམ་པའི་ཟློས་གར་ནི། །ཐོགས་མེད་གཟུགས་བརྒྱའི་རོལ་མོར་མངོན་སྣང་ཡང༌། །དབང་སྔོན་རལ་གྲིའི་འཁྲུལ་འཁོར་འཆང་བའི་གར། །འཇམ་པའི་དབྱངས་ཞེས་གྲགས་པས་མཛེས་དེར་འདུད། །དམར་སེར་ཉི་མ་བྱེ་བའི་གཟི་འོད་དང༌། །འཛུམ་སྒེགས་གཞོན་ནུའི་རྣམ་རོལ་མི་ཟད་པ། །ཟུང་འཇུག་སྒྱུ་འཕྲུལ་དྲྭ་བའི་ཡེ་ཤེས་སྐུ། །སྣ་ཚོགས་དག་ཆེན་སྤྲུལ་པའི་གར་གྱིས་རྩེན། །ཕུལ་བྱུང་ཞལ་གྱི་ཟླ་གཞོན་དང་བའི་ངོགས། །ཡིད་འོང་མཛོད་སྤུའི་ཟླ་རྒྱས་འདི་སྣང་སྟེ། །ཟླ་ཞུན་
ཟླ་བ་གཉིས་པའི་སྙིང་པོ་ཅན། །དཔའ་ཆེན་ཁྱོད་ཀྱི་ལེགས་བྱས་དཔུང་པས་བཟུང༌། །དོ་ཀེར་རྩེ་མོ་ལྔ་པའི་རི་དབང་ལ། །རིན་ཆེན་མེ་ཏོག་འཛུམ་པའི་ག་ཤལ་བརྒྱ། །འཕྱང་འཕྲུལ་དྲ་བ་བསྟར་བའི་འཇོ་སྒེགས་འདིས། །ངོ་མཚར་ཞལ་གྱི་གྲོང་ཁྱེར་མཛེས་པར་བྱས། །ལྡེམ་ལྡེམ་རལ་པ་བསྐྱོད་པའི་ཟུར་ཕུད་དང༌། །ལམ་ལམ་རལ་གྲིའི་འཁྲི་ཤིང་རྣམ་གཡོ་བས། །ཡང་ཡང་ནམ་མཁའི་ལམ་འདི་མཛེས་བྱས་ཏེ། །མང་མང་ལྷ་བརྒྱས་དཀྱིལ་འཁོར་ཟིལ་གྱིས་གནོན། །མི་འཇིགས་གདོང་པ་ལྔ་པའི་བརྟུལ་བཞུགས་ཀྱིས། །མགྲིན་པ་ཆོས་ཀྱི་དུང་ཆེན་གཟེང་བསྟོད་ཅིང༌། །འཁྲིལ་ལྡེམ་སྐུ་ཡི་འགྱིང་ཚུག་ངོམ་བཞིན་དུ། །ཟབ་དོན་གཏམ་གྱི་སྒྲ་དབྱངས་འབུམ་དུ་འཇོ། །གསེར་བཟང་ཕྲེང་བ་དངར་བའི་དོག་པ་ལ། །སྣང་བ་རྣམ་སྡུད་ནོར་བུའི་ཕྲ་ཚོམ་ཅན། །རྨད་བྱུང་མགུལ་པའི་རྒྱན་དུ་སྤུད་བྱས་པས། །ལྷ་དབང་ནོར་བུའི་གཙུག་ཕུད་ལན་བརྒྱར་བསྐལ། །རྐང་གདུབ་འཁྱུད་མོས་བཅིངས་པའི་ཞབས་པདྨོ། །བཀྲ་ཤིས་རྩིབས་སྟོང་འཁྱིལ་བའི་འོད་རིས་ཅན། །ཚངས་དབང་ཟུར་ཕུད་འཛུམ་གྱིས་བསུ་བཞིན་དུ། །སྐྲ་རྒྱན་ནོར་བུའི་འོད་ཀྱིས་ཕྱི་བ་བཞིན། །དེ་སླད་བདག་ཀྱང་ཁྱོད་ཞལ་རྗེས་དྲན་ཏེ། །མིག་གི་ཁོར་ཡུག་གཡོག་པའི་ཆུ་རླབས་དང༌། །སོར་མོའི་ཡལ་འདབ་ཟུམ་
པའི་སྙིམ་པ་ཡིས། །འཕགས་ཆེན་ཁྱོད་ཀྱི་ཞབས་པད་རི་མོར་བགྱི། །མཐོ་བ་ལྷུན་པོའི་རྩེ་འདྲའི་ཕྲག་པ་ནས། །གྱེས་པ་དཔག་བསམ་འདབ་འདྲའི་ཕྱག་བརྐྱང་སྟེ། །གློག་གི་སྣང་བ་ལྟ་བུའི་སོར་མོ་ཡིས། །བདག་གཙུག་ལན་བརྒྱར་ཉུག་པའི་བཀའ་དྲིན་སྩོལ། །སིལ་ཁྲོལ་གདུབ་འཁོར་འཆང་བའི་ཡིད་འོང་ཞབས། །མཉེན་ལྕུགས་གནག་བག་མེད་པའི་མཚར་སྡུག་བཅས། །དབང་ཕྱུག་རལ་པའི་བླ་ན་ཟླ་བ་བཞིན། །མི་འབྲལ་སྤྱི་བོའི་སྤོ་འདིར་རྟག་གཞེས་ཤིག །ཅེས་པའང་རྗེ་བཙུན་འཇམ་པའི་དབྱངས་ལ་མི་ཕྱེད་དད་པའི་ཤུགས་ཅན་སྤྲང་སྨྱོན་འཇིགས་མེད་པས་བྲིས་པ་དགེ། ༈ །།གློག་གི་སྒྲོན་མ་འབར་བའི་འོད་ཟེར་གཟིས། །མཚུངས་ཟླར་བཀུག་པ་མིན་པའི་སྣང་བ་ལ། །བགྲང་ཡང་ཞིང་ཁམས་རྒྱ་མཚོས་མི་ཐུག་པ། །འཇམ་དཔལ་དཔའ་བོ་མཚན་རྫོགས་སྐུ་རུ་བཞུགས། །དཀར་དང་ལེ་བརྒན་ཕྱོགས་སུ་མ་ལྷུང་བའི། །འོད་ཟེར་རྣམ་པ་དུ་མའི་ཁ་དོག་ཅན། །ཡིད་ཅན་མོས་པའི་རྗེས་སུ་མཐུན་འཇུག་པས། །མཁའ་ཁྱབ་རྒྱལ་བའི་ཞིང་མང་སྣང་བར་མཛད། །དུས་ཀྱིས་ངེས་པས་བཅིངས་པ་མ་ཡིན་ཞིང༌། །ཕྱོགས་ཀྱིས་གཏུག་པ་མེད་པའི་འོད་ཟེར་ཆེ། །ཚད་ཀྱིས་ངེས་པར་བརྫུ་བའི་སྒྱུ་ཐབས་འདིས། །གང་འདུལ་གདུལ་བྱའི་ཡིད་དབང་མགྲོན་པོར་འགུགས། །ས་དང་ཕ་རོལ་ཕྱིན་པའི་སྒྲ་དབྱངས་བརྒྱ། །འོད་ཀྱི་འཛུམ་རླབས་གཅིག་གིས་མངོན་
བསྒྲགས་ཏེ། །རྒྱ་མཚོའི་ཆུ་རྡུལ་མཉམ་པའི་སེམས་ཅན་ཁམས། །སྨིན་མཛད་ཐབས་མཁས་སྤྱོད་ཡུལ་བསམ་མི་ཁྱབ། །འོད་ཀྱིས་འཇིག་རྟེན་གསུམ་དུ་སྣང་བྱེད་པའི། །ཚངས་ཆེན་ཉི་མ་ཟླ་བའི་ཁ་དོག་ཀྱང༌། །འཛམ་བུའི་གསེར་བཟང་དྲུང་ན་སོལ་ཕུང་བཞིན། །འཕགས་ཆེན་གཞོན་ནུའི་མདུན་སར་མཛེས་པ་མེད། །རྣམ་མང་སྡུག་བསྔལ་ཕུང་པོས་གཟིར་བའི་འགྲོར། །དྲི་མེད་འོད་ཀྱི་བྱུགས་པས་རེག་མ་ཐག །བདེ་ལེགས་མཆོག་གི་དུས་སྟོན་རྣམ་འཕེལ་བའི། །ཚུལ་འདིས་སེམས་ཅན་ཁམས་མང་རྟག་ཏུ་སྐྱོང༌། །གང་ན་སྟོབས་ཀྱི་རྫུ་འཕྲུལ་དབང་བཙན་པའི། །ལྷ་ཆེན་ཉི་མའི་ཟེར་ཀྱང་མ་ཞུགས་པས། ཁོར་ཡུག་མུན་པའི་དཀྱིལ་འཁོར་ཆེན་པོར་ཡང༌། །སྣང་ལྡན་འོད་ཟེར་བྱེ་བས་ལྷམ་མེར་མཛད། །འོད་ཀྱི་དྲྭ་བ་བཀོད་པའི་རྣམ་རོལ་ལ། །མཚན་བཟང་སྣང་བ་འབར་བའི་བདེ་གཤེགས་སྐུ། །གྲངས་མེད་ཞི་བའི་གཟུགས་ཀྱིས་མངོན་བཞུགས་པས། །འཕྲུལ་ཆེན་འདོད་དགུའི་རོལ་མོ་ཅིར་ཡང་འཁྲོལ། །ལང་ཚོས་རྒྱགས་པ་རྒྱས་པའི་ཡིད་ཅན་ལ། །མཛེས་སྡུག་གཟུགས་སྐུའི་རྣམ་འཕྲུལ་སྣང་མཛད་དེ། །འོད་ཟེར་མཆོག་གི་སྣང་བ་མི་ཟད་པས། །ལྷ་དབང་བཞིན་གྱི་མདངས་ཡང་ཟིལ་གནོན་མཛད། །བསོད་ནམས་ཆེན་པོའི་ཐུ་ལས་ཉེར་འོངས་ཤིང༌། །ཡེ་ཤེས་རྒྱ་མཚོའི་བྱིན་གྱིས་རབ་སྦྱང་བ། །འཇམ་དཔལ་གཞོན་ནུའི་
འོད་ཟེར་གསང་བ་ཆེ། །བསྐལ་བར་བརྗོད་ཀྱང་ཐུག་པ་ག་ལ་ཞིག །ཅེས་འཕགས་པ་འཇམ་དཔལ་གྱི་འོད་ལ་ཆེད་དུ་བརྗོད་པ་ཅོ་ལེ་ཉོ་ལེ་བ་འདིའང་སྤྲང་སྨྱོན་འཇིགས་མེད་པས་སོ།། ༈ །།སྐབས་གསུམ་གནས་ཀྱི་ལྷ་མོ་ལེགས་སྐྱེས་མ། །ཕང་བར་འཁྱུད་པའི་ཚིག་བཟང་མིག་སྟོང་པ། །ཁྱོད་ཉིད་མ་ནུ་གཞོན་པའི་དཔྱིད་གཅིག་པུར། །ཤེས་ནས་འབྲས་ཀྱི་སྙེམས་མཆོད་པར་སྤྲོ། །ཅི་འདི་ཉིན་བྱེད་བྱེ་བས་མཚོན་མེད་པའི། །དམར་སེར་སྣང་བ་འབུམ་གྱིས་ཀུན་གསལ་ལྟོ། །འགེངས་པའི་ངོ་མཚར་རྫོགས་པའི་འཇོ་སྒེགས་འདི། །གྲོང་འཇོམས་སྐལ་བས་བཟུང་ངམ་ཡིད་གཉིས་འགྱུར། །སྣང་དང་སྟོང་པ་དབྱེར་མེད་ཡེ་ཤེས་སྐུ། །རྟག་བརྟན་གཞོམ་གཞིག་བྲལ་བའི་ལང་ཚོ་ནི། ཁྱབ་བདག་ཡེ་ཤེས་མེ་ལོང་མཚན་དཔེའི་སྐུར། །ངེས་པའི་བློ་གྲོས་ཉིན་མོ་བཞིན་དུ་གསལ། །མ་བྲིས་མཚན་དཔེའི་རི་མོ་འབུམ་བཀྲ་ཞིང༌། །མ་བགོས་ཚུལ་ཁྲིམས་བསུང་ཞིམ་ཕྱོགས་མཐར་བརྡལ། །མ་བཅོས་དུལ་བའི་སྤྱོད་ལམ་ངང་གིས་མཛེས། །མ་འབད་གཞན་ཕན་མཛད་པ་ལྷུན་གྱིས་གྲུབ། །མཛེས་སྐུ་ལྟ་བས་མི་ངོམས་དཔག་བསམ་ལྗོན། །མཚན་བཟང་གཉིས་སྐྱེས་གྲངས་ལྡན་འདབ་སྟོང་སྦུབས། །དཔེ་བྱད་འབྲས་བུའི་ཁུང་མར་གཡུར་ཟ་བས། །ཀུན་ནས་སྒེགས་བྱས་ཕན་བདེའི་འདུ་བ་རྒྱས། ཁ་དོག་མེད་ཀྱང་ཁ་དོག་གཟུགས་སུ་སྟོན། །རང་བཞིན་མེད་ཀྱང་སྒྱུ་མའི་རོལ་མོར་སྣང༌། །འགྲོ་
འོང་མེད་ཀྱང་ཞིང་ཁམས་རྒྱ་མཚོར་འགྲོ། །བརྗོད་མེད་དོན་ཡང་བརྗོད་པའི་ཟོལ་གྱིས་སྟོན། །སྣང་བར་བྱས་སོ་རྒྱ་མཚོའི་གོས་ཅན་མ། །འོད་ཟེར་སྣང་བ་སྟོང་ལྡན་ཟླ་བས་ཏེ། །ཡང་དག་ཆེན་པོ་བདུན་ལྡན་ལམ་བཟང་ཡང༌། ཁྱོད་ཀྱི་ལེགས་པར་བཤད་པའི་འོད་བརྒྱས་སོ། །ཞིང་གི་རྡུལ་སྙེད་སེམས་དཔའ་གྲངས་མང་ཡང༌། །གོ་ཆ་བསམ་མི་ཁྱབ་ལྡན་ཁྱོད་ཟླས་དབེན། །ལྕུགས་ཕྲན་རྒྱས་པའི་རྐང་འཐུང་གྲངས་མང་ཡང༌། །ཧ་རི་ཙནྡན་ལྗོན་པ་ཤིན་ཏུ་དཀོན། །བགྲང་ཡས་བདེ་གཤེགས་ཉི་མའི་མདུན་ས་རུ། །ཟབ་མོའི་གཏམ་གྱི་འོད་སྣང་འབུམ་འཕྲོ་ཞིང༌། །རྒྱལ་སྲས་རྒྱུ་སྐར་ཕྲེང་བས་མཛེས་བྱས་པ། །འཕགས་མཆོག་ཟླ་རྒྱས་དབང་པོ་ཁྱོད་གཅིག་ཡིན། །མཐོང་ན་མི་མཐུན་མེད་པ་ཞི་བའི་སྐུ། །ཕྱོགས་ཀྱི་མུ་ཁྱུད་རྒྱས་པའི་ད་ལ་བཞིན། །ཀུན་དགའི་དཔལ་སྟེར་མཁའ་གོས་སྐྲོད་པའི་འོད། །མཐའ་ཡས་ཞིང་ཁམས་རྒྱ་མཚོར་སྤྲོ་ཞིང་སྡུད། །གཅོད་བྱེད་རལ་གྲིའི་འཁྲུལ་འཁོར་འབར་བའི་གཟི། །སྲིད་ན་དཔེ་ཟླས་དབེན་པའི་ཚུལ་མཐོང་ནས། །བཻ་ཌཱུར་རྩིག་པ་འདྲ་བའི་མཁའི་བཞིན་རས། །སྐྱེང་སྟེ་ཆུ་འཛིན་གསར་པས་འགེབས་ལ་རིངས། །མཛེས་མཛེས་སོར་མོའི་ལྕུག་ཕྲན་ལ་གནས་ཤིང༌། །ལྡེམ་ལྡེམ་སྡོང་བུའི་རྩེ་མོར་བབ་ཆགས་པའི། །ཟླུམ་ཟླུམ་ཐིག་ལེར་འཁྱིལ་བའི་འདབ་མ་བརྒྱ། །ཆེས་ཆེར་བཞད་པས་ཨུཏྤལ་རྣམ་པར་གསལ། །ཞེས་སོ། །
༈ སྤྲོས་མཚོན་རྟོག་པའི་དྲ་བ་མཐར་བྱས་ཤིང༌། །ཟབ་དང་རྒྱ་ཆེའི་སྐུ་གཉིས་མངོན་མཛད་ཀྱང༌། །གཞོན་ནུའི་མཚར་སྡུག་རྫོགས་པའི་ལང་ཚོར་བཅས། །སེམས་དཔའི་གཟུགས་སུ་སྣང་དེ་འཇམ་དཔལ་ཡིན། །བྱས་པ་མ་ཡིན་ཆོས་རྣམས་ཀུན་གྱི་གཤིས། །སྣང་བཞིན་སྟོང་ལ་སྟོང་བཞིན་སྣང་བ་སྟེ། །བདེན་པ་དབྱེར་མེད་གཞི་ཡི་དབུ་མ་ན། །རྟག་དང་མི་རྟག་གར་ཡང་གྲུབ་མེད་ཀྱང༌། །ཆོས་དབྱིངས་མི་འགྱུར་བས་ན་རྟག་པ་སྟེ། །དེ་ཉིད་མི་རྟག་ཡིན་ཞེས་སུ་ཞིག་སྨྲ། །རྟག་དང་མི་རྟག་ལས་འདས་ཕུང་སུམ་ཆོས། །ཤེས་བྱའི་ཁོང་འདིར་གཞར་ཡང་མ་མཆིས་སོ། །གཉིས་ཡིན་ཞེས་པ་བདག་གིས་མ་སྨྲས་ཏེ། །དོན་དམ་ཀློང་ན་རྟག་དང་མི་རྟག་དང༌། །གཉིས་ཡིན་གཉིས་མིན་མཐའ་དང་བྲལ་བས་ན། །འདུས་མ་བྱས་པ་ཆེན་པོ་ཡིན་ཞེས་སྨྲ། །དེ་ཉིད་ལེགས་གཟིགས་འཕགས་པའི་མཉམ་བཞག་ནི། །བདེན་དང་བདེན་མེད་འཛིན་པ་སྤངས་པ་སྟེ། །མཚན་མའི་རྟོག་པ་ཀུན་ལས་རྣམ་གྲོལ་བས། །རྣམ་པར་མི་རྟོག་ཟབ་མོའི་ཡེ་ཤེས་ཡིན། །ཆོས་རྣམས་རང་བཞིན་བདེན་པས་སྟོང་པ་ལ། །བདེན་མེད་ཡིན་ཞེས་བརྗོད་པ་མེད་གྱུར་ན། །བདེན་གྲུབ་ཉིད་དུ་ལྡོག་ལས་འོས་མེད་དེ། །ཕུང་གསུམ་གཞན་དུ་འཛིན་ཚུལ་མེད་ཕྱིར་རོ། །སྐྱེ་བ་མེད་ཅེས་ཇི་བཞིན་ཤེས་པའི་ངོར། །སྐྱེ་བར་འཛིན་ལས་ལྡོག་འདིར་བསྙོན་དུ་ཅི། །བདེན་མེད་ཉིད་ཀྱང་
རང་བཞིན་མེད་ཤེས་ན། །བདེན་པ་མེད་ཅེས་སུ་ཡིས་འཛིན་པར་འོས། །ཇི་ལྟར་ཞི་བའི་དབྱིངས་ནི་འཕོ་འགྱུར་མེད། །མ་བྱས་རང་བཞིན་བསམ་གྱིས་མི་ཁྱབ་པ། །དེ་ལྟར་དེ་བཞིན་གཤེགས་པའི་ཡེ་ཤེས་ཀྱང༌། །འདུས་མ་བྱས་པ་རྟག་པའི་རྡོ་རྗེ་ཡིན། །འདི་ནི་ཐ་སྙད་དཔྱོད་པའི་བློ་ངོར་ཏེ། །དོན་དམ་ཡང་དག་མཚད་མས་བརྟགས་བྱས་ན། །རྒྱལ་བའི་ཡེ་ཤེས་མཆོག་གི་ཆོས་ཉིད་ནི། །འདི་ཞེས་སྨྲ་བརྗོད་ཡུལ་དུ་ག་ལ་རུང༌། །མདོར་ན་བདེ་བར་གཤེགས་པའི་གསང་བ་ནི། །ཡུལ་དང་ཡུལ་ཅན་གཉིས་སུ་མི་དམིགས་ཤིང༌། །མཚན་འཛིན་དྲི་མའི་སྦུབས་ལས་རབ་གྲོལ་བ། །འདི་ནི་འཇམ་ཞེས་མཁས་པས་རྟོགས་པར་བྱ། །གཟུང་དང་འཛིན་པའི་རྟོག་པ་མི་མངའ་བཞིན། །ཇི་ལྟ་ཇི་སྙེད་ཆོས་ཀྱི་བྱེ་བྲག་ཀུན། །མ་འདྲེས་སྒྲིབ་མེད་ཅིག་ཆར་ཉིད་གཟིགས་པས། །སངས་རྒྱས་རྣམས་ཀྱི་ཆོས་སྐུ་ཟབ་མོ་ཡིན། །བྱིས་པས་ལན་བརྒྱར་བརྟགས་ཀྱང་རྟོགས་མིན་པའི། །སྟོང་དང་རྟེན་འབྱུང་དབྱེར་མེད་ཆོས་ཀྱི་དབྱིངས། །རྣམ་གྲངས་མིན་པའི་གནས་ལུགས་མཐའ་བྲལ་བ། །ཇི་བཞིན་གཟིགས་པའི་ཆོས་སྐུ་ཟབ་མོ་ཡིན། །སློབ་པའི་ལམ་གྱིས་བསྡུས་པའི་མཉམ་བཞག་ནི། །སྟོང་དང་ཡེ་ཤེས་རོ་གཅིག་འདྲ་ན་ཡང༌། །གཉིས་སྣང་བག་ཆགས་ཕྲ་མོས་བསླད་པས་ན། །ཟབ་མོ་འདི་དང་ལྡན་པར་མ་གྱུར་ཏོ། །
སངས་རྒྱས་རྣམས་ཀྱི་ཆོས་སྐུ་ཟབ་མོ་ནི། །མཐའ་བྲལ་ཆོས་ཀྱི་དབྱིངས་དང་རོ་གཅིག་པས། །མཁའ་དང་ལག་མཐིལ་མཉམ་པའི་སྤྱོད་ཡུལ་དང༌། །གཅིག་ཏུ་མཛའ་བའི་ཐ་ཚིག་རང་གིར་མཛད། །འོད་ལྡན་རི་བོང་འཛིན་པའི་དཀྱིལ་འཁོར་ནི། །གཅིག་ལས་དུ་མའི་སྣང་བརྙན་ཀུན་ཏུ་འགྱེད། །དེ་བཞིན་དེ་བཞིན་གཤེགས་པའི་ཡེ་ཤེས་ནི། །གཅིག་ལས་གཟུགས་སྐུའི་སྣང་བརྙན་དུ་མར་སྟོན། །ཚད་མེད་ཐུགས་རྗེས་འགྲོ་ལ་རབ་དགོངས་ཏེ། །ནམ་མཁའ་ཇི་སྲིད་གཞན་ཕན་མཛད་པ་ནི། །དུས་ལས་ཡོལ་མིན་ཕྲིན་ལས་རླབས་ཆེན་པོ། །མ་ལུས་ཡིད་ཅན་རྒྱ་མཚོར་སྨན་པར་བགྱིད། །ཕྱོགས་རེ་མ་ཡིན་ནམ་མཁའི་ཁྱོན་ཡངས་པོར། །བགྲངས་ཡས་ཞིང་ཁམས་རྒྱ་མཚོར་སྣང་གྱུར་པ། །དེ་སྙེད་རེར་ཡང་ཡིད་ཅན་ཚད་མེད་དེ། །དེ་དག་རྣམས་ལ་ཁྱོད་ཀྱི་ཕྲིན་ལས་འཇུག །འབད་རྩོལ་ཡོད་མིན་རྣམ་དཀར་མཛད་པ་ནི། །དགོས་འདོད་ཀུན་སྟེར་ནོར་བུའི་རྒྱལ་པོ་བཞིན། །མོས་ལྡན་འགྲོ་ལ་ཅིག་ཆར་སྣང་མཛད་པས། །ཀུན་ཏུ་བཟང་པོའི་འོད་ཟེར་ཁྱོད་ལ་མངའ། །མདོར་ན་ཟབ་མོའི་ཆོས་སྐུ་མངོན་བྱས་ཤིང༌། །ཤིན་ཏུ་རྒྱ་ཆེ་གང་འདུལ་གཟུགས་ཀྱི་སྐུས། །སྐལ་བཟང་འགྲོ་ལ་རྣམ་གྲོལ་དཔལ་སྟེར་བའི། །འདི་ནི་དཔལ་ཞེས་བློ་ལྡན་རྣམས་ཀྱིས་འཚལ། །ངེས་པའི་དོན་དུ་ཁྱབ་བདག་འཇམ་པའི་དཔལ། །
མཁའ་ཁྱབ་རྒྱལ་བ་རྣམས་ཀྱི་ཡེ་ཤེས་ལས། །ཐ་དད་མ་ཡིན་མི་ཤིགས་རྡོ་རྗེ་སྐུ། །སྲིད་པ་ཇི་སྲིད་མཚན་དཔེའི་ལང་ཚོར་འབར། །སྒྱུ་མའི་རང་བཞིན་སྲིད་པའི་གྲོང་ཁྱེར་ན། །སྒྱུ་མའི་གར་བཞིན་ལས་ཉོན་གོམ་སྟབས་བཅས། །གཅིག་ཏུ་རྒྱུ་བའི་སེམས་ཅན་སྒྱུ་མ་རྣམས། །བྱང་ཆུབ་སྒྱུ་མའི་ས་ལ་རེག་པར་མཛོད། །གཞོམ་གཞིག་སྤང་བ་མཚན་རྫོགས་སྐུ་ཡི་དལ། །ཉི་མ་ལྟ་བུར་བརྗིད་པའི་འོད་ཟེར་བཅས། །འཆི་བ་མེད་པར་ནམ་མཁའ་ཇི་སྲིད་དུ། །རྟག་ཆེན་གཞོན་ནུའི་གཟུགས་ཀྱིས་སྲིད་ན་སྣང༌། །རྒ་དང་ན་དང་རྒུད་པ་རྣམས་སྤངས་པའི། །ངོ་མཚར་བསོད་ནམས་བྱེ་བའི་གཏེར་གྱུར་པ། །སྣ་ཚོགས་སྐུ་ཡི་བཀོད་པས་སྲིད་གསུམ་འགྲོ། །ཕན་དང་བདེ་བའི་གནས་ལ་སྦྱོར་བར་མཛད། །དེ་སྐད་འཇམ་དཔལ་གཞོན་ནུའི་མཚན་གྱི་དོན། །ཅུང་ཟད་གཏམ་དུ་བྱས་པའི་ལེགས་བྱས་ལ། །བརྟེན་ནས་རྣམ་པར་གྲོལ་བའི་བྱང་ཆུབ་མཆོག །རིང་མིན་མྱུར་དུ་ཐོབ་པའི་དགེ་ལེགས་ཤོག །ཅེས་སོ།། ༈ །།ཡོད་མེད་ཡིན་མིན་དམིགས་གཏད་སྣ་ཚོགས་ཀྱི། །སྤྲོས་པའི་དྲྭ་བ་རྟོག་པའི་ཟུག་རྡུའི་ཚོགས། །རྣམ་བྲལ་འཇམ་པའི་དབྱིངས་སུ་མཉམ་བཞག་པས། །བདུད་ཀྱི་རྒྱུ་བ་ཀུན་ནས་མཐར་བྱེད་ཤོག །སྟོང་པའི་ངང་ནས་འགགས་མེད་མཁྱེན་པའི་གདངས། །ཀུན་ཁྱབ་སྙིང་
རྗེ་ཆེན་པོའི་རོལ་པ་ལས། །ནམ་མཁའ་ཇི་སྲིད་འགྲོ་བའི་ཕན་བདེའི་དཔལ། །རྟག་ཁྱབ་ལྷུན་གྱིས་གྲུབ་པ་ཉིད་གྱུར་ཅིག །རྣམ་པ་ཐམས་ཅད་མཁྱེན་པའི་ཡེ་ཤེས་སྐུ། །རྡུལ་བྲལ་མཆོག་གི་ལང་ཚོར་ཤར་བའི་དཔྱིད། །རྟག་བརྟན་བགྲེས་རྒུད་བྲལ་བའི་གཞོན་ནུའི་གཟུགས། །འགྲོ་ཁམས་རྒྱ་མཚོར་ཡོངས་སུ་སྣང་གྱུར་ཅིག །རང་རིག་ངེས་པ་དོན་གྱི་འཇམ་པའི་དབྱངས། །མངོན་སུམ་ཉིད་དུ་མ་གྱུར་དེ་སྲིད་དུ། །བློ་གཏེར་ངག་གི་དབང་ཕྱུག་གང་གི་སྐུ། །རྟག་ཏུ་སྙིང་གི་འོ་མཚོར་གསལ་གྱུར་ཅིག །ཚིག་དོན་བཟང་པོའི་དྲང་ཚུལ་ལ། །རྗེས་སུ་ཡི་རང་བདག་གིས་ཀྱང༌། །ཚིགས་བཅད་བཞི་ཙམ་ཞབས་འདེགས་སུ། །བསྣན་པ་ཞབས་ཕྱིར་འཁྲིད་པར་ཞུ། །ཞེས་པ་རྗེ་མི་ཕམ་རིན་པོ་ཆེའི་གསུང་ངོ།། ༈ །།གང་དུ་གཉིས་སྣང་མཚན་མའི་ཆོས། །སྤང་བ་མིན་ཀྱང་རང་ངོ་ནས། །གྲུབ་པ་མེད་པའི་ཆོས་ཉིད་ལ། །འཇམ་དཔལ་དབྱངས་ཞེས་རབ་ཏུ་བརྗོད། །འདི་ན་ཐ་སྙད་སྣང་བའི་ཆོས། །སྒྱུ་མ་བཞིན་དུ་འཕྲུལ་པའི་གཞི། །དེ་བཞིན་ཉིད་དབྱིངས་བསམ་བྲལ་ལ། །གདགས་སུ་རུང་བ་མ་ཡིན་ཉིད། །གལ་ཏེ་ཡོད་དང་མེད་པ་དང༌། །གཉིས་མིན་གཉིས་ཞེས་བྱར་ཡོད་ན། །དེ་ཉིད་གདགས་བྱར་རུང་ན་ཡང༌། །དེ་མེད་ཕྱིར་ན་བརྗོད་དུ་མེད། །ཅི་སྟེ་བདེན་མེད་དམ་པའི་དོན། །གྲུབ་པ་འགའ་ཞིག་ཡོད་གྱུར་ན། །དེ་ཉིད་དམིགས་སུ་རུང་མོད་དེ། །བདེན་དངོས་
མེད་ཕྱིར་དེ་མེད་ཉིད། །བདེན་གྲུབ་ཡོད་ཡེ་མ་མཆིས་པས། །བདེན་མེད་ཡོད་ཅེས་ཐ་སྙད་བརྗོད། །གཤིས་ལ་དེ་ཉིད་ཡོད་གྱུར་ན། །དེ་རང་ཉིད་ཀྱང་བདེན་གྲུབ་འགྱུར། །ཡུལ་དང་ཡུལ་ཅན་མི་དམིགས་ཤིང༌། །བསལ་དང་བཞག་པ་ངང་གིས་ཞི། །སྲིད་དང་ཞི་བ་མཉམ་པ་ཉིད། །དེ་ཕྱིར་འཇམ་དཔལ་སྟོང་ཞེས་བྱ། །དོན་དམ་རིགས་པས་དཔྱད་བཟོད་པའི། །ཡེ་ཤེས་དང་ནི་དེ་བཞིན་ཉིད། །གྲུབ་ན་ཤེས་བྱར་བརྗོད་རུང་གི༌།མ་གྲུབ་དེ་བརྗོད་ག་ལ་རུང༌། །གང་ཞིག་རྟོགས་པས་སྤང་བྱའི་ཆོས། །ཟད་བྱེད་མེད་པར་མི་འགྱུར་ཏེ། །འདི་ཡིས་གཞི་ལ་གཟུང་དང་འཛིན། །མ་གྲུབ་བརྗོད་ལས་གཞན་མིན་ཕྱིར། །ཅི་སྟེ་གཤིས་ལ་སྐྱོན་ཡོད་ན། །བདག་མེད་ཟབ་མོ་མངོན་རྟོགས་ཀྱང༌། །བདག་འཛིན་འབྲལ་བར་མི་རིགས་ཏེ། །དེ་ཉིད་བདེན་གྲུབ་ཡིན་ཕྱིར་རོ། །ཡོན་ཏན་མ་ཐོབ་བདེན་གྲུབ་ན། །སེམས་ཅན་འཚང་རྒྱར་རིགས་མ་ཡིན། །ཡོན་ཏན་ཐོབ་པ་གྲུབ་ན་ཡང༌། །ཡོན་ཏན་མི་ལྡན་སྐབས་མི་སྲིད། །དེ་བཞིན་ཟག་བཅས་ཇི་སྙེད་དང༌། །དྲི་མེད་ཆོས་རྣམས་གང་ཡང་རུང༌། །གཅིག་དང་དུ་མར་གྲུབ་པའི་ཆོས། །སྲིད་པར་རུང་བ་མ་ཡིན་ནོ། །གཅིག་ཏུ་གྲུབ་པའི་ཆོས་ཡོད་ན། །ཤེས་བྱ་འགའ་ཡང་སྣང་མི་འགྱུར། །གཅིག་ཅིག་རྩོམ་གཞིར་མ་བྱས་པའི། །དུ་མ་སྲིད་པ་མ་ཡིན་
ཉིད། །འོན་ཀྱང་ཇི་སྙེད་སྣང་བ་འདི། །མེད་བཞིན་བརྟེན་ནས་འབྱུང་བར་ཟད། །སྟོང་ལས་གཞན་ལ་རྟེན་འབྲེལ་ནི། །མཁས་པས་སྨྲ་བར་མི་རིགས་སོ། །འདིས་ནི་ཀུན་རྫོབ་དོན་དམ་དུ། །ཐལ་བ་ཁས་བླང་མ་ཡིན་ཀྱང༌། །ཀུན་རྫོབ་ལས་གཞན་སྟོང་བྱའི་ཆོས། །དམིགས་སུ་མེད་ཕྱིར་ཚུལ་འདི་བཞག། མིང་རྐྱང་བཏགས་ཡོད་ལས་འདས་དེ། །ད་དུང་ཡོད་པ་བསྒྲུབ་དགོས་ན། །དེ་ཚེ་མཐར་ཐུག་ཚད་མ་ཡིས། །སྨ་བབ་བགྱིད་ལས་འོས་ཅི་ཡོད། །གང་ཕྱིར་རྟོག་བཏགས་མ་གཏོགས་པའི། །ཆོས་དེ་རི་བོང་རྭ་འདྲ་ཞེས། །དགེ་སློང་དེ་ཉིད་རིག་རྣམས་ཀྱིས། །གཞུང་ལུགས་རབ་ཏུ་བསྒྲགས་པ་ཡིན། །རྟེན་འབྱུང་ངོ་བོ་ཉིད་ནས་སྟོང༌། །སྟོང་པ་སྒྱུ་མའི་རོལ་མོར་སྣང༌། །སྣང་སྟོང་ཕྱོགས་རེ་མ་ལྷུང་བ། །དེ་ལ་འཇམ་དཔལ་དབྱངས་ཞེས་བརྗོད། །ཟབ་མོ་འདི་ཡིས་ཆོས་རྣམས་ལ། ཁྱབ་ཕྱིར་སེམས་ཅན་བདེ་གཤེགས་སུ། །འགྱུར་བ་དཀའ་བ་མེད་གྲུབ་སྟེ། །སེམས་ཅན་རང་བཞིན་མེད་ཕྱིར་རོ། །རྟོག་བཏགས་ལས་གཞན་མ་མཆིས་ཀྱང༌། །ཐ་སྙད་ངོས་ནས་དོན་མཐུན་དང༌། །ལོག་བློའི་ཕྱིར་ན་སྟོང་རྟོགས་པས། །བདེན་འཛིན་འབྲལ་བར་ནུས་པ་ཡིན། །དེ་ཕྱིར་བྲལ་འབྲས་ཇི་སྙེད་པ། །ཆོས་ཉིད་འདི་ལ་རག་ལས་ཤིང༌། །རང་བཞིན་རྣམ་དག་ཉིད་ཀྱི་ཕྱིར། །འཇམ་པ་ཞེས་ནི་བརྗོད་པ་ཡིན། །ཡོན་ཏན་
ནོར་གྱིས་ཕོངས་རྣམས་ལ། །རྒྱུ་རྐྱེན་མང་ཞིག་ཚོགས་པ་ལས། །ཡོན་ཏན་གང་ཞིག་ཐོབ་གྱུར་པ། །དེ་ཡང་སྔར་གྱི་རྣམ་དཔྱད་བཞིན། །ཐ་སྙད་གནས་ཚུལ་ལས་བསམ་ཀྱང༌། །མ་དག་མཚན་མ་གཏན་མེད་པར། །དག་ཆེན་སྐུ་དང་ཡེ་ཤེས་སུ། །གདོད་ནས་ལྷུན་རྫོགས་དཔལ་ཞེས་བྱ། །གང་ལ་སྐྱེ་མེད་དོན་གྱི་དབྱིངས། །ཕྲ་བ་ཞེས་བྱར་མཁས་རྣམས་སྨྲ། །རྒྱལ་བས་དབྱངས་ཀྱིས་གང་བསྙད་པའི། །དོན་ཟབ་བླ་མེད་ཀྱང་འདི་ཉིད། །ཤིང་རྟ་ཆེན་པོའི་གཞུང་ལུགས་བཞིན། །འཇམ་དཔལ་ཟབ་མོ་རབ་བཤད་པས། །སྲིད་རྩ་ནམ་ཡང་མ་མཆིས་པའི། །སྲིད་ཞི་མཉམ་ཉིད་ལ་གནས་ཤོག །ཅེས་པའང་འཇིགས་མེད་པས་སྨྱོ་གཏམ་སྨྲས་པའོ།། ༈ །།ཤེས་བྱ་མཁྱེན་ལ་གེགས་བྱེད་པའི། །ཐ་ཚིག་རལ་བར་མི་བྱེད་པ། །སྒྲིབ་གཉིས་ཉེས་པའི་ནགས་ཀླུང་ཆེ། །ཡེ་ཤེས་མེ་ལྕེས་ཟོས་དེར་འདུད། །ཡང་འདིར་རིགས་པ་འདི་སྣང་སྟེ། །བདེ་བར་གཤེགས་པའི་མཁྱེན་པ་དང༌། །རྣལ་འབྱོར་པ་ཡི་བློ་གྲོས་ཀྱིས། །ཆོས་ཉིད་མཆོག་ནི་མཉམ་པ་ཉིད། །དེ་དག་དབྱེར་མེད་ཉིད་ཀྱང་སྟེ། །དེ་བཞིན་ཉིད་ལས་རབ་གཞལ་ན། །བློ་གྲོས་མཆོག་དང་མཆོག་མིན་གྱི། །རྣམ་བཞག་སྟོང་ཉིད་བཅས་པ་མེད། །རྒྱལ་དང་སེམས་ཅན་ཐ་དད་ལྟར། །དེ་བཞིན་ཉིད་ཀྱང་དེ་བཞིན་ཞེས། །ཐ་དད་སྨྲ་བ་དོན་དམ་གྱི། །ཚད་མ་ཇི་བཞིན་མ་མཐོང་ཡིན། །ཅི་ཕྱིར་ཞེ་ན་དོན་དམ་དུའང༌། །མཆོག་
དམན་སོ་སོར་བཟུང་ཕྱིར་ཏེ། །གདེན་པ་གཉིས་ཆར་མ་གྲུབ་ན། །ཐ་དད་བྱ་བ་ཅི་ཞིག་མཆིས། །དེ་འདྲའི་ཚུལ་ལ་རབ་མཁས་ཤིང༌། །རྟེན་འབྱུང་རྨི་ལམ་ལྟ་བུ་རུ། །གཟུངས་སྤོབས་མ་བརྟགས་ཉམས་དགའ་བར། །སྣང་ཙམ་རྟོགས་པའི་རྣལ་འབྱོར་པས། །རྒྱལ་བ་ཀུན་གྱི་ཡེ་ཤེས་ཆེ། །ཡི་གེ་སྤྲིན་གྱི་འཁོར་ལོ་རུ། །དྲང་ནས་སྙིང་ལ་དེ་སྦས་ན། །ངེས་པར་ཕྲོག་པ་བཞིན་དུ་འགྱུར། །བདེ་གཤེགས་གཞན་དུ་མ་དམིགས་ཤིང༌། །བདག་ཉིད་བདག་ཏུ་མ་གྲུབ་པར། །དོན་མཐུན་ཚད་མས་རྟོགས་པ་ལ། །འདི་དག་ཐམས་ཅད་འཐད་པར་ཤེས། །སྤོབས་པའི་གཏེར་བརྒྱད་འདི་ཡིན་ཏེ། །དྲན་དང་བློ་གྲོས་རྟོགས་པ་དང༌། །གཟུངས་དང་སྤོབས་པ་ཆོས་ཀྱི་གཏེར། །བྱང་ཆུབ་སེམས་དང་སྒྲུབ་པའོ། །གང་གིས་སྔོན་བྱུང་ཆོས་རྣམས་ཀྱང༌། །བརྗེད་པ་ནམ་ཡང་མ་མཆིས་པར། །དྲན་པ་འདི་ནི་དྲན་པའི་གཏེར། །སེམས་བྱུང་ཡུལ་ངེས་ལྔ་ལས་ཡིན། །ཕུང་པོ་ཁམས་དང་སྐྱེ་མཆེད་ཆོས། །ཤེས་རབ་ཆེན་པོས་རྣམ་འབྱེད་པར། །གཞན་གྱི་དྲིང་ལ་མི་འཇོག་པ། །བློ་གྲོས་དམ་པའི་གཏེར་ཆེན་ཡིན། །ཟབ་མོའི་ཤེས་རབ་དེ་ཡི་མཐུས། །ཕུལ་བྱུང་མདོ་དོན་རྒྱས་པ་རྣམས། །སྒྲོ་དང་སྐུར་བ་མ་མཆིས་པར། །རྟོགས་པ་རྟོགས་པའི་གཏེར་ཞེས་བྱ། །གང་ཞིག་ཐོས་པའི་གཞུང་ལུགས་ཀུན། །མྱུར་དུ་བློ་ལ་འཛིན་བྱེད་པའི། །དྲན་དང་ཤེས་རབ་རྨད་བྱུང་བ། །
གཟུངས་ཀྱི་གཏེར་དུ་རིག་པ་ཡིན། །རྒོལ་བ་རྣམས་ལ་ལན་སྨྲ་བར། །རིགས་པ་ཐག་ཐོག་མེད་གྱུར་པས། །ལེགས་བཤད་སྨྲ་ལ་མི་བསྙེད་པ། །སྤོབས་པའི་གཏེར་ཞེས་བྱ་བ་ཡིན། །གཞུང་ལུགས་འཆད་རྩོད་རྩོམ་པ་ཡིས། །སྡེ་སྣོད་རིན་ཆེན་གསལ་བྱེད་པའི། །བློ་མཆོག་རབ་ཏུ་གྲུབ་པ་ནི། །ཆོས་ཀྱི་གཏེར་དུ་རྣམ་པར་བཞག །འགྲོ་བ་ཀུན་ལ་སྙིང་བརྩེའི་ཕྱིར། །རྫོགས་པའི་བྱང་ཆུབ་མངོན་འདོད་པ། །དེ་ནི་དཀོན་མཆོག་གསུམ་གྱི་གདུང༌། །འཚོབ་བྱེད་བྱང་ཆུབ་སེམས་ཀྱི་གཏེར། །རྣམ་པར་མི་རྟོག་ཡེ་ཤེས་ཆེར། །མངའ་དབང་ཤིན་ཏུ་འབྱོར་གྱུར་པས། །བྱང་ཆུབ་ལུང་བསྟན་བསྙེས་པའི་བློ། །སྒྲུབ་པའི་གཏེར་དེ་ཕྱི་མའོ། །སྲིད་པ་སྒྲུབ་པས་ཅི་ཞིག་རུང༌། །གཞན་ཕྱིར་མྱ་ངན་འདའ་འདོད་ན། །འཇམ་དཔལ་ཡེ་ཤེས་སེམས་དཔའ་ཡི། །སྤོབས་པའི་སྐུ་མཆོག་འདི་བསྒྲུབ་རིགས། །དེ་སྐད་རིགས་པར་སྨྲ་བའི་གཏམ། །འཇམ་དཔལ་རྡོ་རྗེ་རྣོན་པོའི་སྔགས། །སྙིང་ལ་བཅིངས་པའི་གཞོན་པ་ཡིས། །སྔ་ཐུན་གཅིག་ལ་མྱུར་དུ་བྲིས། །ཞེས་པའང་འཇིགས་མེད་བསྟན་པའི་རྒྱལ་མཚན་ཞེས་བྱ་བས་སྦྱར་བའོ།། །།
རྒྱལ་བ་ཚེ་དཔག་ཏུ་མེད་པ་ལ་བསྟོད་པ་དགེ་ལེགས་ཉིན་བྱེད་འདྲེན་པའི་ཤིང་རྟ་ཞེས་བྱ་བ་བཞུགས་སོ། །
ཨོཾ་སྭ་སྟི། །གང་དུ་འཁོར་ལོའི་མཚན་མངའ་ཞབས་སྐྱེས་གཟི། །ལི་ཁྲིའི་རྡུལ་ཚོགས་ལྷུང་བའི་འབབ་སྟེགས་དེར། །རབ་འབྱམས་ཐུབ་པའི་ཡིད་དང་བཀྲ་ཤིས་བསུང༌། །ལྷན་ཅིག་ལྡང་བ་དྲང་སྲོང་པདྨའི་ཞལ། །དེ་ཡི་རྗེས་ཕྱོགས་དད་པའི་རླུང་ཡབ་ཀྱིས། །ཉེ་བར་བོས་པའི་བརྗོད་འདོད་རླུང་ཤུགས་ནི། །བློ་གྲོས་འཁྲི་ཤིང་འདབ་མ་ལ་ཕོག་པས། །ཡིད་འོང་བསྟོད་པའི་མེ་ཏོག་ཅུང་ཟད་འཐོར། །སྙན་ངག་ནོར་གྱིས་དབུལ་བ་བདག་འདྲའི་ཚིག། མཁས་པའི་ཡི་གར་མཆི་སྙམ་མི་བགྱིད་དེ། །མགོན་ཁྱོད་ཡོན་ཏན་བརྗོད་པའི་དགའ་བ་དང༌། །འགྲོགས་ཕྱིར་མེ་ཏོག་ཆར་པའི་དཔེས་ཀྱང་བསྙད། །ཤིན་ཏུ་གཡོ་བ་སོས་ཀའི་དཔལ་འབྱོར་གྱིས། །འཁྱུད་པའི་ཁུ་བྱུག་
གླུས་ཀྱང་དགའ་སྐྱེད་ན། །ཀུན་ཏུ་བཟང་པོའི་ཕུན་ཚོགས་ཟ་མ་ཏོག །ཁྱོད་ཀྱི་གཏམ་ལ་སུ་ཞིག་ངོམས་པ་སྐྱེ། ཁྱོད་ལ་ལུས་ཅན་ཉེར་འཚོར་མ་བསྟབས་པའི། །ཕུན་ཚོགས་བུང་བའི་རྐང་རྡུལ་ཙམ་ཡོད་མིན། །དེ་ཕྱིར་ཁྱོད་ནི་མ་ལུས་འཇིག་རྟེན་གྱི། །བླ་ན་མེད་པའི་ཕན་འདོགས་ཞིང་དུ་མཐོང༌། །གང་ཕྱིར་ཁྱོད་ཀྱིས་མཐའ་དག་ལུས་ཅན་ལ། །རྒུད་པའི་ཁུར་ནི་གང་དང་གང་གཟིགས་པ། །དེ་དེ་ཉིད་ཀྱི་ནོངས་པ་བཞིན་དགོངས་པའི། །ཐུགས་རྗེའི་ཡུམ་གྱིས་དང་པོར་བསྐྲུན་པ་ལགས། །དེ་ལས་བདག་ཉིད་ཕན་བདེ་མི་ཟད་པའི། །གཏེར་དུ་མཛད་ནས་སྐྱེ་དགུའི་རེ་བ་ཀུན། །རྫོགས་པར་སྐོང་བའི་ཐུགས་བསྐྱེད་རིན་པོ་ཆེ། །དབང་ཕྱུག་ཁྱོད་ཀྱི་ཐོག་མའི་གདུང་
རིགས་ལགས། ཁྱོད་ནི་རླབས་ཆེན་རིགས་ཀྱི་ཆེ་བའི་མཐུས། །ཐོས་སྒྲོགས་དཔའ་བོ་རྣམས་ཀྱང་སྐྲག་འགྱུར་བའི། །བརྟུལ་ཞུགས་བྱ་དཀའ་ཀུན་ལ་མ་ཞུམ་པར། །གཞལ་མེད་པས་ཀྱང་གཞལ་མེད་བསྐལ་བར་སྤྱད། །ལུས་ཅན་རྒུད་པའི་རྣམ་གྲངས་ཇི་སྙེད་པར། ཁྱོད་ཀྱིས་ལེགས་ཚོགས་ཚོལ་བ་ལྷུར་བླངས་ཏེ། །རྒྱུར་བཅས་རྒུད་པ་དེ་སྙེད་རྣམས་ཀྱིས་ཀྱང༌། ཁྱོད་ཀྱི་ཐབས་མཁས་ཚད་ལ་ཐུབ་མ་གྱུར། །དེ་ལྟར་འཇིག་རྟེན་ཀུན་དང་མི་མཉམ་པའི། །རྒྱུ་ཚོགས་ཕུལ་བྱུང་རྣམས་ལ་དབང་མཛད་ཕྱིར། །དཔེ་ཟླ་ས་གསུམ་འགྲོ་ནང་རྙེད་མིན་པའི། །ཡོན་ཏན་ཕུང་པོ་རྒྱ་ཆེན་བསྙེས་པ་ལགས། །གོ་འཕང་སྲིད་ཞིའི་བ་གམ་རྩེར་འཇོགས་ཀྱང༌། །ཐུགས་རྗེའི་སྤྱན་རས་མགོན་མེད་འགྲོར་ཆགས་ཏེ། །གཞན་ཕན་ཉིད་ཀྱི་གཙུག་ཏོར་རྒྱན་བཞེས་པ། །ཀྱེ་མའོ་ཁྱོད་ཀྱི་ཆོས་ཉིད་ཡ་མཚན་ལགས། ཁྱོད་ནི་མྱུ་གུའི་དུས་སུ་གཞན་གྱི་ཕྱིར། །སྐྱོ་དུབ་མེད་པར་ཕུན་ཚོགས་འབྲས་བུ་བསྒྲུབས། །དེ་རྙེད་ནས་ཀྱང་བདག་གི་འབྱོར་བ་ལ། །སྤྱོད་པའི་སློང་བ་ཚོལ་ཞིང་རྟག་ཏུ་བཞུགས། །མ་འདྲིས་མཛའ་བཤེས་འབྲེལ་བ་མེད་པའི་གཉེན། །ཕོངས་ལ་མ་བཅོལ་བཞིན་དུ་མགོན་མཛད་པ། །བྱམས་དང་སྡང་བ་སྙོམ་པའི་དགེ་སྦྱོང་གཙོ། ཁྱོད་ཀྱི་གཏམ་འདྲ་སུ་ཡི་རྣར་མི་འཇུག །གཏམ་འདི་པདྨའི་དཔལ་ལྟར་
ཡིད་འོང་ཕྱིར། །ནམ་མཁའ་ཚད་ཀྱིས་འཇལ་འདྲའི་ཞིང་ཀུན་ཏུ། །མཁས་པའི་མགྲིན་པ་གཅིག་ནས་གཅིག་བརྒྱུད་དེ། །ཉམས་དང་འགྱུར་བ་སྟོང་གིས་རྩེ་ཞིང་རྒྱུ། །དཔག་བསམ་ནགས་ནི་བསུང་དང་མཚར་སྡུག་དང༌། །རོ་ལྡན་ཤིང་ཏོག་རྣམས་ཀྱིས་ཉམས་དགའ་ལྟར། ཁྱོད་ཀྱང་གྲགས་པའི་དྲི་དང་མཚན་དཔེ་དང༌། །གསུང་གི་དགའ་བ་རྣམས་ཀྱིས་བརྒྱན་པས་མཛེས།། ༈ ཁྱོད་ཀྱི་སྐུ་ནི་ཉི་མའི་ལང་ཚོ་བཞིན། །མཆོག་ཏུ་འབར་ཡང་སྐྱེ་བོའི་གདུངས་བྱེད་མིན། །རབ་གསལ་ན་ཚོད་ཚེས་པའི་ཟླ་འདྲ་ཡང༌། །མཛེས་དགུའི་ཡོན་ཏན་ཆ་ཤས་མ་གང་མིན། །ཞི་བའི་མཚར་སྡུག་པདྨ་ལ་འགྲན་ཡང༌། །རྟག་ཏུ་མི་ཟུམ་དཔེ་ལ་དེས་མི་ཕོད། །ཡངས་ཤིང་མཐོ་བ་ལྷུན་པོའི་ངོས་འདྲ་སྟེ། །གཟི་བརྗིད་རི་རབ་ལྷས་ཀྱང་བསྙེན་པར་དཀའ། །དྲང་ཞིང་རྒྱས་ལ་ཆུ་ཞེང་ཤིན་ཏུ་གབ། །འཇམ་མཉེན་བཙོ་མའི་གསེར་བཞིན་ཁ་དོག་འཕགས། །མ་རྙོང་དཀུ་སྐབས་ཕྱེད་ཅིང་ཡན་ལག་འཚམས། །ལན་བརྒྱར་བལྟས་ཀྱང་ཡིད་མིག་ངོམས་པ་མེད། །པད་རག་མེ་ལོང་ཕྱིས་འདྲར་གཙང་བའི་ཞལ། །དཀྱུས་རིང་ཟླ་བ་ཚེས་པའི་དབྱིབས་མངའ་ཞིང༌། །གནག་སྣུམ་བེ་ཌཱུར་འོད་ཆགས་སྨིན་མའི་དབུས། །དཀར་ཞིང་གཡས་འཁྱིལ་མཛོད་སྤུའི་ཐིག་ལེ་འཚེར། །གསལ་
དག་མཆོག་ཏུ་བཀྲ་བ་འདབ་བརྒྱའི་སྤྱན། །རབ་ཞི་བསམ་གཏན་རོ་ཡིས་གང་བའི་ཉམས། །སེངྒེའི་གཟིགས་སྟངས་གང་དུ་བབས་པ་ཡང༌། །དགེ་ལེགས་ནོར་བུའི་ཆར་གྱིས་དཔལ་ལྡན་མཛད། །མདོག་ལེགས་རིམ་པར་འཚམས་ཤིང་མཐོ་བའི་རྒྱུད། །རབ་གཙང་དྲི་ཡི་ལོངས་སྤྱོད་བཟང་པོ་ཅན། །དེ་འདྲའི་ཤངས་ནི་མཁུར་ཚོས་ཟླ་བ་དང༌། །སོ་སོའི་མཛེས་སྡུག་རིགས་ཀྱིས་འགྲན་པ་འདྲ། །དམར་བའི་ཕུན་ཚོགས་བིམ་པ་ལ་འཕྱ་ཞིང༌། །སྟེང་འོག་ལེགས་པར་འཚམས་པའི་ཞལ་གྱི་སྒྲོས། །མི་གཡོ་ཡང་དག་འཇོག་བཞིན་གནས་པ་ན། །བརྟན་པའི་བརྗིད་བག་ཅིས་ཀྱང་འཕྲོགས་མི་འགྱུར། །དེ་ནི་ཆོས་སྟོན་དུས་སུ་གཡོ་འགྱུར་ཏེ། །ཚེམས་དཀར་ཆུ་ཤེལ་འོད་ཀྱི་འཆར་ནུབ་དང༌། །མཉེན་ཡངས་ལྗགས་དམར་འགྱུ་བའི་རོལ་རྩེད་ཀྱིས། །མཛེས་པ་བརྒྱ་འགྱུར་དུ་ནི་གསལ་ཞིང་འབར། །དྭངས་ཤིང་རྒྱས་པའི་ཟ་འགྲམ་ངོས་དག་ཏུ། །རང་འོད་མེ་ཏོག་ཕྲེང་བ་སྤེལ་མཁས་པ། །མཉམ་ཞིང་འཁྱིལ་ལེགས་མ་ཉམས་སྙན་གཉིས་ནི། །མཁའ་ཁྱབ་སྒྲ་དབྱངས་མཛེས་མར་རྟག་ཏུ་འཁྱུད། །མཐུ་ཆེན་དགེ་བའི་གཟི་འབར་གནས་གཙང་ལྷའི། །ཟུར་ཕུད་རིན་ཆེན་སྙེ་མར་དབང་བསྒྱུར་བ། ཁྱོད་ཞབས་འཁོར་ལོའི་དཔལ་གྱིས་མི་དབང་གི༌།རིན་ཆེན་
བདུན་གྱི་མཐུ་དཔལ་སྟོང་དུ་ཕམ། །ཆོས་དབྱིངས་ཁྱོན་ན་ལས་དང་ཡེ་ཤེས་ཀྱི། །སྒྱུ་མའི་རྣམ་འཕྲུལ་ཇི་སྙེད་འཆར་བ་ཀུན། ཁྱོད་སྐུའི་རྡུལ་ཆ་རེ་རེར་གཟུགས་བརྙན་བཞིན། །གསལ་རྫོགས་དབང་འབྱོར་ཕ་མཐའ་སུ་ཡིས་དཔོག །མཐོན་མཐིང་ལྕང་ལོའི་རྒྱན་གྱུར་གཙུག་ཏོར་རྩེ། །ས་བཅུའི་དབང་ཕྱུག་རྣམས་ཀྱི་སྒྱུ་མ་ལྟའི། །ཏིང་འཛིན་སྤྲུལ་པའི་མེ་ཏོག་བསྟི་བསྟང་དང༌། །འགྲོགས་པའི་རྩེ་དགའ་སྐད་ཅིག་ཉམས་པ་མེད། ཁྱོད་ནི་སྐྱིལ་ཀྲུང་གཅིག་ལས་མ་བཞེངས་ཀྱང༌། །སྤྲུལ་པའི་སྤྲིན་དང་འོད་ཟེར་གློག་གི་ཕྲེང༌། །མཁའ་ལས་ཆོས་ཀྱི་འབྲུག་སྒྲ་རང་འབྱུང་སོགས། །ལྷུན་གྲུབ་རྣམ་འཕྲུལ་ཕྱོགས་བཅུ་ཁྱབ་པར་འཇུག །ཆོས་དཀར་ཕྱོགས་སུ་འབད་པ་བརྒྱ་ཡིས་ཀྱང༌། །བསྐྱོད་པར་དཀའ་བ་ཉེས་མང་གོམས་པའི་བློ། ཁྱོད་ཞལ་མཐོང་བ་ཙམ་ནས་བྱང་ཆུབ་ཆེར། །མི་འཕྲོགས་དགའ་བའི་གཞན་དབང་འགྱུར་བ་ལགས། །སུ་ཞིག་གཟུངས་སྤོབས་ཏིང་འཛིན་མངོན་ཤེས་སོགས། །གང་གང་མངོན་འདོད་གཙོ་བོ་ཁྱོད་དྲན་ན། །དེ་དེའི་རེ་བའི་འབྲས་བུ་དེ་དང་དེ། །འོད་མཛད་ཞལ་བཟང་མཐོང་མ་ཐག་ཏུ་འཐོབ། །ཀུན་བཟང་སྤྱོད་པའི་ངོ་མཚར་འབྱམས་ཀླས་པ། །མ་འདྲེས་རི་མོར་བྲིས་པ་ཁྱོད་ཀྱི་སྐུ། །འདི་ནི་རང་གི་ཚོགས་ལ་དྲིན་གཟོའི་ཆེད། །ལྷར་བཅས་མདུན་དུ་ཟུར་གྱིས་བསྟོད་པ་འདྲ། ༈ ཁྱོད་ནི་ཆོས་སྒྲོགས་པ་དང་མི་
གསུང་ལ། །དགྱེས་པ་གདུལ་བའི་དུས་དང་དུས་མིན་གྱི། །མཚམས་ལས་མི་བརྒལ་ཡེ་ཤེས་རྗེས་འབྲང་སྟེ། །དེ་སླད་བཤད་པ་འབྲས་བུས་ལྕི་བ་ལགས། ཁྱོད་གསུང་གེ་སར་ནགས་ལས་ཉིན་རེ་བཞིན། །མཐོ་རིས་འདོད་པའི་བུང་བ་འབུམ་སྙེད་དག །དཀར་པོའི་ལྟ་སྤྱོད་བསམ་གཏན་སྦྲང་རྩིའི་ཕྲེང༌། །གུས་པའི་རྒད་པ་ལ་ཐོབ་རབ་དགའ་སྒྲོགས། །རེ་བའི་མིག་འབུར་ཐར་པ་ལ་གཏོད་ཅིང༌། ཁྱོད་གསུང་ཟིལ་པའི་རྡུལ་ཆས་ངོམས་རྣམས་ནི། །མཆོག་ཏུ་གྱ་ནོམ་རྡུལ་བྲལ་ཡང་དག་མཐའི། །ལྡིང་ཁང་མཐོ་ལ་ངལ་འཚོ་རྣམ་པར་སྟེན། །རིགས་དང་དབང་པོ་ཡོངས་འཛིན་རླབས་ཆེ་བའི། །བརྟན་པ་རྣམས་ཀྱིས་རྨད་བྱུང་སྤྱོད་པའི་ཁུར། །དུས་མང་ཁྱེར་བའང་མགོན་པོ་ཁྱོད་ཀྱི་བཀའི། །མཆོག་གི་རྣམ་འཕྲུལ་རྫོགས་པར་བལྟ་སླད་ལགས། །སྤྲོས་བྲལ་དབྱིངས་དང་རྟེན་འབྱུང་སྣང་བ་ནི། །རོ་གཅིག་ཚུལ་འདི་ཁྱོད་གསུང་དགོངས་པའི་གཏིང༌། །ཟབ་པ་ལགས་ཏེ་དེ་དང་མཚུངས་སྦྱོར་བའི། །བློ་ཅན་རྒྱལ་ལས་གཉིས་པ་གཞན་ཡོད་མིན། །མ་ལུས་ཐ་སྙད་སྤྲོས་པའི་ཚོན་རིས་དང༌། །ཆོས་རྒྱལ་རྣམས་ཀྱི་དབང་ཕྱུག་ཆེན་པོའི་སྐུ། །དེ་འདྲར་རབ་ཡངས་ས་དང་ཕར་ཕྱིན་གྱི། །སྤྱོད་པ་རྒྱ་མཚོའི་སྣོད་ཀྱང་ཁྱོད་ཀྱི་གསུང༌། ཁྱོད་ནི་ཁམས་དང་མོས་དབང་སྣ་ཚོགས་པའི། །འཁོར་མང་ནང་དུ་དབྱངས་གཅིག་བསྒྲགས་
པ་ལས། །སོ་སོའི་སྐལ་བ་ཇི་བཞིན་ལེགས་འཚམས་པར། །གདམས་པའི་རོ་ནི་དུ་མར་སྣང་བ་ལགས། ཁྱོད་ཀྱིས་ཆོས་བསྟན་རབ་མཐའ་གང་ལགས་ཀྱང༌། །འདུལ་བའི་དགོས་པ་ལ་ལྟོས་ཚང་བ་དང༌། །མ་ནོར་རིམ་པར་འོས་ཤིང་རྒྱས་བསྡུས་འཚམས། །ཟབ་མོའི་གནས་ཀྱང་ས་ལེར་སྟོན་པ་ལགས། །དེ་བཞིན་ཁྱོད་ནི་གང་གང་གཏམ་མཛད་པ། །བརྗིད་ཅིང་རབ་སྙན་འཐད་པའི་རྒྱན་དང་ལྡན། །མང་ཡང་མཐའ་དག་བཟང་ལ་བརླིང་བ་དང༌། །བསྡུས་ཀྱང་དོན་མང་གསལ་བ་ཁོ་ནའང་ལགས། །གནང་བཀག་དྲང་ངེས་མི་འདྲ་མང་བསྟན་ཀྱང༌། །མི་འགལ་ཕན་ཚུན་གྲོགས་སུ་འགྲོ་བ་སྟེ། །གཏིང་མཐའ་བློ་ཆེན་གྱིས་ཀྱང་དཔོག་དཀའ་ལ། །ཤེས་རབ་ཆུང་ལའང་དགའ་བ་མི་སྐྱེད་མིན། །གདངས་སྙན་རྒྱུན་ཆགས་ཟབ་ཅིང་བརྟན་པར་གྲགས། །འཁོར་གྱི་མུ་ཚོད་ཅུང་ཟད་མི་འདའ་ཞིང༌། །འདུལ་བའི་དཀྱིལ་འཁོར་གདུགས་བཞིན་བསིལ་བར་ཁེབས། །ཆོ་འཕྲུལ་རྒྱ་ཆེན་དུ་མས་བརྗིད་པ་ལགས། །འགྲོ་སེམས་ལོག་པའི་ཡུལ་ལ་གཡོ་བའི་དུག །དྲག་པོའི་ཤུགས་ཀྱིས་འཕྱུར་ཞིང་འོང་བ་ཡང༌། ཁྱོད་གསུང་དྲི་ཟའི་རྒྱུད་མངས་སྒྲས་བཀུག་སྟེ། །རྩེ་གཅིག་ཆོས་ལྡན་ལྟད་མོ་ལ་ཆགས་འགྱུར། །ལྷར་བཅས་འཇིག་རྟེན་མྱ་ངན་འདས་དབྱིངས་སུ། །རྒྱུ་བའི་ལམ་ཆད་ཡུན་རིང་ལོན་པ་ན། །
ཕན་མཛད་སྨྲ་བ་ཟླ་མེད་ཁྱོད་བྱུང་སྟེ། །ལམ་དེ་ཤིང་རྟ་ཆེན་པོའི་སྲོལ་བཞིན་བཏོད། །སློབ་མའི་ཚོགས་སྟུག་བསམ་ཡས་སྲས་མངའ་བ། ཁྱོད་ནི་ནམ་ཞིག་ཞི་ལ་མནལ་བ་ནའང༌། །གསུང་གི་ལྷ་མོ་སྒྱུ་རྩལ་དཔག་མེད་འདི། །རྗེས་དྲན་སྒོ་ནི་རབ་འབྱམས་ཞིང་དུ་རྟ༌།སྟོན་མཚན་མཁའ་ལ་གཟའ་སྐར་རྒྱུ་བ་རྣམས། །དང་བའི་ཆུ་ནང་མིག་བཀོད་ཤེས་པ་བཞིན། ཁྱོད་ཀྱི་སྒྲིབ་མེད་མཁྱེན་བརྩེ་ཐབས་བཅས་པ། །གསུང་གི་འབྱོར་བ་འདི་ལས་ངེས་པ་ལགས། །འོད་མཛད་འགྲོ་བ་རྗེས་འཛིན་ཀུན་དགའི་སྐུར། །དཔག་བསམ་འབྱོར་པའི་སྒོ་ནས་ཆ་ཙམ་ཞིག །བསྟོད་པའི་དགེ་བས་སྐྱེ་ཞིང་སྐྱེ་བ་ཀུན། ཁྱོད་བསྟོད་མེ་ཏོག་ཕྲེང་རྒྱུད་དབང་པོར་ཤོག །ཚེ་འདི་ཁོ་ནར་སངས་རྒྱས་མི་མཐོང་བའི། །ལས་ཀྱི་མཚན་མོ་ཟད་པའི་ཐུན་མཚམས་ནི། །དྲང་སྲོང་འཛུམ་འོད་འཆར་ཀའི་གཟི་དམར་གྱིས། །མཛེས་པར་འཆིང་བའི་གོ་སྐབས་མཐོང་གྱུར་ཅིག །དེ་མཐུས་གྲངས་མེད་རྒྱལ་བའི་ཞལ་གྱི་སྒོར། །མངོན་སུམ་རྣ་བའི་སྙིམ་པ་ལེགས་བཏུད་དེ། །ཉིན་རེ་ཐེག་མཆོག་གདམས་པའི་བཏུང་བ་ནི། །རྒྱ་མཚོས་ཆུ་ཀླུང་སྡུད་འདྲ་འཐུང་བར་ཤོག །ལེགས་བཤད་ཤིང་རྒྱལ་བསྙེན་བཀུར་བྱ་ཕྱིར་ནི། །ལུས་སྲོག་བདུག་སྤོས་བཞིན་དུ་ཡལ་གྱུར་ཀྱང༌། །ཞུམ་པ་སྤང་བའི་ཤུགས་དྲག་སྙིང་སྟོབས་ཀྱིས། །བསྐལ་པའི་
དཀྱིལ་འཁོར་བགྲང་ལས་འདའ་གྱུར་ཅིག །དེ་ལས་ཁྱོད་ཀྱིས་མཆོག་ཏུ་ཕྲ་བའི་སྐུ། །ཐུན་མོང་མིན་པའི་ལོངས་སྤྱོད་རོལ་པ་ཅན། །བདེ་འབྱུང་མགོ་བོར་ཟླ་ཚེས་བཞིན་ཐོབ་ནས། །བསམ་གྱིས་མི་ཁྱབ་ཐོས་པའི་མཛོད་འཕེལ་ཤོག །སླར་ཡང་གཞོན་ནུའི་ས་ལ་ཞི་མཐའ་ལས། །བརྩེ་ཆེན་གདམས་པའི་ཕྱག་གིས་ཡོངས་བཟུང་བས། །ཐབས་ཤེས་རྟོགས་པའི་ན་ཚོད་ཆེར་རྫོགས་ནས། །དབང་བསྐུར་ནོར་བུའི་ཅོད་པན་ནོད་པར་ཤོག །སྙིང་གི་བུམ་པར་ཁྱོད་གསུང་བདུད་རྩིའི་རྒྱུན། །བསམ་བྱུང་སྐྱ་བས་ལེགས་པར་བསྲུངས་པ་ལས། །མཐའ་བྲལ་ལྟ་བ་སྙིང་རྗེའི་གསེར་མདངས་དང༌། །མི་ཕྱེད་བཅུད་ཀྱི་གོང་བུར་འདྲིལ་བར་ཤོག །ཚུལ་དེ་རྒྱ་ཆེན་སྤྱོད་པའི་རྒྱན་ལྡན་པར། །བརྩོན་པ་དྲག་པོས་བར་མེད་བསྐྱེད་བསྲིངས་བས། །ཤིན་སྦྱངས་དགའ་བ་མི་མཉམ་སྟེར་བྱེད་པའི། །ཤེར་ཕྱིན་མཛེས་མའི་བྲང་ལ་སེན་འདེབས་ཤོག་ཁྱོད་ཀྱིས་མོས་སྤྱོད་ཡོན་ཏན་སྒྲུབ་པའི་སྒོ། །རབ་མཆོག་ལགས་པར་གཟིགས་པའི་ཐབས་མཁས་ཚུལ། །མ་ལུས་བདེ་བླག་ཉིད་དུ་ཡོངས་གྲུབ་ནས། །ཆོས་མཆོག་ཟུར་ཕུད་སྤོ་ལ་ཕྱིན་པར་ཤོག །དེ་ནས་གཉིས་སྣང་སྤྲོས་པའི་ན་བུན་རྡུལ། །གནས་ལུགས་ནམ་མཁར་དག་པའི་རྗེས་ཐོགས་སུ། །ཟབ་ཅིང་རྒྱ་ཆེའི་སྣང་བ་
མཐའ་ཡས་ཀྱིས། །ཆོས་དབྱིངས་ངོས་ཀུན་ཐིག་ལེ་འགོད་གྱུར་ཅིག །ས་དང་ས་ལ་རྣམ་པ་ཐ་དད་པའི། །ཚོགས་ཀྱི་དགའ་སྟོན་གསར་པ་ལ་རྩེ་ཞིང༌། །རློམ་སེམས་བྲལ་བ་སྒྱུ་མའི་མི་ལྟ་བུས། །རྫོགས་སྨིན་སྦྱང་གསུམ་ཕ་མཐར་རྒལ་བར་ཤོག །རྟག་ཏུ་མགོན་ཁྱོད་བཀའ་ཡི་སྤྲིང་ཡིག་ནི། །བརྩེ་བའི་ལག་རྩེར་ཐོགས་ནས་ཡིད་ཅན་ལ། །ཀློག་པའི་ལས་ཀྱིས་ཅུང་ཟད་མི་དུབ་པར། །ཞིང་ཁམས་རྒྱ་མཚོའི་ཐ་གྲུ་ཉུལ་བར་ཤོག །གསུང་རབ་མ་ལུས་གཞན་དྲིང་མི་འཇོག་པར། །དྲང་སྲོང་དགོངས་པའི་ཐེག་ལམ་ཉག་གཅིག་ནས། །འགྲེལ་བྱེད་ངག་གི་བ་དན་བྱེ་བ་བརྒྱས། །རྒྱལ་བསྟན་ཁང་པ་རྣམ་པར་བརྒྱན་བྱེད་ཤོག །སྒྲུབ་དང་སུན་འབྱིན་སྦྱོར་བ་རྣོན་པོ་ཡིས། །ས་སྟེང་ལོག་པར་སྨྲ་བའི་དུག་འཕྲོགས་ཤིང༌། །མི་བཟློག་རིགས་པའི་གཟི་བྱིན་རྒྱ་ཆེ་བས། །མཁས་པའི་ཡིད་ལ་སྨིན་པ་སྦྱིན་གྱུར་ཅིག །བདག་གི་སྙན་ངག་སྡེབས་ལེགས་ཕུང་པོ་ནི། །གྲགས་པའི་ཕོ་ཉས་དུས་གསུམ་མི་ངལ་བར། །ཕྱོགས་ཀྱི་བུ་མོའི་རྣ་ལུང་ལ་རྒྱུད་ཅིང༌། །ཐུབ་རྣམས་ཁ་ལ་རྫོགས་ལྡན་འགུགས་གྱུར་ཅིག །སངས་རྒྱས་ཆོས་སྨྲ་འཇིག་རྟེན་རྒྱན་བྱེད་རྣམས། །རྩོད་དུས་འཇིགས་པ་བརྒྱ་ཡིས་གཙེ་བ་ན། །མཐུ་སྟོབས་རྡོ་རྗེ་གདེངས་པའི་བརྗིད་ཟིལ་གྱིས། །སྲུང་བའི་དཔའ་བོ་མཆོག་ཏུ་བདག་འགྱུར་ཤོག །མདོར་ན་སྲིད་ཞིའི་
ལེགས་ཚོགས་ཀུན་གྱི་གཞི། །རྒྱལ་བའི་ཆོས་ཚུལ་ཉན་དང་སྒྲུབ་པ་དང༌། །སྟོན་པའི་སྨོན་ལམ་ཡིད་བཞིན་རྩལ་རྫོགས་ནས། །ཆོས་ཀྱི་དབང་ཕྱུག་ཁྱོད་བཞིན་འགྱུར་བར་ཤོག །རྒྱལ་བ་ཚེ་དཔག་ཏུ་མེད་པ་ལ་བསྟོད་པ་དགེ་ལེགས་ཉིན་བྱེད་འདྲེན་པའི་ཤིང་རྟ་ཞེས་བྱ་བ་མདོ་སྨད་རྡོ་རོལ་གྱི་ཕྲེང་རྒྱུད་མཁན་པོ་ཉི་མ་དཔལ་གྱིས་བི་ཛ་ཡ་ཞེས་པ་ཤིང་ལུག་ཁྲུམ་ཟླའི་དཀར་ཕྱོགས་དྲང་སྲོང་རི་ཥིའི་དཀྱིལ་འཁོར་འཆི་མེད་ཀྱི་བཏུང་བ་འགྱེད་པའི་དུས་སུ་གསེར་ལྗོངས་པདྨོ་བཀོད་པའི་སྤྱིལ་སྦུགས་སུ་སྦྱར་བ་བསམ་དོན་འགྲུབ་པའི་རྒྱུར་གྱུར་ཅིག །མངྒ་ལཾ། ༈ །།བཀྲ་ཤིས་པདྨ་རྒྱས་པའི་ཡིད་འོང་ཞལ། །ཚངས་དབྱངས་སྦྲང་རྩིའི་དོག་པ་རིང་པོ་ཅན། །ཐུབ་རྣམས་ཡིད་ཀྱི་བུང་བ་ཆགས་བྱེད་པའི། །འོད་མཛད་སྣང་བ་དཔག་མེད་ཁྱོད་ཕྱག་འཚལ། ཁྱོད་ཀྱི་རབ་དཀར་གྲགས་པའི་ཡི་གེ་ནི། །རབ་འབྱམས་ཞིང་གི་རྒྱལ་བས་ལན་མང་དུ། །མཁས་པའི་ཚོགས་སུ་དབྱངས་ཀྱིས་གསལ་མཛད་པས། །ལྷ་དང་མི་རྣམས་ཉིན་བཞིན་ཁ་ཏོན་བྱེད། །དེ་ལྟར་རབ་མང་འགྲོ་བའི་ཐོར་ཅོག་རྩེ། །གཟི་ལྡན་མཚན་གྱི་ཞགས་པས་ཉེར་དྲངས་ཏེ། །རང་གི་ཞབས་རྡུལ་གུར་གུམ་ཐིག་ལེ་ཡིས། །དཔལ་འབར་བགྱིས་པའི་ཞིང་དུ་རྩེ་བར་མཛད། ཁྱོད་ཀྱི་མཚན་ཙམ་གུས་པས་ཀློག་པ་རྣམས། །བསམ་ཡས་
ཡུལ་གྱིས་བསྐལ་པའི་ཕྱོགས་གནས་ཀྱང༌། །མཐུ་སྟོབས་ཐོགས་མེད་འོད་ཟེར་ཕྲེང་ཚོགས་ཀྱིས། །པདྨ་ཉི་ཤར་བཞིན་དུ་སྨིན་པར་འགྱུར། །བསོད་ནམས་མཐར་སོན་ཁྱོད་ལ་བལྟ་བ་ན། །མཛེས་སྡུག་འཇིག་རྟེན་གསུམ་ན་དཔེ་མེད་དང༌། །ཤིས་དགུའི་མཆོག་སྟེར་མཐུ་ཡི་ཁྱད་པར་གྱིས། །དང་པོར་མིག་དང་ཡིད་ལ་ཚིམ་པ་སྐྱེད། །དེ་ནས་ཡེ་ཤེས་བཅུད་ཀྱིས་རྒྱས་པའི་ཞལ། །ཕན་དང་བདེན་པའི་དོན་ལྡན་ལེགས་བཤད་དབྱངས། །སྔོན་མེད་ཆོ་འཕྲུལ་བརྒྱ་ཡི་རྒྱན་བཅས་ཏེ། །སྤྲོ་བས་ཡིད་དང་རྣ་བ་ཆེར་སིམ་མཛད། །རྨོངས་པ་མཚན་མོའི་སྨག་གིས་ཐོག་མེད་ནས། །སྐལ་ངན་བགྱིས་པའི་ཡིད་ཀྱང་ཁྱོད་གསུང་མཐུས། །ཚུལ་བཞིན་སེམས་པའི་འོད་ཀྱིས་སྐྱ་གྱུར་ནས། །ཡེ་ཤེས་ལི་ཁྲིའི་སྣང་བ་རིམ་གྱིས་རྩོམ། ཁྱོད་ཀྱི་ཆོས་སྐུ་ཤིན་ཏུ་ཡོངས་དག་པ། །ཟབ་མོ་སོ་སོ་རང་གིས་རིག་བྱ་བའང༌། །ཚུལ་འདིས་འགྲོ་ལ་ལྷང་ངེར་བསྟན་མཛད་ཕྱིར། །གསུང་གི་རྣམ་འཕྲུལ་བསམ་མི་ཁྱབ་པ་ལགས། །སྲིད་ཞིའི་ཕུན་ཚོགས་འདབ་མའི་ཆ་རྫོགས་པ། ཁྱོད་གསུང་དཔག་བསམ་སྡོང་པོ་འདི་སྐྱེས་པས། །མ་ལུས་ཆོས་དབྱིངས་མཛེས་མ་སྟོན་དུས་ཀྱི། །ཟླ་ཟེར་སྤུ་ལོང་ལྟ་བུའི་དགའ་བ་འཛིན། །དེ་ལྟའི་ཡ་མཚན་འོད་ཀྱི་རྩེ་དགར་བཅས། །ཚོགས་གཉིས་རྟ་མཆོག་
བདུན་པའི་ཤིང་རྟ་ཡིས། །བསྐལ་མང་གླིང་གི་འཁོར་ལོ་འཇལ་བྱེད་ཕྱིར། ཁྱོད་ནི་ཚེ་དཔག་མེད་ཀྱི་ཉི་མ་ལགས། །སྒྱུ་མའི་སྤྲོས་པ་ཀུན་གྱི་དེ་ཁོ་ན། ཁྱོད་ལ་གཡོགས་པ་ཀུན་དང་བྲལ་བའི་ཕྱིར། །མཐའ་དག་ཤེས་བྱའི་ནམ་མཁའི་སྐད་ཅིག་རེར། །ཡེ་ཤེས་འོད་ཀྱིས་འགེངས་པའི་དབང་ཕྱུག་མངའ། ཁྱོད་ཀྱི་མཁྱེན་པ་གདུལ་བྱའི་ཁམས་དབང་དང༌། །འདུལ་བའི་ཐབས་དང་དུས་ལ་ཐོགས་མེད་ཅིང༌། །ཐུགས་རྗེ་ཆེན་པོས་རང་གིས་ཕུན་ཚོགས་ཀུན། །གཞན་ཕྱིར་བསྐལ་པ་དུ་མར་བྱིན་བརླབས་པ། །དེ་ཕྱིར་འོད་བཟང་ཉི་མའི་དཀྱིལ་འཁོར་ནི། །གཅིག་པུས་ཕྱོགས་བཞིའི་ནམ་མཁའ་རྒྱན་བྱེད་ལྟར། །མཛད་པ་གཞན་གྱི་དྲིང་ལ་མི་འཇོག་པར། །གདུལ་བྱའི་ཡུལ་ལ་མཉམ་པར་འཇུག་པ་ལགས། །དེ་སྐད་བློ་ཆུང་ཤིང་གི་པི་ཝཾ་ཁོག །རྩེ་གཅིག་དང་བའི་རྒྱུད་ཅན་བསྐུལ་བའི་སྒྲས། ཁྱོད་མཆོད་བསོད་ནམས་ཟླ་བའི་དུམ་བུ་ལྟས། །འགྲོ་ཀུན་ཚེ་དཔག་མེད་ཀྱི་གནས་རྙེད་ཤོ༌།བསྟན་པའི་ཉི་མས་གུས་པ་ཆེན་པོས་ཕྱག་དང་བཅས་ཏེ་ཕུལ། ༈ །སངས་རྒྱས་མཚན་ཐོས་ཙམ་ཡང་བསྐལ་མང་དུ། །ཨུ་དུམ་ཝ་རའི་མེ་ཏོག་བཞིན་དཀོན་ཕྱིར། །ཕུལ་བྱུང་བསོད་ནམས་ཞིང་འདིར་སྙན་དངགས་ཀྱི། །ས་བོན་བག་ཙམ་འདེབས་ལ་སྤྲོ་བ་
སྐྱེས། །མཐོང་བས་དགའ་སྦྱིན་བུམ་པ་བཟང་པོའི་མཆོག །ཐོས་པས་སྡིག་འཕྲོག་གདུང་སེལ་རི་བོང་ཅན། །ཡིད་ལ་དྲན་པ་ཡིས་ཀྱང་ལེགས་དགུའི་ནོར། །སྦྱིན་མཛད་ཆོས་ཀྱི་རྒྱལ་པོ་འོད་དཔག་མེད། ཁྱེད་ནི་འཁོར་བ་མི་གཙང་འདམ་རྫབ་ལ། །ལྷག་པར་དམིགས་པའི་བརྩེ་ཆེན་སྡོང་བུ་ལས། །ཟབ་ཅིང་རྒྱ་ཆེའི་ཡོན་ཏན་འདབ་མ་བརྒྱ། །གྲོལ་ནས་ཚངས་ཆེན་རལ་པའི་ཏོག་ཏུ་འཕགས། ཁྱོད་ཀྱི་ཞལ་བཟང་པདྨའི་མཆོག་ལྟར་མཛེས། །གེ་སར་སྦུབས་ལས་ཆོས་སྒྲའི་དྲི་བསུང་འཕྲོ། །དེ་ནི་མཚན་དཔེའི་ཡལ་ག་རབ་རྫོགས་པའི། །དཔག་བསམ་སྐུ་ཡི་ཆ་ཤས་ཁོ་ནར་འཚམས། །ཚངས་པའི་ང་རོ་ཞི་བའི་དོན་སྟོན་པ། །ཆོ་འཕྲུལ་བརྒྱ་དང་ལྷན་ཅིག་མཐོར་སྒྲོགས་པས། །གདུལ་བྱའི་སྙིང་ལ་རིང་ནས་འདྲིས་པའི་མུན། །འདོད་ལྷའི་དགའ་བ་དག་དང་ལྷན་ཅིག་འཕྲོག །མཁྱེན་པས་ཤེས་བྱའི་དཀྱིལ་འཁོར་དུས་གཅིག་ཁྱབ། །ཐུགས་རྗེས་མ་ལུས་འགྲོ་ལ་གཅིག་ཏུ་འཁྱུད། །མཁྱེན་དང་བརྩེ་བས་སྲིད་ཞིའི་རྒུད་པ་ཀུན། །ཅིག་ཆར་འགོག་པའི་སྤྱོད་ཡུལ་ཁྱེད་ཀྱིས་བསྙེས། །སྐུ་གསུང་ཐུགས་ཀྱི་སྤྱོད་པ་ཇི་སྙེད་པ། །གཅིག་ཏུ་བཟང་བ་ཛམྦུའི་གསེར་འདྲ་ལ། །ཀུན་ཀྱང་འགྲོ་བའི་ཉེར་འཚོར་རྟག་འཇུག་པའི། །སྐྱབས་འོས་ཁྱོད་ལ་སྙིང་ནས་སྐྱབས་
སུ་མཆི། །དེང་ནས་སྐྱེ་བ་ཀུན་ཏུ་ཁྱོད་ཞབས་རྡུལ། །རལ་པའི་ཅོད་པན་རྩེ་མོར་མ་འབྲལ་ཞིང༌། ཁྱོད་གསུང་བདུད་རྩིས་ཡིད་ཀྱི་ཨུཏྤལ་ལ། །དགོད་པའི་ལང་ཚོ་མི་རྙིང་ཐོབ་གྱུར་ཅིག །འོད་མཛད་བརྒྱ་བྱིན་ཐོགས་པའི་ནོར་བུའི་གཟིས། །བརྗིད་འབར་བློ་ཡི་མིག་སྟོང་ཐིག་ལེ་ཅན། ཁྲོས་པའི་བརྒལ་བརྟགས་རྩེ་བརྒྱའི་མཚོན་འཕངས་པས། །ཕས་རྒོལ་ལྟ་མིན་རྣམ་པར་འཐོར་བྱེད་ཤོག །ཆེར་སྙིགས་དུས་ཀྱི་རྒྱ་མཚོར་དྲང་སྲོང་ཆེའི། །གསུང་རབ་རིན་ཆེན་འཛིན་མ་བྱིང་བ་ན། །བློ་དང་བརྩོན་པའི་ཤུགས་ཀྱིས་འདེགས་བཟོད་པའི། །པད་དཀར་མིག་བཟང་འཇུག་པར་བདག་འགྱུར་ཤོག་ཁྱོད་ཀྱིས་ལེགས་གསུངས་རིག་སྔགས་འདོན་བྱེད་ཅིང༌། །དེ་དོན་ཚང་ལ་མ་ནོར་སྒྲུབ་པ་ཡི། །ནན་ཏན་མེ་ཏོག་ཉིན་བཞིན་འབུལ་བ་ཡིས། །རྒྱལ་རྣམས་དགྱེས་སྐྱེད་དྲང་སྲོང་གཙོ་བོར་ཤོག །དེ་སྐད་ནགས་དང་ནགས་འདབ་ན། །དབྱངས་སྙན་སྒྲོག་པའི་ཁུ་བྱུག་སྤུན། །བསྟན་པའི་ཉི་མར་མིང་བརྗོད་པས། ཁྲུམ་ཟླའི་ཚེས་བཅུར་གླུ་རུ་བླངས།། །།
ཁྱབ་བདག་འཇིག་རྟེན་དབང་ཕྱུག་འོད་གསལ་སྤྲུལ་པའི་རྡོ་རྗེ་ལ་ཕྱག་འཚལ་ལོ། །ཆོས་ཀྱི་དབྱིངས་ལས་སྤྲུལ་པའི་སྐུར་བཞེངས་ཏེ། །སྣ་ཚོགས་ཞིང་དུ་གདུལ་བྱའི་མོས་པ་བཞིན། །རྣམ་པ་མང་པོའི་མཛད་པས་རྣམ་རོལ་པ། །འགྲོ་བའི་གཉེན་གཅིག་རྗེ་བཙུན་སྤྱན་རས་གཟིགས། །ཀུན་རྟོག་ཚོན་བརྒྱས་བཀྲ་བའི་རང་སེམས་ཀྱི། ཁང་བརྩེགས་ཡངས་པར་བཟླས་བརྗོད་རོལ་མོ་འཁྲོལ། །དད་པའི་མཆོད་ཡོན་སྦྲེང་ཞིང་སྤྱན་འདྲེན་ན། །ཐུགས་རྗེ་ཤིང་རྟའི་ཁ་ལོ་ཕྱོགས་འདིར་སྒྱུར། །ཡེ་ཤེས་ཙམ་ལས་རང་ཤར་སྒྱུ་འདྲའི་གཟུགས། །ཐུགས་བསྐྱེད་ཙམ་གྱིས་གདུལ་བྱའི་མདུན་ན་བཞུགས། ཁྱོད་ཀྱི་གཤེགས་བཞུད་འབད་ལ་ལྟོས་མིན་པས། །ཆུ་ནང་ཟླ་ཤར་ལྟ་བུར་བལྟ་བར་བགྱི། །སྡིག་དང་ཉོན་མོངས་དུ་མའི་ཕྱགས་དར་གྱིས། །གང་བའི་ཡིད་འདི་མཛེས་པར་མི་སྣང་ཡང༌། །ཆགས་བྲལ་གཙོ་བོ་ཁྱོད་ལ་སྲིད་ཞི་གཉིས། །མཉམ་པ་ལགས་ཀྱིས་རང་གི་ཁབ་བཞིན་དགོངས། ཁྱོད་ཀྱིས་དགོངས་ན་བདག་འདྲའི་ཤེས་རྒྱུད་ཀྱང༌། །འོག་མིན་གཙང་མའི་ཁྱིམ་ལྟར་འགྱུར་དུ་རེ། །གང་ཕྱིར་མནར་མེད་མེ་ཡི་འོབས་ནང་ཡང༌། ཁྱོད་ཞབས་རེག་པས་མེ་ཏོག་མཚོ་གླིང་འགྱུར། །སྲིད་པའི་འབྲོག་དགོན་ཉམ་ང་འཇིགས་རུང་དུ། །སྡིག་པའི་ཆང་འཐུང་གོམ་ཚུགས་འཁྱོར་བ་བདག །ད་གདོད་འཕགས་
པའི་མགྲོན་པོ་ཁྱོད་ཐོས་ཏེ། །ཡིག་དྲུག་ཆོས་ཀྱི་བཞི་མདོར་དུས་ཤིག་འདེབས། །དངོས་གྲུབ་སློང་བ་ཚོལ་བའི་མགོན་ཁྱོད་དང༌། །སངས་རྒྱས་མཐོང་ལ་སྒོམ་པའི་གུས་ལྡན་བདག །རིག་སྔགས་ལམ་སྲང་གཅིག་ཏུ་འཛོམ་དུས་འདིར། །མཐོང་དཀའི་ཞལ་བཟང་གསལ་བར་བསྟན་དུ་གསོལ། །གང་ཚེ་བདག་ཅག་རིག་སྔགས་རྒྱལ་མོའི་ཤིང༌། །ཡི་གེའི་ཡལ་འདབ་བཏུད་པ་ལ་འཇུ་ཚེ། །འཇིག་རྟེན་ཡབ་ཁྱོད་ཐུགས་རྗེའི་ཕྱག་རྐྱོང་ལ། །དངོས་གྲུབ་འབྲས་བུའི་ཁྱད་པར་བཟང་མང་སྩོལ། །འཁོར་བ་རྒྱ་མཚོའི་འགྲམ་དུ་རིག་སྔགས་གྲུ། །སྒྱུར་ལེགས་བཤམས་ནས་ཕ་རོལ་ས་འགྲོ་ཞེས། །དུས་དྲུག་སྒྲོག་ཁྱོད་རེ་བའི་ཡུལ་བྱས་ཏེ། །གྲུར་ཞུགས་བདག་ཅག་མྱུར་བར་བསྒྲལ་དུ་གསོལ། །དམན་དང་ཕོངས་པ་ལྷག་པར་རྗེས་འཛིན་ཕྱིར། །རྒྱལ་རྣམས་ཁྱོད་ལ་སྙིང་རྗེའི་གཏེར་དུ་བསྔགས། །བདག་འདྲ་སྐལ་བ་དམན་པས་མི་སྒྲོལ་ན། །དེ་ལྟར་བསྔགས་པའི་བདེན་པ་གང་དུ་སོང༌། །དམ་ཆོས་རིན་ཆེན་གླིང་ནས་ལེགས་བརྟགས་ཏེ། །རིག་སྔགས་ཡིད་བཞིན་ནོར་བུའི་རྒྱལ་པོ་བླངས། །ངལ་བརྒྱས་མཆོད་ཀྱང་དགོས་པ་མ་གྲུབ་ན། །དོན་མཐུན་གྲོགས་མང་ནང་དུ་ངོ་ཡང་ཚ། །འོན་ཏེ་དྲང་སྲོང་རྣམས་ཀྱང་རྒྱལ་པོའི་སྲིད། །ཉི་ཚེས་དཀའ་ཐུབ་དགོས་པ་གྲུབ་པར་སེམས། །
སངས་རྒྱས་རྒྱལ་སྲིད་འཁོར་ལོ་རིན་ཆེན་ལྟའི། །རིག་སྔགས་ལག་རྩེར་འོངས་ན་སྨོས་ཅི་འཚལ། །བཀླག་གྲུབ་སྔགས་འདི་གཟུང་སླ་ཡི་གེ་ཉུང༌། །དོན་ཚུལ་ཕྱེ་ན་ཆོས་དབྱིངས་ཁྱོན་ལྟར་ཡང༌། ཁྱོད་དང་གྲངས་མེད་རྒྱལ་བའང་འདི་ན་བཞུགས། །སངས་རྒྱས་མཛད་པའི་སྤྲིན་ཡང་འདི་ལས་འབྱུང༌། །ཟབ་དོན་རོ་བརྒྱ་ལྡན་པའི་ལ་དུ་འདི། །ཤེས་རབ་སོ་རྩེ་རྣོན་པོས་ལེགས་བལྡད་དེ། །ཏིང་འཛིན་ལྕེ་ཡིས་ཡང་དང་ཡང་མྱང་བ། །དེ་དག་བདུད་རྩིའི་བྲོ་བ་རིམ་གྱིས་ཤེས། ཁྱོད་ལས་རིག་སྔགས་བདུད་རྩི་འདི་བཞེས་ཏེ། །སྟོབས་བཅུའི་རྩལ་རྫོགས་གངྒཱའི་བྱེ་སྙེད་ཀྱང༌། །དཀོན་མཆོག་ཆོས་འདིར་བྱས་པ་གཟོ་སླད་དུ། །སུ་ཞིག་ཟློས་བརྩོན་དེ་ལ་མཆོག་སྦྱིན་མཛད། །གང་ལ་རྒྱལ་རྣམས་ཡེ་ཤེས་རྗེས་འབྲང་བའི། །ཐུགས་རྗེ་ཆེན་པོ་མིང་གི་རྗེས་དྲན་སྒོར། །རྣམ་པར་འཕྲུལ་འདི་མཁའ་ཁྱབ་རྒྱལ་བའི་སྤྲིན། །དབང་བྱེད་སིལ་སྙན་ཡན་ལག་བརྒྱ་པའང་ཡིན། །དཀའ་སྤྱད་བརྒྱ་ཡིས་མཐོང་དཀའི་ལྷ་རྣམས་ཀྱང༌། །འདི་ཟློས་མདུན་སར་མ་བོས་བཞིན་དུ་འདུ། །ས་བདག་དུ་མས་མ་ཐོབ་གླང་པོ་རྣམས། །མ་ལ་ཡ་ཡི་ནགས་སུ་རང་ཉིད་འོང༌། །རྡུལ་བྲལ་སྒྱུ་མའི་རྣམ་ཐར་ཁམས་ལས་གྲུབ། །སྔགས་ཀྱི་རྫུ་འཕྲུལ་སྟུག་པོའི་རྒྱན་བཀོད་པ། །ཡིག་དྲུག་འཕགས་པའི་ཞིང་བཟང་ཉམས་དགའ་བར། །
བཟླས་བརྗོད་རྩེ་འཇོར་རོལ་ནུས་སྐལ་པ་བཟང༌། །སྙིང་རྗེའི་པདྨ་ཕྱིན་དྲུག་འདབ་ཕྲེང་ཅན། །ཆོས་དཀར་ལང་ཚོ་རྫོགས་པའི་མཛེས་སྡུག་གཏེར། །ཡི་གེའི་གཟུགས་གྱུར་སྔགས་ཀྱི་མེ་ཏོག་ནང༌། །བསམ་གཏན་སྐྱིལ་ཀྲུང་འཆའ་རྣམས་འཕགས་པའི་སྲས། །འཇིགས་བརྒྱའི་མཚོན་ཆར་འབབས་པས་ཕན་བདེའི་སྲོག །མཐར་བྱེད་ལྔ་བདོའི་གཡུལ་ཆེན་ནང་འདུག་ཀྱང༌། །འདི་འདྲའི་ཆོས་རྫོང་འཇིགས་མེད་ལ་བརྟེན་ཏེ། །ཉིན་མཚན་བདེ་བས་འདའ་རྣམས་སྐྱིད་པའི་ཕུལ། །སེར་སྣའི་ལས་ཀྱིས་མགུལ་པ་འགགས་གྱུར་ཅིང༌། །རྒྱ་མཚོར་ཆུ་ཡིས་ཕོངས་པའི་ཡི་དྭགས་ཀྱང༌། །གང་མཐུས་ལྷ་རྫས་ཟས་ལ་ཅི་བདེ་བར། །སྤྱོད་ནུས་ས་གསུམ་འཚོ་བའི་བུམ་བཟང་གཅིག །སྣ་ཚོགས་ཕྱོགས་རུམ་ནས་མཐོན་གྲངས་མཐའ་ཡས། །བར་སྣང་དཀྱིལ་འཁོར་འགེབ་པའི་རྡུལ་ཚུབ་སྤྲིན། །དྲག་པོར་རབ་འཁྲུགས་དམར་པོའི་གཟུགས་ཅན་རྣམས། །རླུང་གིས་བདས་པས་གཡུལ་ཕམ་བྱེར་བ་བཞིན། །ལས་དང་ཉོན་མོངས་གཏུམ་པོའི་བཀའ་ལུང་གིས། །དྲག་ཏུ་རྦད་པའི་སྡུག་བསྔལ་མི་བཟད་ཚོགས། །ཐུགས་རྗེའི་རིག་སྔགས་གཟི་བྱིན་ཆ་ཤས་རེས། །ཤི་རོའི་ལྷག་མའང་བལྟར་མི་མངོན་པར་འགྲོ། །མགོན་པོའི་རྣམ་ཐར་སྒྲོག་པའི་སྤྲིང་ཡིག་གསར། །མཛེས་སྐུ་བལྟ་བའི་མིག་དང་གྲུ་འཛིན་ཞིང༌། །བགྲོད་
པའི་རྟ་མཆོག་ཤུལ་རིང་ལམ་རྒྱགས་སོགས། །དགོས་དགུ་མཐའ་དག་འདི་ཡིས་བྱེད་པར་འགྱུར། །བརྟུལ་ཞུགས་མཆོག་བརྩོན་རིག་སྔགས་འདི་ཟློས་ཤིང༌། །སྔགས་འདིའི་དེ་ཉིད་སྒྲུབ་པ་ལྷུར་བླང་ན། །འདི་གཅིག་ཁོ་ནས་རྫོགས་སྨིན་སྦྱང་གསུམ་གྱི། །རྒྱ་མཚོ་བརྒལ་སླད་ཆོས་ཀྱི་ཉིང་ཁུར་གསུངས། །སངས་རྒྱས་ཆོས་བརྩེགས་སྤྲིན་ཆེན་མཐོ་ལས་འོངས། །དམན་པའི་འཇིག་རྟེན་ཡུལ་ལ་ལྷག་པར་འབབ། །ཞི་བསིལ་རང་བཞིན་ཕན་བདེའི་རོ་གཅིག་པ། །བདུད་རྩིའི་ཆར་འདི་བརྒྱ་ལམ་ཞིག་ན་འབྱུང༌། །པདྨའི་མཆོག་སོགས་དེ་བཞིན་གཤེགས་རྣམས་དང༌། །སྒྲིབ་སེལ་ལ་སོགས་རྒྱལ་སྲས་མཆོག་རྣམས་ཀྱིས། །དཀའ་སྤྱད་དུ་མས་བཙལ་ཞིང་མཆོད་མཛད་པ། །འདི་འདྲའི་རིན་ཆེན་གྲངས་མེད་ཞིང་ནའང་དཀོན། །དེ་ནི་སྣ་ཚོགས་སྐྱེ་བོའི་ལག་བརྒྱུད་ཚེ། ཁ་ཅིག་གཙུག་རྒྱན་བཞིན་དུ་མགོ་ལ་བཀུར། །གཞན་དག་སྲང་མདོར་བོར་བའི་རྡོ་བཞིན་བརྙས། །ལ་ལ་ཚོད་པའི་རྫས་བཞིན་ཟོང་དུ་འཚོང༌། །འོན་ཀྱང་བཀའ་དྲིན་གཟོ་དང་ལོག་པར་སྒྲུབ། །མཚུངས་པར་རྗེས་བརྩེ་རྒྱས་པའི་སྤྱན་རས་ཀྱིས། །གཟིགས་ཤིང་ཆོས་མཆོག་སྙིང་པོའི་སྐལ་པའི་ཤས། །སྙོམས་པར་སྦྱིན་མཛད་དེ་ལ་སུ་མི་གུས། །མགོན་ཁྱོད་ཐ་མལ་གཟུགས་ཀྱིས་མདུན་བྱོན་ནས། །
འདི་ལྟར་ཡིད་བཞིན་ནོར་བུའི་གཏེར་ཁ་བསྟན། །གཏེར་འདིའི་ཡོན་ཏན་ཇི་ལྟར་རྣམ་བསམ་པ། །དེ་ལྟར་ཁྱོད་དྲན་ཕྱིར་ཞིང་མཐོང་ལ་འདུན། །མཚན་དཔེའི་དཔལ་འབར་དྲི་མེད་ཟླ་བའི་ཞལ། །བལྟ་ནུས་རྗེས་དྲན་མིག་སྨན་མ་གྲུབ་ཀྱང༌། །བལྟར་མེད་རིག་སྔགས་རྒྱལ་མོའི་སྒྲ་དབྱངས་སུ། །རྩེན་པའི་རྣམ་འཕྲུལ་མཇལ་ལ་རབ་དགའ་སྐྱེས། །ཏིང་འཛིན་ལུས་ལ་སྔགས་ཀྱི་སྒྲོ་གཤོག་རྒྱས། །ས་མཆོག་སྤྱོད་ཡུལ་དག་པའི་ནམ་མཁར་འཕུར། །མཐུ་ཆེན་རྒྱལ་སྲས་ངང་པའི་ཚོགས་དབུས་ནས། །འཇིག་རྟེན་སྙིང་རྗེས་བལྟ་བར་ནམ་ཞིག་འགྱུར། །ད་ནི་ཟིན་མེད་སྤུན་པ་འཕྱར་བ་ལྟའི། སྙིང་པོ་མེད་པའི་དཔེ་རེད་ཟིན་མེད་ཀྱི་དཔེ་མ་རེད། །དོན་མང་བྱ་བ་མང་པོ་རྒྱང་བསྲིངས་ཏེ། །དབེན་པའི་ནགས་རིར་ཉིན་མཚན་བར་མེད་དུ། །ཡིག་དྲུག་རྣལ་འབྱོར་སྤྱོད་པར་བདག་གྱུར་ཅིག །ཟབ་དར་རྒྱ་ཆེའི་གནད་རྣམས་ཀུན་བསྡུས་པའི། །ལམ་འདི་སྐྱེ་བ་ཀུན་ཏུ་མི་བརྗེད་ཅིང༌། །མང་ཐོས་རྒྱ་མཚོས་ཞིབ་མོར་ལེགས་སྤྱངས་ཏེ། །རྩེ་གཅིག་སྒྲུབ་པས་མགོན་པོ་མཉེས་བྱེད་ཤོག །དེ་ཚེ་ཡིག་འབྲུ་རེས་ཀྱང་མཐའ་ཡས་པའི། །ཆོས་སྒོ་རྙེད་ཅིང་སངས་རྒྱས་གྲངས་མེད་མཐོང༌། །བསམ་ཡས་རྣམ་ཐར་སྒོ་མོ་རང་ཕྱེ་སྟེ། །དངོས་གྲུབ་མཆོག་གི་གནས་ལ་དབང་སྒྱུར་ཤོག །འཕགས་པའི་དོན་མཐུན་ཟད་པའི་དུས་ངན་མཐར། །
དགེ་བའི་བརྒྱགས་ཆང་འགྲོན་པོ་ལམ་སྟོར་རྣམས། །རྙེད་མང་འཇུག་པ་བདེ་བའི་ལམ་འདི་ནས། །སངས་རྒྱས་ཞབས་དྲུང་ཉིན་བཞིན་འགྱེད་པར་ཤོག །སྒྲིབ་བྲལ་མཁའ་ལྟར་ཡངས་པའི་ཡེ་ཤེས་གྲུབ། །སྒྱུ་མའི་རྣམ་འཕྲུལ་སྤྲིན་གྱིས་ཆོས་དབྱིངས་ཁྱབ། །དམ་ཆོས་ཆར་གྱིས་འཇིག་རྟེན་ཉེར་འཚོ་བ། །སྤྱན་རས་གཟིགས་དབང་གཙོ་བོའི་གནས་ཐོབ་ཤོག །འཕགས་པ་ཐུགས་རྗེ་ཆེན་པོ་ལ་ཡི་གེ་དྲུག་པའི་རིག་སྔགས་ཀྱི་སྒོ་ནས་བསྟོད་པ་བྱང་མས་ཆས་སྙོགས་ཞེས་བྱ་བ་བོད་ཀྱི་གནའ་མྱིའི་ལུགས་ཀྱི་རྗེས་མ་ཟིན་ཅིང༌། །ད་མྱིའི་ལུགས་ལ་མ་དད་པ་འཇིགས་མེད་བསྟན་པའི་ཉི་མ་ཞེས་བྱ་བའི་དྭཱ་རི་དྲས་སྦྱར་བའོ། ༈ རབ་གསལ་མཁྱེན་པའི་སྤྱན་རས་འོད་ཀྱིས་ཤེས་བྱའི་མཁའ་ལ་གུར་གུམ་ལང་ཚོའི་རི་མོ་འབྲི། །ཐུགས་རྗེའི་སྤྱན་གྱི་ཟླ་བ་མཐོང་བས་ལུས་ཅན་མཐའ་དག་ཕན་བདེ་བསིལ་བའི་སྤུ་ལོང་གཡོ། །ལྷར་བཅས་འཇིག་རྟེན་དཀར་པོའི་ཆོས་ལམ་གསལ་པོར་བལྟ་ལ་སྤྱན་དུ་གྱུར་པ་གཅིག་པུ་ཉིད། །གྲངས་མེད་ཞིང་དུ་སྤྱན་རས་གཟིགས་ཞེས་ཡི་གེའི་རྣ་རྒྱན་གཡོ་བ་དེ་ལ་ཕྱག་འཚལ་ལོ། །ནོར་བུ་བཻ་་མཆོག་བྱི་དོར་བྱས་པའི་མཐིང་ཁའི་ཕུན་ཚོགས་ཟིལ་གནོན་ཞིང༌། །སྣ་ཚོགས་རིན་ཆེན་གཟི་ལྡན་རྒྱ་མཚོའི་ཁ་དོག་བཀྲ་བའི་དཔལ་ནི་ཕམ་བྱེད་པ། ཁྱོད་སྤྱན་
ཨུཏྤལ་སྔོན་པོའི་ནགས་ཀྱི་ལང་ཚོ་ཀུན་དགའི་གཏེར་གྱུར་བཞད་པ་ལས། །དགེ་ལེགས་འབྲས་བུའི་ཚོགས་མང་ཤིན་ཏུ་རྒྱས་ལྡན་སྟོན་ཀའི་དུས་བཟང་འོང་བར་ཤེས། །བསམ་གཏན་བདེ་བའི་མིག་སྨན་གྱིས་སྦྱངས་ནག་དཀར་ཡིད་ཙམ་དམར་བའི་ཁ་དོག་རིག་པ་གསུམ་ལྟར་རྣམ་བཀྲ་བ། །མཐའ་ཡས་བསྐལ་པའི་འབྱོར་རྒུད་རྒྱུར་བཅས་ཞིབ་མོ་གཟིགས་ཕྱིར་མིག་རྣམས་ཀུན་ལས་འཇིག་རྟེན་ཤེས་པའི་ཐུ་བོ་དང༌། །གཉིད་ལོག་སེམས་ཅན་རྗེས་སུ་སྲུང་སླད་དུས་གསུམ་མི་སྐྱོ་འཇིག་རྟེན་ཀུན་གྱི་མེལ་ཙེ་བྱེད་པ་ཟུང་གཅིག་ཉིད། །ཚུལ་དེ་རིག་ནས་འཇིག་རྟེན་སྐྱོང་རྣམས་དྲེགས་པའི་རུ་མཚོན་རྩེ་མོ་བཏབ་པ་ཐོར་ཚུགས་བཏུད་པའི་གཟུགས་སུ་སྤྲུལ། །སྔོན་གྱི་རྒྱལ་རྣམས་རིན་ཆེན་སྒྲོན་མེ་ཉི་ཟླའི་གཟི་བྱིན་འགོག་པའི་ཕྲེང་བས་མཆོད་མཛད་ཅིང༌། །ལུས་ཅན་ཕོངས་པ་ཨུཏྤལ་མིག་གི་སྦྱིན་པས་བསྡུས་སོགས་བྱང་ཆུབ་སྤྱོད་པ་གཞལ་མི་ལང༌། །དེ་ལྟར་ཁྱོད་ཀྱིས་འཇིག་རྟེན་འཇིག་རྟེན་འདས་པའི་ཞིང་མང་འབད་པ་བརྒྱ་ཡིས་བརྟེན་ནས་ནི། །བསོད་ནམས་རིན་ཆེན་སྙེམ་ལས་འཐོན་སྲིད་ཞིའི་གཟུགས་ཅན་སྙིང་པོ་བསྡུས་འདྲ་འདི་དག་བརྙེས། ཁྱོད་ཐུགས་ཆོས་ལ་མཉམ་པར་བཞག་ཚེ་འདི་དག་ཞི་བའི་ལྟ་སྟངས་རྩེ་གཅིག་ཉིད་འགྱུར་ཏེ། །དེ་ཚེ་གང་ལ་མགོན་ཁྱོད་གཟིགས་པའི་སྤྱོད་ཡུལ་གནས་དེ་རྣལ་འབྱོར་པས་ཀྱང་ཤེས་མི་
ནུས། །སྙིང་རྗེས་སྣ་ཚོགས་ཡུལ་ལ་བསྐྱོད་ཚེ་ཕྱོགས་ཀུན་གློག་གི་རྩེ་དགས་འགེངས་པ་བཞིན་བྱེད་དེ། །དེ་ཚེ་ངན་སོང་འགྲོ་བ་རྣམས་ཀྱང་ཁྱོད་ཀྱི་སྤྱོད་ཡུལ་རྨད་བྱུང་ཤེས་ནས་དགའ་བར་འགྱུར། །ཆོས་དབྱིངས་མཛེས་མའི་རྩེ་དགའི་འཁྲི་ཤིང་སོར་རྟོག་ཡེ་ཤེས་དང་བའི་གཟུགས་ཀྱི་སྒྱུ་མ་ཅན། །འདི་དག་དམན་དང་ཕོངས་པའི་ཡུལ་ལ་གཟིགས་པ་ལྷུར་ལེན་ཀྱེ་མའོ་སྙིང་རྗེ་ནུས་པ་རྣོ། །སྲིད་བདེ་དབུ་བའི་འཛུམ་རིས་མཐོང་ནས་ཕལ་ཆེར་རང་གི་ཕྱི་མའི་རྒུད་པའང་བརྗེད་པར་འགྱུར། །དགྲ་བཅོམ་སེམས་ལ་དབང་ཐོབ་རྣམས་ཀྱང་ཞི་བདེའི་དབང་སོང་ཉེ་དུའི་གནས་སྐབས་ལྟ་བ་སྤངས། །འཛུམ་ཞིང་ཞི་ལ་མཆོག་ཏུ་མཉེས་གཤིན་བཟང་པོའི་གཟིགས་པ་རྗེས་བརྩེའི་ཟིལ་དངར་སྤྲོ་བ་བཞིན། །དེ་ལ་འཐུངས་པས་ཕྱིར་ཞིང་ངོམ་མེད་ལྷ་བརྒྱའི་མིག་ཡངས་ཏིང་འཛིན་ཐོབ་སྟེ་གནས་པ་ནི། །ཆུ་སྐྱེས་ནགས་སུ་བུང་བའི་ཁྱུ་ཚོགས་རོ་བཅུད་ལེན་ལ་རྩེ་གཅིག་ཞུགས་པ་ལྟ་བུ་སྟེ། །གང་ཕྱིར་ཁྱོད་ཀྱི་གཟིགས་པའི་དཔལ་ནི་གཅིག་པུ་ཉིད་ཀྱིས་ས་གསུམ་འགྲོ་འདི་འཚོ་བར་ནུས། །འཇིག་རྟེན་མིག་ཅེས་གྲགས་པ་གསལ་ལྡན་ཉིན་མོའི་མགྲོན་པོའང་ལན་འགའ་གཟའ་ཡིས་ལོང་བར་མཐོང༌། །རྣམ་སད་མིག་གི་མཛེས་པ་མཚོན་ནུས་པདྨ་གཞོན་ནུའང་མཚན་མོའི་དབང་གིས་གཉིད་ལོག་འགྱུར། །ཀུན་ཏུ་བཟང་པོའི་མིག་མཆོག་གྲུབ་
ཁྱོད་རྒྱུད་ལྔའི་འགྲོ་ལ་རྣམ་པར་གཟིགས་པའི་ཕྲིན་ལས་ནི། །སྐད་ཅིག་ཆར་ཡང་གཞན་དུ་མི་འགྱུར་གང་སླད་སྙིང་རྗེའི་བརྟུལ་ཞུགས་ངེས་པའི་འབྲས་བུ་ལགས། །རང་གི་འོད་ཟེར་ཚོན་རྩིའི་ཕྲེང་བས་ནམ་མཁའི་ངོས་ཀུན་ཟློས་གར་ས་གཞིར་འབྲི་བྱས་ནས། །སྨིན་མའི་རོལ་སྒེག་གཡོ་བ་དང་བཅས་སྙིང་རྗེའི་རྟོགས་བརྗོད་གསལ་བར་མཚོན་པའི་གར་མཛད་ཅིང༌། །དེ་ཡི་རྒྱན་བྱེད་དཔེ་ལས་འདས་པའི་ཚངས་དབྱངས་རོལ་མོས་མཁས་རྣམས་ཡིད་དབང་འཛིན་པ་ན། །ལྷ་མང་ཁྱོད་ལས་མཆོག་དོན་གཉེར་བའི་གསོལ་འདེབས་གླུ་ཡང་ཟློས་གར་ཡན་ལག་ལྷག་མ་འདྲ། །ཉིན་མོའི་དབང་པོ་ཤར་བ་ཉིད་ཀྱིས་ས་སྟེང་པདྨ་མཐའ་དག་རྗེས་སུ་བཟུང་བ་སྟེ། །འདབ་བརྒྱ་མིག་ནི་ཕྱེ་བ་གཅིག་པུས་བུང་བའི་དོན་མཐུན་ཚོགས་ལ་མཛའ་བ་བརྗོད་པ་ཉིད། །གཙོ་བོ་ཁྱོད་སྤྱན་གཟིགས་པ་ཁོ་ནས་ལུས་ཅན་དབུགས་རབ་འབྱིན་པའང་རྣམ་པ་དེ་འདྲ་སྟེ། །ལྷུན་གྱིས་གྲུབ་པའི་ཆོས་ཉིད་ཐོབ་རྣམས་གཞན་ཕན་ལས་ལ་བྱ་དཀའ་ཞེས་བྱ་འགའ་ཡོད་མིན། །འགྲོ་མང་རྒུད་པའི་མཚོན་ཆས་རབ་རྨས་སྤྱོད་ཚུལ་བཟང་པོའི་ཁྲག་རྒྱུན་གཟག་ནས་འགྱེལ་བྱེད་ཅིང༌། །བདེ་བའི་ལོངས་སྤྱོད་གཅེས་དགུ་འཕྲོག་བརྩོན་སྙིགས་མའི་ཆོམ་རྐུན་བརྩེ་བྲལ་ཁྲོ་བོའི་མིག་ཅན་རྣམས། ཁྱོད་ཀྱི་བ་མཆོག་རྫི་མའི་སྒྲོ་ལྡན་དཀྱུས་རིང་སྤྱན་མངའ་
སྨིན་མའི་གཞུ་རིས་ལ་སྦྱར་ནས། །བྱམས་པའི་ལྟ་སྟངས་འབར་བས་འཕང་ཚེ་ནམ་མཁའ་ལྡིང་དབང་མཐོང་བའི་སྦྲུལ་ལྟར་ཞུམ་པར་འགྱུར། །རིང་པོར་གཟིགས་པའི་རླུང་གི་ཕོ་ཉས་རྒྱལ་དང་རྒྱལ་སྲས་ལྷོ་ཡི་ཙན་དན་ནགས་བསྐུལ་ཏེ། །དེ་དག་གཟིགས་པ་བསིལ་བའི་སྤོས་ངད་སྐྱེས་སུ་ཐོགས་ནས་སྲིད་པའི་མྱ་ངམ་འཇུག་བརྩོན་ཕྱིར། །མི་བཟད་སྡུག་བསྔལ་ཚ་བས་ཉེན་ཚེ་ཤེས་རབ་ལྡན་རྣམས་ཁྱོད་ལ་རེབས་མིག་གཏོད་དེ། །སྤྱན་རས་གཟིགས་ཞེས་གྲགས་པའི་ཡི་གེའང་ཁ་བའི་ཙནྡན་ལྟ་བུར་བསམ་ནས་འཛིན་པར་བྱེད། །གང་ཞིག་བྱུང་ན་རྡུལ་སྙེད་ཞིང་གི་ནམ་མཁའི་རྨོངས་པ་ངེས་པར་འཕྲོགས་ནུས་ཤེས་རབ་མཆོག །ཕྱོགས་བཅུར་བཞུགས་པའི་རྒྱལ་སྲས་འཁོར་རྣམས་མངོན་དགའ་གསར་པའི་འཛུམ་མདངས་རྒྱས་བྱེད་སྤྲིང་ཡིག་སྟེ། །སྐྱེ་དགུའི་སྐལ་ངན་མཚན་མོ་ཟད་པའི་དུས་དག་འོང་བ་ཉེ་བར་སྟོན་བྱེད་སྐྱ་རེངས་གཟུགས། །ཅི་ཙམ་བལྟ་བའི་རྐྱལ་གྱིས་བགྲོད་ཀྱང་ངོ་མཚར་བརྒལ་དཀའ་ཁྱོད་སྤྱན་འོད་ཟེར་ཆུ་བོའི་མཛོད། །བརྩེ་ཆེན་ཟུར་མིག་གློག་གི་ཐག་པས་ཕྱོགས་རྣམས་བཅིངས་ཏེང་ནི་འཇིག་རྟེན་སྒྲོལ་བའོ་ཞེས། །འཇིགས་མེད་ང་རོའི་འབྲུག་དབྱངས་སྙན་པ་དལ་གྱིས་དགོད་བྱེད་མི་འཇིགས་སྦྱིན་པའི་གྲུ་ཆར་འབེབས། །མ་ལུས་ཆོས་དབྱིངས་
ནམ་མཁའི་རྒྱན་གྱུར་འགྲོ་བའི་ཡུམ་གཅིག་བདུད་རྩིའི་ཆར་སྤྲིན་བཟང་མོ་ནི། །འཕགས་མ་སྒྲོལ་མའང་ཁྱོད་སྤྱན་རྒྱ་མཚོ་ཐུགས་རྗེས་བསྐུལ་བའི་ཆུ་རླབས་ཚོགས་ཀྱི་རྣམ་འཕྲུལ་ལགས། །དེ་ལྟར་བསྟོད་ལས་སྐྱེ་བའི་ཕྲེང་བར་འཕགས་མཆོག་སྤྱན་རས་པདྨའི་དཔལ་གྱིས་འཚོ་བར་ཤོག །མགོན་པོའི་སྤྱན་སྔར་བསྟོད་ཚིག་ཡིད་འོང་སྙན་ངག་ཕྲེང་བ་བུང་བའི་རྒྱུད་མངས་ལེན་པར་ཤོག །དངོས་གྲུབ་དགའ་བ་ཤིན་ཏུ་མདངས་ལེགས་གེ་སར་རྡུལ་གྱིས་ཡིད་ལ་ཐིག་ལེ་འབྲི་བར་ཤོག །པདྨོའི་དེ་ཉིད་རྣལ་འབྱོར་སྦྲང་རྩིས་ཕྱི་མཐའི་བར་དུ་ལུས་ཅན་བུང་བ་ཚིམ་བྱེད་ཤོག །ངག་གི་གཞིར་གྱུར་ཏི་སེའི་འགྲམ་སྟེགས་ཉེ་བར་བསྟན་ཕྱིར་འཛིན་བྱེད་མཚོ་ཡི་འཆིང་ལྡན་སྐྱོང་ལ་ངལ་སྤོང་ཕྱིར། །གཡོ་དང་གཡོ་མིན་གླང་པོ་གཟུང་ཕྱིར་འཁྱོགས་འབར་མིག་གིས་ལུས་སྦྱངས་གཡུལ་དུ་སྤྲིན་དབྱངས་མཐོན་པོ་དགོད་པའི་ཕྱིར། །ནམ་མཁའི་གོས་སྔོན་དགྲ་བོའི་ཐེག་པ་འཕྱ་བའི་དཔལ་འཛིན་གད་རྒྱངས་དྲག་པོའི་ཆུ་མཐོང་སྙེ་མ་གཟེང་རིང་གིས། །དཔལ་སྡུག་རྒྱལ་བ་རྣམ་པར་སྟོན་ཅིང་གནས་ཀྱིས་འཕྲོག་བྱེད་གྲགས་པའི་རབས་ལ་རྒྱས་འདེབས་བྱེད་པ་ཡང་དག་སྩོལ། །འཕགས་པ་འཇིག་རྟེན་དབང་ཕྱུག་གི་ཨུཏྤལ་གཞོན་ནུ་ལྟ་བུའི་སྤྱན་རས་ལ་བསྟོད་པ་བུང་བ་རོལ་པའི་གླུ་དབྱངས་ཞེས་བྱ་བ་འཇིགས་མེད་བསྟན་
པའི་ཉི་མས་བྱ་མང་གི་ནགས་ཚལ་དགའ་བ་ཅན་དུ་སྦྱར་བ་རྫོགས་སོ།། ༈ །།བླ་མ་ལ་ཕྱག་འཚལ་ལོ། །གང་དུ་ལྷར་བཅས་འཇིག་རྟེན་འདི། །འོག་ནས་འོག་ཏུ་བྱིང་བ་དང༌། །ཆུ་སྲིན་འཛིན་ཁྲིས་རབ་གཙེ་ཞིང༌། །ཀློང་འཁོར་འཁྲུགས་པའི་སྒྲ་ཁྱབ་པ། །མཐོ་དམན་མང་ལ་འཆོལ་བར་གཡོ། །ཤིན་ཏུ་འཇིགས་རུང་གཏིང་མཐའ་མེད། །དེ་ལྟ་བུ་ཡི་ཆུ་ཚོགས་ཀྱིས། །ཕྱོགས་རྣམས་མཐའ་དག་ནག་པོར་གནས། །དེ་ཡི་དབུས་ན་རབ་མཛེས་པ། །ཐུན་གསུམ་སྨག་གིས་བསླད་པ་ཡི། །མཁའ་ལ་ཟླ་མཛེས་ཅི་བཞིན་ཏེ། །པདྨ་དཀར་པོའི་ཚལ་ཆེན་ཡོད། པདྨའི་རིགས། །དེ་ནི་ཆུ་ཡིས་རྒྱས་པ་སྟེ། །ཆུ་ཡི་ཉེས་པས་ཡོང་མི་གོས། །ཆུ་རྣམས་དཔལ་ནི་གཅིག་པུ་ཞེས། །གྲགས་པའི་རྫི་ངད་ཕྱོགས་སུ་འགྲོ། །སྐྱེ་དགུ་ཆུ་བོས་ཁྱེར་བ་བརྒྱ། །བདེ་བའི་ཐང་ལ་སྒྲོལ་མཁས་པའི། །མཉན་པ་འགྲོ་བ་དབུགས་འབྱིན་རྣམས། །པདྨའི་ནགས་མཆོག་དེ་ལས་སྐྱེས། །ལྷག་པར་འཇིག་རྟེན་སྒྲོལ་བ་ལ། །བརྩོན་འགྲུས་གཟུགས་ཅན་ཉིད་གྱུར་པ། །རྟ་མཆོག་ཉི་མའི་ཤུགས་འཆང་ནི། །དེ་ན་ཐིག་ལེ་ལྟ་བུར་གྱུར། །དུལ་བའི་ལུས་ཅན་མཐུ་རྩལ་དྲག །བི་ནི་ཏ། །འཇམ་ལ་གཟི་བྱིན་རབ་ཏུ་རྣོ། བྱིས་པས་ཀྱང་རེག་བཟོད་པས། །བརྟན་ཡང་ཡིད་ལྟར་མྱུར་བ་སྟེ། །དྲེགས་པ་སྨད་ལ་སྙིང་སྟོབས་མཐོ། །སྣ་ཚོགས་འཁོར་གྱི་ནང་དག་ན། །སྣ་ཚོགས་འདྲེས་པའི་
སྤྱོད་པ་ནི། །རང་གི་ཁ་དོག་འདྲ་བ་ཡིས། །རྣམ་པ་སྣ་ཚོགས་དོན་ཆེན་སྒྲུབ། །གཞན་དག་ངལ་བ་རྗེས་བཟུང་ཕྱིར། །མགྲོན་པོ་མང་པོའི་རྒྱུ་ཕྱོགས་གནས། །བདག་ཉིད་མཐུ་ཡིས་འཕགས་མཐོང་བས། །ཞུམ་མེད་ང་རོས་ཀུན་ཤེས་བྱེད། །དེ་ཡི་གཟི་བརྗིད་ཀྱིས་སྐྲག་པས། །ཆུ་གཏེར་ཁོལ་བའི་སྒྲ་ཆེན་འབྱིན། །རྒོད་མ་ཁ་ཡི་མེ་ལྕེ་ཡང༌། །རི་མོའི་མེ་ཡི་གོ་འཕང་ཐོབ། །དེ་ནི་རིག་དང་རྐང་པར་ལྡན། །སྣ་ཚོགས་འགྲོས་ཀྱི་ཕ་རོལ་ཕྱིན། །བདེ་དང་ལང་ཚོ་དར་ལ་བབས། །བཟོད་པའི་སྟོབས་ནི་རྡོ་རྗེ་འདྲ། །སྒྲོལ་བའི་དུས་དང་དུས་མིན་ཤེས། །རྒྱ་མཚོའི་རླབས་བཞིན་དུས་མི་འདའ། །རྣམ་པ་དེ་ལྟའི་ཚུལ་གྱིས་ནི། །སེམས་ཅན་སྒྲོལ་ལ་དུས་ཀུན་གནས། །གར་སྟབས་གཅིག་གིས་ཡུལ་ཀུན་གནོན། །འོད་ཟེར་གཅིག་གིས་ཕྱོགས་རྣམས་སྐུལ། །གཅིག་པུས་ས་དང་ནམ་མཁའ་དང༌། །ས་འོག་འཇིག་རྟེན་ཡང་དག་ཁྱབ། །རྫོགས་ལྡན་སྤྲིན་ལྟར་མཐོ་བའི་ལུས། །སྟེང་ཕྱོགས་ནམ་མཁའ་རྒྱས་པར་འགེབས། །ས་སྟེང་ཀུན་ན་གདུགས་གཅིག་པའི། །འཁོར་ལོས་སྒྱུར་བའི་དཔལ་བཞིན་མཛེས། །དབྱངས་དེ་སྙན་ལ་རྒྱུན་ཆགས་སྒྲོག །གསལ་ཞིང་ཟབ་ལ་མ་བརྟབས་པ། །བསྒྱུར་ན་བདེ་ཞིང་རིང་དུ་འགྲོ། །སྒྲ་མང་ནང་ན་དཔེ་ཡིས་དབུལ། །སྐྱེ་དགུ་མུན་རུམ་འཁྱམས་པ་རྣམས། །གང་ཐོས་དྲན་པ་རྙེད་བྱེད་
པའི། །གླུ་ཡི་མཚན་མ་ལེགས་བཟུང་ནས། །པདྨོ་སྣང་བའི་དགའ་ཚལ་འཇུག །གཅིག་པུར་རྒྱུ་ཞིང་འཚེ་བ་མང༌། །ཤུལ་ཐག་རིང་བའི་ལུས་ཅན་ལ། །འཇིགས་མེད་གནས་སུ་ངས་འཁྱེར་ཞེས། །སྙིང་རྗེ་མངོན་སུམ་བཞིན་དུ་སྒྲོག །སྲིན་མོ་གླུ་ཡི་མཆིལ་པ་ཅན། །རྒྱ་མཚོའི་དོན་མཐུན་ཟ་བའི་ཚོགས། །ས་གསུམ་མངལ་རྒྱ་འཇིག་བྱེད་པའི། །འཚེར་སྐད་ཀྱིས་ནི་བརྒྱལ་ཞིང་གནོན། །ཉམས་བརྒྱའི་གར་ནི་རྣམ་རྩེན་པས། །རི་གླིང་རྒྱ་མཚོ་བཅས་པ་སྐྱོད། །བདུད་རྣམས་རྒྱལ་སྲིད་གནས་ལས་ལྷུང༌། །དམྱལ་བ་སྤྲུགས་ཤིང་སྟེང་དུ་འཕེན། །སྐྱེད་ཚལ་པདྨ་རབ་དགའ་ཞིང༌། །བུང་བའི་དུས་སྟོན་འཕེལ་བ་རྩོམ། །ཇི་སྙེད་ས་སྟེང་པདྨོ་ཡི། །ས་བོན་ཚོགས་ནི་དབུགས་འབྱིན་བྱེད། །སྙིང་རྗེས་ཡིད་ནི་ཆེས་གདུང་ཡང༌། །མཆོག་ཏུ་དགའ་བའི་གཟུགས་ཀྱིས་རྒྱུ། །འཇིག་རྟེན་གླུ་གར་གྱིས་སྡུད་ཀྱང༌། །ཤིན་ཏུ་མཉམ་པར་བཞག་པ་ཡིན། །ལྷ་དང་ལྷ་མིན་དབང་པོའི་གཡུལ། །དཔུང་ཚོགས་སྲོད་མུན་བཞིན་གཏིབས་པ། །ཆུ་གཏེར་ས་དང་ནམ་མཁའ་ལ། །ཐོགས་མེད་དྲག་ཤུལ་སྤྱོད་པ་རྣམས། །སྡུག་ཕོངས་རྒྱབ་ཏུ་བཟུང་བ་ཡི། །རྟ་མཆོག་རྒྱལ་པོ་ཉེར་འོང་ཚེ། །སེང་གེའི་སྒྲ་བོས་གླང་པོ་བཞིན། །ཅི་ལའང་ལྟོས་མེད་རིང་དུ་འབྱེར། །དེ་ཡི་རྨིག་པ་སྐལ་བཟང་ལྡན། །ལམ་གྱི་ཉེས་ཀུན་སེལ་བ་སྟེ། །
གང་གང་དག་ནས་དེ་འགྲོ་བ། །དེ་དེ་ཕུན་ཚོགས་རྙེད་པའི་སྒོ། །དམན་རྣམས་དབུལ་བ་འདོར་བྱེད་ཅིང༌། །ཆེ་རྣམས་རྒྱལ་བ་འཐོབ་པའི་གཞི། །དགྲ་སྡེ་དྲེགས་པའི་མྱོས་ཆུ་སྐྱུགས། །ཀུན་གྱི་ཕུན་ཚོགས་ཁོ་ནའི་རྒྱུ། །སྤྱོད་ཡུལ་མཐུན་པའི་ལྷ་ཆེན་རྣམས། །དཀའ་སྤྱད་བརྒྱ་ཡིས་མཐོང་བར་དཀའ། །འདི་ནི་སྤྱོད་ཡུལ་ཆེས་བསྐལ་ཡང༌། །དྲན་པ་ཉིད་ཀྱིས་རྗེས་འཛིན་བྱེད། །གཡོག་པས་ཆོད་དང་གཤེད་མས་བཀག །བགྲོད་དཀའི་ལམ་ལ་ཞུགས་རྣམས་ཀྱང༌། །འདི་ནི་སྐད་ཅིག་རྗེས་དྲན་ན། །སྒྲོལ་བའི་དོན་སླད་མདུན་ན་གནས། །དམྱལ་བའི་ས་གཞིར་རྨིག་རྗེས་ཀྱི། །མེ་ཏོག་ཕྲེང་བ་ཡིད་འོང་བྱིན། །དེ་ན་ལས་ཀྱིས་ཉེར་བརྩེགས་པའི། །རྒུད་པའི་གོས་ནི་སྟུག་པོ་ཕྲོག །བཙོན་ཆུད་རེ་རེའི་དོན་ཕྱིར་ཡང༌། ཁྲི་མུན་རྣམས་སུ་ལམ་ཆེན་བཏོད། །གོམས་སྟབས་གཅིག་ཀྱང་གྲངས་མེད་པའི། །བཙོན་རྣམས་ཐར་པའི་འབྲས་བུར་བཅས། །གྲགས་པ་དྲི་མེད་རབ་ཡངས་པས། །ཕྱོགས་ཀྱི་ཚད་ནི་ཉིན་བཞིན་མཇལ། །དེ་ཡིས་གཞལ་བའི་ཁོང་ཆུད་པ། །མ་ལུས་སྙིང་རྗེའི་རྒྱ་ཡིས་ཐེབས། །མཆོག་གི་གནས་ལ་དབང་སྒྱུར་ཞིང༌། །དམན་པའི་ཡུལ་ལ་སྐྱོ་བ་སྤངས། །ཅི་ལའང་རང་ཉིད་མི་གནས་ཏེ། །སེམས་ཅན་དབང་བཞིན་འཇུག་པ་ཉིད། །སྐད་ཅིག་སྐད་ཅིག་ཟབ་མོ་དང༌། །གསལ་བའི་ཡུལ་ན་
མངོན་སུམ་སླེབས། །གར་ཡང་སྒྲིམ་མེད་རིང་འགྲོ་བ། །དབང་འབྱོར་རྫུ་འཕྲུལ་རྐང་པའི་མཐུ། །སྙིང་རྗེའི་རྒྱ་མཚོ་བསྲུབས་པ་ལས། །རིན་ཆེན་སྙིང་པོ་འདིའང་བྱུང༌། །གང་མཐུས་ལྟས་ཀྱང་མ་ཐོབ་པའི། །སེམས་ཀྱི་རྒྱལ་སྲིད་བླ་མེད་སྟེར། །ས་སྟེང་སྙིང་རྗེ་ལྡན་མང་ཡང༌། །གང་ཞིག་མཐོང་བ་ཙམ་ཉིད་ཀྱིས། །འཇིགས་སྒྲོལ་ཤུགས་ནི་མྱུར་རྟོགས་ཕྱིར། །སྔགས་ཀྱི་ཡེ་ཤེས་དེ་ལྟར་སྤྲུལ། །འཇིག་རྟེན་མཐོན་པོའི་གནས་ལ་དགའ། །དེ་ལྟའནག་ཐུར་ནས་ཐུར་དུ་གཞོལ། །རང་ཉིད་བཟློག་སྟེ་འགྲོ་བར་དཀའ། །ཚུལ་འདིས་ཕོངས་པ་མི་བཟད་ལྡན། །དེ་སླད་ས་མཐོར་བཀྲི་བ་ཡི། །མྱུར་བདེའི་ཐེག་པ་རིན་ཆེན་འདི། །གཞན་ཕན་ལ་དགའ་ཆེ་རྣམས་ཀྱིས། །བསྔགས་འོས་མཚུངས་མེད་ཅི་སྟེ་མིན། །རྟ་ཞོན་ཕྱུག་པོ་མང་མཆིས་ཀྱང༌། །དེ་འདྲ་ཡོད་པ་འགའ་མ་མཐོང༌། །འདི་ལྟར་གཏམ་དུ་སྨྲ་ནུས་པའང༌། །རྒྱུས་ཤེས་རྣམས་ཀྱིས་བསྙད་ལས་བྱུང༌། །སེམས་ཅན་སྒྲོལ་བའི་དོན་སླད་དུ། །རྟ་མཆོག་རྒྱལ་པོ་ལེགས་བསྔགས་པའི། །བསོད་ནམས་དེ་ཡིས་སྐྱེ་བ་ཀུན། །བླ་མེད་ཐེག་པས་འགྲོ་བར་ཤོག །འཕགས་པ་རྟ་མགྲིན་ལ་ཐུན་མོང་གི་རྣམ་ཐར་དང་མཐུན་པར་ཆ་ཙམ་བསྟོད་པ་ཀུན་དགའི་རྒྱུད་མངས་ཞེས་བྱ་བ་འཇིགས་མེད་བསྟན་པའི་ཉི་མས་ཆུ་གླང་དབོ་ཟླའི་
དགའ་བ་གསུམ་པ་ལ་གུས་པས་འབད་དེ་བྲིས་བ་གྲུ་འཛིན་ཆོས་ཀྱི་མདུན་སར་ཡན་ལག་བརྒྱ་པའི་སིལ་སྙན་གྱི་སྤྲིན་དུ་འབྱུང་བར་གྱུར་ཅིག་གུ། ༈ །ཕུན་ཚོགས་ཆོས་དབྱིངས་སྒེག་མོའི་བཞིན་ལ་སོ་སོར་རྟོག་པའི་ཡེ་ཤེས་སྤྱན། །རོལ་པས་དགའ་ལྡན་འཇིག་རྟེན་གསུམ་ན་སྙིང་རྗེའི་གདུགས་དཀར་གཅིག་འཛིན་པ། །སྤྱན་རས་གཟིགས་ཞེས་གྲགས་པའི་བ་དན་ཕྱོགས་ཀྱི་ཕོ་ཉས་སྒྲེང་བ་གང༌། །འུར་འུར་གནས་སུ་གཟུགས་བརྙན་ཟོལ་གྱིས་གཞན་ཕན་བདུད་རྩི་སྤྲོ་ལ་འདུད། ཁྱོད་ཞལ་མཐོང་བ་གཅིག་པུ་ཡིས། །ལུས་ཅན་དགེ་བ་རབ་རྒྱས་བྱེད། །པདྨ་དགའ་བའི་མིག་འབྱེད་པ། །ཉིན་བྱེད་མཐོང་བ་གཅིག་པོས་ནུས། །བསྐལ་པ་སྙིགས་མའི་ཆུ་གཏེར་ཟབ་ཡངས་སྡུག་བསྔལ་ཀློང་འཁོར་འཁྲུགས་པའི་དབུས། །འགལ་མེའི་འཁོར་ལོའི་སྤུན་ཟླར་རབ་གཡོ་ལུས་ཅན་ཉམ་ཐག་བརྒྱ་སྟོང་སྙིང༌། །སྙན་གྲགས་ཐག་པས་རིང་ནས་ཉེར་དྲངས་ཟླ་ཞལ་མཐོང་བས་མངོན་བསྐྱེད་པའི། །དང་སེམས་དགེ་བའི་ཟམ་པ་ལ་འཛེགས་བདེ་བར་དབུགས་འབྱིན་མཛད་ལ་འདུད། །མཚན་མོའི་མྱོས་ཆུ་བཏུང་བའི་ནམ་མཁའ་ནི། །བདུད་རྩིའི་ཐིག་ལེ་གཅིག་པུས་མགོན་དང་བཅས། །སྙོགས་བརྒྱའི་ཁུར་གྱིས་ངལ་བའི་ཡུལ་ལྗོངས་འདི། །སྐལ་བཟང་
བགྱིད་པའི་མགོན་ནི་ཁྱོད་གཅིག་ལགས། །དེ་སླད་ས་ཕྱོགས་རྡོ་རྗེར་རབ་སྒྲུབ་པདྨའི་ཞབས་ཟུང་བརྟན་པར་བཞུགས། །ཕྱོགས་རྣམས་མཐའ་དག་འཛུམ་ཞལ་འོད་ཀྱིས་དཀར་པོར་མཛོད་ཅིག་རྒྱལ་བའི་ཚོགས། །རྡོ་རྗེ་ཐལ་མོའི་ཕྱག་རྒྱས་ཉེར་བསྐུལ་ཕན་བདེའི་རྒྱུན་བཟང་མི་ཟད་སྩོལ། །བདག་ཀྱང་ཟླ་བས་ཀུ་མུ་ཏ་བཞིན་བྱིན་རླབས་སྣང་བས་རྗེས་འཛིན་མཛོད། །ཕྱོགས་འདི་སྡུག་བསྔལ་ཆུ་ཡིས་ཁེབས། །གདུལ་བྱའི་མེ་ཏོག་རབ་ཏུ་མང༌། །བརྩེ་ཆེན་ངང་པའི་རྒྱལ་པོ་ཁྱོད། །འདི་ལ་གཟིགས་ཤིང་བརྟན་པར་བཞུགས། ཁྱོད་ཀྱི་སྨོན་ལམ་རྔ་སྒྲ་གསལ་པོས་སྦྱིན་སྐྱེས་རྒྱལ་མཚན་བསྙིལ་བར་ཤོག །འཇིག་རྟེན་རྨོངས་པ་གཉིད་སད་གྱུར་ཅིག་དགེ་བའི་དུས་སྟོན་ཆེར་རྒྱས་ཤོག །སྐྱེ་དགུ་ཡིག་དྲུག་རྒྱུད་མངས་ལེན་གྱུར་ཀུན་དགའི་གླུ་གར་མང་བར་ཤོག །གྲུ་འཛིན་འཇིག་རྟེན་ལམ་པོ་ཆེར་གྱུར་རྒྱལ་སྲས་དཀྱིལ་འཁོར་འཕེལ་བར་ཤོག །དར་དཀར་སྤྲིན་མཛེས་བྱུ་རུའི་གློག་དམར་གཡོ། །ཞུ་ཕྲིན་དབྱར་རྔའི་སྒྲ་ཡིས་བརྒྱན་པ་འདིས། །རྗེ་བཙུན་ཏི་སེའི་རི་དབང་ཁྱོད་མཆོད་པས། །ཕན་བདེའི་ཆུ་བོ་རྟག་ཏུ་རྒྱས་གྱུར་ཅིག །རྡོ་སྟོད་ཀྱི་སའི་ཆ་དཔལ་བརྩེགས་བདེ་འབྱུང་གི་རི་བོའི་ངོས་ནས། འཕགས་མཆོག་གང་གི་བཀའ་དྲིན་ཁོ་ན་ལ་
རེ་ལྟོས་འཆའ་བའི་འབངས་ཀྱི་ཐ་ཤལ་ཙམ་དུ་གཏོགས་པ་འཇིགས་མེད་བསྟན་པའི་ཉི་མས་ཕུལ་བ་དགེ༌༈ །ཕུན་ཚོགས་སྐྱེ་དགུའི་ལེགས་བྱས་རི་བོའི་ཟུར་ཕུད་རྩེན་མཛེས་པའི་ཏོག །སྟོན་ཀའི་ཟླ་གཞོན་གང་བའི་གཟུགས་ཅན་པདྨོ་རྒྱས་པའི་ཞལ་མངའ་བ། །ཕན་བདེའི་བདུད་རྩི་ཟད་མེད་འཇོ་བའི་གྲགས་པ་དཀར་པོའི་བསིལ་འོད་ཅན། །འཇིག་རྟེན་དབང་ཕྱུག་ས་གསུམ་འགྲོ་བའི་ཡིད་བཞིན་ནོར་གཅིག་ཁྱོད་ལ་འདུད། །སྙིང་གི་གདུངས་པ་རྣམ་པར་འཕྲོག་ནུས་དཔག་དཀའི་མཛེས་སྡུག་ཆུ་ཡི་ཚོགས་ཀྱིས་དཀྲིགས་གྱུར་པ། །ངོ་མཚར་རླབས་ཕྲེང་འཁྲུགས་པའི་ཆིལ་སྒྲས་ཕྱོགས་རྣམས་འགེང་བཞིན་དུལ་བའི་དཔལ་ལས་མི་གཡོ་བའི། ཁྱོད་སྐུ་ཡིད་བཞིན་རྒྱ་མཚོ་ཆེ་ལ་གང་ཞིག་དང་སེམས་རུང་བའི་རྐང་པ་འགོད་བྱེད་པ། །དེ་དག་ས་གསུམ་འཇིག་རྟེན་ནང་ན་ཕུལ་བྱུང་དགའ་བའི་ཁྱད་པར་དག་གིས་རྩེན་པར་འགྱུར། །གང་ཞིག་འཛིན་མའི་གཞི་ལ་དམ་པའི་སྤྱོད་ཚུལ་འཆར་ཀའི་འོད་ཀྱི་མདངས་ལྟར་བཟང་བ་བྱུང་དགུ་དང༌། །རླབས་ཆེན་ཕན་བདེའི་སྣང་བ་ལི་ཁྲིའི་མདོག་བཞིན་གསལ་བས་སྲིད་འདིའི་ཁ་དོག་སྒྱུར་བ་གང་བྱུང་བ། །དེ་ཀུན་ཁྱོད་མཚན་ཡི་གེ་སེང་གེའི་སྤར་མོས་བདུད་ཀྱི་གླང་ཆེན་མགོ་བོ་བརྫིས་པ་ལས་བྱུང་ཁྲག །ཕྱོགས་ཀྱི་ནགས་ཚལ་
ཕྲེང་བའི་རལ་པ་ལ་ཆགས་སྐྱེ་བོའི་མིག་སྔར་དགའ་སྟོན་དཔལ་དུ་གྱུར་པ་ལགས། ཁྱོད་ཀྱི་འོད་ཟེར་རབ་དཀར་དྲི་མེད་གཏིང་མཐའ་བྲལ་བའི་ནང་དག་ན། །དགའ་བཅས་ལྷ་རྣམས་འོ་མའི་རྒྱ་མཚོར་རྒྱལ་གྱིས་རྩེན་པའི་བྱིས་པ་བཞིན། །ཀླུ་རྣམས་ཟླ་ཟེར་རྩེ་གཅིག་འཐུང་བའི་ཀུ་མུ་ཏ་ཞིན་ཚིམ་གྱུར་ཅིང༌། །ཡི་དྭགས་ཚོགས་ཀྱང་པད་དཀར་ཚལ་དུ་བུང་བའི་བཀྲེས་སྐོམ་ཞི་འདྲར་ཤེས། །གང་གི་ནུས་མཐུས་བདུད་ཀྱི་མེ་ཏོག་མདའ་ལྔའནག་རི་མོའི་མཚོན་ཆ་ལྟ་བུར་ཉམས་བྱེད་ཅིང༌། །ཐབས་མཁས་འཕྲུལ་གྱིས་ཡི་དྭགས་ཕོངས་པ་བརྒྱ་སྙེད་སུམ་རྩེན་རྒྱལ་ཐབས་མཐོ་ལ་འགོད་པར་མཛད། །ཐུགས་རྗེའི་དབང་གིས་མནར་མེད་དམྱལ་བའི་ནང་དུའང་བསིལ་བདེ་སྦྱིན་སླད་དགྱེས་བཞིན་འཇུག་བརྩོན་པ། ཁྱོད་ཀྱིས་འཇིག་རྟེན་གསུམ་འདིར་རྒྱལ་སྲིད་མཛོད་ཅིག་ཁྱོད་འདྲ་མགོན་དུ་ཐོབ་རྣམས་སྐལ་བ་བཟང༌། །རྨོངས་པའི་མུན་ནག་ཤིན་ཏུ་ཆེར་གཏིབས་འཇིགས་རུང་འཁོར་བ་མཚན་མོའི་འབྲོག །འགྲོ་བ་ངན་པའི་གཡང་ས་ཟབ་རིང་སྡིག་པའི་ཆོམ་རྐུན་བརྒྱས་གང་བར། །གོམ་ཚུགས་འཁྱོར་བས་ཤིན་ཏུ་ངལ་གྱུར་ལྡབ་ལྡིབ་སྨྲེ་བའི་ལུས་ཅན་འདི། །ཐུགས་རྗེའི་ཉིན་བྱེད་ཤེས་རབ་འོད་མཛད་ཁྱོད་ཅིག་ཤར་ནས་དབུགས་རབ་བྱུང༌། །མཐོན་
མཐིང་ནོར་བུའི་ཐོར་ཅོག་རྩེ་མོར་འོད་དཔག་མེད་ཀྱི་སྣང་བ་རབ་མཛེས་གུར་གུམ་ཕྱེ་མ་ཆགས་པ་བཞིན། །ཡིད་འཕྲོགས་གཟུགས་ཅན་འོད་ཟེར་ཕོ་ཉ་རིང་པོར་རྒྱུ་བའི་ཚོགས་ལ་ཕྱོགས་རྣམས་འཛུམ་མདངས་གསལ་བར་སྟོན་པ་བཞིན། །པདྨོ་མཆོག་ལྟར་དག་པའི་ཞབས་ཟུང་ལྷ་བརྒྱའི་གནག་སྣུམ་རལ་པའི་སྤོ་ལ་འཁོར་ལོའི་རི་མོ་དགོད་པ་བཞིན། །སུ་ཞིག་ཁྱོད་ཀྱི་མཚར་སྡུག་ཚོན་ལ་ཡིད་ཀྱི་རས་བཟང་ལན་རེ་བཅུག་པའང་བྱང་ཆུབ་དམ་པའི་མདོག་ཏུ་འགྱུར། །མཐོ་རིས་གཙོ་བོའི་ཅོད་པན་ཉེར་བཏུད་རྐང་ལ་ལན་བརྒྱར་ཕྱག་བགྱིས་པ་ཡི་གོ་འཕང་རྙེད་པར་དཀའ་མིན་གྱི། །རྡུལ་བྲལ་ཁྱོད་ཀྱི་གཙང་མའི་ཞབས་ཟུང་མགོ་བོའི་ཟེའུ་འབྲུར་ལན་གཅིག་རེག་པའང་འཇིག་རྟེན་གསུམ་ན་དཀོན་པའི་ཕུལ། །ལྷ་བརྒྱའི་ཟུར་ཕུད་གདིང་བར་བསྟབས་པའི་འདོད་ཁམས་དབང་ཕྱུག་ལན་མང་མ་བྱས་སུ་ཞིག་ཡོད་དེ་ཕྱིར་ཡང་ལྷུང༌། ཁྱོད་ཀྱི་ཞབས་སེན་པདྨའི་དཔལ་གྱིས་རལ་པ་བགོས་རྣམས་རྣམ་གྲོལ་བདེ་བའི་ཁྲི་འཕང་མཐོ་ལ་རང་ཉིད་འཛེགས། །གཤིན་རྗེ་ཁྲོས་པའི་བཞིན་རས་རབ་འཁྲུགས་ཆུ་དྭངས་ནོར་བུས་རེག་པའི་ཆབ་ལྟར་དྭངས་བྱེད་ཅིང༌། །དྲག་པོའི་གཡུལ་ཆེན་བསྲེས་པའི་མདའ་ཆར་མནྡྷ་ར་ཡི་མེ་ཏོག་བླ་བྲེར་རབ་སྒྲུབ་བྱེད། །སྦྲུལ་ཆེན་ཁྲོ་བོའི་ཁ་རླང་མི་བཟང་སིམ་བྱེད་བདུད་རྩིའི་ཐིགས་
པ་འཛགས་པའི་སྤྲིན་བྱེད་དེ། །དེ་ལྟར་མ་ལུས་གདུག་པའི་དུག་རྣོན་ཁྱོད་ཀྱི་འཛུམ་ཞལ་ཞི་བའི་ཟླ་བ་གཅིག་པུས་འཕྲོག །འཁྲུད་དོ་དབྱར་སྐྱེས་ཆར་གྱིས་ས་གཞིའི་རྙོགས་པ་དང༌། །སྟོན་ཀའི་དུས་ཀྱི་བརྩོན་པས་ཆུ་མཐོང་དྲི་མ་སྟེ། ཁྱོད་ཀྱི་འོད་ཟེར་ཟླ་བ་བཞུ་འདྲའི་རྒྱུན་རྣམས་ཀྱིས། །འགྲོ་བའི་ལུས་སེམས་སྡུག་བསྔལ་དྲག་པོའི་ཡམས་ནད་དོ། །བསོད་ནམས་མང་པོའི་དཔུང་པ་དང་ལྡན་མི་རྣམས་གང་དག་བགེགས་དང་རྒྱལ་པོའི་ཆད་པ་སོགས། །འཇིགས་དང་ཕོངས་པའི་གནས་སྐབས་བརྒྱ་ལས་ཐར་བར་མཛད་པས་མཐུ་ཆེན་ཁྱོད་ལ་བསྔགས་མི་འགྱུར། །སྟོབས་ལྡན་སྡིག་ལས་ཁོ་ནས་རབ་བསྒྲུབས་བར་མཚམས་མེད་པར་དམྱལ་མེས་འཚོད་པའི་ལུས་ཅན་ཡང༌། །མཚོ་ཆུ་ཁ་བའི་རེག་པ་ཅན་ལ་ཆུ་ཡི་མེ་ཏོག་འཐོག་པའི་རྩེ་དགའ་སྦྱིན་མིན་ནམ། །འཇིག་རྟེན་ཕལ་ཆེར་རང་གི་ཕྱིར་ཡང་ཚེ་འདིའི་བདེ་བ་ཉི་ཚེས་ཆོག་པར་འཛིན། ཁྱོད་ནི་གཞན་ཕྱིར་བླ་མེད་བདེ་བ་མ་སྩལ་དེ་སྲིད་བརྩོན་འགྲུས་འདོར་མི་མཛད། །སྐྱེ་དགུ་འདི་དག་འཇིག་རྟེན་གཞན་གྱི་བདེ་བ་བཙོང་ནས་འཚོ་ཐབས་སྒྲུབ་པར་སེམས། ཁྱོད་ཀྱིས་དེ་དག་བདེ་བས་བདེ་བ་འཐོབ་པའི་ཐབས་ཚུལ་དུ་མས་སྨན་ཡོན་བཏགས། ཁྱོད་ནི་འོག་མིན་ལྷ་བརྒྱའི་བླ་མ་ལགས་ཏེ་དམྱལ་བའི་གནས་ནའང་བྱིས་པའི་རོལ་
པས་རྟག་ཏུ་འཇུག །རྣམ་འདྲེན་ཚེ་དཔག་མེད་ཀྱི་རྒྱལ་ཚབ་མཛད་ཀྱང་མི་མཇེད་ཞིང་དུ་སྣ་ཚོགས་གཟུགས་ཀྱིས་ཆོ་འཕྲུལ་སྟོན། །སྤྲོས་པ་མཐའ་དག་ཞི་བའི་དབྱིངས་ལ་བཞུགས་ཤིང་སྤྲོས་པའི་མིག་འཕྲུལ་མཐའ་དབུས་བྲལ་བས་འགྲོ་བ་འདུལ། །དེ་ལྟར་ཁྱོད་ཀྱི་སྤྱོད་ཡུལ་བསམ་མི་ཁྱབ་ཀྱང་བསམ་བྱ་ལགས་ཏེ་སྐད་ཅིག་དྲན་ནའང་དོན་ཆེར་མཆིས། །བྱིས་པས་མེ་ཏོག་ཇི་ལྟར་རྙེད་བཞིན་འཐུ་ཡི་གོ་རིམ་དག་ལ་རྟོག་མི་བྱེད། །དེ་ནི་མཆོད་རྟེན་སྤྱན་སྔར་འཐོར་ནའང་འཆོལ་བ་ཉིད་དུ་རང་དགར་འབབ་པར་ཟད། །ཉིན་པར་གཉིད་ཀྱི་དགྲ་བོས་གཙེ་བཞིན་རིམ་པ་འཆོལ་བའི་ཀུན་རྟོག་ཕྲེང་བ་སྤེལ། །དེ་ནི་ཡི་གེར་བྲིས་ནའང་གོ་རིམ་ངེས་པ་བརྟག་ཏུ་ཡོང་མིན་འདི་ལྟར་བྱུང༌། །འཕགས་པ་སྤྱན་རས་གཟིགས་དབང་ཕྱུག་ལ་བསྟོད་པ་ཆ་ལེ་ཆོ་ལེ་ཞེས་བྱ་བ་དབྱིག་འཛིན་བུ་མོ་དབྱར་གྱི་ལང་ཚོའི་ཐོག་མ་ལ་བབས་དུས་ཁུ་བྱུག་དང་འཇོལ་མོ་གཉིས་ལ་རམ་འདེགས་བཅོལ་ནས་བརྩམས་པ་རྫོགས་སོ།། ༈ །།འཇིག་རྟེན་དབང་ཕྱུག་གིས་ཆོ་འཕྲུལ་ཆེན་པོ་བསྟན་པའི་བརྗེད་ཐོ་ཆུ་སྟོད་ཟླ་བའི་དགའ་སྟོན་ནི། །མཐའ་བྲལ་སྟོང་པའི་མཁའ་དབྱིངས་མཐོན་པོའི་ནང༌། །བྱང་ཆུབ་སྤྱོད་པའི་འཕུལ་འདེགས་རླབས་པོ་ཆེས། །མངོན་འཕགས་སྒྱུ་མ་ལྟ་བུའི་རྟེན་འབྱུང་གི༌།རོལ་རྩེད་ཀུན་ནས་མ་
བསྒྲིབས་ཐལ་ལེ་བ། །སྒྱུ་མའི་ཏིང་འཛིན་ཡུལ་ལ་མངའ་བརྙེས་པས། །རྒྱ་ཆེན་ཆོས་དབྱིངས་དཀྱིལ་འཁོར་མ་ལུས་ཁྱོན། །རྣམ་ཐར་རྒྱ་མཚོའི་མཛོད་དང་སྙན་གྲགས་རྒྱན། །ལྷན་ཅིག་བརྡལ་བས་བརྒྱན་པ་སྙིང་རྗེའི་གཏེར། །རྩིབས་སྟོང་འཁོར་ལོའི་དགེ་མཚན་བཀྲ་བའི་ཞབས། །འོད་ཀྱིས་བདེ་བ་ཅན་གྱི་ཞིང་ཁམས་ཀུན། །དུས་གཅིག་རྒྱས་པར་གཡོགས་བཞིན་སར་གནས་ཀྱི། །རྒྱལ་སྲས་བྱེ་བའི་མགོ་བོ་དཔལ་ལྡན་མཛད། །དྲོ་རེར་མུ་མཐའ་མེད་པའི་ཕྱོགས་ཀུན་ནས། །བྱང་སེམས་རྫུ་འཕྲུལ་ཤུགས་ཀྱིས་རྩེ་བ་རྣམས། །ཅོད་པན་ནོར་བུའི་འོད་ཟེར་འཐབ་པ་ཡང༌། །མཐོང་བས་ལྷར་བཅས་འཇིག་རྟེན་མིག་འཁྲུགས་ཤིང༌། །ནམ་མཁའི་ཡངས་ཁྱད་མི་མངོན་བཞིན་བགྱིས་ནས། ཁྱོད་ཞལ་པདྨའི་རཱེ་ཁ་བལྟ་བའི་སླད། །བཞུད་པའི་གནས་ཚོད་ཡུལ་གྱིས་ཆེས་བསྐལ་ཡང༌། །གྲགས་པའི་རྔ་སྒྲ་མི་མཇེད་ཞིང་འདིར་སླེབས། །དེ་ནི་རྗེ་བཙུན་ཁྱོད་ལས་དགུང་བདུན་དུ། །གདམ་ངག་བདུད་རྩིའི་བཏུང་བ་ལ་འཐུང་ན། །ཟབ་མོ་སྒྱུ་མ་ལྟ་བུའི་ཏིང་འཛིན་གྱི། །རྒྱལ་ཐབས་རྙེད་པའི་ཆོས་ཉིད་ཐོས་ནས་ལགས། །རབ་འབྱམས་ཞིང་ན་རྒྱལ་དང་དེ་སྲས་རྣམས། །རྒྱ་ཆེན་འཁོར་གྱི་དབུས་སུ་ཁྱོད་ཀྱི་གཏམ། །སྣ་ཚོགས་ཚུལ་གྱིས་བརྗོད་ལ་
རྟག་དགྱེས་པ། །སྒྱུ་མའི་རྣམ་ཐར་ཟླ་མེད་འདི་ཡི་མཐུ། །རླབས་ཆེན་བསོད་ནམས་ཡེ་ཤེས་ཤུགས་འཆང་བའི། །རྒྱལ་སྲས་གྲགས་ཆེན་རྣམས་ཀྱང་ཁྱོད་སྐུའི་ཟླ། །ཤར་བས་ཐེག་མཆོག་ཆོས་ཀྱི་ཨུཏྤལ་ཚལ། །དཔེ་ཟླ་མེད་པར་རྒྱས་པའི་ཡ་མཚན་གྱིས། །ཐུགས་དྲངས་གྱུར་ནས་སྟོབས་བཅུ་མངའ་བ་ལ། །བྱང་སེམས་སྐུལ་བའི་ཆོ་འཕྲུལ་མཛད་སླད་དུ། །རྩེ་གཅིག་གསོལ་བ་བཏབ་སྟེ་མི་འཛུམ་པའི། །པདྨའི་མིག་བཟང་ནུབ་ཏུ་གཏོད་པར་གྱུར། །དེ་ཚེ་་མགོན་པོའི་མཛོད་སྤུ་ནས། །གསེར་ཞུན་བཞུས་པའི་རྒྱུན་འདྲ་འོད་ཀྱི་སྤྲིན། །གཟི་འབར་ལྟ་ན་སྡུག་པའི་ཁ་དོག་གིས། །མཐུ་ཆེན་ཉི་ཟླའི་འོད་ཀྱང་ཟིལ་གནོན་ཅིང༌། །བྱེ་བ་བརྒྱ་སྟོང་ཞིང་གི་དཀྱིལ་འཁོར་རྣམས། །གཡོ་བས་ངོ་མཚར་མཛད་བཞིན་ཐལ་བྱུང་སྟེ། །འོད་ཟེར་དཔག་མེད་ཀྱིས་མཚན་བདེ་ལྡན་ཞིང༌། །མ་ལུས་ལག་མཐིལ་རྫས་བཞིན་ས་ལེར་མཛད། །མགོན་ཁྱོད་བདེ་བ་ཅན་ནས་གང་གི་ཚེ། །དྲང་སྲོང་ལྷུང་བའི་ནགས་སུ་བྱང་སེམས་ཀྱི། །ཏིང་འཛིན་རིན་པོ་ཆེ་ཡི་སྒྲོམ་དབྱེ་ཕྱིར། །རྒྱལ་སྲས་བྱེ་བ་བརྒྱད་ཁྲི་བཞི་སྟོང་དང༌། །ལྷན་ཅིག་སྙིང་རྗེའི་ཤིང་རྟས་བསྐྱོད་པ་ན། །རང་གི་བསྐལ་མང་དགེ་བའི་གཟི་བརྗིད་དང༌། །མཁའ་ལྟར་ཡངས་པའི་སྨོན་ལམ་མཐུ་སྟོན་ཕྱིར། །ཀུན་ཏུ་བཟང་པོའི་འབྱོར་པ་འདི་ལྟར་བརྡལ། །དག་པའི་
འཁོར་རེར་བྱེ་བ་བརྒྱད་ཅུ་བཞིའི། །གྲངས་སྙེད་ཁང་པ་བརྩེགས་པའི་སྤྲིན་བྱུང་སྟེ། །ཀུན་ཀྱང་ཀ་བ་བཞི་ཟུག་གྲུ་བཞི་ལྷམ། །ཆ་མཉམ་ལེགས་པར་ཕྱེ་ཞིང་ཟིན་བྱས་པ། །རྒྱ་དང་འཕང་དུ་དཔག་ཚད་བརྒྱད་དང་ནི། །བཅུ་གཉིས་ཚད་ཅན་སྣ་ཚོགས་རིན་ཆེན་དང༌། །སྤོས་མཆོག་མེ་ཏོག་མཆོག་ཚོགས་ལས་བགྱིས་པའི། །མི་འདྲའི་ཁྱད་པར་དབྱར་གྱི་ཕུན་ཚོགས་བཞིན། །ཤིས་པའི་མེ་ལྟར་དག་ཅིང་དྭངས་པའི་གཟུགས། ཁ་དོག་བརྒྱ་ཡི་མདངས་བཀྲ་འོད་རབ་གསལ། །དཔག་ཚད་བཞི་སྟོང་ལྷག་པའི་བརྒྱད་ཁྲིའི་ཁྱོན། ཁང་བརྩེགས་རེ་རེའི་འོད་ཀྱིས་གཟི་ལྡན་བྱེད། །དེ་དག་རེ་རེར་འཆི་མེད་ན་ཆུང་མཆོག །དཔག་བསམ་ལྕུགས་མའི་ལག་ཅན་སིལ་སྙན་དང༌། །མེ་ཏོག་སྤོས་ཀྱི་ཕུར་མའི་སྤྲིན་འགྱེད་པ། །བརྒྱད་ཁྲི་བཞི་སྟོང་རོལ་པའི་མགྲིན་གླུས་ཁྱབ། །མཚན་དཔེའི་ཆ་རེར་བསོད་ནམས་བརྒྱ་པའི་དཔལ། །རྣམ་དག་མེ་ལོང་གཟུགས་ལྟར་གསལ་རྫོགས་པའི། །རྒྱལ་བ་བཀོད་པ་ཆེན་པོའི་སེང་ཁྲི་ལ། །བཞུགས་པའི་རྣམ་འཕྲུལ་ཁང་བརྩེགས་གཅིག་བཞིན་བསྟན། །མུ་ཏིག་ཕྲེང་མཛེས་དྲིལ་གཡེར་དྲྭ་བ་དང༌། །ལྷ་རྫས་སྤོས་ཀྱི་ཕུར་མ་ཡིད་འོང་དང༌། །འོད་འབར་དབྱིབས་ལེགས་གདུགས་དང་རྒྱལ་མཚན་གྱི། །བཀོད་པ་རྒྱ་མཚོས་ཆུ་སྤྲིན་ཆེ་ལྟར་དཀྲིགས། །དྲི་ཟ་མཁས་
པས་ཡན་ལག་བྱེ་བ་ཕྲག །འབུམ་ལྡན་ལྷ་ཡི་རོལ་མོ་བླང་བ་ལྟའི། །དབྱངས་སྙན་སྒྲོག་པའི་དྲིལ་གཡེར་དེ་དག་གིས། །རང་གི་ཁང་བརྩེགས་སྙན་ངག་མཁན་བཞིན་བྱེད། །མདངས་སྣུམ་ལོ་མ་མེ་ཏོག་ཆེར་ཕྱུགས་ཤིང༌། །སྔོ་བསིལ་གྲིབ་མ་སྟུག་ལྡན་རིན་ཆེན་ཤིང༌། །བརྒྱད་ཁྲི་བཞི་སྟོང་ཚང་བས་ཁང་བརྩེགས་རེར། །ངལ་མེད་མཛེས་པ་སྐྱེད་པའི་བསྙེན་བཀུར་སྟོབས། །གསེར་མཆོག་བྱེ་མ་མཉམ་བརྡལ་རིན་ཆེན་གྱི། ཁ་ཁྱེར་སྡུག་གུས་མཐའ་བསྐོར་མེ་ཏོག་དང༌། །ངུར་པ་མྱོས་པའི་སྒྲས་ཁྱབ་ལྷ་ཆུའི་རྗིད། །མཚར་སྡུག་དཔལ་གྱི་ཐིག་ལེར་འཁྱིལ་བས་བརྒྱན། །འཁོར་གནས་ཕུན་ཚོགས་དེ་འདྲ་དེ་དག་ཀུན། ཁང་བརྩེགས་རེ་རེའི་རྒྱན་དུ་བྱིན་བརླབས་པ། །དེ་ལྟར་གཞལ་མེད་ཡོན་ཏན་ཕྲེང་བའི་གཏེར། །བྱེ་བ་བརྒྱད་ཅུ་རྩ་བཞི་ཕྲག་རེ་ཡིས། ཁྱོད་དང་ཁྱོད་ཀྱི་རྒྱལ་ཚབ་མཐུ་ཆེན་ཐོབ། །བསྐོར་ཅིང་མདུན་དུ་བདར་བས་བརྗིད་འབར་ཞིང༌། །འཁོར་གྱི་གཟི་བྱིན་མི་ཟད་རྗེས་འབྲངས་པས། །མིག་འཇམ་ཙམ་ལ་དེ་ནས་མི་སྣང་གྱུར། །སྐད་ཅིག་དེ་ལ་མི་མཇེད་ཞིང་ཁམས་འདི། །རྐེད་མེད་ལག་མཐིལ་ངོས་བཞིན་རབ་མཉམ་ཞིང༌། །སེང་གེའི་རྣམ་པར་རྩེ་བ་དེ་དག་ཀྱང༌། །སྟོང་གསུམ་འཇིག་རྟེན་གླལ་བ་ལྟ་བུར་སང༌། །དེ་ནས་་གཙོ་ལ་མགྲིན་གཅིག་ཏུ། །སྒྱུ་མ་ལྟ་བུའི་ཏིང་འཛིན་ལས་བརྩམས་ཏེ། །སོ་སོ་
ཡང་དག་རིག་བཞིའི་ཤིང་ཆེན་ལས། །བྲུལ་བའི་བསྟོད་དབྱངས་མེ་ཏོག་ཆར་པ་ཕབ། །དེ་ཚེ་ཕྱོགས་བཅུའི་ཕྱོགས་ཆ་རེ་རེ་བཞིན། །གངྒཱའི་བྱེ་མའི་གྲངས་སྙེད་འཇིག་རྟེན་ན། ཁྱོད་ཀྱི་རྣམ་འཕྲུལ་སྒྱུ་མའི་དྲ་བ་འདི། །ཆད་ལྷག་མེད་པར་ཞིང་ཁམས་རེ་བཞིན་དུ། །ཅིག་ཆར་འཇུག་པའི་སྤྱོད་ཡུལ་ཆེས་ཕྲ་བ། །སངས་རྒྱས་བྱིན་རླབས་བདུད་རྩིས་ལེགས་སྦྱངས་པའི། །མིག་ལྡན་མཐོང་བའི་ཡུལ་དུ་ཐོབ་གྱུར་ནས། །འགྲོ་མང་བྱང་ཆུབ་སེམས་ཀྱི་མྱུ་གུ་ཚུགས། །འོན་ཀྱང་དཔའ་བོ་ཁྱོད་ཀྱིས་འཇིག་རྟེན་ཁམས། །བརྒྱ་ཕྲག་སྟོང་གི་རྡུལ་ལས་ཆེས་མང་བའི། །བསྐལ་པ་བགྲང་བའི་ཡ་མཐར་དེ་བཞིན་གཤེགས། །གསེར་འོད་སེངྒེ་རྣམ་རོལ་སྤྱན་སྔ་རུ། །ཤེས་རབ་ཟབ་མོའི་རྩལ་དང་སེམས་བསྐྱེད་ཀྱི། །སེངྒེའི་སྒྲ་དང་མཐུ་ཡི་ཁྱད་པར་གྱིས། །ལྷར་བཅས་འཇིག་རྟེན་མཐའ་དག་ཟིལ་མནན་ཏེ། །དེ་ཡི་སྔར་ཡང་གངྒཱའི་བྱེ་མ་བས། །རབ་མང་སངས་རྒྱས་ཞིང་ལ་བསྙེན་བཀུར་བར། །དཔལ་སྟུག་བདེན་པའི་གསུང་གིས་རྗེས་བསྔགས་ན། །རྣམ་པ་ཀུན་གྱི་མཆོག་ལྡན་སྟོང་པའི་མཚོ། །བརྒལ་བའི་ཡུལ་འདིར་ངོ་མཚར་གསར་པ་ཅི། ཁྱོད་ཀྱི་གཤེགས་བཞུད་བྱུང་བ་གང་བསྙད་དང༌། ཁྱོད་ཀྱི་སྐྱེས་རབས་ཕྲེང་བ་ཅི་སྨྲ་བ། །དེ་ཀུན་སྒྱུ་མ་ལྟ་བུའི་ཏིང་འཛིན་གྱི། །ཆོས་ཉིད་བརྗོད་པའི་སྒོ་དང་
ཡོངས་སྦྱོང་དང༌། །དང་པོའི་རྒྱུ་ཚོགས་བསྙད་ལས་མ་འདས་ཕྱིར། །ཐུབ་པས་ཁྱོད་ཀྱི་རྟོགས་བརྗོད་གང་གསུངས་པ། །དེ་ནི་ཐེག་མཆོག་ལུང་གི་སྙིང་པོ་རུ། །གཟུང་བར་བྱ་ཡི་དཀྱུས་ལས་འཕྲོས་ཙམ་མིན། །དེ་ལྟར་ཁྱོད་ཀྱི་སྙིང་རྗེའི་རྩ་བ་དང༌། །བརྩོན་པའི་སྡོང་པོ་སྦྱོང་བའི་ཡལ་འདབ་དང༌། །ཏིང་འཛིན་མེ་ཏོག་ཤེས་རབ་འབྲས་བུར་བཅས། །ཅི་དང་ཅི་ནས་རྒྱ་ཡོངས་མ་ཆད་ཅིང༌། །བསམ་གྱིས་མི་ཁྱབ་མངའ་ཐང་བསགས་བསགས་པས། ཁྱོད་ཀྱི་ཞིང་དང་འཁོར་དང་སྐུ་ཚེ་དང༌། །མཛད་ཕྲིན་མཐུ་ཡི་ཁྱད་པར་ཇི་སྙེད་པ། །མ་འདྲེས་ཆོས་ཉིད་བསམ་མི་ཁྱབ་པ་ལགས། །གང་གི་འབྱོར་པ་བསམ་ཀྱང་བསྐལ་མང་དུ། །ཕ་མཐའ་མི་རྫོགས་བདེ་བའི་རྒྱན་ལྡན་པ། །བདེ་བ་ཅན་གྱི་ཡོན་ཏན་བཀོད་པས་ཀྱང༌། །སྐྲ་རྩེའི་ཟིལ་པས་ཕྱོགས་མཐའི་ཆུ་གཏེར་བཞིན། །གསེར་འོད་རྒྱལ་པོའི་ཞིང་ལ་ཆོག་མིན་ཏེ། །དེ་ལྟར་རྣམ་དག་གསེར་འོད་མགོན་པོ་ཡི། །ཞིང་ཁམས་ཡོན་ཏན་རིན་ཆེན་བསགས་པ་ཡི། །དཔལ་དེས་འབུམ་གྱི་ཆར་ཡང་བསྐྲུན་མེད་པའི། །ཞིང་གི་འབྱོར་པ་མཆོག་དང་རྒྱལ་སྲས་འཁོར། །ཏིལ་གྱི་གོང་བུ་བལྟམས་འདྲར་རྟག་གནས་ཕྱིར། །རིན་ཆེན་ཀུན་བསགས་གྲགས་པ་དོན་ལྡན་པ། ཁྱོད་ཀྱི་སངས་རྒྱས་ཞིང་སྟེ་དཔེར་བརྗོད་ཙམ། །དབྱར་གྱིས་དགའ་བ་དཔའ་གྲོགས་ཡིད་ཀྱི་རྫིང༌། །དང་བའི་རླབས་ཀྱིས་
དཀྲུགས་ལས་ཉེར་འོང་བ། །ཚིག་ཕྲེང་རབ་དཀར་དབུ་བའི་འཛུམ་རིས་འདིས། །བློ་དང་བརྩེ་བའི་རྩེ་དགའ་འཕེལ་བར་ཤོག །འཇིག་རྟེན་དབང་ཕྱུག་གི་ཆོ་འཕྲུལ་ཆེན་པོའི་བརྗེད་ཐོ་དབྱར་གྱི་དགའ་སྟོན་འདི་རྡོ་རོང་གི་སྨྱོན་པ་བསྟན་པའི་ཉི་མས་ཆུ་སྟོད་ཟླ་བའི་ཚེས་བདུན་གྱི་ཕྱི་དྲོ་གང་དྲན་མྱུར་དུ་བྲིས་པ་ཐུགས་རྗེའི་བདག་པོའི་སྤྱན་རས་ཀྱིས་འཚོ་བའི་རྒྱུར་གྱུར་ཅིག །འདི་སྒྱུ་མ་ལྟ་བུའི་ཏིང་ངེ་འཛིན་གྱི་མདོ་ལ་བརྟེན་པ་ཡིན། ཕལ་ཆེན་དང་པད་དཀར་ན་འཕགས་པ་འདིའི་ཆོ་འཕྲུལ་བཤད་པ་མང་ཡང་བྲི་མ་ཐུབ་པས་དེར་ལྟོས།། ༈ །།ཟབ་དང་རྒྱ་ཆེའི་ཆོས་ཚུལ་ལས་འཁྲུངས་ཤིང༌། །ཆོས་ཀྱི་བསྙེན་བཀུར་ཁོ་ནས་མཉེས་བྱ་དང༌། །མཉེས་པས་ཆོས་ཀྱི་རྒྱལ་སྲིད་སྦྱིན་ནུས་པ། །འཇམ་དབྱངས་ཞབས་ཀྱི་པདྨོར་ཡིད་བཏུད་དེ། །སྨོན་ཚིག་ཕྲེང་བ་རྒྱུད་འདིར་རྗེ་བཙུན་ཁྱོད། །དག་པའི་སྙན་དབང་ཡུད་ཙམ་མངོན་ཕྱོགས་ནས། །ཀུན་ཏུ་བཟང་པོའི་ཐབས་མཁས་ཚད་མེད་པས། །བཟང་པོའི་སྨོན་ལམ་རྒྱ་ཆེར་སྐོང་བར་མཛོད། ཁྱོད་སྐུ་མཚན་དཔེའི་རིན་ཆེན་མེ་ཏོག་ཚལ། །ངོ་མཚར་བྱེ་བ་བརྒྱ་ཡི་མདང་བཀྲ་བར། །ཡིད་མིག་རོལ་པའི་དགའ་བ་དེ་ལས་བདག །བྱང་ཆུབ་སྙིང་པོ་ཇི་སྲིད་མི་ཉམས་ཤོག །རབ་འབྱམས་ཞིང་གི་རྒྱལ་བས་བསྟོད་དབྱངས་དང༌། །ལྷན་ཅིག་ཤིས་པའི་མེ་ཏོག་ཆར་འབེབས་ཤིང༌། །ཀུན་བཟང་
མཆོད་སྤྲིན་ནང་ན་སྤྲིན་དབུས་སུ། །གློག་ལྟར་མཛེས་པའི་དཔལ་གྱིས་ཡིད་འཕྲོག་ཤོག །ཤིན་ཏུ་ཞི་བ་ཐོག་མའི་ན་ཚོད་ཅན། །གསལ་ཞིང་འོད་འབར་ཕྱི་ནང་ཡོངས་དག་པ། །ཕུལ་བྱུང་གཟུགས་སྐུ་ལན་རེ་མཐོང་བས་ཀྱང༌། །དགའ་བའི་ཡིད་བྱེད་དུས་མང་འབྱུང་བར་ཤོག །འཛུམ་བཅས་བྱམས་པས་དགྱེས་པའི་ཉམས་ཆགས་ཤིང༌། །གསེར་བཟང་འོད་ཀྱིས་ནམ་མཁའ་དགོད་པ་བཞིན། །མཁས་པ་དགའ་བའི་ལེགས་བཤད་རིང་འཕྲོ་བ། །ཀུན་དགའི་ཞལ་རས་རྒྱུན་དུ་རྟོག་པར་ཤོག །འདོད་པས་རྨོངས་བྱེད་ལས་ཀྱི་སྒྱུ་མ་མིན། །མཐོང་བས་ཐོག་མ་མེད་པའི་གཏི་མུག་མུན། །རབ་འཕྲོག་ཡེ་ཤེས་ལང་ཚོ་གསར་པའི་གཟི། གཡེང་བ་མཐའ་དག་བཏང་སྟེ་ཡིད་བྱེད་ཤོག །རྣམ་པར་བསྒྱིངས་པའི་གཟིགས་སྟངས་ཁྱུ་མཆོག་འགྲོས། །དབུགས་འབྱིན་བདུད་རྩིའི་ཕྱག་སྟབས་མཉམ་མེད་སོགས། །དྲན་པས་བདེ་ལེགས་མཆོག་སྩོལ་སྤྱོད་ལམ་གྱིས། །སེམས་ཀྱི་རྙོག་པ་ཀུན་ནས་དྭངས་བྱེད་ཤོག །དག་ཅིང་སྒྲིབ་མེད་མཁའ་ལྟར་རྒྱ་ཆེ་བ། །མཐུ་སྟོབས་དཔག་ཡས་ཞིང་ཁམས་རྒྱ་མཚོའི་རྒྱན། །བལྟ་བས་མི་ངོམས་འོད་ཀྱི་ལྡིང་ཁང་དུ། །དཔག་བསམ་ནགས་ཀྱི་ལྷ་བཞིན་རྩེ་བར་ཤོག །ཀུན་སྤྱོད་ཐམས་ཅད་མཉམ་བཞག་རྗེས་འབྲང་ཡང༌། །འཇིག་རྟེན་བསམ་པ་སྣ་ཚོགས་ལ་གཟིགས་ཤིང༌། །མི་མཉམ་
མཛད་སྤྱོད་ཆོས་དབྱིངས་ཁྱབ་སྟོན་པར། །ཤེས་ནས་ཅི་མཛད་ལེགས་དགུར་མཐོང་བར་ཤོག །རྒྱལ་མཛད་འཁོར་ལོའི་རྟགས་ཅན་ཞབས་མཐིལ་ལ། །རྒྱལ་སྲས་ཁྱུ་མཆོག་མང་པོའི་ཅོད་པན་རྩེ། །ལེགས་གཏུགས་བླ་ན་མེད་པའི་བསོད་ནམས་ཞིང༌། །མཐོང་བས་དངོས་པོ་ཀུན་གྱིས་མཉེས་བྱེད་ཤོག །དག་པའི་སྣོད་བཅུད་རབ་ཡངས་རྡུལ་སྙེད་གཟུགས། །མཛེས་སྡུག་ཆ་ཤས་ཕྲ་མོར་གསལ་རྫོགས་པའི། །སྒྱུ་མའི་རོལ་རྩེད་མཆོག་ལ་ཡིད་ཞུགས་ནས། །ཐུན་མོང་མིན་པའི་ངོ་མཚར་འཆར་བར་ཤོག །ཕྱོགས་བཅུར་དག་པའི་རྣམ་འཕྲུལ་སྣ་ཚོགས་དང༌། །འཁོར་དང་ཞིང་གི་རྒྱན་བཀོད་འབྱམས་ཀླས་པ། །ཆོས་དཀར་བདུད་རྩིས་སྨིན་པའི་མངོན་སུམ་ཡུལ། །ཐོབ་ནས་ཀུན་བཟང་སྤྱོད་ལ་མཁས་པར་ཤོག །མི་ཕྱེད་འཁོར་ལྟར་མཐུན་པའི་གདུ་བུ་དང༌། །གཏོང་དང་ཚུལ་ཁྲིམས་བཟོད་པས་ལེགས་བརྒྱན་པ། །དགེ་བའི་བསུང་ཚོར་པདྨའི་ཞབས་ཟུང་ལ། །འཇུས་ནས་སྨོན་ལམ་རླབས་ཆེན་སྒྲུབ་པར་ཤོག །བདེན་ཞིང་ཕན་པའི་དོན་ལྡན་སྦྱར་ལེགས་ཚིག །ཕུན་ཚོགས་བསོད་ནམས་བརྒྱ་པའི་ཞལ་སྒོ་ལས། །ཚངས་པའི་དབྱངས་སྙན་རྒྱུད་ལ་ཉེར་དྲངས་པས། །གསུང་གི་དབང་པོར་མི་འཕྲོག་ངེས་རྙེད་ཤོག །འཇིགས་རུང་སྲིད་པའི་ཉེས་དམིགས་བསམ་ཡས་པ། །བསྟན་ནས་བག་མེད་ཡིད་ནི་
སྐྱོ་མཛད་ཅིང༌། །རྟེན་འབྱུང་འཁོར་ལོའི་ཚུལ་ལ་མི་རྨོངས་པའི། །ཡང་དག་བློ་གྲོས་སྣང་བ་སྦྱིན་པར་ཤོག །དེ་ནས་སེམས་ཅན་ཐམས་ཅད་ཡིད་འོང་དུ། །སྒྲུབ་བྱེད་རིགས་པའི་རྣམ་གྲངས་མང་བསྟན་ནས། །རྒྱ་ཆེན་སྙིང་རྗེའི་ལྗོན་ཤིང་ཡལ་ག་སྟུག །ལྷག་བསམ་འབྲས་བུས་བརྒྱན་པ་འབྱུང་བར་ཤོག །གཞན་ཕྱིར་རྫོགས་བྱང་སྒྲུབ་པའི་སྙིང་སྟོབས་ཀྱིས། །ཚུལ་ཁྲིམས་ཕུང་པོ་ཡོངས་སུ་དག་བྱེད་ཅིང༌། །སྐྱོ་དུབ་མེད་པའི་བརྩོན་འགྲུས་རྒྱུན་ཆགས་པས། །ཁྱོད་གསུང་གདམས་པའི་གཏེར་ལ་འཇུག་པར་ཤོག །དེ་ཚེ་ཚིགས་བཅད་རེས་ཀྱང་དཔག་དཀའི་དོན། །དུ་མར་མྱུར་འཇུག་རིང་དུ་མི་བརྗེད་པའི། །བློ་མཆོག་རྙེད་ནས་གསུང་རབ་རྒྱ་མཚོའི་མཐར། །སོན་པའི་གོ་འཕང་བདེ་བླག་འཐོབ་པར་ཤོག །འཆད་ཐབས་རྒྱན་ལྡན་བཤད་པའི་ཕ་རོལ་ཕྱིན། །སྒྲུབ་དང་སུན་འབྱིན་རྩོད་པའི་ཚེར་མ་དབྱུང༌། །འཁྲུལ་བ་བྲལ་བའི་དགོངས་འགྲེལ་གཞུང་བྱེད་ལ། །གཞན་དྲིང་མི་འཇོག་ཆོས་སྨྲའི་དབང་པོར་ཤོག །ཀུན་ཏུ་མི་བཟད་ཡིད་ཀྱི་གཡོ་བའི་དུག །འཕྲོག་བྱེད་བསམ་གཏན་སྦྱོར་བའི་ཐབས་མཁས་ཀྱིས། །ཟད་པར་ཟིལ་གནོན་མངོན་ཤེས་ལ་སོགས་པ། །རྣམ་མང་ཡོན་ཏན་ཕུང་པོར་འགྱུར་བར་ཤོག །ཤེས་བྱའི་གསང་བ་གཉིས་མེད་ཞི་བའི་སྒོ། །མཐའ་བྲལ་སྟོང་པ་རྟེན་འབྱུང་དོན་དུ་ནི། །རྣམ་དག་རིགས་པའི་སྒོ་མོ་བརྒྱས་མཐོང་
སྟེ། །ཡིད་ནི་ལྷག་མཐོང་ཟབ་མོའི་ངོས་གང་ཤོག །མཁའ་ལྟར་དང་བའི་མཉམ་བཞག་སྒྱུ་མ་ལྟའི། །རྗེས་ཐོབ་བསོད་ནམས་ཚོགས་དང་ཟུང་འབྲེལ་དུ། །སྦྱངས་པས་སེམས་ཀྱི་རྒྱུ་བ་ལས་འདས་ནས། །དམིགས་མེད་སྟོང་པའི་དབྱིངས་སུ་འཕྱོ་བར་ཤོག །སླར་ཡང་རྒྱལ་སྲས་རྣམས་ཀྱི་བླ་མ་ཁྱོད། །གཟུགས་སྐུས་འཇིག་རྟེན་ཉིན་མོར་མཛད་མཐོང་ནས། །དེ་འདྲའི་འབྱོར་པ་རྒྱ་ཆེན་སྒྲུབ་སླད་དུ། །རབ་ཡངས་བསོད་ནམས་ཚོགས་མཆོག་གསོག་པར་ཤོག །འགྲན་ཟླ་མེད་པར་ཆོས་འཁོར་བསྐོར་བའི་གསུང༌། །རྣམ་པ་ཀུན་མཁྱེན་ཡེ་ཤེས་ཉག་གཅིག་གི༌།འཕྲུལ་དུ་མཐོང་ནས་ངོམས་པ་མ་མཆིས་པར། །ཤིན་ཏུ་རྒྱས་པའི་ཡེ་ཤེས་ཚོགས་གསོག་ཤོག །མོས་སྤྱོད་ས་ནས་ཁྱོད་གསུང་ཚིག་འབྲུ་དང༌། །དོན་དང་ངེས་ཚིག་སྤོབས་པ་མཐའ་ཡས་པས། །ལེགས་བསྐྲུན་སོ་སོ་ཡང་དག་རིག་བཞི་ཡི། །ས་བོན་དབྱར་གྱི་མཚོ་བཞིན་འཕེལ་བར་ཤོག །དེ་མཐུས་སངས་རྒྱས་སྤྱན་སྔར་སྨྲ་རྣམས་ཀྱི། །ཐོག་མའི་སྐྱེས་མཆོག་ཁྱོད་དང་ལྷན་གཅིག་ཏུ། །ཐེག་མཆོག་འགྲོ་བའི་ཚུལ་ལ་མི་འཇིགས་པས། །སེམས་ཅན་རྒྱ་མཚོ་ཡོངས་སུ་སྒྲོལ་བར་ཤོག །འཁོར་བ་ཇི་སྲིད་བསམ་གྱིས་མི་ཁྱབ་པའི། །ཆོ་འཕྲུལ་གསུམ་གྱིས་མཐའ་ཡས་འགྲོ་བ་ཀུན། །གདུལ་བས་མི་སྐྱོ་རྒྱལ་ཀུན་ཡབ་གཅིག་གི༌།རྣམ་ཐར་མ་ལུས་མྱུར་དུ་
རྫོགས་པར་ཤོག །དེ་ལྟར་ཡེ་ཤེས་སྤྱོད་ཡུལ་མཐར་ཕྱིན་ཏེ། །སྐུ་དང་ཞིང་ཁམས་སྐུ་ཚེ་ཡོངས་དག་འཁོར། །སྙན་གྲགས་མཛད་ཕྲིན་ཆོས་དབྱིངས་སྙོམ་འཇུག་པ། །ཀུན་གཟིགས་དཔའ་བོ་མཆོག་དང་མཉམ་པར་ཤོག །རྗེ་བཙུན་འཇམ་པའི་དབྱངས་ཀྱི་གཞན་དོན་ཕུན་ཚོགས་ཀྱི་སྐུ་ལ་བརྟེན་ཏེ་རང་གི་དོན་གཉིས་ཕུན་ཚོགས་འགྲུབ་ཚུལ་དང་སྦྱར་བའི་བསྟོད་པ་སྨོན་ལམ་དང་བཅས་པ་འདི་ནི་རྡོ་རོང་གི་བན་དེ་བསྟན་པའི་ཉི་མས་སྦྱར་བ་ཚེ་རབས་ཀུན་ཏུ་བཅོམ་ལྡན་འདས་འཇམ་དཔལ་གཞོན་ནུས་ཡོངས་འཛིན་མཛད་པའི་རྒྱུར་གྱུར་ཅིག་གུ། མངྒ་ལཾ།། ༈ །།ན་མོ་ཨཱརྱ་མཉྫུ་ཤྲི་ཡེ། །རབ་འབྱམས་ཞིང་གི་མགོན་པོ་སྲས་བཅས་ཀྱིས། །རྒྱ་ཆེན་བསྟོད་དབྱངས་མེ་ཏོག་ཆར་ཕབ་པ། །རྒྱལ་ཀུན་ཡབ་གཅིག་མཁྱེན་རབ་ལྷག་པའི་ལྷའི། །ཞབས་རྟེན་རིན་ཆེན་པདྨར་ཕྱག་བགྱིའོ། །ཀུན་དགའི་དཔལ་སྟེར་དགྱེས་འཛུམ་པདྨའི་ཞལ། །ཤིས་པའི་བསུང་འཐུལ་ཟུང་སྤྱན་ཨཱཏྤལ་མདའ། །དུས་འདིར་བདག་ཅག་རྣམས་ལ་ལྷན་ཅིག་ཏུ། །ཕྱོགས་པའི་རྗེས་བརྩེ་མཛད་ཅིང་དགོངས་སུ་གསོལ། །བདག་སོགས་སྐྱེ་ཞིང་སྐྱེ་བའི་ཕྲེང་བ་རུ། །རླབས་ཆེན་དགེ་བའི་བཤེས་གཉེན་ཁྱོད་བསྟེན་ནས། །ཐེག་མཆོག་གདམས་པའི་བདུད་རྩི་འཐུང་བ་ཡིས། །རྣམ་པ་ཀུན་མཁྱེན་ལང་འཚོ་བལྟ་བར་ཤོག །མཐོང་བས་ཡིད་མུན་སེལ་མཛད་མཚན་
དཔེའི་ཉི། །ཚེ་འདིར་དང་བའི་མིག་ཁར་མངོན་སུམ་དུ། །ལེགས་ཤར་བྱིན་རླབས་རྒྱ་མཚོའི་འོད་སྣང་གི༌།དགའ་བས་ཉིན་མཚན་ཀུན་ཏུ་འདའ་བར་ཤོག །ལེགས་གསུང་འདུལ་མངོན་མདོ་སྡེའི་གཞུང་ལུགས་ཀུན། །དགོངས་འགྲེལ་ཤིང་རྟ་ཆེན་པོའི་མན་ངག་ལ། །བསྟེན་ནས་རྒྱལ་བ་ཉིད་ཀྱི་དགོངས་པ་བཞིན། །རྟོགས་པའི་བློ་མིག་ཁྱོད་མཐུས་རྙེད་པར་ཤོག །དྲང་དོན་གསུང་རབ་ཀུན་གྱི་བརྗོད་བྱའི་གསང༌། །ངེས་དོན་འཁོར་ལོ་བར་བའི་ཟབ་གནད་མཆོག །མཐའ་བྲལ་དབུ་མའི་ཆུ་གཏེར་འཇིངས་རོལ་བའི། །རྣམ་དཔྱོད་གྲུ་སྐྱ་རང་དགར་འཛིན་པར་ཤོག །ཤིན་ཏུ་རྒྱ་ཆེ་རྣམ་གྲངས་འབྱམས་ཀླས་པའི། །རྒྱལ་སྲས་སྤྱོད་ཚུལ་རྒྱ་མཚོའི་དེ་ཉིད་ལ། །མི་རྨོངས་ཆོས་རབ་རྣམ་འབྱེད་རྩལ་རྫོགས་ནས། །ཡུམ་དོན་མཐོང་བའི་རབ་དགས་མྱོས་པར་ཤོག །ཐེག་མཆོག་ལམ་གྱི་ཁྱད་པར་མཐའ་དག་ལ། །ཤིན་ཏུ་ཕྲ་བའི་རིགས་པའི་འཁྲུལ་འཁོར་གྱིས། །ཡིད་ཆེས་རྙེད་ནས་གཞན་གྱིས་མི་འཕྲོགས་པའི། །ཟབ་བརླིང་བློ་གྲོས་རྩ་བ་ཚུགས་པར་ཤོག །དགོས་འབྲེལ་མེད་པའི་གསུང་རབ་ཡོད་མིན་པས། །ལུང་དོན་མ་ལུས་ཉམས་ལེན་སྙིང་པོ་རུ། །དྲིལ་ནས་སྒྲུབ་པ་ནན་ཏན་འཁོར་ལོ་ཡིས། །ཡོངས་རྫོགས་བསྟན་ལ་བྱ་བ་བྱེད་པར་ཤོག །ཚེ་ཡི་མཐའ་ཡང་རྣམ་གྲོལ་བདུད་རྩིའི་ལྷ། །
དྲི་མེད་ཟླ་ཞལ་མངའ་བ་ཁྱོད་མཐོང་སྟེ། །བརྒྱ་ཕྲག་བསོད་ནམས་ལས་གྲུབ་བྱམས་པའི་ཕྱག །བརྐྱངས་ཏེ་སྤྱི་བོར་འཇོག་ཅིང་རྗེས་འཛིན་ཤོག །ཤི་འཕོས་ནས་ཀྱང་རྗེ་བཙུན་ཁྱོད་ཀྱི་ཞལ༌།དྲན་པའི་འདུ་བྱེད་སྐད་ཅིག་མི་འགོག་ཅིང༌། །གང་དང་གང་དུ་དཔའ་བོ་ཁྱོད་བཞུགས་པའི། །ཕྱོགས་དེར་སྐྱེ་བའི་མྱུ་གུ་འཛིན་པར་ཤོག །ནམ་ཡང་མགོན་ཁྱོད་མཉེས་པར་མི་བགྱིད་པའི། །རྒྱུ་མཐུན་ཆོས་ལ་སྡང་དང་དམ་པ་སྨོད། །གཞུང་ལུགས་ངན་དང་སྡིག་པའི་གྲོགས་བསྟེན་སོགས། །རྨི་ལམ་དུ་ཡང་བགྱིད་པར་མ་གྱུར་ཅིག །བསྐལ་མང་ཐོས་དཀའ་ཐོས་ནས་ཤེས་དཀའ་བའི། །ཆོས་ཚུལ་སྒོ་མོ་བརྒྱ་སྟོང་བྱེ་བ་སྙེད། ཁྱོད་ལས་མྱུར་ཐོས་ཚིགས་བཅད་རེ་རེར་ཡང༌། །བརྟེན་ནས་བདེ་བླག་ཁོ་ནར་རྟོགས་པར་ཤོག །སྒྱུ་མའི་རྣམ་ཐར་མཐར་ཕྱིན་མགོན་པོ་ཁྱོད། །སྒྱུ་འཕྲུལ་སྤྲུལ་པ་ལྟ་བུའི་སྐུ་ལུས་ཀྱི། །རྣམ་རོལ་སྣ་ཚོགས་སྟོན་པའི་ཞིང་དེ་དག །མངོན་སུམ་བལྟ་བའི་དབང་འབྱོར་ཐོབ་པར་ཤོག །བསམ་ཡས་རྒྱལ་ཀུན་འཁོར་གྱི་དཀྱིལ་འཁོར་དུ། །ཀུན་ཏུ་བཟང་པོའི་རོལ་རྩེད་བརྒྱ་ཕྲག་གིས། །བཞུད་ཚེ་ཁྱོད་ཞབས་པདྨའི་ས་འཛིན་རྡུལ། །བསྙེན་པའི་ཞམ་རིང་གཙོ་བོར་བདག་འགྱུར་ཤོག །སངས་རྒྱས་ཐམས་ཅད་བསྙེན་བཀུར་སྦྱོར་བ་དང༌། །དམ་ཆོས་ཉན་དང་ཚངས་སྤྱོད་བརྟེན་པ་དང༌། །ཡེ་ཤེས་སྒྲུབ་
པའི་བརྩོན་འགྲུས་ཚད་མེད་པས། །བདེ་གཤེགས་མཐོང་བའི་མིག་ནི་རྣམ་དག་ཤོག །རྒྱལ་རྣམས་སྤྱན་སྔར་ཁྱོད་དང་ལྷན་ཅིག་ཏུ། །ཐེག་མཆོག་འདྲི་དང་སྨྲ་བའི་སྐལ་བཟང་ལ། །དབང་བསྒྱུར་རྒྱལ་སྲས་མཁས་པ་ནོར་བཟང་བཞིན། །གྱུར་ནས་སེམས་ཅན་མང་ལ་ཕན་བྱེད་ཤོག །སྐད་ཅིག་ཙམ་ཡང་མགོན་པོ་ཁྱོད་ཞབས་དང༌། །མི་འབྲལ་སྐུ་གསུང་ཐུགས་ཀྱི་གསང་བ་ཀུན། །མཐོང་བའི་ངོ་མཚར་དཔལ་ལ་རྟག་རོལ་ཅིང༌། །རྣམ་པ་ཀུན་ཏུ་དེ་འདྲའི་རྗེས་སློབ་ཤོག །མདོར་ན་ཀུན་བཟང་སྤྱོད་པའི་སྨོན་ལམ་མཛོད། །རྗེ་བཙུན་ཁྱོད་ཀྱི་བྱིན་རླབས་བཟང་པོ་ཡི། །དྲིན་ལས་མིག་འཕྲུལ་ལྟ་བུར་རྫོགས་བྱས་ཏེ། །ཡོན་ཏན་ཕུང་པོ་ཁྱོད་དང་འདྲ་བར་ཤོ༌།འཇམ་མགོན་ཞལ་བཟང་བལྟ་བའི་སྨོན་ལམ་ཚིགས་སུ་བཅད་པ་འདིའང་བཅོམ་ལྡན་འདས་འཇམ་པའི་དབྱངས་ཀྱི་ཞབས་ལ་མི་འཕྲོགས་པའི་ཡིད་ཆེས་ཅུང་ཟད་ཐོབ་པའི་བནྡྷེ་འཇམ་དཔལ་རིག་པའི་རལ་གྲིས་ལྕགས་ཡོས་ཆུ་སྟོད་ཅན་གྱི་རྒྱལ་བ་ཐོག་མ་ལ་བྲིས་པ་དགེ་བར་གྱུར་ཅིག །
ན་མ་གུ་རུ་ཨཱརྱ་ཏཱ་ར་ཡེ། །དཔལ་ལྡན་སངས་རྒྱས་ཀུན་གྱི་ཞལ་སྐྱིན་དངོས། །སྲིད་ཞིའི་ལེགས་ཚོགས་མཐའ་དག་འབྱུང་བའི་གཞི། །མཉམ་མེད་བླ་མའི་ཞབས་སེན་མེ་ཏོག་ཕྲེང༌། །བདག་གི་མགོ་ལ་རྟག་ཏུ་གནས་གྱུར་ཅིག །ཐུན་མོང་མཁས་བཙུན་དམ་པའི་རྣམ་ཐར་གཏེར། །ཐུན་མིན་སྲས་བཅས་རྒྱལ་བའི་གསང་བ་འཛིན། །མཐར་ཐུག་རྡོ་རྗེ་བཞི་ཡི་རྒྱལ་ཐབས་ཅན། །བླ་མ་སངས་རྒྱས་དེ་ལ་སླར་ཡང་འདུད། །གསང་ཆེན་རྒྱུད་སྡེ་རྒྱ་མཚོའི་སྟོན་པ་སྟེ། །དཀྱིལ་འཁོར་མ་ལུས་སྤྲོ་དང་བསྡུ་བའི་བདག །དངོས་གྲུབ་ཀུན་བྱེད་རིགས་བརྒྱའི་ཁྱབ་བདག་ཆེ། །རྡོ་རྗེ་འཆང་དབང་བླ་མ་རྒྱལ་གྱུར་ཅིག །དེ་ཡི་དམིགས་མེད་སྙིང་རྗེའི་རིན་ཆེན་རྡུལ། །ཡིད་འཕྲོག་ན་ཆུང་སྒྱུ་མའི་སྐུར་བསགས་ཏེ། །འགྲོ་ལ་མི་འཇིགས་བདེ་བའི་མཆོག་སྦྱིན་པ། །སྒྲོལ་མ་ཡུམ་ཁྱོད་བདག་ལ་རྗེས་བརྩེར་མཛོད། །སྒྲིབ་བྲལ་ཆོས་དབྱིངས་ཡངས་པའི་མཁའ་ལ་ཤར། །ཟག་མེད་ཡོན་ཏན་དཀར་པོའི་ཆ་ཤས་རྫོགས། །ཕུལ་བྱུང་སྙིང་རྗེའི་བསིལ་འོད་ཕྱོགས་བཅུར་འཕྲོ། །སྒྲོལ་མཛོད་འཕགས་མའི་ཟླ་བ་བདག་ལ་དགོངས། ཁྱོད་ནི་བདེ་ལྡན་ཞིང་གི་ཐིག་ལེ་སྟེ། །འོག་མིན་ཆོས་ཀྱི་ཁང་བཟང་མཛེས་པའི་རྒྱན། །མ་དག་ཞིང་དུ་འགྲོ་བའི་མ་གཅིག་མོ། །ངན་འགྲོའི་འཇིག་རྟེན་སྒྲོལ་བའི་སྙིང་སྟོབས་ཆེ། །རྒྱལ་བའི་སྤྱན་སྔར་རྒྱལ་སྲས་གཙོ་མོར་གྲགས། །རྒྱལ་སྲས་འཁོར་གྱིས་རྒྱལ་བའི་ཡུམ་དུ་བཀུར། །སངས་རྒྱས་ཆོས་ལ་རྒྱལ་བ་ཉིད་བཞིན་དབང༌། །སེམས་ཅན་ཁམས་ལ་རྒྱལ་
བའི་ཕྲིན་ལས་མཛད། །གཞན་གྱི་སྡུག་བསྔལ་མགུལ་པའི་རྒྱན་ལྟར་བླངས། །བདག་གི་བདེ་བ་དགའ་སྟོན་རྫས་བཞིན་བཀྱེ། །དེ་མཐུས་རང་ཉིད་གོ་འཕང་མཐོན་པོར་བྱོན། །གོ་འཕང་དེ་ཡང་འགྲོ་བའི་དོན་དུ་བསྔོས། །ཕ་མཐའ་ཡས་པའི་སེམས་ཅན་སྒྲོལ་བ་དང༌། །མ་ལུས་རྒྱལ་བའི་ཕྲིན་ལས་ཀུན་སྒྲུབ་པར། །གཞན་དྲིང་མི་འཇོག་གཅིག་པུའི་རྩལ་སྦྱོང་ཕྱིར། །ཆོས་ཀྱི་དབྱིངས་ན་ཉག་གཅིག་དཔའ་བ་ལགས། ཁྱོད་ནི་སངས་རྒྱས་རིན་ཆེན་ཟ་མ་ཏོག །བྱང་ཆུབ་ཆོས་ཀུན་བསྡུས་པའི་ཡེ་ཤེས་ལུས། །འཕགས་བཞིའི་འབྱུང་གནས་ཤེར་ཕྱིན་དགེ་མ་སྟེ། །རིན་ཆེན་གསུམ་བདག་ཁྱོད་ལ་སྐྱབས་སུ་མཆི། །ཚངས་པས་ཅོད་པན་རྩེ་མོས་ཞབས་རྡུལ་བླངས། །འདོད་ལྷས་བདག་ཉིད་དམན་པར་རིང་དུ་སྨྲེ། །ས་གསུམ་ཀུན་ཏུ་རྒྱལ་བའི་སྒྲ་གྲགས་པ། །རྒྱལ་ཡུམ་གཙོ་མོས་རྒྱལ་བསྟན་རྒྱལ་བར་མཛོད། །འཇིག་རྟེན་དབང་ཕྱུག་མགོན་མེད་འགྲོ་བའི་ཕྱིར། །བཤུམ་ཚེ་དེ་དག་ང་ཡིས་བུར་བསྐྱང་ཞེས། ཁྱོད་ཀྱིས་བདེན་གསུང་གཞན་དུ་མི་འགྱུར་བས། །ལྔ་བདོའི་འགྲོ་ལ་བདེན་པ་མངོན་དུ་སྟོན། །ཆོས་དབྱིངས་ཟབ་མོའི་རྒྱ་མཚོ་རབ་སྣང་མཛད། །རྒྱ་ཆེན་ཤེས་བྱའི་ནམ་མཁའ་འོད་ཀྱིས་འགེངས། །འཇིག་རྟེན་གསུམ་ན་མཚུངས་མེད་འོད་བྱེད་པ། །ཡུམ་ཁྱོད་ལྔ་བདོའི་སྨག་ལ་སྣང་བ་སྤྲོས། །ཞི་བའི་དབྱིངས་སུ་ཡེ་ཤེས་རྒྱལ་སྲིད་བརྙེས། །སྲིད་པ་ཀུན་ཏུ་སྙིང་རྗེའི་བཀའ་ལུང་བསྒྱུར། །འཁོར་
འདས་རོ་མཉམ་རྟོགས་པའི་དབང་ཆེ་བ། །སྲིད་ཞིའི་དབང་མོས་སྲིད་པའི་འགྲོ་བ་སྐྱོབས། །ཞི་ཡང་བདུད་སྡེ་སྲེག་ལ་ཤིན་ཏུ་རྣོ། །འབར་ཡང་མི་བཟད་ནང་གི་གདུང་བ་འཕྲོག །གང་ཡང་ཕན་བདེ་ཁོ་ནའི་མཛད་པ་ཅན། །གདུལ་བཀའི་འགྲོ་ལ་ཐབས་ཀྱི་རྣམ་འཕྲུལ་མཛོད། །པདྨའི་ཆོས་གཏེར་ལ་དབང་རིག་འཛིན་རྣམས། །བརྟུལ་ཞུགས་ཉི་མ་བརྒྱ་པའི་ཟེར་རྣོན་གྱིས། །ནག་ཕྱོགས་མུན་པ་མ་ལུས་དྲུངས་ཕྱུང་སྟེ། །བཞེད་དོན་པད་ཚལ་རྒྱས་པར་བྱིན་གྱིས་རློབས། །བདག་ཀྱང་ཁྱོད་ཀྱི་ཏིང་འཛིན་བདེ་རུམ་དུ། །ཡོན་ཏན་ལུས་ཟུངས་རྣམ་པར་རྒྱས་བྱས་ནས། །རིང་པོར་མི་ཐོགས་སྟོབས་བཅུའི་རྩལ་རྫོགས་ཏེ། །ལུས་ཅན་སྡུག་བསྔལ་མཚོ་ལས་སྒྲོལ་བར་ཤོག །བླ་མ་རྗེ་བཙུན་སྒྲོལ་མ་ལ་བསྟོད་ཅིང་གསོལ་བ་འདེབས་པའི་ཚིགས་སུ་བཅད་པ་མཆོག་གསུམ་རྣམ་པར་རྒྱལ་བའི་རྔ་སྒྲ་ཞེས་བྱ་བ་འཇིགས་མེད་བསྟན་པའི་ཉི་མས་ཆུ་བྱི་དབྱུག་ཟླའི་ཉེར་ལྔ་ལ་བྲིས་པ་དགེ་བར་གྱུར་ཅིག། ༈ །།ན་མ་ཨཱརྱ་ཏཱ་རེ། །སྒྲོལ་མའི་ཕྱག་མཐིལ་པདྨོའི་གེ་སར་རྒྱན། །སྟོང་ཕྲག་ཉི་མས་མི་མཚོན་འོད་ཀྱི་གཏེར། །གསལ་རྫོགས་རྩིབས་སྟོང་འཁོར་ལོའི་རེ་ཁཱ་ཡིས། །ལོག་འདྲེན་དགའ་བའི་རྒྱལ་མཚན་བསྙིལ་གྱུར་ཅིག །རི་དྭགས་ནགས་སུ་ཡིབས་ཀྱང་རྔོན་པ་ལྡང༌། །ཉམ་ཆུང་ཐ་མལ་གནས་ཀྱང་བགེགས་ཀྱིས་འཚེ། །ཀྱེ་མ་རྡོ་རྗེ་རྣོན་པོ་ཨུཏྤལའི། །རལ་གྲིའི་འདབ་ཕྲེང་གཡོ་བའི་དུས་ལ་བབས། །ཕྱོགས་
འདིར་རྟག་ཏུ་གནས་དང་གློ་བུར་ལྷགས། །བདག་དང་འཁོར་ལ་གདུག་སེམས་སྙི་འཛུགས་ཤིང༌། །གནོད་འཚེའི་ཞགས་པ་གདེང་བའི་བགེགས་རིགས་རྣམས། །བསད་བསྐྲད་རྨོངས་རེངས་སྦྱོར་བས་ཚར་གཅོད་མཛོད། །ཞལ་གྱི་མཁའ་ལ་ཁྲོ་གཉེར་གློག་འགྱུ་ཞིང༌། །ཕྱག་ཞབས་བརྡབ་པའི་སྤྲིན་སྒྲ་མི་བཟད་པས། །ས་གསུམ་གྲུམ་པའི་མངོན་སྤྱོད་ཐོག་མདའ་ཡིས། །ནག་ཕྱོགས་རྒོལ་བའི་བྲག་རི་ཆམ་ལ་ཕོབ། །རྒྱལ་བསེན་ཀླུ་གདོན་ཁྲོ་བོའི་ན་བུན་འབྲུ། །གདུག་རྩུབ་ནུས་མཐུའི་རྩལ་ཤུགས་བྲིམ་པ་རྣམས། །འཕགས་མའི་གསང་གསུམ་ཉིན་བྱེད་འོད་རྣོན་གྱིས། །ཆུ་ཟད་དབུ་མའི་ཚོགས་ལྟར་རྙིས་གྱུར་ཅིག །སྣ་ཚོགས་ལས་ཀྱི་སྒྱུ་མའི་འཁྲུལ་འཁོར་དང༌། །སྨོན་ལོག་དམོད་པའི་དཔལ་རྣོན་བཟོད་དཀའི་ཚོགས། །དམིགས་མེད་སྙིང་རྗེ་ཁྲོས་པའི་སྡིག་མཛུབ་ཀྱིས། །བསྡིགས་ནས་ཐལ་བའི་ལྷག་མར་མཛད་གྱུར་ཅིག །རྟེན་འབྱུང་འཁྲུལ་པའི་འདྲེར་སྣང་རྫུན་པོ་ཆེས། །འཇིགས་ཞུམ་རྟོག་པའི་ཆོ་འཕྲུལ་ཆེར་སློང་ཚེ། །མཚོན་ཆེན་ཕཊ་ཀྱི་དེ་ཉིད་རལ་གྲི་ཡིས། །སྤྲོས་བྲལ་དབྱིངས་སུ་ཆོད་ཅིག་རྗེ་བཙུན་མ། །འགྱུར་རྩིས་ཐེབས་ན་ལྕགས་ཀྱང་དག་པའི་གསེར། །སྔགས་ཀྱིས་བསྒྱུར་ན་དུག་ཀྱང་བདུད་རྩི་མཆོག །དེ་ལྟར་རྡུལ་བྲལ་འཕགས་མའི་ཡེ་ཤེས་དབྱིངས། །ལོག་འདྲེན་མཚན་མའི་དངོས་ཀུན་རོ་གཅིག་མཛད། །བདག་ཅག་བློ་རྩིང་རྨོངས་པའི་མུན་རུམ་ནང༌། །སྣ་ཚོགས་བག་
མེད་སྤྱོད་པའི་རྡོ་འཕངས་པ། །ས་བདག་ལྷ་ཀླུའི་ཐུགས་ལ་ཕོག་སྲིད་ན། །འཕགས་མའི་བྱམས་ཆེན་སྨན་གྱིས་སོས་གྱུར་ཅིག །མདོར་ན་དེང་ནས་སྲིད་པའི་རྒྱུད་ཀུན་ཏུ། །ཡུམ་གཅིག་སྐྱབས་སྦྱིན་ཕྱག་རྒྱའི་སྲུང་གུར་འོག །མཆོག་སྦྱིན་ཡོངས་འདུའི་འབྱོར་བས་ཉེར་འཚོ་ཞིང༌། །རྒྱལ་བསྟན་སྲུང་ལ་མཐུ་དང་ལྡན་པར་ཤོག། ༈ །།ན་མོ་གུ་རུ་པདྨ་ཀ་ར་ཡེ། །གང་གི་འགྱུར་མེད་ཡེ་ཤེས་བདེན་གཉིས་ཞལ། །མཁའ་ཁྱབ་འགྲོ་བ་སྒྲོལ་བའི་ཕྲིན་ལས་སྟོབས། །གཅིག་བསྡུས་བདེ་ཆེན་དབང་མོའི་སྐུར་སྣང་བ། །དཔལ་ལྡན་བླ་མའི་ཞབས་རྡུལ་སྤྱི་བོས་མཆོད། །རྒྱལ་བ་ཀུན་གྱི་ཐུགས་རྗེའི་མེ་ཏོག་ནི། །ཕྲིན་ལས་འདབ་བརྒྱ་ལྡན་པའི་སྔགས་ཀྱི་གཟུགས། །སྐྱོབ་པ་འཇིག་རྟེན་དབང་པོའི་སྤྱན་ཆབ་ལས། །སྟོན་དུས་པདྨའི་དཔལ་ལྟར་བཞད་ཅིང་འཁྲུངས། །དེ་ནི་སངས་རྒྱས་ཞིང་མང་རྒྱ་མཚོ་ན། །སྒྲོལ་མ་ཞེས་བྱར་གྲགས་པའི་དྲི་བསུང་བཅས། །མཁས་པའི་བུང་བ་དགའ་སྐྱེད་དངོས་གྲུབ་ཀྱི། །སྦྲང་རྩིའི་འབྱུང་གནས་གཅིག་པུར་རྒྱལ་རྣམས་གསུངས། །མཛེས་སྡུག་ཕུང་པོ་དེ་ལ་ཡེ་ཤེས་ཀྱི། །སྙིང་པོ་གྲངས་མེད་སྤྲུལ་པའི་ས་བོན་མཛོད། །ཤེས་རབ་ཕར་ཕྱིན་ཞིབ་མོའི་རྡུལ་འདུས་པ། །ཏིང་འཛིན་གོང་བུ་གཅིག་ཏུ་གྱུར་པ་ཡོད། །དེ་ལས་སྐད་ཅིག་རེར་ཡང་སྔགས་པ་ཡི། །དངོས་གྲུབ་དོན་བྱེད་བུམ་པ་བཟང་པོ་ལྟའི། །བུད་མེད་སྒྱུ་འཕྲུལ་རི་རབ་རྡུལ་ཕྲན་སྙེད། །
རྣམ་པར་སྣང་མཛད་ཞིང་གི་རྒྱན་དུ་འབྱུང༌། །རེ་ཞིག་ཅིག་ན་རྨོངས་པ་འདུས་པ་ཡི། །མུན་པའི་གླིང་འདིར་དམ་ཆོས་འོད་མཛད་ཕྱིར། །ཏོང་ཀུན་རྒྱལ་པོའི་ཁབ་ཏུ་ལྷ་ཅིག་ནི། །ཆུ་ཡི་པདྨ་ཞེས་བྱའི་རྣམ་འཕྲུལ་བསྟན། །དེ་ཡི་ཐབས་མཁས་སྤྱོད་པའི་ཤིང་རྟ་ཆེས། ། རྒྱལ་པོ་སྤྲུལ་པའི་གཟུགས་བརྙན་གྱི། །ཟོལ་ལ་བརྟེན་ནས་མངོན་སུམ་སྤྱན་དྲངས་ཏེ། །བསིལ་ལྗོངས་མཐའ་དག་འོད་ཀྱིས་སྣང་བར་མཛད། །སླར་ཡང་གསང་ཆེན་ཐེག་པའི་རྩེ་དགའ་ཡིས། །བོད་ཁམས་རིག་འཛིན་ཞིང་དུ་བསྒྲུབ་བྱའི་ཕྱིར། །གཡོ་རུ་སྦྲགས་མདར་མཁར་ཆེན་རྒྱལ་རིགས་སུ། །སྐྱེ་བའི་མྱུ་གུ་ལང་ཚོས་དུད་པ་བཟུང༌། །འཇིག་རྟེན་སྒྲོལ་མ་བྱོན་པ་ལེགས་སོ་ཞེས། །ས་ཡི་ལྷ་མོས་མཆོད་ཡོན་སྟོབ་པ་བཞིན། །ཡན་ལག་བརྒྱད་ལྡན་བདུད་རྩིའི་མཚོ་བྱུང་བས། །མཚོ་རྒྱལ་ཞེས་གྲགས་སྙན་པའི་བ་དན་མཐོ། །རིན་ཆེན་གཏེར་ཁ་ལྷ་མིག་ལྡན་པས་རྙེད། །ལྷ་རྫས་ལོངས་སྤྱོད་ལྷ་ཡུལ་བ་ལས་འབྱུང༌། །ཨུཏྤལ་མིག་ཡངས་མཆོག་དེའང་ཁྲི་སྲོང་རྗེས། །འཇམ་དབྱངས་ཕྱག་ན་ཨུཏྤལ་ལ་བཞིན་བརྙེས། །དེ་མཐུས་རྒྱལ་པོའི་སྐུ་ཚེ་མངའ་ཐང་རྣམས། །རྒྱ་མཚོ་ཆུས་གང་བཞིན་དུ་རྒྱས་གྱུར་ཅིང༌། །བོད་འབངས་མཐའ་དག་རྡོ་རྗེ་རྣལ་འབྱོར་མའི། །བདེ་ཆེན་སྙིང་རྗེའི་མངའ་རིས་གཅིག་པུར་གྱུར། །རྗེ་རྒྱལ་བཙན་པོས་བླ་མ་བདེ་བ་ཆེ། །ཕུལ་བྱུང་འབྱོར་པ་རྒྱ་མཚོས་བསྙེན་བཀུར་ཚེ། །
ཕྱོགས་འདིར་ཐེག་མཆོག་རྒྱས་པའི་རྟེན་འབྱུང་སླད། །འདི་ཡང་བླ་མེད་གསང་བའི་མཆོད་པ་འབུལ། །བསྔགས་འོས་རིགས་ཀྱི་ཚངས་པའི་རལ་པ་བརྒྱུད། ཁྲི་སྲོང་མ་དྲོས་མཚོ་ལ་གཡས་སུ་བསྐོར། །གསུང་མཆོག་པདྨའི་རྒྱ་མཚོར་གཅིག་ཏུ་འདྲེས། །གངྒཱའི་དཔལ་མོ་གཉིས་པར་མཚོན་མིན་ནམ། །པདྨའི་རིགས་ཡུམ་ཞི་ཁྲོ་དབྱེར་མེད་ཀྱང༌། །ཐུན་མོང་ངོར་བྱས་ཏི་སྒྲོ་བྲག་སོགས་སུ། །རྡོ་རྗེ་ཕག་མོའི་དབང་དང་རིམ་གཉིས་ལ། །སྦྱངས་པས་དངོས་གྲུབ་རྒྱ་མཚོའི་ཕ་རོལ་གཤེགས། །དེ་ནས་རྟ་ཕག་བདེ་བའི་མེ་ཆེན་གྱིས། །བརྟན་གཡོའི་འཇིག་རྟེན་གསེར་བསྲེགས་བཞིན་དུ་སྦྱངས། །ས་ཀུན་རྡོ་རྗེའི་གནས་ཀྱི་དཔའ་བོ་དང༌། །རྣལ་འབྱོར་མ་ཚོགས་སྤྱོད་པའི་ཞིང་དུ་བསྒྱུར། །མི་དང་མི་མིན་འགྲོ་བའི་ཚོགས་མང་རྣམས། །ཧེ་རུ་ཀ་དཔལ་རིགས་སུ་སྨིན་མཛད་ཅིང༌། །དཀོན་མཆོག་གསུམ་ལ་གནོད་བྱེད་གདུག་པ་རྣམས། །རྣམ་ཐར་སྒོ་གསུམ་དབྱིངས་སུ་ཕུར་བུས་བཏབ། །སྔ་ཕྱིའི་གདུལ་བྱ་སྣ་ཚོགས་ལ་བརྩེ་བས། །མཚོ་སྐྱེས་སྤྱན་སྔར་རྒྱུད་ལུང་མན་ངག་གི༌།ཆོས་ཚུལ་མཐའ་ཡས་བཤད་པར་གསོལ་བཏབ་ཅིང༌། །ཉན་བཤད་དྲི་ཞུས་བཀའ་ཡི་བསྡུ་བ་མཛད། ཁྱད་པར་མ་འོངས་འགྲོ་བའི་དོན་སླད་དུ། །ཆོས་ནོར་དམ་རྫས་གཏེར་ཁ་དཔག་མེད་སྦས། །མཁའ་འགྲོ་དམ་ཅན་ཚོགས་ལ་གཉེར་བྱང་གཏད། །བསྟན་ཞབས་
གཏེར་གྱིས་སྐྱོང་བའི་སྨོན་ལམ་བཏབ། །སྐད་ཅིག་བསྐལ་བར་མཉམ་པའི་དབང་འབྱོར་མཐུས། །འཛམ་གླིང་བྱེ་བ་ཕྲག་བརྒྱའི་བོད་དང་ནི། །དེ་སྙེད་བོད་ཆེན་རྣམས་སུའང་ཚུལ་འདི་ཡིས། །བསམ་གྱིས་མི་ཁྱབ་ཕྲིན་ལས་མཉམ་དུ་མཛད། །ལྗོངས་འདི་བཀའ་དྲིན་ཆེན་པོ་རྗེས་བསྐྱངས་ནས། །བློ་དམན་སྐྱེ་བོས་བརྙས་པ་སྤོང་ཕྱིར་དང༌། །སྐལ་ལྡན་མི་རྣམས་མཐོང་ལ་འདུན་ཕྱིར་དང༌། །རྗེས་འཇུག་རིག་འཛིན་སྒྲུབ་ལ་སྤྲོ་བའི་ཕྱིར། །རགས་ལུས་འཇའ་ཚོན་ལྟ་བུའི་སྐུར་མཛད་ནས། །འཆི་མེད་ལམ་སྲང་མཐོན་པོར་རབ་འཕགས་ཏེ། །ཕྱིར་ཞིང་ལྔ་བདོར་སྐྱེས་པའི་ཉམ་ཐག་འགྲོར། །ཐུགས་རྗེའི་སྤྱན་རས་ཆགས་བཞིན་རིང་དུ་བཞུད། །དེ་ནས་ལངྐའི་ཡུལ་གྱི་གཙུག་ཏོར་རྩེར། །གྲངས་མེད་རིག་འཛིན་མཁའ་འགྲོའི་ཚོགས་དབུས་སུ། །མི་ཟད་ལྷན་སྐྱེས་བདེ་བའི་ཆང་གསོལ་ཞིང༌། །པདྨ་བཛྲ་མཆོད་ལ་བརྩོན་པས་བཞུགས། །འདི་ནི་རིས་བྲལ་སྔགས་པའི་ཕུན་ཚོགས་གཞི། །ས་གསུམ་གསང་སྔགས་འབྱུང་བའི་རིན་ཆེན་གཅིག །གླིང་བཞིར་ལོ་ཏོག་ཁྱད་པར་སྨིན་བྱེད་ཅིང༌། །སྣང་བའི་མཆོག་སྦྱིན་ཉི་མ་གཅིག་པུས་ནུས། །ཤེར་ཕྱིན་སྙིང་པོའི་མན་ངག་བདུད་གཅོད་ཀྱིས། །གཞན་ཕན་ཆེར་སྤྱོད་གཡེ་ཡི་ལབ་སྒྲོན་སོགས། །ཕྱི་མའི་དུས་ཀྱང་བསིལ་ལྡན་འཛིན་ན་འདིར། །རྗེས་དྲན་སྒོ་མང་བྱིན་གྱིས་བརླབས་པ་ཡིན། །
ཉི་མ་འོད་ཟེར་སྤང་སྟོན་ཆོས་དབང་སོགས། །ཚངས་པའི་མེ་ཏོག་སྐྱེས་རབས་ཕྲེང་བ་ཀུན། །སེམས་ཅན་འདུལ་བའི་ཕྲིན་ལས་གྲོགས་མཛད་ཕྱིར། །སྣ་ཚོགས་གཟུགས་ཀྱིས་དུས་བཞིར་ཉེ་བར་གནས། །གང་ཕྱིར་ཐོག་མེད་ནས་བསྒྲུབས་སྨོན་ལམ་དང༌། །ཐབས་ཤེས་བདེ་བའི་དམ་ཚིག་གིས་བསྡམས་ཤིང༌། །ཆོས་དང་ལོངས་སྤྱོད་རྫོགས་སྐུ་གཅིག་པའི་ཕྱིར། །ལྷན་ཅིག་ཙན་དན་ཤིང་དང་དྲི་བཞིན་འབྱུང༌། །དུས་ཀྱི་མཐར་ཡང་རིག་འཛིན་འཇིགས་མེད་གླིང༌། །དབེན་པར་མཆོག་གི་རྣལ་འབྱོར་པ་བཞུགས་ཚེ། །འོད་གསལ་གཉིད་ཀྱི་རང་སྣང་མཆོད་རྟེན་དྲུང༌། །སྙིང་ཐིག་གསང་བའི་ཆོས་མཛོད་མངོན་དུ་གཏད། །སླར་ཡང་པདྨ་འོད་ཀྱི་ཕོ་བྲང་ཆེར། །རིག་འཛིན་བླ་མ་མཁའ་འགྲོའི་འཁོར་ཚོགས་བཅས། །དཔང་དུ་བཀོད་ནས་བརྡ་ཡི་ཐབས་འཕྲུལ་གྱིས། །ས་སྟེང་ཆོས་ཀྱི་རྒྱལ་སྲིད་བྱེད་པར་གནང༌། ཁྱད་པར་སྒྲགས་མདའ་མཚོ་རྒྱལ་བླ་མཚོ་རུ། །བུང་བའི་གཟུགས་ཅན་མཁའ་འགྲོའི་གདངས་སྙན་གླུས། །སྣང་སེམས་བདེ་བ་ཆེན་པོར་མྱོས་པ་ལས། །ངེས་དོན་ནང་གི་མཁའ་སྤྱོད་གསལ་བར་གཟིགས། །དེ་ཚེ་རབ་འབར་ཆགས་པའི་ཁ་དོག་ཅན། །ལྷན་སྐྱེས་བདེ་བའི་ན་ཚོད་དར་བབས་ཤིང༌། །ཀུན་རྟོག་བག་ཆགས་བཅས་པའི་གཡོགས་པ་སྤངས། །རྡོ་རྗེའི་ཕར་ཕྱིན་མང་པོས་ལེགས་པར་བརྒྱན། །བདེ་བའི་རོལ་མོ་སྟོང་པ་སྒྲོགས་པའི་
སྒྲས། །མ་ལུས་དེ་བཞིན་གཤེགས་རྣམས་བསྐུལ་བྱེད་ཅིང༌། །ཤེས་རབ་མཚོན་ཆས་གཟུང་འཛིན་འཁྲུལ་པ་གཅོད། །སྲིད་ཞིར་མི་གནས་འགྲོ་བའི་དོན་ཕྱོགས་པའི། །བླ་མེད་རྒྱུད་དོན་སྙིང་པོ་བདེ་ཆེན་ལམ། །ཡིད་འཕྲོག་རིག་འཛིན་རྒྱལ་མོའི་གཟུགས་གྱུར་པ། །དཔལ་ལྡན་ཁྲག་འཐུང་དཔྱིད་ཀྱི་དགའ་བའི་གཉེན། །རྒྱ་ཆེན་ཆུ་སྐྱེས་རིགས་ཀྱི་ཐིག་ལེ་དེ། །གཏིང་མཐའ་བྲལ་བའི་ཆོས་དབྱིངས་ཆུ་གཏེར་ལས། །མེ་ཆེན་ཕུང་པོ་གར་བྱེད་བཞིན་དུ་བཞེངས། །སྤྲོས་པའི་སྣང་བ་ནུབ་པའི་མཚན་མོ་རུ། །སྟོང་ཕྲག་ཉི་མའི་སྣང་བ་སྤྲོ་བཞིན་བཞུགས། །ཡེ་ཤེས་ལང་ཚོས་སྐུ་ཡི་བདེ་བ་བསྐྱེད། །ཆོས་ཉིད་རང་སྒྲས་གསུང་གི་ནུས་པ་སྤར། །དགོངས་ཀློང་མཉམ་སྦྱར་རིག་པའི་རྩལ་དབང་རྫོགས། །ཕྱི་ནང་གཞན་གསུམ་ཐིག་ལེའི་དབྱིངས་གཅིག་བསྲེས། །རྡོ་རྗེ་བཙུན་མོའི་དབང་དང་བསྐྱེད་རྫོགས་ལ། །བརྟེན་ནས་དངོས་གྲུབ་རྣམ་གཉིས་སྒྲུབ་པའི་ཚུལ། །ཚང་ལ་གནད་འདྲིལ་ནུས་པ་ཕུལ་བྱུང་བའི། །གདམ་ངག་བདུད་རྩིའི་བུམ་བཟང་གསར་པའང་བྱིན། །དེ་ནས་ཆེད་དུ་བརྗོད་པའི་མེ་ཏོག་ཆར། །ལུང་བསྟན་སྭ་སྟིའི་གླུ་དབྱངས་དང་བཅས་པས། །མཆོག་བདེའི་མཛའ་བ་མི་ཕྱེད་གྲུབ་པའི་རྒྱུན། །བརྒྱུད་འཛིན་ཕྲེང་བར་འཇུག་པའི་དགེ་མཚན་སྤེལ། ཁོ་མོ་ཆོས་དབྱིངས་ཟབ་མོའི་ཕུག་ཏུ་གནས། །དེ་ལས་འདིར་འོངས་འགྲོ་དང་འོང་བ་མེད། །ཉི་འོད་ལི་ཁྲིས་དམར་བའི་
མཁུར་ཚོས་ཅན། །ནམ་མཁའི་ལང་ཚོ་མ་དེ་གང་ནས་འོངས། །འགྲོ་མེད་འོང་བྲལ་བརྟན་གཡོ་ཀུན་ཏུ་འགྲོ། །ཉེར་བཞིའི་གནས་བདག་གནས་མེད་སྤྱོད་ཡུལ་ཅན། །གང་ཡང་བརྟགས་དཀའ་སྒྱུ་མའི་དཔལ་མོ་བདག །རྔ་ཡབ་དཔལ་རི་སྤྲུལ་པའི་ཞིང་ནས་འོང༌། །མཐོང་དང་རྗེས་སུ་དྲན་པའི་ལུས་ཅན་གྱི། །རྩ་ཁམས་རོ་མཉམ་རྡོ་རྗེར་བྱིན་རློབ་པ། །གདན་གསུམ་སྔགས་ཀྱི་གྲོང་ཁྱེར་ཁོ་མོའི་ལུས། །དངོས་གྲུབ་རྫོགས་ལྡན་སྙིང་པོའི་དཔལ་ལ་ལྟོས། །ང་ནི་བདེ་ཆེན་རྣལ་འབྱོར་ཆུ་བོའི་མཛོད། །རྒྱལ་རྣམས་བདེ་ཆེན་རྒྱ་མཚོ་བསྲུབ་ལས་བསྐྱེད། །དེ་ལས་དཀོན་མཆོག་ལོ་ཏོག་ཆེར་རྒྱས་ཏེ། །ང་ལས་མ་བལྟམས་དཀོན་མཆོག་གསུམ་ཡོད་མིན། །ཤུལ་རིང་སྲིད་པའི་འབྲོག་ཏུ་མན་ངག་གི༌།སྦྱིན་གཏོང་ཁང་པ་ཕྱུག་པོ་ཉེར་བསྒྲུབས་ཏེ། །ཚུར་ཤོག་སྐུ་གསུམ་འདོད་དགུའི་མཆོག་ལོངས་ཞེས། །སྐལ་ལྡན་མགྲོན་ལ་ཁོ་མོ་སྡོད་ཅིང་མཆིས། །ཀྱེ་ཀྱེ་ཆོས་ཚུལ་བཀྐུ་ལ་ཤིང་ནི། །བདེན་བྲལ་མཛེས་མའི་འགྲམ་ཆང་གིས་འབྱེད་དེ། །དགེ་ལེགས་དེ་ཡིས་རྣལ་འབྱོར་དབང་པོའི་ཚེ། །ཟླ་ཟེར་རེག་པའི་ཀུ་མུ་ཏ་བཞིན་བྱེད། །ཅེས་གསུངས་ཚོགས་བརྒྱད་སྲིན་པོའི་ཡུལ་གླིང་རྣམས། །རྩེ་དགའི་རྣམ་འཕྲུལ་རྒྱས་པས་ཟིལ་མནན་ནས། །བརྗོད་བྲལ་ནང་དབྱིངས་ཞི་བའི་པདྨ་འོད། །དེར་ནི་འཛུམ་ཞལ་མངོན་ཕྱོགས་དགྱེས་པར་གྱུར། །དང་པོ་གཞོམ་
མེད་ན་དཱའི་སྐྱེ་གནས་པ། །བར་དུ་དམ་ཆོས་ཡི་གེའི་རྒྱུན་མང་འཇོ། །ཐ་མར་མཁའ་འགྲོའི་བརྡ་ཡིག་གོང་བུར་གྱུར། །མཐར་ཐུག་སྙིང་དབུས་མི་ཤིགས་སྤྲིན་སྒྲར་ཐིམ། །རིག་འཛིན་བླ་མ་དེ་ཡི་ཟླ་བའི་ཞལ། །བསམ་ཡས་ཆོས་ཀྱི་ག་བུར་དོག་པ་ཅན། །ནུབ་རིར་གཟིམས་ལ་ཕྱོགས་པ་དབང་མིག་ལོར། །བརྟོད་པ་དམ་པོས་བཟུང་བའང་འདི་ཡིས་བྱས། །སྔོན་བྱུང་མཁའ་སྤྱོད་བསྒྲུབ་པའི་གཏེར་བརྒྱུད་ཀྱི། །ལམ་སྲོལ་ཕལ་ཆེར་ནུབ་ཅིང་འཆལ་བ་ན། །མྱུར་བདེའི་ལམ་བཟང་འདི་ཉིད་འཛིན་པ་བརྒྱས། །དྷུ་མ་ཐི་རའི་སྐལ་བཟང་རྒྱས་པར་བྱས། །ལྷ་དང་ལྷ་མིན་གྲུབ་པའི་རིག་སྔགས་འཆང༌། །དཔག་མེད་མཁའ་འགྲོ་རྒྱ་མཚོའི་ཚོགས་རྣམས་ཀྱིས། །སྔོན་བཞིན་ཟབ་མོའི་དགོངས་གཏེར་ཡོངས་བཟུང་སྟེ། །སྐལ་ལྡན་རྣམས་ལ་རྒྱུན་དུ་སྣང་བར་ཤོག །སྐྱེ་བ་ཀུན་ཏུ་པད་འབྱུང་རྒྱལ་བ་དང༌། །ཡུམ་གཅིག་རྣལ་འབྱོར་མ་ཡི་ཞབས་བསྟེན་ཅིང༌། །དམ་ཚིག་མི་ཉམས་གསང་སྔགས་སྙིང་པོའི་གནད། །རྙེད་ནས་རྩེ་གཅིག་སྒྲུབ་ལ་བརྩོན་པར་ཤོག །སངས་རྒྱས་འབྱུང་བ་ལས་ཀྱང་རྙེད་དཀའ་བའི། །འོད་གསལ་སྙིང་པོའི་ལམ་མཆོག་མ་ནོར་བ། །དུས་རྣམས་ཀུན་ཏུ་ཕྱོགས་བཅུར་རྒྱས་བྱེད་ཅིང༌། །གོ་འཕང་བླ་མེད་འགྲོ་ལ་སྦྱིན་པར་ཤོག །སྟོང་ཆེན་དབྱིངས་སུ་རང་བྱུང་རིག་པའི་སྐུ། ཁྱད་ཆོས་དྲུག་གིས་མངོན་པར་བྱང་ཆུབ་སྟེ། །
སྲིད་ཞིའི་འཁོར་ལོ་མཉམ་པར་སྡོམ་བྱེད་པའི། །ཀུན་ཏུ་བཟང་མོ་ཚེ་འདིར་འགྲུབ་པར་ཤོག །མཁའ་འགྲོ་བདེ་ཆེན་རྒྱལ་མོའི་ལོ་རྒྱུས་དང་འབྲེལ་བའི་ཚིགས་སུ་བཅད་པ་དཔའ་བོའི་ཡིད་འཛིན་ཞེས་བྱ་བ་སྡོམ་བརྩོན་མཁས་དབང་དམ་པ་འཇིགས་མེད་འོད་གསལ་གྱིས་ཡང་ཡང་བསྐུལ་བའི་ངོར། འཇིགས་མེད་བསྟན་པའི་ཉི་མས་བྲིས་པ་འགྲོ་ཀུན་ཡེ་ཤེས་མཁའ་འགྲོས་རྗེས་སུ་འཛིན་པའི་རྒྱུར་གྱུར་ཅིག །དེ་ནས་ཆེད་དུ་བརྗོད་པའི་སོགས་ཤོ་ལོ་ཀ་བརྒྱད་པོ་སླད་ནས་རང་ཉིད་ཀྱིས་བསྣན་པ་དགེ། ༈ །།ན་མ་ཛྙཱ་ན་ཙཎྜ་ལི་ཡེ། །རབ་དམར་ཉི་མ་སྟོང་ཕྲག་བཞུས་པའི་རྡུལ། །འཇིགས་ཆེན་དུས་ཀྱི་ཞུགས་དང་འདྲེས་པ་བཞིན། །ས་གསུམ་མ་ལུས་བཟོད་དཀའི་གཟི་བརྗིད་ཀྱིས། །ཟིལ་གནོན་མཁའ་འགྲོའི་ཚོགས་རྗེ་རབ་གཏུམ་མ། །དག་ཅིང་བྱ་ལྟར་དྭངས་པ་འོད་བརྒྱའི་དབྱིག །མཐོང་བས་བདེ་ཆེན་དབྱིངས་སུ་ཡིད་འགུགས་པའི། །སྐུ་འདི་ལྷན་སྐྱེས་དཔལ་མོ་ཁྱོད་མིན་པ། །དྲེགས་ལྡན་སྒྱུ་མ་ཕལ་ལ་ཅི་སྟེ་ཡོད། །ཇི་ལྟར་སོས་ཀའི་རྒྱལ་མོའི་དུས་ཀྱི་མདངས། །མེ་ཏོག་རྒྱས་པའི་ནགས་ཀླུང་ཤར་བ་བཞིན། །བདེ་ཆེན་སྒྱུ་མ་མུ་མཐའ་མེད་པའི་མདངས། །ཕུན་ཚོགས་གཟུགས་སྐུའི་དཀྱིལ་འཁོར་འདི་ན་སྣང༌། །ཀྱེ་མ་འཇིག་རྟེན་ཡིད་འཕྲོག་དངོས་དགུ་ཀུན། །གསར་དུ་རང་ཐབ་ཤོར་བ་བཞིན་འབྱིང་བའི། །འོད་འབར་
པདྨོ་ཉི་ཟླའི་དཀྱིལ་འཁོར་གང༌། །གནོད་པའི་ཞབས་སེན་དེ་དག་དཔལ་དང་ལྡན། །དགེ་ལེགས་མཚན་མ་སྟོང་གིས་རབ་སྤ་བ། །དྲན་པས་འཇིགས་ཀུན་འཕྲོགས་པའི་ཞབས་དྲུང་འདིར། །ནོར་བུའི་ཐོར་ཚུགས་གཡོ་བའི་རིག་འཛིན་བརྒྱས། །བཏུད་ཀྱང་ངོ་མཚར་གཞན་ལྟ་ག་ལ་ཡོད། །སྨོན་དང་ནོར་བུའི་ཁྱད་པར་བརྒྱ་སྟོང་གིས། །མ་འཕྲོག་འཇིག་རྟེན་འབིག་བྱེད་འཆི་བའི་དུག །ཞབས་སེན་མེ་ཏོག་རྡུལ་གྱིས་བསྣུན་མ་ཐག །ཉམས་པས་འབྲལ་རུང་ཆོས་སུ་ད་གདོད་རྟོགས། །འདོད་མེ་འབར་བའི་ན་ཆུང་ཡན་ལག་ན། །རྒྱན་རྣམས་སྲེད་པའི་དུག་གིས་སྐོམ་པ་བཞིན། །ཞི་བསིལ་བདུད་རྩིའི་རེག་པ་ལ་ཉལ་བ། ཁྱོད་གཅིག་ཁོ་ནའི་ཞབས་གདུབ་འདི་དག་ལགས། །ལྡེམ་ཞིང་སྒེག་པ་རྨ་བྱ་མྱོས་པའི་འགྲོས། །འོག་པག་ངང་པའི་སྒྲ་སྙན་འཁྲོལ་བ་དང༌། །ལྷན་ཅིག་དཔའ་མོའི་དབུས་ནས་བསྐྱོད་པའི་ཚེ། །རྗེས་ཆགས་ངོ་མཚར་གཉིས་པ་སྙིང་ལ་འཕོ། །རྡོ་རྗེ་ལྟ་བུར་ཟླུམ་ཞིང་ཕྲ་བ་ཡི། །སྐེད་སྐབས་ལྕུག་ཕྲན་བཞིན་དུ་འགྱུར་བ་ན། །འབུམ་ཕྲག་དཔའ་བོའི་ཡིད་ཀྱང་ཤིག་ཤིག་ཏུ། །འགུལ་བ་རྟེན་འབྲེལ་ཆོས་ཉིད་མིན་ན་ཅི། །ནུ་བུམ་འབུར་བ་ལྷག་པའི་ཆོས་ཅན་དང༌། །དཀུ་སྐབས་ཞུམ་པ་མ་ཚང་སྐྱོན་ལྡན་མིན། །མཐོ་དང་དམའ་བའི་དབྱིབས་ཀྱི་ཁྱད་པར་ཀུན། །སྐུ་འདིའི་ནང་ན་རོལ་རྩེད་འགྲན་པ་འདྲ། །འོ་འཛིན་རྒྱས་པ་
ཟླ་བ་ལྟ་བུ་དང༌། །མཁྲེགས་ཤིང་མཐོ་བ་བུམ་པ་བཟང་འདྲ་དང༌། །གཞོན་ཞིང་འཇམ་པ་མེ་ཏོག་ཁ་བུས་ལྟའི། །གཟུགས་འདིས་ཇི་ལྟ་བུར་ན་མི་མཛེས་ལགས། །ཆུ་སྤྲིན་འཕྱུར་བའི་རླབས་དང་ནུ་འབུར་ནི། །ཟླུམ་པོ་འདི་དག་རེ་ལྡན་ཞིང་པ་དང༌། །རིག་འཛིན་དགའ་བ་སྐྱེད་ལ་མཚུངས་མོད་ཀྱི། །བདེ་ཆེན་སྦྱིན་པའི་ནུས་པ་སྤྲིན་ལ་མེད། །གང་གིས་མགུལ་ནས་བཅིངས་པས་གཞན་སེམས་ཀྱི། །འཆིང་བ་མཐའ་དག་ངེས་པར་ཟད་བྱས་ནས། །སླར་ཞིང་ཡོན་ཏན་ཁྱུད་མོ་བརྒྱད་འཆིང་བ། །ཕྱག་འདི་ཡ་མཚན་ལས་ཀྱང་ཕུལ་བྱུང་ལགས། །ལྷན་ཅིག་སྐྱེས་པའི་དེ་ཉིད་མི་ཤེས་པར། །སྒེག་མོའི་མཛའ་བ་ལ་ཆགས་སྙན་དངགས་མཁན། །ན་ཆུང་ལག་པ་པདྨ་ལྟར་བསྔགས་ཀྱང༌། །ཡིད་ཀྱི་འཆིང་བ་དེ་ལ་དེ་མི་འཚམས། །དངོས་གྲུབ་དགའ་བ་འདོད་པའི་ན་ལུང་དུ། །གང་མཚན་དབང་གི་ལྷ་མོར་སྙན་པའི་བཅུད། །ཀྱོ་བའི་ཟོལ་གྱིས་མིག་སྔར་བབས་པ་ཡང༌། །ཕྱག་རྩེར་ཨ་མྲ་བཞིན་དུ་སྨིན་ནས་ཡོད། །དབང་ཆེན་པདྨའི་ལྕགས་ཀྱུ་འདི་གདེངས་པས། །ལྷུན་པོ་རལ་ཞིང་རྒྱ་མཚོ་གཏིང་ནས་འཁྲུགས། །བརྟན་དང་གཡོ་བའི་དངོས་ཀུན་རང་རང་ཚུགས། །ཞི་གནས་ཁབ་ལེན་ཉེ་བའི་ལྕགས་ལྟར་གདའ། །གུག་ཅིང་རྣོ་བ་ལྕགས་ཀྱུའི་མཚོན་འདི་ནི། །དབང་གི་སྙེམས་པས་བསྒྱིངས་ཤིང་འཕྱར་བ་སྟེ། །སྟོང་ཕྲག་དགེ་
མཚན་འཁྱིལ་བའི་བུམ་བཟང་འདིས། །སྙེམས་པའི་རྒྱུ་མཚན་དེ་དག་འཆད་པ་འདྲ། །འཆི་བ་གཏོར་ཞིང་ཚེ་ཡི་རྒྱུན་འབེབས་པ། །ཨ་བྷི་ཥིཉྩའི་བྱིན་རླབས་ཟ་མ་ཏོག །བཀུར་ནས་འཆི་མེད་འདོད་པ་སུ་ཡོད་ཅེས། །འཇིག་རྟེན་ཀུན་ཏུ་ཡིད་ཀྱི་ཤུགས་ཀྱིས་འཇུག །སྙིང་རྗེའི་དཔལ་མོ་དུས་གསུམ་དུས་མེད་པར། །རྗེས་འཛིན་དཀའ་བ་མཛད་མ་ཁྱོད་བཞུགས་ཀྱང༌། །སྒོམ་དང་བཟླས་པའི་སློང་མོ་མི་ནུས་པར། །འཆི་བཞིན་རང་མལ་ཉལ་རྣམས་ཀྱེ་མའོ་སྨད། །དཔའ་བོའི་སེན་རྟགས་བཏབས་པའི་ནུ་འཁོར་དང༌། །འཛུམ་གསུམ་རི་མོས་སྒེག་པའི་མགུལ་པ་དང༌། །བིམ་པའི་དམར་བ་ལ་འཕྱ་ཞལ་གྱི་སྒྲོས། །འབུས་དང་ཕྱེ་བའི་འཚལ་ལྟར་སོ་སོར་མཛེས། །རྒྱུད་དོན་ཚིག་རེར་རྫོགས་པ་རྡོ་རྗེའི་གླུ། །སྒྲ་དབྱངས་རྒྱ་མཚོའི་རྒྱུད་དུ་བླངས་པ་ན། །དབྱངས་སྙན་དྲི་ཟ་མོ་རྣམས་པི་ཝཾ་ཡང༌། །རང་རང་གནས་སུ་བག་ལ་ཞ་བར་ཟད། །རྣལ་འབྱོར་ནུས་པ་བ་ཀུ་ལ་ཡི་ཁམས། །དངོས་གྲུབ་མེ་ཏོག་ཕུང་པོ་བག་ལ་ཉལ། །གསང་སྔགས་སྒེག་མོའི་འགྲམ་ཆང་གིས་བྲན་པས། །ལས་དང་ཡེ་ཤེས་གྲུབ་པའི་གནས་སྐབས་རྫོགས། །མཚར་སྡུག་ཚེམས་དཀར་འོད་དང་དབྱངས་བདུན་གླུ། །ཨུཏྤལ་པདྨོའི་དྲི་དང་སྦྲང་རྩིའི་རོ། །མངོན་པར་དགའ་བའི་ཕུན་ཚོགས་འབྱོར་པ་ཀུན། །འཛུམ་ཁྲོའི་ཞལ་འདིར་དུས་གཅིག་འོང་བ་སྙམ། །གཞོན་ཤ་རྒྱས་པའི་མཁུར་ཚོས་ཐིག་ལེ་ནི། །རྣ་རྒྱན་ནོར་བུའི་འོད་ཀྱིས་རབ་སྣུམ་པ། །རྩེ་དགས་འགྱིང་བས་ཕན་ཚུན་ཞལ་གཟིགས་
ན། །མཚམས་སྤྲིན་འཇིངས་སུ་གློག་དམར་འཁྱུག་པ་བཞིན། །ལྟག་འོག་སུམ་ཆ་འདས་པའི་ཞལ་རས་དབུས། །རན་པར་མཐོ་བའི་ཤངས་ཀྱི་དབྱིབས་ལེགས་པ། །རིགས་ཀྱི་མཛེས་པའི་ཁྱད་ནོར་སྲུང་བཞིན་དུ། །མཚན་དཔེའི་རིགས་གཞན་ལ་ཡང་མཛེས་པ་སྐྱེད། །དྭངས་གསལ་དཀར་ནག་ཕྱེས་པ་པདྨའི་མིག །དབང་པོའི་གཞུ་ལྷར་འཁྱོགས་པའི་སྨིན་མ་ཅན། ཁྱོད་ཀྱི་མཁྱེན་རབ་འདི་དང་མིག་འདིའི་མདུན། །ཆོས་ཀུན་རང་གི་གསང་ཚིག་འཆད་པ་ལྟ། །དགྱེས་མཛེས་ཞལ་འདིར་གངྒཱའི་རྡུལ་སྙེད་ཀྱི། །དཔའ་བོའི་མིག་རྣམས་བསམ་གཏན་བྱེད་པའི་ཚེ། །ཡིད་ཙམ་ཟུར་མིག་བབས་པས་རྗེས་བཟུང་བ། །སྙིམ་པའི་སྣོད་དུ་བདུད་རྩི་ཟག་པ་འདྲ། །སྟངས་ཟིལ་དབུ་སྐྲའི་དྲི་ཞིམ་ལི་ཤིའི་རྡུལ། །རིགས་བདག་སྣང་མཐའ་ཡས་པའི་འོད་ཟེར་དང༌། །ལྷན་ཅིག་འདྲེས་པས་ཆུ་མཐོང་ཐ་གྲུ་ཀུན། །གཡང་དང་ལྡན་པའི་ཁྱིམ་བཞིན་བརྗིད་པར་མཐོང༌། །འོད་ཀྱི་མཚན་མ་བར་སྣང་ལ་འཕྱོ་བས། །ས་འོག་གསེར་གྱི་འབྱུང་ཁུངས་ཤེས་པ་བཞིན། །པདྨ་ཅན་གྱི་ཞལ་རས་རྒྱས་པ་འདིས། །སྦས་དོན་སྣ་རྩེ་མཁའ་འགྲོ་གདོང་ཡང་ཤེས། །སེམས་ཀྱི་བུང་བ་མྱོས་བྱེད་སྦྲང་རྩི་ཅན། །འདི་ལགས་ཆ་གཞན་འདི་ཡི་ངད་ལགས་ཏེ། །ཚེ་དཔག་མེད་ཀྱང་ཁ་སྦྱོར་བདེ་བའི་སྐུས། །རྡོ་རྗེའི་གནས་འདིའི་དགའ་བ་བསྟན་པར་མཛད། །སྣ་ཡིས་སྣ་བཅིངས་རླུང་གིས་རླུང་བསྐྱོད་དེ། །ཞུགས་ཀྱིས་ཞུགས་པར་ཨ་དྭི་ཀ་དྭིའི་སྤྲིན། །རྡོ་རྗེ་ནམ་མཁའ་
སྨྲ་བསམ་བརྗོད་མེད་ཀློང༌། །འདྲེན་པའི་རེས་དོན་ལྕགས་ཀྱུ་འདི་ལགས་སོ། །གང་གི་རང་བཞིན་དཀའ་ཐུབ་བཟླས་བརྗོད་དང༌། །ཡང་དག་འཇོག་པ་ཕལ་གྱིས་ཤེས་མིན་པའི། །ཟབ་མོ་ནང་གི་མཁའ་སྤྱོད་བདེ་བ་ཆེ། །རྡོ་རྗེ་དབྱིངས་མ་འདིས་ནི་མངོན་སུམ་སྟོན། །ཟབ་དང་རྒྱ་ཆེའི་མན་ངག་གཞན་དག་གིས། །བགྲང་ཡས་བསྐལ་པའི་ཕ་མཐར་རྟོགས་བྱ་བ། །ཟུང་འཇུག་སྒྱུ་འཕྲུལ་ཉི་མ་འོད་པོ་ཆེ། །ཞལ་འདིའི་དེ་ཉིད་ཤེས་པས་ཚེ་འདིར་འགྲུབ། །སྐུ་འདིའི་ཡོན་ཏན་ཅི་ཙམ་ཟབ་པ་དང༌། །རྒྱ་ཆེ་དེ་ལྟར་དམ་པའི་བདེ་བ་ཡང༌། །ཟབ་ཅིང་རྒྱ་ཆེར་འཆར་བའི་ཚུལ་བརྗོད་ཕྱིར། །བསྟོད་པའི་སྒོ་འདི་སེའུ་བཅུའི་ངག་འདྲ་མིན། །དེ་ལྟར་རྒྱལ་ཡུམ་འཕགས་མ་ཚེ་སྦྱིན་མའི། །ཡིད་འཕྲོག་སྐུ་ཡི་ཆ་ཤས་ལ་བསྔགས་པ། །བྱིས་པས་མེ་ཏོག་གང་དགར་བརྒྱུས་འདྲ་འདི། །ཡུམ་གཅིག་རྗེས་བརྩེ་ཁོ་ནས་བདག་གིར་བཞེས། །འཆི་མེད་ཙཎྜ་ལིའི་སྐུ་རྡོ་རྗེ་གསང་བ་བསམ་གྱིས་མི་ཁྱབ་པའི་ཆ་ཤས་རགས་རིམ་ཙམ་ཞིག་ཉུང་ངུའི་ངག་གིས་བསྔགས་པ་རྡོ་རྗེ་སྒྲ་མའི་རྒྱུད་མངས་ཞེས་བྱ་བ་རྡོ་རོང་གི་གཞོན་ནུ་རིགས་པར་སྨྲ་བའི་རྒྱུད་མངས་མཁན། །འཇིགས་མེད་བསྟན་པའི་ཉི་མས་ས་གླང་ཁྲུམས་ཀྱི་ཟླ་བའི་ཡར་ཚེས་ལ་སྦྱར་བ་དགེ་ཞིང་བཀྲ་ཤིས་པར་གྱུར་ཅིག། ༈ །།སྙིང་རྗེའི་དབང་ཕྱུག་མགོན་མེད་འགྲོ་བ་རྣམས། །དབུགས་འབྱིན་བུད་མེད་སྒྱུ་འཕྲུལ་ལ་ཞུགས་ནས། །རབ་འབྱམས་ཞིང་ཀུན་མཚན་གྱི་འབྲུག་སྒྲ་ཡིས། །
འགེབས་མཛད་མྱུར་མའི་ཞབས་ལ་སྐྱབས་སུ་མཆི། །སྦྲང་རྩིའི་བརྟུལ་ཞུགས་མེ་ཏོག་བསུང་ཚོར་བཞིན། །མི་འཇིགས་བདེ་བ་དོན་གཉེར་སེམས་ཅན་ཀུན། །སྒྲོལ་མ་ཞེས་བྱའི་མཚན་ཙམ་ཐོས་པས་ཀྱང༌། །ཕུལ་བྱུང་ཞིང་ལ་རབ་དགའི་འཇུག་པ་སྐྱེ། །ཐུགས་རྗེ་ཆེན་པོའི་སྦྱར་བ་རྣམ་དག་དང༌། །རླབས་ཆེན་བསོད་ནམས་ཡེ་ཤེས་མཐུ་གྲུབ་པའི། །སྙན་པ་ཡོངས་འདུས་འདབ་ལྟར་རྒྱས་པའི་འཛུམ། །ཏཱ་རེའི་ཡི་གེར་མེ་ལོང་གཟུགས་བཞིན་ཆགས། །དེ་སླད་དབྱངས་སྙན་མཐོ་རིས་རོལ་མོས་ཀྱང༌། །ཡི་གེ་གཉིས་འདིའི་ངོ་མཚར་མི་སླེབ་ཕྱིར། །མཁས་པའི་སྨྲ་སྒོ་གཅིག་ནས་གཅིག་ཏུ་ནི། །ཡུམ་གཅིག་ཁྱོད་མཚན་ཁོ་ན་རྟག་ཏུ་འཇུག །བྱིན་རླབས་གསེར་སྦྱངས་འོད་འབར་མཚན་གྱི་ནི། །འཁོར་ལོ་འཆང་བའི་རིགས་ངན་དབུལ་པོ་བརྒྱ། །བརྒྱ་བྱིན་གཙུག་ཕུད་རིན་ཆེན་སྙེ་མའི་སྟེང༌། །རྐང་སེན་རོལ་པའི་དབང་ཕྱུག་འདོད་དགུར་འཛིན། །འོན་ཀྱང་སྟོབས་བཅུ་མངའ་བའི་མིང་ཡིག་གིས། །དྲེགས་ལྡན་གཟི་བརྗིད་འགོང་བ་ངོ་མཚར་མིན། །མཚན་ཙམ་དྲན་པས་བསྐལ་མང་མཐོང་དཀའ་བའི། །པདྨའི་ཞལ་རས་མངོན་སུམ་བལྟ་ལ་དབང༌། །རབ་གསར་སྐྲ་མཆོག་ནོར་བུའི་མྱུ་གུ་ནི། །ཤིས་བརྗོད་གདངས་སྙན་དལ་གྱིས་དགོད་པ་ཡི། །སངས་རྒྱས་འོད་ཀྱི་དཀྱིལ་འཁོར་ནང་སོན་པ། །ཆར་སྤྲིན་ནང་ནུབ་དཔལ་གྱི་རི་རྩེ་བཞིན། །གཞོན་ཞིང་མདངས་གསལ་བཅུ་གསུམ་ཟླ་བ་ལྟར། །ཤིན་ཏུ་
དབྱིབས་ལེགས་ཨུཏྤལ་མིག་ཡངས་དང༌། །རིམ་པར་འཚམས་པའི་ཤངས་སོགས་རང་བཞིན་རྒྱན། །དག་ཅིང་གཙང་བ་རྣམས་ཀྱིས་ཞལ་ཁྱིམ་མཛེས། །བིམ་པའི་ཞལ་སྒྲོས་ཕྱེ་བའི་མཐོང་སྐབས་ནས། །ཐགས་བཟང་ཚེམ་དཀར་འོད་དང་མེ་ཏོག་བསུང༌། །ལྷན་ཅིག་ཚངས་དབྱངས་བདུད་རྩིའི་སིལ་སྙན་གྱིས། །སྐྱོ་དུབ་མེད་པར་ཀུན་ཡིད་ངལ་འཚོ་སྦྱིན། །རབ་འབྱམས་བརྟན་གཡོ་གསལ་རྫོགས་རང་གི་གཟིས། །ཞིང་ཁམས་རྒྱ་མཚོའི་ཉི་ཟླ་སྤ་འགོང་ཞིང༌། །ལྷ་ཡི་ལྷ་བཞིན་ཆོས་ཀྱི་རང་སྒྲ་ཅན། །ཡིད་བཞིན་རྒྱན་ཕྲེང་མང་པོས་ལྷག་པར་སྤ། །དྲི་མེད་ལྷུན་པོའི་མཐིལ་བཞིན་ལེགས་གང་བའི། །བྲང་གི་འོས་ནི་ནུ་བུམ་མཐོ་བས་བརྒྱན། །དཔག་བསམ་ཤིང་ཏོག་ལྟ་བུར་བཟུང་བ་ཡི། །ནུ་ཏོག་བུར་བས་འདུད་རྩིའི་འཛུམ་ཟེར་འགྱེད། །ཕྱག་གཡས་འགྲོ་ལ་མཆོག་སྦྱིན་ཕྱག་རྒྱ་ཅན། །གཡོན་པས་འཇིགས་བཅས་སྐྱོབ་པའི་ཕྱག་སྟབས་མཛད། །གོས་པ་མེད་པའི་སྙིང་རྗེའི་སྤྱན་རས་ནི། །དུས་ཀུན་མི་ཟུམ་ཨུཏྤལ་མཚན་མ་འཆང༌། །ལེགས་ཚོགས་ཉེ་འཁོན་མེད་པར་འགྲེམ་མཛད་ཅིང༌། །རྒུད་པ་མཐའ་དག་ཡུད་ལ་འཕྲོག་ནུས་ཞེས། །བསྙེད་བྲལ་དཔའ་མོའི་སྟངས་སྟབས་དུས་ཀུན་ཏུ། །བསྟན་འདིས་ཐར་འདོད་ཡིད་ལ་ཅིས་མི་འཕྲོག །སྐེད་སྐབས་གཞུ་ཡི་ཆང་ཟུང་ལྟར་ཕྲ་ཞིང༌། །ཀུན་ནས་ཟླུམ་ཕྱིར་སྟོད་སྨད་མཛེས་པར་ཕྱེད། །འགྱིང་བས་ཡིད་འཕྲོག་སྐེད་ཆིངས་ཤིན་ཏུ་འཚམས། །ཟབ་ཅིང་གཡས་འཁྱིལ་ལྟེ་བ་ཟླུམ་པོར་
གནས། །སིལ་ཁྲོལ་གཡེར་ཁའི་དྲ་བ་བརྒྱ་ཕྲག་གིས། །ཞི་བའི་འགྲོས་ལ་སྙན་ངག་སྨྲ་འདྲ་བ། །རྒྱས་ཤིང་འཚམས་པའི་སྐུ་སྨད་ལྟ་ན་སྡུག །སྐྱིལ་ཀྲུང་བཅིང་བ་ཁོར་ཡུག་རི་བཞིན་བརྗིད། །དེ་ཕྱིར་ཁྱོད་སྐུ་མངོན་སུམ་མཐོང་མ་ཐག །མཛེས་སྡུག་ལྕགས་ཀྱུས་ཡིད་ནི་འདྲེན་འགྱུར་ཏེ། །དེ་ཚེ་བྱིན་རླབས་ཟབ་མོའི་སྐབས་རྙེད་པས། །ཡེ་ཤེས་ཞགས་པས་གཏན་དུ་འཆིང་བར་འགྱུར། །འདོད་པའི་དུག་ཅན་ལྷ་ཡུལ་སྒྱུ་བྱེད་མའི། །ལང་ཚོ་དོན་གཉེར་དཀའ་ཐུབ་ཆེར་སྤྱོད་ན། །བལྟ་བས་མི་ངོམས་སྲིད་ཞིའི་འཇིགས་ཕྲོག་མ། ཁྱོད་ཕྱིར་བརྟུལ་ཞུགས་སྒྲུབ་ལ་མཚར་དུ་ཅི། །དེ་ལྟའནག་རྨོངས་པའི་འཇིག་རྟེན་ཆོས་ཉིད་དང༌། ཁྱོད་ཀྱི་མཚན་ཐོས་རྙེད་དཀའ་ལ་བསམ་ཚེ། །གནས་སྐབས་ཕྱི་རོལ་འཇིགས་པས་ཡིད་སྐྲག་སྟེ། །མྱུར་མའི་མཚན་ཙམ་འཛིན་པའང་ཆེས་ངོ་མཚར། །གངྒཱའི་རྡུལ་སྙེད་མ་དག་ཞིང་རྣམས་ན། །ཕྲ་རགས་ནང་གི་འཇིགས་པས་སུན་ཕྱུངས་ནས། །བཅོམ་ལྡན་འདས་མའི་ཞབས་པད་ཡིད་བྱེད་པ། །ཡངས་པའི་ས་རྡུལ་ལས་ཀྱང་ཆེས་ཆེར་མང༌། །གང་ཚེ་དགེ་བའི་ལས་ཅན་རྣམས་ཀྱི་སྣོད། །དག་པའི་ཞིང་ན་སྨོས་ཀྱང་ཅི་འཚལ་ཏེ། །ཀྱེ་མའོ་ཐོགས་མེད་འགྲོ་འདུལ་མཐུ་སྟོབས་བདག་ཁྱོད་ཀྱི་ཕྲིན་ལས་རྒྱ་ཆེ་མཉམ་མེད་ལགས། །ལ་ལར་ཞི་མ་ཡིད་བཞིན་ཚེ་འཕེལ་མ། ཁ་ཅིག་དྲག་མོ་འཇིག་རྟེན་གསུམ་འདུལ་མ། །གཞན་དུ་མ་ངེས་འཇིགས་པའི་འཕྲང་སྒྲོལ་མ། །རྣམ་པ་སྣ་ཚོགས་སྤྲུལ་པའི་གར་མཛད་
མ། །སྐལ་བཟང་ཡིད་མིག་མངོན་སུམ་མགུ་མཛད་ཅིང༌། །ལ་ལར་གཉིད་ཀྱི་མེ་ལོང་ནང་འཇུག་དང༌། ཁ་ཅིག་མིའི་སྣང་བརྒྱུད་ནས་འདུལ་ལ་སོགས། །སྒྱུ་མའི་རྣམ་འཕྲུལ་ཆོས་དབྱིངས་ཁྱབ་པར་སྟོན། །ཆགས་ཐོགས་སྤང་བ་ཡིད་མགྱོགས་རྫུ་འཕྲུལ་གྱིས། །མོས་ལྡན་མདུན་སར་སྐད་ཅིག་ཉིད་བྱོན་ནས། །གདམས་པའི་དུས་སྟོན་གདུལ་བྱའི་དུས་བཞིན་དུ། །སྩོལ་བས་ལུང་གི་ཆོས་ཚུལ་རྒྱས་པར་མཛད། །ཀུན་ཁྱབ་དབྱིངས་དང་རོ་མཉམ་རྡོ་རྗེའི་ཐུགས། །མཁས་པའི་ཡིད་དང་ངག་གི་སྒོར་བཞུགས་ནས། །ལེགས་བཤད་ཆུ་བོའི་རླབས་ལྟར་རིང་སྤྲོ་བས། །ལུང་གི་རོལ་རྩེད་ཀུན་ནས་ཀུན་ཏུ་འཕེལ། །ཡེ་ཤེས་གཟི་བརྗིད་བསམ་མི་ཁྱབ་པའི་དཔལ། །སྙིང་ལ་ཞུགས་པས་མ་རྟོགས་ལོག་རྟོག་དང༌། །ཐེ་ཚོམ་བལ་པ་་ཛ་ལྟར་འཛིང་པའི་རྒྱ། །གཅོད་བྱེད་རིགས་པའི་མདའ་རྣོན་ཅི་ཡང་འགྱུ། །ད་ནས་གདུལ་བྱའི་ཆོས་རབ་རྣམ་འབྱེད་མདའ། །རྒྱལ་ཡུམ་མདའ་མཁན་དགེ་མ་ཁྱོད་ཀྱི་མཐུས། །འཕང་བས་གནས་མིན་གཡང་དུ་མི་ལྟུང་བར། །རྣམ་པ་ཀུན་མཁྱེན་འབེན་ལ་ཐལ་གྱིས་འཇུག །བྱིས་པའི་ཅལ་ཅོལ་སྡེབས་སྦྱོར་མི་ལེགས་ཀྱང༌། །བརྩེ་བའི་ཡུམ་ཅིག་བསྟོད་པ་དང་དུ་བཞེས། །དོན་ལ་ནོངས་རྣམས་བུ་ཡི་རྒུད་པ་རུ། །དགོངས་ནས་དེ་རྒྱུར་བཅས་ཏེ་བཟློག་པར་མཛོད། །དགེ་བས་ཚེ་རབས་ཀུན་ཏུ་རྗེ་བཙུན་མའི། །ཞབས་སེན་མེ་ཏོག་ཕྲེང་བའི་ལ་ཐོད་ཀྱིས། །ཕྱི་ནང་འཇིགས་པ་བརྒྱད་ཀྱི་ཉེར་འཚེ་ཀུན། །ཕྲོགས་
ནས་ཀུན་དགའི་དཔལ་ལ་ལོངས་སྤྱོད་ཤོག །སྙིང་ལ་འཕགས་མ་དགྱེས་པའི་འཛུམ་དཀར་འོད། །ཞུགས་པས་ཚེ་དང་ཡེ་ཤེས་དཔལ་འཕེལ་ཞིང༌། །ལེགས་བཤད་གཏན་པ་མེད་པའི་མཆོད་སྦྱིན་གྱིས། །མ་ལུས་འགྲོ་བའི་རེ་བ་སྐོང་བར་ཤོག །བདག་གི་མིང་དང་སྒོ་གསུམ་བྱ་བྱེད་ཀུན། །སེམས་ཅན་ཉམ་ཐག་སྲིད་པའི་རྒྱ་མཚོ་ལས། །སྒྲོལ་བའི་གྲུ་སྟེགས་དཔལ་མོ་ཁྱེད་བཞིན་དུ། །གྱུར་ནས་སངས་རྒྱས་ཕྲིན་ལས་བྱེད་པར་ཤོག། ༈ །།འཇིགས་མེད་རྔ་སྒྲའི་དབྱངས་ཀྱི་སྤྱན་སྔ་རུ། །ཉོན་མོངས་བདུད་སྡེ་འཇོམས་པ་སེང་གེའི་སྒྲས། །འཕགས་ཚོགས་སློབ་མ་ཁྲག་ཁྲིག་སྤ་བཀོང་བའི། །ལྷ་མོ་ཐུགས་རྗེ་མྱུར་མར་གྲགས་པས་སྐྱོངས། །སྟོབས་ཆེན་ཐུབ་པར་དཀའ་བའི་དགྲ་སྡེ་དང༌། །འཇིགས་རུང་སེང་གེ་ཁྲོས་པའི་དཔལ་བརྟུལ་བརྒྱ། །བཞད་པ་བརྒྱད་ལྡན་རྡོ་རྗེའི་ང་རོ་ཡིས། །འདར་བའི་སྤུ་ལོང་སྦྱིན་པའི་ཏཱ་རེ་མ། །མཆེ་བའི་རྩེ་བརྒྱ་གདེང་ལྡན་གླང་པོ་དང༌། །དུས་ཀྱི་ཆད་པ་འཛིན་པའི་བརྩོན་ར་ཡང༌། །གང་མཚན་དྲན་པའི་ཟིལ་གྱིས་རྣམ་འཐོར་བའི། །བྱམས་ཆེན་གདུང་བ་ཀུན་འཕྲོག་ཏཱ་རེ་མ། །རབ་འབར་བརྟན་གཡོ་ཟ་བའི་མེ་ལྕེ་དང༌། །དབུགས་ཆེན་དུག་རླང་འཕྱུར་བའི་ཁྲི་ལྡན་སྦྲུལ། །གང་ལ་སྐྱབས་གསོལ་འདེབས་པས་ཉེར་ཞིའི་གཟུགས། །ཀུན་དགའི་ལང་ཚོར་འབར་བའི་ཏཱ་རེ་མ། །རེག་གཅོད་སྤུ་གྲིའི་དཔལ་ལྟར་རྣོ་བ་ཐོགས། །ཤུགས་དྲག་རྒྱ་མཚོ་ཕྱུར་བའི་དབའ་རྒལ་
ཀྱང༌། །རྡོ་རྗེའི་ཡི་གེ་བཅུ་པའི་བྱིན་རླབས་ཀྱིས། །མི་འཚེའི་བརྟུལ་ཞུགས་འཛིན་མཛད་ཏཱ་རེ་མ། །མཛའ་བའི་དགའ་ཚལ་ཉམས་པའི་བཤེས་བྲལ་དང༌། །མི་སྡུག་སྐྱིན་ཐང་འབབ་པའི་ཆོམ་རྐུན་གཡུལ། །བྱམས་ཆེན་ཕྱག་རྒྱའི་ཟིལ་གྱིས་གནོན་མཛད་པ། །དཔའ་མོ་དགའ་ཆེན་རྒྱ་མཚོ་ཏཱ་རེ་མ། །གདུག་པ་མཛེ་ཡི་ནད་ཀྱིས་ལུས་རུལ་ཞིང༌། །སྡེ་བཞིའི་ཁྱད་ནོར་ཉམས་པའི་དབུལ་བ་ཡང༌། །གང་ཞབས་པདྨོ་མཆོག་གིས་དབུགས་འབྱིན་པས། །ཞལ་བཞེས་འགོང་བ་མི་མངའ་ཏཱ་རེ་མ། །སྨྱོ་འབོག་ཞགས་པ་འདེབས་བྱེད་དབང་པོའི་གདོན། །མི་གསོན་ཁྲག་ལ་ཀླལ་བའི་ཤ་ཟ་ཡང༌། །བདུད་ཀྱི་བདུད་ཆེན་ཁྲོས་པའི་དྲག་ཤུལ་གྱིས། །ཞུམ་པའི་གདུང་བ་སྟེར་མཛད་ཏཱ་རེ་མ། །གཏུམ་ཆེན་རྒྱལ་པོ་ལས་གྱུར་ཆད་པ་དང༌། །ཕུན་ཚོགས་འདོད་དོན་ཉམས་པའི་སྡུག་བསྔལ་ཀུན། །གང་ལ་བརྟེན་ནས་རྣམ་པར་ཞི་མཛད་དེ། །ཕན་བདེའི་དགེ་མཚན་ལ་སྦྱོར་ཏཱ་རེ་མ། ཁྱོད་ནི་རྣམ་མང་རྒྱལ་བའི་ཞིང་ཀུན་ཏུ། །འཇིགས་དང་གདུངས་བ་འཇོམས་པའི་ལྷ་མཆོག་ཅེས། །ངོ་མཚར་གྲགས་པའི་དཔལ་གྱིས་མངོན་མཐོ་བ། །བདག་ཀྱང་ཁྱོད་ཞལ་དྲན་པའི་གདུང་བ་སྐྱེ། །ལྷ་མོ་དམ་པའི་བདུད་རྩི་མཆོག་སྦྱིན་མ། །དེང་ནས་བདག་ལ་ཐུགས་བརྩེ་ཉེར་བཞག་སྟེ། །འཆི་མེད་ཚེ་དང་ཡེ་ཤེས་སྣང་བ་ཆེས། །མི་འབྲལ་བྱང་ཆུབ་བར་དུ་སྐྱོང་མཛོད་ཅིག །ཅེས་པ་འདིའང་དད་གཏོང་བག་ཡོད་ཀྱི་ཡོན་ཏན་དུ་མས་མཐོ་
བའི་དགེ་རྒན་མ་ཏིའི་མཚན་ཅན་གྱི་ངོར་གཞོན་ནུ་འཇིགས་མེད་པས་བྲིས་པ་རྟག་ཏུ་དོན་ཡོད་པར་གྱུར་ཅིག། ༈ །།རྣམ་པར་དཀར་བའི་ལེགས་བྱས་ཕུང་པོར་མ་རྒད་མདངས་ཀྱིས་ཉེར་བྱུག་པ། །གང་ལ་ཐུགས་རྗེ་མྱུར་མ་ཞེས་བྱའི་གྲགས་སྙན་ཞགས་པ་རྟག་མངའ་བས། །འཇིག་རྟེན་གསུམ་གྱི་ཐ་གྲུ་མ་ལུས་ཅིག་ཆར་འཆིང་བའི་འཕགས་མ་དེས། །གཞན་འཕྲུལ་དབང་བྱེད་འདོད་ལྷའི་བདག་ཉིད་འཆིང་ཞིང་རྨོངས་པའི་ལས་མཛོད་ཅིག །བསྐལ་མང་གོམས་པའི་སྙིང་རྗེ་མཆོག་ནི་ཁྲོ་བའི་བློ་དང་མཛའ་བ་མིན། །འགྲོ་ལ་ཕན་བཞེད་ལྷག་པའི་ཐུགས་ནི་ཕྱོགས་དང་རིས་སུ་ཆད་པ་མེད། །ཀུན་ནས་དགེ་བའི་མཛད་བཟང་མཆོག་ནི་ནག་པོའི་ཆོས་སུ་བཤེས་མིན་པའི། །དཔའ་མོ་ཆེན་མོའི་མཐུ་སྟོབས་འཕྲུལ་ཆེན་བདུད་སྡེ་འཇོམས་པའི་གཤེད་མར་བཞེངས། །སྡིག་ཅན་བདུད་ལ་སྡང་བ་མིན་ཀྱང་བདུད་དཔུང་འཇོམས་པའི་གཤེད་དུ་ཆེ། །ཐུགས་རྗེས་འདོད་ལྷ་བཏང་བ་མིན་ཀྱང་དྲག་ཤུལ་མཛད་པས་བདུད་སྡེ་འདུལ། །སྐལ་བཟང་འགྲོ་ལ་ཆགས་པ་མིན་ཡང་བདུད་ལས་རྣམ་རྒྱལ་དངོས་གྲུབ་འཇོ། །བདུད་འདུལ་དྲག་མོ་མྱུར་མའི་ལྷ་དེས་དེ་རིང་བདུད་དཔུང་ཕམ་པར་མཛོད། །གཏོང་བ་ཆེན་པོ་ཤིན་ཏུ་གཏོང་བཅས་ཡོངས་སུ་རྫོགས་པ་མཐར་སོན་ཏེ། །ཆགས་པ་མེད་པའི་ཡེ་ཤེས་མཆོག་ལས་ནམ་ཡང་འདའ་བ་མ་ལགས་པས། །སྲེད་ལེན་འཆིང་བ་བརྟུལ་ལ་མི་བསྙེད་དཔའ་མོའི་མྱུར་མའི་མཐུ་བྱིན་གྱིས།
སེར་སྣའི་ཀུན་སྦྱོར་ཆ་བཅས་ལས་བྱུང་བདུད་ཀྱི་རྒྱུ་བ་བཟློག་ཏུ་གསོལ། །འཕགས་པ་དགྱེས་པའི་ཚུལ་ཁྲིམས་མཆོག་ནི་རྣམ་བྱང་ཆོས་སུ་བཤེས་གྱུར་མོད། །དག་པ་མིན་པའི་བརྟུལ་ཞུགས་ཀུན་ལ་མྱ་ངན་བསྐྱེད་པའི་ཕོ་ཉ་བ། །གང་ལ་མངའ་མཛད་འཕགས་མ་སྒྲོལ་མས་བསྡུ་བཞི་མཐར་ཕྱིན་བདེན་པ་དེས། །ཉེས་སྤྱོད་མི་བཟད་བདུད་སྡེའི་གྲོང་ཁྱེར་རྨིང་ནས་འཇིག་པའི་ཕྲིན་ལས་མཛོད། །སྲིད་པ་ཇི་སྲིད་སྐྱོ་བས་མི་དུབ་འགྲོ་སྒྲོལ་སྤྱོད་པའི་ཁུར་བསྣམས་ཤིང༌། །སྲིད་དང་ཞི་བ་གཉིས་སུ་མི་དམིགས་ཟབ་མོ་བཟོད་པའི་མཐར་སོན་པས། །འཕགས་མ་མཆོག་ཅེས་གྲགས་པ་དོན་ལྡན་ཨོཾ་མཛད་ལྷ་མོའི་སྟོབས་ནུས་ཀྱིས། །སྡང་དང་རབ་རིབ་ཉེས་པའི་བདུད་དཔུང་སྨོད་ཐབས་བྱེ་བས་སྨད་པར་མཛོད། །བསམ་གྱིས་མི་ཁྱབ་སྙིང་སྟོབས་གོ་ཆ་མི་མཐུན་གཡུལ་གྱིས་བརྫི་བ་མེད། །ཇི་སྐད་སྨྲས་བཞིན་མི་འགོང་དམ་བཅའ་ཆོག་ཤེས་ཐབས་ཀྱིས་བསུབ་ཏུ་མེད། །བྱང་ཆུབ་མཆོག་ལས་མི་ལྡོག་བརྩོན་འགྲུས་ལེ་ལོས་རྒོལ་བའི་སྐབས་མེད་མས། །བྱ་བ་ངན་ཞེན་འདོད་ལྷའི་དམག་དཔུང་མིང་གི་ལྷག་མར་མཛད་དུ་གསོལ། །སྲིད་པའི་སྙོམས་འཇུག་སྲིད་རྩ་འགོག་ལ་ཤིན་ཏུ་ནུས་པ་ཕྲ་གྱུར་པ། །གང་དང་ཐུན་མོང་ནམ་ཡང་མ་གྱུར་ཟག་མེད་ཞི་བའི་ཏིང་འཛིན་སྤྲིན། །ཟག་པ་ཀུན་ཟད་མངོན་ཤེས་དམ་པའི་ཆུ་གཏེར་ལྟོ་བར་སྦྲུམ་པའི་ལྟས། །སྙོམས་འཇུག་སྒྲིབ་པའི་གཡུལ་ངོ་མ་ལུས་རྣམ་ཐར་རྒྱ་མཚོས་ཚར་ཆོད་ཅིག །
ཡུལ་དང་ཡུལ་ཅན་མཚན་མ་ཉེར་ཞི་ཆོས་ཉིད་གསང་བ་དེ་ཁོ་ན། །མཐར་འཛིན་ལྟ་བ་ཀུན་ལས་རྣམ་གྲོལ་སོ་སོ་རང་རིག་ཡེ་ཤེས་ཆེས། །མཐོང་རྒྱུ་མ་མཆིས་མཐོང་བའི་རྩེ་མོར་གཟིགས་པ་རྣམ་དག་ཏཱ་རེ་མས། །བདེན་ཞེན་འཁྲུལ་རྟོག་བདུད་ཀྱི་གཡུལ་ངོ་ལྔ་པའི་ལམ་དུ་སྦྱོར་མཛོད་ཅིག། ཡོན་ཏན་རིན་ཆེན་ནོར་བུའི་ཕྲེང་བ་ཀུན་ནས་དངར་བའི་འཕགས་མ་ལ། །ཡོན་ཏན་བསྔགས་པའི་བསྟོད་དབྱངས་སྤྲིན་ཆེན་རྒྱ་ཆེར་དཀྲིགས་པའི་ལེགས་བྱས་ལས། །ཡོན་ཏན་མི་ཟད་བསིལ་བའི་ཆར་ཟིམ་འཇིག་རྟེན་གསུམ་དུ་རྟག་འབབ་པས། །ཡོན་ཏན་ཆོས་མཆོག་ཐོབ་ལ་གེགས་བྱེད་བདུད་ཀྱི་རྒྱུ་བ་འགོག་གྱུར་ཅིག། ཅེས་པའང་གཞོན་ནུ་འཇིགས་མེད་པས་རང་ཉིད་བདུད་ཀྱིས་མི་རློབ་པའི་རེ་འདུན་ཡིད་ཀྱི་མེ་ལོང་དུ་བཀོད་ནས་གང་དྲན་ཅལ་ཅོལ་དུ་སྨྲས་པའོ།། །།སྔོ་ལྗང་ཤིང་ལོ་ཕྱུག་མོ། །དབྱར་གྱི་རི་བོའི་ཕུན་ཚོགས། །མཐིང་མདོག་ཆར་སྤྲིན་བླ་རེ། །དང་གསལ་ནམ་མཁའི་མཛེས་རྒྱན། །སྒྲོལ་མའི་ཞབས་རྡུལ་རྗེས་དྲན། །བློ་བཟང་ཡིད་ཀྱི་ལོངས་སྤྱོད། །བསིལ་བྱེད་སྙིང་རྗེའི་ལྡིང་ཁང༌། །ཡུམ་ཅིག་ཐུགས་ཀྱི་དཔལ་འབྱོར། །གསེར་མདོག་མེ་ཏོག་ནགས་ཚལ། །དབྱིག་འཛིན་ལན་བུའི་རྒྱན་ཆ། །འོད་སྟོང་མེ་ཤེལ་ཐིག་ལེ། །ཤར་ནུབ་ནམ་མཁའི་སྐྱེས་ཅིག། ཚེ་དང་ཡེས་ཤེས་གཏེར་ཁ། །སྐལ་བཟང་སྙིང་གི་དགའ་སྟོན། །མཆོག་སྦྱིན་བྱིན་རླབས་བདུད་རྩི། །ཐུགས་རྗེ་མྱུར་བའི་ཕམ་ཕབ། ༈ །ཀུན་རྟོག་སྤྲོས་པའི་གྲྭ་ཟུར་བརྒྱད་ཅུའི་ཁམས། །ཀུན་ཟླུམ་ཐིག་ལེ་གཅིག་གི་དབྱིངས་ཐིམ་པས། །ཀུན་སྣང་བདེ་སྟོང་གཉུག་མའི་ལྷར་བཞེངས་པ། །ཀུན་བཟང་གཞོན་ནུ་བུམ་པ་དབྱིངས་ཀྱི་སྐུ། །རྣམ་མེད་སྟོང་པ་ཉིད་ཀྱི་
ཕྱག་རྒྱ་དང༌། །རྣམ་མང་བདེ་བའི་ཡེ་ཤེས་མཉམ་སྦྱར་བས། །རྣམ་པ་ཀུན་གྱི་མཆོག་ལྡན་ཧེ་རུ་ཀའི། །རྣམ་རོལ་སྲིད་དང་ཞི་བའི་ཕ་མཐར་གདལ། །སྤྲོས་མེད་འོད་གསལ་ཆེན་པོ་རིག་པའི་དབྱིངས། །སྤྲོས་དང་སྤྲོས་མིན་རྟོག་པའི་རྡུལ་སྤངས་པ། །སྤྲོས་བཅས་སྒྱུ་འཕྲུལ་དྲ་བའི་རྣམ་རོལ་བརྒྱར། །སྤྲོ་དང་སྡུད་པའི་ཟློས་གར་ཅིར་ཡང་རྩེ། །རྡོ་རྗེ་མི་ཤིགས་སྙིང་པོའི་ཏི་ལ་ཀ༌།རྡོ་རྗེ་གསང་གསུམ་གྲུབ་པའི་དགའ་སྟོན་དབྱིག །རྡོ་རྗེ་རྩེ་མོའི་ཐབས་མཁས་འབའ་ཞིག་གིས། །རྡོ་རྗེའི་ཡེ་ཤེས་ཆེན་པོ་རྣམ་པར་འབར། །ཟབ་གྲགས་ཟབ་མོ་བཟོད་པའི་ཤེས་རབ་ཀྱིས། །ཟབ་དང་རྒྱ་ཆེའི་ཆོས་ཀུན་འབིགས་པ་ཡང༌། །ཟབ་གསལ་གཉིས་མེད་ལྟ་བའི་སྔོན་འགྲོ་སྟེ། །ཟབ་པའི་ནང་ན་མྱུར་བ་རྡོ་རྗེའི་ལམ། །དེ་སླད་དག་པ་གཉིས་ལྡན་དབྱིངས་ཀྱི་མཁའ། །སྣང་གསུམ་ཉེས་པའི་རྡུལ་དང་བྲལ་བ་ནི། །རྡོ་རྗེ་རྣལ་འབྱོར་གོམས་པའི་མཐུ་ཡིན་ཞེས། །ཐེག་མཆོག་སྟོན་པས་རང་གི་ངེས་གསང་བསྟན། །རགས་པ་ལྔ་ཕུང་འདུས་པའི་ལྕགས་ནག་རྡུལ། །ཕྲ་བ་ལྷན་སྐྱེས་ཡེ་ཤེས་གསེར་འགྱུར་རྩིས། །སྦྱང་བས་བདེ་ཆེན་མཆོག་གི་སྐུ་སྒྲུབ་པ། །ཐབས་ཀྱི་ནང་ནས་རྩེ་མོར་སོན་པའི་ཐབས། །ཐབས་ཆེན་ལམ་གྱིས་བསྒྲུབ་པའི་གོ་འཕང་ནི། །རྣམ་པ་ཀུན་གྱི་མཆོག་ལ་གནས་པ་སྟེ། །གང་ཡང་ཐབས་ཀྱི་ནུས་པ་རབ་དམན་པའི། །ལམ་ནི་འདོད་པ་ཉི་ཚེ་ཙམ་ཞིག་སྟེར། །བྱ་རྩོལ་
འཛིན་ཞེན་ལས་འདས་ཐེག་པ་མཆོག །ལྷུན་རྫོགས་ཐིག་ལེ་ཆེན་པོའི་ངང་གནས་ཏེ། །རྩོལ་བཅས་ཐེག་པའི་རྣམ་གྲངས་བརྒྱ་ཕྲག་གིས། །འགྲོ་མང་བྱང་ཆུབ་མཆོག་གི་ས་མཐོར་འགོད། །འོད་གསལ་ཕྱག་རྒྱ་ཆེན་པོའི་རིག་པ་འཛིན། །འཕོ་མེད་ཡེ་ཤེས་གྲུབ་པའི་སྤྱོད་འཆང་ཚོགས། །ཏིལ་གྱི་གང་བུ་བཞིན་དུ་བལྟམས་པའི་ཞིང༌། །ཐེག་རྒྱལ་སྣང་བ་གཅིག་གིས་ཁྱབ་པར་གདལ། །དག་དང་མ་དག་སྤྲུལ་པའི་ཞིང་རྒྱ་མཚོར། །ཞི་དང་ཁྲོ་གར་དུ་མའི་རོལ་མཛད་ཀྱིས། །རབ་འབྱམས་རྒྱུད་སྡེའི་ཆོས་ཚུལ་གང་གསུངས་པ། །ཀུན་ཀྱང་བདེ་ཆེན་གཉུག་མ་མཚོན་པའི་སྒོ། །བསམ་ཡས་སྐུ་དང་མཛད་པའི་ཆོ་འཕྲུལ་གྱིས། །ཡིད་ཅན་རེ་བ་རྣམ་པར་སྐོང་མཛད་ཀྱང༌། །མཐར་ཐུག་ཐེག་པའི་འབབ་སྟེགས་གཅིག་འགྱུར་བའི། །ཀྱེ་མའོ་ཐབས་མཁས་འདི་ནི་བསམ་པར་དཀའ། །དེ་ལྟར་སྟོན་པ་རྒྱུན་འཆད་རྡོ་རྗེ་ཆོས། །རྡོ་རྗེ་རྣལ་འབྱོར་སྟོན་པའི་ཆེ་བ་ལས། །བསྔགས་བརྗོད་པདྨའི་དོག་པ་ཉུང་ངུ་འདི། །སྨྱོན་པ་འཇིགས་མེད་བྱིས་པའི་མཆོད་རྫས་ཡིན། །ཞེས་པའང་མེ་ཁྱི་ཟླ་ཚེས་ལ་སྤྲང་པོ་ཨ་བྷྱས་སོ།། ༈ །།དྲི་མེད་སིནྡྷུའི་རྒྱ་མཚོར་པདྨ་སྐྱེས། །ཨོ་ཌི་ཡ་ནའི་ཁབ་ཏུ་པདྨའི་རྒྱལ། །མ་ར་ཏི་ཀའི་གནས་སུ་པདྨ་འབྱུང༌། །དོན་དུ་པདྨ་གར་དབང་མིག་མི་འཛུམ། །སྣ་ཚོགས་མཚན་དང་རྣམ་འགྱུར་ཅིར་སྣང་ཡང༌། །ཐམས་ཅད་མཁྱེན་པའི་བརྟུལ་ཞུགས་རླབས་པོ་ཆེས། །དོན་གཉིས་འདོད་པ་ཡོངས་སུ་རྫོགས་
མཛད་དེ། །གྲུབ་པའི་དགེ་མཚན་སྦྱིན་ལས་གཞན་ཡོད་མིན། །གསང་ཆེན་དཀྱིལ་འཁོར་རྒྱ་མཚོའི་འཁོར་ལོ་དང༌། །གནས་ཡུལ་མཁའ་ལ་སྤྱོད་པའི་ལྷན་སྐྱེས་མ། །ཀུན་ཀྱང་བདེ་ཆེན་ཕྱག་རྒྱའི་དམ་ཚིག་ཏུ། །སྡོམ་མཛད་བདེ་བའི་བདག་ཉིད་ཧེ་རུ་ཀ༌།ཞི་ཆགས་ཀུན་སྣང་སྙིང་རྗེའི་འཛུམ་དཀར་གྱིས། ཁམས་གསུམ་བདེ་བ་ཆེན་པོར་རྒྱས་བཏབ་ནས། །བྲོ་གར་ཏ་ན་ག་ནའི་བརྟུལ་ཞུགས་ཀྱིས། །བརྟན་གཡོ་འོད་གསལ་སྒྱུ་མའི་དབྱིངས་སུ་སྒྲོལ། །གཟོད་ནས་ཀུན་མཁྱེན་སྟན་པ་འོད་མི་འགྱུར། །དག་མཉམ་བདེ་སྟོང་རོལ་མོའི་ཡེ་ཤེས་སུ། །ལྷུན་རྫོགས་དང་པོའི་མགོན་པོར་སངས་རྒྱས་ཀྱང༌། །ཞིང་འདིར་རྒྱལ་ཚབ་ཆེན་པོའི་རིག་པ་འཛིན། །གང་སྐུ་རྔ་ཡབ་དཔལ་རིའི་ཕོ་བྲང་དུ། །རྩ་གསུམ་ཆོས་སྐྱོང་རྒྱ་མཚོའི་དབང་ཕྱུག་ཆེར། །བཞུགས་ནས་ཁ་བའི་རི་བོའི་ཡིད་ཅན་རྣམས། །དུས་ཀུན་རྒྱུན་ཆད་མེད་པར་བརྩེ་བས་དགོངས། །དེ་ལྟར་སྲིན་པོ་ཤིན་ཏུ་མ་རུངས་དང༌། །བྱང་ཕྱོགས་གདོང་དམར་གདུལ་དཀའི་མི་རྣམས་ཀྱང༌། །ལྷག་པར་ཐུགས་རྗེས་སྐྱོང་བའི་གདུལ་བྱ་རུ། །རྗེས་འཛིན་འདི་འདྲའི་སྨོན་ལམ་བསམ་པར་དཀའ། །མདོར་ན་ཁྱོད་མཚན་ཐོས་དང་དྲན་པས་ཀྱང༌། །གང་འདུལ་མཛད་པའི་བྱིན་རླབས་རྨད་བྱུང་གིས། །དེ་ལ་དེ་ཡི་མོད་ནས་སྐྱོབ་མཛད་པའི། །ཡིད་བཞིན་གཏེར་གྱི་རྒྱ་མཚོར་གསོལ་བ་འདེབས། །བདག་ནི་འདི་ནས་བྱང་ཆུབ་སྙིང་པོའི་བར། །
རིག་འཛིན་བླ་མ་ཁྱོད་དང་མི་འབྲལ་ཞིང༌། །མཁའ་སྤྱོད་རྣལ་འབྱོར་མ་ཡི་ཚོགས་རྣམས་དང༌། །ལྷན་ཅིག་རིམ་གཉིས་སྤྱོད་པའི་དཔའ་བོར་ཤོག །ཅེས་འཇིགས་མེད་པས་སོ།། ༈ །།མཐིང་མདོག་འོད་བརྒྱས་མཛེས་པ་འབུམ་བྱིན་པས། ཁེངས་པས་དྲེགས་པའི་རྦ་རླབས་འཁྲི་ཤིང་ཅན། །དྲི་མེད་སིནྡྷུའི་ཆུ་གཏེར་དྭངས་པའི་ངོགས། །མཚན་དཔེའི་ཟླ་བ་གསར་ངོམས་མཚོ་སྐྱེས་རྗེ། །མཚོ་སྐྱེས་རྒྱུ་སྐར་ལང་ཚོ་མ་རྙིང་བ། །དུ་མའི་ཕྲེང་བ་དངར་བའི་ལྷ་གྲལ་ན། །གེ་སར་ཟླ་གཞོན་འཛིན་པའི་འདབ་སྟོང་སྦུབས། །བཅུ་དྲུག་ལང་ཚོས་སྒེགས་པ་མཚོ་སྐྱེས་རྗེ། །འཕོ་ཆེན་ཡེ་ཤེས་རྡོ་རྗེ་གཉུག་མའི་སྲོག །སྣང་སྟོང་མི་ཤིགས་དྭངས་མའི་འཇོ་སྒེགས་དང༌། །ཆགས་པའི་ཐ་ཚིག་ནམ་ཡང་མི་ལྷོད་པའི། །སྤྱོད་ཡུལ་བསམ་གྱིས་མི་ཁྱབ་མཚོ་སྐྱེས་རྗེ། །ཞི་དབྱིངས་རང་བྱུང་གདོད་མའི་ཆོས་ཉིད་དང༌། །གཞི་སྣང་འོད་གསལ་མཆོག་གི་ཏི་ལ་ཀ༌།ཟུང་འཇུག་སྒྱུ་འཕྲུལ་དྲྭ་བའི་འཁོར་ལོ་ཆེ། །གཟུགས་སྐུའི་རོལ་མོར་འབར་བ་མཚོ་སྐྱེས་རྗེ། །རྣམ་པ་ཀུན་གྱི་མཆོག་ལྡན་སྟོང་པའི་དབྱིངས། །རྣམ་བཅས་བདེ་ཆེན་འཁོར་ལོ་མཉམ་སྦྱོར་བའི། །རྣམ་ཀུན་མཆོག་ཏུ་མི་འགྱུར་ཡེ་ཤེས་ཆེ། །སྒྱུ་མའི་ལང་ཚོར་སྣང་བ་མཚོ་སྐྱེས་རྗེ། །གཟུགས་སྐུའི་རོལ་མོར་སྣང་ཡང་རང་བཞིན་མེད། །གཤིས་ལ་རང་བཞིན་མེད་ཀྱང་གཟུགས་སྐུར་སྣང༌། །
སྣང་དང་མི་སྣང་མཚན་མ་ཉེར་ཞི་བའི། །ངོ་མཚར་བསམ་གྱིས་མི་ཁྱབ་མཚོ་སྐྱེས་རྗེ། །ཞིང་སྔགས་ལྷན་སྐྱེས་མཁའ་འགྲོ་འབུམ་ཕྲག་གིས། །བདེ་མཆོག་བདེ་བའི་ཟློས་གར་རྣམ་གཡོ་བའི། །གནས་ཡུལ་ཉེར་བཞིའི་གྲོང་ཁྱེར་བཀོད་པ་ན། །བརྟུལ་ཞུགས་མཆོག་གིས་རོལ་སྟོན་མཚོ་སྐྱེས་རྗེ། །ཆགས་མེད་ཆགས་པའི་འཕྲུལ་ཆེན་བྱེ་བ་བརྒྱས། །ཟག་མེད་བདེ་བ་མཆོག་གི་དཔལ་སྟེར་བའི། །མཁའ་སྤྱོད་མཁའ་འགྲོའི་དགའ་སྟོན་རྒྱས་མཛད་པའི། །དགྱེས་མཛད་ཧེ་རུ་ཀ་དཔལ་མཚོ་སྐྱེས་རྗེ། ཁམས་གསུམ་སྲོག་གི་གཤེད་གྱུར་སྒྲ་གཅན་ལྟོར། །ཉི་ཟླའི་རྒྱུ་བ་བཀག་པའི་མོད་ཉིད་ལ། །རྟག་ཆེན་འཆི་བ་མེད་པའི་སྐུར་བཞེངས་པ། །ཚེ་དབང་གྲུབ་པའི་རིག་འཛིན་མཚོ་སྐྱེས་རྗེ། །གཅིག་དང་དུ་མར་མ་གྲུབ་ཡེ་ཤེས་ཆེ། །མཁའ་ཁྱབ་ཞི་དང་ཁྲོ་བོའི་དཀྱིལ་འཁོར་དུ། །སྣང་བའི་འཕྲུལ་ཆེན་འགོག་ཏུ་མ་མཆིས་པ། །ཕྲིན་ལས་སྣང་བ་མཆོག་སྩོལ་མཚོ་སྐྱེས་རྗེ། །ཐུགས་རྗེ་བཀའ་དྲིན་མཚུངས་མེད་མཚོ་སྐྱེས་ལྷ། །ཡིད་ཀྱི་འདུན་སར་རྟག་ཏུ་བསྙེན་བྱས་ནས། །ཆེད་བརྗོད་གཏམ་གྱི་རྫ་རྔ་འདི་བརྡུང་ན། །འཛད་མེད་གྲུབ་གཉིས་སྣང་བ་ཆར་དུ་སྙོལ། །ཞེས་པའང་འཇིགས་མེད་པས་གང་དྲན་ལྷུག་པར་བརྗོད་པ་མངྒ་ལཾ།། ༈ །།འཕགས་ཡུལ་ཆོས་ཀྱི་འདུན་ཁང་ན་ལེནྡྲའི། ཁྲི་འཕང་ཞབས་པད་འདབ་མས་གནོན་བཟོད་པ། །ཟ་ཧོར་མཁན་པོའི་གྲགས་
སྙན་སུམ་རྩེན་རྔ། །དབྱུ་གུས་བསྐུལ་བ་མེད་ཀྱང་སྲིད་ན་ལྡིར། །མང་ཐོས་ཤ་ཚུགས་རྒྱས་པའི་མཁས་མང་ཡང༌། །གུས་བཅས་འཛུམ་པའི་མིག་གིས་ཁྱོད་བལྟས་ཏེ། །དཔྱད་གསུམ་ལམ་ནས་དྲང་བའི་ལེགས་བཤད་དབྱངས། །ཉན་ལ་རིང་བའི་ཡིད་ཀྱིས་ཁྱོད་དྲུང་འདུ། །འདབ་བཟང་ངང་པས་བསྟེན་པའི་ཆུ་གཏེར་བཞིན། །ཐར་འདོད་སྐལ་བཟང་སྐྱེ་བོ་ཁྲག་ཁྲིག་འབུམ། ཁྱོད་ལ་དགེ་བའི་བཤེས་ཀྱི་བློ་བཞག་སྟེ། །གདམ་ཟབ་བདུད་རྩིའི་བགོ་སྐལ་འཐུང་ལ་འདུན། །ལྷག་པའི་ཚུལ་ཁྲིམས་ལྗོན་བཟང་མ་སྨད་པ། །མ་རལ་མ་འདྲེས་ཤིན་ཏུ་དག་གྱུར་པས། །མཚམས་སྤྲིན་པིར་གྱིས་བྲིས་འདྲའི་བླ་གོས་འདི། ཁྱོད་ལ་མཛེས་པར་མི་འགྱུར་འགའ་ཡང་མེད། ཁ་ན་མ་ཐོའི་རྒྱུ་བ་མཐར་མཛད་དེ། །སྤོང་ཀློག་ཁྲིམས་ཀྱི་བསླབ་པའི་འདུན་ཁང་ན། ཁྱོད་བློ་ཤིན་ཏུ་ཞི་བ་བརྙེས་གྱུར་པས། །དུར་སྨྲིག་འཛིན་པའི་གྲལ་ན་ཁྱོད་གཅིག་འཕགས། །ལྷར་བཅས་དྲེགས་དགུའི་དོ་ཀེར་འཁྲི་ཤིང་རྩེར། ཁྱོད་ཞབས་བཀྲ་ཤིས་མཚན་ལྡན་རྟག་འགོད་ཀྱང༌། ཁེངས་དང་རྒྱགས་པས་མྱོས་པ་ལྟ་ཅི་སྟེ། །ཆགས་མེད་ཡེ་ཤེས་ཞི་བ་ལྷག་པར་རྒྱས། །ལྷ་དབང་ལྷ་རྫས་འབྱོར་བས་ཁྱོད་མཆོད་ཀྱིས། །སྲིད་པའི་ཕུན་ཚོགས་སྙིང་པོ་མེད་གཟིགས་ཏེ། །འབྱོར་དགུའི་ལོངས་སྤྱོད་རིང་དུ་བརྟུལ་མཛད་ནས། །
བསོད་སྙོམས་སློང་བའི་ཆོ་ག་བསྟར་བ་ལགས། །དྲན་དང་ཤེས་བཞིན་བག་ཡོད་མཆོག་བརྙེས་པས། །དབང་པོ་ཞི་ཞིང་ཐུགས་ཀྱང་ཞི་གྱུར་ཏེ། །དུལ་བའི་སྤྱོད་ལམ་མ་རྨས་མ་འཁྲུལ་བ། །མཐོང་ན་མི་མཐུན་མེད་པའི་དཔལ་གྱིས་མཛེས། །སུ་ཞིག་ལོག་རྟོག་རྒོལ་བའི་ཕྱོགས་འཛིན་ཀྱང༌། །དེ་ལ་ཁྱོད་ཀྱིས་ལྷག་པར་སྙིང་བརྩེ་ཞིང༌། །རིགས་ལམ་རྨད་བྱུང་སྨན་མཆོག་བདུད་རྩིའི་རོས། །ཉེས་པའི་གྲུབ་མཐའ་གོས་རལ་བཞིན་དུ་མཛད། །རྩོད་པའི་འཁྲུལ་འཁོར་བཤམ་ལ་ཉེར་ཞུགས་ཀྱང༌། །གཞན་ཕྱོགས་ཕམ་དང་རང་ཉིད་རྒྱལ་བཞེད་པའི། །ཕྱོགས་ལྷུང་ཉེས་པ་གཞར་ཡང་མ་མཆིས་ཏེ། །གསུང་རབ་ཟབ་མོའི་དགོངས་དོན་འཚོལ་ཕྱིར་ཡིན། །སྐྱེ་བས་ཐོབ་པའི་ཤེས་རབ་ཕུལ་བྱུང་ཞིང༌། །ཐོས་བསམ་སྒོམ་པའི་བློ་གྲོས་རྩལ་རྫོགས་པས། །ཚུལ་གཉིས་ཐེག་པའི་གནད་གསང་ཀུན་གཟིགས་ཏེ། །ཤིང་རྟ་ཆེན་པོའི་རྣམ་ཐར་དྲི་མེད་སྐྱོང༌། །འཕགས་ཡུལ་མཁས་བརྒྱའི་རྒྱུ་སྐར་རྣམ་བཀྲའི་དབུས། །འཕགས་ཆེན་ཁྱོད་ཀྱི་གྲགས་སྙན་ཟླ་བའི་གཟིས། །གླིང་བཞིའི་འཁོར་ཡུག་འཁྱུད་མོར་བསྡམས་བྱས་པས། ཁྲི་སྲོང་དད་པའི་ཀུ་མུད་བཞད་པ་ལགས། །བསོད་ནམས་སྟོང་གི་དཔལ་འབར་ཞབས་པད་མོས། །བསིལ་ལྗོངས་ས་ལའི་སྨན་ཚལ་ཉེར་བཅགས་ཏེ། །རྒྱལ་བསྟན་གདུགས་དཀར་
གཅིག་གིས་བྷོ་ཊའི་གླིང༌། ཁྱབ་མཛད་བཀའ་དྲིན་མཚུངས་མེད་ཞི་བ་འཚོ། །བཀའ་དྲིན་གཞལ་བར་ནུས་མིན་མཁན་ཆེན་ཞབས། །བསྔགས་པའི་གཏམ་འདི་སྡེབ་སྦྱོར་མི་ལེགས་མོད། །དོན་གྱི་སྦྱོར་བ་ཉེས་པར་མི་འགྱུར་གྱི། །བློ་གྲོས་ལྡན་པས་རྣ་ལུང་བཞིན་དུ་ཆོངས། །ཞེས་པའང་འགུ་ལོག་གི་སྤྲང་ཕུག་ཀི་བོས་སྨྱོ་གཏམ་ཐོལ་བྱུང་མར་ཇ་གསུམ་པ་འཐུང་ཞོར་ལ་བྲིས་པ་དགེ། ༈ །།ཤིན་ཏུ་ཞི་བ་ཆོས་ཉིད་ཟབ་མོའི་དབྱིངས། །སྒྱུ་མའི་ཡེ་ཤེས་དག་པའི་རོལ་མོ་རུ། །སྣང་བའི་ཟློས་གར་ཞིང་ཁམས་མི་མཇེད་དུ། །སྒྱུར་མཛད་ཤིང་རྟ་ཆེན་པོ་ཆོས་གྲགས་ཞབས། །སློབ་པ་མིན་པའི་ཡེ་ཤེས་ཆེན་པོའི་གར། །དུར་སྨྲིག་འཆང་བའི་གཟུགས་སུ་ལེགས་བསྒྱུར་ཏེ། །འཛམ་བུའི་གྲོང་ཁྱེར་ཀུན་ནས་དགེ་མཛད་པ། །འཕགས་ཡུལ་ཤིང་རྟ་ཆེན་པོ་ཆོས་གྲགས་ཞབས། །ཐུབ་བསྟན་ཉིན་མོར་བྱེད་པའི་སྣང་བ་ཆེར། །ལོག་རྟོག་སྤྲིན་རུམ་འཐུག་པོས་གླགས་ལྟ་བའི། །རྒོལ་ངན་མིང་མཐར་འཐག་བྱེད་དངོས་སྟོབས་སུ། །ཉེར་ཞུགས་སྤོབས་པའི་རླུང་ལྷ་ཆོས་གྲགས་ཞབས། །བློ་མཆོག་མིག་སྟོང་རྒྱལ་པོས་ཉེར་བཟུང་བའི། །རིགས་པ་མཆོག་གི་རྡོ་རྗེ་གདེངས་སྟབས་ཀྱིས། །ཕས་རྒོལ་ལྟ་མིན་དམག་ཚོགས་འཇོམས་མཛད་པའི། །ཕྲིན་ལས་བསམ་གྱིས་མི་ཁྱབ་ཆོས་གྲགས་ཞབས། །དཔྱད་གསུམ་ཤིན་ཏུ་རྣམ་དག་བདེ་གཤེགས་གཞུང༌། །དྲི་མེད་ཚད་མ་གཉིས་ཀྱིས་ལེགས་བསྒྲུབ་སྟེ། །ཟབ་དང་
རྒྱ་ཆེ་ཐེག་པ་གསུམ་གྱི་ཚུལ། །སྲིད་ན་ཡུན་རིང་གནས་མཛད་ཆོས་གྲགས་ཞབས། །ལྷ་ཆེན་མཁས་པ་འབུམ་གྱིས་བྱིན་རླབས་ཤིང༌། །འཕགས་ཡུལ་མཁས་པ་དུ་མས་བསྔགས་གྱུར་པའི། །མུ་སྟེགས་མཁས་པ་སྟོང་གི་དམ་བཅའི་ནགས། །ལུང་རིགས་ཞུགས་ཀྱིས་སྦྱང་མཛད་ཆོས་གྲགས་ཞབས། །ཇི་སྙེད་ཆོས་ཀྱི་དེ་ཉིད་མངོན་གཟིགས་ཕྱིར། །སྒྲིབ་བྲལ་མཁྱེན་པའི་གཏིང་མཐའ་དཔག་པར་དཀའ། །ཕྱོགས་ལས་རྣམ་རྒྱལ་གྲགས་མཁས་མཁའ་མཐར་གདལ། །ཆེ་བའི་ཡོན་ཏན་དཔག་མེད་ཆོས་གྲགས་ཞབས། །སྐྱེ་བ་བརྒྱུད་མར་ལྟ་བ་ལོག་པའི་གནས། །སྙིང་ལ་རྡོ་ཡི་རིས་བཞིན་བརྟན་བྱས་པའང༌། །རིགས་ལམ་མེ་དཔུང་ལན་ཅིག་འབར་བའི་གཟིས། །མིང་གི་ལྷག་མར་བགྱིད་ནུས་ཆོས་གྲགས་ཞབས། །ཆོས་ལ་ཆོས་མིག་རྡུལ་བྲལ་མངོན་དུ་བརྙེས། །སོ་སོ་ཡང་དག་རིག་བཞིའི་སྣང་བ་ཐོབ། །ལོག་པའི་གྲུབ་མཐའ་གཞིག་ལ་མི་བསྙེངས་པ། །མཁས་པའི་ནང་ན་རིགས་དབང་ཆོས་གྲགས་ཞབས། །དཔལ་ཆེན་ཁྲག་འཐུང་གཙོ་བོས་བྱིན་རླབས་ཤིང༌། །རིག་པ་འཛིན་པའི་ས་རྣམས་ཡོངས་སུ་རྫོགས། །གསང་གསུམ་སྒྱུ་འཕྲུལ་དྲ་བའི་རོལ་མོ་ཅན། །གྲུབ་པའི་ནང་ན་དགྱེས་མཛད་ཆོས་གྲགས་ཞབས། །ཚུར་མཐོང་སྣང་ངོར་རྟོག་གེའི་དབང་ཕྱུག་ཆེ། །ཉེར་བཞིའི་གནས་ན་གྲུབ་པའི་དཔའ་བོ་ཆེ། །འོག་མིན་ཞིང་དུ་རིགས་
བརྒྱའི་ཁྱབ་བདག་ཆེ། །དོན་ལ་དབྱེར་མེད་དཔལ་ལྡན་ཆོས་གྲགས་ཞབས། །བདེ་བའི་རང་བཞིན་བདེ་མཆོག་ཧེ་རུ་ཀ༌།རིག་པ་འཛིན་པའི་སློབ་དཔོན་ཆེན་པོ་རུ། །ཡོངས་བཞེངས་བདེ་སྟེར་མཁའ་འགྲོའི་ཚོགས་ཀྱི་རྗེ། །བརྟུལ་ཞུགས་སྤྱོད་པའི་དབང་ཕྱུག་ཆོས་གྲགས་ཞབས། །ཟབ་མོ་ཆོས་ལ་གཟིགས་པ་ཕུན་སུམ་ཚོགས། །རྒྱ་ཆེའི་ཆོས་ལ་ཤེས་རབ་རྣམ་པར་དག །འཕགས་པའི་ཆོས་ལ་རང་དབང་ཤིན་ཏུ་འབྱོར། །ཆོས་ཀྱི་དབང་ཕྱུག་ཆོས་རྗེ་ཆོས་གྲགས་ཞབས། །མཐའ་ཡས་ཞིང་ན་བློ་མཆོག་མངའ་བར་གྲགས། །མཁས་པའི་འདུན་སར་རིགས་སྨྲའི་གཙོ་བོར་གྲགས། །འཇིག་རྟེན་གསུམ་ན་བདག་ཉིད་ཆེན་པོར་གྲགས། །གྲགས་ཆེན་ལྡན་པ་མཁས་མཆོག་ཆོས་གྲགས་ཞབས། །འཕགས་པའི་སར་ཞུགས་འཕགས་ཡུལ་ཤིང་རྟ་ཆེ། །ཆོས་ཀྱི་གྲགས་པ་བསྟོད་པའི་ལེགས་བྱས་འདིས། །ལྟ་ལོག་མུན་པའི་རི་བོ་ཕྱིར་བསྙིལ་ཏེ། །ཡང་དག་ལྟ་བའི་སྣང་བ་གསལ་བར་ཤོག །ཅེས་པའང་སྤྲང་སྨྱོན་འཇིགས་མེད་པས་སོ།། ༈ །།ལེགས་བྱས་ལམ་བཟང་སྲོང་བའི་མངའ་བདག་རྗེ། །ལུགས་གཉིས་བཀའ་ཁྲིམས་བཙན་པོའི་ར་བ་ལས། །ཆབ་སྲིད་འདའ་བ་མ་ཡིན་མི་ཡི་དབང༌། །བློ་གྲོས་གཏིང་དཔག་དཀའ་བས་སྒམ་པོ་ཡིན། །མཁའ་ལ་ཉིན་བྱེད་ཤར་བའི་འོད་སྣང་གིས། །འདབ་སྟོང་གེ་སར་འཛུམ་
པའི་མདངས་བརྒྱ་སྦྱིན། །ས་དབང་བཀའ་མཆིད་གཏམ་གྱིས་རབ་བསྐུལ་ཏེ། །ཐུ་མིའི་སྙིང་སྟོབས་པདྨོ་ལྷག་པར་བཞད། །ཧ་རི་ཙནྡན་ཚལ་ནས་འོངས་པའི་རླུང༌། །གང་ཡང་བསུང་ཞིམ་དྲི་ཡི་ངད་ཀྱིས་བགོས། །སྲོང་བཙན་མི་ཡི་དབང་པོས་བགྱི་བ་ཀུན། །ཚུལ་བཟང་འཐད་པའི་ལས་ཀྱི་ལྷག་པར་བགོས། །འདབ་ལྡན་ངང་པ་ཡོངས་ཀྱི་དེད་དཔོན་ནི། །ཆུ་ཡི་གཏེར་ལས་འོ་མའི་བཅུད་བཟང་ལེན། །ས་བདག་སྲོང་བཙན་སྒམ་པོའི་རྣམ་དཔྱོད་ཀྱིས། །རིགས་དང་མི་རིགས་བརྟགས་ནས་རིགས་པ་སྒྲུབ། །གཏིང་ཟབ་ཆུ་ཡི་ཕུང་པོའི་ཉེ་འགྲམ་ནི། །ནོར་གཏེར་ནོར་བུའི་རྒྱལ་པོས་ཀུན་ནས་གཏམས། །ས་སྐྱོང་མི་ཡི་བདག་པོའི་བློ་གྲོས་ནི། །ཡོན་ཏན་བརྒྱ་ཕྲག་བརྒྱ་ཡིས་བསྲུང་བར་བྱས། །མཁའ་ལ་ལྡིང་ཞིང་རྒྱུ་བའི་འཁོར་ལོ་ཅན། །དེ་དག་པདྨའི་མཚོ་ལ་ཤིན་ཏུ་བསྟེན། །ཤེས་རབ་འདབ་མ་རྒྱས་པའི་བློ་ལྡན་རྣམས། །སྲོང་བཙན་མགོ་ནག་རྗེ་བོའི་མདུན་སར་འདུ། །གསེར་རིའི་འཕྲེང་བ་དངར་བའི་དོ་ར་ན། །བརྗིད་ལྡན་ལྷུན་པོའི་རྒྱལ་པོ་མཆོག་ཏུ་འཕགས། །བློ་ཆེན་མཁས་པ་འབུམ་གྱི་གྲལ་དབུས་ན། །སྲོང་བཙན་བསོད་ནམས་མཆོག་གི་བརྗིད་དང་ལྡན། །མུ་མཐའ་གཞལ་དུ་ཡོད་མིན་ཀུན་གསལ་ལ། །མཁའ་ལྡིང་ཤུགས་ཀྱིས་བགྲོད་ཀྱང་ཚད་བཟུང་མེད། །ཟབ་ཡངས་བློ་གྲོས་མཆོག་མངའ་སྲོང་བཙན་ཐུགས། །དཔའ་མཛངས་སྐྱེ་བོས་
བརྟགས་ཀྱང་གཏིང་མི་དཔོག །ཆུ་ཀླུང་ཇི་སྙེད་འབབ་པ་དེ་དག་ཀུན། །ཕྱོགས་མཐའི་རྒྱ་མཚོར་གཞོལ་ཞིང་འབབ་པར་འགྱུར། །སྲོང་བཙན་རྒྱལ་པོའི་མཛད་པ་ཇི་སྙེད་པ། །བསྟན་དང་འགྲོ་བའི་དོན་ཕྱིར་གཞོལ་བར་གྱུར། །འཛམ་གླིང་ལྗོན་ཤིང་མེ་ཏོག་འབྲས་བུའི་ཚོགས། །ཀུན་ཀྱང་མ་དྲོས་མཚོ་ལས་བསྐྲུན་པ་ཡིན། །གངས་ལྗོངས་ཐུབ་པའི་བསྟན་ལ་གང་གནས་པ། །སྲོང་བཙན་སྨོན་ལམ་འཕྲུལ་ལས་ཉེ་བར་འོངས། །ཆུ་སྤྲིན་སྟུག་པོར་བཀོད་པའི་ལྟོ་བ་ལས། །ཆར་བསིལ་སྦྲང་རྩིའི་ཁང་བཟང་གསོས་སུ་འབེབས། །སྲོང་བཙན་ཐུགས་བསྐྱེད་རླབས་ཆེན་སྒྱུ་འཕྲུལ་ལས། །བདུད་རྩིའི་ཆོས་ཆར་སྐལ་བཟང་གསོས་སུ་འབེབས། །ཚད་མེད་སྙིང་བརྩེས་བསྐྱངས་པའི་དྲིན་ཆེན་མས། །བཏང་བྱས་བུ་སྡུག་སྐྱབས་དང་བྲལ་བ་བཞིན། །གངས་ལྗོངས་བཀའ་དྲིན་མཚུངས་མེད་སྲོང་བཙན་གྱིས། །རྗེས་བཟུང་སྐལ་བས་དམན་གྱུར་བདག་ཅི་བྱས། །ཉིན་མོའི་དབང་ཕྱུག་ནུབ་གྱུར་དེ་མ་ཐག །མི་སྲུན་འབྱུང་པོའི་བྱ་ཚོགས་དགའ་བར་གྱུར། །སྲོང་བཙན་ཞི་བར་གཟིམས་ནས་བོད་ཁམས་ལྗོངས། །བདུད་དཔུང་ལོག་པར་སྨྲ་བས་བཏབ་པར་འགྱུར། །བསིལ་ལྡན་ཆུ་ཀླུང་རླན་དང་བྲལ་བ་ཡི། །གསེར་མིག་གཞོན་ནུའི་སྡེ་ཚོགས་བདེ་མི་འགྱུར། །བྱམས་ལྡན་སྲོང་བཙན་མགོན་དང་བྲལ་བ་ན། །གངས་
ལྗོངས་ཡིད་ཅན་བདེ་བས་ཕོངས་པར་གྱུར། །གླིང་འདིར་ལོ་ཏོག་ཇི་སྙེད་སྨིན་གྱུར་པ། །དེ་ཀུན་ཀླུ་ཡི་བདག་པོའི་དཔལ་ལས་འོང༌། །ཕན་བདེའི་ལེགས་ཚོགས་ཇི་སྙེད་མཆིས་གྱུར་པ། །སྲོང་བཙན་ཡེ་ཤེས་དཔལ་ལས་ཉེ་བར་འོང༌། །མདོར་ན་ཟབ་མོའི་མདོ་སྡེ་ཟ་མ་ཏོག །གང་ལས་གང་ཞིག་བསྟན་པའི་ཡོན་ཏན་ཚོགས། །དེ་ཀུན་དེ་ཉིད་གཟིགས་པའི་སྲོང་བཙན་རྗེར། །མངའ་བ་མ་ཡིན་ཆོས་འགའ་ཡོད་མ་ལགས། །དེ་སླད་གངས་རིའི་ལྗོངས་ཀྱི་མགོན་པོ་གང༌། །མི་འབྲལ་དང་བའི་ཡིད་ཀྱིས་བསྙེན་བྱས་ཏེ། །བཀའ་དྲིན་འཁོར་མཐའ་མེད་པའི་སྲོང་བཙན་རྗེར། །བསྟོད་ཚིག་མེ་ཏོག་དོག་པས་ཅུང་ཟད་བསྔགས། །ཞེས་པའང་ཆོས་རྒྱལ་ཆེན་པོ་ལ་མི་ཕྱེད་དད་པའི་གདུང་ཤུགས་ཅན་མདོ་ཁམས་ཀྱི་སྤྲང་ཕྲུག་འཇིགས་མེད་པས་སོ།། །།
དཔལ་ངག་གི་དབང་པོ་ལ་ཕྱག་འཚལ་ལོ། །རྟ་མཆོག་གྲུབ་པའི་རིགས་ཀྱི་ཐིག་ལེར་པདྨའི་ཞལ་རས་བཞད་པ་དང༌། །ལྷན་ཅིག་གྲགས་པའི་རྟ་སྐད་དབྱངས་སྙན་འོག་མིན་བ་གམ་རྩེར་སོན་པས། །འདོད་ཁམས་གཙོ་མོ་དྲེགས་པའི་རལ་པ་རླུང་གིས་ལྗོན་ཤིང་ལོ་མ་བཞིན། །བསྙིལ་ནས་གང་གི་བྲན་མོར་ཞལ་འཆེས་རྡོ་རྗེ་གཟི་བརྗིད་དེ་ལ་འདུད། །མགོན་ཁྱོད་གཞོན་ནུའི་ན་ཚོད་ལ་བཞུགས་ཚེ། །དཔལ་ལྡན་གསང་ཕུའི་སུམ་རྩེན་དགའ་བའི་ཚལ། །འཆད་རྩོད་རྩོམ་པའི་རྔ་ཆེན་སྒྲ་ཡིས་བཀང༌། །ཟླ་ཚེས་ཕྲ་ཡང་ནམ་མཁའ་དགའ་བར་བྱེད། །དེ་ནས་ཆོས་ཚུལ་མེ་ཏོག་རབ་རྒྱས་རིག་འཛིན་གཞོན་ནུ་རྒྱལ་པོའི་དྲུང༌། །གསང་དོན་ལེགས་བཤད་ཟིལ་དངར་ཚོལ་ལ་བུང་བའི་བརྟུལ་ཞུགས་གུས་མནོས་ཚེ། །སྡེ་གསུམ་ཀློང་དགུའི་ལུང་མང་སྦྲང་རྩི་བློ་གྲོས་རྐང་པས་ཉེར་ཐོབ་པ། །རབ་མང་ཆུ་ཡི་ལྗིད་ཀྱིས་ནོན་པའི་དབྱར་གྱི་ཆར་སྤྲིན་བཞིན་དུ་གྱུར། །རིན་ཆེན་མཆོག་རྣམས་རྒྱ་མཚོ་ཆེའི། །གཏིང་རུམ་དག་ན་དཔལ་དུ་གནས། ཁྱོད་ཀྱང་སྦས་པའི་བརྟུལ་ཞུགས་ཀྱིས། །ཐེག་མཆོག་བསྟན་ལ་དཔལ་དུ་གྱུར། །ལོངས་སྤྱོད་དངོས་ཀུན་རྩ་ལྟར་བོར་ཡང་ཏིང་འཛིན་འབྱོར་པ་མཐའ་ཡས་ལྡན། །གཅིག་
པུར་ཞི་བའི་ནགས་ཁྲོད་བསྟེན་ཡང་རིག་འཛིན་མཁའ་འགྲོ་སྤྲིན་བཞིན་འདུ། །བྱ་བ་དགུ་ཕྲུགས་རིང་དུ་བཏང་ཡང་མཛད་པ་རྒྱ་མཚོ་ལྷུན་གྱིས་གྲུབ། །ས་ལམ་ཡོན་ཏན་གཏེར་བཞིན་སྦས་ཀྱང་གྲགས་པའི་ཡེ་གེ་ཕྱོགས་མཐར་རྒྱུ། །ཟབ་མོའི་བློ་གྲོས་བལྟ་དཀའ་ཡང༌། །སྟོན་པའི་ཐབས་ལ་རབ་མཁས་ཤིང༌། །ཐུགས་རྗེ་ཉིད་ཀྱི་གཞན་དབང་ཕྱིར། །ལེགས་བཤད་སྣང་བ་བརྒྱ་ཡིས་བསྟན། །མཆིམས་ཕུའི་གནས་སུ་སྙིང་ཐིག་འཆད་ཚེ་མཚོ་སྐྱེས་རྡོ་རྗེས་ཞལ་བསྟན་ཅིང༌། །རྡོ་རྗེ་ཕག་མོས་མངོན་སུམ་དབང་བསྐུར་ལྐོག་གྱུར་གནས་མང་ལུང་དུ་བསྟན། །མཁའ་འགྲོ་དམ་ཅན་རགས་པའི་གཟུགས་ཀྱིས་གཏོར་མ་ལེན་ཅིང་དགའ་བའི་སྒྲས། །འཇིག་རྟེན་ཆེར་གཡོས་དེ་མཐོང་མི་རྣམས་ངོ་མཚར་རོལ་མོ་བརྡུང་བས་བྲེལ། །ཅི་ཙམ་བརྟགས་ཀྱང་ཤེས་དཀའ་བ། །སངས་རྒྱས་ཐེག་པའི་གཙུག་ཏོར་རྩེ། ཁྱེད་ཀྱིས་ཉི་མས་རྫས་གཟུགས་བཞིན། །ས་ལེར་སྣང་བའི་བཀའ་དྲིན་མཛད། །ཟབ་གསལ་དྲི་མེད་མཁའ་ལྟར་རབ་ཡངས་མཁྱེན་རབ་དམ་པའི་ལང་ཚོ་ནི། །གླེགས་བམ་རིན་ཆེན་མེ་ལོང་ངོས་ལ་ཡི་གེའི་གཟུགས་སུ་ཤར་བ་གང༌། །མཛོད་བདུན་ཞེས་གྲགས་ལེགས་བཤད་རྒྱ་མཚོའི་མཛེས་སྡུག་ཉིང་ཁུ་བསགས་པ་ལྟའི། །སྔོན་མེད་ཡ་
མཚན་སྐལ་བཟང་མཁས་པའི་བློ་མིག་བདུད་རྩིར་ད་ལྟའནག་སྣང༌། །ནོར་འདོད་ཚོང་པ་ཆུ་ཡི་རྒྱ་མཚོར་འཇུག །མཁས་རྣམས་ཁྱོད་ཀྱི་གསུང་རབ་རྒྱ་མཚོར་འཇུག །ཆུ་གཏེར་རིན་ཆེན་སྣ་ཚོགས་འབྱོར་བས་གང༌། ཁྱོད་གསུང་ཟབ་དོན་སྣ་ཚོགས་དཔལ་གྱིས་ཕྱུག །རྩོད་ལྡན་སྙིགས་མའི་ས་འོག་གནས་དང་སྐུ་གསུམ་གཙང་རིས་གཞལ་མེད་ཁང༌། །ལེགས་བཤད་ནོར་བུའི་ཐེམ་སྐས་སྤེལ་ལེགས་རྩ་བ་བརྟན་པོས་མཚམས་སྦྱར་ཏེ། །སློབ་བརྒྱུད་མཁས་གྲུབ་ཕྲེང་བའི་ཕྱི་བཞིན་མྱུར་བར་ཤོག་ཅེས་འབོད་འདྲ་བ། །ས་མཐོར་བཞུགས་པའི་འཇིག་རྟེན་འདྲེན་པ་སྙིང་རྗེ་ཟླ་མེད་ཁྱོད་ཕྱག་འཚལ། །དེང་ནས་བྱང་ཆུབ་བར་གྱི་ཚེ་རབས་ཀུན། ཁྱོད་ཀྱི་བཀའ་བརྒྱུད་དྲི་མེད་པདྨ་ལས། །རྡུལ་བྲལ་ཆོས་ཀྱི་ལུས་སུ་སྐྱེ་འགྱུར་ཞིང༌། །ཐེག་མཆོག་སྙིང་པོའི་བསྟན་པ་རྒྱས་བྱེད་ཤོག །རྡོ་རྗེའི་གནས་ན་འོད་གསལ་ལམ་བྱེད་བསྟན་པའི་བཙས། །རྣམ་གསུམ་སངས་རྒྱས་སྤྲུལ་པའི་གཟུགས་བརྙན་གང་བཞུགས་པ། ཁྱོད་ཀྱི་གཟི་བརྗིད་ཉི་མ་བརྒྱ་པས་རེག་མཛད་དེ། །འཛམ་བུའི་གླིང་འདི་འོད་ཟེར་ཕུང་པོ་གཅིག་ཏུ་མཛོད། །ཀུན་མཁྱེན་ཆོས་ཀྱི་རྒྱལ་པོ་ལ་བསྟོད་པ་དཔྱིད་ཀྱི་ཕོ་ཉ་ཞེས་བྱ་བ་སྙིང་ཐིག་བརྒྱུད་པའི་གྲལ་
གཞུག་འཛིན་པ། །འཇིགས་མེད་བསྟན་པའི་ཉི་མས་མན་ངག་སྙིང་ཐིག་གི་ལེགས་བཤད་ལ་ཞིབ་ཏུ་བལྟ་བའི་སྐབས་ཤིག་ཡིད་ལ་ངོ་མཚར་ཆེར་རྒྱས་ཏེ་མོས་གུས་ཀྱི་ཉམས་དབྱངས་སུ་བསྡེབས་པའོ།། ༈ །།ན་མོ་གུ་རུ་ཨ་བྷྱ་དྭི་བ་སེ་ན་ཡ། །བསིལ་ལྡན་འཛིན་མའི་འཁོར་ཡུག་རབ་ཡངས་པར། །ཐེག་རྒྱལ་བསྟན་པའི་བ་དན་འཛིན་ནོ་ཅོག །གང་གི་བཀའ་དྲིན་བདུད་རྩིས་ཉེར་འཚོ་བ། །རིག་འཛིན་འཇིགས་མེད་གླིང་པར་མགོས་ཕྱག་འཚལ། །ཕུལ་བྱུང་ལེགས་བཤད་འོད་བརྒྱས་ཐེག་མཆོག་ཞིང༌། །གསལ་ནུས་ཀློང་ཆེན་ཉིན་བྱེད་མནལ་བ་ན། །མཁྱེན་བརྩེའི་ཆ་གང་འཇིགས་མེད་ཟླ་བ་ཁྱོད། །ལྔ་བདོའི་མུན་གླིང་སྐྱོབ་པ་གཅིག་པུར་བྱོན། །མཆོག་གྲུབ་སྨོན་པའི་མེ་ཏོག་དུས་བཞིན་བརྗེས། །མཚོ་སྐྱེས་ལུང་གིས་རབ་བསྔགས་བདེན་པ་བསྟེན། །བརྒྱུད་འཛིན་མྱུ་གུའི་ཕྲེང་བའང་འཐོན་ལ་ཕྱོགས། ཁྱོད་འཁྲུངས་ཚེ་ན་འདི་དག་མཉམ་དུ་བྱུང༌། །ལ་ལ་ལྡུམ་ར་བཞིན་དུ་གཞན་གྱིས་བསྐྱངས། ཁ་ཅིག་བུང་བ་བཞིན་དུ་ངལ་བརྒྱས་རྙེད། ཁྱོད་ནི་འབྱུང་ཁུངས་མཆོག་ལ་གསེར་བཞིན་དུ། །ལང་ཚོའི་མེ་ཏོག་ཆེས་ཕྲའི་གནས་སྐབས་ནའང༌། །སྐུ་ཚེ་སྔ་མའི་རྨད་བྱུང་མཛད་པ་དང༌། །
སྐྱབས་གཅིག་ཨོ་རྒྱན་བླ་མ་རྗེས་དྲན་ཞིང༌། །བྱང་ཆུབ་ཐུགས་ཀྱི་གཞན་དབང་ཉིད་གྱུར་ཏེ། །བསམ་ཡས་ཡོན་ཏན་མ་བཙལ་ལྷུན་གྱིས་གྲུབ། །པདྨའི་གདུང་འཚོབ་སྐྱིད་གྲོང་རིག་འཛིན་དང༌། །དྲི་མེད་གླིང་པས་ཆོས་ཀྱི་མཛོད་གཏད་ཅིང༌། །དོན་བརྒྱུད་རྟོགས་པའི་བང་མཛོད་ལྡེ་མིག་དང༌། །གཏེར་བརྒྱུད་ནོར་བུའི་ཅོད་པན་ཁྱོད་ལ་བྱིན། །ཐེག་མཆོག་ལམ་དང་འབྲས་བུའི་ཤིང་རྟ་ཆེ། །ཅི་བདེར་རྒྱུ་བ་དཀའ་སྤྱད་སྒྲུབ་པའི་སྲང༌། །མིང་ཙམ་ལྷག་མར་གྱུར་པའི་དུས་ཀྱི་མཐར། །སྔོན་བཞིན་གསལ་མཛད་མི་ངལ་དཔའ་བོའི་ཟླ། །བྱང་ཆུབ་མཆོག་ཕྱིར་རྟག་འགྲུས་སྦྱོར་བའི་ལམ། །གཡར་དམ་བདུན་གྱིས་བརླིང་བ་ལེགས་བརྟེན་ཏེ། །སྣ་ཚོགས་ལས་དང་གཡེང་བའི་ཁྱད་པར་ཀུན། །ཉེར་ཞིའི་སྟེགས་ལ་ངལ་གསོ་བགྱིད་དུ་སྩལ། །ཐུན་མོང་ཐུན་མིན་བྱང་ཆུབ་སེམས་གཉིས་ཀྱི། །རྒྱ་མཚོ་ཡོངས་རྫོགས་བརྩོན་པའི་ཧུབ་གཅིག་གིས། །གསོལ་བས་སངས་རྒྱས་སྙིང་པོ་རབ་བསྐུལ་ཏེ། །རྡོ་རྗེ་གསུམ་མཆོག་གྲུབ་པའི་ལང་ཚོ་རྒྱས། །དེ་ཚེ་རང་སྣང་རྡོ་རྗེའི་འོག་མིན་དུ། །ཏིང་འཛིན་མཆོག་གི་བདེ་བས་དགྱེས་རོལ་པའི། ཁྱོད་ཀྱི་འབྱོར་པ་ཅི་འདྲ་
དེ་ལྟ་བུ། །ས་གསུམ་དབང་པོ་རྣམས་ལའང་ཡོད་མ་ཡིན། །འོན་ཀྱང་ཟས་གོས་ངན་དོན་གྱིས་འཚོ་ཞིང༌། །རྡོ་བའི་མལ་སྟན་སྲ་བ་ཙམ་བལྟས་ནས། །སྐལ་པ་ངན་ཞེས་སྙིང་རྗེར་སེམས་པ་འགས། །ཕལ་དང་དམ་ཆོས་རིང་བར་མནའ་ཆུ་བཏུང༌། །རྨོངས་པས་ཁྲེལ་བའི་བསྟིང་ཚིག་རླུང་ལ་བསྐུར། །དམ་པའི་རྣམ་ཐར་བདུད་རྩི་ངོམས་མེད་གསོལ། །དེ་མཐུས་འཇིག་རྟེན་བླུན་པོའི་སྤྱོད་ཡུལ་བརྒལ། །འཕགས་པ་དགྱེས་པའི་གོ་འཕང་རབ་མཆོག་བརྙེས། ཁྱད་པར་སྔོན་སྦྱངས་ཡོན་ཏན་གཏེར་གྱི་རྒྱ། །རྡོ་རྗེ་རྩེ་མོའི་འཕྲུལ་གསང་གིས་ཕྱེ་བས། །སྤང་བླང་སེམས་འཛིན་རྩོལ་བའི་སྒྲོག་མདུད་གྲོལ། །ཀུན་བཟང་དགོངས་པའི་རྩལ་ཆེན་ཕྱོགས་མེད་རྒྱས། །ཡུལ་སྣང་ཀུན་རྟོག་རི་མོའི་འཕྲུལ་དུ་གཟིགས། །རྟོག་ཚོགས་རིག་རྩལ་སྒྱུ་མའི་འཁོར་ལོར་ཤར། །རིག་པ་གདོད་ནས་རྣམ་དག་དབྱིངས་དང་འདྲེས། །ཉག་གཅིག་ཐིག་ལེའི་ཀློང་དུ་ཆོས་ཀུན་རྫོགས། །ཞིབ་ལ་གྲངས་མང་ཤེས་བྱའི་རྡུལ་ཕྲན་དང༌། །བསམ་གྱིས་མི་ཁྱབ་གནས་ལུགས་ཟབ་མོའི་གཏིང༌། །མཐའ་དག་རང་གནས་ཡེ་ཤེས་གཅིག་ཁོ་ནའི། །གནད་ལ་བརྟེན་ནས་ཕྱག་མཐིལ་རྫས་བཞིན་
གཟིགས། །རྒྱལ་བ་རིག་འཛིན་མཁའ་འགྲོའི་ཚོགས་རྣམས་དང༌། །ཀ་དག་གཉུག་མའི་དབྱིངས་སུ་ཐུགས་ཡིད་འདྲེས། །ལྷུན་གྲུབ་འོད་གསལ་ཞིང་དུ་བགྲོ་བ་མཛད། །འགྲོ་འདུལ་རྒྱལ་ཚབ་སྐྱེས་བུར་བྱིན་གྱིས་བརླབས། །དག་པ་རྣམས་ལ་རྒྱན་བྱེད་གཞན་ཡང་འབྱུང༌། །རྙོག་བྲལ་ཆུ་ལ་ཟླ་བའི་གཟུགས་བརྙན་བཞིན། །གང་བར་གྱུར་ཀྱང་འགེངས་ཕྱིར་བརྩོན་པ་ཡོད། །རྒྱ་མཚོ་ཆེ་ལ་ཕྱོགས་བཞིའི་ཆུ་ཀླུང་བཞིན། །དེ་བཞིན་མགོན་ཁྱོད་དགོངས་པ་རྣམ་དག་ཅིང༌། །ཡེ་ཤེས་དགོས་འབྱུང་ནོར་བུའི་གཏེར་བརྙེས་པས། །དབྱིངས་ཕྱུག་མཁའ་འགྲོའི་གསང་བའི་ཆོས་མཛོད་ནས། །སྙིང་ཐིག་སྤྲུལ་པའི་གླེགས་བམ་ཆར་དུ་བསྙིལ། །རིང་ནས་རྣལ་འབྱོར་གོམས་པའི་བྱི་དོར་གྱིས། །ཤིན་ཏུ་སྦྱངས་པ་མཁྱེན་བརྩེའི་དྭངས་ཤེལ་འོད། །བསེ་རུའི་བརྟུལ་ཞུགས་ཟ་མ་ཏོག་ནང་དུ། །སྦས་ཀྱང་རང་བྱུང་པདྨའི་ཐུགས་བསྐྱེད་དང༌། །ཀློང་ཆེན་དགོངས་པའི་འོད་ཟེར་གྱིས་བསྐུལ་ཏེ། །སྔོན་མེད་ལེགས་བཤད་འོད་ལྔའི་རི་མོ་ཡིས། །རྒྱལ་བསྟན་ནམ་མཁའ་བརྒྱན་པའི་དཔལ་མཐོང་ནས། །ཕྱོགས་ཀྱི་མཛེས་མ་ཀུན་དགའི་ཅ་ཅོ་འཕེལ། །ཟབ་
ཡངས་དགོངས་པ་གཏིང་མཐའ་མི་མངོན་ཡང༌། །མ་འདྲེས་ཡོན་ཏན་གཟུགས་བརྒྱས་གསལ་བཀྲ་བ། ཁྱོད་ཀྱིས་བལྟ་བས་མི་ངོམས་གཟུགས་ཅན་ལྔའི། །གྲགས་པའི་བ་དན་བལྟར་མི་མངོན་པར་སྦས། །དེ་ཡིས་ཉེར་བོས་སྐལ་བཟང་སློབ་མའི་ཚོགས། །སྒྲུབ་དང་ཟང་ཟིང་མཆོད་པའི་ཆར་རྒྱུན་བཅས། ཁྱོད་ཀྱི་སྤྱན་སྔར་འདུ་ཞིང་སླར་གྱེས་པ། །དབྱར་དུས་མཁའ་ལ་སྤྲིན་གྱི་འདུ་འགོད་བཞིན། །བདག་ཉིད་ཆོས་ཚུལ་ལེགས་པར་བསྒོམ་པ་དང༌། །གཞན་ཕན་སྨོན་ལམ་སྒྲུབ་དཀའ་གྲུབ་པ་དང༌། །བརྒྱུད་གསུམ་གདམས་པའི་བྱིན་རླབས་བཅུད་འདུས་པས། ཁྱོད་ལ་སུ་བསྟེན་འདུན་མ་ལེགས་པའི་རྩེ། །མཁས་རྨོངས་བར་མའི་བློ་ཡི་རིམ་པ་དང༌། །མོས་པའི་བྱེ་བྲག་ལས་འཕྲོའི་ཁྱད་པར་སོགས། །སོ་སོར་གང་འཚམས་འདུལ་བའི་ཐབས་མཁྱེན་པས། །གཞན་དོན་སྤྱོད་ལ་བསྙེངས་དང་བྲལ་བ་ལགས། །སྟོབས་འབྱོར་རིགས་གཟུགས་རབ་འབྲིང་ཐ་མ་དང༌། །བྱམས་སྡང་བར་མར་གནས་པའི་སྐྱེ་བོའི་ཚོགས། །སྙོམས་པར་རྗེས་འཛིན་དམན་ལ་ལྷག་པར་བརྩེ། །དུལ་ཞིང་གཡོ་མེད་གཅིག་ཏུ་ཕན་འདོགས་བརྩོན། །མཐོན་པོས་བཀུར་དང་དམན་པས་
བརྙས་ལ་སོགས། །ཅིས་ཀྱང་མི་འགྱུར་འཆད་ལ་སྐྱོ་ངལ་སྤངས། །ས་ལྟར་འགྲོ་བ་ཀུན་གྱི་རྟེན་གནས་འོས། ཁྱོད་འདྲའི་མགོན་བཅས་སྐྱེ་དགུ་སྐལ་བ་བཟང༌། །གང་གིས་ཐེག་མཆོག་སེང་གེའི་སྒྲ་དབྱངས་ཀྱིས། །མཐའ་དབུས་ཡུལ་གྲུ་ཕལ་ཆེར་ཁྱབ་གྱུར་ཏེ། །སྙིང་པོའི་ལམ་བཟང་བཤད་དང་སྒྲུབ་པ་ཡི། །དགའ་སྟོན་ས་སྟེང་བརྒྱུད་མར་གྲགས་པ་བྱུང༌། །བིརྦ་ས་ཞག་བདུན་ཉི་མ་རྟོད་ལ་བཟུང༌། །མཐུ་སྟོབས་མགོན་ཞེས་གྲགས་པས་ས་གསུམ་འདར། ཁྱོད་ཀྱིས་སྙིང་པོའི་བསྟན་པ་ནུབ་ཀའི་དུས། །ད་དུང་རྟོད་ལ་བཟུང་བ་མཐོང་བའི་ཆོས། །ཡོན་ཏན་རང་བཞིན་རྩི་སྨན་རྒྱལ་པོ་ལྟར། །སེམས་ཅན་དོན་དུ་བདག་ཉིད་ཡོངས་བསྔོས་པ། ཁྱོད་ལ་ཆུ་ཐིགས་ཙམ་གྱི་དགེ་བསྐྱེད་ཀྱང༌། །བྱང་ཆེན་རྒྱ་མཚོའི་འཇིངས་སུ་རོ་གཅིག་འགྱུར། །དེ་ཕྱིར་ཁྱོད་མཚན་བརྗོད་དང་རྣམ་ཐར་བསྔགས། །དད་པས་གསོལ་འདེབས་བཀའ་ལ་རི་མོར་བྱེད། །གང་ཡང་ཕྱིར་མི་ལྡོག་པའི་སྐལ་ལྡན་དུ། །པད་འབྱུང་རྡོ་རྗེའི་ལུང་གིས་གསལ་བར་བསྔགས། །ཇི་སྲིད་ཚངས་པའི་མེ་ཏོག་ཡིད་བཞིན་མཚོ། །གངས་ཅན་འཛིན་མའི་དཔལ་དུ་གནས་དེ་སྲིད། །
མཚོ་སྐྱེས་རྣམ་འདྲེན་ངང་པའི་རྒྱལ་པོ་ཡང༌། །དགྱེས་པའི་འཕུར་ལྡིང་བོད་ལ་རྩེན་པར་འགྱུར། །དེ་སླད་བསིལ་ལྗོངས་འགྲོ་བའི་ཕན་བདེ་ནི། ཁྱོད་ཞལ་མཐོང་གྲོལ་ཟླ་བའི་རྗེས་འགྲོ་བས། །ད་དུང་དགྱེས་སྤྱན་གཟིགས་པའི་བདུད་རྩི་ཡིས། །བོད་འབངས་སྐྱོང་བའི་མཆོག་འདི་ཁྱོད་ལ་སློང༌། །གྲངས་མེད་རིག་འཛིན་ཞིང་ནས་དཔའ་བོ་དང༌། །མཁའ་འགྲོས་བསྟོད་དབྱངས་རོལ་མོའི་སྤྲིན་གཏིབས་པ། ཁྱོད་ཀྱི་ཡོན་ཏན་བདག་འདྲས་དཔོག་མིན་ཡང༌། །རང་ཡིད་རབ་དགའི་ཅ་ཅོ་ཕྲེང་བར་བསྡེབས། །དེ་ལྟར་བསྟོད་ལས་བྱུང་བའི་དགེ་ཚོགས་རྒྱུན། །གང་མཆིས་ཁྱོད་ཐུགས་བཞེད་པའི་ཀློང་རུམ་དུ། །འདྲེས་ནས་འོད་གསལ་ཐེག་པའི་ཆོས་འཁོར་གྱིས། །འགྲོ་ཀུན་གདོད་མའི་དབྱིངས་སུ་བྱང་ཆུབ་ཤོག །བདག་ཀྱང་སྲིད་པར་རྒྱུ་བའི་རབས་ཀུན་ཏུ། ཁྱོད་ཞབས་གཙུག་གི་རྒྱན་དུ་མི་འབྲལ་ཞིང༌། །ཐེག་མཆོག་གདམས་པའི་རོ་བཅུད་རྟག་འཐུང་བས། །རྩལ་རྫོགས་དག་པའི་དབྱིངས་ལ་དབང་སྒྱུར་ཤོག །ཀུན་མཁྱེན་རིག་འཛིན་བླ་མ་འཇིགས་མེད་གླིང་པ་ལ་བསྟོད་པ་དད་བརྒྱའི་པདྨོ་རྒྱས་བྱེད་བདུད་རྩིའི་ཟིལ་ཆར་ཞེས་བྱ་བ། །ཀད་ཀོར་སྤྲུལ་པའི་སྐུ་འཇིགས་མེད་རྡོ་རྗེ་དཔའ་
བོས་སྲིད་དུ་རིང་བའི་ལྷ་རྫས་ཀྱི་སྐྱེས་དང་བཅས་ཏེ་བསྐུལ་བའི་ངོར་དང༌། །རང་ཉིད་ཀྱི་དད་པའི་གསོས་སུའང་བསམས་ཏེ། །སྤྲང་རྒན་བསྟན་པའི་ཉི་མས་བྲིས་པ་དགེ་བར་གྱུར་ཅིག། ༈ །།གྲུབ་པའི་དབང་ཕྱུག་འཇིགས་མེད་ཕྲིན་ལས་འོད་ཟེར་ལ་རྟོགས་བརྗོད་དང་འབྲེལ་བར་གསོལ་བ་འདེབས་པའི་ཚིགས་སུ་བཅད་པ་དཔག་བསམ་ལྗོན་པའི་མེ་ཏོག་ཅེས་བྱ་བ། ན་མོ་གུ་རུ་པདྨ་ཀ་ར་ཡེ། །རང་བྱུང་པདྨས་འཇིགས་མེད་ཆོས་ཀྱི་ཁྲིར། །སངས་རྒྱས་ཕྲིན་ལས་བྱེད་པོར་དབང་བསྐུར་བ། །སྐལ་བཟང་པདྨོའི་གཉེན་གྱུར་ཡེ་ཤེས་ཀྱི། །འོད་ཟེར་སྣང་བའི་གཏེར་ཆེན་དེ་ལ་འདུད། ཁྱོད་ཀྱིས་སྔོན་ཚེ་དུས་མཐའི་འགྲོ་བ་ལ། །པདྨའི་ཟབ་གཏེར་སྦྱིན་པར་ཞལ་བཞེས་ལྟར། །བསིལ་ལྡན་ཆོས་ཀྱི་སྣང་བས་འགེང་མཛད་པ། །སངས་རྒྱས་རྡོ་རྗེར་གྱུར་ལ་གསོལ་བ་འདེབས། །དེ་ལས་སླར་ཡང་རབ་ཉི་ཁྲོ་བོའི་ལོར། ཁམས་ཀྱི་ཤར་ཕྱོགས་རྡོ་རོལ་འཛིན་མའི་ཆར། །བོང་ཆུང་ཞེས་བྱ་སྨུག་པོ་གདོང་རིགས་སུ། །སྐྱེ་བའི་མྱུ་གུ་བཟུང་ལ་གསོལ་བ་འདེབས། །བལྟམས་ཙམ་ཉིད་ནས་ཚེ་རབས་དྲན་པ་དང༌། །སྙིང་རྗེ་ཆེ་ཞིང་ཡི་
གེའི་མ་མོ་ཙམ། །སྦྱངས་པས་ཀློག་མཐར་སོན་པའི་མཁྱེན་རབ་ཀྱིས། །དཔྱད་ལྡན་ཡིད་འཕྲོག་མཛད་ལ་གསོལ་བ་འདེབས། །དེ་ཚེ་སྔགས་སྤྱོད་དཔའ་བོའི་གཟུགས་ཅན་གྱིས། །ཆོས་འཁོར་བསྐལ་བའི་མར་མེ་གསལ་འབར་དང༌། །གླེགས་བམ་གཏེར་ཁ་གཏད་ནས་དེ་དག་གི༌།བདག་པོར་ལུང་བསྟན་སྩལ་ལ་གསོལ་བ་འདེབས། །དགུང་གྲངས་བཅོ་ལྔར་ཤེས་རབ་རིན་ཆེན་ལས། །སྐྱབས་སྡོམ་རྡོ་རྗེ་ཕྲེང་བའི་དབང་བསྐུར་དང༌། །ཐུན་མོང་ལམ་རིམ་གདམས་པ་ལེགས་ནོས་ཏེ། །ཉིན་མཚན་ཆོས་ཀྱིས་འདས་ལ་གསོལ་བ་འདེབས། །ཉེར་གཅིག་ལོ་ནང་དྭགས་ལྷ་སྒམ་པོར་བྱོན། །མི་ཕམ་དབང་པོས་དགེ་བསྙེན་ཉིད་དུ་བསྒྲུབས། ། ཤྭ་རར་དཀའ་གདམས་ལམ་རིམ་དང༌། །ཆོས་དྲུག་ཟབ་ཁྲིད་བརྙེས་ལ་གསོལ་བ་འདེབས། །ཅིག་ཆར་གནས་སུ་ཕག་མོ་གསུམ་ལྡན་མར། །མཇལ་བའི་རྐྱེན་གྱིས་གང་སྣང་བདེ་བར་ཤར། །བདེ་བའང་མི་དམིགས་དབྱིངས་དང་རོ་གཅིག་འདྲེས། །ཡེ་ཤེས་བྱིན་ཆེན་ཞུགས་ལ༴་ཁམས་སུ་གདན་བཏེགས་ཟེ་ཆེན་ཀུན་རྣམ་དང༌། །ངེས་དོན་ཞབས་སོགས་མཁས་གྲུབ་དུ་མ་ལས། །དབང་ལུང་མན་ངག་བདུད་རྩི་ངོམས་
མེད་གསོལ། །ཆོས་ཀྱི་རྒྱ་མཚོར་གྱུར་ལ༴༌།རང་ཡུལ་བཞུད་ཚེ་རྒྱལ་བ་འོད་དཔག་མེད། །མཇལ་ཞིང་ཚངས་དབྱངས་རྔ་སྒྲ་གསན་པའི་མོད། །འཇིག་རྟེན་ཆོས་ཀྱིས་མི་གོས་པདྨ་ལྟའི། །རྒྱལ་སྲས་སྤྱོད་མཆོག་བརྙེས་ལ༴༌།རུ་དམ་གནས་སུ་སྒྲུབ་ལ་རྩེ་གཅིག་ཏུ། །བཞུགས་ཚེ་འཚུབ་ལྷོད་དྲག་པོ་བརྒྱུད་མ་རུ། །བྱུང་རྣམས་ལྟ་དགོངས་ནུས་པས་ཟིལ་མནན་ནས། །རྟོགས་པའི་བོགས་ཆེན་ཐོན་ལ༴༌།དུས་དེར་མནལ་ལམ་ཨོ་རྒྱན་སློབ་དཔོན་ཆེས། །གསེར་མདོག་བདུད་རྩིའི་ཆུ་ཡིས་དབང་བསྐུར་ཞིང༌། །དཀའ་སྤྱད་དུས་སུ་མི་མིན་སྐྱེ་བོ་ཡིས། །མངོན་སུམ་ཞལ་ཟས་ཕུལ་ལ༴༌།བོད་སྐྱོང་མཁའ་འགྲོའི་གཙོ་མོ་ཚེ་རིང་མས། །རང་གི་གནས་སུ་སྤྱན་དྲངས་ཞབས་ཏོག་བསྟབས། །ཕྱོགས་དེར་ལོ་བཞིར་འདས་པར་རིམ་གཉིས་ཀྱི། །རྣལ་འབྱོར་རྒྱུན་ཆགས་བསྐྱངས་ལ༴༌།དེ་ནས་ནམ་ཞིག་བསྟན་བཅོས་ཡོན་ཏན་མཛོད། །གཟིགས་ལས་མོས་གུས་གདུང་བས་རྒྱུད་བསྐུལ་ཏེ། །ཚེ་རབས་མང་པོར་རྗེས་བཟུང་རིགས་ཀྱི་བདག །ཀུན་མཁྱེན་ཞབས་པད་བསྙེན་ལ༴༌།མགོན་དེས་སྔ་འགྱུར་བཀའ་གཏེར་རབ་འབྱམས་
ཀྱི། །གདམ་ངག་དབང་བསྐུར་བུམ་པ་གང་བྱོལ་སྩལ། །གཞོན་ནུ་སངས་རྒྱས་སྨོན་ལམ་དུས་སྨིན་པའི། །རྟེན་འབྲེལ་སྲོག་རྩ་མཐུད་ལ༴༌།ཐུགས་བསྐྱེད་བཞེས་ཚེ་འོད་སྲུང་རྒྱལ་བ་ཡི། །སྐུ་གདུང་གཏེར་ཁ་བཞེས་པའི་མནལ་ལམ་གཟིགས། །བྱང་ཆུབ་ཆེ་དྲུང་ཡབ་སྲས་ལྷན་ཅིག་ཏུ། །བཟང་པོ་སྤྱོད་སྨོན་བཏབ་ལ༴༌།དགོངས་འདུས་དབང་བསྐུར་དུས་སུ་དཔོན་སློབ་གཉིས། །ཉང་རལ་སངས་རྒྱས་གླིང་པར་གྱུར་པའི་ཚུལ། །ཡེ་ཤེས་མེ་ལོང་ངོས་སུ་སྒྲིབ་མེད་གཟིགས། །སྔོན་སྦྱངས་ལས་འཕྲོ་སད་ལ༴༌།བསམ་ཡས་དབུ་རྩེར་གུ་རུའི་སྣང་བརྙན་ནི། །གྲངས་མེད་འཕེལ་བའི་རྒྱུ་ཚོགས་རྟེན་འབྲེལ་ལས། །ཕྲིན་ལས་དབྱར་མཚོ་བཞིན་དུ་རྒྱས་འགྱུར་ཞེས། །ལུང་བསྟན་མེ་ཏོག་འཐོར་ལ༴ཡབ་རྗེའི་སྤྱན་སྔར་སྒྲུབ་པའི་མཎྜལ་དང༌། །འབད་རྩོལ་ཆེན་པོས་སྤྱན་དབྱེའི་ཞབས་ཏོག་མཛད། །བདོག་དགུ་རྩལ་སྤྲུགས་མཆོད་པ་ལན་བཞི་སོགས། །མཉེས་པ་མཐར་ཕྱིན་བསྒྲུབས་ལ༴༌།ཀུན་མཁྱེན་རྗེ་ཡིས་སྙིང་ཐིག་བསྟན་པའི་མཛོད། །བཟུང་ནས་གཞན་དོན་སྤྱོད་པར་བཀས་གནང་ཞིང༌། །ཉིད་དང་དབྱེར་མི་ཕྱེད་པའི་ཞལ་བཞེས་མཛོད། །དགོངས་
ཀློང་རོ་གཅིག་འདྲེས་ལ༴༌།རིས་བྲལ་རྟེན་གསུམ་དགེ་འདུན་འདུས་པའི་སྡེ། །རྒྱ་ཆེར་མཆོད་ཅིང་སྒྲུབ་གནས་གསུམ་སོགས་སུ། །བསྙེན་སྒྲུབ་སྦྱིན་སྲེག་ཚོགས་ཀྱི་འཁོར་ལོ་ཡིས། །རྩ་གསུམ་དགྱེས་པ་སྐྱེད་ལ༴དུར་ཁྲོད་གཉན་ས་མང་པོར་གཅོད་ཡུལ་མཛད། །ཚར་ལྷོང་མཐར་ཕྱིན་གཅན་གཟན་ཁྲོ་བོ་དང༌། །ཀླ་ཀློ་གཙང་པོ་ལ་སོགས་ཐུག་ཕྲད་དུ། །ཟིལ་གནོན་བརྟུལ་ཞུགས་གྲུབ་ལ༴༌།དབུས་གཙང་མཐའ་དག་འདར་ནུས་བལ་པོའི་དམག །ལྷགས་ཚེ་བེ་ཧར་དབང་བསྡུས་བརྟུལ་ཞུགས་ཀྱིས། །ཕས་རྒོལ་སོས་ཀའི་ཐན་སྤྲིན་བཞིན་མཛད་དེ། །རྒྱལ་བསྟན་ནུས་མཐུས་བསྲུངས་ལ༴༌།རུ་བཞིར་ཐན་པས་ཉེན་ལ་རྗེས་བརྩེ་ཡིས། །སྦྱིན་སྲེག་མཛད་པའི་ཐལ་བ་མཚོར་གཤེགས་པས། །མོད་ལ་ཆར་གྱི་རྒྱུན་བཟང་འཛད་མེད་བབས། །འགྲོ་མང་སྡུག་བསྔལ་བསྐྱབས་ལ༴༌།གནམ་མཚོར་བདེ་ལྡན་ཞིང་གི་བཀོད་པ་གཟིགས། །ཙ་རི་སེང་གེ་ལ་རྩེར་ཨོ་རྒྱན་རྗེ། །མངོན་སུམ་ཞལ་མཐོང་གསོལ་འདེབས་མཛད་པའི་མོད། །ཡེ་ཤེས་དབྱིངས་གཅིག་གྱུར་ལ༴༌།ཀླུ་རིང་མདུང་རྩེ་གྱ་གྱུའི་གཞི་བདག་དང༌། །ཆུ་རྒྱུད་དགེ་བསྙེན་ལ་
སོགས་དྲེགས་པ་རྣམས། །བྱང་ཆུབ་ཐུགས་ཀྱི་ནུས་པས་དབང་གྱུར་ནས། །དང་བས་སྲི་ཞུ་བགྱིས་ལ༴ཆོས་རྒྱལ་སྡེ་དགེའི་བསྟན་སྲིད་སྲུང་བ་དང༌། །བྱང་རྒྱུད་རིག་འཛིན་གླིང་གི་ས་འདུལ་དུས། །མི་མཐུན་བདུད་དཔུང་ཕམ་པའི་རྟགས་མཚན་གྱིས། །གྲགས་པའི་རྒྱལ་རྔ་བརྡུང་ལ༴༌།བྲ་རོང་ཕྱོགས་སུ་བུད་མེད་གླུ་སྐད་དང༌། །ལྷུན་གྲུབ་སྟེང་དུ་ཚོགས་ཟངས་སྒྲ་གསན་པས། །ལྐོག་གྱུར་བདེ་སྡུག་དུ་མའི་ངང་ཚུལ་མཁྱེན། །རྟེན་འབྲེལ་རང་བྱན་ཆུད་ལ༴༌།བྲག་དཀར་སྤྲེལ་རྫོང་འཕགས་པའི་སྒྲུབ་གནས་སུ། །རྩ་གསུམ་བསྙེན་སྒྲུབ་ཆུ་བོའི་རྒྱུན་བཞིན་གཞོལ། །དག་པ་རབ་འབྱམས་རང་སྣང་རིས་མེད་ཀྱི། །དགོངས་པའི་རྩལ་ཆེན་རྫོགས་ལ༴༌།སོག་ཡུལ་བྱོན་ཚེ་གྲོག་པོ་སྐམ་པོའི་ནང༌། །དལ་འགྲོའི་ཀླུང་ཆེན་འབབས་པའི་དགེ་མཚན་གྱིས། །ཡིད་དྲངས་ཧར་ཧན་ཏ་ལེ་བླ་མ་ཞེས། །སྐྱེ་དགུས་མགྲིན་གཅིག་བསྔགས་ལ༴༌།ཇོ་ནང་དཔོན་གྱིས་ཞུས་ཏེ་མཆོད་གནས་མཛད། །ཕྱོགས་དེར་ཕན་བདེའི་ལེགས་ཚོགས་སྤེལ་སླད་དུ། །མངོན་མཁྱེན་ནུས་སྟོབས་ཟད་མི་ཤེས་པ་བསྟན། །འབྲེལ་ཚད་དོན་ལྡན་མཛད་ལ༴ངག་དབང་ཝང་དང་སྒོ་མེ་ཆོས་རྗེས་མཚོན། །
སྐལ་ལྡན་མང་པོར་སྙིང་ཐིག་ཆོས་ཆར་ཕབ། །རྣལ་འབྱོར་དབང་ཕྱུག་བྱམས་པ་དགེ་ལེགས་ཀྱིས། །འཇིག་རྟེན་བླ་མར་བསྔགས་ལ༴༌།གོང་མའི་ལུང་གིས་མདའ་ཚན་བཅུ་གཉིས་ཀྱི། །བླ་མར་བསྐོས་སོགས་རྙེད་བཀུར་ཆེར་བྱུང་ཡང༌། །ཞེན་མེད་སྨོན་ལམ་མཐུན་པའི་གདུལ་བྱའི་ཆེད། །དགོངས་ཏེ་བོད་ཡུལ་བྱོན་ལ༴༌།ཡོངས་ཤར་ཤུག་ཆེན་གཉིས་སུ་གཙུག་ལག་ཁང༌། །བསྐྲུན་ཚེ་རྡོ་ཡི་གླེགས་བུའི་གཏེར་ཁ་ཕྱུངས། །བསྐལ་བཟང་རྒྱུད་རིས་བཀའ་འགྱུར་གླེགས་བམ་སོགས། །དཀོན་མཆོག་རྟེན་མང་བཞེངས་ལ༴༌།སླར་ཡང་སྡེ་དགེ་ལྷོ་བྱང་ཁམས་ཧོར་དང༌། །རྡོ་འཛི་སྨར་དང་ཟླ་སྙི་གསེར་ཁོག་ཀུན། །ཞབས་ཀྱིས་ལེགས་བཅག་སྐྱེ་དགུ་བགྲང་ཡས་པ། །ཞལ་མཐོང་འབྲེལ་བས་བསྡུས་ལ༴༌།དེ་དག་རྣམས་སུ་འཁོན་སྡུམ་འདྲེ་འདུལ་དང༌། །མངོན་ཤེས་ལ་བརྟེན་བླང་དོར་གནས་མང་བསྟན། །མཆོད་སྦྱིན་སྲོག་བསླུ་རྟེན་བཞེངས་རྒྱས་པར་སྤེལ། །གཞན་ཕན་སྒོ་མཐའ་ཡས་ལ༴༌།ལྷག་པར་དབང་བསྐུར་སྦྱིན་སྲེག་རབ་གནས་དང༌། །གནས་ལུང་མྱོང་གྲོལ་བདུད་རྩིའི་སྦྱིན་པ་སོགས། །རྣམ་མང་སྔགས་དང་རྒྱུད་ཀྱི་
སྦྱོར་བ་ཡིས། །གདུལ་བྱའི་དོན་ཆེན་བསྒྲུབས་ལ༴༌།དེ་ཚེ་སྒྲུབ་བརྩོན་ངག་དབང་ཆོས་འབྱོར་དང༌། །ངོར་ཆེན་བྱམས་པ་ནམ་མཁའ་འཆི་མེད་སོགས། །དམ་པ་མང་པོར་ཟབ་ཆོས་བདུད་རྩི་བཞེས། །འཆད་སྤེལ་ཕྲིན་ལས་བསྐྱངས༴༌།རབ་ཡིད་ལྕགས་རྟར་འབྲིང་རི་སྨུག་པོའི་ཞོལ། །སྦྱང་ཚང་ལུང་པ་པདྨའི་དབྱིབས་ཅན་དུ། །ལྷ་ཁང་སྒྲུབ་སྡེའི་བཀོད་པ་གསར་བསྐྲུན་ནས། །མི་གཡོའི་ཆོས་སྟན་བཟུང་ལ༴༌།གནས་དེར་གཏན་པ་མེད་པའི་ཆོས་སྦྱིན་ལ། །མདོ་ཁམས་སྡེ་དགེ་ནས་བཟུང་རྒྱལ་རོང་དང༌། །རེབ་ཀོང་སོག་ཡུལ་བར་གྱི་གདུལ་བྱའི་ཚོགས། །ཉི་ཟེར་རྡུལ་བཞིན་འཁྲིགས་ལ༴༌།སྙིང་ཐིག་གོང་འོག་མཛོད་བདུན་ངལ་གསོ་གསུམ། །རྒྱུད་འབུམ་ལ་སོགས་ཆོས་འཁོར་འབྱམས་ཀླས་ཀྱིས། །རྙིང་བསྟན་གྲུ་བཞིར་རྒྱས་པའི་ས་བོན་བཏབ། །བསྟན་འཛིན་ཕྲེང་བ་སྤེལ་ལ༴་ཁྱད་པར་ཐུན་མོང་ལམ་གྱིས་རྒྱུད་སྦྱངས་ནས། །རྫོགས་ཆེན་སྙིང་ཐིག་སྒོམ་པའི་རྣལ་འབྱོར་ཁྱུས། །མདོ་ཁམས་རི་སུལ་ཀུན་ཏུ་ཁྱབ་མཛད་པ། །སངས་རྒྱས་གདུང་འཚོབ་ཆེ་ལ༴ཁྱིམ་གནས་རྣམས་ཀྱང་ཡང་དག་ལྟ་བ་དང༌། །མི་འཚེའི་བརྟུལ་ཞུགས་
འཛིན་ལ་རབ་སྦྱར་ཞིང༌། །ཡན་ལག་བརྒྱད་པའི་ཁྲིམས་དང་ཡིག་དྲུག་སྒྲས། །ས་སྟེང་རྒྱས་པར་བཀང་ལ༴རྨོངས་རྟུལ་བླུན་པོ་འདུས་པའི་མཐའ་འཁོབ་ཏུ། །མཐོ་རིས་ཐར་པར་བགྲོད་པའི་ལམ་བཟང་པོ། །ཚོང་དུས་སྲང་ལྟར་གསལ་བ་ཁྱོད་ཀྱི་དྲིན། །ལོང་བ་མིག་འབྱེད་ཁྱོད་ལ༴༌།ཇོ་ཤཀ་ཞལ་བལྟར་ལམ་གྱིས་ངལ་བ་རྣམས། །དབུགས་འབྱིན་ཟས་ཀྱི་ཡོ་བྱད་རྐྱེན་སྦྱར་ཞིང༌། །བསམ་ཡས་ཞིག་གསོར་སྟོང་དངུལ་གསུམ་ལྷག་གིས། །མཐུན་རྐྱེན་ཞབས་ཏོག་ཕུལ་ལ༴༌།མཆུ་ཟླའི་ཚེས་བཅུར་བདེ་གཤེགས་རིགས་འདུས་ཀྱི། །དཀྱིལ་འཁོར་བཞེངས་སྒྲུབ་མཆོད་པའི་རྒྱུན་བཙུགས་ཏེ། །འགྲོ་བའི་རེ་སྐོང་བསོད་ནམས་དཔག་བསམ་ཤིང༌། །ཕ་མཐའ་ཡས་པར་བསྐྲུན་ལ༴༌།དེ་ལྟར་སངས་རྒྱས་ཞིང་ལ་དགེ་རྩ་བསྐྱེད། །ཐེག་མཆོག་ཆོས་ལ་བྱ་བ་རྒྱ་ཆེར་མཛད། །གྲངས་མེད་གདུལ་བྱའི་འཇིག་རྟེན་སྨིན་མཛད་ཅིང༌། །སྐུ་ཚེ་མཐར་ཕྱིན་བཞུགས་ལ༴་ཁྱུ་མཆོག་ཆོ་འཕྲུལ་ཟླ་བའི་བཅུ་གསུམ་ཉིན། །འཇའ་འོད་མེ་ཏོག་ཆར་གྱིས་ནམ་མཁའ་བཀང༌། །དེ་ཡིན་མ་ཕྱེད་ལོངས་སྐུའི་ཆས་ཞུགས་ཏེ། །འོད་གསལ་
ཆོས་སྐུར་གཟིམས་ལ༴་ཁྱོད་སྐུ་ཞུགས་ཀྱིས་སྦྱངས་པའི་ལྷག་མས་ཀྱང༌། །བསྟན་འགྲོའི་དོན་ཆེན་བྱེད་པར་ཞལ་གྱིས་བཞེས། །དུས་རྣམས་ཀུན་ཏུ་རྩི་སྨན་སྡོང་པོ་ལྟར། །ལུས་ཅན་ཉེར་འཚོར་གྱུར་ལ༴༌།མགོན་ཁྱོད་རྣམ་ཐར་ནོར་བུའི་རྒྱུད་མངས་ནི། །མོས་གུས་སོར་རྩེས་བསྐུལ་བའི་རྟོགས་བརྗོད་དབྱངས། །ཅུང་ཟད་བླངས་འདིས་བདག་དང་འགྲོ་བ་ཀུན། །ཐེག་མཆོག་བཤེས་གཉེན་དམ་པས་རྗེ་འཛིན་ཤོག །ཚེ་རབས་ཕྲེང་བར་དཔལ་ལྡན་བླ་མ་མཆོག །ཐབས་ཚུལ་ཀུན་གྱིས་མཉེས་པ་ལྷུར་ལེན་ཅིང༌། །བཀའ་བཞིན་སྒྲུབ་པའི་བརྩོན་འགྲུས་མཐར་དབྱུང་སྟེ། །ས་གསུམ་བླ་མའི་གོ་འཕང་མྱུར་ཐོབ་ཤོག །།ཅེས་པའང་གམ་དུ་འཁོད་པའི་དགེ་ཚུལ་འཇིགས་མེད་ཆོས་ཀྱི་བློ་གྲོས་ཀྱིས་གྲུབ་རྗེའི་རྣམ་ཐར་གསོལ་འདེབས་གོ་བདེ་བ་ཞིག་རྩོམ་ཞེས་ནན་གྱིས་བསྐུལ་བ་ལྟར། འཇིགས་མེད་བསྟན་པའི་ཉི་མས་རིག་འཛིན་བརྒྱུད་པའི་ཕྲེང་བར་གསོལ་བ་བཏབ་སྟེ། །རྒྱལ་བ་ལྷ་ལས་བབས་པའི་དུས་ཆེན་ལ་བྲིས་པ་འབྲེལ་ཚད་རིག་འཛིན་བླ་མས་རྗེས་སུ་འཛིན་པའི་རྒྱུར་གྱུར་ཅིག ༈ །།གང་གི་རྨད་བྱུང་ཐབས་དང་སྙིང་རྗེའི་མཐུས། །
འོག་མིན་ཞིང་གི་སངས་རྒྱས་སྲས་བཅས་ཀྱི། །དབང་བསྐུར་བདུད་རྩིའནག་རབ་དམན་བདག་ལྟ་བུའི། །སྐལ་བར་ཐོབ་མཛད་དྲིན་ཆེན་ཆོས་ཀྱི་རྗེ། ཁྱོད་ཀྱི་ཡོན་ཏན་དྲན་པས་མཆི་མ་གཡོ། །བཀའ་དྲིན་ཕྲེང་བ་རྗེས་དྲན་ཐལ་མོ་སྦྱོར། །ད་དུང་བྱང་ཆུབ་བར་གྱི་ཚེ་རབས་ཀུན། ཁྱོད་ཞབས་སྤྱི་བོས་ནོད་པར་སྨོན་ལམ་འདེབས། །གང་གི་ཟེའུ་འབྲུར་མགོན་པོ་ཁྱོད་བལྟམས་པས། །ལྷར་བཅས་འཇིག་རྟེན་ཀུན་དགའི་གླུ་ལེན་པ། །གཉོས་ཞེས་གྲགས་པའི་རིགས་ཀྱི་པདྨ་དཀར། །ཡོན་ཏན་འདབ་བརྒྱ་ལྡན་ལའང་མགོས་ཕྱག་འཚལ། །གང་དུ་མགོན་ཁྱོད་སྐྱེ་བའི་སྒྱུ་འཕྲུལ་གྱིས། །བྲིས་པའི་དགེ་མཚན་ཡུན་རིང་གནས་གྱུར་པ། །གཏེར་ལྷུང་ཞེས་བྱ་ཡི་གེའི་མེ་ཏོག་གིས། །མཛེས་པའི་ཡུལ་འཁོར་དེ་ལའང་མགོས་ཕྱག་འཚལ། །གང་ཞིག་མགོན་ཁྱོད་ལྷུམས་ཀྱི་པདྨོ་ལས། །རྣམ་པར་གྲོལ་བའི་ལང་ཚོའི་གཟི་འོད་ཀྱིས། །སྐྱེ་དགུ་ཀུན་གྱི་བསོད་ནམས་ཞིང་མཛད་པ། །རི་བོ་དེའུ་ཆུང་དེ་ལ་མགོས་ཕྱག་འཚལ། །རྗེ་བཙུན་འཁྲུངས་ཚེ་དབུ་སྟེང་ཡར་ངོ་ཡི། །རྫོགས་པ་དང་པོའི་གདུགས་མཛེས་ཉེར་བཟུང་སྟེ། །སྲིད་ཞིའི་འབྱོར་པ་རྒྱས་
མཛད་རེས་ཀྱི་གཟའ། །དཔལ་ལྡན་ཟླ་བའི་སྲས་ལའང་མགོས་ཕྱག་འཚལ། །གང་ཞིག་རིག་འཛིན་གཞོན་ནུའི་ཟླ་བ་ནི། །དང་པོར་འཆར་ཚེ་རང་གི་ཡོན་ཏན་ཚོགས། །ས་ལ་དགའ་སྟོན་བཤམས་པ་ལྟར་བཀོད་པ། །རྒྱུ་སྐར་ལྷ་མོ་ནབ་སོ་དེ་ལའང་འདུད། །ཀུན་མཁྱེན་རྗེ་ཁྱོད་ལན་རེ་དྲན་པས་ཀྱང༌། །སྙིང་གི་གདུང་བ་སེལ་ཕྱིར་གལ་ཏེ་ཁྱོད། །རྗེས་དྲན་མཚན་མར་འགྱུར་ན་དེ་ཡི་སླད། །དེའུ་མགོའི་ཁྱི་རྣམས་ལའང་བདག་ཕྱག་འཚལ། །ལི་ཐུར་བདུན་པའི་ཉེར་བདུན་ལ་གཟའ་སྐར་འདི་གཉིས་འཛོམ་པར་ཁ་བྱང་ཐེབས་པ་མཐོང་བས་རྐྱེན་བྱས་ཏེ་བླ་མ་དྲན་ནས་སོ།། ༈ །།ན་མོ་གུ་རུ་ལོ་ཀི་ཤྭ་ར་ཡ། འཇམ་ཞིང་ཟབ་པ་རྡོ་རྗེའི་གསུང་དབྱངས་ནི། །མཁྱེན་བརྩེའི་ལྷ་མཆོག་འཇིག་རྟེན་དབང་པོ་རུ། །རྣམ་པར་ཤར་བའི་ངོ་མཚར་སྒྱུ་མ་ལ། །མི་འཕྲོག་དང་བའི་མེ་ཏོག་གྲུ་ཆར་འབེབ། ཁྱོད་ཀྱིས་བསིལ་ལྡན་ལྗོངས་འདིར་མི་དབང་དང༌། །པཎ་གྲུབ་ལོ་ཙཱ་ཁྱིམ་བདག་དྲ་མ་སོགས། །དུ་མའི་གཟུགས་ཀྱིས་ཕན་བདེའི་གདུགས་དཀར་ནི། །རྩིབས་བརྒྱར་བྲེས་པའི་དྲིན་ལ་སུ་མི་གུས། །ལྷག་པར་སྙིགས་མ་ལས་ཀྱང་ཆེར་སྙིགས་པའི། །དུས་ཀྱི་རྒྱ་མཚོ་ཟབ་མོར་ལྷུང་གྱུར་པ། །
བདག་ཅག་བརྩེ་ཆེན་གྲུ་ཡིས་རྗེས་འཛིན་ཕྱིར། །ཕྱོགས་འདིར་སྐྱེ་བའི་སྒྱུ་འཕྲུལ་བསྟན་ལ་འདུད། །མཁས་ཤིང་དྲང་ལ་བློ་གྲོས་བརྟན་གྱུར་ཅིང༌། །གཏོད་དང་ངོ་ཚ་ཤེས་པའི་ནོར་ལྡན་པ། །ཆེན་པོའི་རིགས་ཀྱི་ནང་དུ་ཁྱོད་བལྟམས་ཏེ། །འབྱུང་ཁུངས་བཟང་པོའི་གསེར་བཞིན་མཁས་པས་བཀུར། །པད་དཀར་རྒྱས་པའི་ཞལ་མངའ་ཁྱོད་ཀྱི་སྐུ། །ལྷུམས་ཀྱི་ཁང་བརྩེགས་ནང་ནས་བྱུང་མ་ཐག །གསལ་རྫོགས་དྲང་སྲོང་དུལ་བའི་ཆ་བྱད་ཀྱིས། །འགྲོ་ལ་ཚངས་པའི་སྤྱོད་ཚུལ་སློབ་པ་བཞིན། །མཚན་མོས་ཉི་འོད་གུར་གུམ་འཐོར་བ་དང༌། །འབབ་ཆུའི་ན་ཆུང་འོ་མ་འཇོ་བ་སོགས། །བཀྲ་ཤིས་ལྟས་ཀྱི་མེ་ཏོག་མ་རྙིངས་པ། །མང་པོའང་ཁྱོད་བལྟམས་དུས་སུ་བྱུང་བར་གྱུར། །མཐུན་པའི་འཁོར་དང་དམ་པའི་ཉེ་དུ་དང༌། །ཆོས་བཞིན་བསྒྲུབས་པའི་ནོར་དང་རིག་པ་ཡི། །གཟི་བརྗིད་ལྡན་སླད་ཁྱིམ་ན་གནས་ཚེ་ཡང༌། ཁྱོད་ཀྱིས་འཇིག་རྟེན་ཕལ་ཆེར་ཟིལ་གྱིས་མནན། །གཞོན་ཡང་རྒྱན་པའི་བརྟན་དང་ཞི་ལ་གནས། །མཐོ་ཡང་མ་དྲེགས་སྐྱེ་བོའི་བྲན་ལྟར་མཛད། །འབྱོར་ཡང་ཕྱི་ཕྱིར་མངོན་པར་འབྱུང་ལ་དགྱེས། །གསལ་ཡང་དགོངས་པའི་གཏིང་ནི་དཔག་པར་དཀའ། །
ཁྱོད་སྔོན་ནག་པོ་ཆེན་པོ་གདོང་བཞི་པས། །སིལ་སྙན་འཁྲོལ་བའི་དབྱངས་ཀྱིས་ས་སྐྱ་པའི། །བསྟན་འཛིན་ཚོགས་ཀྱི་དབུས་སུ་སྤྱན་དྲངས་ལྟར། །དུས་འདིར་ས་ངོར་མཁས་པའི་མགོན་དུ་བྱོན། །བདེ་ལྡན་ཞིང་དུ་ཚེ་དཔག་མེད་མགོན་ལས། །རྒྱལ་ཚབ་དབང་བསྐུར་ཅོད་པན་ནོད་པ་ལྟར། །འདིར་ཡང་རྒྱལ་བའི་གདུང་འཚོབ་ཆེ་རྣམས་ལས། །སྡོམ་གསུམ་མེ་ཏོག་གཙང་མའི་ཐོད་རྒྱན་བཞེས། །རབ་འབྱམས་ཞིང་ན་རྒྱལ་སྲས་འཁོར་གྱི་དབུས། །ཐེག་མཆོག་འཆང་བའི་སྐྱེས་བུར་གྱུར་ཟིན་ཡང༌། །ཆོས་སྨྲའི་དྲུང་ན་ཐལ་མོ་སྦྱར་བཏུད་དེ། །གུས་བཅས་ལུང་མང་ནོད་པའི་གཟུགས་སུའང་སྣང༌། །བརྟན་ཡང་ཆོས་ལ་གུས་པའི་དབང་གྱུར་པས། །མཁས་པ་གནས་པའི་ཡུལ་ནས་ཡུལ་ཀུན་རྒྱུས། ཁྱོད་ཀྱིས་གསན་པའི་ཡོལ་གོས་མ་བཟུང་བའི། །གདམ་ངག་བདུད་རྩི་ཐོགས་པ་འགའ་མ་མཆིས། །སྐྱེ་དགུ་ཆོས་ལ་རི་མོ་མི་བྱེད་ཕྱིར། །རྒྱལ་བསྟན་གཟི་འོད་ཉམས་པའི་དུས་མཐའ་འདིར། །སྔོན་བྱོན་དཔའ་བོ་རྣམས་ཀྱིས་ཆོས་ཚོལ་སྲོལ། །གསལ་ནུས་སེང་གེའི་མཐུ་རྩལ་ཁྱོད་ཀྱིས་བསྟན། །མཐུ་ཆེན་ཁྱོད་ལྟ་བུ་ཡི་དབེན་པའི་བདེ། །འདུ་འཛི་ཕྱི་རོལ་
ཉེས་པས་ག་ལ་བརྫི། །དེ་ལྟའནག་གདུལ་བའི་འཇིག་རྟེན་སྨིན་སླད་དུ། །དུས་ཀུན་འདུ་འཛིས་སྐྱོ་བའི་སྤྱོད་ཚུལ་བསྟན། །ལེགས་ཚོགས་རྩ་བ་བཤེས་གཉེན་བསྟེན་པ་ནས། །རྒྱུད་རྒྱལ་རྡོ་རྗེ་རྩེ་མོའི་ཟབ་ལམ་བར། །ཐུབ་བསྟན་ཡོངས་སུ་རྫོགས་པའི་སྒྲུབ་བརྒྱུད་ཀྱི། །བ་དན་ཕྱོགས་ཀྱི་བུ་མོས་མཐོང་བ་བཙུགས། །ཚུལ་ཁྲིམས་ལ་གནས་མང་དུ་ཐོས་པ་དང༌། །མང་ཐོས་སྙིང་པོ་སྒྲུབ་ལ་འདྲིལ་བྱེད་པའི། །སངས་རྒྱས་དགྱེས་པའི་ལག་ལེན་མ་ནོར་བ། ཁྱོད་ཀྱི་རྣམ་ཐར་བརྟགས་ལས་ཤེས་པར་འགྱུར། །བསྟན་འཛིན་གཙོ་བོ་ཁྱོད་ཀྱི་རྗེས་སློབ་པ། །བཤད་སྒྲུབ་སྟོབས་ཀྱི་འཁོར་ལོས་ཐུབ་བསྟན་གླིང༌། །དབང་སྒྱུར་མཁས་དང་གྲུབ་པའི་ཁྱུ་མཆོག་བརྒྱས། །གནས་དང་གནས་སུ་རྫོགས་ལྡན་ཐིག་ལེ་བཀོད། །དམ་ཆོས་འཆད་དང་འབྲི་དང་སྤེལ་བ་དང༌། །དེ་བཞིན་ཆོས་འདུལ་རབ་འབྱུང་བསྔགས་པ་དང༌། །རྣམ་མང་ལོངས་སྤྱོད་སྒོ་ནས་བསྙེན་བཀུར་སོགས། །ཐབས་ཚུལ་དུ་མས་བསྟན་ལ་སྨན་ཡོན་བཏགས། །གདུལ་བྱའི་ཁམས་དང་འདུལ་བྱེད་ཐབས་ཀྱི་སྒོ། །བསམ་མི་ཁྱབ་ཕྱིར་རྒྱལ་བའི་བསྟན་པ་ཀུན། །མར་དང་མར་གྱི་ཉིང་ཁུ་མཐུན་པ་
བཞིན། །བདུད་རྩིའི་རོ་གཅིག་ཉིད་དུ་ཁྱོད་ཀྱིས་གསུངས། །སྟོན་པ་མཉམ་མེད་དེ་ཡི་བསྟན་འཛིན་ནི། །མཆོག་དམན་གང་གིའང་ཉེས་པ་མི་གླེང་ཞིང༌། །དེ་དག་ཡོན་ཏན་སེན་རྩེའི་རྡུལ་ཙམ་ཡང༌། །སངས་རྒྱས་ཞབས་རྡུལ་ལྟ་བུར་དབུ་ལ་འཇོག །ཆོས་སྤོང་ལས་ཀྱི་གཡང་སར་ཕྱོགས་རྣམས་ཀྱང༌། ཁྱོད་བསྙེན་ཁྱོད་ཀྱི་སྤྱོད་ཚུལ་ལ་བལྟས་ན། །བདེ་བླག་ཆོས་ཀྱི་ལམ་དུ་འགྲོ་འགྱུར་བས། ཁྱོད་ནི་ལུས་ཅན་ཆོས་ཀྱི་ཟམ་པ་ལགས། ཁྱད་པར་སྔགས་རྒྱུད་ཀུན་ལ་ཆོས་མཁས་ཤིང༌། །རབ་འབྱམས་འཁོར་ལོའི་བསྙེན་པ་མཐར་སོན་ཏེ། །འགྲོ་ལ་དབང་བསྐུར་སྦྱིན་པའི་མཛད་པ་ཡིས། །ཟུང་འཇུག་ལམ་སྲོལ་ལམ་པོ་ཆེ་བཞིན་བགྱིས། །དཔལ་ལྡན་ཧེ་རུ་ཀ་ཡི་གསང་མཛོད་ནས། །སྔོན་མེད་རྡོ་རྗེའི་ཆོས་གཏེར་སྤྱན་དྲངས་ཏེ། །ཐུན་མོང་མིན་པའི་ལས་དང་སྐལ་ལྡན་རྣམས། །རྡོ་རྗེ་ཆོས་དང་སྐལ་པ་མཉམ་པར་བསྒྲུབས། །སྣ་ཚོགས་གྲུབ་མཐའི་མན་ངག་མེ་ཏོག་གི༌།ལྡུམ་རའི་ཚལ་ལ་ཉིན་བཞིན་རྟོག་མཛད་དེ། །གང་གང་རྙིས་དང་འཁྲུགས་པ་དེ་དང་དེ། །གསོ་དང་རྣལ་མར་འཇོག་ལ་བརྩོན་ཞིང་བཞུགས། ཁྱོད་ནི་གྲགས་པའི་དྲི་བསུང་རིང་འཕྲོ་ཞིང༌། །མཆོག་
ཏུ་དགའ་སྐྱེད་གཟུགས་ཀྱི་དཔལ་མངའ་དང༌། །ཆོས་དང་ཟང་ཟིང་བཏུང་བའི་རྒྱུན་མང་བས། །དབྱར་དུས་སྤྲིན་བཞིན་གདུལ་བྱའི་བུང་བ་འདུ། །དམ་ཆོས་སྒྲོམ་ཆེན་བདེ་གཤེགས་ཟ་མ་ཏོག་ཁྱོད་ཀྱི་ཞལ་རས་མཐོང་དང་ཟབ་མོའི་དབྱངས། །ཐོས་དང་ཚུལ་ཁྲིམས་དྲི་ཡིས་ཕོག་པའི་འགྲོ། །ཛམྦུའི་གླིང་འདིར་འོངས་པ་ལེགས་པ་ཡིན། །བདེན་སྨྲ་གོམས་པའི་བསོད་ནམས་གཟི་འབར་བ། ཁྱོད་གསུང་ཆོས་ཀྱི་སྒྲ་དབྱངས་མཐོན་པོ་ཡིས། །རྒྱ་མཚོའི་གོས་ཅན་ལྷ་ཡི་རྔ་བོ་ཆེས། །སྭ་སྟི་སྒྲོགས་པའི་ནམ་མཁའ་བཞིན་དུ་མཛེས། །དེ་མཐུས་ཆོས་མིན་འབྱུང་པོའི་དམག་སྡེ་ནི། །སྟོབས་ཀྱི་རྒྱལ་མཚན་བསྙིལ་ནས་རིང་དུ་བྱེར། །སྲིད་པའི་གྲོང་འདིར་དྲི་མེད་མངོན་མཐོ་དང༌། །ངེས་ལེགས་ཆོས་ཀྱི་དགའ་སྟོན་དཔག་ཡས་བྱུང༌། །ལྷ་མིན་ཁྲོས་པའི་དཔུང་བཅས་ཀླ་ཀློ་རྣམས། །མགོན་ཁྱོད་ཇི་སྲིད་བཞུགས་པར་གཟི་མེད་དེ། །མཐུ་སྟོབས་རྡོ་རྗེ་རྭ་བས་མཚམས་བཅད་ཕྱིར། །དེ་དག་བསིལ་བའི་ལྗོངས་འདིར་དུས་མང་རྡུགས། །གདུག་ཅན་འབྱུང་པོ་བསད་བསྐྲད་གཟིར་བ་དང༌། །བརྟན་གཡོའི་དངོས་ཀུན་ལྷག་པར་གནས་པ་དང༌། །བཀྲ་ཤིས་ཚེ་དང་བདུད་རྩིའི་
སྒྲུབ་པ་སོགས། །རྣམ་པ་མང་པོས་ས་སྟེང་ཕན་བདེ་སྤེལ། །ཅི་མཛད་ཆོས་ཀྱི་མཚམས་ལས་མི་འདའ་དང༌། །དེ་དག་ཀུན་ཀྱང་རིས་སུ་མ་ཆད་པའི། །བསྟན་འགྲོའི་ཉེར་འཚོ་ཁོ་ནར་འདུག་པ་འདི། །བསྙོན་མེད་གཟུ་བོའི་བློ་ལྡན་ཀུན་ལ་གྲུབ། །བསྟན་པ་སྤྱི་ཡི་ས་ཆེན་སྐྱོང་བ་ཁྱོད། །རང་འཚོས་ངོམས་པ་སྟོན་རློམ་གདོལ་པའི་ཁྱུར། །སྲེ་བའི་རྨོངས་པ་མཐོང་ནས་བདག་གིས་ནི། །མཐོང་ཐོས་གདངས་སྙན་ལྟ་བུའི་ང་རོ་སྒྲོག །ཆོས་ཀུན་སྒྲ་བརྙན་ལྟ་བུར་གཟིགས་པའི་སྤྱན། ཁྱོད་ལ་བསྟོད་སྨད་མཐའ་དག་མཉམ་གནས་ཀྱང༌། །རང་གི་ཡིད་ལ་དགེ་བ་གནས་བྱའི་ཕྱིར། །བསྟོད་པ་བརྒྱུས་པའི་ཕྲེང་འདི་བརྩེ་བས་བཞེས། །དེ་ཡི་དགེ་བས་བྱང་ཆུབ་ཐོབ་བར་གྱི། །ཚེ་རབས་ཀུན་ཏུ་ཁྱོད་ཀྱིས་རྗེས་འཛིན་ཞིང༌། །སྨོན་དང་སྤྱོད་པ་མཐའ་དག་མགོན་ཁྱོད་དང༌། །མཐུན་པར་བསླབ་ནས་ཁྱོད་བརྙེས་འགྱུར་བར་ཤོག །འཕགས་པ་སྤྱན་རས་གཟིགས་དགེ་སློང་གི་གཟུགས་སུ་རྣམ་པར་རོལ་པ་ལ་ཅུང་ཟད་བསྔགས་པའི་ཚིག་གི་ཕྲེང་བ་པདྨ་དཀར་པོའི་ཆར་ཞེས་བྱ་བ་རྡོ་རོང་གི་སྤྲང་པོ་འཇིགས་མེད་བསྟན་པའི་ཉི་མས་འཕར་བའི་ལོའི་གྲོ་བཞིན་ཟླ་བའི་དམར་ཕྱོགས་ཀྱི་རྫོགས་པ་དང་པོར་བཀྲ་
ལེགས་མདངས་ཆེན་གྱི་རི་བོའི་གཙུག་ལག་ཁང་དུ་མཆོད་པའི་རོལ་མོར་དཀྲོལ་བའོ། །སྭ་སྟི་ཀུ་རུ།། ༈ །།རྒྱ་གར་ཆོས་ཀྱི་ཡུལ་གྲུན། །པཎ་ཆེན་འཇམ་དཔལ་བཤེས་གཉེན་བྱུང༌། །མཁས་གྲུབ་རྣམ་ཐར་ཆེས་འཕགས་ཀྱང༌། །རིན་ཆེན་གླིང་ན་ཁྱད་འཕགས་མང༌། །གངས་ཅན་ས་ཡི་ལྟེ་བ་རུ། །ཆོས་རྒྱལ་ཚངས་པའི་མེ་ཏོག་བལྟམས། །མཛད་པའི་ཕྱག་རྗེས་ཕུལ་བྱུང་ཡང༌། །དུས་བཟང་མི་ལ་ཕུལ་བྱུང་མང༌། །བོད་ཆེན་དུས་ཀྱི་རྒུད་པའི་ནང༌། །མཁྱེན་བརྩེ་ཡིད་བཞིན་གཏེར་ཁ་རྡོལ། །སངས་རྒྱས་མཛད་པས་འགྲོ་མང་བཏུལ། །དགུན་སྐྱེས་པདྨ་ངོ་མཚར་ཆེ། །ད་དུང་ངོ་མཚར་གཞན་ཡང་མཐོང༌། །པདྨ་མདོ་ཁམས་ཡུལ་འཁྲུངས་ཏེ། །ཟླ་བའི་རྒྱལ་པོ་བདུན་ཅུར་གནས། །དྲི་བསུང་མཁའ་འགྲོའི་གླིང་ཀུན་ཁྱབ། །སྦྲང་རྩི་དགའ་ལྡན་ལྷ་ཡང་འཐུང༌། །དེ་ཡི་རྫི་ཕྱོགས་ལ་བརྟེན་ཡང༌། །གེ་སར་རོ་བཅུད་མི་འདོད་ཅིང༌། །བཀྲེས་པའི་མི་ཡིས་ལྟོ་ཞུམ་ལ། །མི་གསལ་གླུ་ནི་འཛེར་འཛེར་བོས། །སྨྲེ་ཞིང་ལྕེ་ཚའི་མེ་ཏོག་ཚལ། །འཕྱན་པས་ངལ་བ་སྐལ་ཆད་ཀྱི། །བུང་བ་འདི་དག་ཆེས་ངོ་མཚར། །ཚུལ་
ཁྲིམས་བཞིན་དུ་དྲི་བཟང་ལྡན། །ཏིང་ངེ་འཛིན་ལྟར་རབ་དགའ་བྱེད། །ཤེས་རབ་བཞིན་དུ་སྙིང་པོར་གྱུར། །བྱམས་པ་ལྟ་བུར་མཉེས་གཤིན་ལ། །དམ་པའི་ཆོས་ལྟར་རབ་བཟང་བའི། །པདྨ་མཆོག་དེའི་མཐུ་དཔལ་གྱིས། །དེ་ཚེ་ས་འདི་སྐལ་བཟང་ལྡན། །དཀར་པོའི་སོ་ཕྲེང་དགོད་པས་མཛེས། །དེ་འདྲ་མཐོང་བས་ཡིད་རབ་དྭངས། །རྫི་ཚོར་ཙམ་ཡང་བཀྲ་ཤིས་འབྱུང༌། །བཟུང་ན་མཆོག་གི་བདེ་བ་སྟེར། །སངས་རྒྱས་ཕྱག་གི་པདྨ་འདྲ། །དེ་ནི་པདྨའི་ས་བོན་མཛོད། །དེ་ཡི་འཁོར་གྱི་པདྨ་ནི། །ས་བོན་ཙམ་དང་སྦལ་མིག་འཐོན། ཁ་འབུས་ཡིད་ཙམ་ཕྱེ་བ་དང༌། །མཆོག་ཏུ་ཆེར་རྒྱས་ལ་སོགས་པ། །གནས་སྐབས་སྣ་ཚོགས་ལ་གནས་པས། །ལྷོ་བྱང་ཕྱོགས་རྣམས་བརྒྱན་གྱུར་པ། །རྒྱུ་སྐར་ཚོགས་ཀྱིས་ནམ་མཁའ་བཞིན། །དེ་ལ་པདྨའི་འཁོར་ལོས་སྒྱུར། །རང་བྱུང་པདྨ་རྒྱལ་པོས་ཀྱང༌། །པདྨ་འོད་བརྒྱ་གསལ་བ་ཞེས། །ཡི་གེའི་མེ་ཏོག་ཅོད་པན་བྱིན། །ལེགས་ཚོགས་ཕུང་པོ་དེས་བཟུང་བས། །བོད་ཁམས་པདྨོའི་ཞིང་དུ་གྱུར། །དེ་ཡི་དཔལ་འབྱོར་གྱིས་དྲེགས་ནས། །བུང་བའི་འཇིག་རྟེན་ཅ་ཅོ་འཕེལ། །ཀྱེ་མའོ་བདུད་རྩི་གྲུབ་པ་ཡི། །
ཡེ་ཤེས་སྒྱུ་མའི་མེ་ཏོག་ཀྱང༌། །སྔོན་བཞིན་བསྡུས་ནས་མི་སྣང་སྟེ། །དྲི་མེད་དབྱིངས་སུ་ཉེ་བར་ཞི། །འགྲོ་ལ་ཆོས་དང་བདེ་བ་ཡི། །དོན་ཆེན་བྱས་ནས་མནལ་བ་ནི། །ཟླ་བས་ཀུ་མུ་ཏ་ཚོགས་ལ། །བདུད་རྩི་བསྣུན་ནས་ནུབ་པ་བཞིན། །དེ་ནས་ས་སྟེང་ཕལ་ཆེར་སྟོང༌། །བཀྲག་མེད་གཟི་བྱིན་རབ་ཏུ་རྒུད། །ཡུལ་རྣམས་འབྲོག་དགོན་ཉམ་ངར་སོང༌། །ཕྱོགས་ཀྱི་བུད་མེད་རྒྱན་དང་བྲལ། །ཀུན་ནས་བཟང་དང་དགེ་བ་དང༌། །དག་པ་ཞེས་བྱ་ཕལ་ཆེར་ནུབ། །ངན་ལ་བཀྲ་མི་ཤིས་པ་དང༌། ཁྲག་གིས་སྦགས་པའི་རྫས་དག་བྱུང༌། །སྐྱེ་དགུ་པདྨའི་ཆོ་རིགས་དང༌། །བརྟུལ་ཞུགས་དག་ལས་རིང་དུ་ཉམས། །དམྱལ་བ་སྤུ་གྲིའི་ལམ་འདྲ་བའི། །སྤྱོད་ཚུལ་ངན་ལ་ཡོན་ཏན་རྩི། །པདྨའི་ནགས་ན་བག་ཡངས་སུ། །སྦྲང་ཆང་འཐུང་བའི་ཡུལ་རྣམས་ཀྱང༌། །ཕྱོགས་མཐའི་གླང་ཆེན་ཁྲོ་བོ་རྣམས། །བརྒྱུགས་ནས་ཉིན་བཞིན་སློག་ཅིང་འཇོམས། །བློ་ལྡན་འདི་འདྲའི་གནས་སྐབས་མཐོང༌། །ཕྱིར་ཞིང་དམ་པའི་ཡོན་ཏན་དྲན། །རྨོངས་པ་ཕུང་འཚེང་དཔྱོད་མི་ཤེས། །སྨན་དང་དུག་ལོ་མཚུངས་པར་སེམས། །གཙང་མ་ཞི་བའི་ཆོས་དག་ནི། །པདྨའི་ངང་
ཚུལ་ཡིན་པར་བརྗོད། །དེ་ལ་རྩ་དང་འདྲར་སེམས་པའི། །མི་ཡིས་པདྨ་ཇི་ལྟར་འཐོབ། །གང་ཕྱིར་པདྨ་པདྨ་ཡི། །ངང་ཚུལ་དགའ་བའི་དཔལ་དུ་འོང༌། །ཉེས་སྤྱོད་མི་ཡིས་རབ་གདུངས་པའི། །སྐལ་པར་པདྨ་ཇི་ལྟར་མཛེས། །འོན་ཀྱང་ཐུབ་བསྟན་མ་ནུབ་པས། །དགེ་ལེགས་ལྷག་མ་ད་དུང་མཆིས། །བཀྲ་ཤིས་དངོས་ཀུན་དེ་ལས་བྱུང༌། །ད་དུང་དེ་ལྟར་འབྱུང་ལགས་གྲང༌།། །།
དཔལ་ལྡན་བླ་མ་དམ་པ་ལ་བསྟོད་པ་དང༌། དམ་ཆོས་ཤོག་སྡེ་བརྒྱད་པའི་ཆོས་འབྱུང་གི་རྩ་ཐོ་དང༌། །སྔ་འགྱུར་རྣལ་འབྱོར་ཆེན་པོའི་ཐུན་མོང་མ་ཡིན་པའི་དབང་གི་ཆུ་བོ་བཞིའི་རྣམ་བཤད་རྣམས་གཞི་མཐུན་པར་སྦྱར་བ་དགེ་ལེགས་རྒྱ་མཚོའི་རོལ་མོ་ཞེས་བྱ་བ། །ཨོཾ་སྭ་སྟི། །པདྨ་འབྱུང་གནས་འོད་གསལ་སྒྱུ་དྲྭའི་གར། །སྙིགས་དུས་མདོ་སྔགས་བསྟན་པའི་གཉེན་གཅིག་པུ། །གྲགས་པ་གླིང་འདིའི་སྤོ་ན་རབ་བརྗིད་པ། །འགྲོ་བའི་མུན་སེལ་ཁྱེད་ལ་ཕྱག་བགྱིད་དོ། །འདི་ལྟར་ཐོས་ཏེ། མགོན་པོ་ཁྱེད་གཅིག་ཏུ་གཞན་ཕན་གྱི་རོ་ལ་དགྱེས་པའི་དབང་དུ་གྱུར་ནས་འགྲོ་བ་ལྔའི་འཇིག་རྟེན་ཐ་དད་པ་རྣམས་སུ་རླབས་པོ་ཆེའི་སྨོན་ལམ་གྱི་ཁྱད་པར་དག་གིས་རྩེ་ཞིང་རྒྱུ་བའི་སྐབས་ཤིག་ན། ཡུལ་གྱི་དམ་པ་དཔལ་ས་ཧོ་ར་དང༌། བསིལ་ལྡན་འོད་ཀྱི་ཡུལ་དུ་མིའི་རྗེ་བོ། །བསོད་ནམས་ཀྱི་གཟི་བརྗིད་རྒྱས་པ། དབང་ཕྱུག་དམ་པའི་བདག་པོར་སྤྱི་བོ་ནས་མངོན་པར་དབང་བསྐུར་བ། །རིགས་ཆེ་ཞིང་མཐོ་བར་སྐྱེས་པའི་སེམས་ཅན་སྐལ་པ་བཟང་པོ་རྣམས་ཀྱི་མགོ་ལ་ཞབས་སེན་རིན་པོ་ཆེའི་ཅོད་པན་ཆོས་ཀྱི་དགེ་མཚན་དང་བཅས་པས་དབང་བསྐུར་བ་སྦྱིན་པར་གྱུར་ཏོ། །དེའི་ཚེ་དེ་བཞིན་གཤེགས་པ་འོད་དཔག་མེད་འཛམ་བུའི་གླིང་འདིར་རིག་འཛིན་གྱི་འཁོར་ལོས་སྒྱུར་བའི་རྣམ་པར་བསྟན་པ། །བདེ་བ་ཆེན་པོ་པདྨ་སཾ་བྷ་བས། ཁྱོད་སྔོན་ནས་རྡོ་རྗེའི་
སྨོན་ལམ་རླབས་པོ་ཆེ་བཏབས་པ་དང༌། དེའི་ཕྱིར་རྡོ་རྗེའི་རྣམ་ཐར་བླ་ན་མེད་པ་རྫོགས་པར་སྒྲུབ་པ་དང༌། རྡོ་རྗེ་འཆང་ཆེན་པོའི་དགོངས་པ་ཡོངས་སུ་སྐོང་བའི་མཐུ་ཡོད་པར་གཟིགས་ནས། །ནམ་མཁའ་གང་བའི་རིག་འཛིན་དང༌། མཁའ་འགྲོའི་འཁོར་གྱི་ཚོགས་ཆེན་པོའི་དབུས་སུ། །རྡོ་རྗེ་ཐེག་པའི་ཆོས་ཀྱི་གསང་མཛོད་གཏད་ཅིང༌། ཁྱོད་ཀྱིས་རྩོད་པའི་དུས་མཐར་རྡོ་རྗེ་སེམས་དཔའི་མཛད་པ་གྱིས་ཤིག་ཅེས་བཀའི་ཅོད་པན་དབུ་ལ་ཕོག་སྟེ། ལུང་བསྟན་མེ་ཏོག་དཀར་པོའི་གྲུ་ཆར་ཕབ། དེའི་མཐུ་ལས་གྲངས་མེད་པའི་རིག་འཛིན་རྣམས་ནི་ཕྱོགས་བཅུར་ཁྱོད་ཀྱི་གྲགས་པའི་ཡི་གེ་ཀློག་ཅིང༌། མཁའ་འགྲོ་མ་རི་རབ་ཀྱི་རྡུལ་སྙེད་དག་ནི་བསྟོད་པའི་གླུ་དབྱངས་རྟག་ཏུ་ལེན་པར་བྱེད་དེ། །མདོར་ན་གྲུབ་པའི་ཞིང་རབ་འབྱམས་ཐམས་ཅད་ཁྱོད་ཀྱི་ཡོན་ཏན་མཛེས་པའི་མེ་ཏོག་ཚིག་གི་སྲད་བུར་རྒྱུ་བ་ལ་བརྩོན་པའི་ཕྲེང་བ་རྒྱུད་མཁན་གྱི་ཁྱིམ་ལྟ་བུར་གནས་པར་གྱུར་ཏོ། །དེ་ཚུན་ཆད་སྐུ་ཚེའི་ཕྲེང་བ་ཐམས་ཅད་དུ་ཁྱོད་རྡོ་རྗེའི་གནས་ཆེན་རྣམས་སུ་བཞུད་པའི་ངལ་བ་མ་མཛད་ཅིང༌། ཆོས་ལ་ཁྱོད་འཚོལ་བའི་རྟོག་པ་མེད་ཀྱང་མཁའ་འགྲོ་མའི་གནས་ཀྱི་སྔགས་ཀྱི་ཆོས་མཛོད་ཐམས་ཅད་ཁྱོད་ཀྱི་ཕྱག་ཏུ་རང་འོང་བར་གྱུར་ཏེ། རེ་ཞིག་འདི་ནི་ངོ་མཚར་མི་ཆེའོ། །གང་གི་ཕྱིར་ན་རྒྱུའི་བདག་ཉིད་ཆེ་བ་ཡིན་པའི་ཕྱིར་ཏེ། སངས་རྒྱས་ཀྱི་དབང་བསྐུར་བ་མེད་པར་ཡང་འཇིག་རྟེན་ན་
འཁོར་ལོས་སྒྱུར་བ་དག་ལྷའི་འཁོར་ལོ་རིན་པོ་ཆེ་ཚོལ་དུ་མ་ཕྱིན་ཅིང༌། འཁོར་ལོ་དེ་ལ་མི་བདག་དགའ་བར་བྱེད་པའི་སེམས་མེད་ཀྱང༌། དེ་གཉིས་གདོན་མི་ཟ་བར་འཛོམས་པར་བཤད་པ་ཡིན་ནོ། །བདེན་པའི་བརྟུལ་ཞུགས་གྲུབ་པ་རྣམས་ཀྱིས་དམ་བཅས་པ་ནི་རྒྱ་མཚོའི་དུས་རླབས་བཞིན་དུ་དུས་ལས་མི་ཡོལ་བ་ལགས་པས། །པདྨ་བཛྲ་གྱི་སྤྱན་སྔར་སྔོན་ཐུགས་དམ་ཇི་ལྟར་བཞེས་པ་བཞིན་དུས་ངན་ཐ་མ་ལ་བབས་པའི་སྐབས་འདིར། སྐལ་པ་མཆིས་ཤིང་རྐྱེན་གྱི་མཐུ་ལ་རག་ལས་པའི་འགྲོ་བ་མང་པོ་ལ་ཐེག་པ་མཆོག་གི་དགའ་སྟོན་འགྱེད་པའི་སླད་དུ་རིགས་ཕུན་སུམ་ཚོགས་པར་སྐྱེ་བའི་སྒྱུ་འཕྲུལ་སྐྱེད་ཚལ་གྱི་དུས་སྟོན་ལྟ་བུ་བསྟན་ཏོ། །དེའི་ཚེ་ཡང་རྒྱ་མཚོ་ཆུ་བོ་བཞིས་མི་ངོམས་པ་ལྟར་ཐུགས་རྒྱུད་དབང་གི་ཆུ་བོས་ངོམས་པ་མི་མངའ་བའི་ཕྱིར། ལང་ཚོའི་དང་པོ་ཉིད་ནས་ཁྱབ་བདག་པདྨ་ཀ་ར་དང༌། རྣལ་འབྱོར་གྱི་དབང་ཕྱུག་བིརྱ་བྷ་དྲས་རིག་རྩལ་ཕྱག་རྒྱའི་དབང་དང༌། །གླེགས་བམ་ལུང་གི་དབང་དང༌། །བདེ་སྟོང་ཕྱག་རྒྱ་ཆེན་པོའི་དབང་དང༌། ཡོངས་འཛིན་དགེ་བའི་བཤེས་གཉེན་གྱི་དབང་སྟེ་གཏོར་བླུགས་རྣམ་པ་བཞིའི་རྒྱུན་བཟང་ཁྱོད་ཀྱི་དབུ་ལ་ཕབ་བོ། །རིག་རྩལ་ཕྱག་རྒྱའི་དབང་དེ་བརྙེས་པས་ནི། ཁྱོད་དག་པ་རབ་འབྱམས་ཀྱི་འཁོར་ལོའི་སྣང་བ་གཞལ་དུ་མེད་པས་སྐད་ཅིག་སྐད་ཅིག་ལ་ཆོས་ཀྱི་དབྱིངས་ཐམས་ཅད་
རྒྱས་པར་དགང་བ་དང༌། དེ་དག་མ་ལུས་པ་སླར་ཡང་སྐད་ཅིག་ཙམ་གྱིས་སྤྲོས་པའི་རི་མོ་རྣམ་པར་དག་པའི་དེ་ཁོ་ན་ཉིད་ཀྱི་ཐིག་ལེར་བསྡུ་བ་ལ་དབང་འབྱོར་བའི་རྣལ་འབྱོར་བརྙེས་སོ། །འདི་ལྟར་ཁྱོད་ནི་རྣམ་པར་སྣང་མཛད་ཀྱི་རྡུལ་ཕྲ་རབ་འདུས་པ། ཡེ་ཤེས་རིན་པོ་ཆེའི་རྒྱན་གྱི་སྤྲིན་སྟུག་པོ་བཀོད་པའི་གཞལ་མེད་ཁང་པར། སྟོང་པ་ཆེན་པོ་དང༌། །སྙིང་རྗེ་སྒྱུ་མ་དང༌། ཡི་གེ་སྒྱུ་འཕྲུལ་དང༌། ཕྱག་རྒྱ་རྫོགས་པའི་རིམ་པས་རྡོ་རྗེ་སེམས་དཔའི་གདུང་མཐོན་པོར་བལྟམས་ཤིང༌། རྡོ་རྗེ་བཞིའི་དཀྱིལ་འཁོར་ཆེན་པོ་བཞིར་སྐུ་བཞིའི་དབང་ཕྱུག་གི་སྐུར་བཞེངས་ནས་ཕན་ནུས་ཟབ་མོའི་དབང་གི་ཆོ་གས་དྲི་མ་གཏོར་ཞིང༌། །ཡེ་ཤེས་ཆེན་པོའི་ནུས་པ་རྒྱུད་ལ་བླུགས་པས་སྨིན་གྲོལ་ཆིག་རྫོགས་སུ་སད་པའི་རིག་པ་རྩལ་གྱི་དབང་རྒྱལ་ཐབས་སྤྱི་བླུགས་སུ་བསྐུར་བར་མཛད་མ་ཐག་འཁོར་ལོས་སྒྱུར་བའི་སྲས་ཐུ་བོ་རྒྱལ་སར་བཀོད་པའི་ཕྱིར་གཏེར་གྱི་བུམ་པས་དབང་བསྐུར་བ་བཞིན་གྱུར་ནས་སྙིང་པོའི་ཁམས་ལ་གནས་པའི་ཡོན་ཏན་གྱི་ལང་ཚོ་བཞད་པར་གྱུར་མ་ཐག་རྡོ་རྗེའི་ལམ་བདེ་མྱུར་དུ་ཞུགས་པས་མཐར་སོན་ཏེ། སྤངས་རྟོགས་ཀྱི་མེ་འབྲས་མི་ཟད་པར་དར་བས། །རིག་འཛིན་མཁའ་འགྲོའི་ཚོགས་ཀྱི་ཁྱུ་མཆོག་རྣམས་དང་སྐལ་པ་མཉམ་པར་གྱུར་པ་ལ། དེ་དག་གིས་ཀྱང་ཨེ་མ་ཁྱོད་ནི་ཁམས་གསུམ་ཆོས་ཀྱི་རྒྱལ་པོའི་རྒྱལ་ཐབས་ལ་རང་སྟོབས་ཀྱིས་འཛེགས་ནས་མཁྱེན་བརྩེ་ནུས་སྟོབས་ཀྱི་
འཁོར་ལོས་སྒྱུར་བ་ཞིག་གོ་ཞེས་བསྔགས་པའི་གླིང་བུ་སྙན་འཇེབས་སུ་སྒྲོགས། །ལྷ་དང་གྲུབ་པ་ཐམས་ཅད་དང་གཉིས་སུ་མེད་པའི་གོ་འཕང་དངོས་སུ་གྲུབ་པ་སྟེ། གསང་བ་རྒྱ་མཚོའི་དབྱིག་ཆེན་པོའི་མཛོད་ཀྱི་ལྡེའུ་མིག་ཕྱག་ཏུ་སོན། །ཆོས་ཀུན་ཡེ་ཤེས་ཀྱི་རོལ་རྩེད་དུ་གཟིགས་པའི་ལྟ་དགོངས་ཀྱི་ཕྱག་རྒྱས་བཏབ་ནས་ཆོས་རྒྱུན་གྱི་ཏིང་ངེ་འཛིན་ལ་དབང་འབྱོར། དངོས་གྲུབ་འཛད་པ་མེད་པའི་འབྱོར་པས་ཕྱུག་ཅིང་སྙེམས། འདོད་རྒུའི་ཕྲིན་ལས་ཐེག་མཆོག་ཆོས་ཀྱི་རྒྱལ་ཁབ་ལ་དབང་བསྒྱུར་ནས། དོན་གཉིས་ལྷུན་གྱིས་གྲུབ་པའི་དཔལ་མ་ཉམས་པར་ལོངས་སུ་སྤྱོད་ནས། འཁོར་བ་མྱང་འདས། སེམས་ཅན་སངས་རྒྱས་སུ་བྱ་རྩོལ་མེད་པར་ཡུད་ཙམ་གྱིས་བསྒྱུར་ནས་སྣང་སྲིད་ཟིལ་གནོན་གྱི་བརྟུལ་ཞུགས་གྲུབ་པའི་ཆེ་བ་ནི། གསང་འཛིན་བདག་པོས་ཀྱང་སྒྲ་ཇི་བཞིན་བརྗོད་པ་ལ་རྔོ་མི་ཐོགས་པས་མཚོན། །མཆོད་ཡོན་དེ་དག་གི་བཀའ་དྲིན་ལ་བརྟེན། གར་གྱི་དབང་པོའི་ཞིང་བསིལ་ལྡན་ལྗོངས་འདི་ཡང་ཤིན་ཏུ་བསྐལ་པ་བཟང་པོའི་རྩེ་མོར་སོན་ནས། སའི་གཟེར་ཐམས་ཅད་དུ་གཙུག་ལག་ཁང་གི་བཀོད་མཛེས་ཀྱིས་སྤ། མདོ་སྔགས་དགེ་འདུན་གཉིས་ཀྱི་མཁས་གྲུབ་ཀྱི་ཚང་བརྡོལ། ཁྱིམ་ན་གནས་པ་ཀུན་ཀྱང་རྣམ་དཀར་གྱི་དཔལ་འབྱོར་ལ་གཙོ་བོར་བསྐྱེད། །ལྷ་ཀླུ་མི་དང་མཁའ་འགྲོའི་གནས་ན་བཞུགས་པའི་རྒྱུད་ཀྱི་
གླེགས་བམ་རྣམས་དགོངས་པའི་རྩལ་དང༌། བརྟུལ་ཞུགས་ཀྱི་ནུས་པས་དབང་དུ་བསྡུས་ནས་བསྒྱུར་བཤད་ཉན་གསུམ་གྱིས་གཏན་ལ་ཕབ་པས་ཨོ་ཌི་ཡཱ་ནའི་གསང་མཛོད་ཀྱང་མོག་པོར་བྱེད་ཅིང༌། རིག་འཛིན་ལྷ་དང་ཌཱ་ཀི་འདུ་བས་གངས་ཁྲོད་ཀྱི་རི་བྲག་མཚོ་སོགས་རྡོ་རྗེའི་གནས་ཆེན་པོ་རྣམས་དང་ཐ་མི་དད་པར་བྱིན་གྱིས་བརླབས། ཆོས་ནོར་རྫས་ཀྱི་གཏེར་ཁ་མིང་ཅན་མིང་མེད་གྲངས་མེད་པ་འབྱུང་ལྔའི་དབྱིངས་དང་དགོངས་པའི་རྩལ་དུ་རྒྱས་བཏབ་ནས། གདུལ་བྱ་ལས་སྨོན་རྟེན་འབྲེལ་དུས་སུ་སོན་པས་ཆོས་གཏེར་ཟད་མི་ཤེས་པས་ཕྱི་མའི་བསྟན་འགྲོའི་དབུགས་དབྱུང་བས་ནག་ཕྱོགས་ཟིལ་གྱིས་གནོན་པ་དང༌། དཀར་ཕྱོགས་རུ་མཚོན་བསྒྲེངས་ནས་བསྟན་པ་རིན་པོ་ཆེའི་མངའ་ཐང་ཀུན་ནས་ཀུན་ཏུ་རྒྱས་པར་སྤེལ་མ་ཐག་གངས་རི་ལ་ཆར་སྤྲིན་དཀྲིགས་པ་ལྟར་དེ་བཞིན་གཤེགས་པ་རྣམས་ཀྱིས་སྟོན་འཁོར་དགོངས་པ་གཅིག་པའི་ཡེ་ཤེས་རྡོ་རྗེའི་དབང་བསྐུར་བའི་དགོངས་པ་མཛད། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་རིག་པའི་ལྷ་མོ་རྣམས་ཀྱི་རྩེ་དགའི་བདེ་བས་སྙེམས་པ་དང༌། ཀུན་ཏུ་བཟང་པོའི་མཆོད་པ་ནམ་མཁའ་ལྟར་བྱས་པའི་ནང་ན་རྣམ་པར་རོལ་པ་དང༌། དེ་བཞིན་གཤེགས་པ་དང༌། རྡོ་རྗེ་དང༌། རིན་པོ་ཆེ་དང༌། པདྨ་དང༌། ལས་ཀྱི་རིགས་ཀྱིས་ཆེ་བའི་བྱང་ཆུབ་སེམས་དཔའ་གཙོ་བོ་རྣམས་བློན་པོར་གྱུར་པས་ཞམ་རིང་བྱས་ཤིང༌།
རྡོ་རྗེའི་ཁྲོ་བོའི་དམག་དཔུང་མཐའ་ཡས་པ་དང་ལྡན་པ་དང༌། འཇིག་རྟེན་དང་འཇིག་རྟེན་ལས་འདས་པའི་གནས་ཀྱི་དཀྱིལ་འཁོར་མཐའ་དག་འོད་ཟེར་དང་སྤྲུལ་པའི་ཕོ་ཉས་ལང་ལོང་དུ་གྱུར་པའི་ཆོས་ཀྱི་རྒྱལ་པོ་ཁམས་གསུམ་ལས་རྣམ་པར་རྒྱལ་བའི་ཏིང་ངེ་འཛིན་གྱི་ཐབས་ཐོབ་པ་སྟེ། གྲངས་མེད་པའི་རྡོ་རྗེའི་ཞིང་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ། རྡོ་རྗེའི་ཏིང་ངེ་འཛིན་རི་རབ་ལྟར་མི་གཡོ་ཞིང་ཤིན་ཏུ་བརྟན་པའི་མཐར་ཕྱིན་པ། བསོད་ནམས་བརྒྱའི་གཟི་བྱིན་བཟོད་པར་དཀའ་བའི་རྒྱན་མངའ་བ། བརྒྱ་བྱིན་དང་ཚངས་པ་ལ་སོགས་པ་འཇིག་རྟེན་གྱི་བླ་མ་རྣམས་ཀྱང་དཀའ་བ་མཐའ་ཡས་སྤྱད་དེ། གང་དག་གི་ཞབས་རྟེན་ལ་ཅོད་པན་ཉུག་པ་ཙམ་ཞིག་དོན་དུ་གཉེར་བ་དེ་དག་ཀྱང་ཁྱོད་ཀྱི་སྔགས་དང་ཕྱག་རྒྱའི་ཁྱད་པར་བསྟན་པའི་སྐད་ཅིག་མ་ཁོ་ནར། སྤྲིན་ཆེན་རླུང་གི་ལྕགས་ཀྱུས་ཚབས་ཆེར་བསྐུལ་བ་བཞིན་འབྱོན་པར་མཛད་ན། དེ་ལས་གཞན་པའི་ས་གསུམ་གྱི་དབང་པོ་ཐམས་ཅད་ལ་བཀའི་འཁོར་ལོ་སྦྱོར་བ་ལྟ་ཅི་སྨོས་དེ་ལྟར་ཁྱོད་ཡེ་ཤེས་རང་སྣང་གི་འོག་མིན་ཡོངས་སུ་དག་པ། ཕལ་པའི་སྐྱེ་དགུ་སུས་ཀྱང་སྔོན་བསམ་གཏན་གྱི་རྐང་པ་མ་བཀོད་པ། མཆོག་གི་དབེན་པ་ལ་དགྱེས་པའི་ཀུན་ཏུ་བཟང་པོ་རྣམས་ཀྱི་སྤྱོད་ཡུལ་གྱི་གནས་དམ་པ་དེ་ལས་མ་བཞེངས་ཤིང་མངོན་པར་མི་གཡོ་བཞིན་དུ། རྙོག་པ་ལྔ་དང་ལྡན་པའི་དུས་
མཐར། བོད་དང་བོད་ཆེན་པོའི་འཛིན་མའི་གཞི་འདིར། རྒྱལ་པོ་དང༌། བློན་པོ་དང༌། ཁྱིམ་བདག་དང༌། ཚོང་དཔོན་དང༌། གདོལ་པ་ལ་སོགས་པ་ཐ་མལ་པའི་འཁོར་ཕལ་མོ་ཆེ་རྣམས་ཀྱི་དབུས་ན། སོ་སོའི་བསམ་པ་དང་མཐུན་པའི་ཀུན་སྤྱོད་དང་སྤྱོད་ཡུལ་རྣམ་པ་སྣ་ཚོགས་ཀྱིས་འདྲེ་ཞིང་སྣང་བ་ནི། སྒྱུ་མ་མཁན་གྱི་སློབ་དཔོན་སྒྱུ་མའི་རིགས་པ་ལ་ཤིན་ཏུ་བྱང་བར་བསླབས་པ་དག །སྒྱུ་འཕྲུལ་གྱི་རོལ་རྩེད་སྟོན་པ་ལྟ་བུ་སྟེ། ངོ་མཚར་ཆེའོ། །དེ་དག་ཀུན་ཏུའང་ཁྱོད་ཀྱིས་སྤྱོ་བ་དང༌། གཟེང་བསྟོད་པ་དང༌། བཞད་པ་དང༌། གཞན་ཡང་སྣ་ཚོགས་ཀྱི་གཏམ་གླེང་བ་མཛད་པ་དང༌། ཕྱག་སྟབས་སྒྱུར་བ་དང༌། འཆགས་པ་དང༌། བཞུད་པ་དང༌། བཟའ་བཏུང་སྤྱོད་པ་དང༌། མནལ་བ་ལ་སོགས་པ་སྤྱོད་ལམ་གྱི་རྣམ་པ་ཅི་དང་ཅི་མཛད་པ་ཐམས་ཅད་སྔགས་ཀྱི་བཟླས་པ་དང༌། ཕྱག་རྒྱ་དང༌། གར་དང༌། ཚོགས་ཀྱི་མཆོད་པ་དང༌། སྦྱིན་སྲེག་དང༌། ནཱ་དའི་དེ་ཉིད་ལ་མཉམ་པར་འཇོག་པ་ལ་སོགས་པའི་སྔགས་ཀྱི་སྤྱོད་པ་གཟི་མདངས་ཆེན་པོ་ཅན། རྣམ་པ་ཐམས་ཅད་ཀྱི་ཐམས་ཅད་དུ་སེམས་ཅན་རྣམས་ལ་དོན་ཆེན་པོའི་སྒོར་ཉེ་བར་གནས་པ། ཡིད་བཞིན་གྱི་ནོར་བུ་དང༌། དཔག་བསམ་གྱི་ཤིང་ལྟ་བུ་འབའ་ཞིག་འབྱུང་བར་ཟད་ཀྱི། ཐ་མལ་པའི་སྤྱོད་པ་གཞན་ནི་ཡོང་ཡེ་མི་མངའོ། ཁྱོད་ཀྱི་རིག་རྩལ་ཕྱག་རྒྱའི་
ཏིང་ངེ་འཛིན་གཅིག་པུས་ཐ་མལ་པའི་ང་རྒྱལ་གྱི་གྲོང་ཁྱེར། སྣོད་དང་བཅུད་དང་རྒྱུད་ཀྱི་དམིགས་པ་སྣ་ཚོགས་དང༌། མཚུངས་ལྡན་གྱི་སྒོ་སྣ་ཚོགས་ནས་རྒྱས་པ། ཐོག་མ་མེད་པའི་དུས་ནས་བརྟན་པར་བྱས་པ། ཁམས་དང་ས་དང་འགྲོ་བ་ཐམས་ཅད་དུ་ཞུགས་པ། བལ་པ་ཛའི་ཚང་ཚིང་ཆེན་པོ་ལྟར་འཛིང་པ་རྣམས་ཕྱེ་མར་བརླག་ཅིང་ཐལ་བར་བྱས་པའི་དྲུང་ན། ལྷ་ཆེན་དྲག་པོས་མདའ་འཕངས་པས་གྲོང་ཁྱེར་སུམ་བརྩེགས་བསྲེགས་པའི་སྔོན་རབས་ཀྱང་སྦྲང་ཚང་འཇིག་པའི་སྐྱེས་བུའི་མཐུ་རྩལ་བཞིན་དུ་དམན་ནོ། །གླེགས་བམ་ལུང་གི་དབང་བསྐུར་བ་བརྙེས་པས་ནི། ཁྱོད་གསང་སྔགས་དང་རིག་སྔགས་ཐམས་ཅད་ཐོགས་པ་མེད་པར་འགྲུབ་པའི་དབང་དང་ལྡན་པ་དང༌། སྔགས་ཀྱི་ཚུལ་ཐམས་ཅད་སྣང་བར་བྱེད་པའི་ལེགས་བཤད་མི་ཟད་པ་དང་ལྡན་པར་གྱུར་ཏེ། དེ་བཞིན་གཤེགས་པ་ཐམས་ཅད་ཀྱི་ལྗགས་རྡོ་རྗེ་ལས་སྤྲུལ་པའི་གོ་འཕང་བརྙེས་སོ། །དེ་ལ་ཁྱོད་ཀྱི་གསུང་རྡོ་རྗེ་རྣམ་པ་ཐམས་ཅད་པའི་ཡུལ་ནི་དོན་དམ་གཟིགས་པ་རྣམས་ཁོ་ན་དབང་དུ་གྱུར་པ་ཡིན་གྱི། བདག་འདྲ་བས་བརྗོད་པ་ག་ལ་ནུས། འོན་ཀྱང་ཡུལ་དུས་འཚོ་བའི་འཇིག་རྟེན་འདིར་སེམས་ཅན་གྱི་བསམ་པའི་དབང་གིས་ཕལ་ཆེར་གླང་པོ་ཆེའི་ལྟ་སྟངས་མཛད་དེ་སྦས་ནས། ཉི་ཚེའི་སྣང་བ་ཙམ་ཞིག་བསྟན་པ་དང་སྦྱར་
ཡང༌། ཁྱོད་ཀྱི་གསུང་གཅིག་ཉིད་རྒྱལ་བ་དང༌། བྱང་ཆུབ་སེམས་དཔའ་དང༌། རྣལ་འབྱོར་པའི་ཚོགས་ཀྱི་གསུང་ཐམས་ཅད་བསྡུས་པར་མཐོང་སྟེ། སྔོན་བཅོམ་ལྡན་འདས་ཀྱིས་འོག་མིན་དུ་བསྟན་པ་དང༌། འཕགས་པ་ལག་ན་རྡོ་རྗེས་རིའི་རྒྱལ་པོ་མ་ལ་ཡར་རྡོ་རྗེའི་རྣམ་པར་ཐར་པ་བསམ་གྱིས་མི་ཁྱབ་པ་ཐོབ་པའི་རིག་འཛིན་གྱི་འདུས་པ་ཁོ་ནའི་དབུས་སུ་བཤད་པ་དང༌། མི་བདག་ལུང་བསྟན་རྡོ་རྗེ་དང༌། ཀུ་ཀུ་རཱ་ཛ་ལ་སོགས་པ་ཆེ་བ་བས་ཀྱང་ཆེ་བའི་སེམས་ཅན་མཆོག་རྣམས་ཀྱི་གཏིང་མཐའ་མེད་པའི་བློའི་ཆུ་གཏེར་གཅིག་ནས་གཅིག་ཏུ་སྦས་པའི་རྒྱུད་སྡེ་དང་རྒྱུད་སྡེའི་མན་ངག་རིན་པོ་ཆེ་དག །ད་ལྟའི་དུས་སུ་ཁྱོད་ཀྱི་གསུང་སྐལ་བཟང་གདུལ་བྱའི་ཐུན་མོང་གི་ལོངས་སྤྱོད་དུ་གྱུར་པའི་བང་མཛོད་བཟང་པོ་འདིར་ཕྱིན་པར་སྣང་ལ། གནའ་བོའི་ལོ་ཙཱ་ཆེན་པོ་རྣམས་ཀྱིས་འཕགས་པའི་ཡུལ་དུ་དཀའ་བ་དུ་མ་སྤྱད་ནས་བགྲོད་པ་དང༌། དེ་དག་གི་བཀའ་བརྒྱུད་འཛིན་པའི་དམ་པའི་ཕྲེང་བ་བར་མ་ཆད་པར་བྱོན་པ་རྣམས་ནི་དོན་འདི་ཉིད་ཁོ་ནའི་ཐབས་སུ་བསྟར་བ་འདྲ་བ་སྣང་ངོ༌། ཁ་བས་མཚན་པའི་ལྗོངས་འདིར་གསང་སྔགས་ཀྱི་གདམས་པ་ཐ་དད་པ། མཁས་གྲུབ་ཀྱི་བརྒྱུད་པ་གཞན་དང་གཞན་ལས་འོངས་པ། ཡུལ་སྣ་ཚོགས་ན་སོ་སོ་སོ་སོར་འཐོར་ཐབས་སུ་སྤྱོད་པ། ཕལ་ཆེར་མི་མངོན་པའི་གནས་ན་གབ་ཅིང་ནུབ་ལ་ཕྱོགས་པ་དུ་མ་ཡང༌། ཁྱོད་ཀྱི་སྤྱན་སྔར་སྒྲིམ་པ་
མེད་པར་ཕྱོགས་ཐམས་ཅད་ནས་འདུ་ཞིང༌། རང་རང་གི་ངང་ཚུལ་མ་སྦས་པར་སྟོན་པ་ནི། ཕྱོགས་ཐག་རིང་པོ་སྣ་ཚོགས་ན་གནས་ཤིང་སྤྱོད་ཡུལ་གྱི་གནས་མི་གསལ་བའི་བུང་བ་རྣམས། དཔྱིད་ཀྱི་དགའ་ཚལ་ན་མ་བོས་བཞིན་དུ། རང་ཉིད་གསལ་བར་སྒྲོགས་ཤིང་འདུ་བ་བཞིན་ནོ། །གཞན་ཡང་ཁྱོད་ཀྱིས་སྔོན་སྐུ་ཚེའི་ཕྲེང་བ་དཔག་ཏུ་མེད་པར་རྡོ་རྗེ་ཐེག་པའི་གསུང་རབ་ལ་སྦྱངས་ཤིང༌། སངས་རྒྱས་དང་བྱང་ཆུབ་སེམས་དཔའི་རིག་སྔགས་བསྒྲུབ་པར་དཀའ་བ་མང་པོ་བསྒྲུབས་ཏེ། མ་ཉམས་མ་གོད་པར་རྩ་ཁམས་ཡི་གེའི་མཛོད་དུ་རྒྱས་བཏབ་ནས་མཆིས་པ། དུས་འདིར་རྗེས་སུ་དྲན་པའི་མཚན་མར་ཡེ་ཤེས་གྲུབ་པའི་མཁའ་འགྲོ་མ་རྣམས་ཀྱིས། གསུང་རྡོ་རྗེའི་སྤྲུལ་པའི་གཟུགས་བརྙན་བདེ་ཆེན་སྒྱུ་མའི་འདུ་བྱེད་ཀྱི་བྲིས་པའི་བརྡ་ཡིག་གི་གླེགས་བམ་ཁྱད་པར་ཅན་རྣམས་ཕུལ་ཏེ། ཇི་ལྟར་བཟོད་པ་ཐོབ་པའི་བྱང་ཆུབ་སེམས་དཔའ་རྣམས་གཟུངས་ཀྱི་སྒོའི་ཡི་གེ་རེ་རེ་ལས་ཀྱང་དོན་དང་ཚིག་གི་རྣམ་གྲངས་མཐའ་ཡས་པ་མངོན་དུ་འགྱུར་བ་དང་འདྲ་བར། གླེགས་བམ་དེ་དག་ལྡེ་མིག་ཏུ་བརྙེས་པ་ན། གསུང་རབ་དང་གྲུབ་པའི་རིག་སྔགས་དེ་དག་གི་སྒོ་ཡང་གཉིད་ལོག་པ་ལས་སད་པ་བཞིན་དུ་བྱེ་བར་གྱུར་ཏེ། དེའི་མོད་ལ་རྡོ་རྗེའི་ལམ་བཟང་ཞིབ་མོའི་ཚུལ་ཐམས་ཅད་ས་ལེར་གཟིགས་ཤིང༌། རིག་སྔགས་དེ་དག་ཀྱང་རང་གི་ངང་གིས་
གྲུབ་པར་གྱུར་ཏོ། །དེར་ཡང་མ་ཟད་ཐོག་མ་མེད་པའི་དུས་ནས་གྲུབ་པའི་དཔའ་བོ་དང་དཔའ་མོའི་དབང་ཕྱུག་མ་རྣམས་ཀྱི་སོ་སོ་ཡང་དག་པར་རིག་པ་བཞིའི་གླེགས་བམ། ཆོས་ཀྱི་དབྱིངས་ཀྱི་ནམ་མཁའ་ལ་གློག་གི་གཟི་བརྗིད་ཀྱི་ཕྲེང་བ་འགྱེད་པ་རྣམས་དབྱིངས་ཕྱུག་རྡོ་རྗེ་རྣལ་འབྱོར་མས་བརྡ་ཡིག་གི་འཁྲུལ་འཁོར་རྣོན་པོ་ལ་བསྐྱོན་ནས། ཁྱོད་ཀྱི་གཞོམ་མེད་ནཱ་དའི་གཙུག་ལག་ཁང་འོད་ཟེར་ལྔའི་རི་མོ་ཅན་དུ་སྤྱན་དྲངས་ཏེ་བཞུགས་པའི་ཕྱིར། བློའི་མིག་དང་ལྡན་པའི་སེམས་ཅན་དག་ནི་ཁྱོད་ཀྱི་སྐུ་ལ་ཨོ་རྒྱན་ཧེ་རུ་ཀའི་ལྷ་ཁང་དུ་འདུ་ཤེས་ཏེ། ལྷ་ཁང་དེ་ལ་ནི་དབང་བསྐུར་བ་དང༌། ལུང་འབོགས་པ་ལ་སོགས་པའི་མཛད་པ་མེད་པས་ན། གཉིས་སུ་ཁྱོད་ཀྱི་སྐུ་ཁོ་ན་ཆེས་ཁྱད་པར་དུ་འཕགས་པར་ཡང་མཐོང་ངོ༌། །ཀུན་ཏུ་བཟང་པོའི་མཛོད་ཀྱི་རྒྱན་བྱེད་པའི་གླེགས་བམ་དེ་དག་ནི་ཕལ་ཆེར་ཞིག །འཇིག་རྟེན་དབང་ཕྱུག་གི་ཞིང་གི་ས་གཞི་རིན་པོ་ཆེའི་པདྨོ་ཟེ་བ་མཐའ་ཡས་པ་འདི་ལས་སྦྲང་རྩིའི་དོག་པ་བཞིན་དུ་ཁྱོད་ཀྱིས་བརྙེས་སོ་ཞེས་གཏམ་དུ་གྲགས་མོད་ཀྱི། དོན་དམ་པར་ནི་སྔགས་དང་རྒྱུད་ཐམས་ཅད་བདེ་བ་ཆེན་པོའི་མིག་འཕྲུལ་དུ་གཟིགས་ཤིང༌། བདེ་ཆེན་གཅིག་པུ་ཉིད་སྔགས་དང་རྒྱུད་ཀྱི་རྣམ་པ་ཐམས་ཅད་དུ་འཆར་བའི་རྣལ་འབྱོར་བརྟན་པའི་མཐུས། ལྷན་ཅིག་སྐྱེས་པའི་ཡེ་ཤེས་ཀྱི་ནམ་མཁའ་ཉིད་ལ་རྙེད་པར་ཟད་དེ། དེའི་ཕྱིར་ཁྱོད་ནི་རྟག་
ཏུ་ནམ་མཁའ་མཛོད་ཀྱི་འབྱོར་པ་ཅན་ཁོ་ན་ཡིན་ནོ། །དེ་ལྟ་བས་ན་རྡོ་རྗེ་སེམས་དཔས་ཐ་མལ་པའི་གཟུགས་ཀྱིས་འདུལ་བའི་འགྲོ་བ་ལ་ཆོས་སྟོན་པའི་ཞལ་གྱི་སྒོ་ནི་གང༌། སེམས་ཅན་དཔག་ཏུ་མེད་པས་རྒྱུད་སྡེའི་དེ་ཉིད་མཆོག་ཏུ་ཟབ་པ་དང་བཀྲ་བའི་གནས་རྣམས་བལྟ་བ་ལ་མིག་ཏུ་གྱུར་པ་ནི་སུ། བྱིན་རླབས་ཀྱི་ལང་ཚོ་རྙིང་པའི་ཆོས་ཚུལ་མང་པོ་ཐོག་མའི་ན་ཚོད་ལ་འགོད་པའི་སྨན་བཅུད་ཀྱིས་ལེན་ནི་ཅི། སངས་རྒྱས་ཀྱི་ཞིང་མཐའ་ཡས་པ་ན་སྤྱོད་པའི་རྒྱུད་སྡེའི་རི་དྭགས་མིག་མ་རྣམས་དང་གསུང་རྡོ་རྗེའི་ཏིང་ངེ་འཛིན་གྱི་རྩེ་དགས་སྦྲེལ་བའི་དཔའ་བོ་གཅིག་པུའང་སུ་ཞིག་ཅེ་ན། དེ་ལྟ་བུ་ནི་བདག་ཉིད་ཆེན་པོ་ཁྱེད་ཡིན་ནོ་ཞེས་བརྗོད་པར་བྱའོ། །བདེ་སྟོང་ཕྱག་རྒྱ་ཆེན་པོའི་དབང་དེ་བརྙེས་པས་ནི། ཁྱོད་མ་ལུས་ཤིང་ལུས་པ་མེད་པའི་དེ་བཞིན་གཤེགས་པའི་དཀྱིལ་འཁོར་རྣམས་ཀྱི་གསང་བ་ཟབ་མོའི་གཏིང་རྙེད་པ་དང༌། སེམས་དང་ཡེ་ཤེས་རང་སྣང་བའི་ཤེས་བྱའི་སྣོད་ཐམས་ཅད་དུ་བླ་ན་མེད་པའི་བདུད་རྩི་གསོལ་བས་དགྱེས་པར་གྱུར་ཏེ་ལྷ་དང་བཅས་པའི་འཇིག་རྟེན་ན་སུ་ཡང་ཤེས་རབ་དང་བརྩོན་པའི་གྲུས་བརྒལ་བར་དཀའ་བའི་ཡེ་ཤེས་ཆེན་པོའི་རྒྱ་མཚོར་གྱུར་ཏོ། །འདི་ལྟར་དེ་བཞིན་གཤེགས་པ་ཐམས་ཅད་ཀྱི་མཆོག་གི་བདེ་བའི་བཀའ་རྟགས། །དེ་ཉིད་འབྱེད་པའི་རི་མོ་ཅན་ཁྱོད་ལ་
གཏད་ནས། རྡོ་རྗེ་ཐེག་པའི་རྒྱལ་ཐབས་ཀྱི་བདག་པོར་གནང་སྟེ། མཆོག་གི་བདེ་བ་དེ་ནི་ལྷ་སྔགས་ཡེ་ཤེས་ཀྱི་དམིགས་པ་ཐམས་ཅད་ལས་འདས་ཀྱང་དཀྱིལ་འཁོར་གསུམ་གྱི་མཚམས་ལས་མ་བརྒལ་བ་ཡིན། རྟེན་མེད་ཅིང་གནས་མེད་པའི་ཡེ་ཤེས་ཡིན་ཡང༌། དེ་བཞིན་ཉིད་ཀྱི་དབྱིངས་ལ་རྟེན་ཅིང་གནས་པ་ཡིན། འཇུག་ལྡང་གི་སྤྲོས་པ་ཉེ་བར་ཞི་ཡང༌། ཆོས་ཀྱི་དབྱིངས་ལ་འཇུག་ཅིང་རྡོ་རྗེ་སེམས་དཔའི་གཟུགས་ཀྱིས་སྒྱུ་མའི་སྤྱོད་ཡུལ་དུ་ལྡང་བའི་མཚན་ཉིད་མི་འདོར་བ་ཡིན། གཅིག་དང་དུ་མའི་རྣམ་པར་བརྟག་ཏུ་མེད་ཀྱང༌། གཅིག་པུས་དུ་མའི་ཉམས་སུ་མཛད་དེ་ཕྲིན་ལས་སྣ་ཚོགས་ཀྱིས་རྩེན་པ་ཡིན། ཕྱག་རྒྱ་དང༌། སྔགས་དང༌། སྦྱིན་སྲེག་དང༌། དཀའ་ཐུབ་ཐམས་ཅད་བསྡུས་པ་ཡིན་ཀྱང༌། ཕྱག་རྒྱ་དང་དཀའ་ཐུབ་ལ་སོགས་པའི་མཚན་མ་ཐམས་ཅད་མི་རྒྱུ་བ་ཡིན་ཏེ། འདི་ནི་སངས་རྒྱས་ཀྱི་ཞིང་གྲངས་མེད་པར་མཐའ་ཡས་པའི་བསྐལ་པ་རྣམས་སུ་དཀའ་བ་སྤྱད་ཀྱང་རྙེད་པར་དཀའ་བའི་གསང་ཆེན། ཁྱོད་ཀྱིས་འབད་པ་ཆུང་ངུས་རང་ཉིད་ལས་བརྙེས་པ་སྟེ། དོན་གྱི་དབང་འདི་ཉིད་གཟིགས་ནས་སངས་རྒྱས་བཅོམ་ལྡན་འདས་རྣམས། དུས་བཞི་ཕྱོགས་བཅུ་གང་ནས་ཀྱང༌། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་ནས་མ་འཚོལ་
ཞིག །ཅེས་སེང་གེའི་སྒྲ་སྒྲོག་གོ །དེ་ལྟར་རང་བཞིན་མེད་པའི་ཆོས་ཉིད་ཀྱི་དཔལ་མོ། །རྡོ་རྗེའི་དཀྱིལ་འཁོར་ཆེན་པོའི་གཏིང་ན་འདུག་པ། བརྟག་པ་དང་མཐོང་བར་དཀའ་བའི་མཐར་ཐུག་པ་དེ་ལྷན་ཅིག་སྐྱེས་པའི་བདེ་བ་དམ་པའི་རྡོ་རྗེ་མེ་ཏོག་གི་མདས་དབང་དུ་མཛད་པ་ན། ལྷ་དང༌། སྔགས་དང༌། ཕྱག་རྒྱ་དང༌། ཕྲ་མོའི་དཀྱིལ་འཁོར་གྱི་འཁོར་ལོ་ཐམས་ཅད། གསེར་གྱི་རིགས་མཆོག་མེ་ལྕེ་རྣོན་པོའི་རྒྱས་བཏབ་པ་ལྟ་བུ་དང༌། སྟོན་ཀའི་ནམ་མཁའ་ཉི་མའི་འོད་ཀྱི་རྒྱས་ཐེབས་པ་ལྟ་བུ་དང༌། དགའ་བའི་ནགས་ཚལ་དཔྱིད་ཀྱི་དུས་ཀྱི་རྒྱས་ཐེབས་པ་ལྟ་བུར། སྔོན་བས་ཀྱང་ཚད་མེད་ཅིང་མཚུངས་པ་མེད་པའི་དཔལ་དང་གཟི་བྱིན་གྱིས་མཛེས་པར་གྱུར་ནས་གནས་ཏེ། དེ་མཐོང་ནས་མཁའ་སྤྱོད་དང་རིལ་བུ་མིག་སྨན་ལ་སོགས་པ་དངོས་གྲུབ་ཀྱི་ན་ཆུང་ཤིན་ཏུ་དྲེགས་མ། དངོས་གྲུབ་བརྒྱའི་འཁོར་དང་ལྡན་པ་རྣམས་ཀྱང༌། ནམ་ཞིག་འདིས་བདག་ཅག་དང་རོལ་རྩེད་ཀྱི་དུས་འདེབས་པར་འགྱུར་སྙམ་སྟེ་རེ་བའི་མིག་རྩེ་གཅིག་ཏུ་གཏོད་པར་བྱེད་དོ། ཁྱོད་ཀྱིས་ཕྱིན་ཅི་ལོག་གི་དངོས་པོའི་འཁོར་ལོ་མཐའ་དག་བདེ་ཆེན་ཤེས་རབ་ཀྱི་ཕ་རོལ་ཏུ་ཕྱིན་པའི་རིག་སྔགས་ཀྱིས་མཚན་མ་བཏབ་སྟེ། ཀུན་ཏུ་བཟང་པོའི་དཀྱིལ་འཁོར་དྲི་མ་མེད་ཅིང་འོད་གསལ་བ། ཆོས་ཀྱི་དབྱིངས་ཀྱི་རྒྱན་བྱེད་པ། མཐའ་དང་དབུས་མེད་པ་སྒྱུ་
མའི་དྲ་བ་ལྟ་བུའི་གཟུགས་འཛིན་པར་གྱུར་པ་ནི། རྒྱལ་བ་དང་རྒྱལ་བའི་སྲས་པོ་དབང་འབྱོར་གྱི་སྤྱོད་ཡུལ་བརྙེས་པ། སྣོད་བཅུད་ཐམས་ཅད་དེ་བཞིན་གཤེགས་པའི་གཟུགས་སུ་བྱིན་གྱིས་རློབ་པའི་ཏིང་ངེ་འཛིན་མཛད་པ་རྣམས་དང་སེང་གེའི་རྣམ་པར་རྩེ་བས་འགྲན་པ་བཞིན་དུ་སྣང་ངོ། །ཡུལ་གྱི་སྤྲོས་པ་རྣམས་ནི་ཆོམ་རྐུན་ལྟ་བུར་གསུངས་ཏེ། འོན་ཀྱང་ཁྱོད་ཀྱི་སྤྲོས་པ་མེད་པའི་བདེ་བའི་རྒྱལ་ཐབས་ནི། སྤྲོས་པའི་བུན་ལོང་ཇི་ལྟར་ཆེར་གྱུར་ཅིང་སྣ་ཚོགས་སུ་གནས་པར་གྱུར་པ་དེ་ལྟར་གཟི་བྱིན་གྱི་ཕུང་པོ་གཅིག་ཏུ་འབར་བར་འགྱུར་ཞིང༌། ཡངས་ཤིང་རྒྱ་ཆེ་བ་དང༌། མཆོག་ཏུ་བརྟན་པ་དང༌། ཀུན་ནས་ཡོངས་སུ་དག་པར་འགྱུར་ཏེ། དེ་ལྟ་བུའི་ཚུལ་གྱིས་འཇིག་རྟེན་ན་སེང་གེ་བཞིན་དུ་སྐྲག་པ་དང་བག་ཚ་བ་ཐམས་ཅད་དང་བྲལ་བར་སྤྱོད་པ་དེའི་ཕྱིར་ཁྱོད་ལ་འཇིགས་བྲལ་གྱི་སློབ་དཔོན་ཕྱོགས་ཐམས་ཅད་ལས་རྣམ་པར་རྒྱལ་བ་ཞེས་བརྗོད་པ་ནི་དོན་ཆེན་པོ་མཆིས་པ་ལགས་སོ།། །།
རྒྱལ་ཀུན་ཡེ་ཤེས་སྐུ་ཅན་འཇམ་པའི་དབྱངས། །གང་དག་དབྱེར་མེད་རྗེ་བཙུན་མཁྱེན་བརྩེའི་གཏེར། །མཁས་གྲུབ་དབང་པོ་དེ་ལ་གུས་པའི་བློས། །བསྟོད་ཚིག་མེ་ཏོག་ཕྲེང་བ་ཅུང་ཟད་འཐོར། །ངོ་མཚར་བྱེ་བའི་གཏེར་ཆེན་ཆོས་ཀྱི་རྗེ། །རབ་གསལ་འོད་སྟོང་རྒྱས་པའི་དཀྱིལ་འཁོར་བཞིན། །འཇིག་རྟེན་ཀུན་ཕན་མཛད་པའི་སྣང་བ་ཡིས། །འབད་པ་མེད་བཞིན་སེམས་ཅན་ཀུན་དོན་སྤྱོད། །རིང་མོའི་དུས་ནས་བྱང་ཆུབ་སྙིང་པོའི་སར། །ཕྱིན་དྲུག་འགྲོས་ཀྱིས་བགྲོད་ཀྱི་མཐར་ཕྱིན་ཀྱང༌། །མགོན་མེད་ཉམ་ཐག་འགྲོ་ལ་བརྩེར་དགོངས་ཏེ། །སླར་ཡང་དགེ་བའི་བཤེས་གཉེན་གཟུགས་སུ་སྣང༌། །རྟག་ཏུ་འགྲོ་ལ་ཕན་པ་ལྷུར་ལེན་ཅིང༌། །འབྲེལ་ཚད་ཡང་དག་དགེ་བའི་ལམ་ལ་སྦྱོར། །ཆོས་སྐུ་ཟག་པ་མེད་པ་སྒྲུབ་མཛད་ཕྱིར། །དགེ་སློང་ཆོས་ཀྱི་ཉི་མ་ཁྱོད་ཅིག་ཡིན། །བསྐལ་པ་བྱེ་བ་མང་པོར་ཚོགས་བསགས་ཤིང༌། །སྨོན་འཇུག་བྱང་ཆུབ་སེམས་ཀྱི་རྩལ་རྫོགས་པས། ཁྱོད་ཀྱི་མཛད་པའི་རོལ་མོ་ཇི་སྙེད་པ། །མཐའ་དག་ཡིད་ཅན་རྒྱ་མཚོར་སྨན་ལ་ལྟོས། །འཕགས་མཆོག་དཔག་བསམ་ལང་ཚོ་མ་རྙིང་བ། །རྨད་བྱུང་འཕགས་པ་དགྱེས་པའི་ཚུལ་ཁྲིམས་དྲིས། །ཀུན་ནས་ཀུན་ཏུ་བགོས་པའི་དགེ་མཚན་གྱིས། །འདུལ་འཛིན་རྒྱུ་སྐར་ཕྲེང་བ་ཟིལ་གྱིས་མནན། །མདོ་
རྒྱུད་གཞུང་ལུགས་ཟབ་ཅིང་རྒྱ་ཆེའི་གནས། །རྣམ་དག་ཐོས་དང་བསམ་པའི་ཤེས་རབ་ཀྱིས། །དཔྱད་པ་དྲི་མེད་ཤིན་ཏུ་ཡོངས་རྫོགས་པས། །ཀློག་པ་བ་ཁྱོད་འགྲན་ཟླས་དབེན་བཞིན་བཞུགས། །ཟབ་མོའི་དོན་ལ་རྟག་ཏུ་མཉམ་པར་བཞག །མཁའ་ལྟར་གོས་པ་མེད་པའི་ཏིང་འཛིན་སོགས། །ཞི་བའི་ཏིང་འཛིན་སྒོ་བརྒྱ་གཅིག་ཆར་འབྱེད། །སྤོང་བ་པ་ཁྱོད་རྒྱལ་སྲས་ཁྱུ་མཆོག་ལགས། །འཆད་དང་རྩོམ་པའི་ཕྲིན་ལས་རྨད་བྱུང་བས། །གྲགས་ལྡན་མཁས་པ་རྣམས་ཀྱང་ཟིལ་མནན་ཏེ། །མཐའ་ཀླས་འགྲོ་ལ་སྨིན་གྲོལ་ཆོས་ཀྱི་ཆར། །འབེབས་མཛད་བྱ་བ་ལས་ཀྱི་འཁོར་ལོར་རྩེན། །བློ་དང་དྲན་དང་རྟོགས་དང་ཆོས་ཀྱི་གཏེར། །དེ་སོགས་མི་ཟད་སྤོབས་པའི་གཏེར་ཆེན་བརྒྱད། །དཔལ་གོས་འདབ་མ་བཞིན་དུ་རྣམ་རྒྱས་པས། །ལེགས་བཤད་སྒོ་བརྒྱ་འབྱེད་ལ་དཔའ་བར་གྱུར། །འབད་དང་རྩོལ་ལ་རག་ལས་མ་ཡིན་པར། །ཐུག་ཕྲད་ཤེས་རབ་མཆོག་གི་གཏེར་རྡོལ་བས། །མ་ལུས་མི་ལུས་ལེགས་གསུང་དགོངས་འགྲེལ་བཅས། ཁྱོད་ཀྱི་ཐུགས་སུ་ཉིན་མོ་ལྟ་བུར་གསལ། །དཔལ་འབྱོར་སྙན་གྲགས་དབྱར་མཚོ་བཞིན་རྒྱས་ཀྱང༌། །འདམ་གྱི་སྦུབས་ན་པདྨོ་གཞོན་ནུ་བཞིན། །ཆགས་མེད་ཡེ་ཤེས་མཆོག་ལ་ལེགས་གནས་ཏེ། །སྒྱུ་མ་ལ་ནི་སྒྱུ་མ་ཉིད་རོལ་གྱུར། །སྙན་པའི་བ་དན་མཐོ་བའི་ཚེ་
རྣམས་ཀྱང༌། །མི་འདུལ་ཁ་ལོ་སྒྱུར་བ་ཁྱོད་དྲུང་ན། །རྟ་བདུན་ཟེར་གྱིས་ཁེབས་པའི་རྒྱུ་སྐར་བཞིན། །ཆེས་གསལ་མིན་པའི་རང་གཟུགས་ཀུན་ནས་ངོམས། །དགེ་ལེགས་སྣང་འབུམ་གྱིས་ཀུན་གསལ་ལྟོ། །འགེང་མཛད་ཆོས་ཀྱི་ཟླ་རྒྱས་ཁྱོད་མཐོང་ནས། །ཆུ་ཤེལ་ཕུང་པོར་གྲུབ་པའི་འོད་དཀར་ཡང༌། །སྐྱེངས་ཏེ་ཆུ་འཛིན་གསར་པས་འགེབ་ལ་རིངས། །མཐོང་ན་མི་མཐུན་མེད་པའི་སྐུ་དཀྱིལ་མཆོག །གང་ལ་མངོན་སུམ་གྱུར་པའི་དེ་མ་ཐག །ཉོན་མོངས་རྙོག་སྐྱོན་ངང་གིས་ཞི་བྱེད་པའི། །མཐོང་གྲོལ་མཚན་དཔེའི་ཉི་མ་སྲིད་ན་མཛེས། །མཛེས་སྐུ་དྲི་མེད་གསེར་གྱི་མཆོད་སྡོང་བཞིན། །ཐོས་གྲོལ་ཚངས་དབྱངས་ལྷ་ཡི་རྔ་སྒྲ་བཞིན། །སྒྲིབ་མེད་ཡེ་ཤེས་དྭངས་པའི་ནམ་མཁའ་བཞིན། །ཡོན་ཏན་མི་ཟད་གངས་ཆེན་མཚོ་བཞིན་ནོ། །བརྡ་སྤྲོད་གཞུང་དང་ཚད་མ་རིག་པའི་གནས། །ཡང་དག་བློ་གྲོས་མཆོག་གིས་ལེགས་གཟིགས་ཏེ། །རྒོལ་ངན་ལོག་པར་སྨྲ་དང་ལོག་པར་རྟོག །དེ་ཀུན་དངོས་སྟོབས་རིགས་པས་སུན་འབྱིན་མཛད། །བཟོ་དང་གསོ་བ་ཕ་རོལ་རྗེས་འཛིན་སྒོ། །རྣམ་དཔྱོད་ལྡེ་མིག་འཕྲུལ་གྱིས་རབ་ཕྱེ་བས། །རྨད་བྱུང་གཞན་ཕན་ཐབས་ཚུལ་རིན་ཆེན་དབྱིག །མཐའ་ཡས་འགྲོ་བའི་ཉེར་འཚོར་འགྱེད་ལ་ལྟོས། །རྒྱལ་བསྟན་འཁོར་ལོ་གསུམ་གྱི་བརྗོད་བྱའི་དོན། །
དྲང་དང་ངེས་པའི་རྣམ་དབྱེ་ཇི་སྙེད་པ། །ངེས་ཤེས་བློ་མིག་དག་པས་མཐོང་ནས་ནི། །ཤིང་རྟ་ཆེན་པོའི་རྣམ་ཐར་ཇི་བཞིན་སྐྱོང༌། །དེ་སླད་གངས་རིའི་ལྗོངས་ཀྱི་མཁས་པ་ཁྱོད། །དམ་པའི་ནང་ན་ཤིན་ཏུ་དམ་པ་སྟེ། །བློ་མཆོག་མངའ་བ་རྣམས་ཀྱི་འབྱུང་གནས་ཆེ། །འཕགས་མཆོག་ཡེ་ཤེས་མེ་ལོང་ཞལ་སྐྱིན་ལགས། །ཤིན་ཏུ་མ་རྨོངས་དབང་པོ་རྣོན་པོའི་ཡུལ། །རྨད་བྱུང་ལྟ་སྒོམ་སྤྱོད་པའི་གཏེར་མཛོད་མཆོག །ཟབ་མོའི་ནང་རྒྱུད་སྡེ་གསུམ་ཆོས་ཀྱི་ཚུལ། །ཡོངས་གཟིགས་ཡེ་ཤེས་ཆེ་ལྡན་ཁྱོད་ཅིག་རྒྱལ། །གསང་སྔགས་ལམ་བཟང་ཀུན་གྱི་རྩ་བ་ནི། །བུམ་པ་གསང་བ་ཤེས་རབ་ཚིག་དབང་སྟེ། །གཏོར་བླུགས་ཆུ་བོ་རྣམ་བཞི་ཡོངས་རྫོགས་པས། །རྒྱུད་སྡེ་རྒྱ་མཚོར་མངའ་དབང་མཆོག་ཏུ་འབྱོར། །མཐོང་ན་བདེ་ཆེན་ཡེ་ཤེས་རབ་སྩོལ་སྟེ། །གཞན་སྣང་ཟིལ་གྱིས་གནོན་པའི་མཐུ་གྲུབ་པས། །ཧེ་རུ་ཀ་དཔལ་སྐུ་ཡི་དངོས་གྲུབ་སྩོལ། །རང་གིར་མཛད་པའི་འབྲས་རྟགས་ཀུན་ཏུ་གསལ། །བཀའ་དང་རང་གཏེར་ཡང་གཏེར་དགོངས་གཏེར་དང༌། །རྗེས་དྲན་གཏེར་དང་དག་སྣང་སྙན་བརྒྱུད་དེ། །བཀའ་བབས་རིན་ཆེན་བདུན་ལྡན་ཆོས་ཀྱི་རྒྱལ། ཁྱོད་གཅིག་ཚངས་ཆེན་ལྷས་ཀྱང་འགྲན་བཟོད་མིན། །དེ་སྐད་ཁྱབ་བདག་བླ་མ་ལ། །ཚིགས་བཅད་འདི་ཉིད་གྲངས་ལྡན་
གྱིས། །བསྔགས་པ་ཕུལ་བའི་ལེགས་བྱས་ལས། །འགྲོ་ཀུན་བྱང་ཆུབ་མཆོག་ཐོབ་ཤོག །དགེའོ།། ༈ ཁ་བའི་རི་ངོགས་བསིལ་ལྗོངས་བྷོ་ཊའི་གླིང༌། །ཡུལ་འཁོར་ཆེན་པོ་མདོ་ཁམས་སའི་ཐིག་ལེའི། །དུམ་བུ་བཀྲ་ཤིས་ལྷ་རྩེའི་ལྗོངས་ཤིག་ན། །ཀློང་ཆེན་སྒྱུ་མའི་རྣལ་འབྱོར་མཆོག་གཅིག་ཡོད། །དེ་ལ་སྐྱེ་བའི་ཟག་པ་ལྟ་ཅི་སྟེ། །སྒྱུ་མའི་ཡེ་ཤེས་མཆོག་གི་ཕྱག་རྒྱ་ཆེ། །གདན་གསུམ་གཟུགས་སྐུའི་རྣལ་འབྱོར་ལ་ཆགས་ཤིང༌། །མཚན་དཔེ་སྒྱུ་འཕྲུལ་དྲ་བའི་སྣང་བ་སྟོན། །འོད་གསལ་ཟབ་མོའི་གཞི་དབྱིངས་མཉམ་པ་ཆེ། །གཞི་སྣང་དག་ཆེན་རོལ་མོར་འབར་བའི་གར། །རྣམ་རོལ་སྐུ་ཡི་སྣང་བ་འབུམ་ཕྲག་གིས། །སྲིད་པའི་གྲོང་ཁྱེར་རྣམ་གསུམ་རྒྱས་པར་འགེང༌། །རིང་ནས་དྲི་མེད་ཐུགས་རྗེའི་འོད་ཟེར་བརྒྱས། །སྲིད་ན་སྲིད་འགྲོ་བསྐྱང་བས་མ་ངོམ་པར། །སླར་ཡང་འཇིགས་མེད་མཁྱེན་བརྩེའི་ཟློས་གར་གྱིས། །སེམས་ཅན་ཁམས་ལ་སངས་རྒྱས་མཛད་པ་མཛད། །འཕགས་པ་མཆོག་དེའི་གྲགས་སྙན་འཁྲི་ཤིང་ལ། །འཁྱུད་པའི་སྐལ་བཟང་འདུ་བ་སྟོང་ལྷགས་ཏེ། །དྲུང་དུ་ཡུན་རིང་དུས་སུ་བརྟགས་བྱས་ཀྱང༌། །དེ་ཡི་གསང་བ་དཔོག་བཟོད་སུ་ཡང་མེད། །མཁས་པར་གྲགས་པའི་ཆེན་པོ་འབུམ་གྱིས་ཀྱང༌། །དེ་ལ་
སྤོབས་པ་རྒོལ་དུ་མི་སྤྱོད་དེ། །ཆོས་ལ་ཆོས་ཀྱི་བཟོད་པ་མཆོག་བརྙེས་པས། །ཚུལ་གཉིས་ཆོས་ཀྱི་དགའ་སྟོན་འགྱེད་ལ་དཔའ། །གྲུབ་པའི་ས་མཐོར་འཛེགས་པའི་དམ་པ་བརྒྱ། །བདག་ཉིད་ཆེ་དེའི་མདུན་སར་ཉེར་ལྷགས་ཀྱང༌། །དེ་ལ་ཟིལ་གྱིས་གནོན་པའི་སྐབས་མེད་དེ། །སློབ་པ་མིན་པའི་ཟུང་འཇུག་དེ་ཡིས་བརྙེས། །བསོད་ནམས་ཆེན་པོའི་བདག་ཉིད་མང་པོ་ཡང༌། །དེ་ཡི་མདུན་སར་ཆེན་པོར་མི་སྣང་སྟེ། །གསེར་སྦྱང་དྲུང་ན་སྣག་ཚའི་ཕུང་པོ་བཞིན། །སྨོན་ལམ་ཆེན་པོའི་སྟོབས་ཀྱིས་ཟིལ་གནོན་མཛད། །བློ་ཆེན་རྒྱལ་སྲས་བྱེ་བའི་འདུན་ས་ན། །མི་འཇིགས་མགྲིན་པའི་དཀྱིལ་འཁོར་གཟེང་བསྟོད་དེ། །ཟབ་དོན་སྐྱེ་བ་ལྔ་པའི་དབྱངས་སྙན་པོ། །འགྲོགས་མཁས་བློ་གྲོས་རྒྱ་མཚོ་དྲི་མེད་འོད། །དེ་ཡིས་ཆོས་རྣམས་རྨི་ལམ་ལྟར་རྟོགས་པས། །མཚན་མའི་ཆོས་ལ་འཇིགས་པ་མ་མཆིས་ཤིང༌། །གང་ལའང་དོགས་དང་ཞུམ་པ་ཡོད་མིན་ཏེ། །སྟོབས་དང་མི་འཇིགས་རྒྱ་མཚོའི་ཕ་རོལ་སོན། །རྒྱལ་བའི་བསྟན་པ་ཐོག་མཐའ་བར་དགེ་བ། །བྱ་བ་ལས་ཀྱི་འཁོར་ལོས་ཉེར་བཟུང་སྟེ། །སྟོང་གི་འཇིག་རྟེན་ཁོ་ར་ཁོར་ཡུག་ཀུན། །རྣམ་པར་དཀར་བའི་ཕྲིན་ལས་གཅིག་གིས་བཅིངས། །ཕྱོགས་ལྷུང་གདོན་གྱིས་ཟིན་པའི་ཀློག་པ་བ། །རྟོག་གེའི་ཚིག་ལ་སྙེམས་པས་མཁས་པར་རློམ། །བསྟན་པ་ཡོངས་
རྫོགས་འགལ་མེད་གནད་གཅིག་ཏུ། །གཟིགས་པའི་མཐུ་ཆེན་མཁྱེན་བརྩེའི་ལྷ་དེས་གྲུབ། །རྣམ་པར་རྟོག་ལ་ཡེ་ཤེས་སྙེམས་འཆང་བའི། །སྤོང་བ་པ་དེ་གཟུང་འཛིན་འཆིང་བ་ཅན། །རྟོག་མེད་རིག་པ་ཡེ་བཞག་ཆེན་པོ་རུ། །སྤྲོས་པའི་དྲྭ་བ་ནུབ་མཛད་མཁྱེན་བརྩེའི་ལྷ། །བྲག་ལས་ཤོག་སེར་རེ་བའི་གཏེར་རློམ་འགའ། །འདོད་ལྷའི་བྱིན་རླབས་གྲུབ་པ་ཆེན་པོར་རེ། །ཆོས་ཉིད་ཀློང་ནས་ཆོས་སྐུའི་གཏེར་འབྱིན་ཞིང༌། །བཀའ་བབས་བདུན་གྱི་མཛོད་བརྙེས་མཁྱེན་བརྩེའི་དབང༌། །ཟག་བཅས་ཡིད་ཀྱི་འཆིང་བ་མ་གྲོལ་བཞིན། །ཟག་མེད་མངོན་ཤེས་ཐོབ་རློམ་དེ་ཟོག་པོ། །གཞི་གྲོལ་གཏིང་མཐའ་མེད་པའི་དགོངས་ཀློང་ནས། །སྒྲིབ་བྲལ་གཟིགས་པའི་གཏེར་འབྱིན་མཁྱེན་བརྩེའི་དབང༌། །ཆེན་པོའི་གོ་སར་འགྱིང་བའི་སྟོན་པ་བརྒྱ། །ཕྱོགས་རེའི་ཡོན་ཏན་ཙམ་གྱིས་ལྷག་པར་ཁེངས། །མཁྱེན་བརྩེའི་ལྷ་དེ་ཡོན་ཏན་ཡོངས་རྫོགས་ཀྱང༌། །ཡོན་ཏན་མངའ་བར་རློམ་དང་ཁེངས་མི་མཛད། །འཇིག་རྟེན་ཆོས་བརྒྱད་སྒྲུབ་པའི་སྟོན་ཆེན་ཕལ། །ཟང་ཟིང་གཏོང་བའི་གཡབ་མོས་འཁོར་སློབ་བསྡུ། །བདག་ཉིད་ཆེན་པོ་མཁྱེན་བརྩེའི་དབང་ཕྱུག་ནི། །དྲི་མེད་ཆོས་ཀྱི་སྣང་བས་གདུལ་བྱ་སྐྱོང༌། །བསྟན་དང་ཐེག་པའི་རྣམ་གྲངས་ཕྱོགས་རེ་བས། །མཐའ་ཡས་འགྲོ་ཁམས་གདུལ་བར་ནུས་མིན་ཕྱིར། །རང་
རང་དབང་སྐལ་འཚམས་པའི་ཆོས་ཀྱི་ཆར། །སྐལ་བཟང་འགྲོ་བློའི་ཞིང་སར་རྟག་ཏུ་འབེབ། །ནོར་འདོད་ནོར་གྱི་བདོག་པས་རེ་བ་སྐོང༌། །གཏམ་འདོད་སྣ་ཚོགས་གཏམ་གྱི་རོལ་མོས་གསོ། །ཐར་འདོད་ཐར་པའི་ལམ་གྱིས་ཚིམ་མཛད་པའི། །ཐབས་མཁས་བསམ་གྱིས་མི་ཁྱབ་མཁྱེན་བརྩེའི་དབང༌། །འབྱོར་ལྡན་རྗེས་འཛིན་ཕོངས་པ་བརྟུལ་བའི་ཚུལ། །སྙིང་རྗེའི་བདག་ཉིད་དེ་ལ་མི་མཛའ་སྟེ། །བཀྲེན་དང་མ་རུངས་ལོག་པའི་བརྟུལ་ཞུགས་ཅན། །དེ་ལ་དེ་ཡི་བྱམས་བརྩེས་ལྷག་པར་དགོངས། །རྒྱན་དང་བྱུག་པས་ཉེ་བར་མ་བགོས་ཀྱང༌། །ཚུལ་ཁྲིམས་ཕུང་པོའི་སྐུ་མཆོག་ལྷང་ངེ་བས། །གཟུགས་བཟང་གཟུགས་ཀྱི་འཇོ་སྒེགས་ཟིལ་གནོན་པ། །ཚོགས་ཀྱི་ཚོགས་མཆོག་འཇམ་དབྱངས་མཁྱེན་བརྩེའི་དབང༌། །མཉམ་པར་བཞག་པ་མིན་པའི་སྐབས་མེད་པར། །དཔའ་བར་འགྲོ་སོགས་ཏིང་འཛིན་རྣམ་ཐར་ལ། །རྟག་ཞུགས་བློ་གྲོས་རྒྱ་མཚོ་དྲི་མེད་འོད། །དེ་བཞིན་གཤེགས་པའི་ཡུལ་ལ་རང་དབང་བསྒྱུར། །ཚུར་མཐོང་བློ་ཡིས་ཡང་དང་ཡང་དཔྱད་ནས། །རྟོགས་དཀའི་གནད་གསང་རྟོགས་སྨྲ་ལྟར་མིན་ཏེ། །ཟག་པ་མེད་པ་ཤེས་རབ་ཕུང་པོའི་མཐུས། །སྲིད་དང་ཞི་བའི་ཆོས་ཀུན་ཅིག་ཆར་གཟིགས། །སྣ་ཚོགས་སྒྲིབ་པའི་དྲ་བ་མ་ལུས་པ། །ཟབ་མོའི་ཡེ་ཤེས་རལ་གྲིས་ཚར་བཅད་དེ། །རྣམ་
གྲོལ་ཤིན་ཏུ་ཞི་བའི་མྱང་འདས་སུ། །འུབ་ཆུབ་མི་སློབ་ལམ་བརྙེས་མཁྱེན་བརྩེའི་དབང༌། །སོ་སོ་རང་རིག་གཉུག་མའི་ཡེ་ཤེས་ནི། །མཐར་འཛིན་ལྟ་བའི་སྦུབས་སུ་མི་བཞུགས་ཀྱི། །སྟོང་དང་རྟེན་འབྱུང་རོ་མཉམ་ཆེན་པོ་རུ། །གཟིགས་པའི་ངོ་མཚར་མཆོག་གྲུབ་མཁྱེན་བརྩེའི་དབང༌། །རྒྱལ་ཀུན་ཡེ་ཤེས་གསང་བ་རྡོ་རྗེའི་གནས། །ཀློང་ཆེན་དགོངས་པའི་ངང་དུ་རྩལ་རྫོགས་ཀྱང༌། །ཚུ་རོལ་མཐོང་ལ་ཚུར་མཐོང་ལྟར་སྟོན་པ། །བདག་ཉིད་ཆེ་དེའི་འཇིག་རྟེན་མཐུན་འཇུག་ཡིན། །མཁའ་ཁྱབ་ཞིང་ན་རྡོ་རྗེའི་གཟུགས་སྐུའི་གར། །མཆོག་དང་མཆོག་མིན་གཅིག་ཏུ་མ་ངེས་ཀྱང༌། །ངེས་པའི་གཟུགས་སྐུ་དུར་སྨྲིག་འཆང་བའི་ཟོལ། །མཁྱེན་བརྩེའི་ལྷ་དེའི་འཇིག་རྟེན་མཐུན་འཇུག་ཡིན། །འཕོ་མེད་ཡེ་ཤེས་མི་ཤིགས་རང་བྱུང་སྐུ། །རྟག་བརྟན་བགྲེས་རྒུད་མེད་པར་ལྷུན་རྫོགས་ཀྱང༌། །བལྟམས་དང་བགྲེས་དང་བསྙུན་པ་ལྟར་སྟོན་པ། །དེ་དག་དེ་ཡི་འཇིག་རྟེན་མཐུན་འཇུག་ཡིན། །མཐུན་འཇུག་རྩིག་པ་སྔར་ནས་བསྒྱེལ་ཟིན་ཀྱང༌། །འཇིག་རྟེན་སྐྱེ་བོ་ཐབས་ཀྱིས་གདུལ་སླད་དུ། །མཐུན་འཇུག་སྟོང་གི་རོལ་མོ་འབར་བ་འདི། །འཇམ་དབྱངས་བླ་མ་མཆོག་དེའི་སྤྱོད་ཡུལ་ཡིན། །ཛམ་བུའི་གླིང་ན་དུར་སྨྲིག་འཆང་བའི་གཙོ། །ཀུན་དགའ་བསྟན་པའི་རྒྱལ་མཚན་ཞེས་བྱ་སྟེ། །བཤད་དང་སྒྲུབ་པའི་མཛད་
བཟང་སྣང་བ་ཆེས། །ཤིང་རྟ་ཆེན་པོའི་རྣམ་ཐར་གསར་དུ་སློང༌། །རྔ་ཡབ་གླིང་ན་རིག་འཛིན་སྒྲུབ་པའི་རྗེ། །མཚོ་སྐྱེས་བླ་མ་བློ་ལྡན་མཆོག་སྲེད་དེ། །ཞིང་སྔགས་ལྷན་སྐྱེས་དཔའ་མོ་འབུམ་ཕྲག་འབུམ། །ཟབ་གསང་བདེ་བ་མཆོག་གི་ཕྱག་རྒྱས་འདེབས། །རྒྱལ་བའི་མདུན་ན་རྒྱལ་སྲས་བྱེ་བའི་གཙོ། །རྒྱལ་ཀུན་ཡབ་གཅིག་འཇམ་དཔལ་གཞོན་ནུ་སྟེ། །དག་དང་མ་དག་རྒྱལ་བའི་ཞིང་ཁམས་སུ། །རྒྱལ་བའི་སྲས་ཀྱི་སྤྱོད་ཡུལ་རྒྱ་མཚོ་སྟོན། །མདོར་ན་རྒྱལ་བའི་དཀྱིལ་འཁོར་ཇི་སྙེད་པ། །དཔའ་ཆེན་དེ་ཡི་ཡེ་ཤེས་དགྱེས་སྤྲིན་ཏེ། །སྲིད་དང་ཞི་བའི་ལེགས་ཚོགས་ཇི་སྙེད་ཀྱང༌། །བདག་ཉིད་ཆེ་དེའི་ཕྲིན་ལས་རྒྱ་མཚོ་ཡིན། །འཕགས་པའི་རྣམ་ཐར་བློ་ཡིས་མི་ཐུག་པ། །བརྗོད་ལ་སྟོབས་བཅུའི་དབང་ཕྱུག་ངལ་མཛད་ན། །རྨོངས་ཆེན་བདག་འདྲས་བརྗོད་དུ་ག་ལ་ནུས། །ཉུང་ངུའི་ངག་འདི་མོས་གུས་ཡིད་ཀྱིས་ཡིན། །དགེ་བ་དེ་ཡིས་མཐའ་ཀླས་སྲིད་པའི་འགྲོ། །རྗེ་བཙུན་ཁྱོད་ཞབས་ཕྱག་གིས་རབ་འདུད་པའི། །སྐལ་བཟང་མངོན་སུམ་གྱུར་ཏེ་ཚེ་རབས་ཀུན། །སྣང་ནས་སྣང་བ་བླ་མེད་བགྲོད་གྱུར་ཅིག །དཔལ་འཁོར་ལོའི་དབང་ཕྱུག་འཇམ་དབྱངས་མཁྱེན་བརྩེའི་དབང་པོའམ། །མཚན་གཞན་བློ་གྲོས་རྒྱ་མཚོ་དྲི་མ་མེད་པའི་འོད་ཅེས་བྱ་ཞིང༌། ཁ་ཅིག་ཏུ་ཀུན་དགའ་བསྟན་པའི་རྒྱལ་མཚན་དཔལ་བཟང་པོ་ཞེས་ཡོངས་སུ་
གྲགས་པའི་རྗེ་བཙུན་ཆེན་པོ་དེའི་ཡོན་ཏན་གྱི་ཕྱོགས་ཕྲ་བ་ལས་བརྩམས་པའི་གཏམ་འདིའང་མགོན་པོ་གང་གི་བཀའ་འབངས་ཀྱི་ཐ་ཤལ་པ་འཇིགས་མེད་བསྟན་པའི་རྒྱལ་མཚན་དུ་འབོད་པས་གང་དྲན་མྱུར་དུ་བྲིས་པ་དགེ་བར་གྱུར་ཅིག། ༈ །།དཔལ་ལྡན་བླ་མའི་ཡེ་ཤེས་ཀྱི་གསང་བ་ལ་སྔགས་པ་ཟབ་དོན་རྡོ་རྗེའི་ཀ་མ་ཀཱ། བླ་མ་འཇམ་པའི་རྡོ་རྗེ་ལ་ཕྱག་འཚལ་ལོ། །འཇམ་ཞིང་ཟབ་པ་མི་ཤིགས་ན་དའི་དབྱངས། །བདེ་ཆེན་མཁྱེན་བརྩེའི་ཉམས་བརྒྱར་འབར་བའི་དབྱིག །དབང་ཕྱུག་བརྒྱད་ལྡན་འོད་གསལ་སྒྱུ་མའི་སྐུར། །རྣམ་རོལ་དང་པོའི་མགོན་པོར་ཕྱག་བགྱིའོ། །རྣམ་མང་རྟོག་ཚོགས་མཚན་མའི་རྡུལ་ཁམས་བརྒྱ། །འོད་གསལ་ཞི་བ་དམ་པའི་ཆུ་མཐོང་ངོགས། །དེངས་པའི་ཟུང་འཇུག་ཉིན་མོའི་སྣང་བ་བཞིན། །དཀྱིལ་འཁོར་འཁོར་ལོའི་སྤྲོས་པ་འབུམ་དུ་འཇོ། །སྙིང་དབུས་གཞོམ་དུ་མེད་པའི་ཐིག་ལེ་ཆེར། །སྲོག་རྩོལ་ཉི་ཟླའི་འགྲོས་ཀྱིས་ཕྱག་བྱས་པས། །རྣམ་པར་མི་རྟོག་ཟབ་མོའི་མཆོག་བརྙེས་པ། །ཐམས་ཅད་སྟོང་པ་ཁྱབ་གདལ་ཆེན་པོའི་གཤིས། །གཟོད་ནས་རྣམ་ཐར་བཞི་ལྡན་གཉུག་མའི་དབྱིངས། །བདེ་དང་མི་བདེའི་མཚན་མ་ཉེར་ཞི་ཡང༌། །ལྷན་སྐྱེས་མི་འགྱུར་བདེ་བའི་སྒེགས་འཆང་བ། །བདེ་ཆེན་གནས་ནི་བསམ་པར་དཀའ་བ་ལགས། །སྒྲ་གཅན་རླུང་བརྒྱ་ཟོས་པའི་ཤུགས་ལྡང་བས། །རོ་དང་རྐྱང་མའི་
མདུད་པ་ལྷོད་ལྷོད་དུ། །བཤིག་པའི་ཉམས་མྱོང་ཁོང་ནས་ཤར་བ་ན། །ངེས་དོན་གསང་བ་མཆོག་གི་དགྱེས་པ་མཐོང༌། །སྲིད་དང་ཞི་བ་རོ་མཉམ་དེ་ཁོ་ན། །ཤེས་དང་ཤེས་བྱའི་འཇུག་ལྡང་ཐིམ་པའི་དབྱིངས། །གཞི་རྫོགས་ཐིག་ལེ་ཆེན་པོར་འུབ་ཆུབ་པའི། །ཡེ་ཤེས་མཆོག་ནི་ཡེ་སྟོང་རྣམ་པར་སྟོང༌། །སྨྲ་བསམ་བརྗོད་དུ་མེད་པའི་དེ་བཞིན་ཉིད། །རྣམ་མེད་སྟོང་པ་ཉིད་ཀྱི་ཕྱག་རྒྱ་སྟེ། །བདེ་བ་གང་གིས་སྙོམས་པར་འཇུག་བཟོད་པ། །ཨེ་ཝཾ་མཉམ་པར་སྦྱོར་བའི་ཡེ་ཤེས་ཡིན། །སྣ་རྩེར་འབར་བའི་གཟུགས་ཅན་ཙཎྜ་ལི། །དཀྱིལ་འཁོར་བཅུ་ཡི་སྲོག་རྣམས་བཀུག་པའི་དབྱིག །རྣམ་པ་ཀུན་གྱི་མཆོག་ལྡན་ཕྱག་རྒྱ་ཆེར། །འཁྱིལ་བའི་བཙུན་མོ་མཆོག་གཅིག་ཁྱོད་ལ་མངའ། །ཕུལ་བྱུང་བཙུན་མོའི་སྒྱུ་མ་དེ་བརྙེས་པས། །ཉི་ཁྲི་ཆིག་སྟོང་རྡོ་རྗེ་ལུས་ཀྱི་ཆ། །འདོད་དགུར་ཐོས་པའི་ཡེ་ཤེས་མེ་ལྕེ་ཡིས། །ཧེ་རུ་ཀ་དཔལ་དགྱེས་པ་ཅི་སྟེ་མིན། །གང་དུ་ཉི་མ་ཟླ་བ་མི་རྒྱུ་ཞིང༌། །རྡོ་རྗེ་སྔགས་ཀྱི་འཇུག་པས་མ་བཟུང་བའི། །མུན་པའི་ལམ་དེ་སྣང་བར་དཀའ་བ་སྟེ། །ཡེ་ཤེས་འདི་ནི་ཤིན་ཏུ་ཕྲ་བ་ལགས། །གཟུང་འཛིན་གཉིས་སྣང་སྤྲོས་པའི་རྫུན་རིས་ཀུན། །ཞི་བས་གཏད་མེད་ནམ་མཁའི་དབྱིངས་བཞིན་དུ། །ཀློང་ཆེན་བསམ་བརྗོད་མེད་པའི་ངང་གནས་པ། །ཡེ་ཤེས་དེ་ནི་ཤིན་ཏུ་ཡངས་པ་
ལགས། །དབང་ཡུལ་ཕུང་ཁམས་འདུས་པའི་ལྕགས་ནག་རྡུལ། །འདོར་བའི་ངལ་བརྒྱ་བསྟན་པ་མེད་བཞིན་དུ། །དག་བྱེད་བདེ་བ་ཆེན་པོའི་གསེར་འགྱུར་རྩི། །ཡེ་ཤེས་དེ་ནི་ཤིན་ཏུ་རྣོ་བ་ལགས། །བྱ་དཀའི་སྤྱོད་ལ་ཡུན་རིང་མ་བསྟེན་ཀྱང༌། །འདོད་པ་མཆོག་ལ་འཁོལ་བའི་དགའ་བ་ཡིས། །ཚེ་གཅིག་བླ་མེད་བདེ་བའི་མཆོག་སྦྱིན་པ། །ཡེ་ཤེས་དེ་ནི་ཤིན་ཏུ་མྱུར་བ་ལགས། །སད་མི་གཉིད་དང་འཛག་པའི་གནས་སྐབས་ཀུན། །སྒྲིབ་བྲལ་སྐུ་བཞིའི་ངོ་བོ་མངོན་བསྐྱེད་ནས། །སྒྱུ་འཕྲུལ་དྲྭ་བའི་རོལ་མོར་འབྱམས་ཀླས་པ། །ཡེ་ཤེས་དེ་ནི་ཤིན་ཏུ་མཛངས་པ་ལགས། །མདོར་ན་གྲངས་མེད་རྡོ་རྗེ་འཆང་རྣམས་དང༌། །བགྲང་ཡས་དཔའ་བོ་རྣལ་འབྱོར་མ་ཚོགས་ཀུན། །ཡེ་ཤེས་སྒྱུ་མ་བདེ་བའི་ཐབས་ཆེན་པོ། །འདི་ཉིད་ཁོ་ནའི་ཡང་དག་བགྲོད་པ་ལགས། །དེ་སླད་དག་པ་རབ་འབྱམས་བརྟན་དང་གཡོའི། །ཆོ་འཕྲུལ་དངོས་བརྒྱ་གནང་བའི་གར་མཁན་མཆོག །དཔལ་ལྡན་བླ་མའི་ཡེ་ཤེས་གསང་བ་མཆོག །ཟབ་གསལ་གཉིས་མེད་དེ་ལ་ཕྱག་འཚལ་ལོ། །ཞེས་པའང་སྨྱོན་པ་འཇིགས་མེད་པས་མེ་ཁྱི་ཟླ་ཚེས་ཀྱི་ཉི་ཤར་ལ་བྲིས་པ་དགེ་ཞིང་བཀྲ་ཤིས།། །།
ན་མོ་གུ་རུ། །གང་གི་མཚན་ཡང་བསོད་ནམས་གཏེར། །རྣམ་ཐར་མཁས་པ་དགའ་བའི་དཔལ། །གསོལ་བ་བཏབ་ན་དངོས་གྲུབ་ཀྱི། །དགེ་ལེགས་ཀུན་འབྱུང་བླ་མ་རྗེ། །རིགས་ལས་བཙུན་པ་སྨུག་པོ་གདོང༌། །དེ་ཡི་ནང་ན་རྗེའི་རིགས་ཡ་རབས་དྲ་མའི་ཁྱིམ་དུ་འཁྲུངས། །བལྟམས་པའི་ལོ་ནི་ལྕགས་ཕོ་སྤྲེལ། །སྐུ་བོང་ཆེ་ལ་སྐྱེ་མཆེད་གཙང༌། ཁོ་ལག་ཡངས་ཤིང་ཉམས་སྟོབས་ལྡན། །དབུ་ནི་གདུགས་ལྟར་རྒྱས་པ་སྟེ། །རོ་སྟོད་སེང་གེ་འདྲ་བར་སྣང༌། །བློ་གསལ་སྨྲ་མཁས་སྙིང་སྟོབས་ཆེ། །དཔའ་ཞིང་བརྟན་ལ་བརྟུལ་ཕོད་པ། །དེས་ལ་ཤིན་ཏུ་གཞུང་རབ་བཟང༌། །སྙིང་རྗེར་ལྡན་ཞིང་ཆོས་ལ་དགྱེས། །དེ་ལྟར་ཡོན་ཏན་རང་བཞིན་གྱི། །དམ་པའི་རིགས་ཀྱི་པདྨ་དེ། །དང་པོར་རྡོ་རོང་རྫོགས་ཆེན་པའི། །གདམ་ངག་ཆུ་ཡིས་མང་དུ་གསོས། །དེ་ནས་མཁས་གྲུབ་གཞན་མང་བསྟེན། །འཕགས་བོད་པཎ་ཆེན་གཞུང་ལ་སྦྱངས། །དབང་ལུང་མན་ངག་བདུད་རྩི་ཡིས། །བུམ་པ་བཟང་པོ་འདྲ་བར་གྱུར། །སེམས་སྦྱོང་བདུན་དང་བསྐྱེད་རྫོགས་ལམ། ཁྱད་པར་འོད་གསལ་སྙིང་ཐིག་གི༌།རྣལ་འབྱོར་རྩེ་གཅིག་སྦྱངས་པའི་མཐུས། །ཟབ་མོའི་ཏིང་འཛིན་ལས་སུ་རུང༌། །བརྟུལ་ཞུགས་གྲུབ་པའི་ཁྱུ་རྒྱལ་དང༌། །ལྷན་ཅིག་རྡོ་རྗེའི་གནས་ཆེན་ཉུལ། །དཔའ་བོ་་བྱིན་རླབས་ཀྱི། །རྒུན་ཆང་འཐུང་བས་རྟག་ཏུ་བཟི། །སྲོག་ཐུར་དབུ་མའི་དབྱིངས་སུ་དེངས། །གཏུམ་
མོའི་འོད་ཀྱིས་གཉིས་སྤང་ཁྱབ། །དཔྱིད་ཀྱི་དགའ་བ་མཆོག་ཏུ་རྒྱས། །ངེས་དོན་དབུ་མའི་བདེན་པ་གཟིགས། །བརྟན་གཡོ་མཐའ་དག་བདེ་བར་ཤར། །བདེ་ཆེན་རོལ་མོས་ཉིན་མཚན་འདའ། །སྡུག་བསྔལ་སྲིད་པའི་འཇིག་རྟེན་འདིར། །སེང་གེ་བཞིན་དུ་འཇིགས་མེད་རྒྱུ། །བཤད་པ་མཁས་ཤིང་རྩོམ་པ་བཟང༌། །དྲིས་ན་ཟབ་ཅིང་བརྟགས་ཐུབ་པས། །སྔགས་ཤེས་རིན་ཆེན་ཚོགས་ནང་ན། །བསྲེགས་བཅད་བདར་བའི་གསེར་དང་འདྲ། །འགྲོ་བའི་བླ་མ་འཇིག་རྟེན་མིག །ཨོ་རྒྱན་ཆོས་ཀྱི་དབང་པོ་སོགས། །སྐྱེས་མཆོག་མང་པོའི་བླ་མར་མཛད། །སྙིང་ཐིག་ཆོས་ཀྱི་སྡོང་པོ་ཡིན། །འོན་ཀྱང་སྦས་པའི་བརྟུལ་ཞུགས་བཟུང༌། ཁྱིམ་སྔགས་ཕལ་པའི་ཚུལ་དག་གིས། །མཐོང་ཐོས་འགྲོ་བའི་དོན་ཆེན་སྒྲུབ། །གཏིང་མེད་རྣམས་ལ་ཅ་ཅོ་ཉུང༌། །ལོ་ནི་བརྒྱད་ཅུ་རྩ་ལྔའི་བར། །སྐུ་ལུས་ཡང་ལ་སྙུན་དང་བྲལ། །དེ་ནས་འཇམ་དཔལ་མཚན་བརྗོད་གཞུང༌། །འདོན་བཞིན་ཞི་བའི་དབྱིངས་སུ་གཟིམ། །བདག་འདྲའནག་གྲུབ་པའི་ཧེ་རུ་ཀ་ཁྱོད་ཀྱི་ཞབས་རྡུལ་ལ་རེག་པས། །སྐལ་བཟང་སྙམ་ནས་དགའ་བ་སྐྱེས། །གུས་བཅས་ལན་བརྒྱར་ཐལ་མོ་སྦྱོར།། ༈ །།ཕྱི་ནང་རིག་གཞུང་རྒྱ་མཚོའི་ཕ་རོལ་སོན། །ཟབ་རྒྱས་གསུང་རབ་མང་པོའི་སྒྲོམ་གཅིག་གྱུར། །དབེན་པའི་གནས་སུ་སྐུ་ཚེ་སྒྲུབ་ལ་དྲིལ། །ཐུགས་དམ་ཞལ་གཟིགས་བྱང་ཆུབ་སེམས་གཉིས་འབྱོངས། །ཆོས་བརྒྱད་རོ་སྙོམས་སྦས་པའི་
བརྟུལ་ཞུགས་མཛད། །སྡིག་སྤྱོད་ཡུལ་ཁམས་དཀར་པོའི་གླིང་དུ་བསྒྱུར། །བྱང་ཆུབ་སྤྱོད་པའི་ལམ་བཟང་ཕྱོགས་བརྒྱར་སྤེལ། །གསང་ཆེན་རྒྱུད་རྒྱལ་རྩེ་མོའི་བསྟན་སྲོག་བཟུང༌། །ཨོ་རྒྱན་འཇིགས་མེད་ཆོས་ཀྱི་དབང་པོ་ལ། །རྣམ་ཐར་དྲན་བཞིན་དད་པས་གསོལ་བ་འདེབས། །འདི་ཕྱི་བར་དོ་ཀུན་ཏུ་ཐུགས་རྗེས་ཟུངས། །གོང་མའི་བརྒྱུད་སྲོལ་ཟིན་པར་བྱིན་གྱིས་རློབས། །རང་གི་འདོན་རྒྱུར་བསྟན་པའི་ཉི་མས་བྲིས་པའོ།། ༈ །།རྒྱལ་བསྟན་མདོ་དང་སྔགས་ཀྱི་ལྟ་གྲུབ་གནད། །ཟབ་མྱུར་བློ་གྲོས་རྣོན་པོས་འབིག་པ་ལ། །གཞན་དྲིང་མི་འཇོག་མི་ཕམ་ཆོས་ཀྱི་རྗེ། །དྲི་མེད་རིགས་པའི་གཏེར་ཆེན་ཁྱོད་མིན་སུ། །རྟོག་གེའི་ལམ་གྱིས་ཐ་སྙད་འཇལ་བ་ན། །རྟོག་གེ་མཁན་པོ་ཕལ་དང་མི་མཚུངས་པའི། །རྟོག་གེའི་གསང་གཏམ་བརྟོལ་བའི་བློ་གྲོས་དང༌། །ལྷན་ཅིག་རིགས་པར་སྨྲ་བའི་གྲགས་སྙན་རྒྱས། །ཟབ་མོའི་ཆོས་ཉིད་གཞལ་ལ་ཞུགས་པ་ན། །ཚུར་མཐོང་བློ་གྲོས་ཉི་ཚེ་མ་ཡིན་པར། །ཡང་དག་ངེས་ཤེས་ཡངས་པོའི་ཐེམ་སྐས་ལ། །བསྟེན་ནས་མཐའ་བྲལ་གནས་ལུགས་ཇི་བཞིན་གཟིགས། །སྤྲོས་མེད་ཇི་ལྟའི་ཆོས་དབྱིངས་ལེགས་གཟིགས་པས། །སྤྲོས་བཅས་ལམ་གྱི་མདུད་པ་ཞིག་གྱུར་ཅིང༌། །བློས་བྱས་ཐེག་པའི་གནད་གསང་ཀུན་མཁྱེན་པས། །གླེན་སྒོམ་རྫོགས་ཆེན་སྒོམ་ལོར་ཁྱོད་མི་མཚུངས། །སྣ་ཚོགས་གྲུབ་མཐའི་ཚུལ་མང་ཐུགས་ཆུད་ནས། །གྲུབ་མཐའི་འདོད་བློ་ཞི་བའི་
ནང་དབྱིངས་སུ། །རྩོལ་རྟོག་མེད་པའི་ཚུལ་གྱིས་སྙོམས་འཇུག་པས། །ཏརྐ་སྨྲ་བ་ཕལ་ཆེར་ཟིལ་གྱིས་མནན། །མཁས་པའི་ས་མཐོར་འཛེགས་པའི་ཆེ་རྣམས་ཀྱང༌། །ཡིད་གཉིས་སྤང་བ་མིན་པའི་རང་མཚང་བརྒྱ། །ངོམ་པའི་ཟབ་དོན་ས་འོག་གཏེར་འདྲ་བ། །དེ་ཀུན་ཁྱོད་ཀྱི་ཐུགས་ལ་ཉིན་བཞིན་གསལ། ཁྱོད་ཀྱི་རིགས་ཚུལ་གཅིག་ཙམ་རྟོགས་པས་ཀྱང༌། །ཟབ་མོའི་ཆོས་ཚུལ་སྒོ་བརྒྱ་ཅིག་ཆར་དུ། །འབྱེད་པའི་ཐབས་ཚུལ་བསམ་གྱིས་མི་ཁྱབ་པས། །སྐལ་བཟང་སྙིང་ལ་གཟུངས་སྤོབས་སྣང་བ་སྟེར། ཁྱོད་ཀྱིས་ལེགས་བཤད་འོད་སྣང་སྤྲོ་བ་ན། །བློ་ལྡན་བློ་ཡི་པདྨོ་འཛུམ་བྱེད་ཀྱང༌། །རྒོལ་ངན་འབྱུང་པོའི་བྱ་ཚོགས་ལྡོང་གྱུར་ཏེ། །རབ་དགའི་ཀུ་མུད་ཟླུམ་ཞིང་ཤིན་ཏུ་ཟུམ། །འཕགས་པའི་ཡུལ་ན་འཕགས་མཆོག་ཀླུ་སྒྲུབ་དང༌། །གངས་རིའི་ཁྲོད་ན་མི་ཕམ་ཆོས་ཀྱི་རྗེ། །ཐལ་འགྱུར་དབུ་མའི་དགོངས་དོན་སྨྲ་བ་ལ། །ཤིང་རྟ་ཆེན་པོར་བསྙོན་དང་བསླུ་བ་སྤངས། །དེ་སླད་བདག་ཀྱང་ཁྱོད་ཀྱི་རྣམ་ཐར་ལ། །གུས་པའི་ཉི་གཞོན་སྙིང་གི་ཀུན་གསལ་ལྟོར། །འཛིན་པའི་ངོ་མཚར་ཤིན་ཏུ་བསྙེན་བྱས་ཏེ། །སོར་མོའི་ཆུ་སྐྱེས་ཟུམ་ལ་གཅིག་ཏུ་ཕྱོགས། །ཞེས་པའང་འཇིགས་མེད་པས་ཇ་ཕོར་གང་བཏུང་བའི་ཡུན་ཙམ་ལ་བསམ་གཞིག་མེད་པར་བྲིས་པའོ།། །།ཨེན་ཨེན་དུས་ཀྱི་ཡུན་ལ། །མང་མང་ཆོས་སྒོ་འབྱེད་པའི། །མྱུར་མྱུར་བློ་གྲོས་མངའ་བ། །མཁས་མཁས་མི་ཕམ་ཆོས་རྗེ། །ཡང་ཡང་ཡིད་ལ་བྱས་ཏེ། །ཟླུམ་ཟླུམ་སྤྱི་བོའི་ཐིག་ལེར། །ཟུམ་ཟུམ་ཐལ་མོས་མཆོད་ཀྱི། །ཟབ་ཟབ་བློ་མཆོག་སྩོལ་ཤོག། །།
ཕུན་ཚོགས་དམ་པ་གཉིས་ཀྱི་རྒྱལ་ཐབས་བདག །འཇིག་རྟེན་མགོན་ལ་དང་བས་ཕྱག་བགྱིས་ཏེ། །དེ་ཡི་བཀའ་སྡོད་ལེགས་ལྡན་ནག་པོ་ཆེའི། །ཞལ་ལ་བྱིས་པའི་བསྟོད་དབྱངས་མེ་ཏོག་འཐོར། ཁྲོ་གཉེར་རླབས་འཁྲུགས་རྒྱ་མཚོའི་ཀློང་ལྟར་གནག །མཚོ་དབུས་ཉི་མའི་གཟུགས་ཤར་འདྲ་བའི་སྤྱན། ཁྱོད་ཞལ་འཇིགས་རུང་ཉམས་བརྒྱར་འབར་ན་ཡང༌། །དངོས་གྲུབ་རིན་ཆེན་འབྱུང་བས་ཀུན་དགའི་གཞི། །རབ་ཁྲོས་འབར་བའི་གདོང་ཅན་ཉི་མའི་མིག །ཡོན་པོར་ལྟ་བས་དགྲ་སྡེ་སྲེག་བྱེད་ཅིང༌། །སྨིན་འཁྱོགས་མེ་འབར་གློག་འགྱུའི་ཕྲེང་བ་བཞིན། །དེ་མཐུས་ཕྱོགས་རྣམས་འོད་ཟེར་རྡུལ་ཆུ་འབྱུང༌། །ཚ་བསྲེག་རྣོ་བའི་གཟི་ལྡན་དམར་ཟླུམ་སྤྱན། །གཟིགས་པ་ཙམ་གྱིས་ལོག་འདྲེན་ཁྲོ་བོའི་དཔུང༌། །ཉི་མས་གདུངས་བསྐྱེད་མར་གསར་བཞིན་འཇུ་བས། །བདུད་ཀྱི་དགྲ་ཞེས་གྲགས་པའི་རུ་མཚོན་ཐོབ། །ཞགས་པས་མ་བཟུང་ཕུར་བུས་བཏབ་མིན་ཡང༌། །ཆེ་བར་སྙེམས་ཤིང་སྟོབས་ཀྱིས་དྲེགས་པ་བརྒྱ། །སྡང་མིག་ཟུར་གྱིས་ཕོག་པའི་མོད་ཁོ་ནར། །རི་མོའི་གཟུགས་བཞིན་གཡོ་བ་མེད་པར་འཆིང༌། ཁྲོ་གཉེར་བསྡུས་པའི་ཤངས་ཀྱི་རླུང་སྒྲོམ་ལས། །འཇིགས་པའི་ཧཱུྃ་སྒྲ་མི་བཟད་རབ་འབྱིན་པས། །རི་གླིང་རྒྱ་མཚོར་བཅས་པའི་ས་གཞིའི་ཁྱོན། །ཆུ་དབུས་རླུང་ཆེན་བསྣུན་པའི་གྲུ་བཞིན་གཡོ། །བགྲང་དུ་མི་སྤྱོད་གདུལ་གྱིས་མི་ལང་བའི། །སྲིད་གསུམ་
གདུག་པ་དུས་གཅིག་ཟ་བའི་ཁ། །དྲག་པོར་གདངས་འདིས་གདུལ་དཀའ་ཡོངས་འདུལ་བའི། ཁུར་ཁྱེར་རྣམས་ཀྱི་ཐུགས་ཁྲལ་ཆུང་ངུར་བཏུངས། །འུར་འུར་འབར་བའི་སྒྲར་བཅས་མེ་ལྕེ་ཡིས། །ཕྱེ་ལེབ་སྤྲང་བུའི་ཚོགས་རྣམས་ལེན་པ་བཞིན། །ཧཱུྃ་ཧཱུྃ་དྲག་པོའི་དབྱངས་ལྡན་དམར་མཉེན་ལྗགས། །བསྐྱོད་པས་ཕྱོགས་བཅུའི་དགྲ་བགེགས་ཟས་སུ་འགུག །སྲ་བརྟན་ཆེ་བ་རྣོ་དཀར་གཙིགས་པའི་ངོས། །བསྟན་དགྲའི་གསོན་ཁྲག་གོས་དམར་གྱོན་པ་ནི། །ཐུན་མཚམས་སྤྲིན་གྱིས་གཡོགས་པའི་གངས་རིའི་ཕྲེང༌། །བརྡབ་པས་གནམས་གཡོ་འཁྲུགས་སྟོན་པ་བཞིན། །རྔམས་ཞལ་འོད་ཀྱིས་དགྲ་སྲོག་གབ་པ་འབྱིན། །དབུགས་ཆེན་ཚ་བས་དགྲ་ཡུལ་མུན་པར་བྱེད། །ཕྲད་དང་ཟོས་པ་དུས་གཅིག་རྐན་སྒྲ་གཏོག །མ་རུངས་འཇིགས་བྱེད་འབྱུང་པོའི་རི་དྭགས་དགྲ། །གཡུལ་ལ་དགྱེས་ཤིང་དཔའ་བོའི་བཤུག་གླུ་ཡིས། །བསྐུལ་ཚེ་གཏུམ་ཆེན་དྲག་པོའི་ལྷ་དམག་ཚོགས། །མཚོན་ཆའི་འོད་ཀྱིས་ཉི་ཟླ་ཟིལ་གནོན་པ། །འཚུབ་པས་ནམ་མཁའི་ལམ་སྲང་བར་མེད་ཁྱབ། །དེ་མཐོང་རི་རབ་འགྲོས་ལ་ཕྱོགས་པ་བཞིན། །འགུལ་ཞིང་ལྷ་མིན་ཡུལ་གྱི་རྒྱལ་མཚན་རྣམས། །བརྒྱལ་བས་འགྱེལ་གྱུར་སྦྱིན་སྐྱེས་དགའ་མའི་འཁོར། །ཡུག་སའི་གནས་སྐབས་སེམས་ཤིང་དུད་མོ་ལྡིར། ཁམས་ནག་རལ་པ་བརྫེས་པའི་སྐྲ་གསེབ་ནས། །གློག་འགྱུ་ནམ་མཁའ་འགེང་བའི་མེ་སྟག་ཚོགས། །
བཟོད་དཀའི་འོད་དམར་འཚེག་ཅིང་དྲག་རྒྱུ་བས། །རྒྱུ་སྐར་གནམ་སྔོན་ཟབ་མོའི་བུག་རིང་བྱེར། །བདུད་སྡེའི་སྙིང་སྟོབས་བུད་ཤིང་ཟ་བའི་མེ། །བསྟན་དང་དེ་འཛིན་རྣམ་པར་རྒྱལ་བའི་དཔལ། །ས་གསུམ་དྲེགས་པའི་ཚོགས་རྗེ་ནག་པོ་ཆེ། །མ་མོའི་འཁོར་དང་བཅས་ལ་ཕྱག་འཚལ་ལོ།། ༈ །།ཧྲཱིཿ ཛ་ལནྡྷ་རའི་བ་གམ་ཏོག །བདེ་ཆེན་དངོས་གྲུབ་རྒྱུན་འབེབས་པ། །འཆི་མེད་ཟླ་བའི་ལང་ཚོ་ཅན། །པདྨ་འབྱུང་གནས་ལ་ཕྱག་འཚལ། །སྟོང་ཉིད་ཕག་མོའི་བདེ་ཀློང་དུ། ཁམས་ལྔ་དག་པའི་ཤེས་རབ་ཆ། །བུད་མེད་སྒྱུ་མའི་དབྱིབས་གཟུགས་སུ། །རྣམ་འཕྲུལ་མཁའ་འགྲོ་ལྔ་ལ་འདུད། །ཀུན་རྟོག་ཟོས་པའི་ཙཎྜ་ལིས། །དཔྱིད་ཀྱི་སྤྲིན་སྒྲ་སད་པ་ལས། །ལྷན་སྐྱེས་ཉམས་བརྒྱར་རོལ་བ་མོ། །དབྱིངས་ཆེན་རྨ་བྱའི་རྒྱལ་མོ་ལྔ། ཁྱོད་ནི་ཆགས་མཆོག་པདྨའི་ཞིང༌། །ཟླ་ཞུན་ཁ་བའི་གོས་ཅན་གྱི། །རྡོ་རྗེ་ཕུང་པོའི་བོད་ལྗོངས་སུ། །ལས་རླུང་འགོང་པོ་འདུལ་བྱེད་ཅིང༌། །མཐར་འཛིན་མུ་སྟེགས་རྒྱུ་བ་གཅོད། །ཡེ་ཤེས་དྭངས་མའི་ལོངས་སྤྱོད་ཀྱིས། །འཇའ་ལུས་རྡོ་རྗེའི་སྲོག་སྒྲུབ་པས། །བཀྲ་ཤིས་ཚེ་རིང་མཆེད་ལྔར་གྲགས། །མི་ཕྱེད་མ་དང་ཕྲ་གཟུགས་སོགས། །གནས་ཡུལ་མ་མོ་མཁའ་འགྲོའི་སྤྲིན། །ཐིག་ལེ་རླུང་གི་གཟུགས་ཅན་མ། །ཀུན་ཀྱང་ཁྱོད་ཀྱི་རྣམ་འགྱུར་དང༌། །སྣ་ཚོགས་ལས་སྒྲུབ་ཕྱག་བརྙན་འཁོར། །
སྐྱེ་འགྲོའི་ལུས་ངག་ཡིད་གསུམ་གྱི། །སྣང་དང་མི་སྣང་ཕྱེད་སྣང་གྲོང༌། ཁྱབ་པར་ཉུལ་ཞིང་ཀུན་དབང་སྒྱུར། །ཀུན་རྫོབ་སྤྲོས་པའི་འཛུམ་དཀར་བརྒྱས། །འཇིག་རྟེན་མིག་སྒྱུར་རྩ་རླུང་གི༌།སྨན་མོའི་གྲོང་ཁྱེར་ཇི་སྙེད་ཀྱང༌། །དོན་དམ་སྤྲོས་མེད་ནམ་མཁའི་སྐུ། །འོད་གསལ་དབྱིངས་ལྔར་རྣམ་དག་སྟེ། །ཨ་ཝ་དྷུ་ཏི་མཐོན་མཐིང་གངས། །ཤེལ་དཀར་རྩ་ཡི་ཕོ་བྲང་ཆེར། །བདེན་གཉིས་མ་མོ་ཐ་མི་དད། །མཐར་ཐུག་ཉི་མའི་འཕོ་བ་རྣམས། །འགྱུར་མེད་དབྱིངས་སུ་རྒྱས་ཐེབས་པས། །ཕྱི་ནང་གཞན་གསུམ་དབུ་མར་འདྲེས། །གངས་ཆེན་རྒྱལ་མོས་ཕྱོགས་དུས་ཁྱབ། །བདེན་དོན་རྣམ་པ་བཅུ་གཉིས་ཀྱི། །བསྟན་སྐྱོན་ཡ་མ་ཆེ་རྣམས་ཀྱང༌། །མཆོག་བདེའི་ལང་ཚོ་གང་བ་མོ། ཁྱོད་ཀྱི་ཡོངས་འགྱུར་དག་པ་ལགས། །དེ་སླད་རླུང་སེམས་འཕོ་བའི་ཆ། །དབྱིངས་ལྔ་མི་ཕྱེད་ཀ་དག་ཀློང༌། །བདེ་ཆེན་ཐབས་ཀྱིས་བསྡམས་པ་ལས། །སྣང་སྲིད་མ་མོའི་སྲོག་ཏུ་འདྲེས། །མ་མོ་རང་སེམས་གཉུག་མར་བསྟིམ། །ཉག་གཅིག་ཐིག་ལེ་ཆེན་པོའི་ཀློང༌། །གདོད་མའི་རྒྱལ་སྲིད་དབང་བསྒྱུར་ཏེ། །དོན་གཉིས་བསམ་པ་ལྷུན་གྲུབ་ཤོག །ཅེས་པའང་སྐྱབས་རྗེས་མཆོག་སྤྲུལ་རིན་པོ་ཆེ་འཇམ་དབྱངས་ཆོས་ཀྱི་བློ་གྲོས་པས་འདི་འདྲ་ཞིག་བྲིས་ཞེས་གནང་རྟེན་བཅས་བཀའ་ཕེབས་པ་ལྟར་བསྟན་པའི་ཉི་མས་སྦྱར་བ་དགེ་ཞིང་བཀྲ་ཤིས།། །།