གསུང་མགུར་ཕྱོགས་བསྡུས།
ཨ་ཧོ་སྐལ་ལྡན་ཤིང་རྟའི་ཆུ་འགྲམ། །སྐལ་བཟང་གྲོང་གི་ཉེ་འདབས། །ཉམས་དགའ་ལུམྦི་ནི་ཡི་ཚལ་དེར། །ཟས་གཙང་རིགས་ཀྱི་པདྨོ་བཞད་དོ། །དེ་ཚེ་འཇིག་རྟེན་གསུམ་གྱི་ཁོངས་འདི། །ལྷ་ཀླུ་མི་གསུམ་དགའ་བའི་ཅ་ཅོས། །གླུ་ཡི་འདུན་ཁང་ལྟ་བུར་གྱུར་ཏེ། །དམྱལ་ཁམས་སྡུག་བསྔལ་མེ་ཡང་ཞི་སྐད། །ང་ནི་ས་གསུམ་འགྲོ་བའི་མིག་ཅེས། །འཇིགས་བྲལ་ཚངས་པའི་དབྱངས་ཀྱི་ང་རོས། །སྟོང་གསུམ་དཀྱིལ་འཁོར་མ་ལུས་བཀང་ཚེ། །འོན་པ་རྣམས་ཀྱང་རྣ་བ་དག་གོ་བཙོ་སྦྱངས་གསེར་ཞུན་ལྟ་བའི་འོད་ཀྱིས། །མཁའ་ལྟར་ཡངས་པའི་ཞིང་ཀུན་གཡོགས་ཏེ། །དམུས་ལོང་མུན་པའི་སྐྱེ་གནས་རྣམས་ཀྱང༌། །དེ་ཚེ་མིག་དང་སྣང་བ་རྙེད་དོ། །བགྲང་བྱ་སུམ་སྟོང་ཉེ་བའི་ཁོངས་འདིར། །དེ་ལྟའི་ཡ་མཚན་གཞལ་མེད་བྱུང་ཡང༌། །ཆ་ཙམ་མཐོང་ཐོས་ཡུལ་གྱི་སྐལ་བར། །མ་ཐོབ་བདག་འདྲ་དེ་ཚེ་གར་སོང༌། །མགོན་པོ་གཞོན་ནུའི་རོལ་རྩེད་མཛད་ཅིང༌། །བཙུན་མོའི་འཁོར་དབུས་སྒྱུ་མ་སྟོན་དང༌། །དཀའ་སྤྱད་བྱང་ཆུབ་ཤིང་དྲུང་གཤེགས་པའི། །གནས་སྐབས་ཀུན་ཏུ་ཉིན་རེ་ཞིང་ཡང༌། །ཕྱོགས་བཅུའི་ཞིང་ནས་གྲངས་མེད་གདུལ་བྱ། །འཕགས་ཡུལ་རིགས་བཞི་མི་ཡི་ནང་དུ། །བདུད་རྩི་སྦྱིན་པའི་མགྲོན་ལ་བསོགས་ནས། །ས་འདི་དེ་འདྲའི་འཁོར་གྱིས་གང་སྟེ། །ཀྱི་ཧུད་དེ་ཚེ་དབུས་འགྱུར་ཚལ་གྱི། །གནག་རྫི་ཐ་ཤལ་ཙམ་དུ་སྐྱེ་བའི། །སྐལ་བ་མ་གཟིགས་
སྡིག་པའི་གོང་བུ། །བདག་འདྲ་མི་རུ་རློམ་སྟེ་ཅི་རུང༌། །སྐྱེས་མཆོག་བྱང་ཆུབ་བླ་མེད་བརྙེས་ནས། །ཕྱོགས་བཅུར་གདུལ་བྱ་རེ་རེའི་ཕྱིར་ཡང༌། །ཐོགས་མེད་རྫུ་འཕྲུལ་རྐང་པའི་ཤུགས་ཀྱིས། །སྐྱོ་དུབ་ངལ་བ་མེད་པར་གཤེགས་ཏེ། །བདག་འདྲ་འདི་ན་མ་བརྒྱུད་བྱ་བ། ཁམས་གསུམ་ཀུན་ཏུ་ཡོང་ཡེ་མེད་ཀྱང༌། །སྡིག་འཕྲོག་འཁོར་ལོ་མངའ་བའི་ཕྱག་དེར། །ཐེང་གཅིག་མ་བཏུད་སྐལ་པ་ངན་ནོ། །དྲི་མེད་ཟླ་ཞལ་དེ་ཡི་སྤྱན་སྔར། །གླེན་ལྐུགས་དུད་འགྲོའི་རྟེན་ལ་ཕྱིན་ཡང༌། །འདི་ལྟར་རྣམ་མང་རྒུད་པའི་རྒྱ་མཚོར། །བྱིང་སྟེ་མི་མཆི་རྟ་དབྱངས་བཞིན་ནོ། །འོན་ཀྱང་བདག་དང་བདག་འདྲ་དུ་མ། །ཐུབ་པའི་སྐུ་ཚེ་སྔ་མར་བསྡུ་བཞིས། །མགྲོན་དུ་བོས་པའི་འཁོར་ལ་གཏོགས་ཕྱིར། །དེ་ཡི་ཚེ་ཡང་འབངས་སུ་དགོངས་མཆི། །རིང་ནས་ལས་ཀྱི་ཆུ་བོས་ཁྱེར་ཡང༌། །དྲང་སྲོང་སྨོན་ལམ་ཞགས་པས་བརྟོད་ཕྱིར། །རྒྱལ་བསྟན་ལྔ་བརྒྱ་ཕྱི་མའི་དུས་མཐར། །གསུང་རབ་རིན་ཆེན་གླིང་དུ་འཐོན་བྱུང༌། །ཕན་མཛད་ཆོས་ཀྱི་ཕྲིན་བསྐུར་མང་པོ། །སློབ་དཔོན་ཀླུ་སྒྲུབ་ཞལ་སྒོ་བརྒྱུད་ནས། །མཐར་གྱིས་རྗེ་བཙུན་བླ་མའི་དྲིན་ལས། །ཡིད་དང་རྣ་བའི་བདུད་རྩིར་རྙེད་དོ། །དེ་ཚེ་དགའ་སྐྱོ་འདྲེས་མའི་ཉམས་ཀྱིས། །ཀྱེ་མའོ་ཐུགས་རྗེ་ལྡན་པའི་སྟོན་པ། །འདི་ལྟར་འཕྲིན་ཙམ་ཤུལ་དུ་བཞག་ནས། །གར་བཞུད་སྙམ་སྟེ་མཆི་མ་བློག་གོ །ས་སྟེང་ཆོས་ཀྱི་སྣང་བ་འགྱེད་པའི། །བསྟན་འཛིན་ཉི་ཟླའི་ཕྲེང་
བ་ཕལ་ཆེར། །དུས་ཀྱི་རིམ་པས་ཞི་བར་གཟིམས་ཏེ། །ཆོས་མིན་འབྱུང་པོའི་བྱ་རྣམས་དགོད་འདུག །སྟོན་པའི་ལེགས་གསུང་ནོར་བུའི་སྒྲོམ་ཆེན། །ནགས་མཆོག་གང་དུ་ཐོག་མར་ཕྱེ་བའི། །དྲང་སྲོང་ལྷུང་བའི་ནགས་ཚལ་དེ་དང༌། །རི་དབང་བྱ་རྒོད་ཕུང་པོ་དེ་ཡང༌། །དགའ་སྟོན་ཟིན་པའི་སྐྱེད་ཚལ་བཞིན་དུ། །ཧ་ཅང་ཉམས་སུ་དགའ་རྒྱུ་མེད་དེ། །སངས་རྒྱས་རྗེས་དྲན་མཚན་མ་ཕལ་ཆེར། །སྐྱོ་ཤས་སྐུལ་བའི་ཕོ་ཉར་སོང་འདུག། དཀར་པོའི་ཆོས་དང་དེ་ཡི་འབྲས་བུ། །དགའ་དང་སྐྱིད་པའི་དངོས་པོ་གང་མཐོང༌། །སྟོན་པའི་བཀའ་དྲིན་ཁོ་ནར་ངེས་པས། །དེས་ཀྱང་རྒྱལ་བ་ཉག་གཅིག་དྲན་ནོ། །འཇིགས་རུང་སྙིགས་མའི་སྤྱོད་ཚུལ་རྣམས་དང༌། །སྡུག་བསྔལ་མང་པོས་ཡིད་རབ་བྱུང་ཚེ། །བློ་གཏད་གཞན་ན་མེད་པར་ངེས་པས། །དེས་ཀྱང་སྟོན་པའི་རྣམ་ཐར་དྲན་ནོ། །མང་དུ་དྲན་ཡང་ཀུན་རྟོག་རི་མོ། །དུས་ཀྱང་རང་ཉིད་གདུངས་བ་ཙམ་ལས། །མཚན་དཔེའི་མཆོད་སྡོང་བལྟར་ནི་མི་སྣང༌། །ཀྱི་ཧུད་མི་བཟད་ལས་ཀྱི་མུན་པ། །དེ་ལྟར་རང་རྒྱུད་ཆོས་ཀྱི་སྒྲིབ་པས། །བསླད་ཕྱིར་སྔོན་གྱི་སངས་རྒྱས་རྣམས་དང༌། །གང་གིས་བདག་ཅག་ཕྱག་མཚན་བཞེས་པའི། ། སྐྱེས་མཆོག་དེ་ཡང་མ་མཐོང༌། །ད་དུང་རང་གི་སྤྱོད་ལ་བལྟས་ཚེ། །བྱས་ཚད་ཆོས་སྤང་མིན་པ་མི་འདུག །དེ་ཕྱིར་མ་བྱོན་སངས་རྒྱས་རྣམས་
དང༌། །དེ་འདྲར་འགྱུར་དོགས་གདུངས་བ་སྐྱེའོ། །ཚུལ་འདི་བསམས་ཤིང་སྐྱེ་བ་ཀུན་ཏུ། །སྐད་ཅིག་ཙམ་ཡང་དམ་པའི་ཆོས་ལ། །ལོག་སྒྲུབ་མི་བྱེད་བསམ་སྦྱོར་གཙང་མས། །རྒྱལ་བ་དགྱེས་སྐྱེད་སྨོན་ལམ་འདེབས་སོ། །སྟོབས་བཅུ་མངའ་བའི་རྗེས་སུ་བསམས་ཏེ། །མཆི་མ་བླག་པའི་སྨྲེ་སྔགས་འདི་ཡིས། །སྔོན་བསགས་ཆོས་ཀྱིས་ཕོངས་པའི་སྒྲིབ་མུན། །མཐའ་དག་ཡུད་ལ་བྱང་བར་གྱུར་ཅིག །བརྩེར་བཅས་བདེན་པ་གསུང་བ་དེ་ཡིས། །མ་བྱོན་རྒྱལ་རྣམས་ང་ཡི་མཛའ་ཟླ། །ང་ལ་རྩེ་གཅིག་དད་པར་བྱོས་དང༌། །མཛའ་བོའི་ཚོགས་ལ་བཅོལ་གཏམ་བགྱི་ཡིས། །ཞེས་གསུངས་བཀའ་འདི་རྣམ་པ་གཞན་དུ། །མི་འགྱུར་སྙམ་ནས་རེ་བའི་མིག་ཡངས། །ཟླ་མེད་སྟོན་པ་ཁྱོད་ལ་གཏོད་ཀྱིས། །ཐུགས་རྗེའི་རྒྱ་མཚོ་བཏང་སྙོམས་མ་བཞུགས། །བྱང་ཆུབ་བར་གྱི་ཚེ་རབས་ཕྲེང་བར། ཁྱོད་ཀྱི་ཡོངས་རྫོགས་བསྟན་པའི་མཛོད་ཁང༌། །དངོས་པོ་ཀུན་གྱིས་ལེགས་པར་བཟུང་སྟེ། ཁྱོད་མཉེས་འབའ་ཞིག་བྱེད་པར་ཤོག་ཅིག །སྟོན་པ་མཉམ་མེད་་རྒྱལ་པོ་རྗེས་སུ་དྲན་པའི་སྨྲེ་སྔགས་ཀྱི་གདུང་དབྱངས་དོན་དང་ལྡན་པ་ཞེས་བྱ་བ་བསྟན་པའི་ཉི་མས་མཛེས་བྱེད་ཆུ་སྟོད་ཟླ་བའི་རྒྱལ་བ་དང་པོའི་ཉིན་སྦྱར་བ་འདིས་ཀྱང་སྐྱེ་བ་ཐམས་ཅད་དུ་དེ་བཞིན་གཤེགས་པས་རྗེས་སུ་དགོངས་པར་གྱུར་ཅིག་གུ།། ༈ །།ངོ་མཚར་ལ་ཨ་ཧོ། །འགྲོ་དྲུག་སྲིད་པའི་རྒྱལ་ཁམས་ཡངས་པོར། །ངེས་མེད་རྒྱུ་བའི་སྤྲང་རྒན་སྨྱོན་པ། །མི་སྲིད་དགུ་སྲིད་ལས་ཀྱི་
སྒྱུ་མ། །མ་མཐོང་བྱ་བ་གཏན་ནས་མེད་དེ། །སངས་རྒྱས་གསུང་རབ་ཉི་མའི་འོད་ཀྱིས། །སྐལ་བཟང་ཀུན་དགའི་པདྨོ་ཕྱེ་བའི། །ཞིང་བཟང་འདི་འདྲར་སླེབས་ཅིག་མ་མྱོང༌། །ད་རེས་སླེབས་པ་སྐྱིད་པའི་དགའ་སྟོན། །སྨག་རུམ་དམྱལ་བའི་གནས་ནས་འཐོན་ཏེ། །ལན་ཅིག་ས་སྟེང་ཕྱིན་སྙམ་ཙ་ན། །སྤྱན་རས་གཟིགས་ཀྱི་ཞབས་སེན་དྲུང་ན། །མིག་འབུར་ཧྲིག་གེར་སླེབས་ནས་གདའ་འོ། །གླེན་ལྐུགས་ངན་འགྲོའི་ཡུལ་གྱི་སེམས་ཅན། །ད་ལྟ་འཕགས་པའི་སློབ་འབངས་ནང་ན། །ཆོས་ཀྱི་དགའ་ཉམས་བསྐྱང་ནས་བསྡད་ཡོད། །ཨ་ཧོ་འདུས་བྱས་འདི་ཡི་འགྱུར་བ། །རྗེ་བཙུན་ཐུགས་རྗེའི་བུམ་པ་བཟང་པོར། །འཇུས་ནས་སྨོན་ལམ་དཀར་པོ་བཏབ་ཟིན། །ད་དུང་བདེ་ནས་བདེ་བར་ལོས་འགྲོ། །སྐྱིད་དོ་སྙམ་ནས་དགའ་བྲོ་འཁྲོབ་དང༌། །བསགས་པ་དོན་ལྡན་ཐེག་མཆོག་ལོངས་སྤྱོད། །ད་ལྟ་འདི་ཡོད་སྙམ་པ་མེད་དེ། །རེ་ལྟོས་མི་བསླུ་ཁོང་ལ་བསྟེན་ནས། །རང་སྐལ་མི་འཆད་གདེངས་ཤིག་ཡོད་དོ། །ལས་ཀྱི་རྒྱ་མཚོར་ཉ་ལྟར་འགྱུ་ཡང༌། །འཕགས་མཆོག་སྐྱབས་སྦྱིན་ཕྱག་རྒྱའི་ལྕགས་ཀྱུར། །ལེགས་སྨོན་སྲད་བུས་སྦྲེལ་བའི་ཉ་ཆུང༌། །ཆུ་གནས་གཞན་དང་ཡུན་རིང་མི་འགྲོགས། །ཨ་ཧོ་ལྔ་བདོའི་སྙིགས་མའི་མི་ནང༌། །སྐྱིད་བྲོ་བརྡུང་དང་འཇིགས་མེད་སྨྱོན་པ། །འདམས་ཀྱི་ནང་ན་འཛུམ་དཀར་ཤིགས་སེ། །པདྨ་དཀར་པོའི་ལད་མོ་ཁྱོགས་དང༌། །དགུན་གྱི་ཡུལ་ངན་ཞིག་གི་རྐྱེན་དབང་དང་འགྲོགས་པས་ཤེས་པ་སྐྱོ་བ་ན་ཨ་མཚར་དུ་བྲིས་པ་ཡིན་ནོ། །དགེའོ། །
༈ །ཨ་ཧོ། །ནམ་མཁའི་རྣལ་འབྱོར་ཆེན་པོ་གཉུག་མའི་དབྱིངས་སུ། །ལྷུན་གྲུབ་གཞོན་ནུ་བུམ་པ་འོད་ཀྱི་ལུས་ཅན། །ཟུང་འཇུག་ཐོག་མའི་སངས་རྒྱས་མཁྱེན་བརྩེའི་འོད་ཟེར། །མི་འབྲལ་སྙིང་དབུས་པདྨོར་ངལ་འཚོ་མཛོད་ཅིག །ངེད་ཅག་བརྒྱུད་པ་བཟང་པོའི་བུ་ཆུང་གཞོན་ནུ། །རྟོགས་པའི་རྩལ་ཤུག་རྫོགས་པ་རེ་ཞིག་མེད་ཀྱང༌། །ཕ་མེས་རིག་འཛིན་བརྒྱུད་པའི་ཤུལ་ལམ་མཐོང་བས། །ད་ནི་ཐེག་མཆོག་རྒྱལ་པོས་ཡིད་ཁ་གང་ཡོད། །ཐེག་པའི་ནང་ན་མཐོ་བ་ཨ་ཏི་ཡོ་ག༌།ཐབས་ཀྱི་ནང་ན་བདེབ་སྒོམ་མེད་ཅོག་བཞག །བྱུང་རྒྱལ་ཉམས་ཀྱི་ངང་ནས་སྣང་བ་གདོང་འདེད། །ད་ནི་ཅི་ཡང་མི་འདོད་རོ་ཉལ་རྒྱག་འདོད། །དཔྱད་ཀྱང་བཞག་སོ་མི་རྙེད་རྟོག་པ་ཉིད་འཁྲུལ། །བལྟས་ཀྱང་བལྟ་ཡུལ་མི་མཐོང་རྟེན་མེད་གནས་མེད། །ལྟ་བ་བྱར་མེད་ངང་དུ་སྒོམ་པ་རང་བཞག །ད་ནི་བྱ་བ་བློས་བཏང་གཅིག་པུར་ཉལ་འདོད། །ངོ་བོ་ཀ་དག་ཟེར་ཡང་དག་པས་མི་ཚིམ། །གཞི་གྲོལ་གཉུག་མ་ཟེར་ཡང་གྲོལ་སར་མི་འཇོག །རྟོགས་ལྡན་འུད་ཀྱིས་བསླུས་པ་མང་ཞིག་མཐོང་བས། །ད་ནི་འགྲིགས་འགྲིགས་ཡིན་ཡིན་སྨྲ་སྙིང་མི་འདོད། །དག་པ་ཀ་ནས་དག་སྟེ་ཡང་དག་མི་དགོས། །གྲུབ་པ་ལྷུན་གྲུབ་ཡིན་ཏེ་ད་གྲུབ་ཅི་བགྱི། །བསལ་བཞག་སེམས་ཀྱི་སྤྲོས་པ་ཤིགས་སེ་ཐོངས་ལ། །ད་ནི་གནས་ལུགས་ངང་ལ་ལྷོད་དེ་སྡོད་འདོད། །བྱ་རྩོལ་སྤྲོས་པའི་ཞེན་འཛིན་ཡིད་ཀྱི་འཆིང་ཐག །རྩོལ་མེད་ཐ་མལ་སྡོད་པ་འཁྲུལ་བའི་ཡོ་ལང༌། །རྩོལ་དང་མི་རྩོལ་ཟེར་
བ་རྟོག་པའི་རྫུན་རིས། །ད་ནི་གཏད་མེད་ངང་ལ་གང་དགར་ཉལ་འདོད། །སྣང་བ་ཕྱིན་མེད་དེ་ཆོས་སྐུའི་རིག་གདངས། །སྟོང་པ་ནང་ན་མེད་དེ་མཉམ་ཉིད་ཁྱབ་གདལ། །ཟང་ཐལ་ཕྱི་ནང་མེད་པའི་ཡིན་ལུགས་ཤེས་ནས། །ད་ནི་མི་སྤྲོ་མི་བསྡུ་ཙོག་གེར་སྡོད་འདོད། །ཟབ་མོ་རིག་པ་རྣོ་ཡང་ཕིག་ས་མི་འདུག །གནས་ལུགས་ཐོས་པ་མང་ཡང་གོ་མཁན་དཀའ་བས། །གཉུག་མ་ཚིག་གིས་མཚོན་དུས་ཡོད་ཡོད་མི་འདྲ། །ད་ནི་རྟོག་གེ་གོག་པོའི་སྤྲོས་པ་གཅོད་འདོད། །གཞུང་བརྒྱ་སྤུ་རིས་འབྱེད་པའི་བརྗོད་སྒྲོས་མེད་ཀྱང༌། །རང་བཞག་ཡངས་པ་ཆེན་པོའི་ལྟ་སྟངས་གཅིག་གིས། །སྤྲོས་པའི་གྲྭ་ཟུར་འབུམ་ཕྲག་གཅིག་ཆར་ཆོད་ན། །ཐ་སྙད་ཚིག་སྐམ་མུར་བ་འགྲམ་པའི་གཅོག་རྡོ། །ཚེ་གང་ཆོས་ར་འགྲིམས་ནས་འཆི་ཁ་ལག་སྟོང༌། །མགོ་ཐོད་སྒོམ་ལ་བཞག་ནས་སྐྱེ་ཤིའི་ཁ་བརྒྱུད། །དེ་དང་དེ་འདྲའི་ངལ་བ་འབྲས་མེད་བཞག་ནས། །གདོད་མའི་ནང་དབྱིངས་ཆེན་པོར་སིབ་ཀྱིས་འཇུག་འདོད། །འཁོར་བ་སྡུག་བསྔལ་ཟེར་ཡང་རྟོག་པའི་རང་མདངས། །ཞི་གྱུར་མྱང་འདས་ཟེར་ཡང་སེམས་ཀྱི་ཆོས་ཉིད། །འཁོར་འདས་རིག་དང་མ་རིག་ལག་པའི་ལྟོ་རྒྱབ། །འཆི་མེད་བྱང་ཆུབ་ཞི་བ་ཐག་རིང་མི་བཞུགས། །སྒྲིབ་བྲལ་དབྱིངས་རིག་དབྱེར་མེད་གཉུག་མའི་གཞི་ཀློང༌། ཁམས་གསུམ་རྟོག་པའི་འཇུག་ལྡང་ཤུགས་ཀྱིས་དེངས་པས། །ཀློང་ཆེན་ཡེ་ཤེས་དམ་པའི་མེ་ལོང་གཅིག་ཏུ། །ཆོས་ཀུན་མཉམ་པར་ཟླུམ་པ་
སྒོམ་གྱི་སྐྱེལ་སོ། །ཨ་ཧོ་དགའ་བོ་སྐྱིད་དོ་རྡོ་ཤོད་སྨྱོན་པ། །ཕ་གཅིག་ཀུན་མཁྱེན་བརྒྱུད་པའི་གཞུང་ལུགས་མཐོང་ནས། །ཚུར་མཐོང་བྱིས་པའི་ངག་ལ་དགའ་བ་མི་སྐྱེ། །ཐེག་མཆོག་རྫོགས་ཆེན་བསམ་ན་ཁྱད་ཆོས་འདུག་གོ །དེ་སླད་རྟེན་འབྲེལ་བཟང་པོའི་ཁ་གཡང་བོས་པས། །གནས་སྐབས་རིག་འཛིན་དགྱེས་པའི་འཛུམ་དཀར་མཐོང་ཞིང༌། །མཐར་ཐུག་ཁྱད་ཆོས་དྲུག་ལྡན་གདོད་མའི་དབྱིངས་སུ། །འོད་གསལ་མ་བུ་འདྲེས་པའི་དགའ་སྟོན་ཞུའོ། །ཞེས་པའང་རྡོ་རོང་གི་སྨྱོན་པ་འཇིགས་མེད་བསྟན་པའི་རྒྱལ་མཚན་གྱིས་སྨྱོན་ཚིག་རྐང་པ་དུམ་ཆོད་བྱས་པ་དགེ་ཞིང་བཀྲ་ཤིས།། ༈ །།ཞིང་རབ་འབྱམས་རྒྱལ་བའི་ཡེ་ཤེས་ཀྱི་སྣང་བརྙན། །མ་འགྲོ་བའི་སྐྱབས་གཅིག་རྗེ་བཙུན་གྱི་བླ་མ། །ཐུགས་ཡེ་ཤེས་གཟིགས་པའི་བྱིན་རླབས་ཀྱི་འཇུག་པས། །སྤྲང་བདག་གི་བློ་སྣ་ཆོས་ཕྱོགས་ལ་བསྒྱུར་མཛོད། །དུས་བསྐལ་མང་བསགས་པའི་ལེགས་བྱས་ཀྱི་མཐུ་ལས། །ཆོས་བཅུ་གཉིས་ཚང་བའི་མི་ལུས་ཞིག་རྙེད་ཀྱང༌། །འདི་རྙེད་པར་དཀའ་བའི་གནས་ཚུལ་ལ་རྨོངས་པའི། ཁོང་སྟོང་ལོག་མཁན་གྱི་རྣལ་འབྱོར་དེ་ཨེ་གཟིགས། །མི་མཁས་པར་གྲགས་པའི་དཔྱོད་ལྡན་གྱི་སྐྱེ་བོ། །ནོར་ཆོས་བརྒྱད་སྒྲུབ་པའི་གསོག་འཇོག་ལ་མཁས་ཏེ། །ཚེ་ཕྱི་མར་འགྲོ་དུས་གྲོ་རྒྱགས་ཤིག་མེད་ན། །སྐྱས་ཆེན་པོ་འདེགས་དུས་ཅི་འདྲ་ཞིག་ཡིན་ཨང༌། །ནོར་འབྱོར་པ་རྒྱས་པའི་སྟོན་ཆེན་གྱི་བླ་མ། །ཞལ་ཇ་ཆང་བཏུང་བའི་དགའ་སྟོན་ལ་རོལ་ཞིང༌། །ཐུགས་ང་རྒྱལ་ཆེན་པོའི་ཏིང་
འཛིན་གྱིས་དགྱེས་པའི། །ཚུལ་འདི་འདྲ་སྙིགས་མའི་ཕོ་ཉ་རུ་འདུག་གོ །གནས་རྒྱལ་ཁམས་འགྲིམས་པའི་རྟོག་ལྡན་གྱི་རྣལ་འབྱོར། །སྤྱན་སེང་གེའི་ལྟ་སྟངས་ནམ་མཁའ་ལ་སྒྲིལ་ཞིང༌། །གསུང་ཧཱུྃ་སྒྲ་གཅིག་གིས་རྟ་མཛོ་བརྒྱ་ཟླུམ་སྟེ། །རྡོ་གོར་མོ་འཕེན་འདྲའི་མན་ངག་དེ་ཅི་ཞིག །དུས་ལན་གཅིག་བསྒོམས་པའི་ཞི་གནས་ཀྱང་མེད་བཞིན། །གཏམ་མངོན་ཤེས་ཡིན་བརྫུ་ཅལ་ཅོལ་དུ་སྒྲོགས་པའི། །མི་དེ་འདྲ་ཟོག་མའི་སྒྲིབ་བྱེད་ལ་མཁས་ཏེ། །དཔེ་ཡལ་གའི་རི་དྭགས་མཆོད་གནས་སུ་འོས་སམ། །ལམ་ཐེག་ཆེན་པ་ཞེས་ཞལ་བཞེས་སུ་མཛད་བཞིན། །མ་དྲིན་ཆེན་བསད་པའི་ཤ་ཁྲག་གིས་དགྱེས་ཤིང༌། །ཐུགས་སྙིང་རྗེས་གཟིགས་ཡུལ་སྦྱིན་བདག་ཏུ་དགོངས་ནས། །བགེགས་དགྲ་རུ་འཛིན་པའི་སེམས་དཔའ་དེ་ཨ་ཧོ། །རྟགས་དུར་སྨྲིག་བགོ་བའི་རྒྱལ་མཚན་དང་འགྲོགས་ཀྱང༌། །ལས་སྤོང་ཀློག་གཉིས་ལྡན་བྱ་བ་དེ་བོར་ནས། །གཏམ་གླུ་གར་སྒྲུང་རྒྱུད་བཞད་གད་ཀྱི་འཁོར་ལོ། །རྟེན་དལ་འབྱོར་འཇོམས་པའི་མཚོན་ཆ་རུ་ཨེ་གཟིགས། །གོས་རས་དཀར་གྱོན་པ་ཙི་ན་ལ་ཡོད་མོད། །སྐྲ་རལ་པའི་ཐོར་གཙུག་མུ་སྟེགས་ཀྱིས་འཛིན་ཏེ། །རྒྱན་རྐང་ལག་གདུ་བུ་རྐེད་མེད་ཀྱིས་འཆང་ན། །དེ་རྣལ་འབྱོར་དཔའ་བོའི་ཁྱད་ཆོས་སུ་རེའམ། །གྲོགས་ཆུང་མ་ལེན་པ་ཚངས་སྤྱོད་ཀྱི་འགལ་ཟླ། །ཆས་ཟླུམ་པོའི་ཌཱ་རུ་ངལ་དུབ་ཀྱི་ཁུར་ཆེན། །ཚིག་འུད་གོག་སྐམ་པོ་བསླུ་བྲིད་ཀྱི་
གཡོ་ཟོལ། །དེ་གསུམ་ལྡན་སྔགས་ཀྱི་བརྟུལ་ཞུགས་སུ་རེའམ། །ཐབས་མྱུར་ལམ་ཟབ་མོ་གསང་སྔགས་ཀྱི་སྒྲུབ་རྫས། །དོན་སྣང་སྟོང་ཟུང་འཇུག་གཉིས་མེད་ཀྱི་ཕྱག་རྒྱ། །རྟགས་རྡོ་རྗེ་དྲིལ་བུའི་དཀྱིལ་འཁོར་ཞིག་མཐོང་ན། །ཡོན་རིང་ཐང་བརྩི་བའི་སྔགས་འཆང་ཚོ་ཨེ་གཟིགས། །ལྷ་དྲང་སྲོང་ཆེན་པོའི་རྗེས་འཇུག་ཏུ་རློམ་བཞིན། །ཚུལ་འཁྱོགས་སྤྱོད་སྣ་དགུའི་ངང་ཚུལ་ལ་གནས་པའི། །དུས་སྙིགས་མའི་རང་གཟུགས་དགེ་སྦྱོང་གི་བཟོ་བཅོས། །དེ་བསྟན་འཛིན་ཡིན་ཟེར་ངོ་མཚར་ཞིག་ཆེའོ། །ཚུལ་འདི་དང་འདི་འདྲའི་ངན་སྤྱོད་ཀྱིས་ཀུན་ཁེབས། ཁོང་ལྔ་བདོ་སྙིགས་མའི་ཐུན་གསུམ་གྱིས་བསྐུལ་ནས། །ཆོས་ཐར་ལམ་སྣང་བའི་དགྲ་ཟླ་རུ་སླེབས་ཚེ། །མི་འཇིགས་པ་མེད་པས་སྐྱོ་གླུ་རུ་བླངས་སོ། །ཚུལ་དེ་འདྲ་ཤེས་པའི་བློ་གྲོས་ཀྱི་ཁྱེའུ་ཆུང༌། །སྒོ་རྣམ་པ་མང་པོའི་སྤྱོད་ངན་གྱིས་དཀྲིགས་པའི། །གྲོགས་བྱིས་པའི་སྐྱེ་བོས་སུན་འབྱིན་ཞིག་བྱས་ཚེ། །ནོར་བཀུར་སྟིའི་ཚེགས་ཀྱང་དེ་ཀ་ལ་ཕྱོགས་འདུག །ཡུན་རིང་པོར་འགྲོགས་པའི་སྲེད་ལེན་གྱི་ཕོ་ཉས། །དུས་རྟག་པར་བསྒྲུབས་པའི་རྙེད་བཀུར་གྱི་ལོངས་སྤྱོད། །ཀླུ་འཇོག་པོ་ལྟ་བུའི་དཔལ་འབྱོར་ལ་སྤྱོད་ཀྱང༌། །ལམ་རིང་མོ་འགྲིམས་དུས་ཕན་པ་ཞིག་བདོག་གམ། །དགྲ་འཆི་བདག་གཤིན་རྗེའི་གཡུལ་ངོ་དེར་སླེབས་ཚེ། །ནོར་རིན་ཆེན་ཐང་མ་སྟོང་གསུམ་དུ་བདལ་ཡང༌། །དེས་སུག་འབུལ་ལེན་པ་རི་བོང་གི་རྭ་ཅོ། ཁྱོད་རང་ལ་ཕན་པ་ག་འདྲ་ཞིག་ཡོད་ཨང༌། །ཐབས་
རྣམ་མང་ངལ་བའི་དཀའ་ཚེགས་ཀྱིས་བསྒྲུབས་པའི། །ནོར་རྙེད་བཀུར་སྙན་གྲགས་ཚངས་ཆེན་ལས་ལྷག་ཀྱང༌། །དེ་གར་སོང་ཆ་མེད་བར་སྣང་གི་བྱ་རྗེས། །རང་གཅིག་པུར་འགྲོ་དུས་ཅི་ཚུགས་ཞིག་བྱ་སྙམ། །ནོར་དང་པོ་བསྒྲུབ་དུས་གཡོ་སྒྱུ་ཡི་བྱ་བ། །ཕྱི་ལུས་ངག་འཁྱུག་འཁྱུག་མགོ་སྐོར་གྱི་རྫུན་མ། །ནང་རང་སེམས་འཁྱུག་འཁྱུག་བསམ་གཞིག་གི་འཁོར་ལོ། །དེའི་བྱ་སྤྱོད་མཐའ་དག་བྲེལ་དོ་ཡི་ཕུང་པོ། །ནོར་བར་དུ་བསྲུང་དུས་ངལ་དུབ་ཀྱི་ཡོ་ལང༌། །ཉིན་རིང་པོར་འདབ་པའི་བཀའ་ཐུབ་ཀྱིས་སྨད་པས། །ལུས་ཤིན་ཏུ་ཉམ་ཐག་འགལ་དུམ་བཞིན་ཉལ་ཡང༌། །ལས་བསོད་ནམས་མ་བསགས་འབད་རྩོལ་གྱིས་ཕན་ནམ། །ནོར་ཐ་མ་སྤེལ་དུས་འདུ་འཛི་ཡི་འཁོར་ལོ། །ཐབས་སྣ་ཚོགས་ཚུལ་གྱིས་དཔལ་འབྱོར་རང་སྤེལ་ཀྱང༌། །སྔོན་སྦྱིན་པ་བྱས་པའི་བསགས་རྒྱབ་ཞིག་མེད་ན། །གསོག་ཇི་ལྟར་མཁས་ཀྱང་འཕེལ་རྒྱུ་ཞིག་ཨེ་གདའ། ཁབ་སྐུད་པ་བསོགས་པའི་ཁྱིམ་བདག་དང་ཡོན་གནས། །དུས་ཉིན་གཅིག་འདས་པའི་སོས་དལ་ཀྱང་མེད་པར། །ནོར་ལོངས་སྤྱོད་བསྒྲུབས་པ་གར་སོང་ཡང་མེད་ན། །དེ་ཁྱབ་འཇུག་ཆེན་པོའི་ལྟོ་ཞལ་དུ་ཕུལ་ལམ། །གྲོ་སྲན་མ་ཙམ་གྱི་ལོངས་སྤྱོད་ཞིག་ཡོད་ཀྱང༌། །ཡིད་ཟུག་རྔུའི་ཚོར་བ་དེ་ཙམ་ཞིག་མཆིས་ན། །མནོག་ཤིན་ཏུ་ཆུང་བའི་དབང་ཐང་གིས་ཅི་བྱ། །རྒོད་སྙི་ལས་ཐར་བའི་གདམས་ངག་དེ་ཨེ་དྲན། །དགྲ་རྣམ་གཡེང་འཕེལ་བའི་རྙེད་བཀུར་དང་སྙན་གྲགས། །
དོན་སྙིང་པོ་མེད་པའི་རང་ཚུལ་འདི་ཤེས་ནས། །སེམས་ཐར་པ་འདོད་པའི་བསྐལ་བཟང་གི་གཞོན་ནུ། །གནས་དབེན་པ་དྲན་ནས་ཚུགས་ཐབས་རང་མི་གདའ། །མགོན་སྲས་བཅས་རྒྱལ་བས་ལན་བརྒྱ་རུ་བསྔགས་ཤིང༌། །ལྷ་ཐུབ་པ་ཆེན་པོའི་བྱིན་རླབས་ཀྱིས་བསྲུངས་བའི། །གནས་ངོ་མཚར་སྨན་ལྗོངས་དབེན་རི་ཡི་རྒྱལ་ཁབ། །ཕ་ཀུན་མཁྱེན་བརྒྱུད་པའི་གདན་ས་རུ་དགོངས་སམ། །ནགས་ལྗོན་ཤིང་ཕྲེང་བས་མཛེས་རྒྱན་དུ་གནས་ཤིང༌། །གཙུག་རི་བོང་འཛིན་པ་ལ་ཐོད་དུ་བཅིངས་པའི། །གྲོགས་ཉོན་མོངས་མེད་པའི་མཛེས་སྡུག་གི་ལྷུན་པོ། །ལུས་མི་གཙང་གཟེ་རིའི་སྡིག་གྲོགས་དང་འདྲའམ། །གཡུའི་མཛེས་པ་འགོག་པའི་ལྗང་གསལ་གྱི་འཁྲི་ཤིང༌། །རླུང་ཤིན་ཏུ་འཇམ་པའི་བསིལ་ཆབ་ཀྱིས་བསྐུལ་ཚེ། །ལུས་བསིལ་བའི་རེག་བྱས་ལན་བརྒྱ་རུ་སིམ་བྱེད། ཁྱེད་མི་ཆེན་དགྱེས་པའི་རྔ་ཡབ་ཀྱིས་ཨེ་འགྲན། །གནས་མ་བཅོས་ལྷུན་གྲུབ་རྡོ་ལེབ་ཀྱི་ཁང་བཟང༌། །ཆོད་ཕག་ཕུག་དུ་མའི་མཛོད་ཁང་ཡང་མེད་དེ། །ནོར་ཆོག་ཤེས་བསོགས་པའི་འཛད་མེད་ཀྱི་གཏེར་ཆེན། །འདི་ཀུན་མཁྱེན་བརྒྱུད་པའི་བསོགས་རྫས་ཀྱི་ཕ་ཁང༌། །མདངས་ཤིན་ཏུ་གསལ་བའི་ན་ཆུང་གི་གྲོགས་མོས། །ལྷ་མིག་སྟོང་དབང་པོའི་རྒྱུད་མང་ལ་འགྲན་པའི། །སྐད་ཡན་ལག་བརྒྱ་པའི་འཇོ་སྒེགས་དང་འགྲོགས་ནས། །ཡིད་ཐར་བར་བསྐུལ་བའི་ཕོ་ཉ་དེ་དྲན་བྱུང༌། །མདོག་བེཌཱུར་གཞོན་ནུའི་གཟི་མདངས་
ལ་འགྲན་ཅིང༌། །མིག་ཉི་མའི་ལུས་ཀྱི་མཚུངས་ཟླ་རུ་འོས་པའི། །གཉེན་ལྷོ་མོན་དགའ་མའི་མགྲོན་གླུ་ཞིག་བླངས་ཚེ། །ཆོས་འདུས་བྱས་འཇིག་པའི་ངང་ཚུལ་དེ་དྲན་བྱུང༌། །རེག་འཇམ་ཞིང་སྡུག་པའི་འདབ་བརྒྱ་ཡི་ཟེའུ་འབྲུ། །གནས་ངེས་མེད་འགྲིམ་པའི་རྐང་དྲུག་གི་གཞོན་ཆུང༌། །གླུ་སྙན་ལ་འཇེབ་པའི་མགྲིན་རྔ་དང་ལྷན་ཅིག །བཅུད་སྦྲང་རྩིའི་སྙིང་པོ་ཅི་དགའ་རུ་བླངས་སོང༌། །སྒྲ་ལྷུང་ལྷུང་འབབ་པའི་ཕུ་ཆུ་ཡི་བཤེས་གཉེན། །དུས་རིངས་པར་རིངས་པར་མི་རྟག་གི་ཕོ་ཉ། །ཚུལ་ང་ཅག་འདྲ་ཞེས་གདམས་ངག་ཏུ་འདོམས་པའི། །དོན་འདི་འདྲ་སྟོན་པ་དབེན་རི་ཡི་ཁྱད་ཆོས། །དུས་ཆར་ལྡན་རྒྱལ་མོའི་བསོགས་བྲུན་གྱི་མེ་ཏོག་ཁང་མི་སྡུག་སྲིན་མོའི་གཞན་དབང་དུ་གྱུར་པའི། །ཚུལ་དེ་མཐོང་བསགས་པ་འཛད་མཐའ་རུ་ཤེས་པའི། །ཚུལ་འདི་འདྲ་སྟོན་པའི་བླ་མ་རུ་གཟིགས་སམ། །སྙིགས་མའི་སྐྱེ་བོའི་རྙེད་བཀུར་གྱི་ལོངས་སྤྱོད་ལ་སྐྱོ་བའི་གཏམ་སྐལ་བཟང་རྣ་རྒྱན་ཞེས་བྱ་བ་ཏིང་ངེ་འཛིན་གྱི་དགའ་བ་ལ་མངོན་པར་སྤྲོ་བའི་བྱིས་པ་འཇིགས་མེད་པས་སོ།། ༈ །།ཕ་བཀའ་དྲིན་མཚུངས་མེད་ཨོ་རྒྱན་གྱི་ཆོས་རྗེ། །སྐྱབས་མཆོག་གསུམ་ཀུན་འདུས་དྲིན་ཆེན་གྱི་བླ་མ། །དེ་དབྱེར་མེད་རྗེ་བཙུན་ཡེ་ཤེས་ཀྱི་མེ་ལོང༌། །ངའི་སྙིང་ཀ་ཆོས་ཀྱི་འཁོར་ལོ་རུ་རྩེན་མཛོད། །གཤིས་མཐའ་བརྒྱད་སྤྲོས་བྲལ་ངེས་དོན་གྱི་འཇམ་དཔལ། །དེ་ཚིག་ཏུ་བརྗོད་པས་གོ་རྒྱུ་ཞིག་མི་གདའ། །བློས་ཇི་ལྟར་བརྟགས་ཀྱང་བསམ་རྒྱུ་ཞིག་མི་འདུག །ད་རྩོལ་མེད་ལྟ་བས་ཁྱེད་ཞལ་དེ་
བལྟ་འདོད། །ལས་བྱས་བྱས་ནམ་མཁའི་མདུང་སྐོར་དང་མཚུངས་ཤིང༌། །ཡིད་གང་ཤར་སྦྲུལ་མདུད་རང་གྲོལ་དུ་འདུག་པ། །དེ་ཤེས་ནས་ཐབས་གསལ་གཉིས་མེད་ཀྱི་འཇམ་དཔལ། །དོན་མཉམ་ཉིད་ཆེན་པོར་ལྷོད་ལྷོད་དུ་འཇོག་སྙམ། །ལྷའི་བསྐྱེད་རིམ་བསྒོམ་པ་རྣམ་རྟོག་གི་རི་མོ། །ལམ་རྩ་རླུང་སྦྱོང་བ་བློས་བྱས་ཀྱི་རྣལ་འབྱོར། །དེ་ཤེས་ནས་བྱ་རྩོལ་བློ་འདས་ཀྱི་འཇམ་དཔལ། །ཐབས་ཅོག་བཞག་འཁྱིལ་བའི་མན་ངག་གིས་བལྟ་འདོད། །སེམས་སྤང་དུ་མི་འཚལ་འཇམ་མགོན་གྱི་རང་གདངས། །ལམ་བསྒྲུབ་ཏུ་མི་འཚལ་ས་ལམ་ཀུན་གཞི་རྫོགས། །དེ་ཤེས་ནས་མཉམ་རྫོགས་གཞི་གྲོལ་གྱི་འཇམ་དཔལ། །བློ་འཇུར་བུས་མ་ཡིན་ལྷོད་འབོལ་དུ་བལྟ་སྙམ། །བློ་ཚོགས་དྲུག་འགོག་པ་སྲིད་རྩེ་ལ་ཡོད་ཅིང༌། །སེམས་དང་དུ་ལེན་པ་ཁྱི་རྒན་ཡང་ཤེས་མོད། །དེ་མཐོང་ནས་གཉུག་མ་དག་མཉམ་གྱི་འཇམ་དཔལ། །བློ་བསལ་བཞག་མེད་པར་གུ་ཡངས་སུ་བལྟ་འདོད། །ཡིད་ཀུན་རྟོག་འཆིང་བ་ཁམས་གསུམ་གྱི་རྩ་བ། །སེམས་ཅིར་ཡང་མི་འཛིན་ཧ་ཤང་གི་ལྟ་སྒོམ། །དེ་ཤེས་ནས་རིག་སྟོང་མཐའ་བྲལ་གྱི་འཇམ་དཔལ། །ཐབས་གསལ་དྭངས་ཕྱེད་པའི་ཉམས་མྱོང་གིས་བལྟ་འདོད། ༧༌།དབྱིབས་ཁ་དོག་མེད་དེ་སྟོང་ཆེན་གྱི་ཆོས་ཉིད། །རྒྱ་རིས་ཆད་བྲལ་བ་ཀུན་ཁྱབ་ཀྱི་རིག་གདངས། །ཕྱོགས་མཐའ་དབུས་མེད་དེ་མཁའ་མཉམ་གྱི་ཡེ་ཤེས། །ཚུལ་དེ་ཤེས་འཇམ་མགོན་རང་ཞལ་དེ་མཐོང་ངོ༌། །ཧོ་ཧོ། གཤིས་ཡོད་པ་མ་ལགས་བདེན་མེད་ཀྱི་
རོལ་མོ། །དེ་མེད་པ་མ་ལགས་ཀུན་སྣང་གི་ཡེ་གཞི། །བློས་གང་དུ་བརྟགས་ཀྱང་མཐོང་རྒྱུ་ཞིག་མི་འདུག །ཚིག་ཡི་གེར་བརྗོད་པས་མཚོན་རྒྱུ་ཞིག་མ་ལགས། །ཕྱི་བརྟན་སྣོད་མ་ཡིན་བེམ་ཆོས་སུ་མ་གྲུབ། །ནང་གཡོ་བ་མ་ཡིན་གང་ཟག་ཏུ་མི་གདའ། །ཆོས་རྟག་དང་མི་རྟག་བརྗོད་གཞི་ལས་འདས་པའི། །དོན་ཡིན་ལུགས་ཟབ་མོ་སྤྲོས་མཚན་ལས་འདས་སོ། །མི་བརྩོན་འགྲུས་ཅན་འགའ་འཇུར་དྲན་ལ་འབྱམས་སོང༌། ཁོང་ཤེས་རབ་ཅན་ཕལ་རྟོག་གེ་ལ་ཞེན་སོང༌། །ཕ་བློ་ལྡན་མཆོག་སྲེད་བྱིན་རླབས་ཀྱི་མཐུ་ལས། །མིང་ཅག་ཐེག་རྩེའི་དགོངས་དོན་ལ་དགའ་འོ། །ཞེས་པའང་གཞོན་ནུ་འཇིགས་མེད་པས་ལྕགས་སྤྲུལ་གྱི་ཟླ་༡༢ཚེས་༢༥ལ་སྐད་ཅིག་ཡུད་ཙམ་གྱིས་བྲིས་པའོ།། ༈ །།རི་བོ་སྤྲིན་དཀར་གྱི་ལྭ་ཐོད་ཅན། ཁྱོད་ལན་བུན་འདི་མཛེས་མོད་དེ། །དྲག་པོའི་འཐོར་རླུང་ཞིག་སླེབས་ཙ་ན། །མགོ་རྗེན་ལུས་རྗེན་དུ་འགྲོ་ཉེན་ཡོད། །ནགས་རླུང་རྩི་སྨན་གྱི་ཡོ་ལང་ཅན། ཁྱོད་ལ་ལྕུགས་ཕྲན་འདི་མཛེས་མོད་དེ། །སྟོན་དགུན་རེག་བྱ་ཡིས་བྲན་ཙ་ན། །སྐུ་རྐྱང་དབུ་རྐྱང་དུ་འགྲོ་ཉེན་ཡོད། །ཁུ་བྱུག་རྒྱུད་མངས་ཀྱི་སྒྲ་དབྱངས་ཅན། ཁྱོད་ཀྱང་ཆར་བསིལ་འདིས་འཚོ་མོད་དེ། །གྲང་རེག་ཁ་ངར་གྱིས་བརྡོལ་ཙམ་ན། །བྷོ་ཊའི་སྨན་ལྗོངས་ནས་བྲོས་དོགས་ཡོད། །ནེའུ་སེང་མེ་ཏོག་གི་འཛུམ་ཞལ་ཅན། ཁྱོད་ཀྱང་གེ་སར་གྱིས་ཁེངས་མོད་དེ། །དྲུག་པའི་ཧོར་ཟླ་དེ་སོང་ཙ་ན། །ཐལ་བའི་མདོག་ངན་ཞིག་འཆར་ལས་ཆེ། །པདྨ་འདབ་སྟོང་གི་
ལང་ཚོ་ཅན། ཁྱོད་ཀྱང་གཡུ་སྦྲང་འདིས་བཀུར་མོད་དེ། །ཆབ་རོམ་གདོང་བ་ལ་བབ་ཙམ། །གྲོགས་པོ་ལྔ་ལམ་དུ་འགྲོ་དོགས་ཡོད། །རྩ་ལྗང་བསིལ་འཇམ་གྱི་རེག་བྱ་ཅན། ཁྱོད་ཀྱང་གཡུ་མདོག་འདིས་མཛེས་མོད་དེ། །ཉི་མ་ལྷོར་བགྲོད་ཀྱི་མཐར་སླེབས་ཚེ། །རྩ་སྐྱའི་གྲགས་ངན་ཞིག་འཐོབ་ཀྱིས་དོགས། །ལོ་ཏོག་འབྲུ་སྔོན་གྱི་རྩི་བཅུད་ཅན། ཁྱོད་ཀྱང་ཞིང་ས་ན་བརྗིད་མོད་དེ། །བ་མོའི་ཚེ་གེགས་ཞིག་བྱུང་ཙ་ན། ཁོང་རུལ་སྙིང་སྟོང་དུ་འགྲོ་དོགས་ཡོད། །གཞོན་ནུ་བསྟན་རྒྱམ་གྱི་མིང་གོག་ཅན། ཁྱོད་ཀྱང་གསོན་ཡུལ་དུ་སྣང་མོད་དེ། །གཤིན་རྗེའི་བཀའ་ཁྲིམས་ཀྱིས་དེད་ཙ་ན། །གཅེར་བུ་ལག་སྟོང་དུ་འགྲོ་ཉེན་ཆེ། །ཆོས་གཏམ་རྣ་ལམ་དུ་གྲགས་ནས་ཡོད། །འཆི་ཆོས་བློ་ཐོག་ཏུ་བླང་བ་མེད། །བྱུར་ངན་སྣ་འདྲེན་གྱི་འགོང་རྒན་ཁྱོད། །རང་ཕུང་རང་བརླག་ཞིག་བྱེད་ངེས་ཡོད། །ལྷ་ཆོས་རྟེན་དྲུང་ན་བཞུགས་བཞིན་དུ། །སྡིག་སྤྱོད་ཁ་ཟས་སུ་ཟ་ལུགས་ལ། །ཐར་པའི་རེ་བ་དེ་ཟད་པར་མཆི། །བར་དོའི་འཕྲང་རིང་དུ་ལྟད་མོ་ལྟོས། །གསོན་ཚེ་རྣམ་གཡེང་གི་ཡོ་ལང་འགྱེད། །འཆི་ཁ་སེན་རྗེས་ཀྱིས་བྲང་གོག་འགེང༌། །བར་དོའི་འཇིགས་སྐྲག་གི་འཁོར་ལོ་བསྐོར། །དེ་འདྲ་བསྟན་རྒྱམ་གྱི་རྣམ་ཐར་ཡིན། །ཞེས་པའང་གཞོན་ནུ་འཇིགས་མེད་བསྟན་པའི་རྒྱལ་མཚན་གྱིས་བྲིས་པའོ།། ༈ །།ཧོ་ཧོ། །མཐའ་བརྒྱད་དང་བྲལ་བའི་འོད་གསལ་གྱི་ཀློང་དུ། །ཡིད་དཔྱོད་ཀྱི་ཞེན་འཛིན་རང་གྲོལ་དུ་དག་སོང༌། །རང་བྱུང་གི་རིག་པ་བཟོད་མེད་ཁོ་མཐོང་ནས། །འབད་རྩོལ་གྱི་སྤུ་རིས་བྲི་འདོད་ཅིག་མེད་དོ། །
འཛིན་སྟངས་ནི་མི་འདུག་གཉུག་མ་ཡི་དྲན་རིག །བཟོ་བཅོས་ནི་མི་དགོས་གཏད་མེད་ཀྱི་ཤེས་པ། །དཔྱད་སྒོམ་ནི་མི་བྱེད་རང་བཞག་གི་ཆོས་ཉིད། །མཐའ་བྲལ་གྱི་ཀློང་དུ་ཆམ་གདལ་དུ་སོང་ངོ། །གནས་པ་དང་འགྱུ་བའི་ཤན་འབྱེད་ཀྱིས་མ་བྲེལ། །མངོན་འགྱུར་དང་ལྐོག་འགྱུའི་རྩིས་འདབ་ཀྱང་མ་དགོས། །གསལ་འགྲིབ་དང་བྲལ་བའི་ཀློང་ཆེན་གྱི་དགོངས་པ། །དམིགས་གཏད་ཀྱི་མཚན་མ་ཞི་བ་དེ་སྐྱིད་དོ། །སྣང་བ་ལ་སྟོང་པས་རྒྱས་འདེབས་ཀྱང་མ་ཡིན། །སྟོང་པ་དང་སྣང་བ་རེས་འཇོག་ཀྱང་མ་དགོས། །ཀ་དག་དང་ལྷུན་གྲུབ་དབྱེར་མེད་ཀྱི་དགོངས་ཀློང༌། །ཕྱོགས་འཛིན་གྱི་མདུད་པ་རང་ཞིག་ཏུ་ཐལ་ཐལ། །རྣམ་རྟོག་ལ་སྒོམ་དུ་རེ་བ་དེས་ཅི་བྱ། །རྟོག་མེད་ཀྱི་སྙོམས་འཇུག་དེ་འདྲས་ཀྱང་ཅི་ལྟོ། །རྟོག་བཅས་དང་རྟོག་མེད་འཛིན་རྩོལ་ལས་འདས་པའི། །སྒོམ་མེད་འདི་སྒོམ་གྱི་དྲག་ཤོས་རང་ཡིན་ནོ། །འཁྲུལ་རྟོག་གི་ལྟད་མོས་བསླུས་པ་ཡང་མིན་མོད། །ཡུལ་སྣང་གི་འཆར་ཆ་ནུབ་པའང་མ་ཡིན། །ནང་གསལ་གྱི་རིག་པ་འཛིན་མེད་དུ་བཞུགས་དེས། །གཟུང་འཛིན་གྱི་རི་མོ་རྨིང་སྒྱེལ་ཞིག་བྱས་སྐད། །བྲག་གསེབ་ཀྱི་སྒོམ་ཆེན་འདི་འདྲ་རང་གསུངས་གདའ། །སྤྲང་པོས་ནི་རྫོགས་ཆེན་རྟོགས་དུས་ཞིག་ནམ་ཡོད། །འོན་ཀྱང་ནི་བླ་མ་པད་འབྱུང་དེའི་དྲིན་ལས། །རིག་སྟོང་གི་ཆོས་སྐུའི་གཏན་སྲིད་ཀྱང་འཛིན་ཐང༌། །ཅེས་འཇིགས་མེད་པས་སོ།། ༈ །།དབྱིངས་དག་ཆེན་འཁོར་ལོ་རྒྱས་འདེབས་མ། །རྩལ་བདེ་ཆེན་བཛྲ་ཀུ་མཱ་ར། །
དེ་དབྱེར་མེད་གཉུག་མའི་འོད་གསལ་ཆེ། །འདི་ཁྲག་འཐུང་སྟོང་གི་སྲོག་སྙིང་ཡིན། །ལྷ་སྒོམ་ཀྱང་རུང་ལ་མ་བསྒོམ་རུང༌། །གཞི་ཡེ་གྲོལ་ཆོས་སྐུའི་རྒྱལ་ཁབ་ན། །དོན་རིག་སྟོང་གི་དཔལ་ཆེན་ཡབ་ཡུམ་ཟུང༌། །དུས་བཞི་མཉམ་ཉིད་དུ་འབྲལ་མེད་བཞུགས། །སྔགས་བཟླས་ཀྱང་རུང་ལ་མ་བཟླས་རུང༌། །བརྗོད་ཚད་འདི་བརྗོད་མེད་ཀྱི་རོལ་མོར་གདའ། །བརྗོད་མེད་དེ་སྤྲོས་བྲལ་དོན་གྱི་སྔགས། །དེ་འཕོ་འགྱུར་མེད་པར་གདོད་ནས་གནས། །མཉམ་བཞག་ལ་བསྡད་རུང་མ་བསྡད་རུང༌། །ཤར་སྣང་འདི་ཡེ་ཤེས་ཀྱི་རོལ་བར་གདའ། །ད་ལྟར་གྱི་ཤེས་པ་ཐ་མལ་པ། །འདི་མཚན་མེད་རིག་པའི་ཕུར་བུ་ཡིན། །སྣང་སྣང་འདི་དག་ཆེན་ཕུར་པའི་ལྷ། །གྲགས་གྲགས་འདི་མི་ཤིགས་རྡོ་རྗེའི་སྔགས། །དྲན་དྲན་འདི་མི་རྟོག་ཡེ་ཤེས་ཐུགས། །སྣང་སྲིད་འདི་དཀྱིལ་འཁོར་གསུམ་དུ་ཆེ། །དེར་ལྷ་ཡང་ཡེ་ཤེས་རོལ་པའི་ལྷ། །སྔགས་ཀྱང་ཡེ་ཤེས་རྡོ་རྗེའི་སྔགས། །ཐུགས་ཀྱང་མི་རྟོག་ཡེ་ཤེས་ཐུགས། །ཐམས་ཅད་ཡེ་ཤེས་ཀྱི་རོལ་མོར་འདུག །དོན་མ་བཅོས་རིག་པའི་ཕུར་བུ་དེ། །བློ་གཉིས་འཛིན་གདོན་གྱི་སྙིང་ལ་རྒྱོབ། །ཐུག་ཕྲད་རང་གྲོལ་གྱི་སྨད་ལས་དེས། ཁམས་གསུམ་འདི་ཀ་དག་དབྱིངས་སུ་སྒྲོལ། །ངས་དེ་ལྟར་རྟོགས་པ་མ་ལགས་ཏེ། །གྲུབ་ཆེན་གྱི་གཟིགས་མོ་འདི་ཡིན་ཞེས། །རྟོགས་ལྡན་ཚོས་གསུང་གླེང་མོལ་བ་ཐོས། །ཐོས་པ་བཞིན་དྲང་པོར་སྨྲས་པ་ལགས།། ༈ །།ཕ་སྙན་བརྒྱུད་རྡོ་རྗེའི་ལམ་སྟོན་མཆོག །མཁྱེན་བརྩེའི་ཟློས་
གར་དེ་ཡང་ཡང་དྲན། །གཤིས་རྫོགས་པ་ཆེན་པོ་ཡེ་གྲོལ་ལ། །གནད་གཏད་མེད་ལྟ་བའི་གཟེར་ཀ་ཞིག །ལམ་ཡི་གེ་མེད་པའི་ཆོས་མཛོད་དེར། །ཕ་བླ་མའི་དྲིན་གྱིས་དེ་རིང་མཐོང༌། །དབྱིངས་མཐའ་བརྒྱད་སྤྲོས་བྲལ་སྒོམ་བློ་འདི། །ལམ་ཐེག་རྩེའི་དགོངས་དོན་མི་བྱེད་པས། །ད་འོད་གསལ་མ་བཅོས་ཅོག་བཞག་གིས། །གཞི་རང་བཞིན་རྣམ་དག་གདར་ཤ་ཆོད། །སེམས་རྟོག་པའི་འགྱུ་དྲན་དེངས་པ་ཙམ། །དོན་གཉུག་མའི་ཆོས་སྐུ་མ་ལགས་པས། །ད་གཞི་གྲོལ་ཀ་དག་ཟབ་མོའི་དབྱིངས། །སེམས་རིག་པའི་ལ་ཤན་དབྱེ་སྟེ་ལྟོས། །སྒོམ་རོ་གཅིག་སྣང་སེམས་འདྲེས་བློ་ཙམ། །ཟུང་འཇུག་གི་འོད་གསལ་མ་ལགས་པས། །ད་གཟུང་འཛིན་གཏད་མེད་ཡོངས་གྲོལ་དང༌། །ཀུན་རྟོག་གི་སྤྲོས་པ་ཤིག་ལ་ཞོག །ལར་སྣང་བ་ཡུལ་གྱི་རྫུན་རིས་ལ། །ཤེས་བྱ་སུམ་སྒྲིལ་གྱི་མན་ངག་ཡོད། །ལམ་རིག་སྟོང་ཁ་སྦྱོར་མ་ཤེས་ན། །སྣང་སེམས་གཞི་གྲོལ་གྱི་ཨ་བོ་མིན། །ནང་འཛིན་པ་སེམས་ཀྱི་བྱུང་ཚོར་ན། །སྒྱུ་མ་ངོ་སྤྲོད་ཀྱི་གདམས་ངག་ཡོད། །ལམ་འོད་གསལ་རྩལ་སྦྱོང་མི་ཤེས་ན། ཁྱབ་གདལ་གྱི་ཆོས་སྐད་ལད་མོ་ཡིན། །བར་ལས་རླུང་ཉི་ཁྲི་ཡར་བ་ན། །གཤིས་གཞོན་ནུ་བུམ་པའི་ཆོས་སྐུ་ཡོད། །ཡེ་གྲོལ་གྱི་ལམ་གནད་མ་འཆུག་ན། །སྟོང་གསལ་གྱི་དྲན་རིག་གཟུགས་བརྙན་ཙམ། །
ལམ་རྫོགས་ཆེན་སྒོམ་པའི་རྣལ་འབྱོར་ལ། །གཉིད་ཤེས་བྱ་བུམ་འཇུག་གནད་དུ་ཆེ། །སྨན་གཞོན་ནུའི་རེག་བྱ་གང་དགར་ཐོངས། །དོན་ཡེ་ཤེས་ཀྱི་ཕྱག་རྒྱར་རྩེད་མོ་མཛོད། །སྲོད་ཐོ་རང་གཉིས་ཀྱི་སྟོན་གྲལ་ན། །གཉིད་རྨི་ལམ་གཉིས་ཀྱི་མཚམས་ཤིག་ན། །ཡིད་ཆོས་སྐུར་གྲོལ་བའི་ཉམས་མྱོང་ཡོད། །ལྭ་བའི་གོས་ཅན་ལྟར་ཅིས་མི་མཛད། །ལམ་ལྟར་སྣང་ཙམ་གྱིས་མི་ངོམས་པའི། །བུ་ལས་འཕྲོ་ལས་ཀྱི་སྐལ་བཟང་དག །ཕ་སྔོན་བྱོན་གོང་མའི་རྣམ་ཐར་གཟིགས། ཁྱད་ཆོས་དྲུག་ལྡན་དུ་མཆོད་ལ་ཤོག །ཅེས་པའང་གཞོན་ནུ་འཇིགས་མེད་པས་སོ།། ༈ །།རྒྱ་ཡན་ཅོག་བཞག་རང་བྱུང་གི་རིག་པ། །ཡེ་བབས་རང་གནས་ཀ་དག་གི་ཆོས་ཉིད། །ལྟ་གྲུབ་མཁན་པོས་མཐོང་ས་ན་མི་གདའ། །འཛིན་ཞེན་མེད་པའི་ཉེ་ལམ་ཞིག་དགོས་སོ། །གདལ་བ་ཆེན་པོ་ཀུན་ཁྱབ་ཀྱི་ཡེ་ཤེས། །རྟོག་པས་མ་བཟོས་ཀློང་ཆེན་གྱི་དགོངས་པ། །རྟོག་གེ་མཁན་པོས་མཐོང་ས་ན་མི་གདའ། །རང་བབས་འཇོག་པའི་ཉེ་ལམ་ཞིག་དགོས་སོ། །ཡེ་གྲོལ་གཤིས་ལུགས་མཐའ་བཞི་ལས་འདས་པའི། །ཀུན་བྱེད་སྙིང་པོ་བྱང་ཆུབ་ཀྱི་སེམས་མཆོག །དམིགས་གཏད་མཁན་པོས་མཐོང་ས་ན་མི་གདའ། །དམིགས་མེད་འཇོག་པའི་ཉེ་ལམ་ཞིག་དགོས་སོ། །གཞི་མེད་རྩ་བྲལ་འོད་གསལ་གྱི་རིག་པ། །བསམ་བརྗོད་སྤྲོས་བྲལ་མཁའ་མཉམ་གྱི་ཡེ་ཤེས། །རྟོག་དཔྱོད་མཁན་པོས་མཐོང་ས་ན་མི་གདའ། །གཉུག་མར་
འཇོག་པའི་ཉེ་ལམ་ཞིག་དགོས་སོ། །ཕྱལ་བ་ལྷུག་པ་རྟོག་བྲལ་གྱི་རང་མདངས། །སྐྱེ་འགགས་གཉིས་མེད་དག་གསལ་གྱི་དགོངས་པ། །འདོད་ཞེན་མཁན་པོས་མཐོང་ས་ན་མི་གདའ། །བློ་འཛིན་མེད་པའི་ཉམས་ལེན་ཞིག་དགོས་སོ། །ཡེ་བཞག་རང་བཞག་གཞི་བཞག་གི་དགོངས་པ། །ཡེ་གདལ་ཕྱམ་གདལ་ཁྱབ་གདལ་གྱི་རང་རིག །གཏད་མེད་འཛིན་མེད་རྟོག་མེད་ཀྱི་ཡེ་ཤེས། །ཅེར་གྲོལ་རང་གྲོལ་མཐའ་གྲོལ་གྱི་ཆོས་ཉིད། །འཇུར་དྲན་གཉེན་པོས་འཆིང་ས་ན་མི་བཞུགས། །སྤང་གཉེན་ཡེ་གྲོལ་ཐ་མལ་གྱི་ཤེས་པ། །མ་བྱས་ཡེ་ཟིན་རྩོལ་མེད་ཀྱི་འབྲས་བུ། །མ་བགྲོད་ཡེ་ཕྱིན་ཆོས་སྐུ་ཡི་རྒྱལ་ས། །མི་བསྒོམ་རྒྱུན་ཆད་མེད་པ་ཡི་སྒོམ་པ། །རྣལ་འབྱོར་སྤྱོད་པའི་ཉེ་ལམ་དེ་མཁྱེན་ནམ། །ལྟ་སྟངས་མཐོན་པོ་ནམ་མཁའ་ལ་བསྒྲིལ་བའི། །ཨུ་ཙུག་ཅན་གྱི་གླེན་སྒོམ་ལ་གཟིགས་དང༌། །ཧ་ཤང་རྒན་པོའི་ཐ་ཚིག་གིས་བཅིངས་པའི། །འདག་ཞལ་མཁན་པོའི་རྣམ་ཐར་དེ་མཐོང་ངམ།། ༈ །།གཉུག་མ་མཐའ་བྲལ་གྱི་གནས་ལུགས་ཆེན་པོ། །ཇི་བཞིན་རྗེན་པ་རུ་སྟོན་པའི་བླ་མ། །འབྲལ་མེད་སྙིང་དབུས་ཀྱི་ཐིག་ལེར་བཞུགས་ནས། །འོད་གསལ་ཡེ་ཤེས་ཀྱི་སྣང་བ་སྩོལ་ཤོག །ཟབ་མོ་གསང་ཆེན་གྱི་ཐེག་པའི་དགོངས་བཅུད། །བློ་བྲལ་རིག་སྟོང་གི་ཡེ་ཤེས་ཆེན་པོ། །རྩོལ་མེད་རང་བཞག་ཏུ་ལྟ་བའི་མན་ངག །ཤིན་ཏུ་རྣལ་འབྱོར་གྱི་ཁྱད་ཆོས་ཁོ་ན། །སྤྲོས་པའི་གྲྭ་ཟུར་དང་
མཛའ་བ་མིན་པའི། །སྟོང་ཆེན་བརྗོད་བྲལ་གྱི་ཀུན་ཟླུམ་ཐིག་ལེ། །རང་གནས་ཡེ་ཤེས་ཀྱི་སྙིང་པོར་བཅས་པ། །ཟུང་འཇུག་འོད་གསལ་དེ་ངོ་མཚར་ཆེའོ། །མཚན་འཛིན་གཉིས་སྣང་གི་དྲྭ་བ་སྟུག་པོ། །བློ་འདས་ཡེ་ཤེས་ཀྱི་རལ་གྲིས་བཅད་པས། །ཞེན་འཛིན་དམིགས་གཏད་ཁོ་སྐྱེ་སྙམ་མི་འདུག །ནམ་མཁའ་རྡུལ་བྲལ་གྱི་ཀློང་ལྟར་འདུག་གོ །སྣ་ཚོགས་རྣམ་རྟོག་གི་ན་བུན་ལང་ལོང༌། །སྤོང་བསྒྱུར་སྦྱོང་བྱེད་ཀྱི་རྩོལ་བ་མེད་ཀྱང༌། །རྒྱ་ཡན་ཅོག་བཞག་ལ་ཅི་བདེར་བསྒྱུར་བས། །ཀློང་ཆེན་ཡེ་གྲོལ་གྱི་གཤིས་སུ་དེངས་སོང༌། །མི་དགེའི་རྣམ་རྟོག་ལ་སྤང་རྒྱུ་ཅི་ཡོད། །ཤར་ཚད་ཡེ་ཤེས་ཀྱི་རོལ་མོར་འདུག་པ། །དགེ་བའི་རྣམ་རྟོག་ལ་བསྒྲུབ་རྒྱུ་ཅི་ཡོད། །བློས་བྱས་ཡིད་དཔྱོད་ཀྱི་འཆིང་བར་འདུག་པ། །སྡུག་བསྔལ་ངན་པ་ལ་དོགས་རྒྱུ་ཅི་ཡོད། །སྡུག་བསྔལ་རིག་སྟོང་གི་རང་རྩལ་ཡིན་པ། །དགའ་བདེའི་ཚོར་བ་ལ་རེ་རྒྱུ་ཅི་ཡོད། །དགའ་བདེ་ཐ་མལ་གྱི་སྣང་ཚུལ་ལགས་པ། །འཇུར་དྲན་ཨ་འཐས་ཀྱིས་བཅིང་བ་མ་ཡིན། །འཁྲུལ་བ་རྒྱ་འབྱམས་སུ་ལྷོད་པ་མ་ཡིན། །རང་འགྲོས་བཅོས་སླད་དང་བྲལ་བའི་དགོངས་ཀློང༌། །མཉམ་རྫོགས་ཟང་ཐལ་གྱི་ཉམས་མྱོང་ངོ་མཚར། །ཚོགས་དྲུག་ཡུལ་སྣང་གི་སྒྱུ་མའི་གྲོང་ན། །ཀུན་བྱེད་གླང་པོ་ཁོ་ཅི་བདེར་ཡན་ཚེ། །རང་གྲོལ་རྗེས་མེད་ཀྱི་ལྟད་མོ་ཆེ་བས། །སྤང་གཉེན་འདོར་ལེན་གྱི་ངལ་དུབ་མི་དགོས། །དེ་སླད་རྡོ་རྗེ་ཡི་མཆེད་པོ་ཁྱོད་ཀྱང༌། །སྟོང་སྒོམ་མུན་ཅན་གྱི་བསླུ་བྲིད་
བོར་ལ། །ཡོད་མེད་ཡིན་མིན་གྱི་མཚན་མ་ཞི་བའི། །གདོད་མའི་ནང་དབྱིངས་དེར་མྱུར་དུ་ཕེབས་སོང༌། །འཇིགས་མེད་པས་སོ།། ༈ །།ཐ་མལ་གྱི་ཤེས་པ་ཟང་ཐལ་ཡེ་གྲོལ་ལ་ལྟོས་དང༌། །ཡིད་ཀྱི་དབང་པོ་ཚིག་དང་ཡི་གེས་བརྗོད་དུ་མེད་པ་ནམ་མཁའ་ལ་མདུང་བསྐོར་བས་འབིག་རྒྱུ་མེད་པ་ལྟར་འདུག་གོ །བཅོས་བསླད་དང་བྲལ་བ་གཉུག་མའི་ཡེ་ཤེས་ལ་ལྟོས་དང༌། །མ་དག་ལས་རླུང་གི་རྒྱུ་བ་ཆ་དང་བཅས་པས་བསྒྲིབས་ཀྱང་མ་གོས་པ་ཉི་མ་སྤྲིན་གྱིས་བསྒྲིབས་ཀྱང་རང་ངོར་བསླད་པ་མེད་པ་ལྟར་འདུག་གོ །རང་གྲོལ་ལ་རྒྱུན་ཆད་མེད་པའི་སྒོམ་པ་ལ་ལྟོས་དང༌། །རྣམ་རྟོག་གི་འཁྲུལ་འཁོར་ཇི་ལྟར་འཁྲུགས་ཀྱང་རང་ངོ་ལ་སྐྱོན་མི་འཇུག་པ་པདྨོ་ལ་ཆུས་མི་གོས་པ་ལྟར་འདུག་གོ །ཀུན་ཁྱབ་ཆོ་འཕྲུལ་སྣ་ཚོགས་དང་ལྡན་པའི་རང་རིག་ལ་ལྟོས་དང༌། །ཡུལ་སྣང་ཇི་ལྟར་ཤར་ཀྱང་རང་གི་གྲོགས་སུ་ཆེ་བ་རླུང་ཇི་ལྟར་འཁྲུགས་ཀྱང་མེ་ཆེན་པོ་ལྷག་པར་འབར་བ་ལྟར་འདུག་གོ །ཀུན་སྣང་འོད་གསལ་གྱི་རང་གདངས་འགག་མེད་ཀྱི་འཆར་ཚུལ་ལ་ལྟོས་དང༌། །བདེན་པར་མེད་བཞིན་དུ་སྐུ་དང་ཐིག་ལེའི་སྣང་བ་ཅིར་ཡང་འཆར་བ་འཇའ་ཚོན་ནམ་མཁའ་ལ་བཀྲ་བ་ལྟར་འདུག་གོ །གཞི་གྲོལ་གྱི་ཡེ་ཤེས་མཁའ་མཉམ་ཡངས་པ་ལ་ལྟོས་དང༌། །རྒྱ་ཆད་དང་ཕྱོགས་ལྷུང་མེད་པ་ཤིན་ཏུ་ཚད་མེད་པའི་ནམ་མཁའ་དྭངས་པའི་ཀློང་ལྟར་འདུག་གོ །ཡེ་གནས་ཀྱི་ཆོས་སྐུ་ཕྱམ་གདལ་ཆེན་པོ་ལ་ལྟོས་དང༌། །
འཁྲུལ་པ་དང་གྲོལ་བ་ཐམས་ཅད་རང་གི་ངང་ལས་མ་གཡོས་པ་རླབས་ཇི་ལྟར་བྱུང་ཡང་རྒྱ་མཚོ་ཆེན་པོ་ལས་གཡོ་བ་མེད་པ་ལྟར་འདུག་གོ །ཀུན་བྱེད་ཀྱི་སྟོན་པ་འཕོ་མེད་སྤྲོས་བྲལ་ལ་ལྟོས་དང༌། །ངོ་བོ་ལ་དྲི་མ་མེད་ཀྱང་དྲི་མ་རང་རྩལ་དུ་ཤར་བ་ནམ་མཁའ་ལ་སྤྲིན་གྱིས་བསྒྲིབས་ཀྱང་སྤྲིན་རང་གི་ངང་ལས་བྱུང་བ་ལྟར་འདུག་གོ་ཧ་ཧ། མ་བཅོས་པའི་ཆོས་ཉིད། མ་འཁྲུལ་པའི་གནས་ལུགས། མི་རྟོག་པའི་ཡེ་ཤེས། མ་ཡེངས་པའི་དྲན་པ། མ་མཐོང་བའི་མཐོང་བ། མི་བསྒོམ་པའི་བསྒོམ་པ། ཡུལ་དང་ཡུལ་ཅན་ཐམས་ཅད་དབྱེར་མེད་ཆུ་ལ་ཆུ་བཞག་པ་ལྟར་འདུག་གོ །ཚིག་ལས་འདས་པའི་རང་བཞིན། སེམས་ལས་འདས་པའི་རིག་པ། བློ་ལས་འདས་པའི་དོན་དམ། ཡིད་ལས་འདས་པའི་ཤེས་རབ། མཐའ་ལས་འདས་པའི་འོད་གསལ། ནམ་མཁའ་དྭངས་པའི་དཀྱིལ་ལྟར་འདུག་གོ །གཟའ་གཏད་མེད་པའི་ཉམས་མྱོང༌། ཆེད་འཛིན་མེད་པའི་མཉམ་བཞག །གཟུང་འཛིན་མེད་པའི་ཡེ་ཤེས། །རྩིས་གདབ་མེད་པའི་རྗེས་ཐོབ། །རྒྱུན་ཆད་མེད་པའི་རྣལ་འབྱོར། །བར་མེད་ཆུ་བོའི་རྒྱུན་ལྟར་འདུག་གོ །སྤྲོས་མེད་ལ་སྤྲོས་པར་འཛིན་པ་མཚར་ཆེ། །བློ་བྲལ་ལ་རྟོག་གེས་འཇལ་བ་དགོད་བྲོ། །གཉིས་མེད་ལ་གཉིས་སུ་འཛིན་པ་རེ་སྡུག །དག་དབྱིངས་ལ་ཕོ་ཚོད་བྱེད་པ་ཐང་ཆད། །བརྗོད་མེད་ལ་བརྗོད་བྱར་རེ་བ་ཡི་མུག །ཨ་ཅང་ཀུ་རེ་ཙམ་དུ་འུད་གོག་རྔམ་པོ་ཆེ་བསྒྲགས་པ་
ཡིན། །གཞོན་ནུ་འཇིགས་མེད་གང་ཤར་རང་གྲོལ་གྱིས་ཤར་མར་བྲིས།། ༈ །།འཕགས་མཆོག་འཇམ་པའི་དབྱངས་ལ་སྤྱན་འདྲེན་པའི་གླུ་དད་པའི་མྱུ་གུ་ཞེས་བྱ་བ། །ཆོས་དབྱིངས་སྤྲོས་པ་ཀུན་བྲལ་ཀ་དག་གི་ཀློང་ན། །ལྷུན་གྲུབ་ངེས་པ་ལྔ་ལྡན་རིགས་ཀུན་གྱི་ཁྱབ་བདག །གདོད་མའི་སངས་རྒྱས་འཇམ་དཔལ་ཡེ་ཤེས་ཀྱི་སྐུ་ཅན། །ཀུན་ཁྱབ་ཆོས་སྐུའི་ཀློང་ནས་སྤྲུལ་སྐུ་རུ་བཞེངས་ཤོག །སྲིད་ཞི་མཉམ་པར་གདལ་བའི་ཆོས་ཉིད་ཀྱི་ཀློང་ན། །གཉིས་སྣང་མཚན་མ་ཉེར་ཞི་རང་བྱུང་གི་ཡེ་ཤེས། །འཕོ་མེད་སེམས་ཀྱི་རྡོ་རྗེ་འཇམ་དཔལ་གྱི་དཔའ་བོས། །སྣ་ཚོགས་གཟུགས་སྐུའི་རོལ་གར་འགགས་མེད་དུ་བཞེངས་ཤོག །མི་ཤིགས་སེམས་ཀྱི་ཆོས་ཉིད་བརྗོད་བྲལ་གྱི་ཀློང་ན། ཁ་སྦྱོར་ཡེ་ཤེས་རྡོ་རྗེ་བདེ་ཆེན་གྱི་ལང་ཚོ། །རྟག་ཆེན་གཉུག་མའི་སྐུ་ཅན་འཇམ་དཔལ་གྱི་རྡོ་རྗེ། །རིག་གདངས་སྒྲོན་མ་རྣམ་བཞིའི་འཇའ་སྐུ་རུ་སྟོན་ཤོག །སྣང་མེད་སྣང་བའི་གར་རོལ་སྒྱུ་འཕྲུལ་གྱི་ཡེ་ཤེས། །གཟུགས་མེད་གཟུགས་སུ་བརྫུ་བའི་ལྷུན་གྲུབ་ཀྱི་འོད་གདངས། །ཐོགས་མེད་ཅིར་ཡང་འཕྲུལ་བའི་འཇམ་དཔལ་གྱི་ཡེ་ཤེས། ཁྱེའུ་ཆུང་རྒྱང་ཞགས་སྒྲོན་མའི་ལྟད་མོ་རུ་ངོམས་ཤོག །བྲི་དང་གང་བ་གཉིས་མེད་མཐའ་བྲལ་གྱི་དབྱིངས་སུ། །ལས་རླུང་ཟས་སུ་ཟ་བའི་ཁྲག་འཐུང་གི་སྤྱི་རྗེ། །འཁོར་འདས་ཀུན་གྱི་སྤྱི་དཔལ་གཤིན་རྗེ་ཡི་གཤེད་པོ། །ཡེ་ཤེས་སྒྱུ་མའི་བཀོད་པའི་རྣམ་རོལ་གྱིས་བཞེངས་ཤོག་ཁམས་
གསུམ་ཡིད་ཀྱི་རྒྱུ་བ་གཞི་མེད་དུ་སངས་པའི། །ནང་གསལ་གཞོན་ནུ་བུམ་སྐུ་འཇམ་དཔལ་གྱི་ཡེ་ཤེས། །གཏུམ་ཆེན་ཞེ་སྡང་རྡོ་རྗེའི་རོལ་མོ་རུ་བཞེངས་ནས། །ཟག་བཅས་སེམས་ཀྱི་མཚན་མ་ཡོངས་གྲོལ་དུ་ཤིག་ཅིག །འཁྲུལ་རྟོག་རྡུལ་ཁམས་དྭངས་པའི་གཞི་དབྱིངས་ཀྱི་ཀློང་ནས། །བརྗོད་མེད་གྲགས་སྟོང་རྡོ་རྗེའི་རྒྱང་གླུ་འདི་བླངས་པས། །འཇམ་པའི་རྡོ་རྗེ་དགྱེས་པའི་མཆོད་སྤྲིན་དུ་གྱུར་ནས། །བྱིན་རླབས་མཆོག་གི་ཆར་ཆེན་འཛད་མེད་དུ་སྙིལ་ཤོག །ཅེས་པའང་སྤྲང་རྒན་འཇིགས་མེད་པས་གང་དྲན་གླུར་བླངས་པ་དགེ་བར་གྱུར་ཅིག། ༈ །།དབྱིངས་དག་པ་རབ་འབྱམས་ཀློང་ཡངས་ན། །ལྷ་མཚམས་སྤྲིན་གྱི་མདངས་ལྡན་ཡོད་དོ་ཞེས། །ཡིད་དང་བའི་མོས་ངོར་རབ་བསམས་ཏེ། །ངག་འོ་དོད་ཀྱི་སྒྲ་དབྱངས་འདི་འབོད་ན། །ཐུགས་བརྩེ་ཆེན་གྱི་གཟིགས་པ་མ་གཡེལ་ཞིག །སྙིང་ཀུན་རྨོང་གི་མེ་ལྕེས་ཟིན་བཞིན་དུ། །བློ་མོས་གུས་ཀྱི་གདོང་བ་ར་རི་ཞིག །ལྷ་ཟུར་ཕུད་ལྔ་པའི་ཞབས་པད་ཕྱོགས། །ད་གྲུབ་འབྲས་ཀྱི་སྐལ་བ་མི་སྩལ་ན། །སྤྲང་སྡུག་བསྔལ་གྱི་གཡང་སར་སླར་ཡང་འགྲོ། །ཡིད་ཤེས་རབ་ཀྱི་འབྱོར་པས་ཕོངས་བཞིན་དུ། །བློ་དད་གསུམ་གྱི་སྤྲང་སྒྱེ་འདི་བཟུང་སྟེ། །སྐྱབས་ལག་ན་རལ་གྲིའི་ཞབས་དྲུང་ན། །ངག་སྨྲེ་སྔགས་ཀྱི་ཀུ་ཅོ་འདོན་ཞིང་འདུག །ད་དངོས་གྲུབ་ཀྱི་ནོར་སྐལ་མི་གནང་ན། །སྤྲང་སྐྱབས་མེད་དུ་འཁོར་བའི་གཡང་སར་མཆི། །མི་ཉམ་ཆུང་གི་སྤྲང་པོ་འཇིགས་
མེད་པའི། །བློ་གཏད་ས་དེ་ཁྱོད་ལས་གཞན་མ་རྙེད། །ངས་ཉིན་མཚན་དུ་གདུད་ཡུས་ཁ་ཏོན་བྱས། །ད་མཚན་བཟང་གི་གསེར་ཞལ་མི་སྟོན་ན། །སྤྲང་འདུན་མའི་གཏད་སོ་སུ་ལ་འཆའ། །ལྷ་མཁྱེན་པའི་གཏེར་ཆེན་སེམས་ལ་བཏགས། །མིག་མཆི་མའི་ཆུ་རྒྱུན་དྲག་ཏུ་གཡོ། །ལག་ཐལ་མོའི་གེ་སར་གཙུག་ཏུ་བཅིང༌། །ལུས་གུས་པའི་རྣམ་འགྱུར་འདི་བཅས་ནས། །ལྷ་འཇམ་དཔལ་གཞོན་ནུའི་མཚན་ནས་འབོད། །སྐྱབས་ཐུགས་རྗེ་ཅན་དེས་གསན་ལགས་སམ། །ངས་རྩེ་གཅིག་ཏུ་འཕགས་མཆོག་ཡིད་ལ་བྱས། །ལྷས་ཉིན་གཅིག་ཀྱང་དགྱེས་ཞལ་བསྟན་པ་མེད། །ངའི་རེ་བའི་རེ་འབྲས་དཀའ་དཀའ་འདྲ། །དུས་ད་དུང་ཡང་རེ་ཐག་རྒྱུན་མ་ཆད། །འདི་གཟིགས་སམ་འཇམ་མགོན་མཁྱེན་པའི་ལྷ། །ཞབས་རྩིབས་སྟོང་གི་འཁོར་ལོ་དཔལ་ཡོན་ཅན། །སྤྱི་གཙུག་ཏུ་འཇོག་པའི་བཀའ་དྲིན་ཞུ།། ༈ །།སྙིང་ལ་བློ་གྲོས་སྣང་བ། །སྦྱིན་མཛད་ཆོས་ཀྱི་ཉི་མ། །དཔལ་ལྡན་ཨོ་ཌིའི་སངས་རྒྱས། །ཀུན་མཁྱེན་བློ་ལྡན་མཆོག་སྲེད། །པཎ་གྲུབ་བྱེ་བའི་གྲལ་ན། །མཚུངས་མེད་མི་ཡི་སེང་གེ༌།རིག་གྲོལ་རྟོགས་པའི་གཏེར་ཆེན། །མཁས་པ་བློ་ལྡན་མཆོག་སྲེད། །མཁའ་ཁྱབ་ཞིང་ཁམས་རྒྱ་མཚོར། །ཇི་སྙེད་རྒྱལ་དང་རྒྱལ་སྲས། །སྤྲོ་ཞིང་སྡུད་པའི་བདག་ཉིད། །བདེ་གཤེགས་བློ་ལྡན་མཆོག་སྲེད། །དབྱིངས་ལས་གཡོ་བ་མེད་
བཞིན། །གང་འདུལ་མོས་པའི་སྣང་ངོར། །མཚན་དང་སྐུ་ཡི་བཀོད་པ། །སྣང་མཛད་བློ་ལྡན་མཆོག་སྲེད། །རྨོངས་ཤིང་དམན་པའི་གདུལ་བྱར། །ཐུགས་རྗེ་ལྷག་པར་རྒྱས་ཏེ། །རྩོལ་མེད་གཞན་ཕན་མཛད་པའི། །བརྩེ་ཆེན་བློ་ལྡན་མཆོག་སྲེད། །རིག་འཛིན་མཁའ་འགྲོའི་ཚོགས་རྗེ། །སྒྱུ་མ་ཡེ་ཤེས་ལུས་ཅན། །བདེ་ཆེན་ཉམས་བརྒྱ་འབར་བའི། །དགྱེས་མཛད་བློ་ལྡན་མཆོག་སྲེད། །བློ་ཆེན་འབུམ་གྱི་སྤྱི་བོར། །ཞབས་སེན་ཟླ་སྣང་འཇོ་ཞིང༌། །མི་ཟད་སྤོབས་པའི་གཏེར་ཆེན། །བློ་མཆོག་བློ་ལྡན་མཆོག་སྲེད། །འོད་གསལ་སྣང་བཞིའི་གྲོང་ན། །ཀུན་སྣང་ཡེ་ཤེས་རོལ་མོ། །འགགས་མེད་སྣང་ཞིང་འཕྲུལ་པའི། །རང་རིག་བློ་ལྡན་མཆོག་སྲེད། །ཨ་ཧོ། གཉུག་མ་བློ་ལྡན་མཆོག་སྲེད། །བཙལ་ནས་རྙེད་རྒྱུར་མི་གདའ། །གདོད་མའི་གྲོལ་གཞི་ཆེན་པོ། །ཡེ་བཞག་འཕོ་འགྱུར་མེད་པའི། །གནས་ལུགས་རིག་སྟོང་དབྱེར་མེད། །མི་ཤིག་རང་བྱུང་ཐིག་ལེ། །དོན་གྱི་བློ་ལྡན་མཆོག་སྲེད། །ཙིཏྟ་ཕྱི་ནས་འཚོལ་བ་ཧོ་ཧོ། །རང་གནས་གཞན་དུ་འཚོལ་བ་ཧོ་ཧོ། །རང་ངོ་རང་གིས་མ་ཤེས་ཧོ་ཧོ། །ལག་པའི་ལྟོ་རྒྱབ་ནོར་བ་ཧོ་ཧོ།། །།དགེའོ།། ༈ །།ཕ་བཀའ་དྲིན་འཁོར་མེད་མཁྱེན་བརྩེའི་ལྷ། །སངས་རྒྱས་མི་གཟུགས་ཀྱི་རྫུ་བག་ཅན། །མཚན་བརྗོད་ན་རྡོ་རྗེ་གཟི་བརྗིད་རྩལ། །བུའི་སྙིང་དབུས་བཞུགས་ལ་བྱིན་གྱིས་རློབས། །རྒྱལ་ཁམས་ཀྱི་བླ་མ་བཟང་
བཟང་དང༌། །གྲགས་པ་འུར་འུར་གྱི་རྗེས་མི་ཆོད། །ངའི་བླ་མ་དྲན་ཆོག་རྒྱལ་པོ་དེ། །བསླུ་མེད་ཀྱི་མགོན་པོ་ཁྱོད་ལ་ཞུ། །ཕ་རིག་འཛིན་ཁྱོད་ཀྱི་བཀའ་དྲིན་ལས། །ཆོས་རྫོགས་པ་ཆེན་པོ་གཉུག་མའི་བབས། །ཡེ་གྲོལ་གྱི་རིག་པ་རྗེན་པ་དེར། །སྤྲང་བདག་འདྲའི་ཡིད་ཀྱང་གོ་བ་སྐྱེས། །དེར་བཅོས་མའི་དད་པ་སོག་པོ། །བཟོ་མ་དང་མགར་མའི་རྫུན་རྐྱལ་དུ། །ཕུགས་ཁོང་ནས་རྡིབ་པའི་ཤེས་པ་ཁོ། །བཅོས་མིན་གྱི་དད་པར་སོང་ལ་ཁད། །ཕ་བླ་མ་སངས་རྒྱས་ཡིན་ཟེར་མཁན། །རྒྱལ་ཁམས་ན་ཅི་ཡོད་ཅི་མེད་དེ། །སྤངས་རྟོགས་ཡོངས་རྫོགས་ཀྱི་ངེས་ཤེས་ལ། །ཐུག་ན་སྦུད་པ་བུས་པ་འདྲ། །ངེད་ཀུན་མཁྱེན་བརྒྱུད་པའི་བུ་རྒྱུད་ལ། །མོས་གུས་ཚིག་རྗེས་སུ་ཤོར་བ་མེད། །དད་པས་ཁམས་འདུས་གསོ་བ་ཞིག །ལས་ཅན་གྱི་སློབ་མར་བསྔགས་པ་ཡིན། །ང་བརྒྱུད་པ་བཟང་པོའི་རིགས་སྐྱེས་ཀྱང༌། །རྟོག་གེ་མགོ་མཁྲེགས་ཀྱི་ཐན་སྐད་འདིས། །རྒྱུད་ཐ་རྒོད་ཀྱི་ཉམ་ངར་ཅུང་ཟད་འཕྱན། །རྒྱལ་རིགས་ད་ཕྲུགས་སུ་ལྷུང་བ་བཞིན། །དེ་འོན་ཀྱང་མགོན་པོ་པདྨའི་ཞབས། །ཐུགས་སྲས་རིག་འཛིན་གྱི་ཚོམ་བུར་བཅས། །ཡིད་དང་བའི་མོས་ངོར་བསྒོམས་བསྒོམས་པས། །ད་རང་ལུགས་ཉམས་ཀྱིས་དོགས་པ་མེད། །ངའི་ཆོས་གྲོགས་ཆོས་པར་རེ་བ་འགའ། །གདམས་ངག་དེ་ངེད་ཀྱི་ཆོས་
གྲར་ཞུས། །བསྔགས་བརྗོད་དེ་རྟོག་གེའི་རྩོད་གྲར་བྱེད། །ཉིན་ཟོས་སྲིབ་ཉལ་གྱི་རྣམ་ཐར་ཅན། །ངའི་མན་ངག་ཀུན་མཁྱེན་བརྒྱུད་པའི་ཆོས། །བློ་རྩེ་ཀུན་མཁྱེན་གྱི་གཞུང་ལ་གཏོད། །ཚེ་རབས་ཀྱི་གྲོས་ཕུགས་བཅོལ་ས་དེ། །དོན་རྫོགས་པ་ཆེན་པོ་ཁོང་ལ་ཞུས།། ༈ །།ཕ་ཟབ་ལམ་རྡོ་རྗེའི་བླ་མ་མཆོག །མཚན་བརྗོད་ན་འཇིགས་མེད་མཁྱེན་བརྩེའི་ལྷ། །དེ་ཡང་ཡང་དྲན་པས་སྙིང་ཁམས་འདི། །དད་པའི་ཚོས་མདོག་ཏུ་ལམ་གྱིས་འགྲོ། །གནས་རི་ཁྲོད་འདོད་པའི་སྒོམ་ཕྲུག་ཚོ། །བྱ་བ་བློས་བཏང་སྔ་དྲག་པས། །རྟོག་ངན་གྱི་དུག་རོ་ལང་ཙ་ན། །ཞེན་ལོག་གི་ལས་མཐའ་ལོག་ཏ་རེ། །ཆོས་འཆི་ཁར་ཕན་ངེས་ཞིག་མཛད་བཞེད་ན། །གྲོ་བརྒྱགས་སུ་གཏད་པ་བཞི་ལྡན་དགོས། །ལྟོ་གོས་གཏམ་གསུམ་པོ་མི་ཕྱིད་ན། །མཐོ་དྲག་ན་དམའ་སར་ལྷུང་གིས་དོགས། །ལྟོ་མུ་གེས་གདུངས་བའི་དཀའ་སྤྱད་དང༌། །རྒྱབ་ལྷག་པ་ཕྱུར་བའི་སྙིང་རུས་ཞིག །བྱུང་ན་བཟང་གསུམ་གྱི་རྩེ་མོ་ལོ། །མདོ་འགགས་སུ་གོ་མཉེད་ཡོང་ཡོང་མཛོད། །ཕྱི་ཕྱུགས་ལུག་ཀོ་བ་མ་ལགས་ཏེ། །ནང་གཤིས་ངན་སེམས་ཀྱི་ཀོ་གྱོང་འདི། །ཐབས་ཟབ་མོ་བླ་མའི་གདམ་ངག་གིས། །མཉེད་ལྷན་ལྷན་བབས་ཚེ་ཆོས་ལ་ལགས། །ལམ་དལ་འབྱོར་རྙེད་དཀའི་བློ་རྩེ་ནས། །ཐེག་དགུ་ཡི་རྩེ་མོ་རྫོགས་ཆེན་བར། །དེ་རང་སེམས་འདུལ་བ་ཁོ་ནའི་ཕྱིར། །མགོན་སྐྱོབ་པ་
མཚུངས་མེད་དེ་ཡིས་གསུངས། །ད་བསམ་གཞིག་རང་གི་སེམས་ལ་ཐོངས། །རྟོག་དཔྱོད་ཀྱི་རྩེ་མོ་ནང་དུ་སྐོར། །དཔྱད་སྒོམ་གྱི་རྣོ་སོ་རང་ལ་སྟོན། །འུག་པའི་མགོ་ཅན་དེ་ཅི་ཐུལ་ཞུ། །དཀར་ཕྱོགས་ཀྱི་ཉིན་མོ་མི་གྲགས་སྟེ། །མི་སྐལ་ངན་མཚན་མོ་ལྷང་ལྷང་གྲགས། །ཉེས་སྤྱོད་ཀྱི་ལྟས་ངན་སྣ་དགུའི་མཛོད། །ཕུང་བྱེད་ཀྱི་འུག་རྒན་ག་ན་གདའ། ཁོ་ཡུལ་དྲག་ཐང་ནས་མི་རྙེད་ཀྱི། །སེམས་བག་མེད་ཤིང་རྩེར་ཉལ་ཚབ་ཆེ། །ཐུགས་བསམ་གྱི་བཀྱེ་འགྱེད་དེ་རུ་ཐོང༌། །དགྲ་ཞེ་འཁུའི་སྙིང་རྡོ་དེ་ན་གདའ། །མིང་ལ་རྟག་འཛིན་གྱི་འགོང་པོ་ཟེར། །འདིར་སྣང་གི་ཕྱི་ཚིས་བྱེད་ཀྱིན་ཡོད། །ཕྱག་རྡོག་པོ་གཅིག་གི་དགེ་སྦྱོར་ཀྱང༌། །ལོག་འཆུ་རུ་འཁྲིད་མཁན་ཁོ་ལས་མེད། །ད་ཆུ་བུར་རྡོས་འདྲའི་བེམ་ཀོག་དང༌། །ཤ་མེད་སྤུ་མེད་ཀྱི་ཚེ་སྲོག་འདི། །འཆི་བདག་གིས་དགུང་ལ་མ་སྤུར་གོང༌། །ཤུལ་རིང་གི་སྐྱེལ་མ་ཅི་རྙེད་མཛོད། །ཚེ་ནམ་གཞུག་སྦྲང་མའི་ཚང་ཁང་འདི། །ཤི་གཤིན་རྗེ་བྱང་འབྲོང་རྨིག་ར་ཡིས། །ནམ་གཅུར་གྱི་ངེས་པ་མི་ཤེས་པས། །འཆི་ཀའི་འཕྱོར་ཆས་དེ་མ་མཛད་ཅིག །ལམ་རིང་པོ་བར་དོའི་འཕྲང་ན་ཡོད། །གྱི་ལིང་གི་གཞོན་པ་ག་འདྲ་བདོག །དགྲ་ཁ་དྲག་དམྱལ་བའི་ལས་མཁན་ཡིན། །འཇིགས་མེད་ཀྱི་གདེངས་ཚད་ཅི་འདྲ་གདའ། །ལར་དམྱལ་བ་ཟེར་བའི་སྒྲ་བོ་ཆེ། །མི་སྡིག་ཅན་ཤི་བའི་འགྲོ་ཁུང་
ཡིན། །སྡིག་པ་ཆ་ལུགས་ཀྱི་སྟེང་ན་མེད། །ལས་དགེ་སྡིག་རང་གི་སེམས་ལ་ལྟོས། །ང་འཆི་འཆི་ཤི་ན་སྐྲག་སྐྲག་ཟེར། །འཆི་ཁ་ལ་བཏགས་ནས་གསོན་དུ་རེ། །ཚེ་ཕྱི་མའི་འདུག་ཆུས་གང་བྱུང་བྱེད། །སྤྱང་གྲུང་གི་མི་ཕོ་ཚོ་ཡིན་ལེ་ལེ། །སྤྱང་བཅེན་ཕྱུག་སྒྲུབ་པའི་ཕོ་རྒོད་དང༌། །གླེན་འུག་པ་སྣོད་བཏུམ་མི་ངན་གཉིས། །འཆི་བདག་གི་སྲིན་པོ་ཁྲག་མིག་མདུན། །དཀར་ནག་གི་ཐང་ཤ་མཉམ་པར་གཅོད། །དུས་དེ་ཚེ་མལ་གྱི་ཐ་མ་ཞིག །གཅིན་སྟུག་གིས་བཀང་བའི་སྟན་ཐོག་ན། །བྲང་རུས་ཀྱི་པགས་པ་མཉེ་ཙ་ན། །འཁྲུལ་སྣང་གི་སུན་མ་བྱུང་ཙ་ན། །ཚེ་འདི་ཕྱིའི་བར་ལག་འབྱེད་ཙ་ན། །ཤུལ་རིང་གི་ཐག་པ་བསྡོག་ཙ་ན། །ཞུམ་འོ་དོད་འབོད་ཚེ་ཨ་ཙ་མ། །མིག་ཧུར་ཧུར་བྱེད་ཚེ་ཨ་ཙ་མ། །དབུགས་ཤུགས་རིང་འབྱིན་ཚེ་ཨ་ཙ་མ། །དགྲ་འཆི་བདག་ཞགས་པས་རྐེ་ནས་བཏགས། །ལས་ངན་གྱི་ཉེས་པ་རྣ་བར་བསྒྲགས། །ཤི་དམྱལ་བར་ཁྲིད་པའི་གྲོང་སྒོ་ན། །གོས་མེད་ཀྱི་གཅེར་བུ་འཇིགས་པ་ལ། །བཤེས་མེད་ཀྱི་གཅིག་པུར་འཇིགས་པ་ལ། །ནོར་མེད་ཀྱི་ལག་སྟོང་འཇིགས་པ་ལ། །སྡིག་ཅན་གྱི་མི་མཁན་ཨ་ཙི་ཙི། །མི་ཕྱུག་གི་ཤི་སྐད་ཐོས་ཙ་ན། །ཤི་བར་དོ་ཟེར་བའི་གྲགས་པ་ཅན། །དུས་དོ་མོད་ཀྱི་མཚན་མོ་ཚུན་ཆད་ཀྱང༌། །གཉའ་ཐོག་ཏུ་འཆར་གྲབ་འཆར་གྲབ་ལགས། །ད་འཆི་ཆོས་རང་དྲིན་རང་ཆེ་ཞིག །རན་པས་མི་ཚད་འཕྱིས་
པ་ཙམ། །དེ་ཐུགས་ལ་དགོངས་སམ་འཇིགས་མེད་བཟང༌། །སྤྲང་སྨྱོན་གྱི་ཡིད་ལ་ཤར་ཚོད་ལགས། །ཞེས་པའང་ད་རི་དྲ་འདུ་ཤེས་གསུམ་པའི་བན་གཞོན་ཞིག་གིས་གང་དྲན་སྐད་ཅིག་ལ་བྲིས་པའོ།། ༈ །།ཕ་བླ་མ་མཁྱེན་བརྩེའི་ཟློས་གར་མཆོད། །གླུ་ཚིག་ཐུང་རྐང་པ་དུམ་ཆོད་མ། །ངག་སྙན་པོས་ལེན་འདོད་མི་འདུག་སྟེ། །གང་དྲན་གྱི་སྨྱོ་གླུ་ཚིག་གསུམ་ལེན། །གླུ་བླང་ན་ཆོས་ཀུན་གླུ་ཆོས་ཏེ། །མགྲིན་པ་འདི་གླུ་ཡི་བང་མཛོད་ཡིན། །ངེད་དེ་འདྲའི་དོ་ཧ་མི་ཤེས་པས། །གླུ་བླང་ན་གྲེ་བ་དོག་མོར་གདའ། །དེ་འོན་ཀྱང་བཤེས་གཉེན་མ་ཏིའི་མཚན། །བཞི་ཆ་གསུམ་བྲལ་གྱི་ཆོས་སྐད་འདི། །གླུ་ཚིགས་བཅད་ལམ་ནས་དྲོངས་ཤིག་ཅེས། །བཀའ་སྩལ་ཏེ་ཟློག་ཏུ་ཅུང་མ་སྤོབས། །ལམ་ཐེག་པའི་རྩེ་རྒྱལ་རྫོགས་པ་ཆེ། །ཟབ་པའི་གནད་ཅིག་མ་ཤེས་ན། །ཟབ་ཁ་ལ་བཏགས་ཀྱང་དོན་རྩ་ཆུང༌། །བསྟོད་མི་ཤེས་སྨད་རའི་གཞི་མར་འགྲོ། །སྤྱིར་རྡོ་རྗེ་ཐེག་པའི་ཟབ་ཁྱད་དང༌། །དགོས་བླ་མེད་ཐེག་པའི་དགོངས་དོན་ལ། །གོ་བ་རགས་པ་ཙམ་མ་བྱུང་ན། །རྡོ་རྗེ་སྐེད་བཟུང་ཞིག་དཀའ་བར་སྣང༌། །ད་མང་རབ་དེ་ཚོ་ཕར་བཞག་ནས། །མི་ཉན་ཤེས་ཀྱི་རྣ་བ་བཟང་པོ་ལ། །མགོ་མེད་འཇུག་མེད་ཀྱི་རྣ་རྒྱན་ཞིག །འདོགས་པ་དུས་སུ་བབས་པ་ལགས། །སེམས་རིག་པ་གཉིས་ཀྱི་ཐ་སྙད་འདི། །སྒོམ་ཆེན་གྱི་ཞལ་ན་རླུང་ལྟར་གྲགས། །གྲོགས་གྲགས་པ་ཆེ་སར་ཡོད་ན་ཀོ །དེ་ཞིབ་
མོར་བཤད་དུ་ཅི་ཞིག་དགོས། །དེ་ཐུགས་ལ་བཅིངས་ནས་སྐབས་དོན་འདིར། །བཞི་ཆ་དེ་རིག་པ་ཀ་དག་ལ། །གསུམ་སེམས་ལ་བྱས་པའི་གོལ་ས་འདི། །གཞི་མེད་རྩ་བྲལ་དུ་ཆོད་ལ་ཤོག །སེམས་ཀུན་རྟོག་བརྒྱད་ཅུའི་དབྱེ་བ་དེ། །གསུམ་དུ་བསྡུས་པ་མི་ཤེས་ན། །སེམས་ཅི་ཟེར་འདི་ཟེར་ཐབས་རྡུགས་ནས། །གནས་འགྱུའི་བརྡ་ཆད་ལ་སྐྱབས་སུ་མཆིས། །ལར་འགྱུ་བ་སེམས་སུ་བཏགས་པ་ཙམ། །འགལ་འདུའི་སྣ་འདྲེན་མ་ལགས་མོད། །སྤྱི་རྒྱ་དེ་རླབས་ཀྱིས་མ་ཆོད་ན། ཁོལ་ཚེས་བང་ཐག་མི་ཆོད་ལགས། །དོན་དེ་སླད་ཀུན་རྟོག་སྤྲོས་པའི་ཁམས། །ངོ་བོ་བརྒྱད་ཅུ་རུ་ཕྱེ་མོད་ཀྱི། །ཡུལ་འདུས་བྱས་དངོས་པོའི་སྣང་བ་ཀུན། །དུས་གསུམ་དུ་བསྡུ་བ་འདི་ཡི་ལུགས། །དུས་ལྡན་མིན་འདུ་བྱེད་ཡིན་མོད་ཀྱི། །དུས་གསུམ་གྱིས་བསྡུས་པའི་ཤེས་བྱ་ལ། །ཕུང་པོ་ལྔས་བསྡུས་ཀྱི་ཆོས་ཀུན་འདུ། །འདུས་མ་བྱས་ཆོས་ཀྱང་ཞར་ལ་མཚོན། །དེ་ཡུལ་ལས་ཡུལ་ཅན་ཕྱེ་བ་ཡིས། །རྟོག་པ་རྣམ་གསུམ་དུ་གྲགས་པ་དེ། །ཤུགས་འབྱུང་གི་དྲན་པ་གཉུག་མའི་ཁམས། །བཟོ་མེད་དུ་ཁྲོལ་ལེར་ཤིག་ལ་ཞོག །དེར་བཞག་ན་རྟོག་མེད་རིག་པའི་གཤིས། །དཀར་དམར་ནག་གསུམ་གྱིས་མ་བསླད་པའི། །གཤིས་འོད་གསལ་རིག་པ་བུམ་པའི་སྐུ། །ནམ་མཁའི་གཟུགས་ཅན་དེ་འབྱོན་ཞིང་འོང༌། །འདི་རང་བཞིན་རྫོགས་པ་ཆེན་པོ་ཞེས། །
སྒོམ་ཆེན་སྟོང་གི་སྙིང་རྡོ་སྟེ། །རྟོགས་ལྡན་ཁྲི་ཡིས་མ་རྟོགས་པ། །རྟོགས་དཀའི་ཟབ་མོ་གསང་བ་ཡིན། །དེ་བཞི་ཆར་གྲགས་པའི་བརྡ་ཆད་འདི། །དང་པོ་འདས་དུས་ཀྱི་རྗེས་གཅོད་ལ། །གཉིས་པ་ད་ལྟའི་ཆ་འཛིན་ཏེ། །ཆ་གསུམ་པ་འབྱུང་འགྱུར་སྡུན་བསུ་ཡིན། །དེ་དག་དང་བྲལ་བའི་གཉུག་སེམས་ལ། །ཆ་བཞི་པའི་བརྡ་ཆད་མཛད་པ་སྟེ། །ཀློང་ཆེན་གྱི་རིག་པ་ཀ་དག་ལ། །གསུམ་བཞི་ཡི་ཐ་སྙད་ཅིག་ཡོད་དོགས་མེད། །ངོ་འཕྲོད་ན་ཚིག་བརྒྱ་དོན་གཅིག་སྟེ། །འུག་པ་གླད་ལོག་གི་བྱིས་པ་ལ། །གོ་སླ་བར་བཤད་པའི་བརྡ་ཆད་ཀྱང༌། །ཀོ་དམར་གཡོགས་རྒྱབ་ཏུ་འགྲོ་ཡིན་གདའ། །བཞི་ཆ་སྙིང་དབུས་ན་གཟིམས་ཏེ་ཡོད། །གསུམ་ལས་རླུང་རྟ་ལ་བསྐྱོན་ནས་སོང༌། །རླུང་རང་སར་བཞག་ན་དགའ་བ་ལ། །གསུམ་བྲལ་འཐོབ་པའི་ལམ་གནད་ཡིན། །བཞི་ཆ་ལ་གཞོན་ནུ་བུམ་སྐུ་ཟེར། །ཐམས་ཅད་སྟོང་པའང་ཁོང་ལ་ཞུ། །གསུམ་ཡིད་དཔྱོད་རྟོག་པའི་འཆིང་བ་ཟེར། །འཆིང་བ་དང་བྲལ་ན་བཞི་ཆ་ཡིན། །ཕྲ་རགས་ཀྱི་ཀུན་རྟོག་ཡོད་དོ་ཅོག །གསུམ་གྱི་ཕྱོགས་མཐུན་དུ་ཧྲིལ་ཧྲིལ་འདུ། །སྣང་གསུམ་ཁོ་བཞི་ཆ་མ་ལགས་ཀྱང༌། །བཞི་ཆའི་ཕྱོགས་མཐུན་དུ་མཁྱེན་པར་མཛོད། །ལར་བཞི་ཆ་འདི་གསུམ་གྱི་སྦྱང་གཞི་སྟེ། །གསུམ་པོ་ཁོ་སྦྱང་བྱའི་ཆོས་སུ་བཞག །འབྲལ་བ་ལ་ངང་གིས་འབྲལ་བ་དང༌། །སྒོམ་བྱུང་གིས་བྲལ་བ་
གཉིས་ཤིག་ཡོད། །འབྲལ་ལུགས་དང་པོ་མཁྱེན་བཞེད་ན། །མི་འཆི་ཀ་མ་ལ་དྲིས་ཤིག་ཨང༌། །འབྲལ་ལུགས་ཕྱི་མ་ལ་བསླབ་བཞེད་ན། །འོད་གསལ་ངང་སྒོམ་ལ་བགྲོ་གླེང་མཛོད། །བཞི་ཆ་གསུམ་བྲལ་གྱི་གོ་བ་འདིའི། །མཐའ་བཅད་ན་སྲིད་པའི་སྒྲུང་རབས་ཙམ། །ཕྱོགས་བསྡུས་ན་སྨྱོ་གླུ་ཚིག་གསུམ་ཡིན། །ཕ་ཀུན་མཁྱེན་བརྒྱུད་པའི་མཆོད་པར་བཞེས། །ཞེས་ཡོངས་འཛིན་དགེ་རྒན་བློ་གྲོས་ནས་བཀའ་ཕེབས་བསྩལ་བ་ལྟར། སྤྲང་ཕྲུག་མདོ་མེད་འཇིགས་མེད་བསྟན་རྒྱམ་གྱིས་དྲན་ཚད་ས་བཤད་རྡོ་བཤད་དུ་བྲིས་པ་དགེ་ཞིང་བཀྲ་ཤིས།། ༈ །།ཕ་ཀུན་མཁྱེན་བརྒྱུད་པར་སྙིང་ནས་འདུད། །ལམ་རྡོ་རྗེ་ཐེག་པའི་སྙིང་པོའི་བཅུད། །སེམས་གཉུག་མའི་དེ་ཉིད་སྒོམ་འདོད་ན། །གཞི་དམ་ཚིག་སྡོམ་པ་མིག་བཞིན་སྲུངས། །གནད་རིམ་གཉིས་ཟབ་མོས་ཁོག་ཕུབ་སྟེ། །འོད་གསལ་གྱི་རང་བཞིན་ཕྱག་རྒྱ་ཆེ། །ཡིད་ཀུན་རྟོག་རླུང་གི་ཁ་ལོ་ཅན། །དེ་སྦྲིན་ཚོགས་ནམ་མཁར་དེངས་པ་བཞིན། །དབྱིངས་སྟོང་པར་དག་པའི་རིག་མདངས་ཆ། །ཆེས་ཕྲ་ཡང་ཉི་མ་བརྒྱ་ལྟར་གསལ། །གཤིས་བདེ་བས་ཁྱབ་ཀྱང་ཆགས་རྟོག་མེད། །རང་ཉམས་སུ་མྱོང་ཡང་སྨྲ་དཀའ་བའི། །གནད་ངོ་མཚར་ཅན་འདི་ཤེས་བྱོས་ལ། །དེ་མ་བརྗེད་དྲན་པའི་ལྕགས་ཀྱུས་ཟུངས། །ཡུལ་བཟང་ངན་བར་མའི་སྣང་བ་དང༌། །བློ་སྣ་ཚོགས་རྟོག་པའི་ཡོ་ལང་ཀུན། །ནང་འོད་གསལ་རིག་པའི་རྣམ་འཕྲུལ་དུ། །བལྟ་ཤེས་ན་མཉམ་བཞག་རྟོགས་པའི་གྲོགས། །
དོན་གཏིང་མཐའ་བྲལ་བའི་སྟོང་པ་དག་ཁྱབ་གདལ་གྱི་རིག་པ་དབྱེར་མེད་ལས། །རྩལ་འགགས་མེད་ཅིར་ཡང་འཆར་བ་འདིར། །ངེད་རྫོགས་ཆེན་པའི་གསང་གཏམ་མང་པོ་ཡོད། །ལར་རྫོགས་ཆེན་བློ་འདས་རིག་པ་དང༌། །དཔལ་དུས་འཁོར་རྒྱུད་སྡེའི་རིང་ལུགས་ཀྱི། །ལམ་མི་འགྱུར་བདེ་བའི་བསྒྲུབ་གཞི་གཉིས། །མིང་འདོགས་ཚུལ་ཙམ་ལས་སོ་སོར་མེད། །རྩ་དྷུ་ཏིའི་ནམ་མཁར་སྟོང་གཟུགས་ཀྱི། །སྣང་བ་མཐའ་མེད་དུ་འབྱུང་བ་ཡང༌། །སོར་སྡུད་ཀྱི་དམིགས་པ་ཡིད་བྱེད་མཐུས། །གཞི་འོད་གསལ་འདི་ནང་འཆར་བ་ཡིན། །ཚུལ་དེ་ཕྱིར་བདེ་སྟོང་དབྱེར་མེད་དང༌། །གནད་རིག་སྟོང་ཟུང་འཇུག་ལ་སོགས་པ། །མིང་དུ་མས་བསྙད་བྱའི་སེམས་ཉིད་འདི། །སྐྱོང་མཁས་པ་ལམ་གྱི་སྙིང་པོར་ཟུངས། །རང་ཟབ་དོན་རྟོགས་པའི་མི་མིན་ཡང༌། །ཤར་རྒྱལ་མོ་རོང་པས་བསྐུལ་འདེབས་ཚིག །ནན་ཆེས་ནས་ཡིད་ལ་གང་ཤར་བྲིས། །དེའི་དགེ་བས་འགྲོ་ཀུན་གྲོལ་བར་ཤོག །སྤྲང་རྒན་བསྟན་ཉིས་ཡུད་ཙམ་ལ་བྲིས་པ་དག།ཨེ༌༈ །།འོད་གསལ་གྱི་རིག་པ་གཏད་མེད་དུ་བཏང་ནས། །སྣང་གྲགས་ལ་ཀློང་ཆེན་ཡེ་རྒྱ་ཡིས་བཏབ་པས། །བདེ་སྟོང་གི་ཆོ་འཕྲུལ་མཁའ་མཉམ་དུ་གདལ་ཏེ། །གཟུང་འཛིན་གྱི་འཆིང་བ་ཆོས་ཉིད་དུ་དེངས་སོང༌། །ལྷུན་གྲུབ་ཀྱི་འཇའ་སྐུ་སྙིང་དབུས་སུ་མཐོང་ནས། །བྱ་རྩོལ་གྱི་སྤྲོས་པ་ཅོག་བཞག་ཏུ་བཏང་ཡོད། །དམིགས་གཏད་
ཀྱི་མཚན་མ་རང་གྲོལ་དུ་བཤིག་ན། །རླུང་སེམས་ཀུན་དབུ་མ་འོད་གསལ་དུ་འདུས་འགྲོ། །ཨ་ཧོ་ཡ་སྣང་ཤེས་འདི་བདེན་མེད་ཀྱི་རང་བཞིན། །སྙིང་དབུས་ཀྱི་རྩ་འཁོར་ཉེར་བཞི་ཡི་ཡུལ་ཆེན། །བདེ་སྟོང་གི་ཞབས་བྲོ་ལྡིར་ལྡིར་གྱི་ངང་ནས། །སྤྲོས་མེད་ཀྱི་བརྟུལ་ཞུགས་གང་དགའ་རུ་སྐྱོངས་ཤོག །སྟག་ཤམ་དང་རུས་པའི་རྒྱན་ཆ་ཚོ་ཁྲོལ་ཁྲོལ། ཁ་ཊྭཱཾ་དང་ཅང་ཏེའུ་དབྱངས་གདངས་དང་ལྷན་ཅིག །རོ་ལང་གི་གཉའ་བར་བརྟུལ་ཞུགས་ཀྱིས་ཞོན་པའི། །རྐང་བྲོ་དེ་སྙིང་ལ་ཀམ་ཀམ་རང་ཤར་བྱུང༌། །འཇོག་སྒོམ་གྱི་དྲན་པ་ལྷོད་ལྷོད་དང་འབོལ་འབོལ། །གཉུག་མ་ཡི་འོད་གསལ་ཤིག་ཤིག་དང་ཁྲོལ་ཁྲོལ། །ཤན་འབྱེད་ཀྱི་ངང་མཆུ་ངེས་ངེས་ཤིག་མེད་ན། །ཐ་མལ་གྱི་ལྟ་བའི་ཞལ་ངོ་དེ་བསྐུང་དོགས། །ལས་རླུང་གི་དྲ་བ་རྟོག་ཚོགས་ཀྱི་བཞོན་པ། །སྣང་གསུམ་དང་བཅས་པའི་སྒྲིབ་བྱེད་ཀྱི་འཆིང་བ། །རྩོལ་མེད་དུ་གྲོལ་བའི་ནང་གསལ་གྱི་བུམ་སྐུ། །རང་བབས་སུ་བཞག་ན་རྫོགས་ཆེན་གྱི་ལྟ་སྒོམ། །བདེ་ཆེན་གྱི་རིག་པ་འཕོ་མེད་དུ་བཞག་པས། །གསལ་ངར་གྱི་རང་མདངས་འཆར་ནུབ་རང་མེད་དེ། །ཀུན་རྟོག་དང་སྒོ་ལྔའི་འགྱུ་དྲན་གྱི་སྙེམ་ཐག །ད་ལྟར་གྱི་རིག་པ་རྗེན་དེད་དེས་བཅད་ཐལ། །ལྟ་སྒོམ་ལ་མཐོ་བ་འོད་གསལ་གྱི་ཐེག་པ། །བརྟུལ་ཞུགས་ལ་རྣོ་བ་འཁོར་འདས་ཀྱི་རུ་ཤན། །ཟུང་འབྲེལ་དུ་སྦྲེལ་བའི་རྣལ་འབྱོར་གྱི་དབང་ཕྱུག །ད་ལྟ་ནས་གདོད་མའི་ནང་དབྱིངས་སུ་
ཆས་འགྲོ། །ཞིང་སྐྱེས་ཀྱི་་འདུ་བ་དང་ལྷན་ཅིག །བརྟུལ་ཞུགས་ཀྱི་སྤྱོད་པ་སྐྱོང་ཐབས་རང་མེད་ན། །རྡོ་རྗེ་ཡི་ཕུང་པོ་རང་བྱུང་གི་དུར་ཁྲོད། །འདི་ཉིད་དུ་རིག་སྟོང་ཁ་སྦྱོར་ལ་བཞུགས་མཛོད། །གནས་ཆེན་ལ་ཨ་བ་དྷུ་ཏི་ཡི་བང་མཛོད། །གཉན་ཁྲོད་ལ་སྙིང་གའི་རླུང་རིག་གི་ཐིག་ལེ། །ལྷན་སྐྱེས་ཀྱི་འདུ་བ་འབུམ་ཕྲག་གི་རྒྱལ་ཁབ། །དེ་ཉིད་དུ་ཅོག་བཞག་ངལ་བསོ་རུ་བཞུགས་ཤོག །རྡོ་རྗེ་ཡི་ལུས་ལ་ལས་རླུང་གི་དྲ་ཕད། །བྱར་མེད་ཀྱི་ངད་དུ་རང་དྭངས་ཤིག་ནུས་ན། །གངས་ཁྲོད་དང་གཉན་ཁྲོད་ཕྱི་རོལ་ནས་མ་ཚོལ། །ཡེ་ཤེས་མཆོག་བཞི་སྦྱོར་འོད་གསལ་གྱི་ལྷ་ཁང༌། །འཕོ་ཆེན་གྱི་རིག་པ་ཟང་ཐལ་གྱི་འཇའ་ལུས། །འདི་ཉིད་དུ་གྲུབ་པའི་རྟེན་འབྲེལ་རང་ཡོད་དོ།། ༈ །།མཉམ་པ་ཆེན་པོའི་ཆོས་ཉིད་མཐའ་བཞིའི་སྤྲོས་བྲལ། །ཀུན་སྣང་སྒྱུ་མའི་ལང་ཚོར་རྟག་ཏུ་སྣང་བའི། །ངོ་མཚར་བསམ་གྱིས་མི་ཁྱབ་འཇམ་པའི་རྡོ་རྗེའི། །སྣང་སྟོང་གཟུགས་སྐུའི་དཀྱིལ་འཁོར་དེ་རིང་སྟོན་ཤོག །དག་ཆེན་ཡེ་ཤེས་རོལ་མོ་འབུམ་དུ་འབར་ཞིང༌། །རྨད་དུ་བྱུང་འཕྲུལ་གྱི་རོལ་མོས་འཇིག་རྟེན་ཁྱབ་མཛད། །གྲགས་སྙན་རོལ་མོ་སྟོང་ལྡན་འཇམ་པའི་རྡོ་རྗེ། །ཕུལ་བྱུང་ཕྲིན་ལས་རོལ་མོས་སྲིད་འདི་སྐྱོངས་ཤོག །སྒྱུ་འཕྲུལ་དྲྭ་བ་ཆེན་པོ་ཡེ་ཤེས་གཅིག་ཉིད། །མཁའ་ཁྱབ་ཞི་དང་ཁྲོ་བོའི་གར་གྱིས་རྩེན་པའི། །
རྣམ་རོལ་སྣང་བ་འབུམ་ལྡན་འཇམ་པའི་རྡོ་རྗེ། །གཟུངས་དང་སྤོབས་པའི་ཆར་ཆེན་སྙིང་ལ་སྙོལ་ཤོག །ཐོགས་མེད་སྤོབས་པའི་བློ་གྲོས་མཚུངས་པ་མེད་ཅིང༌། །མི་འཇིགས་སེངྒེའི་སྒྲ་དབྱངས་ལྷུག་པར་འཇོ་བའི། །མཐའ་ཡས་གདུལ་བྱ་སྨིན་མཛད་འཇམ་པའི་རྡོ་རྗེ། །ཚུལ་གཉིས་སྣང་བ་དམ་པས་བདག་ཡིད་ཁྱབ་མཛོད། །སྐྱེ་དང་འཆི་བའི་མཚན་མ་ངང་གིས་ཞི་བས། །རྟག་ཆེན་གཞོན་ནུའི་འཇོ་སྒེག་ཅིར་ཡང་ངོམས་པའི། །མཁྱེན་གཉིས་ཡེ་ཤེས་སྐུ་ཅན་འཇམ་པའི་རྡོ་རྗེས། །མཚན་རྫོགས་སྐུ་ཡི་དཀྱིལ་འཁོར་མངོན་དུ་སྟོན་ཤོག །ལམ་ལམ་མཚན་དཔེའི་སྣང་བ་སྟོང་དུ་འཇོ་ཞིང༌། །མཐིང་མདོག་རལ་པའི་ཟུར་ཕུད་ལྡེམ་ལྡེམ་གཡོ་བཞིན། །ཞིང་མང་འོད་བརྒྱས་འགེངས་མཛད་འཇམ་པའི་རྡོ་རྗེས། །དྲན་དང་རྟོགས་པའི་ཆར་ཆེན་ཡིད་ལ་ཕོབ་ཤོག །འོད་བཟང་རལ་གྲིའི་འཁྲུལ་འཁོར་ཀུན་ཏུ་སྐྱོད་ཅིང༌། །འཁྲིལ་ལྡེམ་ཞི་བའི་ཉམས་བཟང་འཛད་པ་མེད་པས། །ལྷ་ཀླུའི་དྲེགས་པ་ཟིལ་གནོན་འཇམ་པའི་རྡོ་རྗེས། །བྱིན་རླབས་མེ་ཏོག་ཆར་ཆེན་རྟག་ཏུ་སྙོལ་ཤོག །གོ་ཆ་ཆེན་པོ་བགོས་པའི་འཁོར་གྱི་དབུས་ན། །མི་ཤིགས་དྭངས་མའི་སྐུ་མཆོག་ལྷམ་མེར་གསལ་ཞིང༌། །སྨོན་ལམ་ཆེན་པོའི་གཟི་བརྗིད་མཚུངས་ཟླ་མེད་པས། །འཕགས་མཆོག་འཇམ་པའི་ལྷ་དེས་བྱིན་རླབས་སྩོལ་ཤོག །ཅེས་པའང་གཞོན་ནུ་འཇིགས་མེད་པས་ཡར་ཀླུང་པདྨ་
བཀོད་དུ་བྱི་བ་ཟླ་བའི་ཚེས་༡༡་ཀྱི་སྔ་དྲོ་བྲིས་པའོ།། ༈ །།མཆོག་ཏུ་མི་འགྱུར་བདེ་བའི་ལང་ཚོ་གསར་པ། །རྗེས་ཆགས་དམར་འོད་སྣང་བ་འབུམ་དང་འགྲོགས་ནས། །དགའ་ཆེན་རོལ་མོའི་སིལ་ཁྲོལ་དིར་དིར་སྒྲོག་བཞིན། །གཟུགས་སྐུའི་སྣང་བ་སྟོན་ཤོག་མཁའ་སྤྱོད་དགའ་མ། །ཞིང་སྔགས་ལྷན་སྐྱེས་དཔལ་མོ་འབུམ་གྱི་གྲལ་ན། །སྣང་སྟོང་གཉུག་མའི་འོད་གསལ་ལྷ་སྐུར་བཞེངས་པའི། །མཁའ་སྤྱོད་རྣལ་འབྱོར་རྗེ་མོ་མཁར་ཆེན་དགའ་མས། །ཡིད་ལ་ཡེ་ཤེས་སྣང་བ་ཆར་དུ་སྙོལ་ཤོག །ལས་རྒྱའི་ལུས་ལ་བརྟེན་ནས་བདེ་ཆེན་སྒྲུབ་པའི། །འབར་འཛག་གཏུམ་མོའི་ནུས་པ་ཡོད་སྙམ་ཟད་ཀྱིས། །གྲོལ་ལམ་གཉུག་མའི་ཡེ་ཤེས་ཟད་སར་འཁྱོལ་བའི། །བྱིན་རླབས་སྣང་བ་སྩོལ་ཤོག་མཁའ་སྤྱོད་དགའ་མ། །ཕྱིན་དྲུག་ཁྱིམ་སོ་འཛིན་པའི་མཐུ་ནུས་རྡུག་ཅིང༌། །བསྡུ་བཞིའི་དགའ་སྟོན་འཇོ་བའི་སྦྱིན་ལག་ཕྲ་ལ། །རྟོགས་པའི་ཉམས་རྩལ་རྫོགས་པ་ད་དུང་མེད་ཀྱི། ཁྱེའུ་ཆུང་རྩེ་གྲོགས་མཛོད་ཅིག་མཁར་ཆེན་དགའ་མ། །འབྲས་བུ་མ་བཅོས་ཅོག་བཞག་འཁྱིལ་བའི་ཀློང་དུ། །དགོངས་པའི་གཏན་སྲིད་ཇི་སྲིད་ཟིན་གྱི་བར་དུ། །མི་ཤིགས་མཚན་དཔེའི་སྣང་བ་འབུམ་དང་ལྷན་ཅིག །སྙིང་ལ་ཟློས་གར་སྒྱུར་ཅིག་མཁའ་སྤྱོད་དབང་མོ། །ཤེས་དང་ཤེས་བྱའི་སྤྲོས་པ་དབྱིངས་སུ་ཞི་བའི། ཁྱབ་གདལ་གཉུག་མའི་དེ་ཉིད་བསམ་བརྗོད་བྲལ་བ། །གཟུང་
འཛིན་མཚན་མའི་དམིགས་གཏད་ཉེར་ཞིའི་ཚུལ་དུ། །མཐོང་བའི་དགའ་སྟོན་སྩོལ་ཅིག་མཁའ་སྤྱོད་དགའ་མ། །དག་ཆེན་ཡེ་ཤེས་རོལ་པའི་འཁྲུལ་འཁོར་ཆེན་པོས། །མ་དག་ལས་རླུང་རྒྱུ་བ་དབུ་མར་བསྒྲལ་ཏེ། །དགོངས་པའི་གསང་མཛོད་ཟབ་མོ་ནང་ནས་རྡོལ་བའི། །འཕྲུལ་གྱི་ལྡེ་མིག་མཛོད་ཅིག་མཁར་ཆེན་རྗེ་མོ། །དྷུ་ཏིའི་རྩ་མདུད་གཞིག་དཀའ་དམ་པོར་བཅིང་བ། །བདེ་སྟོང་སྒྱུ་འཕྲུལ་དྲྭ་བའི་འཕྲུལ་གྱིས་བཤིགས་ནས། །མི་འཛད་ས་བཅུའི་སྤངས་རྟོགས་ཡིད་བཞིན་འཇོ་བའི། །འཕྲུལ་ཆེན་རོལ་མོ་འཁྲོལ་ཤོག་མཁའ་སྤྱོད་གཙོ་མོ། །ཀ་དག་ཁྲེགས་ཆོད་ལྟ་བའི་རྩལ་ཆེན་རྫོགས་ཤིང༌། །ལྷུན་གྲུབ་སྣང་བཞིའི་ལམ་བཟང་མངོན་དུ་བྱས་ཏེ། །ནང་དབྱིངས་གཞོན་ནུ་བུམ་སྐུའི་རྒྱལ་ཐབས་ཆེན་པོར། །མི་རིང་མྱུར་དུ་འཇོག་མཛོད་མཁའ་སྤྱོད་རྗེ་མོ། །སྟོང་སྒོམ་མུན་རྡོའི་གཡང་ས་རིང་དུ་བགྱིད་ཅིང༌། །མི་བཟད་རྟོག་གེའི་འཇིགས་པ་མིང་ཙམ་བྱས་ནས། །ཀློང་ཆེན་བསམ་གྱིས་མི་ཁྱབ་འོད་གསལ་ངང་དུ། །ཚེ་འདིར་བཙན་ས་ཟིན་པར་བྱིན་གྱིས་རློབས་ཤིག། དག་དང་མ་དག་སྣང་བ་མཉམ་པར་ཟླུམ་པའི། །ཀུན་ཁྱབ་མཉམ་པ་ཆེན་པོའི་ཨེ་དབྱིངས་ཀློང་དུ། །མཉམ་དང་མི་མཉམ་འཛིན་ཞེན་རང་སར་གྲོལ་བའི། །དངོས་གྲུབ་སྣང་བ་སྩོལ་ཤོག་མཁའ་འགྲོའི་ཚོགས་རྗེ། །འཕོ་མེད་རང་བྱུང་རིག་པའི་རང་ཞལ་མཐོང་ཞིང༌། །འཕོ་འགྱུར་རྟོག་པའི་དྲྭ་བ་དབྱིངས་སུ་ཐིམ་
ནས། །འཕོ་ཆེན་འཇའ་ལུས་རྡོ་རྗེའི་གོ་འཕང་འགྲུབ་པའི། །བྱིན་རླབས་ཆར་ཆེན་ཕོབ་ཤོག་རྒྱལ་ཡུམ་ཕག་མོ། །ཞེས་པའང་འཇིགས་མེད་སྨྱོན་པས་ཅལ་ཅོལ་དུ་སྨྲས་པའོ།། །།དགེའོ།། ༈ །།སྣང་སྟོང་མི་ཤིགས་ཐིག་ལེ་འོད་གསལ་གྱི་ལྷ་སྐུར། །གནས་ཡུལ་ཉེར་བཞིའི་བཀོད་པ་ལྷུན་གྲུབ་ཏུ་རྫོགས་པའི། །གཞོམ་ཞིག་མཚན་མ་རྣམ་སྤང་ཡེ་ཤེས་ཀྱི་རང་གཟུགས། །དག་ཆེན་དཀྱིལ་འཁོར་རྡོ་རྗེ་ཕུང་པོ་ཡི་གྲོང་ན། །སྣ་ཚོགས་སྒྱུ་མའི་རོལ་མོ་འགགས་མེད་དུ་རྩེན་པའི། །རིག་རྩལ་དཔའ་བོ་་ཚོམ་བུ་ཡི་ཚོགས་ཀུན། །བདེ་ཆེན་གཉུག་མའི་གར་སྟབས་མིག་འཕྲུལ་ལྟར་བསྒྱུར་བཞིན། །གྲུབ་གཉིས་བྱིན་རླབས་སྣང་བ་གྲུ་ཆར་ལྟར་སྙོལ་ཤོག །སྲིད་གསུམ་ཟས་སུ་ཟ་བའི་སྒྲ་གཅན་གྱི་ལྟོ་བར། །དཀར་དམར་ཉི་ཟླའི་དཀྱིལ་འཁོར་རྔམ་ཟས་སུ་རོལ་བས། །སྒྱུ་མའི་ལང་ཚོ་རབ་འབར་འོད་གསལ་གྱི་ཕག་མོས། །མི་འགྱུར་ཡེ་ཤེས་མཆོག་གི་བྱིན་འོད་ཞིག་ཕོབ་ཤོག །བསླུ་མེད་སྒེག་མོའི་རྒྱུ་བ་སྲིན་ཞལ་དུ་བསྟབས་པས། །བསླུ་མེད་ནམ་མཁའི་འཛུམ་ཞལ་སྙིང་དབུས་སུ་ངོམ་པ། །རང་བྱུང་འདུས་མ་བྱས་པ་བདེ་སྟོང་གི་ཕག་མོས། །འཕོ་མེད་ཟག་བྲལ་ཆེན་པོའི་བྱིན་འོད་ཞིག་ཕོབ་ཤོག །དབྱིངས་ཕྱུག་སྙིང་པོའི་སྣ་རྩེའི་རེག་བྱ་དང་འགྲོགས་པའི། །པདྨོ་རྣམ་པར་རྒྱས་འདྲའི་ལང་ཚོ་ཡི་སྲི་ཞུས། །ནོར་བུའི་དགྱེས་པ་སྐོང་བའི་ངོ་མཚར་དང་ལྷན་ཅིག །གཞོན་ཆུང་ལག་པའི་གྲངས་ལྡན་རྩེད་
འཇོ་རུ་ཕོབ་ཤོག །ག་བུར་བདུད་རྩིའི་ཐིགས་པ་ལུགས་འབྱུང་དུ་འབབ་ཅིང༌། །ལུགས་ལྡོག་རོལ་མོ་བཅུ་དྲུག་སིལ་ཁྲོལ་དུ་འཁྲོལ་བཞིན། །ནམ་མཁའི་འཁོར་ལོའི་གྲོང་དུ་རྩེ་དགའ་ལ་རོལ་བའི། །མི་ཟད་དུས་སྟོན་སྟེར་ཅིག་མཁའ་སྤྱོད་ཀྱི་དགའ་མ། །ཁུ་རྡུལ་དྲི་མ་བཀྲུས་པའི་ཉི་གཞོན་གྱི་ད་ལ། །འཆར་ནུབ་བྲི་གང་ཡོངས་སྤང་མཁའ་དཀྱིལ་དུ་རྩེན་པའི། །རྟག་ཆེན་སྣང་བ་དམ་པའི་འཇིག་རྟེན་ཀུན་འགེང་བའི། །ངོ་མཚར་བྱིན་འོད་ཕོབ་ཤོག་ཡེ་ཤེས་ཀྱི་ཕག་མོ། །རོ་སྙམ་ཟིལ་གནོན་དགོངས་པའི་རྣལ་འབྱོར་གྱི་ངང་ནས། །མཉམ་པའི་བརྟུལ་ཞུགས་སྤྱོད་པའི་དཔའ་གདེང་དང་ལྷན་ཅིག །རུས་པའི་འཕྱང་འཕྲུལ་གཡོ་བའི་གར་སྟབས་ལ་དགྱེས་པས། །མཁའ་འགྲོའི་ཚོགས་གྲལ་འགྲིམ་པའི་རྟེན་འབྲེལ་ཞིག་ཞུའོ། །ཞེས་པའང་ལྕགས་སྦྲུལ་ཟླ་བ་དང་པོའི་དམར་ཕྱོགས་ཀྱི་ཚེས་བཅུར་གཞོན་ནུ་འཇིགས་མེད་པས་སོ།། ༈ །།ཕ་བདེ་གཤེགས་ཀུན་དངོས་མཚོ་སྐྱེས་ཀྱི་རྡོ་རྗེ། །ལྷ་ཡེ་ཤེས་སྐུ་ཅན་ཡེ་ཤེས་ཀྱི་མེ་ལོང༌། །དེ་ཟུང་འཇུག་ཁྱབ་བདག་མཁྱེན་བརྩེ་ཡི་དབང་པོ། །མི་ཁོ་བོའི་སྙིང་དབུས་ཐིག་ལེ་རུ་བཞུགས་མཛོད། །གཤིས་ཡེ་གྲོལ་གཉུག་མ་ཀུན་བཟང་གི་རང་ཞལ། །ལམ་མ་བཅོས་ལྷུག་པའི་ཉམས་མྱོང་གི་ངང་ནས། །དོན་མཉམ་རྫོགས་ཆེན་པོ་མངོན་སུམ་དུ་བལྟ་བའི། །ཐབས་ཟབ་མོ་ཤེས་པའི་བློ་ལྡན་དེ་སྐྱིད་དོ། །དབྱིངས་སྐྱེ་འགག་མེད་པ་ཀ་དག་གི་ཀློང་ནས། །མདངས་ནང་གསལ་རིག་པ་ལྷུན་གྲུབ་ཀྱི་གྲོང་
ཁྱེར། །དེ་དབྱེར་མེད་གནས་ལུགས་ཅི་བཞིན་དུ་རྟོགས་པའི། ཁོང་སྐལ་པ་རབ་ཀྱི་རྣལ་འབྱོར་དེ་སྐྱིད་དོ། །མཐའ་སྤྲོས་པའི་གྲ་ཟུར་རི་བོང་གི་རྭ་ཅོ། །བློ་གཉིས་སྣང་ཁྲུལ་པ་ཐག་ཁྲ་ལ་སྦྲུལ་འཛིན། །ཚུལ་དེ་ལྟར་ཤེས་པའི་བློ་གྲོས་དང་ལྡན་བཞིན། །ལམ་སྤྲོས་མེད་རྟོགས་པའི་གདེང་ཅན་དེ་སྐྱིད་དོ། །གཤིས་མཐའ་གྲོལ་ཆེན་པོ་རིག་སྟོང་གི་འོད་གསལ། །ཡུལ་ཡུལ་ཅན་མཚན་མ་རྒྱ་ཡན་དུ་སངས་པའི། །དོན་བསམ་བརྗོད་མེད་པ་ཀློང་ཆེན་གྱི་མཁའ་ལ། །སེམས་རང་སར་གྲོལ་བའི་རྟོགས་ལྡན་དེ་སྐྱིད་དོ། །ཕྱི་སྣང་བ་སྒྱུ་མའི་གྲོང་ཁྱེར་གྱི་ལྟད་མོ། །དེ་སྤང་བླང་མེད་པའི་ཉམས་མྱོང་གིས་བལྟས་ཚེ། །ནང་རིག་པ་གཏད་མེད་ཡོང་གྲོལ་དུ་ཐལ་ཏེ། །བློ་འཁྲུལ་པ་ཞིག་པའི་ཞིག་པོ་དེ་སྐྱིད་དོ། །དོན་ཡུལ་མེད་ཟང་ཐལ་རྗེན་པ་རུ་མཐོང་བའི། །སྒོམ་ཟབ་མོ་ཉིན་མཚན་ཁ་སྦྱོར་གྱི་གདམས་པས། །སེམས་རིག་པ་ལ་ཤན་ཅི་དགའ་རུ་ཕྱེ་བས། །ད་འཁྲུལ་སྙམ་མེད་པའི་སྒོམ་ཆེན་དེ་སྐྱིད་དོ། །དོན་ཐ་མལ་རིག་པ་ལྷོད་གྲོལ་གྱི་སྦུབས་སུ། །ཐབས་ཅོག་བཞག་བཞི་ཡི་མན་ངག་གིས་རོལ་པས། །སྒོམ་དྲན་འཛིན་འཆིང་བ་ཡིད་ཡུལ་ན་མི་འདུག །ལམ་རྩོལ་མེད་མཁྱེན་པའི་བློ་མངའ་དེ་སྐྱིད་དོ། །ཆོས་རྫོགས་པ་ཆེན་པོར་ངེས་ཤེས་ཤིག་སྐྱེས་པས། ཁོང་ཐེག་བརྒྱད་གྲུབ་མཐའི་འཚོ་སྐྱོང་གི་ངལ་བ། །དེ་སྒྲུབ་འདོད་འགྲམ་ཆུ་ལྡང་དོན་ཞིག་མེད་པས། །
སེམས་གུ་ཡངས་སྡོད་པའི་རྣལ་འབྱོར་དེ་སྐྱིད་དོ། །ཡུལ་ཚོགས་དྲུག་རོལ་པ་བདེན་མེད་ཀྱི་བརྫུ་བག །ནང་འཛིན་པའི་ཤེས་པ་རང་རིག་གི་བརྫུ་བག །ཆོས་ཅི་ཤར་ཅི་སྣང་ཡེ་ཤེས་ཀྱི་རོལ་མོ། །དེ་ཁོ་ཐག་ཆོད་པའི་རྟོགས་ལྡན་དེ་སྐྱིད་དོ། །གཞི་རིག་པའི་རང་གདངས་སྣ་ཚོགས་སུ་ཤར་ཚད། །དེ་སྣང་བ་གདོང་འདེད་བརྟུལ་ཞུགས་ཀྱི་ངང་ནས། །ཚུལ་བཟོ་བཅོས་མེད་པར་བྱུང་རྒྱལ་དུ་སྤྱོད་པའི། ཁོང་གཏད་མེད་གདེངས་ལྡན་སྨྱོན་པ་དེ་སྐྱིད་དོ། །ཆོས་མ་དག་སྣང་བ་ཡེ་ཤེས་སུ་ཤར་བའི། །སྲིད་ཁམས་གསུམ་གནས་ཞེས་དོགས་ཡུལ་དུ་མི་ཤེས། །དོན་ས་ལམ་འབྲས་ཆོས་གཞི་རྫོགས་སུ་བཞུགས་པས། །འབྲས་གཞན་ནས་མི་འཚོལ་གྲུབ་ཐོབ་དེ་སྐྱིད་དོ། །ཚུལ་ཐོ་ཅོ་སྤྱོད་པ་ཞིག་པོ་ནི་མ་ལགས། །ཚིག་འུད་གོག་འཐག་པ་སྒོམ་ཆེན་དུ་མི་བསམ། །རྡོ་རྐང་པས་བརྫི་བ་གྲུབ་འབྲས་སུ་མི་འདུག །གཤིས་དག་མཉམ་རྟོགས་པའི་གྲུབ་བརྙེས་དེ་སྐྱིད་དོ། །ལུས་ནམ་མཁར་འཕྱོ་བ་མུ་སྟེགས་ལ་ཡོད་མོད། །མགོའི་རལ་རྫིགས་འཆང་བ་ཨ་མྱེ་ཚོས་ཤེས་འདུག །མིག་ནམ་མཁར་སྒྲིལ་བ་འན་བུས་ཀྱང་ནུས་མོད། །དོན་གཞི་གྲོལ་རྟོགས་པའི་གྲུབ་ཆེན་དེ་སྐྱིད་དོ། །ཨ་ལ་ལ་ཧོ།། ༈ །།ཕ་རིག་འཛིན་པདྨའི་ཞབས་ལ་འདུད། །གཤིས་སྐྱེ་མེད་རྟོགས་པར་བྱིན་གྱིས་རློབས། ཁྱེད་གསོན་དང་སྐལ་བཟང་ཐར་འདོད་རྣམས། །སྙིང་ནས་བྱང་ཆུབ་ཞིག་ཐོབ་འདོད་ན། །སངས་རྒྱས་སྒྲུབ་པའི་ཐབས་མཁས་ཆེ། །
ལམ་ཆེན་པོ་བདུན་ལྡན་གྱི་རྩེ་རྒྱལ་མཆོག །ཤིན་ཏུ་རྣལ་འབྱོར་གྱི་ཐེག་པ་འདིར། །བསྟེན་ནུས་ན་མགོན་པོ་སྟོབས་བཅུ་པ། །ཚེ་གཅིག་ལ་འགུགས་པའི་སྐལ་པ་ཡོད། །བློ་ཀུན་རྟོག་གི་རྫུན་རིས་ཡོ་བོ་ཆེ། །དོན་རང་བཞིན་མེད་པའི་ཆོས་ཉིད་ལ། །དཔྱད་སྒོམ་གྱི་རྣམ་པར་ཤར་བ་དང༌། །གནས་དགའ་འགྱུ་སྡུག་གི་ཤེས་བཞིན་ལ། །བསམ་གཏན་གྱི་སྙིང་རྡོར་རེ་བ་གཉིས། །སྣང་གསུམ་གྱི་དངོས་གཉེན་མ་ལགས་པས། །ལས་རླུང་གི་བརྩིགས་པ་སྒྱེལ་འདོད་ན། །ལམ་ཅོག་བཞག་འཁྱིལ་བའི་མན་ངག་གིས། །ཐ་མལ་གྱི་ཤེས་པ་བྱུང་རྒྱལ་ལ། །རྟོག་མེད་ཀྱི་ངང་ལ་གང་དགར་ཞོག །ཕྱི་ཡུལ་སྣང་གི་སྤྲོས་པ་རྫུན་པོ་ཆེ། །ནང་ཀུན་བྱེད་ཀྱི་རིག་པའི་རྣམ་འཕྲུལ་ཅན། །ཆུ་ནང་གི་ཟླ་བའི་གཟུགས་བརྙན་བཞིན། །སྣང་ཡུལ་གྱི་འཆར་སྒོ་མ་འགགས་ཀྱང༌། །དེར་འཛིན་གྱི་བཟོ་རྒྱ་མི་འཆོས་པར། །སྣང་མཁན་གྱི་རིག་པ་རྐྱང་འདེད་མཛོད། །རླུང་ཀུན་རྟོག་མཚན་མའི་རྒྱུ་བར་བཅས། །ཡུལ་མེད་དུ་སངས་པའི་ཡེ་ཤེས་ལ། །ཀློང་ཆེན་གྱི་རིག་པ་སོ་མ་ཤེས། །ཐ་སྙད་ཀྱི་ཚིག་གིས་བཏགས་ཙམ་ལས། །གཞི་མེད་རྩ་བྲལ་གྱི་ཆོས་ཉིད་དུ། །སེམས་རིག་གི་མཚན་མ་ག་ལ་ཡོད། །ད་ལྟར་གྱི་ཤེས་པ་ཆུ་འབབ་མ། །བཞི་ཆ་གསུམ་བྲལ་གྱི་དགོངས་པ་འདི། །མངོན་ལྐོག་གི་འགྱུ་བའི་རང་ས་སྟེ། །སེམས་འཇོག་ན་གཉུག་མའི་ཡིད་འདིར་ཞོག །ཡུལ་སྣང་ལ་
བཟོ་བཅོས་མི་བྱེད་ཅིང༌། །རྣམ་རྟོག་གི་རྗེས་སྙོགས་མ་ཡིན་ཏེ། །ཡེ་བབས་ཀྱི་ཀུན་གཞིའི་དྭངས་ཆ་འདི། །བཙལ་ཤེས་ན་རྫོགས་ཆེན་དེ་ཀ་རང༌། །ཚིག་དེ་སྐད་སྨྱོ་གཏམ་ཐོལ་བྱུང་མ། །བླུན་ཕྲུག་གི་བྱིས་པ་འཇིགས་མེད་པས། །ཡིད་གང་ཤར་གྱི་རྟོག་པའི་རི་མོ་ལས། །གང་བབ་བསྒྱུར་བཟོ་མེད་པར་སྨྲས། །ཞེས་པའང་འཚོ་བྱེད་གར་དབང་གི་ངོར་བརྗོད་པའོ།། ༈ །།ལམ་བྱང་ཆུབ་ཞི་བའི་ས་མཁན་པ། །སྐྱབས་དྲིན་ཆེན་བླ་མ་ལས་གཞན་མེད། །ཆོས་ཚིག་གསུམ་དོན་ཡང་མི་མཁྱེན་ན། །སྟོན་གཡག་གླང་རྒན་གྱི་དཔེ་འཐེན་ཞུ། །ཆོས་མགོ་ནས་ལེགས་པའི་རྟེན་འབྲེལ་དེ། །བུ་ལས་ཅན་སློབ་མའི་རྒྱུད་ལ་ཡོད། །ཆོས་ཞུས་ལོ་ཐོས་ལོས་ཚོམ་སྲིད་ན། །རྔོན་པ་རྩི་ཚོལ་གྱི་ལད་མོ་ཤོ༌།ལམ་བསླབ་གསུམ་བསྟན་པའི་ཆོས་མཛོད་སྒོ། །མི་ཐར་འདོད་སྐྱེ་བོའི་འཇུ་ཐག་སྟེ། །ཚིག་ཐོས་དོན་རྒྱུད་ལ་མ་སྦྱར་ན། །མགོ་ཆག་ཁ་བརྡལ་གྱི་གོང་མ་ཙམ། །ཚེ་མི་རྟག་སྒོམ་པའི་རྣལ་འབྱོར་པ། །བློ་ཆོས་བརྒྱད་ཞེན་པས་ག་ལ་འཆིང༌། །ཆོས་བློ་སྦྱོང་ཞུས་ཞུས་རྟག་འཛིན་ཅན། །འུག་པའི་རྫུན་དྲུག་གི་སྤུན་ཟླ་ལགས། །ལམ་ཆེན་པོ་བདུན་གྱི་སྲོག་རྩ་དེ། །གནད་ཟབ་མོ་བྱང་ཆུབ་སེམས་སུ་འདུ། །སེམས་དེ་བསྐྱེད་ཟེར་བའི་སྒོམ་ཆེན་ཕལ། །སྨོན་འཇུག་གི་འཛུབ་མོ་བཙུག་ས་མེད། །དོན་བླ་མེད་བྱང་ཆུབ་བསྒྲུབ་འདོད་ན། །ཐབས་ཟབ་མོ་གསང་སྔགས་འདྲ་བ་མེད། །སྟུ་དགའ་རྙེད་ཚོལ་གྱི་སྔགས་
འཆང་ཚོ། །བོང་ཤ་དང་རི་དྭགས་རྔ་མ་བཞིན། །ལམ་རྡོ་རྗེ་ཐེག་པའི་མྱུར་ཁྱད་དེ། །གཞི་སྨིན་བྱེད་དབང་བཞིའི་གནད་ལ་ཐུག །དམ་ཉམས་ཀྱིས་རི་ལུང་བཀང་དྲག་ན། །ཕ་བསད་རྔ་བརྡུང་གི་རྣམ་ཐར་ཡིན། །རྒྱུ་རྡོ་རྗེ་བཞི་ཡི་ནུས་པ་དེ། །སྨིན་འདོད་ན་ནན་ཏན་དབང་ལ་མཛོད། །ཆུ་འཁྱགས་ལ་རེ་ཧམ་ཚ་དྲག་ན། །ཝ་སྙན་རྒན་སྒྲོ་བའི་རྗེས་གཅོད་ཡིན། །ལམ་བསྐྱེད་རིམ་སྒོམ་པའི་རྣལ་འབྱོར་ཅན། །རྫོགས་རིམ་གྱི་རྟོགས་པ་གན་ན་ཡོད། །གནད་དག་རྫོགས་སྨིན་གསུམ་མི་ཤེས་ན། །རི་བོང་གིས་སྟག་ལ་བརྡུང་སྟངས་ཡིན། །དོན་སྟོང་པ་བཞི་ཡི་བདེ་ཆེན་ལ། །སེམས་ཆོས་སྐུར་གྲོལ་བའི་ཟབ་གནད་ཡོད། །རླུང་བུམ་ཅན་དགང་བའི་སྔགས་གཟུགས་ཕལ། །རྦུད་པ་རླུང་རྐྱལ་གྱི་ཆེ་བརྗོད་ཡོད། །གཤིས་ཡེ་གྲོལ་ཅོག་བཞག་འཁྱིལ་བའི་ཀློང༌། །གཟུང་འཛིན་གྱི་སྣང་བ་ཐད་ཀར་ཆོད། །ཚིག་གནད་ལ་འབེབ་པའི་དྲག་སྔགས་དང༌། །འཐབ་ན་ཀུན་རྟོག་གི་གདོང་པ་དམར། །ལར་དམའ་མོ་གཞི་ནས་མ་ཐེག་ན། །མེ་སྲིད་ཀྱི་བྱ་རོག་དཀར་པོ་མིན། །མཐོ་དྲག་ནས་དམའ་སར་ལྷུང་བ་དེ། །མི་ཆོས་དང་དགུ་ཆོས་ཀྱི་ཨ་བོ་ཡིན། །གོས་དུར་སྨྲིག་གྱོན་པའི་དགེ་སྦྱོང་དང༌། །ལྕུག་སྣལ་མ་སེར་པོའི་སྐ་རགས་ཙམ། །ཡོན་ཏན་གྱི་སྙིང་རྡོ་མ་ལགས་པས། །ཆོས་སྙིང་པོར་དྲིལ་ན་རང་སེམས་ཐུལ། །དུས་དེང་སང་གི་བཙུན་པའི་ལྟ་གྲལ་འགའ། །དོན་སྒྲུབ་པ་
གཙོ་བོར་མི་འཛིན་པར། །དཀོར་གྲལ་ཤེས་ཉུལ་བའི་སྟ་གོན་ལ། །སྒོ་གསུམ་ཆིག་དྲིལ་གྱི་བརྩོན་པ་མཛད། །དེ་བསམས་ཤིང་མགོན་པོ་་ཏོག །ཐུགས་སྙིང་རྗེའི་གཞན་དབང་ཁོ་ན་ཡིས། །གསུང་སྡེ་སྣོད་བསྟན་པའི་དམ་ཆོས་མཛོད། །རྗེས་གནང་ལ་མཆི་མས་ཁྲུས་གསོལ་བྱས། །ཤིང་དུང་གི་ཁ་ལ་ཤོག་བུའི་ལྕེ། །དེ་བསྐྱོད་ན་མི་དྲག་ཅི་དྲག་སྟེ། །འདིས་རྒན་རབས་མཁས་པ་མ་མཉེས་ཀྱང༌། །སྤྲང་རང་གིས་སྨྱོ་གླུ་བླང་བར་ཟད། །ཚིག་འདི་ཡང་འཇིགས་མེད་པས་སོ།། ༈ །།ནམ་ཡང་མི་བསླུའི་སྐྱབས་གནས་དཀོན་མཆོག་ཁྱེད་ཤེས་བློ་གཏད་གཏིང་ནས་འབྱོང་གིས། །སྐྱབས་མེད་སེམས་ཅན་དྲིན་ཆེན་མ་གཅིག །དེ་རིང་སྐྱོབས་ཤིག་སྐྱབས་མཛད་རྒྱལ་བ། །འཕྲང་རིང་བར་དོའི་གྲོང་ཁྱེར་ཆེན་པོར། །དྲིན་ཆེན་མ་དེ་གཅིག་པུར་སོང་གི༌།མི་བསླུ་གཏན་གྱི་སྐྱབས་གནས་རྣམ་གསུམ། །དེ་རིང་བདེན་པའི་བྱིན་རླབས་ཡོད་རན། །འཇིགས་རུང་གཤིན་རྗེའི་ཁྲིམས་ར་དོག་མོ། །དེ་རིང་ཨ་མས་འགྲིམ་དགོས་བྱུང་གིས། །དེད་དཔོན་ཕན་མཛད་གང་ན་ཕེབས་སོང༌། །ཕན་པའི་མཛད་བཟང་དེ་རིང་སྐྱོང་རན། །སྔུན་ནས་འཁྲུལ་སྣང་སུན་མས་སླེབས་ཤིང༌། །རྒྱབ་ནས་ལས་རླུང་ཤུགས་ཀྱིས་བདས་ཏེ། །ཤུལ་རིང་ལམ་ནས་ཨ་མ་སོང་གིས། །སངས་རྒྱས་ཕན་བཞེད་དེ་རིང་ཨེ་གཟིགས། །དྲིན་ཆེན་མ་གཅིག་སྙིང་ལས་ལྷག་པ། །གཏིང་རིང་མུན་པའི་ནགས་ཁྲོད་ཉུལ་ཞིང༌། །ཕྱི་
མའི་ལམ་ཆེན་དེ་རིང་བླང་གིས། །མཆོག་གསུམ་ར་མདའ་ད་ནི་ཕེབས་རན། །ཀྱི་ཧུད་འཆི་བདག་སྙིང་རྗེ་མེད་པའི། །ཞགས་ནག་ཁུག་པ་དེ་ཙམ་མྱུར་ཆེས། །དུས་ཀྱི་སྟ་རེ་གདེངས་སྟབས་རྔམ་པས། །དྲིན་ཆེན་མ་ལ་དེ་ཙམ་བཏབ་དྲག །རེག་འཇམ་ལུས་ཀྱི་དྲོད་ལ་བཅར་ཞིང༌། །མངར་བའི་འོ་རྒྱུན་ཁ་ལ་བསྣུན་པའི། །དྲིན་ཆེན་མ་དེ་གཤིན་ཡུལ་སོང་གིས། །བུ་སྡུག་ད་ལྟ་ཅི་ཞིག་བྱེད་ཨང༌། །བྱམས་པའི་གདུང་བ་འཛུམ་མདངས་དགོད་ཅིང༌། །བརྩེ་བའི་ཚིག་སྙན་ཡིད་ལ་འབབས་པའི། །དྲིན་ཆེན་མ་དེ་གཤིན་གྲལ་འཛིན་ཅིང༌། །ཕུང་ཤུལ་ནུས་པ་རླུང་གིས་སྤུར་སོང༌། །ཨ་མའི་བརྩེ་གདུང་རྡོ་རྗེའི་རྒྱ་མདུད། །སྔ་རབས་དྲན་ན་དགའ་བ་སྐྱེ་སྟེ། །ད་ལྟ་དྲན་ན་ད་ཕྲུག་བྱིས་པའི། །མྱ་ངན་སྡུག་གི་སྣོན་མ་ཁོ་ན། །ཀྱི་ཧུད་ཀྱི་ཧུད་སྲས་བཅས་རྒྱལ་བ། །ཉམ་ཐག་རྒན་མོ་པུ་ཎྱེ་ས་ར། །སྡུག་བསྔལ་ཆུ་བོའི་རླབས་ཀྱིས་བཏབ་ཚེ། །ཅི་སླད་ཐུགས་རྗེའི་ཕྱག་རང་མི་སྐྱོང༌། །གཟིགས་ཤིག་སངས་རྒྱས་སྟོབས་བཅུའི་དབང་གྱུར། །དགོངས་ཤིག་འཕགས་མཆོག་སྙིང་རྗེའི་བདག་ཉིད། །དེ་རིང་བྱིས་པ་འཇིགས་མེད་གཞོན་ནུའི། །དྲིན་ཆེན་མ་ལ་དཔུང་གཉེན་མཛོད་ཅིག། ཅེས་སྤྲང་ཕྲུག་འཇིགས་མེད་པས་རེ་ཆེ་ལྷ་ལ་འབོད་པ་ཡིན་པས་ད་ལྟ་དང་ཕྱི་རབས་ཀྱི་གང་ཟག་སྙིང་རྗེའི་བདག་ཉིད་རྣམས་ཀྱིས་ཀྱང་གཟིགས་ནས་ཐུགས་གཏད་བསྔོ་སྨིན་གྱི་སྒོ་ནས་མ་རྒན་མོ་དག་པའི་ཞིང་ཁམས་སུ་འདྲེན་པ་ཞིག་ཅི་ནས་ཀྱང་ཞུ་ཞུ།། ༈ །།
སྨྲ་འདོད་ཀྱི་ཕོ་ནད་ཞེ་ཕུག་ལ་ཐེབས་བྱུང༌། །གཏམ་ངན་གྱི་བཤལ་སྐྱུག་འབྱུང་ངེས་ཞིག་རེད་མོད། ཁྱེད་རང་གི་སྐུ་ཆས་རྩོག་འདོད་ནི་མེད་ཀྱི། །སྐུ་སྤྱོད་ཀྱིན་བཟའ་ཚག་ཚག་ལ་རེམ་མཛོད། །འདིར་སྣང་གི་བྱ་བཞག་ཟད་མཐའ་ནི་མི་སྣང༌། །འགྲུབ་འདོད་འདིས་སྟོན་ཆེན་དབུ་ཡུལ་འདྲ་འཁོར་ཐང༌། །ཆོས་བརྒྱད་ལ་ཐུགས་ཁུར་ཆེ་ཚོད་རང་ལགས་ཏེ། །སྨིག་རྒྱུ་ཡི་ཆུ་རག་འོ་བརྒྱལ་ལས་མཆིས་སམ། །སྐུ་དོན་དང་བསྟན་ཆུས་ནམ་མཁའ་དང་མཉམ་སོང༌། །མཚན་སྙན་གྱི་བླ་མ་སངས་རྒྱས་སུ་བཞག་མོད། །གདམས་ངག་གི་བདུད་རྩི་སྩོལ་དུས་ནི་མེད་ན། །ཐར་ལམ་གྱི་སྟོན་པ་དཀའ་དཀའ་ཞིག་ཡིན་དྲག །བྱིན་རླབས་ལ་རེབས་སྐྱབས་གནས་སུ་མཆོད་མོད། །སྡེ་དཔོན་ནི་མ་རེད་ཁྲལ་འུར་ནི་ཅི་དགོས། །ཚོང་དཔོན་ནི་མ་བྱས་བུ་ལོན་ནི་མི་དགོས། །བླ་ཆེན་ཚོས་དེ་ལུགས་མཛད་ན་ནི་བཟང་དྲག །ཐོབ་ཐང་འདི་མི་ཆེན་ཁེ་དྲག་ཚོས་རེད་མོད། །བླ་མ་ལ་གོ་ས་མཐོ་བས་ཏ་ཅི་བྱེད། །བླ་མ་དེ་བྱང་ཆུབ་ས་མཁན་རང་རེད་མོད། །བླ་ཆེན་ལ་བླ་མའི་རྣམ་ཐར་འདི་དཀའ་དྲག །སྣམ་ཐེར་གྱི་སློག་སྙིང་ཁྲ་ཁྲ་དང་ཤིག་ཤིག །རྟ་གོག་དང་མཛོ་གྱོག་གོག་གོག་དང་ཐར་ཐར། །འདི་འདྲས་ཏ་དགེ་བའི་བཤེས་གཉེན་དུ་ཅིར་འགྱུར། །གཞན་ཕན་གྱི་མཛད་ཕྲིན་དགུང་སྔོན་ལ་ཡལ་སོང༌། །དཀྱིལ་འཁོར་ནི་དར་གོས་ལྷབ་ལྷུབ་ཏུ་བཀྲ་འདུག །དུང་རྒྱག་གི་འུར་སྒྲས་ཡ་ལོག་ནི་ཟིང་ཟིང༌། །གདུང་གྲལ་གྱི་ཆས་གོས་འཇའ་ཚོན་ལས་ཕྱོར་ཏེ། །འུར་
འུར་གྱི་གྲགས་སྐམ་རླུང་འཚུབ་ཀྱིས་སྤུར་ཐལ། །ཉམས་པ་དེ་བདུན་ལྡན་ཡོད་སྐད་ནི་འདུག་མོད། །བླ་ཆེན་ཚོས་བརྟུལ་ཞུགས་འདི་འདྲ་ལ་བལྟས་ན། །ཞིང་བཅུ་ཡང་ལུག་རྒན་བཤས་སྐོབ་ལས་མེད་འདྲ། །མེད་ན་ནི་ངས་ཀྱང་མ་རྒན་རེ་གསོད་ནུས། །ཆགས་མེད་ཀྱི་ཡེ་ཤེས་འོད་གསལ་གྱི་ཀློང་ན། །སྒོམ་མེད་དུ་གཟིམ་པའི་ཞེན་མེད་ཀྱི་གྲུབ་ཐོབ། །འབྱུང་འགྱུར་གྱི་འབུལ་ནོར་དགོངས་ཀློང་དུ་བལྟམས་པས། །སྣང་ཚུལ་འདིས་སྤྲང་པོའི་ཞེ་ཁ་ནི་སྟིག་སྟིག །ནོར་མེད་ཀྱི་སེམས་ཅན་གདུལ་བྱ་རུ་མི་བཞེད། །ཕྱུག་པོ་ཚོ་དག་པའི་ལས་ཅན་ལས་མེད་འདྲ། །ནོར་ལྡན་ལ་སངས་རྒྱས་བྱང་སེམས་སུ་ལུང་སྟོན། །བླ་མ་འདི་ཀུན་ཕན་ཉི་མ་ཞིག་མིན་དྲག །ཐར་འདོད་ནི་མི་འཚལ་བྱང་ཆུབ་ཀྱི་ལམ་འཁྲིད། །སྙིང་རྗེ་ནི་མི་དགོས་ཐེག་ཆེན་གྱི་ལམ་སྟོན། །བདེན་མེད་ནི་མ་རྟོགས་ཕྱག་རྫོགས་ཀྱི་ངོ་སྤྲོད། །འདི་འདྲ་དག་བླ་ཆེན་ཐུགས་དམ་གྱི་རྩ་བ། །བྱུང་རྒྱལ་གྱི་མཛད་སྤྱོད་མི་ནག་ལ་འགྲོ་སྟེ། །ཆོས་མིག་དང་ལྡན་པའི་གང་ཟག་ལ་མི་ལྟོ། །ལེགས་བཤད་ཀྱི་ལྗགས་རྩེ་ཐུང་ཐུང་ལས་མེད་ན། །དབང་རྟུལ་གྱི་མི་ནག་འབའ་ཞིག་རང་བསྡུས་ཤིག །ཨ་ཧོ་ཡ་བླ་མ་དེ་འདྲ་རུ་བཞུགས་ན། །གྲ་སློབ་ཀྱི་མཛད་སྤྱོད་གུ་ཡངས་ལ་ཅི་ཁག །རང་དྲིན་ཞིག་རང་ལ་གཅོད་འདོད་འདྲ་ཡོད་ན། ཁག་མེད་དུ་བཞུགས་རྒྱུའི་དུས་སྐབས་ཀྱང་མ་རེད། ཤེས་རྒྱ་དང་འདུག་ཕེར་རྐུན་ཁྲམ་དང་ཐུན་
མོང༌། །ཀློག་འདོན་འདིས་བཙུན་པའི་ལྷ་གྲལ་ན་བཞག་མོད། །མི་ཆེན་གྱི་གཅེས་ཕྲུག་ཁྱིམ་འཛིན་གྱི་ལས་ཅན། །དེ་འདྲས་ཀྱང་འབྲི་ཀློག་ལེགས་པོ་རེ་ཤེས་སྐད། ཁ་ཟས་ཀྱི་གསོག་བསྐྲུན་བྱི་ལོང་ལ་ཡོད་མོད། །གོས་ཕྲུག་གི་སོ་ནམ་མཐའ་མིས་ཀྱང་ཤེས་འདུག །སྤོང་ཀློག་འདི་བཙུན་པའི་ལས་ཀ་རང་ལགས་ན། །བཙུན་གཟུགས་ཚོའི་བཙུན་ཚུལ་ཐལ་ཕུང་དུ་ཕོས་དྲག །གཟན་ཤམ་འདི་འཕགས་པའི་རྟགས་མཚན་དུ་གྲགས་མོད། །གླང་སྙིང་གི་སྐྱེ་བོས་གྱོན་ན་ནི་ཅི་ཆ། །རྡོར་དྲིལ་འདི་རྒྱལ་བའི་དཀྱིལ་འཁོར་གྱི་མཚོན་བྱེད། །ཚོང་མཁན་གྱི་ཕྱག་ན་ཅི་ཞིག་ལྟར་འགྱུར་ཨང༌། །གཡག་རྒན་གྱི་ཚ་སྣ་འཐེན་སྐོར་ལ་བསམ་ན། །སྦྱིན་བདག་ལ་ཐུགས་བརྩེ་ཅི་འདྲ་ཞིག་ཡོད་ཨང༌། །ཆིབས་རྒན་ལ་ཞོན་ན་གཤེད་མ་དང་འདྲ་བ། ཁྱིམ་ཕུག་ཏུ་བཞུགས་ཚེ་སངས་རྒྱས་རེ་ཡིན་ལོ། །ཚུལ་ཁྲིམས་ཀྱི་བསླབ་པའི་དོན་ལྡོག་ཀྱང་མི་མཁྱེན། །བདག་མེད་ལ་ཐུགས་དཔྱད་སྔོན་སོང་ཡང་མེད་ན། །ལྡན་གྲོལ་གྱི་ཡོན་ཏན་གར་ཡོད་ནི་མ་གོ །དཀོར་ནག་འདི་ཁྱེད་ལ་ཞིམ་ཞིམ་ཞིག་མི་འདྲ། །ཚོགས་གྲལ་ན་གཟན་ཤམ་རྨ་བྱ་ལས་མཛེས་ཏེ། །ཤ་བཟན་གྱི་ཚོང་ཟོང་ཙི་ན་ལ་སྤྲོད་ཚེ། །གྲི་རིང་དང་གོས་བརྫེས་ཤན་པ་བཞིན་ཆས་ནས། །ཅི་མཛད་དང་འདི་མཛད་ཡོད་སྙམ་ཡང་མི་འདུག །དུར་སྨྲིག་དང་ཀློག་འདོན་རང་བྱན་ལ་ཚུད་ནས། །དད་ཟས་ནི་ནས་ཕྱེ་འགམ་འགམ་དུ་མཛད་འདུག་ཁེ་སྐྱེད་དང་རེག་
བདེའི་ཕ་རོལ་ཏུ་སོན་ནས། །སྐྱ་སེར་གྱི་ལས་གོ་གཉིས་ཆོད་འདི་ཨ་ཧོ། །སྐུ་ཚེ་འདིར་ཁྱེད་ཅག་ཕོ་རྒོད་རང་ལགས་ཏེ། །བྲང་གོག་ལ་སེན་རྗེས་འཇོག་དུས་ཤིག་བྱུང་ཚེ། །གཤིན་རྗེ་ཡི་ཁྲིམས་ལ་མི་ཐབས་ནི་མི་འགྲོ། །ཤུལ་རིང་གི་ལམ་ནས་སྐུ་རྐྱང་དུ་ཕེབས་ཡོང༌། །དེང་སང་ནི་སྟེང་ན་ཨ་སྔོན་ལས་མི་སྣང༌། །ས་འོག་ན་སྤོ་དོ་དོ་མདུང་ལས་མི་མཐོང༌། །གཅིག་པུ་རུ་ཕྱི་མའི་ལམ་ཆེན་ཞིག་ལེན་དུས། །མི་མཐོང་གི་དགུ་མཐོང་གཟིགས་མོ་རུ་ངོམས་ཡོང༌། །དཔའ་བརྟུལ་གྱི་སྙིང་སྲན་ཁྱེད་རང་ལ་ཡོད་མོད། །ལྕགས་ཞུན་གྱི་བཏུང་བ་སྐུ་ཁོག་ཏུ་བླུག་ཚེ། །ཞེ་རུས་ཀྱི་བསྲན་ཚུགས་དཀའ་དཀའ་ལྟར་འདུག་གོ །ད་ལྟ་ནས་ཐུགས་བསམ་བཏང་ན་ནི་དགའ་ཡོང༌། །གླུ་ཐུང་འདི་ཞལ་གདམས་ཉམས་དབྱངས་ནི་མིན་མོད། །གླང་རྒན་གྱི་ས་སྐོས་རང་གཉའ་རུ་འབབ་པའི། །དཔེ་སྒྲུང་དང་མཐུན་པའི་སྐྱོན་བརྗོད་ཀྱི་རྨིག་སྐོས། །རང་མཚང་གི་ས་ལོག་རང་ཐོག་ཏུ་འཕང་ངོ༌། །ཞེས་པའང་སྤྲང་སྨྱོན་འཇིགས་མེད་པས་འཆལ་གཏམ་མགོ་རྒྱག་རྔ་རྒྱག་མར་བྲིས་པ་ལགས།། ༈ །།སྒྱུ་ལུས་ཀྱིས་ཁུར་ནས་སོང་སོང་ཡང༌། །ངོ་སོ་མི་རྙེད་ཨ་རེ་སྡུག །མི་ཐེག་གི་ཁུར་བོ་ཁུར་ཁུར་ཡང༌། །གླ་རྔན་མེད་པས་ཨ་ཐང་ཆད། །གར་སོང་གི་གཡོག་ཏུ་འབྲང་འབྲང་ཡང༌། །གཅེས་ཀ་མི་བྱེད་ཐང་རེ་ཆད། །གང་འདོད་ཀྱི་མངག་སར་བརྒྱུགས་བརྒྱུགས་ཀྱང༌། །དྲིན་ལན་མེད་པ་སྡུག་རེ་ཆེ། །ཉིན་མཚན་དུ་ཁོལ་པོར་ཕྱིན་ཕྱིན་
ཡང༌། །བྱམས་བརྩེས་མི་སྐྱོང་ཡི་རེ་མུག །ཅི་ནུས་སུ་བང་གིས་བསྐྱོད་བསྐྱོད་ཀྱང༌། །ལྕགས་ཚན་རྙེད་པ་ལས་བསྐོས་ཆེ། །འགྲོ་འདོད་ཀྱི་གོམ་པའི་སྟོབས་ཟད་ཀྱང༌། །དམོད་པ་འདོར་བ་བསྐོས་ཐང་ལྕི། །སྣ་རྩིད་ཐག་རྩུབ་མོས་འཐེན་འཐེན་ནས། །སྣ་བུག་ད་ལྟ་འདྲལ་ལ་ཁད། །སྐེད་ཡོབ་ལྕག་ས་ལེབ་མོས་བརྡུང་བརྡུང་ནས། །རྩིབ་མ་ད་ལྟ་ཆག་ལ་ཁད། །འཕོང་སྙེད་ཐག་ནར་མོས་བསྡམས་བསྡམས་ནས། །རྔ་ཤིང་ད་ལྟ་འཆད་ལ་ཁད། །རྒྱབ་ཡག་ལྕགས་ཟོར་མོས་བཅད་བཅད་ནས། །གློ་སྙིང་ད་ལྟ་མཐོང་ལ་ཁད། །ལྕེ་སྤང་ལེབ་ཙམ་དུ་འཕྱར་བ་ལ། །བརྗིད་འདོད་ཀྱི་ཆེ་རྟགས་ཅི་ཞིག་སྟེ། །སྡུག་ཨ་ཐང་ཆད་པའི་རང་རྟགས་ཡིན། །སྣ་རླུང་གི་འུར་སྒྲ་དིར་དིར་པོ། །རྔམ་འདོད་ཀྱི་དཔའ་རྟགས་ཅི་ཞིག་སྟེ། །སེམས་སྐྱོ་དུབ་ཆེ་བའི་སྡུག་མཚང་ཡིན། །རྐང་གོམ་འགྲོས་མགྱོགས་པའི་འདུར་རྒྱུག་འདི། །སྒྱུ་རྩལ་གྱི་ངོམ་འདོད་ཅི་ཞིག་སྟེ། །འཕོང་ལྕགས་ཀྱིས་བྲབ་པའི་སྡུག་རྟགས་ལགས། །གཡག་རྒན་ཚོས་དེ་སྐད་གསུང་གྱིན་གདའ། །སྙིང་རྗེའི་བདག་ཉིད་ཚོས་ཐུགས་ལ་ཞོག། ༈ །།ཐང་ཆེན་པོ་སྔོ་ཕྱུག་དར་མ་རེད། །མེ་ཏོག་གིས་གཡོག་ན་དེ་བས་ལྷག། སྟོན་དགུན་གྱི་ཐུགས་བབ་མ་བྱུང་ན། །བ་མོའི་བཀའ་བཀྱོན་ཞིག་ཕོག་ངོ་ཡོད། །སྨན་ལོ་གཞོན་མཛེས་སྡུག་དར་བབ་རེད། །གཞོན་ལྷ་ཕྲུག་གིས་འཁྱུད་ན་དེ་བས་མཛེས། །སྔོན་ལས་ལ་ཐུགས་བབ་མི་འདུག་ན། །འདུ་འབྲལ་གྱི་
ཡོ་ལང་ཞིག་འབྱུང་ཏ་རེ། །གཞོན་ཆུང་གི་གདོང་པ་ལྷ་བས་ལྷག །སྨན་རྐེད་མེད་ཀྱི་མིག་ཟུར་མདའ་བས་རྣོ། །ལྷ་ཕྲུག་ཚོ་མདའ་རྩེས་རྨས་ཏ་རེ། །མདའ་རྐེ་རྒྱན་དུ་བཞེད་ན་ཅི་དགྱེས་མཛོད། །ཆུང་ལྷ་སྨན་གྱི་མཁུར་ཚོས་མཛེས་མོད་དེ། །རྒན་ཁ་སྔོན་ཤ་ཚུག་སྐྱི་རེ་བུང༌། །འདང་སྔ་མཐའ་ཕྱི་ཕུག་ལ་མ་བཏང་ན། །སེམས་འགྱོད་པའི་དུས་ཞིག་ཡོད་ལས་ཆེ། །བན་དར་མའི་འཕྱོར་ཉམས་འཇའ་བས་ལེགས། །སྨན་གཞོན་ནུའི་སྒེགས་ཉམས་ལྷ་མོ་འདྲ། །འཕྱོར་ཉེ་བའི་གྲ་སྡེབ་བཟང་མོད་ཀྱི། །བྱི་ཕྲུག་གི་གྲགས་པ་སྙིང་ལ་གཟན། །མཚན་སྨད་ཀྱི་དུས་སྟོན་སྐྱིད་མོ་དང༌། །ཉིན་ཕྱེད་ཀྱི་གཟའ་འཛིང་ཐལ་སྤུལ་མ། །རེས་འཇོག་གི་བྱ་བ་མཐའ་རིང་པོ། །བྱེ་བྲལ་ལ་གཏོད་པའི་དུས་ཤིག་མཆི། །ནུབ་གཅིག་གི་དགའ་བདེའི་གཡང་སློང་དང༌། །བསྐལ་ཆེན་གྱི་རང་སྡུག་ངུ་འབོད་མ། །དེ་མཉམ་ཚོང་བྱེད་པའི་ཕོ་རྒོད་ཚོ། །ཚོང་ཕམ་པོ་རེད་དམ་རྒྱལ་པོ་རེད། །དེ་ཚོང་ཁེ་ལོན་ཞེས་དགོངས་ན་ནི། །སོས་དལ་དུ་བཞུགས་ལོང་མི་གདའ་བས། །ཚེ་གྲོགས་ལ་གཡབ་མོ་མྱུར་དུ་མཛོད། །ཉིན་མཚན་དུ་ལྷ་སྨན་འཁྱུད་ལ་བཞུགས། །ལྷ་ཞི་ཁྲོ་རབ་འབྱམས་བསྒོམ་ནའང༌། །སྟོང་འདང་ཞིག་རེད་མོད་མཐོང་རྒྱུ་དཀའ། །ད་བསྒོམ་ན་ལྷ་སྨན་བོ་ལི་སྒོམས། །བྱིན་རླབས་ཞིག་དེ་ཡི་གསང་ན་ཡོད། །བདག་སྲས་དང་གཞན་སྲས་བསྒོམ་ཅི་དགོས། །སྲས་ལྷ་ཕྲུག་འདྲ་བ་ཞིག་
བསྐྱེད་ན་ཆོག །ད་བསྐྱེད་ན་རིགས་ཀྱི་ས་བོན་བསྐྱེད། །དངོས་གྲུབ་ཞིག་དེ་ཡི་གསང་ན་ཡོད།། ༈ །།དགའ་སྟོན་ཚོགས་ཀྱི་གླུ་བཛྲ་གཱི་རྟིའི་རྒྱུད་མངས་ཞེས་བྱ་བ་ཐོག་མཐའ་བར་དུ་དགེ་བར་གྱུར་ཅིག །ན་མོ་གུ་རུ། །གདོད་ནས་རྣམ་དག་སྟོང་ཆེན་ཀུན་ཁྱབ་ཀྱི་ཀློང་ནས། །བདེ་ཆེན་མཆོག་ཏུ་མི་འགྱུར་འོད་གསལ་གྱི་རིག་པ། །མཉམ་རྫོགས་ལོངས་སྤྱོད་ཆེན་པོའི་སྒྱུ་འཕྲུལ་ལ་ཆགས་པའི། །རང་སྣང་དོན་གྱི་བླ་མ་མཚན་དཔེ་རུ་བཞེངས་ཤོག །མཐའ་བྲལ་ཆོས་དབྱིངས་དག་པའི་ཡེ་ཤེས་ཀྱི་ཀློང་ནས། །རིག་བདག་དྲུག་པའི་རྒྱལ་ཚབ་རྗེ་བཙུན་གྱི་བླ་མ། །རིགས་རྣམས་ཀུན་གྱི་ཁྱབ་བདག་རྡོ་རྗེ་ཡི་གཟི་བརྗིད། །སྤྱི་གཙུག་ཛ་ལནྡྷ་རར་འབྲལ་མེད་དུ་བཞུགས་མཛོད། །ཟུང་འཇུག་ངེས་པ་ལྔ་ལྡན་འོག་མིན་གྱི་གནས་མཆོག །སྤྲུལ་པའི་གླིང་ན་ཉེར་བཞིའི་ཞིང་ཁམས་སུ་བཀོད་པའི། །མཁའ་སྤྱོད་གནས་ཀྱི་མཁའ་འགྲོ་འབུམ་ཕྲག་ཏུ་གཡོ་བའི། །དགའ་སྟོན་ལྷན་ཅིག་སྐྱེས་པའི་ཡེ་ཤེས་དེ་ཨ་ཧོ། །མཁའ་ཁྱབ་རྡོ་རྗེ་བཙུན་མོའི་མཁའ་དབྱིངས་ཀྱི་ཀློང་དུ། །འཕོ་མེད་སེམས་ཀྱི་རྡོ་རྗེའི་དཀྱིལ་འཁོར་གྱི་འཁོར་ལོ། །ཟབ་གསལ་གྷ་ན་ཙཀྲའི་དགའ་སྟོན་གྱིས་མཆོད་པའི། །ཐབས་ཆེན་མྱུར་ལམ་ཟབ་མོའི་གླུ་དབྱངས་ཞིག་ལེན་འདོད། །སྐྱེད་ཚལ་འབྲས་བུས་བརྒྱན་པའི་བཟའ་ཤིང་གི་ལྡུམ་རར། །གཏུམ་པོའི་ངང་ཚུལ་རྫོགས་པའི་ཧ་ལ་ཡི་ལྗོན་པ། །ལྕུགས་ཕྲན་ཤིན་ཏུ་རྒྱས་པའི་འགྱུར་བ་འདི་མཐོང་ནས། །འཇིགས་ཤིང་འདོར་
བར་ཕྱོགས་པའི་བློ་དམན་དེས་ཅི་བྱ། །བརྟུལ་ཞུགས་གྲུབ་པར་གྲགས་པའི་གསོ་བྱེད་ཀྱི་རིག་སྨྲས། །དུག་ཆེན་འདུལ་སྦྱོང་ངལ་བས་སྨན་མར་དུ་བསྒྱུར་ཞིང༌། །མཁས་པའི་ངང་ཚུལ་ཅན་གྱི་མནྟྲ་ཡི་ཐབས་ལས། །འཆི་བྱེད་འཚོ་བར་བསྒྱུར་བའི་ངལ་དུབ་དེས་ཅི་བྱ། །བྱུང་རྒྱལ་ཉམས་ཀྱིས་སྒེགས་པའི་རྨ་བྱ་ཡི་གཞོན་ཆུང༌། །དགག་སྒྲུབ་སྤང་བླང་བྲལ་བ་གཏད་མེད་ཀྱི་སྤྱོད་པས། །འཆིང་བྱེད་ལས་ཀྱི་གྲོལ་འབྲས་མངོན་གྱུར་དུ་བགྱིད་པ། །ལམ་ཟབ་ཨ་ཏི་ཡོ་གའི་ཁྱད་ཆོས་སུ་གཟིགས་སམ། །རིམ་རྩོལ་སྤྲོས་པས་མ་ཡིན་བློ་བྲལ་གྱི་རིག་པ། །ཀློང་ཆེན་མཁའ་ལྟར་དག་པའི་ཡེ་ཤེས་ཀྱི་ཀློང་ན། །འཁྲུལ་གྲོལ་གཉིས་སུ་མེད་དེ་ཆོས་ཟད་ཀྱི་དགོངས་པ། །དགག་སྒྲུབ་གཉིས་སུ་མེད་དེ་ཡེ་གྲོལ་གྱི་གཤིས་ལུགས། །རྒྱ་ཆད་ཕྱོགས་ལྷུང་མེད་དེ་ཁྱབ་གདལ་གྱི་དགོངས་ཀློང༌། །གྲུབ་མཐའི་ཞེ་འདོད་མེད་དེ་རྫོགས་ཆེན་གྱི་ལྟ་བ། །བརྩོན་དང་མི་བརྩོན་མེད་དེ་བསྒོམ་མེད་ཀྱི་རྣལ་འབྱོར། །ཨ་འཐས་འཛིན་ཞེན་མེད་དེ་ལྷུན་འབྱམས་ཀྱི་ཡོ་ལང༌། །གང་ཤར་རང་སར་གྲོལ་བའི་ཟང་ཐལ་གྱི་རང་རིག །གཏད་མེད་རང་ཡན་ཆེན་པོ་གཉུག་མ་ཡི་དེ་ཉིད། །ལྟ་སྒོམ་ཐ་སྙད་མེད་དེ་བརྗོད་བྲལ་གྱི་ཡེ་ཤེས། །མིང་ཚིག་ཡི་གེས་མི་མཚོན་བློ་འདས་ཀྱི་འོད་གསལ། །ཕྱི་སྣང་ཡུལ་མེད་ཟང་ཐལ་ཅོག་བཞག་གི་སྒོམ་པ། །བཅོས་བསླད་རྟོག་པས་མ་བཟོས་ཐ་མལ་གྱི་ཤེས་པ། །སྣང་སྟོང་
ཐ་དད་མེད་པའི་གདོད་མ་ཡི་ཆོས་སྐུ། །ཡིད་དཔྱོད་ཐེག་བརྒྱད་ལས་འདས་ཐེག་རྩེ་ཡི་གྲུབ་མཐའ། །སྣང་སྲིད་དག་པ་རབ་འབྱམས་གཞི་གནས་ཀྱི་དཀྱིལ་འཁོར། །སྣོད་བཅུད་དག་མཉམ་རྟོགས་པའི་གདེངས་ཚད་ཞིག་མེད་ན། །མིག་འགྱུར་ནམ་མཁར་བསྒྲིལ་བའི་ལྟ་སྟངས་ཀྱི་ངང་ནས། །འུར་འུར་མཆོད་དབྱངས་གྱེར་བའི་འཕྱོར་སྒེག་དེས་ཅི་བྱ། །རྟོགས་པས་བདག་རྒྱུད་གྲོལ་བའི་ཉམས་མྱོང་གི་ངང་ནས། །རྒྱུད་དྲུག་སྙིང་རྗེས་འདུལ་བའི་ཐབས་མཁས་ཤིག་མེད་ན། །ཨ་འཐས་ཞེ་སྡང་རྔམ་པའི་འཁྲུལ་རྟོག་གི་ངང་ནས། །སྡང་མིག་གློག་ལྟར་གཡོ་ཡང་དགྲ་བགེགས་ནི་མི་ཐུལ། །གདན་གསུམ་ལྷ་རུ་ཤེས་པའི་དག་སྣང་གི་ངང་ནས། །ཅིར་སྣང་བདེ་ཆེན་དགའ་བཞིའི་རོལ་མོ་རུ་རྟོགས་པའི། །གསང་ཆེན་ཐབས་ཀྱི་དགོངས་སྤྱོད་དེ་འདྲ་ཞིག་མེད་ན། །ཟ་འདོད་བཟའ་བཏུང་དགྲམ་པའི་ཚོགས་འཁོར་དེས་ཅི་བྱ། །གང་སྣང་ལྷ་རུ་ཤེས་པ་བསྐྱེད་རིམ་གྱི་ཟབ་གནད། །སྒྲ་གྲགས་སྔགས་སུ་གོམས་པ་བཟླས་བརྗོད་ཀྱི་ཡང་རྩེ། །གདོད་མའི་རང་ཞལ་མཇལ་བ་ཉམས་མྱོང་གི་སྙིང་པོ། །རྩོལ་མེད་རང་བཞག་རྟོགས་ན་དེ་ཀ་རང་ལགས་སོ། །འཕོ་མེད་སེམས་ཀྱི་རྡོ་རྗེའི་དམ་ཚིག་གིས་བསྡུས་པའི། །འདིར་འདུས་ལས་སྨོན་མཐུན་པའི་རྡོ་རྗེ་ཡི་མཆེད་ལྕམ། །ཐབས་ཆེན་མྱུར་ལམ་ཟབ་མོའི་དགོངས་སྤྱོད་ཀྱི་ངང་ནས། །ཟག་མེད་ཆོས་སྐུར་གྲོལ་བའི་རྟེན་འབྲེལ་ཞིག་ཞུའོ། །ཞེས་དགའ་
སྟོན་ཚོགས་ཀྱི་འཁོར་ལོ་དང་འབྲེལ་བའི་གླུ་བཛྲ་གཱི་རྟིའི་རྒྱུད་མངས་ཞེས་བྱ་བ་འདིའང་ལུང་རྟོགས་ཡོན་ཏན་གྱིས་ཕྱུག་པའི་དད་ལྡན་ལས་ཅན་གྱི་སློབ་བུའི་དམ་པར་གྱུར་པ་འཇིགས་མེད་དཔའ་བོ་རྡོ་རྗེའི་གསུང་ལྡོག་ཏུ་མ་ནུས་པར་ཀུན་མཁྱེན་བརྒྱུད་པའི་བཀའ་འབངས་ཀྱི་ཐ་ཤལ་པ། །ཀུན་བཟང་འཇིགས་མེད་བསྟན་པའི་ཉི་མ་ཕྲིན་ལས་ཀུན་ཁྱབ་དཔལ་བཟང་པོས་གང་ཤར་ལྷུག་པར་སྤེལ་བ་ཛ་ཡནྟུ།། ༈ །།གསང་སྔགས་གཱ་ན་ཙཀྲའི་གླུ་དབྱངས་མཚོ་སྐྱེས་རིག་འཛིན་དགྱེས་པའི་དགའ་སྟོན་ཞེས་བྱ་བ་བཞུགས། །ཨེ་དབྱིངས་ཉེར་བཞིའི་ཞིང་མཆོག་དབུ་མ་ཡི་གྲོང་དུ། །ཝཾ་ཡིག་མཆོག་ཏུ་མི་འགྱུར་ལྔ་ལྡན་གྱི་ཐིག་ལེ། །བདེ་ཆེན་ནམ་མཁའི་གཟུགས་ཀྱི་གར་སྟབས་སུ་བཞུགས་དང༌། །ལོངས་སྤྱོད་འཁོར་ལོའི་དཀོར་མཛོད་རྒྱང་གླུ་རུ་ཆས་འགྲོ། །ཀུན་རྟོག་སྤྲོས་པའི་མཚན་མ་ཆོས་དབྱིངས་སུ་ཞི་བའི། །ཀ་དག་བཟོད་ནས་རྣམ་གྲོལ་འོད་གསལ་གྱི་རིག་པ། །ལྷུན་གྲུབ་རྡོ་རྗེའི་ལུས་ཀྱི་བྱེད་བཅིང་ལ་བརྟེན་ནས། །མཆོག་གི་ཡེ་ཤེས་གྲུབ་པ་གསང་སྔགས་ཀྱི་ཁྱད་ཆོས། །དཔྱིད་དང་ཐིག་ལེ་མཉམ་སྦྱོར་ཐབས་ཆེན་གྱི་ལམ་གནད། །ཕུང་ཁམས་བསམ་གྱིས་མི་ཁྱབ་འོད་གསལ་དུ་བསྡུས་པའི། །བདེ་སྟོང་ནམ་མཁའ་ལྟ་བུའི་རྣལ་འབྱོར་ཞིག་མེད་ན། །དབྱིང་ཕྱུག་སྣ་རྩེའི་སྟོན་མོ་བྱུང་རྒྱལ་དུ་མ་མཛད། །ཡུལ་ལྔ་རྣམ་ཀུན་མཆོག་ལྡན་འོད་གསལ་གྱི་དབྱིངས་སུ། །རོ་གཅིག་ཕྱག་རྒྱ་སྒྱུ་མ་དག་མཉམ་གྱི་རྟོགས་པས། །གིང་ཆེན་མི་མགོའི་ཅོད་པན་ཐོར་ཚུགས་སུ་བཅིངས་ནས། །གཏད་མེད་བརྟུལ་ཞུགས་རོལ་པའི་ཟློས་གར་ཞིག་རྩེན་
འདོད། །གང་སྣང་དག་པ་རབ་འབྱམས་ཡེ་ཤེས་ཀྱི་རོལ་མོ། །འོད་གསལ་ནམ་མཁའི་རྡོ་རྗེར་ཡེ་གྲོལ་དུ་དེངས་པའི། །དོན་དམ་རིག་སྟོང་གཉིས་མེད་ཀློང་ཆེན་གྱི་དགོངས་པས། ཁམས་གསུམ་ཨ་ཝ་དྷུ་ཏིའི་འཁོར་ལོ་རུ་སྒྲོལ་གཏོང༌། །གཞི་གྲོལ་ཐོག་མའི་སྟོན་པ་ལྷན་སྐྱེས་ཀྱི་འོད་གསལ། །གསང་སྤྱོད་ཨ་དཱི་ཀ་དཱིའི་དགའ་སྟོན་དང་བསྦྲགས་ནས། །རྣམ་གྲོལ་འཆི་བ་མེད་པའི་བཅུད་ལེན་ཞིག་ཡོད་དེ། །མཚོ་སྐྱེས་གྲུབ་པའི་རྡོ་རྗེའི་ཐུགས་དབུས་སུ་གབ་ཡོད། །སྟག་ཤམ་རུས་པའི་རྒྱན་ཆ་སིལ་ཁྲོལ་དུ་གཡོ་ཞིང༌། །ཅང་ཏེའུ་དྲིལ་བུ་གཡེར་ཁའི་སྒྲ་དབྱངས་དང་ལྷན་ཅིག །གཏུམ་པོ་རོ་ལང་ཞོན་ནས་དུར་ཁྲོད་དུ་ཉུལ་བཞིན། །མ་ཚོགས་མཁའ་འགྲོའི་གྲལ་ན་ཚོགས་འཁོར་ལ་ཕེབས་འགྲོ། །མཉམ་བཞག་གཉུག་མའི་ཆོས་སྐུ་འོད་གསལ་དུ་འཇུག་ཅིང༌། །རྗེས་ཐོབ་རླུང་གི་གཡོ་བ་གཟུགས་སྐུ་རུ་ལྡང་བའི། །དགོངས་རྒྱུད་རྡོ་རྗེའི་རྣལ་འབྱོར་དེ་འདྲ་ཞིག་འདོད་དེ། །སྐྱེ་འཆི་རྨི་ལམ་ལྟ་བུའི་གཡོ་འཁྲུལ་འདིས་བསླུས་དོགས། །ངེས་དོན་འཕོ་འགྱུར་མེད་པ་བུམ་སྐུ་ཡི་ཡིན་ལུགས། །བྱ་རྩོལ་སྤྲོས་ཀུན་ཉེར་ཞི་སྙིང་ཐིག་གི་ཐེག་པས། །ཚེ་འདིར་ཡེ་ཤེས་བླ་མའི་ཀུན་བཟང་གི་དགོངས་ཀློང༌། །ནང་དབྱིངས་བཙན་ས་ཟིན་པའི་དངོས་གྲུབ་ཞིག་ཞུའོ། །ཞེས་ཤྲི་གཱ་ན་ཙཀྲའི་རྡོ་རྗེའི་གླུ་མཚོ་སྐྱེས་རིག་འཛིན་དགྱེས་པའི་དབྱངས་སྙན་ཞེས་བྱ་བ་འདི་ཡང་ཀུན་མཁྱེན་བླ་མ་ཡབ་སྲས་ཀྱི་བཀའ་འབངས་གྲལ་མཐར་སྡོད་པའི་རྡོ་རོང་གི་སྤྲང་པོ་ལམ་ཟན་པ་འཇིགས་མེད་བསྟན་པའི་
རྒྱལ་མཚན་གྱིས་རྒྱལ་ཀུན་སོར་རྟོག་ཡེ་ཤེས་ཞལ་སྐྱིན་དུ་བརྫུ་བའི་ཁྱབ་བདག་བློ་ལྡན་མཆོག་སྲེད་སིན་དྷུའི་ཆུ་གཏེར་གྱི་པདྨོ་ལས་མཚན་དཔེའི་ལང་ཚོ་གསར་དུ་འཁྲུངས་ལོའི་ཉི་སྒྲོལ་ཞེས་པ་ཤིང་ཕོ་སྤྲེའུའི་ལོའི་རྒྱལ་ཟླའི་ཚེས་བཅུའི་རྒྱལ་དབང་ཨོ་ཌི་ཡ་ནའི་རྒྱལ་ཐབས་སུ་དབང་བསྒྱུར་བའི་དུས་རྡོ་རྗེའི་ལམ་གྱི་གནད་དུ་ངེས་པར་བསྡུས་པ་གཏམ་དུ་བརྗོད་པ་དགེ་བར་གྱུར་ཅིག་གུ། །དགེའོ། །དགེའོ། །དགེའོ།། ༈ །།སྙན་འགྱུར་མགྲིན་པའི་རྔ་གསང་ལྷོད་ལྷོད་འཇོ་ཞིང༌། །ལྗང་སྔོན་འདབ་མའི་འགྱུར་བ་འབུམ་དུ་སྐྱོད་བཞིན། །ལྟོ་ལྡིར་བུམ་པའི་བསྟི་གནས་འཚོལ་ཞིང་རྒྱུ་བའི། །ཐི་བྱ་དེ་རིང་སླེབས་སོ་གནས་ཁང་བདག་པོ། །བསིལ་ལྗོངས་བྷོ་ཊའི་གྲོང་ན་གེ་སར་སྣང་ཞེས། །ལྷོ་མོན་སྨྱུག་མའི་ཚལ་ནས་ཉེ་བར་འོངས་པའི། །སྤུ་སྡུག་ན་གཞོན་གྲོགས་པོ་ཐི་བྱའི་དཔལ་མོས། །གཤོག་འགྱུར་གར་གྱི་རོལ་པས་དེ་རིང་སླེབས་བྱུང༌། །འཁྲིལ་ལྡེམ་ལུས་ཀྱི་འགྱུར་བ་སྟོང་དུ་གཡོ་ཞིང༌། །ཟླུམ་མཛེས་ལང་ཚོ་མ་རྙིང་སྒྲོ་གཤོག་སྐོར་བཞིན། །ཐོགས་མེད་ནམ་མཁའི་ལམ་ནས་དལ་གྱིས་རྒྱུ་བའི། །བྱ་འདི་ཐི་བྱ་ལགས་སོ་གནས་ཁང་བདག་པོ། །ས་མཆོག་བྱེ་མའི་ཁང་ཆུང་སྔོན་ནས་ཡོད་དེ། །མི་སྲུན་བྱེའུ་ཆུང་རྒྱ་ངོས་ཕྲོགས་སམ་མ་ཕྲོགས། །བརྟགས་པ་རྣམ་པ་དུ་མས་ལེགས་པར་བརྟགས་ཏེ། །གཤོག་འགྲོས་དལ་གྱིས་སྐྱོད་འདི་ཐི་བྱ་ལགས་སོ། །རྩྭ་ལྗང་མྱུ་གུའི་ཚལ་ནས་འཚོ་བ་འཚོལ་ཞིང༌། །ཡིད་འོང་ངག་གི་རྫ་རྔ་ལྷུག་པར་འཁྲོལ་བཞིན། །སྔོ་བསང་ནམ་མཁའི་ངོགས་སུ་ལྡིང་ཞིང་འགྲོ་
བའི། །ཐི་བྱ་ད་ལྟ་བྱུང་ངོ་གནས་ཁང་བདག་པོ། །ཞེས་པའང་གཞོན་ནུ་འཇིགས་མེད་པས་ཉམས་མཚར་དུ་བྲིས་པ་ཙམ་ཁོ་ནའོ།། ༈ །།གླུ་ཚིག་བྱིས་པའི་རྩེ་འཇོ་ཞེས་བྱ་བ། །རྡོ་ཞུན་དང་མའི་དུམ་བུ། །མཐིང་མདོག་ཟླ་བའི་དབྱིབས་ཅན། །འཕེན་སྡུད་ཆོ་ལོའི་བརྫུ་བག །སྟོན་མཁས་གཞོན་ནུའི་འདུ་ལོང༌། །ལྡེམ་ལྡེམ་འཛུབ་མོའི་ཞགས་པ། །མཁའ་ཁམས་བླ་ན་བསྐྱོད་དེ། །བར་སྣང་སྣང་བའི་གྲོང་ཁྱེར། །རྡེའུ་ཆུང་འཕྲུལ་གྱིས་བརྡལ་སོང༌། །སྐྱེད་ཚལ་གཡུ་ལྗོངས་ལོགས་ནས། །སྒྱུ་རྩལ་ཤེ་མོང་དར་བས། །ཆུ་སྐྱེས་དཔུང་པ་བཅོམ་སྟེ། །རྣ་ལུང་རྒྱལ་རྔ་བརྡུང་ངོ། །གེ་སར་ནུ་མའི་འོ་སྦྲང༌། །བུང་མ་གཞོན་པའི་བཅུད་ལེན། །འཛིན་བཟོད་འདབ་སྟོང་དཔལ་མོ། །ལག་སོར་ཕོ་ཉས་ཕྲོག་སོང༌། །རེག་འཇམ་རྩ་སྔོན་ཕོན་པོ། །གནོན་ལ་རིང་བའི་སྟབས་ཀྱིས། །མཐེ་བོང་ཕན་ཚུན་འགྲན་བཞིན། །ནེ་ཐང་དཀྱུས་སར་བཏང་བྱུང༌། །གྲ་ལྡེམ་བྱིན་པའི་འཁྲི་ཤིང༌། །ལོང་གཉིས་འབྲས་བུའི་ཁུར་འཆང༌། །དྲི་བཞོན་བསྐྱོད་པ་མེད་ཀྱང༌། །རླུང་རྡུལ་གཞན་གྱིས་བསྐུལ་སོང༌། །གོམ་སྟབས་ཐ་གུ་ཆུང་ཡང༌། །མི་ལྷོད་རྩལ་གྱི་དཔུང་པས། ཁྱོན་ཡངས་ཕྱོགས་ཀྱི་ཐ་ཁྱོན། །འགྲོ་ལྡོག་སྲང་ལམ་བྱས་སོ། །བཞད་གད་སློང་མོར་སློང་བའི། །བཀྱལ་ཚིག་གཏམ་གྱི་ཡོལ་གོས། །དོར་ཁོར་མོར་བཅིངས་པ། །དེ་སླད་རྩེད་འཇོར་གདགས་སོ། །གོ་སྐབས་མགྲིན་པས་ཕྱེ་ཞིང༌། །ལམ་སྲང་མཆུ་ཡིས་བླངས་ནས། །བག་ཡང་གད་
མོའི་ཆུ་རྒྱུན། །ལྷུང་ལྷུང་མཁའ་ལམ་བརྟོལ་འགྲོ། །ལྷུག་ལྷུག་རླན་གྱི་རྐྱལ་བའི། །བྱེ་རྡུལ་མཁའ་ལ་བརྩེགས་པ། །བརྟན་དང་ཀུན་ཏུ་ཉམས་པས། །འཛུམ་དགོད་དུད་མོ་འབྱིན་ཏོ། །ཆུ་འདབ་རྣམ་པར་དབྱེ་ཞིང༌། །འགྲིག་འགྲིག་སོ་ཕྲེང་ངོམ་བཞིན། །གསལ་བྱེད་ཐ་མའི་གྲོགས་པོ། །སྒྲོགས་མཁས་གཞོན་ནུའི་གཟུགས་ཅན། །ཨེ་ཡིག་ཕྲ་མའི་གདངས་ཅན། །འཛེར་འཛེར་སྐད་ཀྱི་འབྱུང་བས། །ཆུ་ཐིགས་མགྲོན་པོར་བོས་ཏེ། །མིག་ཟུར་ཐ་གྲུ་གཡོག་གོ །ཐ་དད་གཟུགས་ཀྱི་རྣམ་འགྱུར། །ལམ་ལམ་མིག་སྔར་སྟོན་པའི། །རྐང་གཉིས་གཞོན་ནུའི་ལུས་ཅན། །དེ་དག་དེ་ལྟར་གནས་སོ། །ཧྲུལ་ཧྲུལ་རྩུབ་མོའི་མལ་ནས། །ཉེར་ཉེར་ལྕི་བའི་བམ་རུལ། །ཡོར་ཡོར་འགུལ་བའི་མི་རྒན། ཁྱུག་ཁྱུག་ལས་འདིར་མི་དགྱེས། །གད་གད་མཉམ་པའི་ས་ཕྱོགས། །དྲང་དྲང་རྐང་པས་དཀྱུ་བའི། །གསལ་གསལ་གཞོན་ནུའི་གདུང་ཅན། །ཡང་ཡང་རྩེད་མོས་མྱོས་སྐད། །ཧ་ཧ། མཁས་ལ་བཀྱལ་ཀས་ཉེར་མཁོ་མེད། །བག་མེད་དོན་ལོག་དོན་རློམ་པ། །དེ་དག་འདི་འདྲས་དགྱེས་དེ་སླད། །བྱིས་པའི་ཟློས་གར་འདི་བྲིས་སོ། །ཞེས་སོ།། ༈ །།ལ་མཐོན་པོ་འཕྱོར་ཡག་གི་སྟེང་ན། །སྨན་ཁྲ་མོ་ཟླ་གཞོན་གྱི་གདོང་ཅན། །ངག་འགྱུར་ཁུག་ལ་ཡི་རུ་ལེན་སྐད། །མོ་ཚུལ་མིན་ཚུལ་ཞེན་ཞིག་ཡིན་དྲག །ཐང་ཆེན་པོ་སྤང་ལེབ་ཀྱི་ངོགས་སུ། །སྤྲང་རྒན་པོ་གོས་ཧྲུལ་གྱི་གཡོགས་
ཅན། །ངག་འདེགས་འཇོག་རྒྱང་གླུ་རུ་ལེན་སྐད། ཁོ་མྱ་ངན་སྡུག་ཡུས་ཀྱིས་ཡིན་དྲག །བྲག་མཐོན་པོ་རང་བྱུང་གི་ཕུག་ན། ཁོ་བརྟུལ་ཞུགས་མཐར་ཕྱིན་གྱི་གྲུབ་ཆེན། །ངག་སྙན་འཇེབས་ཐོལ་གླུ་རུ་ལེན་སྐད། །དེ་འོད་གསལ་ཉམས་རྩལ་རང་ཡིན་དྲག། ༈ །།སྤྲིན་རབ་དཀར་དྲི་མེད་གཙང་ལ་མཛེས། །འཇམ་ཡང་འཛོམ་པ་ལྷ་རྫས་དང༌། །མཉེན་འབོལ་ཚར་བ་རས་བལ་གོས། །བརྐྱང་ན་ལྷོ་བྱང་ཧྲིལ་གྱིས་ཁེབ། །དྲིལ་ན་ཤེལ་ཕྲེང་རྡོག་པོ་ཙམ། །བཟོ་མ་བྱས་སྲུབ་ཀྱི་འཛུམ་རིས་དོད། །སྲུབ་མེད་ཀྱང་བཟོ་སྒྲོས་དུ་མར་ཤར། །དེ་རྒྱ་མཚོ་ཀླུ་ཡི་འདུ་བྱེད་ཀྱིས། །རྒྱུ་སྤུན་མེད་པའི་ཐགས་སུ་བཏགས། །འཐག་དང་དྲུབ་པ་མཉམ་དུ་བྱུང༌། །དྲུབ་ཟིན་ཙམ་ནས་ཚལ་བརྒྱར་རལ། །རལ་སྙམ་ཙ་ན་ཡུག་གཅིག་འགྲོ། །ཡ་མཚན་རྫུ་འཕྲུལ་སྤྲུལ་པའི་གོས། །མཐོང་བཀྲག་ཆེ་བ་འཇའ་ཚོན་ཏེ། །སྤྲིན་དང་འཇའ་ཚོན་མཚེ་མའི་སྤུན། །རེག་བདེ་བསིལ་བ་གཙང་ཆུ་སྟེ། །ཆུ་སྤྲིན་སོར་མོ་ཁུ་ཚུར་བཞིན། །སྟེང་དགུང་སྔོན་ཡངས་པའི་རྒྱན་དུ་བཏགས། །འབྲུག་རྔ་སྒྲའི་རྒྱལ་མོས་གོས་སུ་གྱོན། །རི་མཐོ་བརྗིད་ཀྱི་མགོ་ལ་གདུགས་ལྟར་འཁོར། །རླུང་སྟོབས་པོ་ཆེ་ཡི་རྒྱལ་མཚན་ཏེ། །ས་ལ་གཡང་ཞག་འབོད་པའི་དར། །མགོ་ནག་མི་ཡི་གཡང་རྟེན་ཏེ། །རྨིག་ཆགས་དུད་འགྲོའི་གཡང་གི་བླ། །མི་རྒྱལ་པོ་ཆེ་ཡང་བཟུང་དུ་མེད། །འཕྱོར་བག་མ་བཟང་ཡང་གྱོན་མི་བཏུབ། །མཛོད་ཕྱུག་པོ་བརྒྱ་ལ་མི་ཆུག་སྟེ། །
འོན་ཀྱང་གནས་སར་མཐའ་དབུས་ཁེབ། །མི་ཕྱུག་དབུལ་མེད་པར་དགོས་འདོད་སྟེར། །ས་རི་ཀླུང་མེད་པར་རྩི་བཅུད་འགུག །མཐོང་ན་བྱ་རྣམས་བཀྲ་ཤིག་སྒྲོག །སྤྲུགས་ན་བདུད་རྩིའི་ཆབ་རྒྱུན་འབེབས། །འབྲུ་འདོད་ཀྱི་ཞིང་ས་ཁོང་འཛུམ་རྒྱས། །བུ་འདོད་ཀྱི་རྨ་བྱ་རྩེ་བྲོ་འཁྲབ། །བདག་བཟུང་གི་གཉེར་ལ་མི་ལྟོས་ཤིང༌། །བསྲི་ཕང་གི་སེམས་ལས་མ་གོས་པར། །དུས་ནམ་དགོས་ཚེ་ན་ཕུང་གིས་འདུ། །དོན་བྱས་མ་ཐག་ཏུ་རང་སར་གྱེས། །ཕྱྭ་ཁུ་ཡེ་ཟེར་ན་དེ་ལ་གྱིས། །གཡང་ཁུ་ཡེ་འདྲེན་ན་དེ་ལ་སྒྲོང༌། །ཆར་སྤྲིན་འབོལ་མོ་གཡང་གི་མཛོད། །ཆུ་ཁུར་བ་མོ་སྐྱེ་དགུའི་གསོས། ཁྱོད་ཁར་སང་དབྱར་གྱི་ཟླ་བ་ལ། །དཔལ་གཟུགས་ཅན་བཞིན་དུ་མཁའ་ལ་འཁྲིགས། །འབྲོག་ཐམས་ཅད་མར་ཁུའི་རྒྱ་མཚོར་བཏང༌། །འབྲོག་མིའི་རྒྱལ་བ་མར་གྱིས་བཀང༌། །རོང་ཐམས་ཅད་འབྲུ་སྣའི་ཐང་མར་བརྡལ། །སྟོང་སྡེའི་བང་བ་ནས་ཀྱིས་བཀང༌། །མི་ཐམས་ཅད་སྐྱིད་པའི་རྒྱང་གླུ་ལེན། །བྱད་མདངས་སྣུམ་ལ་འཛུམ་བག་ཆགས། །ཕྱུག་ཐམས་ཅད་རྒྱགས་པས་གར་རྩེད་སྒྱུར། །གཅིག་ལས་གཉིས་འཕེལ་རི་ཐང་གང༌། །མདོ་ཕྲུག་རྟ་ཡི་བང་ཁ་དར། །བཀྲག་མདངས་ལྷ་ཡི་རི་དྭགས་འདྲ། །ཆུ་དང་ནགས་ཚལ་ལ་གནས་པའི། །བྱ་རྣམས་རྫོགས་ལྡན་བདེ་བས་མྱོས། །རྩ་ལྗང་མྱུ་གུའི་ལོངས་སྤྱོད་ཀྱིས། །རི་དྭགས་རྣམས་ཀྱང་དྲེགས་པ་འཛིན། །དེ་འདྲ་དཔག་མེད་ཁྱོད་ལས་
བྱུང༌། །སྐུ་དྲིན་མི་ཆུང་ཆེ་ལགས་ཏེ། །དུས་དེང་སང་སྟོན་ཟླའི་མཇུག་མ་ལ། ཁྱོད་ཀྱང་ཆུ་ཡི་དབང་ཐང་ཉམས། །ཕྱག་དར་ཁྲོད་ཀྱི་གོས་བཞིན་ཟད། །རིང་པོར་མི་ཐོགས་ཡལ་དུ་ཉེ། །དེ་འོན་ཀྱང་འདུས་བྱས་སྒྱུ་མའི་གཟུགས། །ད་ལྟ་མེད་ཀྱང་ད་ལྟ་ཡོད། །རེས་གཅིག་ནུབ་ཀྱང་གཞན་དུ་འཆར། །དར་རྒུད་གཅིག་ཏུ་མ་ངེས་པས། །ད་ལོ་སྐུ་ཁམས་བདེ་མོ་ཞུ། །སང་ཕོད་ཆོ་འཕྲུལ་ཟླ་བའི་དུས། །རྒྱ་མཚོ་ཀླུ་ཡི་བང་མཛོད་ནས། །ནམ་མཁར་འཕགས་ལ་ཕྱོགས་བཅུར་ལྡིང༌། །རྔ་སྒྲ་སྒྲོགས་ཤིང་ལྷབ་ལྷུབ་གཡོ། །བར་སྣང་ཉུལ་ཞིང་ས་ཀུན་འགེབས། །འཛད་མེད་ཆར་གྱི་ཕམ་ཕབ་བཅས། །ས་སྟེང་མི་ཡི་དཔལ་དུ་ཤོག །གཞི་མགྲོན་འཛོམ་པའི་སྨོན་ལམ་ཞུ། །ཆད་མདོ་རྡོ་ཡི་རི་མོ་འབྲི། །རྡོ་བརྐོས་རི་མོ་འགྱུར་མེད་ལགས།། ༈ །།མ་ཉལ་ལོངས་ལ་ཕྱོགས་སུ་ལྟོས། །ཉལ་ན་གཉིད་ཀྱི་རྒྱ་མཚོར་ལྟུང༌། །གཉིད་མཚོར་ལྷུང་ན་འཇིགས་པ་ཆེ། །ཤེས་རབ་འགྲིབ་ཅིང་བརྗེད་ངས་སྐྱེད། །ཕྱོགས་སུ་ལྟོས་དང་ཉམས་དགའ་ཡོད། །མི་ཡུལ་མི་དགའ་ཅི་ཞིག་དགའ། །དགའ་ན་ཤེས་པ་ཕྱིར་ལ་འཕྲོ། །འཕྲོ་ན་གཉིད་ཀྱིས་སྡུད་མི་འགྱུར། །གར་གྱི་ལྟད་མོར་འདུས་པ་དང༌། །བཞད་གད་ཤག་ལ་ཉན་པ་དང༌། །སྟོབས་འགྱོད་རྒྱན་པོ་ལྟ་བ་ཡང༌། །གཉིད་ཀྱིས་ཁྱེར་བ་གཅིག་མ་མཐོང༌། །འདི་ན་ཐང་ཤིང་གར་བྱེད་ཅིང༌། ཁུ་བྱུག་འཇོལ་མོ་ཤགས་ཀྱིས་རྩེ། །ཕུག་རོན་སྟོབས་འགྱེད་འཕུལ་ཐོ་རྡེག་ཁུག་རྟ་མཁར་ལས་
བྱ་བས་བྲེལ། །བུང་བ་གླུ་ལེན་མེ་ཏོག་དགོད། །འདི་ལྟར་རྣམ་པ་སྣ་ཚོགས་པའི། །ལྟད་མོའི་འདུན་ས་ཆེར་འདུག་ནས། །ཉིན་གཉིད་ལོག་པར་ཇི་ལྟར་འཐད། །ནམ་མཁའ་སྨག་གིས་ར་རོ་བའང༌། །ཉི་འོད་བདུད་རྩི་རེག་པས་སངས། །མེ་ཏོག་གཉིད་ཀྱིས་མིག་ཟུམ་པ། །ཉིན་མོའི་དུས་སྟོན་གསར་པས་སད། །བྱིའུ་ཚང་མལ་གཉིད་ལོག་རྣམས། །ཕྱིར་བྱུང་ཅ་ཅོ་སྒྲོགས་ཤིང་རྒྱུ། །འདི་འདྲའི་དབུས་ན་ཁྱོད་གཅིག་པུ། །ཉིན་གཉིད་ཤོར་བ་ལས་མཐུ་ཆེ། །སྐྱེ་དགུ་གཉིད་ལས་སློང་དོན་དུ། །གནམ་ལ་ཉི་མ་འདི་ལྟར་ཤར། །ཉི་མ་མགོ་ལ་ཤར་བཞིན་དུ། །གཉིད་ལོག་ཉི་མས་ཅི་ཞིག་བྱ། །སྤྱི་མཐུན་མིག་གི་བསོད་ནམས་ལས། །འཛམ་གླིང་འདི་ལྟར་བཀྲ་བ་སྤྲུལ། །དུས་ཀུན་མིག་བཙུམ་གཉིད་ལོག་ན། །འཛམ་གླིང་བཀྲ་བ་དོན་མེད་ཡིན། །བྱོལ་སོང་ཁ་ཏྭས་གསལ་ཉམས་བསྟན། །རྩེ་གར་འཁྲབ་ཅིང་གཏམ་དག་གཏོང༌། ཁྱོད་འདྲའི་མི་ཡིས་རྨོངས་ཉམས་བསྟན། །ཉིན་མཚན་གཉིད་ཀྱི་མུན་པར་ཞུགས། །འབུ་སྦྲང་རྣམས་ལའང་དོན་ཅིག་ཡོད། །རང་འཚོ་བསྒྲུབ་ཕྱིར་སྤྱོད་ཡུལ་རྒྱུ། ཁྱོད་ཀྱིས་བྱ་བ་ཀུན་བཅག་ནས། །ཉིན་གཉིད་ལོག་ཕྱིར་མདོ་ཤོར་ཡིན། །ད་རེས་མངོན་མཐོ་མི་ལུས་ཐོབ། །མཁས་པའི་གྲལ་འདབ་ལན་མང་ཉུལ། །དུད་འགྲོའི་སྤྱོད་ལས་འཕགས་རྒྱུ་ལ། །མཉམ་པའང་མ་བྱུང་མཚར་རེ་ཆེ། །ཨ་ཅང་དི་ཙམ་ཀུ་རེ་ཡིན། ཁྱོད་དང་དུད་འགྲོ་འདྲ་དོགས་
མེད། །བློ་གསལ་སྨྲ་ཤེས་དོན་གོ་ཁྱོད། །རང་ཉིད་སུ་ཡིན་མནོ་བསམ་ཐོང༌། །ང་རྒྱལ་སྐྱེད་ལ་མགོ་འཕང་སྟོད། །རང་ཚུལ་འཚོས་ལ་རང་སྤྱོད་སྐྱོངས། །རང་མགོ་གཉིད་ཀྱི་རྡོ་ལེབ་འོག །མི་འཆོད་ངེས་པའི་སེམས་སྟོབས་སྐྱེད། །འཇིགས་མེད་དུང་ཐོད་ཅན་གྱིས་བུ་ཀི་ལོ་ལ་བཀའ་བཀྱོན་ཕབ་པའོ།། ༈ །།ཚིག་གི་མེ་ཏོག་ཞེས་བྱ་བ། ཁ་བའི་གོས་དཀར་དྲི་མེད་དུང་མདོག་ཅན། །དགུན་གྱི་རྒྱལ་མོས་བཀབ་པ་འཁུར་བཟོད་པའི། །ལྕུགས་ཕྲན་སར་བ་སར་བའི་ཉིང་ལག་ཅན། །ལྗོན་པའི་ཤིང་འདི་ལྷ་ཡུལ་ལྷ་མོ་བཞིན། །ཉི་གཞོན་འོད་ཀྱི་བྱུགས་པས་རེག་མ་ཐག །དྭངས་ཤེལ་ཁ་དོག་འཛིན་པའི་ཆུ་ཐིག་ཏུ། །ཞུ་བའི་གཟུགས་ཅན་ཁ་བ་བ་མོའི་རྡུལ། །ཤིང་ལོའི་འགྲམ་པར་ཡང་དང་ཡང་དུ་འཁྱུད། །ལྡེམ་དྲང་ཁེངས་པས་དྲེགས་པའི་ནགས་ཀྱི་ཀླུང༌། ཁུར་ཆེན་ལྕིད་ཀྱིས་སྨ་དབབ་བགྱིའོ་ཞེས། ཁ་བའི་ཆུ་རྒྱུན་ཀུ་མུད་དོག་པ་བཞིན། །ནམ་མཁའི་ལམ་ནས་ལྗོན་བཟང་སྤྱི་བོར་འབབས། །སྤྲིན་དཀར་ཁ་ཡི་ཟེག་མ་སྐྱུག་པའི་ཆུ། །དཀར་གསལ་ཁ་བའི་ཟོལ་གྱིས་ཉེར་འོང་བ། །ལྗོན་ཤིང་མགུལ་བར་ཅུང་ཞིག་ངལ་གསོས་ནས། །དབྱིག་འཛིན་ཁོང་པར་རིངས་པར་རིངས་པར་སོང༌། །ཉི་མའི་དཀྱིལ་འཁོར་མངོན་དུ་མི་གསལ་ཞིང༌། །གྲང་རེག་འཛིན་པའི་རླུང་གི་གར་སྟབས་ལ། །ཞོན་པའི་གོ་སྐབས་ཉེ་བར་གནས་པའི་ཚེ། ཁ་བའི་རྡུལ་འདི་རི་ནས་ཀླུང་དུ་རྒྱུ། །གང་ཚེ་ཉི་མ་འབར་བའི་འོད་ཞག་གིས། ཁ་བའི་རྡུལ་མང་ཀུན་ཏུ་
བཞུས་པའི་མོད། །ཤིང་གི་གྲིབ་བསིལ་ཁོ་ར་ཁོར་ཡུག་ཀུན། །རླན་གྱི་ཐིག་པ་གོས་སུ་འཛིན་པར་གྱུར། །དེ་ཚེ་བདག་ཅག་ཁུར་དང་བྲལ་ལོ་ཞེས། །དགའ་བའི་གར་གྱིས་རོལ་མོ་རྒྱས་པའི་ཤིང༌། །ཡལ་གའི་གཡོ་བ་འབུམ་དུ་བརྩེན་པ་འདིས། །ནགས་ཀྱི་བྱ་ཚོགས་སྙིང་ལ་རབ་དགའ་འཕེལ། །ནགས་ཀྱི་མཐོངས་སུ་རྣལ་འབྱོར་ལྡན་པས་ཉལ། །ཕྱག་དར་ཁྲོད་ཀྱི་གོས་ནི་ཁ་བས་གཡོག །སླར་ཡང་བ་མོའི་ཁྲི་ལས་ཉེར་ལྡང་སྟེ། །ནང་དུ་ཡང་དག་འཇོག་ལ་གནས་དེ་སྐྱིད། །ཅེས་པའང་གཞོན་ནུ་འཇིགས་མེད་པས་ཉམས་མཚར་གྱི་ཕྱིར་དང་ནགས་མཐོང་ལ་དགའ་བ་འཕེལ་བའི་ཕྱིར་ཤར་མར་བྲིས་པའོ།། ༈ །།ངས་སྐྱ་ཀ་ལ་འདི་བྱས། བྱ་ཀྱ་ཀ་ཁྲ་མོའི་འདབ་མ་བསྐྱོད་ན། །ཤིང་བལ་གྱི་ཡང་ཁྱད་ངོ་རེ་ཚ་སྟེ། །ཐུགས་རློམ་སེམས་མཐོན་པོས་ཆེ་ཐང་མ་མཛད། །བྱ་སྤུའི་ཤེ་མོང་ཨེ་དྲན་འདབ་བཟང་གི་གྲོགས་པོ། །བྱས་པས། ཁོ་ན་རེ། ཁྱེད་འཇམ་དར་སྐྱིད་པོ་མལ་ནང་ཉལ་ཚེ། །ཕྱུག་པོ་ཚོའི་གཅེས་ཕྲུག་འདྲ་ལ་ཁད་དེ། །ཐུགས་རྐྱལ་པ་ཕུས་གཏེར་ཤག་པོ་མ་མཛད། །རམ་པའི་ཞལ་ཟས་ཨེ་དྲན་འཇིགས་མེད་ཀྱི་བསྟན་རྒྱམ། །ངས་ཁོ་ལ། ཤ་ཟོས་ན་ཞིམ་པའི་ཚང་ར་ཚིལ་རྐྱལ། །སྐུ་ཁོག་ཏུ་སླེབས་དུས་མནོག་པོ་ཡོད་དེ། །ཟས་སྲོག་དང་བསྡོས་ནས་འཚང་ཁྲ་མ་མཛད། །གྱང་ཞལ་བ་ཨེ་གཟིགས་སྤུ་སྡུག་གི་གྲོགས་པོ། །བྱས་པས། ཁོས་ང་ལ། ནོར་བསགས་ན་འཕེལ་བའི་དངུལ་སྒྲོམ་རྒྱབ་ཁལ། །
མཛོད་ཁང་ན་བཞུགས་དུས་ཞལ་ངོ་དྲོ་སྟེ། །སྲོག་འབེན་ལ་བཞག་ནས་ལྡོམ་བུ་མ་མཛད། །གུང་ཕྱིའི་ཟས་ཐང་ཨེ་གཟིགས་འཇིགས་མེད་ཀྱི་བསྟན་རྒྱམ། །ངས་ཁོ་ལ་ཡང༌། མཆུ་གཟན་ལ་རྣོ་བ་ཁ་མཆུའི་གཞི་མ། །འབྱོན་ལམ་ནས་ཁ་ཏྭའི་རུ་སྣ་བཤམ་འདུག །བྱ་འོལ་བ་སེར་པོའི་ལད་མོ་མ་མཛད། །སྐུ་ཤུག་རང་ཚོད་ཨེ་ཟིན་མཁའ་ལྡིང་གི་གྲོགས་པོ། །བྱས་པས། །ང་ལ་ཁོས། བློ་རིག་པའི་རྣམ་འཕྲུལ་བྱུར་ངན་གྱི་སྣ་འདྲེན། །སྙིགས་དུས་ཀྱི་སེམས་ཅན་ཀོ་ལོང་དམ་འདུག་ཁོང་སྔོན་རབས་མཁས་པའི་ལད་མོ་མ་མཛད། །རྣམ་དཔྱོད་རང་ཚོད་ཨེ་ཟིན་འཇིགས་མེད་ཀྱི་བསྟན་རྒྱམ། །ཡང་ངས་ཁོ་ལ། །ཟས་ཧབ་ཐོབ་མཛད་པ་བྱ་བརྒྱའི་ཆོས་ཉིད། །གདུང་མ་དང་དྲལ་ཕྱམ་ཁང་པའི་ཤིང་ཆ། །ཤིང་ཁང་པའི་ལོགས་ལ་སྤུ་འཐོར་མ་མཛད། །གཟིགས་ཚད་ཁ་ཟས་ཨེ་རེད་གཤོག་བཟང་གི་གྲོགས་པོ། །བྱས་པས། ཁོས་ང་རང་ལ། །གཏོ་ཚོགས་གྲལ་འགྲིམས་པ་གཏོ་བླའི་ཆོས་ཉིད། །དཀོན་མཆོག་ལ་ཕུལ་བ་དཀོར་གྱི་གཉན་ཤོས། །རྟེན་མཆོད་ཆས་སྤྱན་གཟིགས་ངའི་ཡིན་མ་མཛད། །ཟང་ཞུན་ལྟོ་བས་ཨེ་ཐུབ་འཇིགས་མེད་ཀྱི་བསྟན་རྒྱམ། །ངས་ཁོ་ལ། མཚན་ཟླ་བ་བཀབ་འདྲའི་གཟུགས་སུ་མཛེས་ཀྱང༌། །ངན་སྐྱུག་གི་ཞལ་ཟས་དྲི་ངད་དེ་མནམ་པས། །ཤིང་ཇོ་དར་ཡུ་བ་དྲིལ་ཕྱིས་མ་མཛད། །གསུང་རབ་བཀུར་སྟི་ཨེ་ཡིན་འཕུར་འགྲོ་ཡི་གྲོགས་པོ། །བྱས་པས། ཁོས་ང་ལ། །གཟན་དུར་སྨྲིག་ན་བཟའ་མཚན་
སྤྲིན་ལས་ལྷག་ཀྱང༌། །ལྡན་གྲོལ་གྱི་བསླབ་བྱ་གུ་ཡངས་ལ་བཞག་ནས། །འཁོར་སློབ་མ་སྡུད་པའི་བཤེས་གཉེན་མ་མཛད། །བསྟན་འཛིན་རྣམ་ཐར་ཨེ་རེད་འཇིགས་མེད་ཀྱི་བསྟན་རྒྱམ། །ཟེར་བས། ངས་ཁོ་ལ། །ཨ་ཅང་ཀུ་རེ་ཡིན་མོད་འདབ་བཟང་གཞོན་ནུ། །རྩེ་སྒྲོས་གནམ་འཕང་གཅོད་པ་མཁའ་ལྡིང་གི་ཁྱད་ཆོས། །སྡིག་ཟས་ཤ་ལ་རྔམ་པ་སྔོན་ལས་ཀྱི་རྒྱུ་མཐུན། །བདེན་རིགས་ཁྱོད་ལ་ཡོད་དོ་བདེན་སྨྲ་ཡི་སྐྱ་ཀ༌།བྱས་པས་ཁོས་ཀྱང་ང་ལ། བདེན་བདེན་ང་ལ་ཡོད་ན་བྱོལ་སོང་རང་མིན་མོད། །ཨ་ཅང་སྙིགས་མར་སྤྱོད་པའི་རང་རྟགས་འདི་མིན་ན། །བདེན་སྨྲའི་དྲང་སྲོང་མཆོག་གཅིག་སངས་རྒྱས་རང་བཞིན་ཏེ། །སྣལ་མ་སེར་པོ་ཅན་ཚོའི་རེས་མོ་ལ་བབས་ཡོད། །ཟེར་ནས་འཕུར་སོང༌། །ཞེས་པའང་ངས་བྲིས་སོ། །ཧ་ཧ། ༈ །།ཤར་མདོ་སྨད་སླང་ངའི། །བྱ་དེ་མོའི་བུ་སྡུག་ངང་དཀར་མ། །ཆུང་སྒོང་ངའི་སྦུབས་སུ་བསྡད་བསྡད་ནས། །སྒོང་ཤུན་གྱི་གཟེབ་ཏུ་བཅིངས་བཅིངས་ནས། །མུན་ནག་གི་ཁྲོད་དུ་ཉལ་ཉལ་ནས། །དུས་བབ་ཀྱི་ཉིན་མོ་ཁ་སང་ལ། །ལུས་སྒོང་ལྤགས་ཀྱི་ཤུབས་ནས་ཐོན་དེ་བྱུང༌། ཁོ་ཡུལ་དྲུག་གི་སྣང་བའི་ཐང་ཆེན་དུ། །བློ་འཇུག་ཤེས་རྣམ་དྲུག་རྩེན་ལ་རེ། །ཉམས་གཤོག་རྩལ་རྫོགས་པའི་ཕོ་རྒོད་ཞིག། ཡོང་སྙམ་ལ་ངེད་ཀྱང་རེད་མོད་དེ། །ཚེ་ཟད་དང་དུས་མིན་མ་ཕྱེད་པའི། །འཆི་རྐྱེན་དེ་ཐོག་འབབ་བཞིན་དུ་བྱུང༌། །དུས་ད་ནང་བཙས་པའི་དོ་མོད་ལ། །སྲོག་རྒྱུ་བ་ཕྲ་མོའི་
རྒྱུས་ཐག་ཅད། །ལ་སྒྲོ་གཤོག་རྒྱས་ཀྱང་མི་སླེབ་པའི། །ཤི་བར་དོའི་འཕྲང་ལ་འཛེགས་ནས་སོང༌། །དེ་སྤུན་ཟླ་གསུམ་གྱི་ཐ་ཆུང་ཡིན། །ཕུ་བོ་ཚོ་རེ་ཞིག་གསོན་ལྟར་སྣང༌། །ཆུང་བྱིས་པའི་རང་ནས་བྱེ་བྲལ་བྱུང༌། །ལར་འདུས་བྱས་ཀྱི་རང་མཚང་རྔམ་པོ་ཆེ། །འདི་དང་འདི་འདྲ་ལ་བསམ་ཙ་ན། །འདི་བྱ་ཕྲུག་གཅིག་པོའི་སྒོས་སྐལ་མིན། ཁམས་གསུམ་གྱི་སེམས་ཅན་ཀུན་གྱི་ཡིན། །དེ་ལེགས་པར་བསམ་ན་ཡི་རེ་མུག །ཐོག་ཏུ་བྱུང་ན་ཇི་ཚུགས་བགྱི། །ན་དགའ་ཤི་སྐྱིད་ཅིག་དགོས་རྒྱུ་ལ། །ང་དང་ང་འདྲ་ཚོས་བྱེད་ལུགས་འདིས། །ཅི་མིན་འདི་མིན་ཞིག་འབྱུང་གིས་དོགས།། ༈ །།ཡེ་ཡེ། འོད་མཛད་ཆོས་ཀྱི་རྒྱལ་བུ། །སྐྱིད་པའི་ཡ་མཐའ་རེད་དེ། །གཞན་གྱི་སྡུག་བསྔལ་གཟིགས་ནས། །དཀའ་བ་བརྒྱ་ཡིས་བྲེལ་འདུག། རྩོད་དུས་འདོད་ཁམས་འགྲོ་བ། །སྡུག་པའི་མ་མཐའ་རེད་དེ། །རང་གི་སྡུག་བསྔལ་མཐོང་ནས། །སྐྱོ་བ་ཡིད་ན་མི་འདུག །ཡེ་ཡེ། །སྤྱན་རས་གཟིགས་ལ་མེད་པའི། །དངོས་གྲུབ་བསྒྲུབ་རྒྱུ་མེད་ཀྱང༌། །ད་དུང་མ་ཎི་འདྲེན་པའི། །བགྲང་ཕྲེང་ཕྱག་དང་མ་བྲལ། །ཉམ་ཐག་འགྲོ་བའི་རེས། །མ་ཎི་མིན་པ་མེད་དེ། །ཕྲེང་བ་སྔས་སུ་གཡུག་ནས། །གཏམ་ཉོབ་ནང་ན་ཡེངས་འདུག །ཡེ་ཡེ། །མྱོས་བྱེད་ཆང་འཐུང་ངང་ལ། །ནམ་ཟླ་གར་ཐལ་མེད་པར། །གོ་ཞིག་ཆོད་ཡོད་སྙམ་པའི། །རོང་ཕྲུག་མགོ་འཁོར་པོ་ཚོ། །རི་བོ་ཏ་ལའི་ཁང་བརྩེགས། །
རིན་ཆེན་བ་གམ་ཅན་དང༌། །ཕུན་ཚོགས་བཟའ་ཤིང་ར་བ། །བདུད་རྩིའི་སྙེམ་དུད་རྣམས། །སྨྱོ་ཆུ་བྱུར་བུ་ཅན་དང༌། །ཐན་སྙེ་སྐེ་རིང་སྐྱེས་པའི། །ཞིང་སྒོག་སྐྱེ་བོ་རེ་ལ། །བལྟས་ནས་འདོར་ཕོད་ཨེ་འདུག །ཡེ་ཡེ། །དཔག་བསམ་ལོ་མའི་ལྡིང་ཁང༌། །འཕགས་ཚོགས་རྩེ་བའི་ནང་ན། །རབ་དཀར་བདུད་རྩིའི་ཟ་བའི། །གྲུ་འཛིན་ཆུ་བོའི་མ་ཁྱུད། །འདའ་བྱེད་མ་ཎིའི་གྲུ་གཟིང༌། །མི་འཛིན་སྟོང་པར་སྦུབ་ནས། །བེའུ་ལུག་གསོན་མཆུ་འཆིང་བས། །བྲེལ་བ་འབྲོག་པའི་བརྒྱག་ཕྲུག །རེ་ནག་སྒྱེ་མོའི་ཁྱིམ་དུ། །རྒྱབ་ཁྲ་ཚེར་མའི་ཁ་ཅན། །སྲིན་མོའི་གཡོག་ལ་སྡོད་དང༌། །འདུན་མའི་གཏད་སོ་ལེགས་འདུག །ཡེ་ཡེ། ཚུར་བལྟས་རང་ལ་བསམ་ཚེ། ཁ་མང་རང་མདོ་ཤོར་འདུག །ཕར་བལྟས་གཞན་ལ་བསམ་ཚེ། །ཅོལ་ཆུང་རང་ཆུས་བརྗེད་འདུག །ཀུན་ཀྱང་སྙིང་རྗེའི་དབང་ཕྱུག །དངོས་གྲུབ་གཏེར་ཁ་འགྱེད་ལ། ཁྱོར་བ་གཅིག་ཙམ་འཛད་པའི། །བསམ་པ་གཞིན་མི་འདུག །ཡེ་ཡེ། ཨ་ཅང་ཀུ་རེ་ཡིན་གྱི། །ཕོངས་པ་ནང་འཐབ་མི་བྱེད། །སྣང་བ་ཡེངས་ལ་བོར་ནས། །བྱུང་རྒྱལ་ངག་གཅིག་ལོངས་དང༌། །ཡེ་ཡེ། །ལྷོ་ཕྱོགས་བར་སྣང་ལམ་ནས། །དལ་གྱིས་འོང་བའི་སྤྲིན་ཁྱོད། །ཆུ་གཏེར་ལྷོ་མའི་ནང་ནས། །འོང་བའི་མགྲོན་པོ་ཡིན་ན། །ང་ཚོའི་བླ་མ་བཞུགས་པའི། །རི་རྒྱལ་གྲུ་འཛིན་ཕྱོགས་ཀྱི། །མཚར་བའི་གཏམ་ཞིག་ཤོད་དང༌། །སྣང་བའི་སྐྱོ་གྲོགས་
ཡོང་གི༌།ཕྱི་སྣོད་རྩི་ཐོག་ནགས་ལ། །ཕམ་ཕབ་ཆར་པ་མེད་ཅིང༌། །ནང་བཅུད་ཤེས་པ་སྐྱོ་དུས། །གཏམ་སྙན་སྤྲིང་ཡིག་མེད་ན། །ཆེ་བརྗིད་རི་བོ་འདྲ་ཞིང༌། །དལ་འགྲོས་གླང་ཆེན་མཉམ་ཡང༌། །ཕྱོགས་འདིར་འོང་བའི་ལས་དོན། །བསྟན་རྒྱུ་ཟད་ནས་གདའོ། །ཡེ་ཡེ། འདབ་བཟང་ལྕུང་ཀ་ནག་ཆུང༌། །དགུང་སྔོན་འཕུར་ལྡིང་བྱེད་ཁྱོད། །ལྷོ་མཐའི་ཆུ་གཏེར་ཕྱོགས་སུ། །རྒུམ་བུ་ཐུ་ཞིང་འགྲོ་ན། ཁྱོད་སྨྲ་མཁས་སྐད་སྙན་འགྱུར་བདེ། །ལྷོ་ཕྱོགས་རྒྱ་མཚོའི་གླིང་རྩེར། །ང་ཚོའི་རྗེ་བཙུན་བཞུགས་ཀྱིས། །སྤྲང་པོའི་སྐྱིད་སྡུག་ཚུལ་འདི། །ཇི་ལྟ་བ་བཞིན་ཞུས་ལ། །རྗེས་བསྟན་གསུང་གི་སྐྱེས་ཤིག །འདུག་ན་ཅིས་ཀྱང་མ་སྐྱུར། །བུ་ངའི་རྣ་བར་བླག་དང༌། །ས་འདིར་ཁྱོད་དང་ང་གཉིས། །བསམ་པ་མཛའ་བོར་བསྡེབས་ཏེ། །ཡུན་རིང་ཁྱིམ་ཚེས་འགྲོགས་པའི། །ཕྱི་ཐག་དེ་ཀ་ཡིན་ནོ། །ཅེས་འཇིགས་མེད་པས་སོ།། ༈ །།རྩ་རྐྱ་ཁ་བས་གཡོགས་པའི་གསང་སྟེང་ན། །ཕོ་རོག་ལྷག་རླུང་འགམ་པ་ཡི་རེ་ཕྱྭ། །བྱིན་ཆགས་ཐང་ཤིང་ཕྱུག་མོའི་ནགས་ཁྲོད་ན། ཁྭ་ཏ་ཉི་ཤིག་འཐུ་བ་བག་རེ་དྲོ། །འཐབ་འཐབ་ལྕགས་རྒྱུན་ཁྱི་ཁར་མ་ཟད་པར། །བརྡུང་བརྡུང་ལྕགས་ཡུ་ཁྱིམ་གོས་མ་བཅག་པར། །སུན་མེད་འབྲོག་སྡེའི་རུ་སྒོ་ཉུལ་ན་ཡང༌། །ལྟོ་ཕྱིར་གཞན་མིག་ཁྲེལ་བ་སྙིང་པོར་ཟད། །བེརྒ་སྔོན་དུ་བཏང་ནས་ཁུག་སྟོང་མཆན། །བསོད་ཆུང་སྤྲང་ཟས་གཅིག་ལ་ཁྱི་རུབ་བརྒྱ། །ད་དུང་རྒྱུག་རྒྱུག་སོང་
སོང་སྒྲས་འདེད་པའི། །ལས་ངན་སྤྲང་པོའི་ལས་ལ་སྣང་བ་སྐྱོ། །ཟས་ལ་གཙང་སྨེ་མེད་པའི་བག་ཡངས་པོ། །གང་བྱུང་དེ་གར་ཟ་བས་རྩོལ་སྒྲུབ་སླ། །ཅི་སྣང་ཟས་སུ་ཤར་བས་སེམས་ཁྲལ་ཆུང༌། །བློ་བདེ་རྒྱུན་ཆད་མེད་དོ་ཁྭ་ཏའི་བུ། །རྡོར་འདེབས་གཡོས་སྐོལ་ཐབས་ལྡན་མི་ཡིས་བྱེད། །ཆུ་ཐབ་ཁོལ་པོ་མི་དགོས་སྐྱིད་ཅིག་ཡོད། །དཀོན་ཟས་དུས་ཁྲལ་དབྱར་གྱི་རྒྱལ་མོས་སྤྲོད། །དཀའ་ཚེགས་རྙེད་ཚོལ་མི་དགོས་སྐྱིད་ཅིག་ཡོད། །བྱུང་ཁུངས་མི་ཟས་བཟང་དགུའི་ཆོ་རིགས་བཙུན། །བྱེད་ལས་འདི་མེད་འཛམ་གླིང་ལོ་ཏོག་མེད། །ངོ་བོ་ཚ་སྐྱུར་ཁ་བསྐའི་རོ་བཅུད་རྫོགས། །དོན་རྩ་རང་ལ་ཞིམ་ན་ཞིམ་པར་ཟད། །སྦྲ་སྒོ་ལྕགས་སྣས་ཕྱེ་ཞིང་ལྟ་བ་དང༌། །ཆེན་པོའི་མཚན་སྙན་བསྒྲགས་ནས་འབོད་པ་སོགས། །སློང་ཐུབ་ལྡོམ་བུ་མང་པོས་ཐོབ་དཀའ་བའི། །ཞིམ་དགུའི་བཟའ་བ་ཐང་མར་བརྡལ་བ་ཡང༌། །ཨོ་ཀ་ཨོ་ཝ་ལ་སོགས་སཾ་སྐྲི་ཏའི། །གསང་སྔགས་ཡི་གེའི་ཕྲེང་བ་ཟློས་བཞིན་དུ། །ལྗན་ལྗིན་ཕྱི་སའི་རྫབ་ཆགས་རྡོ་རྗེའི་མཆུས། །དུད་ཅིང་དཀྲུགས་པའི་བྱིན་རླབས་བྱས་མ་ཐག །འཛིན་པའི་རྒྱ་བཤིག་གཅེས་པའི་འཆིང་ཐག་བྲལ། །སེར་སྣའི་སྒྲོག་བཅད་བདག་པོའི་ལག་བསྒུལ་ནས། །རྣམ་པ་རྫས་བདག་ཁྲོས་པའི་བསྡིགས་རྔམ་སྟེ། །མདོ་དོན་ཁྭ་ཏ་རང་ལྟོ་འཆིང་བ་འབྱུང༌། །གོང་མའི་ངོ་བསྲུང་མིང་འགྲུབ་མ་བྱིན་རུང༌། །ཕ་གཞིས་ཤོར་ན་ཕང་བ་
གཞིན་མེད། །མཐོན་པོའི་ཞལ་ངོ་མི་འཚོ་མ་མཉེས་རུང༌། །རང་ཤོང་ནགས་སྒུགས་རྒྱལ་ཁམས་ཀུན་ན་ཡོད། །བཙན་པོའི་ཞབས་ཏོག་མི་འོང་མ་བཞག་རུང༌། །འཕུར་ཆོག་གཤོག་པའི་གདེང་ཚད་བརྟན་པོ་ཡོད། །ཕྱུག་པོའི་ངོ་བསྲུང་མི་འགྲུབ་མ་བྱིན་རུང༌། །ཟ་ཞིང་སོ་ནམས་སྟོང་ཁམས་སྡེ་བས་བྱེད། །སོ་ནམ་ལས་གླ་མི་ཐིང་མི་བྲ་ན། །སྐྱག་པ་ཁྱིམ་དུ་བསྡུས་ལ་ཁ་རྒྱ་ཞོག །ཡང་ན་དེ་ཡང་མི་བྲ་ཟུངས་ལ་སྡོད། །རུལ་བའི་ཁྱི་རོ་ཟོས་ཀྱང་མི་བརྒྱགས་ཏེ། །ནེ་ཙོ་ཅོར་ལི་གཟུགས་དང་ཁས་ཕུང་བར། །མཐོང་བས་གཡོན་ཅན་མི་ཡི་རྒྱུས་ཤེས་ནས། །མི་བློར་མི་བསྟུན་རྣ་བ་གཙེར་སྐད་དང༌། །མི་སྡུག་སྤུ་ལོང་སྟོན་པས་མིས་མི་འཛིན། །མ་བཟུང་ཕ་ཡུལ་ནགས་ཀྱིས་མི་འཆོར། །མ་ཤོར་རིགས་མཐུན་འདབ་ཆགས་ཁྱུ་མི་འཇིགས། །མ་ཞིག་ཡིད་གཅུགས་བཟའ་ཚོའི་སྡེབ་མི་འཐོར། །མ་འཐོར་འགྲོགས་ཡུན་རིང་བས་ལོ་བཞིན་དགའ། །ཕར་འགྲོ་དཔའ་སྙིང་ཆེ་བས་རྡོག་པ་བརྟན། །གཟན་ལེན་བྱ་བརྒྱའི་ནང་ནས་ཐོབ་སྐལ་མནོག །ཚུར་རྒོལ་ཁང་ཟོན་རྣོ་བས་གླག་རྙེད་དཀའ། །བྱ་བརྒྱ་ཇག་ཉེས་བྱུང་ཡང་རང་མགོ་ཐོན། །མི་སེམས་གཡེངས་དང་མང་སྣང་འུར་བ་སོགས། །གཞན་བློའི་གླགས་ཤེས་ལས་ཀྱི་དུས་ཤེས་ཤིང༌། །རྐུན་གབ་མཁས་འཕྲོགས་ན་འཇབ་མཁས་པའི། །རྣམ་དཔྱོད་རང་ན་དྲོ་བ་ཁྭ་ལ་ཡོད། །མི་དགོས་གཟུགས་ལྡེམས་ངག་སྙན་སྒྲོས་མི་བཏོད། །ཤུགས་འབྱུང་ལྷུག་པར་སྡོད་པས་
རང་བཞིན་དྲང༌། །དགོས་ངེས་རང་དོན་སྒྲུབ་ལ་བློ་རྩེ་འཁྱུག །འཛུར་དང་སྐོར་བའི་ཐབས་མཁས་སྨུག་ལྟར་ལྡེམས། །སྲེད་ལྡན་ཡིད་ཀྱི་སྐོམ་པ་མི་སེལ་བཞིན། །ངལ་མེད་ཅ་ཅོ་ཟེར་བའི་རོལ་མོའི་ཤིང༌། །ངོ་ཚ་སྤང་བ་དེ་དག་ལྷ་ཡུལ་ན། །ད་དུང་རང་གི་རྒྱགས་པ་ཉིན་བཞིན་འཕེལ། །འཕྲལ་དགའ་སྣང་བ་འདྲིད་པའི་པི་ཝཾ་དང༌། །ཟོལ་མེད་རྒན་ཉམས་ཆགས་པ་ཁྭ་ཏའི་སྐད། །མགོ་ཡང་བྱིས་པའི་རྣ་བར་སྔ་མ་སྟེ། །ཡུལ་གྱི་ཉེས་དམིགས་རིག་པ་ཕྱི་མ་འཐད། །དེ་ཕྱིར་ཁྭ་ཏ་ཡོག་མགོས་འདེད་མི་དགོས། །བཟླས་ཚིག་ཡེ་གེས་དྲུག་མ་ཡོད་བཞིན་དུ། །དོན་མེད་འཆལ་གཏམ་སྨྲ་ལ་དགའ་བའི་ཁ། །བསྲུང་ན་ཡོག་མགོ་ཟུང་ལ་འདི་གཅིག་སྲུངས། །ཡ་གི་སྐྱེ་མཆེད་མུ་བཞིའི་གདུགས་རྩེ་ནས། །མ་གི་མནར་མེད་དམྱལ་བའི་གདན་མཐའ་ཡན། །འཁོར་བ་སྡུག་བསྔལ་ཕུང་པོའི་རང་བཞིན་ཏེ། །སྐྱག་ཟན་ཁྭ་ཏའི་ལུས་ལ་སྨོན་རྒྱུ་ཅི། །འོན་ཀྱང་དགོས་ངེས་འཇིག་རྟེན་ཕྱི་མའི་རྒྱགས། །རང་སྐལ་སེན་རྩེ་གང་ཡང་མི་འཁྱེར་བར། །དོན་ཆུང་འཇིག་རྟེན་ཚེ་འདིའི་འཚོ་ཐབས་ལ། །དཔའ་རྒོད་སུ་ལྷག་བལྟ་བས་ཆོག་སྙམ་པ། །རང་དང་གཞན་གྱི་ཁྲོད་ན་མང་མཐོང་ཞིང༌། །དེ་ལྟར་བྱས་ན་ནག་ཆུང་ཡོག་མགོ་ཡང༌། །སྤྱང་གླང་སྐྱེས་བུའི་མཐུ་རྩལ་མི་དམན་པར། །རིག་ནས་འཇིགས་མེད་གདོལ་བ་དེ་ཡིས་བྲིས། །ཧ་ཧ་ཧ། །དགེའོ། །དགེའོ། །དགེའོ།། ༈ །།སྔོན་ཆད་
དྲིན་གྱིས་བསྐྱངས་པའི་མ་རྒན། །ཀུན་འབྱུང་ལས་ཉོན་བཙན་པོའི་ཁྲིམས་ཀྱིས། །ངན་འགྲོའི་གཡང་ལ་དབང་མེད་བསྐྱུར་བས། །མཆོག་གསུམ་བླ་མའི་སྐྱབས་ཞབས་མ་ཆུང༌། །ཡུན་རིང་འགྲོགས་པའི་ཨ་མ་རྒན་མོ། །མཐུ་ཆེན་སྡིག་པའི་ལས་དབང་བཙན་པོས། །གཏི་མུག་བྱོལ་སོང་གནས་ལ་བོར་བས། །དམ་ཆོས་བསྒྲུབ་པའི་སྐལ་བ་ཆད་སོང༌། །དྲིན་ཆེན་ཨ་མ་འཁོར་མེད་དྲིན་ཆེན། །མི་བཟད་ལས་ངན་སྙིང་རྗེ་མེད་པས། །མྱ་ངན་གཡང་ལ་ལྟོས་མེད་བོར་བས། །དགའ་སྐྱིད་བདེ་བའི་ནོར་དང་ཕྲལ་སོང༌། །ནུ་ཞོས་གསོས་པའི་ཨ་མ་རྒན་མོ། །ཤ་ཚ་མེད་པའི་ལས་རླུང་ངར་མས། །ཉམ་ཐག་དུད་འགྲོའི་གཡང་ལ་བསྐྱུར་བས། །ཐར་ལམ་སྒྲུབ་པའི་རྟེན་དུ་མ་གྱུར། །བདག་གི་མ་གཅིག་བརྩེ་ལྡན་རྒན་མོ། །བརྩེ་བྲལ་ཉེས་མང་ལས་ཀྱི་ཞགས་པས། །ངན་སོང་གཡང་ལ་དབང་མེད་འཁོར་བས། །ཚོགས་མཆོག་འདུས་པའི་གྲལ་དུ་མ་སླེབས། །ཀྱེ་མ་ཀྱི་ཧུད་མི་བཟད་ལས་ངན། ཁྱོད་ལ་ཨ་མས་ཅི་ཞིག་ཉེས་ཨང༌། །ཨ་མ་རྒན་མོ་ངན་འགྲོར་འཕེན་པའི། །སྡུག་ཡུས་ཅི་ཞིག་ཁྱོད་ལ་ཡོད་ཨང༌། །ཀྱེ་མ་ཀྱི་ཧུད་དྲིན་ལན་འཁོར་མེད། །ཨ་མ་རྒན་མོའི་ལས་བསྐོས་འདི་ཅི། །ཀྱི་ཧུད་སྲས་བཅས་རྒྱལ་བས་ཨེ་གཟིགས། །ཨ་མའི་ཉམས་མྱོང་མྱ་ངན་འདི་ཅི། །བདེ་ལེགས་བྱེ་བས་སྟོང་ཁམས་ཁྱབ་ཀྱང༌། །འཕགས་ཞལ་བལྟ་བའི་སྐལ་བ་མི་འདུག། དམ་ཆོས་རིན་ཆེན་ཐང་མ་
བརྡལ་ཡང༌། །སྡོམ་གསུམ་བསླབ་པའི་རྟེན་དུ་མི་རུང༌། །འཕགས་ཚོགས་འདུས་པ་སྐར་ལྟར་བཀྲ་ཡང༌། །འཕགས་པའི་གྲལ་ན་སྡོད་དུ་མི་དབང༌། །ཀྱེ་མ་ཀྱི་ཧུད་ཀྱེ་མ་མ་ལ། །བརྩེ་བའི་འགྲོགས་པའི་ཨ་མ་སྙིང་སྡུག །ལྷ་བས་ལྷག་པའི་ལུས་རྟེན་མིན་ཡང༌། །ལྷ་དང་ལྷ་མིན་གནས་རིས་ཙམ་དུ། །སྡོད་དུ་མི་སྟེར་སྐལ་ངན་འདི་ཅི། །ནམ་མཁར་འཕུར་བའི་སྒྲོ་གཤོག་གདའ་སྟེ། །ཐབས་དང་ཤེས་རབ་འདབ་མ་མི་གདའ། །ཡིད་དབང་འགུགས་པའི་སྐད་སྙན་གདའ་སྟེ། །ལེགས་པར་སྨྲ་བའི་ངག་སྙན་མི་གདའ། །ཤིང་ལོའི་བསིལ་གྲིབ་འདུག་པར་གདའ་སྟེ། །འཕགས་ལམ་མཆོག་གི་གྲིབ་བསིལ་མི་གདའ། །རྒྱང་གླུ་ལེན་པའི་སྨྲ་ལྕེ་གདའ་སྟེ། །ཟབ་དོན་མྱོང་བའི་རོ་འཛིན་མི་གདའ། །ཟན་རྒུམ་འཐུ་བའི་མཆུ་སྒྲོས་གདའ་སྟེ། །ལེགས་ལམ་སྡུད་པའི་སྤོབས་པ་མི་གདའ། །གོམ་འགྲོས་བསྒྱུར་བའི་རྐང་པ་གདའ་སྟེ། །ཐར་པར་འགྲོ་བའི་བློ་མཆོག་མི་གདའ། །འགྲོགས་པའི་གྲོགས་ལ་བྱོལ་སོང་འདབ་ཆགས། །བཟའ་བའི་ཟས་ལ་སྲིན་བུའི་ཤ་ཁྲག །བཏུང་བའི་སྐོམ་ལ་འདམ་ཆུ་རྙོག་ཅན། །སྤྱོད་པའི་ལས་ལ་སྲོག་གཅོད་སྡིག་ཆེན། །བསགས་པའི་ནོར་ལ་ཀུན་རྨོངས་གཏི་མུག །བསམ་པའི་སེམས་ལ་ཉོན་མོངས་འཐིབས་འཐིབས། །རྐང་གཉིས་མི་དང་འབྲེལ་གཏམ་མི་འོང༌། །གཉེན་མེད་བཤེས་མེད་ཨ་མ་སྡུག་གོ །ཞིམ་པའི་བཟའ་བཏུང་ཁ་ལ་མི་
འགོ །འཚོ་བ་མེད་པའི་ཨ་མ་སྡུག་གོ །དགེ་སྡིག་ལས་ལ་སྤང་བླང་མི་ཤེས། །བློ་མཐུ་མེད་པའི་ཨ་མ་སྡུག་གོ །དམ་པའི་ལྷ་ཆོས་བསྒྲུབ་ཏུ་མི་ཤེས། །འཆི་ཆོས་མེད་པའི་ཨ་མ་སྡུག་གོ །དཀོན་མཆོག་མཚན་སྙན་རྣ་བར་མ་གྲགས། །དཔུང་གཉེན་མེད་པའི་ཨ་མ་སྡུག་གོ །སྔོན་ཆད་དྲིན་ཆེན་ཨ་མ་རྒན་མོ། །ད་ལྟ་སྐྱོ་གྲོགས་བྱེའུ་ངག་སྙན། །གྲངས་མེད་བསྐལ་པ་བརྒྱ་སྟོང་བྱེ་བར། ཁྱེད་དང་ང་གཉིས་མ་བུར་གྱུར་མོད། །བུ་སྡུག་འཇིགས་མེད་བསྟན་པའི་རྒྱལ་མཚན། །ད་ལྟ་གཞན་ཕན་ཁ་ཉམ་ཆུང་ཡང༌། །སྙིང་ལ་སྙིང་སྟོབས་གོ་ཆ་བགོས་ནས། །ནམ་ཞིག་རྣམ་གྲོལ་གཏན་བདེར་ཁྲིད་དོ། །དེ་སྐད་གཞོན་ཆུང་མྱ་ངན་སྨྱོ་གླུ། །གང་འདི་འཇམ་དཔལ་གཞོན་ནུའི་ཁང་བཟང༌། །ཟླ་གཞོན་སྣང་བ་སྟོང་ལྡན་ཆེན་པོར། །ཡི་གེའི་ལམ་ནས་གསལ་བར་བྱས་སོ། །ཞེས་པའང་འཇིགས་མེད་བསྟན་པའི་རྒྱལ་མཚན་དབེན་གནས་གཤིན་རྗེའི་ཕུག་པར་གནས་ཚེ་བྱེའུ་ཁ་ལ་ཁ་འདྲ་ཞིག་མཐོང་ཚེ་ཉམས་མཚར་དུ་བྲིས་པའོ།། ༈ །།ཤར་ཉི་མ་སེར་པོའི་མངའ་ཞབས་ན། །ལུས་ལང་ཚོ་དར་བབ་པདྨོ་མཆོག །དགུང་ཟླ་བ་གཞོན་ནུའི་ཐོད་ཆིངས་ཤིག །འདོགས་འདོད་ན་སྨྱོ་གུ་ཚིག་གསུམ་ཉོན། །ཧ་རཱ་ཨི་ཨཾ་ཨཱཿ སྐད་མཐོན་པོ་འཁར་བའི་རྔ་ཀོར་ཡིན། །དབྱངས་གདངས་དང་ང་ཞེས་ཟེར་མོད་དེ། །སེམས་འཕྲེང་བའི་གླུ་གསུམ་མི་འཐེན་ན། །ཡིད་སྐྱོ་བའི་ཉམས་ལ་སང་དུས་མེད། །ཧ་རི་ཨཱི་ཨཾ་ཨཱཿ འབུ་བུང་བའི་གཤོགས་རླུང་ཟི་ཟི་བོ། །སྐྱིད་
མེ་ཏོག་ཚལ་ན་སྙན་སྐད་དེ། །སྡུག་བ་མོའི་གཉའ་ཤིང་འཁོར་བ་ན། །ཚེ་ཕྱི་མའི་དུང་ཁར་རྐང་པ་འཇོག །ཧ་ར་ཨཱ་ཨཾཨཱཿ བྱ་འཇོལ་མོའི་གྲེ་ལྕེ་བདེ་ལགས་ན། །མ་ལྷོ་མོན་ནགས་མའི་ཁུ་བྱུག་དེ། །སྙིང་བྱམས་པའི་ཤུགས་ཀྱིས་དྲན་དྲན་ཡང༌། །ཞལ་མཐོང་བ་མེད་པས་སྣང་ཤེས་སྐྱོ། །ཧ་ར་ཨཱ་ཨཾ་ཨཿ ཡུམ་སྙིང་ལ་སྡུག་པའི་མིའམ་ཅི། །གླུ་པི་ཝཾ་ལེན་པས་ཅི་སྐྱོ་སྟེ། །མ་སྐུ་དྲིན་ཆེ་ཞེས་མི་བརྗོད་ན། །བུ་བདུད་དུ་འབབས་པའི་ནམ་ཟླ་ཡོད། །ཧ་ར་ཨཱིཿཨཾ་ཨ། །བྲག་ཤེལ་དཀར་མཆོད་རྟེན་བཟང་ལེགས་ཏེ། །གླུ་བྲག་ཆ་བླང་བ་རྫུན་དུ་ཆེ། །མི་རྣམ་དཔྱོད་ཅན་གྱིས་བལྟས་ཙ་ན། །རྩ་སོག་མ་བུས་པའི་ཐལ་བ་ཙམ། །དྷཾ་དི་དི་དི་དི་དི་དི་དི། །དྷཾ་དི་དི་དི་དི་དི། །དྷཾ་དི་དི་དི། དྷཾ་དྷཾ་དྷཾ། དྷཾ་དྷཾ་དྷཾ། ཨི་ཨི་ཨཱི། ཞེས་ཟད་མི་ཤེས་པའི་སྙན་འགྱུར་ཀ་མ་ལའི་གདངས་ལས་དྲངས་སོ། །དེའང་ཚིགས་བཅད་དང་པོས་ཉན་པར་བསྐུལ་ཞིང་དགོས་འབྲེལ་བཤད། གཉིས་པས་བཤེས་གཉེན་བསྟེན་པ་སྟེ། །གང་གི་དོན་དུ་བསྟེན་པའི་དགོས་ཆེད། །གང་བསྟེན་བྱའི་མཚན་ཉིད་བཤད། །གསུམ་པས་མི་རྟག་པ་དང་དེའི་ས་ཁོངས་ཚེ་འདི་བློས་བཏང་རྫོགས་པར་བཤད། བཞི་པས་སྐྱབས་འགྲོའི་རྒྱུ་མཚན་དང་སྐྱབས་འགྲོ་དངོས་བསྟན། ལྔ་པས་སྙིང་རྗེ་ཆེན་པོ་སྒོམ་ལུགས་བསྟན། །དྲུག་པས་རྟེན་འབྲེལ་གྱི་རྟགས་ཀྱིས་སྟོང་ཉིད་ལ་འཇུག་ཚུལ་བཤད་དོ། །དགེ་ཞིང་བཀྲ་ཤིས།། ༈ །།
ཁར་སང་ཟླ་བ་སྔ་མ་ལ། །ས་སྣུམ་གཤེར་བདུད་རྩིའི་ལང་ཚོ་ཅན། །རྩ་མཆོག་ལྗང་ལོ་འཁྲིལ་བས་ཁྱབ། །རྒྱན་མེ་ཏོག་བཀྲ་བའི་དོ་ཤལ་གྱོན། །དེང་སང་གཟིམ་དངས་ཉམས་ནས་གདའ། །བྱ་མཐོང་ན་དགའ་བའི་ཁུ་བྱུག་ཁྱུ། །དབྱར་གྱི་སྤྲིང་ཡིག་ཀློག་ཅིང་གྲགས། །སྤྲིན་ཚོན་པོ་མཐོང་ནས་སྙན་པར་འགོད། །ད་ལྟ་མོན་ཡུལ་འཕུར་ནས་སོང༌། །བཅུད་སྦྲང་རྩི་རྒྱས་པའི་མེ་ཏོག་ཚལ། །མཐོང་ནས་ཡིད་དགའ་བུང་བའི་ཚོགས། །དབྱངས་རབ་གསལ་རྒྱུད་མངས་ལེན་འདྲ་དེ། །ད་ལྟ་སྨྲེ་སྔགས་ལྡབ་ལྡིབ་འདོན། །ཤིང་སྔོ་ལྗང་ལོ་མའི་ཁུར་བ་ཅན། །ཉིན་བཞིན་མེ་ཏོག་གསར་པ་བཀོད། །རླུང་སྨན་དྲིས་ཕྱོགས་ཀུན་འགེང་བདེ། །ད་ལྟ་ཤིང་ལོ་དམར་པོ་བྲུལ། །ཆུ་ཀླུང་ཆེན་སྤྲིན་ཆར་ཕྱུག་པོའི་གསོས། །ཆུ་བྲན་དུ་མའི་འཁོར་གྱིས་དྲེགས། །རླབས་ནམ་མཁར་ལྡིང་ཞིང་རྩེ་བ་ཡང༌། །ད་ལྟ་ཉིན་རེ་སོང་ཞིང་འཁུམ། །ཕྱི་དབྱར་གྱི་ལྟད་མོས་མིག་བྲིད་ནས། །དགེ་སྦྱོར་རླུང་ལ་བསྐུར་བ་ཁྱོད། །དུས་ད་ལྟ་སྐྱི་སེར་གྲང་བའི་ནང༌། །བྱ་བཟུང་ལག་པ་སྟོང་པར་འདུས། །ནོར་ལོངས་སྤྱོད་ཉེ་དུ་མཛའ་བཤེས་ཀྱིས། །མགོ་རྨོངས་སྡིག་གི་ཁོལ་པོ་རྣམས། །དཔེ་འདི་བཞིན་འཇིག་རྟེན་ཕ་རོལ་ཏུ། །གཅིག་པུར་འགྲོ་ཚེ་ཤེས་པ་སྐྱེ། །གཞོན་སོ་དཀར་དུས་ཀྱི་སྣང་བ་ཀུན། །རིམ་གྱིས་དྲན་ཡུལ་ཙམ་དུ་སོང༌། །རྒན་སྐྲ་དཀར་འཆི་བའི་ཕོ་ཉ་རུ། །སྔར་ནས་སླེབས་ཏེ་ད་གཟོད་སྐྱོ། །སྔར་ན་གཞོན་སེམས་ཤེད་རྒྱས་པའི་དུས། །སྐྱོ་ཤས་
སྐྱེས་ན་དོན་ཆེན་འགྲུབ། །ད་སྟོབས་ཉམས་དབང་པོ་འགྲིབ་པའི་ཚེ། །སྐྱོ་ཡང་རང་སེམས་ངལ་བར་ཟད། །དེ་འོན་ཀྱང་ངན་འགྲོའི་རྟེན་བསམ་ཆེ། །ད་དུང་ཐབས་མེད་ནུས་མེད་མིན། །ལྷ་མཆོག་གསུམ་ཐུགས་རྗེའི་བྱིན་རླབས་ཀྱིས། །ཚེ་མཇུག་ཆོས་ལ་འདྲིལ་བར་ཤོག། །།